Day2

དེ་རིང་ཟླ་ ༩ ཚེས་ ༡༩ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ནང་ལ་ལོ་ངོ་བཞི་བཅུ་ལྷག་ཕྱག་ལས་གནང་མྱོང་ཡོད་པ་ད་ལྟའི་ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་མང་མོས་ཐོག་འོས་འདེམས་གནང་སོང་། བཙན་བྱོལ་བོད་མིའི་བཅའ་ཁྲིམས་ལེའུ་ ༦ དོན་ཚན་ ༦༣ ནང་གསེས་དང་པོའི་དགོངས་དོན་ལྟར། ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་སྤྱི་འཐུས་ལྷན་ཁང་གི་ཚོགས་གཙོ་སྦྲེལ་པོ་མཆོག དེ་བཞིན་སྲིད་སྐྱོང་མཆོག་བཅས་ནས་ཁྲིམས་ཞིབ་པ་ཆེ་བ་ཟུར་པ་བྱ་དུར་བསོད་ནམས་བཟང་པོ་ལགས་དང་། བཀའ་ཟུར་ཚེ་རིང་ཕུན་ཚོགས་མཆོག དབུས་འོས་བསྡུ་སྤྱི་ཁྱབ་འགན་འཛིན་ཟུར་པ་འཇམ་དཔལ་ཆོས་བཟང་ལགས་བཅས་ལས་གྲུབ་པའི་འོས་མི་འདེམས་སྒྲུག་ཚོགས་ཆུང་ཞིག་ཆེད་འཛུགས་གནང་དོན་ལྟར། དེ་རིང་གྲོས་ཚོགས་སུ་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་དང་ཆོས་རིག་དྲུང་འཕར་ཀརྨ་དགྲ་འདུལ་ལགས་རྣམ་གཉིས་ཁྲིམས་ཞིབ་པ་གཞན་གཅིག་གི་འོས་མིག་ཏུ་མཚན་འདོན་གནང་ཡོད་པ་རེད། དེ་རིང་གྲོས་ཚོགས་སུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་གི་ཆེད་དུ་ངོ་ཡོད་སྤྱི་འཐུས་ ༤༣ རྣམས་ཀྱིས་འོས་ཤོག་འཕེན་པའི་ཁྲོད་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་ ༢༡ དང་ཆོས་རིག་དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དེ་བཞིན་རྩིས་མེད་སོང་བའི་གྲངས་ ༡ བཅས་བྱུང་སྟབས་ངོ་ཡོད་སྤྱི་འཐུས་ལས་དགོས་ངེས་འོས་གྲངས་མ་ཚང་བར་བརྟེན་ཚོགས་གཙོ་མཆོག་གིས་དེ་འབྲེལ་ལས་རིམ་རེ་ཞིག་འཕར་འགྱངས་དང་བསྐྱར་དུ་འོས་འཕང་རྒྱུའི་གསལ་བསྒྲགས་བསྐྱངས་ཡོད་པ་རེད། གྲོས་ཚོགས་སུ་སླར་ཡང་འོས་འཕངས་པ་ལས་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་...

ཁ་སང་དང་དེ་རིང་ཉིན་རྒྱབ་བར་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ལས་བསྡོམས་སྐོར་བགྲོ་གླེང་གནང་སྐབས། དགེ་བཤེས་མའི་བསླབ་མཐར་དང་པོ་སོན་མཁན་བཙུན་མ་ཉི་ཤུའི་ཁྲོད་ནས་ཇི་ཙམ་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དུ་བསྐོ་གཞག་གནང་མིན་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་དགེ་བཤེས་མའི་གནས་བབ་སྤྱི་ཡོངས་སྐོར་འདྲི་རྩད་གནང་སོང་། ཁ་སང་ཉིན་རྒྱབ་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་གཏན་འབེབས་གནང་གྲུབ་རྗེས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ཕྱི་ལོ་ ༢༠༡༧ ཟླ་ ༤ ཚེས་ ༡ ནས་འདི་ལོ་ཕྱི་ཟླ་ ༣ ཚེས་ ༣༡ བར་༸རྒྱལ་བའི་༸སྐུ་ཕྱཱ་དང་བསྟན་སྲིད་ཞབས་རིམ་སོགས་ཆོས་ཕྱོགས་ཀྱི་ལས་དོན་དང་གྲྭ་བཙུན་སྔགས་འཆང་གསུམ་ལ་མཐུན་རྐྱེན་སྦྱོར་སྤྲོད་སྐོར། སློབ་ཁག་གི་དགེ་རྒན་ཚོའི་གསོལ་ཕོགས་དང་བདེ་དོན། དེ་བཞིན་གཞུང་ཆེན་རིགས་གཅིག་རྐང་འཛིན་དང་དགེ་བཤེས་མའི་ལས་རིམ། སྤྱི་ཚོགས་ནང་ཆོས་རིག་ངོ་སྤྲོད་དང་ཟབ་སྦྱོང་གནང་ལུགས་བཅས་ཀྱི་ཐོག་ནས་ལོ་འཁོར་ལས་བསྡོམས་འགོད་འབུལ་གནང་ཡོད་པ་རེད། དེ་རིང་ཆོས་རིག་ལས་ཁུངས་ཀྱི་ལས་བསྡོམས་ཐོག་གྲོས་ཚོགས་འཐུས་མི་རྣམས་ནས་མུ་མཐུད་བགྲོ་གླེང་དང་དྲི་བ་དྲིས་ལན་བཅས་གནང་སྐབས་སྤྱི་འཐུས་ཁག་ཅིག་གིས་དགེ་བཤེས་མའི་ལས་རིམ་དེའི་ནང་ཆ་ཤས་བླངས་མཁན་བཙུན་མའི་ཞལ་གྲངས་དེ་ལོ་རེ་བཞིན་ཇེ་ཉུང་དུ་འགྲོ་བཞིན་པའི་གནས་སྟངས་ཐད་སེམས་འཚབ་ཀྱིས་ཆོས་རིག་ལས་ཁུངས་ནས་གནད་དོན་དེའི་ཐོག་གང་གནང་ཡོད་མེད་དང་ཐེངས་དང་པོའི་དགེ་བཤེས་མ་ཉི་ཤུའི་ཁྲོད་ནས་ཇི་ཙམ་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དུ་བསྐོ་གཞག་གནང་མིན་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་དགེ་བཤེས་མའི་གནས་བབ་སྤྱི་ཡོངས་སྐོར་འདྲི་རྩད་གནང་སོང་། དེ་བཞིན་སྤྱི་འཐུས་གཅིག་གིས་བགྲོ་གླེང་དེའི་ཐོག་ཆ་ཤས་བཞེས་པར་དེ་སྔ་ཆོས་རིག་ལས་ཁུངས་ཀྱིས་ཕྱི་ལོ་ ༢༠༡༣ ལོར་གཞུང་ཆེན་རིགས་གཅིག་རྐང་འཛིན་གྱི་སློབ་ཡོན་ལས་རིམ་ཞིག་གསར་གཏོད་ལག་བསྟར་གྱིས་ལོ་རེ་བཞིན་སློབ་གཉེར་བ་ཁག་གི་གྲངས་ཚད་ངེས་ཅན་ཞིག་བསྡུ་རུབ་གནང་རྒྱུ་ཡིན་ཞེས་གསུངས་ཡོད་ཀྱང་། སྐབས་དང་པོ་ལས་གཉིས་པའི་སློབ་གཉེར་བའི་གྲངས་འབོར་དེ་ཉུང་དུ་ཕྱིན་ཡོད་པ་དང་དེ་རྗེས་ལོ་ཁ་ཤས་རིང་དེའི་སྐོར་གནས་ཚུལ་གང་ཡང་གོ་ཐོས་མེད་པར་གྱུར་དགོས་དོན་སྐོར་བཀའ་འདྲི་ཞུས་པར་བཀའ་བློན་མཆོག་གིས་ལས་འཆར་དེ་ནི་གཙོ་བོ་༸གོང་ས་མཆོག་གི་བཀའ་སློབ་ཕེབས་དགོངས་ལྟར་རིན་ཐང་ཆེ་བར་ངོས་འཛིན་ཞུས་པའི་ཐོག་སྐབས་དེའི་ཆོས་རིག་ལས་ཁུངས་ནས་ལས་གཞི་དེ་དབུ་འཛུགས་གནང་བ་དང་ཕྱིས་སུ་འགྲོ་གྲོན་གྱི་ཆ་ནས་དཀའ་ངལ་གང་ཙམ་འཕྲད་རྐྱེན་ལས་གཞི་དེ་གནས་སྐབས་ཚོད་ལྟའི་ཚུལ་དུ་ཐེངས་གཉིས་གོ་སྒྲིག་ཞུས་ཡོད་ཀྱང་ཐོག་མའི་ཞལ་གྲངས་ལས་ཉུང་དུ་ཕྱིན་ཡོད་པ་དེ་ནི་གཙོ་བོ་གཞུང་ཆེན་རིགས་གཅིག་རྐང་འཛིན་གྱི་སློབ་གཉེར་གནང་མཁན་རྣམས་རང་ཉིད་ཁུངས་གང་ནས་ཡིན་པ་དེའི་ལས་གནས་ཁག་ཏུ་བསྐོ་གཞག་བྱུང་རྐྱེན་ལས་རིམ་དེ་ནས་ཕྱིར་ཐོན་གནང་གི་ཡོད་པ་སོགས་གསལ་བཤད་གནང་སོང་། སྤྱི་འཐུས་གཅིག་གིས་ད་ཆ་༸གོང་ས་༸སྐྱབས་མགོན་ཆེན་པོ་མཆོག་གི་དགུང་ལོའི་བབ་ཀྱི་ཆ་ནས་ངེས་པར་དུ་༸གང་ཉིད་མཆོག་གི་མཛད་འཆར་ཁག་ཉུང་འཕྲི་དགོས་པའི་ཚོར་ཤུགས་ཆེན་པོས་གསུངས་སོང་བར་བཀའ་བློན་མཆོག་གིས་བཀའ་ལན་གནང་ཡོད། དེ་རིང་ཆོས་རིག་གི་ལས་བསྡོམས་ཐོག་༸དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་གནད་དོན་སྐོར་ལའང་དྲི་བ་ཞིག་ཕེབས་ཡོད་པ་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་ལན་འདེབས་གསལ་བཤད་གནང་སོང་བའི་ནང་འཛིན་སྐྱོང་བཀའ་ཤག་ནས་ད་བར་རིན་པོ་ཆེ་མཆོག་གི་༸སྐུའི་ཕྱྭའི་གནད་དོན་ཐད་ཐུགས་འཁུར་ཆེ་བཞེས་ཀྱིས་མཐུན་འགྱུར་གང་ཐུབ་ཞུས་བཞིན་ཡོད་པ་དང་ལྷག་དོན་རྒྱ་གར་གཞུང་ནས་རིན་པོ་ཆེ་མཆོག་རྒྱ་གར་ལ་ཕྱིར་ཕེབས་གནང་རྒྱུར་བཀག་སྡོམ་རྩ་བ་ནས་གནང་མེད་པ་མ་ཟད། ཕྱི་ལོ་ ༢༠༡༡ ནས་ད་བར་རིན་པོ་ཆེའི་གནས་སྟངས་ལ་ཡར་རྒྱས་གང་ཙམ་ཕྱིན་ཡོད་སྐོར་སོགས་གསལ་བཤད་གནང་སྟེ་རིན་པོ་ཆེ་མཆོག་རིང་མིན་ཕྱི་ཟླ་ ༡༡ ནང་བཞུགས་སྒར་དུ་བླ་ཆེན་ཁག་གི་ཚོགས་འདུ་ཐོག་ཆིབས་བསྒྱུར་བསྐྱང་རྒྱུའི་ཐུགས་རེ་ཡོད་ཅེས་བཀའ་གནང་བ་བཞིན་དེ་ལྟར་ངོས་འཛིན་གནང་བཞིན་ཡོད་པ་གསུངས་སོང་། གཞི་རྩའི་དེ་རིང་ཆོས་རིག་ལས་ཁུངས་ཀྱི་ལས་བསྡོམས་དང་འབྲེལ་བའི་བགྲོ་གླེང་དེའི་ཁྲོད་སྤྱི་འཐུས་འགའ་ཞིག་གིས་ཆོས་རིག་ལས་ཁུངས་ཀྱི་ནང་ཆོས་ངོ་སྤྲོད་ལས་དོན་དང་འབྲེལ། བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་གང་འདྲ་འགྲོ་མིན་དང་།...

བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་མཆོག་གིས་སྒྲིག་འཛུགས་ཀྱི་མ་དངུལ་གནས་སྟངས་དེ་སྔ་ལས་ཡག་ཏུ་ཕྱིན་ཡོད་པ་གསུངས་སོང་། དེ་རིང་ཉིན་རྒྱབ་གྲོས་ཚོགས་ཀྱི་ཚོགས་དུས་ཐོག་གྲོས་ཚོགས་སུ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་མཆོག་གིས་རྩིས་ལོ་ ༢༠༡༨ དང་ ༡༩ ལོའི་སྔོན་རྩིས་གསུང་བཤད་དང་སྔོན་རྩིས་ཚོད་དཔག་འཆར་རྩིས་ཚོགས་ཆུང་ནས་སྙན་ཐོ་སྙན་སྒྲོན་ཟིན་ཐོག་སྤྱི་ཡོངས་ཀྱི་ཐད་ལ་བགྲོ་གླེང་གནང་སོང་བ་དང། སྐབས་དེར་སྤྱི་འཐུས་ཁག་ཅིག་ནས་བཙན་བྱོལ་བོད་མིའི་སྒྲིག་འཛུགས་ཀྱི་ལོ་རེའི་སྔོན་རྩིས་དངུལ་འབོར་འཕར་བཞིན་ཡོད་པ་དང་དེ་བཞིན་འདི་ལོའི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོའི་ནང་བོད་མིའི་སྒྲིག་འཛུགས་ཀྱི་མ་དངུལ་གནས་བབས་ཛ་དྲག་ཏུ་འགྱུར་ཉེན་ཡོད་པ་གསལ་བཏོན་ལུང་འདྲེན་དང་འབྲེལ། ད་ལྟའི་ཆར་བཙན་བྱོལ་བོད་མིའི་སྒྲིག་འཛུགས་ཀྱི་མ་དངུལ་གནས་སྟངས་དེ་ལོ་རེར་འཁྱོལ་བ་མ་གཏོགས་ཕུགས་འཁྱེལ་བ་ཞིག་མེད་པ་གསུང་མཁན་བྱུང་བ་མ་ཟད། གནས་སྟངས་དེ་འདྲའི་ཐོག་མ་འོངས་པར་གཏན་འཇགས་མ་དངུལ་ཐོག་ཡར་རྒྱས་གཏོང་ཕྱོགས་ཐད་ལ་འཆར་གཞི་གང་ཡོད་མེད་སོགས་དང་འབྲེལའཛིན་སྐྱོང་བཀའ་ཤག་ལ་དྲི་བ་ཕུལ་ཡོད། རྩ་བའི་ཁ་སང་གྲོས་ཚོགས་ཀྱི་ལས་ཉིན་དང་པོའི་ཐོག་དཔལ་འབྱོར་བཀའ་བློན་མཆོག་གིས་གསུང་བཤད་གྲུབ་རྗེས་བོད་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གིས་སྙན་ཐོ་སྙན་སྒྲོན་གནང་སྐབས་བོད་མིའི་སྒྲིག་འཛུགས་ཀྱི་མ་དངུལ་གནས་སྟངས་སྐོར་དང་འབྲེལ། སྤྱི་ཡོངས་མ་དངུལ་གནས་བབས་ཧིན་སྒོར་ས་ཡ་ ༧༠༠ ཟིན་ཡོད་ཐོག་ལོ་ལྟར་འཕར་བཞིན་ཡོད་པ་དེ་ལྟར་ཡང། ལས་ཁུངས་སོ་སོའི་མ་དངུལ་ལ་བལྟས་ཚེ་ད་ལྟའི་གནས་སྟངས་བཞིན་འགྲོ་ན་རྩིས་ལོ་ ༣ ལས་ལྷག་མི་འདང་བ་དང། ལྷག་པར་དུ་ལས་ཁུངས་རེ་ཟུང་གི་རོགས་དངུལ་བྱེ་བྲག་པ་ཁ་ཤས་རྩ་ཆད་འགྱུར་ཚེ་རྩིས་ལོ་གཅིག་ཀྱང་འཁྱོལ་ཁག་པོ་ཡིན་པར་བརྟེན་འབྲེལ་ཡོད་རྣམས་ནས་ཐུགས་འཚབ་ཀྱང་གནང་བཞིན་ཡོད་པ་གསུངས་ཡོད། དེ་རིང་གྲོས་ཚོགས་སུ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བཙན་བྱོལ་བོད་མིའི་སྒྲིག་འཛུགས་ཀྱི་མ་དངུལ་གནས་སྟངས་དེ་སྔ་ལས་ཡག་ཏུ་ཕྱིན་ཡོད་པ་དང་། མ་འོངས་པར་དཔལ་འབྱོར་གྱི་གནས་བབས་ཡར་རྒྱས་འགྲོ་ཕྱིར་འདི་ལོའི་ནང་དུ་བཙན་བྱོལ་བོད་མིའི་སྤྱི་ཚོགས་ནང་གི་འཕྲོད་བསྟེན་དང་དཔལ་འབྱོར། ཤེས་རིག དེ་བཞིན་རིག་གཞུང་དང་འབྲེལ་བའི་ལྔ་དང་ལྔ་བཅུའི་ཚོགས་འདུ་ཆེན་པོ་ཞིག་བསྐོང་ཚོགས་གནང་རྒྱུའི་ལས་འཆར་བང་སྒྲིག་ཡོད་པ་གསུངས་སོང་། གཞན་ཡང་སྤྱི་འཐུས་ཁག་ཅིག་གིས་བོད་མིའི་སྒྲིག་འཛུགས་ཀྱི་མ་དངུལ་ལ་ཕན་པའི་ཆེད་དུ་འཛིན་སྐྱོང་བཀའ་ཤག་ལ་བོད་མིའི་དང་བླངས་དཔྱ་དངུལ་གྱི་དངུལ་འབབ་སྤར་ཆ་གནང་དགོས་པའི་གཞེན་སྐུལ་གནང་བ་དང་། བེུད་ནུས་སྟོབས་གོང་སྤེལ་གྱི་ལས་འཆར། བོད་དོན་ཆབ་སྲིད་ཀྱི་ལས་དོན་དང་འབྲེལ་བའི་སྔོན་རྩིས་ལས་འཆར། ཤེས་ཡོན་དང་འབྲེལ་བའི་ལས་འཆར་སོགས་ཀྱི་སྐོར་ལའང་དོགས་འདྲི་གནང་ཡོད།

དེ་རིང་ཟླ་ ༣ ཚེས་ ༡༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་གཉིས་པའི་ཚོགས་ཐེངས་གཉིས་པའི་ཐོག་བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་སྤྱི་མོས་ཀྱིས་རྒྱབ་སྐྱོར་གནང་ཐོག་གཏན་འབེབས་གནང་སོང་། ཁ་སང་དང་དེ་རིང་བཅས་གྲོས་ཚོགས་སུ་བོད་ནང་གི་ད་ལྟའི་ཛ་དྲག་གནས་སྟངས་དང་འབྲེལ་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གི་ལས་རིམ་གནང་དོན་ལྟར་ཁྱོན་སྤྱི་འཐུས་ ༡༩ ནས་བགྲོ་གླེང་གི་ཆ་ཤས་བཞེས་ཏེ་བཀའ་བསྡུར་ལྷུག་པོ་གནང་ཡོད། སྐབས་དེར་སྤྱི་འཐུས་རྣམས་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་འཆར་ལ་སྤྱི་མོས་ཀྱིས་རྒྱབ་སྐྱོར་ཞུས་ཡོད་པ་དང་འབྲེལ། བཙན་བྱོལ་བོད་མི་ཚོས་ཞལ་ནས་གདུང་སེམས་བསྐྱེད་ཡོད་གཅིག་པོ་གསུངས་བ་ཙམ་མིན་པར་བཙན་བྱོལ་བོད་མི་ནང་ཁུལ་དབར་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མེད་པར་ཆིག་སྒྲིག་གྱི་ནུས་པ་མཉམ་སྤུངས་ཐོག་དོན་དམ་པའི་གདུང་སེམས་མཉམ་བསྐྱེད་གནང་གལ་ཡིན་པ་སོགས་གསུངས་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་སྐབས་དེར་བཀའ་ཤག་གི་ངོས་ནས་ཀྱང་བོད་ནང་གི་ཛ་དྲག་གནས་སྟངས་ཐོག་གི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཐོག་རྒྱབ་སྐྱོར་དང་སྦྲགས། གྲོས་ཆོད་དེ་ལས་འཕྲོས་ནས་ཁ་སང་དང་དེ་རིང་བཅས་སུ་སྤྱི་འཐུས་རེ་ཟུང་ནས་རང་ལུས་མེར་སྲེག་དང་འབྲེལ་བའི་དྲི་བ་ཁག་ཅིག དེ་དང་འབྲེལ་ནས་རྒྱལ་སྤྱིའི་ཁྲོད་ནས་བོད་དོན་ཐོག་གཟིགས་ཕྱོགས་ལ་འགྱུར་བ་ཡོད་མེད་སྐོར་བཀའ་འདྲི་ཞུས་ཡོད་སྟབས། སྲིད་སྐྱོང་མཆོག་གིས་རྒྱལ་སྤྱིའི་ཐོག་ནས་བོད་ནང་གི་ཛ་དྲག་གནས་སྟངས་ཐོག་ཐུགས་འཚབ་དང་བོད་དོན་ལ་རྒྱབ་སྐྱོར་གནང་མུས་ཡིན་པ་གསུངས་ཡོད།  དེ་བཞིན་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དེ་དང་འབྲེལ་ནས་སྤྱི་འཐུས་ཁག་ཅིག་གིས་ཆབ་སྲིད་དང་བོད་མིའི་ཆིག་སྒྲིལ། དེ་བཞིན་ཡིད་ཆས་དང་སེམས་ཤུགས་ཀྱི་ཆ་ནས་ཉམས་རྒུད་དུ་འགྲོ་ཡི་ཡོད་པའི་སྐོར་གསུང་མཁན་བྱུང་ཡོད་པ་དང་འབྲེལ་སྲིད་སྐྱོང་མཆོག་གིས་བཀའ་ཤག་གི་ངོས་འཛིན་གནང་ཕྱོགས་དེ་ལྟར་མིན་པ་གསུངས་སོང་། གཞན་ཡང་གྲོས་ཆོད་གྲོས་འཆར་དེ་དང་འབྲེལ་ཨ་རིའི་སྒོར་མོ་ས་ཡ་གཅིག་དང་ཕྱེད་ཀའི་གནད་དོན་དེའི་རྐྱེན་པས་སྤྱི་ཚོགས་ནང་དུ་འཁྲུག་ཐེབས་ཡོད་པའི་གནད་དོན་སྐོར་གླེང་སློང་བྱུང་ཡོད་སྟབས། སྲིད་སྐྱོང་མཆོག་ནས་བཀའ་ཤག་ནས་ཨ་སྒོར་ས་ཡ་གཅིག་དང་ཕྱེད་ཀའི་གནད་དོན་དེ་གྲོས་ཚོགས་ནས་བཀའ་འཁྲོལ་ཞུས་ཟིན་པ་ཞིག་ཡིན་པ་དང་། སྤྱི་ཚོགས་འཁྲུག་བཞིན་པ་དེ་ནི་མི་རེ་ཟུང་གིས་འགྲེལ་ལོག་གནང་རྐྱེན་ཡིན་པས་བགྲོ་གླེང་དང་གསལ་བཤད་རིམ་པས་ཨ་རིའི་དོན་གཅོད་ཀྱི་སྔོན་རྩིས་སྐབས་གནང་རྒྱུ་ཡིན་པ་སོགས་གསུངས་ཡོད་པ་རེད།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་ཉིན་གཉིས་པའི་ཐོག་ཆོས་རིག་ལས་ཁུངས་ཀྱི་ལས་བསྡོམས་སྐོར་བགྲོ་གླེང་གནང་སྐབས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོའི་གདན་ཐོབ་དང་གསོལ་ཕོགས་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་གནས་ཆུང་ཆོས་རྒྱལ་ཆེན་པོའི་གནད་དོན་སྐོར་ལ་འདྲི་རྩད་གནང་སོང། དེ་ཡང་ཁ་སང་ཉིན་རྒྱབ་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་གཏན་འབེབས་གནང་གྲུབ་རྗེས་བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ཕྱི་ལོ་ ༢༠༡༦ ཟླ་ ༤ ཚེས་ ༡ ནས་འདི་ལོ་ཟླ་ ༣ ཚེས་ ༣༡ བར་༸རྒྱལ་བའི་༸སྐུ་ཕྱྭ་དང་བསྟན་སྲིད་ཞབས་རིམ་སོགས་ཆོས་ཕྱོགས་ཀྱི་ལས་དོན་དང་། གྲྭ་བཙུན་སྔགས་འཆང་གསུམ་ལ་མཐུན་རྐྱེན་སྦྱོར་སྤྲོད་སྐོར། སློབ་ཁག་གི་ལྟ་གྲུབ་དགེ་རྒན་ཚོའི་གསོལ་ཕོགས་དང་བདེ་དོན། སྤྱི་ཚོགས་ནང་ནང་ཆོས་ངོ་སྤྲོད་ལས་དོན་གནང་ལུགས་བཅས་ཀྱི་ཐོག་ནས་ལོ་འཁོར་ལས་བསྡོམས་འདོག་འབུལ་གནང་ཡོད་པ་རེད། དེ་རིང་ཆོས་རིག་ལས་ཁུངས་ཀྱི་ལས་སྡོམས་ཐོག་གྲོས་ཚོགས་འཐུས་མི་རྣམས་ནས་མུ་མཐུད་བགྲོ་གླེང་དང་དྲི་བ་དྲིས་ལན་བཅས་གནང་སྐབས་སྤྱི་འཐུས་ཅིག་གིས་ང་ཚོའི་གཞུང་འདི་ཆོས་སྲིད་ཟུང་འབྲེལ་གྱི་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དགོངས་དོན་ལྟར་ཡིན་པར་ངོས་ལེན་ཞུ་བཞིན་ཡོད་ཀྱང་། ཆོས་སྲིད་གཉིས་ལྡན་གྱི་ཆོས་ཞེས་པ་དེ་གནས་ཆུང་ཆོས་རྒྱལ་ཆེན་པོར་ངོས་འཛིན་ཞུ་བཞིན་པ་དེ་ནོར་འཁྲུལ་ཡིན་པ་དང་དེ་བོད་ཆོལ་ཁ་གསུམ་དང་ཆོས་བརྒྱུད་ཡོངས་ལ་ཁྱབ་པའི་སྐུ་རྟེན་ཞིག་གཏན་ནས་ཆགས་ཀྱི་མེད་ཅེས་ཚོར་ཤུགས་ཆེན་པོས་གསུངས་སོང་། སྐབས་དེར་ཆོས་རིག་བཀའ་བློན་མཆོག་གིས་གསལ་བཤད་ལན་འདེབས་གནང་པར་གཞུང་བསྟེན་དགྲ་ལྷར་གདན་ཐོབ་དང་གསོལ་ཕོགས་ཕུལ་རྒྱུའི་ལམ་སྲོལ་དེ་སྔ་ལམ་ཞིག་ཆགས་ཡོད་པ་དང། ང་ཚོའི་ཆོས་སྲིད་ཟུང་འབྲེལ་དེ་དུས་དང་མཐུན་པའི་ཆོས་སྲིད་བཟུང་འབྲེལ་ཞིག་ཡིན་སྐོར་འགྲེལ་བརྗོད་དང་སྦྲགས། གལ་ཏེ་ལམ་ལུགས་རང་གི་ཐད་བསྒྱུར་བཅོས་དགོས་པར་གཟིགས་ཚེ་དེ་བརྒྱུད་རིམ་གཞན་གི་ཐོག་ནས་གཏན་འབེབས་གནང་དགོས་གལ་ཡིན་པ་གསུངས་སོང་། དེ་མཚུངས་སྤྱི་འཐུས་གཞན་ཞིག་གིས་གནས་ཆུང་ཆོས་རྒྱལ་ཆེན་པོ་དེ་ལོ་རྒྱུས་ལ་ཁུངས་གཏུགས་ནས་ད་ཆ་ཆོས་སྲིད་ཟུང་འབྲེལ་གྱི་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ལུང་འདྲེན་གྱིས་གནས་ཆུང་ཆོས་རྒྱལ་ཆེན་པོ་དེ་གལ་ཆེ་ཞིག་ཏུ་ངོས་འཛིན་གནང་གི་ཡོད་ཞེས་དང་། ཅི་སྟེ་གཞུང་བསྟེན་དགྲ་ལྷ་བསྟེན་སྲོལ་དེ་ལ་འགྱུར་བ་ཞིག་གཏོང་དགོས་ཀྱི་ཡོད་ནའང། ཆོས་སྲིད་གཉིས་ལྡན་གྱི་བཅའ་ཁྲིམས་ཀྱི་སྒྲོམ་གཞིར་འགྱུར་བ་གཏང་དགོས་པ་དང་དེ་བཞིན་སྤྱི་འཐུས་གཞན་ཞིག་ནས་གཞུང་འབྲེལ་དགྲ་ལྷ་བསྟེན་སྲོལ་དེ་འགྲིག་མི་འགྲིག་སོགས་ཞུ་དཀའ་བར་འགྲེལ་བརྗོད་གནང་ཡང་སྔར་ལམ་ཁག་ཅིག་འགྱུར་བ་གཏང་ཆེད་བགྲོ་གླེང་དང་གོ་བསྡུར་གནང་རྒྱུ་གལ་ཆེར་གཟིགས་ཀྱི་ཡོད་སྐོར་གསུང་སོང། འོན་ཀྱང་སྤྱི་འཐུས་གཅིག་གིས་ཆོས་དང་སྲིད་གཉིས་ཁ་བྲལ་ཐབས་མེད་སྐོར་གསུངས་པ་དང། སྤྱི་འཐུས་གཞན་ཞིག་ནས་ཀྱང་སྤྱིར་གཞུང་བསྟེན་དགྲ་ལྷ་གལ་ཆེན་པོ་ཡིན་པ་ངོས་ལེན་ཞུ་བཞིན་ཡོད་ཀྱང་སྒྲིག་འཛུགས་ཀྱིས་དགྲ་ལྷ་བེད་སྤྱོད་གཏོང་ཕྱོགས་ལ་དྲི་བ་ཡོད་པ་དང། ཁག་ཅིག་ནས་དེ་རིང་གི་བགྲོ་གླེང་དེའི་གྲོས་ལ་གཞིགས་ཏེ་སྤྱི་འཐུས་རྣམས་ལ་ཆོས་བརྒྱུད་ཀྱི་འཐེན་འཁྱེར་གནང་རྒྱུ་མེད་པར་འབོད་སྐུལ་གནང་མཁན་བྱུང་སོང། རྩ་བའི་དེ་རིང་ཆོས་རིག་ལས་ཁུངས་ཀྱི་ལས་སྡོམས་དང་འབྲེལ་བའི་བགྲོ་གླེང་དེའི་ཁྲོད་སྤྱི་འཐུས་འགའ་ཞིག་གིས་ཆོས་རིག་ལས་ཁུངས་ཀྱི་ནང་ཆོས་ངོ་སྤྲོད་ལས་དོན་དང་འབྲེལ་ད་བར་ས་གནས་ག་ཚོད་ནང་ནང་དོན་རིག་པའི་ངོ་སྤྲོད་ལས་འགུལ་གང་སྤེལ་ཡོད་མེད་དང་དེ་དང་ལྷན་དུ་ཞར་བྱུང་བོད་ཡིག་བྲིས་ཀློག་སློབ་ཁྲིད་གནང་དགོས་པ། དེ་བཞིན་ནང་ཆོས་ངོ་སྤྲོད་སློབ་ཁྲིད་གནང་མཁན་གྱི་ལྟ་གྲུབ་དགེ་རྒན་རྣམས་གདན་ས་གང་དང་གང་ནས་གདན་ཞུ་གནང་མིན་དང་ཁོང་རྣམས་རིས་སུ་མ་ཆད་པའི་ཆོས་བརྒྱུད་ཁག་ནས་ཡིན་མིན་བཅས་ཀྱི་སྐོར་གསུང་མཁན་ཡང་བྱུང་སོང་། གཞན་ཡང་སྤྱི་འཐུས་ཤིག་གིས་བགྲོ་གླེང་དེའི་ཐོག་ཆ་ཤས་བཞེས་པར་ལྟ་གྲུབ་དགེ་རྒན་ཚོས་ནང་ཆོས་ངོ་སྤྲོད་གནང་སྐབས་གཙོ་ཆེ་ཤོས་དེ་ནང་ཆོས་ངོ་སྤྲོད་གནང་ཡུལ་གྱི་གདུལ་བྱ་དེར་ནང་ཆོས་ངོ་སྤྲོད་ཐུབ་པ་ཞིག་གནང་རྒྱུ་ཡིན་པ་མ་གཏོགས་ནང་ཆོས་ངོ་སྤྲོད་གནང་མཁན་ལ་ཁྱད་པར་གང་ཡང་མེད་སྐོར་གསུངས་པ་དང་འབྲེལ། ལྷག་དོན་ནང་ཆོས་ངོ་སྤྲོད་བྱ་རྒྱུ་ཆེད་དམིགས་བསལ་སློབ་ཚན་ཞིག་གཏན་འབེབས་གནང་ཐུབ་ན་དགེ་མཚན་ཆེ་བར་གཟིགས་ཀྱི་ཡོད་པར་དགོངས་འཆར་ཕུལ་སོང་།

བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་གཉིས་པའི་དུས་ཚོད་མང་ཆེ་བ་ཀླུ་མཁར་བྱམས་ཀྱི་གནད་དོན་ཐོག་ལ་བཏང་སོང་། དེ་ཡང་བཞུགས་སྒར་དུ་གནས་སྡོད་བོད་མི་ཆབ་སྲིད་བཙོན་ཟུར་ཀླུ་མཁར་བྱམས་ཀྱིས་ཉེ་སྔོན་ཨ་རིའི་བོད་རིག་པའི་མཁས་པ་སྐུ་ཞབས་ Eliot Sperlingལགས་དགོངས་པ་རྫོགས་རྗེས་ཁོང་ལ་མྱ་ངན་རྗེས་དྲན་གྱི་དཔྱད་རྩོམ་ཞིག་སྤེལ་བའི་མགོ་བརྗོད་དུ། ལོ་ ༡༡༣ ལ་བཞུགས་དགོས་པའི་མི་དེ་ཁྱེད་ཡིན་ཅེས་བྲིས་ཡོད་པ་ལྟར། བོད་མིའི་སྤྱི་ཚོགས་ཁྲོད་དེ་ནི་༸གོང་ས་༸སྐྱབས་མགོན་ཆེན་པོ་མཆོག་ལ་ཟུར་ཟ་བྱས་པ་ཞིག་ལ་ངོས་འཛིན་གྱིས་ངོ་རྒོལ་བྱེད་མཁན་ཤུགས་ཆེ་བྱུང་བ་མ་ཟད། བོད་མིའི་སྒྲིགས་འཛུགས་བཀའ་ཤག་གི་ངོས་ནས་ཀྱང་ཉེ་ལམ་གསུམ་བཅུའི་དུས་དྲན་གྱི་མཛད་སྒོའི་སྟེང་གནད་དོན་དེའི་རིགས་ལ་དགག་པ་མཐའ་གཅིག་ཏུ་ཡོད་པའི་འགྲེལ་བརྗོད་གནང་ཡོད་པ་རེད། དེ་རིང་ཕྱི་ཚེས་ ༡༥ གྲོས་ཚོགས་ཀྱི་ལས་ཉིན་གཉིས་པའི་ཐོག་སྤྱི་འཐུས་མང་པོ་ཞིག་གིས་བོད་ནང་གི་ཛ་དྲག་གནས་སྟངས་དང་འབྲེལ་བའི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་པ་ལས་འཕྲོས་ཏེ། ཀླུ་མཁར་བྱམས་ཀྱིས་སྤེལ་བའི་རྩོམ་ཡིག་དེས་ ༸གོང་ས་མཆོག་ལ་མཚན་སྨད་ཞུས་པར་ངོས་འཛིན་དང་འབྲེལ། གནད་དོན་དེའི་རིགས་ཀྱིས་བོད་མིའི་ཆིག་སྒྲིལ་ལ་གནོད་སྐྱོན་གཏོང་གི་ཡོད་སྟབས། མ་འོངས་པར་དེ་འདྲ་རྩ་བ་ནས་གནང་རྒྱུ་མེད་པའི་འབོད་སྐུལ་གནང་མཁན་བྱུང་བ་དང་། ཡང་ཁག་ཅིག་གིས་དཔྱད་རྩོམ་སྤེལ་བ་དེས་༸གོང་ས་མཆོག་ལ་གོ་གི་ཡོད་མེད་ཀྱི་དཔང་རྟགས་མེད་སྐོར་དང། དེ་བཞིན་དོ་བདག་ཁོང་ནས་རྗེས་སུ་༸གོང་ས་མཆོག་ལ་མཚན་སྨད་ཞུས་མེད་སྐོར་བརྗོད་པ་དེར་ཡིད་ཆེས་གནང་དགོས་པ་སོགས་ཀྱི་བགྲོ་གླེང་ཧ་ཅང་ལྷུག་པོ་བྱུང་སོང་། རྩ་བའི་གནད་དོན་དེའི་ཐོག་ད་སྐབས་སྤྱི་ཚོགས་འབྲེལ་མཐུད་ཀྱི་དྲ་རྒྱའི་ཁྲོད་བསམ་ཚུལ་གླེང་མཁན་མང་དག་ཞིག་འབྱུང་དང་བྱུང་མུས་ཡིན་པ་མ་ཟད། བདུན་ཕྲག་སྔོན་མའི་ནང་བཞུགས་སྒར་དུ་རྩ་དོན་གླིང་སྐད་འཕྲིན་ཚོགས་པ་དང་དེ་བཞིན་རྡ་ས་ ས་གནས་མདོ་སྨད་རྒྱུན་ལས་ཁང་བཅས་ནས་གསར་འགོད་གསལ་བསྒྲགས་ཤིག་སྤེལ་བའི་བརྒྱུད་ཁོང་གིས་བྱེད་སྟངས་དེ་རྒྱ་ནག་གི་བྱེད་སྟངས་དང་གཅིག་པ་ཡིན་པར་ངོས་འཛིན་གྱིས་ངོ་རྒོལ་ཤུགས་ཆེ་གནང་ཡོད་པ་རེད། འོན་ཀྱང་ཕྱོགས་གཞན་ཞིག་ནས་རྒྱ་གར་གཙོས་པའི་་ཕྱི་རྒྱལ་གྱི་ཡུལ་གྲུ་འདྲ་མིན་ཁག་གཅིག་གི་གཙུག་ལག་སློབ་གཉེར་ཁང་ ༡༢ ཙམ་གྱི་སློབ་མ་དང་ཞིབ་འཇུག་པ་ཁག་ཅིག་གིས་སྤྱི་བསྒྲགས་ཤིག་སྤེལ་ཏེ། རྩ་བའི་ཀླུ་མཁར་བྱམས་ཀྱི་དཔྱད་རྩོམ་དེ་༸གོང་ས་མཆོག་ལ་ཟུར་ཟ་ཞུས་པའི་དགོས་མེད་ཀྱི་རྩོམ་ཞིག་ལ་ངོས་འཛིན་གནང་པ་ལྟར། གནད་དོན་དེའི་རྐྱེན་གྱིས་ཁོང་སྤྱི་ཚོགས་ཀྱི་གྲལ་རིམ་ནས་ཕུད་ཐབས་བྱ་རྒྱུའི་ལས་དོན་ལ་དགག་པ་སྐྱོན་པ་དང་འབྲེལ། བྱེད་སྟངས་དེའི་རིགས་ཀྱིས་༸གོང་ས་མཆོག་གིས་ད་བར་སྐུ་ངལ་ཚད་མེད་སྐྱོན་ནས་བོད་མིའི་སྤྱི་ཚོགས་དེ་མང་གཙོ་ཡང་དག་པའི་ལམ་བུར་སྣེ་ཁྲིད་གནང་བ་དེར་དོ་ཕོག་འགྲོ་རྒྱུར་ཉེན་ཁ་ཡོད་པ་དང་། དེས་ཕན་ལས་གནོད་མང་བ་ཡོང་བར་འགྲེལ་བརྗོད་གནང་ཡོད་པ་རེད། དེ་རིང་གི་གྲོས་ཚོགས་སུ་སྤྱི་འཐུས་ཁག་ཅིག་ནས་བོད་མིའི་སློབ་མ་དང་ཞིབ་འཇུག་པས་གནད་དོན་དེ་གླེང་སྟེ་ཀླུ་མཁར་བྱམས་ཀྱི་གནད་དོན་ལ་གདོང་ལེན་བྱེད་ཕྱོགས་ཐོག་ཡིད་གཟབ་གནང་དགོས་གལ་ཡིན་པ་གསུང་མཁན་དང་དེར་དགག་པ་གནང་མཁན་ཡང་བྱུང་སོང་། བོད་མིའི་སྒྲིགས་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་ངོས་ནས་གྲོས་ཚོགས་སུ་སྤྱི་འཐུས་ཁག་ཅིག་གིས་ཀླུ་མཁར་བྱམས་ཀྱི་དཔྱད་རྩོམ་དེ་ཁྲིམས་ཐོག་ནས་༸གོང་ས་མཆོག་ལ་གོ་གི་ཡོད་མེད་ཁུངས་སྐྱེལ་ཐུབ་མིན་དྲི་བ་བཏང་ཡོད་པ་ལྟར་ཁྲིམས་ཐོག་ནས་དེ་ལྟར་ཁུངས་སྐྱེལ་ཐུབ་རྒྱུ་ཡོད་པ་དང་། དོ་བདག་ཁོང་ནས་དཔྱད་རྩོམ་དེ་ཕྱིར་འཐེན་བྱེད་དགོས་པར་ལམ་སྟོན་གནང་སོང་།...

དེ་རིང་ཟླ་ ༩ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ནང་བོད་རྒྱ་འབྲེལ་མོལ་དང་༸གོང་ས་མཆོག་བོད་ལ་གདན་ཞུའི་སྐོར་དང་འབྲེལ་བའི་སྐར་རྟགས་ཅན་གྱི་དྲི་བར་བཀའ་ལན་གནང་སྐབས། བཀའ་ཤག་ནས་༸གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་འབད་བརྩོན་ཞུ་གལ་ཆེ་ཤོས་སུ་ངོས་འཛིན་གནང་གི་ཡོད་པ་གསུངས་པ་དང་། བོད་རྒྱ་འབྲེལ་མོལ་ཡོང་སླད་འཆར་གཞི་ལྡན་པའི་ཐོག་ནས་སྔར་ལྷག་འབད་བཙོན་གནང་མུས་ཡིན་པ་གསུངས་གནང་སོང་། རྩ་བའི་དེ་རིང་སྔ་དྲོ་སྤྱི་འཐུས་གྲོས་ཚོགས་ཀྱི་ལས་ཉིན་གཉིས་པ་འདིའི་ཐོག་སྲིད་སྐྱོང་མཆོག་ལ་བོད་རྒྱ་ཞི་མོལ་གྱི་ལམ་ནས་དུས་ཡུན་རིང་པོ་མ་འགོར་བར་བོད་དོན་བདེན་མཐའ་གསལ་ཐུབ་པའི་ཡིད་ཆེས་དང་གདེང་ཚོད་ཡོད་དམ་ཞེས་དང་། དེ་བཞིན་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་འབད་བཙོན་གནང་རྒྱུ་ཡིན་སྐོར་གསུངས་པ་དེ། གནས་གཟིགས་ཙམ་ལ་གོ་བ་ཡིན་ནམ། བོད་དོན་བདེན་མཐའ་གསལ་ནས་བོད་ལ་གདན་འདྲེན་ཞུ་བ་ཞིག་ལ་གོ་བ་ཡིན། ད་ལྟའི་ཆར་གནད་དོན་དེ་ལ་རེ་བ་ཅུང་ཙམ་རེ་གཟིགས་ཀྱི་ཡོད་དམ་ཞེས་སྐར་རྟགས་ཅན་གྱི་དྲི་བ་གཉིས་ཕུལ་སོང་བ་མ་ཟད། དྲི་བ་དེ་དག་དང་དེ་བཞིན་སྲིད་སྐྱོང་མཆོག་གིས་བཀའ་ལན་ལས་འཕྲོད་ནས་སྤྱི་འཐུས་ཁག་ཅིག་གིས་༸གོང་ས་མཆོག་བོད་ལ་གདན་འདྲེན་ཞུ་ཆེད་དང་། འབྲེལ་མོལ་བསྐྱར་མཐུད་ཡོང་སླད་ད་བར་འཛིན་སྐྱོང་གིས་གང་གནང་ཡོད་མེད་དང་། མ་འོངས་པར་འབྲེལ་མོལ་ཡོང་བའི་རེ་བ་གསར་པ་གཟིགས་མིན་དང་རེ་བའི་འབྱུང་གཞི་ཇི་གཟིགས་སོགས་ཀྱི་ཐད་ལ་དཀའ་ཅན་གྱི་བཀའ་འདྲི་མང་དག་ཅིག་ཞུས་ཡོད་པ་རེད། སྲིད་སྐྱོང་མཆོག་གིས་སྐབས་དེར་བོད་རྒྱ་འབྲེལ་མོལ་ཡོང་མིན་གཙོ་བོ་རྒྱ་གཞུང་གི་འགོ་ཁྲིད་ཚོའི་ཆོད་སེམས་ལ་རག་ལུས་ཡོད་པ་གསུངས་པ་དང་སྦྲགས། བཀའ་ཤག་ནས་དེ་སྔ་བཞིན་དབུ་མའི་ལམ་གྱི་ཐོག་ནས་༸གོང་ས་མཆོག་གི་༸སྐུ་ཚབ་དང་རྒྱ་གཞུང་དབར་འབྲེལ་མོལ་དང་། དེ་རྗེས་ཞི་མོལ་གྱི་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་སུ་འབད་བརྩོན་སྔར་ལྷག་མེད་ནའང་སྔར་ལྟར་གནང་མུས་ཐོག་འབྲེལ་མོལ་བསྐྱར་མཐུད་ཡོང་རྒྱུའི་རེ་བ་གཟིགས་གནང་གི་ཡོད་པ་དེ་ལྟར་ཡང་། བོད་མི་ལྟར་འཚེ་མེད་ཞི་བ་དང་འབྲེལ་མོལ་ཐོག་ནས་འཐབ་རྩོད་གནང་མཁན་གཞན་ཚོའི་རེ་བ་ཁག་གྲུབ་ཡོད་པ་གསུངས་ཡོད་པ་རེད། ད་དུང་འབྲེལ་མོལ་དང་འབྲེལ་ཏེ་སྤྱི་འཐུས་ཤིག་གིས་ཉིན་ཤས་སྔོན། དེ་སྔའི་༸གོང་ས་མཆོག་གིས་དམིགས་བསལ་༸སྐུ་ཚབ་སྐལ་བཟང་རྒྱལ་ཚོགས་ལགས་ནས་བཀའ་ཤག་ནས་འབྲེལ་མོལ་ཡོང་རྒྱུར་སྒུག་ནས་མ་བཞུགས་པར་འཆར་གཞི་ལྡན་པའི་ཐོག་ནས་ཕྱག་ལས་གནང་དགོས་གལ་ཡིན་སྐོར་གསུངས་ཡོད་པ་ལུང་འདྲེན་དང་སྦྲགས། ཁོང་གིས་གསུངས་པ་དེ་ལས་བཀའ་ཤག་གི་གྲ་སྒྲིག་དེ་ཙམ་ཡག་པོ་མེད་པར་ཐེ་ཚོམ་བྱུང་གི་ཡོད་པ་བཀའ་འདྲི་ཞུས་པར་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གིས་དམིགས་བསལ་སྐུ་ཚབ་རྣམ་པ་གཉིས་ ༢༠༡༢ ལོ་ནས་རྩ་དགོངས་ཞུས་རྗེས། ཉེ་བའི་ཆར་འཛིན་སྐྱོང་ནས་སྐུ་ཚབ་མེད་པའི་ཐོག་ནས་འབད་བརྩོན་གནང་པའི་གནས་ཚུལ་ཁག་སྐུ་ཚབ་སྐལ་བཟང་རྒྱལ་མཚན་མཆོག་གིས་མཁྱེན་གྱི་མེད་པ་ངོས་འཛིན་གནང་ཡོད་ཅེས་གསུངས་སོང་བ་མ་ཟད། ལྷག་པར་དུ་འཛིན་སྐྱོང་ནས་འབྲེལ་མོལ་ཡོང་སླད་འཆར་གཞི་དང་ལྡན་པའི་ཐོག་ནས་འབད་བཙོན་གནང་མུས་ཐོག་རྒྱབ་སྐྱོར་ཡང་ཐོབ་ཡོད་སྐོར་གསུངས་གནང་སོང། མུ་མཐུད་དྲི་བ་ཕེབས་པའི་ནང་སྲིད་སྐྱོང་མཆོག་གིས་འབྲེལ་མོལ་ཡོང་མིན་དེ་རྒྱ་གཞུང་གི་ཆོད་སེམས་ལ་རག་ལུས་ཡོད་པ་གསུངས་ན། བཀའ་ཤག་སྐབས་༡༣པའི་སྐབས་འབྲེལ་མོལ་བྱུང་བ་དང་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་སྐབས་༡༤པའི་སྐབས་ལ་འབྲེལ་མོལ་ཡོང་མ་ཐུབ་པར་འཕར་བབ་བྱུང་དགོས་པའི་རྒྱུ་མཚན་གཙོ་བོ་ཇི་ཡིན་བཀའ་འདྲི་ཞུས་སོང་བས།...

https://www.youtube.com/embed/aT3M-Nt7xck

དེ་རིང་ཟླ་ ༩ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གྲོས་ཚོགས་ཀྱི་ལས་ཉིན་གཉིས་པའི་ཐོག་ཆོས་རིག་ལས་ཁུངས་ཀྱི་ཕྱི་ལོ་ ༢༠༡༥ ཟླ་ ༤ ཚེས་ ༡ ནས་འདི་ལོའི་ཕྱི་ཟླ་ ༣ ཚེས་ ༣༡ བར་༸རྒྱལ་བའི་སྐུ་ཕྱྭ་དང་བསྟན་སྲིད་ཞབས་རིམ་སོགས་ཆོས་ཕྱོགས་ཀྱི་ལས་དོན་དང་འཛིན་སྐྱོང་གི་ལས་དོན། དེ་བཞིན་ཡིག་མཛོད་ཚན་པའི་ལས་དོན་བཅས་དོན་ཚན་གསུམ་གྱི་ཐོག་ནས་ལོ་འཁོར་ལས་བསྡོམས་འགོད་འབུལ་གནང་ཡོད་པ་རེད། ཆོས་རིག་བཀའ་བློན་མཆོག་གིས་ལས་བསྡོམས་སྙིང་བསྡུས་སྙན་སྒྲོན་གྲུབ་བསྟུན། སྤྱི་འཐུས་རྒྱུན་ལས་ནས་ཆོས་རིག་གི་ལས་བསྡོམས་རྒྱས་པ་ལ་ཞིབ་འཇུག་ཞུས་པའི་སྙན་ཐོ་འགོད་འབུལ་ཞུས་པར་དྲི་བ་དྲི་ལན་དང་བགྲོ་གླེང་བཅས་གནང་སྐབས། སྤྱི་འཐུས་གཅིག་གིས་གཞུང་གཞུང་བསྟེན་དགྲ་ལྷའི་གོཙ་བོ་གནས་ཆུང་ཆོས་རྒྱལ་ཆེན་པོ་སྤྱན་འདྲེན་ཞུས་སྐོར་དང་འབྲེལ། སྤྱིར་ལྷ་སྲུང་སྤྱན་འདྲེན་ཞུ་རྒྱུ་དེ་ནི་བོད་མིའི་གནའ་བོའི་གོམས་སྲོལ་རྩ་ཆེན་ཞིག་དང་དེ་དགོས་ངེས་ཅན་ཞིག་ཆགས་ཀྱི་ཡོད་ཀྱང་། དེ་ཆོས་ཕྱོགས་དང་འབྲེལ་བའི་ཐོག་ནས་ལྷ་སྲུང་སྤྱན་འདྲེན་ཞུ་དགོས་པ་མ་གཏོགས་དེ་མིན་སྲིད་ཀྱི་གནད་འགག་དང་འབྲེལ་ཐོག་ལྷ་སྲུང་རིགས་མིའི་རྙོག་གླེང་ནང་འཁྲིད་ཐབས་བྱ་རྒྱུ་དེ་གཏན་ནས་འགྲིག་གི་མེད་སྐོར་ཚོར་ཤུགས་ཆེན་པོ་གསུངས་གནང་སོང་། སྐབས་དེར་ཆོས་རིག་བཀའ་བློན་མཆོག་གིས་སྤྱི་འཐུས་ཀྱི་དྲི་བར་བཀའ་ལན་གནང་དོན་ལ། སྒྲིག་འཛུགས་ཀྱིས་ལྷ་སྲང་རྣམས་ཀྱི་དྲུང་ནས་བཀའ་ལུང་གང་ཞིག་ཞུ་རུང་དེ་སྒྲིག་འཛུགས་ཀྱི་མ་འོངས་པའི་ལས་དོན་གང་སྤེལ་དེ་དག་ལ་འཆར་གཞི་དང་སྲིད་བྱུས་གཏན་འབེབས་ཟིན་རིགས་ཁག་ལ་མི་མཐུན་པའི་འགལ་རྐྱེན་སེལ་ཕྱིར་སྤྱན་འདྲེན་ཞུས་པ་མ་གཏོགས་ཆབ་སྲིད་ཀྱི་ལས་དོན་གང་བརྩམ་དགོས་མིན་ཐད་བཀའ་ལུང་ཞུ་སྲོལ་མེད་ཅེས་གསུངས་ཡོད་པ་རེད། གཞན་ཡང་སྤྱི་འཐུས་ཤིག་གིས་བགྲོ་གླེང་དེའི་ཐོག་ལ་ཆ་ཤས་བཞེས་པར་སྒྲིག་འཛུགས་ཀྱིས་ལོ་ལྟར་ས་ག་ཟླ་བའི་སྐབས་དང་བསྟུན། ༸རྒྱལ་བའི་སྐུ་ཚེ་ཚེ་སྒྲུབ་ལ་དམིགས་ཏེ་ས་གནས་འགོ་འཛིན་ལས་ཁུངས་ཁག་བརྒྱུད་སེམས་ཅན་སྲོག་བླུ་དང་ཚེ་ཐར་གཏོང་སྲོལ་ཡོད་པ་དེས་སེམས་ཅན་བཙོང་མཁན་ཚོས་རྒྱུ་མཚན་དེ་ལ་དམིགས་ནས་ཆེད་མངགས་ཉ་དང་བྱ་རིགས་སོགས་གང་མང་འཇུ་བཟུང་བྱེད་ཀྱི་ཡོད་པ་དེ་དོན་དངོས་དགེ་བའི་ལས་ལ་འཇུག་གི་ཡོད་མེད་ཐད་དགོངས་ཚུལ་ཕུལ་སོང་། ཆོས་རིག་བཀའ་བློན་མཆོག་གིས་སྐབས་དེར་ཤིང་ལུགས་ལོའི་ནང་ཁྱོན་སེམས་ཅན་ཆེ་ཆུང་ ༤༧༢༣༤༥ སྲོག་བླུ་བཏང་ནས་༸སྐུ་ཚེ་ཚེ་སྒྲུབ་གནང་ཡོད་པ་དང་། སེམས་ཅན་གང་ཚེ་ཐར་བཏང་ཡོད་པ་རྣམས་མིང་དོན་མཚུངས་པའི་ཚེ་ཐར་གཅིག་ཡོང་ཐབས་སུ་ཆོས་རིག་ལས་ཁུངས་ནས་བཀའ་བསྡུར་གྱིས་རིམ་པའི་ས་གནས་འགོ་འཛིན་ལས་ཁུངས་ཁག་ལ་ནན་བསྐུལ་གྱིས་བཀོད་ཁྱབ་གནང་རྒྱུ་ཡིན་ཅེས་གསུངས་ཡོད། དེ་རིང་གྲོས་ཚོགས་ལས་ཉིན་གཉིས་པའི་ཐོག་གཞན་ཡང་སྒྲིག་འཛུགས་ཀྱི་ངོས་ནས་དགེ་བཙུན་རྣམ་པ་གཙོས་འབྲེལ་ཡོད་སོ་སོར་སློབ་ཡོན་དང་གསོལ་ཕོགས། དེ་བཞིན་འཚོ་སྣོན་དང་སྨན་བཅོས་སོགས་ཀྱི་མཐུན་རྐྱེན་བསྐྲུན་ཡོད་སྐོར་དང་།...