ཁ་སང་ཟླ་ ༩ ཚེས་ ༢༥ ཉིན་ཐེ་ཝན་གྱི་རྒྱལ་ས་ཐེ་པེ་ནང་དུ་ནང་ཐེ་ཝན་ནང་གི་མང་གཙོའི་ཉམས་མྱོང་ལས་བོད་རྒྱའི་གནད་དོན་སྐོར་བགྲོ་གླེང་ཞེས་པའི་བརྗོད་གཞིའི་ཐོག་རྒྱ་གར་
དང་ཧོང་ཀོང་། སུས་སི་བཅས་ནས་ཕེབས་པའི་མཁས་དབང་དང་དགེ་རྒན་ཆེན་མོ། དེ་བཞིན་སློབ་ཕྲུག་སོགས་འདུ་འཛོམས་ཀྱིས་མཁས་པའི་བགྲོ་གླེང་ཚོགས་འདུ་ཞིག་ཚོགས་གནང་འདུག
དེ་ཡང་ཐེ་ཝན་བོད་རྒྱ་ཚོགས་པ་དང། བོད་རིགས་ཚོགས་པ་གཉིས་ཀྱིས་གོ་སྒྲིག་དང་ཐེ་ཝན་སྐུ་ཚབ་དོན་ཁང་གི་ལམ་སྟོན་མཐུན་འགྱུར་འོག་འཚོགས་པ་ཞིག་ཡིན་པ་དང། ཁ་སང་སྔ་དྲོ་ཚོུད་ ༩ ནས་ཕྱི་དྲོ་ཚོུད་ ༥ པའི་བར་ཚོགས་པའི་བགྲོ་གླེང་ལྷན་ཚོགས་འདིའི་ཐོག་ཧོང་ཀོང་གི་ད་ལྟའི་གནས་བབ་དང། བོད་མི་དང་བོད་རྒྱ་འབྲེལ་མོལ་གྱི་གནས་འབབ། ཡུ་རོབ་བོད་རིགས་གཞོན་ནུ་ཚོགས་པ་ངོ་སྤྲོད། བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྐོར། དེ་བཞིན་བོད་ནང་གི་ཆབ་སྲིད་བཙོན་པར་ཁྲིམས་ཐོག་གིས་རྡུང་རྡེག་དང་ཐེ་ཝན་གཞུང་སྔ་རྗེས་གཉིས་ཀྱི་ཕྱི་འབྲེལ་སྲིད་བྱུས་སྐོར་བཅས་བརྗོད་གཞི་འདྲ་མིན་ཐོག་ཚོགས་ཐེངས་བཞི་གནང་ནས་ཚོགས་འདུག ལྷན་ཚོགས་དེའིཐོག་བོད་མིའི་ཕྱོགས་ནས་བཞུགས་སྒར་རྡ་རམ་ས་ལར་བརྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛི
ན་ཐུབ་བསྟན་བསམ་འཕེལ་ལགས་དང། སུད་སི་ནས་བསྟན་འཛིན་བདེ་ཆེན་ལགས་རྣམ་པ་གཉིས་མཉམ་ཞུགས་གནང་འདུག
དེའི་སྐོར་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཞལ་པར་བརྒྱུད་གསུངས་དོན་ད་ལན་གྱི་བགྲོ་གླེང་ལྷན་ཚོགས་དེ་གོ་སྒྲིག་དོན་གཙོ་བོ་ནི། བོད་ཀྱི་གནད་དོན་ཐོག་ཐེ་ཝན་གཙོས་པའི་འཛམ་གླིང་ནང་གི་མཁས་པ་ཁག་གི་དགོངས་ཚུལ་གང་ཡོད་མེད་གསལ་པོ་ཞིག་ཤེས་རྟོགས་ཐུབ་རྒྱུ་དེ་ཡིན་པ་གསུངས་སོང་།
རྩ་བའི་ཐེ་ཝན་ནང་ཕྱི་ལོ་ ༢༠༡༡ ལོ་ནས་བཟུང་ལོ་ལྟར་བོད་དོན་དང་འབྲེལ་བའི་བརྗོད་གཞི་འདྲ་མིན་ཐོག་མཁས་པའི་བགྲོ་གླེང་ལྷན་ཚོགས་དེ་ཚོགས་གནང་གི་ཡོད་པ་ལྟར། ཐེངས་འདིའི་ཚོགས་ཐེངས་དྲུག་པའི་ཐོག་བགྲོ་གླེང་ལས་རིམ་དང་སྦྲགས།ང་ཚོ་ནམ་ཡང་གཉའ་མི་ཞུམ་ཞེས་པའི་བོད་མི་ཆབ་སྲིད་བཙོན་པ་རྟ་ནག་འཇིགས་མེད་བཟང་པོ་ལགས་དང། བློ་བཟང་བསྟན་འཛིན་ལགས་གཉིས་ཀྱི་སྐུ་ཚེའི་ལོ་རྒྱུས་བཀོད་པའི་རྒྱ་ཡིག་ཕྱག་དེབ་ཞིག་དང། ཡང་ཐེང་ཝན་ནང་གི་རྩོམ་པ་པོ་མཁས་པ་ཞིག་གིས་བོད་ཀྱི་ནང་ཆོས་བྱེད་པ་དང། བོད་མི་མང་དག་ཞིག་གི་ལྷན་དུ་འབྲེལ་བ་གནང་བའི་ཁྲོད་ཁོང་ལ་སེམས་འགུལ་ཤུགས་ཆེ་ཐེབས་པ་རྣམས་ཀྱི་སྐོར་ལ་བྲིས་པའི་ཉན་པ་ཞེས་པའི་དེབ་ཆུང་བཅས་དཔེ་དེབ་དབུ་བྱེད་གནང་ཡོད་པ་རེད།
