བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་གིས་གསར་འགོད་པའི་བཅར་འདྲི་དང་ལེན་གནང་པ་འབྲེལ་ཁེ་ན་ཌའི་གཞུང་གིས་རྒྱ་ནག་ལྟ་བུའི་སྟོབས་ཆེན་རྒྱལ་ཁབ་དང་ལྷན་དུ་འབྲེལ་མོལ་འཛུགས་སྐབས་རང་ཉིད་ཀྱི་རྒྱལ་ཁབ་དེའི་ཆེ་མཐོང་གཙོ་བོར་བཞག་དགོས་པ་གསུངས་འདུག
དེའང་ཁེ་ན་ཌའི་ CBC གསར་ཁང་གིས་ཉེ་ཆར་
མཇུག་སྒྲིལ་ཟིན་པའི་ཁེ་ན་ཌའི་སྲིད་བློན་ Justrin Trudeau མཆོག་དང། རྒྱ་ནག་གི་སྲིད་བློན་ li Keqiang གཉིས་བར་མཇལ་འཕྲད་དང། ལྷག་པར་དུ་བདུན་ཕྲག་སྔོན་མའི་ནང་རྒྱལ་ཁབ་གཉིས་དབར་རང་དབང་གི་ཐོག་ནས་ཕན་ཚུལ་ཚོང་གི་འབྲེལ་ལམ་འཛུགས་རྒྱུ་གསལ་བསྒྲགས་བྱས་པ་བསྟུན། ད་ལན་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་དང། དེ་བཞིན་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Carole བསམ་འགྲུབ་ལགས་སུ་བཅར་འདྲི་ཁག་ཅིག་ཞུས་འདུག
སྐབས་དེར་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་གིས་ཁེ་ན་ཌའི་གཞུང་གིས་རྒྱ་ནག་ལྷན་དུ་ཚོང་གི་འབྲེལ་ལམ་བཞག་པའི་སྐབས་ཁེ་ན་ཌའི་གཞུང་གི་ངོས་ནས་ངེས་པར་དུ་ཕྱི་ལོ་ ༢༠༠༩ ལོ་ནས་ད་བར་བོད་ནང་བྱུང་བའི་བོད་མི་རང་ལུས་མེར་སྲེག་གི་གནད་དོན་ཐོག་དཔྱད་ཞིབ་དང་དེའི་བྱུང་རྐྱེན་གང་ཡིན་སོགས་ཀྱི་ཐད་གཟིགས་དགོས་པ་དང། དེ་ནི་ད་རེས་ཚོང་གི་འབྲེལ་མོལ
་ཁྲོད་གཡོལ་ཐབས་མེད་པ་ཞིག་རེད་ཅེས་གསུངས་འདུག ཁེ་ན་ཌའི་སྲིད་བློན་ Justrin Trudeau མཆོག་ནས་རང་ཉིད་ཀྱི་རྒྱལ་ཁབ་གྱི་ཁེ་ཕན་གལ་ཆེར་ངོས་འཛིན་དང་དེ་མཚུངས་ཁེ་ན་ཌའི་རྒྱལ་ཁབ་ཀྱི་ཆེ་མཐོང་སྲུང་སྐྱོབ་དང་དེ་ལ་གུས་བརྩི་ཡོང་བ་ཞིག་གནང་དགོས་པ་མ་ཟད། ལྷག་པར་དུ་རྒྱ་ནག་ལྟ་བུའི་སྟོབས་ཆེན་རྒྱལ་ཁབ་ལྷན་དུ་འབྲེལ་མོལ་འཛུགས་སྐབས་རང་གི་རྒྱལ་ཁབ་ཀྱི་ཆེ་མཐོང་གཙོ་བོར་བཞག་དགོས་པ་རེད་ཅེས་གསུངས་འདུག
དེ་བཞིན་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Carole བསམ་འགྲུབ་ལགས་ཀྱིས་ད་ལན་རྒྱལ་ཁབ་གཉིས་ཕན་ཚུལ་དབར་ཚོང་གི་འབྲེལ་མོལ་དེར་འཚམས་འདྲི་ཞུས་པ་དང་སྦྲགས། ཚོང་འབྲེལ་དེའི་བརྒྱུད་རྒྱ་ནག་ནངགི་འགྲོ་བ་མིའི་ཐོབ་ཐང་གི་གནད་དོན་ཐད་ཤུགས་རྐྱེན་ཇི་ལྟར་ཐེབས་མིན་ཐོག ཁེ་ན་ཌའི་གཞུང་ནས་འཕྲལ་དུ་ཉམས་ཞིབ
་ལས་དོན་འགོ་བརྩམ་དགོས་པ་དང། དེ་ལྟར་གནང་ཚེ་རྒྱལ་སྤྱིིའི་འགྲོ་བ་མིའི་ཐོབ་ཐང་གི་འབྲུ་དོན་ལ་བརྩི་སྲུང་དང་སྲུང་སྐྱོབ་བྱེད་པ་ཞིག་མཚོན་ཐུབ་ཀྱི་རེད་ཅེས་གསུངས་འདུག ཁྱད་པར་དུ་ཚོང་འབྲེལ་དེའི་བརྒྱུད་ནས་རྒྱ་གཞུང་གིས་བོད་ནང་དུ་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་དེ་སྡུག་ཏུ་མི་འགྲོ་བར་། གནས་སྟངས་དེ་སེལ་ཐབས་སུ་འགོག་རྐྱེན་མི་ཡོང་བ་བྱ་རྒྱུ་བཅས་ནི་ཁེ་ན་ཌའི་གཞུང་ནས་བཟང་སྤྱོད་ཀྱི་འགན་འཁྲི་ཞིག་ཆགས་ཡོད་ཅེས་གསུངས་ཡོད།
དེ་བཞིན་ཨ་རིའི་སྐུ་ཚབ་དོན་གཅོད་མཆོག་གིས་ད་ལན་རྒྱལ་ཁབ་གཉིས་དབར་གྱི་ཚོང་འབྲེལ་དེའི་བརྒྱུད་ནས་ཚོང་འབྲེལ་གོ་འཕེལ་ཁོ་ན་མིན་པར། རྒྱུ་གཞུང་གི་ངོས་ནས་རྒྱ་ནག་མི་མང་དང། དེ་བཞིན་བོད་མི་གཙོས་པའི་གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་དང་དང། ཆོས་རིག སྐད་ཡིག། དེ་བཞིན་ཁོར་ཡུག་སྲུང་སྐྱོབ་གནང་རྒྱུ་བཅས་ཀྱི་གནད་ཆེའི་ཐོག་གྲོས་མཐུན་ཞིག་ཡོང་དགོས་གལ་ཡིན་པ་གསུངས་འདུག
