སུད་སི་གྲོས་ཚོགས་འཐུས་མིས་སུད་སི་གཞུང་ལ་བོད་དོན་དང་དེ་བཞིན་སུད་སི་དང་རྒྱ་ནག་ཕྱོགས་གཉིས་ཀྱི་དབར་འགྲོ་བ་མིའི་ཐོབ་ཐང་གི་གྲོས་མོལ་དེར་ནུས་པ་ག་ཚོད་ཐོན་ཡོད་མེད་སོགས་ཀྱི་སྐོར་དྲི་བ་གནང་འདུག
ཁ་སང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་སྤེལ་བར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ Maya Graf ལགས་དང་གྲོས་ཚོགས་འཐུས་མི་སྐུ་ཞབས་ Fabian Molina ལགས། དེ་བཞིན་སྐུ་ཞབས་ Niklaus Gugger ལགས། གྲོས་ཚོགས་འཐུས་མི་ཁག་གཅིག་ནས་ཉེ་ལམ་ཟླ་བ་འདིའི་ཕྱི་ཚེས་ ༣ ནས་ཕྱི་ཚེས་ ༢༡ བར་ཚོགས་པའི་སུད་སི་དབྱར་དུས་གྲོས་ཚོགས་སུ་སུད་སི་གཞུང་ལ་བོད་དོན་དང་འབྲེལ་བའི་དྲི་བ་ཁག་གཅིག་བཏང་འདུག
སྐབས་དེར་གྲོས་ཚོགས་འཐུས་མི་རྣམ་པས་རྒྱ་ནག་གི་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་བོད་གཙོས་པའི་ཤར་ཏུར་ཀི་སི་ཐན་གྱི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་སྡུག་ཏུ་འགྲོ་བཞིན་པ་དང་། ཆོས་ལུགས་དང་འདུ་འཛོམས་རང་དབང་ལ་དམ་དྲག་བྱེད་བཞིན་པའི་གནད་དོན་གླེང་སློང་གནང་འདུག
ལྕམ་སྐུ་ Maya Graf ལགས་ཀྱིས་སུད་སི་གཞུང་ནས་བོད་གཙོས་པའི་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་དཔྱད་ཞིབ་གནང་རྒྱུའི་བསྐྱར་དུ་བསམ་ཞིབ་གནང་མིན་དང་སུད་སི་ནས་རྒྱ་ནག་ཐོག་འཛིན་པའི་སྲིད་བྱུས་ལ་བསྒྱུར་བཅོས་གནང་མིན་དང་འབྲེལ། སུད་སི་དང་རྒྱ་ནག་ཕྱོགས་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐད་ནུས་པ་ཇི་ཙམ་ཐོན་མིན་སྐོར་ལ་དྲི་བ་བཏང་འདུག
གཞི་རྩའི་དེ་སྔོན་པེ་ཅིན་དུ་སུད་སི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐེངས་ ༡༦ པ་ཚོགས་པ་དང་འབྲེལ། སུད་སི་གཞུང་གིས་སྤྱི་བསྒྲགས་ཤིག་སྤེལ་ནས་གྲོས་མོལ་ཐོག་བོད་ཀྱི་གནད་དོན་གླེང་ཡོད་སྐོར་བརྗོད་པ་དེ་ལྟར་ཡང་། སྐུ་ཞབས་ Niklaus Gugger ལགས་ཀྱིས་སུད་སི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐད་ད་ཆ་གྲུབ་འབྲས་གང་ཡང་སོན་མེད་པ་དང་སྒོས་སུ་སུད་སི་གཞུང་ནས་འགྲོ་བ་མིའི་ཐོབ་ཐང་གི་སྡེ་ཚན་ཐད་གྲུབ་འབྲས་ཇེ་བཟང་དུ་གནང་ཕྱིར་འབད་བརྩོན་སྔར་ལྷག་གནང་རྒྱུ་ཡིན་མིན་དང་། སྐུ་ཞབས་ Fabian Molina ལགས་ཀྱིས་ཡུ་རོབ་མཐུན་ཚོགས་ཀྱི་ཆེས་མཐོའི་སྐུ་ཚབ་བོད་ནང་འཚམས་གཟིགས་སུ་ཕེབས་སྐོར་གྱི་གནད་དོན་སོགས་ཀྱི་ཐད་དྲི་བ་བཏང་འདུག
རྩ་བའི་ད་རེས་ཀྱི་གྲོས་ཚོགས་ཚོགས་འདུ་མ་འཚོགས་གོང་དུ་ཉེ་སྔོན་ཕྱི་ཚེས་ ༡༧ ཉིན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་ཚོགས་པ་དང་། ཚོགས་འདུ་ནང་མཉམ་ཞུགས་པས་བོད་དོན་དང་འབྲེལ་བའི་ནང་མོལ་གནད་དོན་དང་། སུད་སི་གྲོས་ཚོགས་ནང་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གླེང་སློང་གནང་ཕྱོགས་སོགས་ཀྱི་ཐོག་གྲོས་བསྡུར་གནང་བ་དང་བསྟུན་ཚོགས་འདུའི་སྐབས་ཀྱི་དྲི་བ་ཁག་གཅིག་དབྱར་དུས་གྲོས་ཚོགས་སུ་སྙན་གསེང་ཞུས་པ་ཡོད་པ་རེད། སུད་སི་གཞུང་ནས་གྲོས་ཚོགས་འཐུས་མིའི་དྲི་བ་ཁག་ལ་ཟླ་བ་དགུ་པའི་ནང་སྟོན་དུས་གྲོས་ཚོགས་ཐོག་ལན་འདེབས་གནང་རྒྱུ་རེད་འདུག
