སྐབས་བཅུ་བདུན་པའི་གྲོས་ཚོགས་ཀྱི་ཚོགས་དུས་གཉིས་པ་དང་གསུམ་པ་གཉིས་ཕྱི་ཟླ་གསུམ་པར་འཚོགས་གཏན་ཁེལ་བ།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་་དང་གསུམ་པ་གཉིས་སང་ལོའི་ཕྱི་ཟླ་ ༣ པའི་ནང་བསྟུད་མར་འཚོགས་གཏན་འཁེལ་འདུག
ཁ་སང་རེས་གཟའ་ཟླ་བ་ཚེས་ ༡༥ ཉིན་ཚོགས་དྲུང་ལས་ཁུངས་ཀྱིས་སྐབས་ ༡༧ པའི་གྲོས་ཚོགས་ཀྱི་ཚོགས་བརྡ་གསལ་བསྒྲགས་སྤེལ་བར་གཞིགས་ན། བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༠ ནང་གསལ་ལྟར། སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་གཉིས་པ་དེ་བཞིན་ཕྱི་ལོ་ ༢༠༢༢ ཟླ་ ༣ ཚེས་ ༡༤ རེས་གཟའ་ཟླ་བ་ནས་ཟླ་ ༣ ཚེས་ ༡༨ རེས་གཟའ་པ་སངས་བར་ལས་ཉིན་ལྔ་དང་། གྲོས་ཚོགས་ཚོགས་དུས་གསུམ་པ་ཕྱི་ལོ་ ༢༠༢༢ ཟླ་ ༣ ཚེས་ ༢༡ རེས་གཟའ་ཟླ་བ་ནས་ཟླ་ ༣ ཚེས་ ༣༡ རེས་གཟའ་ཕུར་བུ་བར་བཅས་ལས་ཉིན་གྲངས་བཅུའི་རིང་བཞུགས་སྒར་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཁང་དུ་ཚུགས་གཏན་འཁེལ་འདུག
གཞི་རྩའི་ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་འོས་བསྡུ་ཆེན་མོའི་རྗེས་སུ་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་བདམས་ཐོན་སྤྱི་འཐུས་རྣམ་པའི་དམ་འབུལ་ཞུ་ཕྱོགས་དང་འབྲེལ་ནས་དཀའ་རྙོག་འཕྲད་པའི་རྐྱེན་གྱིས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་དེ་འདི་ལོའི་ཟླ་བ་བཅུ་པའི་ནང་ལ་མ་གཏོགས་ཚོགས་ཐུབ་མེད་པ་དང་། དེ་འབྲེལ་དུས་རྒྱུན་ཕྱི་ཟླ་ ༩ པའི་ནང་ཚོགས་སྲོལ་ཡོད་པའི་ལས་སྡོམས་གྲོས་ཚོགས་དེའང་དུས་ཐོག་འཚོགས་ཐུབ་མེད་པ་རེད།
ཤེས་རྟོགས་བྱུང་བར་གཞིགས་ན། ཚོགས་དྲུང་ལས་ཁུངས་ཀྱི་ངོས་ནས་རིང་མིན་ཕྱི་ཟླ་ ༡༢ ནང་གྲོས་ཚོོགས་ཀྱི་འཐུས་མི་གསར་པ་ ༡༨ ཙམ་ཡོད་པ་རྣམས་ལ་བཞུགས་སྒར་དྷརྨ་ས་ལ་ཁུལ་དུ་ཁྲིམས་བཟོའི་ལས་དོན་སོགས་དང་འབྲེལ་བའི་ཟབ་ཁྲིད་གནང་འཆར་ཡོད་པ་དང་། སྤྱི་འཐུས་རྣམ་པ་བོད་མིའི་ས་གནས་ཁག་ཏུ་འཚམས་གཟིགས་སུ་ཕེབས་རྒྱུའི་ལས་དོན་ཁག་ཅིག་ཀྱང་བང་སྒྲིག་ཟིན་ཡོད་པ་རེད།