ཁ་སང་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་སོ་གསུམ་ལ་ཕེབས་པའི་༸སྐུའི་འཁྲུངས་སྐར་ཉིན་མོ་དང་བསྟུན་ཨ་རིའི་ཕྱི་སྲིད་ལས་ཁང་གིས་གསར་འགོད་བསྒྲགས་གཏམ་ཞིག་སྤེལ་བ་བརྒྱུད་རྒྱ་གཞུང་ནས་༸པཎ་ཆེན་རིན་པོ་ཆེའི་གནས་བབ་གང་ཡིན་མངོན་གསལ་བྱས་པའི་ཐོག་ནས་འགྲོ་བ་མིའི་ཐོབ་ཐང་ལོངས་སུ་སྤྱོད་རྒྱུའི་ཐོབ་ཐང་ཕུལ་དགོས་ཞེས་གསུངས་འདུག
ཁ་སང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ Ned Price ལགས་ཀྱིས་༸པཎ་ཆེན་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་གསར་འགོད་བསྒྲགས་གཏམ་ཞིག་ཆེད་སྤེལ་གནང་འདུག་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་༸པཎ་ཆེན་རིན་པོ་ཆེ་མཆོག་དགུང་ལོ་དྲུག་ལ་ཕེབས་སྐབས་རྒྱ་གཞུང་གིས་བཙན་ཁྲིད་བྱས་ནས་ད་ལན་ལོ་ངོ་ ༢༧ འཁོར་གྱི་ཡོད་ཀྱང་ད་བར་རྒྱ་གཞུང་ནས་རིན་པོ་ཆེ་མཆོག་དང་༸སྐུ་འཁོར་ནང་མི་རྣམ་པའི་གནས་བབ་གང་འདྲ་ཡོད་མེད་ཕྱིར་བསྒྲགས་ཞུས་མེད་པར་བློ་ཕམ་ཡོད་ཅེས་གསུངས་པ་དང་སྦྲགས། རྒྱ་གཞུང་ནས་རིན་པོ་ཆེ་མཆོག་ད་ཆ་གང་དུ་ཡོད་མེད་དང་༸སྐུ་ཁམས་ཀྱི་གནས་བབ་ཇི་ལྟར་ཡོད་པ་སོགས་འཕྲལ་མར་ཡོངས་གྲགས་ཞུ་དགོས་པ་མ་ཟད། རྒྱ་གཞུང་གིས་རྒྱལ་སྤྱིའི་ཁྲིམས་སྒྲིག་ཁག་ལ་སྲུང་བརྩི་ཞུ་རྒྱུའི་ཁས་ལེན་བྱས་པ་བཞིན་༸ཀུན་གཟིགས་༸པཎ་ཆེན་རིན་པོ་ཆེར་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཁག་ལོངས་སུ་སྤྱོད་རྒྱུའི་སྐུ་དབང་ཕུལ་དགོས་པའི་འབོད་སྐུལ་ཞུས་འདུག 
དེ་བཞིན་སྐུ་ཞབས་ Ned Price ལགས་ཀྱིས་བོད་མི་ཚོར་རྒྱ་ནག་གཞུང་ནས་ཐེ་བྱུས་གང་ཡང་མེད་པར་༸གོང་ས་༸སྐྱབས་མགོན་ཆེན་པོ་མཆོག་དང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་དབུས་པའི་སོ་སོའི་དབུ་ཁྲིད་རྣམས་ཀྱི་ཡང་སྲིད་རྩད་གཅོད་ཞུ་རྒྱུ་དང་། ཁོང་རྣམ་པར་སློབ་གཉེར་གྱི་གོ་སྐབས་བསྐྲུན་རྒྱུའི་རང་དབང་ཕུལ་དགོས་པ་མ་ཟད། བོད་མི་ཚོར་སོ་སོའི་ཐུན་མོང་མ་ཡིན་པའི་ཆོས་དང་སྐད་ཡིག་གཙོས་པའི་ལེགས་བྱང་ཁག་མི་ཉམས་རྒྱུན་འཛིན་གནང་རྒྱུའི་གཞི་རྩའི་རང་དབང་དང་ཐོབ་ཐང་ཁག་ལ་ཨ་རིའི་གཞུང་གི་ངོས་ནས་རྒྱབ་སྐྱོར་ཞུས་དང་ཞུ་བཞིན་ཡོད་ཅེས་ནན་བརྗོད་གནང་འདུག
ཁ་སང་ཕྱི་ཟླ་ ༤ ཚེས་ ༢༥ ཉིན་མོ་དེ་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུའི་འཁྲུངས་སྐར་དུས་ཆེན་ཡིན་པ་དང་བསྟུན་ཨ་རིའི་རྒྱལ་ས་ཝ་ཤིན་ཊོན་ཌི་སིར་བྱང་ཨ་རིའི་སྐུ་ཚབ་དོན་གཅོད་ལས་ཁུངས་དང་རྒྱལ་སྤྱིའི་བོད་དོན་ལས་འགུལ་ཁང་། ཨ་རིའི་རྒྱལ་སའི་ཁུལ་གྱི་བོད་རིགས་སྤྱི་མཐུན་ཚོགས་པ་བཅས་ཐུན་མོང་གི་གོ་སྒྲིག་འོག་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་འདུག་པ་དང་། སྐབས་དེའི་མཛད་སྒོ་ཐོག་སྲིད་སྐྱོང་སྤེན་པ་ཚེ་རིང་མཆོག་དང་། བཀྲིས་ལྷུན་པོ་དགོན་པའི་མཁན་ཟུར་དང་ཨཀྱཱ་རིན་པོ་ཆེ་མཆོག བཀྲིས་ལྷུན་པོའི་མཁན་རིན་པོ་ཆེ་གཟིག་རྒྱབ་རིན་པོ་ཆེ་མཆོག དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་ཆེན་མོ་སྐུ་ཞབས་ Rashad Hussain ལགས། རང་དབང་སྲུང་སྐྱོབ་ཚན་པའི་ཚོགས་གཞོན་ Nury Turkel ལགས། བྱང་ཨ་རི་སྐུ་ཚབ་དོན་གཅོད་དང་ཨ་རིའི་གྲོས་ཚོགས་འཐུས་མི་སོགས་ལྷན་ཞུགས་གནང་འདུག
གདན་ས་བཀྲིས་ལྷུན་པོའི་༸སྐྱབས་རྗེ་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་ཁོང་ད་ལན་ཨ་རིར་ཕེབས་དོན་གཙོ་བོ་ནི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་རིན་པོ་ཆེ་མཆོག་གང་མགྱོགས་གློད་བཀྲོལ་ཡོང་ཐབས་ཆེད་ཡིན་པ་དང་ཕྱོགས་ཕེབས་དེའི་ཁྲོད་ཨ་རིའི་གྲོས་ཚོགས་འཐུས་མི་གཙོས་གནད་ཡོད་མི་སྣ་མང་དག་ཅིག་དང་ཐུག་འཕྲད་ཀྱི་གོ་སྐབས་བྱུང་དོན་ལྟར་ཁོང་རྣམས་ཀྱིས་རིན་པོ་ཆེའི་གནད་དོན་ཐད་རྒྱབ་སྐྱོར་སྔར་ལྷག་གནང་རྒྱུའི་ཞལ་བཞེས་གནང་ཡོད་སྐོར་གསུངས་པ་དང་སྦྲགས་ཏེ། འབྲེལ་ཡོད་ཚང་མར་ཐུགས་རྗེ་ཆེ་ཞེས་ཞུས་པ་དང་ཆབས་ཅིག་ཏུ་རིན་པོ་ཆེ་མཆོག་གང་མགྱོགས་གློད་བཀྲོལ་ཐོབ་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་གསན་བསམ་སློབ་གཉེར་མཛད་དེ་བོད་སྤྱིའི་རྩ་དོན་དང་སྒོས་འཛམ་གླིང་སྤྱིར་ཞབས་འདེགས་རླབས་པོ་ཆེ་བསྒྲུབ་ཐུབ་པའི་ཐུགས་སྨོན་འདུག
ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་ཚོགས་གཙོ་གཞོན་པ་སྐུ་ཞབས་ Nury Turkel ལགས་ཀྱིས་ཁོང་སྒེར་ལ་མཚོན་ལ་བོད་མིའི་སྤྱི་ཚོགས་དང་འབྲེལ་བ་ཟབ་པོ་ཡོད་སྟབས་ཨ་རི་གཞུང་གི་སྐུ་ཚབ་ཐོག་ནས་མཛད་སྒོར་ཆེད་བཅར་ཞུས་ཡོད་ཀྱང་༸པཎ་ཆེན་རིན་པོ་ཆེའི་གནད་དོན་དེ་ཁོང་སྒེར་གྱི་གནད་དོན་ཞིག་ཀྱང་ཆགས་ཡོད་པར་མ་ཟད་ཡུ་གུར་དང་བོད་མི་གཉིས་ཀ་རྒྱ་ནག་གཞུང་གི་དྲག་གནོན་འོག་དཀའ་སྡུག་ཚད་མེད་མྱོང་མཁན་གྱི་མི་རིགས་ཤིག་ཆགས་ཡོད་པར་བརྟེན་ཁོང་ནས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚབ་ཞུས་ཏེ་བོད་མིའི་དཀའ་སྡུག་ལ་གདུང་སེམས་མཉམ་བསྐྱེད་ཞུས་པ་དང་འབྲེལ་བོད་དོན་ཐད་མུ་མཐུད་ནས་རྒྱབ་སྐྱོར་གང་ཐུབ་གནང་རྒྱུའི་ཆོད་སེམས་བརྟན་པོ་ཡོད་ཅེས་གསུངས་ཡོད། 
དེ་བཞིན་ཁ་སང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་དང་བསྟུན་བྱེས་ཀྱི་གདན་ས་བཀྲིས་ལྷུན་པོའི་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ Uzara Zaya མཆོག་དང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་པ་ཆེན་མོ་སྐུ་ཞབས་ Rashad Hussain ལགས་དང་མཇལ་འཕྲད་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་བོད་ནང་ཆིབས་བསྒྱུར་མཛད་ཐབས་དང་༸པཎ་ཆེན་རིན་པོ་ཆེའི་གནད་དོན་དེ་བརྒྱུད་བསྒྲགས་རྒྱ་ཆེར་ཡོང་སླད་ཆེ་བསྟོད་ཀྱི་ངོས་འཛིན་དགོས་པ་སོགས་ཞུ་གཏུག་གནང་འདུག
