ཨ་རིའི་ཕྱི་སྲིད་དྲུང་ཆེས་གཙོས་པའི་སུད་སི་དང་འཇར་མན་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་སོགས་ཀྱིས་༸སྐུའི་འཁྲུངས་སྐར་འཚམས་འདྲི་ཞུས་པ།

ཁ་སང་ཕྱི་ཚེས་ ༦ ཉིན་འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་ཀྱིས་བོད་ཀྱི་ཐུན་མིན་རྐང་བྲོ་གླུ་གཞས་འཁྲབ་སྟོན་དང་རྩེད་རིགས་འགྲན་བསྡུར། ཞལ་ལག་གང་རྒྱས་སོགས་བཞེས་ཏེ་དགའ་དད་སྤྲོ་གསུམ་འཁོལ་བའི་ངང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཟབ་རྒྱས་ཞུས་ཡོད་པ་ལྟར་ཁ་སང་གི་དུས་ཚིགས་དང་བསྟུན་ཨ་རིའི་ཕྱི་སྲིད་དྲུང་ཆེ་དང་གྲོས་ཚོགས་འོག་མའི་ཚོགས་གཙོ་གཙོས་སུད་སི་དང་འཇར་མན་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་སོགས་ཀྱིས་མགོན་པོ་༸གང་ཉིད་མཆོག་ལ་༸སྐུའི་འཁྲུངས་སྐར་ལ་འཚམས་འདྲི་ཞུས་འདུག

ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་གིས་༸གོང་ས་མཆོག་གི་འཁྲུངས་སྐར་ལ་འཚམས་འདྲི་ཞུས་པའི་གསར་འགོད་བསྒྲགས་གཏམ་ཞིག་སྤེལ་བར་༸གོང་ས་མཆོག་གིས་ཞི་བདེ་གོང་མཐོར་དང་ཆོས་ལུགས་མཐུན་སྒྲིལ། དེ་བཞིན་བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན། ཁོར་ཡུག་སྲུང་སྐྱོབ་ཐད་ཐུགས་འཁུར་ཆེས་བཞེས་མཛད་བཞིན་པར་ཡི་རང་བསྔགས་བརྗོད་ཞུས་པ་དང་འབྲེལ། ཨ་རི་གཞུང་གིས་མུ་མཐུད་ནས་༸གོང་ས་མཆོག་དང་བོད་མི་རྣམས་ལ་བོད་པའི་རིག་གཞུང་གཅེས་ཉར་ཐོག་རྒྱབ་སྐྱོར་གནང་ངེས་ཡིན་སྐོར་ཞལ་བཞེས་གནང་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་གིས་Twitter དྲ་གནས་ཐོག་༸གོང་ས་མཆོག་ལ་༸སྐུའི་འཁྲུངས་སྐར་འཚམས་འདྲི་ཞུས་པ་དང་སྦྲགས། དེ་རིང་དང་དུས་ཀུན་ཏུ་ནས་ཨ་རིའི་གྲོས་ཚོགས་གོང་འོག་དང་ཚོགས་པ་ཐུན་མོང་གི་ངོས་ནས་༸གོང་ས་མཆོག་གི་བླ་ན་མེད་པའི་དབུ་ཁྲིད་ལ་ཡི་རངས་བསྔགས་བརྗོད་ཞུ་བཞིན་ཡོད་པ་དང་ལྷག་པར་མགོན་པོ་༸གང་ཉིད་མཆོག་གིས་བོད་ཀྱི་ཆོས་དང་སྐད་ཡིག   རིག་གཞུང་བཅས་ཀྱི་རང་དབང་ཐད་འཐབ་རྩོད་མཛད་བཞིན་པར་རྒྱབ་སྐྱོར་ཞུ་ངེས་ཡིན་པ་གསུངས་འདུག

ཁ་སང་༸སྐུའི་འཁྲུངས་སྐར་གྱི་ཉིན་མོ་དང་བསྟུན་བྱང་ཨ་རིའི་སྐུ་ཚབ་དོན་ཁང་དུ་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་དང་། ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་དོན་གཅོད། བཀའ་ཟུར་ཀིརྟི་རིན་པོ་ཆེ་མཆོག་བཅས་དམིགས་བསལ་སྐུ་མགྲོན་ལ་གདན་འདྲེན་ཞུས་པའི་ཐོག་ནས་༸སྐུའི་འཁྲུངས་སྐར་སྲུང་བརྩི་ཞུས་འདུག

ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་གིས་Twitter དྲ་གནས་ཐོག་མགོན་པོ་༸གང་ཉིད་མཆོག་གིས་༸སྐུ་ཚེ་གང་པོར་བྱམས་བརྩེའི་གོང་མཐོར་སླད་མཛད་འཕྲིན་བསམ་གྱིས་མི་ཁྱབ་པ་བསྐྱངས་པར་གུས་བརྩི་ཡོད་པ་དང་མགོན་པོ་མཆོག་དང་ལྷན་བོད་རྒྱའི་དཀའ་རྙོག་སེལ་ཐབས་སུ་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་གྲོས་མོལ། བོད་མི་རྣམས་ཀྱི་འགྲོ་བ་མིའི་ཐོབ་ཐང་སྐོར། དེ་བཞིན་བཙན་བྱོལ་དུ་ཡོད་པའི་བོད་མི་རྣམས་ཀྱི་དགོས་མཁོ་ལ་སོགས་པའི་གནད་དོན་ཐོག་ཕྱག་ལས་གནང་རྒྱུ་རེ་བ་ཡོད་ཅེས་གསུངས་འདུག

ད་དུང་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་མགོན་པོ་༸གང་ཉིད་མཆོག་གིས་བྱམས་བརྩེ་དང་འཚེ་མེད་ཞི་བ། ཁོར་ཡུག་སྲུང་སྐྱོབ་ཐད་བཀའ་སློབ་སྩལ་ཁག་ནི་སེམས་འགུལ་ཐེབས་གཞི་ཞིག་ཆགས་ཡོད་པར་མ་ཟད་དེང་གི་འཛམ་གླིང་ལ་ཧ་ཅང་དགོས་ངེས་ཆགས་ཡོད་སྐོར་གསུངས་པ་དང་ཆབས་ཅིག ང་ཚོས་རང་གི་རིག་གཞུང་དང་སྐད་ཡིག ཆོས་ལུགས་རང་དབང་སྲུང་སྐྱོབ་སླད་འཐབ་རྩོད་གནང་མཁན་གྱི་བོད་མི་ཡོངས་ལ་རྒྱབ་སྐྱོར་ཡོད་ཅེས་གསུངས་འདུག

གཞན་ཡང་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་སྦྲགས། ༸གོང་ས་མཆོག་༸སྐུ་ཚེ་ཡུན་དུ་བརྟན་པ་དང་དབུ་མའི་ལམ་གྱི་དགོངས་གཞི་བརྒྱུད་བོད་ལ་རང་དབང་མྱུར་དུ་ཐོབ་རྒྱུའི་རེ་སྨོན་ཞུས་འདུག རྒྱ་ནག་གིས་བོད་ནང་དུ་བོད་མི་ཚོའི་འགྲོ་བ་མིའི་ཐོབ་ཐང་ལ་མུ་མཐུད་ནས་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་ལ་ཐུགས་འཚབ་གནང་བ་དང་། སུད་སི་གཞུང་ནས་རྒྱ་ནག་ལ་བོད་ནང་གི་བོད་མིའི་གཞི་རྩའི་ཐོབ་ཐང་ལ་གུས་བརྩི་ཞུ་དགོས་ཞེས་བཀའ་གནང་དགོས་པ་གསུངས་འདུག

འཇར་མན་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Michael Brand ལགས་ཀྱིས་བོད་མི་ཙམ་མིན་པར་འཛམ་གླིང་གི་མི་འབོར་ས་ཡ་མང་པོས་༸གོང་ས་མཆོག་དང་མགོན་པོ་༸གང་ཉིད་མཆོག་གིས་འདོན་གནང་མཛད་པའི་དབུ་མའི་ལམ་གྱི་དགོངས་གཞིར་གུས་བརྩི་བཞིན་ཡོད་པ་མ་ཟད། དེ་ལྟ་བུའི་དགོངས་པ་བཞེས་ཕྱོགས་ལ་འཛམ་གླིང་གི་རང་དབང་ཅན་གྱི་རྒྱལ་ཁབ་རྣམས་ནས་རྒྱབ་སྐྱོར་གནང་འོས་པ་ཞིག་ཡིན་སྐོར་གསུངས་འདུག

ཕྱོགས་མཚུགས་འཇར་མན་གཞུང་གི་འགྲོ་བ་མིའི་ཐོབ་ཐང་འགན་འཛིན་ལྕམ་ Luise Amtsberg ལགས་ཀྱིས་ཀྱང་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་ཆབས་ཅིག བོད་ནང་རྒྱ་གཞུང་གི་གདུག་རྩུབ་མནར་གཅོད་མྱོང་བཞིན་པའི་བོད་མི་རྣམས་ལ་གདུང་སེམས་མཉམ་བསྐྱེད་ཞུས་འདུག གཞི་རྩའི་༸གོང་ས་མཆོག་གི་༸སྐུའི་འཁྲུངས་སྐར་གྱི་ཉིན་མོར་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྣམ་པ་འདྲ་མིན་ཐོག་ནས་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་ལྟར། ཇི་ནི་ཝར་སུད་སི་དང་ལིག་ཏེན་སིཌཡན་བོད་རིགས་མི་མང་སྒྲིག་འཛུགས་ཁྱབ་ཁོངས་ཚོགས་ཆུང་གིས་གོ་སྒྲིག་ཞུས་ཏེ། Tibet Park ཞེས་པར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་གཙོས་དོན་ཁང་གི་ལས་བྱེད་དང་སུད་བོད་མཛའ་གྲོགས་ཚོགས་པའི་ཚོགས་མི། དེ་བཞིན་སུད་སི་དང་ལིག་ཏེན་སིཌཡན་བོད་རིགས་མི་མང་གི་ཚོགས་གཞོན་དང་བོད་མི་བཅས་མཉམ་ཞུགས་ཀྱིས་༸སྐུའི་འཁྲུངས་སྐར་སྲུང་བརྩི་དང་ཁུལ་དེར་ཡོད་པའི་མཆོད་རྟེན་རབ་གནས་གནང་བར་མ་ཟད། བོད་ཀྱི་རྒྱལ་དར་དང་ནང་པའི་རྒྱལ་དར་སྒྲེང་འཛུགས་གནང་ཐུབ་པ་བྱུང་འདུགདབྱིན་ཡུལ་ནང་སྐུ་ཚབ་དོན་ཁང་དང་བོད་ཁང་ཐེབས་རྩས་གོ་སྒྲིག་གནང་ནས་དེ་རིང་ཕྱི་ཚེས་ ༧ ནས་ ༡༡ བར་ October Gallery ཞེས་པར་༸གོང་ས་མཆོག་གི་ཐུགས་བསྐྱེད་ཆེན་པོ་བཞིའི་སྐོར་པར་རིས་འགྲེམས་སྟོན་དང་༸སྐྱབས་རྗེ་ཀ་ལུ་རིན་པོ་ཆེ་མཆོག་ནས་ཆོས་ལུགས་མཐུན་སྒྲིལ་དང་ཁུལ་དེར་ཡོད་པའི་དགེ་བཤེས་བསྟན་འཛིན་རྣམ་དག་ལགས་ཀྱིས་བྱམས་སྙིང་རྗེ་སྐོར་གསུང་བཤད་གནང་ཡོད།  

ཤྲི་ལངྐར་ནང་དུ་ Srilankan Tibetan Buddhist Brotherhood Society ཞེས་པའི་ཤྲི་ལངྐར་བོད་ཀྱི་ནང་ཆོས་མཐུན་ཚོགས་ཀྱི་གོ་སྒྲིག་འོག་ཁ་སང་ཕྱག་ཚོད་ ༢ ཐོག་ནང་པ་དང་པཱ་ལིའི་གཙུག་ལག་སློབ་གཉེར་ཁང་དུ་༸གོང་ས་མཆོག་གི་སྐོར་དངོས་བྱུང་གློག་བརྙན་གཟིགས་འབུལ་དང་༸རྒྱལ་བ་རིན་པོ་ཆེའི་ཐུགས་བསྐྱེད་བཞི་དང་གོ་ལ་སྤྱི་ལ་ཁྱབ་པའི་བཟང་སྤྱོད་སོགས་ཀྱི་བརྗོད་གཞི་ཐོག་གཏམ་བཤད་དང་བགྲོ་གླེང་གནང་ནས་༸སྐུའི་འཁྲུངས་སྐར་སྲུང་བརྩི་ཞུས་འདུག འབྲེལ་ཡོད་པར་ཁག་གི་བདག་དབང་སྤྱི་ཚོགས་དྲ་རྒྱར་ཡོད།