༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བྱམས་བརྩེ་དང་སྙིང་རྗེ་གོང་འཕེལ་མཛད་ཐབས་ཀྱི་རླབས་ཆེན་དགོངས་གཞི་ཐོག་གློག་བརྙན་གསར་བཟོ་དང་འབྲེལ་སུད་སིའི་གློག་བརྙན་བཟོ་སྒྲིག་པའི་རུ་ཁག་ཅིག་བཞུགས་སྒར་དུ་ཆེད་བཅར་གྱིས་དེ་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཏེ་དམིགས་བཅར་འདྲི་ཞུས་འདུག ལོ་མང་རིང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་དགའ་མོས་ཆེན་པོའི་ཐོག་ནས་མགོན་པོ་༸གང་ཉིད་མཆོག་གི་བཀའ་ཆོས་མཚོན་པའི་མང་ཚོགས་ལ་ལམ་སྟོན་བཀའ་སློབ་སོགས་བསྩལ་ཡུལ་ས་གནས་ཁག་ཏུ་རྗེས་སུ་སྙེག་སྟེ་མཛད་འཕྲིན་དེ་དག་དང་འབྲེལ་བའི་༸སྐུ་པར་མང་དག་ཅིག་སྒྲོན་མྱོང་མཁན་སུད་སིའི་པར་པ་གྲགས་ཅན་སྐུ་ཞབས་ Manuel Bauer ལགས་ཀྱིས་སྣེ་ཁྲིད་འོག་ཉེ་ཆར་བཞུགས་སྒར་དུ་བཅར་བའི་གློག་བརྙན་བཀོད་སྒྲིག་རུ་ཁག་དེའི་ནང་སྐུ་ཞབས་ Manuel ལགས་ཀྱིས་གཙོས་པའི་གློག་བརྙན་བཀོད་སྒྲིག་པ་ལྕམ་ Barbara Miller ལགས་དང་བཟོ་སྒྲིག་པ་སྐུ་ཞབས་ Philip Delaquis ལགས།  དེ་བཞིན་གློག་བརྙན་གྱི་སྒྲའི་འཆར་འགོད་པ་དང་པར་པ་བཅས་མི་དྲུག་ཆེད་བཅར་ཞུས་ཡོད་པ་མ་ཟད། རྒྱ་གར་ནས་པར་ལས་ཀྱི་མི་སྣ་དྲུག་ཆེད་འབོད་གནང་འདུག བྱམ་བརྩེ་གསར་བརྗེ་ཞེས་པའི་ལས་གཞིའི་འགན་འཛིན་སྐུ་ཞབས་ Manuel Bauer ལགས་སུ་བཀའ་འདྲི་ཞུས་པར་ཁོང་གིས་༸གོང་ས་མཆོག་དང་ལྷན་དུ་མཇལ་འཕྲད་ཞུ་སྐབས་དམིགས་གསལ་གྱི་མྱོང་ཚོར་ཆེན་པོ་བྱུང་སོང་བ་དང་། ༸གོང་ས་མཆོག་ནི་བྱམས་པ་དང་བརྩེ་བ། འགྲོ་བ་མིའི་རིན་ཐང་གོང་འཕེལ་གནང་མཁན་རླབས་ཆེན་གྱི་དབུ་ཁྲིད་ཅིག་ཡིན་སྟབས། ད་ལན་ཁོང་རྣམས་ཀྱིས་བཟོ་སྒྲིག་ཞུ་རྒྱུའི་གློག་བརྙན་འདི་བརྒྱུད་ནས་འཛམ་གླིང་ཀུན་ལ་༸གོང་ས་མཆོག་གི་རླབས་ཆེན་དགོངས་གཞི་ཁྱབ་སྤེལ་ཡོང་རྒྱུར་ཆེད་དམིགས་གནང་ཡོད་པ་གསུངས་ཡོད། ཁོང་གིས་ད་དུང་གློག་བརྙན་དེ་མ་འོངས་པར་འདོན་སྤེལ་གནང་ཕྱོགས་དང་འབྲེལ་ཏེ་གློག་བརྙན་བཟོ་སྒྲིག་གནང་མཁན་ཁོངས་སུ་ཡོད་པའི་མི་སྣ་ཡོངས་རྫོགས་རང་དབང་ལྡན་པའི་གློག་བརྙན་བཀོད་སྒྲིག་པ་ཞིག་ཆགས་ཀྱི་ཡོད་སྟབས། ཁོང་རྣམས་ནས་༸གོང་ས་མཆོག་གི་མཛད་འཕྲིན་དང་འབྲེལ་བའི་གློག་བརྙན་དེའི་ཐོག་དུས་ཚོད་གང་ཙམ་གཏང་རྒྱུའི་བསམ་བློ་ཡོད་པས་ད་ཆ་གློག་བརྙན་དེ་ནམ་འདོན་སྤེལ་གནང་ཐུབ་མིན་ཐད་བཤད་ཚོད་ཐུབ་དཀའ་ཡང་གློག་བརྙན་དེ་སྤུས་ཚད་ལྡན་པ་ཞིག་བཟོ་རྒྱུའི་དམིགས་ཚད་ཡོད་ཅེས་གསུངས་སོང་། རྩ་བའི་སྐུ་ཞབས་ Manuel Bauer ལགས་ནི་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་གྱི་སུད་སིའི་པར་པ་གྲགས་ཅན་ཞིག་དང་ ཁོང་གིས་དེ་སྔོན་༸གོང་ས་མཆོག་ཐོག་ལ་ཞི་བདེའི་འགྲུལ་བཞུད་ཞེས་པའི་པར་དེབ་ཅིག་བརྩམས་ཡོད་པ་རེད། ད་ལན་ཁོང་གིས་སྣེ་ཁྲིད་པའི་སུད་སི་ནས་བཅར་བའི་གློག་བརྙན་བཟོ་སྒྲིག་རུ་ཁག་འདི་བཞུགས་སྒར་དུ་ཉིན་གྲངས་བཅུ་ཙམ་གྱི་གོང་ནས་བཅར་ཡོད་པ་དང་། བརྒྱུད་རིམ་དེའི་ཁྲོད་ཁོང་རྣམས་ནས་གཙོ་བོ་༸རྒྱལ་བའི་ཕོ་བྲང་དུ་གློག་བརྙན་དེ་འབྲེལ་གྱི་བརྙན་པར་རིགས་བླངས་འདུག་པ་མ་ཟད། དེ་རིང་སྔ་དྲོ་༸གོང་ས་མཆོག་ལ་དམིགས་བསལ་བཀའ་འདྲི་ཞུས་ཏེ་རིང་མིན་བཞུགས་སྒར་ནས་ཕྱིར་ཕེབས་གནང་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་སྐུ་ཞབས་ B.S. Yediyurappa མཆོག་སླར་ཡང་མངའ་སྡེའི་སྤྱི་ཁྱབ་བློན་ཆེན་དུ་བསྐོ་གཞག་བྱུང་བར་དགའ་བསུའི་འཚམས་འཕྲིན་བསྩལ་འདུག ༸གོང་ས་མཆོག་གིས་འཚམས་འདྲི་དེའི་ནང་སྐུ་ཉིད་ཀྱི་དབུ་ཁྲིད་ལམ་སྟོན་འོག་ཀ་ན་ཊ་ཀ་མངའ་སྡེའི་མང་ཚོགས་རྣམས་དཔལ་འབྱོར་དང་ལོངས་སྤྱོད་བཅས་པར་རོལ་ཞིང་། ཡར་རྒྱས་ཀྱི་ཕྱོགས་སུ་བསྐྱོད་ཐུབ་པའི་ཡིད་ཆེས་ཡོད་ཅེས་བཀའ་བསྩལ་བ་དང་། ལྷག་དོན་མངའ་སྡེའི་ནང་གི་དབུལ་ཕོངས་ཉམ་ཐག་པའི་མི་མང་ཚོར་དམིགས་བསལ་གཟིགས་རྟོག་ནན་པོ་གནང་སྟེ་དེ་དག་གི་འཚོ་བ་གོང་འཕེལ་གནང་བའི་ཐུགས་རེ་ཡོད་སྐོར་བཀའ་བསྩལ་འདུག   རྩ་བའི་སྔ་ལོའི་ཕྱི་ཟླ་བཞི་པའི་ནང་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་རྣམས་རྒྱ་གར་འཕགས་པའི་ཡུལ་དུ་བཙན་བྱོལ་ལ་འབྱོར་ནས་མི་ལོ་ ༦༠ འཁོར་བའི་དུས་དྲན་དང་བསྟུན་ཀ་ན་ཊ་ཀ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་ཡོད་པ་རེད། ༸གོང་ས་མཆོག་གིས་ཐེངས་འདིའི་འཚམས་འཕྲིན་ནང་དེའི་སྐོར་ལུང་འདྲེན་དང་འབྲེལ་ཏེ་ཀ་ན་ཊ་ཀ་མངའ་སྡེའི་ནང་བོད་མི་བཙན་བྱོལ་བ་མི་གྲངས་ ༣༠༠༠༠ ལྷག་ཙམ་གནས་སྡོད་གནང་བཞིན་ཡོད་པ་དང་། ཕལ་ཆེར་བོད་མི་བཙན་བྱོལ་བ་མང་ཤོས་གནས་ཡུལ་ཞིག་ཡིན་པ་མ་ཟད། བོད་ཀྱི་གདན་ས་ཁག་ལ་མཚོན་ན་རྒྱ་གར་དཔལ་ནཱ་ལེནྡཱའི་གནའ་བོའི་རིག་གནས་ལ་སློབ་གཉེར་གནང་ཡུལ་གཙོ་བོ་ཆགས་ཡོད་སྟབས། དགོན་པ་དེ་དག་ཀ་ན་ཊ་ཀ་མངའ་སྡེའི་ནང་བསྐྱར་འཛུགས་ཐུབ་པར་དགའ་སྤོབས་སྐྱེས་གཞི་ཞིག་ཡིན་པར་བཀའ་བསྩལ་འདུག    དེ་ནི་སྐབས་དེའི་རྒྱ་གར་གྱི་སྲིད་བློན་དམ་པ་སྐུ་ཞབས་ཛཝཱཧར་ལཱལ་ནེཧ་རུ་མཆོག་ནས་བཀོད་མངསགས་གནང་དོན་ལྟར་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དམ་པ་སྐུ་ཞབས་ཨེས་ནི་ཛལིཾགྷཔྤཱ་མཆོག་གིས་ཞལ་བཞེས་བཟང་པོ་གནང་བའི་བཀྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་པ་རེད་ཅེས་བཀའ་བསྩལ་དང་འབྲེལ་ཏེ། ཕྱི་ལོ་ ༡༩༥༦ ལོར་རྒྱ་གར་བྱང་ཆུབ་ཆེན་པོའི་ཆོས་ཚོགས་ནས་བདག་ཅག་གི་སྟོན་པ་ཐུབ་པའི་དབང་པོ་སྐུ་མྱ་ངན་ལས་འདས་ནས་ལོ་ ༢༥༠༠ འཁོར་བའི་དུས་སྟོན་ཐོག་༸གོང་ས་༸སྐྱབས་མགོན་ཆེན་པོ་གདན་ཞུ་ཕུལ་བ་བཞིན་རྒྱ་གར་དུ་ཆེས་ཐོག་མ་ཆིབས་བསྒྱུར་མཛད་སྐབས་དམ་པ་ཁོང་དང་མཇལ་མྱོང་ཡོད་སྐོར་བཀའ་བསྩལ་དང་ཆབས་ཅིག མགོན་པོ་མཆོག་གིས་དེ་རིང་སླར་ཡང་གོ་སྐབས་འདི་བརྒྱུད་ནས་མངའ་སྡེའི་གཞུང་མང་གཉིས་ནས་ད་བར་བོད་མི་བཙན་བྱོལ་བ་རྣམས་ལ་མཐུན་འགྱུར་གང་དགོས་ལྟར་འཐུས་སྒོ་ཚང་བའི་རོགས་སྐྱོར་གནང་དང་གནང་མུས་ལ་སྙིང་ཁོངས་རུས་པའི་གཏིང་ནས་ཐུགས་རྗེ་ཆེ་ཞེས་བཀའ་བསྩལ་མཛད་འདུག་པ་མ་ཟད། མཐའ་དོན་དུ་མགོན་པོ་༸གང་ཉིད་མཆོག་གིས་ཀ་ན་ཊ་ཀ་མངའ་སྡེའི་སྐུ་ཞབས་ B.S. Yediyurappa མཆོག་གི་དབུ་ཁྲིད་པའི་མངའ་སྡེའི་གཞུང་གི་ཕྱག་ལས་ཇི་གནང་ཀུན་འགེགས་མེད་ལམ་ལྷོང་ཡོང་བའི་ཐུགས་སྨོན་ཤུགས་དྲག་ཡོད་ཅེས་བཀའ་བསྩལ་འདུག     དེ་བཞིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འགྱུང་གནས་མཆོག་རྣམ་གཉིས་ཀྱིས་ཀྱང་བོད་གཞིས་བྱེས་གཉིས་ཀྱི་བོད་མི་ཡོངས་ཀྱི་སྐུ་ཚབ་ཞུས་ཏེ་སྐུ་ཞབས་ B.S. Yediyurappa མཆོག་སླར་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དུ་བསྐོ་གཞག་བྱུང་བར་འཚམས་འཕྲིན་བསྩལ་བ་དང་སྦྲགས། ལྷག་པར་དུ་ཀ་ན་ཊ་ཀ་མངའ་སྡེ་འདི་ནི་རྒྱ་གར་གྱི་མངའ་སྡེ་ཚང་མའི་ནང་ནས་བོད་མི་བཙན་བྱོལ་བ་མང་ཤོས་གནས་ཡུལ་ཞིག་ཡིན་པ་མ་ཟད། བོད་མིར་རང་དབང་ངང་ནས་བོད་མིའི་གཞིས་སྒར་བསྐྱར་འཛུགས་ཐུབ་ཡོད་པ་དང་བོད་མི་དག་ལ་ཤེས་ཡོན་གྱི་གོ་སྐབས་ཐོབ་པ། དེ་བཞིན་བོད་ཀྱི་ཐུན་མོང་མ་ཡིན་པའི་ལེགས་བྱང་སྲུང་སྐྱོང་དང་ཞེད་སྣང་དང་ཕྱོགས་ལྷུང་གང་ཡང་མེད་པར་བོད་བརྒྱུད་ནང་བསྟན་ཉམས་བཞེས་གནང་རྒྱུའི་ཐོབ་བཞིན་སྐོར་གསུངས་པ་དང་སྦྲགས། གོ་སྐབས་འདི་བརྒྱུད་ནས་ཀ་ན་ཊ་ཀ་མངའ་སྡེའི་གཞུང་མང་གཉིས་ནས་ངེད་ཅག་བོད་མི་བཙན་བྱོལ་བ་དག་ལ་རྒྱབ་སྐྱོར་དང་མཐུན་འགྱུར་གང་དགོས་གནང་བ་བཅས་ལ་ཐུགས་རྗེ་ཆེ་ཞེས་གསུངས་འདུག དེ་བཞིན་སྐུ་ཞབས་ B.S. Yediyurappa མཆོག་ནས་མངའ་སྡེའི་སྤྱི་ཁྱབ་བློན་ཆེན་གྱི་ཐུགས་འགན་བཞེས་རིང་ལ་མང་ཚོགས་ཀྱི་རེ་འདུན་དང་མངོན་འདོད་བཅངས་དོན་ལྟར་ལམ་ལྷོང་ཡོང་བ་དང་། ཁྱད་པར་དུ་བོད་ཀྱི་གནད་དོན་ལ་རྒྱབ་སྐྱོར་དང་བོད་མིར་མཐུན་འགྱུར་མུ་མཐུད་གནང་རྒྱུ་མ་ཟད།བོད་མི་དང་ཀ་ན་ཊ་ཀའི་མང་ཚོགས་དབར་མཛའ་འབྲེལ་ཟབ་མོ་ཡོད་པ་དེ་སྔར་ལྷག་རྒྱུན་གནས་ཐུབ་པའི་ཐུགས་རེ་ཡོད་པ་གསུངས་འདུག གཞི་རྩའི་རང་ལོ་ ༧༦ ལ་ཕེབས་པའི་སྐུ་ཞབས་ B.S. Yediyurappa མཆོག་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དུ་འདེམས་ཐོན་བྱུང་བ་ད་རེས་ཐེངས་ ༤ པ་དེ་ཆགས་ཀྱི་ཡོད་པ་རེད། སྔ་ལོའི་ཕྱི་ཟླ་ ༥ པའི་ནང་ཚོགས་པའི་མངའ་སྡེའི་འོས་བསྡུ་ཆེན་མོའི་རྗེས་སུ་ BJP ཆབ་སྲིད་ཚོགས་པར་རྒྱལ་ཁ་ཐོབ་རྗེས་སྐུ་ཞབས་ Yediyurappa མཆོག་མངའ་སྡེའི་སྤྱི་ཁྱབ་བློན་ཆེན་དུ་འདེམས་ཐོན་བྱུང་ཡོད་ཀྱང། གྲོས་ཚོགས་སུ་འཐུས་མི་འདང་ངེས་ཀྱི་རྒྱབ་སྐྱོར་མ་ཐོབ་པར་བརྟེན་ཁོང་ཉིན་གསུམ་གྱི་རྗེས་ནས་སྤྱི་ཁྱབ་བློན་ཆེན་གྱི་གོ་གནས་ནས་དགོངས་ཞུ་གནང་དགོས་བྱུང་ཡོད་པ་དང་། ཁོང་གི་ཚབ་ཏུ་ JDS དང་ Congress གནའ་འབྲེལ་ཚོགས་པའི་སྐུ་ཞབས་ HD Kumarasamy མཆོག་མངའ་སྡེའི་སྤྱི་ཁྱབ་བློན་ཆེན་དུ་བསྐོ་གཞག་བྱུང་བ་དེ་ལྟར་ཡང་། ཟླ་ ༡༩ རྗེས་སླར་ཡང་རྙོང་ཟིང་ཁྲོད་མངའ་སྡེའི་གཞུང་ཟགས་ཏེ་སྐུ་ཞབས་ B.S. Yediyurappa མཆོག་སླར་སྤྱི་ཁྱབ་བློན་ཆེན་དུ་བསྐོ་གཞག་བྱུང་བ་མ་ཟད། ཁ་སང་གྲོས་ཚོགས་སུ་འཐུས་མི་དགོས་ངེས་ཀྱི་རྒྱབ་སྐྱོར་ཐོབ་ཐུབ་པ་བྱུང་ཡོད་པ་རེད།

དེ་རིང་སྔ་དྲོ་བཞུགས་སྒར་༸རྒྱལ་བོའི་ཕོ་བྲང་དུ་རྨ་ལྷོ་སོག་རྫོང་གི་གཞིས་བྱེས་བོད་མིའི་སྐུ་ཚབ་ཞུས་ནས་རྒྱ་བལ་གཉིས་ཀྱི་མི་གྲངས་ ༡༦ སྐོར་ཞིག་གི་ཚོགས་ཆུང་གིས་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་འདུག སྐབས་དེར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་རྨ་ལྷོ་སོག་རྫོང་གི་ཡུལ་དགོན་རེ་རེའི་ལོ་རྒྱུས་རགས་ཟིན་རྣམས་ལ་གཟིགས་ཞིབ་ཀྱིས་ལྗགས་ཀློག་མཛད་པ་དང་། དགོན་ཁག་དེ་དག་ཏུ་ཆོས་འཆད་ཉན་གྱི་སློབ་སྦྱོང་ཡག་པོ་གནང་དགོས་གལ་ཡིན་པར་ལམ་སྟོན་བསྩལ་ཏེ་ཐེངས་འདིར་མཎྜལ་རྟེན་གསུམ་འདེགས་འབུལ་ཞུས་པར་ཡི་རངས་ཡོད་ཅེས་བཀའ་བསྩལ་འདུག གསར་འགོད་པས་བལ་ཡུལ་ནས་ཕེབས་པའི་རྨ་ལྷོ་སོག་རྫོང་གི་འབྲུག་ལྷ་ལགས་སུ་དེ་རིང་མགོན་པོ་༸གང་ཉིད་མཆོག་ལ་རྟེན་གསུམ་འདེགས་འབུལ་ཞུས་སྐོར་ཐོག་བཅར་འདྲི་ཞུས་པར་ཁོང་གིས་བོད་གཞིས་བྱེས་གཉིས་ཀྱི་མི་གྲངས་ཁྲི་བཞི་ལྷག་གི་ཚབ་ཞུས་ཏེ་རྟེན་གསུམ་ཕུལ་ཡོད་པ་དང་། མགོན་པོ་༸གང་ཉིད་མཆོག་ལ་མཎྜལ་རྟེན་གསུམ་ཕུལ་བ་དེས་བོད་གཞིས་བྱེས་གཉིས་ཀྱི་ཕ་ཡུལ་གཅིག་པ་དག་གིས་མགོན་པོ་མཆོག་གི་བཀའ་ཅི་གསུང་སྒྲུབ་རྒྱུའི་དམ་ཚིག་མཚོན་ཡོད་པར་ངོ་སྤྲོད་གནང་སོང་། དེ་བཞིན་ཨ་རིའི་གྲོང་ཁྱེར་ California མངའ་སྡེའི་ Anaheim གྲོང་སྡེའི་སྤྱི་ཁྱབ་པ་ཟུར་པ་སྐུ་ཞབས་ Tom tait ལགས་ཀྱིས་སྣེ་ཁྲིད་པའི་ཁུལ་དེར་རྟེན་གཞི་བྱས་པའི་ཚོང་པ་ཆེ་ཁག་བཅུ་ཙམ་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་འདུག རྩ་བའི་སྐུ་ཞབས་ Tom Tait ལགས་ཀྱིས་དེ་སྔོན་ Anaheim གྲོང་ཁྱེར་གྱི་སྤྱི་ཁྱབ་གནང་སྐབས་མང་ཚོགས་ཁྲོད་སྙིང་རྗེ་གོང་འཕེལ་དང་འབྲེལ་བའི་ལས་གཞི་མང་དག་ཅིག་སྤེལ་ཏེ་གྲོང་ཁྱེར་དེ་ city of kindness ཞེས་སྙིང་རྗེ་ལྡན་པའི་གྲོང་ཁྱེར་ཞིག་ཏུ་བསྐྲུན་རྒྱུའི་ལས་གཞི་སྤེལ་གནང་བའི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་དེར་ཚོགས་པའི་རྒྱལ་སྤྱིའི་བྱམས་བརྩེའི་ལྷན་ཚོགས་ཐོག་ཚོགས་མགོན་དུ་གདན་འདྲེན་ཞུས་པ་མ་ཟད། སྔ་ལོ་ཕྱི་ཟླ་ ༢ པའི་ནང་སྐུ་ཞབས་ཁོང་བཞུགས་སྒར་དུ་ཆེད་ཕེབས་ཀྱིས་༸གོང་ས་མཆོག་གི་གསེར་ཞལ་མཇལ་ཁ་ཞུས་ཡོད་པ་རེད། གསར་འགོད་པས་གྲོང་སྡེའི་སྤྱི་ཁྱབ་ཟུར་པ་ལགས་སུ་ཐེངས་འདིར་༸གོང་ས་མཆོག་གི་མཇལ་ཁ་ཞུ་དོན་དང་མགོན་པོ་༸གང་ཉིད་མཆོག་གིས་བཀའ་སློབ་གང་བསྩལ་སྐོར་བཅར་འདྲི་ཞུས་པར་༸གོང་ས་མཆོག་དང་མཇལ་ཁ་ཞུས་ནས་༸གང་ཉིད་མཆོག་གི་བྱིན་རླབས་ཐོབ་རྒྱུར་དམིགས་པ་ཞིག་ཡིན་པ་དང་། མགོན་པོ་མཆོག་གིས་དེང་རབས་ཀྱི་རྡུལ་ཕྲ་རབས་ཀྱི་སྐོར་བཀའ་བསྩལ་ཡོད་པ་མ་ཟད། མི་སྒེར་པ་རེ་རེས་བྱམས་བརྩེ་གོང་འཕེལ་བཏང་ནས་སེམས་ལ་འགྱུར་བ་གཏོང་རྒྱུ་དེ་གལ་ཆེན་པོ་ཡིན་པར་ལམ་སྟོན་མཛད་སྐོར་གསུངས་སོང་། ཁོང་གིས་སྔོན་ཆད་ནས་ California གྲོང་ཁྱེར་ནང་བྱམས་བརྩེའི་ལས་གཞི་ཞིག་གཉེར་གྱི་ཡོད་པ་ལྟར་ཕྱིར་ཨ་རིར་སྐྱོད་ནས་མུ་མཐུད་ལས་གཞི་དེ་རྒྱ་སྐྱེད་གནང་རྒྱུ་ཡིན་པ་གསུངས་ཡོད།

ཁ་ཉིན་ཕྱི་ཚེས་ ༢༧ ཉིན་གྱི་སྔ་དྲོ་ཚོུད་ ༩ པ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཕྱི་རྒྱལ་ཡུལ་གྲུ་ཁག་ནས་བཞུགས་སྒར་དྷ་སྟེང་བོད་ཁྱིམ་དང་ས་རཱ་བོད་ཀྱི་མཐོ་སློབ་གཉིས་སུ་དབྱར་དུས་གུང་གསེང་རིང་བོད་ཀྱི་སྐད་ཡིག་གཙོས་པའི་རིག་གནས་ལ་སློབ་གཉེར་གནང་ཆེད་ཆེད་བཅར་ཞུས་པའི་བོད་ཕྲུག་རྣམས་ལ་དམིགས་བསལ་མཇལ་ཁ་བསྩལ་བ་དང་སྦྲགས། བོད་ཀྱི་ཐུན་མོང་མ་ཡིན་པའི་སྐད་ཡིག་ལ་སློབ་སྦྱོང་གནང་དགོས་གལ་ཡིན་པའི་སྐོར་ལ་ལམ་སྟོན་མཛད་འདུག སྐབས་དེར་མགོན་པོ་༸གང་ཉིད་མཆོག་གིས་བོད་ཀྱི་ཆོས་རྒྱལ་མེས་དབོན་རྣམ་གསུམ་སྐབས་སོ་སོར་རྒྱ་གར་འཕགས་པའི་ཡུལ་ནས་དཔལ་ནཱ་ལེནྡཱའི་མཁས་པའི་དབང་པོ་བོད་ལ་ཆེད་དུ་གདན་འདྲེན་ཞུས་པ་མ་ཟད། དེ་བཞིན་རྒྱ་གར་གྱི་ཡིག་གཟུགས་ལས་བོད་ཀྱི་སྐད་དང་མཐུན་པའི་ཡིག་གཟུགས་གསར་བཟོ་གནང་བ་ལྟར་ནང་པ་སངས་རྒྱས་པའི་བཀའ་བསྟན་གཉིས་པོ་བོད་སྒྱུར་གནང་ཡོད་པ་སོགས་ངོ་སྤྲོད་ཞིབ་རྒྱས་བསྩལ་འདུག་པ་མ་ཟད།  དེ་བཞིན་རྒྱ་གར་འཕགས་པའི་ཡུལ་གྱི་དཔལ་ནཱ་ལེནྡཱའི་ཆོས་བརྒྱུད་དང་རིག་གཞུང་དྲི་མ་མེད་པར་སྔར་ནས་དུས་ད་ལྟ་བར་རྒྱུན་འཛིན་འཐུས་ཚང་བྱེད་མཁན་དེ་ང་ཚོ་བོད་པ་ཁོ་ན་ཆགས་ཡོད་སྟབས་བོད་ཀྱི་མི་རིགས་ལ་སྤོབས་པ་བྱ་འོས་པ་ཞིག་དང་། ཁྱེད་རང་ཚོའི་ངོས་ནས་བོད་ཡིག་ལ་སློབ་སྦྱོང་བྱེད་དགོས་ཞེས་ལམ་སྟོན་བསྩལ་འདུག བསྟན་པ་ལ་སློབ་གཉེར་གནང་སྐབས་གནད་ཤིན་ཏུ་ཆེ་བའི་བསྟན་པ་སྤྱི་མཚན་དང་གང་ཟག་དགོས་མཚན་ཞེས་གསུངས་སྲོལ་ཡོད་པ་ལྟར། དེ་ལ་མདོ་སྔགས་གཉིས་ཀྱི་བསྟན་པ་དབྱེ་ནས་གོ་བ་བླངས་དགོས་པ་དང་། དེའང་བསྟན་པ་སྤྱི་མཚན་ཐོག་ནས་དགོངས་པ་བཞེས་ཐུབ་ཚེ་བསྟན་པ་སྤྱིར་སྨན་པའི་དགེ་མཚན་ལྡན་ཡོད་པ་བཀའ་བསྩལ་འདུག དེ་བཞིན་མགོན་པོ་༸གང་ཉིད་མཆོག་ད་ལྟའི་ཆར་དགུང་ལོ་ ༨༤ ལ་ཕེབས་ཀྱི་ཡོད་སྟབས་འདས་པའི་༸སྐུའི་མྱོང་བར་གཞིགས་ནས་ཐུགས་བསྐྱེད་དམ་བཅའ་བཞིའི་གལ་གནད་དང་དེ་དག་གི་ངོ་སྤྲོད་མཛད་པ་དང་འབྲེལ་ཏེ་བོད་མི་ཚོས་དཔལ་ནཱ་ལེནྡཱའི་ཐུན་མིན་ཤེས་རིག་དེ་དག་གཞི་རྩར་བཞག་ཐོག་དེང་རབས་ཚན་རིག་གི་ཤེས་ཡོན་དང་ཟུང་འབྲེལ་གྱིས་འཛམ་གླིང་ཁྱོན་ལ་ཞབས་འདེགས་ཞུ་ཐུབ་པའི་ནུས་པ་ལྡན་ཡོད་པ་སོགས་བཀའ་བསྩལ་ཡོད་པ་རེད། འདི་ག་རླུང་འཕྲིན་ཁང་གི་གསར་འགོད་པས་དབྱར་དུས་གུང་གསེང་རིང་བོད་ཀྱི་སྐད་ཡིག་གཙོས་པའི་རིག་གནས་ལ་སློབ་གཉེར་ཆེད་བཅར་བའི་སློབ་ཕྲུག་ཕན་ཐོགས་ཇི་བྱུང་དང་འབྲེལ་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་བསོད་ནམས་སྲིད་གཅོད་ལགས་སུ་བཅར་འདྲི་ཞུས་པར་ཁོང་གིས་ལས་རིམ་འདི་བརྒྱུད་ནས་ཕྱི་རྒྱལ་དུ་བཞུགས་པའི་བོད་ཕྲུག་སློབ་མ་ཚོར་ཕན་ཐོགས་ཆེན་པོ་ཡོང་བཞིན་ཡོད་པ་གསུངས་སོང་བ་དང་། དེ་བཞིན་ལོ་རེ་བཞིན་དབྱར་དུས་འཛིན་གྲྭར་སློབ་ཞུགས་གནང་མཁན་ཇེ་མང་དུ་འགྲོ་མུས་ཡིན་པ་སོགས་ངོ་སྤྲོད་གནང་ཡོད། རྩ་བའི་ཐེངས་འདིའི་དབྱར་དུས་གུང་གསེང་དང་བསྟུན་ཕྱི་རྒྱལ་ཡུལ་གྲུ་ཨ་རིས་གཙོས་པའི་ཁེ་ན་ཌ། སུསད་སི། དབྱིན་ཡུལ། བྷེལ་འཇམ། ནི་ཐར་ལན་ཌི། དེ་བཞིན་ཐེ་ཝན་སོགས་ནས་བོད་ཕྲུག་སློབ་མ་ ༥༠ ལྷག་ཅིག་ཆེད་བཅར་ཞུས་འདུག་པ་མ་ཟད། ཁོང་རྣམས་ནས་དུས་ཡུན་ཟླ་བ་གཅིག་ལྷག་གི་རིང་དྷ་སྟེང་བོད་ཁྱིམ་དང་ས་རཱ་བོད་ཀྱི་མཐོ་སློབ་གཉིས་སུ་བོད་ཀྱི་སྐད་ཡིག་གཙོ་གྱུར་ནང་ཆོས་དང་སྲོལ་རྒྱུན་གྱི་ཞལ་ལག་བཟོ་སྟངས་སོགས་ཀྱིས་མཚོན་པའི་རིག་པའི་གཞུང་ལུགས་དག་ལ་སློབ་གཉེར་གནང་གི་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་དབྱིན་ཡུལ་གྱི་སྲིད་བློན་གསར་པར་འོས་འདེམས་བསྐོ་གཞག་བྱུང་བའི་སྐུ་ཞབས་ Boris Johnson མཆོག་ལ་དགའ་བསུའི་འཚམས་འཕྲིན་བསྩལ་བ་དང་འབྲེལ། སྲིད་བློན་གསར་པའི་ལས་དོན་མཐའ་དག་ལམ་ལྷོང་ཡོང་བའི་ཐུགས་སྨོན་བསྩལ་བའི་ཁྲོད་འདིར་ཁ་སང་ Hong Kong free Press ཞེས་པའི་གསར་ལམ་ཐོག་འབྲེལ་ཡོད་དཔྱད་གཏམ་ཞིག་སྤེལ་བའི་ནང་དབྱིན་ཡུལ་རྒྱལ་ཁབ་ནས་རྒྱ་ནག་གི་དབང་ཤུགས་ལས་རང་དབང་འདོད་ཀྱི་ཡོད་ཚེ་སྲིད་བློན་གསར་པ་སྐུ་ཞབས་ Boris Johnson མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ངེས་པར་དུ་ཞུ་དགོས་ཞེས་བཀོད་འདུག དེའང་རྒྱུན་དུ་རྒྱ་ནག་དང་ཧོང་ཀོང་དབར་གྱི་འབྲེལ་ལམ་སོགས་ཀྱི་གནད་དོན་ཐོག་དཔྱད་ཞིབ་གནང་མཁན་Gray Sergaent ལགས་ཀྱིས་དམིགས་བསལ་དཔྱད་གཏམ་ཞིག་སྤེལ་བའི་ནང་དེ་སྔ་དབྱིན་ཡུལ་གྱི་རྩོམ་པ་པོ་གྲགས་ཅན་ Edward Lucas ལགས་ཀྱིས་ཁོང་གི་བརྩམས་ཆོས་ཀློག་པ་པོ་རྣམས་ལ་རང་ཉིད་རང་དབང་ལྡན་པའི་རྒྱལ་ཁབ་ཅིག་གི་ནང་གནས་སྡོད་བྱེད་ཀྱི་ཡོད་མིན་གྱི་དྲི་བ་ཞིག་བཏང་བ་ལུང་འདྲེན་དང་འབྲེལ། གལ་ཏེ་ཁྱེད་ཚོའི་སྲིད་དོན་པ་རྣམས་ནས་༸གོང་ས་མཆོག་ལ་མཇལ་ཁ་ཞུ་རྒྱུའི་རང་དབང་མེད་ཚེ་རྒྱལ་ཁབ་གང་རུང་དེ་རང་དབང་ཅན་ཞིག་མིན་པ་རང་བཞིན་གྱིས་མངོན་གསལ་ཐུབ་ཀྱི་རེད་ཅེས་གསུངས་པ་དང་ཆབས་ཅིག དབྱིན་གྱི་སྲིད་བློན་ཟུར་པ་ལྕམ་སྐུ་ Theresa May མཆོག་ནི་སྐུ་ཞབས་སྲིད་བློན་ཟར་པ་ John Major ལགས་ཀྱི་རྗེས་༸གོང་ས་མཆོག་དང་ལྷན་མཇལ་འཕྲད་མ་ཞུ་མཁན་གྱི་སྲིད་བློན་ཐོག་མ་དེ་ཆགས་ཡོད་པ་གསུངས་འདུག དཔྱད་གཏམ་དེའི་ནང་ད་དུང་སྤྱིར་རྒྱལ་ཁབ་ཅིག་གི་དབུ་འཁྲིད་དང་༸གོང་ས་མཆོག་རྣམ་གཉིས་དབར་མཇལ་མོལ་གྱི་གནད་དོན་དེ་ནི་རྒྱ་ནག་གི་དྲག་པོའི་དབང་སྒྱུར་འོག་གནས་པའི་བོད་ནང་གི་བོད་མི་ཚོར་གདུང་སེམས་མཉམ་བསྐྱེད་མཚོན་པ་ཁོ་ན་མ་ཡིན་པར་རྒྱ་ནག་གི་འགོ་ཁྲིད་ཚོ་ལའང་བོད་ཀྱི་གནས་བབ་དེ་ ༡༩༥༠ ལྔ་གྲངས་བཞིན་ད་ལྟའང་སེལ་མ་ཐུབ་པར་དེ་མུར་ལྷག་ཡོད་པ་མངོན་གསལ་གནང་རྒྱུའི་མཚོན་དོན་གལ་ཆེ་ཞིག་ཡིན་པར་འགྲེལ་བརྗོད་གནང་བ་མ་ཟད། ལྕམ་སྐུ་ Teresa མཆོག་གིས་༸གོང་ས་མཆོག་གི་༸སྐུའི་འཕྲོད་བཞེས་ཀྱི་གནས་བབ་དང་ད་སྐབས་མགོན་པོ་༸གང་ཉིད་མཆོག་གི་མཛད་འཕྲིན་ཉུང་དུ་ཕྱིན་པ་སོགས་ཀྱི་རྒྱུ་མཚན་དུ་མ་ཞིག་བགྲང་ནའང། དོན་དམ་པར་ཁོང་གིས་ད་བར་༸གོང་ས་མཆོག་དང་ལྷན་མཇལ་འཕྲད་མ་ཞུ་པའི་རྒྱུ་མཚན་གཙོ་བོ་དེ་རྒྱ་ནག་གི་དཔལ་འབྱོར་སྟོབས་ཤུགས་དང་འབྲེལ་བ་ཡོད་པ་ཞིག་རེད་ཅེས་སྐྱོན་བརྗོད་གནང་འདུག དབྱིན་ཡུལ་གྱི་སྲིད་བློན་རིམ་པས་འདས་པའི་ལོ་ཤས་ནས་བོད་ཀྱི་གནད་དོན་ཐོག་བཞེངས་ཕྱོགས་མཁྲེགས་པོ་ཞིག་བཟུང་ཐུབ་མེད་པར་སྐྱོན་བརྗོད་གནང་དང་འབྲེལ། ཕྱི་ལོ་ ༡༩༩༡ ལོར་ཨ་རིའི་སྲིད་འཛིན་ལས་ཐོག་ཞིག་གིས་༸གོང་ས་མཆོག་དང་ལྷན་མཇལ་མོལ་ཐེངས་དང་པོ་ཞུས་པ་ནས་བཟུང་ད་བར་ Trump མ་གཏོགས་ཨ་རིའི་སྲིད་འཛིན་རིམ་པས་༸གང་ཉིད་མཆོག་ལ་མཇལ་ཁ་ཞུས་ཡོད་པ་འགྲེལ་བརྗོད་གནང་སྟེ། གལ་ཏེ་དབྱིན་ཡུལ་གྱི་སྲིད་བློན་གསར་པས་ལྕམ་ Theresa May མཆོག་གི་གནས་སྟངས་ལྟར་༸གོང་ས་མཆོག་ལ་མཇལ་ཁ་མ་ཞུས་པ་རེད། མ་འོངས་པར་དེ་ལམ་སྲོལ་ཞིག་ཆགས་ཉེན་ཡོད་པར་འགྲེལ་བརྗོད་དང་ཆབས་ཅིག གང་ལྟར་སྲིད་བློན་ Boros Johnson མཆོག་གིས་རང་ཉིད་ཀྱི་རྒྱལ་ཁབ་འདི་བཞིན་རྒྱ་ནག་གི་དབང་ཤུགས་འོག་མ་ལྷུང་བར་རང་དབང་ཅན་གྱི་རྒྱལ་ཁབ་ཞིག་བསྐྲུན་འདོད་ཡོད་ཚེ་ཁོང་ནས་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་ངེས་པར་དུ་མཇལ་འཕྲད་ཞུས་ཏེ་རང་དབང་ཅན་གྱི་དབུ་ཁྲིད་ཅིག་གི་རྣམ་པ་མཚོན་ཐུབ་པ་གནང་དགོས་ཞེས་གསུངས་འདུག གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ཚེས་ ༢༥ ཉིན་སྐུ་ཞབས་ Boris Johnson མཆོག་དབྱིན་ཡུལ་གྱི་སྲིད་བློན་གསར་པར་འོས་འདེམས་བྱུང་བར་དགའ་བསུའི་འཚམས་འཕྲིན་བསྩལ་ནས་བོད་མིར་བློ་ཐག་ཉེ་བའི་དབྱིན་ཡུལ་གྱི་མཛའ་གྲོགས་དག་གིས་བོད་མིའི་གཞི་རྩའི་རང་དབང་དང་མཚན་མཐོང་ལ་སྨན་པའི་རྒྱབ་སྐྱོརཤུགས་ཆེ་དང་ཧ་ཅང་དགའ་མོས་གནང་དང་གནང་བཞིན་པར་བསྔགས་བརྗོད་མཛད་པ་དང་ཆབས་ཅིག་ཏུ་ལོ་རྒྱུས་ཐོག་བོད་དང་དབྱིན་ཡུལ་དབར་ཡུན་རིང་ནས་འབྲེལ་བ་དམིགས་བསལ་ཞིག་ཡོད་པ་ལྟར། དུས་ད་ལྟའང་ང་ཚོ་དང་དེ་སྔ་ཕྱི་ལོ་ ༡༩༥༩ གོང་བོད་ནང་ཕྱག་ལས་གནང་མྱོང་མཁན་གྱི་ཨིན་ཇིའི་གཞུང་ཞབས་པ་ཚོའི་ནང་མིའི་དབར་མཛའ་བརྩེའི་འབྲེལ་བ་རྒྱུན་སྐྱོང་བྱེད་བཞིན་ཡོད་ཅེས་བཀའ་བསྩལ་ཡོད་པ་རེད། ༸གོང་ས་མཆོག་གིས་ད་དུང་དབྱིན་ཡུལ་དེ་ཡོ་རོབ་མཐུན་ཚོགས་ཀྱི་སྒྲིག་འཛུགས་ནས་ཕྱིར་འཐེན་གནང་བཞིན་པའི་གནད་དོན་དང་འབྲེལ་བའི་ཐད་༸གང་ཉིད་མཆོག་ནས་དགོངས་ཚུལ་ཇི་ཡོད་བསྩལ་ཟིན་སྐོར་བཀའ་བསྩལ་དང་སྦྲགས། མགོན་པོ་མཆོག་ནི་ཡུན་རིང་ནས་རྒྱལ་ཁབ་སོ་སོའི་སྒེར་གྱི་ཁེ་ཕན་ལས་སྤྱིའི་སྒྲིག་འཛུགས་དེ་གལ་ཆེ་བར་རྩིས་ཏེ་སྒྲིག་འཛུགས་དེ་འདྲ་ཞིག་གསར་འཛུགས་གནང་ཐུབ་པའི་ཡོ་རོབ་སྤྱི་མཐུན་ཚོགས་པའི་སྒྲིག་འཛུགས་སམ་སྒྲོམ་གཞིར་རྒྱབ་སྐྱོར་དང་ཡི་རངས་བསྔགས་བརྗོད་མཛད་མཁན་ཞིག་ཡིན་པ་དེ་ལྟར་ཡང་། ཕྱི་ལོ་ ༢༠༡༦ ལོར་དབྱིན་ཡུལ་ནང་རྒྱལ་ཡོངས་འོས་བསྡུ་ཆེན་མོ་གནང་བ་ལྟར་སྐབས་དེར་ཨིན་ཡུལ་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ནས་ཕྱིར་འཐེན་གནང་རྒྱུའི་མང་ཚོགས་ཀྱི་དགོངས་ཚུལ་བསྡུ་ལེན་གནང་སྟེ་ཐག་གཅོད་གནང་བ་དེར་༸གོང་ས་མཆོག་ནས་གུས་བརྩི་ཡོད་སྐོར་བཀའ་བསྩལ་འདུག མཐར་མགོན་པོ་༸གང་ཉིད་མཆོག་གིས་དབྱིན་ཡུལ་དེ་བཞིན་ཡུ་རོབ་སྤྱི་མཐུན་ཚོགས་པའི་སྒྲོམ་གཞི་ནས་ཕྱིར་ཐོན་པའི་མཇུག་འབྲས་གང་ཡོང་མིན་ལ་ལྟོས་མེད་དབྱིན་ཡུལ་དེ་མུ་མཐུད་གཅིག་ལ་གཅིག་བརྟེན་གྱི་འཛམ་གླིང་འདིིའི་ནང་གཞན་ལ་བཟང་པོའི་ཤུགས་རྐྱེན་འཇོག་ཐུབ་མཁན་གྱི་རྒྱལ་ཁབ་ཅིག་འགྱུར་བའི་ཐུགས་རེ་ཡོད་སྐོར་བཀའ་སྩལ་བ་དང་ཆབས་ཅིག དབྱིན་ཡུལ་གྱི་སྲིད་འཛིན་གསར་པ་མཆོག་གི་ལས་དོན་མཐའ་དག་ལམ་ལྷོང་ཡོང་བའི་ཐུགས་སྨོན་བཅས་མཛད་འདུག

ཟླ་བ་འདིའི་ཚེས་ ༡༧ ཉིན་ཐེ་ཝན་གཞུང་འཛིན་མང་གཙོ་ཡར་ཐོན་ཚོགས་པའི་དྲུང་ཆེ་སྐུ་ཞབས་ Lo Wen-jia ལགས་ཀྱིས་སྣེ་ཁྲིད་འོག་ཡར་ཐོན་ཚོགས་པའི་སྤྱི་དམངས་འབྲེལ་ལམ་སྡེ་ཚན་གྱི་སྤྱི་ཁྱབ་ངེས་སྟོན་པ་སྐུ་ཞབས་ Hsieh Yu-Li ལགས་དང་ཚོགས་པའི་མགྲིན་ཚབ་པ།  སྤྱི་དམངས་འབྲེལ་ལམ་སྡེ་ཚན་གྱི་ངེས་སྟོན་པ་གཞོན་པ་སྐུ་ཞབས་ Wen Lii ལགས་བཅས་བཞུགས་སྒར་དུ་ཆེད་བཅར་གྱིས་ཚེས་ ༡༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་ཁ་ཞུས་ཡོད་པ་རེད།  སྐུ་ཞབས་ Lo Wen-jia ལགས་ཀྱིས་༸གོང་ས་མཆོག་གི་མཇལ་ཁ་ཞུས་རྗེས་གསར་འགོད་པའི་བཅར་འདྲི་དང་ལེན་གྱིས་ད་རེས་འཚམས་གཟིགས་འདི་ཐེ་ཝན་གྱི་མང་གཙོ་ཡར་ཐོན་ཚོགས་པའི་ཚོགས་གཙོའི་སྐུ་ཚབ་ཐོག་ནས་བཅར་བ་དང་། གཙོ་བོ་༸གོང་ས་མཆོག་གི་༸སྐུའི་འཁྲུངས་སྐར་ལ་དགའ་བསུའི་འཚམས་འདྲི་ཞུ་ཆེད་ཡིན་ཞེས་གསུངས་སོང་བ་དང་། ལྷག་དོན་ཚོུད་གཅིག་ཙམ་གྱི་མཇལ་མོལ་དེའི་རིང་མགོན་པོ་༸གང་ཉིད་མཆོག་དང་ལྷན་ཐེ་ཝན་གྱི་མང་གཙོ་འཕེལ་རྒྱས། སླད་མར་ཐེ་ཝན་དང་བོད་གཉིས་ཀྱི་རང་དབང་རྩོད་ལེན་གནང་ཕྱོགས་ཀྱི་དགོངས་ཚུལ་བརྗེ་ལེན་གནང་བ་མ་ཟད། ༸གོང་ས་མཆོག་ནས་ཐེ་ཝན་གྱི་མང་གཙོ་སྟོབས་ཤུགས་དེ་གནད་ཆེ་ཞིག་ཡིན་སྐོར་བཀའ་སློབ་ནན་པོ་བསྩལ་བ་དང་ཆབས་ཅིག་ཏུ་ཐེ་ཝན་གྱི་མང་གཙོ་སྟོབས་ཤུགས་དེ་ཐེ་ཝན་གྱི་མ་རྩ་ཆེ་ཤོས་ཡིན་པར་ལམ་སྟོན་མཛད་སྐོར་གསུངས་སོང་།  དེ་བཞིན་ཁོང་གིས་༸གོང་ས་མཆོག་ལ་ཐེ་ཝན་དང་བོད་གཉིས་ནས་ཐུན་མོང་གི་གདོང་ལེན་གནང་ས་དེ་རྒྱ་ནག་དམར་ཤོག་ཚོགས་པའི་གཞུང་ཆགས་ཡོད་པ་དང་། ཐེ་ཝན་མི་རིགས་ནས་རང་ཉིད་ཀྱི་མང་གཙོ་སྲུང་སྐྱོབ་བྱེད་དགོས་པ་མ་ཟད་སྒོས་འཛམ་གླིང་ཁྲོད་ལ་མང་གཙོ་རྩོད་མཁན་ཚོར་རྒྱབ་སྐྱོར་གནང་དགོས་པའི་འོས་འགན་ཡོད་སྐོར་སྙན་གསེང་ཞུས་ཡོད་པ་གསུངས་ཡོད། མཇལ་འཕྲད་དེའི་ཁྲོད་རིག་གཞུང་གི་སྟོབས་ཤུགས་དང་བོད་བརྒྱུད་ནང་བསྟན་གྱི་རིན་ཐང་སོགས་ཀྱི་ཐོག་བཀའ་མོལ་གནང་བ་དང་ཕྱོགས་མཚུངས་༸སྐུའི་ཡང་སྲིད་ཀྱི་གནད་དོན་ཐད་ལའང་བཀའ་མོལ་གནང་འདུག སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་དགུང་ལོ་ ༡༠༠ ལྷག་བར་དུ་༸སྐུ་འཚོ་བཞུགས་མཛད་རྒྱུ་དང་འབྲེལ། ༸སྐུའི་ཡང་སྲིད་ཐད་དམར་ཤོག་ཚོགས་པའི་འཐུས་མི་ནས་ཐག་གཅོད་བྱེད་རྒྱུའི་ཐོབ་ཐང་གང་ཡང་མེད་པར་བཀའ་བསྩལ་བ་མ་ཟད།  སྐུ་ཞབས་ Lo Wen-jia ལགས་ནས་༸སྐུའི་ཡང་སྲིད་དེ་ཐེ་ཝན་ནང་འཁྲུངས་སྲིད་དམ་ཞེས་བཀའ་འདྲི་ཞུས་པར་༸གོང་ས་མཆོག་གིས་དེ་ཡོང་སྲིད་པ་དང་ནང་པའི་རྒྱལ་ཁབ་ནང་༸སྐུའི་ཡང་སྲིད་འཁྲུངས་ངེས་ཡིན་སྐོར་བཀའ་བསྩལ་ཡོད་སྐོར་གསུངས་ཡོད། ལྷག་དོན་ཁོང་གིས་བོད་མིར་བརྡ་ལན་དང་འབྲེལ་ཏེ་ཐེ་ཝན་དང་བོད་དབར་གདོང་ལེན་གནང་ཡུལ་དང་དཀའ་ངལ་གཅིག་མཚུངས་ཡིན་པས་ང་ཚོ་མཉམ་རུབ་ཀྱི་ཐོག་ནས་དེར་འབད་རྩོད་གནང་དགོས་པ་གསུངས་སོང་བ་དང་། དེ་བཞིན་མགྲིན་ཚབ་པ་སྐུ་ཞབས་ Wen Lii ལགས་ཀྱིས་བོད་མིའི་མང་གཙོའི་མྱོང་བ་དེ་ཐེ་ཝན་ལ་སེམས་འགུལ་ཐེབས་གཞི་ཞིག་ཏུ་གྱུར་བ་མ་ཟད། ང་ཚོའི་གནས་སྟངས་ཛ་དྲག་ཅི་འདྲ་ཞིག་གི་འོག་ལྷུང་ཀྱང་མང་གཙོའི་ལྟ་གྲུབ་དང་ལམ་སྲོལ། འགྲོ་བ་མིའི་ཐོབ་ཐང་དང་རང་དབང་བཅས་འགྲོ་བ་མིའི་རིན་ཐང་ཁག་མུ་མཐུད་ནས་སྲུང་གནང་དགོས་པའི་བརྡ་ལནགནང་བས་དེའི་ཐེ་ཝན་ཙམ་མ་ཟད་ཧོང་ཀོང་དང་ཡུ་གུར་སོགས་རྒྱའི་དབང་སྒྱུར་འོག་ཏུ་ལྷུང་བའི་མི་རིགས་ཡོངས་ལ་སེམས་འགུལ་ཐེབས་སྐོར་གསུངས་སོང་།  རྩ་བའི་ཐེ་ཝན་ནང་མང་གཙོ་ཡར་ཐོན་ཚོགས་པས་གཞུང་འཛིན་པའི་རྗེས་སུ་༸རྒྱལ་བའི་བཞུགས་གནས་བཞུགས་སྒར་དྷ་རྨ་ས་ལར་སྐུ་ཚབ་ཆེད་བཅར་གནང་བ་ཆེས་ཐོག་མ་ཆགས་ཀྱི་ཡོད་པ་དང་། ཕྱི་ཟླ་ ༧ ཚེས་ ༡༧ ནས་ ༡༩ བར་ཉིན་གྲངས་གསུམ་གྱི་མཛད་རིམ་ཁྲོད་ཐེ་ཝན་ནས་བོད་མི་ལ་མཛའ་གྲོགས་ཀྱི་རང་བཞིན་མཚོན་སླད་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག  དེ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་དང་ཐུག་འཕྲད་གནང་བ་མ་ཟད།  ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་སུ་སྐོར་སྐྱོད་གནང་ཡོད་པ་རེད།

དེ་རིང་སྔ་དྲོ་ཚོུད་ ༡༠ པ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གཙུག་ལག་སློབ་གཉེར་ཁང་ཁག་གཅིག་གི་སློབ་ཕྲུག་བཅོ་ལྔ་ལ་༸རྒྱལ་བའི་གཟིམ་ཆུང་མཇལ་ཁ་བསྩལ་བ་དང་ལྷག་དུ་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་གཙོ་གྱུར་འགྲོ་བ་མིའི་རིགས་ཀྱི་རིན་ཐང་དང་འཛམ་གླིང་གི་ཞི་བདེ་སོགས་ཀྱི་སྐོར་ལ་ལམ་སྟོན་མཛད་འདུག སྐབས་དེར་མགོན་པོ་༸གང་ཉིད་མཆོག་གིས་འགྲོ་བ་མིའི་རང་གཤིས་ནི་སྙིང་རྗེ་དང་ལྡན་པ་ཞིག་ཡིན་པར་བཀའ་བསྩལ་ཏེ་མིའི་རིགས་ཡོད་ཚད་གཅིག་སྒྲིལ་གྱིས་མཉམ་གནས་བྱེད་རྒྱུ་དེ་གལ་ཆེན་པོ་ཡིན་པ་དང་། དེ་བཞིན་དེང་དུས་ཀྱི་རྒྱལ་སྤྱིའི་ཤེས་ཡོན་སྲིད་བྱུས་དེ་དངོས་གཙོ་རང་ལུགས་ལ་གཞིར་བཞག་པ་ཞིག་ཡིན་པ་བཀའ་ཕེབས་དང་སྦྲགས། དངོས་གཙོ་རང་ལུགས་ཁོ་ནས་མི་འདང་བར་དེང་དུས་ཀྱི་ཤེས་ཡོན་སློབ་གསོའི་ནང་མིའི་ནང་སེམས་ཀྱི་འཕྲོད་བསྟེན་ལ་ཕན་པའི་གནའ་བོའི་རྒྱ་གར་གྱི་རིག་གཞུང་དང་ཤེས་ཡོན་དེ་འཇོག་དགོས་གལ་ཡིན་པ་ལམ་སྟོན་མཛད་འདུག གསར་འགོད་པས་སློབ་ཕྲུག་ཚོགས་པ་དེའི་ཚོགས་གཙོ་ Rachal Posner ལགས་སུ་མཇལ་ཁའི་སྐོར་ལ་བཅར་འདྲི་ཞུས་པར་ཁོང་གིས་ཐེངས་འདིའི་སྐོར་སྐྱོད་དེ་ནི་རྒྱལ་སྤྱིའི་འཚོ་བ་དང་རྒྱ་གར་གྱི་སྲོལ་རྒྱུན་གྱི་རིག་གཞུང་ཞེས་པའི་ལས་གཞིའི་འོག་ཨ་རིའི་སློབ་གྲྭ་འདྲ་མིན་ཁག་བཅོ་ལྔ་ལྷག་གི་འཐུས་ཚབ་སློབ་མ་དྷ་སར་ཆེད་བཅར་ཞུས་ཡོད་པ་ལྟར། དེ་རིང་༸གོང་ས་མཆོག་གི་མཇལ་ཁ་ཞུ་རྒྱུའི་གོ་སྐབས་བྱུང་བ་ནི་སྒྱུ་འཕྲུལ་ལྟ་བུ་ཞིག་ཡིན་པར་འགྲེལ་བརྗོད་ཀྱིས་དགའ་པོ་ཞེ་དྲག་བྱུང་སོང་ཞེས་ངོ་སྤྲོད་གནང་སོང་། དེ་དང་འབྲེལ་ནས་ཁོང་གིས་དྷ་སར་བཅར་དོན་གཙོ་བོ་ནི་རང་ཉིད་ཨ་རིའི་མི་སེར་ཞིག་ཡིན་སྟབས་བོད་མིའི་སྐྱབས་བཅོལ་གྱི་གནས་སྟངས་དང་འཐབ་རྩོད་ཀྱི་ངོ་བོ་བཅས་ཀྱི་སྐོར་ལ་རྒྱུས་ལོན་གནང་རྒྱུ་དེ་གལ་ཆེན་པོ་ཡིན་པ་ལྟར།  རྒྱལ་སྤྱིའི་ཐོག་གནས་ཚུལ་དེའི་བརྡ་ལན་འཕྲོད་པའི་ཐོག་ནས་ནམ་ཞིག་བོད་ལ་རང་དབང་ཐོབ་སླད་དུ་རྒྱབ་སྐྱོར་གནང་དགོས་གལ་ཡིན་པ་གསུངས་ཡོད།   དེ་བཞིན་ཇཱོན་ཟེར་བའི་སློབ་ཕྲུག་ཅིག་ལ་བོད་པའི་སྤྱི་ཚོགས་ནང་སླེབས་ནས་ཚོར་བ་ཇི་བྱུང་ཐོག་བཅར་འདྲི་ཞུས་པར་ཁོང་གིས་སྔོན་ཆད་བོད་པའི་སྤྱི་ཚོགས་ཀྱི་སྐོར་ལ་ཤེས་རྟོགས་གང་ཡང་མེད་ནའང་། ཐེངས་འདིར་བོད་པའི་སྤྱི་ཚོགས་སུ་བསླེབས་པ་དང་བསྟུན་ནས་བོད་མིའི་སྐྱབས་བཅོལ་གྱི་གནས་སྟངས་དང་བོད་མིའི་སྒྲིག་འཛུགས་ཀྱི་སྐོར་ལ་ཤེས་རྟོགས་བྱུང་བ་མ་ཟད། རྒྱ་ནག་གིས་བོད་ས་བཙན་བཟུང་བྱས་ཟིན་ནའང་བོད་མི་རྣམས་ཀྱིས་འཚེ་མེད་ཞི་བའི་ལམ་ནས་རང་དབང་འཐབ་རྩོད་གནང་བཞིན་པ་དེ་ནི་ཡུལ་གཞན་དུ་མཐོང་དཀོན་པའི་སྣང་ཚུལ་ཞིག་ཆགས་སྐོར་གསུངས་སོང་བ་དང་ཆབས་ཅིག བོད་དོན་བདེན་མཐའ་གསལ་རྒྱུར་དུས་ཡུན་རིང་པོ་འགོར་སྲིད་ཀྱང་བོད་མི་རྣམས་སེམས་ཤུགས་མི་ཆག་པར་ཡིད་ཆེས་བརྟན་པོ་གནང་རོགས་ཞེས་གསུངས་ཡོད།

ཉེ་ལམ་རྒྱལ་སྤྱིའི་གསར་ལམ་ཁག་ཏུ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་གནས་ཚུལ་ཁག་གཅིག་ཐོན་བཞིན་པ་ལྟར་དེ་རིང་ DNA གསར་ཁང་གིས་རྒྱལ་ཁབ་ཁག་གི་ཆབ་སྲིད་དང་རིག་གཞུང་ཐོག་བཤད་པ་དང་དཔྱད་རྩོམ་སྤེལ་མཁན་སྐུ་ཞབས་ Prasenjit Chowdhury ལགས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དང་དེར་རྒྱ་དཀར་ནག་གཉིས་ཀྱི་བཞེངས་ཕྱོགས་སོགས་དང་འབྲེལ་བའི་དཔྱད་གཏམ་ཞིག་སྤེལ་འདུག དེའི་ནང་སྐུ་ཞབས་ Prasenjit Chowdhury ལགས་ཀྱིས་ཉེ་ཆར་བོད་རང་སྐྱོང་ལྗོངས་དམར་ཤོག་ཚོགས་པའི་དྲིལ་བསྒྲགས་ཚན་པའི་འགན་འཛིན་གཞོན་པ་ Wang Neng Sheng དང་། པེ་ཅིང་དུ་རྟེན་གཞི་བྱས་པའི་བོད་རིག་པའི་ཞིབ་འཇུག་བསྟི་གནས་ཁང་གི་སྤྱི་ཁྱབ་ Zha Luo ཟེར་བ་གཉིས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ནི་རྒྱ་ནག་རྒྱལ་ནང་གི་གནད་དོན་དང་འབྲེལ་བ་ཆགས་ཀྱི་ཡོད་སྟབས། རྒྱ་གར་གཞུང་ལ་ཐེ་བྱུས་གནང་རྒྱུའི་དབང་ཆ་གང་ཡང་མེད་པ་མ་ཟད་གལ་སྲིད་རྒྱ་གར་གཞུང་ནས་བཙན་བྱོལ་བོད་གཞུང་ཟེར་བས་བདམས་པའི་༸སྐུའི་ཡང་སྲིད་ལ་ངོས་འཛིན་ཞུ་ཚེ་རྒྱ་གར་དང་རྒྱ་ནག་དབར་གྱི་ཆབ་སྲིད་གནད་དོན་ལ་དོ་ཕོག་ཤུགས་ཆེར་འགྲོ་ངེས་ཡིན་པའི་ཉེན་བརྡ་བཏང་བ་ལུང་འདྲེན་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་ཨ་རིའི་གྲོས་ཚོགས་ཀྱིས་རྒྱ་ནག་ནས་ངོས་འཛིན་ཞུས་པའི་༸སྐུའི་ཡང་སྲིད་ལ་ངོས་ལེན་མེད་ཅེས་ཡོངས་བསྒྲགས་གནང་བ་ལྟར། རྒྱགར་གཞུང་ནས་རྒྱ་དཀར་ནག་གཉིས་ཀྱི་གནད་དོན་ཐོག་རྒྱ་ནག་ལ་ཆེས་དགའ་དགའ་དང་ཞི་འཇམ་གྱི་རྣམ་འགྱུར་མ་བསྟན་པར་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་བཞེངས་ཕྱོགས་བརྟན་པོ་ཞིག་འཛིན་དགོས་པའི་སྐུལ་མ་གནང་འདུག ཁོང་ནས་དེ་སྔ་ཕྱི་ལོ་ ༡༩༥༤ ལོར་རྒྱ་གར་གྱི་སྲིད་བློན་ནེཧ་རུ་མཆོག་གིས་བོད་དེ་རྒྱ་ནག་གི་ཆ་ཤས་ཡིན་པའི་གྲོས་མཐུན་ལ་མཚན་རྟགས་བསྐྱོན་པ་དང་། ཕྱི་ལོ་ ༢༠༠༣ རྒྱ་ནག་གིས་འབྲས་ལྗོངས་ས་མཚམས་ས་ཁུལ་ཁག་ཅིག་རྒྱ་ནག་གི་ཆ་ཤས་ཡིན་སྐོར་བརྗོད་སྐབས་གནད་དོན་འགྲིག་འཇགས་ཡོངས་ཐབས་སུ་སྲིད་བློན་ Atal Bihari Vajpayee མཆོག་གིས་སླར་བོད་དེ་རྒྱ་ནག་གི་ཤས་ཡིན་སྐོར་གསུངས་པ་དང་། དེ་བཞིན་ད་ལྟའི་རྒྱ་གར་གཞུང་འཛིན་ཚོགས་པའི་ངོས་ནས་གཞུང་འབྲེལ་གནད་ཡོད་མི་སྣ་རྣམས་བོད་མིའི་སྒྲིག་འཛུགས་ཀྱིས་གོ་སྒྲོག་ཞུས་པའི་མཛད་རིམ་ཐོག་མཉམ་ཞུགས་གནང་མི་ཆོག་པའི་བརྡ་ཁྱབ་བཏང་ཡོད་པ་སོགས་ལུང་འདྲེན་གྱིས་རྒྱ་གར་གཞུང་ནས་མུ་མཐུད་འདས་པའི་ལོ་ངོ་བཅུ་ཕྲག་ཁ་ཤས་ནང་གི་གནང་སྟངས་ལྟར་རྒྱ་ནག་ལ་འཇིགས་སྣང་ཁོ་ན་གནང་ནས་བཞུགས་ཚེ་རིམ་པས་རྒྱལ་སྤྱིའི་ཐོག་ནས་རྒྱ་གར་ལ་གཟིགས་ཕྱོགས་མི་ལེགས་པ་ཞིག་ཡོང་ངེས་ཡིན་པ་གསུངས་འདུག ལྷག་དུ་སྐུ་ཞབས་ Prasenjit Chowdhury ལགས་ནས་རྒྱ་གར་གཞུང་ནས་རྒྱ་ནག་གི་འདོད་མོས་ལྟར་འདས་པའི་ལོ་ངོ་དེ་དག་ཁྲོད་དུ་བོད་འདི་རྒྱ་ནག་གི་ཆ་ཤས་རེད་ཅེས་བརྗོད་པ་བཞིན་ཡོད་ཀྱང་། རྒྱ་དཀར་ནག་དབར་གྱི་ས་མཚམས་གནད་དོན་དེ་ནི་ད་ལྟའང་ཀྱ་གེ་ཀྱོག་གེ་ངང་གནས་ཡོད་པར་འགྲེལ་བརྗོད་དང་འབྲེལ་ཏེ་རྒྱ་གར་གཞུང་ནས་འདས་པའི་ལོ་ངོ་བཅུ་ཕྲག་ཁ་ཤས་གོང་ནས་བོད་ཐོག་འཛིན་པའི་སྲིད་བྱུས་ལ་གྲུབ་འབྲས་ཐོན་ཡོད་མེད་ལ་དཔྱད་ཞིབ་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་རྒྱ་ནག་ལ་རྒྱབ་སྐྱོར་གནང་ཚེ་དེ་སྔ་རྒྱ་གར་གྱིས་བོད་ཐོག་ནོར་འཁྲུལ་བཟོས་ཟིན་པའི་སྲིད་བྱུས་ཐོག་ཁ་སྣོན་ཆགས་རྒྱུ་ཡིན་པ་དང་། རྒྱ་ནག་གཞུང་ནས་ཀྱང་༸སྐུའི་ཡང་སྲིད་ཀྱི་གནད་དོན་དེ་རྒྱ་དཀར་ནག་དབར་གྱི་ས་མཚམས་གནད་དོན་དང་འབྲེལ་བ་བཏགས་ཚེ་དེས་རྒྱ་ནག་གཞུང་ནས་རྒྱ་གར་གཞུང་ལ་ཡིད་ཆེས་མེད་པའི་རྣམ་པ་ཞིག་མཚོན་གྱི་རེད་ཅེས་ནན་པོ་གསུངས་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ཕྱི་ཟླ་ ༣ ཚེས་ ༡༨ ཉིན་ Reuters  གསར་ཁང་གི་བཅར་འདྲིར་བཀའ་ལན་མཛད་སྐབས་མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་ངོས་འཛིན་བྱས་པའི་གཅིག་བཅས་གཏན་འབེབས་བྱུང་ཚེ། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས་རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་ནན་བསྩལ་བ་དང་ཆབས་ཅིག མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་ཞག་མཛད་བཞིན་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པའི་ནང་ལ་འཁྲུངས་སྲིད་སྐོར་བཀའ་བསྩལ་ཡོད་པ་རེད། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་ནས་༸སྐུའི་ཡང་སྲིད་ཀྱི་གནད་དོན་དང་འབྲེལ་ཏེ་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མགོན་པོ་༸གང་ཉིད་མཆོག་གི་ཡང་སྲིད་དེ་༸རྒྱལ་མཆོག་༸རྗེ་དགེ་འདུན་གྲུབ་པའི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང་། བོད་མི་གཙོས་པའི་དད་ལྡན་མང་ཚོགས་རྣམས་ལ་གོ་བསྡུར་གྱིས་༸རྒྱལ་དབང་༸སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་གནང་རྒྱུ་ཡིན་པ་མ་ཟད། གལ་སྲིད་༸སྐུ་ཕྲེང་བཅོ་ལྔ་པའི་ཡང་སྲིད་དགོས་གལ་དུ་གཟིགས་ཚེ་དེའི་གནང་སྒོའི་འགན་དབང་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་གི་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་ཚོས་མཚོན་པའི་སྲིད་དབང་འཛིན་པ་སུ་ཞིག་ལའང་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པ་བཅས་ཀྱི་བཀའ་སློབ་ནན་པོ་ཕེབས་ཡོད་པ་རེད།  

བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་འདི་ལོར་ཕྱི་ལུགས་ལྟར་དགུང་ལོ་བརྒྱད་ཅུ་གྱ་བཞིར་སོན་པ་ལྟར། དགུང་ནའི་བབ་དང་སྐུའི་འཕྲོད་བཞེས་ཀྱི་གནས་སྟངས་ཆ་ནས་ད་ཆ་༸མགོན་པོ་གང་ཉིད་ཀྱི་ཕྱི་ཕྱོགས་ཀྱི་མཛད་འཆར་ཡོད་ཚད་ཉུང་འཕྲི་བྱས་ཏེ་བཞུགས་སྒར་གྱི་ཁུལ་དུ་སྐུ་བཞུགས་གནང་བཞིན་ཡོད་ནའང་།  ད་སྐབས་རྒྱལ་སྤྱིའི་རྒྱལ་ཁབ་འདྲ་མིན་གྱི་མི་གྲངས་མང་པོ་ཆེད་དུ་རྡ་སར་བཅར་སྟེ་མགོན་པོ་གང་ལ་མཇལ་བཅར་ཞུ་མཁན་རྒྱུན་ཆད་མེད་པར་ཡོང་བཞིན་པ་ལྟར། དཔལ་ལྡན་དགའ་ལྡན་ཕོ་བྲང་གིས་བདུན་ཕྲག་གཅིག་གི་ནང་དུ་ཐེངས་གསུམ་ལ་མཇལ་བཅར་བ་རྣམས་ལ་མཇལ་ཁ་སྩོལ་རྒྱུའི་གོ་སྐབས་གནང་གི་ཡོད་པ་རེད། དེ་འབྲེལ་འདི་ག་རླུང་འཕྲིན་ཁང་གི་གསར་འགོད་པ་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་བཅར་སྐབས་རྒྱལ་སྒོའི་ཕྱི་ཕྱོགས་སུ་ཨུ་རུ་སུ་དང་ལྷོ་ཀོ་རི་ཡ། དེ་བཞིན་རྒྱལ་གར་ལྷོ་ཕྱོགས་དང་འབྲུག་བཅས་ནས་ནས་གཟབ་འཕྱོར་ལེགས་པར་སྤྲོས་པའི་ཕྱི་རྒྱལ་མི་རིགས་མང་དག་ཅིག་མཇལ་རྒྱུ་འདུག་པ་དང་། དེའི་ཁོངས་སུ་དུས་རྒྱུན་ནས་སློབ་གྲྭ་དང་སྨན་ཁང་སོགས་ཆེད་འཛུགས་ཀྱིས་ཨེ་ཤ་ཡའི་རྒྱལ་ཁབ་སྐྱོ་བོ་ཁག་ལ་རོགས་རམ་བྱེད་མཁན་ལྷོ་ཀོ་རི་ཡའི་བཙུན་མ་ Neung Haeng ལགས་དང་ཕྱག་རོགས་ཁག་གཅིག་འདུག་པ་དང་། ཁོང་གིས་མཇལ་ཁའི་སྐབས་༸གོང་ས་མཆོག་ལ་ཁོ་མོས་རྒྱ་གར་ལྷོ་ཕྱོགས་ཀྱི་འབྲས་སྤུངས་བློ་གསལ་གླིང་གི་དགེ་འདུན་པ་ཁག་གཅིག་གདན་ཞུས་ཀྱིས་ནང་ཆོས་ཀྱི་སློབ་སྦྱོང་གནང་རྒྱུདང་དེ་བཞིན་ཀོ་རི་ཡའི་ནང་༸དཔལ་ནཱ་ལེནྡཱའི་ཆོས་བརྒྱུད་འཛིན་སྐྱོང་སྤེལ་གསུམ་གྱི་ལས་དོན་ཁག་གཅིག་གི་སྐོར་ལ་བཀའ་སློབ་ལམ་སྟོན་ཞུས་འདུག དཔལ་ལྡན་དགའ་ལྡན་ཕོ་བྲང་ཡིག་ཚང་གིས་དེ་རིང་མཇལ་ཁའི་བརྙན་ཐུང་ཞིག་འདོན་སྤེལ་གནང་བའི་ནང་དུ་༸གོང་ས་མཆོག་གིས་སྐབས་དེར་ལྷོ་ཀོ་རི་ཡའི་དད་ལྡན་དེ་དག་གི་ཕྱག་ལས་ལ་བསྔགས་བརྗོད་མཛད་པ་དང་འབྲེལ། ནང་པའི་ཆོས་ལ་ཐུགས་སྣང་དང་སངས་རྒྱས་ཀྱི་བཀའ་བསྟན་འགྱུར་དེ་ཚོ་སློབ་དེབ་ལྟ་བུར་བརྩིས་ནས་སློབ་སྦྱོང་བྱེད་དགོས་པའི་ལམ་སྟོན་བསྩལ་འདུག   ཡང་མཇལ་མང་ཁྲོད་དུ་རྡ་སར་ལོ་མང་གི་རིང་ལ་ནང་ཆོས་སྦྱངས་ནས་སྒོམ་སྒྲུབ་བྱེད་བཞིན་པའི་ཀོ་ར་ཡའི་བཙུན་མ། བསྟན་འཛིན་སྒྲོན་གསལ་ལགས་ཀྱིས་མིག་ཟུང་ནས་མཆི་མ་ཐོན་བཞིན་དུ།   ཁོང་མོ་སྔོན་ཆད་ཐེངས་དང་པོ་རྒྱ་གར་ལ་སླེབས་དུས་བོད་དང་༸རྒྱལ་བ་རིན་པོ་ཆེའི་སྐོར་ལ་ཤེས་རྟོགས་ཅི་ཡང་མེད་ཀྱང་།  རྗེས་སུ་༸སྐྱབས་མགོན་རིན་པོ་ཆེ་མཇལ་དུས་རང་ཉིད་ལ་དམིགས་བསལ་གྱི་ཚོར་བ་ཞིག་བྱུང་བ་ལྟར།  འདི་གར་སློབ་སྦྱོང་བྱེད་ཞོར་གཞན་དོན་གྱི་ཆེད་དུ་ཕྱག་ལས་གནང་གི་ཡོད་པར་འགྲེལ་བརྗོད་གནང་གི་འདུག མ་ཟད་དེ་རིང་གི་མཇལ་མང་ཁྲོད་མི་གྲངས་ ༡༥ ལས་གྲུབ་པའི་རྒྱ་གར་ལྷོ་ཕྱོགས་Chennai ནས་ཕེབས་པའི་ནང་མི་ཞིག་འདུག་པ་ནི། ནང་དེའི་པ་ལགས་སྐུ་ཞབས་Ravi kumar ལགས་ཀྱི་སྐྱེས་སྐར་དང་སྟབས་བསྟུན་ཆེད་དུ་བཞུགས་སྒར་དུ་ཕེབས་པ་དང་འབྲེལ་དེ་རིང་༸གོང་ས་མཆོག་གི་མཇལ་བཅར་ཞུས་པ་ཞིག་རེད་འདུག     ངའི་སྐྱེས་སྐར་དང་སྟབས་བསྟུན་ནས་འདི་གར་༸གོང་ས་སྐྱབས་མགོན་ཆེན་པོ་དང་མཇལ་བས་དགའ་ཚོར་དཔག་མེད་སྐྱེས་བྱུང་།    ༸མགོན་པོ་གང་ཉིད་ཀྱིས་ང་ཚོར་དེང་རབས་ཀྱི་དངོས་གཙོ་རིང་ལུགས་གཅིག་པོ་མ་ཡིན་པར་གཙོ་བོ་རྒྱ་གར་གྱི་ནང་དུ་གནའ་བོའི་རིག་གཞུང་ཉར་ཚགས་བྱེད་རྒྱུ་གལ་ཆེན་པོ་ཡིན་པར་བཀའ་གནང་སྟེ།  མི་སྒེར་སུ་ཞིག་ཡིན་རུང་སེམས་ཞི་བདེ་གནས་དགོས་གལ་དང་།  དེ་བཞིན་དེང་རབས་ཀྱི་རྡུལ་ཕྲན་གྱི་རྣམ་བཞག་སོགས་ཀྱི་ཐད་ནས་ཀྱང་བཀའ་གནང་སོང་། ང་རང་ཕྱིར་ལྷོ་ཕྱོགས་སུ་སོང་སྟེ་༸སྐྱབས་མགོན་རིན་པོ་ཆེ་ཡིས་གསུང་བ་དག་ལག་ལེན་གྱིས་རྒྱ་གར་གྱི་གནའ་བོའི་རིག་གཞུང་སྲུང་སྐྱོབ་ཀྱི་ཐོག་ལ་མི་མང་ལ་གོ་རྟོགས་སྤེལ་རྒྱུ་ཡིན། དེ་བཞིན་སྐབས་དེར་ཨུ་རུ་སུ་ནས་ཕེབས་པའི་མཇལ་བཅར་བ་ཞིག་ལ་མགོན་པོ་གང་མཇལ་བའི་ཚོར་བ་ཅི་བྱུང་གི་སྐོར་ལ་བཅར་འདྲི་ཞུས་པར་ཁོང་གིས།  ༸གོང་ས་མཆོག་ཐེངས་གསུམ་མཇལ་མྱོང་ཡོད་པ་དང་། ག་དུས་ཁོང་མཇལ་བ་ཡིན་ན།   རང་ཉིད་ལ་སྟོབས་ཤུགས་གསར་བ་ཞིག་སླེབས་པ་ལྟ་བུའི་ཚོར་བ་བྱུང་གི་ཡོད་པ་དང་། ཐེངས་འདིར་ཀྱང་ཁོང་ལ་མཇལ་སྐབས་མགོན་པོ་གང་གིས་རང་ཉིད་ཀྱི་རྒྱལ་ཁབ་དང་རང་གི་གཉེན་འབྲེལ་རྣམས་ལ་ཐུགས་སྨོན་སྐྱབས་འཇུག་ཞུས་སོང་ཞེས་དགའ་ཚོར་ཆེན་པོའི་འགྲེལ་བརྗོད་བྱས་སོང་།