༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་སྔོན་༸སྐུའི་འཕྲོད་བཞེས་བདེ་མིན་གྱི་རྐྱེན་པས་རྒྱལ་ས་ལྡི་ལིའི་ Max སྨན་ཁང་དུ་སྨན་པ་བསྟེན་གཏུག་དང་དེ་ནས་༸སྐུ་ངལ་གསོ་བཞུགས་དང་འབྲེལ་སྨན་ཁང་གི་ཉེ་འགྲམ་ Sheraton བཞུགས་གནས་གསོལ་མགྲོན་ཁང་དུ་ཉིན་ཤས་༸སྐུ་བཞུགས་མཛད་དགོས་བྱུང་ཡོད་ནའང་། ད་ལྟའི་ཆར་༸སྐུའི་འཕྲོད་བཞེས་དྭངས་སྐྱེད་སངས་དྲག་བྱུང་སྟེ་དེ་རིང་ཟླ་ ༤ ཚེས་ ༢༢ ཉིན་གྱི་སྔ་དྲོ་ཚོུད་ ༩༌༣༠ ཐོག་ལྡི་ལི་རོ་ཧི་ནི་བོད་ཁྱིམ་སྡོད་ཁང་གི་༸རྒྱལ་བའི་གཟིམ་ཆུང་དུ་༸ཞབས་སོར་བདེ་བར་འཁོད་ཡོད་པ་རེད། མགོན་པོ་༸གང་ཉིད་མཆོག་ནས་རོ་ཧི་ནི་བོད་ཕྲུག་སྡོད་ཁང་དུ་༸ཞབས་སོར་འཁོད་མ་ཐག་ཏུ་རྒྱལ་སྒོ་ཕྱི་མར་ཆིབས་གྲུ་བཀག་གནང་ནས་༸ཞབས་ཐང་ཐོག་ཕེབས་སྐབས་ལྡི་ལི་བོད་སྒར་བསམ་ཡས་གླིང་དང་ལ་དྭགས་དྷ་རྨམ་ས་ལ། རོ་ཧི་ནི་བོད་ཁྱིམ་གྱི་སློབ་ཕྲུག་སོགས་ཉེ་འཁོར་བོད་མི་ཚོས་ཕེབས་བསུའི་སེར་བང་སྒྲིག་མཁན་རྣམས་ལ་ཞལ་མཇལ་འཚམས་འདྲི་དང་འབྲེལ། ངོས་ཀྱི་གདོང་ལ་སྐྱོན་མི་འདུག་གམ། ད་བདེ་པོ་ཡིན། བློ་བདེ་པོ་བྱོས་ཞེས་སོགས་བཀའ་བསྩལ་སོང་། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་སྔོན་ཕྱི་ཚེས་ ༤ ནས་ ༦ བར་ཉིན་གྲངས་གསུམ་གྱི་རིང་ལ་རྒྱལ་ས་ལྡི་ལིར་སཱི་ཤེས་ཡོན་སློབ་གསོའི་རྒྱལ་སྤྱིའི་རང་བཞིན་ལྡན་པའི་དབུ་འབྱེད་མཛད་སྒོར་དབུ་བཞུགས་མཛད་གྲུབ་རྗེས་༸རྒྱལ་བའི་བཞུགས་གནས་དྷ་རྨ་ས་ལར་ཕྱིར་༸ཞབས་སོར་འཁོད་ཡོད་ཀྱང་། གློ་བུར་དུ་མགུལ་གློར་གཉན་ཕྲན་བཞེས་རྐྱེན་ཕྱི་ཚེས་ ༩ ཉིན་སླར་ལྡི་ལིར་ཆིབས་བསྒྱུར་གྱིས་ Max སྨན་ཁང་དུ་ཉིན་གྲངས་ ༣ རིང་༸སྐུའི་འཕྲོད་བཞེས་བརྟག་དཔྱད་གནང་བ་དང་སྨན་ཁང་དུ་༸སྐུ་བཞུགས་མཛད་དགོས་བྱུང་ཡོད་པ་རེད།མགོན་པོ་༸གང་ཉིད་མཆོག་༸སྐུ་གཟུགས་བདེ་མིན་རྐྱེན་པས་གློ་བུར་སྨན་ཁང་དུ་ཕེབས་དགོས་བྱུང་ཡོད་སྟབས་བོད་མི་གཙོས་པའི་རྒྱལ་སྤྱིའི་ཁྲོད་དུ་མགོན་པོ་མཆོག་ལ་དད་མོས་ཞུ་མཁན་མང་ཚོགས་ས་ཡ་མང་པོར་བློ་འཚབ་ཆེན་པོ་ཞིག་བྱུང་ཡོད་པ་རེད།  ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་ད་ལྟའི་ཆར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་སངས་དྲག་གིས་རྣམ་ཀུན་ལྟར་༸སྐུ་ཁམས་གསལ་ཐང་ཡིན་པ་དང་། མགོན་པོ་༸གང་ཉིད་མཆོག་ད་དུང་ཉིན་ཤས་རིང་རྒྱལ་ས་ལྡི་ལིར་༸སྐུ་བཞུགས་གནང་རྒྱུའི་མཛད་འཆར་ཡོད་པ་གསུངས་སོང་།རྩ་བའི་དེ་རིང་མགོན་པོ་༸གང་ཉིད་མཆོག་ལ་ཕེབས་བསུ་ཞུ་བར་བོད་མི་ ༣༠༠ ལྷག་ཆེད་བཅར་ཞུས་འདུག

རྒྱ་གར་གྱི་ཆབ་སྲིད་ཚོགས་པ་འདྲ་མིན་ལས་གྲུབ་པའི་རྒྱ་གར་དབུས་ཀྱི་གྲོས་ཚོགས་འཐུས་མི་ཉིས་བརྒྱ་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་མི་ལོ་དྲུག་ཅུ་ལྷག་རིང་བཀའ་དྲིན་ཆེན་པོས་མཛད་འཕྲིན་བསྐྱངས་ཡོད་པ་ཁག་ཅིག་དྲན་གསོའི་ཆེ་བསྟོད་ཞུས་པ་དང་སྦྲགས། རྒྱ་གར་དབུས་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་རེ་འདུན་བཏོན་འདུགཁ་སང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ Shanta Kumar མཆོག་གིས་གསར་འགོད་བསྒྲགས་གཏམ་ཞིག་ཡོངས་ཁྱབ་གནང་བའི་ནང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་གྲོས་ཚོགས་འཐུས་མི་རྣམ་པ་དང་རྒྱ་གར་གྲོས་ཚོགས་ཀྱི་ཆབ་སྲིད་ཚོགས་པ་འདྲ་མིན་ནས་ཁྱོན་གྲོས་ཚོགས་འཐུས་མི་ ༢༠༠ ཐུན་མོང་གིས་ཞུ་ཡིག་ཐོག་མཚན་རྟགས་བཀོད་ནས་རྒྱ་གར་དབུས་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna ཞེས་པ་དེ་འབུལ་ལམ་ཞུ་དགོས་པའི་ཞུ་སྙན་གཏན་འབེབས་གནང་ཐོག་རྒྱ་གར་ནང་སྲིད་བློན་ཆེན་སྐུ་ཞབས་ Rajnath Singh མཆོག་ལ་ཕུལ་ཡོད་པ་རེད།ལྷག་པར་དུ་སྐུ་ཞབས་ Shanta Kumar མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་ལོ་ངོ་དྲུག་བཅུ་ལྷག་རིང་འཚེ་མེད་ཞི་བའི་ཐབས་ལམ་ཁོ་ནའི་ཐོག་ནས་བོད་མིའི་བདེན་པའི་འཐབ་རྩོད་ཀྱི་དབུ་ཁྲིད་མཛད་ཡོད་པ་དང་། མགོན་པོ་༸གང་ཉིད་མཆོག་གི་ཡང་དག་པའི་མཛད་བཟང་ལ་རྒྱལ་སྤྱིའི་ཁྱོན་ནས་ངོས་འཛིན་གྱིས་ཆེ་བསྟོད་ཞུས་པ་མ་ཟད། ཕྱི་ལོ་ ༡༩༨༩ ལོར་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་པ་རེད། མགོན་པོ་༸གང་ཉིད་མཆོག་གི་མཛད་བཟང་དེ་དག་ལ་བརྟེན་ནས་ཐེངས་འདིར་གྲོས་ཚོགས་བོད་དོན་རྒྱབ་སྐྱོར་ཚོགས་པས་རྐང་འགན་བཞེས་ཐོག་༸གོང་ས་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་མགྱོགས་མྱུར་འབུལ་ལམ་ཞུ་དགོས་པའི་དགོས་འདུན་འདི་ལྟར་ཆེད་བཏོན་གནང་བ་ཡིན་ཞེས་གསུངས་འདུག སྐུ་ཞབས་ཤན་ཏཱ་ཀུ་མཱར་མཆོག་ནས་དེ་སྔ་ཕྱི་ལོ་ ༢༠༡༦ ལོར་བཞུགས་སྒར་དུ་༸གོང་ས་༸སྐྱབས་ཆེན་པོ་མཆོག་གིས་ཁོང་གིས་བརྩམས་པའི་ཧི་མཱ་ལ་ཡའི་སྟེང་གི་གྲིབ་གཟུགས་དམར་པོའམ་ Red Shadow over Himalaya དང་། ཁོང་གི་སྐུ་ཟླ་ Santosh Shailja ལས་ཀྱིས་བརྩམས་པའི་གལ་ཏེ་སྟོན་ཀ་ཤར་ཚེའམ་   If Autumn Comes ཞེས་པའི་དཔེ་དེབ་གཉིས་དང་གཞན་ཡང་སྐུ་ཞབས་ Hemraj Kaushik ལགས་ཀྱིས་སྐུ་ཞབས་ཤན་ཏཱ་ཀུ་མཱར་མཆོག་ལ་ཆེ་བསྟོད་ཀྱི་དཔེ་དེབ་གཅིག་བཅས་ཁྱོན་དཔེ་དེབ་གསུམ་དབུ་འབྱེད་མཛད་སྒོ་གཙོ་གྱུར་བོད་དོན་དང་འབྲེལ་བའི་མཛད་སྒོ་རིམ་པའི་ཐོག་རྒྱ་གར་གཞུང་ནས་༸གོང་ས་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་ Bharat Ratna ཞེས་པ་དེ་འབུལ་ལམ་ཞུ་དགོས་པ་གསུངས་ཡོད།

དེ་རིང་རྒྱ་གར་གྱི་ Times of India གསར་ཤོག་ཐོག་གནས་ཚུལ་ཐོན་པར་བྷི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་མཆོག་ནུབ་བྷེན་གྷལ་གྱི་སྲིད་སྐྱོང་ཟུར་པ་ Gopalkrishna Gandhi ལགས་ཀྱིས་༸གོང་ས་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna ཞེས་པ་དེ་དབུལ་དགོས་པའི་རྩོམ་ཡིག་ཅིག་སྤེལ་ཡོད་པ་དེར་རྒྱབ་སྐྱོར་གནང་ཡོད་པ་བཀོད་འདུགNitish Kumar མཆོག་གིས་རྒྱ་གར་གྱི་རིན་ཐང་ལྡན་པའི་བྱམས་བརྩེ་དང་འཚེ་མེད་ཞི་བ། དེ་བཞིན་ཕན་ཚུན་མཛའ་མཐུན་དང་འཛམ་གླིང་ཞི་བདེའི་ལྟ་གྲུབ་ཀྱིས་རྒྱ་གར་དེ་ཐུན་མོང་མ་ཡིན་པ་ཞིག་ཆགས་ཡོད་པ་ལྟར། ༸གོང་ས་མཆོག་དབུ་བཞུགས་ཀྱི་ཐོག་ནས་ལྟ་གྲུབ་རང་བཞིན་གྱི་ལམ་སྟོན་གནང་རྒྱུ་དེ་ཧ་ཅང་གི་གལ་ཆེན་པོ་རེད་ཅེས་གསུངས་འདུགཉེ་སྔོན་ཧིཾ་དུའི་གསར་ཤོག་ཅིག་གི་ཐོག་ཏུ་རྒྱ་གར་གྱི་མངའ་སྡེ་ནུབ་བྷེན་གྷལ་གྱི་སྲིད་སྐྱོང་ཟུར་པ་གྷོ་པཱལ་ཀྲི་ཤྞཱ་ལགས་ཀྱིས་རྒྱ་གར་ལ་༸གོང་ས་ཏཱ་ལའི་བླ་མ་མཆོག་ཉེ་བར་མཁོ་གལ་ཞེས་པའི་བརྗོད་གཞི་ཐོག་རྩོམ་ཡིག་ཅིག་སྤེལ་ཏེ་རྒྱ་གར་གྱིས་༸གོང་ས་ཏཱ་ལའི་བླ་མ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་དེ་འབུལ་མ་ཐུབ་པ་ཡིན་ན། དེ་ནི་རྒྱ་གར་རྒྱལ་ཁབ་ཀྱི་གྱོང་གུད་ཡིན་པ་ལས་༸གོང་ས་ཏཱ་ལའི་བླ་མ་མཆོག་གི་གྱོང་གུད་མ་རེད་ཅེས་བྲིས་ཡོད་པ་དེར་ཁ་སང་བྷི་ཧར་མངའ་སྡེ་བློན་ཆེན་སྐུ་ཞབས་ནི་ཏིཤ་ཀུ་མཱར་མཆོག་གིས་རྒྱབ་སྐྱོར་གནང་སྟེ་ཁོང་གི་སྤྱི་ཚོགས་དྲྭ་ལམ་དུ་རྩོམ་ཡིག་དེ་ཆེད་སྤེལ་གྱིས་ཁོང་ནས་གནས་ཚུལ་དེར་མཐའ་གཅིག་ཏུ་རྒྱབ་སྐྱོར་ཡོད་ཅེས་གསུངས་ཡོད་པ་རེད།ནུབ་བྷེན་གྷལ་གྱི་མངའ་སྡེའི་སྲིད་སྐྱོང་ཟུར་པ་ Gopalkrishna Gandhi ལགས་ཀྱིས་རྒྱ་གར་ལ་༸གོང་ས་ཏཱ་ལའི་བླ་མ་མཆོག་ཉེ་བར་མཁོ་གལ་ཞེས་པའི་རྩོམ་ཡིག་ནང་ད་ལྟ་བར་དུ་རྒྱ་གར་སྲིད་གཞུང་གིས་༸གོང་ས་མཆོག་གི་གནད་དོན་དེར་འཛེམ་ཟོན་གནང་ཡོད་སྐོར་གསུངས་པ་དང་འབྲེལ། རྒྱ་གར་གྱིས་རྒྱ་ནག་གི་ཡ་ལན་ལ་མགོ་འཐོམ་ནས་ཡོད་པ་རེད་དམ་ཞེས་དོགས་འདྲི་གནང་བ་བརྒྱུད་ནས་༸གོང་ས་མཆོག་གིས་ཀྱང་མགོན་པོ་མཆོག་ནས་བོད་དེ་རྒྱ་ནག་དང་ཁ་བྲལ་ཏུ་གཏོང་འདོད་མེད་པ་ལྟར། རྒྱ་གར་གྱི་ངོས་ནས་ཀྱང་བོད་ཀྱི་ཆོས་དང་རིག་གཞུང་གོང་འཕེལ་གཏོང་རྒྱུར་རོགས་འདེགས་དང་སྲུང་སྐྱོབ་གནང་བཞིན་ཡོད་པ་རེད། འོན་ཀྱང་རྒྱ་གར་དབུས་གཞུང་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna ཞེས་པ་དེ་ཅིའི་ཕྱིར་འབུལ་མ་ཐུབ་པ་རེད་ཅེས་ཞུ་སྐུལ་གནང་ཡོད་པ་དང་། ལྷག་པར་དུ་མགོན་པོ་༸གང་ཉིད་མཆོག་ལ་གཟེངས་རྟགས་དེ་འབུལ་མ་ཐུབ་པ་ནི་རྒྱ་གར་རྒྱལ་ཁབ་ཀྱི་གྱོང་གུད་རེད་ཅེས་གསུངས་ཡོད། ཁོང་གིས་ད་དུང་༸གོང་ས་ཏཱ་ལའི་བླ་མ་མཆོག་འཛམ་གླིང་གི་ས་ཕྱོགས་གང་དུ་ཆིབས་བསྒྱུར་མཛད་ཀྱང་མི་མང་གིས་མགོན་པོ་མཆོག་ནི་སངས་རྒྱས་དངོས་ཤིག་ཡིན་པར་ངོས་བཞེས་ཞུ་བཞིན་ཡོད་པ་ལྟར་རྒྱ་གར་གྱི་ངོས་ནས་དེ་ལྟར་ངོས་བཞེས་གནང་གི་མེད་པར་སྐྱོན་བརྗོད་གནང་འདུགརྩ་བའི་ཁ་སང་བྷི་ཧར་མངའ་སྡེ་བློན་ཆེན་སྐུ་ཞབས་ནི་ཏིཤ་ཀུ་མཱར་མཆོག་དང་སྲིད་སྐྱོང་ཟུར་པ་གྷོ་པཱལ་ཀྲི་ཤྞཱ་ལགས་རྣམ་གཉིས་ཀྱིས་རྒྱ་གར་གྱིས་༸གོང་ས་མཆོག་ལ་སྤྱི་དམངས་ཀྱི་གཟེངས་རྟགས་མཐོ་ཤོས་དེ་འབུལ་ལམ་ཞུ་དགོས་པའི་གླེང་སློང་གནང་བ་དེ་ནི་ཆེས་ཐོག་མ་མ་ཡིན་པར་ཕྱི་ལོ་ ༢༠༡༧ ལོར་རྒྱ་གར་བྱང་ཤར་གྱི་མངའ་སྡེ་ཨ་རུ་ནཱ་ཅལ་དུ་རྟེན་གཞི་བྱས་པའི་ཨ་རུ་ནཱ་ཅལ་བོད་དོན་རྒྱབ་སྐྱོར་ཚོགས་པས་རྒྱ་གར་དབུས་གཞུང་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ཞེས་པ་དེ་དབུལ་དགོས་པའི་ཞུ་འབོད་གནང་ཡོད་པ་རེད། གཞི་རྩའི་རྒྱ་གར་གྱི་ཆེས་མཐའི་གཟེངས་རྟགས་ भारत रत्न ཞེས་པ་དེ་ནི་རྒྱ་གར་ནང་གི་ཚན་རིག་དང་སྒྱུ་རྩལ། རྩོམ་རིག་ཐོག་མཛད་རྗེས་ཅན། དེ་བཞིན་སྤྱི་ཚོགས་ཞབས་ཞུའི་ཐད་ནས་རླབས་ཆེན་གྱི་ཕྱག་ལས་གནང་མཁན་སོགས་ལ་འབུལ་སྲོལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་སྔ་དྲོ་ཚོུད་ ༧༌༣༠ ཐོག་ Sheraton བཞུགས་གནས་གསོལ་མགྲོན་ཁང་ནས་༸སྐུའི་འཕྲོད་བཞེས་ཀྱི་མཇུག་སྐྱོང་བརྟག་དཔྱད་གནང་ཕྱིར་ Max སྨན་ཁང་དུ་སླར་ཡང་ཆིབས་བསྒྱུར་མཛད་ཡོད་པ་དང་། སྐར་མ་ ༡༥ ལྷག་ཙམ་གྱི་བརྟག་དཔྱད་ལེགས་པར་གྲུབ་མཚམས་སུ་རླུང་འཕྲིན་ཁང་གིས་༸སྐུ་བཅར་ཕྱི་ལུགས་དང་བོད་ལུགས་ཀྱི་༸སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་ཚེ་དབང་རྟ་མགྲིན་ལགས་རྣམ་གཉིས་ལ་བཅར་དྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་དྭངས་སྐྱེད་ཧ་ཅང་བྱུང་ནས་རྣམ་ཀུན་ལྟར་༸སྐུ་གཟུགས་གསལ་ཐང་ཡིན་པ་དང་། གཉན་འཇོམས་ཀྱི་གསོལ་སྨན་ཉིན་གྲངས་འགའ་ཤས་རིང་མུ་མཐུད་མཆོད་དགོས་པ་མ་གཏོགས་མགོན་པོ་༸གང་ཉིད་མཆོག་གི་༸སྐུའི་གསུང་ཤུགས་མཚོན་པའི་༸སྐུའི་འཕྲོད་བཞེས་སྤྱི་ཡོངས་ཀྱི་ཐོག་ལ་ཧ་ལས་པའི་ཡག་པོ་ཡོད་པ་སོགས་ངོ་སྤྲོད་གནང་སོང་།གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཉེ་སྔོན་ཕྱི་ཚེས་ ༩ ཉིན་༸སྐུ་གཟུགས་བདེ་མིན་རྐྱེན་པས་འདི་ག་རྒྱལ་ས་ལྡི་ལིར་གློ་བུར་དུ་ཆིབས་བསྒྱུར་མཛད་དགོས་བྱུང་ཡོད་པ་དང་། Max སྨན་ཁང་དུ་ཉིན་གྲངས་ ༣ རིང་༸སྐུའི་འཕྲོད་བཞེས་བརྟག་དཔྱད་ལེགས་གྲུབ་མཚམས་ཕྱི་ཚེས་ ༡༡ ཉིན་ནས་ Sheraton བཞུགས་གནས་གསོལ་མགྲོན་ཁང་དུ་༸སྐུ་ངལ་གསོ་ཞུགས་མཛད་མུས་ཡིན་པ་རེད།ཁ་སང་རྒྱ་གར་དབུས་གཞུང་གི་འབྲེལ་ཡོད་འཕྲོད་བསྟེན་བློན་ཆེན་སྐུ་ཞབས་ Jagat Prakash Nadda མཆོག་ཆེད་མངགས་༸རྒྱལ་བའི་བཞུགས་གནས་གསོལ་མགྲོན་ཁང་དུ་ཆེད་ཕེབས་དང་སྦྲགས་མགོན་པོ་མཆོག་གི་༸སྐུའི་འཕྲོད་བཞེས་ཀྱི་གནས་སྟངས་སོགས་ཐོག་ལ་དགོངས་སྐོར་ཞུས་པ་མ་ཟད་གང་མྱུར་དྭངས་བསྐྱེད་ཡོང་བའི་ཐུགས་རེ་སོགས་གནང་ཡོད་པ་རེད། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་ཀྱི་གནས་སྟངས་ད་ལྟའི་ཆར་རྒྱུན་ལྡན་ལྟར་དྭངས་སྐྱེད་ཧ་ལས་པའི་ཡག་པོ་བྱུང་ཡོད་པ་དང་མགོན་པོ་༸གང་ཉིད་མཆོག་ད་དུང་ཉིན་ཤས་རིང་རྒྱལ་ས་ལྡི་ལིར་༸སྐུ་ངལ་གསོ་བཞུགས་མཛད་རྒྱུ་ཡིན་པ་རེད།

༸གོང་ས་ཏཱ་ལའི་བླ་མ་ནི་གང་ཟག་སུས་ཀྱང་ཚབ་མཚོན་བྱེད་མི་ཐུབ་པའི་ཆོས་ལུགས་ཀྱི་དབུ་ཁྲིད་ཅིག་དང་། བོད་འབངས་ཡོངས་ཀྱི་དཔུང་གཉེན་གྱི་ནོར་བུ་ཁོ་ན་དེ་རེད་ཅེས་བརྗོད་དེ་བོད་མི་རྣམས་ནས་མགོན་པོ་༸གང་ཉིད་མཆོག་གི་༸སྐུའི་སྙུན་གཞི་ལ་བློ་འཚབ་མ་བྱེད་རོགས་ཞེས་རེ་འབོད་ཞུས་པ་དང་སྦྲགས། ཧིཾ་དུ་དགོན་པ་ཞིག་གིས་༸གོང་ས་མཆོག་མགྱོགས་མྱུར་༸སྐུ་ཁམས་གསལ་ཐང་ཡོང་བའི་སྨོན་ལམ་གསུང་འདོན་གནང་འདུགརྒྱ་གར་གྱི་གྲོང་ Hyderabad ནང་གི་ Chilkur Balaji དགོན་པའི་སྨོན་ལམ་ཚོགས་འདུ་དེའི་ཐོག་དགོན་པའི་ཆོས་དཔོན་ M V Soundararajan མཆོག་དང་ C S Gopalakrishna མཆོག་གཉིས་གཙོ་གྱུར་གྲྭ་ཚང་གི་དགེ་འདུན་པ་སྟོང་ཕྲག་ལྷག་དབུ་བཞུགས་གནང་བའི་ཐོག་ནས་༸གོང་ས་མཆོག་གི་སྙུན་གཞི་དེ་གང་མགྱོགས་དྭངས་གསལ་ཡོང་པའི་སྨོན་ལམ་འཚོགས་པ་དང་འབྲེལ་ཏེ་རྒྱ་ནག་གི་ངོས་ནས་༸སྐུའི་ཡང་སྲིད་ཀྱི་ཐད་ལ་ཐེ་གཏོགས་མ་བྱས་ན་ཡག་པོ་འདུག་ཅེས་གསུངས་ཡོད། གཞི་རྩའི་དེ་སྔ་ Chilkur Balaji དགོན་པའི་ཆོས་དཔོན་ Archaka CS Rangarajan  མཆོག་གིས་ཕྱི་ལོ་ ༢༧༠༠ གོང་ལ་ Sanatana Dharma འམ་གཡུང་དྲུང་ཆོས་ཀྱི་ནང་གསུངས་པ་ལྟར་འབྱུང་པོ་ཀུན་ལ་མཉམ་པ་བལྟ་ཞེས་པ་ལྟར་འགྱུར་མེད་གཡུང་དྲུང་ཆོས་དེ་བསྐྱར་འཕེལ་གནང་སྟེ་རྒྱ་གར་ནང་གི་ Dalit ཞེས་པའི་རིགས་དམན་པ་རྣམས་ལ་དགོན་པར་ཆོས་ཞུ་ཆོག་པའི་བསྒྱུར་བཅོས་བཏང་སྐབས་རྒྱ་གར་ནང་གི་ཆོས་དཔོན་ཉུང་ཤས་ཤིག་མ་གཏོགས་ཁོང་ལ་འཚམས་འཕྲིན་ཕུལ་ཡོད། ༸གོང་ས་མཆོག་གིས་ཆོས་དཔོན་སྐུ་ཞབས་ CS Rangaranjan མཆོག་ནས་རིགས་དམན་སྐྱེས་བུར་གཅིག་གྱུར་གྱི་ཕྱག་བཞེས་གནང་བར་བསྔགས་བརྗོད་དང་བླ་མེད་མིག་གི་དཔེ་ཞིག་ཡིན་སྐོར་འཚམས་འཕྲིན་བསྩལ་ཡོད་སྟབས། Chilkur Balaji དགོན་པ་དང་དང་༸གོང་ས་མཆོག་གི་དབར་ལ་དམིགས་བསལ་གྱི་འབྲེལ་བ་ཞིག་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་སྔ་དྲོའི་ཆུ་ཚོད་ ༨༌༣༠ ཐོག་༸སྐུ་གཟུགས་དྭངས་སྐྱེད་ཐོག་ Max སྨན་ཁང་ནས་ Sheraton Hotel བཞུགས་གནས་གསོལ་མགྲོན་ཁང་དུ་ ༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་གིས་སྐབས་དེར་གཞིས་བྱེས་གཉིས་ཀྱི་བོད་མི་རྣམས་ཙམ་མ་ཟད་དེ་བཞིན་འཛམ་གླིང་མི་མང་ས་ཡ་མང་པོས་མགོན་པོ་མཆོག་གི་༸སྐུ་ཕྱཱའི་ཐད་བློ་འཚབ་དང་སེམས་ཁུར་ཆེན་པོས་ཐུགས་སྨོན་མཚམས་སྦྱོར་གནང་ཡོད་སྟབས་ཕན་ཐོགས་ཏན་ཏན་བྱུང་ཡོད་པ་དང་། ད་ཆ་མགོན་པོ་༸གང་ཉིད་མཆོག་རྣམ་ཀུན་ལྟར་༸སྐུ་གཟུགས་དྭངས་སྐྱེད་ཡག་པོ་ཡོད་སྟབས་ཚང་མར་བདེ་པོ་བྱོས་ཞེས་བཀའ་བསྩལ་མཛད་སོང་།གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སྔོན་ཕྱི་ཚེས་ ༢ ཉིན་འདི་ག་རྒྱ་གར་གྱི་རྒྱལ་ས་ལྡི་ལིར་རྒྱལ་སྤྱིའི་རང་བཞིན་ལྡན་པའི་སཱི་ཤེས་ཡོན་གྱི་སྤྱི་ཚོགས་དང་། སེམས་མྱོང་། བཟང་སྤྱོད་བཅས་ཀྱི་བསླབ་གཞི་དབུ་འབྱེད་གནང་ཕྱིར་༸ཞབས་སོར་བདེ་བར་འཁོད་པ་ཡོད་པ་དང་། ཕྱི་ཚེས་ ༤ ནས་ ༦ བར་གྱི་རྒྱལ་སྤྱིའི་ལྷན་ཚོགས་དེ་ལེགས་པར་གྲུབ་མཚམས་མགོན་པོ་༸གང་ཉིད་མཆོག་བཞུགས་སྒར་དུ་ཕྱིར་༸ཞབས་སོར་བདེ་བར་འཁོད་ཡོད་ཀྱང་། གློ་བུར་དུ་མགུལ་གློར་གཉན་ཕྲན་བཞེས་རྐྱེན་ཕྱི་ཚེས་ ༩ ཉིན་སླར་ལྡི་ལིར་ཆིབས་བསྒྱུར་གྱིས་༸ཞབས་སོར་བདེ་བར་འཁོད་དོན་ལྟར་ Max སྨན་ཁང་དུ་ཉིན་གྲངས་ ༣ རིང་༸སྐུའི་འཕྲོད་བཞེས་བརྟག་དཔྱད་གནང་དགོས་བྱུང་ཡོད་པ་རེད།༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་༸གོང་ས་མཆོག་གི་སྙུན་གཞི་དེ་གཞི་ལྗིད་པོ་གང་ཡང་མིན་པ་དང་ད་ཆ་༸སྐུ་གཟུགས་ཆ་ཚང་དྲག་སྐྱེད་བྱུང་ཡོད། ད་དུང་ཉིན་ཤས་རིང་གསོལ་མགྲོན་ཁང་དུ་༸སྐུ་ངལ་གསོ་བཞུགས་གནང་ཕྱིར་རྒྱལ་ས་ལྡི་ལིར་༸སྐུ་བཞུགས་མཛད་རྒྱུ་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་ཆར་ཕྱི་ཚེས་ ༩ ཉིན་ནས་རྒྱལ་ས་ལྡི་ལིར་རྟེན་གཞི་བྱས་པའི་ Max སྨན་ཁང་དུ་སྐུའི་འཕྲོད་བཞེས་བརྟག་དཔྱད་དང་། ལྷག་པར་དུ་མགུལ་ཆམ་བཞེས་པའི་རྐྱེན་གྱིས་མགུལ་གློར་མཉན་ཁ་ཕྲན་བུ་བྱུང་བར་སྨན་བཅོས་སོགས་གང་ལེགས་བྱུང་སྟེ། སང་ཉིན་སྨན་ཁང་ནས་ཕྱིར་ཐོན་ཏེ་ལྡི་ལིར་ཉིན་ཤས་རིང་སྐུ་ངལ་གསོ་རྒྱུ་རེད་འདུག གཞི་རྩའི་༸གོང་ས་མཆོག་སྨན་ཁང་དུ་སྨན་བཅོས་གནང་བའི་རིང་ལ་བོད་མིའི་གཙོས་པའི་རྒྱལ་སྤྱིའི་ཐོག་མགོན་པོ་༸གང་ཉིད་མཆོག་ལ་དད་གུས་དང་། བླ་སློབ་ཀྱི་དམ་ཚིག་གཡོ་བ་མེད་པའི་མང་ཚོགས་མང་པོས་༸སྐུ་ཕྱྭའི་ཞབས་རིམས་གསོག་སྒྲུབ་དང་། མགོན་པོ་༸གང་ཉིད་མཆོག་མགྱོགས་མྱུར་༸སྐུ་ཁམས་གསལ་ཐང་ཡོང་བའི་ཐུགས་གསོའི་གསོལ་འདེབས་རྒྱ་ཆེར་གནང་བཞིན་ཡོད་པ་རེད།ལྷག་པར་དུ་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཁམས་སྙུན་གཞི་འཕྲལ་མར་དྭངས་བསྐྱེད་ཡོང་སླད་བསྟན་སྲུང་སྤྱན་འདྲེན་ཞུས་པའི་བཀའ་ལུང་དུ་བོད་འབངས་ཡོངས་ཀྱིས་སྤྱི་མཐུན་བསོད་ནམས་གསོག་གལ་ཆེ་བར་གསུངས་ཡོད་སྟབས། ༸དཔལ་ལྡན་དགའ་ལྡན་ཕོ་བྲང་ནས་ཁ་སང་རྒྱུད་གྲྭ་སྟོད་སྨད་གཉིས་དང་། གདན་ས་ཁག་ལ་སོང་ནས་བདེ་གསང་འཇིགས་གསུམ་གྱི་བདག་འཇུག་གང་མང་འཕྲལ་དུ་སྒྲུབ་དགོས་པ་དང་། འདུས་མང་སྤྱི་ནས་རྒྱལ་བའི་ཞབས་བརྟན་དང་སྨན་བླའི་གཟུངས་སྔགས་གང་མང་མྱུར་དུ་སྒྲུབ་དགོས་བའི་བཀའ་གནང་འདུག  

བོད་མིའིབླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཞབས་པད་བརྟན་པར་༸སྐུའི་མཛད་འཕྲིན་ཁག་ལ་རག་ལས་ཀྱི་ཡོད་སྟབས། མགོན་པོ་༸གང་ཉིད་མཆོག་ནས་འགྲོ་བ་སྤྱིའི་བདེ་རྩར་དམིགས་ཏེ་བཞུགས་སྒར་ནས་ཕྱི་ཕྱོགས་སུ་ཕེབས་རྒྱུའི་མཛད་འཆར་ཁག་ཉུང་འཕྲི་གནང་དགོས་པ་མ་ཟད། ༸རྒྱལ་བའི་ཕོ་བྲང་དུ་མང་ཚོགས་ནས་མགོན་པོ་མཆོག་གི་གསེར་ཞལ་མཇལ་རྒྱུ་དེའང་ཉུང་དུ་གཏོང་རོགས་ཞེས་བོད་མི་ཚོས་སེམས་ཚོར་ཆེན་པོས་འབོད་སྐུལ་གསོལ་འདེབས་ཞུ་བཞིན་འདུགདྷ་ས་ས་གནས་མི་མང་ཚོགས་ཁང་དུ་ཁ་ཉིན་ཚེས་ ༨ ནས་དབུ་འཛུགས་ཀྱིས་ཉིན་གསུམ་གྱི་རིང་དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་དང་ནང་སྲིད་ལས་ཁུངས་ནས་བཀོད་ཁྱབ་གནང་དོན་ལྟར་༸རྒྱལ་བའི་སྐུ་ཕྱྭའི་སླད་དུ་ཞབས་རིམ་གསོག་སྒྲུབ་གནང་བཞིན་ཡོད་པ་ལྟར། ས་གནས་མི་མང་ ༡༥༠ ལྷག་འདུ་འཛོམས་གནང་བའི་སར་གསར་འགོད་པ་ཆེད་བཅར་གྱིས་བོད་མི་རྒན་གྲས་ཁག་གཅིག་དང་བཀའ་མོལ་ཞུས་པར་ཁོང་རྣམ་པས་སེམས་འཚབ་ཆེན་པོས་མིག་ཆུ་གཏོང་བཞིན་ཁ་སང་༸གོང་ས་མཆོག་༸སྐུའི་འཕྲོད་བཞེས་བདེ་མིན་རྐྱེན་གྱིས་གློ་བུར་དུ་རྒྱ་གར་གྱི་རྒྱལ་ས་ལྷི་ལིར་ཆིབས་བསྒྱུར་མཛད་དགོས་བྱུང་བ་དེར་མང་ཚོགས་ནས་སེམས་འཚབ་ཆེན་པོ་གནང་བཞིན་ཡོད་པའི་ཁར་ཚང་མས་ཞལ་གཅིག་གྲག་གིས་༸སྐུའི་མཛད་འཆར་ཁག་ཉུང་འཕྲི་གནང་རོགས་ཞེས་འབོད་སྐུལ་གསོལ་འདེབས་ཞུ་བཞིན་འདུག རྩ་བའི་ཁ་སང་སྔ་དྲོ་༸གོང་ས་མཆོག་མགུལ་ཆམ་བཞེས་ཏེ་མགུལ་གློར་མཉན་ཕྲན་བྱུང་བ་ལྟར་རྒྱལ་ས་ལྡི་ལིའི་ Max སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་གནང་བཞིན་ཡོད་སྟབས། བོད་མི་གནས་ཡུལ་ས་གནས་ཁག་དང་གདན་ས་ཁག་ཏུ་༸སྐུ་ཕྱྭའི་ཞབས་རིམས་གསོག་སྒྲུབ་དང་། དེ་བཞིན་བོད་རིགས་ཚོས་སྤྱི་ཚོགས་དྲྭ་ལམ་སོགས་ཀྱི་ཐོག་བློ་འཚབ་ཆེན་པོའི་ཐོག་ནས་མགོན་པོ་༸གང་ཉིད་མཆོག་ལ་ཐུགས་གསོ་དང་མགྱོགས་མྱུར་༸སྐུ་ཁམས་གསལ་ཐང་ཡོང་བའི་གསོལ་འདེབས་སྨོན་ལམ་ཞུ་བཞིན་ཡོད་པ་མ་ཟད་མང་ཚོགས་ཀྱི་ཁྲོད་ནས་སྐབས་དེར་སེམས་འཚབ་ཆེན་པོ་བྱུང་སྐོར་གསུངས་སོང་།གཞི་རྩའི་ཁ་སང་རླུང་འཕྲིན་ཁང་ནས་༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས་༸གོང་ས་མཆོག་ལ་མགུལ་ཆམ་བཞེས་རྐྱེན་མགུལ་གློར་གཉན་ཕྲན་བཞེས་པ་མ་གཏོགས། དེ་མིན་༸སྐུའི་འཕྲོད་བཞེས་ཀྱི་གནས་སྟངས་ལ་ཛ་དྲག་གང་ཡང་མེད་པར་འགྲེལ་བརྗོད་དང་འབྲེལ། མགོན་པོ་༸གང་ཉིད་མཆོག་ཉིན་ཤས་རིང་སྨན་ཁང་དུ་༸སྐུ་བཞུགས་མཛད་རྒྱུ་ཡིན་པ་འགྲེལ་བརྗོད་གནང་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སང་རྒྱལ་ས་ལྡི་ལིའི་ནང་གི་ཉིན་གྲངས་བཞིའི་མཛད་འཆར་ཁག་ལེགས་པར་གྲུབ་ཏེ་བཞུགས་སྒར་དུ་༸ཞབས་སོར་བདེ་བར་འཁོད་ཡོད་ཀྱང་། དེ་རིང་སྔ་ཐོག་མགོན་པོ་༸གང་ཉིད་མཆོག་མགུལ་ཆམ་བཞེས་པ་དང་སྐུ་ཚད་རྒྱས་པ་སོགས་བྱུང་ཡོད་སྟབས། སྔ་དྲོའི་ཚོུད་ ༧ ཡོལ་ཙམ་ལ་མགོན་པོ་༸གང་ཉིད་མཆོག་མཁའ་ལམ་བརྒྱུད་རྒྱལ་ས་ལྡི་ལིའི་ Max སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་གནང་སླད་ཆིབས་བསྒྱུར་མཛད་ཡོད་པ་རེད། དེ་རིང་རྒྱལ་ས་ལྡི་ལིར་༸གོང་ས་མཆོག་གི་༸སྐུའི་འཕྲོད་བཞེས་བརྟག་དཔྱད་གནང་གྲུབ་མཚམས་སུ་འདི་ག་རླུང་འཕྲིན་ཁང་གིས་༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས་༸གོང་ས་མཆོག་ལ་མགུལ་ཆམ་བཞེས་རྐྱེན་མགུལ་གློར་གཉན་ཕྲན་བཞེས་པ་མ་གཏོགས། དེ་མིན་༸སྐུའི་འཕྲོད་བཞེས་ཀྱི་གནས་སྟངས་ལ་ཛ་དྲག་གང་ཡང་མེད་པར་འགྲེལ་བརྗོད་དང་འབྲེལ། མགོན་པོ་༸གང་ཉིད་མཆོག་ཉིན་ཤས་རིང་སྨན་ཁང་དུ་༸སྐུ་བཞུགས་མཛད་རྒྱུ་ཡིན་པ་གསུངས་སོང་། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཚེས་ ༣ ཉིན་རྒྱ་གར་རྒྱལ་ས་ལྡི་ལིར་ཆིབས་བསྒྱུར་མཛད་པ་དང་འབྲེལ། ཚེས ༤ ནས་ ༦ བར་ཁུལ་དེའི་ Andaz མགྲོན་ཁང་དུ་ SEE Learning ཞེས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་དང་དྲྭ་རྒྱ་བཅས་དབུ་འབྱེད་བཀྲིན་བསྐྱངས་པ་སོགས་ལོ་རྒྱུས་ཀྱི་རང་བཞིན་ལྡན་པའི་མཛད་འཕྲིན་ཁག་ལེགས་པར་གྲུབ་ཏེ་ཁ་སང་ཚེས་ ༨ ཉིན་བཞུགས་སྒར་དུ་༸ཞབས་སོར་བདེ་བར་འཁོད་ཡོད་པ་རེད།