Tibetan Royal Year of 2151 | Year of the Wood Dragon

༸གོང་ས་མཆོག

༸གོང་ས་མཆོག་གིས་ལྡི་ལིར་སློབ་གྲྭ་ཁག་ ༩༠ ལྷག་གི་སློབ་ཕྲུག་རྣམས་ལ་ལམ་སྟོན་བཀའ་སློབ་བསྩལ་བ།

དེ་རིང་ཟླ་ ༢ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ convent of Jesus and Mary ཞེས་པར་ལྡི་ལི་ཁུལ་གྱི་སློབ་གྲྭ་ ༩༠ ལྷག་གི་སློབ་ཕྲུག་ ༡༤༠༠ ལྷག་ལ་བྱམས་བརྩེ་དང་བཟང་སྤྱོད་གཉིས་བདེ་སྐྱིད་ཀྱི་འབྱུང་ཁུངས་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་སྩལ་ཡོད་པ་དང་། མགོན་པོ་༸གང་ཉིད་མཆོག་གིས་ལྡི་ལིའི་ནང་སྙན་གྲགས་ཆེ་བའི་སློབ་གྲྭ་ཁག་ནས་ཆེད་བཅར་ཞུས་པའི་སློབ་ཕྲུག་ཚོར་གཙོ་བོ་མི་སེམས་པ་བཟང་པོ་ཞིག་བྱེད་དགོས་གལ་ཡིན་པ་དང་། འགྲོ་བ་མིའི་རིགས་ལ་སེམས་ཅན་གཞན་དང་མི་འདྲ་བའི་ཀླད་པ་ཡོད་པ་དང་། ཀླད་པ་དེའི་ཐོག་ནས་དྲན་པ་དང་བསམ་བློ་གཏོང་བའི་རྣམ་སྤྱོད་དེ་སེམས་ཅན་གཞན་དང་མི་གཅིག་པའི་ཁྱད་ཡོད་སྐོར་ལམ་སྟོན་བཀའ་བསྩལ་གནང་སོང་།  ༸གོང་ས་མཆོག་གིས་སྐབས་རེ་ང་ཚོས་ང་ཚོ་ཚང་མ་འགྲོ་བ་མིའི་མཆེད་གྲོགས་གཅིག་མཚུངས་ཡིན་པའི་འདུ་ཤེས་དེ་བརྗེད་འགྲོ་བའམ་སྣང་མེད་ལྟ་བུ་བཞག་སྟེ་གཞི་རྩ་གཉིས་པ་ཆོས་ལུགས་མི་འདྲ་བ་དང་། སྐད་ཡིག་མི་འདྲ་བ། ལུང་པ་མི་འདྲ་བ་སོགས་ཀྱི་ཁྱད་པ་ལ་བསམ་བློ་ནན་པོ་བཏང་བ་དང་། དེའི་བརྒྱུད་ནས་ང་དང་ཁྱོད་ཟེར་བའི་ལྷན་སྐྱེས་ཀྱི་བར་ཁྱད་ཅིག་སླེབས་ཀྱི་ཡོད་སྟབས།  ལོ་རྒྱུས་ལ་ཕྱི་མིག་ཞིག་བལྟ་ཚེ་དཀའ་སྡུག་ཚད་མེད་མྱོང་བའི་ངལ་བ་དེ་དག་ང་དང་ཁྱོད་ཟེར་བའི་བར་ཁྱད་དེའི་དབང་གིས་བྱུང་ཡོད་པ་ང་ཚོས་གསལ་པོ་ཤེས་ཐུབ་ཀྱི་ཡོད་པ་ལྟར། ངལ་བ་ཕྲན་བུ་འཕྲད་ཀྱི་ཡོད་ཀྱང་ང་ཚོས་གཞི་རྩ་དང་པོ་མི་གཅིག་མཚུངས་ཡིན་པའི་འདུ་ཤེས་དེ་ཆེ་ཙམ་བཟུང་ནས་གཞི་རྩ་གཉིས་པ་ཆོས་ལུགས་མི་འདྲ་བ་དང་། སྐད་ཡིག་མི་འདྲ་བ། ལུང་པ་མི་འདྲ་བ་སོགས་ཀྱི་ཁྱད་པར་ཐོག་བསམ་བློ་དེ་ཙམ་གཏོང་རྒྱུ་མེད་སྐོར་བཀའ་ནན་བསྩལ་སོང་། ༸གོང་ས་མཆོག་གིས་ད་དུང་ཇི་སྲིད་ང་ཚོ་འགྲོ་བ་མི་རྣམས་གནས་པ་དེ་སྲིད་དུ་དཀའ་ངལ་ཡོང་རྒྱུ་ནི་ཆོས་ཉིད་ཡིན་པ་དང་། དཀའ་ངལ་དེ་དག་གྲོས་མོལ་གྱི་ལམ་ནས་སེལ་ཐབས་བྱེད་དགོས་པ་དང་། གལ་ཏེ་ང་ཚོའི་འཛམ་བུ་གླིང་འདི་བདེ་སྐྱིད་དང་ལྡན་པ་ཞིག་འདོད་ཚེ་ངེས་པར་དུ་དཀའ་ངལ་གང་ཞིག་འཕྲད་ཀྱང་དེ་དག་གྲོས་མོལ་གྱི་ལམ་ནས་སེལ་ཐབས་བྱེད་དགོས་པ་རེད་ཅེས་བཀའ་བསྩལ་སོང་བ་དང་། དེ་ལྟར་ཡོང་བར་ངེས་པར་དུ་ཕྱོགས་གཞན་དེར་བྱམས་པ་དང་བརྩེ་བའི་འདུ་ཤེས་ཡོད་པ་བྱེད་དགོས་པ་མཟད།  ཁོང་ཚོའི་ཐོབ་ཐང་དང་བསམ་ཚུལ་ལ་ངེས་པར་དུ་བརྩི་བཀུར་ཡང་བྱེད་དགོས། གང་ལ་ཞེ་ན་ང་ཚོ་ཚང་མ་འགྲོ་བ་མིའི་མཆེད་གྲོགས་གཅིག་པ་ཡིན་པའི་འདུ་ཤེས་དེའི་ཐོག་ནས་དཀའ་ངལ་སེལ་ཐབས་གནང་པ་ཡིན་ན་གྲོས་མོལ་དེ་དོན་སྙིང་ལྡན་པ་ཞིག་ཡོང་སྐོར་ལམ་སྟོན་བཀའ་ནན་མཛད་ཡོད་པ་རེད། ཁྱད་པར་དུ་མགོན་པོ་༸གང་ཉིད་མཆོག་གིས་སློབ་ཕྲུག་ཁྱེད་རང་ཚོ་ད་ལྟའི་དུས་རབས་ ༢༡ གི་མི་རབས་ཤ་སྟག་ཡིན་པས་དུས་རབས་འདི་བདེ་སྐྱིད་དང་ལྡན་པ་ཞིག་ཡོང་ཐབས་སུ་ད་ལྟ་ནས་བསམ་བློ་དོ་ནན་གཏང་ཐོག་ལས་འགུལ་སྤེལ་དགོས་པའི་ལམ་སྟོན་སོགས་རྒྱ་ཆེ་བསྩལ་སོང་། མགོན་པོ་༸གང་ཉིད་མཆོག་གིས་ཚོུད་གཅིག་ཙམ་རིང་གི་ལམ་སྟོན་བཀའ་སློབ་བཀྲིན་བསྩལ་གྲུབ་བསྟུན་སློབ་ཕྲུག་ཚོས་དྲི་བ་ཁག་ཅིག་ལ་ཕུལ་བར་བཀའ་ལན་ཡང་བསྩལ་ཡོད་པ་རེད། གནས་ཚུལ་ཤེས་རྟོགས་བྱུང་བར། དེ་རིང་ཉིན་རྒྱབ་ད་དུང་རྒྱ་གར་གྱི་གསར་འགོད་པ་གྲགས་ཅན་     Shekhar Gupta  མཆོག་གི་  OFF the CUFF ཞེས་པའི་བརྙན་འཕྲིན་ལས་རིམ་ཞིག་ཐོག་མགོན་༸གང་ཉིད་ལྷན་ཞུགས་གནང་རྒྱུ་ཡིན་པ་མ་ཟད།  སང་ཚེས་ ༧ ཉིན་  Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་ཡིན་པ་རེད། རྩ་བའི་དེ་རིང་རྒྱལ་ས་ལྡི་ལིའི་ Convent of Jesus and Mary སློབ་གྲྭའི་མཛད་རིམ་དེ་ནི་  Itihaas ཞེས་པའི་རྒྱ་གར་གྱི་ལེགས་བྱང་དང་གནའ་བོའི་གཅེས་ནོར་སྲུང་སྐྱོབ་ཚོགས་པས་གོ་སྒྲིག་ཞུས་པ་ཞིག་ཡིན་ཞིང་། མཛད་རིམ་ཡོངས་རྫོགས་རྒྱ་གར་རྒྱལ་ཡོངས་ཀྱི་སློབ་གྲྭ་ཚང་མའི་ནང་དྲ་རྒྱ་བརྒྱུད་ནས་ཐད་སྲིང་གནང་གི་འདུག་པ་མ་ཟད། རྒྱལ་སྤྱིའི་ནང་ Jesus and mary སློབ་གྲྭའི་ཡན་ལག་ཁག་གི་ནང་དུའང་ཐད་སྲིང་གནང་ཡོད་པ་རེད།

༸གོང་ས་མཆོག་གིས་ལྡི་ལིར་མི་མང་སྟོང་ཕྲག་བརྒལ་བར་ལམ་སྟོན་བཀའ་སློབ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིར་རྟེན་གཞི་བྱས་པའི་བིདྱཱ་ལོཀ་ Vidyaloke  ཞེས་རྒྱ་གར་གནའ་རབས་ལེགས་སྦྱང་སླར་གསོའི་བསྟི་གནས་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས་ Talkatora ཞེས་པའི་རྩེད་ཐང་དུ་མི་མང་སྟོང་ཕྲག་འགར་ལམ་སྟོན་བཀའ་སློབ་བཀྲིན་བསྩལ་གནང་ཡོད་པ་དང་།   རྒྱལ་ས་ལྡི་ལིའི་ནང་གི་སློབ་གྲྭ་གྲགས་ཅན་ཁག་ཅིག་གི་དགེ་ལས་སློབ་ཕྲུག་དང་། ལས་ཁུངས་འདྲ་མིན་གྱི་ལས་བྱེད། དེ་བཞིན་ཕྱི་རྒྱལ་མི་རིགས་བཅས་ཁྱོན་མི་གྲངས་སྟོང་ཕྲག་བརྒལ་བ་འདུ་འཛོམ་བྱུང་ཡོད་པ་རེད། སྐབས་དེར་༸གོང་ས་མཆོག་གིས་ང་ཚོ་ཚང་མ་འགྲོ་བ་མི་ཡིན་པ་གཅིག་པ་རེད། དེས་ན་ངོས་ཀྱིས་རྒྱུན་དུ་འཛམ་གླིང་ནང་ཡོད་པའི་མི་འབོར་དུང་ཕྱུར་བདུན་ལྷག་ཡོད་པ་དེ་དག་གཉིས་སུ་མེད་པ་གནང་དགོས་སྐོར་བཤད་ཀྱི་ཡོད་ལ། ཆོས་ཕྱོགས་ནས་བསམ་བློ་གཏང་ཚེ་ཚང་མ་མཉམ་གནས་བྱ་རྒྱུ་དེ་འགྲོ་ལུགས་དང་མཐུན་པ་ཞིག་ཆགས་ཡོད་པ་མ་ཟད། ཐ་ན་མི་ཙམ་མ་ཟད་སྲོག་ཆགས་གཞན་ལའང་འདོད་པ་དེ་གཅིག་མཚུངས་ཡོད་པ་དང་། དེ་ལོངས་སུ་སྤྱོད་རྒྱུའི་རང་དབང་ཡང་ཡོད་པ་རེད།  ལྷག་པར་དུ་ང་ཚོ་མིའི་རིགས་སུ་སྐྱེས་པ་ནས་མ་ཤི་བར་དུ་བསམ་བློ་གཏོང་སྟངས་དང་། དགའ་སྡུག་གི་འདུ་ཤེས་འཛིན་སྟངས། དེ་བཞིན་ལུས་པོའི་ཁམས་བཅས་ཕྱོགས་གང་ས་ནས་སྐྱེས་མ་ཐག་མི་ཚེ་འདི་བདེ་སྐྱིད་ལྡན་པ་ཞིག་བྱུང་ན་བསམ་པ་གཅིག་མཚུངས་ཡིན་སྟབས། སྐབས་རེ་ངོས་རང་སྒེར་གྱི་བསམ་བློ་གཏོང་ཕྱོགས་ཞིག་ལ་མི་ཚེའི་དགོས་པ་ནི་བདེ་སྐྱིད་ཡོང་ཐབས་བྱེད་རྒྱུ་མིན་ནམ་བསམ་གྱི་འདུག་ཅེས་སྐུ་སྒེར་གྱི་དངོས་མྱོང་དང་འབྲེལ་ཏེ་ལམ་སྟོན་བསྩལ་ཡོད། ང་ཚོ་འཚོ་དང་མ་འཚོ་ཟེར་བ་དེའང་འབྱུང་འགྱུར་གནས་སྟངས་བཟང་པོ་ཞིག་ཡོང་རྒྱུ་རེད་ཅེས་རེ་བ་དེའི་ཐོག་ནས་འཚོ་བཞིན་ཡོད་པ་རེད་ཅེས་བཀའ་བསྩལ་མཛད་སོང་། དེ་བཞིན་༸གོང་ས་མཆོག་གིས་རྩ་བའི་འཛམ་གླིང་འདི་ཐོག་ཡོད་པའི་ཆོས་ལུགས་སོ་སོར་ལྟ་གྲུབ་འདྲ་མིན་ཡོད་ཀྱང་། དེ་དག་ཚང་མའི་དམིགས་ཡུལ་དེ་བརྩེ་བ་དང་བྱམས་སྙིང་རྗེ་སོགས་ཁྱབ་སྤེལ་གནང་རྒྱུ་གཅིག་མཚུངས་ཡིན་སྐོར་བཀའ་གནང་པ་དང་སྦྲགས། དེང་སྐབས་སྟབས་མ་ལེགས་པ་ཞིག་ལ་གཅན་གཟན་སྟག་དང་གླང་པོ་ཆེ་ལྟ་བུས་མི་བསད་འདུག་ཟེར་ན་མི་ཚང་མར་ཧང་སང་བའི་གནས་ཚུལ་ཆགས་ཀྱི་ཡོད་པ་དང་། མིས་མི་བསད་འདུག་ཟེར་ན་སྤྱིར་སྟངས་ལྟ་བུ་ཞིག་ཏུ་ངོས་འཛིན་བཞིན་ཡོད་པ་རེད་ཅེས་བཀའ་གནང་སྟེ། གལ་ཏེ་ང་ཚོས་དུས་རབས་ ༢༠ ནང་ཕྱི་མིག་ཞིག་བལྟ་ཚེ་ལོ་རྒྱུས་སྨྲ་བ་པ་ཚོས་བཤད་པ་ལྟར་མི་ས་ཡ་གཉིས་ལྷག་བསད་པར་ངོས་འཛིན་གྱི་ཀྱི་ཡོད་པ་རེད། དེས་ན་དཀའ་སྡུག་ཚད་མེད་ཀྱི་འོག་མི་གསོད་ཁྲག་སྦྱོར་བྱུང་བའི་ལོ་རྒྱུས་ལས་སློབ་གསོ་ལེན་ནས་མི་རབས་གཞོན་པ་ཚོས་དུས་རབས་ ༢༡ པ་འདི་བདེ་སྐྱིད་ལྡན་པའི་དུས་རབས་ཤིག་བསྐྲུན་ཐབས་བྱེད་དགོས་པ་སོགས་ཀྱི་ལམ་སྟོན་བཀའ་སློབ་རྒྱ་ཆེ་བསྩལ་ཡོད་པ་རེད། གཞན་ཡང་༸གང་ཉིད་མཆོག་གིས་མང་ཚོགས་རྣམས་ལ་བརྗོད་གཞི་དང་འབྲེལ་ནས་བཀའ་སློབ་གནང་དོན་ལ་རྒྱ་གར་གྱི་ཆོས་དང་མ་འབྲེལ་བའི་བཟང་སྤྱོད་ཀྱི་ལྟ་གྲུབ་དང་འཚེ་མེད་ཞི་བའི་ལྟ་གྲུབ་གཉིས་ད་ལྟའི་འཛམ་བུ་གླིང་འདིར་ཤིན་ཏུ་ནས་འོས་ཤིང་འཚམ་པ་ཞིག་ཡོད་པ་མ་ཟད། དངོས་ཡོད་ཀྱི་གནས་སྟངས་ཆ་ནས་ཀྱང་ང་ཚོ་ཚང་མ་བྱམས་པ་དང་བརྩེ་གདུང་ཀྱི་ཚོར་བ་ཡོད་པའི་སྤྱི་ཚོགས་གཅིག་གི་སེམས་ཅན་གཅིག་མཚུངས་ཡིན་སྟབས། ང་ཚོར་མའི་མངལ་ནས་བྱམས་བརྩེའི་ས་བོན་དེ་ཡོད་པ་ཡིན་དུས་ང་ཚོས་རྣམ་དཔྱོད་དེ་སྤྱོད་ནས་བྱམས་བརྩེའི་ས་བོན་དེ་ཕྱོགས་ལྷུང་མེད་པ་ཞིག་ཡོང་ཐབས་འབད་དགོས་ཞེས་གསུངས་པ་དང་ཆབས་ཅིག རིམ་པས་རྣམ་དཔྱོད་དེའི་ཐོག་ནས་ས་བོན་དེ་རྒྱ་སྐྱེད་བྱེད་དགོས་ཞིང་། དེ་ཡང་རྣམ་འགྱུར་ལ་ལྟོས་མེད་ཀྱིས་འགྲོ་བ་མི་ཞིག་ཡིན་པའི་འདུ་ཤེས་འཛིན་ཐོག་རང་ཉིད་བདེ་སྐྱིད་འདོད་པ་ལྟར་གཞན་དེ་བདེ་སྐྱིད་འདོད་པ་གཅིག་མཚུངས་ཡིན་པ་ཚོར་དགོས་སྐོར་སོགས་བཀའ་སློབ་བཀྲིན་ཆེ་བ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་དེང་སྐབས་རྒྱ་གར་བ་མི་སྒེར་པ་དང་ཚོགས་པ་ཁག་ཅིག་གིས་རང་ཉིད་ལ་སྔ་མོ་ནས་ཤིན་ཏུ་ཕྱུག་པའི་རིག་གཞུང་དེ་ངོས་ཟིན་ཐོག་དེར་དོ་སྣང་དང་སླར་གསོ་ཡོང་ཐབས་གནང་གི་ཡོད་པ་མ་ཟད། སྐབས་བབ་ Max སྨན་ཁང་གི་སྦྱིན་བདག་དང་ད་རེས་མང་ཚོགས་ཀྱི་གསུང་བཤད་ལས་རིམ་མཐུན་འགྱུར་གནང་མཁན་སྐུ་ཞབས་ Veer Singh  མཆོག་ལ་ཐུགས་རྗེ་ཆེ་ཞུས་པ་དང་འབྲེལ། ལས་དོན་འདི་འཛམ་གླིང་སྤྱིའི་བདེ་དོན་ཙམ་མིན་པར་འཛམ་གླིང་སྤྱིའི་ཁོར་ཡུག་དང་ཡང་འབྲེལ་བ་ཡོད་པ་རེད་ཅེས་བཀའ་བསྩལ་མཛད་སོང་།

༸གོང་ས་མཆོག་གིས་བོད་ནང་བཀའ་བསྟན་གཉིས་ལ་དོ་སྣང་དེ་ཙམ་གནང་མེད་པ་དེ་འཐུས་ཤོར་ཞིག་ལ་གཟིགས་ཀྱི་ཡོད་པ་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ནང་རྟེན་གཞི་བྱས་པའི་རྒྱ་གར་གནའ་རབས་ཀྱི་རིག་གནས་དང་ལེགས་བྱང་བསྐྱར་གསོ་བསྟི་གནས་ཁང་བིདྱཱ་ལོཀ་འམ་འཇིག་རྟེན་གྱི་སྣང་གསལ་ཞེས་པས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་གིས་དེ་རིང་སྔ་དྲོ་ཚོུད་ ༨།༣༠ སྟེང་ཉིན་གཉིས་པའི་ཆོས་འབྲེལ་མུ་མཐུད་བསྐྱངས་གནང་ཡོད་པ་དང་། སྐབས་དེར་༸གོང་ས་མཆོག་གིས་དེ་སྔོན་བོད་ནང་སངས་རྒྱས་བཅོམ་ལྡན་འདས་ཀྱི་གསུང་བཞག་པའི་ཆོས་ཕུང་བརྒྱད་ཁྲི་བཞི་སྟོང་བཀའ་འགྱུར་དང་བསྟན་འགྱུར་བཅས་ལ་དོ་སྣང་དེ་ཙམ་མེད་པར་གསང་སྔགས་ཀྱི་ཆོས་ལ་དོ་སྣང་ཆེན་པོ་གནང་པ་དེ་འཐུས་ཤོར་ཆེན་པོ་ཞིག་ཏུ་ངོས་འཛིན་གནང་གི་ཡོད་ཅེས་བཀའ་སློབ་བསྩལ་གནང་སོང་། ཁ་སང་ཚེས་ ༣ ཉིན་དབུ་འཛུགས་ཀྱིས་དེ་རིང་བར་ཉིན་གྲངས་གཉིས་རིང་གི་ཆོས་འབྲེལ་དེ་ནི་བིདྱཱ་ལོཀ་ཞེས་པ་རྒྱ་གར་གྱི་སྤྱི་ཚོགས་ནང་དཔལ་འབྱོར་དང་ཤེས་ཡོན་སོགས་ཀྱི་དྲག་རིམ་མི་སྣའི་གཞོན་སྐྱེས་ཚོགས་པ་ཞིག་གིས་གསོལ་འདེབས་ཞུས་པ་ཞིག་ཡིན་པ་རེད། ཆོས་འབྲེལ་དེའི་དམིགས་ཡུལ་གཙོ་བོ་ནི་རྒྱ་གར་གཞོན་སྐྱེས་དང་ལྷག་པར་དུ་སྤྱི་ཚོགས་ཁྱོན་ཡོངས་ཀྱི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུན་དུ་ཡང་ནས་ཡང་དུ་བཀའ་སྩལ་གནང་བཞིན་པའི་རྒྱ་གར་གྱི་ཕ་མེས་ནས་ཡོད་པའི་ལེགས་བྱང་བཟང་པོ་དེ་མི་ཉམས་རྒྱུན་འཛིན་ཡོང་ཐབས་དང་། ད་ལྟའི་དུས་རབས་དང་མཐུན་པའི་ལེགས་བྱང་འདི་འཛམ་གླིང་སྤྱིའི་བདེ་དོན་ལ་ཕན་རླབས་ཆེན་པོ་ཞིག་བསྐྲུན་རྒྱུའི་ནུས་པ་ལྡན་ཡོད་སྟབས། ཆོས་ལུགས་མཐུན་འབྲེལ་དང་ཆོས་དང་མ་འབྲེལ་བའི་བཟང་པོའི་ཡོན་ཏན་གྱི་རིན་ཐང་དེ་དག་རྒྱ་གར་སྤྱི་ཚོགས་ཁྲོད་ལ་ངོ་སྤྲོད་གསལ་པོ་གནང་རྒྱུ་དང་། རྒྱ་གར་མང་ཚོགས་ཀྱིས་ལེགས་བྱང་དེའི་རིན་ཐང་ཤེས་ཐོག་དེ་དག་ཉམས་པ་སོར་ཆུད་གནང་སྟེ་རང་ཉིད་ཀྱི་སྤྱི་ཚོགས་གཙོས་འགྲོ་བ་སྤྱིར་ཕན་ཐོགས་ཡོང་བ་བཅས་ལ་དམིགས་པ་ལྟར་ཆོས་འབྲེལ་གོ་སྒྲིག་ཞུ་མཁན་ཚོས་ཀྱང་དཔལ་མགོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་ཀྱི་བཀའ་ཆོས་གསོལ་འདེབས་ཞུས་ཡོད་པ་རེད། ཆོས་འབྲེལ་དབྱིན་སྐད་གསུང་བསྒྱུར་བ་ལྡི་ལི་བོད་ཁང་གི་ངེས་སྟོན་པ་དགེ་བཤེས་རྡོ་རྗེ་དགྲ་འདུལ་ལགས་སུ་བཀའ་ཆོས་ཐོག་ཕེབས་པའི་རྒྱ་གར་གྱི་དྲག་རིམ་མི་སྣ་ཚོས་དོ་དབྱིངས་ཇི་ཙམ་གནང་གི་ཡོད་མེད་སོགས་ཀྱི་ཐོག་བཀའ་འདྲི་ཞུས་པར་ཁོང་གིས་ཁ་སང་ཆོས་འབྲེལ་ཉིན་དང་པོའི་ཐོག་༸གོང་ས་མཆོག་གིས་ཁོང་རྣམས་ལ་ཆོས་དང་མ་འབྲེལ་བའི་བཟང་སྤྱོད་ཐོག་བཀའ་ནན་གནང་ནས་བཟང་སྤྱོད་དེ་ཡོང་ས་ནི་རྒྱ་གར་འཕགས་པའི་ཡུལ་རང་ནས་ས་སྐྱེས་རྡོ་སྐྱེས་ལྟ་བུ་ཤིག་ཡིན་སྐོར་ངོ་སྤྲོད་གནང་སྟབས། ཚོགས་བཅར་བ་རྣམས་ནས་ཞེ་དྲག་གིས་དགའ་སྣང་ཆེན་པོ་གནང་བཞིན་ཡོད་པ་སོགས་གསུངས་སོང་། ཤེས་རྟོགས་བྱུང་བར་གཞིགས་ན། སང་ཟླ་ ༢ ཚེས་ ༥ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དེང་གི་དུས་སུ་རྒྱ་གར་གནའ་བོའི་ཤེས་བྱ་བསྐྱར་གསོ་གནང་ཕྱོགས་ཐོག་མང་ཚོགས་ལ་བཀའ་བསྩལ་མཛད་རྒྱུ་དང་ཚེས་ ༦ ཉིན་ཁུལ་དེའི་རྒྱ་གར་རིག་གཞུང་བསྟི་གནས་ཁང་དུ་བདེ་སྐྱིད་ཀྱི་རྩ་བ་ནི་སྙིང་རྗེ་དང་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་ཡིན་པ་རེད། དེ་བཞིན་ཚེས་ ༧ དང་ ༨ ཉིན་ Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་བང་སྒྲིག་ཡོད་པ་རེད།

ད་ལྟའི་དུས་རབས་འདི་བདེ་སྐྱིད་ལྡན་པ་ཞིག་ཡོང་རྒྱུ་ནི་༸གང་ཉིད་ཀྱི་ཐུགས་རེ་ཡིན་ཅེས་བཀའ་བསྩལ་བ།

དེ་རིང་ཟླ་ ༢ ཚེས་ ༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ནང་རྒྱ་གར་གྱི་ས་གནས་གང་ས་ནས་ཕེབ ས་པའི་ཤེས་ཡོན་ཅན་གྱི་ན་གཞོན་ཕོ་མོ་ཁྱོན་ ༤༠༠  ལྷག་ལ་དུས་རབས་ཉི་ཤུ་དང་ཉེར་གཅིག་གི་མགོ་སྟོད་དུ་ལྟ་གྲུབ་ཕན་ཚུན་དབར་མ་མཐུན་པ་དང་། ལམ་ལུགས་འདྲ་མིན། དེ་བཞིན་རྒྱལ་ཁབ་ཕན་ཚུན་གྱི་ཞེན་ཁོག་སོགས་གི་མིང་ཐོག་ནས་འཛམ་གླིང་ནང་མི་གསོད་ཁྲག་སྦྱོར་གྱི་དཀའ་ངལ་སྣ་ཚོགས་པ་ཞིག་འཕྲད་མྱོང་ཡོད་སྐོར་དྲན་སྐུལ་གནང་པ་དང་སྦྲགས། ༸གོང་ས་མཆོག་གི་ངོས་ནས་ད་ལྟའི་དུས་རབས་འདི་ཞི་ཞིང་བདེ་སྐྱིད་ལྡན་པ་ཞིག་ཡོང་རྒྱུ་ནི་༸གང་ཉིད་ཀྱི་ཐུགས་རེ་གནང་གི་ཡོད་ཅེས་བཀའ་སློབ་བསྩལ་བ་མ་ཟད། རྒྱ་གར་གྱི་མི་རབས་གཞོན་པ་ཚོར་གནའ་སྔ་མོ་ནས་ཡོད་པའི་སོ་སོའི་རིག་གཞུང་བཟང་པོ་དེའི་བརྒྱུད་ནས་སྤྱིར་སོ་སོའི་རྒྱལ་ཁབ་དང་མི་རིགས་སྒོས་འཛམ་གླིང་སྤྱིའི་ཞི་བདེ་གོང་འཕེལ་ཡོང་ཕྱིར་ཞབས་འདེགས་རླབས་ཆེན་ཞུ་ཐུབ་པའི་ནུས་པ་ཡོད་སྐོར་སོགས་ལམ་སྟོན་བཀའ་སློབ་རྒྱ་ཆེ་བསྩལ་ཡོད་པ་རེད། འཇིག་རྟེན་གྱི་སྣང་གསལ་ཞེས་པ་རྒྱ་གར་གྱི་སྔ་མོའི་རྒྱ་གར་གྱི་རིག་གཞུང་བསྐྱར་གསོའི་ལས་འཆར་གྱི་ན་གཞོན་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་གིས་ལྡི་ལི་གསར་པའི་ཨབ་དུལ་ཀ་ལམ་ལམ་གཞུང་ཁུལ་དུ་རྟེན་གཞི་བྱས་པའི་ཁང་ཨང་། ༡༥ ནང་རྒྱ་གར་གྱི་མངའ་སྡེ་འདྲ་མིན་ནས་ཕེབས་པའི་ཤེས་ཡོན་ཅན་གྱི་ན་གཞོན་ཕོ་མོ་ཁྱོན་  ༤༠༠   ལྷག་ལ་བཤེས་སྤྲིངས་ཀྱི་ཆོས་འབྲེལ་བཀྲིན་བསྩལ་གནང་ཡོད་པ་རེད། ༸གོང་ས་མཆོག་གིས་ཆོས་འབྲེལ་དངོས་གཞི་དབུ་འཛུགས་མ་གནང་གོང་༸གང་ཉིད་ཀྱིས་ངོས་རང་གི་རེ་བ་དེ་དེ་རིང་ང་ཚོ་འདིར་འདུ་འཛོམས་བྱུང་བ་འདི་ཆོས་བཤད་བྱེད་རྒྱུ་ཙམ་དང་། ལྷག་དོན་ནང་པ་སངས་རྒྱས་པའི་ཆོས་འགྲེལ་བཤད་བྱེད་རྒྱུ་ཙམ་ཞིག་མིན་པར། ད་ལྟའི་དུས་རབས་འདི་ཞི་ཞིང་བདེ་སྐྱིད་ལྡན་པ་ཞིག་ཡོང་རྒྱུ་ནི་དམིགས་ཡུལ་གཙོ་བོ་རེད། གལ་སྲིད་མིའི་འཇིག་རྟེན་གོ་ལ་འདི་བདེ་སྐྱིད་ལྡན་པ་ཞིག་ཡོད་ཚེ་ང་ཚོ་འདིར་འདུ་འཛོམས་གནང་དགོས་དོན་མེད་པ་རེད། འོན་ཀྱང་ང་ཚོས་ཕྱིར་མིག་ཞིག་བལྟ་བ་ཡིན་ན་དུས་རབས་ཉི་ཤུ་དང་ཉེར་གཅིག་གི་མགོ་སྟོད་དུ་ལྟ་གྲུབ་ཕན་ཚུན་དབར་མ་མཐུན་པ་དང་། ལམ་ལུགས་འདྲ་མིན། དེ་བཞིན་རྒྱལ་ཁབ་ཕན་ཚུན་གྱི་ཞེན་ཁོག་སོགས་གི་མིང་ཐོག་ནས་འཛམ་གླིང་ནང་མི་གསོད་ཁྲག་སྦྱོར་གྱི་དཀའ་ངལ་ཆེན་པོ་འཕྲད་ཡོད་པ་རེད། ད་ལྟའི་དུས་སྐབས་འདིར་གཞིགས་ན་མིའི་བསམ་བློ་ལ་འགྱུར་བ་ཞིག་སླེབས་ཡོད་པ་དང་། དེ་ལྟར་སླེབས་ཡོད་པའི་དཔེ་མཚོན་གསལ་པོ་ཞིག་ནི་གནའ་སྔ་མོ་ཡིན་ན་རྒྱལ་ཁབ་གཅིག་གིས་ཁྱིམ་མཚེས་རྒྱལ་ཁབ་གཞན་ཞིག་ལ་དམག་དྲངས་པ་ཡིན་ན། རྒྱལ་ཁབ་དེའི་མི་རིགས་ཀྱིས་དྲི་བ་གང་ཡང་མེད་པའི་ཐོག་སྤོབས་པ་དང་བཅས་དམག་དེར་རྒྱབ་སྐྱོར་གྱིས་མཉམ་ཞུགས་གནང་གི་ཡོད། འོན་ཏང་དེང་གི་ཆར་གནས་སྟངས་དེར་འགྱུར་ལྡོག་ཕྱིན་ཡོད་པ་རེད། དཔེ་མཚོན་ཡག་ཤོས་ནི་ཝིཏ་ནམ་དམག་འཁྲུག་ཆེན་པོའི་སྐབས་མི་གསོད་ཁྲག་སྦྱོར་ཤུགས་ཆེན་པོ་བྱུང་ཡོད་པ་དེར་བློ་འགྱོད་ཆེན་པོ་ཡོང་གི་ཡོད་པ་རེད།  གནས་སྟངས་དེ་དག་ལ་བལྟ་ཚེ་ད་ཆ་མི་མང་ཆེ་བས་ཞི་བདེར་མོས་པ་བྱེད་ཀྱི་ཡོད་པ་གསལ་པོ་ཞིག་ཡིན་སྐོར་ལམ་སྟོན་མཛད་སོང་། དེ་བཞིན་༸གོང་ས་མཆོག་གིས་རྒྱ་གར་རྒྱལ་ཁབ་འདི་ནི་མི་འབོར་མང་ཤོས་དང་མང་གཙོ་ཡང་དག་པའི་རྒྱལ་ཁབ་ཅིག་ཡིན་སྟབས། ངོས་རང་གི་ངོས་ནས་འཛམ་བུ་གླིང་འདིའི་ནང་རྒྱལ་ཁབ་ཁག་ ༢༠༠ ལྷག་ཡོད་པ་ལས་རྒྱ་གར་འདི་ཞི་བདེའི་ཐོག་ཕྱག་ལས་གནང་ཐུབ་མཁན་གྱི་རྒྱལ་ཁབ་ཅིག་ཏུ་ངོས་འཛིན་ཞུ་མུས་ཡིན་ཅེས་བཀའ་བསྩལ་བ་དང་། དེའང་རྒྱ་གར་ལ་ཕ་མེས་ནས་ཡོད་པའི་རིག་གཞུང་བཟང་པོ་དེ་དང་དེང་དུས་ཀྱི་ཤེས་ཡོན་བཅས་ཕྱོགས་གཉིས་ཀའི་མཐུན་རྐྱེན་འཛོམས་ཡོད་པས་དེ་གཉིས་ཟུང་འབྲེལ་ཐོག་ནས་ཐོག་མར་རང་ཉིད་ཀྱི་རྒྱལ་ཁབ་ཀྱི་ངལ་བ་ཁག་སེལ་ཐབས་བྱ་དགོས་པ་དང་། དེ་ལྟར་བྱེད་ཐུབ་ན་རྒྱ་གར་དེ་དྲང་བདེན་ལ་རྒྱབ་སྐྱོར་བྱེད་མཁན་ཞིག་དང་། ལྷག་དོན་དེའི་བརྒྱུད་ནས་སོ་སོའི་སྤྱི་ཚོགས་ཀྱི་དཔལ་འབྱོར་དབུལ་ཕྱུག་གི་དཀའ་ངལ།   སྤྱོ་ཚོགས་ཁྱོན་ཡོངས་ཞི་བདེ་ལྷིང་འཇག་ཡོད་པ་ཞིག་བྱུང་ཚེ་རྒྱལ་ཁབ་ཀྱང་བདེ་འཇགས་ལྡན་པ་ཞིག་ཡོང་ངེས་ཡིན་སྐོར་གསུངས་པ་དང་ཆབས་ཅིག  ཁྱེད་རང་ཚོར་འཛམ་གླིང་སྤྱིར་ཕན་པའི་གོ་སྐབས་དང་མཐུན་རྐྱེན་བཅས་ཀྱི་ནུས་པ་ལྡན་ཡོད་སྟབས། ད་ཆ་ང་ཚོས་ཁ་ནས་བཤད་པ་ཙམ་མིན་པར་དོན་འཁྱོལ་ཡོང་བར་འབད་དགོས་པ་དང་། དེར་ཆོས་ལུགས་མཐུན་འབྲེལ་དང་ཆོས་དང་མ་འབྲེལ་བའི་བཟང་སྤྱོད་ཀྱི་ལྟ་གྲུབ་དེ་ཁྱབ་སྤེལ་གནང་དགོས་ཞེས་སོགས་ལམ་སྟོན་རྒྱ་ཆེ་བསྩལ་རྗེས་བཀའ་ཆོས་དབུ་འཛུགས་མཛད་ཡོད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཁ་སང་བཞུགས་སྒར་དྷ་ས་ནས་ཕེབས་ཐོན་གྱིས་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད་པ་རེད། ༸གང་ཉིད་མཆོག་གིས་རྒྱལ་ས་ལྡི་ལིའི་ནང་མང་ཚོགས་ལ་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་ཅིག་གོ་སྒྲིག་ཞུས་ཡོད་པ་རེད། དེའང་དེ་རིང་ཟླ་ ༢ ཚེས་ ༣ དང་ ༤ བཅས་ལ་ཁུལ་དེའི་ Vidyaloke ཞེས་པའི་རྒྱ་གར་ན་གཞོན་ཤེས་ཡོན་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་བཞིན་ Talkatora རྩེད་ཐང་དུ་རྒྱ་གར་གྱི་ན་གཞོན་དད་ལྡན་ཚོར་དཔལ་མགོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་བཀའ་ཆོས་བསྩལ་རྒྱུ་དང་། ཚེས་ ༥ ཉིན་དེང་གི་དུས་སུ་རྒྱ་གར་གནའ་བོའི་ཤེས་བྱ་བསྐྱར་གསོ་གནང་ཕྱོགས་ཐོག་མང་ཚོགས་ལ་བཀའ་བསྩལ་མཛད་རྒྱུ། དེ་རྗེས་ཚེས་ ༦ ཉིན་ཁུལ་དེའི་རྒྱ་གར་རིག་གཞུང་བསྟི་གནས་ཁང་དུ་བདེ་སྐྱིད་ཀྱི་རྩ་བ་ནི་སྙིང་རྗེ་དང་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་ཡིན་པ་རེད། དེ་བཞིན་ཚེས་ ༨ ཉིན་ Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་བང་སྒྲིག་ཡོད་པ་རེད།

༸གོང་ས་མཆོག་བཞུགས་སྒར་ནས་རྒྱལ་ས་ལྡི་ལིར་ཆིབས་བསྒྱུར་བསྐྱངས་པ།

དེ་རིང་ཟླ་ ༢  ཚེས་ ༢  ཉིན་དགུང་ཚོུད་ ༡༢།༤༠ ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྷ་ས་བཞུགས་སྒར་ནས་རྒྱ་གར་གྱི་རྒྱལ་ས་ལྡི་ལི་དང་ཨནྡྲ་པར་དེ་ཤི་མངའ་སྡེའི་ནང་གི་མཛད་འཆར་བསྐྱང་ཕྱིར་ཆིབས་བསྒྱུར་མཛད་སོང་། མཛད་འཆར་ལྟར་ན།  ཟླ་ ༢ ཚེས་ ༣ ནས་ ༩ བར་བདུན་ཕྲག་གཅིག་ལྷག་རིང་བཞུགས་ཞག་མཛད་པའི་ཁྲོད། སང་ཟླ་ ༢ ཚེས་ ༣ དང་ ༤ བཅས་ལ་ཁུལ་དེའི་ Vidyaloke ཞེས་པའི་རྒྱ་གར་ན་གཞོན་ཤེས་ཡོན་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་བཞིན་ Talkatora རྩེད་ཐང་དུ་རྒྱ་གར་གྱི་ན་གཞོན་དད་ལྡན་ཚོར་དཔལ་མགོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་བཀའ་ཆོས་བསྩལ་རྒྱུ་དང་། ཚེས་ ༥ ཉིན་དེང་གི་དུས་སུ་རྒྱ་གར་གནའ་བོའི་ཤེས་བྱ་བསྐྱར་གསོ་གནང་ཕྱོགས་ཐོག་མང་ཚོགས་ལ་བཀའ་བསྩལ་མཛད་རྒྱུ། དེ་རྗེས་ཚེས་ ༦ ཉིན་ཁུལ་དེའི་རྒྱ་གར་རིག་གཞུང་བསྟི་གནས་ཁང་དུ་བདེ་སྐྱིད་ཀྱི་རྩ་བ་ནི་སྙིང་རྗེ་དང་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་ཡིན་པ་རེད། དེ་བཞིན་ཚེས་ ༨ ཉིན་ Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་ལེགས་གྲུབ་ཟིན་རྗེས། རྒྱ་གར་ལྷོ་ཕྱོགས་ Andhra Pradesh མངའ་སྡེའི་ Vijayawada གྲོང་ཁྱེར་དང་། Hyderabad དེ་བཞིན་ Amravati ས་གནས་བཅས་སུ་ཆིབས་བསྒྱུར་མཛད་ཀྱི་ཡོད་པ་རེད། དེའང་ Andhra Pradesh མངའ་སྡེའི་གྲོས་ཚོགས་ཀྱིས་གདན་ཞུའི་གསོལ་འདེབས་ཕུལ་བ་ཞིག་ཆགས་ཀྱི་ཡོད་པ་རེད། ཕྱི་ཚེས་ ༡༡ དང་ ༡༢ བཅས་སུ་མངའ་ཁུལ་དེའི་གྲོང་ཁྱེར་ Hyderabad ནང་རྟེན་གཞི་བྱས་པའི་རྒྱལ་ཡོངས་སྐོར་སྲུང་བསྟི་གནས་ཁང་དུ་བཀའ་སློབ་བསྩལ་རྒྱུ་བཅས་ཀྱི་མཛད་འཆར་སྣ་མང་བསྐྱང་གཏན་འཁེལ་ཡོད་པ་རེད། མཛད་འཆར་ལྟར་ན། ༸གོང་ས་མཆོག་ད་ལན་རྒྱ་གར་གྱི་ས་གནས་ཁག་བཞིའི་ནང་གི་མཛད་འཕྲིན་ཁག་ལེགས་གྲུབ་ཀྱིས་ཟླ་ ༢ ཚེས་ ༡༣ ཉིན་བཞུགས་སྒར་དུ་ཆིབས་༸ཞལ་བསྒྱུར་གནང་མཛད་ཀྱི་འདུག  

༸གོང་ས་མཆོག་རྒྱ་གར་ལྷོ་ཕྱོགས་ཨ་མ་རཱ་བ་ཏཱི་གཙོས་པའི་ས་གནས་བཞིའི་ནང་ཆིབས་བསྒྱུར་མཛད་རྒྱུ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་ ༢ ཚེས་ ༢ ཉིན་བཞུགས་སྒར་རྒྱལ་བའི་ཕོ་བྲང་ནས་ཆིབས་ཐོན་གྱིས་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལི་དང་ལྷོ་ཕྱོགས་ Andhra Pradesh མངའ་སྡེའི་ Vijayawada གྲོང་ཁྱེར་དང་།  Hyderabad དེ་བཞིན་ Amravati ས་གནས་བཅས་སུ་ཆིབས་བསྒྱུར་བསྐྱང་རྒྱུ་རེད་འདུག ༸གོང་ས་མཆོག་གིས་ཟླ་ ༢ ཚེས་ ༩ ཉིན་རྒྱ་གར་གྱི་རྒྱལ་ས་ལྡི་ལིའི་ནང་གི་མཛད་འཕྲིན་ཁག་ལེགས་གྲུབ་གནང་རྗེས། རྒྱ་གར་ལྷོ་ཕྱོགས་ Andhra Pradesh མངའ་སྡེའི་ Vijayawada གྲོང་ཁྱེར་དང་། Hyderabad དེ་བཞིན་ Amravati ས་གནས་བཅས་སུ་ཆིབས་བསྒྱུར་མཛད་ཀྱི་ཡོད་པ་རེད། དེའང་ Andhra Pradesh མངའ་སྡེའི་གྲོས་ཚོགས་ཀྱིས་གདན་ཞུའི་གསོལ་འདེབས་ཕུལ་བ་ཞིག་ཆགས་ཀྱི་ཡོད་པ་རེད། ཕྱི་ཚེས་ ༡༡ དང་ ༡༢ བཅས་སུ་མངའ་ཁུལ་དེའི་གྲོང་ཁྱེར་ Hyderabad ནང་རྟེན་གཞི་བྱས་པའི་རྒྱལ་ཡོངས་སྐོར་སྲུང་བསྟི་གནས་ཁང་དུ་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་ཅིག་གོ་སྒྲིག་ཞུས་འདུག སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་གིས་ལྷོ་ཕྱོགས་ Andhra Pradesh མངའ་སྡེའི་ནང་ཆིབས་བསྒྱུར་མ་མཛད་གོང་དུ་ཟླ་ ༢ ཚེས་ ༣ དང་ ༤ བཅས་ལ་ཁུལ་དེའི་ Vidyaloke ཞེས་པའི་རྒྱ་གར་ན་གཞོན་ཤེས་ཡོན་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་བཞིན་ Talkatora རྩེད་ཐང་དུ་རྒྱ་གར་གྱི་ན་གཞོན་དད་ལྡན་ཚོར་དཔལ་མགོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་བཀའ་ཆོས་བསྩལ་རྒྱུ་དང་། ཚེས་ ༥ ཉིན་དེང་གི་དུས་སུ་རྒྱ་གར་གནའ་བོའི་ཤེས་བྱ་བསྐྱར་གསོ་གནང་ཕྱོགས་ཐོག་མང་ཚོགས་ལ་བཀའ་བསྩལ་མཛད་རྒྱུ། དེ་རྗེས་ཚེས་ ༦ ཉིན་ཁུལ་དེའི་རྒྱ་གར་རིག་གཞུང་བསྟི་གནས་ཁང་དུ་བདེ་སྐྱིད་ཀྱི་རྩ་བ་ནི་སྙིང་རྗེ་དང་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་ཡིན་པ་རེད། དེ་བཞིན་ཚེས་ ༨ ཉིན་ Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་སོགས་ཀྱི་མཛད་འཆར་རྒྱ་ཆེ་བསྐྱང་གཏན་འཁེལ་ཡོད་པ་རེད། མཛད་འཆར་ལྟར་ན། ༸གོང་ས་མཆོག་གིས་ད་ལན་རྒྱ་གར་གྱི་ས་གནས་ཁག་བཞིའི་ནང་གི་མཛད་འཕྲིན་ཁག་ལེགས་པར་གྲུབ་བསྟུན། ཕྱི་ཟླ་ ༢ ཚེས་ ༡༣ ཉིན་བཞུགས་སྒར་དུ་ཆིབས་༸ཞལ་བསྒྱུར་གནང་མཛད་ཀྱི་འདུག

༸གོང་ས་མཆོག་ལྡི་ལི་ནང་གི་མཛད་འཕྲིན་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལི་ནང་གི་མཛད་འཕྲིན་ཁག་ལེགས་པར་གྲུབ་བསྟུན། དེ་རིང་སྔ་དྲོ་བཞུགས་སྒར་རྡ་རམ་ས་ལར་༸ཞབས་སོར་བདེ་བར་འཁོད་སྐབས་བཞུགས་སྒར་ཕེབས་ལམ་གྱི་གཡས་གཡོན་དུ་ས་གནས་བོད་མི་གཙོས་རྒྱ་གར་གྱི་ཡུལ་མི་ཚོས་ལག་ཏུ་དཀར་གཙང་གི་མཇལ་དར་དང་དྲི་ཞིམ་གྱི་དུག་སྤོས་དང་བཅས་བསྣམས་ཏེ་དགའ་དད་སྤྲོ་གསུམ་གྱི་ངང་ནས་མགོན་པོ་མཆོག་ལ་ཕེབས་བསུ་གཟབ་རྒྱས་ཞུས་སོང། གཞི་རྩའི་༸གོང་ས་སྐྱབས་མགོན་ཆེན་པོ་མཆོག་གིས་ཟླ་ ༡༢ ཕྱི་ཚེས་ ༨ ཉིན་བཞུགས་སྒར་ནས་ཕེབས་ཐོན་གནང་སྟེ་མཛད་འཆར་ཐོག་མར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་སྲིད་འཛིན་གྱི་ཕོ་བྲང་ Rashtrapati Bhawan ནང་རྒྱ་གར་གྱི་སྲིད་འཛིན་སྐུ་ཞབས་ Pranab Mukherjee མཆོག་དང་མཇལ་མོལ་མཛད་པ་མ་ཟད། སྲིད་འཛིན་མཆོག་དང་ལྷན་རྒྱས་ཕྲུ་གུའི་བདེ་དོན་དང་འབྲེལ་བའི་ལྷན་ཚོགས་ཤིག་གི་དབུ་འབྱེད་དང་མཇུག་སྡོམ་གྱི་མཛད་སྒོར་དབུ་བཞུགས་མཛད་ཡོད་པ་དང་འདི་བཞིན་མང་ཚོགས་ལ་བཀའ་སློབ་དང་ཆོས་འབྲེལ་སོགས་མཛད་འཕྲིན་རྒྱ་ཆེ་བསྐྱངས་གནང་མཛད་ཡོད། ཕྱི་ཚེས་ ༡༣ ཉིན་མགོན་མཆོག་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་ནང་རྟེན་གཞི་བྱས་པའི་མེ་སོར་ཆེས་མཐོའི་གཙུག་ལག་སློབ་གཉེར་ཁང་གི་བསླབ་པ་མཐར་སོན་མཛད་སྒོར་དབུ་བཞུགས་གནང་པ་དང་ཏཱ་ལའི་བླ་མ་མཐོ་སློབ་ཁང་དབུ་འབྱེད་རབ་གནས་བཀྲིན་ཆེ་བ་བསྐྱངས་པ། སྦེང་ལོར་གྲོང་ཁྱེར་ནང་རྟེན་གཞི་བྱས་པའི་རྒྱ་གར་རྒྱལ་ཡོངས་ནང་གི་ཁྲིམས་ཀྱི་སློབ་གཉེར་ཁང་གི་དགེ་ལས་སློབ་མ་ཚོར་བཀའ་སློབ་བསྩལ་ཡོད། དེ་རྗེས་ཚེས་ ༡༦ ནས་ ༢༠ བར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་བྱེས་ཀྱི་གདན་ས་འབྲས་སྤུངས་སུ་འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འཁོར་བའི་མཛད་སྒོ་དང་བཙུན་དགོན་དྲུག་གི་ཆེས་ཐོག་མའི་དགེ་བཤེས་མ་ཐོན་མཁན་རྣམས་ལ་དགེ་བཤེས་མའི་ཕྱག་འཁྱེར་གསོལ་བསྩལ་མཛད་སྒོ། མོན་གྷོ་གཏན་སློབ་དབུ་བརྙེས་ཏེ་ལོ་ངོ་ ༥༠ ཐམ་པ་འཁོར་བའི་དུས་དྲན་མཛད་སྒོ། དེ་བཞིན་ཚན་རིག་བགྲོ་གླེང་བཅས་ཁག་སོ་སོའི་མཛད་སྒོར་དབུ་བཞུགས་ཀྱིས་བཀའ་བསྩལ་སོགས་ཀྱི་མཛད་འཕྲིན་སྣ་མང་བསྐྱངས་གནང་མཛད་ཡོད། དེ་བཞིན་༸གོང་ས་མཆོག་གིས་ཟླ་བ་སྔོན་མའི་ཚེས་ ༢༨ ཉིན་བྷི་ཧར་མངའ་སྡེའི་རྒྱལ་ས་པཊ་ནཱར་ཆིབས་བསྒྱུར་གྱིས་མངའ་སྡེའི་སྤྱི་ཁྱབ་བློན་ཆེན་མཆོག་དང་ལྷན་མཇལ་མོལ་གནང་ཡོད་པ་དང། དེ་ཉིན་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་གནང་མཛད་ཡོད་པ་རེད། ཕྱི་ལོ་གསར་བཞད་ཟླ་ ༡ ཚེས་ ༢ ཉིན་དབུ་འཛུགས་ཀྱིས་ཚེས་ ༡༤ བར་ཕྱི་ནང་གི་དད་ལྡན་ཆོས་ཞུ་བ་འབུམ་གཉིས་ལྷག་ལ་དཔལ་དུས་ཀྱི་འཁོར་དབང་ཆེན་ཐེངས་ ༣༤ བཀྲིན་བསྩལ་བ་གཙོས་ཁུལ་དེའི་ནང་མཛད་འཕྲིན་སྣ་མང་བསྐྱངས་གྲུབ་རྗེས་ཟླ་འདིའི་ཚེས་ ༡༦ ཉིན་མགོན་པོ་མཆོག་རྡོ་རྗེ་གདན་ནས་རྒྱ་གར་གྱི་རྒྱལ་ས་ལྡི་ལིར་ཆིབས་༸ཞལ་བསྒྱུར་གནང་མཛད་པ་དང་། ཁུལ་དེར་རྒྱ་གར་རྒྱལ་ཡོངས་བེུད་ཚོང་པ་ཚོགས་པའི་འཐུས་མི་བུད་མེད་ ༢༠༠ ལྷག་ལ་ནུས་སྟོབས་གོང་འཕེལ་གཏོང་བའི་ནུས་པའི་སྐོར་ལམ་སྟོན་བསྩལ་བ་མ་ཟད། རྒྱལ་ས་ལྡི་ལིར་རྟེན་གཞི་བྱས་པའི་ Mother’s International School དང་བོད་ཁྱིམ་སྡོད་ཁང་དུ་བོད་ཕྲུག་སློབ་མ་བཅས་ཁག་སོ་སོར་བཀའ་སློབ་བསྩལ་བ་བཅས་ཀྱིས་གཙོས་ད་བར་ཁྱོན་ཟླ་བ་གཅིག་དང་ཕྱེད་ལྷག་གི་རིང་རྒྱ་གར་གྱི་མངའ་སྡེ་གསུམ་ནང་གི་མཛད་འཕྲིན་ཁག་ལེགས་གྲུབ་ཀྱིས་དེ་རིང་བཞུགས་སྒར་དུ་༸ཞབས་སོར་བདེ་བར་འཁོད་གནང་མཛད་ཡོད་པ་རེད།

ཨ་རུ་ནཱ་ཅལ་གཞུང་གིས་༸གོང་ས་མཆོག་གི་ཆིབས་བསྒྱུར་ཐད་སྟ་གོན་གནང་བཞིན་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་རིང་མིན་ཟླ་ ༣ པའི་ནང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེར་ཆིབས་བསྒྱུར་མཛད་ཀྱི་ཡོད་པ་ལྟར། ད་ཆ་མངའ་སྡེ་དེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་མགོན་པོ་༸གང་ཉིད་མཆོག་རྟ་དབང་ཁུལ་དུ་ཆིབས་བསྒྱུར་གནང་རྒྱུ་ཐད་ཚ་ཚ་འུར་འུར་ངང་སྟ་གོན་གནང་བཞིན་འདུག དེ་ཡང་བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ཚེ་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་ཇི་ལྟར་གསོལ་འདེབས་ཞུས་དོན་བཞིན། མགོན་པོ་༸གང་ཉིད་མཆོག་རིང་མིན་ཟླ་ ༣ པའི་ནང་ཨ་རུ་ནཱ་ཅལ་མངའ་སྡེར་བདུན་ཕྲག་གཉིས་རིང་ཆིབས་བསྒྱུར་གྱིས་མོན་རྟ་དབང་དང་རྒྱལ་ས་ཨི་ཏྲ་ན་གར། དེ་བཞིན་ཨ་རུ་ནཱ་ཅལ་མངའ་སྡེའི་ཤར་ཕྱོགས་རྫོང་སྡེ་ཁག་བཅས་ཀྱི་ནང་ལ་མཛད་འཆར་ཁག་ཅིག་བསྐྱང་གཏན་འཁེལ་ཡོད་སྟབས། ཁ་སང་ཟླ་ ༡ ཚེས་ ༢༢ ཉིན་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་རྟ་དབང་ནང་ཡོད་པའི་ཡིད་དགའ་ཆོས་འཛིན་དགོན་པར་ཆེད་ཕེབས་ཀྱིས་༸གང་ཉིད་མཆོག་གི་ཆིབས་བསྒྱུར་སྟ་གོན་དང་འབྲེལ་བའི་ལས་ གཞི་ཁག་གི་ཐོག་ལ་གཟིགས་ཞིབ་གནང་པ་དང་འབྲེལ་དེར་དགོས་གལ་གྱི་དགོངས་འཆར་རིགས་ཕུལ་འདུག་པ་མ་ཟད། དེ་རྗེས་སུ་ཁུལ་དེར་མགོན་པོ་༸གང་ཉིད་མཆོག་གི་དབུ་འབྱེད་གནང་ཡུལ་ High Altitude རྩེད་ཐང་གི་ Rostrum སྡིངས་ཆ་གསར་པར་ཞིབ་འཇུག་ཆེད་བསྐྱོད་འདུག སྐབས་དེར་པདྨ་མཁའ་འགྲོ་མཆོག་གིས་ཨ་རུ་ནཱ་ཅལ་མངའ་སྡེ་དེའི་ནང་ལ་གཞུང་གིས་འཆར་ལོ་ནས་ཁུལ་དེའི་ནང་གཞུང་གི་གཙུག་ལག་སློབ་གཉེར་ཁང་ཞིག་ཆེད་འཛུགས་གནང་གཏན་འཁེལ་ཡོད་ཀྱང་། ལས་གཞི་སྤྱི་ཡོངས་ལེགས་གྲུབ་ཟིན་པར་དུས་ཡུན་གང་ཙམ་འགོར་ངེས་ཡིན་པས་ལས་གཞི་དེ་མགོ་འཛུགས་དང་འབྲེལ་ཏེ་རྟ་དབང་ནང་ཡོད་པའི་གཞུང་གི་ HQ primary school  འམ་ཞི་རིམ་སློབ་གྲྭ་དང་དེ་བཞིན་ High Altitude  རྩེད་ཐང་གི་ཐོག་རྩེགས་མཐའ་མ་གཉིས་པོ་གཙུག་ལག་སློབ་ཁང་དེའི་འཕྲལ་གསལ་གྱི་བསྟི་གནས་ཤིག་གནང་ཐུབ་ཚེ་དགེ་མཚན་ཆེན་པོ་ཡོད་པར་དགོངས་འཆར་ཕུལ་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ད་ལན་ཨ་རུ་ནཱ་ཅལ་མངའ་སྡེར་ཆིབས་བསྒྱུར་བསྐྱང་རྒྱུའི་མཛད་འཆར་ཐོས་མ་ཐག་རྒྱ་ནག་གཞུང་གིས་རྒྱུན་ལྡན་ལྟར་སྐྱོན་བརྗོད་བྱས་པ་མ་ཟད། མགོན་པོ་མཆོག་ཁུལ་དེར་ཆིབས་བསྒྱུར་གནང་རྒྱུར་དགག་པ་ཡོད་ཅེས་བརྗོད་པ་དང་ཆིབས་ཅིག རྒྱ་གར་དང་རྒྱ་ནག་གཉིས་ཀྱི་ས་མཚམས་དཀའ་རྙོག་ཆེ་རུ་མི་གཏོང་བའི་རེ་བ་ཡོད་སྐོར་བརྗོད་ཡོད་པ་རེད། རྒྱ་གར་དབུས་གཞུང་གིས་རྒྱ་ནག་གཞུང་ནས་སྐྱོན་བརྗོད་བྱས་པར་ལྟོས་མེད་ཀྱིས་༸གོང་ས་མཆོག་ཨ་རུ་ནཱ་ཅལ་ནང་ཆིབས་བསྒྱུར་མཛད་པར་ཆོག་མཆན་ཕུལ་བ་དང་། ལྷག་དོན་རྒྱ་གར་དབུས་གཞུང་དང་ཡུལ་དེའི་ཕྱོགས་འགལ་སྲིད་དོན་ཚོགས་པ་གཉིས་ཀྱིས་ཨ་རུ་ནཱ་ཅལ་མངའ་སྡེ་ནི་རྒྱ་གར་གྱི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་མ་ཟད། ༸གོང་ས་ཏཱ་ལའི་བླ་མ་མཆོག་ནིི་རྒྱ་གར་གཞུང་གི་ཆེས་བཀུར་འོས་པའི་སྐུ་མགྲོན་ཞིག་ཡིན་སྟབས།  ༸གོང་ས་མཆོག་རྒྱ་གར་གྱི་ས་ཕྱོགས་གང་དུ་ཆིབས་བསྒྱུར་མཛད་ཀྱང་ཐོབ་ཐང་ཡོངས་རྫོགས་མགོན་པོ་༸གང་ཉིད་མཆོག་ལ་ཡོད་པ་ལས་རྒྱ་ནག་ལ་དབང་མེད་ཅེས་ལན་འདེབས་གནང་ཡོད་པ་རེད། ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ལས་ཁུངས་ཀྱིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་བོད་ལ་དུས་འགྱུར་བྱུང་སྐབས་བོད་ནས་རྒྱ་གར་ལ་བྲོས་བྱོལ་ཕེབས་སྐབས་རྟ་དབང་བརྒྱུད་ནས་ཕེབས་ཡོད་པར་བརྟེན་ཨ་རུ་ནཱ་ཅལ་མངའ་སྡེ་དང་༸གོང་ས་མཆོག་གི་དབར་དམིགས་བསལ་གྱི་འབྲེལ་བ་ཞིག་ཡོད་ཅེས་རྒྱ་གཞུང་ལ་ནན་བརྗོད་གནང་ཡོད་པ་རེད། གཞི་རྩའི་༸གོང་ས་མཆོག་ཟླ་ ༣ པའི་ནང་ཨ་རུ་ནཱ་ཅལ་མངའ་སྡེར་ཆིབས་བསྒྱུར་མཛད་ཀྱི་ཡོད་པ་ནི་ཁུལ་དེར་ཆིབས་བསྒྱུར་བསྐྱང་ཐེངས་ ༢ ཆགས་ཀྱི་ཡོད་པ་དང་། དེ་སྔ་ ༢༠༠༩ ལོར་ད་ལྟའི་སྤྱི་ཁྱབ་བློན་ཆེན་པདྨ་འགྲོ་མཆོག་གི་ཡབ་དམ་པ་རྡོ་རྗེ་མཁའ་འགྲོ་མཆོག་མངའ་སྡེའི་སྤྱི་ཁྱབ་བློན་ཆེན་གནང་སྐབས་སུ་༸གོང་ས་མཆོག་ས་གནས་དེར་གདན་ཞུ་གནང་ཡོད་པ་རེད།

༸གོང་ས་མཆོག་གིས་བོད་རིགས་སློབ་མ་ལྔ་བརྒྱ་ལྷག་ལ་ལམ་སྟོན་བཀའ་སློབ་བསྩལ་བ།

ཟླ་ ༡ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་བོད་ཕྲུག་ཁྱིམ་སྡེ འི་མཐོ་རིམ་སློབ་མའི་སྡོད་ཁང་དུ་ཁུལ་དེར་སློབ་སྦྱོང་བྱེད་བཞིན་པའི་བོད་རིགས་མཐོ་རིམ་སློབ་གྲྭའི་སློབ་མ་དང་སྨན་ཞབས་པ་སོགས་ཁྱོན་བོད་རིགས་ན་གཞོན་ ༥༠༠ ལྷག་ལ་ལམ་སྟོན་བཀའ་སློབ་བཀྲིན་བསྩལ་ཡོད་པ་དང་།  ༸གོང་ས་མཆོག་གིས་ཆེས་ཐོག་མར་༸གང་ཉིད་མཆོག་གི་དགོངས་གཞི་ཆེན་པོ་གསུམ་པོ་ལས་དང་པོ་འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་སྐོར་ལ་འགྲེལ་བརྗོད་གནང་པར་ང་ཚོ་སེམས་ཅན་ཐམས་ཅད་ལ་བདེ་བ་འདོད་ཀྱི་ཡོད་ཀྱང་། དངོས་ཡོད་གནས་སྟངས་ཀྱི་ཆ་ནས་ང་ཚོས་འགྲོ་བ་མི་ཙམ་ལས་དུད་འགྲོ་ལྟ་བུའི་སེམས་ཅན་གཞན་ལ་དེ་ཙམ་ཕན་འདོགས་བྱེད་ཐབས་མེད་པ་དང།  ༸གང་ཉིད་མཆོག་གི་ངོས་ནས་རྒྱུན་དུ་གོ་སྐབས་ནམ་བྱུང་ལ་འགྲོ་བ་གཅིག་འགྱུར་ཡིན་པའི་འདུ་ཤེས་འཛིན་ཏེ་མིའི་རིགས་ལ་ལྷན་སྐྱེས་སུ་ཡོད་པའི་བརྩེ་བའི་རང་བཞིན་གྱི་ནུས་པ་ཡོད་པ་དང་། ལྷག་པར་དུ་སེམས་ཅན་གཞན་དང་མི་འདྲ་བར་འགྲོ་བ་མིའི་རིགས་ལ་ཆོས་རབ་ཏུ་རྣམ་འབྱེད་ཀྱི་རྣམ་དཔྱོད་བེད་སྤྱོད་པའི་ནུས་པ་ཞིག་ཡོད་པ་ལྟར།   ནུས་པ་དེའི་ཐོག་ནས་རང་གཞན་ཀུན་ལ་ཕན་ཐབས་ཡོང་བར་གནང་དགོས་གལ་ཡིན་སྐོར་ལམ་སྟོན་བསྩལ་ཡོད་པ་རེད། ༸གོང་ས་མཆོག་གིས་ཆོས་ལུགས་མཐུན་འབྲེལ་དང་འབྲེལ་བཀའ་བསྩལ་དོན་ལ་ཆོས་མི་འདྲ་བ་ཡོད་པ་རྒྱུ་མཚན་དུ་བྱས་ཏེ་དེང་སྐབས་འཛམ་གླིང་ནང་མི་ཕན་ཚུན་དབར་གསོད་རེས་ལྟ་བུ་ཡོང་གི་ཡོད་པ་དེ་ཧ་ཅང་ཐབས་སྡུག་པོ་རེད་ཅེས་བཀའ་གནང་པ་དང་ཆབས་ཅིག གཞི་རྩའི་ཆོས་ལུགས་ཚང་མའི་ལྟ་གྲུབ་མི་འདྲ་བ་ཡིན་ཀྱང་དམིགས་ཡུལ་བྱམས་བརྩེ་གོང་འཕེལ་ཡོང་ཐབས་ལ་ཆེད་དམིགས་གནང་པ་གཅིག་མཚུངས་ཡིན་སྟབས། ཆོས་ལུགས་ཕན་ཚུན་མཐུན་འབྲེལ་གནང་རྒྱུ་ནི་ཆེས་གནད་ཆེ་ཡིན་པར་ལམ་སྟོན་བསྩལ་སོང་བ་དང་། བོད་རིགས་ན་གཞོན་ཚོས་རྒྱུན་དུ་བོད་པ་གཅིག་པོ་ཡིན་པའི་བསམ་བློ་གུ་དོག་པོ་གཏོང་རྒྱུ་མེད་པར་རྒྱ་ཆེ་ས་ནས་བོད་པའི་ལོ་རྒྱུས་སུ་བྱུང་བའི་རྐྱེན་ངན་གྱི་གྱོང་གུན་ཆེན་པོ་དེ་དག་ལ་བསམ་བློ་གཏོང་དགོས་གལ་ཡིན་པ་སོགས་ལམ་སྟོན་མཛད་ཡོད་པ་རེད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ཆར་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ ལེགས་གྲུབ་མཛད་བསྟུན་གནས་མཆོག་རྡོ་རྗེ་གདན་ནས་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད་པ་དང་།  ལྡི་ལིར་ཉིན་ཤས་རིང་བཞུགས་ཞག་མཛད་སྐབས་དེར་ཀླད་པའི་ཚན་རིག་པ་གྲགས་ཅན་སྐུ་ཞབས་  Richard Davidson  ལགས་ཀྱིས་དབུས་པའི་ཚན་རིག་པ་གཞན་ཁག་ཅིག་ནས་༸གང་ཉིད་མཆོག་གི་ཞལ་མཇལ་ཞུ་བར་ཕེབས་ཡོད་པ་དང་། ཁ་སང་གི་མཛད་རིམ་དེའི་ཐོག་མགོན་པོ་༸གང་ཉིད་མཆོག་གིས་སྐུ་ཞབས་ Richard Davidson ལགས་ལ་བོད་རིགས་སློབ་མ་ཚོར་གསུང་བཤད་གནང་དགོས་པར་བཀའ་མངགས་གནང་དོན་ལྟར་ཁོང་གིས་ཀྱང་བོད་རིགས་སློབ་མ་རྣམས་༸གོང་ས་མཆོག་དང་ཆེས་ཐོག་མ་ཕྱི་ལོ་ ༡༩༩༢ ལོར་མཇལ་ཁ་ཞུ་རྒྱུའི་གོ་སྐབས་བྱུང་ཡོད་པ་དང་།   དུས་དེ་ནས་བཟུང་ད་བར་ལོ་ ༢༥ རིང་མགོན་པོ་མཆོག་གི་ལྷན་དུ་གྲོས་མོལ་གནང་པའི་བརྒྱུད་ནང་པའི་སེམས་ཁམས་རིག་པའི་ལྟ་གྲུབ་དེའི་ཐོག་ནས་རང་ཉིད་སྒེར་ཙམ་མ་ཚད་འཛམ་གླིང་སྤྱིའི་བདེ་སྐྱིད་ལ་ཕན་རླབས་ཆེན་པོ་ཡོང་རྒྱུ་ཡིན་པའི་ངེས་རྙེས་བྱུང་བ་དང་། ལྷག་པར་ཁོང་སྒེར་ལ་ཆ་མཚོན་ནའང་ལྟ་གྲུབ་དེའི་ཐོག་ནས་སེམས་འགུལ་ཆེན་པོ་ཐེབས་ཡོད་སྐོར་སོགས་ངོ་སྤྲོད་གནང་ཡོད་པ་རེད། རྩ་བའི་ཁ་སང་གི་མཛད་རིམ་དེ་ལེགས་གྲུབ་ཟིན་རྗེས་བོད་རིགས་སློབ་མ་ཚོས་༸གོང་ས་༸སྐྱབས་མགོན་ཆེན་པོ་མཆོག་དང་ཀླད་པའི་ཚན་རིག་པ་སྐུ་ཞབས་ Richard Davidson ལགས་རྣམ་གཉིས་ལ་གནད་དོན་འདྲ་མིན་ཐོག་བཀའ་འདྲི་ཞུ་རྒྱུའི་གོ་སྐབས་ཀྱང་བྱུང་ཡོད་པ་རེད།

Latest news