༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་དབང་ཆེན་༣༤པའི་དངོས་གཞི་བཀའ་དབང་དབུ་འཛུགས་དང་འབྲེལ། རྡོ་རྗེ་གདན་དུ་ཐེངས་འདིའི་དུས་དབང་ཞུ་བ་བཅར་བའི་ཆོས་ཞུ་བ་ཙམ་མ་ཟད། འཛམ་གླིང་འདིའི་སྟེང་དུས་འཁོར་དབང་ཆེན་ལ་དོ་སྣང་དང་འདུན་པ་ཡོད་པ་ཚང་མའི་ཕྱི་ནང་གི་བར་ཆད་སེལ་རྒྱུར་སྨོན་ལམ་རྒྱག་གི་ཡིན་ཞེས་བཀའ་བསྩལ་ཡོད་པ་རེད། དེ་རིང་ཟླ་ ༡ ཚེས་ ༡༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཆོས་ཞུ་བ་ཉིས་འབུམ་ལྷག་ལ་དངོས་གཞི་བཀའ་དབང་དབུ་འཛུགས་མཛད་པ་དང་འབྲེལ་ཏེ་ཆེས་ཐོག་མར་ཆོས་ཞུ་བ་ཚོར་དབང་ཞུ་དགོས་པའི་དགོས་དམིགས་དང་དེའི་ཕན་ཡོན་ཇི་ཡོད་སྐོར་ལམ་སྟོན་བཀྲིན་བསྩལ་སོང། དུས་འཁོར་དབང་ཆེན་འདིའི་ཐོག་ལ་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱས་པར་བརྟེན། བོད་དང་རྒྱ་ནག་སྐམ་ས་ཆེན་པོ་གཉིས་ནས་༸གང་ཉིད་མཆོག་གི་དྲུང་ནས་དུས་དབང་ཞུ་བར་བཅར་ཐུབ་མེད་པ་མ་ཟད། དེ་བཞིན་འདིར་ཕེབས་པའི་བོད་མི་མང་དག་ཞིག་དུས་དབང་གི་གོང་ནས་ཕྱིར་ལོག་གནང་དགོས་བྱུང་སྟབས། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་དུས་དབང་གི་དངོས་གཞིའི་བཀའ་དབང་སྩལ་བའི་སྐབས་ཐུགས་བརྩེ་བ་ཆེན་པོས་དདམིགས་བསལ་གྱི་དད་པ་དང་དམ་ཚིག་གཡོ་བ་མེད་པའི་བོད་ནང་གི་གཞིས་ལུས་རྒྱ་ཆེ་བོད་མི་དང་རྒྱ་ནག་ནང་དུ་ཡོད་པའི་རྒྱ་རིགས་ནང་པ་དེ་དག་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཞེས་བཀའ་བསྩལ་བ་མ་ཟད། ད་དུང་འཛམ་གླིང་འདིའི་སྟེང་དུས་འཁོར་དབང་ཆེན་ལ་དོ་སྣང་དང་འདུན་པ་ཡོད་པ་ཚང་མའི་ཕྱི་ནང་གི་བར་ཆད་སེལ་རྒྱུར་སྨོན་ལམ་རྒྱག་གི་ཡིན་པ་ཡང་བཀའ་བསྩལ་མཛད་ཡོད་པ་རེད། དེ་རིང་མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་བྱང་ཆུབ་སེམས་པའི་སྡོམ་པ་བསྩལ་བའི་ཁྲོད་བྱང་ཆུབ་སེམས་ཀྱི་ཕན་ཡོན་སྐོར་ལ་བཀའ་གནང་པ་དང་ཆབས་ཅིག སངས་རྒྱས་ལ་སྐྱབས་སུ་འགྲོ་ཚུལ་སྐོར་ལམ་སྟོན་གནང་པར་དུས་རྒྱུན་ཕ་མས་རང་ཉིད་ཀྱི་གཅེས་པའི་བུ་ལ་གཅེས་ནོར་གང་ཡོད་པ་སྦྱིན་པ་ལྟར། སངས་རྒྱས་བཅོམ་ལྡན་འདས་དང་དེའི་རྗེས་འབྲང་སྐྱེ་བོ་དམ་པ་རྣམས་ཀྱིས་ཡུན་རིང་ཉམས་བཞེས་གནང་ནས་སྐྱོན་སྤང་རྒྱུ་དང་ཡོན་ཏན་ཐོབ་རྒྱུའི་ཐབས་ཤེས་ཡག་ཤོས་ལམ་སྟོན་གནང་ཡོད་ཅེས་བཀའ་བསྩལ་བ་དང་ཆབས་ཅིག ཆོས་ཞུ་བ་ཚོའི་ངོས་ནས་ཁོང་རྣམ་པས་ལམ་སྟོན་མཛད་དོན་བཞིན་ལག་བསྟར་མ་བྱེད་པར་སངས་རྒྱས་ལ་སྐྱབས་སུ་མཆི་ཞེས་པའི་སྒྲ་འཛིན་འཁོར་ཐག་གམ་ Tape Recorder བཏང་བ་དང་གཅིག་མཚུངས་རེད་ཅེས་བཀའ་ནན་བསྩལ་སོང། རྩ་བའི་དེ་རིང་ནས་གསུང་ཆོས་གྲུབ་རྗེས་ཉིན་རྒྱབ་ཆོས་ཞུ་བ་ཚོར་དཔལ་དུས་ཀྱི་འཁོར་ལོའི་དབང་ཆེན་གྱི་དཀྱིལ་འཁོར་མཇལ་ཁ་ཞུ་རྒྱུར་གཏོང་བཞིན་ཡོད་པ་དང། དེའང་དེ་རིང་གནད་ཡོད་མི་སྣ་དང་ཕྱི་རྒྱལ་ནས་ཕེབས་པའི་ཆོས་ཞུ་ཚོ་དང། སང་ཉིན་ཚེས་ ༡༢ ཉིན་གྲྭ་བཙུན་རྣམ་པ་དང། ཚེས་ ༡༣ ཉིནཧི་མཱ་ལ་ཡའི་ཆོས་ཞུ་བ་དང་འདི་བཞིན་ཚེས་ ༡༤ ཉིན་མང་ཚོགས་བཅས་ནས་མཇལ་ཁ་ཞུ་བར་གཏང་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དབང་གི་སློབ་མ་སྟ་གོན་སྐབས་ཆོས་ཞུ་བ་ཚོས་ཚེ་འདིའི་བདེ་དོན་ཁོ་ནའི་ཆེད་དུ་དབང་ཞུས་ན་ནོར་བ་རེད་ཅེས་བཀའ་བསྩལ་སོང་། དེའང་ཟླ་བ་འདིའི་ཕྱི་ཚེས་ ༢ ཉིན་ནས་དབུ་འཛུགས་ཀྱིས་རྒྱ་གར་གྱི་གནས་མཆོག་རྡོ་རྗེ་གདན་དུ་༸གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་དང་འབྲེལ་ས་ཆོག་དང་སྒྲུབ་བཞག དཀྱིལ་འཁོར་བྲིས་བཞེངས། དེ་བཞིན་ཆོས་ཞུ་བ་ཚོར་སྔོན་འགྲོ་གསུང་ཆོས་བསྩལ་རྒྱུ་བཅས་ཡོངས་རྫོགས་ཁ་སང་ཚེས་ ༩ ཉིན་ལེགས་པར་གྲུབ་ཡོད་པ་དང་། དེ་རིང་མགོན་པོ་༸གང་ཉིད་མཆོག་གིས་བཀའ་དབང་གི་སྔོན་འགྲོར་སློབ་མ་སྟ་གོན་གྱི་ཆོས་འབྲེལ་དབུ་འཛུགས་བསྐྱངས་གནང་མཛད་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་འདིར་གསང་སྔགས་རྡོ་རྗེ་ཐེག་པའི་ཆོས་ངོ་སྤྲོད་གནང་པ་དང་འབྲེལ། གསང་སྔགས་ཀྱི་ཆོས་ཉམས་ལེན་ཟབ་པོ་བྱེད་པ་ལ་རྒྱབ་བརྟེན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཉིས་མེད་ན་ཡོང་ཐབས་མེད་པ་ཞིག་ཡིན་སྟབས། ཆོས་ཞུ་བ་ཚོས་ངེས་པར་དུ་བྱང་ཆུབ་ཀྱི་སེམས་དང་སྟོང་པ་ཉིད་ཀྱི་ལྟ་བ་ལ་ཐོས་བསམ་སྒོམ་གསུམ་གནང་རྒྱུ་གལ་ཆེན་པོ་ཡིན་དང་། ལྷག་དོན་ཆོས་ཞུ་བ་ཚོས་རྣམ་ཀུན་གསང་སྔགས་ཀྱི་ཆོས་ལ་མོས་པ་ཡོད་པ་ལྟར། བྱམས་སྙིང་རྗེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་ངེས་པར་དུ་དོ་སྣང་བྱེད་དགོས་ཅེས་བཀའ་ནན་བསྩལ་སོང་། གཞི་རྩའི་དེ་རིང་སློབ་མ་སྟ་གོན་དང་སང་ཉིན་ནས་དབང་དངོས་གཞི་དབུ་འཛུགས་མཛད་ཀྱི་ཡོད་པས་ཕྱི་ནང་གི་དད་ལྡན་ཆོས་ཞུ་བ་ཚོར་དབང་ཞུས་པའི་སྐབས་སུ་ཀུན་སློང་འཁྱེར་ཕྱོགས་སྐོར་ལ་ལམ་སྟོན་བཀའ་སློབ་བསྩལ་བ་དང་ཆབས་ཅིག ཆོས་ཞུ་བ་ཚོས་ཚེ་འདིའི་བདེ་དོན་ཁོ་ནའི་ཆེད་དུ་དབང་ཞུས་ན་ནོར་བ་རེད་ཅེས་སོགས་ཀྱི་བཀའ་སློབ་རྒྱ་ཆེ་བསྩལ་ཡོད་པ་རེད། དེ་བཞིན་སློབ་མ་སྟ་གོན་གི་དབང་སྐབས་མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་དགེ་བསྙེན་དང་བྱང་སེམས་ཀྱི་སྡོམ་འབོག་ཆོག་མཛད་ཡོད་པ་རེད། རྩ་བའི་ཐེངས་འདིའི་དུས་དབང་སྐབས་སུ་ཕྱི་ནང་གི་ཆོས་ཞུ་བ་ཁྱོན་ཉིས་འབུམ་ལྷག་ཙམ་ཕེབས་ཡོད་པར་ཚོད་དཔག་གནང་བཞིན་ཡོད་པ་དང་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་དང་བོད་མིའི་སྒྲིགས་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཁ་སང་གསར་འགོད་ལྷན་ཚོགས་ཤིག་གི་ཐོག་འགྲེལ་བརྗོད་གནང་པར་ཆོས་ཞུ་བ་དེ་དག་གི་ཁོངས་སུ་རྒྱལ་ཁབ་འདྲ་མིན་ཁྱོན་ ༩༢ ནས་ཆོས་ཞུ་བ་བཅར་ཡོད་པ་མ་ཟད། འབྲུག་དང་བལ་ཡུལ་ཕུད་པའི་ཕྱི་རྒྱལ་བ་ཁྱོན་བསྡོམས་ ༩༠༠༠ ཙམ་ཕེབས་ཡོད་པ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་རྟེན་གཞི་བྱས་པའི་སོག་པོའི་དགོན་པ་གསར་པར་དབུ་འབྱེད་རབ་གནས་གནང་པ་དང་འབྲེལ། སོག་པོའི་དགེ་འདུན་པ་ཚོས་ནང་ཆོས་ལ་བསླབ་པ་སློབ་གཉེར་ཡག་པོ་གནང་ནས་རང་ཉིད་ཀྱི་ཕ་ཡུལ་དུ་བསྟན་པའི་ཞབས་འདེགས་བསྒྲུབ་རྒྱུའི་འགན་ཡོད་ཅེས་བསྩལ་སོང། དེ་རིང་ཟླ་ ༡ ཚེས་ ༩ ཉིན་སྔ་དྲོ་ཚོུད་ ༡༡ སྟེང་༸གོང་ས་༸སྐྱབས་མགོན་ཆེན་པོ་མཆོག་གིས་སོག་ཡུལ་དགའ་ལྡན་དགོན་པའི་མཁན་པོ་ཆོས་རྒྱ་མཚོ་མཆོག་གིས་དབུས་པའི་སོག་པོའི་སེར་སྐྱ་མང་ཚོགས་ཚོས་ཇི་ལྟར་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་བསྩལ་མཛད་ཐོག་སྔ་དྲོ་དུས་དབང་གི་སྒྲུབ་བཤག་ལེགས་གྲུབ་གནང་རྗེས་གནས་མཆོག་རྡོ་རྗེ་གདན་གྱི་ཉེ་འདབས་སུ་ཉེ་ཆར་གསར་བཞེངས་ལེགས་གྲུབ་ཟིན་པའི་སོག་ཡུལ་དགའ་ལྡན་ཐེག་ཆེན་དགོན་པའི་ཡན་ལག་པ་ཐཱ་ཚ་གྭང་ལྷ་ཁང་ལ་ཆིབས་བསྒྱུར་མཛད་སྟེ་དབུ་འབྱེད་རབ་གནས་བཀྲིན་བསྐྱངས་ཡོད་པ་རེད། ༸གོང་ས་མཆོག་གིས་སྐབས་དེར་སོག་པོ་དང་བོད་གབར་གྱི་འབྲེལ་ལམ་དེ་ནི་ཚོང་གི་འབྲེལ་ལམ་ལྟ་བུ་ཞིག་མ་ཡིན་པར་༸གོང་ས་༸སྐུ་ཕྲེང་བཞི་པ་ཡོན་ཏན་རྒྱ་མཚོ་མཆོག་སོག་ཡུལ་དུ་སྐུ་འཁྲུངས་པ་དང་ཁོང་ལ་ཏཱ་ལའི་བླ་མ་ཞེས་མཚན་ཐོབ་པ་སོགས་གསུངས་ཏེ་བོད་སོག་གཉིས་ཀྱི་དབར་ད་བར་ཆོས་ཕྱོགས་ཀྱི་དད་པ་དམ་ཚིག་གི་ཐོག་ནས་འབྲེལ་ལམ་དམིགས་བསལ་ཞིག་ཆགས་ཡོད་སྐོར་སོགས་བཀའ་བསྩལ་གནང་པ་མ་ཟད། ལྷག་པར་དུ་དེ་སྔའི་ལོ་རྒྱུས་ཁྲོད་བོད་ཀྱི་གདན་ས་ཁག་ནས་སོག་པོའི་མཁས་དབང་དང་དགེ་བཤེས་མང་པོ་ཞིག་ཐོན་ཐུབ་པ་བྱུང་ཡོད་པ་ལུང་འདྲེན་མཛད་པ་དང་སྦྲགས་ཏེ་ད་ལྟ་བཙན་བྱོལ་ནང་དུའང་གདན་ས་ཁག་ལ་ཡོད་པའི་སོག་པོའི་དགེ་འདུན་པ་ཚོས་ནང་ཆོས་ལ་སློབ་གཉེར་ཧུར་ཐག་གནང་དགོས་པ་དང་། རང་ཉིད་སོ་སོའི་ཕ་ཡུལ་དུ་ཕྱིར་ལོག་གནང་རྗེས་བསྟན་པའི་ཞབས་འདེགས་བསྒྲུབ་རྒྱུའི་འགན་ཡོད་ཅེས་བཀའ་བསྩལ་ཡོད་པ་རེད།  ༸གང་ཉིད་མཆོག་གིས་ད་ལན་གནས་མཆོག་རྡོ་རྗེ་གདན་དུ་སོག་པའི་དགོན་པ་གསར་བཞེངས་བྱུང་བར་བསྔགས་བརྗོད་མཛད་པ་དང་འབྲེལ། སངས་རྒྱས་པོའི་བསྟན་པ་འཛིན་སྐྱོང་སྤེལ་གསུམ་གནང་རྒྱུར་གཙ་བོ་ལུང་རྟོགས་གཉིས་ཀྱི་བསྟན་པ་ལ་ཐུག་ཡོད་པ་ལས། ལམ་དང་ལུགས་སྲོལ་ལྟ་བུར་ཕྱིན་ཚེ་སངས་རྒྱས་པའི་བསྟན་པ་བརྟན་པོ་ཡོང་གི་མ་རེད་ཅེས་བཀའ་ནན་མཛད་སོང། རྩ་བའི་༸གོང་ས་༸སྐྱབས་མགོན་ཆེན་པོ་གིས་དབུ་འབྱེད་རབ་གནས་པའི་སོག་པོའི་དགོན་པ་དེ་རྒྱ་གར་གྱི་གནས་མཆོག་རྡོ་རྗེ་གདན་དུ་སོག་པོའི་ནང་པའི་དགོན་པ་ཐོག་མ་དེ་ཆགས་ཡོད་པ་དང་འདི་བཞིན་དགོན་པ་དེ་གཙོ་བོ་སོག་ཡུལ་དགའ་ལྡན་དགོན་པའི་མཁན་པོ་ཆོས་རྒྱ་མཚོ་མཆོག་གིས་ཐུགས་འགན་གཙོ་བཞེས་འོག་ཕྱག་བཏབ་པ་ཞིག་ཡིན་པ་རེད་འདུག དགོན་པ་དེའི་གཤམ་འོག་ཏུ་སོག་ཡུལ་གྱི་ནང་པའི་དགོན་པ་ཁག་དང་སོག་པོའི་རིག་གཞུང་དང་འབྲེལ་བའི་པར་རིས་ཁག་ཅིག་འགྲེམས་སྟོན་ཡང་གོ་སྒྲིག་ཞུས་འདུག ཤེས་རྟོགས་བྱུང་བར་གཞིགས་ཚེ་ད་ལྟའི་ཆར་བྱེས་ཀྱི་གདན་ས་སེ་འབྲས་གཉིས་སུ་སོག་པོའི་དགེ་འདུན་པ་སློབ་གཉེར་གནང་མཁན་ ༧༨༠ ཡོད་པ་དང་། ཐེངས་འདིའི་དུས་འཁོར་དབང་ཆེན་ཐོག་སོག་ཡུལ་ནས་ནང་པའི་དད་ལྡན་ཆོས་ཞུ་བ་ཁྱོན་ ༢༠༠༠ ལྷག་ཆེད་བཅར་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དབང་ཐེངས་ ༣༤ པའི་ཐོག་སྔོན་འགྲོའི་བཀའ་ཆོས་ལེགས་གྲུབ་མཛད་ཡོད་པ་དང་། དེ་རིང་སྔོན་འགྲོའི་ཆོས་འབྲེལ་ཉིན་མཐའ་མའི་སྐབས་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་པའི་སྤྱོད་པ་ལ་འཇུག་པ་དང་། སློབ་དཔོན་ཀ་མ་ལ་ཤཱི་ལས་མཛད་པའི་བསྒོམ་རིམ་བར་པའི་ཆོས་འབྲེལ་ཡོངས་སུ་ལེགས་གྲུབ་དང་བསྟུན། མགོན་པོ་༸གང་ཉིད་མཆོག་གིས་རིང་མིན་གནས་མཆོག་རྡོ་རྗེ་གདན་དུ་འཚོགས་འཆར་ཡོད་པའི་རིས་མེད་ཆོས་ལུགས་ཀྱི་ཚོགས་འདུ་དེར་འཚམས་འདྲི་གནང་པ་དང་སྦྲགས།  ཆོས་ལུགས་ཕན་ཚུན་དབར་དམ་ཚིག་ཐུགས་མཐུན་ཁྲིམས་གཙང་དགོས་རྒྱུ་གལ་ཆེན་པོ་ཡིན་པ་དང་། དེའང་རྒྱུན་ལྡན་ནས་ཆོས་ལུགས་ཕན་ཚུན་བར་ལ་ད་ལྟ་གནས་མཆོག་རྡོ་རྗེ་གདན་དུ་ཚོགས་རྒྱུའི་ཚོགས་འདུ་དེ་ལྟ་བུ་མང་ཙམ་ཚོགས་ཐུབ་པ་ཡིན་ན། ཕན་ཚུན་བར་ངོ་ཤེས་པ་དང་དེའི་བརྒྱུད་ནས་སེམས་ཐག་ཉེ་པོ་ཡོང་གི་རེད། ལྷག་པར་དུ་ས་དགེ་བཀའ་རྙིང་སོགས་ཀྱི་ཆོས་ལུགས་ཚང་མས་སྔོན་གྱི་མཁས་པ་ཚོས་མཛད་པའི་གཞུང་དེ་དག་ལ་དོ་སྣང་བྱེད་དགོས་པ་དང་། ས་དགེ་བཀའ་རྙིང་ཇོ་ནང་དང་བཅས་པ་ཆོས་བརྒྱུད་ཚང་མ་བཅོམ་ལྡན་འདས་དང་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་མཚུངས་ཡིན་སྟབས་ཆོས་བརྒྱུད་ཕན་ཚུན་ཚང་མས་ཆོས་ལུགས་སོ་སོའི་མཁས་པ་ཚོས་མཛད་པའི་གཞུང་ཚང་མར་དོ་སྣང་གནང་དགོས་གལ་ཡིན་པར་ལམ་སྟོན་སོགས་བཀྲིན་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་བཞིན་སྔོན་འགྲོའི་ཆོས་འབྲེལ་ཁག་ལེགས་པར་གྲུབ་པ་དང་བསྟུན། ཆོས་ཞུ་བ་ཚོས་རྒྱུན་དུ་ཆོས་སེམས་ནས་བྱེད་དགོས་པ་དང་མཆུ་ཏོ་གཅིག་པོར་ལས་ཀ་བསྐུལ་ཏེ་གཟུངས་སྔགས་བགྲངས་བསྡད་པ་ལས་དེ་རེས་སྔོན་འགྲོའི་གསུང་ཆོས་སུ་བསྩལ་བའི་སྤྱོད་འཇུག་ལྟ་བུའི་གཞུང་དེ་ཚོར་དོ་སྣང་ཐུབ་ན་ཁེ་ཕན་ཆེ་བའི་ལམ་སྟོན་སོགས་རྒྱ་ཆེ་མཛད་ཡོད་པ་རེད། ད་རེས་ཀྱི་དུས་འཁོར་དབང་ཆེན་ཐེངས་ ༣༤ པ་འདིའིསྔོན་འགྲོའི་ཆོས་འབྲེལ་ཁག་དེ་རིང་ལེགས་པར་གྲུབ་ཡོད་ཀྱང་། སང་ཚེས་ ༩ ཉིན་མཆོད་གར་དང་ཚེས་ ༡༠ ཉིན་བཀའ་དབང་སྔོན་འགྲོ་སློབ་མ་སྟ་གོན། དེ་རྗེས་དབང་དངོས་དཀྱིལ་འཁོར་དུ་ཞུགས་པ་དང་ཞུགས་ནས་དབང་བསྐུར་བ། དེ་བཞིན་དབང་གོང་མ་དང་གོང་ཆེན་བཞི་བཅས་རིམ་པས་བཀྲིན་བསྩལ་རྒྱུ་མ་ཟད། ༸གང་ཉིད་མཆོག་གིས་ད་རེས་ཀྱི་དུས་དབང་འདིའི་ཆོས་འབྲེལ་གྱི་མཐའ་མར་སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བཀྲིན་བསྩལ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དང་རྒྱ་ནག་ནང་གི་ནང་པ་རྣམས་ནམ་ཡང་བརྗེད་རྒྱུ་མིན་པ་དང་། རྒྱ་ནག་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་མགོན་པོ་༸གང་ཉིད་མཆོག་བོད་དང་རྒྱ་ནག་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་སོང་། དེ་རིང་ཟླ་ ༡ ཚེས་ ༨ ཉིན་གནས་མཆོག་རྡོ་རྗེ་གདན་དུ་སྔོན་འགྲོའི་ཆོས་འབྲེལ་ཉིན་མཐའ་མའི་ཆོས་ཐུན་དབུ་འཛུགས་མ་གནང་གོང་ལ་ཧོང་ཀོང་དང་མ་ཀའོ་གཙོས་པའི་རྒྱ་ནག་སྐམ་ས་ཆེན་པོ་ནས་བཅར་བའི་དད་ལྡན་ཆོས་ཞུ་བ་ཁག་ཅིག་ལ་དམིགས་བསལ་བཀའ་སློབ་བསྩལ་ཡོད་པ་རེད། སྐབས་དེར་༸གང་ཉིད་མཆོག་གིས་རྒྱ་རིགས་ཆོས་ཞུ་བ་དེ་དག་ལ་བླ་མ་དང་སློབ་མའི་དབར་གྱི་དམ་ཚིག་སྐོར་བཀའ་བསྩལ་ཡོད་པ་རེད། ཁྱེད་ཚོར་ཧ་ཅང་དཀའ་ལས་ཡོད་ཀྱང་ཨུ་ཚུགས་བརྒྱབ་སྟེ་འདི་གར་ཆེད་མངགས་ཡོང་བར་བརྟེན་དམིགས་བསལ་གྱི་འཚམས་འདྲི་ཡོད་ཅེས་བཀའ་གནང་པ་དང་སྦྲགས།  གལ་ཏེ་རྒྱ་ནག་གཞུང་གིས་ཁྱེད་ཚོ་ཕར་ལོག་དགོས་པའི་སྡིག་ར་དང་བསུན་གཙེར་ཤུགས་ཆེ་བཟོ་བཞིན་ཡོད་ན་ཁྱེད་ཚོ་ཕར་ལོག་ན་འགྲིག་གི་རེད་ཅེས་ལམ་སྟོན་མཛད་པ་མ་ཟད། ལྷག་དོན་དུས་འཁོར་དབང་ཆེན་དངོས་གཞིའི་སྐབས་ངས་ཁྱེད་རང་ཚོ་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་ཆོས་ཞུ་བ་ཚོའི་ངོས་ནས་ཆོས་དད་ལ་དད་པ་གཅིག་པོ་ཙམ་མ་ཡིན་པར་ཕྱག་དཔེ་ཁག་ཉིན་རེའི་མི་ཚེའི་ནང་བལྟ་ཀློག་ཐུབ་པ་ཞིག་དང་ལྷག་པར་དུ་ཕྱག་དཔེ་དེ་དག་ནང་བཀའ་འགྲེལ་གང་གནང་པ་དེ་དག་ཐོག་ལ་ཡང་ཡང་བསམ་བློ་གཏོང་དགོས་པ་དང་དེ་བཞིན་ཆོས་གྲོགས་ཕན་ཚུན་དབར་བགྲོ་གླེང་གནང་བའི་བརྒྱུད་སོ་སོའི་སེམས་ལ་འགྱུར་བ་ཞིག་ཐེབས་ཐབས་གནང་དགོས་གལ་ཡིན་པར་ལམ་སྟོན་མཛད་ཡོད། ༸གང་ཉིད་མཆོག་གིས་རྒྱ་ནག་སྐམ་ས་ཆེན་པོ་ནང་གི་ནང་པ་ཚོ་དུས་ནམ་ཡང་བརྗེད་ཐབས་མེད་སྐོར་བཀའ་སྩལ་བ་དང་འབྲེལ་ཏེ་རྒྱ་གཞུང་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་ ༸གང་ཉིད་མཆོག་བོད་དང་རྒྱ་ནག་སྐམ་ས་ཆེན་པོ་གཉིས་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་མཛད་ཡོད་པ་རེད། རྩ་བའི་ཐེངས་འདིའི་དུས་འཁོར་དབང་ཆེན་ཐོག་རྒྱ་ནག་སྐམ་ས་ཆེན་པོ་གཙོས་པའི་ཧོང་ཀོང་དང་ཐེ་ཝན་སོགས་ཀྱི་རྒྱ་རིགས་ ༩༠༠ ལྷག་ཙམ་ཆེད་བཅར་ཞུས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་གནས་མཆོག་རྡོ་རྗེ་གདན་དུ་ཉིན་བཞིའི་སྔོན་འགྲོའི་ཆོས་འབྲེལ་དུ་སློབ་དཔོན་ཀ་མ་ལ་ཤྰི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་གཉིས་ཀྱི་བཀའ་ཆོས་བཀྲིན་བསྐྱངས་གནང་ཡོད་པ་ལྟར། སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་སྐོར་གྱི་ཆོས་འབྲེལ་བཀྲིན་སྩལ་སྐབས་ཆོས་ཞུ་བ་ཚོས་བྱང་ཆུབ་ཀྱི་སེམས་པ་དང་སྟོང་ཉིད་ཀྱི་ལྟ་བ་བསྒོམ་པ་ཡིན་ན་སྐྱེ་བ་ཕྱི་མ་མི་ལུས་བཟང་པོ་ཞིག་ཐོབ་པར་༸གོང་ས་༸སྐྱབས་མགོན་ཆེན་པོ་མཆོག་གིས་བརྒྱ་ཆ་བརྒྱ་ཐུགས་ཐག་བཅད་ཐུབ་ཀྱི་ཡོད་ཅེས་བཀའ་གནང་པ་མ་ཟད། ལྷག་དོན་ཆོས་ཞུ་བའི་ཁོངས་ལོ་རྒན་འཆི་ཁའི་ཆོས་བྱེད་མཁན་ཚོས་གཟུངས་སྔགས་བགྲང་པ་དང་སངས་རྒྱས་ཆོས་ཚོགས་མ་ལྟ་བུའི་སྟེང་ནས་བྱང་ཆུབ་ཀྱི་སེམས་པ་དང་སྟོང་པ་ཉིད་ཀྱི་ལྟ་བ་བསྒོམ་པ་ཡིན་ཚེ། ཚེ་རབས་ནས་ཚེ་རབས་བར་བདེ་ཞིང་སྐྱིད་པ་ཡོང་རྒྱུར་ལམ་སྟོན་བསྩལ་ཏེ་དེ་ནི་རང་དོན་གྲུབ་པའི་ཐབས་ཤེས་མཆོག་ཏུ་གྱུར་བ་ཞིག་རེད་ཅེས་ལམ་སྟོན་རྒྱ་ཆེ་མཛད་ཡོད། ད་དུང་༸གོང་ས་མཆོག་གིས་ཆོས་ཞུ་བ་ཚོའི་ངོས་ནས་༸གང་ཉིད་མཆོག་གིས་ཉིན་རེའི་ཆོས་འབྲེལ་སྐབས་ཆོས་ཀྱི་འགྲེལ་བརྗོད་གང་གནང་པ་དེ་དག་སེམས་ནང་ཉར་ཐུབ་པ་ཞིག་དང་། ལྷག་པར་དུ་ཆོས་གྲོགས་ཕན་ཚུན་དབར་བགྲོ་གླེང་གནང་པའི་བརྒྱུད་སེམས་ལ་འགྱུར་བ་ཤིག་ཐེབས་ཐབས་གནང་དགོས་གལ་ཡིན་པའི་ལམ་བཀའ་བསྩལ་མཛད་ཡོད་པ་རེད། གཞི་རྩའི་༸གོང་ས་མཆོག་གིས་དེ་རིང་གི་ཆོས་འབྲེལ་སྐབས་ཁ་སང་སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་ཞེས་པ་ནས་བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །  འཁོར་བའི་བཙོན་རར་བསྡམས་པའི་ཉམ་ཐག་རྣམས། །  བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང། །  འཇིག་རྟེན་ལྷ་མིར་བཅས་པས་ཕྱག་བྱར་འགྱུར། ཞེས་པའི་བར་མུ་མཐུད་ཆོས་འབྲེལ་མཛད་པ་དང་སྦྲགས། སངས་རྒྱས་པའི་ཆོས་བྱེད་མི་བྱེད་སོ་སོའི་རང་དབང་ཡིན་ཀྱང་། ཆོས་ལ་དད་པ་བྱས་ཚར་བའི་རྗེས་སུ་ཆོས་ཆོས་སུ་འགྲོ་བ་ཞིག་བྱེད་དགོས་པ་དང་། དེའང་ཚེ་འདི་ཕྱི་གཉིས་ཀྱི་བདེ་སྐྱིད་ཀྱི་རྒྱུ་དེ་རང་གི་སེམས་འདུལ་བར་བྱེད་རྒྱུ་དེ་རེད་ཅེས་ལམ་སྟོན་གནང་སོང་།  ༸གོང་ས་མཆོག་གིས་དེ་རིང་ཉིན་རྒྱབ་ཚོུད་ ༡༢།༠༠ ནས་དབུ་འཛུགས་ཀྱིས་ཚོུད་ ༣།༠༠ བར་སྤྱོད་འཇུག་ལེའུ་གཉིས་པ་སྡིག་བཤག་ནས་ལེའུ་ལྔ་པ་ཤེས་བཞིན་བསྲུང་བའི་བར་མུ་མཐུད་བཀའ་ཆོས་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གནས་མཆོག་རྡོ་རྗེ་གདན་དུ་ཆོས་ལུགས་རིས་མེད་ཀྱི་མཛད་སྒོ་ཐོག་དབུ་ཞུགས་མཛད་ཡོད་པ་དང་། ༸གང་ཉིད་མཆོག་གིས་སྐབས་དེར་རྒྱ་གར་ནང་ལ་ཆོས་ལུགས་ཕན་ཚུན་མཐུན་སྒྲིལ་གྱི་གོམས་སྲོལ་བཟང་པོ་དེ་མུ་མཐུད་སྲ་བརྟན་གནང་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་དགོས་པའི་བཀའ་བསྩལ་སོང། དེའང་ཟླ་ ༡ ཚེས་ ༢ ཉིན་ནས་རྒྱ་གར་གྱི་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཆོས་ཞུ་བ་ཚོར་དཔལ་དུས་ཀྱི་འཁོར་ལོའི་དབང་ཆེན་བཀྲིན་བསྩལ་བཞིན་ཡོད་པ་དང། དེ་རིང་ཉིན་རྒྱབ་ཀྱི་བཀའ་ཆོས་དངོས་སུ་དབུ་འཛུགས་མ་མཛད་གོང་ལ་མང་ཚོགས་ཁྲི་ཚོ་བརྒལ་བ་འདུ་འཛོམས་བྱུང་བའི་དུས་དབང་གི་གསུང་ཆོས་ར་བར་༸གོང་ས་མཆོག་དབུ་བཞུགས་ཐོག་འཛམ་གླིང་ནང་གི་ཆོས་ལུགས་འདྲ་མིན་གྱི་དབུ་ཁྲིད་བླ་ཆེན་ཁག་ཅིག་ལྷན་འཛོམས་ཀྱིས་ཆོས་ལུགས་རིས་མེད་ཀྱི་སྟབས་བདེའི་མཛད་སྒོ་ཞིག་ཚོགས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོའི་ཐོག་ལ་བཀའ་སློབ་བསྩལ་དོན། ད་ལན་གནས་ཁྱད་པར་ཅན་འདིར་རྒྱ་གར་གྱི་ཆོས་བརྒྱུད་གཙོ་ཆེ་ཁག་གི་དབུ་ཁྲིད་རྣམ་པ་ཆེད་བཅར་ཞུས་པར་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་སོང་ཞེས་བཀའ་བསྩལ་བ་དང་འབྲེལ། འཛམ་གླིང་འདིའི་སྟེང་མི་དུང་ཕྱུར་ ༧༠ ཙམ་ཡོད་པ་དང། དེ་དག་གི་ཁམས་མོས་བསམ་པ་བག་ལ་ཉལ་བ་བཅས་མི་འདྲ་བ་ཞིག་ཡོད་སྟབས། ཆོས་ལུགས་མི་འདྲ་བ་ངེས་པར་དུ་དགོས་ཀྱི་ཡོད་པ་རེད། ཆོས་ལུགས་དེ་དག་ཐམས་ཅད་ཀྱིས་མི་བྱམས་བརྩེ་དང་ལྡན་པ་ཞིག་དང། གཞན་ལ་ཕན་ཐོགས་པ། མི་བཟང་པོ་དགོས་པའི་བསླབ་བྱ་གཅིག་གྱུར་སྟོན་གྱི་ཡོད་ཅེས་བཀའ་བསྩལ་མཛད་པ་དང་ཆབས་ཅིག ༸གང་ཉིད་མཆོག་གིས་༸སྐུ་ཚེ་གང་བོ་བྱམས་བརྩེའི་ཐོག་ལ་ཤུགས་སྣོན་མཛད་རྒྱུ་ཡིན་པས་ད་རེས་འདིར་ཕེབས་པའི་ཆོས་གྲོགས་རྣམ་པ་ཚོ་གཙོས། དེ་མིན་ཕྱོགས་མཐའ་ཁག་ཏུ་བཞུགས་ཡོད་པའི་ཆོས་གྲོགས་རྣམ་པ་ཚོས་ཀྱང་ཆོས་ལུགས་ཕན་ཚུན་གཅིག་གྱུར་གྱི་འདུ་ཤེས་འཛིན་རྒྱུ་ཐོག་ཧུར་ཐག་གནང་རོགས་གནང་ཞེས་འབོད་སྐུལ་དང་བཅས་བཀའ་བསྩལ་མཛད་ཡོད་པ་རེད། དེ་བཞིན་མགོན་པོ་མཆོག་གིས་རྒྱ་གར་རྒྱལ་ཁབ་འདི་འཛམ་གླིང་འདིའི་སྟེང་གི་ཆོས་ལུགས་གཙོ་ཆེ་ཚང་མ་ཡོད་བསྡད་པའི་རྒྱལ་ཁབ་ཅིག་ཆགས་ཀྱི་ཡོད་པ་མ་ཟད། དེའང་ཆབ་སྲིད་ཀྱི་དགོས་མཁོ་གཅིག་པོ་མ་ཡིན་པར་འདས་པའི་ལོ་ངོ་སྟོང་ཁྲག་རིང་ལ་ལྟ་གྲུབ་མི་འདྲ་བའི་ཆོས་བརྒྱུད་རྣམས་ཕན་ཚུན་ལྷན་དུ་གནས་ཐུབ་པ་དེ་ནི་འཛམ་གླིང་སྤྱི་ལ་ཁྱད་དུ་འཕགས་པ་ཞིག་རེད་ཅེས་བཀའ་བསྩལ་དང་སྦྲགས། དེ་ལྟར་མུ་མཐུད་ནས་སྲ་བརྟན་གནས་པའི་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་བྱེད་དགོསཀྱི་རེད་ཅེས་ལམ་སྟོན་མཛད་ཡོད་པ་རེད། གཞི་རྩའི་དེ་རིང་ཐེངས་འདིའི་དུས་དབང་སྐབས་ཚོགས་པའི་ཆོས་ལུགས་རེས་མེད་ཀྱི་མཛད་སྒོར་རྒྱ་གར་ནང་གི་སིཀ་ཆོས་ལུགས་དང་གཅེར་བུ་བའི་ཆོས་ལུགས། ཁ་ཆེ་ཆོས་ལུགས། ཧིན་དུ་ཆོས་ལུགས་བཅས་ཀྱི་དབུ་ཁྲིད་ཁག་ཅིག་ཆེད་བཅར་ཞུས་འདུག སྐབས་དེར་ཆོས་ལུགས་ཁག་གི་དབུ་ཁྲིད་ཚོས་རང་རང་སོ་སོའི་ཆོས་ལུགས་ཀྱི་སྨོན་ལམ་གསུང་འདོན་གནང་པ་དང་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ད་བར་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་ཐོག་མཛད་རྗེས་རླབས་པོ་ཆེ་ཞིག་འཇོག་གནང་མཛད་པར་ཆེ་བསྟོད་ཞུས་ཡོད་པ་རེད། རྩ་བའི་རྒྱ་གར་གྱི་ཆོས་ལུགས་འདྲ་མིན་ཁག་གི་དབུ་ཁྲིད་དེ་དག་ཁ་སང་བྷི་ཧར་མངའ་སྡེའི་རྒྱལ་ས་པ་ཊ་ནཱར་རྒྱ་གར་སིཀ་ཆོས་བརྒྱུད་ཀྱི་བླ་ཆེན་གུ་རུ་གྷོ་ཝིནཌ་སིངྒ་མཆོག་སྐུ་འཁྲུངས་ནས་ལོ་ངོ་ ༣༥༠ འཁོར་བའི་མཛད་སྒོར་བཅར་ཡོད་པ་དང། ཁོང་རྣམ་པས་གོ་སྐབས་དེ་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་ལུགས་རིས་མེད་ཀྱི་མཛད་སྒོ་དེ་ལྟར་ཚོགས་པར་གསོལ་འདེབས་ཞུས་པ་ཞིག་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གནས་མཆོག་རྡོ་རྗེ་གདན་དུ་ཉིན་བཞིའི་སྔོན་འགྲོའི་ཆོས་འབྲེལ་དབུ་འཛུགས་གནང་པ་དང་འབྲེལ། དུས་དབང་ཞུ་བར་བཅར་བའི་ཆོས་ཞུ་བ་ཚོའི་ངོས་ནས་འཛམ་གླིང་འདིའི་སྟེང་ཡོད་པའི་ཆོས་ལུགས་རྣམས་ཕན་ཚུན་དབར་མཐུན་སྒྲིལ་ཡོང་བར་དགོངས་པ་བཅང་དགོས་པ་རེད་ཅེས་བཀའ་བསྩལ་སོང་། དེའང་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་དུས་དབང་ཐོག་བཅར་བའི་ཕྱི་ནང་གི་དད་ལྡན་ཆོས་ཞུ་བ་ཉིས་འབུམ་བརྒལ་བར་དཔལ་དུས་ཀྱི་འཁོར་ལོའི་སྔོན་འགྲོའི་ཆོས་འབྲེལ་ལ་སློབ་དཔོན་ཀ་མ་ལ་ཤྰི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་གཉིས་ཀྱི་བཀའ་ཆོས་དབུ་འཛུགས་མཛད་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་དངོས་གཞི་སྒོམ་རིམ་བར་པའི་བཀའ་ཆོས་དབུ་འཛུགས་མ་མཛད་གོང་ལ་ཐེངས་འདིའི་དུས་དབང་ཐོག་འཛམ་གླིང་ཡུལ་འདྲ་མིན་ནས་ཕེབས་པའི་ཆོས་ཞུ་བ་ཚོར་ བདེ་སྐྱིད་ཀྱི་རྩ་བ་བྱམས་བརྩེའི་གལ་གནད་སྐོར་བཀའ་བསྩལ་བ་དང་འབྲེལ་ཏེ། འགྲོ་བ་མི་རྣམས་བདེ་བ་འདོད་པ་དང་སྡུག་ངལ་མི་འདོད་པ་གཅིག་མཚུངས་ཡིན་ཀྱང་། དེང་སྐབས་སྤྱི་ཚོགས་ནང་དུ་ཆོས་ཕྱོགས་དང་། མི་རིགས། དཔལ་འབྱོར་སོགས་ཀྱི་ཐོག་ནས་ཕན་ཚུན་དབར་དབྱེ་འབྱེད་བྱས་སྟབས། མི་མང་པོ་ཞིག་དཀའ་ངལ་ནང་དུ་ཚུད་པ་དང་ཕན་ཚུན་གསོད་རེས་ཀྱིས་མི་གསོད་ཁྲག་སྦྱོར་གྱི་གནས་སྟངས་ཡོང་གི་ཡོད་སྐོར་བཀའ་བསྩལ་བ་དང་ཆབས་ཅིག དེ་དག་མཐོང་བཞིན་དུ་འཆར་ཅན་རེད་ཅེས་སྣང་མེད་དུ་བཞག་ཚེ། དུས་རྒྱུན་ང་ཚོས་སེམས་ཅན་ཐམས་ཅད་ཟེར་བ་འདི་སྐྱག་རྫུན་ཆགས་ཀྱི་ཡོད་ཅེས་བཀའ་བསྩལ་ཡོད། དེ་བཞིན་༸གོང་ས་མཆོག་གིས་འཛམ་གླིང་འདིའི་ཐོག་ཡོད་པའི་ཆོས་ལུགས་དེ་དག་ལྟ་གྲུབ་ཀྱི་ཆ་ནས་མི་འདྲ་བ་ཡོད་རུང་། བྱམས་བརྩེའི་བསླབ་བྱ་སྟོན་མཁན་གཅིག་མཚུངས་ཡིན་ཀྱང་དེང་སྐབས་ཆོས་ལུགས་མི་འདྲ་བའི་རྒྱུ་མཚན་དུ་བྱས་ནས་མི་གཅིག་གིས་གཅིག་ལ་གསོད་རེས་བཏང་པའི་གནས་སྟངས་ཤིག་ཡོང་བའི་དུས་སྐབས་དེར་ཆོས་ལུགས་ནང་ཕན་ཚུན་དབར་གཅིག་གྱུར་གྱི་འདུ་ཤེས་འཛིན་པའི་ཐོག་ནས་ཕན་ཚུན་གཅིག་གིས་གཅིག་ལ་བརྩི་བཀུར་དང་སློབ་སྦྱོང་གནང་སྟེ་ ཆོས་ལུགས་མཐུན་སྒྲིལ་ཡོང་ཐུབ་ཡག་ཞིག་ཡིན་སྟབས། ད་ལན་དུས་དབང་ལ་བཅར་བའི་ཆོས་ཞུ་བ་ཚོའི་ངོས་ནས་ཆོས་ལུགས་མཐུན་སྒྲིལ་ཡོང་བར་དགོངས་པ་བཅང་རོགས་ཅེས་འབོད་སྐུལ་གནང་སོང་། ལྷག་པར་དུ་ད་ལན་གྱི་ཆོས་འབྲེལ་འདིའི་ཐོག་མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་༸གང་ཉིད་མཆོག་གི་ཐུགས་ཀྱི་དམ་བཅའ་གསུམ་པོ་ལས། འགྲོ་བ་མིའི་གཅིག་འགྱུར་གྱི་འགན་འཁྲི་དང་། ཆོས་ལུགས་མཐུན་སྒྲིལ། དེ་བཞིན་བོད་པ་ཞིག་ཡིན་པའི་ཆ་ནས་བོད་མི་རིགས་ཀྱི་ཆོས་དང་རིག་གཞུང་། ཁོར་ཡུག་བཅས་པ་མི་ཉམས་རྒྱུན་འཛིན་གནང་རྒྱུ་བཅས་ཀྱི་ཐོག་ངོ་སྤྲོད་ཞིབ་རྒྱས་གནང་པ་མ་ཟད། ༸གང་ཉིད་མཆོག་གིས་བོད་ལ་ཡོད་པའི་ནང་པ་སངས་རྒྱས་པའི་ཆོས་དང་འབྲེལ་བའི་རིག་གཞུང་དེ་དེང་སྐབས་འཛམ་གླིང་སྤྱིའི་སྤྱི་ནོར་ཞིག་ཆགས་ཡོད་སྟབས། དེ་མི་ཉམས་རྒྱུན་འཛིན་གནང་རྒྱུའི་ཐད་ཐེངས་འདིར་བསྡུས་པའི་བོད་མི་གཙོས་པའི་ཕྱི་རྒྱལ་མི་རིགས་དང་། ལྷག་དོན་རྒྱ་རིགས་ཆོས་ཞུ་བ་ཚོས་དགོངས་པར་བཞག་དགོས་པའི་བཀའ་བསྩལ་མཛད་ཡོད་པ་རེད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཚོུད་ ༧།༠༠ ནས་དུས་དབང་གསུང་ཆོས་ར་བར་ཆིབས་བསྒྱུར་གྱིས་སྒྲུབ་བཤག་མཛད་ཀྱི་ཡོད་པ་དང་། ཉིན་གུང་ཚོུད་ ༡༢།༣༠ ནས་དབུ་འཛུགས་ཀྱིས་ཚོུད་ ༣།༠༠ བར་སྔོན་འགྲོིའི་བཀའ་ཆོས་བསྩལ་གནང་གི་ཡོད་རེད། དེ་རིང་ནས་དབུ་བཙུགས་མཛད་པའི་ཉིན་བཞིའི་ཆོས་འབྲེལ་དེ་ dalialama.com དང་། Kalachakra2017.net དྲ་གནས་གཉིས་ཀྱི་ཐོག་ལ་ཐད་སྲིང་གནང་གི་ཡོད་པ་མ་ཟད། དེའང་སྐད་རིགས་རྒྱ་སྐད་དང་ཧིན་དི། སོག་སྐད། དབྱིན་སྐད། ཀོ་རི་ཡ། ཨུ་རུ་སུ་སྐད། བོད་སྐད། ཝི་ཊ་ནམ་སྐད་བཅས་ཀྱི་ཐོག་གསུང་ཆོས་གསན་གཟིགས་ཞུ་རྒྱུ་ཡོད་པ་རེད།

གནས་མཆོག་རྡོ་རྗེ་གདན་དུ་ད་རེས་དུས་ཀྱི་འཁོར་དབང་ཆེན་ཐེངས་ ༣༤ པ་འདིའི་ཐོག་ལ་དུས་དབང་གོ་སྒྲིག་ཚོགས་ཆུང་གི་ངོས་ནས་ད་ལྟའི་ཆར་ཁྱོན་རྒྱལ་ཁབ་ཁག་ ༨༠ ལྷག་ནས་ཆོས་ཞུ་བ་འབུམ་གཉིས་འབྱོར་གྱི་ཡོད་པར་ཚོད་དཔག་གནང་འདུག་པ་དང་།  ཆོས་ཞུ་བ་དེ་དག་ཁྲོད་ནས་འབྲུག་དང་བལ་ཡུལ། རྒྱ་གར་གྱི་ཧི་མཱ་ལ་ཡའི་རི་རྒྱུད་ཁག་གཅིག་པོ་ནས་ཆོས་ཞུ་བ་ཁྲི་ཚོ་ཁ་ཤས་འབྱོར་འདུག། དེའང་ཐོག་མའི་འཆར་དུས་དབང་གོ་སྒྲིག་ཚོགས་ཆུང་གིས་ཧི་མཱ་ལ་ཡའི་རི་རྒྱུད་ནས་ཆེད་བཅར་ཞུས་པའི་ཆོས་ཞུ་བ་ཚོར་དམིགས་བསལ་གྱི་དཔུང་རྟགས་གནང་ནས་གསུང་ཆོས་ར་བའི་ནང་བཞུགས་གནས་ལོགས་སུ་གོ་སྒྲིག་ཞུས་ཡོད་ཀྱང་། ད་ལྟའི་ཆར་དམིགས་བསལ་གྱི་བཞུགས་གནས་གནང་པའི་ཤོང་ཚད་ལས་བརྒལ་བའི་ཆོས་ཞུ་བ་ཕེབས་ཡོད་པ་མ་ཟད། ཉིན་རེ་བཞིན་ཁུལ་དེ་དག་ནས་ཆོས་ཞུ་བ་མང་པོ་ཞིག་ཕེབས་མུས་ཡིན་སྟབས། དུས་དབང་གོ་སྒྲིག་ཚོགས་ཆུང་གིས་ཁོང་རྣམས་ཚེས་ ༢ ནས་བཟུང་དམིགས་བསལ་གྱི་དཔུང་རྟགས་བཞེས་མི་དགོས་པར་མི་མང་དཀྱུས་མ་ལྟར་ཕེབས་དགོས་སྐོར་ལམ་སྟོན་གནང་ཡོད་པ་རེད། འདི་ག་རླུང་འཕྲིན་ཁང་གིས་ད་རེས་ཧི་མཱ་ལ་ཡའི་རི་རྒྱུད་ཁག་ནས་ཆོས་ཞུ་བ་མང་པོ་ཞིག་ཕེབས་དང་ཕེབས་མུས་ཡིན་པར་བརྟེན། དེ་འདྲ་འབྱོར་དོན་གང་ཡིན་ཞིབ་དཔྱད་བྱེད་སྐབས་དང་པོ་བལ་ཡུལ་གྱི་ཤར་པ་དང་རྟ་དམག་སོགས་བལ་པོའི་ནང་པ་ཚོས་༸་གོང་ས་༸་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་གྱི་ཡོད་པ་དང་། གཉིས་པ་ལ་དྭགས་ཀྱི་ལུང་ཁུག་ཁག་ཅིག་ནས་ཀྱང་ཆོས་ཞུ་བ་དེ་སྔ་ལས་མང་བ་འབྱོར་ཡོད་པ་མ་ཟད། གསུམ་པ་བལ་ཡུལ་ཁུལ་དུ་ད་རེས་ཀྱི་དུས་འཁོར་དབང་ཆེན་དེ་དུས་དབང་མཐའ་མ་དེ་ཡིན་པར་དཀྲོག་གཏམ་ཞིག་ཁྱབ་པར་བརྟེན་ཆོས་ཞུ་བ་མང་པོ་ཕེབས་པའི་གནས་སྟངས་ཤིག་ཆགས་འདུག རྣམ་ཀུན་ཡིན་ན་ལ་དྭགས་ཁུལ་དུ་ད་ལྟའི་དུས་ཚོད་འདིའི་སྐབས་གཞུང་ལམ་ཁག་ལ་གངས་འབབ་སྟེ་འགྲོ་ལམ་འགག་པའི་གནས་སྟངས་ཆགས་ཀྱི་ཡོད་ཀྱང་། ད་བར་འགྲོ་ལམ་འགག་མེད་པ་དེས་ལ་དྭགས་ཀྱིི་ས་ཁུག་སྐྱོག་སྐྱོག་འདྲ་མིན་ནས་ཀྱང་ཆོས་ཞུ་བ་མང་པོ་ཕེབས་ཐུབ་ཡོད་པ་རེད། ད་ལན་དུས་དབང་ཐེངས་ ༣༤ པ་འདིའི་ཐོག་འབྲུག་དང་བལ་ཡུལ། རྒྱ་གར་གྱི་ཧི་མཱ་ལ་ཡའི་རི་རྒྱུད་གཞན་ཁག་ཅིག་ནས་ཕེབས་པའི་ཆོས་ཞུ་བའི་ཁོངས་སུ་དུས་འཁོར་དབང་ཆེན་ཐེངས་དང་པོ་ཞུ་མཁན་ཡང་མང་དག་ཞིག་ཕེབས་འདུག