Tibetan Royal Year of 2151 | Year of the Wood Dragon

༸གོང་ས་མཆོག

༸གོང་ས་མཆོག་གིས་རྒྱ་གཞུང་ནས་སྐྱོན་བརྗོད་བྱེད་མིན་ལ་མ་ལྟོས་པར་རྒྱལ་ཚོགས་ཀྱི་ཟུར་ཚོགས་ཐོག་དབུ་བཞུགས་མཛད་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གཞུང་ནས་སུད་སི་གྲོང་ཁྱེར་ཇི་ནེ་ཝ་ནང་རྟེན་གཞི་བྱས་པའི་རྒྱལ་ཚོགས་ཀྱི་ཟུར་ཚོགས་ཐོག་དབུ་བཞུགས་མཛད་པར་སྐྱོབ་བརྗོད་དང་། ཟུར་ཚོགས་དེ་ཕྱིར་འཐེན་བྱ་དགོས་ལུགས་ཀྱི་རྒྱལ་ཚོགས་དཔོན་རིགས་ཚོར་གནོན་ཤུགས་སྤྲད་མིན་ལ་མ་ལྟོས་པར་དེ་རིང་༸གང་ཉིད་མཆོག་དབུ་བཞུགས་ཀྱིས་ཟུར་ཚོགས་ཚོགས་གནང་ཡོད་པ་རེད། དེ་ཡང་དེ་རིང་ཟླ་ ༣ ཚེས་ ༡༡ ཉིན་རྒྱལ་ཚོགས་ཀྱི་ཨ་རིའི་གཞུང་ཚབ་དང་ཁེ་ན་ཌའི་གཞུང་ཚབ་ཐོུང་གིས་གོ་སྒྲིག་འོག་སུད་སི་གྲོང་ཁྱེར་ཇི་ནེ་ཝར་འཚོགས་བཞིན་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༣༡ འཚོགས་བཞིན་པ་དང་བསྟུན། ཇི་ནེ་ཝ་ནང་རྟེན་གཞི་བྱས་པའི་ Geneva Gratude Institude ཞེས་པའི་བསྟི་གནས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་གཙོས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་Tawakkol མཆོག་དང་ཨི་རན་གྱི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ Shirin Ebadi མཆོག་དང་། གནད་ཡོད་མི་སྣ་ཁག་ཅིག་བཅས་ལྷན་ཞུགས་ཀྱིས་འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་གནད་དོན་ཐད་ཟུར་འཚོགས་གནང་འདུག ད་ལན་གྱི་ཟུར་ཚོགས་དེ་བསྐོང་ཚོགས་མ་གནང་པའི་སྔ་རོལ་ཏུ་གྲོང་ཁྱེར་ཇི་ནེ་ཝ་ནང་ཡོད་པའི་རྒྱ་གཞུང་གི་སྐུ་ཚབ་ཀྱིས་རྒྱལ་ཚོགས་ཀྱི་ཚོགས་མི་དང་རྒྱལ་སྤྱིའི་ཚོགས་སྡེ་ཁག་གི་སྐུ་ཚབ་ཚོས་ཟུར་ཚོགས་དེའི་ནང་མཉམ་ཞུགས་བྱ་རྒྱུ་མེད་པ་དང་། ལྷག་དོན་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུ་མི་རུང་བའི་ཉེན་བརྡ་ཞིག་བཏང་སྟེ་ངེས་པར་དུ་ཟུར་ཚོགས་ཕྱིར་འཐེན་བྱ་དགོས་པའི་གནོན་ཤུགས་སྤྲད་པའི་ཞུ་སྙན་ཞིག་ཕུལ་འདུག     དེ་ཡང་རྒྱལ་ཚོགས་ཀྱི་འབྲེལ་ཡོད་དཔོན་རིགས་དང་རྒྱལ་སྤྱིའི་ཚོགས་སྡེ་ཁག དེ་ཞིན་ཁུལ་དེའི་གྲོས་ཚོགས་འཐུས་མི་རྣམས་ཀྱི་མཚན་ཐོག་ལ་ཕུལ་བའི་ཞུ་སྙན་དེའི་ནང་། རྒྱལ་ཚོགས་ཀྱི་ཟུར་ཚོགས་དེའི་ནང་༸གོང་ས་ཏཱ་ལའི་བླ་མ་མཆོག་མགྲོན་གཙོར་གདན་ཞུས་གནང་པ་དེ་ནི་རྒྱ་ནག་གི་རང་དབང་དང་ཆེ་མཐོང་འདི་བཞིན་རྒྱལ་ཚོགས་ཀྱི་གཞི་རྩའི་རྩ་ཁྲིམས་དང་དངོས་འགལ་ཡིན་པ་མ་ཟད། ཁྱད་པར་དུ་༸གོང་ས་ཏཱ་ལའི་བླ་མ་མཆོག་ནི་རྒྱལ་ཁབ་དང་ཚོགས་སྡེ་གང་ཡིན་རུང་དེའི་མིང་ཐོག་ནས་ཁ་བྲལ་གྱི་ལས་འགུལ་སྤེལ་བཞིན་པར་ངོ་རྒོལ་མཐའ་གཅིག་ཏུ་ཡོད་ཅེས་འཁོད་འདུག འདི་ག་རླུང་འཕྲིན་ཁང་གིས་སུད་སི་བོད་ཀྱི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་སྤྱིར་༸གོང་ས་མཆོག་འཛམ་གླིང་རྒྱལ་ཁབ་ཁག་གི་དབུ་ཁྲིད་ཚོ་དང་མཇལ་འཕྲད་གནང་རྒྱུ་གཙོས་པའི་ཕྱི་རྒྱལ་ཡུལ་གྲུ་འདྲ་མིན་ཁག་ཏུ་མཛད་འཆར་བསྐྱངས་དང་སྐྱོང་བཞིན་པ་བཅས་ལ་རྒྱ་གཞུང་གིས་རྟག་ཏུ་འགོ་ཐབས་བྱས་དང་བྱེད་བཞིན་པ་དེ་དག་ནི་རྒྱུན་གཏན་གྱི་བྱ་སྤྱོད་ཞིག་ཡིན་པ་ལས་དམིགས་བསལ་གང་ཡང་མིན་པ་དང་། ལྷག་དོན་ཟུར་ཚོགས་དེ་ནི་འགྲོ་བ་མིའི་ཐོབ་ཐང་དང་འབྲེལ་བའི་གནད་ཆེ་ཞིག་ཡིན་སྟབས། དེ་ར་འགོག་ཐབས་བྱེད་ཀྱང་བསྒྲུབ་རྒྱུ་མེད་པ་རེད་ཅེས་གསུངས་སོང་། དེ་བཞིན་རྒྱལ་ཚོགས་ཀྱི་གཙོ་འཛིན་སྐུ་ཞབས་ Ahmad Fawzi མཆོག་གིས་ཀྱང་རྒྱལ་ཚོགས་ཀྱི་གྲོས་ཚོགས་འཐུས་མི་རྣམ་པའི་བཀའ་བསྡུར་གནང་པ་ཐོ་བཀོད་ཙམ་ལས་དངོས་སུ་ལག་བསྟར་བྱ་དགོས་པ་ཁྱབ་ཀྱི་མེད་སྐོར་གསལ་བཤད་གནང་འདུག ཟུར་ཚོགས་ཀྱི་ཚོགས་ཡུལ་ཇི་ནེ་ཝ་བསྟི་གནས་ཁང་དེའི་འགན་འཛིན་སྐུ་ཞབས་ Philippe Burrin ལགས་ཀྱིས་ཟུར་ཚོགས་དེའི་ཐོག་ཕྲོགས་གང་ས་ནས་གནོན་ཤུགས་སྤྲད་ཀྱི་ཡོད་མེད་ལ་མ་ལྟོས་པར་ཟུར་ཚོགས་དེ་ཕྱིར་འཐེན་གནང་གི་མི་ཅེས་གསུངས་ཡོད་པ་རེད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཁ་སང་ཕྱི་དྲོ་ཚོུད་ ༧།༠༠ ཡོལ་ཙམ་ལ་སུད་སི་གྲོང་ཁྱེར་ཇི་ནེ་ཝར་ཞབས་སོར་བདེ་བར་འཁོད་མཚམས་སུ་ཨ་རིའི་གཞུང་ཚབ་དང་རྒྱ་གར་གྱི་གཞུང་ཚབ་སྐུ་གཞོན། ས་གནས་དོན་གཅོད་དང་། དེ་བཞིན་བོད་མི་དང་བོད་དོན་རྒྱབ་སྐྱོར་བ་བཅས་ཆེད་བཅར་གྱིས་ཕེབས་བསུ་གཟབ་རྒྱས་ཞུས་འདུག མཛད་འཆར་ལྟར་ན། ༸གོང་ས་མཆོག་དེ་རིང་ཉིན་རྒྱབ་ཚོད་ ༥།༠༠ ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཟུར་ཚོགས་ཐོག་དབུ་བཞུགས་གྲུབ་རྗེས། སང་ཉིན་སྔ་དྲོ་ཁུལ་དེ་ནས་རྒྱ་གར་ཕྱོགས་སུ་ཆིབས་ཐོན་གནང་རྒྱུ་ཡིན་འདུག

༸གོང་ས་མཆོག་འཛམ་གླིང་ཁྱོན་ཡོངས་སུ་སེམས་ཀྱི་ཞི་བདེ་བསྐྲུན་ཐབས་ཞེས་པའི་མཁས་པའི་བགྲོ་གླེང་ཐོག་དབུ་བཞུགས་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཚེས་ ༩ ཉིན་ཨ་རིའི་ Madison གྲོང་ཁྱེར་དུ་མཛད་འཆར་མཐའ་མ་བསྐྱངས་པ་དང་འབྲེལ།  ཁུལ་དེར་བསྐོང་ཚོགས་གནང་པའི་འཛམ་གླིང་ཁྱོན་ཡོངས་སུ་སེམས་ཀྱི་ཞི་བདེ་བསྐྲུན་ཐབས་ཞེས་པའི་མཁས་པའི་བགྲོ་གླེང་ཐོག་དབུ་བཞུགས་མཛད་འདུག དེ་ཡང་ཁ་སང་ཟླ་ ༣ ཚེས་ ༩ ཉིན་༸གོང་ས་སྐྱབས་མགོན་ཆེན་པོ་མཆོག་གིས་ཨ་རིའི་ Wisconsin གཙུག་ལག་སློབ་གཉེར་ཁང་དུ་ཆིབས་སྒྱུར་བཀྲིན་བསྐྱངས་འདུག  གཙུག་ལག་སློབ་གཉེར་ཁང་དེའི་ཀླད་རྩ་དང་སེམས་ཁམས་རིག་པའི་མཁས་དབང་སྐུ་ཞབས་ Richard Davidson ལགས་གཙོས་པའི་མཉམ་ཞུགས་བ་རྒྱལ་ཁབ་འདྲ་མིན་ནས་ཚན་རིག་པ་དང་སེམས་ཁམས་རིག་པའི་མཁས་དབང་། དེ་བཞིན་གསར་འགོད་པ་བཅས་ཁྱོན་མི་གྲངས་ ༢༠༠༠ ཙམ་ལ་ད་ལྟའི་དུས་རབས་ཉེར་གཅིག་པ་དེའི་ནང་འགྲོ་བ་མིའི་བདེ་སྡུག་ཡར་རྒྱས་གཏང་རྒྱུ་དང་། ལྷག་དོན་འཚེ་བའི་བྱ་སྤྱོད་ཁག་ཉུང་དུ་གཏོང་བར་རང་རྒྱུད་ལ་བྱམས་བརྩེ་དང་གཞན་ཕན་གྱི་བསམ་པ།  སྙིང་རྗེ་གསུམ་པོ་ནི་མེད་དུ་མི་རུང་བའི་དགོས་ངེས་ཀྱི་ཆ་རྐྱེན་ཡིན་པ་བཀའ་སྩལ་གནང་འདུག ལྷན་ཚོགས་དེའི་ཁྲོད་མགོན་པོ་༸གང་ཉིད་མཆོག་གིས་ཞི་བདེ་དང་འཚེ་བའི་སྐོར་བཀའ་འདྲིར་བཀའ་ལན་གནང་བའི་ནང་། སྤྱིར་རྩོད་རྙོག་ཡོང་གཞི་ནི་ང་ཚོའི་ཁྲོད་དུ་ང་ཚོ་དང་རྟག་ཏུ་འདྲེས་ནས་ཡོད་པ་གང་ཞིག་དེར་གྲོས་མོལ་གྱི་ཐབས་ལམ་ཐོག་ནས་སེལ་ཐུབ་རྒྱུ་ཡོད་པ་བཀའ་སྩལ་གནང་པ་མ་ཟད།  འཛམ་གླིང་འདིའི་ནང་འཚེ་བའི་རྒྱུ་ཆུང་ངུར་བརྟེན་ནས་དཀའ་རྙོག་དུ་མ་ཞིག་བཟོ་བཞིན་ཡོད་སྟབས། ད་ལྟའི་དུས་རབས་ཉེར་གཅིག་འདི་གྲོས་མོལ་གྱི་དུས་རབས་ཤིག་ཏུ་འགྱུར་ཐབས་འབད་དགོས་གལ་ཡིན་པའི་སྐུལ་ལྕག་གནང་འདུག རྩ་བའི་༸གོང་ས་མཆོག་ཨ་རིའི་མཱ་ཡོ་སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་ལེགས་གྲུབ་ཟིན་རྗེས། ཨ་རིའི་མེ་ཌི་སོན་ གྲོང་ཁྱེར་དུ་ཟླ་བ་འདིའི་ཚེས་ ༦ ནས་དབུ་འཛུགས་ཀྱིས་ཁ་སང་ཚེས་ ༩ བར་ཁུལ་དེར་བླང་དོར་བཀའ་སློབ་དང་ཆོས་འབྲེལ་མཛད་ཡོད་པ་རེད། ལྷག་དོན་ཨ་རིའི་ Wisconsin གཙུག་ལག་སློབ་གཉེར་ཁང་དུ་མཁས་པའི་བགྲོ་གླེང་ཐོག་དབུ་བཞུགས་མཛད་པ་སོགས་ཀྱི་མཛད་འཆར་ལེགས་གྲུབ་ཀྱིས་ཁ་སང་ཚེས་ ༩ ཉིན་ཁུལ་དེ་ནས་ཆིབས་ཐོན་གྱིས་དེ་རིང་ཕྱི་དྲོ་སུད་སི་ཇི་ནེ་ཝ་གྲོང་ཁྱེར་དུ་ཞབས་སོར་འཁོད་ཀྱི་ཡོད་པ་རེད། ༸གང་ཉིད་མཆོག་ཁུལ་དེར་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཟུར་ཚོགས་ཐོག་དབུ་བཞུགས་ཀྱིས་བཀའ་སློབ་བསྩལ་རྒྱུ་རེད་འདུག  

༸གོང་ས་མཆོག་གིས་བོད་མི་ཚོས་རང་གི་ངོ་བོ་སྲུང་སྐྱོབ་ཐུབ་པར་བོད་ཀྱི་ཐུན་མིན་ནང་དོན་རིག་པར་སློབ་གཉེར་གནང་དགོས་གལ་ཡིན་པ་བཀའ་བསྩལ་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ Wisconsin མངའ་སྡེའི་རྒྱལ་ས་ Madison དུ་ཉིན་གྲངས་གཉིས་རིང་གི་མཛད་འཆར་ཁག་སྐྱོང་བཞིན་ཡོད་པ་ལྟར། ཁ་སང་ཚེས་ ༨ ཉིན་༸གང་ཉིད་མཆོག་གིས་བོད་རིགས་གཙོས་དད་ལྡན་མི་གྲངས་ ༡༠༠༠ ལྷག་བརྒལ་བར་བོད་མིའི་ངོ་བོ་སྲུང་སྐྱོབ་ཐུབ་པར་བོད་ཀྱི་ཐུན་མིན་ནང་དོན་རིག་པར་བརྟག་ཞིང་དཔྱད་ནས་སློབ་གཉེར་གནང་དགོས་གལ་ཡིན་པ་བཀའ་བསྩལ་འདུག དེ་ཡང་ཨ་རིའི་ Wisconsin བོད་མིའི་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། ༸གང་ཉིད་མཆོག་གིས་ཁ་སང་ཚེས་ ༨ ཉིན་གྱི་སྔ་ཐོག་ཁུལ་དེར་རྟེན་གཞི་བྱས་པའི་ Madison Masonic ཚོགས་ཁང་ཆེན་མོར་ཆིབས་སྒྱུར་གྱིས་ཁུལ་དེའི་བོད་རིགས་གཙོས་པའི་ཕྱི་རྒྱལ་གྱི་དད་ལྡན་མང་ཚོགས་རྣམས་ལ་བླང་དོར་གྱི་བཀའ་སློབ་སྩལ་བའི་ཆེས་ཐོག་མར་བོད་མི་ཚོར་བོད་ཀྱི་སྐད་ཡིག་གི་གལ་གནད་སྤྱི་དང་། ཁྱད་པར་དུ་འཛམ་བུ་གླིང་འདིའི་སྟེང་རྒྱུ་མཚན་གྱི་ཐོག་ནས་ར་སྤྲོད་བྱེད་རྒྱུ་ཡོད་བསྡད་པའི་ཆོས་དེ་དཔལ་ནཱ་ལེནྡྲའི་ཆོས་བརྒྱུད་ཡིན་པ་བཀའ་སྩལ་དང་འབྲེལ། ཆོས་བརྒྱུད་དེ་དུས་གནས་ཐུབ་པ་ལ་བོད་ཀྱི་སྐད་ཡིག་དེ་ངེས་པར་དུ་གནས་དགོས་གལ་ཡིན་པས།  བོད་རིགས་གཞོན་སྐྱེས་ཚོས་ངེས་པར་དུ་བོད་ཀྱི་སྐད་ཡིག་ལ་གལ་ཆེ་དོན་ཆེར་བརྩི་ ནས་དེར་དམིགས་བསལ་དོ་སྣང་གིས་སོ་སོའི་བུ་ཕྲུག་རྣམས་ལ་བོད་ཡིག་བསླབ་ཐབས་གནང་དགོས་གལ་ཆེ་བའི་སྐུལ་ལྕག་གནང་འདུག ད་དུང་༸གོང་ས་མཆོག་གིས་བོད་ཀྱི་སྐད་ཡིག་མ་ཤེས་པ་ཡིན་ན་ང་ཚོ་ལོ་ངོ་སྟོང་ཕྲག་ལྷག་གི་ལོ་རྒྱུས་ཡོད་པའི་བོད་ཀྱི་ནང་པ་སངས་རྒྱས་པའི་ལྟ་གྲུབ་དེ་དག་ཤེས་དཀའ་བའི་ངལ་བ་འཕྲད་རྒྱུའི་ཉེན་ཁ་ཆེན་པོ་ཡོད་སྟབས། བོད་མི་ཚོས་བོད་ཀྱི་གནའ་བོའི་རྗེས་ལུས་ཀྱི་བསམ་བློ་དེ་དོར་ཐབས་བྱས་ཏེ་བོད་ཀྱི་ཐུན་མོང་མ་ཡིན་པའི་ནང་དོན་རིག་པར་རབ་བྱུང་ཕོ་མོ་ཁྱད་མེད་ཙམ་དུ་མ་ཟད། མི་དམངས་དཀྱུས་མ་ཚོས་ཀྱང་དམིགས་བསལ་དོ་སྣང་གིས་སློབ་གཉེར་གནང་དགོས་པའི་ལམ་སྟོན་ཡང་སྩལ་འདུག ༸གོང་ས་མཆོག་གིས་སྐབས་དེར་མང་ཚོགས་ཚོར་བཀའ་སློབ་སྩལ་ཟིན་རྗེས་ཆོས་ཞུ་བ་དད་ལྡན་མང་ཚོགས་ཚོར་དགེ་བཤེས་བླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་དངོས་སུ་དབུ་ཚུགས་གནང་འདུག མཛད་རིམ་ལྟར་ན།  ཕྱི་ཚེས་ ༡༠  ཉིན་ ༸གོང་ས་མཆོག་གིས་རང་གཞན་རོགས་གསུམ་ལ་ཕན་པའི་ལྷག་བསམ་གྱི་ཀུན་སློང་རང་རྒྱུད་ལ་སྐྱེས་ཐབས་སྐོར་བགྲོ་གླེང་མཛད་རྒྱུ་རེད་འདུག

༸གོང་ས་མཆོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཟུར་ཚོགས་ཐོག་དབུ་བཞུགས་མཛད་རྒྱུ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོནཆེན་པོ་མཆོག་སུད་སི་གྲོང་ཁྱེར་ཇི་ནེ་ཝ་ནང་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཟུར་ཚོགས་ཐོག་དབུ་བཞུགས་མཛད་མཛད་རྒྱུ་རེད་འདུག དེ་ཡང་ཟླ་འདིའི་ཚེས་ ༡༡ ཉིན་རྒྱལ་ཚོགས་ཀྱི་ཨ་རིའི་གཞུང་ཚབ་དང་ཁེ་ན་ཌའི་གཞུང་ཚབ་ཐོུང་གིས་གོ་སྒྲིག་འོག སུད་སི་གྲོང་ཁྱེར་ཇི་ནེ་ཝར་འཚོགས་བཞིན་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༣༡ འཚོགས་ཀྱི་ཡོད་པ་དང་བསྟུན། ད་ལན་གྱི་ཟུར་ཚོགས་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་གཙོས། yemen རྒྱལ་ཁབ་ཀྱིས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་Tawakkol མཆོག་དང་ཨི་རན་གྱི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ Shirin Ebadi མཆོག་བཅས་ལྷན་ཞུགས་ཀྱིས་འགྲོ་བ་མིའི་ཐོབ་ཐང་གི་བརྗོད་གཞིའི་ཐོག་གསུང་བཤད་གནང་གི་འདུག ད་ལན་གྱི་ཟུར་ཚོགས་དེའི་ཐོག་ལ་ཁུལ་དེའི་གཞུང་ཚབ་དང་ཕྱི་འབྲེལ་ལས་དོན་མི་སྣ། དེ་བཞིན་འགྲོ་བ་མིའི་ཐོབ་ཐང་ཐོག་ལ་ཕྱག་ལས་གནང་མཁན་དང་སློབ་ཕྲུག་བཅས་མཉམ་ཞུགས་གནང་གི་ཡོད་འདུག ཤེས་རྟོགས་བྱུང་བར་གཞིགས་ན། ༸གོང་ས་མཆོག་ཕྱི་ཚེས་ ༡༠ ཉིན་ཨ་རི་ནས་ཕེབས་ཐོན་གྱིས་སུད་སིར་ཞབས་སོར་བདེ་བར་འཁོད་ཀྱི་འདུག་པ་དང་། ཁུལ་དེའི་ནང་ཉིན་གཅིག་རིང་གི་མཛད་འཆར་ཁག་ལེགས་གྲུབ་ཟིན་རྗེས་ཕྱི་ཚེས་ ༡༢ ཉིན་རྒྱ་གར་ལ་ཚུར་ཕེབས་ཐོན་མཛད་ཀྱི་འདུག

༸གོང་ས་མཆོག་གིས་མེ་ཌི་སོན་རི་དྭགས་སྐྱེད་མོས་ཚལ་གྱི་ཆོས་ཚོགས་དེ་ནང་པའི་སློབ་གཉེར་བསྟི་གནས་ཤིག་ཏུ་གྱུར་ཐབས་གནང་གལ་ཡིན་པ་བཀའ་སྩལ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མི་ནེ་སོ་ཊ་ Minnesota མངའ་སྡེའི་ Mayo སྨན་ཁང་དུ་༸སྐུའི་འཕྲོད་བཞེས་ལེགས་གྲུན་ཟིན་རྗེས། ཁ་ཉིན་ཟླ་ ༣ ཚེས་ ༥ ཉིན་གྱི་སྔ་དྲོ་ཚོུད་ ༩།༣༠ ཙམ་ལ་ཨ་རིའི་ Wisconsin མངའ་སྡེའི་རྒྱལ་ས་ Madison དུ་རི་དྭགས་སྐྱེད་མོས་ཚལ་གྱི་༸རྒྱལ་བའི་ཕོ་བྲང་དུ་ཞབས་སོར་འཁོད་བསྟུན། བོད་རིགས་གཙོས་དད་ལྡན་མི་གྲངས་ ༣༠༠ ལྷག་གིས་ཕྱག་ཏུ་དྭངས་གཙང་མཇལ་དར་གཙོས་བདུག་སྤོས་བསྣམས་ཤིང། བཀྲིས་ཞོལ་པ་འཁྲབ་སྟོན་དང་གྲོ་སོ་ཕྱེ་མར་ཆང་ཕུད་བཅས་འདེགས་འབུལ་གྱིས་ཕེབས་བསུ་གཟབ་རྒྱས་ཞུས་པ་དང་། སྐབས་དེར་༸གང་ཉིད་མཆོག་གིས་ཐུགས་རྒྱུད་ཡོད་པའི་གྲོགས་པོ་རྙིང་པ་ཁག་ཅིག་མཇལ་བཅར་ཕེབས་པར་ཕྱག་དབང་སྩལ་ཡོད་པ་རེད། མེ་ཌི་སོན་རི་དྭགས་སྐྱེད་མོས་ཚལ་གྱི་ནང་པའི་ཆོས་ཚོགས་ཀྱིས་གོ་སྒྲོག་འོག་ཆོས་ཚོགས་ཀྱི་འདུ་ཁང་དུ་སྐུ་མགྲོན་གཙོ་བོ་ Madison རྫོང་དཔོན་སྐུ་ཞབས་  Paul Soglin  མཆོག་དང་ཁོང་གི་ནང་མི་ལྷན་རྒྱས་དབུས་ཕྱི་རྒྱལ་ཡུལ་གྲུ་ཁག་ནས་སྨན་པ་དང་ཚན་རིག་པ་གྲགས་ཅན་སོགས་ལྷན་འཛོམས་ཐོག་༸གང་ཉིད་མཆོག་གིས་ཆོས་ཚོགས་དེ་ནང་པའི་སློབ་གཉེར་གྱི་བསྟི་གནས་ཤིག་ཏུ་གྱུར་ཐབས་གནང་དགོས་གལ་ཡིན་པ་བཀའ་སྩལ་འདུག ༸གོང་ས་མཆོག་གིས་སྐབས་དེར་བཀའ་སློབ་སྩལ་དོན་ལ། སྤྱིར་སྟོན་པ་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ནས་ད་ཆ་ལོ་ངོ་སྟོང་ཕྲག་ཕྱིན་ཟིན་ཀྱང་། དུས་ད་ལྟའང་སངས་རྒྱས་དེའི་བསྟན་པ་དེ་མུ་མཐད་གནས་ཡོད་པ་ལྟར། རི་དྭགས་སྐྱེད་མོས་ཚལ་གྱི་ནང་པའི་ཆོས་ཚོགས་འདིའི་མགོན་བདག་དགེ་བཤེས་ལྷུན་གྲུབ་བཟོད་པ་རིན་པོ་ཆེ་དགོངས་པ་རྫོགས་ཟིན་ནའང་། རིན་པོ་ཆེ་མཆོག་གི་ཤུལ་ལུས་དགེ་ཕྲུག་ཚོས་དམ་པ་ཁོང་གི་རླབས་ཆེན་གྱི་མཛད་རྗེས་ཁག་ལས་དམིགས་དཔེ་བླངས་སྟེ།  ཆོས་ཚོགས་དེ་བཞིན་ནང་པའི་བཀའ་འགྱུར་དང་བསྟན་འགྱུར་དག་ལ་བླ་མའི་གང་བཤད་ཙམ་དུ་མ་བཞག་པར། རང་ཉིད་ཀྱི་ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱིས་བརྟག་ཞིང་དཔྱད་ནས་ནང་པའི་གཞུང་ཆེན་དག་ལ་བསླབ་པ་སློབ་གཉེར་ཚུལ་བཞིན་གནང་ནས་སློབ་གཉེར་གྱི་བསྟི་གནས་ངོ་བོར་གྱུར་ཐབས་གནང་དགོས་གལ་ཡིན་པ་བཀའ་སྩལ་འདུག རྩ་བའི་༸གོང་ས་མཆོག་གིས་ཟླ་འདིའི་ཕྱི་ཚེས་ ༧ ཉིན་གྱི་སྔ་དྲོར་མངའ་སྡེའི་རྒྱལ་ས་མེ་ཌི་སོན་དུ་རྟེན་གཞི་བྱས་པའི་ཁུལ་དེའི་ Masonic Center ཞེས་པའི་བསྟི་གནས་ཁང་དུ་ས་གནས་བོད་རིགས་རྣམས་ཀྱིས་ཇི་ལྟར་གསོལ་འདེབས་ཞུས་དོན་བཞིན།  དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་སྩལ་གནང་མཛད་རྒྱུ་དང་། དེ་རྗེས་ཚེས་ ༩ ཉིན་ཁུལ་དེར་རྟེན་གཞི་བྱས་པའི་ Wisconsin གཙུག་ལག་སློབ་གཉེར་ཁང་དུ་མི་སྒེར་དང་སྤྱི་ཚོགས། དེ་བཞིན་འཛམ་གླིང་ཀུན་ལ་ལུས་སེམས་བདེ་ཐང་བསྒྲུབ་ཚུལ་ཞེས་པའི་བརྗོད་གཞིའི་ཐོག་མཁས་པའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་རྒྱུ་རེད་འདུག

༸གོང་ས་མཆོག་༸སྐུའི་འཕྲོད་བཞེས་ལེགས་གྲུབ་ཀྱིས་བཀའ་སྩལ་གནང་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མི་ནེ་སོ་ཊ་ Minnesota མངའ་སྡེའི་ Mayo སྨན་ཁང་དུ་༸སྐུའི་འཕྲོད་བཞེས་ལེགས་གྲུན་ཟིན་རྗེས། ཨ་རིའི་ Madison གྲོང་ཁྱེར་དུ་ཆིབས་སྒྱུར་བསྐྱངས་འདུག ཁ་སང་ཟླ་ ༣ ཚེས་ ༤ ཉིན་གྱི་སྔ་དྲོ་ཆུ་ཚོད་༦.༣༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་མཱ་ཡོ་སྨན་ཁང་ནས་ཕེབས་ཐོན་མཛད་སྐབས། མི་ནེ་སོ་ཊའི་བོད་རིགས་སྤྱི་མཐུན་ཚོགས་པའི་རྒྱུན་ལས་དང་དྭངས་བླང་བོད་མི་ཁག་ཅིག་ཕེབས་སྐྱེལ་དུ་ཆེད་བཅར་ཞུས་ཡོད་སྟབས། ༸གང་ཉིད་མཆོག་གིས་སྐབས་དེར་བཀའ་སློབ་སྩལ་དོན་ལ། ངོས་རང་ལ་སྨན་བཅོས་ལས་སླ་པོ་ཞེ་དྲག་བྱུང་ལ། ངོས་རང་ཟླ་བ་གཅིག་ལྷག་རིང་ལ་ངལ་གསོ་རང་རེད། དེའི་རིང་ལ་སྐྱིད་པོ་ཞེ་དྲག་བྱུང་ཞེས་བཀའ་སྩལ་གནང་པ་དང་འབྲེལ། དེ་བཞིན་བོད་མི་ས་ཡ་དྲུག་གི་དད་པ་དམ་ཚིག་གཡོ་བ་མེད་པ་དང་མི་རིགས་ཀྱི་ངོ་བོ་མ་བརླག་པར་ལྷག་བསམ་དང་སེམས་ཤུགས་ཆེན་པོས་བོད་སྤྱིའི་རྩ་དོན་སླད་ཕྱག་ལས་གནང་པར་ཡི་རང་བསྔགས་བརྗོད་གནང་འདུག དེ་བཞིན་མགོན་པོ་མཆོག་གིས་ཇི་སྲིད་བོད་ཀྱི་ཆོས་དང་རིག་གཞུང་ལ་འཛམ་གླིང་འདིའི་ཐོག་ནས་དོ་སྣང་ཇི་ཙམ་ཡོད་པ་དེ་སྲིད་དུ་བོད་མི་རིགས་ལ་ཆེ་མཐོང་སླེབས་ངེས་རེད་ཡིན་སྟབས། བོད་མི་ཚོས་ཀྱང་རང་མི་རིགས་ཀྱི་གཅེས་ནོར་ནང་པའི་ཆོས་ལ་དམིགས་བསལ་གྱི་དོ་སྣང་གནང་སྟེ་བསླབ་པ་སློབ་གཉེར་གནང་དགོས་གལ་ཡིན་པ་བཅས་བཀའ་སློབ་ལམ་སྟོན་བཀྲིན་ཆེ་བ་སྩལ་འདུག རྩ་བའི་༸གོང་ས་མཆོག་ཁ་སང་མཱ་ཡོ་སྨན་ཁང་ནས་ཕྱིེར་ཕེབས་ཐོན་གྱིས་དེ་རིང་ཟླ་ ༣ ཚེས་ ༥ ཉིན་ཨ་རིའི་ Madison གྲོང་ཁྱེར་དུ་ཞབས་སོར་འཁོད་ཀྱི་འདུག་པ་དང་།  ཁུལ་དེར་ཉིན་གྲངས་བཞིའི་རིང་བཞུགས་བཞག་ཁྲོད་གཙོ་བོ་ཟླ་འདིའི་ཚེས་ ༨ ཉིན་བོད་རིགས་སྤྱི་མཐུན་ཚོགས་པས་གོ་སྒྲིག་འོག་ས་གནས་བོད་མི་གཙོས་མང་ཚོགས་ཚོར་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་དང་། དེ་རྗེས་ཚེས་ ༩ ཉིན་ཁུལ་དེར་རྟེན་གཞི་བྱས་པའི་ Wisconsin གཙུག་ལག་སློབ་གཉེར་ཁང་དུ་བཟང་སྤྱོད་གོང་མཐོར་དང་འབྲེལ་བའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་རྒྱུ་རེད་འདུག

༸གོང་ས་མཆོག་གིས་མ་ཡོ་སྨན་ཁང་གི་ལས་བྱེད་རྣམ་པར་སེམས་རྒྱུད་ལ་བྱམས་སྙིང་རྗེ་ལྡན་པ་གནང་དགོས་གལ་ཡིན་པ་བཀའ་སྩལ་བ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མི་ནེ་སོ་ཊ་ Minnesota མངའ་སྡེའི་ Mayo སྨན་ཁང་གི་སྨན་པ་གཙོས་པའི་ལས་བྱེད་ཁག་ཅིག་ལ་སེམས་རྒྱུད་ལ་བྱམས་སྙིང་རྗེ་ལྡན་པ་ཞིག་གནང་དགོས་གལ་ཡིན་པ་བཀའ་སློབ་བཀྲིན་བསྩལ་ཡོད་པ་རེད། དེ་ཡང་༸གོང་ས་མཆོག་ཟླ་བ་སྔོན་མའི་ཚེས་ ༢༠ ནས་ཨ་རིའི་ Mayo སྨན་ཁང་དུ་༸སྐུའི་འཕྲོད་བཞེས་ཀྱི་སྨན་བཅོས་བརྟག་དཔྱད་གནང་བཞིན་ཡོད་པའི་དུས་སྐབས་དང་བསྟུན། ཁ་སང་ཟླ་ ༢ ཚེས་ ༢༩ ཉིན་ཨ་རིའི་མི་ནེ་སོ་ཊ་ Minnesota མངའ་སྡེའི་ Mayo སྨན་ཁང་གི་འགན་འཛིན་ John Noseworthy ལགས་ཀྱིས་གཙོས་པའི་ལས་བྱེད་ཁག་ཅིག་དང། དེ་བཞིན་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༥༠༠ ལྷག་ལ་འཕྲོད་བསྟེན་དང་བྱམས་སྙིང་རྗེའི་ཐོག་ལ་བླང་དོར་གྱི་ལམ་སྟོན་བཀའ་སློབ་བཀྲིན་ཆེ་བ་སྩལ་གནང་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་བདེ་སྡུག་ལ་ལྟ་སྐྱོང་གནང་མཁན་སྨན་པ་དང་སྨན་ཞབས་རྣམ་པའི་སེམས་རྒྱུད་ལ་བྱམས་སྙིང་རྗེ་ལྡན་པ་དགོས་པ་ནི་ཆེས་ཤིན་ཏུ་ནས་གལ་འགངས་ཆེ་བ་ཡིན་པ་བཀའ་སྩལ་དང་འབྲེལ། གཙོ་བོ་མིའི་མི་ཚེ་ནང་ཉོན་མོངས་པའི་སེམས་འཚོར་ཁོང་ཁྲོ་དང་མ་རིག་པའི་བསམ་བློ་དེ་དག་ངེས་པར་དུ་དོར་དགོས་གལ་ཡིན་པ་བཀའ་སྩལ་གནང་པ་མ་ཟད། ལྷག་དོན་ཆེད་དུ་དམིགས་པའི་སྨན་ཁང་གི་སྨན་པ་གཙོས་པའི་ལས་བྱེད་རྣམ་པར་རང་གི་ལས་ཀའི་ངོ་བོ་ཆ་ནས་འགྲོ་བ་ཀུན་ལ་སྨན་པའི་སེམས་རྒྱུད་ལ་བྱམས་སྙིང་རྗེ་ལྡན་པ་ཞིག་གནང་རྒྱུ་གལ་ཆེན་པོ་རེད་ཅེས་བཀའ་སྩལ་འདུག དེ་བཞིན་མགོན་པོ་༸གང་ཉིད་མཆོག་གིས་མིའི་མི་ཚེ་ནང་འཆི་བ་ལས་གཡོལ་ཐབས་མེད་ཀྱང་། འཆི་ལ་ཉེ་བའི་མིའི་བསམ་བློ་གཏོང་ཕྱོགས་དེ་ཞི་བདེ་དང་བག་ཕེབས་ལྡན་པ་ཞིག་བྱུང་ཚེ་སྐྱེ་བ་ཕྱི་མར་ཕན་ངེས་ཡིན་པ་བཀའ་སྩལ་གནང་པ་དང་ཆབས་ཅིག སྨན་པ་དང་སྨན་ཞབས་པ་ཚོས་ནད་པ་ཀུན་ལ་རིགས་རུས་དང་ཡུལ་ལུང་སོགས་ཁྱད་མེད་པར་རང་གི་ཆེས་གཅེས་པའི་གཅེན་པོ་དང་གཅེན་མོའི་འདུ་ཤེས་འཛིན་ཏེ། རྣམ་པ་ཀུན་ཏུ་སེམས་པ་བཟང་པོ་དང་བྱམས་སྙིང་རྗེ་ལྡན་པ་ཞིག་གནང་རྒྱུ་གལ་ཆེ་ཡིན་པ་བཀའ་སྩལ་འདུག གཞན་ཡང་སྐབས་དེར་ལས་རིམ་གཙོ་སྐྱོང་བ་གསར་འགོད་པ་ལྕམ་སྐུ་ Cathy Wurzer ལགས་ཀྱིས་རང་ཉིད་ཀྱི་ཡབ་དམ་པ་སྐུ་ཚེ་མ་ཟིན་པའི་ལོ་རྒྱུས་དང་། ལོ་ངོ་གཉིས་ཀྱི་སྔོན་ལ་ Minneapolis Convention Center དུ་ཚོགས་པའི་ནོ་སྦེལ་ཞི་བདེའི་ལྷན་ཚོགས་ཐོག་༸གོང་ས་མཆོག་དང་ཆེས་ཐོག་མའི་མཇལ་འཕྲད་བྱུང་སྐོར་སོགས་གསུངས་པ་དང་སྦྲགས།  སྐབས་དེར་མགོན་པོ་༸གང་ཉིད་མཆོག་ནས་ཀྱང་ཁོ་མོའི་ཡབ་དམ་པ་དེ་ཉིད་སྐུ་ཚེ་མ་ཟིན་པར་ཐུགས་གསོ་སྩལ་བ་མ་ཟད། བྱམས་པ་དང་སྙིང་རྗེ་གཉིས་པོ་ནི་འགྲོ་བ་མིའི་རྒྱུད་ལ་ལྷན་སྐྱེས་སུ་ཡོད་སྟབས།  ང་ཚོ་ཚང་མས་དེར་ཉམས་ལེན་གནང་ཐུབ་རྒྱུ་ཡོད་པ་ཞིག་རེད་ཅེས་བཀའ་སྩལ་ཟབ་མོ་གནང་མྱོང་ཡོད་པ་གསུངས་ཡོད། ད་དུང་གསར་འགོད་པ་ལྕམ་སྐུ་ Cathy Wurzer ལགས་ཀྱིས་༸གོང་ས་མཆོག་ལ་དེང་དུས་ཀྱི་འཕྲུལ་རིགས་ཡར་རྒྱས་ཤུགས་ཆེ་འགྲོ་བཞིན་པའི་ཐད་ལ་དགོངས་ཚུལ་ཇི་ཡོད་སྐོར་བཀའ་འདྲི་ཞུས་པར། ༸གོང་ས་མཆོག་གིས་ཡར་རྒྱས་སུ་འགྲོ་བཞིན་པའི་འཕྲུལ་རིགས་རྣམས་མིའི་མི་ཚེ་ནང་ཕན་ཐོགས་ཆེན་པོ་ཡོད་ཀྱང་། དེ་དག་བེད་སྤྱོད་ལོག་པར་གཏང་ན་ཕན་ལས་གནོད་ཆེ་བ་ཆགས་སྲིད་པས་རྣམ་ཀུན་ནས་བེད་སྤྱོད་ལེགས་པོ་གཏང་དགོས་གལ་ཡིན་པ་དང།  ལྷག་དོན་འགྲོ་བ་མི་གཅིག་གྱུར་ཡིན་པའི་འདུ་ཤེས་ཀྱི་བསམ་བློ་གོང་མཐོར་གཏང་གལ་ཡིན་པ་བཀའ་སྩལ་འདུག ༸གོང་ས་མཆོག་གིས་ད་བར་ཟླ་བ་གཅིག་ལྷག་རིང་ Mayo སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་ཆེད་ཆིབས་སྒྱུར་བསྐྱངས་པ་ཞིག་ཆགས་ཡོད་སྟབས། སྨན་ཁང་གི་འགན་འཛིན་ John Noseworthy ལགས་ཀྱིས་གཙོས་པའི་ལས་བྱེད་ཚོས་སེམས་དགའ་པོའི་ཐོག་སྨན་བཅོས་སོགས་གང་ལེགས་གནང་བར་ཐུགས་རྗེ་ཆེ་ཞུས་དང་འབྲེལ། John Noseworthy ལགས་དང་ལས་རིམ་གཙོ་སྐྱོང་གནང་མཁན་གསར་འགོད་པ་ལྕམ་སྐུ་ Cathy Wurzer ལགས་གཉིས་ལ་ལེགས་གསོའོ་མཇལ་དར་རེ་གནང་འདུག རྩ་བའི་༸གོང་ས་མཆོག་ད་ལྟའི་ཆར་ཨ་རིའི་ Mayo སྨན་ཁང་དུ་༸སྐུའི་འཕྲོད་བཞེས་ཀྱི་སྨན་བཅོས་བརྟག་དཔྱད་དང་སྐུ་ངལ་གསོལ་བཞུགས་གནང་བཞིན་ཡོད་པ་དང་། དཔལ་ལྡན་དགའ་ལྡན་ཕོ་བྲང་གི་དྲ་གནས་ཐོག་གསལ་བར་གཞིགས་ན། ༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་ ༨ ཉིན་ཨ་རིའི་ Madison གྲོང་ཁྱེར་ནང་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་དང་། ཕྱི་ཚེས་ ༨ ཉིན་ཁུལ་དེར་རྟེན་གཞི་བྱས་པའི་ Wisconsin གཙུག་ལག་སློབ་གྲྭ་ཆེན་མོར་བཟང་སྤྱོད་གོང་མཐོ་དང་འབྲེལ་བའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཀྱི་ཡོད་པ་རེད་འདུག

༸གོང་ས་མཆོག་གིས་ Mayo སྨན་ཁང་གི་ལས་བྱེད་རྣམ་པར་བཀའ་སློབ་བསྩལ་གནང་གི་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞེ་ཉིན་རེས་གཟའ་ཟླ་བ་སྟེ་ཚེས་ ༢༩ ཉིན་ཨ་རིའི་མི་ནེ་སོ་ཊ་ Minnesota མངའ་སྡེའི་ Mayo སྨན་ཁང་གི་སྨན་པ་གཙོས་པའི་ལས་བྱེད་ཁག་ཅིག་ལ་དམིགས་བསལ་མཇལ་ཁ་དང་བཀའ་སློབ་བཀྲིན་བསྩལ་གྱི་ཡོད་པ་རེད་འདུག       རྩ་བའི་༸གོང་ས་མཆོག་ད་ལན་ Mayo སྨན་ཁང་དུ་རྐང་༸སྐུའི་འཕྲོད་བཞེས་བརྟག་དཔྱད་ཆེད་ཆིབས་སྒྱུར་བསྐྱངས་པ་ཞིག་ཆགས་ཡོད་སྟབས། དཔལ་ལྡན་དགའ་ལྡན་ཕོ་བྲང་ཡིག་གི་གཞུང་འབྲེལ་དྲ་གནས་ཐོག་གསལ་བར་༸གོང་ས་མཆོག་གིས་མང་ཚོགས་ལ་བཀའ་སློབ་ཀྱི་མཛད་འཆར་དེ་ཟླ་བ་འདིའི་ཚེས་ ༢༡ དང་། ཕྱི་ཟླ་ ༣ ཚེས་ ༨ དང་ ༩ བཅས་མ་གཏོགས་མི་འདུག དེ་རིང་ Post Bulletin བརྒྱུད་ལམ་ཐོག་གནས་ཚུལ་ཐོན་པར་གཞིགས་ན། Mayo སྨན་ཁང་གི་འགན་འཛིན་ John Noseworthy ལགས་ཀྱིས་༸གོང་ས་མཆོག་ནས་རེས་གཟའ་ཟླ་བའི་ཉིན་ Rochester གྲོང་ཁྱེར་ Saint Mary’s སྨན་ཁང་གི་ཡི་ཤུའི་ལྷ་ཁང་ཞིག་ཏུ་ Mayo སྨན་ཁང་གི་སྨན་པ་གཙོས་པའི་ལས་བྱེད་ཁག་ཅིག་ལ་འཕྲོད་བསྟེན་དང་སྙིང་རྗེའི་འབྲེལ་བའི་སྐོར་བླང་དོར་ལམ་སྟོན་བཀྲིན་བསྩལ་རྒྱུའི་མཛད་འཆར་ཐུགས་གཏན་འཁེལ་ཡོད་པ་གསུངས་འདུག མཛད་འཆར་དེ་ནི་ཆེད་མངགས་ལས་བྱེད་པ་ཁག་ཅིག་གི་ཆེད་དུ་ཆེད་དམིགས་གནང་པ་ཞིག་ཡིན་ཀྱང། མང་ཚོགས་རྣམས་ལ་དྲ་རྒྱའི་ཐོག་ནས་ཐད་སྲིང་གནང་གི་འདུག གཞི་རྩའི་༸གོང་ས་མཆོག་ཟླ་བ་སྔོན་མའི་ཚེས་ ༢༠ ནས་ཨ་རིའི་ Mayo སྨན་ཁང་དུ་༸སྐུའི་འཕྲོད་བཞེས་ཀྱི་སྨན་བཅོས་བརྟག་དཔྱད་གནང་བཞིན་ཡོད་པའི་དུས་སྐབས་ན་གཞིས་བྱེས་བོད་མི་རྣམ་པ་གཙོས་མགོན་པོ་༸གང་ཉིད་མཆོག་ལ་དགའ་མོས་ཞུ་མཁན་མང་ཚོགས་ནས་སེམས་འཚབ་ཆེན་བྱུང་ཡོད་སྟབས། མགོན་པོ་མཆོག་གིས་བོད་ཀྱི་གནམ་ལོ་གསར་པའི་འཚམས་འདྲིའི་གསུང་འཕྲིན་དང་། ལྷག་དོན་ཟླ་བ་འདིའི་ཚེས་ ༢༡ ཉིན་༸གང་ཉིད་མཆོག་གིས་བློ་སྦྱོང་ཚིག་བརྒྱད་མའི་ཆོས་འབྲེལ་བཀྲིན་བསྐྱངས་མཚམས་མགོན་པོ་མཆོག་སྐུ་ཁམས་སེལ་ཐང་ཡིན་པས་མང་ཚོགས་བློ་བདེ་པོ་གནང་དགོས་སྐོར་བཀའ་སློབ་བསྩལ་ཡོད་པ་རེད། ༸གོང་ས་མཆོག་ཨ་རིའི་ Mayo སྨན་ཁང་དུ་བཞུགས་ཞག་མཛད་པའི་ཁྲོད། Rochester གྲོང་ཁྱེར་སྤྱི་ཁྱབ་པ་སྐུ་ཞབས་ Ardell Brede མཆོག་གིས་དབུས་པའི་གནད་ཡོད་མི་སྣ་ཁག་ཅིག་ནས་མཇལ་བཅར་ཞུས་འདུག་པ་དང། ལྷག་པར་དུ་ཨ་རིའི་གྲོས་ཚོགས་འཐུས་མི་སྐུ་ཞབས་ Tim Walz ལགས་ནས་༸གོང་ས་མཆོག་མཇལ་བཅར་ཞུས་ཏེ་ཉེ་སྔོན་ཕྱི་ཟླ་ ༡༡ ནང་ཁོང་དང་ཨ་རིའི་གཞུང་གི་སྐུ་ཚབ་ཁག་ཅིག་བོད་ནང་བསྐྱོད་པའི་སྐོར་ལ་བཀའ་མོལ་ཞུས་འདུག སྐུ་ཞབས་ Tim Walz ལགས་ནས་བརྒྱུད་ལམ་ཁག་ཏུ་གསུངས་པར། ༸གོང་ས་མཆོག་གི་མཇལ་ཁ་ཞུ་རྒྱུའི་དུས་ཚོད་འདི་ནི་ཧ་ཅང་གི་རྩ་ཆེན་པོ་ཞིག་དང་། གཞན་ལ་སེམས་པ་བཟང་པོ་བྱ་རྒྱུའི་བསླབ་བྱ་སེམས་སྐུལ་ཐེབས་ཡག་ཅིག་བྱུང་གི་འདུག་ཅེས་གསུངས་འདུག    

༸གོང་ས་མཆོག་གིས་སེམས་ཀྱི་ས་ཁྲའི་ཐོག་ནས་ཉོན་མོངས་ལ་གཉེན་པོ་བསྟེན་སྟངས་ཤེས་ཐུབ་རྒྱུ་ཡོད་པ་ལམ་སྟོན།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟ་ཨ་རིའི་མི་ནེ་སོ་ཊ་ Minnesota མངའ་སྡེའི་གྲོང་ཁྱེར་ Rochester ནང་དུ་༸སྐུའི་འཕྲོད་བཞེས་བརྟག་དཔྱད་གནང་ནས་སྐུ་ངལ་གསོ་བཞུགས་མཛད་བཞིན་ཡོད་པ་ལྟར།  ཁ་ཉིན་ཚེས་ ༢༢ ཉིན་ སེམས་ཁམས་ཚན་རིག་པ་སྐུ་ཞབས་ Paul   Ekman ལགས་ཀྱི་བོུ་ལྕམ་སྐུ་  Dr Eve Ekman ལགས་ཀྱིས་ཁོ་མོའི་ཡབ་ཀྱིས་དབུ་འཛུགས་གནང་བའི་ Atlas of Emotion འམ་སེམས་ཀྱི་ས་ཁྲའི་ལས་འཆར་སྐོར་སྙན་གསེང་ཞུས་འདུག ལྷན་རྒྱས་མཇལ་མོལ་དེའི་སྐབས་ལྕམ་ Eve Ekman ལགས་ནས་༸གོང་ས་མཆོག་ལ་སེམས་ཀྱི་ས་ཁྲའི་ལས་འཆར་དེའི་ངོ་བཤུ་རག་ཟིན་ཁག་སྤྱན་འབུལ་ཞུས་པ་དང་ཆབས་ཅིག གཞི་རྐང་ལས་འཆར་དེའི་དམིགས་ཡུལ་གཙོ་བོ་ནི་གཞན་ཕན་བསྒྲུབ་རྒྱུ་དང་། ཚན་རིག་གི་ཤེས་བྱ་གོང་མཐོར་སྤེལ་ཆེད། དེ་བཞིན་མཇལ་མོལ་དེའི་སྐབས་ལྕམ་སྐུ་ Eve Ekman ལགས་ཀྱིས་ཁོང་ཁྲོ་དང་འབྲེལ་བའི་སེམས་སྡུག་དང་སྐྱོ་སྣང་བཅས་ནང་ཕན་ཚུན་འབྲེལ་ཡོད་སྐོར་དགོངས་ཚུལ་གསུངས་འདུག ༸གོང་ས་མཆོག་གིས་ཁོང་ཁྲོའི་སྐོར་དང་འབྲེལ་བའི་ཐོག་ལ་ལམ་སྟོན་བསྩལ་བའི་ཁྲོད། ཁོང་ཁྲོའི་རང་བཞིན་ནི་མི་དགེ་བའི་བློ་ཞིག་ཆགས་ཡོད་ཅིང་། འོན་ཀྱང་བློ་དེ་ལ་ལྡོག་ཕྱོགས་ཀྱི་གཉེན་པོ་བསྟེན་ཚེ་བཟང་ཕྱོགས་ཀྱི་ནུས་པ་ཞིག་ཏུ་གྱུར་ཐབས་ཡོད་པ་དེ་ལྟར་ཡང། གྲང་མོས་ཚ་རེག་སེལ་བ་ལྟར་ཡིན་པ་དང་། ཁོང་ཁྲོ་དང་ཞེ་སྡང་སོགས་ལ་གཉེན་པོ་བསྟེན་ནས་ཉོམ་མོངས་ཀྱི་བློ་དེ་དག་རྩ་བ་ནས་འགོག་ཐབས་གནང་དགོས་པ་ལས། ཉོམ་མོངས་པའི་བློ་དག་ལ་གཡོལ་ཐབས་བྱས་པས་ཕན་ཡོན་དེ་ཙམ་མེད་པ་རེད།  དེ་ལྟར་ན་བློ་ཡི་རྣམ་གཞག་དེ་དག་ཤེས་པར་སེམས་ཀྱི་ས་ཁྲའི་སྐོར་ཤེས་དགོས་གལ་ཡིན་པ་བཀའ་བསྩལ་འདུག ལྷག་པར་དུ་༸གོང་ས་མཆོག་གིས་སེམས་ཁམས་ཚན་རིག་པ་སྐུ་ཞབས་ Paul  Ekman ལགས་ཀྱིས་དབུ་འཛུགས་གནང་བའི་ Atlas of emotion འམ་སེམས་ཀྱི་ས་ཁྲ་ཞེས་པའི་ལས་འཆར་གྲ་སྒྲིག་འགྲོ་བཞིན་པའི་དུས་མཚམས་འདིར་ཤེས་ལྡན་མི་སྣ་གཞན་གྱིས་བློ་བསྐྱེད་ཁ་སྣོན་གནང་ཐུབ་ཚེ་དགེ་མཚན་དང་གྲུབ་འབྲས་ཆེ་བ་ཐོན་རྒྱུའི་ལམ་སྟོན་བཅས་བསྩལ་འདུག

Latest news