བོད་མིའི་སྒྲིག་འཛུགས།

ཁ་སང་དབུས་འོས་བསྡུ་ལས་ཁང་གིས་དྲྭ་ལམ་ཐད་གཏོང་བརྒྱུད་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ཆེན་མོའི་གྲུབ་འབྲས་གཞུང་འབྲེལ་ཐོག་གསལ་བསྒྲགས་གནང་བ་དང་སྦྲགས། སྤྱི་འཐུས་ཚོགས་ཟུར་སྤེན་པ་ཚེ་རིང་ལགས་སུ་ཁྱོོན་འོས་གྲངས་ ༣༤༣༢༤ དང་དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་སུ་ཁྱོན་འོས་གྲངས་ ༢༨༩༠༧ བཅས་ཐོབ་སྟེ་སྤེན་པ་ཚེ་རིང་ལགས་སུ་སྲིད་སྐྱོང་གི་འོས་བསྡུའི་རྒྱལ་ཁ་ཐོབ་ཡོད་པ་གསལ་བསྒྲགས་གནང་ཡོད་པ་རེད་། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁ་སང་ཕྱི་དྲོ་རང་ཉིད་ཀྱི་ངོ་དེབ་བརྒྱུད་འོས་བསྡུ་གྲུབ་འབྲས་དང་འབྲེལ་བའི་གཏམ་བཤད་གནང་བའི་ནང་དུ་ཁོང་ལ་འོས་བསྡུའི་རྒྱལ་ཁ་ཐོབ་པར་ཚོར་བ་ཅི་བྱུང་སྐོར་དང་འབྲེལ། འོས་བསྡུའི་འགྲན་རྩོད་ནང་ཞུགས་སྐབས་གཅིག་ལ་རྒྱལ་ཁ་དང་གཅིག་ལ་ཕམ་ཉེས་བྱུང་གི་ཡོད་པ་དེ་རང་བཞིན་ཆོས་ཉིད་ཡིན་པས་རྒྱལ་ཁབ་ཐོབ་པར་དམིགས་བསལ་དགའ་བ་སྒོམ་དགོས་དོན་གང་ཡང་མེད་པ་དང་དེ་ལས་ང་ཚོས་སེམས་ཤུགས་མ་ཆགས་པར་མུ་མཐུད་ནས་མདུན་བསྐྱོད་ཞུས་ཏེ་མི་རིང་བར་བོད་རྒྱའི་དཀའ་རྙོག་སེལ་བའི་ཉིན་མོ་ཞིག་ཤར་ཚེ་དེ་ཉིན་གཞིས་བྱེས་བོད་མི་ཡོངས་ནས་དོན་དངོས་ཀྱི་དགའ་བ་སྒོམ་དགོས་པ་དང་ཉིན་མོ་དེའི་ཆེད་དུ་ཚང་མས་མཉམ་རུབ་ཀྱིས་ནུས་པ་སྤུངས་རོགས་ཞེས་འབོད་སྐུལ་བསྐྱར་ནན་ཞུས་འདུག ཁ་སང་དབུས་འོས་བསྡུ་ལས་ཁང་གིས་གསལ་བསྒྲགས་དེ་གནང་མ་ཐག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་སེང་གེ་མཆོག་ནས་བོད་ཀྱི་བརྙན་འཕྲིན་བརྒྱུད་བཀའ་ཤག་གི་ཚབ་ཞུས་ཏེ་བདམས་ཐོན་སྲིད་སྐྱོང་དང་སྤྱི་འཐུས་རྣམ་པར་དགའ་བསུའི་འཚམས་འདྲི་གནང་ཞིང་ས་ག་ཟླ་བའི་ཚས་ ༡༥ ཉིན་དེ་དམ་འབུལ་ཉིན་མོར་གཏན་འཁེལ་གནང་བའི་ཐག་གཅོད་གསལ་བསྒྲགས་གནང་བ་མ་ཟད། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་ཞལ་པར་ཕུལ་ཏེ་བཀའ་ཤག་ནས་འཚམས་འདྲི་དང་ཁོང་གི་ལས་ཡུན་སྐབས་ཕྱག་ལས་ལེགས་འགྲུབ་ཡོང་བའི་སྨོན་འདུན་ཡང་ཞུས་འདུགབདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁ་སང་ཕྱི་དྲོ་ཕྱག་ཚོད་ ༨ ཐོག་རང་ཉིད་ཀྱི་ངོ་དེབ་བརྒྱུད་མང་ཚོགས་ལ་གནང་པའི་གསུང་བཤད་དེའི་སྐབས། ཁོང་གིས་ད་ལན་མི་མང་གིས་ཁོང་ལ་འོས་ཤོག་ཕངས་ནས་འགན་སྐུར་བའི་ཁས་ལེན་ཡོངས་རྫོགས་ལྷག་བསམ་རྣམ་དག་དང་འཇིགས་ཞུམ་ཆགས་སྡང་མེད་པར་སྤྱི་སྙོམ་དྲང་བདེན་ཐོག་ནས་ལག་བསྟར་གྱིས་གོམ་པ་མདུན་སྤོ་བྱ་རྒྱུའི་དམ་བཅའ་བརྟན་པོ་ཡོད་པ་གསུངས་འདུགདེ་བཞིན་སྤེན་པ་ཚེ་རིང་ལགས་ཀྱིས་ལྟ་བ་ལངས་ཕྱོགས་དང་ཆོལ་ཁའི་དཀའ་ངལ་ཁག་ལ་གདོང་ལེན་གནང་ཕྱོགས་དང་འབྲེལ་ང་ཚོས་བོད་མདོ་དབུས་ཁམས་གསུམ་གྱི་ལོ་རྒྱུས་ཙམ་མིན་པར་ཁྱིམ་མཚེས་རྒྱལ་ཁབ་ཁག་དང་བྲེ་བྲག་རྒྱ་ནག་གི་འབྲེལ་བའི་སྐོར་ཞིབ་ཚགས་མཁྱེན་པ་གནང་རྒྱུ་དེ་གལ་ཆེ་ཡིན་པས་དེའི་ཐོག་འབད་བརྩོན་གནང་རྒྱུ་དང་ལྷག་དོན་སྤྱི་ཚོགས་ནང་རྙོག་དྲ་རིགས་ཡོང་བཞིན་པ་དེ་དངོས་ཡོད་གནས་སྟངས་མ་རྟོགས་པའི་དབང་གིས་ཡིན་སྟབས་འབྱུང་འགྱུར་བཀའ་ཤག་ངོས་ནས་བོད་དང་བཙན་བྱོལ་སྤྱི་ཚོགས་ནང་གི་དངོས་ཡོད་གནས་སྟངས་ཐོག་ཞིབ་འཇུག་ཚད་ལྡན་གྱིས་དེ་དག་མང་ཚོགས་མདུན་ལ་མཁོ་སྤྲོད་གནང་རྒྱུ་དེ་ལས་འགན་གཙོ་གྲས་སུ་ངོས་འཛིན་གྱི་ཡོད་པར་གསུངས་འདུག གཏམ་བཤད་དེའི་ནང་ཁོང་གིས་ད་དུང་སྲིད་སྐྱོང་གི་དམ་འབུལ་རྗེས་ཀྱིས་ལས་དོན་དང་དེ་བཞིན་བཀའ་ཤག་གསར་བའི་གྲ་སྒྲིག་ཡིན་པའི་འགྲེལ་བརྗོད་གནང་འདུག ལར་ནས་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁོང་གིས་སྲིད་སྐྱོང་གི་ལས་ཡུན་ཁྲོད་ཕྱག་ལས་གང་གནང་བ་དེ་དག་ལྷག་བསམ་རྣམ་དག་གི་སྒོ་ནས་གནང་རྒྱུའི་ཁས་ལེན་དང་འབྲེལ་མང་ཚོགས་ལ་རྒྱབ་སྐྱོར་གྱི་འབོད་སྐུལ་གནང་བ་མ་ཟད་བོད་ནང་གི་བོད་མི་ཚོར་བརྡ་ལན་དེ་འདྲ་ཞིག་གནང་འདུགདེ་བཞིན་སྲིད་སྐྱོང་གི་དངོས་གཞིའི་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་ཁོང་སྒེར་གྱི་ངོ་དེབ་ཐོག་འོས་བསྡུའི་གྲུབ་འབྲས་དང་འབྲེལ། མཇུག་བསྡོམས་གསལ་བསྒྲགས་ཤིག་སྤེལ་བའི་ནང་ལ། ༢༠༢༡ ལོའི་དངོས་གཞིའི་སྲིད་སྐྱོང་འོས་མིར་ཚུད་ཐུབ་པ་བྱུང་བ་ནི་མི་ཚེ་འདིའི་ནང་གི་གཟི་བརྗིད་ཆེ་ཤོས་ཀྱི་བྱ་བཞག་ཅིག་ལ་ངོས་འཛིན་ཞུ་བཞིན་ཡོད་པ་དང་། འོས་བསྡུའི་ཐོག་མཐའ་བར་གསུམ་གྱི་ལས་དོན་ཁྲོད་རྒྱབ་བསྐྱོར་གནང་མཁན་སྤྱི་ལ་ཐུགས་རྗེ་ཆེ་ཞུས་དང་སྦྲགས། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ལ་འཚམས་འདྲི་བཀྲ་ཤིས་བདེ་ལེགས་དང་། ད་ལྟའི་དཀའ་རྙོག་དང་འགྱུར་འགྲོས་ཆེ་བའི་དུས་སྐབས་འདིར་ལས་དོན་རྣམས་ལེགས་འགྲུབ་ཡོང་བ་དང་སྐུ་གཟུགས་བདེ་ཐང་ཡོང་བའི་འཚམས་འདྲི་ཞུས་གནང་བ་མ་ཟད་བོད་རིགས་སྤུན་ཟླ་ཡོངས་ལ་འོས་བསྡུའི་གྲུབ་འབྲས་ཅི་བྱུང་ལ་ངོས་ལེན་གནང་དགོས་པའི་རེ་སྐུལ་དང་སྲིད་སྐྱོང་གསར་བར་མཐུན་འགྱུར་རོགས་རམ་ཞུ་དགོས་བའི་སྐུལ་མ་གནང་ཡོད་པ་རེད། གཞི་རྩའི་ཐེངས་འདིའི་བཙན་བྱོལ་བོད་མིའི་འོས་བསྡུ་ཆེན་མོའི་ནང་འོས་འཕེན་པའི་མིང་གཞུང་དེབ་འགོད་གནང་མཁན་བོད་མི་གྲངས་ ༨༣,༠༨༠ བྱུང་བའི་བྱུང་བའི་ཁོངས་ནས་སྲིད་སྐྱོང་གི་དངོས་གཞིའི་འོས་ཤོག་དངོས་སུ་འཕེན་མཁན་གྱི་བོད་མི་གྲངས་ ༦༣,༩༩༡ བྱུང་ཡོད་པ་བཅས་ཆ་སྙོམས་འོས་འཕེན་པའི་རྒྱ་ཆ་ ༧༧་༠༢ ཆགས་ཀྱི་ཡོད་པ་དེ་ནི། ད་བར་བཙན་བྱོལ་བོད་མིའི་འོས་བསྡུའི་ལས་རིམ་ནང་འོས་འཕེན་པ་ཆ་ཤས་བཞེས་མཁན་གྱི་གྲངས་འབོར་མཐོ་ཤོས་དེ་ཆགས་ཡོད་པ་རེད།

དེ་རིང་ཕྱི་ཟླ་ ༥ ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་༡༠ ཐོག་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་གཙོས་པའི་འགན་འཛིན་ལས་འཕར་སྤྱི་ཟུར་བསོད་ནམས་རྒྱལ་མཚན་ལགས་དང་དགེ་བཤེས་མ་བདེ་ལེགས་དབང་མོ་ལགས། དེ་བཞིན་གསར་ཁང་ཁག་གི་གསར་འགོད་པ་བཅས་ལྷན་བཞུགས་ཐོག་དྲ་ལམ་བརྒྱུད་ཏེ་གསར་འགོད་ལྷན་ཚོགས་ཤིག་སྐོང་ཚོགས་དང་སྦྲགས། ཉེ་ཆར་མཇུག་སྒྲིལ་ཟིན་པའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ཆེན་མོའི་གྲུབ་འབྲས་ གསལ་བསྒྲགས་གནང་ཡོད།དེ་ཡང་དབུས་འོས་བསྡུ་ལས་ཁང་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༦༩ དང་། དོན་ཚན་ ༥༢ པའི་དགོངས་དོན་གཞིར་བཟུང་གསལ་བསྒྲགས་གནང་བར་བདམས་ཐོན་བྱུང་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། སྐབས་ ༡༧ པའི་བོད་མི་མང་སྤྱི་འཐུས་རྣམསཀྱི་གྲུབ་འབྲས་ལ་གཞིགས་ན། ཐེངས་འདིའི་དངོས་གཞིའི་འོས་བསྡུ་ཆེན་མོའི་ནང་འོས་འཕེན་པའི་མིང་གཞུང་དེབ་འགོད་གནང་མཁན་བོད་མི་གྲངས་ ༨༣,༠༨༠ བྱུང་བའི་ཁོངས་ནས་སྲིད་སྐྱོང་གི་དངོས་གཞིའི་འོས་ཤོག་དངོས་སུ་འཕེན་མཁན་གྱི་བོད་མི་གྲངས་ ༦༣,༩༩༡ བྱུང་ཡོད་པ་དང་། དེ་དག་ཁྲོད་ནས་སྲིད་སྐྱོང་གི་དངོས་གཞིའི་འོས་མི་ཚོགས་ཟུར་སྤེན་པ་ཚེ་རིང་ལགས་ལ་ཁྱོན་འོས་གྲངས་ ༣༤༣༢༤ དང་། སྤྱི་ཚོགས་ཡར་རྒྱས་ཐེབས་རྩའི་འགན་འཛིན་ཟུར་པ་དབུ་དཀར་ཚང་སྐལ་བཟང་རྡོ་རྗེ་ལགས་ལ་ཁྱོན་འོས་གྲངས་༢༨༩༠༧ བཅས་ཐོབ་སྟེ། ཚོགས་ཟུར་སྤེན་པ་ཚེ་རིང་ལགས་ལ་རྒྱལ་ཁ་ཐོབ་པ་དང་སྦྲགས་བོད་མིའི་སྒྲིག་འཛུགས་ཀྱི་སྲིད་སྐྱོང་དུ་འདེམས་ཐོན་བྱུང་འདུག འབུས་འོས་བསྡུ་ལས་ཁང་གིས་ད་རེས་གསལ་བསྒྲགས་གནང་པ་ལྟར་བྱས་ན། ད་རེས་སྲིད་སྐྱོང་གི་དངོས་གཞིའི་འོས་བསྡུའི་ནང་འོས་བསྡུའི་ནང་ཆ་སྙོམས་འོས་འཕེན་པའི་རྒྱ་ཆ་ ༧༧་༠༢ ཆགས་ཀྱི་ཡོད་པ་དེ་ནི། ད་བར་བཙན་བྱོལ་བོད་མིའི་འོས་བསྡུའི་ལས་རིམ་ནང་འོས་འཕེན་པ་ཆ་ཤས་བཞེས་མཁན་གྱི་གྲངས་འབོར་མཐོ་ཤོས་དེ་ཆགས་ཡོད་པ་གསུངས་ཡོད། དེ་བཞིན་སྐབས་ ༡༧ པའི་བོད་མི་མང་སྤྱི་འཐུས་ཀྱི་གྲུབ་འབྲས་གསལ་བསྒྲགས་གནང་བར་གཞིགས་ན། འདེམས་ཐོན་སྤྱི་འཐུས་ ༤༥ ཁོངས་ནས་སྤྱི་འཐུས་གསར་པ་ ༡༨ བྱུང་འདུག་པ་དང་། དེ་དག་ཁྲོད་ནས་དབུས་གཙང་ཆོལ་ཁའི་ཁོངས་སུ་སྤྱི་འཐུས་གསར་པ་བཞི་དང་། མདོ་སྟོད་ཆོལ་ཁའི་ཁོངས་སུ་སྤྱི་འཐུས་གསར་པ་ལྔ། མདོ་སྨད་ཆོལ་ཁའི་ཁོངས་སུ་སྤྱི་འཐུས་གསར་པ་བཞི། དེ་བཞིན་གཡུང་དྲུང་བོན་ཁྱབ་ཁོངས་ནས་སྤྱི་འཐུས་གསར་པ་གཅིག་དང་། ལྷོ་བྱང་ཨ་རི་ཁུལ་ནས་སྤྱི་འཐུས་གསར་པ་གཉིས། ཡོ་རོབ་དང་ལྷོ་ཨ་ཕི་རི་ཀ་ཁུལ་ནས་སྤྱི་འཐུས་གསར་པ་གཅིག རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་། ཨོ་སེ་ཀྲེ་ལེ་ཤི་ཡ་ཁུལ་ནས་སྤྱི་གཐུས་གསར་པ་གཅིག་བཅས་ཆགས་ཀྱི་འདུག་པ་དང་། ཁྱོན་འདེམས་ཐོན་སྤྱི་འཐུས་ ༤༥ ཁོངས་ནས་ ༩ བེུད་ཆགས་ཀྱི་འདུག ད་རེས་འདེམས་ཐོན་བྱུང་བའི་སྐབས་ ༡༧ པའི་བོད་མི་མང་སྤྱི་འཐུས་རྣམ་པ་དབུས་འོས་བསྡུ་ལས་ཁང་ནས་གཏན་འབེབས་གནང་པའི་ཚེ་གྲངས་ལྟར་བྱས་ན། ཟླ་བ་འདིའི་ཕྱི་ཚེས་ ༣༠ རེས་གཟའ་ཉི་མའི་ཉིན་སྤྱི་འཐུས་ཀྱི་ལས་འཁུར་དམ་འབུལ་ཞུ་རྒྱུ་དང་། དེ་བཞིན་སྲིད་སྐྱོང་ལས་ཐོག་མཆོག་ནས་དེ་སྔ་བརྒྱུད་ལམ་ཁག་ཏུ་གསུངས་པ་ལྟར་བྱས་ན། ཟླ་བ་འདིའི་ཕྱི་ཚེས་ ༢༦ རེས་གཟའ་ལྷག་པའི་ཉིན་སྲིད་སྐྱོང་གསར་པའི་དམ་འབུལ་གྱི་ཚེས་གྲངས་འོས་འཚམས་ཤིག་ཡོད་སྐོར་གསུངས་ཡོད་ཀྱང་། ད་ལྟའི་ཆ་ལ་ཉེ་དུས་སྐབས་༡༦ པའི་བོད་མི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༡༠ ཐོག་ཆེ་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམས་པ་འཕོ་འགྱུར་བཏང་་བའི་གནས་སྟངས་ལས་འཕྲོས་ཏེ། དམ་འབུལ་ཞུ་ཡུལ་གྱི་ཁྲིམས་ཞིབ་པ་མེད་པ་སོགས་དང་འབྲེལ་ད་ལྟའི་ཆ་ལ་སྲིད་སྐྱོང་དང་ཚོགས་གཙོ་སྦྲེལ་པོའི་དམ་འབུལ་གྱི་གནས་སྟངས་ཇི་ཆགས་གསལ་ཁ་མེད་པ་རེད། གནད་དོན་དེའི་ཐོག་དེ་རིང་གསར་འགོད་ལྷན་ཚོགས་སྐབས་སུ་གསར་འགོད་པ་རྣམས་ནས་འོས་བསྡུའི་སྤྱི་ཁྱབ་འགན་འཛིན་མཆོག་ལ་བཀའ་འདྲི་ཁག་ཅིག་ཞུས་སོང་བ་དང་། སྐབས་དེར་སྤྱི་ཁྱབ་འགན་འཛིན་མཆོག་ནས་ནས། དམ་འབུལ་གྱི་གནས་སྟངས་ཐོག་འོས་བསྡུ་ལས་ཁང་ནས་ཐད་ཀར་ཞུ་ཐུབ་ཡག་གང་ཡང་མེད་པ་སོགས་གསུངས་ཡོད།   དེ་རིང་དབུས་འོས་བསྡུ་ལས་ཁང་ནས་༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ཆེན་མོའི་གྲུབ་འབྲས་ གསལ་བསྒྲགས་གནང་ཟིན་མ་ཐག འདི་ག་རླུང་འཕྲིན་ཁང་ནས་འདེམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་འབྲེལ་བ་ཞུ་སྐབས། ཐེངས་འདིའི་སྔོན་འགྲོ་དང་དངོས་གཞི་གཉིས་ཀྱི་འོས་བསྡུའི་ལས་རིམ་ཁག་གླེང་སློང་གང་ཡང་མེད་པར་གནང་ཐུབ་པ་དེ་ནི་མང་གཙོའི་རྒྱལ་ཁ་ཞིག་ཡིན་པ་དང་། ད་ཆ་འོས་བསྡུའི་ལས་རིམ་ཁག་མཇུག་སྒྲིལ་ཟིན་ཡོད་སྟབས་འོས་བསྡུ་དང་འབྲེལ་བའི་སྤྱི་ཚོགས་ཀྱི་གླེང་སློང་རྣམས་མཚམས་འཇོག་གནང་རོགས་ཞེས་འབོད་སྐུལ་གནང་སོང་པ་མ་ཟད། དམ་འབུལ་ཟིན་པའི་ཉིན་མོ་ནས་བཟུང་སྟེ་མི་མང་གི་རེ་བ་ཡིད་ཆེས་གནང་པ་ཁག་ཆུད་ཟོས་སུ་མི་གཏོང་བར། བོད་རྒྱའི་དཀའ་རྙོག་གསལ་ཐབས་གཙོས་པའི་བོད་མིའི་བདེ་དོན་ལྟ་སྐྱོང་སོགས་ལས་དོན་མང་པོ་ཞིག་སྒྲུབ་དགོས་པ་རྣམས་ཐོག་མའི་དམ་བཅའ་གཞིར་བཟུང་ནུས་པ་གང་ཡོད་སྤུངས་རྒྱུའི་ཆོད་སེམས་བརྟན་པོ་ཡིན་ཞེས་གསུངས་བྱུང་།  དེ་བཞིན་སྲིད་སྐྱོང་གི་དངོས་གཞིའི་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་སུ་ཞལ་པར་བརྒྱུད་འབྲེལ་བྱས་ཀྱང་འབྲེལ་བ་མཐུད་ཐུབ་པ་བྱུང་མ་སོང་ཡང་། ཁོང་སྒེར་གྱི་ངོ་དེབ་ཐོག་འོས་བསྡུའི་གྲུབ་འབྲས་དང་འབྲེལ། མཇུག་བསྡོམས་གསལ་བསྒྲགས་ཤིག་སྤེལ་བའི་ནང་ལ། ༢༠༢༡ ལོའི་དངོས་གཞིའི་སྲིད་སྐྱོང་འོས་མིར་ཚུད་ཐུབ་པ་བྱུང་བ་ནི་མི་ཚེ་འདིའི་ནང་གི་གཟི་བརྗིད་ཆེ་ཤོས་ཀྱི་བྱ་བཞག་ཅིག་ལ་ངོས་འཛིན་ཞུ་བཞིན་ཡོད་པ་དང་། འོས་བསྡུའི་ཐོག་མཐའ་བར་གསུམ་གྱི་ལས་དོན་ཁྲོད་རྒྱབ་བསྐྱོར་གནང་མཁན་སྤྱི་ལ་ཐུགས་རྗེ་ཆེ་ཞུས་དང་སྦྲགས། འདེམས་ཐོན་སྲིད་སྐྱོང་སྤེན་པ་ཚེ་རིང་ལགས་ལ་འཚམས་འདྲི་བཀྲ་ཤིས་བདེ་ལེགས་དང་། ད་ལྟའི་དཀའ་རྙོག་དང་འགྱུར་འགྲོས་ཆེ་བའི་དུས་སྐབས་འདིར་ལས་དོན་རྣམས་ལེགས་འགྲུབ་ཡོང་བ་དང་སྐུ་གཟུགས་བདེ་ཐང་ཡོང་བའི་འཚམས་འདྲི་ཞུས་གནང་བ་མ་ཟད་བོད་རིགས་སྤུན་ཟླ་ཡོངས་ལ་འོས་བསྡུའི་གྲུབ་འབྲས་ཅི་བྱུང་ལ་ངོས་ལེན་གནང་དགོས་པའི་རེ་སྐུལ་དང་སྲིད་སྐྱོང་གསར་བར་མཐུན་འགྱུར་རོགས་རམ་ཞུ་དགོས་བའི་སྐུལ་མ་གནང་འདུག གཞི་རྩའི་༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་དེ་བཞིན་སྔར་ལོའི་ཕྱི་ཟླ་ ༨ ཚེས་ ༥ ནས་དངོས་སུ་འགོ་འཛུགས་ཞུས་ཏེ། འདི་ལོའི་ཕྱི་ཟླ་ ༡ ཚེས་ ༣ དང་། ཕྱི་ཟླ་ ༤ ཚེས་ ༡༡ སོ་སོར་བོད་མི་གནས་ཡུལ་རྒྱལ་སྤྱིའི་རྒྱལ་ཁབ་ ༢༦ གྱི་ནང་ལ་སྔོན་འགྲོ་དང་དངོས་གཞིའི་འོས་བསྡུ་ཆེན་མོའི་ལས་རིམ་གནང་ཡོད་པ་དང་། དེ་རིང་དངོས་གཞིའི་འོས་བསྡུའི་གྲུབ་འབྲེས་གསལ་བསྒྲགས་དང་སྦྲགས་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ནས་འབྲེལ་ཡོད་ལས་བྱེད་དང་། འོས་བསྡུའི་ལས་རིམ་ཐོག་རྒྱབ་སྐྱོར་གནང་མཁན་གྱི་ཚོགས་སྒེར་ཁག དེ་བཞིན་མང་ཚོགས་བཅས་ནས་འོས་བསྡུའི་ལས་རིམ་ནང་ཆ་ཤས་བླངས་པར་ཐུགས་རྗེ་ཆེ་ཞུས་གནང་ཡོད།

གཟའ་འཁོར་འདིའི་ནང་རྒྱ་གར་དང་བལ་ཡུལ་ནང་གི་བཙན་བྱོལ་བོད་མིའི་འདུས་སྡོད་ཁྲོད་ཏོག་དབྱིབས་བོད་མི་བཞི་བརྒྱ་ལྷག་ཙམ་ལ་གཉན་རིམས་ཕོག་ཡོད་པ་ལས་བོད་མི་ཉེར་གཉིས་འདས་གྲོངས་སུ་གྱུར་ཡོད་འདུག ཐེངས་འདིར་བོད་མི་འདས་གྲོངས་སོང་བའི་གྲངས་ཐོ་དེ་ནི་གཉན་རིམས་ཁྱབ་བརྡལ་ཁྲོད་བདུན་ཕྲག་གཅིག་གི་ནང་དུ་བོད་མིའི་ཚེ་སྲོག་ཤོར་བའི་གྲངས་ཐོ་མཐོ་ཤོས་དེ་ཆགས་ཀྱི་ཡོད་པ་རེད། ཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༥༩ སྤེལ་སྐབས་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འགྲེལ་བརྗོད་གནང་བར་གཞིགས་ན། ད་བར་བཙན་བྱོལ་བོད་མིའི་འདུས་སྡོད་ས་ཁུལ་ཁག་ཏུ་ཁྱོན་བོད་མི་ ༣༣༧༧ ལ་ཏོག་དབྱིབས་གཉན་རིམས་ཕོག་ཡོད་ཀྱང་། དེའི་ཁོངས་ནས་ ༢༡༡༩ དྲག་སྐྱེས་བྱུང་ཡོད་པ་དང། ད་ལྟའི་ཆར་ནད་མནར་བཞིན་པ་བོད་མི་སྡོམས་ ༡༡༧༥ ཡོད་པ་ལས། འདས་བའི་བདུན་ཕྲག་གཅིག་ཁོ་ནའི་ནང་རྒྱ་གར་དང་བལ་ཡུལ་གཉིས་སུ་བོད་མི་གཉན་རིམས་ཕོག་མཁན ༤༤༣ བྱུང་བ་ལས་བོད་མི་༢༢ ཚེ་སྲོག་ཤོར་ཡོད་པར་འགྲེལ་བརྗོད་གནང་སོང་། སྤྱིར་འདི་ལོའི་ཟླ་བ་དང་པོའི་ཚེས་ ༡༦ ནས་བཟུང་རྒྱ་གར་གྱི་ནང་དུ་ཏོག་དབྱིབས་གཉན་རིམས་ཀྱི་འགོག་ཁབ་བསྐྱོན་འགོ་ཚུགས་ཡོད་པ་ལྟར། ད་ལྟའི་བར་དུ་རྒྱ་གར་དང་བལ་ཡུལ་ཁུལ་གྱི་བོད་མི་གྲངས་ ༡༦༢༢༢ ལྷག་ལ་འགོག་ཁབ་བསྐྱོན་གྲུབ་ཡོད་པ་རེད་འདུག ཁ་སང་གི་གསར་འགོད་ལྷན་ཚོགས་སྐབས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ད་ལྟའི་ཆར་རྒྱ་གར་གྱི་ནང་དུ་འགོག་ཁབ་འདང་ངེས་ཤིག་མེད་པའི་གནས་སྟངས་འགྲེལ་བརྗོད་དང་འབྲེལ། བོད་མི་མང་ཚོགས་ཀྱིས་འགོག་ཁབ་རག་མིན་ལ་མ་ལྟོས་བར་རིམས་ནད་ཁྱབ་བརྡལ་ལ་སྣང་ཆུང་མི་གཏོང་བར་སྔོན་འགོག་གནང་གལ་ཡིན་པ་དང་། སྒོས་སུ་བོད་མི་སུ་རུང་ཞིག་ལ་ནད་རྟགས་ཐོན་མཚམས་སུ་ངེས་བར་དུ་བརྟག་དཔྱད་གནང་རྒྱུ་དེ་གལ་ཆེ་ཤོས་ཤིག་ཡིན་པའི་འབོད་སྐུལ་གནང་སོང་།  སྐབས་དེར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་ལས་རོགས་བསྟན་འཛིན་ཀུན་བཟང་ལགས་ཀྱིས་གཉན་རིམ་ཁྲོད་ཐོག་མཐའ་བར་གསུམ་ནས་དྭངས་སླངས་ཞབས་ཞུ་དང་དགེ་རྩའི་ཕྱག་རོགས་གནང་མཁན་ཚོགས་སྒེར་ཡོངས་ལ་ཡིད་རང་བསྔགས་བརྗོད་གནང་བ་མ་ཟད། སྨན་པ་ཚེ་རིང་མཚམས་གཅོད་ལགས་ཀྱིས་ནད་པ་རྣམས་ཀྱི་ཟས་སྤྱོད་དང་འབྲེལ་བོད་མི་མང་བོ་ཞིག་ལ་རིམས་ནད་ཕོག་པའི་སྐབས་སུ་ཟས་ཀྱི་ཡི་ག་ཞན་སྟབས་མངར་ཟས་རིགས་མང་དུ་སྤྱད་པ་ལ་བརྟེན་ནས་གཉན་སྲིན་གྱི་ནད་གཞི་ལངས་ཀྱི་ཡོད་དུས་རང་བཞིན་གྱི་ལུས་སྟོབས་ཇེ་ཞན་དུ་འགྱུར་ཉེན་ཡོད་སྟབས་རིམས་ནད་ཕོག་པ་རྣམས་ཀྱིས་འབྲེལ་ཡོད་ཀྱི་སྨན་པར་འབྲེལ་གཏུགས་ཀྱིས་ཟས་སྤྱོད་བརྟེན་ཕྱོགས་ལ་གཟབ་དགོས་བའི་སྐུལ་མ་གནང་སོང་། གཞི་རྩའི་སྔར་ལོ་ནས་བཟུང་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་རིམས་ནད་དེ་རྒྱལ་སྤྱིའི་སྤྱི་ཚོགས་གང་སར་ཁྱབ་བརྡལ་ཕྱིན་པའི་ཁྲོད། ད་བར་ལོ་གཅིག་དང་ཕྱེད་ཀ་ལྷག་གི་རིང་ལ་རྒྱལ་སྤྱིའི་མི་འབོར་ས་ཡ་ ༡༥༩ ལྷག་ལ་རིམས་ནད་འགོས་ཁྱབ་བྱུང་ཡོད་པ་དང་། རྒྱ་གར་གྱི་ནང་དུ་ཡང་མི་འབོར་ས་ཡ་ ༢༣ ལྷག་བྱུང་སྟེ་རྒྱལ་སྤྱིའི་ཁྲོད་རིམས་ནད་འགོས་ཁྱབ་མང་ཤོས་ཀྱི་རྒྱལ་ཁབ་གཉིས་བ་དེ་ཆགས་ཡོད་པ་ལྟར། ད་ལྟའི་ཆར་རིམས་ནད་ཀྱི་རླབས་རྒྱུན་གཉིས་བ་དེ་ཆེས་ཆེར་ཁྱབ་བརྡལ་འགྲོ་བཞིན་པ་རེད་འདུག

ད་ལྟ་རྒྱ་གར་དུ་རྒྱ་ནག་གི་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་འོག་དཀའ་སྡུག་ཚད་མེད་མྱོང་བཞིན་པ་དང་བསྟུན། ཉེ་ཆར་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་ངོས་ནས་བཙན་བྱོལ་བོད་མི་ཡོངས་ནས་ཏོག་དབྱིབས་ནད་རླབས་གཉིས་པར་གདོང་ལེན་ལ་རོགས་སྐྱོང་ཆེད་ PM-cares ཞེས་རྒྱ་གར་གྱི་སྲིད་བློན་མཆོག་གི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཞལ་འདེབས་གང་ཐུབ་འབུལ་དགོས་པའི་སྐུལ་མ་གནང་བ་བཞིན། ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་བཙན་བྱོལ་བོད་མི་དང་རྒྱ་བལ་འབྲུག་གསུམ། དེ་བཞིན་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་རྣམས་ཀྱིས་ཉིན་གཅིག་གི་གླ་ཕོགས་བཅས་ཁྱོན་སྡོམ་སྒོར་ས་ཡ་ ༥༠ ཙམ་རོགས་དངུལ་གནང་གནང་འདུགདེ་ཡང་ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། གཞུང་འབྲེལ་བརྙན་འཕྲིན་བརྒྱུད་ལམ་ཐོག་གཏམ་བཤད་ཀྱི་བརྙན་ཐུང་ཞིག་འདོན་སྤེལ་གནང་བའི་ནང་དུ། བོད་མི་ཡོངས་ལ་ས་ག་ཟླ་བ་འགོ་བཙུགས་པར་འཚམས་འདྲི་དང་། ལྷག་པར་དུ་ཁ་སང་རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན། སྨན་ཞབས་པ་དང་འཕྲོད་བསྟེན་ལས་བྱེད་རྣམས་ལ་མཚམས་འདྲི་ཞུས་པ་དང་འབྲེལ། ཉེ་འཆར་བཀའ་ཤག་གི་འབོད་སྐུལ་ཞུས་པ་བཞིན། ཨ་རིའི་བོད་མི་མང་ཚོགས་རྣམས་ནས་ཨ་རིའི་སྐུ་ཚབ་དོན་ཁང་བརྒྱུད། རྒྱ་གར་སྲིད་བློན་གྱི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཧིན་སྒོར་ས་ཡ་ ༢༠ ཙམ་དང་སུད་སུ་བོད་མི་རྣམས་ནས་ས་ཡ་ ༡༠ ཙམ། དེ་བཞིན་ Brussels སྐུ་ཚབ་དོན་ཁང་བརྒྱུད་ཡུ་རོབ་ཁུལ་དུ་གནས་སྡོད་བོད་མི་རྣམས་ནས་ནས་འབུམ་ ༣༧ ཙམ། དེ་བཞིན་ཐེ་ཝན་སྐུ་ཚབ་དོན་ཁང་བརྒྱུད་ཧིན་སྒོར་འབུམ་ ༣༠ ཙམ། ཨོ་གླིང་དང་ New Zealand བོད་མི་རྣམས་ནས་འབུམ་ ༢༧ ཙམ་བཅས་ཁྱོན་ཕྱི་རྒྱལ་ཡུལ་གྲུ་ཁག་ཏུ་བཅའ་བཞུགས་བོད་མི་རྣམས་ནས་ས་ཡ་ ༤༠ ཙམ་དང་རྒྱ་བལ་འབྲུག་གསུམ་ནང་དུ་གནས་སྡོད་བོད་མི་རྣམས་ནས་འབུམ་ ༨༠ ཙམ་དང་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་པ་རྣམས་ནས་ཉིན་གཅིག་གི་གླ་ཕོགས་དངུལ་འབོར་ཞལ་འདེབས་བཅས་ཁྱོན་ས་ཡ་ ༥༠ ཙམ་རྒྱ་གར་གཞུང་དམངས་ལ་ཞལ་འདེབས་གནང་ཡོད་པ་མངོན་གསལ་གནང་འདུག སྲིད་སྐྱོང་མཆོག་གིས་དེ་དང་ཆབས་ཅིག རྒྱ་གར་གཞུང་དམངས་གཉིས་ནས་བོད་མི་རྣམས་ཀྱི་རང་ས་ཤོར་ནས་ཉག་ཕྲག་པའི་དུས་སྐབས་སུ་ཕྱོགས་ཡོངས་ནས་གཟིགས་སྐྱོང་གང་ལེགས་གནང་བར་ཧ་ལས་པའི་དཀའ་འདྲིན་ཆེན་པོ་ཡིན་པ་ལྟར། ད་ལན་བོད་མི་རྣམས་ནས་ཐུགས་རྗེ་ལེགས་འབུལ་གྱི་རྣམ་འགྱུར་སྟོན་ཐུབ་པ་དེས་རྒྱ་གར་གཞུང་དམངས་གཉིས་ལ་ཡང་བོད་མི་རྣམས་བཀའ་དྲིན་བསམ་ཤེས་ཐུབ་མཁན་ཡིན་པ་དང་། གདུང་སེམས་མཉམ་སྐྱེད་ཀྱི་བརྡ་ལན་ཤུགས་ཆེན་པོ་ཞིག་ཆགས་རྒྱུ་ཡིན་པ་གསུངས་འདུགརྩ་བའི་ད་ལན་ཙམ་མ་ཟད། སྔར་ལོ་རྒྱ་གར་ནང་དུ་རིམས་ནད་ཀྱི་གནས་སྟངས་ཐོག་མར་བྱུང་བའི་སྐབས་སུའང་བཙན་བྱོལ་བོད་མི་ཚོགས་སྒེར་ཡོངས་ནས་རྒྱ་གར་སྲིད་བློན་གྱི་རོགས་སྐྱོར་ཐེབས་རྩར་ཧིན་སྒོར་ས་ཡ་མང་པོ་ཞལ་འདེབས་གནང་ཡོད་པ་རེད། ད་ལྟ་རྒྱ་གར་ནང་དུ་ཏོག་དབྱིབས་ནད་རླབས་གཉིས་པའི་ཁྲོད་དཀའ་ངལ་ཆེ་ཤོས་གཅིག་ནི། ནད་པ་ཛ་དྲགས་ཧ་ཅང་མང་རུ་ཕྱིན་པའི་ཁྲོད། སྲོག་རླུང་གི་མཐུན་རྐྱེན་མ་འདང་བའི་དཀའ་ངལ་ཤུགས་ཆེན་པོ་འཕྲད་བཞིན་པ་དང་སྟུན། ཁ་སང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་མཚུར་ཕུ་བླ་བྲང་ཀྱི་ངོ་དེབ་དྲ་ལམ་བརྒྱུད་གནས་ཚུལ་སྤེལ་བར་གཞིགས་ན། ཉེ་ཆར་དཔལ་རྒྱལ་བ་ཀརྨ་པ་མཆོག་གི་ཀུན་སྐྱོང་དགེ་རྩ་ཚོགས་པ་ནས། རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཧེམ་ཀུཎ་ཊ་དགེ་རྩ་ཚོགས་པར་སྲོག་རླུང་གི་བླུག་སྣོད ༡༠༠ ཐམ་པ་ཞལ་འདེབས་གནང་ཡོད་པ་མ་ཟད། ལྡི་ལི་ས་གནས་འགོ་འཛིན་གྱི་སྣེ་ཁྲིད་པའི་ཏོག་དབྱིབས་སྔོན་འགོག་ལས་དོན་རུ་ཁག་ལ་ PPE Kit ༡༥༠ ལྷག་ཞལ་འདེབས་གནང་ཡོད་པ་རེད་འདུག དེ་བཞིན་ཉེ་ཆར་ཕྱི་ཟླ་ ༥ པའི་ནང་དུ་ཏོག་དབྱིབས་ཀྱི་གནས་སྟངས་ཛ་དྲག་ཁྲོད། ལྡི་ལི་ནང་དུ་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པ་དང་གཞོན་ནུ་ལྷན་ཚོགས་བཅས་ནས། ནད་ཡམས་ཀྱི་མནར་བའི་བོད་མི་རྣམས་ལ་སྨན་ཁང་འཚོལ་རྒྱུ་དང་སྨན་ཅོས་ཀྱི་མཐུན་རྐྱེན་སྦྱོར་རྒྱུ་སོགས་ཀྱི་ཞབས་ཞུ་སྒྲུབ་བཞིན་པའི་ཁྲོད། རྒྱ་གར་བ་དཀའ་ངལ་ཤུགས་ཆེར་འཕྲད་མཁན་ཁག་ཅིག་ལའང་སྲོག་རླུང་གི་ཕྱག་རོགས་དང་ནད་པ་མྱུར་སྐྱོབ་ཀྱི་རླང་འཁོར་གྱི་མཐུན་རྐྱེན་སོགས་ཀྱི་ཕྱག་རོགས་གང་ཐུབ་གནང་ཡོད་པ་རེད། དེ་བཞིན་བཙན་བྱོལ་བོད་མིའི་གཞུང་འབྲེལ་མ་ཡིན་པའི་ཚོགས་པ་དང་སྒེར་ཁག་ཅིག་ནས། གཉན་རིམས་ཀྱི་ཛ་དྲག་གནས་སྟངས་ཁྲོད།  འཚོ་བའི་ཡོངས་འབབ་མེད་མཁན་དང་དཀའ་འཕྲད་བཞིན་པའི་རྒྱ་གར་ཡུལ་མི་རྣམས་ལ་བཟའ་བཅའ་སོགས་ཀྱི་རོགས་སྐྱོར་གནང་བཞིན་པ་རེད། དེ་བཞིན་བལ་ཡུལ་ནང་དུའང་དགེ་འདུན་པ་བསོད་ནམས་དབང་ཆེན་ཞུ་བ་ཞིག་གིས། སྔར་ལོ་ནས་བཟུང་ད་བར་བལ་པོའི་མི་དབུལ་ཕོངས་རྣམས་ལ་བཟའ་བཅའ་དང་དངུལ། དེ་བཞིན་སྨན་བཅོས་དང་ད་ཕྲུག་ལྟ་སྐྱོང་སོགས་ཀྱི་ཞབས་ཞུ་སྒྲུབ་མུས་རེད། ཁ་སང་སྲིད་སྐྱོང་མཆོག་གིས་གསུངས་བཤད་བརྙན་པར་དེའི་ནང་ད་དུང་། ནད་ཡམས་དང་འབྲེལ་འཛིན་སྐྱོང་བཀའ་ཤག་གི་ངོས་ནས་སྔོན་ཁབ་རིན་མེད་རྒྱག་རྒྱུ་སོགས་ཀྱི་མཐུན་རྐྱེན་གང་ཐུབ་སྦྱོར་རྒྱུའི་ཆོད་སེམས་བརྟན་པོ་ཡོད་སྐོར་གསུངས་པ་དང་འབྲེལ། སྲིད་སྐྱོང་མཆོག་གི་སྣེ་ཁྲིད་པའི་བཀའ་ཤག་ལས་ཡུན་གཉིས་པ་དེ་གཙང་ལ་རན་པ་དང་བསྟུན། ད་བར་ནད་ཡམས་ལ་གདོང་ལེན་གཙོས་པའི་ལས་དོན་ཅི་རིགས་ནང་དུ་བོད་མིའི་སྒྲིག་འཛུགས་ཀྱི་དབུས་སའི་ལས་བྱེད་པ་ཚོས་སྐུ་ལས་ཧ་ཅང་ཆེན་པོ་སྐྱོན་གནང་བར་ཐུགས་རྗེ་ཆེ་ཞུས་དང་འབྲེལ།   དམའ་རིམ་ལས་བྱེད་པའི་གླ་ཕོགས་བརྒྱ་ཆ་ ༡༨ དང་ལས་བྱེད་མཐོ་རིམ་གྱི་ཕོགས་བརྒྱ་ཆ་ ༡༠ ཙམ་སྤར་ཐུབ་པ་བྱུང་ཡོད་པ་དང་། འཕྲོད་བསྟེན་ལས་བྱེད་ཁྲོད། སྨན་ཞབས་པའི་རིམ་པ་འདྲ་མིན་གསུམ་ལ་གླ་ཕོགས་བརྒྱ་ཆ་ ༡༠ དང་ ༡༥། ༢༠ དེ་བཞིན་འཕྲོད་བསྟེན་ལས་ཁུངས་ལས་བྱེད་པ་ཚོའི་གླ་ཕོགས་བརྒྱ་ཆ་ ༤༠ ཙམ་སྤར་ཐུབ་པ་བྱུང་ཡོད་སྐོར་གསུངས་སོང་། ལྷག་པར་དུ་སྨན་ཞབས་པ་ཚོར་ནད་པ་དང་ཐད་དཀར་འབྲེལ་བ་ཆགས་སྐབས་ཁོང་རྣམས་ལ་ནད་གཞི་འགོས་པའི་གནད་དོན་ཡང་བྱུང་བཞིན་ཡོད་པ་དང་། གཉན་རིམས་གྱི་ཛ་དྲག་གནས་སྟངས་འདི་མུ་མཐུད་གནས་རྒྱུ་ཡིན་སྟབས། ཁོང་རྣམས་ལ་ཐུགས་རྗེ་ལེགས་འབུལ་གྱི་ཚུལ་དུ་ཧིན་སྒོར་སྟོངས་ཕྲག་ ༥ རེ་ཐུགས་རྗེ་ལེགས་འབུལ་གྱི་ཚུལ་དུ་འབུལ་གཏན་ཁེལ་ཡོད་པ་མ་ཟད། སྨན་ཞབས་པར་མཐུན་རྐྱེན་གང་ཐུབ་མུ་མཐུད་སྦྱོར་རྒྱུ་ཡིན་པ་གསུངས་སོང་། དེ་བཞིན་ནང་སྲིད་ཀྱི་ལས་ཁུངས་ལས་བྱེད་པ་དང་ལྷག་པར་དུ་བསམ་བྷོ་ཊ་སློབ་གྲྭའི་ལས་བྱེད་དང་དགེ་རྒན་རྣམ་པའི་གླ་ཕོགས་ནང་དུ་རྒྱ་ཆ་ ༡༥ ཙམ་སྤར་ཆ་གནང་ཐུབ་པ་བྱུང་ཡོད་སྐོར་སོགས་གསུངས་པ་དང་འབྲེལ། ལས་བྱེད་པ་རྣམས་ནས་དེ་སྔ་སྐུ་ལས་སྐྱོན་པ་བཞིན་མུ་མཐུད་སྐུ་ལས་བསྐྱོན་དགོས་པའི་སྐུལ་མ་གནང་འདུག

དེང་སྐབས་རྒྱ་གར་ནང་དུ་རྒྱ་ནག་ཝུ་ཧན་གྲོང་ཁྱེར་ནས་འཆེད་པའི་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་འོག རིམས་ནད་ཕོག་མཁན་ཧ་ཅང་མང་པོ་ཆགས་པ་དང་། ནད་པ་རྣམས་ལ་སྨན་ཁང་ནང་ཉལ་ཁྲི་མི་རགས་པ། དེ་བཞིན་ནད་པར་ Oxygen འམ་སྲོག་རླུང་མི་འདང་བ་སོགས་ཀྱི་རྐྱེན་གྱིས་ཉིན་རེར་མི་སྟོང་ཕྲག་མང་པོ་འདས་གྲོངས་སུ་འགྱུར་བཞིན་པའི་ཆེས་ཛ་དྲག་གི་གནས་སྟངས་ཁྲོད། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་གཙོ་བྱས་པའི་འབྲེལ་ཡོད་རྣམས་གྱིས་ནུས་ཤུགས་གང་ཡོད་འདོན་བཞིན་པའི་ཐོག་ལ།    བོད་མི་སྒེར་དང་ཚོགས་པ་ཁག་ཅིག་ནས་ནད་ཡམས་ཀྱི་ཉེན་ཁར་མ་ལྟོས་པར། ནད་པར་བདག་སྐྱོང་གནང་རྒྱུ་དང་ཞལ་ལག་སྐྱེལ་རྒྱུ། དེ་བཞིན་ས་ཁོངས་བཙང་བཟོ་དང་ཟས་སྦྱིན་སོགས་ཀྱི་མཚོན་པའི་སྤྱི་ཚོགས་ཞབས་ཞུ་གང་ལེགས་སྒྲུབ་བཞིན་པ་རེད་འདུགདེའི་ཁྲོད་བཞུགས་སྒར་དུ་བཅའ་བཞུགས་སྤྱི་འཐུས་ཟླ་བ་ཚེ་རིང་ལགས་ཀྱིས། Tara Tibet Beads ཞེས་པའི་རང་གི་ཤེལ་འཕྲེང་བཟོ་ལས་ཁང་དུ་དུས་རྒྱུན་བེད་སྤྱོད་གཏོང་བཞིན་པའི་ Oxygen འམ་སྲོག་རླུང་རྣམས་རང་ཁྱིམ་དུ་ནད་མནར་འོག་ལུས་པའི་བོད་མི་དང་རྒྱ་གར་ཡུལ་མི་རྣམས་ལ་རིན་མེད་ཐོག་གནང་བཞིན་འདུག   འདི་གའི་གསར་འགོད་པས་ཟླ་བ་ཚེ་རིང་ལགས་སུ་དེ་རིང་ཞལ་པར་བརྒྱུད་བཀའ་འདྲི་ཞུས་སྐབས། ཁོང་གིས་ད་ལྟའི་ཆར་བཞུགས་སྒར་རྡ་རམ་ས་ལའི་གཡས་གཡོན་ནས་སྲོག་རླུང་དགོས་ཟེར་མཁན་ཁ་ཤས་བྱུང་ཟིན་པ་རྣམས་ལ་མཐུན་རྐྱེན་སྦྱོར་བཞིན་ཡོད་པ་དང་། དེའི་རྗེས་རིམས་ནད་ཀྱི་ཛ་དྲག་གནས་སྟངས་མ་ཡལ་བར་དུ་གང་ཐུབ་མཐུན་རྐྱེན་དེ་མུ་མཐུད་གནང་རྒྱུ་ཡིན་པ་གསུངས་སོང་།དེ་བཞིན་དུས་རྒྱུན་ནས་མང་ཚོགས་དབུལ་ཕོངས་རྣམས་ལ་རོགས་སྐྱོར་གནང་མཁན་དང་ལྷག་པར་དུ་སྔར་ལོ་ཏོག་དབྱིབས་གཉན་རིམས་ཁྱབ་བརྡལ་ཁྲོད་རྒྱ་གར་ནང་དུ་ཟླ་བ་མང་པོར་སྤྱི་ཚོགས་ཀྱི་བཀག་རྒྱ་བསྡམས་པའི་གནས་སྟངས་ཁྲོད། ཡོངས་འབབ་མེད་པ་དང་དཔལ་འབྱོར་གྱི་གནས་སྟངས་ཞན་པའི་བོད་མི་མང་དག་ཅིག་ལ་བཟའ་བཅའ་དང་དངུལ་སོགས་ཀྱི་རོགས་སྐྱོར་གནང་མཁན་བླ་མ་བློ་བཟང་ལགས་ནས་ཀྱང་། བཞུགས་སྒར་ཁུལ་གྱི་ཏོག་དབྱིབས་གཉན་རིམས་ནད་གསོ་ཁང་དང་བོད་ཁྱིམ་སློབ་གྲྭ་སོགས་ལ་རིམས་ནད་སྔོན་འགོག་དང་འབྲེལ་བའི་དགོས་ངེས་ཀྱི་བཅའ་དངོས་ཕུལ་བ་དང་། དཀའ་ངལ་འོག་ལྷུང་བའི་གང་ཟག་སྒེར་ཁག་ལ་ཡང་རོགས་སྐྱོར་སོགས་ཕྱི་ལ་དངོས་སུ་ཐོན་ནས་སྤྱི་ཚོགས་ཞབས་ཞུ་སྒྲུབ་བཞིན་པ་རེད་འདུག དེ་བཞིན་བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྡ་སའི་གྲོང་སྡེ་ལས་ཁུངས་དང་མཉམ་འབྲེལ་ཐོག ཁ་སང་རྡ་རམ་ས་ལའི་བོད་མི་གནས་སྡོད་ས་ཁུལ་ཁག་ཏུ་དུག་སེལ་གནང་བ་དང་ཁ་རས་བགོ་འགྲེམས་གནང་བ་སོགས་ཀྱི་ཞབས་ཞུ་བསྒྲུབས་ཡོད་པ་དང་། དེ་བཞིན་བོད་རང་བཙན་སློབ་ཕྲུག་ཚོགས་པའི་ངོས་ནས་བོད་པའི་ཁྱིམ་ཚང་རྣམས་ལ་རིམས་ནད་འགོག་ཐབས་དང་འབྲེལ་བའི་དགོས་ངེས་ཅན་གྱི་བཅའ་དངོས་བགོ་འགྲེམས་ཆེད་དྲ་ཐོག་ཏུ་དཔལ་འབྱོར་བསྡུ་རུབ་ཀྱི་འགུལ་ཞིག་སྤེལ་བཞིན་པ་རེད་འདུགསྤྱིར་བོད་མི་གནས་སྡོད་ས་ཁུལ་ཁོངས་ནས་རྒྱ་གར་རྒྱལ་ས་ལྡི་ལི་དང་རྡེ་ར་རྡུན། དེ་བཞིན་ ཝ་ར་ན་སི་དང་བཞུགས་སྒར་རྡ་རམ་ས་བཅས་སུ་གནས་སྟངས་ཛ་དྲགས་པོ་ཡོད་པ་དང་བསྟུན། དབུས་གཞོན་ནུ་ལྷན་ཚོགས་ཀྱི་བཀའ་ཁྱབ་དང་སྦྲགས། ས་གནས་གཞོན་ནུ་ལྷན་ཚོགས་རྣམས་ནས་རང་རང་སོ་སོའི་ས་གནས་སུ་ཛ་དྲག་གི་དུས་སྐབས་འདིར་ནད་པར་ལྟ་སྐྱོང་དང་འདས་གྲོངས་སུ་ཕྱིན་པ་རྣམས་ཀྱི་སྐུ་ཕུང་དུར་འཇུག་སོགས་ཀྱི་སྤྱི་ཚོགས་ཞབས་སུ་རྒྱ་གང་ཆེ་སྒྲུབ་བཞིན་པ་རེད་འདུགདེའི་བར་ན་རྒྱ་གར་རྒྱལ་ས་ལྡི་ལིའི་ནང་དུ་ནད་པ་མང་པོ་ཐོན་བཞིན་པའི་འོག་སྨན་ཁང་དང་ཉལ་ཁྲི་མ་རག་པའི་དཀའ་ངལ་ཁྲོད། ཁུལ་དེར་རྟེན་གཞི་བྱས་པའི་ Tibetan Cancer Society འམ་བོད་ཀྱི་འབྲས་ནད་ཚོགས་པའི་ངོས་ནས་བོད་མི་ནད་པ་རྣམས་སྨན་ཁང་དུ་འཁྱེར་རྒྱུ་དང་ཁོང་ཚོའི་ཆེད་དུ་སྲོག་རླུང་ཐབས་ཤེས་གནང་རྒྱུ། དེ་བཞིན་ཛ་དྲག་པ་རྣམས་ལ་ནད་གཡོག་རྒྱུག་རྒྱུ་སོགས་ཀྱི་ཞབས་ཞུ་སྒྲུབ་བཞིན་པར་ས་གནས་གཞོན་ནུས་རོགས་འདེགས་མཐུན་འགྱུར་གང་ཡོད་གནང་བཞིན་པ་དང་། ལྡི་ལི་བསམ་ཡས་གླིང་གཞིས་སྒར་གྱི་རྩམ་པ་མགྲོན་ཁང་གི་ཚོང་བདག་ནས་རང་གི་མགྲོན་ཁང་ཆ་ཚང་ནད་པ་འཇོག་ས་བཟོས་ཡོད་པ་ལྟར་ས་གནས་བུད་མེད་ཚོགས་པ་ནས་ནད་པ་རྣམས་ལ་ཉིན་རེའི་ཞལ་ལག་སྐྱེལ་བ་དང་། ཐེམ་སྤང་བཀའ་རྒྱའི་དུས་ཚོད་འདིའི་ནང་ཡོངས་འབབ་མེད་པའི་དབུལ་ཕོངས་རྣམས་ལ་བཟའ་བཅའ་བགོ་འགྲེམས་བྱེད་པ་དང་གཡས་གཡོན་བཙང་བཟོ་བྱེད་པ། ལྷག་པར་དུ་རྒྱ་གར་གྱི་སྨན་ཁང་ཁག་ཏུ་ཡོད་པའི་བོད་པའི་སྨན་ཞབས་པ་རྣམས་ནས་ནད་པ་ལྟ་སྐྱོང་གནང་མཁན་བོད་པའི་ཚོགས་པ་ཁག་དང་མཉམ་འབྲེལ་གྱིས། སྨན་ཁང་ནང་དུ་ཉལ་ཁྲི་རག་ཐབས་དང་། ནད་པར་ལྟ་སྐྱོང་གྱིས་ཕྱག་རོགས་གནང་བ་སོགས་ཆགས་འཇིགས་ཀྱི་དུས་ཚོད་འདིའི་ནང་དུ་ཚོགས་པ་དང་གང་ཟག་སྒེར་མང་པོས་རང་དོན་བློས་བཏང་གིས་སྤྱི་སེམས་དང་གཞན་ཕན་གྱི་རྣམ་དཀར་དགེ་བའི་ལས་ལ་འཇུག་བཞིན་པ་རེད་འདུག

རྒྱ་ནག་གི་ཏོག་དབྱིབས་རིམས་ནད་ཀྱི་རླབས་རྒྱུན་གཉིས་པ་རྒྱ་གར་གཙོ་བྱས་པའི་རྒྱལ་སྤྱིའི་ས་ཁུལ་གང་སར་མཆེད་བཞིན་པའི་དུས་སྐབས་འདིར། བོིད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གིས་ཁ་སང་བོད་རིགས་འདུས་སྡོད་ཀྱི་ས་ཁུལ་ཡོངས་ལ་དམིགས་པའི་ཡོངས་ཁྱབ་ཀྱི་གསལ་བསྒྲགས་ཤིག་བསྐྱངས་ཏེ། རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ལ་རང་ནུས་གང་ལྕོག་གིས་མི་འགྱངས་བར་ཟླ་བ་ལྔ་བའི་ཚེས་ ༧ ནང་ཚུད་ཞལ་འདེབས་ངེས་སྤྲོད་ཡོང་བའི་འབོད་སྐུལ་ཞུས་འདུག དེ་ཡང་ཁ་སང་གི་གཞུང་འབྲེལ་གྱི་གསལ་བསྒྲགས་དེའི་ནང་དུ། རྒྱ་གར་ནང་ཝུ་ཧན་ཏོག་དབྱིབས་གཉན་རིམས་ཀྱི་རྦ་རླབས་གཉིས་པའི་དབང་གིས་བསམ་ཡུལ་ལས་འདས་པའི་གོད་ཆགས་ཆེན་པོ་ཞིག་འབྱུང་བཞིན་པའི་སྐབས་འདིར། རང་ཅག་བཙན་བྱོལ་བོད་མི་ཡོངས་ཀྱི་ངོས་ནས་རྒྱ་གར་གཞུང་དང་མི་མང་ལ་བཀའ་དྲིན་རྗེས་དྲན་དང་། ཐུགས་གསོ། གདུང་སེམས་མཉམ་སྐྱེད་བཅས་མཚོན་ཕྱིར། རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ PM-CARES Fund དུ་རྒྱ་མཚོ་ཆུ་ཐིགས་ཀྱི་ཞལ་འདེབས་རྒྱ་མི་ཆུང་བ་ཞིག་འཕྲལ་འབུལ་ཞུ་རྒྱུ་གལ་ཆེར་མཐོང་བཞིན་ཡོད་སྐོར་འཁོད་འདུག གསལ་བསྒྲགས་དེའི་ནང་གསལ་ལྟར་ན། བོད་མིའི་སྒྲིག་འཛུགས་མ་ལག་གི་འགོ་ལས་ཡོངས་ནས་ཉེ་ཆར་ཧི་མཱ་ཅལ་མངའ་སྡེའི་གཞུང་ནས་གནང་བ་ལྟར། སོ་སོའི་ལས་ཉིན་གཅིག་གི་ཕོགས་འབབ་ཞལ་འདེབས་སུ་འབུལ་རྒྱུ་ཡིན་པ་དང་། དེར་འབྲེལ་རྒྱ་ཆེའི་མང་ཚོགས་ཁྲོད་ནས་སྐྱ་སེར་ཕོ་མོ་རྒན་གཞོན་དབྱེ་བ་མེད་པར་ཚོགས་སྒེར་ཡོངས་ནས་རང་བློས་གང་ཆོད་ཀྱི་ཞལ་འདེབས་རེ། རང་ཉིད་གནས་ཡུལ་ས་གནས་ཀྱི་སྐུ་ཚབ་དོན་གཅོད་ལས་ཁུངས་སམ། ས་གནས་འགོ་འཛིན་ལས་ཁུངས་སུ་འབུལ་རྒྱུར་སྐུལ་འདེབས་ཞུས་པ་དང་འབྲེལ། སྐུ་ཚབ་དོན་གཅོད་ལས་ཁུངས་དང་ས་གནས་འགོ་འཛིན་ལས་ཁུངས་རྣམས་ནས་དེ་ལྟར་བསྡུ་བཞེས་གནང་རྒྱུའི་ལས་དོན་འཕྲལ་དུ་འགོ་འཛུགས་དགོས་པའི་བཀོད་ཁྱབ་གནང་འདུག གཞི་རྩའི་རྒྱ་ནག་གི་ཏོག་དབྱིབས་རིམས་ནད་སྔར་ལོའི་ལོ་མགོ་ནས་ཁྱབ་བརྡལ་དུ་འགྲོ་འགོ་ཚུགས་ཏེ། འཛམ་གླིང་གི་ཤར་ལྷོ་ནུབ་བྱང་ཡོངས་སུ་ཆེས་ཆེར་ཁྱབ་བརྡལ་གྱིས་འགྲོ་བ་མིའི་རིགས་ཀྱི་རྩ་ཆེའི་ཚེ་སྲོག་གི་གཤེད་མ་ལྟ་བུར་གྱུར་ནས་རྒྱལ་སྤྱིའི་མང་ཚོགས་ས་ཡ་ ༡༥༠ མ་ཟིན་ཙམ་ལ་རིམས་ནད་ཕོགས་ཡོད་པའི་ཁྲོད་ནས། ད་ཆ་རྒྱ་གར་གྱི་ནང་དུ་རིམས་ནད་ཁྱབ་བརྡལ་གྱི་རླབས་རྒྱུན་གཉིས་བ་དེ་ཆེས་ཆེར་ཛ་དྲག་གི་ངོ་བོར་འགྱུར་བཞིན་པ་དང་། ཉིན་གཅིག་གི་ནང་དུ་རྒྱ་གར་རྒྱལ་ཡོངས་སུ་རིམས་ནད་ཕོག་མཁན་གྱི་ནད་པ་འབུམ་གསུམ་དང་ཕྱེད་ཀ་ལྷག་འབྱུང་གི་ཡོད་པའི་ཁྲོད་མང་ཚོགས་ཀྱི་བློ་ངོར་བསམ་ཡུལ་ལས་འདས་བའི་འཇིགས་དངངས་འབྱུང་བཞིན་པར་བརྟེན། བོད་མིའི་སྒྲིག་འཛུགས་ཀྱི་ངོས་ནས་ཀྱང་མ་དངུལ་བསྡུ་རུབ་ཀྱིས་རྒྱ་གར་གྱི་གུད་སྐྱོབ་ལས་གཞི་ལ་ཞལ་འདེབས་སྤྲོད་འཆར་ཡོད་པ་དང་། ཁ་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་མཆོག་གིས་ཀྱང་གང་ཉིད་ཀྱི་དགེ་རྩ་བརྒྱུད་ནས་ PM-CARES Fund ཞེས་པའི་རྒྱ་གར་གྱི་གུད་སྐྱོབ་ཀྱི་ལས་གཞི་དེར་ཞལ་འདེབས་གསོལ་སྩལ་གནང་ཡོད་པ་རེད། ཡང་དེའི་བར་སྤྱི་ཚོགས་དྲ་ལམ་ཐོག་གནས་ཚུལ་ཐོན་ཁག་ལ་གཞིགས་ན། རྒྱལ་སྤྱིའི་འབྲི་གུང་ལྷན་ཚོགས་དང་དེར་འབྲེལ་གྱི་མི་སྒེར་སོགས་ཀྱིས་མ་དངུལ་ས་ཡ་གཅིག་དང་འབུམ་གསུམ་ལྷག་བསྡུ་རུབ་ཀྱིས་རྒྱ་གར་བྱང་ཕྱོགས་རྡེ་ལ་རྡུན་ཁུལ་གྱི་བོད་གཞིས་བདེ་སྐྱིད་གླིང་གི་གཙོས་པའི་དགོས་ངེས་ཅན་ས་ཁུལ་གཞན་དག་ལ་འབུལ་འཆར་ཡོད་པ་མ་ཟད། མ་དངུལ་བསྡུ་རུབ་དེ་ད་དུང་ཡང་མཇུག་སྐྱོང་གནང་བཞིན་པ་རེད་འདུག

བོད་མིའི་སྒྲིག་འཛུགས་ཀྱི་ཝུ་ཧན་COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༥༧ པ་སྤེལ་བའི་ཐོག   ཏོག་དབྱིབས་ནད་གཞི་ཕོག་མཁན་ཚོ་དངངས་སྐྲག་གནང་རྒྱུ་མེད་པ་དང་དངངས་སྐྲག་གནང་ན་སོ་སོའི་སེམས་ཁམས་ལ་གནོད་ངེས་ཡིན་པས། སེམས་ཁམས་འཕྲོད་བསྟེན་ལ་དོ་ཕོག་བྱུང་ན་ནད་གཞི་དྲག་སྐྱེད་ལ་འགོག་རྐྱེན་འབྱུང་ངེས་ཡིན་སྟབས།  ཐུགས་ལྷོད་ལྷོད་ངང་བཞུགས་རོགས་གནང་ཞེས་འབོད་སྐུལ་གནང་སོང་། དེ་ཡང་དེ་རིང་གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་ཚེ་རིང་ལགས་ཀྱིས།  ནད་རླབས་གཉིས་པ་འདིའི་ཁྲོད་མང་ཚོགས་ནས་ཏོག་དབྱིབས་སྔོན་འགོག་གི་ལམ་སྟོན་ཁག་མུ་མཐུད་བསྟེན་དགོས་པར་ནན་བརྗོད་གནང་བ་དང་སྦྲགས།  ད་ཆ་ནད་རླབས་གཉིས་པ་འདི་ནད་གཞི་ཁྱབ་གདལ་ཧ་ཅང་མྱུར་བས་བོད་མི་རྣམས་ནས་ད་ལྟ་ས་གནས་ག་བར་བཞུགས་ཡོད་ན་རང་འཇགས་བཞུགས་རྒྱུ་དང་ལྷག་པར་རྒྱ་གར་གྱི་མངའ་སྡེ་ཆེ་ཁག་ཁག་ཅིག་ནང་ནད་གཞི་ལྗིད་པོར་འགྱུར་བཞིན་པས་ས་ཁུལ་དེ་དག་ནང་འགྲུལ་བཞུད་མི་གནང་རྒྱུའི་རྩོལ་འདོན་དང་།  དེ་བཞིན་མང་ཚོགས་ནས་ནད་ཡམས་ཁྱབ་གདལ་འགོག་ཐབས་སླད་འདུ་འཛོམས་སོགས་མ་གནང་ཡ་དང་ལྷག་པར་སྐབས་བབས་ཀྱི་དུས་ཚོད་འདིར་ཞེད་སྣང་དང་དངངས་སྐྲག་མ་གནང་རོགས་ཞེས་གཞེན་སྐུལ་སོགས་གནང་སོང་། ཡང་སྐབས་དེར་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས།  གཟའ་འཁོར་འདིའི་ནང་བོད་མིའི་འདུས་སྡོད་ཁག་ཏུ་ཏོག་དབྱིབས་ནད་གཞི་ཕོག་མཁན་༣༥༢ དང་དེ་དག་ཁྲོད་ནད་གཞི་ཕོག་མཁན་ལོ་ན་བགྲེས་ཤོས་དེ་ ༨༦ དང་ཆུང་ཤོས་དེ་བྱིས་པ་ལོ་གཅིག་དང་ཟླ་བ་བཅིུག་ཡིན་པ་དང་ནད་གཞི་ཕོག་མཁན་ཁོངས་ཕལ་མོ་ཆེར་ནད་རྟགས་མངོན་པ་མ་ཟད།  གཟའ་འཁོར་འདིའི་ནང་ནད་ཡམས་རྐྱེན་པས་ སྐྱེས་པ་རང་ལོ་  ༧༦ སོན་ཞིང་ཁྲག་ཤེད་ནད་གཞི་ཡོད་མཁན་ཞིག་དང་། སྐྱེས་པ་རང་ལོ་ ༦༠ དང་དེ་བཞིན་ ༧༦ སོན་པ་བཅས་བོད་མི་གསུམ་འདས་གྲོངས་སུ་གྱུར་བ་བཅས་ད་བར་རྒྱ་བལ་གཉིས་ནང་ཏོག་དབྱིབས་ནད་གཞི་ཕོག་མཁན་མི་གྲངས་ ༢༤༥༠ དང་དྲག་སྐྱེད་དུ་སོང་བ།  ༡༧༢༠ ཡིན་ཀྱང་ད་བར་བོད་མི་ ༥༣ འདས་གྲོངས་དང་ད་ཆ་ནད་མནར་བཞིན་པ་དེ་ ༦༧༧ ཆགས་ཀྱི་ཡོད་པ་གསུངས་སོང་།ཕྱོགས་མཚུངས་ནད་མནར་བཞིན་པ་དེ་དག་ཁྲོད་ཕལ་མོ་ཆེ་ལྡི་ལི་གཙོས་པའི་ལྡེ་ར་ལྡུན་དང་རྡ་རམ་ས་ལ་བཅས་ནས་ཆགས་ཀྱི་ཡོད་པ་གསུངས་པ་མ་ཟད།  རྒྱ་ཆེ་མང་ཚོགས་ནས་ནད་རླབས་གཉིས་པའི་ཁྲོད་ཐུགས་གཟབ་གནང་དགོས་གལ་དང་དེ་བཞིན་ནད་ཡམས་སྔོན་འགོག་སླད་ལམ་སྟོན་ཁག་ཅིག་གནང་སོང་།མ་ཟད།  ཕྱི་ལུགས་སྨན་པ་བསྟན་འཛིན་རྣམ་སྒྲོན་ལགས་ཀྱིས།  སྔོན་ཁབ་དང་འབྲེལ།  རིང་མིན་ཟླ་བ་ ༥བའི་ཚེས་ ༡ ཉིན་ལོ་ན་ ༡༨ ཡན་ལ་སྔོན་ཁབ་བརྒྱབ་རྒྱུ་ཡིན་པས།  སྔོན་ཁབ་བསྐྱོན་ན་ཕན་རྒྱུ་ཡིན་པས་ཚང་མས་གོ་སྐབས་དམ་འཛིན་གྱིས་སྔོན་ཁབ་བསྐྱོན་དགོས་པ་དང་།  ད་ལྟའི་ཛ་དྲག་གི་དུས་འདིར་ཞལ་ལག་ཟས་བཅུད་ལྡན་པ་མཆོད་རྒྱུ་དང་གཉིད་དུས་ཐོག་ཏུ་ཁུག་རོགས་ཞེས་གསུངས་སོང་། རྩ་བའི་རྒྱ་གར་གྱི་ནད་རླབས་གཉིས་པའི་ཁྲོད་འདིར་ worldometer གྲངས་ཐོར་གཞིགས་ན་ཉིན་རེར་ནད་གཞི་ཕོག་མཁན་གསར་བ་མི་གྲངས་འབུམ་གསུམ་ལྷག་བརྒལ་བཞིན་པ་དང་།  ལྷག་པར་འདས་གྲོངས་སོང་མཁན་ ༢༠༠༠ དང་ ༣༠༠༠ ལྷག་བརྒལ་འགྲོ་བའི་གནས་སྟངས་རེད་འདུག  དུས་ཡུན་འདིའི་ཁྲོད་རིམ་པས་བོད་མིའི་འདུས་སྡོད་ཁག་ཏུའང་ནད་གཞི་ཕོག་མཁན་ཇེ་མང་དུ་འགྲོ་མུས་ཁྲོད་འདིར་  ཉེ་ལམ་ལྡེ་ར་ལྡུན་མངའ་ཁུལ་Rajpur རྟེན་གཞི་བྱས་པའི་ས་སྐྱའི་ཆོས་སྒར་ནང་དགེ་འདུན་པ་ ༧༠ ལྷག་ལ་ཏོག་དབྱིབས་གཉན་རིམས་ཕོག་པའི་གནས་ཚུལ་ཞིག་ཁྱབ་བཞིན་པ་དང་།  འདི་ག་རླུང་འཕྲིན་ཁང་ནས་དེ་འབྲེལ་དང་ལྷག་པར་ལྡེ་ར་ལྡུན་ཁྱབ་ཁོངས་བོད་མིའི་འདུས་སྡོད་སྤྱི་ཡོངས་ཀྱི་གནས་སྟངས་ད་ཆ་གང་འདྲ་ཆགས་ཡོད་མིན་སྐོར་ས་གནས་འགོ་འཛིན་ནོར་བུ་ལགས་སུ་བཀའ་འདྲི་ཞུས་སྐབས།  ཁོང་གིས་ས་སྐྱའི་ཆོས་སྒར་གྱི་གནས་ཚུལ་དེ་ཉེ་ལམ་བྱུང་བ་ཞིག་ཡིན་པ་དང་སྐབས་དེ་དུས་ནད་གཞི་ཕོག་པའི་ཁོངས་ཛ་དྲག་ཡོད་པ་དེ་རེ་ཟུང་ལས་མེད་པ་དང་དགེ་འདུན་པ་རྣམས་ཟུར་བཀག་ལ་བཞུགས་ཡོད་སྐོར་གསུངས་སོང་། གཞན་ཡང་ས་གནས་འགོ་འཛིན་གྱིས་ད་ལྟའི་ཆར་བདེ་སྐྱིད་གླིང་ནང་ནད་པའི་གྲངས་འབོར་དེ་བརྒྱ་ཆ་ ༥༠ ཆགས་ཡོད་པ་མ་ཟད།   ལྡེ་ར་ལྡུན་སྤྱི་ཡོངས་ནང་ད་ལྟ་རིང་ནད་པ་ ༢༠༠ ལྷག་ཡོད་འདུག  བོད་མིའི་འདུས་སྡོད་དུ་ཏོག་དབྱིབས་གཉན་རིམས་ཀྱི་གནས་སྟངས་དང་འབྲེལ།   འདི་ག་རླུང་འཕྲིན་ཁང་ནས་ནད་ཡམས་གཞི་འཕེལ་ཚད་པོར་གྱུར་བ་ལྡི་ལི་ལྟ་བུའི་ནང་གི་བོད་མི་རྣམས་ཀྱི་གནས་སྟངས་སྤྱི་ཡོངས་རྒྱུས་ལོན་སླད་ལྡི་ལིའི་བོད་སྒར་བསམ་ཡས་གླིང་གི་ས་གནས་འགོ་འཛིན་གཙོས་བོད་ཀྱི་འབྲས་ནད་ཚོགས་པར་འབྲེལ་བ་བྱས་ཀྱང་འབྲེལ་བ་མཐུད་ཐུབ་མ་སོང་།   གཞན་ཡང་ད་ཆ་རྡ་རམ་ས་ལའི་ནང་དུའང་རིམ་བཞིན་ནད་གཞི་ཕོག་མཁན་མང་རུ་ཕྱིན་པ་དང་ལྷག་པར་བོད་མིའི་སྒྲིག་འཛུགས་ཀྱི་ལས་བྱེད་ཁྲོད་དུའང་ནད་པ་མི་ཉུང་བ་ཐོན་བཞིན་ཡོད་སྟབས།  དེ་རིང་ལས་ཁུངས་ཡོངས་སྒོ་བརྒྱབ་ནས་རང་ཉིད་སོ་སོའི་ཁྱིམ་ནས་ཕྱག་ལས་གནང་རྒྱུ་བཀོད་ཁྱབ་བཏང་ཡོད་པ་དང་།  དེའི་ཐད་འབྲེལ་ཡོད་ལ་བཀའ་འདྲི་ཞུས་ཐབས་བྱས་ཀྱང་འབྲེལ་བ་མཐུད་ཐུབ་མ་སོང་།

རིང་མིན་ཕྱི་ཟླ་ ༥ པའི་ཟླ་མཇུག་ཏུ་བོད་མིའི་སྒྲིག་འཛུགས་ཀྱི་བཀའ་ཤག་སྐབས་ ༡༤ པ་དང་ ༡༥ པའི་སྲིད་སྐྱོང་བློ་བཟང་སེང་གེ་མཆོག་གི་ལོ་བཅུའི་ལས་ཡུན་རྫོགས་རན་པ་དང་བསྟུན་ཁ་སང་ཉི་ཧོང་གི་སྲིད་བློན་ཟུར་པ་ Shinzo Abe མཆོག་དང་བདེ་རླུང་བློན་ཆེན་གཞོན་པ་སྐུ་ཞབས་ Yasuhide Nakayama མཆོག དེ་བཞིན་ཉི་ཧོང་གི་སྲིད་བྱུས་ཉམས་ཞིབ་ཁང་གི་གཙོ་འཛིན་ལྕམ་ Sakurai Yoshiko མཆོག ཉི་ཧོང་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཉི་ཧོང་གི་ཤེས་རིག་བློན་ཆེན་ཟུར་པ་གྲོས་ཚོགས་འཐུས་མི་སྐུ་ཞབས་ Shimomura Hakubun མཆོག་གིs་གཙོས་པའི་ཚོགས་མི་རྣམས་ལྷན་འཛོམས་ཐོག་སྲིད་སྐྱོང་མཆོག་ལ་དམིགས་བསལ་ཆེ་བསྟོད་ཀྱི་ལྷན་ཚོགས་ཚོགས་འདུགབོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་ཁ་སང་ཉི་ཧོང་གྲོས་ཚོགས་ཀྱི་ཚོགས་ཁང་དུ་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་སྲིད་སྐྱོང་མཆོག་ལ་ལོ་བཅུའི་ལས་ཡུན་ལེགས་གྲུབ་གནང་བར་ཆེ་བསྟོད་ཀྱི་ལྷན་ཚོགས་ཚོགས་ཏེ་ལྷན་ཚོགས་ནང་མཉམ་ཞུགས་གནང་མཁན་ཡོངས་ཀྱིས་སྲིད་སྐྱོང་མཆོག་གི་ཕྱག་ལས་གནང་ཕྱོགས་ལ་བསྔགས་བརྗོད་དང་འབྲེལ། བོད་དོན་ལ་སྔར་བཞིན་རྒྱབ་སྐྱོར་གནང་རྒྱུ་ཡིན་པར་ཞལ་བཞེས་གནང་འདུག སྐབས་དེར་སྐུ་ཞབས་ Shimomura Hakubun ལགས་ཀྱིས་དེ་སྔ་ལོ་བཅུའི་སྔོན་ལ་ཁོང་དང་གནད་ཡོད་ཕྱག་སྦྲེལ་ཁག་ཅིག་རྒྱ་གར་ནང་དུ་ཕེབས་སྐབས་༸གོང་ས་མཆོག་དང་མཇལ་འཕྲད་ཞུ་རྒྱུའི་གོ་སྐབས་བྱུང་བ་དང་དེ་རྗེས་བོད་མིའི་སྒྲིགས་འཛུགས་ཀྱི་སྲིད་སྐྱོང་མཆོག་དང་མཇལ་འཕྲད་གནང་བ་དང་འབྲེལ་ནས་ཉི་ཧོང་གྲོས་ཚོགས་ནང་དུ་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུའི་སྐོར་གསུངས་ཡོད་པ་ལྟར་ད་ལྟའི་ཆར་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་དེ་འཛམ་གླིང་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་སུ་གྱུར་ཡོད་པ་སོགས་གསུངས་པ་དང་ཆབས་ཅིག ཁོང་རྣམ་པའི་ངོས་ནས་བོད་མི་དང་བོད་དོན་ལ་མུ་མཐུད་རྒྱབ་སྐྱོར་གནང་ངེས་ཡིན་པར་ཞལ་བཞེས་གནང་ཡོད་པ་རེད།དེ་བཞིན་སྐབས་དེར་ཉི་ཧོང་གི་སྲིད་བློན་ཟུར་པ་སྐུ་ཞབས་ Shinzo Abe མཆོག་གིས་ལྷན་ཚོགས་འདིའི་ཐོག་མགྲོན་འབོད་གནང་བར་ཐུགས་རྗེ་ཆེ་ཞེས་གསུངས་པ་དང་སྦྲགས། ཁོང་ནས་དེ་སྔ་རྒྱ་ནག་གི་སྲིད་འཛིན་དང་ལྷན་དུ་མཇལ་འཕྲད་སྐབས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་སྐོར་གསུངས་ཡོད་པ་ལུང་འདྲེན་གནང་བ་མ་ཟད། ད་ལྟའི་ཆར་ཁོང་ནས་སྲིད་བློན་གྱི་ཐུགས་འགན་བཞེས་ཀྱི་མེད་ཀྱང་གྲོས་ཚོགས་ཀྱི་འཐུས་མི་ཞིག་གི་ངོ་བོའི་ཐོག་ནས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ལྷན་དུ་བོད་ནང་གི་གནས་སྟངས་ཡར་རྒྱས་གཏོང་དགོས་པའི་གནད་དོན་ཐོག་མུ་མཐུད་ཕྱག་ལས་གནང་རྒྱུའི་ཐུགས་འདུན་ཡོད་པ་གསུངས་འདུགཉི་ཧོང་གི་རྒྱལ་ས་ཊོ་ཀི་ཡོ་ནང་རྟེན་གཞི་བྱས་པའི་ཉི་ཧོང་གི་སྲིད་བྱུས་ཉམས་ཞིབ་བསྟི་གནས་ཁང་གི་འགན་འཛིན་ལྕམ་སྐུ་ Sakurai Yoshiko ལགས་ཀྱིས་བོད་ཀྱི་གནད་དོན་ནི་ཉི་ཧོང་དང་འབྲེལ་བ་ཡོད་སྐོར་དང་། ཁྱིམ་མཚེས་རྒྱ་ནག་དང་ལྷན་འབྲེལ་བ་ཡག་པོ་ཉར་དགོས་ཀྱང་ང་ཚོས་མང་གཙོ་དང་རང་དབང་། འགྲོ་བ་མིའི་ཐོབ་ཐང་། ཁྲིམས་ཀྱི་དབང་སྒྱུར་བཅས་ཀྱི་རིན་ཐང་ལ་བརྩི་མེད་རྡོག་རོལ་གཏོང་མི་ཉན་ཞེས་གསུངས་པ་མ་ཟད། བོད་དོན་ལ་རྒྱབ་སྐྱོར་གནང་རྒྱུ་དང་སླད་མར་བོད་དོན་སླད་ཞུ་གཏུག་གི་ལས་འགུལ་སྤེལ་བའི་རེ་བ་ཡོད་ཅེས་གསུངས་ཡོད།སྐབས་དེར་སྲིད་སྐྱོང་མཆོག་གིས་དྲྭ་རྒྱ་བརྒྱུད་མཉམ་ཞུགས་གནང་སྟེ་ཉི་ཧོང་གཞུང་མང་གཉིས་ནས་བོད་མིའི་བདེན་པའི་འཐབ་རྩོད་ལ་གཡོ་བ་མེད་པར་རྒྱབ་སྐྱོར་གནང་བར་ཐུགས་རྗེ་ཆེ་ཞེས་གསུངས་པ་དང་སྦྲགས། ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ ༩༨ ཡོད་པ་དང་དེའང་ད་ལྟའི་ཆར་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་དེ་འཛམ་གླིང་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་སུ་གྱུར་ཡོད་པར་ཧ་ཅང་དགའ་པོ་བྱུང་ཞེས་སོགས་གསུངས་འདུག དེ་བཞིན་སྲིད་སྐྱོང་མཆོག་གིས་བོད་དོན་ལ་རྒྱབ་སྐྱོར་གནང་བ་དེས་རྒྱ་ནག་ལ་ངོ་རྒོལ་གནང་བ་ཞིག་མཚོན་གྱི་མེད་ཀྱང་། དེ་རིང་གི་ལྷན་ཚོགས་བརྒྱུད་ནས་ཉི་ཧོང་དེ་འགྲོ་བ་མིའི་ཐོབ་ཐང་དང་མང་གཙོའི་རྒྱབ་ཏུ་བཞེངས་མཁན་ཞིག་ཡིན་པའི་བརྡ་ལན་གསལ་པོ་ཆགས་པ་དང་ལྷག་པར་དུ་རྒྱ་གཞུང་གིས་གདུག་རྩུབ་ཅན་གྱི་སྲིད་བྱུས་སྤེལ་བཞིན་པའི་འོག་མནར་གཅོད་མྱོང་བཞིན་པའི་བོད་མི་ས་ཡ་དྲུག་ལ་ཉི་ཧོང་དེ་བདེན་པའི་རྒྱབ་ལངས་གནང་བའི་བརྡ་ལན་ཁ་གསལ་ཞིག་ཆགས་ཡོད་པར་གསུངས་འདུག སྲིད་སྐྱོང་མཆོག་གིས་ད་དུང་བོད་ནང་དུ་རྒྱ་གཞུང་གིས་དྲག་པོའི་སྲིད་བྱུས་སྤེལ་ནས་བོད་མི་རྣམས་མི་སྤྱོད་ལས་འདས་པའི་གདུག་རྩུབ་མྱངས་དང་མྱོང་བཞིན་པའི་གནས་སྟངས་ཁག་ངོ་སྤྲོད་གནང་བ་དང་ཆབས་ཅིག་ཏུ་དེང་སྐབས་རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་། ནང་སོག ཐེ་ཝན་བཅས་ཀྱི་ནང་དུ་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་བསྐྲུན་ཐབས་བྱེད་བཞིན་པ་མ་ཟད་ཉི་ཧོང་གིས་གཙོས་པའི་འཛམ་གླིང་ཁྱོན་ཡོངས་སུ་རིམ་བཞིན་ལྟ་གྲུབ་ངན་པ་དེ་སྤེལ་ཐབས་བྱེད་མུས་ཡིན་སྟབས། རྒྱལ་སྤྱིའི་སྤྱི་ཚོགས་ཚོས་དེར་གདོང་ལེན་ནན་པོ་གནང་རྒྱུ་དང་ཕྱོགས་གཞན་ཞིག་ནས་དེའི་དབང་སྒྱུར་འོག་འགྲོ་རྒྱུ་ལས་འདས་མེད་སྐོར་དང་འབྲེལ་ནས་ཉི་ཧོང་གི་ངོས་ནས་བོད་མི་དང་ཡུ་གུར་བ། ནང་སོག ཧོང་ཀོང་། ཐེ་ཝན་བཅས་ལ་རྒྱབ་སྐྱོར་གནང་བཞིན་པར་བསྔགས་བརྗོད་གནང་ཡོད།གཞི་རྩའི་སྲིད་སྐྱོང་བློ་བཟང་སེང་གེ་མཆོག་ཉེ་ལམ་ཨ་རིར་སྐོར་སྐྱོད་ལ་ཕེབས་ཡོད་པ་དང་བསྟུན་ཨ་རིའི་ནིའུ་ཡོག་དང་ནིའུ་ཇར་སིའི་བོད་རིགས་སྤྱི་མཐུན་ཚོགས་པས་ཕྱི་ཚེས་ ༢༤ ཉིན་སྲིད་སྐྱོང་མཆོག་ལ་གསོལ་སྟོན་གོ་སྒྲིག་ཞུས་པ་དང་སྦྲགས། ཁོང་ལ་ཕུལ་བྱུང་དབུ་ཁྲིད་ཀྱི་ཕྱག་རྟགས་ཤིག་ཀྱང་ཕུལ་ཡོད་པ་རེད།དེའི་བར་ན་ཕྱི་ཚེས་ ༢༡ ཉིན་སྲིད་སྐྱོང་མཆོག་ནས་ཨ་རིའི་རྒྱལ་ས་ཝ་ཤིན་ཊོན་ཌི་སིར་ཆེད་ཕེབས་ཀྱིས་ཨ་རིའི་བོད་ཀྱི་སྐུ་ཚབ་དོན་ཁང་གིས་གསོལ་སྟོན་ཞིག་གོ་སྒྲིག་ཞུས་པའི་ཐོག་ཨ་རིའི་གཞུང་འཛིན་གསར་པའི་ཕྱི་སྲིད་ལྷན་ཁང་གི་ལས་བྱེད་ཁག་ཅིག་དང་། གྲོས་ཚོགས་ཀྱི་ལས་བྱེད། USAID འམ་ཨ་རིའི་རོགས་ཚོགས་ཀྱི་ལས་བྱེད། དེ་བཞིན་མི་འབོར་དང་སྐྱབས་བཅོལ། ཕྱི་མི་གཞིས་སྤོ་བཅས་ལྷན་ཁང་ཁག་གི་སྐུ་ཚབ། ལྷོ་ཕྱོགས་དང་དཀྱིལ་ཤར་ཨེ་ཤ་ཡའི་མཛའ་འབྲེལ་འཐུས་ཚབ་བཅས་དང་མཇལ་འཕྲད་གནང་ཡོད་པ་རེད།

ཁ་སང་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༥༦ པ་སྤེལ་བ་དང་སྦྲགས་བོད་མིའི་འདུས་སྡོད་ཀྱི་ས་ཁུལ་ཁག་ཏུ་སྨན་པ་དང་སྨན་ཞབས་པའི་དང་བླངས་ཕྱག་རོགས་གནང་རོགས་ཞེས་འབོད་སྐུལ་གནང་སོང་།གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་རྒྱ་གར་ནང་ནད་རླབས་གཉིས་པའི་དུས་ཚིགས་སུ་ཉིན་རེར་ནད་གཞི་ཕོག་མཁན་ཇེ་མང་དུ་འགྲོ་མུས་ཁྲོད་འདིར་རྒྱ་གར་དུ་གནས་བཞུགས་བོད་མིའི་མི་འབོར་འབུམ་གཅིག་ཙམ་མེད་སྟབས་བོད་མིའི་སྤྱི་ཚོགས་ཁྲོད་ནད་ཡམས་ཁྱབ་གདལ་ཤུགས་ཆེ་མི་འགྲོ་སླད་མང་ཚོགས་ནས་འགན་རང་འཁུར་གྱིས་ནད་ཡམས་ལས་མཐར་ཐབས་དང་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་པའི་གཞེན་སྐུལ་ནན་པོ་གནང་སོང་། དེ་བཞིན་དྲུང་ཆེ་མཆོག་གིས་ད་ལྟའི་ཆར་རྒྱལ་ས་ལྡི་ལི་གཙོས་ཀར་ན་ཊ་ཀ་དང་། ཆ་ཏིས་གྷར། མ་ཧཱ་རཤཊྚ་སོགས་མངའ་སྡེ་བཅུ་ཙམ་ནང་ནད་གཞི་ལྗིད་པོ་ཆགས་ཡོད་པ་དང་ཆབས་ཅིག  བོད་མིའི་འདུས་སྡོད་ས་གནས་དྷརྨ་ས་ལ་དང་། ཝཱ་རཱ་ཎ་སཱི། ལྡེ་ར་ལྡུན།  ཧུན་སུར། དེ་བཞིན་ཨུ་རི་ས་བཅས་ནད་པ་མང་པོ་ཐོན་སའི་ས་ཁུལ་ཆགས་ཡོད་པར་གསུངས་སོང་། ནད་ཡམས་ཀྱི་ཛ་དྲག་དུས་སྐབས་སུ་ས་གནས་ཁག་ཅིག་ལ་སྨན་པ་དང་སྨན་ཞབས་པ་འདང་ངེས་མེད་པའི་དཀའ་ངལ་རིམ་པ་འཕྲད་བཞིན་འདུག་པ་དང་། ལྷག་པར་དུ་དེའི་ཁྲོད་ད་ཆ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་སྨན་ཞབས་པའི་ཕྱག་ལས་གནང་མཁན་དགོས་མཁོ་ཆེ་བར་བརྟེན་ཟླ་བ་གཅིག་གཉིས་ནང་བོད་རིགས་སྨན་པ་རྣམས་སྤྱི་ཚོགས་ཞབས་ཞུ་ཆེད་དུ་དང་བླངས་ཕྱག་རོགས་གནང་རོགས་ཞེས་འབོད་སྐུལ་གནང་བ་དང་སྦྲགས། དེ་ལྟར་གནང་བློ་མཆིས་རིགས་ཚོས་འབྲེལ་བ་གནང་རོགས་ཞེས་གསུངས་སོང་། རྩ་བའི་གཟའ་འཁོར་འདིའི་ནང་བོད་མིའི་འདུས་སྡོད་ཁག་ཏུ་ཏོག་དབྱིབས་ནད་གཞི་ཕོག་མཁན་ ༢༦༠ དང་དེའི་ཁོངས་ལོ་ན་བགྲེས་ཤོས་དེ་ ༩༠ དང་ཆུང་ཤོས་དེ་ལོ་ ༢ སོན་པའི་བྱིས་པ་རེད་འདུག ཚོགས་ཆུང་གི་འབྲེལ་མཐུད་པ་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་ནད་ཡམས་རྐྱེན་གྱིས་སྐྱེས་པ་རང་ལོ་ ༧༥ སོན་པར་ནད་རྟགས་ཡོད་པ་གང་ཞིག་ལ་ཁྲག་ཤེད་ནད་གཞི་ཡོད་པ་དང་། དེ་བཞིན་སྐྱེས་པ་རང་ལོ་ ༦༦ སོན་པ་གང་ཞིག་ལ་ཏོག་དབྱིབས་ ༡༩ འི་ནད་རྟགས་ཆ་ཚང་མངོན་པ་གཉིས་ཀྱི་ཚེ་སྲོག་ཤོར་ཡོད་སྐོར་གསུངས་སོང་། ལྷག་པར་དུ་ད་རེས་ནད་གཞི་ཕོག་པའི་ཁོངས་ལོ་ན་ ༦༠ ཡན་གྱི་མི་གྲངས་ ༣༩ དང་།  ༣༠ ནས་ ༥༩ བར་ ༡༣༩ དེ་བཞིན་ ༢༩ འོག་ལ་མི་གྲངས་ ༨༢ བཅས་ནད་རླབས་གཉིས་པ་འདིར་ནད་རྟགས་མངོན་མཁན་མང་བ་ཡོད་པ་རེད་འདུག  ད་བར་ཁྱོན་རྒྱ་བལ་གཉིས་ནང་བོད་མི་ནད་གཞི་ཕོག་མཁན་ ༢༠༩༧ དང་དྲག་སྐྱེད་སོང་བ་ ༡༦༩༢ དང་དེ་བཞིན་འདས་གྲོངས་སུ་སོང་མཁན་ ༥༠ དང་ནད་མནར་བཞིན་པ་དེ་ ༣༥༥ ཆགས་ཀྱི་ཡོད་པ་རེད། སྨན་པ་ཚེ་རིང་མཚམས་གཅོད་ལགས་ཀྱིས་ནད་གཞི་ཕོག་སྐབས་དབུགས་གཏོང་ལེན་དཀའ་བའི་གནས་སྟངས་ཆགས་ན་མ་གཏོགས་སྨན་ཁང་ལ་ཕེབས་རྒྱུ་མེད་པ་དང་རང་ཁྱིམ་ནས་སྨན་པར་འབྲེལ་བ་གནང་བའི་ཐོག་གསོ་ཐབས་གནང་ན་ལེགས་པ་དང་། དེ་བཞིན་ཟས་སྤྱོད་དང་འབྲེལ་ནས་ཞལ་ལག་ཚ་པོའི་རིགས། ཐང་དང་ཁུ་བ་རིགས། ཞལ་ལག་དུས་ཐོག་ཏུ་མཆོད་རྒྱུ། དུས་ཐོག་གཟིམ་རྒྱུ།  ལྷག་པར་དུ་དངངས་སྐྲག་རིགས་གནང་རྒྱུ་མེད་པར་ལམ་སྟོན་གནང་ཡོད།  ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས་ནད་རྟགས་རིགས་ཐོན་ཚེ་སོ་སོ་ནས་གནང་དགོས་པའི་ཐད་ལམ་སྟོན་གནང་བ་དང་འབྲེལ། ནད་རྟགས་ཡོད་ཚེ་ཟུར་བཀག་ལ་བཞུགས་རྒྱུ་དང་བརྟག་དཔྱད་གནང་རྒྱུ། ཁ་རས་གྱོན་རྒྱུ་མ་ཟད། ཚང་མས་སྔོན་ཁབ་ངེས་པར་དུ་བརྒྱབ་དགོས་པར་འབོད་སྐུལ་གནང་སོང་། གཞི་རྩའི་དེ་སྔ་ཏོག་དབྱིབས་གཉན་རིམས་ཁྱབ་གདལ་ཐོག་མར་བྱུང་སྐབས་ལོ་ན་བགྲེས་པ་དང་འཕྲོད་བསྟེན་གྱི་མདུན་ཐོན་ཞབས་ཞུ་བར་ནད་གཞི་འགོས་པའི་ཉེན་འཚབས་ཆེ་བ་ཡོད་པ་གསུངས་པ་ལྟར་བོད་མིའི་འདུས་སྡོད་ཁག་ཏུ་ད་བར་སྔོན་ཁབ་བརྒྱབ་ཟིན་པའི་གྲངས་དེ་ ༡༤༦༣༤  ཆགས་ཀྱི་ཡོད་པ་རེད། འོན་ཀྱང་ནད་རླབས་གཉིས་པའི་དུས་ཚིགས་འདིར་ནད་གཞི་དེ་དེ་སྔ་ལས་འགོས་ཁྱབ་མྱུར་བ་ཡོད་པས་རྒྱ་གར་དབུས་གཞུང་ནས་རིང་མིན་ཟླ་ ༥ ཚེས་ ༡ ནས་ལོ་ན་ ༡༨ ཡན་ཚང་མར་སྔོན་ཁབ་བརྒྱབ་རྒྱུར་བཀའ་འཁྲོལ་གནང་བ་རེད། རྩ་བའི་ནད་རླབས་གཉིས་པའི་དུས་ཚིགས་དང་འབྲེལ། བཙན་བྱོལ་བོད་མིའི་གནས་ཡུལ་ཁག་ཏུ་ནད་གཞི་ཕོག་མཁན་མི་ཉུང་བ་ཞིག་བྱུང་བ་ལྟར། ནད་གཞི་ཕོག་མཁན་ཁྲོད་ཕལ་མོ་ཆེར་དམིགས་བསལ་ངལ་བ་གང་ཡང་མེད་པ་རེད་འདུག   དེའི་ཁྲོད་དེ་སྔ་ལྡེ་ར་ལྡུན་མངའ་ཁུལ་བདེ་སྐྱིད་གླིང་བོད་མིའི་གཞིས་ཆགས་སུ་མི་གྲངས་ ༡༣༨ ལ་ནད་གཞི་ཕོག་ཡོད་པ་དང་རྗེས་སུ་མང་ཚོགས་ལ་བརྟག་དཔྱད་མུ་མཐུད་ནས་གནང་སྐབས་ནད་གཞི་ཕོག་མཁན་ ༡༨༤ བྱུང་བ་དེ་ལྟར་ཡང་། ཁག་ཅིག་དྲག་སྐྱེད་སོང་ནས་ད་ལྟའི་ཆར་ནད་གཞི་ཕོག་མཁན་མི་གྲངས་ ༡༧༧ ཆགས་ཡོད་སྟབས། ལྡེ་ར་ལྡུན་ས་གནས་འགོ་འཛིན་ནོར་བུ་ལགས་ཀྱིས་ད་ཆར་གནས་སྟངས་ཛ་དྲག་པོ་མེད་སྐོར་འགྲེལ་བརྗོད་གནང་སོང་།