བོད་མིའི་སྒྲིག་འཛུགས།

ཁ་སང་ཕྱི་ལོ་་༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་དང་འབྲེལ་ནས་སྤྱི་ཚོགས་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། ལ་དྭགས་ནང་གི་བརྒྱ་ཤོག་བརྒྱད་པའི་ཁུལ་དུ་འོས་བསྡུ་གནང་བའི་སྐབས་སུ། ཁུལ་དེའི་ཡིག་རྨོངས་བ་རྣམས་ལ་རོགས་འདེགས་ཀྱི་ཆེད་དུ་ལ་དྭགས་བོད་ཁྱིམ་གྱི་དགེ་རྒན་ཞིག་བསྐོ་བཞག་བྱས་པ་དང་། ཁོང་གིས་ཡིག་རྨོངས་བ་ཞིག་ལ་རོགས་རམ་བྱས་པའི་བརྒྱུད་རིམ་ཁྲོད་དུ་སྲིད་སྐྱོང་གི་འོས་བསྡུའི་འགེངས་ཤོག་གི་ནང་དུ་དོ་བདག་གིས་སྲིད་སྐྱོང་གི་འོས་མི་རྒྱ་རི་སྒྲོལ་མ་ལགས་ཕྲིས་ཞེས་སྐུལ་མ་གནང་ཡོད་ཀྱང་། དགེ་རྒན་དེས་ཚོགས་ཟུར་སྤེན་པ་ཚེ་རིང་ལགས་ཀྱི་མཚན་བྲིས་ཡོད་པ་ར་འཕྲོད་བྱུང་ཡོད་ལུགས་ཀྱི་གནད་དོན་ཞིག་ཁྱབ་བརྡལ་འགྲོ་བཞིན་པ་རེད། དེ་རིང་འདི་གའི་གསར་འགོད་པས་ལ་དྭགས་ཀྱི་ལ་སྤྱི་ཚེ་བརྟན་དབང་ཕྱུག་ལགས་སུ་ཞལ་པར་བརྒྱུད་ནས་གནས་ཚུལ་དེའི་ཐད་ལ་རྒྱུས་ལོན་བྱས་པར་ཁོང་གིས། གནས་ཚུལ་དེ་དངོས་བདེན་ཡིན་པ་དང་། ཡིག་རྨོངས་བ་རྣམས་ལ་རོགས་འདེགས་བྱེད་མཁན་གྱི་དགེ་རྒན་དེས་དོ་བདག་གིས་ཕྲིས་ཞེས་པ་དེ་མ་བྲིས་བར་འོས་མི་གཞན་ཞིག་གི་མཚན་བྲིས་ཡོད་པ་ཤེས་རྟོག་བྱུང་མ་ཐག་འཕྲལ་དུ་དགེ་རྒན་དེ་ཡུལ་དངོས་ཀྱི་འོས་བསྡུའི་ལས་གནས་ལས་གནས་དབྱུང་བཏང་ཡོད་སྐོར་ངོ་སྤྲོད་གནང་སོང་། དེ་བཞིན་གསར་འགོད་པས་ལ་སྤྱི་ལགས་སུ་རོགས་འདེགས་བྱེད་མཁན་གྱི་དགེ་རྒན་དེའི་ཁོང་གིས་ཁ་སང་གི་འོས་བསྡུའི་རྙོག་གླེང་དེར་ཁས་ལེན་གནང་ཡོད་མེད་ཀྱི་ཐད་ནས་བཀའ་འདྲི་ཞུས་པར། རོགས་འདེགས་བྱེད་མཁན་གྱི་དགེ་རྒན་དེ་དང་འོས་ཤོག་འཕེན་མཉན་གྱི་དོ་བདག་གཉིས་ངོ་གཏུག་གིས་གནས་ཚུལ་ཞིབ་བསྡུར་བྱས་པའི་སྐབས་སུ་དགེ་རྒན་དེའི་སྐད་ཆར་ཆ་འཇོག་བྱེད་དཀའ་བའི་གནས་སུ་གྱུར་ཡོད་སྟབས། དབུས་འོས་བསྡུ་ལས་ཁང་ལ་སྙན་གསེང་ཞུས་ཏེ་འོས་ཤོག་འཕངས་ཟིན་པའི་མི་ ༡༩༢ གྱིས་བསྐྱར་དུ་འོས་ཤོག་འཕངས་ཡོད་པར་ངོ་སྤྲོད་གནང་སོང་། གཞི་རྩའི་རྒྱ་གར་གྱི་ནང་ཁུལ་ལྟ་བུར་མཚོན་ན་ཁ་སང་གི་འོིས་བསྡུ་དེ་ཞོགས་པའི་ཆུ་ཚོད་ ༨ པ་ནས་དགོང་དྲོའི་ཆུ་ཚོད་ལྔ་བའི་བར་དུ་འོས་འཕེན་གནང་གྲུབ་དགོས་བའི་དབུས་འོས་ལས་ཁང་གི་སྒྲིག་གཞི་སྔོན་སོང་ལྟར། གསར་འགོད་པས་འོས་བསྡུ་བསྐྱར་དུ་གནང་བ་བརྒྱུད་ནས་དགོང་དྲོའི་ཆུ་ཚོད་ ༧ པའི་བར་དུ་འོས་བསྡུ་མཚམས་འཇོག་གནང་མ་ཐུབ་པའི་གནས་ཚུལ་ཞིག་ཡོང་བཞིན་པ་དེར་དབུས་འོས་བསྡུ་ལྷན་ཁང་གི་ཆོག་མཆན་ཐོབ་ཡོད་མིན་དང་། འོས་བསྡུའི་ཁྲིམས་སྒྲིག་གི་དགོངས་དོན་དང་འགལ་འཛོལ་བྱུང་བར་ངོས་འཛིན་གནང་གི་ཡོད་མེད་ཀྱི་ཐད་ནས་བཀའ་འདྲི་ཞུས་པར་ཁོང་གིས། འོས་བསྡུ་བསྐྱར་དུ་བྱེད་དུས་ཆུ་ཚོད་གསུམ་པ་ཡིན་པར་བརྟེན་ཆུ་ཚོད་ཏོག་ཙམ་འཕར་འགྱངས་ཞུ་དགོས་བར་འཁེལ་ཡོད་པ་དང་། དེ་ནི་ས་གནས་འོས་བསྡུ་ལས་ཁང་གི་འགན་དབང་འོག་གི་གུ་ཡངས་ཀྱི་རྣམ་པ་ཞིག་ཡིན་པར་ངོས་འཛིན་གནང་བཞིན་ཡོད་པར་གསུངས་སོང་།དེ་བཞིན་ཁོང་གིས་གཞི་རྩའི་འོས་བསྡུ་བསྐྱར་དུ་བྱས་པ་བརྒྱུད་ནས། མི་མང་གི་སེམས་སུ་འོས་བསྡུའི་ལས་རིམ་དེ་དྲང་པོ་མ་བྱུང་བ་ལྟ་བུའི་དོགས་གཞི་རིགས་ཡོངས་སུ་སེལ་ཟིན་ནའང་། མང་ཚོགས་ཀྱིས་དགེ་རྒན་དེའི་དྲང་བདེན་མིན་པའི་འགལ་འཛོལ་གྱི་བྱས་ཉེས་དེར་འོས་བསྡུའི་ཁྲིམས་སྒྲིག་གི་དགོངས་དོན་འོག་ཉེས་ཆད་གཅོད་དགོས་བའི་དགོངས་ཚུལ་བྱུང་གི་ཡོད་པ་ལྟར། དེ་རིང་དེར་འབྲེལ་གྱི་ཚོགས་འདུ་ཞིག་འཚོག་རྒྱུ་ཡིན་པར་གསུངས་སོང་། གཞི་རྩའི་ཁ་སང་གི་འོས་བསྡུའི་ལས་རིམ་དེ་སྤྱི་ཡོངས་ཀྱི་ཆ་ནས་རྙོག་གླེང་གི་རིགས་མེད་པར་ལེགས་འགྲུབ་བྱུང་ཡོད་ནའང་། མི་རེ་འགའི་རང་འོས་ཤོག་གི་ངོ་བཤུས་པར་བླངས་ཏེ་རང་གི་ངོ་དེབ་ཏུ་སྤེལ་བ་སོགས་ཀྱི་གནད་དོན་ཁག་ཅིག་སྤྱི་ཚོགས་དྲ་ལམ་དུ་ཐོན་ཡོད་པ་དང་། དེ་བཞིན་རང་བཙན་ལག་དེབ་དེབ་སྐྱེལ་གྱི་ཁྲོད་ནས་མི་སྒེར་གྱི་ཆོལ་ཁོངས་དེབ་སྐྱེལ་བྱས་བ་ནོར་བ་དང་། གཞན་ཡང་དེབ་སྐྱིལ་བྱས་ཟིན་ནའང་། སྲིད་སྤྱི་ཞེས་པའི་ཡིག་འབྲུ་གཉིས་འཁོད་མེད་པ་སོགས་ཀྱི་གནད་དོན་དང་འབྲེལ་ནས་མི་འགའ་ཞིག་གིས་དུས་ཐོག་ཏུ་འོས་ཤོག་བླུགས་མ་ཐུབ་སོགས་ཀྱི་གནད་དོན་ཁག་ཅིག་བྱུང་འདུག

ཁ་སང་ཕྱི་ཟླ་ ༡ ཚེས་ ༣ ཉིན་བྱེས་འཁོད་བོད་མི་ཚོས་མང་གཙོའི་ཁེ་དབང་ལོངས་སུ་སྤྱད་ནས་ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་མཉམ་ཞུགས་དང་འབྲེལ། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་སྩལ་གནང་བའི་མང་གཙོ་དེ་རྒྱལ་སྤྱིའི་མང་གཙོའི་རྒྱལ་ཁབ་ཁག་དང་དཔུང་པ་མཉམ་གཤིབ་ཀྱིས་འགྲོ་བཞིན་པ་འདིས་རྒྱ་གཞུང་ལ་བརྡ་ལན་གསལ་པོ་ཞིག་བཏང་ཡོད་པ་གསུངས་ཡོད།ཁ་སང་བཙན་བྱོལ་བོད་མིའི་གནས་ཡུལ་རྒྱ་གར་ནང་གི་གཞིས་སྒར་ཁག་ཏུ་བོད་མི་ཚོས་མང་གཙོའི་ཁེ་དབང་ལོངས་སུ་སྤྱད་ནས་ ༢༠༢༡ ལོའི་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་དངོས་སུ་དབུ་འཛུགས་གནང་ཡོད་པ་ལྟར། འདི་ག་རྒྱ་གར་བྱང་ཕྱོགས་༸རྒྱའི་བའི་བཞུགས་སྒར་དྷ་རམ་ས་ལར་མཚོན་ན་འོས་བསྡུ་གནང་ཡུལ་གྱི་ས་ཚིགས་ ༡༦ ཐོག་བོད་མི་སེར་སྐྱ་མི་མང་རྣམས་འཚང་ཁ་ཤིག་ཤིག་ངང་ཕེབས་ཏེ་འོས་ཤོག་འཕངས་ཡོད་ཅིང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་ལྷན་ཁང་ཁག་གི་བཀའ་བློན་རྣམས་དབུས་སྨན་རྩིས་ཁང་དུ་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུར་ཆ་ཤས་བཞེས་ཡོད།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་གསར་ཁང་ཁག་གི་བཅར་འདྲིར་དང་ལེན་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱེས་འཁོད་བོད་མི་རྣམས་འཛམ་གླིང་ཡུལ་གྲུ་གང་སར་གནས་ཀྱང་ཚང་མས་མང་གཙོའི་ཁེ་དབང་ལོངས་སུ་སྤྱད་ནས་འོས་བསྡུར་ཆ་ཤས་བཞེས་ཡོད་པ་དང་ལྷག་དོན་བོད་ནང་གི་བོད་མིའི་མངོན་འདོད་ནི་མང་གཙོ་ཡིན་པ་དང་། རྒྱ་ནག་ནང་ཡོད་པའི་རྒྱ་རིགས་མང་ཚོགས་རྣམས་ཀྱི་མངོན་འདོད་ཀྱང་མང་གཙོ་ཡིན་སྟབས། རྒྱ་གཞུང་གིས་བཙན་བྱོལ་བོད་མི་རྣམས་ཀྱིས་མང་གཙོའི་ལམ་བཟང་ཕྱག་བསྟར་གནང་ཕྱོགས་ལས་མིག་དཔེ་ལེན་དགོས་གལ་ཡིན་པ་གསུངས་ཡོད།དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་ནས་ཐེ་ཝན་དང་ཧོང་ཀོང་ནང་དམ་དྲག་བཀག་སྡོམ་ཤུགས་ཆེ་བྱེད་ཀྱི་ཡོད་ཀྱང་མང་ཚོགས་རྣམས་ཀྱིས་མང་གཙོ་ཕྱག་བསྟར་ཇི་ལྟར་གནང་བཞིན་པ་དེ་དག་ལ་བལྟས་ནས་མང་གཙོ་འདི་ཧ་ཅང་གལ་ཆེན་པོ་ཆགས་ཀྱི་ཡོད་པ་དང་ལྷག་དོན་བོད་ནི་རྒྱ་ནག་གིས་བཙན་བཟུང་འོག་ཉིན་རེ་བཞིན་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་དེ་ལྟར་ཡང་། བཙན་བྱོལ་བོད་མི་རྣམས་ཀྱིས་རྒྱ་གཞུང་གིས་ཀླ་ཀློ་ལྟ་བུའི་བྱ་སྤྱོད་སྤེལ་བཞིན་པའི་གནས་སྟངས་འོག་དཀའ་སྡུག་ཚད་མེད་མྱངས་དང་མྱོང་བཞིན་པའི་གཞིས་ལུས་བོད་མི་རྒྱ་ཆེ་མང་ཚོགས་དུས་ནམ་ཡང་བརྗེད་ཐབས་མེད་ཅེས་གསུངས་འདུགསྲིད་སྐྱོང་བློ་བཟང་སེང་གེ་མཆོག་གིས་ང་ཚོའི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཟུང་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཚད་ལྡན་ཞིག་རྩོད་ཀྱི་ཡོད་པ་ལྟར་མུ་མཐུད་ནས་དེ་ལྟར་གནང་རྒྱུ་ཡིན་ཞེས་འགྲེལ་བརྗོད་དང་སྦྲགས། ད་ལན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༧ པའི་བོད་མི་མང་སྤྱི་འཐུས་བཞེངས་མཁན་ཡོངས་ལ་རྗེས་སུ་ཡི་རང་དང་ལྷག་དོན་སྲིད་སྤྱི་གཉིས་ཀྱི་འོས་མིར་གང་ཟག་སུ་མི་སུ་འདྲ་ཞིག་ཕེབས་ཀྱང་། ཁོང་རྣམ་པས་བོད་མིའི་སྒྲིག་འཛུགས་ཆེད་དུ་ཐུགས་འཁུར་བཞེས་དགོས་པ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་དང་མཐུན་པའི་ཞབས་ཕྱི་ཞུ་དགོས་ཡོད་པར་བརྟེན་ཕྱག་ལས་གང་གནང་ཐམས་ཅད་ལམ་ལྷོང་ཡོང་བའི་སྨོན་འདུན་དང་ང་ཚོས་ཁོང་རྣམ་པར་རྡོག་རྩ་ཆིག་སྒྲིལ་གནང་ཐོག་རྒྱབ་སྐྱོར་གནང་དགོས་གལ་ཡིན་པ་སོགས་གསུངས་འདུགགཞི་རྩའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་སྐབས་འོས་འཕེན་པའི་མིང་གཞུང་དེབ་སྐྱེལ་གནང་མཁན་མི་གྲངས་ཁྲི་བརྒྱད་ལྷག་བྱུང་ཡོད་པ་དང་། ལྷག་པར་དུ་འདི་ལོ་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ཁྱོན་འོས་བསྡུ་གནང་ཡུལ་གྱི་སྡེ་ཚན་མི་འདྲ་བ་ ༥༠༠ ལྷག་གྲ་སྒྲིག་གནང་ཡོད་པར་མ་ཟད། བཙན་བྱོལ་བོད་མིའི་འོས་བསྡུ་ལས་རིམ་ཡོངས་རྫོགས་ལེགས་གྲུབ་ཀྱིས་ཚོུད་ ༢༤ རྗེས་སུ་ས་གནས་སོ་སོར་ཉིན་གྲངས་བདུན་གྱི་ནང་ཚུད་སྔོན་འགྲོའི་འོས་ཤོག་གྲངས་བཤེར་གནང་ནས་དབུས་འོས་བསྡུ་ལས་ཁང་ལ་ཕུལ་དགོས་ཀྱི་འདུག དབུས་འོས་བསྡུ་ལས་ཁང་ནས་ཕྱི་ཟླ་ ༢ ཚེས་ ༨ ཉིན་སྒྲིག་གསལ་འོས་དམིགས་དྲུག་ལས་མ་མང་བ་སྔོན་གྲོའི་འོས་གཞིར་གསལ་བསྒྲགས་གནང་གཏན་ཁེལ་ཡོད་པ་རེད།

ཁ་སང་ཕྱི་ལོ་ ༢༠༢༡ ལོའི་ཕྱི་ཟླ་ ༡ ཚེས་ ༣ ཉིན་བཙན་བྱོལ་བོད་མི་རྣམས་ཀྱིས་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་མཉམ་ཞུགས་གནང་ཡོད་པ་དང་། ཐོག་མའི་འཆར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམ་རྐྱེན་པས་ཐེངས་འདིའི་འོས་བསྡུ་ཆེན་མོར་དོ་ཕོག་དང་བར་ཆད་རིགས་འཕྲད་སྲིད་པར་ཐུགས་འཚབ་ཆེན་པོ་བྱུང་ཡོད་ཀྱང་། རྒྱལ་ཁབ་ཁག་ཅིག་ཏུ་སྔོན་འགྲོའི་འོས་བསྡུ་ཉིན་གཅིག་དང་ཁག་ཅིག་ཏུ་ཉིན་གཉིས་བཅས་སོ་སོར་སྔ་སྣུར་གནང་ཡོད་པ་དང་། གཞན་ཡང་ས་གནས་སོ་སོའི་མཐུན་རྐྱེན་ལ་གཞིགས་ཏེ་ཟུར་བཀག་ལ་བཞུགས་པའི་བོད་མི་མི་ཉུང་བ་ཞིག་འོས་བསྡུར་མཉམ་ཞུགས་གནང་མ་ཐུབ་པ་བྱུང་བ་མ་གཏོགས་ད་ལྟ་བར་དུ་ངལ་བ་ཆེ་བ་གང་ཡང་འཕྲད་མེད་པ་རེད།ད་ཆ་སྔོན་འགྲོའི་འོས་བསྡུ་ཆེན་མོ་ལེགས་གྲུབ་དང་བསྟུན་མང་ཚོགས་ཁྲོད་དྲི་བ་ཁག་ཅིག་གླེང་སློང་གནང་བཞིན་པ་ནི་འོས་སྒམ་བདག་གཉེར་དང་གྲངས་བཤེར་གནང་ཕྱོགས། དེ་བཞིན་འོས་བསྡུའི་གྲུབ་འབྲས་གསལ་བསྒྲགས་གནང་དུས་ནམ་ཡིན་དེ་དག་ཆགས་ཡོད་པ་རེད།རླུང་འཕྲིན་ཁང་ལ་ཁ་སང་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་སྔོན་འགྲོའི་འོས་བསྡུ་ཆེན་མོ་གྲུབ་ཟིན་རྗེས་ཕྱག་ཚོད་ཉི་ཤུ་རྩ་བཞིའི་རྗེས་སུ་་གྲངས་བཤེར་གནང་རྒྱུ་དབུ་འཛུགས་གནང་དགོས་སྟབས་ས་གནས་ཁག་ཁ་ཤས་ཀྱིས་སྔོན་འགྲོའི་འོས་བསྡུ་སྔ་སྣུར་གནང་རྐྱེན་འོས་སྒམ་ཉིན་གྲངས་གཅིག་དང་གཉིས་ཀྱི་རིང་ཉར་གནང་དགོས་པ་ཆགས་ཡོད་ཀྱང་། ས་གནས་ཁག་ཏུ་འོས་སྒམ་ཇི་ཡོད་རྣམས་བདག་གཉེར་ལེགས་པོ་གནང་གི་ཡོད་སྐོར་གསུངས་ཡོད། སྤྱིར་བཙན་བྱོལ་བོད་མའི་འོས་བསྡུའི་སྒྲིག་གཞིའི་ནང་གསལ་དོན་ལྟར་ན། འོས་སྒམ་ལ་རྟགས་ཐེལ་རྒྱག་པའི་སྐབས་ས་གནས་འོས་བསྡུ་ལས་ཁང་དུ་འགན་འཛིན་དང༌འགན་འཛིན་ལས་རོགས། ཟུར་དཔང་གི་གསུམ་ཆ་གཉིས་ངེས་པར་དུ་འཛོམས་དགོས་པ་དང་། བཙན་བྱོལ་བོད་མིའི་སྔོན་འགྲོའི་འོས་དེ་ཡོངས་སུ་གྲུབ་ཟིན་པའི་རྗེས་ཀྱི་ཕྱག་ཚོད་ཉི་ཤུ་རྩ་བཞིའི་རྗེས། ཕྱི་ལོ་ ༢༠༢༡ ལོའི་ཕྱི་ཟླ་  ༡ ཚེས་ ༥ ནས་ཕྱི་ཚེས་ ༡༡ བར་ཉིན་གྲངས་ ༧ རིང་འོས་ཤོག་གྲངས་བཤེར་གནང་རྒྱུའི་དུས་ཚོད་བཞག་ཡོད་པ་རེད།དེ་རྗེས་ཕྱི་ཚེས་ ༢༢ ནང་ཚུད་སྔོན་འགྲོའི་འོས་ཤོག་གི་བྱུང་སོང་བསྡད་གསུམ་གྱི་གནས་སྟངས་དང་གྲངས་བཤེར་ཕྱོགས་བསྡོམས་དབུས་འོས་བསྡུ་ལས་ཁང་དུ་འབྱོར་ནས་ཕྱི་ཟླ་ ༡ ཚེས ༢༩ ནས་ཕྱི་ཟླ་ ༢ ཚེས་ ༠༧ བར་ལ་དབུས་འོས་བསྡུ་ལས་ཁང་ནས་སྔོན་འགྲོའི་འོས་ཤོག་གྲངས་བཤེར་ཕྱོགས་བསྡོམས་གནང་རྗེས། ཕྱི་ལོ་ ༢༠༢༡ ལོའི་ཕྱི་ཟླ་ ༢ ཚེས་ ༠༨ ཉིན་སྲིད་སྤྱི་གཉིས་ཀྱི་སྔོན་འགྲོའི་འོས་གཞིའི་གསལ་བསྒྲགས་དང་། དེ་བཞིན་ཕྱི་ཟླ་ ༣ ཚེས་ ༢༡ ཉིན་དངོས་གཞིའི་འོས་གཞི་གསལ་བསྒྲགས་གནང་རྒྱུ་ཡིན་པ་རེད།དེའི་བར་ན། ཨ་རི་ནང་དེ་སྔ་ས་གནས་ཁག་གི་འོས་སྒམ་ལ་རྟགས་ཐེལ་རྒྱག་པའི་སྒོ་ནས་ས་གནས་འོས་བསྡུ་ལས་ཁང་གི་འགན་འཛིན་དང༌འགན་འཛིན་ལས་རོགས། ཟུར་དཔང་གི་གསུམ་ཆ་གཉིས་ངེས་པར་དུ་ཨ་རི་དོན་གཅོད་ལས་ཁུངས་སུ་ཕེབས་ནས་གྲངས་བཤེར་གནང་གི་ཡོད་རུང་། འདི་ལོར་ཏོག་དབྱིབས་གཉེན་རིམས་ཀྱི་རྐྱེན་གྱིས་དབུས་འོས་བསྡུ་ལས་ཁང་ནས་བཀའ་འཁྲོལ་གནང་བའི་སྒོ་ནས་ས་གནས་ཁག་གི་འོས་སྒམ་བསྣམས་ནས་སྐུ་ཚབ་དོན་ཁང་དུ་ཆེད་བཅར་ཞུ་མི་དགོས་པར་ས་གནས་འོས་བསྡུའི་ཁོངས་སུ་འཕྲལ་སེལ་གྱི་འོས་བསྡུའི་འགན་འཛིན་ལས་རོགས་བསྐོ་བཞག་གནང་སྟེ་ཕྱི་ཚེས་ ༥ ནས་ས་གནས་སོ་སོར་གྲངས་བཤེར་གནང་གི་ཡོད་པ་རེད་འདུག ཁ་སང་འདི་ག་རླུང་འཕྲིན་ཁང་གིས་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་སུ་ས་གནས་ཀྱི་འོས་བསྡུ་དང་འབྲེལ་བའི་སྐོར་ལ་བཀའ་འདྲི་ཞུས་སྐབས་འདི་ལོར་ཏོག་དབྱིབས་གཉན་རིམས་དང་ས་གནས་གཞུང་གི་ཁྲིམས་སྒྲིག་སོགས་དུ་མར་བརྟེན་ནས་འོས་བསྡུའི་ལས་རིམ་ལ་ཉིན་གྲངས་གཉིས་དང་གསུམ་བཅས་སོ་སོར་སྔ་སྣུར་བྱ་རྒྱུ་གཙོས། དེ་སྔ་ཨ་རིའི་ཁྱབ་ཁོངས་ས་གནས་ཁག་གི་འོས་ལེགས་གྲུབ་རྗེས་སུ་ས་གནས་འོས་བསྡུ་ལས་ཁང་གི་འཐུས་མི་གསུམ་ཆ་གཉིས་ནས་འོས་སྒམ་བསྣམས་ནས་དོན་ཁང་དུ་གྲངས་བཤེར་སླད་ཆེད་ཕེབས་གནང་དགོས་ཀྱི་ཡོད་སྟབས། དོན་ཁང་དུ་འཐུས་མི་བརྒྱ་ལྷག་ལྷན་འཛོམས་བྱུང་གི་ཡོད་སྟབས། འདི་ལོར་ཏོག་དབྱིབས་གཉན་རིམས་དང་ཡུལ་ཁྲིམས་ལ་གཞིགས་ཏེ་དབུས་འོས་བསྡུ་ལས་ཁང་ནས་བཀའ་འཁྲོལ་གནང་ཐོག་ས་གནས་འོས་བསྡུའི་ཁོངས་སུ་འཕྲལ་སེལ་གྱི་འོས་བསྡུའི་འགན་འཛིན་ལས་རོགས་བསྐོ་བཞག་གནང་ནས་ཕྱི་ཚེས་ ༥ ནས་ས་གནས་སོ་སོར་གྲངས་བཤེར་གནང་གི་ཡོད་དང་། གྲངས་བཤེར་གྲུབ་མཚམས་སུ་གློག་འཕྲིན་བརྒྱུད་ཕུལ་དགོས་ཀྱི་ཡོད་པར་མ་ཟད། གློག་འཕྲིན་བརྒྱུད་ཐོ་གཞུང་འབྱོར་མཚམས་སུ་རྒྱལ་སའི་ཁུལ་གྱི་ས་གནས་འོས་བསྡུའི་ཚོགས་ཆུང་གི་ཚོགས་མི་རྣམས་གདན་ཞུ་གནང་སྟེ་ཕྱོགས་བསྡོམས་གནང་ནས་གསལ་བསྒྲགས་གནང་རྒྱུ་ཡིན་པ་གསུངས་ཡོད།ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རི་ཁུལ་དུ་བོད་མི་ཆིག་ཁྲི་བཞི་སྟོང་ལྷག་ནས་དེབ་སྐྱེལ་གནང་ཡོད་པ་དང་། འོས་བསྡུ་བྱ་ཡུལ་གྱི་སྡེ་ཚན་སུམ་ཅུ་སོ་གཅིག་ཆེད་འཛུགས་གནང་སྐོར་གསུངས་སོང་།

ཉེ་ལམ་ཨ་རིའི་སྲིད་འཛིན་ Donald Trump མཆོག་གིས་ Tibet Policy and Support Act  ༢༠༢༠ ཞེས་ལོ་རྒྱུས་ཀྱི་རང་བཞིན་ལྡན་པའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་མཚན་རྟགས་བསྐྱོན་ནས་ཁྲིམས་སུ་བཅས་ཡོད་པ་རེད། གཞི་རྩའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་དེ་སྔ་ཕྱི་ལོ་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་བསྐྱར་བཅོས་གནང་བའི་ཁྲིམས་འཆར་ཞིག་ཆགས་ཀྱི་ཡོད་པ་དང་། ཁྲིམས་འཆར་དེའི་འོག་ཨ་རི་གཞུང་གི་བོད་དོན་དམིགས་བསལ་སྐུ་ཚབ་བསྐོ་བཞག་གནང་རྒྱུ་དང་བོད་རྒྱ་ཞི་མོལ་ལ་རྒྱབ་སྐྱོར་གནང་རྒྱུ། དེ་བཞིན་བོད་ནང་ཨ་རིའི་གཞུང་ཚབ་ལས་ཁུངས་གསར་འཛུགས་སོགས་ཀྱི་དེ་སྔའི་འབྲུ་དོན་ཐོག་གལ་ཆེའི་གནད་དོན་ཁག་ཅིག་ཁ་སྣོན་གནང་བའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དང་། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་ཆབ་སྲིད་ཀྱི་ཉེས་ཆད་ལྕི་མོ་གཅོད་རྒྱུ་ཡིན་པ། ༸གོང་ས་མཆོག་གི་མང་གཙོ་གོང་འཕེལ་ཐད་ཀྱི་མཛད་རྗེས་ལ་ངོས་འཛིན་དང་ཆེ་བསྟོད། དེ་བཞིན་བོད་མིའི་སྒྲིག་འཛུགས་འདི་བཞིན་བཙོན་བྱོལ་བོད་མིའི་སྐུ་ཚབ་དང་མངོན་འདོད་མཚོན་ཐུབ་མཁན་གྱི་སྒྲིག་འཛུགས་ཤིག་དང་བོད་མིའི་སྒྲིག་འཛུགས་ཀྱི་འགོ་ཁྲིད་བཅས་ངོས་འཛིན་གནང་དགོས་པ།བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཡན་ལག་གི་ལས་ཁུངས་མ་བཙུག་བར་དུ་ཨ་རིར་རྒྱ་ནག་གཞུང་ཚབ་ཡན་ལག་ལས་ཁུངས་གསར་འཛུགས་མི་ཆོག་པ། བོད་ནང་ཚོང་འབྲེལ་བྱེད་མཁན་རྣམས་ནས་རྒྱལ་ཚོགས་ཀྱི་ཁྲིམས་སྒྲིག་ལྟར་ཚོང་འབྲེལ་བྱེད་དགོས་པ། བོད་མཐོ་སྒང་གྱི་ཁོར་ཡུག་སྲུང་སྐྱོབ་བྱེད་དགོས་པ། བོད་ཕྱི་ནང་གཉིས་ཀྱི་བོད་མིར་རང་གི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་གནང་ཕྱིར་ཕྱི་ལོ་ ༢༠༢༥ བར་རོགས་དངུལ་སྔར་བཞིན་གནང་སྐྱོང་ཡོང་བ་སོགས་ཀྱི་འབྲུ་དོན་ཁག་ཆེད་བཀོད་ཀྱིས་ཁ་སྣོན་གནང་ཡོད་པ་རེད།རླུང་འཕྲིན་ཁང་གིས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་སུ་ཁྲིམས་འཆར་གཏན་འབབ་དང་འབྲེལ་ནས་བཀའ་འདྲི་ཁག་ཅིག་ཞུས་ཡོད།

བདུན་ཕྲག་འདིའི་རེས་གཟའ་ཉིན་མ་སྟེ་ཕྱི་ཚེས་ ༣ ཉིན་བཙན་བྱོལ་བོད་མི་གནས་སྡོད་འཛམ་གླིང་ས་ཕྱོགས་གང་སར་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོ་གནང་གི་ཡོད་པ་དེ་ལྟར་ཡང། དབྱིིན་ཡུལ་ཁུལ་དུ་ད་ཆ་ Mutant Covid ཞེས་ཏོག་དབྱིབས་གཉན་རིམས་ཀྱི་ངོ་བོ་འགྱུར་ལྡོག་གིས་གཉན་སྲིན་གསར་པ་ཐོན་པའི་དཀའ་ངལ་དང་འབྲེལ་དབྱིན་ཡུལ་ནང་གྱི་བོད་མི་ཚོས་ཐེངས་འདིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་དེ་ཉིན་གཅིག་སྔ་སྣུར་གནང་གཏན་འཁེལ་འདུག ད་ཆ་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་དཀའ་ངལ་སྤྱི་དང་ལྷག་པར་དུ་ཟླ་བ་འདིའི་ནང་དབྱིན་ཡུལ་ནང་ Mutant Covid ཞེས་ཏོག་དབྱིབས་གཉན་རིམས་ཀྱི་ངོ་བོ་འགྱུར་ལྡོག་གྱིས་གཉན་སྲིན་གསར་པ་ཐོན་ཏེ་ད་ཆ་ཁུལ་དེའི་རྒྱལ་ས་ལོ་ཊོན་གཙོ་བོར་གྱུར་པའི་དབྱིན་ཡུལ་རྒྱལ་ནང་དུ་ནད་པའི་གྲངས་འབོར་ཉིན་རེ་བཞིན་ཇེ་ཆེར་འཕར་བཞིན་འདུག་པ་མ་ཟད། ད་ཆ་དབྱིན་ཡུལ་གཞུང་གིས་རྒྱལ་ས་ལོ་ཊོན་ཁུལ་དུ་ཚད་མཐོའི་ཁྱིམ་སྡོད་བཀའ་བརྒྱ་བསྡམས་ཡོད་པ་རེད།གསར་འགོད་པས་དབྱིན་ཡུལ་དོན་གཅོད་ལས་བྱེད་དང་ས་གནས་འོས་བསྡུའི་འགན་འཛིན་ལས་རོགས་ཚེ་རིང་མཚོ་མོ་ལགས་སུ་ད་ལྟའི་ས་གནས་ཀྱི་ཛ་དྲག་གནས་བབ་དེའི་འོག་དབྱིན་ཡུལ་ཁུལ་དུ་སྲིད་སྤྱི་གཉིས་ཀྱི་སྔོན་འགྲོ་འོས་བསྡུའི་ལས་དོན་ལེགས་གྲུབ་ཐུབ་མིན་ཐད་བཅར་འདྲི་ཞུས་པར་ཁོང་གིས་ས་གནས་འོས་བསྡུ་ལས་ཁང་གིས་སྲིད་སྤྱི་གཉིས་ཀྱི་སྔོན་འགྲོའི་ཀྱི་འོས་བསྡུའི་ལས་དོན་ཚགས་ཚུགས་དང་དབྱིན་ཡུལ་ཁུལ་གྱི་བོད་མི་ཚོས་འོས་ཤོག་སྟབས་བདེ་ངང་འཕེན་ཐུབ་ཕྱིར་དེ་སྔ་དང་མི་འདྲ་བར་དབྱིན་ཡུལ་ནང་དུ་འོས་བླུགས་སའི་ས་ཚིགས་འཕར་མ་བཞི་གོ་སྒྲིག་གནང་ཡོད་པ་མ་ཟད། དེ་བཞིན་དབུས་འོས་བསྡུ་ལས་ཁང་ལ་ས་གནས་ཀྱི་གནས་བབ་དང་དཀའ་ངལ་ཇི་ཡོད་ཁག་སྙན་སེང་ཞུས་ཏེ་བཀའ་འཁྲོལ་དང་བཅས་རྒྱལ་ས་ལོ་ཊོན་ཁུལ་དུ་ཡོད་པའི་འོས་བསྡུའི་ས་ཁུལ་ཁག་གསུམ་ལ་ཕྱི་ཚེས་ ༢ རེས་གཟའ་སྤེན་པའི་ཉིན་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་དེ་ཉིན་གཅིག་སྔར་སྣུར་གནང་གཏན་འཁེལ་ཡོད་པ་གསུངས་ཡོད། དེ་བཞིན་ཁོང་གིས་དབྱིན་ཡུལ་དོན་གཅོད་ཀྱི་ཁྱབ་ཁོངས་རྒྱལ་ཁབ་གཞན་ནོར་ཝེ་དང་ཌན་མག སུ་ཌན། ཨར་ལན་ཌི། དེ་བཞིན་པོ་ལན་ཌི་བཅས་ཡོ་རོབ་རྒྱལ་ཁབ་ལྔ་ནང་དུ་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོའི་དུས་ཚོད་ལ་འགྱུར་གང་ཡང་ཕྱིན་པར་གསུངས་སོང་། སྤྱིར་གསར་འགོད་པས་སླེབས་ལ་ཉེ་བའི་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་དང་འབྲེལ་ད་བར་དུ་ཡོ་རོབ་རྒྱལ་ཁབ་གཞན་ཁག་གྱི་གནས་བབ་རྒྱུས་ལོན་ཞུས་ཏེ་ཤེས་རྟོགས་བྱུང་བར་གཞིགས་ན། དབྱིན་ཡུལ་ཕུད་པའི་ཡོ་རོབ་རྒྱལ་ཁབ་གཞན་ཁག་ཏུ་ད་ལྟའི་ཆར་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོའི་དུས་ཚོད་ལ་འགྱུར་བ་གང་ཡང་མེད་པར་དབུས་འོས་བསྡུ་ལས་ཁང་གིས་བཀོད་ཁྱབ་ཇི་གནང་ལྟར་ཚེས་ ༣ ཉིན་གནང་གཏན་འཁེལ་འདུག

ཨ་རིའི་གྲོས་ཚོགས་ནས་ཚད་མཐོའི་རྒྱབ་སྐྱོར་ཐོག་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཁ་ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཡུལ་དེའི་ཁྲིམས་སུ་བཅས་འདུགཟླ་བ་འདིའི་ཚེས་ ༢༡ ཉིན་ཨ་རིའི་གྲོས་ཚོགས་གོང་འོག་གཉིས་ནས་ཚད་མཐོའི་རྒྱབ་སྐྱོར་ཐོག་ Tibet Policy and Support Act 2020 ཞེས་ལོ་རྒྱུས་ཀྱི་རང་བཞིན་ལྡན་པའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བར་བོད་མིའི་སྒྲིག་འཛུགས་ཀྱིས་གཙོས་ས་གནས་བོད་མི་དང་བོད་དོན་རྒྱབ་སྐོར་བ་ཡོངས་ཀྱིས་དགའ་བསུ་ཞུས་ཏེ་སླད་མར་ཁྲིམས་འཆར་དེ་ཨ་རིའི་ཁྲིམས་སུ་བཅས་པར་སྲིད་འཛིན་ཌམ་མཆོག་གི་མཚན་རྟགས་གནང་སྐྱོང་ཡོང་བའི་འབོད་སྐུལ་ཞུ་མུས་ཁྲོད་ཁ་ཉིན་རེས་གཟའ་ཉི་མའི་ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་ཨ་རིའི་གཞུང་གི་སྔོན་རྩིས་ཁྲིམས་གཞིར་མཚན་རྟགས་བསྐྱོན་ཏེ་ ༢༠༢༠ ལོའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་བཞིན་ཨ་རིའི་གཞུང་གི་ཁྲིམས་སུ་གཏན་འབེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་བརྟན་པོ་དང་བོད་མིའི་སྒྲིག་འཛུགས་ལ་ངོས་འཛིན་གྱི་རྣམ་པ་ཆེས་མངོན་གསལ་གནང་ཡོད།བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་དང་འབྲེལ་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྐུ་སྒེར་གྱི་ངོ་དེབ་ཐོག་དེ་འབྲེལ་ཁྲིམས་འཆར་གཏན་འབེབས་གནང་ཐུབ་པ་དེ་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་གཞིས་བྱེས་བོད་མི་ཡོངས་ཀྱིས་ཐུན་མོང་ཐོག་སྐུ་ལས་སྐྱོན་པའི་གྲུབ་འབྲས་ཤིག་ཡིན་པར་བརྟེན་ཐུགས་རྗེ་ཆེ་ཞེས་དགྱེས་ཚོར་བྱུང་སྐོར་གསུངས་འདུག བོད་མིའི་སྒྲིག་འཛུགས་ཀྱིས་དྲ་གནས་ཐོག་སྲིད་སྐྱོང་མཆོག་གིས་བོད་མིའི་སྒྲིག་འཛུགས་དང་བོད་མི་ས་ཡ་དྲུག་གི་ཚབ་ཞུས་ཏེ་ཨ་རིའི་སྲིད་འཛིན་མཆོག་ལ་ཁྲིམས་འཆར་དེར་མཚན་རྟགས་བསྐྱོན་པ་དང་ཨ་རིའི་གྲོས་ཚོགས་ནས་དེར་སྤྱི་མོས་ཐོག་གཏན་འབེབས་གནང་བ། དེ་བཞིན་ཡུལ་དེའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་ཁག་ཅིག་ནས་རྐང་འགན་བཞེས་ཏེ་ཁྲིམས་འཆར་ངོ་སྤྲོད་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད། ཁྲིམས་འཆར་དེ་ནི་གཞིས་བྱེས་བོད་མི་དང་བོད་དོན་རྒྱབ་སྐྱོར་བ་རྣམས་ལ་མཚོན་ན་ལོ་རྒྱུས་ཀྱི་རང་བཞིན་ལྡན་པ་ཞིག་དང་དེས་བོད་ནང་གི་བོད་མིར་རེ་བ་གསར་པ་ཞིག་དང་བོད་མིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་། བོད་མིའི་མང་གཙོའི་སྒྲིག་འཛུགས་ལ་སྔར་ལྷག་རྒྱབ་སྐྱོར་དང་སྲུང་སྐྱོབ་གནང་བ་ཞིག་མཚོན་སྐོར་གསུངས་འདུགརྩ་བའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་དེ་སྔ་ཕྱི་ལོ་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་བསྐྱར་བཅོས་གནང་བའི་ཁྲིམས་འཆར་ཞིག་ཆགས་ཀྱི་ཡོད་པ་དང་། ཁྲིམས་འཆར་དེའི་འོག་ཨ་རི་གཞུང་གི་བོད་དོན་དམིགས་བསལ་སྐུ་ཚབ་བསྐོ་བཞག་གནང་རྒྱུ་དང་བོད་རྒྱ་ཞི་མོལ་ལ་རྒྱབ་སྐྱོར་གནང་རྒྱུ། དེ་བཞིན་བོད་ནང་ཨ་རིའི་གཞུང་ཚབ་ལས་ཁུངས་གསར་འཛུགས་སོགས་ཀྱི་དེ་སྔའི་འབྲུ་དོན་ཐོག གལ་ཆེའི་གནད་དོན་ཁག་ཅིག་ཁ་སྣོན་གནང་བའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དང་། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་ཆབ་སྲིད་ཀྱི་ཉེས་ཆད་ལྕི་མོ་གཅོད་རྒྱུ་ཡིན་པར་མ་ཟད། ༸གོང་ས་མཆོག་གི་མང་གཙོ་གོང་འཕེལ་ཐད་ཀྱི་མཛད་རྗེས་ལ་ངོས་འཛིན་དང་ཆེ་བསྟོད། དེ་བཞིན་བོད་མིའི་སྒྲིག་འཛུགས་འདི་བཞིན་བཙན་བྱོལ་བོད་མིའི་སྐུ་ཚབ་དང་མངོན་འདོད་མཚོན་ཐུབ་མཁན་གྱི་སྒྲིག་འཛུགས་ཤིག་ཡིན་པ་དང་། བོད་མིའི་སྒྲིག་འཛུགས་ཀྱི་འགོ་ཁྲིད་ངོས་འཛིན། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་མ་བཙུག་བར་དུ་ཨ་རིར་རྒྱ་ནག་གཞུང་ཚབ་ལས་ཁུངས་གསར་འཛུགས་མི་ཆོག་པ། བོད་ནང་ཚོང་འབྲེལ་བྱེད་མཁན་རྣམས་ནས་རྒྱལ་ཚོགས་ཀྱི་ཁྲིམས་སྒྲིག་ལྟར་ཚོང་འབྲེལ་བྱེད་དགོས་པ། བོད་མཐོ་སྒང་གྱི་ཁོར་ཡུག་སྲུང་སྐྱོབ་བྱེད་དགོས་པ། བོད་ཕྱི་ནང་གཉིས་ཀྱི་བོད་མིར་རང་གི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་གནང་ཕྱིར་ཕྱི་ལོ་ ༢༠༢༥ བར་རོགས་དངུལ་སྔར་བཞིན་གནང་སྐྱོང་ཡོང་བ་སོགས་ཀྱི་འབྲུ་དོན་ཁག་ཆེད་བཀོད་གནང་ཡོད་པ་རེད།སྤྱིར་བོད་དོན་རྒྱབ་སྐྱོར་གྱི་ཁྲིམས་ཡིག་དེ་གཏན་ལ་ཕབ་རྒྱུར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཨ་རིའི་རྒྱལ་ས་ཝ་ཤིན་ཌོན་དུ་ཐེངས་ཁ་ཤས་ཆེད་ཕེབས་གནང་ཡོད་པར་མ་ཟད་བྱང་ཨ་རིའི་ཁུལ་གྱི་བོད་མི་དང་བོད་དོན་རྒྱབ་སྐྱོར་བ་རྣམས་ནས་རྒྱལ་སྤྱིའི་བོད་དོན་ལས་འགུལ་ཁང་བརྒྱུད་ཨ་རིའི་གྲོས་ཚོགས་འཐུས་མི་རྣམས་ལ་ཞུ་སྙན་དང་དངོས་སུ་མཇལ་འཕྲད་ཀྱིས་ཞུ་གཏུག་གི་ལས་འགུལ་རིམ་པ་སྤེལ་ཡོད་པ་རེད།

དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་དེ་བཞིན་ཟླ་ ༡ ཚེས་ ༣ རེས་གཟའ་ཉི་མའི་ཉིན་གནང་རྒྱུའི་གསལ་བསྒྲགས་གནང་ཡོད་པ་དེ་ལྟར་ཡང་། ཨ་རི་ཁུལ་དུ་ཏོག་དབྱིབས་གཉན་རིམས་ཀྱི་དཀའ་ངལ་དང་འབྲེལ་མི་ནི་སོ་ཊ་ཁུལ་དུ་སྔོན་འགྲོའི་འོས་བསྡུ་དེ་ཉིན་གཅིག་སྔ་སྣུར་གནང་གཏན་འཁེལ་འདུག ཉེ་ལམ་ཟླ་འདིའི་ཚེས་ ༢༦ ཉིན་མི་ནི་སོ་ཊའི་ས་གནས་འོས་བསྡུའི་ཚོགས་ཆུང་གིས་འོས་བསྡུ་དང་འབྲེལ་བཀོད་ཁྱབ་ཅིག་གནང་བར་བྱང་ཨ་རི་ཁུལ་དུ་ཏོག་དབྱིབས་གཉན་རིམས་ཁྱབ་གདལ་ཤུགས་ཆེར་འགྲོ་བཞིན་པའི་རྐྱེན་གྱིས་ས་གནས་གཅིག་ལ་མང་ཚོགས་འདུ་འཛོམས་གནང་རྒྱུར་དཀའ་ངལ་འཕྲད་སྟབས་མི་ནི་སོ་ཊ་ཁུལ་དུ་བོད་མི་རྣམས་ནས་ཟླ་ ༡ ཚེས་ ༣ ཉིན་ཉིན་བརྒྱ་དུས་གཅིག་ལ་འོས་འཕེན་གནང་རྒྱུ་ཚབ་ཏུ་ཚེས་ ༢ དང་ ༣ བཅས་སྔ་དྲོ་ཆུ་ཚོད་ ༨ པ་ནས་དགོང་དྲོ་ཆུ་ཚོད་ ༦ པ་བར་གནང་གཏན་འཁེལ་འདུགདེ་བཞིན་ཨ་རི་ཁེལ་ཕོ་ནི་ཡའི་བོད་རིགས་ཚོགས་པ་དང་། ཁེ་ན་ཌའི་གངས་ལྗོངས་ཆོས་ལྡན་གླིང་གིས་སྤྱི་ཚོགས་དྲ་ལམ་སོགས་ཀྱི་བརྒྱུད་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་དེ་བཞིན་ཟླ་ ༡ ཚེས་ ༡ དང་ ༢ དེ་བཞིན་ ༣ བཅས་སོ་སོར་གནང་རྒྱུ་གསལ་བསྒྲགས་གནང་འདུག གཞི་རྩའི་ད་ཆ་ཏོག་དབྱིབས་གཉན་རིམས་ཁྱབ་གདལ་གྱི་དུས་ཚིགས་དང་འབྲེལ་དབུས་འོས་བསྡུ་ལས་ཁང་ནས་ས་གནས་སོ་སོར་འོས་བསྡུའི་ཉིན་གཉན་རིམས་ཁྱབ་གདལ་མི་འགྲོ་བའི་ཕྱིར་མང་ཚོགས་ཁྲོད་སྤྱི་ཚོགས་རྒྱང་བཀྱེད་བསྟེན་རྒྱུ་དང་། ཁ་རས་ངེས་པར་དུ་གྱོན་དགོས་པ། དེ་བཞིན་འོས་བསྡུའི་བྱ་ཡུལ་གྱི་ས་ཚིགས་སུ་དུག་སེལ་གནང་དགོས་པ་སོགས་གསལ་བསྒྲགས་གནང་ཡོད་པར་མ་ཟད། འོས་བསྡུའི་བྱ་ཡུལ་གྱི་ས་ཚིགས་དེ་སྔ་ལས་མང་དུ་བཏང་ཡོད་པ་རེད། དེའི་ཁྲོད་ད་ཆ་དབྱིན་ཡུལ་ནང་ Mutant Covid ཞེས་ཏོག་དབྱིབས་གཉན་རིམས་ཀྱི་གཉན་སྲིན་གྱི་ངོ་བོ་འགྱུར་ལྡོག་དང་འབྲེལ་ནས་གཉན་སྲིན་དེ་འགོས་ཁྱབ་བརྒྱ་ཆ་ ༧༠ མྱུར་བ་ཡོད་པ་ར་འཕྲོད་བྱུང་བ་ལྟར།  ཉེ་ལམ་རླུང་འཕྲིན་ཁང་ནས་དབྱིན་ཡུལ་བོད་ཀྱི་སྐུ་ཚབ་དོན་ཁང་གི་ལས་བྱེད་དང་ཁུལ་དེའི་འོས་བསྡུའི་འགན་འཛིན་གྱི་ལས་རོགས་ཚེ་རིང་མཚོ་མོ་ལགས་སུ་གཉན་རིམས་ཀྱི་རླབས་རྒྱུན་གསར་པ་དེའི་ཁྲོད་བོད་མིའི་སྤྱིའི་གནས་བབ་དང་འོས་བསྡུའི་ལས་རིམ་ཁག་དུས་ཐོག་ཏུ་གནང་ཐུབ་མིན་ཐོག་བཀའ་འདྲི་ཞུས་སྐབས་ཁོང་གིས་སྤྱིར་ད་ལྟའི་ཆར་དབྱིན་ཡུལ་ནང་གི་གནས་བབ་ལ་བརྟེན་ནས་ས་གནས་བོད་མི་རྣམས་ནས་ཉིན་བརྒྱ་དུས་གཅིག་ལ་འོས་འཕེན་གནང་རྒྱུ་ཁག་པོ་ཆགས་ཡོད་སྟབས། དབུས་འོས་བསྡུ་ལས་ཁང་ལ་གནད་དེོན་དེའི་ཐད་སྙན་སེང་ཞུས་ཡོད་པ་གསུངས་ཡོད།   ད་ཆ་བོད་མི་གནས་སྡོད་ས་གནས་མང་དག་ཅིག་གི་ནང་ཏོག་དབྱིབས་གཉན་རིམས་ཀྱི་དཀའ་ངལ་ལ་བརྟེན་ནས་ས་གནས་སོ་སོའི་གནས་བབ་ལ་གཞིགས་པའི་འོས་བསྡུའི་དུས་ཚེས་སོགས་གཏན་འབེབས་གནང་ཡོད་པ་དང་སྒོས་སུ་ཉེ་ལམ་བཙན་བྱོལ་བོད་མིའི་འོས་བསྡུ་ཆེན་མོ་དང་འབྲེལ་བལ་ཡུལ་ཉེན་རྟོག་པས་བལ་ཡུལ་ཆོས་འབྱོར་ས་གནས་འགོ་འཛིན་དང་ཨེ་ཤ་ཡའི་རང་དབང་རླུང་འཕྲིན་ཁང་གིས་གསར་འགོད་པ། དེ་བཞིན་བོད་མི་གསུམ་བཅས་ཁྱོན་མི་ལྔ་འཛིན་བཟུང་གིས་ཆུ་ཚོད་ཁ་ཤས་རིང་དོ་དམ་བྱས་པའི་གནས་ཚུལ་ཐོན་ཡོད་པ་རེད། རྩ་བའི་བལ་ཡུལ་ནང་རྒྱ་ནག་གཞུང་གིས་ཤུགས་རྐྱེན་ཧ་ཅང་ཆེན་པོ་སྤྲོད་བཞིན་པའི་རྐྱེན་གྱིས་བལ་ཡུལ་གཞུང་གིས་ཁུལ་དེའི་བོད་མི་རྣམས་ནས་ཆབ་སྲིད་ཀྱི་ལས་དོན་སྤེལ་ཕྱོགས་ཐད་དམིགས་བསལ་དམ་དྲག་བྱེད་ཀྱི་ཡོད་པ་རེད། ལྷག་པར་དུ་དེ་སྔ་ཕྱི་ལོ་ ༢༠༡༡ ལོའི་འོས་བསྡུ་སྐབས་སུ་ཡང་བལ་ཡུལ་གཞུང་ནས་འོས་སྒམ་ཡོངས་འཕྲོག་པའི་གནས་ཚུལ་བྱུང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ལོར་བོད་ནས་རྒྱ་གར་ལ་བཙན་བྱོལ་དུ་ཕེབས་སྐབས་དམིགས་བསལ་ཆིབས་ཞབས་སྐུ་སྲུང་ཨ་ནན་ཟླ་བ་ལགས་དགུང་ལོ་མཐོ་པོར་ཕེབས་ཁར་སྐུ་གཟུགས་བདེ་མིན་རྐྱེན་གྱིས་སྨན་བཅོས་ཞབས་རིམ་ཞུ་སྒོ་ཁག་ཞུས་ཀྱང་མཐར་དྲག་སྐྱེད་མ་བྱུང་བར་ཟླ་བ་འདིའི་ཚེས་ ༢༦ ཕྱི་དྲོ་ཚོུད་ ༤༌༣༠ ཙམ་ལ་ཨ་རིའི་མངའ་སྡེ་མི་ནི་སོ་ཊར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུགཆིབས་ཞབས་སྐུ་སྲུང་ཨ་ནན་ཟླ་བ་ལགས་ནི་ཕྱི་ལོ་ ༡༩༣༩ ལོར་བོད་ཀྱི་རྒྱལ་ས་ལྷ་སར་འཁྲུངས་ཤིང་། ཁོང་ལ་སྤུན་མཆེད་ལྔ་ཡོད་པའི་ནང་ནས་ཁོང་ཆུང་ཤོས་དེ་ཡིན་པ་དང་།  ཁོང་གི་པཱ་ལགས་དང་གཅེན་པོ་བློ་བཟང་བསྟན་འཛིན་ལགས་ཀྱང་སྐུ་སྲུང་གི་ཞབས་ཞུ་བསྒྲུབས་ཡོད་པ་མ་ཟད། བཞུགས་སྒར་རྡ་རམ་ས་ལར་༸རྒྱལ་བའི་ཕོ་བྲང་དུ་མི་ཚེ་ཧྲིལ་པོའི་རིང་ཞབས་ཞུ་བསྒྲུབས་ཡོད།ཕྱི་ལོ་ ༡༩༥༥ ལོར་ཁོང་སྐབས་དེ་དུས་ལོ་ན་བཅོ་ལྔ་ལས་སོན་མེད་ཀྱང་ནོར་བུ་གླིང་ཁར་༸རྒྱལ་བའི་སྐུ་སྲུང་དམག་མིར་འཛུལ་ཞུགས་ཀྱིས་ལོ་བཞིའི་རྗེས་ལ་སྐུ་སྲུང་དམག་མི་ངོ་མར་བསྐོ་བཞག་གནང་བར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྷ་ལྡན་སྨོན་ལམ་ཆེན་མོར་སེར་འབྲས་དགའ་གསུམ་གྱི་བསྟན་འཛིན་གྱི་སྐྱེས་ཆེན་མཁས་དབང་སྟོང་ཚོ་མང་པོའི་དབུས་སུ་གྲྭ་སྐོར་ལྷ་རམས་པའི་དམ་བཅའ་མཚན་རྟགས་བཞེས་སྐབས་བོད་ནང་རྒྱ་དམར་གྱིས་དྲག་གནོན་ཛ་དྲག་ཉེན་ཁའི་འོག་༸རྒྱལ་བའི་སྐུ་སྲུང་གི་འགན་འཁུར་ཞུས་ཡོད་པ་རེད། ཕྱི་ལོ་ ༡༩༥༩ ཕྱི་ཟླ་ ༣ ཚེས་ ༡༧ མཚན་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་འཁོར་བོད་མི་སྟོང་ཕྲག་མང་པོ་བཙན་བྱོལ་དུ་ཕེབས་སྐབས་ཕེབས་ལམ་ལ་སྐུ་ངལ་ཚད་མེད་འཕྲད་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་སྲུང་གི་འགན་འཁུར་ཞབས་ཞུས་པ་མ་ཟད། ཕྱི་ཟླ་ ༣ ཚེས་ ༣༡ ཉིན་སྤྱི་ནོར་༸གོང་ས་མཆོག་དང་སྐུ་འཁོར་ལྷན་རྒྱས་རྒྱ་གར་ས་ཆར་བདེ་འབྱོར་ཐུབ་རྗེས་བསྟན་སྲུང་དྭང་བླངས་དམག་མི་དང་འཇབ་དམག་མཉམ་དུ་ཕྱིར་ལོག་གིས་རྒྱ་དམག་ལ་འཐབ་འཛིང་ཆེད་དུ་བོད་ལ་བསྐྱོད་ཡོད་ཀྱང་། ཨ་ནན་ཟླ་བ་ལགས་༸རྒྱལ་བའི་བཀའ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་སྒར་དང་པོ་མ་སུ་རི་བར་ཆིབས་ཞབས་སུ་ལྷན་བཅར་གྱིས་༸རྒྱལ་བའི་སྐུ་སྲུང་གི་ཞབས་ཕྱི་བསྒྲུབས་ཡོད།བྱེས་འབྱོར་བོད་མི་དག་མ་སུ་རིར་བདེ་འབྱོར་ཟིན་པའི་རྗེས་སུ་༸རྒྱལ་བའི་བཀའ་དགོངས་བཞིན་མ་སུ་རི་སློབ་གྲྭ་གསར་འཛུགས་སྐབས་ཀྱི་ཐོག་མའི་སློབ་ཕྲུག་ལྔ་བཅུའི་གྲས་ནས་གཅིག་ཆགས་ཀྱི་ཡོད་ཅིང་། མ་སུ་རིར་སློབ་སྦྱོང་ཟིན་རྗེས་བལ་ཡུལ་ལ་བོད་མི་གསར་དུ་འབྱོར་བ་ཚོའི་སྐད་སྒྱུར་དང་ལམ་སྟོན་གྱི་ལས་དོན་ཁག་ཧུར་སྐྱེད་ཞུས་པར་མ་ཟད། རྗེས་སུ་ཨ་རིའི་ Cornell University Ithaca མཐོ་སློབ་དང་ Boston དུ་ཨ་རིའི་གསང་བའི་སློབ་སྦྱོང་ལ་བསྐྱོད་དེ་སློབ་ཐོན་གྱི་གྲུབ་འབྲས་ལེགས་སོན་གྱིས་རྒྱ་གར་ལ་ཕྱིར་ཕེབས་ནས་བོད་གཞུང་གི་བཀོད་མངགས་ལྟར་ཞབས་ཞུ་ཁག་འཐུས་ཚང་ཞུས་ཡོད་པ་རེད། ཕྱི་ལོ་ ༡༩༩༦ ལོར་ཨ་རིར་ནང་མི་ཟླ་སྒྲིལ་གྱི་ཁོངས་སུ་ཨ་རིའི་མངའ་སྡེ་མི་ནི་སོ་ཊར་གནས་སྤོས་བགྱིས་ཏེ་རྒས་ཡོལ་དུ་བཞུགས་ཡོད་པ་དང་། ཁོང་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནས་བཙན་བྱོལ་དུ་ཕེབས་སྐབས་དམིགས་བསལ་ཆིབས་ཞབས་སྐུ་སྲུང་བདུན་ཡོད་པའི་ནང་ནས་སྐུ་སྲུང་མཐའ་མ་དེ་ཆགས་ཀྱི་ཡོད་པ་རེད།

བོད་མིའི་སྒྲིག་འཛུགས་ཀྱི་ཏོག་དབྱིབས་སྔོན་འགོག་ལས་དོན་ཚོགས་ཆུང་གིས་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་དབྱིན་ཡུལ་ནང་ཐོན་པའི་ Mutant Covid 19 འམ་ཏོག་དབྱིབས་གཉན་རིམས་ ༡༩ ཡི་གཉན་སྲིན་གྱི་ངོ་བོར་འགྱུར་ལྡོག་ཕྱིན་པ་དེས་བརྒྱ་ཆ་ ༧༠ འགོས་ཁྱབ་མྱུར་བ་ཡོད་སྟབས་མང་ཚོགས་ནས་མུ་མཐུད་སྔོན་འགོག་གི་ཐབས་ལམ་རྣམས་བསྟེན་དགོས་པའི་གཞེན་སྐུལ་གནང་སོང་།བོད་མིའི་སྒྲིག་འཛུགས་ཀྱི་ཏོག་དབྱིབས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༩ སྤེལ་བའི་ཐོག་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་ད་ཆ་ཏོག་དབྱིབས་གཉན་རིམས་ ༡༩ ཡི་གཉན་སྲིན་གྱི་ངོ་བོ་དང་རྣམ་པ་འགྱུར་ལྡོག་འགྲོ་བ་ Mutant Coronavirus ཞེས་པ་དེ་ནད་གཞི་གསར་པ་གང་ཡང་མིན་པ་དང་དེ་ནི་ཏོག་དབྱིབས་ ༡༩ གཉན་རིམས་ཡིན་པ་གང་ཞིག་ལ་ནད་འབུ་དེ་ངོ་བོ་དང་རྣམ་པ་ཡང་སེ་འགྱུར་ལྡོག་འགྲོ་བ་ཞིག་ཆགས་ཀྱི་ཡོད་པ་དང་སྒོས་སུ་གཉན་སྲིན་འགྱུར་ལྡོག་ཕྱིན་པ་དེས་བརྒྱ་ཆ་ ༧༠ འགོས་ཁྱབ་མྱུར་བ་ཡོད་སྐོར་གསུངས་སོང་།དབྱིན་ཡུལ་དང་ལྷོ་ཨ་ཕི་རི་ཀ་སོགས་ནང་གཉན་སྲིན་གྱི་ངོ་བོ་འགྱུར་ལྡོག་ཕྱིན་པའི་ནད་འབུ་འགོས་པའི་མི་ཁག་ཅིག་ཐོན་སྐབས་ཉེ་ཆར་རྒྱ་གར་གཞུང་གིས་ཕྱི་ཚེས་ ༢༤ ནས་དབྱིན་ཡུལ་ནས་གནམ་གྲུ་འགྲུལ་བཞུད་སོགས་བཀག་སྡོམ་གནང་ཡོད་པ་དང་། ད་ལྟའི་ཆར་རྒྱ་གར་ནང་གཉན་སྲིན་གྱི་ངོ་བོ་འགྱུར་ལྡོག་ཕྱིན་ནས་ནད་འབུ་འགོས་པ་མེད་ཀྱང་། འདས་པའི་བདུན་ཕྲག་ནང་དབྱིན་ཡུལ་ནས་ཕེབས་མཁན་ཚོར་དཔྱད་བཞིན་ཡོད་སྐོར་གསུངས་ཡོད།དེ་བཞིན་བདུན་ཕྲག་འདིའི་ནང་བོད་མིའི་འདུག་སྡོད་ཁག་གི་ཏོག་དབྱིབས་གནས་སྟངས་དང་འབྲེལ་ནས་སྨན་པ་ཚེ་རིང་མཚམས་གཅོད་ལགས་ཀྱིས་ད་ཆ་ཨ་རིས་གཙོས་པའི་སུད་སི་ནང་ཏོག་དབྱིབས་གཉན་རིམས་ཕོག་མཁན་ཇེ་མང་དུ་འགྲོ་བཞིན་པའི་ཁར་ས་གནས་དེ་དག་ནང་དུ་གནས་བཞུགས་བོད་མི་རྣམ་པས་རེ་སྐུལ་ཞུས་པ་ལྟར་གསོ་རིག་ལུས་སེམས་ནུས་གསོའི་སྨན་འགྲེམས་སྤེལ་གནང་ཡོད་པ་གསུངས་སོང་། ཕྱོགས་མཚུངས་རྒྱ་གར་ནང་མི་གྲངས་ ༧ དང་བལ་ཡུལ་ནང་བོད་མི་ ༦ ལ་གཉན་རིམས་ཕོག་པ་བཅས་ཁྱོན་རྒྱ་བལ་གཉིས་ནང་བོད་མི་ ༡༣ ལ་གཉན་རིམས་ཕོག་ཡོད་པ་དང་། གཉན་རིམས་ཕོག་མཁན་དེའི་ཁོངས་མི་གྲངས་ ༧ ལ་ནད་རྟགས་ཡོད་པ་དང་དེ་མིན་རྣམས་ལ་ནད་རྟགས་དམིགས་བསལ་མེད་པ་གསུངས་ཡོད། བདུན་ཕྲག་འདིའི་ནང་ལ་དྭགས་ནས་སྐྱེས་པ་རང་ལོ་ ༧༤ དང་ཤིམ་ལ་ནས་སྐྱེས་པ་རང་ལོ་ ༥༥ སོན་པ་བཅས་བོད་མི་གཉིས་གཉན་རིམས་རྐྱེན་གྱིས་འདས་གྲོངས་སུ་གྱུར་འདུགརྒྱ་གར་གཞུང་གི་གཉན་རིམས་དང་འབྲེལ་ལམ་སྟོན་སོགས་ཀྱི་སྐོར་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས་ Mutant Coronavirus ཞེས་པའི་ནད་གཞི་དེ་འགོས་སླ་བ་ཡིན་ཀྱང་། ད་ལྟའི་ཆར་གཉན་སྲིན་འགྱུར་བ་ཕྱིན་པ་དེས་ན་ཚ་ཕོག་མཁན་ཚོར་ན་ཚ་སྡུག་པ་དང་འདས་གྲོངས་སུ་འགྱུར་བའི་ཉེན་ཚབས་ཆེ་བ་ཡོད་མེད་ཐད་གནས་ཚུལ་ཁ་གསལ་པོ་མེད་པ་གསུངས་སོང་བ་དང་། ཁོང་གིས་ཟླ་ ༡༡ ཚེས་ ༢༥ ནས་དབྱིན་ཡུལ་ནས་རྒྱ་གར་ནང་འབྱོར་བ་དང་ཏོག་དབྱིབས་གཉན་རིམས་ཀྱི་བརྟག་དཔྱད་གནང་མེད་ཚེ་ངེས་པར་དུ་བརྟག་དཔྱད་གནང་དགོས་པ་དང་། རྒྱ་གར་གཞུང་གི་ངོས་ནས་ཀྱང་དེ་འབྲེལ་ཐད་མངའ་སྡེ་སོ་སོར་འབྲེལ་བ་གནང་མུས་ཡིན་སྐོར་གསུངས་ཡོད།གཞི་རྩའི་རྒྱ་བལ་གཉིས་སུ་ཆགས་པའི་བཙན་བྱོལ་བོད་མིའི་སྤྱི་ཚོགས་ཁྲོད་ད་བར་བོད་མི་ཁྱོན་ ༡༤༣༤ ལ་ཏོག་དབྱིབས་གཉན་རིམས་ཕོག་ཡོད་པ་དང་འདས་གྲོངས་སུ་གྱུར་བ་དེ་ ༣༧ ཆགས་ཀྱི་ཡོད་པ་དེ་ལྟར་ཡང་། ནད་གཞི་དེ་ལས་དྲག་སྐྱེད་བྱུང་བ་ནི་ ༡༣༠༧ དང་བརྒྱ་ཆའི་ཆ་ནས་བརྒྱ་ཆ་ ༩༠ བརྒལ་བ་དང་ད་ལྟའི་ཆར་ནད་ཀྱིས་མནར་བཞིན་པ་དེ་ ༩༠ ཆགས་ཀྱི་འདུགརྒྱ་གར་ནང་ད་བར་ཏོག་དབྱིབས་གཉན་རིམས་ཕོག་མཁན་ས་ཡ་བཅུ་ལྷག་བྱུང་བའི་ཁོངས་ནས་རྐྱེན་འདས་སུ་གྱུར་བ་ནི་འབུམ་གཅིག་ལྷག་ཆགས་ཀྱི་འདུག་པ་དེ་ལྟར་ཡང་། ནད་གཞི་དེ་ལས་དྲག་སྐྱེད་བྱུང་བ་ནི་མི་གྲངས་ས་ཡ་དགུ་ལྷག་ཆགས་ཀྱི་འདུག དེའི་ཁྲོད་བོད་མིའི་སྒྲིག་འཛུགས་ཀྱི་བསྟི་གནས་ཆགས་ཡུལ་རྒྱ་གར་ཧི་མཱ་ཅལ་ནང་དུ་ཉེ་ལམ་གཉན་རིམས་ཕོག་མཁན་གྱི་གྲངས་ཐོ་ཇེ་མང་དུ་འགྲོ་བའི་རྐྱེན་གྱིས་མངའ་སྡེ་ནས་རེས་གཟའ་ཉི་མའི་ཉིན་ཟ་ཁང་དང་ཚོང་ཁང་སོགས་གཉེར་མི་ཆོག་པའི་བཀའ་རྒྱ་བཏང་ཡོད་པ་རེད།ཉེ་ལམ་ཤིམ་ལའི་ཟ་ཁང་དང་ཚོང་གཉེར་ཚོགས་པ་རྣམས་ཀྱིས་མངའ་སྡེའི་བློན་ཆེན་སྐུ་ཞབས་ Jai Ram Thakur མཆོག་དང་ཐུག་འཕྲད་ཀྱིས་རེས་གཟའ་ཉི་མའི་ཉིན་ཚོང་གཉེར་ཆོག་པའི་རེ་སྐུལ་ཞུས་པ་ལྟར། ད་ཆ་ཧི་མཱ་ཅལ་གྱི་ཤིམ་ལ་དང་ཀུ་ལུ། མན་ཌི། ཀངྒ་ར་རྫོང་ཁོངས་བཅས་སུ་རེས་གཟའ་ཉི་མའི་ཉིན་ཚོང་ལས་དང་འབྲེལ་བའི་ལས་དོན་ཁག་གཉེར་ཆོག་པ་མ་ཟད། དེ་སྔོན་གྱི་མཚན་མོའི་ཆུ་ཚོད ༩  པ་ནས་སྔ་དྲོའི་ཆུ་ཚོད་ ༦ བར་གྱི་ཐེམ་སྤང་གི་དུས་ཡུན་ལ་གྱུར་བ་བཏང་ནས་མཚན་མོའི་ཆུ་ཚོད་ ༡༠ ནས་སྔ་དྲོའི་ཆུ་ཚོད་ ༦ བར་བཟོས་འདུག