Tibetan Royal Year of 2151 | Year of the Wood Dragon

རྒྱ་ནག

ལི་ཐོ་ནི་ཡའི་གྲོས་ཚོགས་འཐུས་མི་རྣམས་བོད་དུ་འཚམས་གཟིགས་སུ་ཕེབས་རྒྱུ་དེ་རྒྱ་ནག་གི་སྲིད་བྱུས་ལ་རྒྱབ་སྐྱོར་གནང་བའི་རྣམ་པ་རེད། 

ཡོ་རོབ་རྒྱལ་ཁབ་ལི་ཐོ་ནི་ཡའི་གྲོས་ཚོགས་འཐུས་མི་ལྔ་ནས་བོད་ནང་འཚམས་གཟིགས་སུ་ཕེབས་རྒྱུ་དང་ཁུལ་དེའི་ས་གནས་གཞུང་གི་སྐུ་ཚབ་དང་ཐུག་འཕྲད་གནང་རྒྱུ་འཆར་གཞི་ཡོད་སྟབས། ལི་ཐོ་ནི་ཡའི་གཞུང་འབྲེལ་མ་ཡིན་པའི་ཚོགས་པ་ཁག་ནས་གྲོས་ཚོགས་འཐུས་མི་བོད་དུ་འཚམས་གཟིགས་སུ་ཕེབས་རྒྱུ་དེ་ནི་རྒྱ་ནག་གི་བོད་ནང་དྲག་པོའི་བཀོལ་སྤྱོད་ཀྱི་སྲིད་བྱུས་དེར་ངོས་ལེན་དང་རྒྱབ་སྐྱོར་གནང་བ་ཞིག་མཚོན་གྱི་ཡོད་སྐོར་གསུངས་འདུག དེ་རིང་ The Baltic Times གསར་ཁང་གི་དྲ་གནས་ཐོག་གནས་ཚུལ་སྤེལ་བར་གཞིགས་ན། ལི་ཐོ་ནི་ཡའི་ཆབ་སྲིད་ཚོགས་པ་འདྲ་མིན་བཞི་ལས་གྲུབ་པའི་གྲོས་ཚོགས་འཐུས་མི་ལྔ་དེ་རིང་བོད་ལ་འཚམས་གཟིགས་ཆེད་ཕེབས་ཐོན་གནང་གི་ཡོད་པ་དང་།  ཁོང་རྣམ་པ་ཚང་མ་རྒྱ་ནག་སྤྱི་མཐུན་རྒྱལ་ཁབ་དང་འབྲེལ་མཐུད་གནང་མཁན་གྲོས་ཚོགས་ཚོགས་ཆུང་གི་འཐུས་མི་ཤ་སྟག་རེད་འདུག  སྐུ་ཚབ་ཚོགས་ཁག་དེའི་ངོས་ནས་བོད་ནང་གི་འཚམས་གཟིགས་ཁྲོད་ས་གནས་གཞུང་གི་སྐུ་ཚབ་དང་བོད་རང་སྐྱོང་ལྗོངས་ཀྱི་འཐུས་མི་ཚོགས་ཆེན་གྱི་རྒྱུན་ལས་ལྷན་ཚོགས་ཀྱི་ཚོགས་གཙོ་དང་ཐུག་འཕྲད་གནང་རྒྱུ་ཡིན་པ་ལྟར། གྲོས་ཚོགས་འཐུས་མི་སྐུ་ཞབས་ Algirdas Butkevicius ལགས་ཀྱིས་ད་རེས་བོད་ནང་གི་འཚམས་གཟིགས་བརྒྱུད་ས་གནས་གཞུང་གི་སྐུ་ཚབ་དང་ལྷན་ས་གནས་མི་མང་གི་གནས་སྟངས་སྐོར་གླེང་སློང་གནང་རྒྱུ་ཡིན་སྐོར་གསུངས་འདུག ཐེངས་འདིའི་འཚམས་གཟིགས་དེར་ལི་ཐོ་ནི་ཡའི་ནང་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་དང་བོད་དོན་རྒྱབ་སྐྱོར་ཚོགས་པ་བཅས་ནས་གྲོས་ཚོགས་འཐུས་མི་དེ་དག་ཁུལ་དེར་བསྐྱོད་པ་ཙམ་གྱིས་རྒྱ་ནག་གི་སྲིད་བྱུས་ལ་ངོས་ལེན་དང་རྒྱབ་སྐྱོར་གནང་བའི་རྣམ་པ་ཞིག་མངོན་སྐོར་གསུངས་འདུག འོན་ཀྱང་སྐུ་ཚབ་ཚོགས་ཁག་དེ་སྣེ་ཁྲིད་གནང་མཁན་གྲོས་ཚོགས་འཐུས་མི་སྐུ་ཞབས་ Butkevicius ལགས་ཀྱིས་འདི་ལོའི་ཟླ་བ་ ༦ པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལི་ཐོ་ནི་ཡའི་ནང་ཆིབས་བསྒྱུར་བསྐྱངས་པ་དང་འབྲེལ་ཏེ་ད་རེས་ཁོང་རྣམས་རྐང་བོད་ནང་ཆེད་ཕེབས་གནང་བ་དེའི་བརྒྱུད་བོད་ཀྱི་གནད་དོན་སྐོར་ཕྱོགས་ཡོངས་ཀྱི་གོ་རྟོགས་ཟབ་ཏུ་འགྲོ་རྒྱུ་དང་དངོས་ཡོད་གནས་ཚུལ་ལ་གཞིར་བཞག་ཐོག་ཐག་གཅོད་གང་དགོས་མིན་ཤེས་ཐུབ་རྒྱུ་ཡིན་པ་གསུངས་འདུག ཁོང་གིས་དེ་སྔ་ལི་ཐོ་ནི་ཡའི་རྒྱལ་ཁབ་ནང་༸གོང་ས་མཆོག་ཆིབས་བསྒྱུར་བསྐྱངས་སྐབས་གནད་དོན་འགའ་རས་ཐོག་དགོངས་བཞེས་གནང་བ་དང་སྦྲགས། ད་རེས་ཀྱི་འཚམས་གཟིགས་དེའི་ཁྲོད་དགོང་ཚིགས་ཀྱི་དུས་ཚིགས་ཤིག་དང་བསྟུན་ང་ཚོས་རྒྱ་ནག་གི་སྐུ་ཚབ་དང་ལྷན་བོད་ཀྱི་གནད་དོན་གླེང་རྒྱུ་ཡིན་ཞེས་གསུངས་འདུག ལི་ཐོ་ནི་ཡའི་བོད་དོན་རྒྱབ་སྐྱོར་ཚོགས་པའི་འགན་འཛིན་སྐུ་ཞབས་ Vytis Vidunas ལགས་ཀྱིས་གྲོས་ཚོགས་འཐུས་མི་ལྔ་པོ་དེ་དག་བོད་དུ་འཚམས་གཟིགས་སུ་ཕེབས་རྒྱུ་དེ་ནི་བསུན་གཙེར་ཅན་ཞིག་དང་ཡིད་མུག་སྐྱེ་བའི་གནད་དོན་ཞིག་ཡིན་པ་གསུངས་འདུག  ཁོང་གིས་ཁོང་ཚོ་བོད་དུ་འཚམས་གཟིགས་སུ་བསྐྱོད་པ་དང་གཞུང་གི་མི་སྣ་ཐུག་འཕྲད་དུ་བཅར་བ་དེ་རྒྱ་ནག་གཞུང་གིས་ཁུལ་དེར་འཛིན་པའི་སྲིད་བྱུས་ལ་རྒྱབ་སྐྱོར་དང་ངོས་ལེན་གྱི་རྣམ་པ་ཡིན་པ་མ་ཟད་སྒོས་སུ་ང་ཚོའི་སྲིད་དོན་པ་རྣམས་ཨུ་རུ་སུའི་དབང་སྒྱུར་འོག་ཡོད་པའི་ Crimea ལྟ་བུ་རྒྱལ་ཁབ་གཞན་གྱི་བཙན་འཛུལ་འོག་ཡོད་པའི་ལུང་པར་བསྐྱོད་ཀྱི་མེད་པ་གསུངས་འདུག ལི་ཐོ་ནི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འཐུས་མི་ Monika Navickiene ལགས་ཀྱིས་གྲོས་ཚོགས་ཀྱི་འཐུས་མི་རྣམས་རྒྱ་ནག་དུ་འཚམས་གཟིགས་སྐབས་གོ་སྐབས་བཟུང་ཐོག་རྫ་དྲག་གི་གནད་དོན་རྣམས་གླེང་སློང་བྱེད་དགོས་པ་ཞུ་འབོད་དང་སྦྲགས། ཁོང་ཚོས་རྒྱ་ནག་ནང་ཕྱིན་ནས་ལེགས་པའི་ཆ་གཅིག་པུ་བཤད་ཚེ་ངའི་བསམ་པར་འཚམས་གཟིགས་དེ་ལས་ཁེ་ཕན་ཡོང་རྒྱུ་མིན་པ་གསུངས་འདུག རྩ་བའི་ད་རེས་ཀྱི་འཚམས་གཟིགས་དེར་ལི་ཐོ་ནི་ཡའི་གྲོས་ཚོགས་འཐུས་མི་ཙམ་མིན་པར་ Latvia དང་ Estonia འི་གྲོས་ཚོགས་འཐུས་མི་ཁག་ཅིག་ཀྱང་ཕེབས་རྒྱུ་རེད་འདུག

འཇར་མ་ནི་ཕྱི་སྲིད་བློན་ཆེན་མཆོག་ལ་བོད་ཀྱི་གནད་དོན་གཙོ་གྲས་སུ་གླེང་སློང་དགོས་པའི་ཞུ་འབོད་ལས་འགུལ།

འཇར་མ་ནི་བོད་དོན་རྒྱབ་སྐྱོར་ཚོགས་པས་ཡུལ་དེའི་ཕྱི་སྲིད་བློན་མཆོག་ལ་དྲྭ་ཐོག་བརྒྱུད་འཇར་མན་གཞུང་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཐོག་བོད་མིའི་འགྲོ་བ་མིའི་ཐོབ་ཐང་དང་རང་ཐག་རང་གཅོད་ཀྱི་ཐོབ་ཐང་ལ་མངོན་གསལ་དོད་པོས་གུས་བརྩི་ཞུ་ཐོག་གནད་དོན་དེ་གཙོ་གྲས་སུ་གླེང་སློང་གནང་དགོས་པའི་ཞུ་སྐུལ་གནང་བཞིན་འདུག རིང་མིན་ཕྱི་ཟླ་ ༡༡ ཚེས་ ༥ ནས་ ༡༦ བར་སུད་སི་ཇི་ནི་ཝ་གྲོང་ཁྱེར་དུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཐེངས་ ༣༡ སྟེང་རྒྱ་ནག་གིས་གཙོས་པའི་རྒྱལ་ཁབ་ ༡༣ གྱི་འགྲོ་བ་མིའི་ཐོབ་ཐང་གི་གནས་བབ་ཐོག་བསྐྱར་ཞིབ་གནང་གཏན་ཁེལ་བ་དང་བསྟུན། Tibet Initiative Deutschland འམ་འཇར་མ་ནི་བོད་དོན་རྒྱབ་སྐྱོར་ཚོགས་པས་རང་གི་དྲྭ་གནས་ཐོག་ཡུལ་དེའི་ཕྱི་སྲིད་བློན་ཆེན་སྐུ་ཞབས་ Heiko Maas མཆོག་གི་མཚན་ཐོག་ལ་ཞུ་ཡིག་ཞིག་ཕུལ་རྒྱུའི་ལས་འགུལ་འགོ་འཛུགས་གནང་སྟེ་འཇར་མ་ནི་གཞུང་ལ་རྒྱ་ནག་གི་དུས་བཀག་བསྐྱར་ཞིབ་ཀྱི་ལས་རིམ་ཐོག་འཛམ་གླིང་གི་རྒྱལ་ཁབ་ཚང་མར་མཉམ་འབྲེལ་རྒྱལ་ཚོགས་ཀྱི་འབྲུ་དོན་ཁག་ལ་གུས་བརྩི་ཞུ་ཐོག་རྒྱ་གཞུང་གིས་ཡུལ་དེའི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཤུགས་ཆེ་གཏོང་བཞིན་པའི་བྱ་སྤྱོད་ཁག་མངོན་གསལ་དོད་པོས་ཐེར་བཏོན་གྱིས་སྐྱོན་བརྗོད་བྱ་རྒྱུའི་དམིགས་བསལ་འགན་ཡོད་པ་ལྟར་འཇར་མན་ནས་ཀྱང་དེ་ལྟར་གནང་སྐྱོང་ཡོང་བ་དང་ལྷག་དོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེའི་ཐོག་བོད་མིའི་འགྲོ་བ་མིའི་ཐོབ་ཐང་དང་རང་ཐག་རང་གཅོད་གཉིས་ལ་ཡོངས་བསྒྲགས་སྒོ་ནས་ངོ་བཞེས་གནང་ཐོག་རྒྱ་གཞུང་ལ་འགྲོ་བ་མིའི་ཐོབ་ཐང་གི་གནད་དོན་ལ་ཐུག་སྐབས་འགྲིག་འཇགས་སོགས་རྩ་བ་ནས་མེད་པའི་བརྡ་ལན་གསལ་པོ་ཞིག་སྤྲོད་དགོས་པར་འབོད་སྐུལ་ཞུས་འདུག དེ་བཞིན་འཇར་མ་ནི་བོད་དོན་རྒྱབ་སྐྱོར་ཚོགས་པས་ད་ཆ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་ཉིན་རེ་བཞིན་ཆེས་ཇེ་ཞན་ཇེ་སྡུག་ཏུ་འགྲོ་མུས་ཁར་ཁུལ་དེར་ཉིན་མཚན་ལྟོས་མེད་ཐོག་དྲག་ཆས་དམག་མི་འགྲེམས་འཇོག་བྱས་ནས་བོད་མིའི་འགྲོ་སྡོད་སྤྱོད་གསུམ་གྱི་རང་དབང་ཡོངས་ལ་དམ་དྲག་ཀྱིས་ཚོད་འཛིན་ཤུགས་ཆེ་བྱེད་བཞིན་པ་དང་བོད་མི་རྣམས་གང་བྱུང་འཛིན་བཟུང་བཙོན་འཇུག བོད་ཀྱི་དགོན་སྡེ་ཁག་གི་ཐོག་སྟངས་འཛིན། བོད་མི་འབྲོག་པ་ཚོར་བཙན་དབང་གིས་གཞིས་སྤོས་སྲིད་བྱུས་ལག་བསྟར་བྱེད་བཞིན་ཡོད་ཀྱང་། བོད་མི་ཚོས་མུ་མཐུད་འཚེ་མེད་ཞི་བའི་ལམ་ནས་སོ་སོའི་ཆོས་དང་རིག་གཞུང་སྐད་ཡིག་སོགས་སྲུང་སྐྱོབ་བྱ་རྒྱུའི་ཐབས་ཤེས་འདྲ་མིན་གནང་མུས་ཡིན་པ་སོགས་ཆེས་མངོན་གསལ་གནང་འདུག ལར་ནས་ཚོགས་པ་དེས་ཞི་ཅིང་ཕིང་རྒྱ་ནག་གི་སྲིད་འཛིན་ཆགས་པ་ནས་བཟུང་ད་བར་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་བཟང་པྱོགས་ཀྱི་འགྱུར་བ་གང་ཡང་ཕྱིན་མེད་པའི་ཁར་དམ་དྲག་བྱེད་ཤུགས་ཆེ་རུ་གཏོང་བཞིན་ཡོད་སྟབས། ད་ཆ་རྒྱ་ནག་གཞུང་ནས་ངེས་པར་དུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་འབྲུ་དོན་ཁག་ལ་བརྩི་བཀུར་དང་ལེན་ཞུ་ཐོག་ཡུལ་དེའི་མང་ཚཽགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་རྒྱུའི་ལས་དོན་ཁག་འཕྲལ་མར་མཚམས་འཇོག་དགོས་པ་དང་ རྒྱལ་ཚོགས་ཀྱི་ཚོགས་མི་རྣམས་ནས་རྒྱབ་སྐྱོར་དགོས་གལ་ཡིན་པ་བཀོད་ཡོད་པ་རེད། རྩ་བའི་ད་ལྟའི་ཆར་དྲྭ་ཐོག་གི་ཞུ་སྙན་དེར་མང་ཚོགས་ ༡༤༠༠ ལྷག་གིས་རྒྱབ་སྐྱོར་ཡོད་པའི་མཚན་རྟགས་བཀོད་འདུག

རྒྱལ་ཚོགས་ཀྱི་ཚོགས་ཆུང་ནས་རྒྱ་གཞུང་གིས་ལན་འདེབས་བྱེད་སྟངས་ལ་ཆེས་བློ་ཕམ་ཡོད་ཅེས་གསུངས་འདུག

ཁ་སང་ཟླ་ ༨ ཚེས་ ༡༣ ཉིན་རྒྱལ་ཚོགས་ཀྱི་མི་རིགས་དབྱེ་འབྱེད་རྟོག་ཞིབ་ཚོགས་ཆུང་གིས་རྒྱ་གཞུང་ལ་ཡུལ་དེའི་ནང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པར་སེམས་འཚབ་ཡོད་པའི་དྲི་བ་འདྲ་མིན་བརྒྱ་ལྷག་གནང་འདུག་ཀྱང་། རྒྱ་གཞུང་གིས་དྲི་བ་ཁག་ལ་ལན་འདེབས་གསལ་པོ་གང་ཡང་སྤྲད་མེད་པར་བློ་ཕམ་ཡོད་ཅེས་གསུངས་འདུག གཟའ་འཁོར་སྔོན་མའི་རེས་གཟའ་པ་སངས་ཉིན་ཚོགས་མི་གྲངས་བཅོ་བརྒྱད་ལས་གྲུབ་པའི་རྒྱལ་ཚོགས་ཀྱི་མི་རིགས་དབྱེ་འབྱེད་ཚོགས་ཆུང་ནས་བོད་གཙོ་གྱུར་གྲངས་ཉུང་མི་རིགས་རྣམས་ཀྱི་གནས་སྟངས་འཁོད་པའི་སྙན་ཐོར་ཞིབ་འཇུག་གིས་རྒྱ་ནག་དམར་པོའི་གཞུང་ལ་མི་རིགས་དབྱེ་འབྱེད་ཀྱི་གནད་དོན་དང་འབྲེལ་བའི་འདྲི་རྩད་བྱས་ཡོད་ཀྱང་། ཉིན་དེར་རྒྱ་གཞུང་གི་སྐུ་ཚབ་ཚོས་དེར་ལན་འདེབས་གང་ཡང་སྤྲད་མེད་སྟབས། ཁ་སང་ཚེས་ ༡༣ ཉིན་གཞི་ནས་རྒྱ་གཞུང་གི་སྐུ་ཚབ་མི་སྣ་བཞི་བཅུས་མི་རིགས་དབྱེ་འབྱེད་རྩ་འགོག་དང་འབྲེལ་ཚོགས་ཆུང་དེའི་མདུན་དུ་བཅར་ནས་དེ་སྔོན་ཕུལ་བའི་དྲི་བ་ཁག་ལ་ལན་འདེབས་གསལ་བཤད་བྱས་འདུག སྐབས་དེར་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་ཚོགས་མི་རེ་ངོ་རེ་ངོས་ནས་གཅིག་རྗེས་གཉིས་མཐུད་ཀྱིས་རྒྱ་ནག་གཞུང་ལ་བོད་དང་ཤིན་ཅང་། ནང་སོགས་གཙོ་གྱུར་རྒྱ་ནག་ནང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་དང་ཡུལ་དེའི་ཁྲིམས་སྒྲིག་ལག་བསྟར་བྱེད་ཕྱོགས། དེ་བཞིན་གྲངས་ཉུང་མི་རིགས་རྣམས་དཀའ་སྡུག་ཚད་མེད་མྱངས་དང་མྱོང་བཞིན་པའི་གནས་སྟངས་དང་། ཆོས་དད་རང་དབང་། རིག་གཞུང་། སྐད་ཡིག་སྲུང་སྐྱོབ་སོགས་ཀྱི་ཐོག་དྲི་བ་འདྲ་མིན་ཁྱོན་བརྒྱ་ཙམ་གནང་འདུག་ཀྱང། རྒྱ་གཞུང་གིས་རྒྱུན་ལྡན་བཞིན་གོང་གསལ་གྱི་དྲི་བ་དེ་དག་ལ་ལན་འདེབས་ཁ་གསལ་རྩ་བ་ནས་སྤྲད་མེད་སྟབས་ཚོགས་ཆུང་དེའི་ཚོགས་མི་གཅིག་གིས་མཐར་རྒྱ་གཞུང་ནས་ད་ལན་ཚོགས་ཆུང་དེས་ཕུལ་བའི་དྲི་བ་ཁག་ལ་ལན་འདེབས་གསལ་པོ་སྤྲད་མེད་པར་ཆེས་བློ་ཕམ་ཡོད་ཅེས་དང་ལྷག་དོན་རྟོག་ཞིབ་ཚོགས་ཆུང་ལ་མགོ་སྐོར་གཏོང་བཞིན་པར་སྐྱོན་བརྗོད་གནང་འདུག རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ནས་རྒྱ་གཞུང་ལ་ཡུལ་དེའི་ནང་གི་མི་རིགས་དབྱེ་འབྱེད་སྐོར་ལ་འདྲི་རྩད་བྱས་པའི་ཉིན་དེའི་སྔ་དྲོར་རྒྱ་ནག་ནང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་འོག་དཀའ་ངལ་འཕྲད་བཞིན་པའི་བོད་དང་ཤིན་ཅང་། ནང་སོག་གཙོ་གྱུར་གྲངས་ཉུང་མི་རིགས་རྣམས་ཀྱི་གནང་སྟངས་སྐོར་བདེ་སྡུག་ཞུ་མཁན་གཞུང་འབྲེལ་མིན་པའི་ཚོགས་པ་ཁག་ཅིག་དང་ཟུར་དུ་ཐུག་འཕྲད་གནང་འདུག སྐབས་དེར་བོད་མིའི་ཕྱོགས་ནས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་གཙོས་སུད་སི་བོད་ཀྱི་སྐུ་ཚབ་དོན་གཅོད་དང་རྒྱལ་སྤྱིའི་བོད་དོན་ལས་འགུལ་ཁང་། འཇར་མན་བོད་དོན་རྒྱབ་སྐྱོར་ཚོགས་པ། བོད་རང་བཙན་སློབ་ཕྲུག་ཚོགས་པའི་སྐུ་ཚབ་ཁག་ཅིག་ཆེད་ཕེབས་ཀྱིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་དང་སྐད་ཡིག་རང་དབང་མེད་པའི་ཆེས་ཛ་དྲག་གི་གནས་སྟངས་ཁག་སྙན་གསེང་དང་སྲུང་སྐྱོབ་དགོས་པའི་ཞུ་འབོད་གནང་འདུག དེའི་ཁྲོད་རྒྱལ་ཚོགས་ཀྱི་ཁྱད་ལས་མི་སྣ་ཁག་ཅིག་གིས་ཀྱང་རྒྱ་གཞུང་གིས་མི་སེར་ལག་འཁྱེར་སྤྲོད་ཕྱོགས་ཐད་སྲིད་བྱུས་མི་འདྲ་བ་གཉིས་ལག་བསྟར་བྱེད་བཞིན་པ་དེས་བོད་མི་ཚོར་མི་སེར་ལག་འཁྱེར་ཐོབ་རྒྱུའི་ཐད་འགོག་རྐྱེན་བཟོ་པར་སྐྱོན་བརྗོད་དང་འབྲེལ་ཏེ་རྒྱ་ནག་གཞུང་ལ་ཤོག་ངོས་ལྔ་ཅན་གྱི་ཞུ་སྙན་ཞིག་ཕུལ་ཡོད་པ་རེད། ཞུ་སྙན་དེའི་ནང་གཙོ་བོ་ད་ལྟ་རྒྱ་གཞུང་གིས་ལག་བསྟར་བྱེད་བཞིན་པའི་ཕྱིར་བསྐྱོད་ལག་འཁྱེར་སྤྲོད་ཕྱོགས་ཀྱི་ལམ་ལུགས་དེ་བོད་ནང་གི་བོད་མི་རྣམས་ལ་ཕྱིར་བསྐྱོད་གནང་ཕྱོགས་ཐོག་དམ་དྲག་བྱས་པ་དང་། བོད་མིའི་ཆོས་དད་རང་དབང་ཐོག་འགོག་རྐྱེན་དང་བོད་མི་རྣམས་ཕྱིའི་རྒྱལ་ཁབ་ཁག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་ཞུ་བར་འགོག་རྐྱེན་བཟོ་མུས་ཡིན་སྐོར་བཅས་བཀོད་འདུག གནད་དོན་དེའི་རྐྱེན་པས་དོ་དམ་འཛིན་བཟུང་དང་འདྲི་རྩད་བྱས་པའི་གནས་ཚུལ་མང་དག་བྱུང་ཡོད་པ་ནི་བློ་འཚབ་བྱ་གཞི་ཞིག་ཆགས་ཡོད་པ་མངོན་གསལ་གནང་འདུག

བིརྶཊོལ་གྲོང་སྡེའི་སྤྱི་ཁྱབ་ནས་རྒྱ་ནག་ལས་དངུལ་དང་མཐུན་འགྱུར་མ་བླངས་གོང་ངེས་པར་དུ་དགོངས་བཞེས་གནང་དགོས།

དེ་རིང་ཟླ་ ༨ ཚེས་ ༡༣ ཉིན་ཨིན་ཡུལ་གྱི་ Bristol གྲོང་ཁྱེར་ཡོད་པའི་འགྲོ་བ་མིའི་ཐོབ་ཐང་ལས་འགུལ་བ་དང་། ས་གནས་བོད་རིགས། བོད་དོན་རྒྱབ་སྐྱོར་བ། ཧྥ་ལུང་གོངྒ་ཆོས་བརྒྱུད་ཉམས་ལེན་བྱེད་མཁན་བཅས་ནས་གྲོང་སྡེའི་སྤྱི་ཁྱབ་པ་ Maryin Rees མཆོག་ལ་ཉེ་ལམ་རྒྱ་ནག་ Guangzhou ཞེས་པའི་ས་གནས་གཞུང་གིས་འགྲོ་གྲོན་འོག་ཉིན་གཉིས་རིང་རྒྱ་ནག་ཏུ་བསྐྱོད་པར་བློ་ཕམ་གྱི་རྣམ་པ་ཤུགས་ཆེ་བསྟན་པ་དང་འབྲེལ་དྲག་གནོན་ཅན་གྱི་གཞུང་འཛིན་པའི་སར་ནས་དངུལ་དང་མཐུན་འགྱུར་སོགས་མ་བླངས་གོང་ངེས་པར་དུ་དགོངས་བཞེས་གནང་དགོས་ཞེས་བརྗོད་འདུག ཁོང་རྣམས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་ཉེ་ལམ་ Bristol གྲོང་སྡེའི་སྤྱི་ཁྱབ་པ་ Maryin མཆོག་རྒྱ་ནག་ Guangzhou ཞེས་པའི་ས་གནས་གཞུང་གིས་འགྲོ་གྲོན་འོག་ཉིན་གྲངས་གཉིས་ཀྱི་རིང་གྲོང་ཁྱེར་ བིརྶ་ཊོལ་ནང་ཚོང་གི་གོ་སྐབས་ཅི་ཞིག་ཡོང་རྒྱུ་ཡོད་མིན་ལྟ་རྟོག་སླད་བསྐྱོད་སྐོར་འགྲེལ་བརྗོད་དང་སྦྲགས། བོད་དང་ཡུ་གུར་གཙོ་གྱུར་མང་གཙོ་དོན་གཉེར་བ་རྣམས་ལ་ཆེས་དྲག་གནོན་བྱེད་མཁན་གྱི་གཞུང་ཞིག་ལས་ངོ་སོ་བླངས་པ་ནི་རང་རྒྱལ་ཁབ་ཀྱི་བཟང་སྤྱོད་དང་ཡོངས་སུ་འགལ་བ་ཞིག་ཡིན་པར་འགྲེལ་བརྗོད་གནང་འདུག སྐབས་དེར་བིརྶ་ཊོལ་ས་གནས་བོད་རིགས་ཚོགས་པའི་ཚོགས་གཙོ་བསྟན་འཛིན་ལགས་ཀྱིས་ Bristol གྲོང་ཁྱེར་གྱི་འཛུགས་སྐྲུན་ཆེད་འགྲོ་བ་མིའི་ཐོབ་ཐང་དང་། དྲང་བདེན། མི་རིགས་འདྲ་མཉམ་སོགས་ལ་བརྩི་མེད་རྡོག་རོལ་གཏོང་མཁན་གྱི་རྒྱ་གཞུང་ནས་དངུལ་བླངས་པ་དེ་ངོ་ཚ་དགོས་པ་ཞིག་ཡིན་པ་མ་ཟད་གྲོང་སྡེའི་སྤྱི་ཁྱབ་མཆོག་གིས་ས་གནས་མི་མང་ལ་ཁྱད་གསོད་བྱས་པ་ཞིག་ཀྱང་མཚོན་གྱི་ཡོད་པ་རེད། ལྷག་དོན་དེ་སྔ་སྐུ་ཞབས་ Maryin མཆོག་གྲོང་སྡེའི་སྤྱི་ཁྱབ་ཀྱི་འོས་མིར་བཞེངས་སྐབས་སུ་ཁས་ལེན་གནང་ཁག་དང་ཕྱོགས་ཡོངས་སུ་འགལ་བ་ཞིག་ཡིན་པར་སྐྱོན་བརྗོད་གནང་འདུག རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ལས་འགུལ་འབྲེལ་མཐུད་པ་སྐུ་ཞབས་ Mandie mckeown ལགས་ཀྱིས་དྲག་གནོན་བྱེད་མཁན་གྱི་གཞུང་ཞིག་ནས་དངུལ་བླངས་པ་དེས་ད་བར་བོད་དང་ཡུ་གུར། Falun Gong ཆོས་བརྒྱུད་འཛིན་མཁན། མང་གཙོ་དོན་གཉེར་བ་བཅས་ལ་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་ཡོད་པར་རྒྱབ་སྐྱོར་བྱས་པ་དང་གཅིག་མཚུངས་ཡིན་པ་མ་ཟད། རྒྱལ་ཁབ་ཡར་རྒྱས་ཀྱི་ཁ་ཕྱོགས་སུ་ཁྲིད་རྒྱུ་ལས་ལྡོག་སྟེ་སྔར་གྱི་ལམ་ལུགས་རྙིང་པར་ཆས་པ་ཞིག་ཡིན་སྐོར་འགྲེལ་བརྗོད་དང་ཆབས་ཅིག་ཏུ་གྲོང་སྡེའི་སྤྱི་ཁྱབ་མཆོག་གིས་ Bristol གྲོང་སྡེ་དེ་མུན་ནག་གི་སྡུག་བསྔལ་ནང་མ་ལྷུང་བའི་སྔོན་ཚུལ་ནས་དགོངས་བཞེས་གནང་དགོས་ཞེས་ནན་བརྗོད་གནང་ཡོད་པ་རེད།

ལྷ་ས་མེ་འཁོར་འབབ་ཚུགས་ཁེལ་ཡུལ་སླེའུ་གྲོང་ཁུལ་མང་ཚོགས་སྤྲང་པོ་ལྟ་བུའི་འཚོ་བ་སྐྱེལ་བཞིན་ཡོད་པ།

ལྷ་སའི་མེ་འཁོར་འབབ་ཚུགས་ཁེལ་ཡུལ་སླེའུ་གྲོང་ཁུལ་དུ་ཡོད་པའི་ཞིང་པ་རྣམས་ཀྱི་འཚོ་རྟེན་དུ་གྱུར་བའི་ས་ཞིང་རྣམས་དེ་སྔོན་མེ་འཁོར་འབབ་ཚུགས་གསར་སྐྲུན་ཆེད་སྲིད་གཞུང་གིས་གཞུང་བཞེས་བཏང་ནས་གུན་གསབ་དངུལ་ཕྲན་བུ་སྤྲད་ཡོད་ཀྱང་དེང་སྐབས་གུན་གསབ་དངུལ་དེ་དག་རིམ་བཞིན་ཟད་སྟབས་མང་ཚོགས་མང་ཆེ་བ་སྤྲང་པོ་ལྟ་བུའི་འཚོ་བ་སྐྱེལ་བཞིན་ཡོད་པ་རེད་འདུག དེ་སྔོན་ལྷ་ས་མེ་འཁོར་འབབ་ཚུགས་ཁེལ་ཡུལ་སླེའུ་གྲོང་ཁུལ་མང་ཚོགས་རྣམས་དེ་སྔ་རང་གི་ས་ཞིང་ལ་བརྟེན་ནས་འཚོ་བར་དཀའ་ངལ་མེད་ཀྱང་ས་ཞིང་གཞུང་བཞེས་བཏང་རྗེས་མང་ཚོགས་མང་ཆེ་བ་འཚོ་རྟེན་མེད་པར་སྤྲང་པོ་ལྟ་བུའི་འཚོ་བ་སྐྱེལ་བཞིན་ཡོད་པ་མ་ཟད། དེ་དག་ཁྲོམ་གཞུང་དུ་གད་འཕྱག་པ། ནང་མ་ཁང་སོགས་ནང་གཞས་གཏོང་བ། ལས་ཁུངས་ཁག་གི་སྒོ་སྲུང་བ་སོགས་གླ་ཕོགས་ཧ་ཅང་ཉུང་བའི་ལས་རིགས་མ་གནང་ཀ་མེད་ཀྱི་གནས་གྱུར་ཡོད་པ་རེད་འདུག ལྷག་དོན་དུ་དེང་སྐབས་སླེའུ་གྲོང་ཁུལ་ནང་གླུ་གཞས་འཁྲབ་སྦྱོང་བྱ་སའི་ཁང་ཆེན་ཞིག་ཀྱང་གསར་སྐྲུན་བྱས་ཡོད་པ་དང་། གླུ་གཞས་འཁྲབ་སྦྱོང་བྱ་སའི་ས་གནས་ས་ཐོག་ནས་འཁྲབ་སྦྱོང་བྱེད་བཞིན་པའི་སྐབས་ཀྱི་བརྙན་ཐུང་ཡང་འདི་གར་བཏང་འབྱོར་བྱུང་ཡོད། དེ་དང་ཕྱོགས་མཚུངས་རྒྱ་གཞུང་གིས་འདི་ལོ་ཕྱི་ཟླ་ ༥ པའི་ནང་ལྷ་ས་སྟོད་ལུང་བདེ་ཆེན་ཁུལ་དུ་ཞིང་པ་མང་ཚོགས་ཀྱི་ས་ཞིང་ཡང་སྲིད་གཞུང་གིས་མེ་ཏོག་འདེབས་འཛུགས་བྱ་རྒྱུ་ཡིན་པར་ཁ་གཡར་ཏེ་གཞུང་བཞེས་བཏང་བར་བརྟེན་མང་ཚོགས་ཀྱིས་མི་རབས་ནས་བརྒྱུད་པའི་རང་གི་ཞིང་པའི་འཚོ་རྟེན་ཤོར་བར་བརྟེན་མང་ཚོགས་རྣམས་སེམས་སྡུག་དང་ཁོང་ཁྲོ་ཆེན་པོའི་ནང་ལྷུང་ཡོད་ཀྱང་བདེ་སྡུག་ཞུ་ས་མེད་པར་གྱུར་ཡོད་པའི་གནས་ཚུལ་ཡང་ཐོན་ཡོད་པ་རེད།

ལྷ་སར་ཡུལ་སྐོར་ཡོང་མཁན་རྒྱ་རིགས་ཚོ་དང་ཐོག་རྒྱ་བཟའ་ཀོང་ཇོའི་ལོ་རྒྱུས་འཁྲབ་སྟོན་མ་བལྟ་ཚེ་འགྲོ་བསྐྱོད་ལག་ཁྱེར་མེད་པ་བཟོ་ཡི་ཡོད་འདུག

རྒྱ་གཞུང་གིས་ཆབ་སྲིད་དང་དཔལ་འབྱོར་ལ་དམིགས་ནས་ཕྱི་ལོ་ ༢༠༡༣ ལᨕ་ནས་འགོ་འཛུགས་ཀྱིས་བོད་ཀྱི་རྒྱལ་ས་ལྷ་སའི་ལྷོ་ངོས་སྐྱིད་ཆུའི་ཕར་ཕྱོགས་གྲིབ་ཞེས་པའི་ས་ཁུལ་དུ་ཕྱི་ནས་ཡོང་བའི་ཡུལ་སྐོར་བ་ཚོར་རྒྱ་བཟའ་ཀོང་ཇོ་བོད་ལ་ཕེབས་པའི་སྐོར་གྱི་བོད་ཀྱི་ལོ་རྒྱུས་ལ་འཁྱོག་བཤད་བྱས་པའི་ཁྲབ་སྟོན་བྱས་དང་བྱེད་བཞིན་པའི་གནས་ཚུལ་ཐོན་མུས་ལྟར། དེང་སྐབས་རྒྱ་རིིགས་ཡུལ་སྐོར་བ་ཚོ་ལྷ་སར་སླེབས་རྗེས་ས་ཁུལ་གཞན་ལ་ཡུལ་སྐོར་དུ་མ་འགྲོ་བའི་སྔོན་ལ་དང་ཐོག་རྒྱ་བཟའ་ཀོང་ཇོའི་འཁྲབ་སྟོན་ངེས་པར་བལྟ་དགོས་པ་དང་། ཅི་ཏེ་མ་བལྟ་ཚེ་ས་གནས་གཞན་ལ་བསྐྱོད་རྒྱུའི་ལག་ཁྱེར་མེད་པ་བཟོ་རྒྱུ་རེད་འདུག རྒྱ་བཟའ་ཀོང་ཇོ་བོད་ལ་སླེབས་པའི་སྐོར་གྱི་བོད་ཀྱི་དོན་དངོས་ལོ་རྒྱུས་ལ་འཁྱོག་བཤད་བྱས་ཡོོད་པ་དང་རྒྱ་རིགས་ཡུལ་སྐོར་བ་རྣམས་རྒྱ་བཟའ་ཀོང་ཇོ་བོད་ལ་སླེབས་པའི་ལོ་རྒྱུས་འཁྲབ་སྟོན་དེར་ངེས་པར་དུ་བལྟ་བཅུག་པ་ནི་བོད་དང་རྒྱ་ནག་གཉིས་འབྲེལ་བ་ཆགས་སྟངས་དང་རྒྱ་བཟའ་ཀོང་ཇོ་བོད་ལ་སླེབས་པར་བརྟེན་བོད་ནང་རིག་གནས་དང་སྤྱི་ཚོགས་ཀྱི་དཔལ་ཡོན་དར་བ། རྒྱ་མི་རིགས་ཀྱི་ཤེས་རབ་དང་སྙིང་སྟོབས། བོད་དེ་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པའི་བསམ་བློའི་གོ་རྟོགས་སྤེལ་སླད་ཡིན་པ་རེད་འདུག བོད་ཀྱི་རྒྱལ་ས་ལྷ་སར་དེང་སྐབས་རྒྱ་རིགས་ཡུལ་སྐོར་དུ་ཡོང་མཁན་ལོ་རེ་བཞིན་ཇི་མང་དུ་འགྲོ་བཞིན་ཡོད་པ་དང་བསྟུན་རྒྱ་རིགས་ཡུལ་སྐོར་བ་ཚོས་རྒྱ་བཟའ་ཀོང་ཇོའི་འཁྲབ་སྟོན་དེའི་ཕྱག་ཁྱེར་ཉོ་བར་རྒྱ་སྒོར་༥༠༠ ནས་ ༡༠༠༠ སྤྲོད་དགོས་སྟབས་རྒྱ་རིགས་ཡུལ་སྐོར་བ་ཚོའི་ལག་ནས་དངུལ་འཕོན་ཆེ་འཕྲོག་བཅོམ་བྱེད་བཞིན་ཡོད་པ་རེད་འདུག རྒྱ་བཟའ་ཀོང་ཇོའི་ལོ་རྒྱུས་འཁྲབ་སྟོན་བྱེད་ས་དེ་ནི་རྩེ་ཕོ་བྲང་པོ་ཏ་ལའི་མདུན་ཐང་དུ་ཡིན་པ་བརྗོད་མཁན་ཡོད་ཀྱང་དེ་ནི་བདེན་པ་མིན་ཞིང་། རྩེ་ཕོ་བྲང་པོ་ཏ་ལའི་ཞོལ་འགྲེམས་སྟོན་ཁང་དུ་རྒྱ་བཟའ་ཀོང་ཇོ་བོད་ལ་སླེབས་པའི་སྐོར་གྱི་འགྲེམས་སྟོན་བལྟ་རྒྱུ་ཡོད་པ་ལས་འཁྲབ་སྟོན་བྱས་མེད་སྐོར་འགྲེལ་བརྗོད་གནང་སོང་། ལྷག་དོན་ཁོང་གིས་འཁྲབ་སྟོན་བྱེད་ས་དངོས་ནི་ལྷ་སའི་ལྷོ་ངོས་སྐྱིད་ཆུའི་འགྲམ་གྱི་གྲིབ་ཞེས་པའི་ས་གནས་དེར་ཡིན་པ་དང་དེང་སྐབས་གྲོང་ཁྱེར་གྱི་རྣམ་པར་འཛུགས་སྐྲུན་བྱས་ཡོད་པ་དང་དེའི་སྦྱིན་བདག་ཀྱང་རྒྱ་རིགས་ཡིན་པར་འགྲེལ་བརྗོད་གནང་ཡོད།

རྒྱ་ནག་ནང་ Winnie the Pooh ཡི་གློག་བརྙན་བཀག་སྡོམ།

བྱིས་པའི་འགུལ་རིས་གྲགས་ཅན་ Winnie the Pooh ཞེས་པའི་དོམ་ཕྲུག་སེར་པོའི་གློག་བརྙན་གསར་པ་ Christopher Robin ཟེར་བ་དེ་རྒྱ་ནག་ནང་བཀག་སྡོམ་བྱས་འདུག དེའང་ཉེ་བའི་ལོ་ཤས་ནང་རྒྱ་རིགས་མང་ཚོགས་ནས་ Winnie the Pooh ཞེས་པའི་དོམ་ཕྲུག་རྒྱག་པ་རིལ་རིལ་དེའི་ཕྱིའི་གཟུགས་ཀྱི་ཁྱད་ཆོས་དེ་རྒྱ་ནག་གི་སྲིད་འཛིན་ཞི་ཅིང་ཕིང་དང་མཚུངས་བསྡུར་གྱིས་བསྟན་བཤིག་སློང་གི་ཡོད་པ་ལྟར། རྒྱ་ནག་གཞུང་གིས་སྤྱི་ཚོགས་དྲྭ་རྒྱ་སོགས་ཀྱི་སྟེང་དོམ་ཕྲུག་དེའི་འགུལ་རིས་དང་དེའི་མིང་སོགས་སྤྱོད་རྒྱུར་བཀག་སྡོམ་བྱེད་མུས་ཡིན་པ་མ་ཟད། ཟླ་བ་འདིའི་ཚེས་ ༣ ཉིན་འཛམ་གླིང་ཁྱོན་དུ་གཟིགས་འབུལ་འགོ་འཛུགས་ཞུས་པའི་ Winnie the Pooh གློག་བརྙན་དེ་ད་ཆ་རྒྱ་ནག་ནང་ཡོངས་བསྒྲགས་ཐོག་བཀག་སྡོམ་བྱས་ཡོད་པ་རེད་འདུག རྩ་བའི་སྲིད་འཛིན་ཞི་ཅིང་ཕིང་དང་ Winnie དབར་མཚུངས་བསྡུར་བྱ་རྒྱུ་དེ་ཐོག་མར་ཕྱི་ལོ་ ༢༠༡༣ ལོར་ཨ་རིའི་སྲིད་འཛིན་ཟུར་པ་སྐུ་ཞབས་ཨོ་བྷ་མ་དང་ཞི་ཅིང་ཕིང་རྣམ་གཉིས་དགོང་ཚིགས་བཞེས་པར་མཉམ་དུ་བསྐྱོད་སྐབས་ཀྱི་འདྲ་པར་ཞིག་ནས་འགོ་བཙུགས་ཡོད་པ་དང། སྐབས་དེར་ཞི་ཅིང་ཕིང་ནི་ Winnie དང་སྐུ་ཞབས་ཨོ་བྷ་མ་ནི་དོམ་ཕྲུག་དེ་དང་འབྲེལ་བའི་དགོད་བྲོའི་རྟོག་སྒྲུང་ལས་ tigger ཞེས་པའི་སྟག་གི་དཔེ་མཚུངས་བཀོད་ཡོད་པ་རེད། དེ་རྗེས་སླར་ཡང་ཕྱི་ལོ་ ༢༠༡༤ ལོར་ཞི་ཅིང་ཕིང་དང་ཉི་ཧོང་གི་སྲིད་བློན་ Shinzo Abe རྣམ་གཉིས་མཇལ་འཕྲད་སྐབས་རྟོག་སྒྲུང་དོམ་དང་མཚུངས་བསྡུར་བྱས་ཡོད་པ་མ་ཟད་ Shinzo Abe དེ་ Winnie the Pooh རྟོག་སྒྲུང་ལས་ Eeyore བོང་བུ་དང་དཔེ་མཚུངས་བཀོད་པ་བཅས་སྤྱི་ཚོགས་བརྒྱུད་ལམ་དྲྭ་རྒྱའི་ཐོག་ཏུ་ཞི་ཅིང་ཕིང་དང་དོམ་ཕྲུག་དེ་མཚུངས་བསྡུར་གྱིས་བྱ་སྤྱོད་དེ་རིམ་བཞིན་མང་དུ་སོང་བ་ལྟར་རྒྱ་ནག་གཞུང་གིས་ཞི་ཅིང་ཕིང་ལ་འཕྱ་སྨོད་ཀྱི་སྣང་བརྙན་དེ་རིགས་ཡོངས་རྫོགས་ནག་སུབ་བཏང་ཡོད་པ་རེད། ལྷག་པར་དུ་ཕྱི་ལོ་ ༢༠༡༥ ལོར་དམག་རྩེད་རུ་སྒྲིག་རྒྱས་སྟོན་སྐབས་སྲིད་འཛིན་ཞི་ཅིང་ཕིང་དང་དོམ་ Winnie དབར་མཚུངས་བསྡུར་བྱས་པ་དེ་ཆེས་ཡོངས་གྲགས་གྱུར་པ་མ་ཟད་ལོ་དེའི་ནང་སྣང་བརྙན་དེར་དམ་དྲག་ཤུགས་ཆེ་བྱ་ཡུལ་ཞིག་ཆགས་ཡོད་པ་མ་ཟད། རྒྱ་ནག་གཞུང་དང་ཞི་ཅིང་ཕིང་སྒེར་གྱི་ངོས་ནས་ཀྱང་དོ་སྣང་ཤུགས་ཆེ་བྱེད་དགོས་པའི་གནད་དོན་ཞིག་ཆགས་སྐོར་ Global Risk Insights ཞེས་པའི་ཆབ་དཔལ་རིག་གསུམ་དང་འབྲེལ་བའི་དཔྱད་ཞིབ་གསར་ཤོག་སྟེང་བཀོད་ཡོད་པ་རེད།

བསྟན་འཛིན་ཆོས་འཕེལ་ལགས་རྒྱ་གཞུང་གིས་འཛིན་བཟུང་འོག་གར་ཡོད་ཤེས་རྟོགས་མེད་པར་གྱུར་འདུག

བོད་ཀྱི་ཤར་ཕྱོགས་སུ་གནས་པ་ནག་ཆུ་ཁུལ་ཤག་རོང་རྟ་ཆེན་ཡུལ་ཚོ་ལྔ་པ་སྲ་ཁུ་གྲོང་ནས་ཡིན་པའི་ཚོང་པ་བསྟན་འཛིན་ཆོས་འཕེལ་ལགས་ཕྱི་ལོ་ ༢༠༡༨ ཕྱི་ཟླ་ ༣ པའི་ཟླ་མཇུག་ཏུ་རྒྱ་གཞུང་གིས་བཙན་ཁྲིད་འོག་ད་བར་ཟླ་བ་བཞི་ལྷག་འགྲོ་བཞིན་ཡོད་ཀྱང་ད་ལྟའི་ཆར་ཁོང་བཙོན་ཁང་གང་ཞིག་ཏུ་ཡོད་མེད་ཤེས་རྟོགས་ཐུབ་ཀྱི་མེད་སྟབས་འབྲེལ་ཡོད་ཚོས་ཁོང་གི་བདེ་འཇགས་ལ་སེམས་ཁྲལ་ཆེན་པོ་གནང་བཞིན་ཡོད་པ་རེད་འདུག འདི་ལོ་ཕྱི་ཟླ་གསུམ་པའི་ཟླ་མཇུག་ཏུ་བསྟན་འཛིན་ཆོས་འཕེལ་ལགས་རྒྱ་ནག་ནས་ལྷ་སར་ལོག་པའི་ལམ་བར་དུ་ལྷོ་ཁ་གོང་དཀར་གནམ་ཐང་ནས་རྒྱ་གཞུང་གིས་གློ་བུར་དུ་འཇུ་བཟུང་བྱས་ནས་ཅ་དངོས་བསྔོག་གཤེར་སྐབས་ཆབ་སྲིད་དང་འབྲེལ་བའི་རྩོམ་ཡིག་འགའ་ཞིག་དང་སྡོད་ཁྱིམ་དུ་བསྔོག་གཤེར་སྐབས་༸གོང་ས་མཆོག་གི་༸སྐུ་པར་བཅས་ཐོན་པའི་གནས་ཚུལ་ཙམ་ལས་འཛིན་བཟུང་བྱེད་དོན་གང་ཡིན་ཤེས་རྟོགས་ཐུབ་མེད་པ་མ་ཟད་ད་ལྟའི་ཆར་ས་གནས་གང་ཞིག་ཏུ་ཡོད་མེད་སོགས་ཞིབ་ཕྲའི་གནས་ཚུལ་ཤེས་ཐབས་བྲལ་ཡོད་པ་རེད། བསྟན་འཛིན་ཆོས་འཕེལ་ལགས་ནི་རྒྱུན་དུ་རང་རིགས་ལ་ཞེན་པ་དཀར་ཞིང་བོད་ཀྱི་ཁོར་ཡུག་སྲུང་སྐྱོབ་དང་བོད་མི་ཉམ་ཐག་ལ་རོགས་སྐྱོར་དང་བོད་ཀྱི་ལོ་རྒྱུས་དང་རིག་གནས་སྲུང་སྐྱོབ་དང་འབྲེལ་བའི་ལས་གཞི་གང་ཞིག་ཡོད་ཀྱང་དེའི་ཐད་ལ་དཔལ་འབྱོར་གྱི་ཞལ་འདེབས་འབུལ་བ་དང་། བོད་མི་ནང་ཁུལ་ལ་མཐུན་སྒྲིལ་སོགས་ཀྱི་ཆེད་དུ་ལྷག་བསམ་གཡོ་བ་མེད་པར་ཕྱག་ལས་གནང་མཁན་ཞིག་ཡིན་པ་དང་། ལྷག་པར་དུ་ལོ་ཤས་སྔོན་ནས་ནག་ཆུ་བྱི་ནགས་འཁོར་གསུམ་རྒྱུད་ཀྱི་གཏེར་ཆུ་དང་གཏེར་ཁ་སོགས་ལ་སྲུང་སྐྱོབ་ཆེད་དུ་རྫོང་དང་ལྗོངས་རིམ་པ་བརྒྱུད་ནས་གནས་རི་དང་། གནས་ས་མང་པོ་ཞིག་རྒྱ་ནག་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་ཁོངས་སུ་ཡིག་ཆ་བཞག་པ་དང་ལོ་རྒྱུས་ཀྱི་རྡོ་རིང་སློང་བ་སོགས་ཀྱི་ལས་གཞིའི་ཐད་ལའང་དཔལ་འབྱོར་གྱི་འགྲོ་གྲོན་མང་དག་བཏང་མྱོང་འདུག བསྟན་འཛིན་ཆོས་འཕེལ་ལགས་ནི་ད་ལྟའི་ཆར་ལོ་ན་བཞི་བཅུ་ཞེ་གྲངས་སོན་ཡོད་པ་དང་། ནག་ཆུ་གྲོང་ཁྱེར་དུ་གཏན་སྡོད་བྱེད་བཞིན་ཡོད་པ་མ་ཟད་ཁོང་ལ་བཟའ་ཟླ་དང་བུ་ཕྲུག་མེད་པར་རྒྱུན་དུ་ཚོང་ལས་གཉེར་གནང་གི་འདུག

རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཀྱི་ཚོགས་ཆུང་ནས་རྒྱ་ནག་ལ་མི་རིགས་དབྱེ་འབྱེད་དང་འབྲེལ་བའི་དྲི་བ་ཕུལ་འདུག

རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ནས་རྒྱ་གཞུང་གི་སྙན་ཐོར་བསྐྱར་ཞིབ་དང་འབྲེལ་ནས་ཡུལ་དེའི་ནང་གི་མི་རིགས་དབྱེ་འབྱེད་དང་འབྲེལ་བའི་གནད་དོན་ཐོག་དྲི་བ་ཁག་ཅིག་གནང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་ལྟེ་གནས་ཁང་གིས་སྤེལ་བའི་གནས་ཚུལ་ནང་གསལ་ལྟར་ན། མི་རིགས་དབྱེ་འབྱེད་ཀྱི་རྣམ་པ་འདྲ་མིན་རྩ་འགོག་དང་འབྲེལ་བའི་རྒྱལ་ཚོགས་ཀྱི་ཁྲིམས་སྒྲིག་ལག་བསྟར་ཐོག་དཔྱད་ཞིབ་གནང་མཁན་གྱི་ཚོགས་ཆུང་ནས་དེ་སྔོན་རྒྱ་གཞུང་གིས་མི་རིགས་དབྱེ་འབྱེད་དང་འབྲེལ་བའི་ལྷན་ཚོགས་ཐེངས་ ༩༦ ཐོག་ཕུལ་བའི་སྙན་ཐོ་དེར་བསྐྱར་ཞིབ་གནང་རྗེས་ཉེ་ལམ་ཕྱི་ཟླ་ ༦ ནང་རྒྱ་གཞུང་ལ་བོད་གཙོ་གྱུར་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་དྲི་བ་ཁག་ཅིག་གནང་ཡོད་པ་རེད། རྒྱལ་ཚོགས་ཀྱི་མི་རིགས་དབྱེ་འབྱེད་ཀྱི་ཚོགས་ཆུང་ནང་མི་རིགས་དབྱེ་འབྱེད་ཐོག་གི་ཆེད་ལས་མི་སྣ་ ༡༨ ཡོད་པ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྐུ་ཚབ་ནས་རིང་མིན་ཟླ་ ༨ ཚེས་ ༡༠ དང་ ༡༣  བར་ཚོགས་ཆུང་དེའི་མདུན་དུ་བཅར་ནས་དྲི་བ་ཁག་ཅིག་ལ་ལན་འདེབས་གསལ་བཤད་བྱ་རྒྱུ་ཡིན་པ་རེད། ད་ལན་རྒྱལ་ཚོགས་ཀྱིས་རྒྱ་གཞུང་ལ་ཕུལ་བའི་དྲི་བ་དེ་དག་མང་ཆེ་བ་དེ་སྔ་ནས་གནང་བའི་རྒྱུན་ལྡན་གྱི་དྲི་བ་ཆགས་ཀྱི་ཡོད་ཀྱང་ཐེངས་འདིའི་དྲི་བའི་ཁོངས་སུ་བོད་ནང་གི་འགྲོ་བ་མིའི་ཐོབ་ཐང་གཙོ་བཟུང་ཐོག་སོག་པོ་དང་ཡུ་གུར་གྲངས་ཉུང་མི་རིགས་རྣམས་ཀྱི་སྤྱི་མང་དང་ཆབ་སྲིད་ཐོབ་ཐང་བཅས་ཀྱི་སྐོར་དྲི་བ་ཕུལ་ཡོད་པ་མ་ཟད། ལྷག་དོན་གྲངས་ཉུང་མི་རིགས་དེ་དག་གི་ཆོས་དད་རང་དབང་དང་སྨྲ་བརྗོད་རང་དབང་། འདུ་འཛོམས་རང་དབང་སོགས་སྲུང་སྐྱོབ་གནང་རྒྱུ་ཐད་རྒྱ་ནག་གཞུང་ཕྱོགས་ནས་ཐབས་ཤེས་གང་དང་གང་གནང་ཡོད་མེད་སྐོར་དང་། བོད་མི་གཙོས་གྲངས་ཉུང་མི་རིགས་རྣམས་ལ་གང་བྱུང་དུ་དོ་དམ་དང་། བཀག་ཉར་འོག་འདས་གྲོངས་སུ་གྱུར་བའི་གནད་དོན། དེ་བཞིན་གྲངས་ཉུང་མི་རིགས་རྣམས་ཀྱི་ས་ཞིང་བཙན་འཕྲོག་བྱས་པར་གུན་གསབ་སྤྲོད་མེད་པ་སོགས་ཀྱི་གནད་དོན་མང་དག་ཐོག་དྲི་བ་ཕུལ་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱ་གཞུང་གིས་ད་བར་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་དྲི་བ་ཁག་ལ་ལན་འདེབས་རྩ་བ་ནས་གནང་མེད་པར་སྐྱོན་བརྗོད་དང་འབྲེལ། རྒྱ་གཞུང་ནས་ངེས་པར་དུ་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གིས་བོད་གཙོས་པའི་གྲངས་ཉུང་མི་རིགས་ཀྱི་གནད་དོན་ཐོག་ཕུལ་བའི་དྲི་བ་ཁག་ལ་དམིགས་བསལ་སེམས་འཚབ་བྱས་ཐོག་རྒྱལ་ཚོགས་དང་མཉམ་ལས་གནང་རྒྱུའི་དུས་ལ་བབ་ཡོད་སྐོར་གསུངས་སོང་། ལྷག་དོན་རྒྱ་གཞུང་དེ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཞིག་ཡིན་པའི་ཆ་ནས་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་འབྲུ་དོན་ཁག་ལ་བརྩི་བཀུར་ཞུས་ཐོག་ཚོགས་ཆུང་དེས་ཕུལ་བའི་དྲི་བ་ཁག་ལ་ལན་འདེབས་གསལ་པོ་གནང་དགོས་པའི་འོས་འགན་ཡོད་སྐོར་ནན་བརྗོད་གནང་འདུག གཞི་རྩའི་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ལ་ད་བར་རྒྱལ་སྤྱིའི་ཁྲོད་ཀྱི་སྤྱི་མང་ཚོགས་པ་འདྲ་མིན་ནས་བོད་མི་གཙོ་གྱུར་གྲངས་ཉུང་མི་རིགས་རྣམས་རྒྱ་གཞུང་གིས་བཙན་གནོན་འོག་སོ་སོའི་མི་རིགས་ཀྱི་ཆོས་དང་རིག་གཞུང་། སྐད་ཡིག་སོགས་བེད་སྤྱོད་བྱ་རྒྱུའི་ཐད་དཀའ་ངལ་ཆེན་པོ་འཕྲད་མུས་ཡིན་པའི་དངོས་ཡོད་གནས་སྟངས་འཁོད་པའི་གནས་ཚུལ་མང་པོ་ཞིག་མགོ་འབུལ་ཞུས་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་ཀྱང་རྒྱལ་ཚོགས་ཀྱི་ཚོགས་ཆུང་དེར་རྒྱ་གཞུང་གིས་བོད་མི་ཞིང་འབྲོག་རྣམ་པའི་ས་ཞིང་བཙན་འཕྲོག་གིས་ཁོང་ཚོར་གུན་གསབ་སྤྲད་ཀྱི་མེད་པ་དང་ལྷག་དོན་རྒྱའི་དོ་དམ་བཀག་ཉར་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེས་གཙོས་པའི་ད་བར་བོད་མི་བདུན་ཙམ་འདས་གྲོངས་གྱུར་ཡོད་པ་སོགས་ཀྱི་གནས་ཚུལ་ཁག་ཅིག་མགོ་འབུལ་ཞུས་ཡོད་པ་རེད།

Latest news