རྒྱ་ནག

རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ནང་གི་བོད་པའི་གྲྭ་བཙུན་རྣམས་ཆབ་སྲིད་ཐོག་ཡིད་བརྟན་འཕེལ་བ་བཟོ་ཆེད་ཉིན་གསུམ་གྱི་སློབ་གསོའི་སྦྱོང་བརྡར་སྤྲད་འདུག དེ་ཡང་ Global Times ཞེས་པའི་རྒྱ་ནག་གི་བརྒྱུད་ལམ་ཐོག་ཏུ་སྤེལ་བའི་གནས་ཚུལ་ལ་གཞིགས་ན། རྒྱ་གཞུང་གིས་བོད་པའི་གྲྭ་བཙུན་ཚོར་སྤྲད་པའི་ཆབ་སྲིད་སློབ་གསོའི་སྦྱོང་བརྡར་དེ་ཟླ་ ༥ ཚེས་ ༣༡ ཉིན་ནས་ཟླ་ ༦ ཚེས་ ༢ བར་བོད་ཀྱི་རྒྱལ་ས་ལྷ་སར་སྤྲད་འདུག་པ་དང་། བརྒྱུད་རིམ་དེའི་ཁྲོད་གྲྭ་བཙུན་རྣམ་པར་རྒྱ་ནག་དམར་ཤོག་ཚོགས་པར་དགའ་ཞེན་དང་ཡིད་ཆེས། ཆབ་སྲིད་ཀྱི་ལངས་ཕྱོགས་བརྟན་པོ་འཛིན་དགོས་པའི་སྐུལ་འདེད་བྱས་པ་མ་ཟད། ལྷག་དོན་གྲྭ་བཙུན་ཚོའི་ངོས་ནས་བཟང་སྤྱོད་དང་ལྡན་པའི་ཐོག་ཆོས་ཕྱོགས་ཀྱི་གནང་སྒོ་ཡང་དག་སྤེལ་དགོས་པ་དང་གཉན་འཕྲང་ཅན་གྱི་དུས་མཚམས་སུ་རྒྱལ་ཁབ་ཀྱི་བདེ་འཇགས་ལ་དམིགས་པའི་ལས་དོན་གཉེར་དགོས་པ་བཅས་དམིགས་བསལ་དོན་ཚན་བཞི་འབུར་བཏོན་ཐོག་སློབ་གསོ་སྤྲད་འདུག འོན་ཀྱང་སྐབས་དེར་ཆབ་སྲིད་སློབ་གསོའི་སྦྱོར་བརྡར་ནང་གྲྭ་བཙུན་ཇི་ཙམ་མཉམ་ཞུགས་གནང་ཡོད་མེད་ཀྱི་ཞལ་གྲངས་ཁ་གསལ་མེད་པ་རེད། Global Times གསར་ཁང་ལ་པེ་ཅིང་མི་རིགས་གཙུག་ལག་སློབ་ཁང་གི་སློབ་དཔོན་སྐུ་ཞབས་ Xiong Kunxin ཡིས་བོད་དེ་སྲ་བརྟན་གནས་པར་བོད་པའི་དགོན་སྡེ་དེ་དག་གནད་ཆེ་ཆགས་ཀྱི་ཡོད་པ་དང་ད་རེས་ཉིན་གསུམ་གྱི་སྦྱོང་བརྡར་དེའི་ནང་གཏམ་བཤད་བྱེད་མཁན་རྣམས་ནས་བོད་པའི་གྲྭ་བཙུན་ཚོར་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་བའི་བརྒྱུད་ཁོང་རྣམས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་པ་ཞིག་གནང་དགོས་གལ་གྱི་སློབ་གསོ་སྤྲད་ཡོད་སྐོར་བཤད་འདུག་མ་ཟད། སྦྱོང་བརྡར་སྤྲོད་མཁན་ཁོངས་སུ་བོད་རིགས་ཡོད་རྐྱེན་རྒྱ་གཞུང་གི་ལས་བྱེད་མི་སྣས་སྤྲད་པའི་སྦྱོང་བརྡར་དེ་ལས་ནུས་པ་ཆེས་ལྡན་པ་བྱུང་ཡོད་ཚུལ་འགྲེལ་བརྗོད་བྱས་འདུག གྲྭ་བཙུན་ཚོར་ཆབ་སྲིད་ཀྱི་སློབ་གསོའི་སྦྱོང་བརྡར་སྤྲོད་མཁན་ཁོངས་སུ་ཡོད་པའི་བོད་རིགས་དེ་དག་ནི་གཙོ་བོ་རྒྱ་ནག་དམར་ཤོག་ཚོགས་པར་དགའ་མོས་བྱེད་མཁན་གཞོན་སྐྱེས་གྲྭ་བཙུན་ཁག་ཅིག་ཆགས་ཀྱི་ཡོད་པ་མ་ཟད། རྒྱ་ནག་བོད་རིགས་པའི་ཞིབ་འཇུག་ཁང་གི་དམར་ཤོག་ཚོགས་པའི་དྲུང་ཆེ་ཟུར་པ་ཀྲུ་ཤའོ་མིང་གིས་བོད་རིགས་སྦྱོང་བརྡར་སྤྲོད་མཁན་རྣམས་ཆེད་མངགས་གཞུང་གི་སྒྲིག་འཛུགས་དང་གཞི་རིམ་ས་ཞིང་འདེབས་ལས་བྱེད་མཁན། དགེ་རྒན་དང་དགོན་ཁག་གི་ལས་བྱེད་མི་སྣ་ཁོངས་ནས་འདེམས་ཐོན་གནང་སྐོར་འགྲེལ་བརྗོད་བྱས་ཡོད་པ་རེད། འདི་ག་རླུང་འཕྲིན་ཁང་ནས་དེ་འབྲེལ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ་བཅར་འདྲི་ཞུས་པར་ཁོང་གིས་བོད་ནང་རྒྱ་ནག་གཞུང་གིས་དེ་སྔོན་ནས་བོད་མིར་རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་སྤེལ་ཡོད་པ་དང་། རྒྱ་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་དྲག་གནོན་གྱི་སྲིད་བྱུས་དེར་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པར་ནན་བརྗོད་གནང་སོང་། རྩ་བའི་རྒྱ་གཞུང་གིས་ཉེ་བའི་ལོ་ཤས་ནས་བོད་པའི་དགོན་སྡེ་ཁག་གི་ནང་ཆོས་ཕྱོགས་ཀྱི་བྱེད་སྒོ་སྤེལ་རྒྱུར་དམ་དྲག་ཤུགས་ཆེ་དང་། ཆོས་ཕྱོགས་ཀྱི་བྱེད་སྒོ་སྤེལ་བར་དམིགས་བསལ་ཆོག་མཆན་ཞུ་དགོས་པ་བཅས་ཀྱི་བཙན་བཀའ་འདྲ་མིན་གཏོང་མུས་ཁྲོད་ཟླ་ ༥ ཚེས་ ༢༡ ཉིན་བོད་པའི་གྲྭ་བཙུན་རྣམས་ནས་རྒྱ་ནག་གི་ཁྲིམས་དང་སྒྲིག་གཞིའི་སྐོར་གོ་རྟོགས་ཇི་ཙམ་ཡོད་མེད་ཤེས་རྟོགས་སླད་སེ་ར་དགོན་པར་དགེ་འདུན་པ་ ༤༠༠ ལྷག་ལ་ཁྲིམས་ལུགས་ཤེས་བྱའི་ཡིག་རྒྱུགས་ནང་ཞུགས་བཅུག་པའི་གནས་ཚུལ་ཐོན་ཡོད་པ་རེད། ངག་རྒྱུགས་དང་ཡིག་རྒྱུགས་ཟུང་འབྲེལ་བྱས་ནས་རྒྱུགས་ལེན་ནང་དོན་ཁྲོད་མི་རིགས་ས་ཁོངས་རང་སྐྱོང་བཅའ་ཁྲིམས་དང་ཆོས་ལུགས་ལས་དོན་སྐོར་གྱི་སྲོལ་ཡིག བདེ་འཇགས་དོ་དམ་གྱི་ཆད་པ་གཅོད་ཕྱོགས་སྐོར་གྱི་བཅའ་ཁྲིམས་སོགས་ཀྱི་ནང་དོན་ཚུད་ཡོད་པ་དང། རྒྱུགས་ལེན་གྱི་དམིགས་ཡུལ་གཙོ་བོ་གྲྭ་བཙུན་རྣམས་ནས་སྲིད་བྱུས་ཆུ་ཚད་དང་ཁྲིམས་ལུགས་ཆུ་ཚད། ཁྲིམས་སྐྱོང་དྲིལ་བསྒྲགས་སློབ་གསོའི་ལས་དོན་གྱི་ནུས་པ་མཐོ་རུ་གཏོང་བ་དང་། ཁོང་ཚོ་རྒྱལ་གཅེས་ཆོས་གཅེས་དང་ཁྲིམས་སྲུང་ཁྲིམས་བརྩི་བྱེད་མཁན་གྱི་གྲྭ་པ་ཞིག་གནང་རྒྱུར་སློབ་གསོ་ཁྲིད་སྟོན་བྱེད་ཆེད་ཡིན་སྐོར་བརྗོད་ཡོད་པ་རེད།

རྒྱ་གཞུང་གིས་གཞིས་རྩེ་གཉའ་མོ་གྲོང་ཚོའི་ཡུལ་མིར་དྲག་གནོན་དང་མང་ཚོགས་ ༡༤ འཛིན་བཟུང་བྱས་པའི་ཁྲོད་ནས་གྲོང་ཚོའི་ཏང་གི་དྲུང་ཆེ་རྒྱལ་མཚན་གྱིས་གཙོས་གཤམ་འོག་འགོ་ཁྲིད་ཚང་མ་འཛིན་བཟུང་བྱས་ཡོད་པ་ཤེས་རྟོགས་ཐུབ་ཡོད་པ་རེད། ཏང་གི་དྲུང་ཆེ་དང་ཏང་ཡོན་ལས་བྱེད་རྣམས་འཛིན་བཟུང་བྱེད་དགོས་དོན་ནི་མང་ཚོགས་ལ་ངན་སྐུལ་དང་འུར་ལངས་བྱེད་བཅུག་པའི་ཉེས་འཛུགས་འོག་འཛིན་བཟུང་བྱས་ནས་ཉ་རི་བཙོན་ཁང་དུ་བཀག་ཉར་བྱས་འདུག འཛིན་བཟུང་བྱས་པའི་མི་ ༡༤ དེ་དག་གི་ཁྲོད་ནས་མི་ལྔ་ཉེ་ལམ་ཕྱི་ཚེས་ ༡༨ ཉིན་གློད་བཀྲོལ་བཏང་ཡོད་ཀྱང་གྲོང་ཚོའི་ཏང་གི་དྲུང་ཆེ་དང་དང་གཤམ་འོག་ཏང་གི་འགོ་ཁྲིད་གཞན་རྣམས་ཀྱིས་གཙོས་མི་གཞན་རྣམས་མུ་མཐུད་བཀག་ཉར་བྱས་ཡོད་པ་མ་ཟད་ས་གནས་སུ་མུ་མཐུད་དྲག་གནོན་འོག་གནས་ཡོད་པ་རེད་འདུག ས་གནས་ལ་དོན་རྐྱེན་དེ་བྱུང་རྗེས་རྣམ་གླིང་ཤན་ནམ་ཡུལ་ཚོར་བདེ་འཇགས་ཀྱི་ཚད་གཞི་མ་ལོན་པར་རྩིས་ཏེ་ལོ་རེའི་དཔེ་བཟང་གི་བྱ་དགའ་སྤྲོད་པའི་བྱེད་སྒོ་དེ་ཡང་མེད་པ་བཟོ་འཆར་ཡོད་པ་རེད་འདུག སྤྱིར་གོང་གསལ་དོན་རྐྱེན་དེ་ནི་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་རྣམ་གླིང་རྫོང་། རྡོ་རྗེ་ཤང་། གཉའ་མོ་གྲོང་ཚོའི་ནང་ཕྱི་ལོ་ ༢༠༡༦ ལོར་རྒས་མི་ཞིག་ལྐོག་བསད་བཏང་བའི་མི་བསད་གྱོད་གཞི་ཞིག་བྱུང་ཡོད་ཅིང་ས་གནས་རྒྱ་ནག་གཞུང་གི་འབྲེལ་ཡོད་ལས་བྱེད་དང་ཉེན་རྟོག་པས་མི་གསོད་མཁན་གྱི་ཉེས་ཅན་པའི་ལག་ནས་ལྐོག་རྔན་བླངས་ཏེ་མི་གསོད་མཁན་ཉེས་ཅན་པ་འགེབས་སྲུང་བྱས་པ་མ་ཟད། མི་ཤི་མཁན་གྱི་ནང་མི་འཛིན་བཟུང་དང་ཉེས་རྡུང་དྲག་པོ་བཏང་ནས་ད་བར་གནད་དོན་དེར་དྲང་བདེན་གྱི་ཐག་གཅོད་ཡང་དག་པ་མ་བྱས་པར་བརྟེན་འདི་ལོ་ཕྱི་ལོ་  ༢༠༡༨ ཟླ་ ༥ ཚེས་ ༦ ཉིན་གཉའ་མོ་གྲོང་ཚོར་ཁྱིམ་ཚང་ ༡༨༢ ཡོད་པའི་མང་ཚོགས་ཚང་མས་རྡོག་རྩ་གཅིག་སྒྲིལ་གྱིས་སྲིད་གཞུང་ནས་དྲང་བདེན་གྱི་ཐག་གཅོད་མ་བྱས་པ་དེར་རྫོང་ལས་བྱེད་ལ་སླར་ཡང་ཞུ་རྒོལ་གནང་སྟབས། རྫོང་ཉེན་རྟོག་པའི་རླངས་འཁོར་དང་བཙོན་པ་བཅུག་སའི་རླངས་འཁོར་བཅས་ཁྱོན་རླངས་འཁོར་ ༣༢ འབྱོར་ཏེ་མང་ཚོགས་ཐོག་དྲག་གནོན་བྱས་པ་མ་ཟད་རྒྱལ་ཁབ་ལ་ངོ་ལོག་བྱས་པའི་ཆབ་སྲིད་ཀྱི་ཞྭ་་མོ་གཡོག་པ་དང་མང་ཚོགས་ཀྱི་དྲང་བདེན་ལས་འགུལ་དེ་ཆབ་སྲིད་གནད་དོན་ཡིན་པར་འགྲེལ་བརྗོད་བྱས་ཏེ་ཟླ་ ༥ ཚེས་ ༨ ཉིན་གྲོང་ཚོའི་འགོ་ཁྲིད་གཙོས་པའི་ཏང་ཡོན་ལས་བྱེད་དང་གྲོང་མང་ཚོགས་བཅས་མི་  ༡༤ འཛིན་བཟུང་གིས་བཙོན་འཇུག་བྱས་པའི་ཛ་དྲག་གནས་ཚུལ་ཐོན་ཡོད་པ་རེད། གྲོང་ཚོ་དེའི་ཡུལ་མི་ཚང་མས་འཛིན་བཟུང་བྱས་པའི་མི་རྣམས་གློད་བཀྲོལ་དགོས་པ་དང་གལ་ཏེ་གློད་བཀྲོལ་མ་གཏང་ཚེ་ཁོ་ཚོས་ད་ལོ་ས་ཞིང་འདེབས་ལས་གནང་རྒྱུ་མིན་པ་དང་གྲོང་ཚོའི་ཡུལ་མི་ཚང་མ་མཉམ་དུ་བཙོན་འཇུག་བྱེད་དགོས་པའི་དགོས་འདུན་བཏོན་ནས་ས་ཞིང་འདེབས་ལས་མཚམས་འཇོག་བྱས་ཡོད་འདུག ས་གནས་རྒྱ་གཞུང་གི་སྲིད་གཞུང་གིས་གོང་གི་གནད་དོན་དེ་མི་གཞན་དང་ཕྱིར་ཕྱོགས་ལ་འགྲེལ་བརྗོད་བྱེད་མི་ཆོག་པར་གསང་དགོས་པའི་བཀའ་རྒྱ་བཏང་བ་དང་། ཕྱི་ལ་གནད་དེ་བཤད་པ་ཤེས་རྟོགས་བྱུང་ཚེ་ཐག་གཅོད་ནན་པོ་བྱེད་རྒྱུ་ཡིན་པའི་འཇིགས་སྐུལ་བྱས་འདུག ལྷག་དོན་ས་གནས་སུ་ཉེན་རྟོག་པ་དང་དམག་མི་ཕོན་ཆེ་འགྲེམས་འཇོག་གིས་ས་གནས་ལ་དམ་དྲག་ཆེན་པོ་བྱས་དང་བྱེད་བཞིན་ཡོད་པ་རེད་འདུག

རྒྱ་ནག་གཞུང་གིས་ལྷ་ས་གྲོང་ཁྱེར་གཙོ་གྱུར་གཞིས་ཀ་རྩེ་དང་ནག་ཆུ་སོགས་བོད་རང་སྐྱོང་ལྗོངས་ཀྱི་མངའ་འོག་ལས་ཁུངས་ཁག་གི་ལས་བྱེད་དང་གུང་ཁྲན་ཏང་ཡོན་རྒས་ཡོལ་ལས་བྱེད་བཅས་ནས་ས་ག་ཟླ་བའི་སྐབས་དགོན་པར་མཆོད་མཇལ་དང་གླིང་སྐོར་འགྲོ་བ་སོགས་ཆོས་ཕྱོགས་ཀྱི་བྱེད་སྒོའི་ནང་ཞུགས་མི་ཆོག་པའི་བཀའ་རྒྱ་བཏང་བ་མ་ཟད་གལ་སྲིད་མཆོད་མཇལ་དང་གླིང་སྐོར་ལ་འགྲོ་བ་སོགས་ཤེས་རྟོགས་བྱུང་ཚེ་ལྐོག་ལ་བརྙན་པར་བླངས་ཏེ་ལས་བྱེད་ཡིན་ན་ལས་ཁུངས་ནས་ཕྱིར་ཕུད་དང་། རྒས་ཡོལ་ཡིན་ན་རྒས་ཡོལ་གྱི་ཐོབ་ཐང་ཁག་མེད་པ་བཟོ་རྒྱུ།  དེ་ལྟར་མ་བྱུང་ཚེ་གཞུང་གི་ལས་ཁུངས་ལ་ཡོད་པའི་བུ་ཕྲུག་ཚོ་ལས་ཀ་ནས་ཕྱིར་ཕུད་གཏང་རྒྱུའི་བཀའ་རྒྱ་བཀྲམས་ཡོད་པ་རེད་འདུག་ གནས་ཚུལ་མཁོ་སྤྲོད་པས་བརྗོད་དོན་ཕྱི་ལོ་ ༢༠༡༧ དང་ ༢༠༡༦ ལོར་རྒས་ཡོལ་ལས་བྱེད་ཁག་ཅིག་དེ་སྔ་གླིང་སྐོར་དང་མཆོད་མཇལ་ལ་ཕྱིན་པ་ཤེས་རྟོགས་བྱུང་རྗེས་རྒས་ཡོལ་གླ་ཕོགས་བཅད་པའི་དཀའ་ངལ་དངོས་སུ་འཕྲད་ཡོད་པ་མ་ཟད་ལས་བྱེད་ཀྱི་གླ་ཕོགས་དུས་རྒྱུན་དངུལ་ཁང་གི་བྱང་བུ་བརྒྱུད་འབྱོར་གྱི་ཡོད་རུང་རྗེས་སུ་འབྱོར་གྱི་མེད་སྟབས་རྒྱུ་མཚན་ཇི་ཡིན་ལས་ཁུངས་ལ་རྩད་གཅོད་གནང་སྐབས་ཁྱེད་རང་གིས་ཟླ་བ་དང་ཚེས་གྲངས་འདི་འདྲ་ཞིག་ལ་གླིང་སྐོར་དང་ཡང་ན་མཆོད་མཇལ་ལ་ཕྱིན་འདུག་ཅེས་ལྐོག་ལ་བརྒྱབ་པའི་བརྙན་པར་དང་བཅས་དཔང་རྟགས་ཐོག་འགྲེལ་བརྗོད་བྱས་པ་བྱུང་འདུག བཀའ་རྒྱ་དེ་ནི་ལས་ཁུངས་ཁག་ཏུ་བཀྲམས་པ་མ་གཏོགས་མངོན་གསལ་དོད་པོས་ཕྱི་ཕྱོགས་ལ་བཀྲམས་མེད་སྟབས་རྒྱ་ཆེའི་མང་ཚོགས་ནས་ཤེས་རྟོགས་ཐུབ་ཀྱི་མེད་པ་དང་། དེང་སྐབས་བོད་ནང་ཧོབ་དེ་ཁ་ལ་བལྟ་ཚེ་འཕྲུལ་འཁོར་དང་གྲོང་ཁྱེར་འཛུགས་སྐྲུན་སོགས་ཕྱིའི་རྣམ་པ་མཛེས་པོ་དང་ཡར་རྒྱས་ཀྱི་རྣམ་པ་ཡོད་ཀྱང་ནང་གི་གནས་སྟངས་ནི་ལོ་རེ་ནས་ལོ་རེ་བཞིན་ཇེ་སྡུག་ཏུ་འགྲོ་བཞིན་པ་མ་ཟད། ཞིང་འབྲོག་གྲོང་ཁྱེར་དུ་སྤོས་བཅུག་པ་སོགས་ཞི་ལྷོད་ངང་འཚོ་བ་སྐྱེལ་ཐབས་མེད་པ་རེད་འདུག

རྒྱ་ནག་གཞུང་གིས་བོད་ནང་ཆབ་སྲིད་སློབ་གསོའི་མིང་ཐོག་ནས་སློབ་གསོ་ཡོ་བསྲང་ལྟེ་གནས་ཁང་མང་པོ་ཆེད་འཛུགས་བྱས་ཡོད་པའི་ནང་བོད་མི་ཚོར་འཇིགས་སྐུལ་གྱིས་མནར་གཅོད་དང་བཙན་གཡེམ་གཏོང་བཞིན་པ་མངོན་གསལ་གནང་འདུག དེ་ཡང་ཉེ་ཆར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་མཚན་བརྗོད་འདོད་མེད་པའི་དགེ་འདུན་པ་ཞིག་གིས་བོད་ནང་གི་དངོས་ཡོད་གནས་སྟངས་བྲིས་པའི་ཁོང་གི་ཉིན་ཐོ་བརྒྱུད་སྤྲོད་གནང་བའི་ནང་འདས་པའི་ལོ་ཤས་ནང་རྒྱ་གཞུང་གིས་བོད་ནང་ཁྲིམས་མེད་ལུགས་མེད་ཀྱི་ཆབ་སྲིད་སློབ་གསོའི་ལྟེ་གནས་ཁང་མང་དག་ཞིག་ཆེད་འཛུགས་བྱས་ཡོད་པ་དང་དེ་དག་གི་ནང་བོད་མི་ཚོར་བཙན་གཡེམ་དང་མནར་གཅོད་གཏོང་བཞིན་པ་སོགས་ཀྱི་གནས་སྟངས་སྐོར་མངོན་གསལ་གནང་འདུག དགེ་འདུན་པ་ཁོང་གིས་གནས་ཚུལ་བརྒྱུད་སྤྲོད་གནང་བའི་བརྒྱུད་དེ་སྔ་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ས་ཁུལ་ནས་བོད་ཀྱི་ས་ཁུལ་གཞན་ནང་སློབ་གཉེར་གནང་བར་ཕེབས་མཁན་དགེ་འདུན་པ་དང་བཙུན་མ་རྣམས་བཙན་དབང་ཐོག་རང་གི་ཕ་ཡུལ་དུ་ཕྱིར་ལོག་བྱེད་དུ་བཅུག་པ་དང། ཕྱིར་ལོག་གནང་རྗེས་ཁོང་རྣམས་ལ་ཆབ་སྲིད་སློབ་གསོའི་ལྟེ་གནས་ཁང་དུ་བཞུགས་བཅུག་པ་མ་ཟད། ལྟེ་གནས་ཁང་དེ་དག་ནས་གློད་བཀྲོལ་ཐོབ་རྗེས་གྲྭ་ཆས་གྱོན་མི་ཆོག་པ་དང། དགོན་པ་དང་སློབ་གཉེར་ཁང་གཞན་གྱི་ནང་དུ་ཞུགས་མི་ཆོག་པའི་དམ་དྲག་བྱེད་མུས་ཀྱི་གནས་ཚུལ་ཐོན་པ་རྣམས་བདེན་དཔང་ར་སྤྲོད་བྱུང་འདུག དགེ་འདུན་པ་དེས་ཁོང་དེ་སྔོན་ཟླ་བ་ ༤ ཙམ་རིང་བོད་ནག་ཆུ་ཁུལ་སོག་རྫོང་དུ་རྒྱ་གཞུང་གི་ཆེད་འཛུགས་བྱས་པའི་ཆབ་སྲིད་སློབ་གསོ་ལྟེ་གནས་ཁང་དུ་བཙན་དབང་ཐོག་བཞུགས་རིང་རང་གི་མྱོང་བ་རྣམས་ཉིན་ཐོར་བཀོད་ཡོད་པ་རེད་འདུག རྩ་བའི་དགེ་འདུན་པ་ཁོང་ནི་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ནག་ཆུ་ཁུལ་སོག་རྫོང་ནས་ཡིན་ཞིང། འདས་པའི་ལོ་ཤས་ནང་རྒྱ་གཞུང་གིས་བོད་རང་སྐྱོང་ལྗོངས་ཀྱི་གྲྭ་བཙུན་རྣམས་བོད་ཀྱི་ས་ཁུལ་གཞན་གྱི་དགོན་སྡེ་ཁག་ཏུ་སློབ་གཉེར་གནང་མི་ཆོག་པའི་བཙན་བཀའ་བཏང་རྐྱེན་བོད་མཚོ་སྔོན་ཁུལ་ནས་ཕྱིར་ལོག་གནང་གྲས་ཆགས་ཀྱི་འདུག ཁོང་གི་ཉིན་ཐོའི་ནང་ཁོང་ནས་མཚོ་སྔོན་ནང་དུ་སློབ་གཉེར་གནང་ཆེད་དུ་བསྐྱོད་པ་ལས་ཁྲིམས་འགལ་གྱི་བྱ་སྤྱོད་གང་ཡང་སྤེལ་མེད་ཀྱང་། ཕྱི་ལོ་ ༢༠༡༧ ཟླ་ ༧ ཚེས་ ༡༣ ཉིན་རྒྱགཞུང་ཉེན་རྟོག་པས་ཁོང་རང་གི་ཕ་ཡུལ་དུ་བཙན་ཁྲིད་བྱས་ཡོད་པ་དང། སྐབས་དེར་རྒྱ་གཞུང་གི་བཀོད་ཁྱབ་ནང་ཁོང་ཕྱིར་ལོག་མ་གནང་ཚེ་ཁོང་གི་ཕ་མ་དང་སྤུན་མཆེད། ནང་མི་སོགས་འཛིན་བཟུང་བྱ་རྒྱུའི་བཙན་བཀའ་བཏང་ཡོད་པ་མ་ཟད་ནང་མིའི་བྱིས་པ་རྣམས་སློབ་གྲྭར་འགྲོ་མི་ཆོག་པ་དང་། དབྱུར་རྩ་དགུན་བུ་བརྐོ་མི་ཆོག་པ་བཟོ་རྒྱུའི་ཉེན་བརྡ་བཏང་ཡོད་པ་ལྟར་ཁོང་ཕྱིར་ལོག་མ་གནང་ཐབས་མེད་ཀྱི་གནས་སྟངས་བྱུང་ཡོད་པ་གསུངས་འདུག

རྒྱ་ནག་ཏུ་གཞུང་འབྲེལ་འཚམས་གཟིགས་གནང་བཞིན་པའི་འཇར་མ་ནི་རྒྱལ་ཁབ་ཀྱི་སྲིད་བློན་ལྕམ་ Angela Merkel མཆོག་ནས་ཡུལ་དེའི་ནང་གི་འགྲོ་བ་མིའི་ཐོབ་ཐང་གི་གནད་དོན་གལ་ཆེ་འཛིན་བཞིན་པ་མངོན་གསལ་གནང་ཆེད་ཟླ་ ༥ ཚེས་ ༢༤ ཉིན་དུས་ཚོད་དམིགས་བསལ་བཀོད་སྒྲིག་མ་གནང་པར་རྒྱ་ནག་གི་བཙོན་ཁང་ཏུ་ཡོད་པའི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་སྐུ་ཞབས་ Wang Quanzhang ལགས་ཀྱི་ལྕམ་ Li Wenzu ལགས་དང་སྐུ་ཞབས་ Yu Wensheng ལགས་ཀྱི་ལྕམ་ Xu Yan ལགས་དང་ཐུག་འཕྲད་གནང་འདུག ཉི་ཧོང་གི་ The Asahi Shimbum གྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ལྕམ་ Merkel མཆོག་ནས་འགྲོ་བ་མིའི་ཐོབ་ཐང་གི་ཁྲིམས་རྩོད་པའི་བཟའ་ཟླ་རྣམ་གཉིས་དང་མཇལ་འཕྲད་གནང་སྐབས་ཁོང་རྣམ་གཉིས་ནས་ལྕམ་ Merkel མཆོག་ལ་རང་ཉིད་ཀྱི་བཟའ་ཟླ་དང་ནང་མི་རྣམས་ཀྱི་གནས་སྟངས་ཐོག་ཐུགས་སྣང་གནང་བར་ཐུགས་རྗེ་ཆེ་ཞུས་པ་དང་འབྲེལ་རྒྱབ་སྐྱོར་གནང་སྐྱོང་ཡོང་བར་འབོད་སྐུལ་ཞུས་འདུག རྩ་བའི་ལོ་ན་ ༤༢ སོན་པའི་སྐུ་ཞབས་ Wang Quanzhang ལགས་ལ་མཚོན་ན་ཕྱི་ལོ་ ༢༠༡༥ ཟླ་ ༧ པའི་ནང་རྒྱ་གཞུང་གིས་ཡུལ་དེའི་ཁྲིམས་རྩོད་པ་རྣམས་ལ་དྲག་གནོན་ཤུགས་ཆེ་བྱས་པའི་ཁྲོད་རྒྱལ་ཁབ་མགོ་རྟིང་སློག་པའི་ཉེས་མིང་འོག་འཛིན་བཟུང་བྱས་པ་དང་། དེ་བཞིན་ལོ་ན་ ༥༠ ལ་སོན་པའི་སྐུ་ཞབས་ Yu Wensheng ལགས་ནི་ཕྱི་ལོ་ ༢༠༡༨ ཟླ་ ༡ པོའི་ནང་རྒྱ་ནག་ནང་ཆབ་སྲིད་བཅོས་བསྒྱུར་དགོས་པའི་བསྒྲགས་གཏམ་ཞིག་འགྲེམས་སྤེལ་གནང་རྐྱེན་འཛིན་བཟུང་བྱས་པ་དང་ཟླ་ ༤ པའི་ནང་རྒྱལ་ཁབ་མགོ་རྟིང་སློག་རྒྱུའི་དོགས་ཟོན་འོག་འཛིན་བཟུང་བྱས་ཡོད་པ་རེད། ད་རེས་ལྕམ་ Merkel མཆོག་ནས་རྒྱ་རིགས་ཁྲིམས་རྩོད་པ་རྣམ་གཉིས་ཀྱི་བཟའ་ཟླ་དང་ལྷན་ཐུག་འཕྲད་གནང་རྗེས། རྒྱལ་སྤྱིའི་ཁྲོད་དེ་སྔོན་རྒྱ་ནག་གི་དོ་དམ་འོག་འདས་གྲོངས་སུ་གྱུར་བའི་རྒྱ་ནག་གི་འགྲོ་བ་མིའི་ཐོབ་ཐང་གི་ལས་འགུལ་བ་དང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ཀྱི་བཟའ་ཟླ་ལྕམ་ Liu Xia ལགས་སུ་བྱ་སྤྱོད་ཇི་ལྟར་སྤེལ་ཚུལ་ཐོག་ཐུགས་སྣང་ཆེན་པོ་གནང་གཞི་ཞིག་ཆགས་ཡོད་པ་རེད། གནས་ཚུལ་ཐོན་ཁག་ལ་གཞིགས་ན་ལྕམ་ Liu Xia ལགས་ཀྱི་འཕྲོད་བསྟེན་གྱི་གནས་བབ་ཇེ་སྡུག་ཏུ་ཕྱིན་ཡོད་པ་དང། ཁོང་གིས་རང་ཉིད་འཇར་མ་ནི་ལ་གཞིས་སྤོ་བྱ་རྒྱུའི་མངོན་འདོད་ཡོད་པ་གསལ་བཏོན་གནང་ཡོད་པ་རེད་འདུག གཞི་རྩའི་ལྕམ་ Merkel མཆོག་ནས་དེ་སྔ་རྒྱ་ནག་ཏུ་འཚམས་གཟིགས་སྐབས་ Liu Xia ལགས་དང་ཐུག་འཕྲད་གནང་མྱོང་ཡོད་པ་དང། ཁོང་གིས་ད་རེས་ཀྱི་འཚམས་གཟིགས་དེའི་ཁྲོད་རྒྱ་ནག་གི་སྲིད་འཛིན་ཞི་ཅིང་ཕིང་དང་སྲིད་བློན་ Li Keqiang གཉིས་དང་མཇལ་འཕྲད་གནང་ཡོད་ཀྱང་། Liu Xia ལགས་ཀྱི་གནད་དོན་སྐོར་གླེང་མོལ་གནང་ཡོད་མེད་གསལ་བཏོན་གང་ཡང་གནང་མི་འདུག འོན་ཀྱང་ཟླ་བ་འདིའི་ཚེས་ ༢༤ ཉིན་ཚོགས་པའི་གསར་འགོད་ལྷན་ཚོགས་ཐོག་གསར་འགོད་པས་རྒྱ་ནག་གི་སྲིད་བློན་ Le Keqiang ལ་ Liu Xia ལགས་ཀྱི་གནད་དོན་སྐོར་དྲིས་སྐབས་ Le Keqiang ཡིས་ང་ཚོས་འཇར་མ་ནི་དང་ལྷན་དུ་ཁྲིམས་ཀྱི་ཚད་གཞི་སྒོ་ནས་འགྲོ་བ་མིའི་ཐོབ་ཐང་གི་ལངས་ཕྱོགས་གཞིར་བཟུང་བཀའ་མོལ་གནང་རྒྱུ་དང་འབྲེལ། མི་སྒེར་གྱི་གནད་དོན་ཐོག་ཕན་ཚུན་དབར་གུས་བརྩི་དང་དཔུང་པ་མཉམ་གཤིགས་ཐོག་གྲོས་བསྡུར་ཞུ་རྒྱུ་ཡིན་ཞེས་བཤད་འདུག

རྒྱ་ནག་གཞུང་གིས་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་སུ་ལོ་ལྔ་ཡིས་བཙོན་འཇུག་ཁྲིམས་ཐག་བཅད་པ་དེར་བོད་མི་དང་བོད་དོན་རྒྱབ་སྐྱོར་བ།  དེ་བཞིན་འགྲོ་བ་མིའི་ཐོབ་ཐང་གི་ཚོགས་པ་ཁག་བཅས་ནས་སྐྱོན་བརྗོད་ཤུགས་ཆེར་བྱེད་མུས་ཁྲོད། ཕ་རན་སི་དང་། ཡོ་རོབ། ཁེ་ན་ཌ་གཞུང་ནས་ཀྱང་རྒྱ་གཞུང་ལ་སྐྱོན་བརྗོད་ཤུགས་ཆེར་བྱས་འདུག france Diplomatie གསར་ཁང་ནས་གནས་ཚུལ་སྤེལ་བ་ལྟྲར་ན། ཕ་རན་སི་ཕྱི་སྲིད་ལས་ཁུངས་ནས་རྒྱ་ནག་སྤྱི་མཐུན་རྒྱལ་ཁབ་ཀྱི་ཁྲིམས་ལུགས་འོག་བཀྲིས་དབང་ཕྱུག་ལགས་ཀྱིས་རང་གི་སྨྲ་བརྗོད་རང་དབང་ལོངས་སུ་སྤྱད་པའི་ཐོག་རྒྱ་གཞུང་ལ་བོད་ཀྱི་སྐད་ཡིག་ཐོག་ཐུགས་ཁུར་བཞེས་དགོས་པའི་དགོས་འདུན་བཏོན་པ་དེར་ཡུ་ཤུ་འབྲིང་རིམ་མི་མང་ཁྲིམས་ཁང་ནས་ཁ་བྲལ་བའི་ཉེས་མིང་འོག་ལོ་ ༥ ཡི་རིང་བཙོན་འཇུག་ཁྲིམས་ཐག་བཅད་པ་ལ་ཧ་ཅང་བློ་ཕམ་ཡོད་གསུངས་པ་དང་སྦྲགས།   རྒྱ་ནག་གཞུང་ནས་ཁྲིམས་ཀྱི་སྒྲོམ་གཞི་དང་མཐུན་པའི་ཐོག་རྒྱ་ནག་གཞུང་འཛིན་པ་དང་ས་གནས་བོད་རིགས་དབར་གྲོས་མོལ་གྱི་ཐོག་ནས་གནད་དོན་སེལ་དགོས་པ་སྐུལ་མ་གནང་འདུག དེ་བཞིན་ཁ་ས་ཕྱི་ཚེས་ ༢༣ ཉིན་ཡོ་རོབ་ཀྱི་ཕྱི་སྲིད་དང་རྒྱལ་སྲུང་སྲིད་བྱུས་ལས་ཁུངས་ཀྱི་མགྲིན་ཚབ་པས་བསྒྲགས་གཏམ་ཞིག་སྤེལ་བའི་ནང་རྒྱ་ནག་རང་ཉིད་ཀྱི་ཁྲིམས་དང་རྒྱལ་སྤྱིའི་ཁྲིམས་ལུགས་ནང་དུ་དྲང་བདེན་གྱི་ཁྲིམས་གཤེར་དང། དུས་གྱང་མེད་པའི་ཐོག་ནས་ཁྲིམས་གཤེར་འཕྲལ་མར་ཉིད་དུ་བྱ་རྒྱུ་སོགས་འཁོད་ཡོད་ནའང་དེར་གུས་རྩིས་མེད་པ་མ་ཟད། ཕྱི་ལོ་ ༡༩༨༡ ལོར་རྒྱ་ནག་གཞུང་རང་ཉིད་ཀྱིས་མི་རིགས་དབྱེ་འབྱེད་དང་འབྲེལ་བའི་ཁྲིམས་ཡིག་བཀའ་ཁྱབ་གནང་བ་བཞིན་གྲངས་ཉུང་མི་རིགས་ལ་ཐོབ་ཐང་འདྲ་མཉམ་དང་། སྨྲ་བརྗོད་ཀྱི་རང་དབང་སྤྲོད་དགོས་ངེས་ཡིན་པ་ཐེར་བཏོན་གནང་ཡོད་པ་མ་ཟད། རྒྱ་ནག་རང་ཉིད་ནས་ཁ་དན་ཟིན་པའི་རྒྱལ་སྤྱི་ཁྲིམས་དང་རང་ཉིད་ཀྱི་རྩ་ཁྲིམས་ནང་གསལ་ལྟར། རྒྱ་ནག་གཞུང་འཛིན་པ་ཚོས་སྨྲ་བརྗོད་ཀྱི་རང་དབང་ལ་གུས་བརྩི་ཞུ་རྒྱུའི་རེ་བ་ཡོད་བཅས་གསུངས་འདུག   དེ་བཞིན་རྒྱ་གཞུང་ལ་བཀྲིས་དབང་ཕྱུག་ལགས་གཙོས་པའི་སྐུ་ཞབས་ Ilham tohti ལགས་དང་རྒྱ་རིགས་ཁྲིམས་རྩོད་པ་རྣམས་གང་མགྱོགས་གློད་བཀྲོལ་དགོས་པའི་རེ་འདུན་བཏོན་འདུག དེ་དང་ཕྱོགས་མཚུངས་ཁེ་ན་ཌ་གཞུང་གིས་རྒྱ་ནག་ཏུ་ཡོད་པའི་གཞུང་ཚབ་ལས་ཁུངས་བརྒྱུད་བཀྲིས་དབང་ཕྱུག་ལགས་གང་མགྱོགས་གློད་བཀྲོལ་དགོས་པ་དང་རྒྱ་ནག་གཞུང་ནས་རང་ཉིད་ཀྱི་རྩ་ཁྲིམས་དང་བཅའ་ཁྲིམས། དེ་བཞིན་རང་ཉིད་ཀྱིས་ཁ་དན་ཟིན་པའི་རྒྱལ་སྤྱིའི་འགྲོ་བ་མིའི་ཐོབ་ཐང་བཅས་ལ་བརྩི་སྲུང་བྱ་དགོས་པའི་རེ་འདུན་ཤུགས་ཆེར་བཏོན་གནང་འདུག

ད་རིང་ཐེ་ཝན་གསར་ཁང་ནས་གནས་ཚུལ་སྤེལ་བ་ལྟར་ན། རྒྱ་གཞུང་གིས་གནོན་ཤུགས་འོག་ཐེ་ཝན་གྲོས་ཚོགས་འཐུས་མི་སྐུ་ཞབས་ Freddy lim ལགས་ཀྱི་སྐུ་ཚེའི་ལོ་རྒྱུས་ཁྲོད་ཁོང་གྲགས་ཅན་གྱི་གཞས་པ་ཞིག་ནས་རྒྱལ་ཁབ་ཀྱི་ཁྲིམས་བཟོ་ལྷན་ཚོགས་ཀྱི་ཚོགས་མི་ཞིག་ཏུ་བསྒྱུར་བའི་དངོས་བྱུང་གི་གློག་བརྙན་ Metal politics Taiwan ཅེས་པ་ཡུལ་དེར་གཟིགས་འབུལ་ཞུ་རྒྱུ་དཀའ་ངལ་འཕྲད་འདུག དེ་ཡང་གློག་བརྙན་དེའི་བཀོད་ཁྲིད་པ་སྐུ་ཞབས་ Macro Wilms ལགས་ཀྱིས་སྐུ་ཞབས་ Freddy ལགས་ནི་ཐེ་ཝན་རང་བཙན་དང་བོད་ཀྱི་གནད་དོན་བཅས་གཞི་རྩའི་འགྲོ་བ་མིའི་ཐོབ་ཐང་རྩོད་མཁན་གྱི་ལས་འགུལ་བ་ཞིག་ཡིན་པ་ཟད། རྒྱ་གར་དུ་༸གོང་ས་མཆོག་དང་མཇལ་མོལ་གནང་མྱོང་མཁན་ཞིག་ཡིན་སྟབས་རྒྱ་ནག་གཞུང་གིས་གནོན་ཤུགས་འོག་གློག་བརྙན་བཟོ་ལས་ཁང་གཞན་རྣམས་ནས་གཟིགས་འབུལ་ཞུ་ཐུབ་མེད་པ་ཞིག་ཡིན་པར་བརྗོད་འདུག སྐུ་ཞབས་ Freddy ལགས་ཀྱི་སྐུ་ཚེའི་ལོ་རྒྱུས་དང་འབྲེལ་བའི་དངོས་བྱུང་གློག་བརྙན་དེ་རྒྱ་ནག་གཞུང་གི་གནོན་ཤུགས་འོག་ཐེ་ཝན་གྱི་གློག་བརྙན་བཟོ་ལས་ཁང་གཞན་རྣམས་ཀྱིས་གཟིགས་འབུལ་ཞུ་ཐུབ་མེད་ནའང་ད་རིང་ཕྱི་ཟླ་ ༥ ཚེས་ ༢༡ ཉིན་ཐེ་ཝན་གྱི་རྒྱལ་ས་ Taipei ནང་དུ་ཚོགས་བཞིན་པའི་2018 Urban Nomad film fest གློག་བརྙན་དུས་སྟོན་གྱི་ཐོག་རྒྱ་གཞུང་གིས་གནོན་ཤུགས་ལ་མ་འཛེམས་པར་གློག་བརྙན་དེའི་བཀོད་སྒྲིག་པ་སྐུ་ཞབས་ Macro Wilms ལགས་ནས་ཉིན་གཉིས་ཀྱི་རིང་གཟིགས་འབུལ་ཞུ་རྒྱུ་ཡིན་པ་རེད་འདུག རྩ་བའི་ཐེ་ཝན་གྱི་གཞས་པ་གྲགས་ཅན་གྲོས་ཚོགས་འཐུས་མི་སྐུ་ཞབས་ Freddy lim ལགས་ནི་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་ཡིན་པ་མ་ཟད། ད་ཆ་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡང་ཡིན་པ་རེད། སྐུ་ཞབས་ Freddy ལགས་ནི་བོད་ཀྱི་རྩ་དོན་ལ་དོན་གཉེར་ཆེན་པོ་གནང་མཁན་ཞིག་ཡིན་པ་དང་། ༸གོང་ས་མཆོག་དང་མཇལ་འཕྲད་ཐེངས་ཁ་ཤས་གནང་མྱོང་ཡོད་པ་རེད།

ཟླ་བ་སྔོན་མའི་ཚེས་ ༢ ཡས་མས་ཤིག་ལ་ཁམས་འབྲི་རུ་རྫོང་ཤག་ཆུ་གྲོང་བརྡལ་གྱི་ས་གནས་མང་ཚོགས་ནས་ཡུལ་དེའི་གནས་རི་སེབ་ཁྲ་རྫ་རྒན་གྱི་གཏེར་ཁ་སྔོག་འདོན་ལས་གཞིར་ཞི་རྒོལ་གནང་བར་བརྟེན་རྒྱ་གཞུང་གིས་དོགས་ཡོད་བོད་མི་ ༣༠ ཙམ་གང་བྱུང་བཀག་ཉར་བྱས་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་གནས་ཚུལ་སྤེལ་བར་རྒྱ་གཞུང་གིས་ཕྱི་ཟླ་ ༢ པའི་ཟླ་མཇུག་ཙམ་ནས་ཁམས་འབྲི་རུ་རྫོང་ཤོང་ཆུ་གྲོང་བརྡལ་དང་ཐག་ཉེ་བའི་སེབ་ཁྲ་རྫ་རྒན་ཞེས་པའི་གནས་རི་ནས་ས་གནས་མང་ཚོགས་ཀྱི་འདོད་པ་ཡོད་མེད་ལ་མ་ལྟོས་པར་བཙན་ཤེད་ཀྱིས་གཏེར་ཁ་སྔོག་འདོན་བྱ་རྒྱུའི་ལས་གཞིར་མོས་མཐུན་གྱི་མིང་རྟགས་བཀོད་དུ་བཅུག་པ་དང་དེར་ས་གནས་མང་ཚོགས་ཀྱི་ངོས་ནས་ཞི་རྒོལ་གནང་བར་བརྟེན་ས་གནས་སྲིད་གཞུང་གིས་ཛ་དྲག་ཚོགས་འདུ་བསྐོང་ཚོགས་བརྒྱུད་དོགས་ཡོད་བོད་མི་ ༣༠ ཙམ་བཙན་ཤེད་ཀྱིས་གང་བྱུང་བཀག་ཉར་བྱས་འདུག ལྟེ་གནས་ཁང་ལ་རྒྱ་གཞུང་གིས་བཀག་ཉར་བྱས་པའི་བོད་མི་སུམ་ཅུ་དེ་དག་གི་ཁྲོད་ནས་བོད་མི་དགུའི་འདྲ་པར་དང་ལྷག་དོན་བོད་མི་བདུན་གྱི་མཚན་སོགས་འབྲེལ་ཡོད་བརྒྱུད་ནས་ཕྱག་སོན་བྱུང་འདུག འོན་ཀྱང་ད་ལྟའི་ཆར་ཁོང་རྣམས་ཀྱི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མི་འདུག བོད་མི་བདུན་གྱི་མཚན་ཤེས་རྟོགས་བྱུང་ཡོད་པ་རྣམས་ནི་རང་ལོ་ ༣༦ ཡིན་པའི་འབྲི་རུ་རྫོང་ཤག་ཆུ་གྲོང་བརྡལ་གྱི་ལས་བྱེད་མཁྱེན་རབ་ལགས་དང་ཝ་ཐང་འབྲོང་ངུར་དགོན་གྱི་རང་ལོ་ ༥༠ ཡིན་པའི་གྲྭ་ཚུལ་ཁྲིམས་མགོན་པོ་ལགས། རང་ལོ་ ༣༩ ཡིན་པའི་གྲྭ་རིན་ཆེན་རྣམ་གྲོལ་ལགས། དེ་བཞིན་བྱང་ཆུབ་དངོས་གྲུབ་ལགས། བྲག་ར་གྲོང་ཚོའི་རྣམ་སྲས་ལགས། རང་ལོ་ ༥༡ ཡིན་པའི་དོན་རྒྱས་ལགས། དེ་བཞིན་རང་ལོ་ ༣༨ ཡིན་པའི་སྨན་པ་སོག་རུ་ཨ་བུ་ལགས་བཅས་རེད་འདུག དེའི་ཁྲོད་མཁྱེན་རབ་ལགས་དེ་སྔ་ ༢༠༡༥ ལོར་རྒྱ་གཞུང་གིས་ཁོང་ལ་ཁ་བྲལ་དང་འབྲེལ་བ་ཡོད་པའི་ཉེས་འཛུགས་འོག་ཟླ་བ་ ༦ རིང་བཀག་ཉར་བྱས་འདུག་པ་དང་། གྲྭ་རིན་ཆེན་རྣམ་གྲོལ་ལགས་དང་ཚུལ་ཁྲིམས་མགོན་པོ་ལགས་གཉིས་ཀྱང་ཕྱི་ལོ་ ༢༠༡༥ ལོར་ཁ་བྲལ་བའི་ཉེས་འཛུགས་འོག་མི་ལོ་ ༡ རིང་བཀག་ཉར་བྱས་ཡོད་པ་མ་ཟད། ངོ་རྟགས་མ་ཆོད་པའི་བོད་རིགས་བུ་མོ་གཉིས་དང་གཞན་རྣམས་རྒྱ་གཞུང་གིས་དོགས་གཞིའི་འོག་དུས་ཡུན་འདྲ་མིན་གྱི་འཛིན་བཟུང་བཀག་ཉར་འོག་ལ་ཚུད་མྱོང་ཡོད་པ་རེད།

ཁ་སང་ཕྱི་ཟླ་ ༥ ཚེས་ ༡༤ ཉིན་global times དང་ Hindustan Times Business insider བཅས་ཀྱིས་གནས་ཚུལ་སྤེལ་བར་ཨ་རིར་རྟེན་གཞི་བྱས་པའི་ Gap ཚོང་ལས་ཁང་ནས་ཉེ་ལམ་ཚོང་འགྲེམས་བྱ་རྒྱུའི་སྟོད་ཐུང་ཞིག་གི་ཐོག་བོད་དང་ཐེ་ཝན་མ་ཚུད་པའི་རྒྱ་ནག་གི་ས་ཁྲའི་པར་རིས་བཀོད་པར་རྒྱ་ནག་མི་མང་གིས་སྐྱོན་བརྗོད་བྱས་པ་ལྟར་ཚོང་ལས་ཁང་དེའི་ངོས་ནས་རྒྱ་ནག་ལ་དགོངས་སེལ་ཞུས་འདུག ཨ་རིའི་གེཔ་ཚོང་ལས་ཁང་གིས་བོད་ལྷོ་ཕྱོགས་སུ་ཡོད་པའི་ས་ཁུལ་དང་། ཐེ་ཝན།  ལྷོ་རྒྱ་ནག་རྒྱ་མཚོའི་གླིང་ཕྲན་བཅས་མེད་པའི་རྒྱ་ནག་གི་ས་ཁྲའི་པར་རིས་ཡོད་པའི་སྟོད་ཐུང་ཞིག་ཚོང་འགྲེམས་བྱས་པའི་གནས་ཚུལ་དེ་རྒྱ་ནག་གི་སྤྱི་ཚོགས་དྲྭ་གནས་ Weibo ཐོག་ཁྱབ་སྤེལ་ཆེན་པོ་བྱུང་བར་བརྟེན། དྲྭ་གནས་བཀོལ་སྤྱོད་བྱེད་མཁན་རྒྱ་རིགས་མང་དག་ཞིག་ནས་ངོ་རྒོལ་དང་འབྲེལ་རྒྱ་ནག་གཅིག་གི་སྲིད་བྱུས་ལ་ངོས་ལེན་མ་བྱེད་པར་སྐྱོན་བརྗོད་དང་། ཚོང་ལས་ཁང་དེ་ཉིད་ཀྱིས་ནོར་འཁྲུལ་བཟོས་པར་འགྲིག་ཐབས་ཀྱི་གྲོས་མོལ་བྱ་རྒྱུ་མེད་པ་མ་ཟད། རྒྱ་ནག་ནང་ཚོང་ལས་ཁང་དེའི་ཚོང་ཟོག་རྣམས་འཕྲལ་མར་བཀག་སྡོམ་བྱ་དགོས་པ་དང་། ལྷག་དོན་རྒྱ་ནག་རང་ནས་ཚོང་ལས་ཁང་དེ་ཕྱིར་ཕུད་བྱ་དགོས་པ་སོགས་ཀྱི་སྐྱོན་བརྗོད་མང་དག་བྱས་འདུག ཁ་སང་རེས་གཟའ་ཟླ་བའི་ཉིན་ Gap ཚོང་ལས་ཁང་ནས་ Global times དང་ Weibo དྲྭ་གནས་བརྒྱུད་ཚོང་ལས་ཁང་དེས་བོད་དང་ཐེ་ཝན་མ་ཚུད་པའི་རྒྱ་ནག་གི་ས་ཁྲ་བཀོད་པའི་སྟོད་ཐུང་ཚོང་འགྲེམས་བྱས་པར་དགོངས་སེལ་ཞུས་པ་དང་སྦྲགས། རྒྱ་ནག་གི་མངའ་ཁོངས་ལ་གུས་བརྩི་ཡོད་པ་དང་གང་མགྱོགས་ཞིབ་འཇུག་གནང་སྟེ་ནོར་བཅོས་བྱ་ངེས་ཡིན་ཞེས་དང་། མ་འོངས་པར་ནོར་འཁྲུལ་དེ་ལྟ་བུ་མི་ཡོང་བའི་བསྒྲགས་གཏམ་ཞིག་སྤེལ་འདུག རྩ་བའི་རྒྱ་གཞུང་གིས་འདི་ལོའི་ནང་སྙན་གྲགས་ཆེ་བའི་འཇར་མ་ནིའི་སྣུམ་འཁོར་བཟོ་ལས་ཁང་ MercedesBenz ཚོང་གཉེར་ཁང་གིས་རང་ཉིད་ཀྱི་ Instagram དྲྭ་གནས་ཐོག་བཟོ་ལས་ཁང་དེའི་རླངས་འཁོར་དཀར་པོ་ཞིག་ཁྱབ་བསྒྲགས་གནང་བའི་སྟེང་གནས་སྟངས་ཇི་ལྟར་ཡིན་རུང་ཕྱོགས་ཡོངས་ནས་བལྟ་ཚེ་རང་ཉིད་མཐོང་རྒྱ་ཆེ་བ་ཡོང་གི་རེད་ཅེས་པའི་༸གོང་ས་མཆོག་གི་གསུང་ལུང་འདྲེན་གནང་བར་བརྟེན། རྒྱ་གཞུང་ནས་ཁ་བྲལ་བར་ངོས་འཛིན་བཞིན་པའི་ཏཱ་ལའི་བླ་མའི་གསུང་ལུང་འདྲེན་བྱས་ནས་རྒྱ་ནག་མང་ཚོགས་ཀྱི་སེམས་ཚོར་ལ་དོ་ཕོག་བཏང་ཡོད་སྐོར་སྐྱོན་བརྗོད་ཤུགས་ཆེར་བྱས་ཡོད་སྟབས། བཟོ་ལས་ཁང་དེས་རྒྱ་གཞུང་ལ་དགོངས་སེལ་ཞུ་དགོས་བྱུང་ཡོད་པ་མ་ཟད། ཕྱི་ཟླ་དང་པོའི་ནང་ཛ་ར་གྱོན་ཆས་ཚོང་ལས་ཁང་དང་ Delta མཁའ་ལམ་འགྲུལ་བསྐྱོད་ཁང་ནས་ཀྱང་རང་ཉིད་ཀྱི་དྲྭ་གནས་ཐོག་བོད་དང་ཐེ་ཝན་གཉིས་རྒྱལ་ཁབ་ཁག་གི་ཐོ་གཞུང་དུ་བཀོད་པར་ཉེས་འཛུགས་ཀྱིས་རྒྱ་གཞུང་ལ་དགོངས་སེལ་ཞུ་དགོས་བྱུང་ཡོད་པ་རེད། དེ་བཞིན་སྔ་ལོའི་ནང་༸གོང་ས་མཆོག་གི་༸སྐུའི་གྱ་སྟོན་སྐབས་མགོན་པོ་༸གང་ཉིད་ལ་འཁྲུངས་སྐར་གྱི་འཚམས་འདྲི་ཞུས་པའི་གནད་དོན་དང་འབྲེལ་རྒྱ་ནག་སྐམ་ས་ཆེན་མོའི་དྲྭ་རྒྱ་ཁག་ཏུ་ Red Iphone ཀུ་ཤུ་རྟགས་ཅན་ཁ་པར་ཐོན་གསར་པ་ཞིག་བཀག་སྡོམ་བྱས་པའི་གནས་ཚུལ་ཡང་བྱུང་ཡོད་པ་རེད།