རྒྱ་ནག

ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་སྐུ་ཞབས་ Mike Pompeo ལགས་ཀྱིས་རྒྱ་ནག་གི་གསར་ལམ་ཆེ་ཁག་ལྔ་མིང་འདོན་བྱས་ཏེ།  གསར་ལམ་དེ་དག་ནི་རྒྱ་ནག་གིས་ཕྱི་ཕྱོགས་ཀྱི་དམིགས་འདུན་ལ་ཁ་གཏད་པའི་དམར་ཤོག་སྲིད་གཞུང་གི་ལག་ཆ་ཡིན་པར་མངོན་གསལ་གནང་འདུག དེ་རིང་ཨ་རིའི་གསར་ཁང་། Axios ཞེས་པས་གནས་ཚུལ་སྤེལ་བའི་ནང་དུ། ཁ་སང་ཨ་རིའི་ཕྱི་སྲིད་ལས་ཁུངས་ཀྱིས་རྒྱ་ནག་སྲིད་གཞུང་གིས་གསར་འགྱུར་བརྒྱུད་ལམ་ཆེ་ཁག་ལྔ། ཞིན་ཧ་གསར་ཁང་དང་། རྒྱ་ནག་གི་རྒྱལ་སྤྱིའི་བརྙན་འཕྲིན་དྲ་བ། རྒྱ་ནག་གི་རྒྱལ་སྤྱིའི་རླུང་འཕྲིན་ཁང་། དེ་བཞིན་རྒྱ་ནག་གི་ China Daily Distribution Corp ཞེས་པ་དང་ Hai Tian Development USA ཞེས་པ་སོགས་ནི་རྒྱ་ནག་དམར་ཤོག་གིས་ཕྱི་ཕྱོགས་ལ་ཁ་གཏད་པའི་སྲིད་གཞུང་གི་ལག་ཆ་ལྟ་བུའི་གསར་ཁང་རྐྱང་རྐྱང་ཡིན་པར་མངོན་གསལ་གནང་སྟེ།   རྒྱ་ནག་གི་དྲིལ་བསྒྲགས་ཀྱི་སྡེ་ཚན་རྣམས་ཀྱིས་ཨ་རིའི་ནང་དུ་རང་དབང་གིས་ལས་དོན་སྤེལ་བཞིན་ཡོད་ནའང་། རྒྱ་ནག་གི་ནང་དུ་ཡོད་པའི་ཨ་རིའི་གསར་འགོད་པ་རྣམས་ལ་དམར་ཤོག་གཞུང་གིས་སྟངས་འཛིན་དམ་དྲག་ནན་པོ་བྱེད་བཞིན་པར་བརྟེན།  རྒྱ་ནག་གིས་དམར་ཤོག་སྲིད་གཞུང་གིས་གནད་དོན་དེར་བསྐྱར་དུ་བསམ་གཞིགས་བྱེད་རྒྱུའི་སྐུལ་མ་གནང་འདུག གསར་ཁང་གིས།  ཕྱི་སྲིད་ལས་ཁུངས་ཀྱིས་གནད་དོན་དེ་གླེང་སློང་བྱེད་དོན་ནི་ Trump འཛིན་སྐྱོང་གི་ངོས་ནས་རྒྱ་ནག་ལ་གནོད་ཤུགས་སྤྲོད་རྒྱུའི་འགུལ་སྐྱོད་གསར་བ་ཞིག་ཡིན་དང་། རྒྱ་ནག་གི་ནང་དུ་ཡོད་པའི་ཨ་རིའི་ཚོགས་པ་ཁག་ལ་རྒྱ་ནག་གིས་བཀག་སྡོམ་བྱེད་ཀྱི་ཡོད་པ་ལྟར།  ད་ཆ་ཨ་རིའི་ངོས་ནས་ཀྱང་ཨ་རིར་ཡོད་པའི་རྒྱ་ནག་གི་ཚོགས་པ་ཁག་ལ་བཀག་སྡོམ་གཅིག་པ་བྱེད་ཐབས་ཤིག་ཡིན་པར་འཁོད་འདུག སྐུ་ཞབས་ Pompeo ལགས་ཀྱིས་གསར་ཁང་ལ།  རྒྱ་ནག་གི་སྲིད་འཛིན་ཞི་ཅིན་ཕིང་གིས་གསར་ལམ་ཁག་དེ་དག་གིས་དམར་ཤོག་སྲིད་གཞུང་གི་ཆེད་དུ་ལས་ཀ་བྱེད་བཞིན་ཡོད་སྐོར་གསུངས་ཡོད་དུས།   ང་ཚོ་ངོས་ནས་རྒྱ་ནག་གི་གསར་ཁང་དེ་དག་ག་རེ་ཡིན་པ་དེ་ལ་ངོས་འཛིན་བྱེད་ཀྱི་ཡོད་པ་ལས། ང་ཚོས་དེ་ལ་སྒྲོ་འདོགས་བྱེད་ཀྱི་མེད་སྐོར་གསུངས་བ་དང་སྦྲགས།  གསར་ཁང་དེ་དག་རྒྱ་ནག་དམར་ཤོག་སྲིད་གཞུང་གི་མགྲིན་ཚབ་པ་ཆགས་ཡོད་པ་མ་ཟད།   ད་ཆ་སྲིད་གཞུང་གི་སྟངས་འཛིན་འོག་གི་གསར་ཁང་དེ་དག་ཤུགས་ཆེ་རུ་འགྲོ་བཞིན་པ་ཡོངས་གྲགས་གནང་འདུག གཞན་ཡང་གསར་ཁང་གིས།  ཐེངས་འདིའི་ཨ་རིའི་ཕྱི་སྲིད་ལས་ཁུངས་ཀྱི་བྱེད་ལས་དེ་ཡིས།  ཨ་རིའི་ Trump འཛིན་སྐྱོང་གིས་ཨ་རི་དང་རྒྱ་ནག་གཉིས་ཀྱི་འབྲེལ་ལམ་གྱི་ཁྲོད་དུ་ཕན་ཚུན་འདྲ་མཉམ་དུ་བལྟ་དགོས་བར་ཤུགས་སྣོན་ཡང་ཡང་བྱེད་ཀྱི་ཡོད་པ་དེ་གསལ་འདོན་བྱས་ཡོད་པ་ཞིག་ཡིན་པར་འགྲེལ་བརྗོད་གནང་སྟེ།   འདི་ལོའི་ཟླ་བ་བཅུ་བའི་ནང་དུ། ཨ་རིའི་ངོས་ནས་རྒྱ་ནག་གི་གཞུང་འབྲེལ་མི་སྣ་སུ་ཞིག་ཨ་རིར་ཡོང་ནས་མཐོ་སློབ་དང་ཞིབ་འཇུག་ལྟེ་གནས་སོགས་སུ་འགྲོ་དགོས་ཚེ་ངེས་བར་ཨ་རིའི་ཕྱི་སྲིད་ལས་ཁུངས་ལ་ཐོ་འགོད་བྱེད་དགོས་བའི་ཁྲིམས་སྒྲིག་ཤིག་བཟོས་ཡོད་པར་བསྒྲགས་ཏེ། ཐེངས་འདིའི་ཕྱི་སྲིད་ལས་ཁུངས་ཀྱི་དམིགས་འབེན་གཙོ་བོ་ནི། རྒྱལ་ཁབ་ཕན་ཚུན་གྱི་བར་དུ་འདྲ་མཉམ་ཀྱི་ངོས་འཛིན་ཡོང་ཐབས་ལ་དམིགས་པ་ཞིག་ཡིན་སྐོར་འཁོད་འདུག  

ཨ་རིའི་གྲོས་ཚོགས་འཐུས་མིས་རྒྱ་གཞུང་གིས་རིམས་ནད་སྐོར་རྫུན་གཏམ་འཆད་བཞིན་པ་དང་ཚན་རིག་གནས་ཚུལ་སྤེལ་བའི་བརྒྱུད་ལམ་ཐོག་ལོ་གཅིག་གི་གོང་ནས་རིམས་ནད་ཀྱི་སྔོན་བརྡ་བཏང་ཡོད་པ་སོགས་ཀྱི་གནས་ཚུལ་དང་འབྲེལ། དྲྭ་རྒྱའི་མི་སྣ་མང་དག་ཅིག་ནས་དེ་སྔ་ ༢༠༡༨ ལོར་རྒྱ་ནག་གི་དམག་དོན་ཚན་རིག་པ་ཟུར་པ་ Chen Hu ཟེར་བས་རྒྱ་ནག་གི་བརྒྱུད་ལམ་ཐོག་རྒྱ་ནག་ནས་དེ་སྔ་ཁྱབ་གདལ་བྱུང་བའི་ MERS དང་ SARS  ཡི་ནད་དུག་རྣམས་གྱི་སྨན་སྦྱོར་བྱས་ནས་ཆེས་ཉེན་ཚབས་ཆེ་བའི་སྐྱེས་ལྡན་རྫས་སྦྱོར་གྱི་མཚོན་ཆ་བསྐྲུན་ཐུབ་ངེས་ཡིན་སྐོར་བཤད་པའི་བརྙན་པར་དེ་ཡང་ཤུགས་ཆེར་བརྒྱུད་བསྒྲགས་བྱེད་བཞིན་པ་རེད། དེའི་ཁྲོད་ཉེ་ཆར་ Wuhan གྲོང་ཁྱེར་མང་ཚོགས་ཁྲོད་དཀའ་སྡུག་མྱོང་བཞིན་པའི་རྒྱ་རིགས་བེུད་ཅིག་གིས་བརྙན་ཞིག་ཡོངས་བསྒྲགས་གནང་འདུག་པར་རྒྱ་ནག་དམར་ཤོག་ཚོགས་པས་འཆར་གཞི་དང་ངན་ཇུས་ལྡན་ཐོག་རིམས་ནད་དེ་བཏང་བ་ཞིག་ཡིན་པ་དང་ངལ་བ་དེ་དག་དངོས་སུ་མྱོང་མཁན་དེ་མི་སེར་དཀྱུས་མ་ཡིན་པར་མ་ཟད། ད་ལྟའི་ཆར་ཁོང་རྣམས་ལ་སྨན་བཅོས་འཐུས་སྒོ་ཚང་བ་ཅིག་ཀྱང་ཐོབ་ཀྱི་མེད་སྟབས་ཕ་མ་ཚོས་རང་ཁྱིམ་དུ་ཤི་སྒུག་བྱས་ནས་བསྡད་ཡོད་པ་གསུངས་འདུག ཁོང་གིས་ཧོང་ཀོང་དང་ཐེ་ཝན། དེ་བཞིན་བོད་མིའི་རང་བཙན་གྱི་འཐབ་རྩོད་ལ་རྒྱབ་སྐྱོར་ཞུ་རྒྱུ་ཡིན་པ་དང་། རྒྱ་ནག་དམར་ཤོག་ཚོགས་པའི་སྲིད་དབང་འོག   གང་ཟག་སུ་འདྲ་ཞིག་ཡིན་རུང་རང་དབང་ཐོག་བཀའ་མོལ་གནང་རྒྱུའི་ཐོབ་ཐང་མེད་པ་དང་། དངོས་ཡོད་གནས་ཚུལ་བཤད་མཁན་རྣམས་ཉེན་རྟོག་པས་འཛིན་བཟུང་བྱེད་བཞིན་ཡོད་པ། ཁྲིམས་རྩོད་པ་རྣམས་ཀྱང་འཛིན་བཟུང་གིས་བཀག་ཉར་བྱེད་མུས་ཡིན་པ་དང་། ལྷག་དོན་བཀའ་མོལ་གནང་འདོད་ཡོད་ཀྱང་དེ་ལྟར་གོ་སྐབས་མེད་པ་སོགས་འགྲེལ་བརྗོད་གནང་འདུག ད་ཆ་བཟོད་སྲན་བྱེད་ཐབས་བྲལ་སོང་ཝུ་ཧན་ནང་སྨན་མེད་པ་དང་སྨན་ཁང་ནང་ཉལ་ཁྲི་མི་འདུག CCTV བརྒྱུད་ལམ་ཐོག་བསྟན་པ་ཚང་མ་རྫུན་མ་རེད། མི་དཀྱུས་མ་ཚོའི་དཀའ་སྡུག་དང་འབོད་སྒྲ་ངས་མཐོང་སོང་ཞེས་ཚོར་ཤུགས་ཆེན་པོས་གསུངས་འདུག རྩ་བའི་འདི་ལོ་ཕྱི་ཟླ་ ༡༢ ནང་ཝུ་ཧན་དུ་ཏོག་དབྱིབས་ནད་དུག་ཁྱབ་བརྡལ་བྱུང་བ་ནས་བཟུང་རྒྱ་གཞུང་གིས་སྨན་པ་Li Wenliang ལགས་དམ་པ་དེ་ཉིད་ཀྱིས་གཙོས་པའི་དེའི་སྐོར་དངོས་ཡོད་གནས་ཚུལ་གསུང་མཁན་རྣམས་འཛིན་བཟུང་བཀག་ཉར་དང་སུན་གཙེར་བཟོ་བ་དང། གར་སོང་ཆ་མེད་དུ་བཏང་བ་སོགས་ཀྱི་གནས་ཚུལ་རིམ་པ་ཐོན་ཡོད་སྟབས། ད་ཆ་ཝུ་ཧན་གྱི་བེུད་དེས་ས་གནས་ཀྱི་དངོས་ཡོད་གནས་ཚུལ་གསུངས་པར་བརྟེན་རྒྱ་གཞུང་ནས་འཛིན་བཟུང་བྱེད་སྲིད་པའི་ཉེན་ཁ་ཆེན་པོ་ཆགས་ཡོད་སྟབས། དྲྭ་རྒྱའི་ཐོག་ཁོང་མོའི་བདེ་འཇགས་ཐོག་སྲུང་སྐྱོབ་གནང་དགོས་གལ་ཡིན་སྐོར་གསུང་མཁན་མང་དག་ཅིག་འདུག རྩ་བའི་ད་བར་རྒྱ་ནག་རྒྱལ་ཡོངས་གཙོས་པའི་རྒྱལ་སྤྱི་ཁྱོན་ཡོངས་སུ་རིམས་ནད་དེ་འགོས་ཁྱབ་ཤུགས་ཆེར་བྱུང་བཞིན་པའི་ཁྲོད་ད་བར་མི་བདུན་ཁྲི་ཆིག་སྟོང་ལྷག་ལ་ནད་གཞི་དེ་ཕོག་ཡོད་པ་དང་མི་ ༡༧༠༠ ལྷག་རྐྱེན་འདས་སུ་ཕྱིན་ཡོད་པ་རེད། དེའི་ཁྲོད་འཛམ་གླིང་རྒྱལ་ཁབ་འདྲ་མིན་ ༢༠ ལྷག་ནང་རིམས་ནད་དེ་འགོས་ཁྱབ་བྱུང་ཡོད་པ་ལྟར་ Philippines དང་ཧོང་ཀོང་། ཉི་ཧོང་། ཐེ་ཝན། དེ་བཞིན་ཕ་རན་སི་བཅས་ཀྱི་ནང་མི་གྲོངས་པའི་གནས་ཚུལ་ཡང་བྱུང་ཡོད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་པའི་ཁྲོད་འདིར་བོད་ཆོལ་གསུམ་ལས་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་ནད་གཞི་དེ་ཕོག་པའི་མི་གྲངས་ཁྱོན་ ༣༩ བྱུང་ཡོད་སྟབས། རྟའུ་ཡུལ་དགོན་སྤྱི་ནས་༸གོང་༸སྐྱབས་མགོན་ཆེན་པོ་མཆོག་ལ་བརྟག་ཞུ་ཞུས་པར་མགོན་པོ་༸གང་ཉིད་མཆོག་གིས་ཁ་སང་ཕྱི་ཚེས་ ༡༤ ཉིན་བརྟག་པ་བགྱིས་འབྲས་སུ་དམིགས་བསལ་ངན་དོག་ཆེ་བ་མེད་ཅེས་བཀའ་བསྩལ་འདུག དེའང་ད་ལྟའི་ཆར་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་ས་གནས་ཁག་ཏུ་གློ་ཚད་རིམས་ནད་དེ་ཁྱབ་བརྡལ་ཡོང་བར་དོགས་ནས་བོད་མི་ཚོས་ཡིད་གཟབ་དང་འཕྲོད་བསྟེན་ལ་ཐུགས་སྣང་རྒྱ་གང་ཆེ་གནང་མུས་ཡིན་པ་དང་། རྒྱ་གཞུང་གི་འབྲེལ་ཡོད་ལས་བྱེད་ཚོས་ཀྱང་རིམས་ནད་དེེ་འགོས་པར་དོགས་ཏེ་གཞིས་བཞུགས་བོད་མི་དག་ལ་རང་ཉིད་ཀྱི་ནང་ནས་ཕྱི་ལ་བསྐྱོད་རྒྱུ་གཙོས་པའི་འགྲོ་འདུག་སྤྱོད་གསུམ་ལ་དམ་དྲག་ཆེས་ཆེར་བྱས་དང་བྱེད་བཞིན་ཡོད་པ་རེད། འོན་ཀྱང་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་མི་གྲངས་ ༣༩ ལ་གློ་ཚད་གསར་པའི་རིམས་ནད་དེ་ཕོག་པར་བརྟེན་ནས་བོད་ནང་ནས་རིམས་ནད་ཕོག་པའི་གྲངས་འབོར་མང་ཤོས་ཀྱི་ས་ཚིགས་ཤིག་གྱུར་བར་བརྟེན། རྟའུ་ཡུལ་དགོན་སྤྱི་ནས་༸གོང་ས༌སྐྱབས་མགོན་ཆེན་པོ་མཆོག་ལ་དེ་འབྲེལ་བརྟག་ཞུ་གསོལ་འདེབས་ཞུས་པར་མགོན་པོ་༸གང་ཉིད་མཆོག་གིས་བརྟག་པར་བགྱིས་འབྲས་སུ་དམིགས་བསལ་ངན་དོག་ཆེ་བ་གང་ཡང་མ་ཤར་ཡང་སྤྱི་མཐུན་ལས་དབང་དང་འབྲེལ་བས་ཡུལ་སྤྱི་ནས་འཕྲོད་བསྟེན་སྔོན་འགོག་གཟབ་ནན་དང་། ༸རྗེ་བཙུན་སྒྲོལ་མའི་མཚན་སྔགས་དང་མ་ཎི་གང་འགྲོ་གསོག་དགོས་གལ་ཆེ་བ་མ་ཟད། ༸སྟོན་པའི་གསུང་གི་སྙིང་པོ་བྱང་ཆུབ་སེམས་དང་སྟོང་ཉིད་ཀྱི་ལྟ་བར་ཐོས་བསམ་སྒོམ་པ་ཅི་ཐུབ་གནང་ཚེ་ཚོགས་བསགས་དང་ལས་སྒྲིབ་སྦྱོང་བར་དེ་ལས་ལྷག་པའི་གནད་ཆེ་བ་མེད་ཅེས་ལམ་སྟོན་བཀའ་བསྩལ་མཛད་འདུག གཞི་རྩའི་༸གོང་ས་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཕྱི་ཟླ་ ༡ ཚེས་ ༢༩ ཉིན་ཐེ་ལན་ཌི་དང་ཝེ་ཏི་ནམ་གྱི་དད་ལྡན་ཁག་གཅིག་ལ་མཇལ་ཁ་བསྩལ་སྐབས་རྒྱ་ནག་ནང་གི་ནད་ཡམས་དེའི་ཆེད་ཐུགས་སྨོན་མཛད་པ་མ་ཟད། ནད་ཡམས་དེ་ཞི་བར་སྒྲོལ་མའི་གཟུངས་སྔགས་གསུང་འདོན་གནང་ཚེ་ཕན་ཕོགས་ཡོད་པར་ལམ་སྟོན་མཛད་ཡོད་པར་མ་ཟད། དེ་རྗེས་སླར་ཚེས་ ༣༠ ཉིན་༸མགོན་པོ་༸གང་ཉིད་མཆོག་གིས་བླ་ལྷའི་ཐུགས་དམ་དགོངས་དོན་ལྟར་ཐུབ་པའི་མཚན་སྔགས་དང་མ་ཎི་དུང་ཕྱུར།  སྒྲོལ་མའི་མཚན་སྔགས་ཡི་གེ་བཅུ་པ། བཀའ་འགྱུར་དག་སྒྲོག རྡོ་རྗེ་རྣམ་འཇོམས་མའི་སྒོ་ནས་རྟེན་ཁྲུས་ཡུལ་ཁྲུས་དང་། འདོད་ཁམས་བདག་མོའི་བསྐང་བ་དང་འབྲེལ་མ་མོའི་འཁྲུགས་སྐོང་། པདྨའི་མནོལ་བསངས་བཅས་འཕྲལ་དུ་བསྒྲུབ་དགོས་པ་དང་། གཟུང་སྔགས་ཁག་མང་ཚོགས་སོ་སོ་ནས་གནང་དགོས་པ། དེ་མིན་རྣམས་དགོན་སྡེ་དང་གྲོང་སྡེ་སྤྱི་ཚོགས་བཅས་ནས་རང་དོན་རང་གཅེས་ཀྱིས་འཕྲལ་དུ་བསྒྲུབ་གལ་ཆེ་བའི་འབོད་སྐུལ་མཛད་ཡོད་པ་རེད།

བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་བཞུགས་སྒར་ཁྲོམ་ཞུང་དུ་བོད་ཆས་སྤྲས་ནས་འགྱིང་འགྲོས་གནང་སྟེ་༸རྒྱལ་མཆོག་སྐུ་ཕྲེན་བཅུ་གསུམ་པ་ཐུབ་བསྟན་རྒྱ་མཚོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་དེ་ལོ་ངོ་ ༡༠༧ འཁོར་བའི་ཉིན་མོ་སྲུང་བརྩི་ཞུས་སོང་། དེ་རིང་གི་ཉིན་མོ་འདི་ནི་དེ་སྔ་ཕྱི་ལོ་ ༡༩༡༣ ཕྱི་ཟླ་ ༢ ཚེས་ ༡༣ ཉིན་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་ཁེལ་གྱི་ཡོད་པ་ལྟར། དེ་རིང་ཉིན་གུང་ཚོུད་ ༡ ཐོག་རྒྱ་གར་བོད་རང་བཙན་སློབ་ཕྲུག་ཚོགས་པས་རྐང་གོ་སྒྲིག་གནང་སྟེ་བོད་པའི་གཞོན་སྐྱེས་ཕོ་མོ་བརྒྱ་སྐོར་ཞིག་གིས་བོད་ཀྱི་ཐུན་མོང་མ་ཡིན་པའི་ཆས་གོས་དང་། ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་བོད་བོད་ཡུལ་དུ་སྐྱིད། རྒྱ་རྒྱ་ཡུལ་དུ་སྐྱིད་ཅེས་པའི་འབོད་ཚིག ལོ་རྒྱུས་རང་བཞིན་ལྡན་པའི་བོད་དང་རྒྱ་ནག་དབར་གྱི་ཆིངས་ཡིག་གི་དོན་ཚན་སོགས་འཁོད་པའི་འཕྲེད་དར་བསྣམས་ཏེ་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཆགས་པའི་དཔའ་བོའི་རྡོ་རིང་མདུན་ནས་མེག་གྷན་སྣུམ་འཁོར་བབས་ཚུགས་བར་འགྱིང་འགྲོས་གནང་སྟེ་ཉིན་མོ་འདི་སྲུང་བརྩི་ཞུས་ཡོད། སྐབས་དེར་རྒྱ་གར་བོད་རང་བཙན་སློབ་ཕྲུག་ཚོགས་པའི་ངེས་བསྟོན་པ་རིག་འཛིན་ཆོས་སྒྲོན་ལགས་ནས་ཉིན་མོ་འདིའི་གལ་ཆེའི་རང་བཞིན་ཁག་ངོ་སྤྲོད་གནང་བ་དང་སྦྲགས། རྒྱ་ནག་དམར་ཤོག་སྲིད་གཞུང་དང་སྲིད་གཞུང་དེས་རྒྱལ་སྤྱིའི་ཐོག་བོད་ཀྱི་དངོས་ཡོད་རྒྱལ་རབས་ལོ་རྒྱུས་ཁག་འཁྱོག་བཤད་དྲིལ་བསྒྲགས་སྣ་མང་བྱེད་བཞིན་པའི་བྱ་སྤྱོད་དེ་དག་ལ་ངོས་ལེན་རྩ་བ་ནས་མེད་ཅེས་གསུངས་སོང་།  ཁོང་གིས་འགྱིང་འགྲོས་ཀྱི་ལས་འགུལ་འདི་ནི་བོད་ནང་ལ་མཚོན་ན་རྒྱ་གཞུང་གི་དམ་དྲག་རྐྱེན་པས་བོད་ཀྱི་རྒྱལ་དར་འཆར་རྒྱུ་ཁག་པོ་ཡིན་སྟབས། སྨོན་ལམ་ཆེན་མོའི་རྗེས་སུ་ཆོས་དར་བསྣམས་ཏེ་སྤེལ་སྲོལ་ཡོད་པ་སོགས་ངོ་སྤྲོད་དང་ཆབས་ཅིག བཙན་བྱོལ་རང་དབང་ལུང་པའི་ནང་བོད་མི་ཚོས་རང་གི་རིག་གཞུང་དང་ལོ་རྒྱུས་དེ་དག་བདག་གཅེས་གནང་དགོས་གལ་ཡིན་པར་མ་ཟད་གཞོན་སྐྱེས་ཚོར་དེ་དག་དང་འབྲེལ་བའི་འོས་འགན་འཕར་མ་ཞིག་ཡོད་པ་གསུངས་ཡོད། དེ་བཞིན་ལོ་རྒྱུས་རང་བཞིན་ལྡན་པའི་དུས་ཚིགས་དང་བསྟུན་རྒྱ་གར་བོད་རང་བཙན་སློབ་ཕྲུག་ཚོགས་པས་དགོང་དྲོ་ཆུ་ཚོད་དྲུག་པ་ནས་ Drum Stick ཟ་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་གཉིས་གདན་ཞུ་ཐོག་སིམ་ལ་ཆིངས་ཡིག་གི་འབྱུང་རྐྱེན་གང་ཡིན་ལ་ལྟ་བ་ཅེས་པའི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་སོགས་གནང་གི་ཡོད་པ་རེད། རྩ་བའི་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་སྲུང་བརྩི་ཞུ་རྒྱུའི་ལས་འགུལ་དེ་ནི་བོད་རང་བཙན་སློབ་ཕྲུག་ཚོགས་པས་དེ་སྔ་ཕྱི་ལོ་ ༢༠༡༣ ལོར་༸གོང་ས་༸སྐུ་ཕྲེང་བཅུ་གསུམ་པོ་ཆེན་པོ་མཆོག་གིས་བོད་རང་བཙན་གསལ་བསྒྲགས་བསྐྱངས་ནས་ལོ་ངོ་ ༡༠༠ འཁོར་བའི་དུས་ཚིགས་ཉིན་ནས་དབུ་འཛུགས་ཀྱིས་ལོ་ལྟར་ཟླ་ ༢ ཚེས་ ༡༣ ཉིན་བོད་མིའི་གནས་ཡུལ་རྒྱལ་སྤྱིའི་ས་གནས་མང་དག་ཅིག་ཏུ་ལས་འགུལ་གྱི་རྣམ་པ་འདྲ་མིན་ཐོག་སྲུང་བརྩི་ཞུ་བཞིན་ཡོད་པ་ལྟར། ཨ་རི་ནང་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་ཀྱང་ཡུལ་དེའི་གྲོང་ཁྱེར་ New York ནང་སྙན་ངག་དང་འགོག་རྒོལ་ཞེས་པའི་བརྗོད་གཞིའི་འོག་ས་གནས་བོད་མི་དང་བོད་དོན་རྒྱབ་སྐྱོར་བ། དེ་བཞིན་རང་དབང་འཐབ་རྩོད་སོགས་ཀྱི་ནང་ཕྱག་ལས་གནང་མྱོང་ཡོད་པའི་མི་སྣ་དང་མང་ཚོགས་འདུ་འཛོམས་ཀྱིས་འཐབ་རྩོད་ལས་འགུལ་སོགས་དང་འབྲེལ་བའི་སྙན་ངག་གྱེར་འདོན་དང་བསམ་ཚུལ་བརྗེ་ལེན་གནང་སྟེ་སྲུང་བརྩི་ཞུས་ཡོད་པ་རེད།

སྔ་ལོའི་ཕྱི་ཟླ་ ༡༢ ཀྱི་འགོ་སྟོད་ནས་ཡོ་རོབ་སུ་ཌེན་རྒྱལ་ཁབ་ཀྱི་ Swedish Educational Broadcasting Company ཞེས་པའི་རྒྱལ་ཡོངས་རླུང་འཕྲིན་ལས་ཁང་ནས་ཤེས་ཡོན་སློབ་གསོའི་ལེ་ཚན་ཁོངས་སུ་ Himalaya-neighbor under the clouds ཞེས་བོད་ནང་གི་འཛུགས་སྐྲུན་སོགས་དང་འབྲེལ་བའི་གློག་བརྙན་ཞིག་རྒྱང་སྲིང་ཞུ་བཞིན་ཡོད་པ་རེད། ཁ་སང་སུ་ཌེན་གྱི་གསར་འགྱུར་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བར་ Himalaya - neighbor under the clouds ཞེས་བོད་ནང་གི་འཛུགས་སྐྲུན་སོགས་དང་འབྲེལ་བའི་གློག་བརྙན་དེ་སུ་ཌེན་རྒྱལ་ཡོངས་རླུང་འཕྲིན་ལས་ཁང་དང་རྒྱ་ནག་གཞུང་འབྲེལ་གྱི་ CCTV བརྙན་འཕྲིན་ལས་ཁང་དང་ཟུང་འབྲེལ་ཐོག་བཟོ་སྐྲུན་གནང་བ་ཞིག་ཡིན་པ་མ་ཟད། གློག་བརྙན་གྱི་ནང་དོན་དེ་དག་ཀྱང་རྒྱ་ནག་གྱི་དྲིལ་བསྒྲགས་ལས་དོན་ལྟར་མི་མང་དངོས་ཀྱི་འཚོ་བའི་གནས་སྟངས་སོགས་གསལ་འདོན་མ་གནང་བར་རྒྱ་ནག་གྱི་འཛུགས་སྐྲུན་ལས་གཞི་ཁོ་ན་གསལ་འདོན་གནང་བར་སྐྱོན་བརྗོད་ཤུགས་ཆེ་གནང་བཞིན་ཡོད་སྟབས་སུ་ཌེན་རྒྱལ་ཡོངས་རླུང་འཕྲིན་ལས་ཁང་ནས་རྒྱ་ནག་གི་དྲིལ་བསྒྲགས་དང་འབྲེལ་བའི་གློག་བརྙན་དེ་རྒྱང་སྲིང་གནང་རྒྱུ་ཕྱིར་འཐེན་གནང་དགོས་པ་བྱུང་འདུག འོན་ཀྱང་སུ་ཌེན་རྒྱལ་ཡོངས་རླུང་འཕྲིན་ལས་ཁང་གི་རྒྱང་སྲིང་སྡེ་ཚན་འགན་འཛིན་ Anna Rastner ལགས་ནས་རྒྱ་ནག་གི་དྲིལ་བསྒྲགས་དང་འབྲེལ་བའི་གློག་བརྙན་རྒྱང་བསྲིངས་ཞུས་པར་དགོངས་སེལ་གང་ཡང་ཞུས་མེད་ཀྱང་། གློག་བརྙན་གྱི་ནང་དོན་ཁག་གཟིགས་ཞིབ་ཡག་པོ་གནང་སྟེ་རྒྱ་བསྲིངས་ཞུས་ཡོད་ཅེས་གསལ་བཤད་གནང་འདུག ལྷག་པར་དུ་ Himalaya - neighbor under the clouds ཞེས་པའི་གློག་བརྙན་རྒྱང་བསྲིངས་ཞུས་ཡོད་པ་དང་འབྲེལ་སུ་ཌེན་གྱི་ Sveriges གསར་ཁང་གི་རྒྱ་ནག་སྡེ་ཚན་གྱི་གསར་འགོད་པ་ Hanna Sahlberg ལགས་ནས་གློག་བརྙན་དེའི་ནང་རྒྱ་ནག་གཞུང་གིས་བོད་ནང་འཛུགས་སྐྲུན་བྱས་པའི་རྣམ་པ་ལས་དེའི་རྒྱབ་ཕྱོགས་སུ་བོད་མིའི་གནས་སྟངས་དང་། རྒྱ་ནག་གཞུང་གི་ས་གནས་སུ་དམ་དྲག་དང་མི་མང་འཛིན་བཟུང་བཙོན་འཇུག་བྱས་པའི་གནས་སྟངས་ཟུར་ཙམ་གསལ་འདོན་མ་བྱས་པ་དེ་ནི་ཕྱོགས་ལྷུང་ཅན་གྱི་གློག་བརྙན་ཞིག་ཡིན་པ་རེད། དེ་ནི་རྒྱ་ནག་གཞུང་གི་དྲིལ་བསྒྲགས་ལས་གཞི་ཞིག་ཀྱང་རེད་ཅེས་གསུངས་པ་དང་ཆབས་ཅིག་ཏུ་སུ་ཌེན་རྒྱལ་ཡོངས་རླུང་འཕྲིན་ལས་ཁང་ནས་དྲིལ་བསྒྲགས་ཅན་གྱི་གློག་བརྙན་དེ་ལྟ་བུ་ཞིག་ཤེས་ཡོན་སློབ་གསོ་ཁོངས་སུ་རྒྱང་བསྲིངས་ཞུས་པ་དེ་ནི་བློ་ཡུལ་ནས་འདས་པའི་བྱེད་སྟངས་ཤིག་རེད་ཅེས་སྐྱོན་བརྗོད་ནན་པོ་བྱས་འདུག དེང་སྐབས་རྒྱ་ནག་གཞུང་གིས་ཕྱིའི་གསར་འགོད་པ་བསླུ་ཐབས་སུ་མ་དངུལ་ཕོན་ཆེན་གཏོང་བཞིན་པར་འགྲེལ་བརྗོད་དང་སྦྲགས། གསར་འགོད་པ་ཆེད་ལས་གཉེར་མཁན་ཚོས་ཀྱང་རྒྱ་ནག་གི་བསླུ་ཁྲིད་འོག་མ་ཚུད་པ་ཞིག་གནང་དགོས་གལ་ཡིན་པ་གསུངས་འདུག གཞི་རྩའི་རྒྱ་ནག་གཞུང་ནས་འདས་པའི་ལོ་ཤས་ནང་རྒྱ་ནག་རྒྱལ་ཡོངས་སུ་དམ་དྲག་ཅན་གྱི་ལས་གཞི་སྣ་མང་སྤེལ་བ་མ་ཟད། དམ་དྲག་དང་དྲིལ་བསྒྲགས་ཀྱི་ལས་གཞི་དེ་དག་རྒྱལ་ནང་ཙམ་མིན་པར་རྒྱལ་སྤྱིའི་ཁྱོན་དུ་རྒྱ་བསྐྱེད་བཏང་ནས་ཕྱིའི་རྒྱལ་ཁབ་ཁག་གི་ཤེས་ཡོན་གྱི་བསྟི་གནས་དང་། གསར་ཁང་སྡེ་ཚན་སོགས་སུ་མ་དངུལ་ཕོན་ཆེ་བཏང་སྟེ་རྒྱ་ནག་གྱི་ལྟ་སྤྱོད་དང་མཐུན་པའི་ཤེས་ཡོན་སློབ་གསོ་དང་གནས་ཚུལ་དྲིལ་བསྒྲགས་སོགས་བྱེད་བཞིན་ཡོད་པ་རེད།

བོད་ཆབ་མདོ་ནང་ཏོག་དབྱིབས་ནད་དུག་གསར་པའི་གློ་ཚད་རིམས་ནད་དང་འབྲེལ་བའི་དཀྲོག་གཏམ་སྤེལ་བའི་ཉེས་མིང་འོག་མི་བརྒྱད་ལ་ཆབ་སྲིད་སློབ་གསོ་སྤྲད་པ་དང་བདུན་བཀག་བསྐྱིལ་བྱས་འདུག ཟླ་ ༢ ཚེས་ ༦ ཉིན་མི་དམངས་དྲྭ་བ་ཞེས་པའི་བོད་ནང་གི་གཞུང་འབྲེལ་བརྒྱུད་ལམ་གྱིས་གནས་ཚུལ་སྤེལ་བར་རྒྱ་གཞུང་གིས་བོད་ཀྱི་ས་ཁུལ་གང་སར་རིམས་ནད་འགོག་ཐབས་དང་འབྲེལ་བའི་བརྡ་ཁྱབ་བཏང་བའི་ནང་རིམས་ནད་དང་འབྲེལ་བའི་གནས་ཚུལ་རྫུན་མ་དང་དཀྲོག་གཏམ་རིགས་སྤེལ་མི་ཆོག་པ་ནན་པོར་བརྗོད་བྱས་ཡོད་པ་ལྟར། ཆབ་མདོའི་ཉེན་རྟོག་པས་དྲྭ་ཐོག་ཏུ་རིམས་ནད་དང་འབྲེལ་བའི་དཀྲོག་གཏམ་དང་ཆ་འཕྲིན་ ༧༥ ཤེས་རྟོགས་བྱུང་བ། ཁྲིམས་ལྟར་མི་བདུན་བཀག་ཉར་བྱས་པ་མ་ཟད་མི་བརྒྱད་ལ་སློབ་གསོ་སྤྲོད་བཞིན་ཡོད་པ་འཁོད་འདུག ཉེ་ཆར་ཨེ་ཤ་ཡ་རང་དབང་རླུང་འཕྲིན་ཁང་གིས་ཆབ་མདོར་མི་ ༧ འཛིན་བཟུང་བྱས་པའི་ཁོངས་ནས་བོད་མི་རྡོ་རྗེ་ལགས་ཀྱིས་དེང་སྐབས་རིམས་ནད་འགོས་ཁྱབ་ཤུགས་ཆེ་འགྲོ་བཞིན་པ་ལྟར་ཚང་མས་༸རྗེ་བཙུན་སྒྲོལ་མའི་གཟུངས་སྔགས་འདོན་ན་ཕན་ཐོགས་ཡོད་ལུགས་རང་ཉིད་སྒེར་གྱི་སྐད་འཕྲིན་སྟེང་བརྒྱུད་བསྐུལ་བྱས་པར་བརྟེན་སྟེང་ཆེན་རྫོང་སྤྱི་བདེ་མི་སྣས་བོད་མི་དེ་དཀྲོག་གཏམ་སྤེལ་མིང་འོག་བཀག་བསྐྱིལ་བྱས་ཡོད་སྐོར་འཁོད་འདུག སྤྱིར་ད་ལྟ་རྒྱ་ནག་ནང་ཏོག་དབྱིབས་ནད་དུག་གསར་པའི་གློ་ཚད་རིམས་ནད་ཁྱབ་བརྡལ་ཕྱིན་པའི་ཆེས་ཛ་དྲག་གི་གནས་སྟངས་ཁྲོད་དེ་རིང་ CNR བརྒྱུད་ལམ་གྱི་བོད་སྐད་སྡེ་ཚན་གྱིས་གནས་ཚུལ་སྤེལ་བར་དེ་རིང་ཕྱི་ཚེས་ ༡༠ ཉིན་སྔ་དྲོ་བར་རྒྱ་ནག་རྒྱལ་ཡོངས་སུ་ཁྱོན་བསྡོམས་ཏོག་དབྱིབས་ནད་ཡམས་གསར་པ་འགོས་པའི་ནད་པ་ཁྲི་བཞི་བརྒལ་བ་དང་དོགས་ཡོད་ནད་པ་ཁྲི་གཉིས་བརྒལ་བ། དེ་བཞིན་མི་ ༩༠༠ ལྷག་རྐྱེན་འདས་སུ་ཕྱིན་ཡོད་པ། དེའི་ཁྲོད་ཀྱི་བོད་ཀྱི་ས་ཁུལ་ཁག་ཏུ་བལྟས་ཚེ་བོད་རང་སྐྱོང་ལྗོངས་ཟེར་བའི་ནང་དེ་སྔ་རིམས་ནད་ཕོག་པའི་མི་གཅིག་ཡོད་པ་དེ་རང་འཇགས་གནས་ཡོད་པ་དང། དེ་མིན་རྒྱ་གཞུང་གིས་དབྱེ་བའི་བོད་ས་ཁུལ་གྱི་ཞིང་ཆེན་ཁག་གི་ཁོངས་ནས་ཟི་ཁྲོན་ཞིང་ཆེན་ནང་རིམས་ནད་ཕོག་པའི་ནད་པ་ཁྱོན་ ༤༠༥ ཡོད་པ་དང་དེའི་ཁོངས་ནས་བོད་མི་འབོར་ཆེན་སྡོད་སའི་དཀར་མཛེས་ནང་ད་ཆ་རིམས་ནད་ཕོག་པ་ ༢༣ དང་རྔ་བ་ནང་ ༡ མཚོ་སྔོན་ཞིང་ཆེན་གྱི་ཟི་ལིང་གྲོང་ཁྱེར་ནང་ནད་པ་ ༡༥ མཚོ་བྱང་ཁུལ་དུ་ ༣ དེ་བཞིན་ཀན་སུའུ་ཞིང་ཆེན་ནང་ནད་པ་ ༨༣ ཡོད་པའི་ཁོངས་ནས་ཀན་ལྷོ་ཁུལ་དུ་ནད་པ་ ༦ ཡུ་ནན་ཞིང་ཆེན་ནང་ནད་པ་ ༨༣ ཡོད་པ་བཅས་མངོན་གསལ་གནང་འདུག དེ་རིང་རྩོམ་པ་པོ་ཚེ་རིང་འོད་ཟེར་ལགས་ཀྱིས་ངོ་དེབ་བརྒྱུད་བོད་ནང་གི་གནས་ཚུལ་ཡོངས་གྲགས་གནང་བར་དཀར་མཛེས་ཁུལ་དུ་རིམས་ནད་ཕོག་པ་ ༢༣ ཡོད་པའི་ཁོངས་ནས་ ༡༨ ཙམ་ཏྭའུ་རྫོང་ནང་ཡོད་པ་དང། ས་གནས་སུ་ད་ཆ་རིམས་ནད་འགོས་ཁྱབ་མི་ཡོང་བའི་སྔོན་འགོག་ཆེད་ཁ་རས་སོགས་ཀྱི་མཐུན་རྐྱེན་མི་གདངས་བའི་དཀའ་འཕྲད་བཞིན་པ་ལྟར། ཁུལ་དེའི་གསེར་ཁ་ཡུལ་ཤོག་གི་ཉི་འོད་བཤད་སྒྲུབ་བསྟན་པའི་ཆོས་གླིང་གི་དགེ་འདུན་པ་ཁག་ཅིག་གི་རྐང་འགན་འཁུར་ཐོག་དངུལ་བསྡུ་རུབ་གནང་སྟེ་ཁ་རས་ཀྱི་རྒྱུ་ཆ་ཉོ་སྟེ་གྲྭ་བཙུན་ ༦ དང་མི་སྐྱ་ལྔས་ཉིན་བདུན་ཙམ་གྱི་རིང་ལ་ཕྱག་ལས་གནང་བ་དང་འབྲེལ། ཁ་རས་ཁྱོན་ ༢༥༠༠ ལྷག་ཙམ་ཞིག་བཟོ་བསྐྲུན་གནང་སྟེ་ཉེ་འཁོར་གྱི་ས་ཁུལ་ཁག་ལ་རིན་མེད་ཐོག་བགོས་འགྲེམས་གནང་འདུག ཏོག་དབྱིབས་གློས་ཚད་རིམས་ནད་དེ་རྒྱ་ནག་གི་ཕྱི་ཕྱོགས་སུའང་འགོས་ཁྱབ་ཕྱིན་པའི་ཁྲོད་ད་བར་རྒྱལ་ཁབ་གཞན་ ༢༧ ཙམ་གྱི་ནང་ནད་ཕོག་པའི་ནད་པ་ཁྱོན་ ༤༠༠ ཙམ་ཐོན་ཡོད་པ་རེད། གྲོང་ཁྱེར་ནང་རིམས་ནད་ཕོག་པ་རྣམས་ལ་སྨན་བཅོས་དང་སྨན་ཁང་། དེ་བཞིན་ཁ་རས་སོགས་ཀྱི་མཐུན་རྐྱེན་མེད་པའི་དཀའ་ངལ་ཆེན་པོ་འཕྲད་ཐོག་ཉེ་ཆར་ Li Wenliang ལགས་ནད་གཞི་དེའི་རྐྱེན་པས་འདས་གྲོངས་སུ་གྱུར་བ་དང་འབྲེལ་མང་ཚོགས་ཁྲོད་གཞུང་ལ་སྐྱོན་བརྗོད་དང་སྡང་བའི་རྣམ་པ་ཤུགས་ཆེན་པོ་མངོན་གསལ་གནང་ཡོད་པ་རེད།

བྷེལ་ཇམ་གྱི་ཕྱི་སྲིད་བློན་ཆེན་མཆོག་གིས་བྷེལ་ཇམ་གཞུང་གི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་མུ་མཐུད་ཐུགས་སྣང་ཆེན་པོ་གནང་རྒྱུར་ཞལ་བཞེས་གནང་བ་དང་འབྲེལ། ༸གོང་ས་མཆོག་གི་༸སྐུའི་ཡང་སྲིད་གདམ་རྒྱུའི་བདག་དབང་དེ་བོད་མི་རང་ལ་མ་གཏོགས་མེད་པར་འགྲེལ་བརྗོད་གནང་འདུག དེ་རིང་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་བར་ཟླ་བ་སྔོན་མའི་ཚེས་༢༡ གྱི་ཉིན་བྷེལ་ཇམ་གྲོས་ཚོགས་ཀྱི་ཕྱི་འབྲེལ་ལས་དོན་ཚུགས་ཆུང་གི་ཚོགས་གཙོ་གཞོན་པ་སྐུ་ཞབས་ Cogolati ལགས་ཀྱིས་གྲོས་ཚོགས་ཀྱི་དབུས་སུ་རྒྱ་ནག་གིས་བོད་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་༸སྐུའི་ཡང་སྲིད་ལ་ཐེ་གཏོགས་བྱེད་བཞིན་པ་སོགས་ཀྱི་གནས་ཚུལ་དང་འབྲེལ་ནས་ཡུལ་དེའི་ཕྱི་སྲིད་བློན་ཆེན་ལ་དོགས་འདྲི་གནང་སྟེ་བྷེལ་ཇམ་སྲིད་གཞུང་གི་ངོས་ནས་ཨ་རིའི་གྲོས་ཚོགས་ཀྱིས་གནང་བཞིན་པ་ལྟར་༸སྐུའི་ཡང་སྲིད་ཀྱི་གནད་དོན་ཐོག་གྲོས་འཆར་གཏན་འབེབས་གནང་ཡོད་མེད་དང་། ཉེ་སྔོན་ Netherlands ཕྱི་སྲིད་བློན་ཆེན་གྱིས་དེ་གའི་གྲོས་ཚོགས་སུ་གཞུང་འབྲེལ་གྱི་ཕྱག་ཡིག་ཞིག་གནང་སྟེ་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་ཁ་གསལ་བཀོད་པ་བཞིན་གནང་རྒྱུ་ཡིན་མིན་སྐོར་ལ་བཀའ་འདྲི་གནང་འདུག ཁོང་གིས་སྐབས་དེར་རྒྱ་ནག་དམར་ཤོག་སྲིད་གཞུང་གིས་བོད་ནང་དུ་བཀག་སྡོམ་དང་དམ་དྲག་ཆེན་པོ་བྱས་ནས་བོད་མིའི་སྐད་ཡིག་དང་རིག་གཞུང་རྩ་གཏོར་གཏོང་བཞིན་པ། དེ་བཞིན་བོད་ཀྱི་སྲོལ་རྒྱུན་རང་བཞིན་གྱི་དགོན་སྡེ་རྣམས་ཀྱང་གཏོར་བཅོམ་གཏོང་བཞིན་པར་ཐེར་འདོན་གནང་བ་དང་། རྒྱ་ནག་གིས་༸སྐུའི་ཡང་སྲིད་ཐད་ནས་ཐེ་གཏོགས་བྱེད་བཞིན་པར་བརྟེན་བྷེལ་ཇམ་སྲིད་གཞུང་གི་གནད་དོན་དེའི་ཐོག་བཞེངས་ཕྱོགས་གང་འཛིན་དགོས་པ་དང་། སྲིད་གཞུང་གི་ངོས་ནས་ཡོ་རོབ་མཐུན་ཚོགས་དང་ལྷན་དུ་གནད་དོན་དེའི་ཐོག་གླེང་སློང་གནང་འཆར་ཡོད་མེད་སོགས་ཀྱི་བཀའ་འདྲི་གནང་འདུག གསར་འགོད་པས་བྷེལ་ཇམ་གྱི་དོན་གཅོད་བཀྲ་ཤིས་ཕུན་ཚོགས་ལགས་སུ་བཀའ་འདྲི་ཞུས་པར་སྐུ་ཞབས་ Cogolati ལགས་ཀྱིས་བོད་དོན་འབྲེལ་དང་བའི་བཀའ་འདྲི་ཞུས་པར་བྷེལ་ཇམ་གྱི་ཕྱི་སྲིད་ལྷན་ཁང་གི་བློན་ཆེན་སྐུ་ཞབས  Philippe Goffin ལགས་ཀྱིས་བྷེལ་ཇམ་སྲིད་གཞུང་གིས་ཁོང་གིས་བརྗོད་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དེར་སེམས་འཚབ་གཅིག་པ་ཡོད་པར་གསུངས་བ་དང་སྦྲགས།  བྷེལ་ཇམ་སྲིད་གཞུང་གིས་རྒྱ་ནག་དང་ལྷན་དུ་གོ་སྐབས་ནམ་བྱུང་ལ་བོད་དོན་གླེང་སློང་གནང་བཞིན་ཡོད་པའི་ལན་འདེབས་གནང་ཡོད་པ་མ་ཟད། ལྷག་དོན་༸སྐུའི་ཡང་སྲིད་གདམ་རྒྱུའི་བདག་དབང་དེ་བོད་མིར་མ་གཏོགས་མེད་པའི་འགྲེལ་བརྗོད་གནང་ཡོད་པ་གསུངས་ཡོད། དེ་མཚུངས་ཁོང་གིས་བྷེལ་ཇམ་སྲིད་གཞུང་གིས་གཙོས་པའི་ཁུལ་དེའི་གྲོས་ཚོགས་གོང་འོག་གཉིས་སུ་བོད་དོན་རྒྱབ་སྐྱོར་བ་ཡོད་པ་མ་ཟད། སྤྱི་ཡོངས་ཀྱི་ཆ་ནས་བྷེལ་ཇམ་སྲིད་གཞུང་གིས་བོད་དོན་དང་འབྲེལ་བའི་ཐོག་ནས་བཞེངས་ཕྱོགས་བརྟན་པོ་ཡོད་པར་གསུངས་སོང་། རྩ་བའི་ Netherlands ཕྱི་སྲིད་བློན་ཆེན་མཆོག་གི་ངོས་ནས་དེ་སྔོན་ཕྱི་ཟླ་ ༡༡ ནང་ཡུལ་དེའི་གྲོས་ཚོགས་ལ་གཞུང་འབྲེལ་གྱི་ཕྱག་ཡིག་ཞིག་གནང་བའི་ནང་༸གོང་ས་མཆོག་གི་༸སྐུའི་ཡང་སྲིད་གདམ་རྒྱུའི་ཁེ་དབང་དེ་བོད་མི་ཚོར་ཡོད་པར་འགྲེལ་བརྗོད་གནང་ཡོད་པ་དང་། ཨ་རིའི་གྲོས་ཚོགས་འོག་མའི་ངོས་ནས་ཀྱང་ཉེ་ལམ་བོད་དོན་ལ་རྒྱབ་སྐྱོར་གྱི་གྲོས་ཆོད་ཅིག་གཏན་འབེབས་གནང་སྟེ་༸སྐུའི་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་བྱེད་རྒྱུའི་ཐོབ་ཐང་མེད་པར་འགྲེལ་བརྗོད་གནང་ཡོད་པ་རེད། ཁ་སང་ཨིན་ཡུལ་གྲོས་ཚོགས་ནང་དུ་གྲོས་ཚོགས་འཐུས་མི་སྐུ་ཞབས་  Timloughton ལགས་ཀྱིས་རྒྱ་ནག་དམར་ཤོག་གཞུང་གིས་གྲངས་ཉུང་མི་རིགས་ས་ཁུལ་བོད་དང་ཤིན་ཅང་ཁུལ་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་བསྒྲགས་ཏེ་ཨིན་ཡུལ་གྲོས་ཚོགས་ཀྱིས་གནད་དོན་དེ་གླེང་སློང་གནང་དགོས་བར་སྐུལ་མ་གནང་བ་དང་ཆབས་ཅིག བོད་ལ་ཕར་འགྲོ་ཚུར་འོང་གི་གྲོས་འཆར་དེར་རྒྱབ་སྐྱོར་གནང་དགོས་པའི་གཏམ་བཤད་གནང་འདུག

རྒྱ་རིགས་སྒྱུ་རྩལ་བ་གྲགས་ཅན་སྐུ་ཞབས་ Ai WeiWei ལགས་ཀྱིས་དབྱིན་ཡུལ་གཞུང་ནས་ཡུལ་དེའི་ནང་གི་ 5G དྲྭ་རྒྱའི་ཚོང་ལས་ཐད་རྒྱ་ནག་གི་འཕྲུལ་ལས་བཟོ་གྲྭ་ཆེ་ཤོས་ Huawei དང་འབྲེལ་བ་བྱེད་རྒྱུའི་ཐག་གཅོད་དེར་ཉིན་ཞིག་བློ་འགྱོད་བྱ་ངེས་ཀྱི་ཉེན་བརྡ་བཏང་འདུག འདས་པའི་ཟླ་ཤས་ནས་དབྱིན་ཡུལ་གྲོས་ཚོགས་འཐུས་མི་གཙོ་གྱུར་ཨ་རི་སོགས་ནས་དབྱིན་ཡུལ་གཞུང་ལ་གནོན་ཤུགས་སྤྲད་དེ་རྒྱ་ནག་གི་ Huawei བཟོ་ལས་ཁང་དང་འབྲེལ་ཐག་གཅོད་དགོས་པའི་ཞུ་སྐུལ་གནང་མིན་ལ་བལྟོས་མེད་གཟའ་འཁོར་སྔོན་མར་དབྱིན་ཡུལ་གྱི་སྲིད་བློན་སྐུ་ཞབས་ Boris Johnson མཆོག་གི་སྲིད་གཞུང་ནས་རྒྱ་ནག་གི་བཟོ་ཚོང་ཁང་ལ་ཡུལ་དེའི་ 5G དྲྭ་རྒྱའི་ཚོང་ལས་ཀྱི་ཆ་ཤས་ཤིག་གནང་རྒྱུར་ཐག་བཅད་ཡོད་པ་རེད། དབྱིན་ཡུལ་གྱི་དྲྭ་རྒྱ་བདེ་འཇགས་མི་སྣས་ Huawei བཟོ་ཚོང་ལ་ཡིད་ཆེས་གནང་གི་མེད་པ་ངོས་ལེན་གནང་ཡོད་ཀྱང་བཟོ་ལས་ཁང་དེའི་འཕྲུལ་ལས་བརྒྱུད་དེ་དྲྭ་རྒྱའི་བདེ་འཇགས་ཀྱི་ཉེན་ཁར་སྟངས་འཛིན་གནང་ཐུབ་རྒྱུ་ཡོད་པར་གསུངས་པ་མ་ཟད་ཡུལ་དེའི་བཟོ་ལས་མཁས་པ་ཁག་གཅིག་གིས་དབྱིན་གཞུང་གི་ཐག་བཅད་པར་དགའ་བསུ་གནང་འདུག འོན་ཀྱང་རྒྱ་རིགས་སྒྱུ་རྩལ་བ་གྲགས་ཅན་སྐུ་ཞབས་ Ai WeiWei ལགས་ཀྱིས་ཉེ་ཆར་ BBC Radio 5 Live གྱི་བཅར་འདྲིར་ཐེངས་འདིའི་དབྱིན་གཞུང་གིས་འཕྲལ་སེལ་ཁེ་ཕན་ཙམ་ལ་དམིགས་ཏེ་རྒྱལ་ཁབ་དེའི་ནང་ Huawei བཟོ་ཚོང་ཁང་གི་འཕྲུལ་ལས་མ་ལག་བརྒྱུད་དེ་ཡོང་རྒྱུའི་ཉེན་ཁར་སྣང་མེད་གཏོང་བཞིན་པར་སྐྱོན་བརྗོད་གནང་བ་དང་། དེང་སྐབས་རྒྱ་ནག་དེ་ཚད་མཐོའི་འཕྲུལ་རིགས་བཀོལ་སྤྱོད་ཐོག་མང་ཚོགས་ལ་དྲག་གནོན་དང་ལྟ་སྲུང་ན་པོས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཤུགས་ཆེ་བཏང་མཁན་གྱི་རྒྱལ་ཁབ་ཆེ་སྡུག་ཤོས་གྲས་སུ་ཐེར་འདོན་གནང་ཡོད་པར་མ་ཟད། ད་ཆ་རྒྱ་གཞུང་གིས་དམ་དྲག་ཇེ་ཆེ་དང་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་གནད་དོན་དེ་དག་ནི་བསམ་ཡུལ་ལས་འདས་པ་ཞིག་ཡིན་སྟབས། དེར་དབྱིན་ཡུལ་ཁོ་ན་མིན་པར་འཛམ་གླིང་རྒྱལ་ཁབ་གཞན་ཚོས་ཀྱང་དོགས་ཟོན་གནང་དགོས་གལ་ཡིན་པ་གསུངས་འདུག སྐབས་དེར་གསར་འགོད་པས་སྐུ་ཞབས་ Ai WeiWei ལགས་སུ་ཐེངས་འདིའི་ཐག་གཅོད་བརྒྱུད་དེ་དབྱིན་གཞུང་གིས་རྒྱ་ནག་གི་ཉེན་ཁ་ལ་མཐོང་ཆུང་གནང་བ་ཞིག་མཚོན་གྱི་ཡོད་དམ་ཞེས་དྲིས་པར་ཁོང་ནས་དབྱིན་ཡུལ་གྱི་ཐག་བཅད་པ་དེས་དོན་དངོས་ཐོག་རྒྱ་ནག་གི་ཉེན་ཁང་མཐོང་ཆུང་བྱས་པ་ཞིག་ཡིན་མིན་ཚོད་དཔག་གནང་དཀའ་ནའང་ཐག་བཅད་དེས་ཡུལ་དེའི་གཞུང་གིས་རང་ཉིད་ཀྱི་གཞི་རྩའི་རིན་ཐང་ལ་དགོངས་བཞེད་གནང་བཞིན་དུ་ཕམ་ཉེས་གཏང་བར་ངོས་འཛིན་གནང་སྲིད་པ་རེད་ཅེས་ལན་འདེབས་གནང་འདུག དེ་བཞིན་ཁོང་གིས་ནུབ་རྒྱལ་ཁབ་ཁག་གི་གཞུང་འཛིན་པ་རྣམས་ཀྱིས་རྒྱ་ནག་ལྟ་བུའི་ཐ་ཤལ་གྱི་རྒྱལ་ཁབ་དང་འབྲེལ་བ་བཞག་ནས་སྔར་ལྷག་སྟོབས་ཆེན་རྒྱལ་ཁབ་ཅིག་ཏུ་འགྱུར་རྒྱུར་རམས་འདེམས་གནང་ཚེ་དེ་འབྲེལ་གྱི་ནུབ་ཕྱོགས་རྒྱལ་ཁབ་རྣམས་མགོ་གཉིས་ཅན་གྱི་རྒྱལ་ཁབ་ལ་ངོས་འཛིན་ཆོག་པར་སྐྱོན་བརྗོད་ཀྱང་གནང་ཡོད་པ་རེད། རྩ་བའི་རྒྱལ་སྤྱིའི་སྤྱི་ཚོགས་ཁྲོད་དུ་རྒྱ་ནག་གི་འཕྲུལ་ལས་བཟོ་གྲྭ་ཆེ་ཤོས་ Huawei བཟོ་ཚོང་ཁང་ནི་རྒྱ་ནག་སྲིད་གཞུང་ལ་འབྲེལ་བ་ཆེན་པོ་ཡོད་པའི་ཁར་བཟོ་ཚོང་ཁང་དེས་རྒྱ་ནག་གཞུང་དང་ལག་འབྲེལ་གྱིས་ཕྱི་ཕྱོགས་ཀྱི་རྒྱལ་ཁབ་མང་པོའི་གནས་ཚུལ་རྐུ་འཁྱེར་བྱེད་བཞིན་པར་དོགས་སློང་མང་པོ་གནང་ཡོད་པ་མ་ཟད། བཟོ་ཚོང་ཁང་གཞན་གྱི་ཐོན་གསར་གྱི་མ་ལག་སྒྲིག་སྦྱོར་གྱི་བསམ་བློ་སོགས་ཀྱང་རྐུ་འཁྱེར་བྱེད་ཀྱི་ཡོད་པའི་ཉེས་འཛུགས་མང་པོ་བྱས་ཡོད་པར་བརྟེན་ཨ་རི་དང་ཨོ་སི་ཊོ་ལི་ཡ། ཁེ་ན་ཌ། ཉི་ཧོང་སོགས་ཀྱིས་རྒྱ་ནག་གི་ Huawei བཟོ་ཚོང་ལ་ཚོང་འབྲེལ་གནང་རྒྱུ་མཚམས་འཇོག་གནང་ཡོད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ Coronavirus ཞེས་ཏོག་དབྱིབས་གློ་ཚད་རྐྱེན་པས་ད་ཆ་རྒྱ་ནག་ནང་མི་གྲངས་ ༡༡༨༠༠ ལྷག་ལ་ནད་གཞི་ཕོག་ཡོད་པ་མ་ཟད་འདས་གྲོངས་སུ་གྱུར་བའི་གྲངས་འབོར་ ༢༥༠ ལྷག་འཆར་ཡོད་པའི་ཁྲོད་བོད་མིའི་བླ་ན་མེད་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་དྷརྨ་སཱ་ལཱའི་མེག་ལོཊ་གྷན་ཇ་དུ་ཏོག་དབྱིབས་ནད་རིམས་བརྟག་དཔྱད་གནང་ཡུལ་ཞིག་ཟུར་འཛུགས་གནང་རྒྱུ་རེད་འདུག དེའི་ཁྲོད་དེ་རིང་རྒྱ་གར་ Times གསར་ཁང་གིས་རེས་གཟའ་ཕུར་བུ་ཉིན་ཧི་མཱ་ཅལ་གྱི་སྤྱི་ཁྱབ་དྲུང་ཆེ་མཆོག་གིས་སིམ་ལར་ཛ་དྲག་གི་ཚོགས་འདུ་ཆེད་བསྐོང་གནང་ཐོག་འཕྲོད་བསྟེན་ལྷན་ཁང་ཁག་ནས་སྨན་ཁང་ཆེ་གྲས་སུ་ནད་གཞི་དེ་འབྲེལ་དོགས་གཞི་ཡོད་མཁན་ཚོའི་སླད་དུ་ཟུར་བཀག་གི་ལྟ་རྟོག་གནང་ཡུལ་ཞིག་ཆེད་འཛུགས་གནང་རྒྱུ་དང་། ལྷག་དོན་བཞུགས་སྒར་དུ་མང་ཚོགས་མང་པོ་ཞིག་མགོན་པོ་༸གང་ཉིད་མཆོག་གི་མཇལ་ཁ་ཞུ་བར་ཆེད་བཅར་ཞུ་ཡི་ཡོད་སྟབས། མེག་གྷན་དུའང་དེ་འབྲེལ་ནད་གཞི་བརྟག་དཔྱད་གནང་ཕྱིར་དམིགས་བསལ་ཟུར་འཛུགས་གནང་རྒྱུ་དང་ཆབས་ཅིག་ཏུ་ནད་གཞི་དེ་འབྲེལ་གོ་རྟོགས་གནང་རྒྱུའི་ལམ་སྟོན་གནང་ཡོད་པ་རེད།གནས་ཚུལ་དེ་འབྲེལ་དེ་རིང་ཉིན་རྒྱབ་རྒྱ་གར་ས་གནས་རྫོང་དཔོན་ལས་ཁུངས་ནས་ཆེད་འབོད་གནང་བ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་དང་དྷ་ས་ས་གནས་འགོ་འཛིན་སོགས་ཕེབས་ནས་ནད་གཞི་དེ་འབྲེལ་ལས་འཆར་ཐོག་ཚོགས་འདུ་ཚོགས་ཡོད་པ་རེད། གཞི་རྩའི་བཞུགས་སྒར་དྷརྨ་སཱ་ལཱ་ནི་༸གོང་ས་མཆོག་གི་བཞུགས་གནས་ཡིན་པའི་ཆ་ནས་རྣམ་ཀུན་འཛམ་གླིང་གི་ཡུལ་གྲུ་གང་ས་ནས་མགོན་པོ་༸གང་ཉིད་མཆོག་གི་གསེར་ཞལ་མཇལ་བར་ཆེད་བཅར་ཞུ་གནང་གི་ཡོད་ཀྱང་། ད་ལྟའི་ཆར་འཛམ་གླིང་སྤྱི་ལ་ཏོག་དབྱིབས་ཀྱི་ནད་གཞི་རིམ་པས་ཁྱབ་བརྡལ་འགྲོ་བཞིན་པར་བརྟེན་ཛ་དྲག་གི་དུས་ཚིགས་འདིར་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་མང་མཇལ་རེ་ཞིག་མཚམས་འཇོག་གནང་ཡོད་པ་རེད། སྤྱིར་ད་ཆ་ནད་རིམས་དེའི་རྐྱེན་པས་ཨ་མི་རི་ཀས་གཙོས་པའི་ཡོ་རོབ་དང་། ཉི་ཧོང་སོགས་ཀྱི་མི་སེར་ཝུ་ཧན་ནང་ཡོད་པ་རྣམས་རྒྱལ་ཁབ་སོ་སོས་འགན་ཁུར་ཏེ་རྒྱ་ནག་ནས་ཕྱིར་འདོན་གནང་གི་ཡོད་པ་དང་། ཁ་སང་ཕྱི་ཚེས་ ༣༡ ཉིན་རྒྱ་གར་གྱི་ Air India གནམ་གྲུ་ཞབས་ཞུ་ཁང་ནས་འགྲུལ་བཞུད་པ་ ༤༢༣ ཙམ་ཤོང་པའི་ AI Boeing 747 གནམ་གྲུ་ཆེད་གཏོང་གིས་རྒྱལ་ས་ལྡི་ལི་ནས་ཉིན་དགུང་ཚོུད་ ༡༌༡༨ ཐོག་ཝུ་ཧན་ལ་ཐོན་ཡོད་པ་དང་། དེ་རིང་སྔ་དྲོ་ཚོུད་ ༧༌༣༠ ཐོག་རྒྱ་གར་གྱི་མི་སེར་ ༣༢༤  ཞིག་ལྡི་ལིར་འབྱོར་འདུག ལྡི་ལིར་འབྱོར་མ་ཐག་ས་གནས་དེར་ཡོད་པའི་བོད་ས་མཚམས་ཉེན་རྟོག་གི་སྡོད་སྒར་དང་དེ་བཞིན་རྒྱ་གར་གྱི་མངའ་སྡེ་ཧ་རི་ཡ་ནར་ Manesar ཞེས་པའི་དམག་སྒར་གཉིས་སུ་སྨན་བཅོས་ལྟ་སྐྱོང་སླད་ཁྲིད་ཡོད་པ་རེད། རྒྱ་གར་གྱི་མི་སེར་དེའི་ཁྲོད་མི་གྲངས་ ༢༡༡ ཙམ་ཞིག་ཨན་དྷ་ར་མངའ་སྡེ་དང་། ཀེ་ར་ལ་ནས་ཡིན་པ་མ་ཟད་ ༢༢ ཙམ་ཞིག་མ་ཧ་རཤྚའི་སློབ་ཕྲུག་ཆགས་ཀྱི་འདུག  ཁ་སང་རྒྱ་གར་མི་སེར་ཕྱིར་འདོན་གནང་སྐབས་རྒྱ་ནག་གི་གཞིས་སྤོས་ལས་ཁང་ནས་རྒྱ་གར་སྐྱེས་པ་ཕོ་དང་མོ་ཞིག་ཚ་བ་ཧ་ཅང་རྒྱས་རྐྱེན་ཕྱིར་འདོན་གནང་བར་བཀག་འགོག་བྱས་པ་དང་།  ཁོང་གཉིས་ཝུ་ཧན་ནང་ཟུར་བཀག་སྨན་བཅོས་བྱེད་སྲིད་པ་དང་དེ་འབྲེལ་གྱི་ནད་རྟགས་དཔྱད་སླད་ཡིན་པ་འཁོད་འདུག   གཞི་རྩའི་ད་རེས་རྒྱ་གར་མི་སེར་ཕྱིར་འདོན་སླད་བཏང་བའི་གནམ་གྲུ་དེའི་ནང་རྒྱ་གར་འཕྲོད་བསྟེན་ལས་ཁུངས་ཀྱི་སྨན་པ་ལྔ་དང་། གནམ་གྲུའི་ཁ་ལོ་བ་བཞི། འཕྲུལ་ལས་འཆར་འགོད་པ། གནམ་གྲུའི་ལས་བྱེད་བཅས་མི་གྲངས་ ༣༠ ལྷག་ཆེད་ཕེབས་གནང་ཡོད་པ་དང་། ད་ཆ་ཕྱིར་འདོན་གནང་བའི་མང་ཚོགས་རྣམས་ནད་ཕོག་པའི་དོགས་གཞི་དང་དེ་བཞིན་འདས་པའི་ཉིན་གྲངས་ ༡༤ ནང་མཚོ་ཟས་ཁྲོམ་ར། ནད་གཞི་ཕོག་པའི་རྒྱ་རིགས་དང་འབྲེལ་བ་བྱུང་བ། ནད་གཞི་དེའི་རྟགས་མཚན་མེད་པ་སོགས་སྡེ་ཚན་གསུམ་ལ་བགོས་ནས་ཟུར་བཀག་གི་སྨན་བཅོས་གནང་སར་བཏང་བ་དང་ཆབས་ཅིག་ཏུ་ཉིན་གྲངས་ ༡༤ རྗེས་སུ་མི་སོ་སོར་ཏོག་དབྱིབས་ནད་དུག་གི་རྟགས་མཚན་མེད་པ་ཐོན་ཚེ་རང་ཁྱིམ་དུ་གཏང་བ་དང་ལྷག་པར་དུ་ནད་རྟགས་ཐོན་མཁན་ཚོར་ཟུར་བཀག་གི་སྨན་བཅོས་གནང་རྒྱུ་རེད་འདུག སྤྱིར་རྒྱ་ནག་ཝུ་ཧན་ནས་དེ་རིང་རྒྱ་གར་མི་སེར་ ༣༠༠ ལྷག་ཕྱིར་འདོན་གནང་ཐུབ་པ་བྱུང་ཡོད་ཀྱང་ད་ཆ་ཡང་ཝུ་ཧན་གྲོང་ཁྱེར་ནང་མི་སེར་ཁག་གཅིག་ལུས་ཡོད་སྟབས་ཁོང་རྣམས་ཡོངས་རྫོགས་ཕྱིར་འདོན་སླད་དེ་རིང་ཉིན་རྒྱབ་ཚོུད་ ༡༢ ཡོལ་ཙམ་ལ་ Air India ཞབས་ཞུ་ཁང་གི་གནམ་གྲུ་བཏང་ཡོད་པ་རེད། རྩ་བའི་ཁ་སྔོན་རེས་གཟའ་ཕུར་བུ་ཉིན་རྒྱ་གར་ནང་ཏོག་དབྱིབས་ནད་དུག་གི་ནད་པ་གཅིག་ཡོད་པ་མངོན་གསལ་བྱུང་བ་དང་། ནད་པ་དེའང་ཝུ་ཧན་གྱི་གཙུག་ལག་སློབ་གཉེར་ཁང་གི་སློབ་ཕྲུག་དང་ཀེ་ར་ལ་ནས་ཡིན་པ་མ་ཟད། རྒྱ་གར་ནང་ཏོག་དབྱིབས་ཀྱི་ནད་པའི་གནས་ཚུལ་ཐོན་མ་ཐག་ཀེ་ར་ལ་འཕྲོད་བསྟེན་བློན་ཆེན་གྱིས་ཀེ་ར་ལ་མངའ་སྡེ་ནས་ནད་རིམས་དེར་གདོང་ལེན་གནང་ཕྱིར་གྲ་སྒྲིག་ཡིན་པ་དང་། ད་ཆ་སློབ་ཕྲུག་ནད་པ་དེ་ཟུར་འཇོག་གིས་ལྟ་རྟོག་གནང་བཞིན་ཡོད་པས་མང་ཚོགས་ནས་དེར་དངངས་སྐྲག་གནང་མི་དགོས་ཞེས་གསུངས་ཡོད་པ་རེད། གཞན་ཡང་དེ་རིང་རྒྱ་ནག་གི་ CNR རླུང་འཕྲིན་གྱིས་གནས་ཚུལ་སྤེལ་བར་རྒྱ་གཞུང་གིས་དབྱེ་བའི་བོད་ས་ཁུལ་གྱི་ཞིང་ཆེན་བཞིའི་ཁག་ཏུ་ནད་རིམས་ཕོག་མཁན་ཇེ་མང་དུ་འགྲོ་ཡོད་པ་དང་ཟི་ཁྲོན་དུ་ནད་པ་ ༢༠༧ དང་། དཀར་མཛེས་ཁུལ་དུ་ནད་པ་ ༥ དེ་བཞིན་རྔ་བ་ཁུལ་དུ་ནད་པ་ ༡ དང་། མཚོ་སྔོན་དུ་ནད་པ་ ༨ དང་། ཀན་སུའུ་ནང་ནད་པ་ ༣༥ ཡུ་ནན་དུ་ནད་པ་ ༨༣ ཡོད་པ་མངོན་གསལ་གནང་འདུག ནད་གཞི་དེ་ཁྱབ་བརྡལ་ཤུགས་ཆེ་འགྲོ་བཞིན་པའི་ཁྲོད་སྤྱི་ཚོགས་དྲྭ་རྒྱའི་ཐོག་རྒྱ་ནག་ནང་གི་བཟའ་ཆས་ཉོ་སའི་ཚོང་རར་མང་ཚོགས་ནས་བཟའ་ཆས་ཉོ་བར་འཚང་ཀ་རྒྱག་པ་དང་།  དེ་བཞིན་གྲོང་གསེབ་ཁག་ནང་ཕྱི་མི་ཡོང་བར་བཀག་འགོག་བྱས་པ་སོགས་ཀྱི་གནད་དོན་ཡང་མང་དག་ཅིག་མཐོང་རྒྱུ་འདུག