རྒྱལ་སྤྱི།

ཨོ་གླིང་གི་ Brisbane གྲོང་ཁྱེར་ནང་དུ་གནས་སྡོད་གནང་མཁན་རྒྱུད་སྨད་མཁན་ཟུར་དགེ་བཤེས་བཀྲ་ཤིས་ཚེ་རིང་ལགས་སུ་ Australia Medal for Service ཞེས་པའི་ཡུལ་དེའི་ནང་གི་ཆེས་སྙན་གྲགས་ཆེ་བའི་རྒྱལ་ཁབ་ཀྱི་གཟེངས་རྟགས་ཐོབ་འདུག དེ་ཡང་་ཨོ་གླིང་དུ་ལོ་ལྟར་དབྱིན་ཡུལ་གྱི་རྒྱལ་མོ་ Elizabeth གཉིས་པ་མཆོག་གི་འཁྲུངས་སྐར་དང་བསྟུན། ཡུལ་དེའི་ནང་དུ་སྤྱི་ཚོགས་ཞབས་ཞུ་དང་ཤེས་ཡོན། སྒྱུ་རྩལ་དང་ཚན་རིག་སོགས་སྡེ་ཚན་འདྲ་མིན་ནང་དུ་གཟེངས་སུ་ཐོན་པའི་ཞབས་ཞུའི་གྲུབ་འབྲས་ཐོབ་མཁན་རྣམས་ལ་ཆེ་བསྟོད་ཀྱི་གཟེངས་རྟགས་འབུལ་སྲོལ་ཡོད་པ་ལྟར། འདི་ལོའི་གཟེངས་རྟགས་ཀྱི་ཁོངས་སུ་ཡུལ་དེའི་ནང་བཞུགས་མཁན་གྱི་རྒྱུད་སྨད་མཁན་ཟུར་དགེ་བཤེས་བཀྲ་ཤིས་ཚེ་རིང་ལགས་སུ་བོད་བརྒྱུད་ནང་བསྟན་དང་ཤེས་ཡོན་ཐད་སྤྱི་ཚོགས་ལ་སྨན་པའི་ཞབས་ཞུ་བླ་མེད་བསྒྲུབས་པར་ཆེ་བསྟོད་ཀྱི་གཟེངས་རྟགས་དེ་ཐོབ་འདུགརྩ་བའི་མཁན་ཟུར་དགེ་བཤེས་བཀྲིས་ཚེ་རིང་ལགས་ཕྱི་ལོ་ ༡༩༩༠ གཡས་གཡོན་དུ་ཨོ་གླིང་དུ་འབྱོར་རྗེས་ཡུལ་དེའི་ Queensland མངའ་ཁུལ་དུ་རྟེན་གཞི་བྱས་པའི་སྤྱན་རས་གཟིགས་ལྟེ་གནས་ཁང་དུ་བོད་བརྒྱུད་ནང་བསྟན་སློབ་ཁྲིད་གནང་བ་སོགས་ལོ་ངོ་ ༢༠ ཙམ་གྱི་རིང་ལ་ཕྱག་ལས་གནང་བའི་རྗེས་སུ་ཕྱི་ལོ་ ༢༠༠༩ ལོར་རྒྱ་གར་ལ་ཕྱིར་ལོག་གནང་བ་དང་འབྲེལ། རིམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་སྨད་མཁན་པོར་བསྐོ་བཞག་གནང་ཡོད་པ་ལྟར། ཕྱི་ལོ་ ༢༠༡༤ བར་རྒྱུད་སྨད་མཁན་པོའི་འགན་ཁུར་བཞེས་རྗེས་ཨོ་གླིང་དུ་ཕྱིར་ལོག་གནང་སྟེ། ད་ལྟའི་ཆར་ Brisbane གྲོང་ཁྱེར་ནང་དུ་རྟེན་གཞི་བྱས་པའི་ Tashi Khangmar Samdrup Ling ཆོས་ཚོགས་དང་ Langri Tangpo ལྟེ་གནས་ཁང་། དེ་བཞིན་ Good Fortune ཐེབས་རྩ་ཁང་བཅས་སུ་ནང་ཆོས་སློབ་ཁྲིད་གནང་གི་ཡོད་པ་རེད་འདུག མཁན་ཟུར་རིན་པོ་ཆེ་མཆོག་ལ་ཨོ་གླིང་དང་ NewZealand གཙོས་པའི་ཐེ་ཝན་དང་རྒྱ་གར། དེ་བཞིན་བོད་བཅས་ཀྱི་ནང་དུ་སློབ་མ་མང་དག་ཅིག་ཡོད་པ་རེད་འདུགཁོང་ལ་ད་རེས་ཨོ་གླིང་ནང་གི་ཆེས་མཐོའི་གཟེངས་རྟགས་དེ་ཐོབ་པའི་གནས་ཚུལ་ཐོན་མ་ཐག་ཁོང་ལ་དགའ་བསུའི་འཚམས་འདྲི་ཞུ་མཁན་མང་དག་ཅིག་ཡོང་བཞིན་པའི་ཁྲོད། དེ་རིང་རྒྱ་གར་ལྷོ་ཕྱོགས་ཁུལ་དུ་རྟེན་གཞི་བྱས་པའི་སེར་བྱེས་ཏྲེ་ཧོར་ཁང་ཚན་གྱི་མཁན་བླ་འདུས་མང་ཡོངས་ནས་དགའ་དད་སྤྲོ་གསུམ་གྱི་འཚམས་འདྲི་བཀྲིས་བདེ་ལེགས་ཞུས་པ་དང་འབྲེལ། མཁན་ཟུར་རིན་པོ་ཆེ་སྐུ་ཚེ་སྐལ་བརྒྱར་བརྟན་པའི་སྨོན་འདུན་ཞུས་འདུགརྩ་བའི་ཨོ་གླིང་ནང་འདི་ལོ་དབྱིན་ཇིའི་རྒྱལ་མོའི་འཁྲུངས་སྐར་དང་བསྟུན་ཡུལ་དེའི་རྒྱལ་ཁབ་ཀྱི་གཟེངས་རྟགས་བཞེས་མཁན་ཁོངས་སུ་མཁན་ཟུར་དགེ་བཤེས་བཀྲ་ཤིས་ཚེ་རིང་ལགས་ཀྱི་གཙོས་པའི་ཨོ་གླིང་སྲིད་བློན་ཟུར་པ་ Tony Abbot མཆོག་དང་། ཡུལ་དེའི་ནང་དར་སྲོལ་ཆེ་བའི་ Cricket འམ་གཡུག་རྩེ་སྤོ་ལོའི་རུ་ཁག་གི་འགོ་ཁྲིད་ཟུར་པ་ Michael Clark བཅས་ཆབ་སྲིད་དང་སྒྱུ་རྩལ། སྤྱི་ཚོགས་ཞབས་ཞུ་སོགས་སྡེ་ཚན་འདྲ་མིན་ནང་དུ་གཟེངས་སུ་ཐོན་པའི་ཞབས་ཞུ་སྒྲུབ་མཁན་མི་གྲངས་ ༩༣༣ ལ་རྒྱལ་ཁབ་ཀྱི་གཟེངས་རྟགས་ཕུལ་ཡོད་པ་རེད་འདུག

ཉེ་སྔོན་ཨ་རིའི་ནང་དུ་ཉེན་རྟོག་པས་མི་རིགས་ནག་པོ་ཞིག་གི་སྐེ་ལ་པུས་མོ་བཙུགས་ནས་རྐྱེན་ལམ་དུ་བཏང་བའི་གནད་དོན་དང་འབྲེལ་ནས།  ད་སྐབས་ཨ་རིའི་ནང་དུ་མི་རིགས་ནག་པོ་མང་པོ་ཞིག་ཁྲོམ་གཞུང་དུ་ཐོན་ནས་ངོ་རྒོལ་གྱི་རྣམ་པ་འདྲ་མིན་སྤེལ་བཞིན་པའི་ཁྲོད། བོད་མི་ཁག་ཅིག་གིས་མི་རིགས་ནག་པོའི་རྒྱབ་ཀྱི་བོད་མི་ཞེས་པའི་འཕྲེད་དར་སྒྲེང་ནས་ལས་འགུལ་དེར་རྒྱབ་སྐྱོར་གྱི་རྣམ་པ་བསྟན་ཡོད་པར་བརྟེན། སྤྱི་ཚོགས་དྲ་རྒྱའི་ནང་དུ་བོད་མིས་ལས་འགུལ་དེར་འཛུལ་ཞུགས་བྱེད་རུང་མིན་གྱི་ཐད་ནས་གླེང་སློང་བྱེད་མཁན་མང་པོ་ཡོང་གི་ཡོད་པ་རེད། དེ་རིང་འདི་གའི་གསར་འགོད་པས་གནད་དོན་དེར་དོ་སྣང་ཆེན་པོ་བྱེད་མཁན། བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གི་འགན་འཛིན་དབང་ལྡན་སྐྱབས་དང་བུད་མེད་ལས་འགུལ་བ་བསྟན་འཛིན་དཔལ་ཡོན་གཉིས་སུ་ཕྱོགས་གཉིས་ཀྱི་ངོས་འཛིན་གྱི་ཐད་ནས་བཀའ་འདྲི་ཁག་ཅིག་ཞུས་ཡོད།   དབང་ལྡན་སྐྱབས་ལགས་ཀྱིས་སྤྱིར་བོད་མི་རྣམས་ཀྱིས་མི་རིགས་གཞན་གྱི་ཐོབ་ཐང་ལ་རྒྱབ་སྐྱོར་གྱི་རྣམ་པ་སྟོན་མི་སྟོན་དེ་མི་སྒེར་གྱི་གནད་དོན་ཞིག་རེད།   ཡིན་ནའང་བོད་མིའི་ཚབ་མཚོན་རང་བཞིན་གྱི་ཐོག་ནས་ད་རེས་ཀྱི་ལས་འགུལ་དེའི་ནང་ཞུགས་ན་འགྲིག་གི་མེད་པའི་དགོངས་ཚུལ་གསུང་བ་མ་ཟད། ད་ལྟའི་ཆར་ཨ་རིའི་གྲོས་ཚོགས་སུ་བོད་མིའི་ཁྲིམས་འཆར་གཉིས་འགྲོ་བཞིན་པའི་དུས་སྐབས་འདིར། བོད་མི་རྣམས་ཀྱིས་སྤྱི་བའི་རྩ་དོན་ལ་གནོད་པའི་ལས་འགུལ་གྱི་རིགས་ལ་འཛུལ་ཞུགས་བྱེད་རྒྱུར་གཟབ་གཟབ་གནང་དགོས་བའི་དྲན་སྐུལ་གནང་སོང་། ཡིན་ཡང་། བསྟན་འཛིན་དཔལ་ཡོན་ལགས་ཀྱིས། བོད་མིའི་རྩ་དོན་དང་འབྲེལ་ནས་མི་རིགས་དབྱེ་འབྱེད་ཀྱི་དྲང་བདེན་གྱི་འཐབ་རྩོད་དེར་རྒྱབ་སྐྱོར་མ་བྱས་པ་ཡིན་ན་སོ་སོའི་ཁོག་རྒྱ་ཆུང་དྲག་པ་ཡིན་པར་གསུངས་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་ཁ་སང་ཟླ་ ༦ ཚེས་ ༧ ཉིན་དྲྭ་ལམ་ཐད་གཏོང་བརྒྱུད་ཨེ་ཤ་ཡའི་གཞོན་སྐྱེས་རྣམས་ལ་བཀའ་སློབ་བསྩལ་བ་དང་འབྲེལ་ཏེགཞོན་སྐྱེས་ཚོས་ནང་སེམས་ཀྱི་ཤེས་ཡོན་དང་འགྲོ་བ་མི་བཟང་སྤྱོད་གོང་འཕེལ་གཏོང་ཐབས་སླད་འབད་བརྩོན་བྱེད་དགོས་གལ་ཡིན་པ་ལམ་སྟོན་མཛད་འདུག༸དཔལ་ལྡན་དགའ་ལྡན་ཕོ་བྲང་གི་ལྷོ་ཤར་ཨེ་ཤ་ཡའི་འབྲེལ་མཐུད་པ་སྦྱིན་པ་རྒྱ་མཚོ་ལགས་དང་ཁུལ་དེར་ཡོད་པའི་ཚོགས་པ་བཅུ་གསུམ་མཉམ་སྦྲེལ་གྱིས་ཇི་ལྟར་གསོལ་འདེབས་ཞུས་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་རེས་གཟའ་ཉི་མའི་ཉིན་བཞུགས་སྒར་༸རྒྱལ་བའི་ཕོ་བྲང་དུ་ཨེ་ཤ་ཡའི་རྒྱལ་ཁབ་སིངྒ་པོར་དང་མ་ལེ་ཤཱི་ཡ། ཐེ་ལན་ཌི། ཝེ་ཏི་ནམ། མེག་མར། ཁམ་པོ་ཌི་ཡ། ལའོ་སི། ཧོང་ཀོང་བཅས་ཀྱིས་གཙོས་པའི་ལྷོ་ཤར་ཨེ་ཤ་ཡའི་གཞོན་སྐྱེས་སྟོང་ཕྲག་བརྒལ་བར་དྲྭ་རྒྱའི་བརྒྱུད་བཀའ་སློབ་དང་བཀའ་འདྲི་དགོངས་སྐོར་ཞུས་ཁག་ལ་ཐུགས་བརྩེ་ཆེན་པོས་བཀའ་ལན་བསྩལ་ཡོད་པ་རེད།སྐབས་དེར་ལྷོ་ཤར་ཨེ་ཤ་ཡའི་ཚོགས་པ་བཅུ་གསུམ་གྱི་སྐུ་ཚབ་ཚོས་བཀའ་འདྲི་ཞུ་རྒྱུའི་མཛད་རིམ་དངོས་སུ་དབུ་འཛུགས་མ་གནང་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་གོ་སྒྲིག་ཚོགས་ཆུང་ལ་འདི་ལྟ་བུའི་མཛད་རིམ་གོ་སྒྲིག་ཞུས་པར་ཐུགས་རྗེ་ཆེ་ཞེས་བཀའ་བསྩལ་ནས་མགོན་པོ་༸གང་ཉིད་མཆོག་གི་ཐུགས་བསྐྱེད་ཆེན་པོ་བཞི་པོ་རྣམས་ངོ་སྤྲོད་དང་འབྲེལ། སྤྱིར་འགྲོ་བ་མིས་གཙོས་པའི་སེམས་ཅན་ཀུན་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དང་། མིའི་རིགས་ལ་སེམས་ཅན་གཞན་དང་མི་འདྲ་བར་འཕྲལ་ཕུགས་བདེ་སྡུག་ཐོག་ལ་བསམ་བློ་བཏང་ཐུབ་པའི་རྣམ་དཔྱོད་ཀྱི་ནུས་པ་ཁྱད་པར་བ་ཞིག་ཡོད་པར་མ་ཟད། རྣམ་དཔྱོད་དེས་འཕྲུལ་ཆས་དང་ཚན་རིག་སོགས་གསར་གཏོད་གནང་ཐུབ་ཡོད་ཀྱང་། རྣམ་དཔྱོད་དེ་ཉོན་མོངས་པ་དང་ཟུང་སྦྲེལ་ཐོག་གོ་མཚོན་འདྲ་མིན་བཟོས་ཏེ་འཛམ་གླིང་ནང་དམག་འཁྲུག་དང་འཚེ་བའི་གནད་དོན་འཕེལ་ཡོད་སྟབས། དཀའ་ངལ་དེ་དག་སེལ་རྒྱུར་ང་ཚོ་ཚང་མར་འགན་ཡོད་ཅེས་བཀའ་ནན་བསྩལ་ཡོད་པ་རེད།མགོན་པོ་མཆོག་གིས་འཛམ་གླིང་འདིའི་ཐོག་ཡོད་པའི་ཆོས་ལུགས་དེ་དག་ལྟ་གྲུབ་ཀྱི་ཆ་ནས་མི་འདྲ་བ་ཡོད་ཀྱང་བྱམས་བརྩེའི་བསླབ་བྱ་གནང་མཁན་གཅིག་མཚུངས་ཡིན་པ་རེད། དེང་སྐབས་ཆོས་ལུགས་མི་འདྲ་བའི་རྒྱུ་མཚན་དུ་བྱས་ནས་མི་གཅིག་གིས་གཅིག་ལ་གསོད་རེས་བཏང་བའི་གནས་སྟངས་ཤིག་ཡོང་སྐབས་དེར་ཆོས་ལུགས་ནང་ཕན་ཚུན་དབར་གཅིག་གྱུར་གྱི་འདུ་ཤེས་འཛིན་ནས་ཕན་ཚུན་གུས་བརྩི་དང་སློབ་སྦྱོང་གནང་བ་བརྒྱུད་དེ་ཆོས་ལུགས་མཐུན་སྒྲིལ་ལ་དགོངས་པ་བཞེས་དགོས་པར་གཞེན་བསྐུལ་གནང་འདུགབཀའ་སློབ་ཀྱི་མཚམས་སུ་མགོན་པོ་༸གང་ཉིད་མཆོག་ལ་གསོལ་འདེབས་ཞུ་མཁན་ཚོགས་པ་ཚོའི་སྐུ་ཚབ་རིམ་པས་བཀའ་འདྲི་དགོངས་སྐོར་ཞུས་པའི་ཁྲོད་གཞོན་སྐྱེས་སློབ་མ་ཞིག་གི་བཀའ་འདྲིར་བཀའ་ལན་བསྩལ་བར་མགོན་པོ་༸གང་ཉིད་མཆོག་དགུང་ལོ་བདུན་བརྒྱད་ལ་ཕེབས་སྐབས་ནས་བཟུང་སློབ་གཉེར་གནང་ཡོད་པ་དང་ལྷན་ཉམས་ལེན་མཛད་རྒྱུ་དབུ་འཛུགས་གནང་ཡོད་སྟབས་སློབ་གཉེར་དང་ཉམས་ལེན་གཉིས་མཉམ་དུ་འགྲོ་ཐུབ་རྒྱུ་ཡོད་པ་༸སྐུའི་མྱོང་བའི་ཐོག་ནས་ལམ་སྟོན་མཛད་པ་མ་ཟད། ༸གོང་ས་མཆོག་ད་ཆ་དགུང་གྲངས་ ༨༦ ལ་ཕེབས་སྐབས་འདིར་གོ་སྐབས་ནམ་བྱུང་ལ་བཀའ་བསྟན་གསུང་རབ་རྣམས་ལྗགས་ཀློག་མཛད་བཞིན་ཡོད་པར་བཀའ་བསྩལ་དང་ཆབས་ཅིག་ཏུ་ཐོས་བསམ་སྒོམ་གསུམ་ཡ་མ་བྲལ་བར་སློབ་གཉེར་གནང་གནད་ཡིན་པའི་སྐུལ་ལྕགས་མཛད་ཡོད།ཐེངས་འདིའི་དྲྭ་ཐོག་གླེང་མོལ་གྱི་མཛད་རིམ་གོ་སྒྲིག་པས་༸གོང་ས་མཆོག་ལ་སླད་མར་གཞོན་སྐྱེས་རྣམས་དང་ལྷན་དུ་འདི་ལྟ་བུའི་བགྲོ་གླེང་གི་གོ་སྐབས་བཀའ་བཞེས་བཟང་པོ་ཅི་ནས་ཀྱང་སྨིན་བསྩལ་ཡོང་བའི་གསོལ་བ་བཏབ་པ་ལྟར་མགོན་པོ་༸གང་ཉིད་མཆོག་གིས་མགོན་པོ་མཆོག་ནང་ཆོས་ཉམས་ལེན་པ་ཞིག་ཡིན་པའི་ཆ་ནས་བདག་གི་ལུས་ངག་ཡིད་གསུམ་སེམས་ཅན་གྱི་དོན་དུ་བསྔོས་ཟིན་པས་ཡིན་དང་ཡིན་ཞེས་དང་། ལྷག་དོན་དེང་རབས་ཀྱི་འཕྲུལ་ཆས་ལ་བརྟེན་ནས་ས་གནས་གཞན་དུ་འགྲོ་མི་དགོས་པར་འདིར་བདེ་བར་བསྡད་ནས་དགོངས་ཚུལ་གསུངས་པ་ལས་དཀའ་ངལ་མེད་སྟབས་ནམ་ཡིན་ཡང་གྲ་སྒྲིག་ཨང་སར་ཡིན་ཞེས་བཀའ་བཞེས་བཟང་པོ་བཀྲིན་ཆེ་བ་བསྩལ་འདུགཐེངས་འདིའི་དྲྭ་ལམ་ཐད་གཏོང་གི་བགྲོ་གླེང་དེ་བོད་དབྱིན་རྒྱ་གསུམ་གྱི་སྐད་ཡིག་གཙོས་ཝི་ཏི་ནམ་དང་ཀོ་རི་ཡ། རུ་སུ་སྐད་བཅས་ཁྱོན་སྐད་རིགས་འདྲ་མིན་བཅིུག་ཐོག་གསུང་སྒྱུར་གནང་ཡོད་པ་རེད།

གསར་ལམ་ཁག་ཏུ་གནས་ཚུལ་ཐོན་པ་ལྟར་ན།  ཨ་རི་དང་འཇར་མན། དབྱིན་ཡུལ་དང་ཉི་ཧོང་། དེ་བཞིན་ཁ་ན་ཌ་དང་ནོར་ཝེ་སོགས་ཀྱི་མཚོན་པའི་སྟོབས་འབྱོར་ཆེ་བའི་རྒྱལ་ཁབ་བརྒྱད་ཀྱི་གྲོས་ཚོགས་འཐུས་མི་རྒན་གྲས་ཁག་ཅིག་གིས་མཉམ་འབྲེལ་གྱི་ཐོག་ནས་ཚོགས་པ་ཞིག་བཙུགས་ཏེ། ད་ལྟའི་ཆར་རྒྱ་ནག་ནི་རྒྱལ་སྤྱིའི་སྟེང་གི་དཔལ་འབྱོར་འཕེལ་རྒྱས་དང་བདེ་འཇགས། དེ་བཞིན་འགྲོ་བ་མིའི་ཐོབ་ཐང་གི་གནད་དོན་སོགས་ཀྱི་ཉེན་ཁ་ཞིག་ཡིན་པའི་གཅིག་གྱུར་གྱི་ངོས་འཛིན་དང་འབོད་སྒྲ་བསྒྲགས་ཏེ།  མཉམ་རུབ་ཀྱི་ཐོག་ནས་རྒྱ་ནག་ལ་ཁ་གཏད་གཅོག་རྒྱུ་ཡིན་པར་ཡོངས་གྲགས་གནང་འདུག གཞི་རྩའི་རྒྱ་ནག་གི་ནང་དུ་ཏོག་དབྱིབས་རིམས་ནད་ཐོག་མར་མཆེད་པ་ནས་བཟུང་། རྒྱལ་སྤྱིའི་སྤྱི་ཚོགས་ནང་ཁྱབ་བརྡལ་ཆེན་པོ་ཕྱིན་ཡོད་པ་ལྟར། ཨ་རིའི་ངོས་ནས་རྒྱ་ནག་ནས་ཁྱབ་བརྡལ་བྱུང་བའི་རིམས་ནད་དེ་ནི་རྒྱ་ནག་གིས་ཆེད་དུ་རྫས་འགྱུར་ཁང་ནས་གསར་བཟོ་བྱས་ཏེ་ཨ་རིར་ཁ་གཏོར་རྒོལ་གཏོང་བྱེད་དུ་བཟོས་བ་ཞིག་ཡིན་པར་ངོས་འཛིན་གནང་གི་ཡོད་པའི་དུས་སྐབས་དང་བསྟུན་ནས།  ཐེངས་འདིའི་རྒྱལ་ཁབ་བརྒྱད་ཀྱི་གྲོས་ཚོགས་ཀྱི་འཐུས་མིས་གོ་སྐབས་དམ་འཛིན་གྱིས་ཚོགས་པ་ཆེད་འཛུགས་བྱས་ཏེ་རྒྱལ་སྤྱིའི་སྟེང་རྒྱ་ནག་གི་དཔལ་འབྱོར་དང་ཕྱི་འབྲེལ་གྱི་ཤུགས་རྐྱེན་ཆེ་རུ་འགྲོ་བཞིན་པར་ཁ་གཏད་གཅོག་ཆེད་དུ་ཡིན་པར་འགྲེལ་བརྗོད་གནང་འདུག ཐེངས་འདིའི་མཐུན་ཚོགས་དེར་ཨ་རིའི་གྲོས་ཚོགས་གོང་མའི་འཐུས་མི། སྐུ་ཞབས་ Marco Rubio དང་ Bob Menendez ལགས། གཞན་ཡང་ཉི་ཧོང་གི་བདེ་སྲུང་གི་བློན་ཆེན་ཟུར་བ་སྐུ་ཞབས་ Gen Nakatani ལགས། དེ་བཞིན་ཡོ་རོབ་གྲོས་ཚོགས་ཀྱི་ཕྱི་འབྲེལ་ལྷན་ཚོགས་ཀྱི་ཚོགས་མི་ Miriam Lexmann སོགས་ཀྱིས་ལྷན་ཞུགས་གནང་ཡོད་པ་དང་།  སྐུ་ཞབས་ Marco Rubio ལགས་ཀྱིས་ཁོང་གི་ Twitter དྲ་གནས་ཐོག་བརྙན་ལམ་ནས་བརྡ་ལམ་ཞིག་ཕུལ་བའི་ནང་། ད་ལྟའི་རྒྱ་ནག་དམར་ཤོག་སྲིད་གཞུང་དེ་ནི་རྒྱལ་སྤྱིའི་སྤྱི་ཚོགས་ཀྱི་དཀའ་ངལ་ཞིག་ཡིན་པར་ཡོངས་གྲགས་གནང་ཡོད་པ་རེད། མཉམ་འབྲེལ་གྱི་ཚོགས་པ་དེས།  དེང་སྐབས་རྒྱ་ནག་གི་དཔལ་འབྱོར་འཕེལ་ཕྱོགས་དེས་རྒྱལ་སྤྱིའི་སྤྱི་ཚོགས་འདིར་སྒྲིག་གཞི་རང་བཞིན་ལྡན་པའི་གནོད་ཤུགས་ཆེན་པོ་སྤྲོད་ཀྱི་ཡོད་པས། རྒྱལ་ཁབ་གཅིག་གིས་རྒྱ་ནག་ལ་ཁ་གཏད་གཅོག་དགོས་ན་བློས་བཏང་ཆེན་པོ་བྱེད་དགོས་པར་བརྟེན། གྲོས་ཚོགས་མི་སྣའི་ཚོགས་པ་དེའི་ཆེད་དུ་རྒྱ་ནག་དང་འབྲེལ་བའི་གནད་དོན་ཁག་ལ་མཉམ་ལས་བྱེད་རྒྱུ་ཡིན་པར་བསྒྲགས་འདུག དེ་བཞིན་ཁ་ཉིན་རྒྱ་ནག་ནང་དུ་སྤྱི་ལོ་ ༡༩༨༩ ལོར་པེ་ཅིན་ཏུ་སློབ་ཕྲུག་སྟོང་ཕྲག་མང་པོ་དམར་གསོད་བཏང་ནས་མི་ལོ་ ༣༡ ཕྱིན་པའི་དྲུག་བཞིའི་དོན་རྐྱེན་གྱི་དུས་དྲན་དང་འབྲེལ་ནས།   སི་པན་དུ་རྟེན་གཞི་བྱས་པའི་རྒྱ་ནག་གི་རྐང་རྩེད་སྤོལ་བ་གྲགས་ཅན་ Hao Haidong  ལགས་ཀྱིས་ད་ལྟའི་རྒྱ་ནག་གི་སྲིད་དབང་སྒེར་གཅོད་ཀྱི་བྱེད་བབ་དེར་སྐྱོན་བརྗོད་དྲག་པོ་གནང་བ་དང་སྦྲགས།  ཁོང་གིས་བོད་དང་ཧོང་ཀོང་། དེ་བཞིན་ཐེ་ཝན་སོགས་ཀྱི་རང་སྐྱོང་གི་དགོས་འདུན་དེར་རྒྱབ་སྐྱོར་བྱེད་རྒྱུ་ཡིན་པར་ཡོངས་གྲགས་གནང་བ་མ་ཟད།  ཨ་རིར་རྟེན་གཞི་བྱས་པའི་རྒྱ་ནག་གི་ཕྱུག་བདག་ཆེན་མོ། Guo Wengui ཡིས་ད་ཡོད་ཀྱི་རྒྱ་ནག་དམར་ཤོག་ཚོགས་པར་ངེས་ལེན་མེད་པར།  རྒྱ་ནག་གསར་བའི་མཉམ་འབྲེལ་གྱི་རྒྱལ་ཁབ་ཟེར་བ་ཞིག་གསར་འཛུགས་བྱེད་རྒྱུའི་བསྒྲགས་གཏམ་དེར་རྒྱབ་སྐྱོར་ཡོད་པར་ཕྱིར་བསྒྲགས་གནང་བ་དང་སྦྲགས། ད་ལྟའི་རྒྱ་ནག་དམར་ཤོག་སྲིད་གཞུང་དེ་འཇིགས་སྐུལ་ཚོགས་པས་སྐྱོང་གི་ཡོད་པར་བརྟེན་རྒྱ་ནག་གི་ཁྲིམས་ལུགས་ལྡན་པའི་སྲིད་གཞུང་མགོ་རྟིང་བསློགས་ཡོད་པ་ཅེས་སྐྱོན་བརྗོད་ཚ་ནན་བྱས་འདུག གཞན་ཡང་ཁ་ཉིན་ Italy ཡི་དཔལ་འབྱོར་བློན་ཆེན་ཟུར་བ་དང་། ཨ་རིའི་གཞུང་ཚབ་པ་སྐུ་ཞབས་ Giulio Terz ལགས་ཀྱིས་དྲུག་བཞི་དོན་རྐྱེན་གྱི་དུས་དྲན་མཛད་སྒོ་དང་འབྲེལ་ནས།  བོད་ནི་རྒྱ་ནག་གི་དམར་གསོད་དང་རྩ་གཏོར་གཏོང་ཡུལ་གྱི་དུས་དྲན་སྲུང་བརྩི་ཞུ་ཡུལ་དང་པོ་ཆགས་ཡོད་པར་འགྲེལ་བརྗོད་ཀྱིས། རྒྱ་ནག་གིས་བོད་མི་ས་ཡ་མང་པོ་དམར་གསོད་བཏང་ཡོད་པ་དང་།  བོད་ཁུལ་གྱི་དགོན་པ་དྲུག་སྟོང་ལྷག་དང་སྒྱུ་རྩལ་རང་བཞིན་ལྡན་པའི་གནའ་ཤུལ་བརྒྱ་ཆ་ ༩༠ ལྷག་ཀྱང་རྩ་གཏོར་བཏང་ཡོད་པ་མ་ཟད། ད་ཆ།  རྡུལ་ཕྲན་མཚོན་ཆའི་སྙིགས་རོ་མང་པོ་བོད་ཁུལ་དུ་གཡུགས་ནས་བོད་ཀྱི་རང་བྱུང་ཁོར་ཡུག་ལ་ཚད་ལས་འདས་པའི་གཏོར་བཤིག་བཏང་ཡོད་པར་སྐྱོན་བརྗོད་བྱས་ཏེ། ཡོ་རོབ་ཀྱི་རྒྱལ་ཁབ་རྣམས་ཀྱིས་རྒྱ་ནག་གི་བྱེད་བབ་དེར་མཁྱེན་རྟོགས་དགོས་བའི་འབོད་སྐུལ་གནང་འདུག   པར་དང་པོ་དེ་བོད་མིའི་སྒྲིག་འཛུགས་ནས་བླངས།  

རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་བརྡལ་ཁྲོད་འཛམ་གླིང་ས་ཕྱོགས་གང་སར་གནས་སྡོད་བོད་མི་ཚོས་གནས་ཡུལ་གཞུང་མང་ལ་བྱེད་སྒོ་འདྲ་མིན་བརྒྱུད་དེ་གདུང་སེམས་མཉམ་བསྐྱེད་ཞུ་བཞིན་ཡོད་པ་ལྟར་ཡོ་རོབ་སྦེལ་འཇམ་བོད་རིགས་ཚོགས་པའི་ཁྱབ་ཁོངས་Antwerpen ས་གནས་སུ་གནས་སྡོད་བོད་མི་ཁྱིམ་ཚང་ ༡༡༣ གྱིས་ཁུལ་དེའི་ནང་ཏོག་དབྱིབས་ནད་ཡམས་ལ་གདོང་ལེན་གྱི་ལས་དོན་གཉེར་མཁན་ UZA ཞེས་པའི་སྨན་སློབ་ལ་རྒྱབ་སྐྱོར་མཚོན་ཕྱིར་ཡོ་སྒོར་ ༥༡༡༣ ཞལ་འདེབས་ཕུལ་བའི་ཐོག་ནས་སྦེལ་འཇམ་གཞུང་མང་ལ་གདུང་སེམས་མཉམ་བསྐྱེད་ཞུས་འདུག གདུང་སེམས་མཉམ་བསྐྱེད་ཀྱི་ཞལ་འདེབས་དེ་བོད་ཟླ་ ༤ ཚེས་ ༡༥ ཉིན་ཆོས་ཕྱོགས་ཀྱི་དུས་བཟང་དང་བསྟུན་ནས་ཕུལ་འདུག་པ་དང་། སྦེལ་འཇམ་བོད་རིགས་ཚོགས་པའི་ཚོགས་གཙོ་ཕུར་བུ་དོན་གྲུབ་ལགས་ཀྱིས་བྱེད་སྒོ་དེ་ལྟར་སྤེལ་བ་བརྒྱུད་ནས་ད་བར་ཁུལ་དེའི་ནང་གི་བོད་མི་ཚོར་སྦེལ་འཇམ་གཞུང་མང་གཉིས་ཀྱིས་མཐུན་འགྱུར་རོགས་རམ་རྒྱ་གང་ཆེ་གནང་བར་བཀྲིན་རྗེས་དྲན་དང་ཐུགས་རྗེ་ཆེ་ཞུ་ཕྱིར་གནང་བ་དང། ལྷག་དོན་མགོན་པོ་༸གང་ཉིད་མཆོག་གི་དགོངས་གཞི་ལྟར་བོད་མིའི་བཟང་སྤྱོད་ཐོག་ནས་ཉམ་ཐག་པའི་མང་ཚོགས་ལ་ཞབས་ཞུ་བསྒྲུབ་རྒྱུ་བཅས་ལ་ཆེད་དམིགས་ཞུས་པ་ཞིག་ཡིན་སྐོར་གསུངས་སོང་། ད་ལན་ཁོང་རྣམས་ནས་སྦེལ་འཇམ་གཞུང་མང་ལ་ནད་ཡམས་ཁྱབ་གདལ་ཁྲོད་གདུང་སེམས་མཉམ་བསྐྱེད་ཞུས་པའི་གནས་ཚུལ་དེ་ཡང་ས་གནས་ཀྱི་ཚགས་ཤོག་ཁག་ཏུ་ཐོན་པར་བརྟེན་ཡུལ་མི་མང་ཚོགས་ནས་དོ་སྣང་དང་བསྔགས་བརྗོད་གནང་ཡུལ་གྱི་གནས་ཚུལ་ཆགས་འདུག བོད་རིགས་ཚོགས་པའི་ཚོགས་གཙོ་ཕུར་བུ་དོན་གྲུབ་ལགས་ཀྱིས་དེ་སྔ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༡༣ ལ་བཞུགས་རྒྱུའི་བཀའ་བཞེས་བཟང་པོ་སྨིན་བསྩལ་མཛད་དོན་བཞིན་ད་རེས་མགོན་པོ་༸གང་ཉིད་མཆོག་གི་དགུང་གྲངས་དང་མཉམ་པའི་ཞལ་འདེབས་གནང་མཁན་གྱི་ཁྱིམ་ཚང་ ༡༡༣ བྱུང་བ་ནི་མ་གྲོས་བསམ་པ་ལྟུན་གྲུབ་ཀྱི་རྟེན་འབྲེལ་བཟང་པོ་བྱུང་ཡོད་པར་འགྲེལ་བརྗོད་གནང་ཡོད།དེ་དང་ཕྱོགས་མཚུངས་སུ་སྦེལ་འཇམ་གྱི་བོད་རིགས་ཚོགས་པའི་ཁྱབ་ཁོངས་ས་གནས་ལུའུ་ཝན་ཆོས་གསུམ་བོད་རིགས་ཡོངས་ཀྱིས་དང་བླངས་ཐོག་ས་གནས་ཀྱི་ནད་ཡམས་སྔོན་འགོག་གི་ལས་དོན་དང་འབྲེལ་ཡོད་ UZ མཐོ་སློབ་སྨན་ཁང་དང། KU Leuven གཙུག་ལག་སློབ་གཉེར་གཉིས་ཀྱི་ཐེབས་རྩར་ཡོ་སྒོར་ ༢༧༩༥ ཞལ་འདེབས་ཕུལ་ནས་གཉན་རིམས་་བརྟག་དཔྱད་ལས་དོན་ལ་གདུང་སེམས་མཉམ་བསྐྱེད་ཞུས་འདུག

རྒྱ་ནག་ཚོང་ཟོག་ཉོ་ཚོང་འཚམས་འཇོག་དགོས་པའི་རེ་འདུན་ཐོག་ཟླ་ ༥ ཚེས་ ༢༧ ཉིན་སུད་སི་གྲོང་ཁྱེར་ Winterthur ནས་དབུ་འཛུགས་ཀྱིས་རྒྱབ་ཏུ་ཉལ་ཆས་བླུགས་པའི་ལྟོ་ཆས་དང་ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་རྒྱབ་ཏུ་འཛམ་གླིང་གཞུང་མང་ནས་རྒྱ་ནག་གི་དངོས་ཟོག་ཉོ་ཚོང་མཚམས་འཇོག་དགོས་ཞེས་འབོད་ཚིག་འཁོད་པའི་ཤོག་སྦྱང་འཕྱང་ནས་སུད་སི་ནང་ཁེར་རྐྱང་གིས་བོད་དོན་ཞི་བའི་གོམ་བགྲོད་གནང་མཁན་ཚེ་རིང་དབང་འདུས་ལགས་ཕྱི་ཚེས་ ༥ ཉིན་སུད་གྲོང་ཁྱེར་ཇི་ནི་ཝ་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་ Michelle Bachelet མཆོག་གི་མཚན་ཐོག་ལ་རྒྱལ་ཚོགས་ཀྱི་ངོས་ནས་ད་བར་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་བཏང་བའི་ནག་ཉེས་ཁག་ངོས་ལེན་བྱེད་འཇུག་དགོས་ཞེས་ཞུ་སྙན་ཕུལ་བ་དང་སྦྲགས་ཏེ་ཐེངས་འདིའི་སུད་སི་ནང་གི་བོད་དོན་གོམ་བགྲོད་ལས་འགུལ་དེ་འཇུག་སྒྲིལ་གནང་སོང་། སུད་སི་གནས་སྡོད་བོད་མི་བསྟན་འཛིན་ཉི་མ་ལགས་ཀྱིས་ས་གནས་ Lausanne ནས་ཇི་ནི་ཝ་བར་ཚེ་རིང་དབང་འདུས་ལགས་དང་ལྷན་དུ་བོད་དོན་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་འདུག ཐེངས་འདིའི་བོད་དོན་གོམ་བགྲོད་འདིའི་ཐོག་ཚེ་རིང་དབང་འདུས་ལགས་ཀྱིས་སུད་སི་གྲོང་ཁྱེར་ Winterthur ནས་དབུ་འཛུགས་ཀྱིས་ Zurich དེ་བཞིན་ Luzern རྒྱལ་ས་ Bern དེ་བཞིན་གྲོང་ཁྱེར་ Fribourg དང་ Lausanne ཇི་ནི་ཝ་བཅས་གྲོང་ཁྱེར་ཆེ་ཁག་བདུན་དང་ཁྱོན་སྤྱི་ལི་ ༣༠༠ ལྷག་གོམ་བགྲོད་གནང་ཡོད་པ་དང་ཕྱི་ཚེས་ ༥ ཉིན་ཁོང་ཇི་ནི་ཝར་འབྱོར་སྐབས་སུད་སི་དོན་ཁང་དང་ཇི་ནི་ཝའི་བོད་རིགས་ཚོགས་པའི་འཐུས་མི་དང་རེ་ཀོན་ཚོགས་ཆུང་། སུད་སི་གནས་བོད་ཀྱི་བེུད་ཚོགས་པའི་འཐུས་མི། བོད་དོན་རྒྱབ་སྐྱོར་བ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད། གོམ་བགྲོད་ལས་འགུལ་བ་དབང་འདུས་ཚེ་རིང་ལགས་ཀྱིས་ད་ལྟའི་དུས་སྐབས་འདིར་བོད་མི་རྣམས་བོད་དོན་འཐབ་རྩོད་ཐོག་ཤུགས་སྣོན་འཕར་མ་གནང་རྒྱུའི་དུས་ལ་བབ་ཡོད་པ་དང། ཁོང་རང་ཉིད་ལྟ་བུར་ཆ་མཚོན་བོད་དོན་འཐབ་རྩོད་ཆེད་ཤི་དགོས་བྱུང་ཡང་བློ་འགྱོད་རྩ་བ་ནས་མེད་ཅེས་གསུང་གི་འདུགཚེ་རིང་དབང་དུས་ལགས་ཀྱི་ཐེངས་འདིའི་གོམ་བགྲོད་ལས་འགུལ་ལ་ཐོག་མཐའ་བར་གསུམ་ལ་རྒྱབ་སྐྱོར་གནང་མཁན་རང་ལོ་ ༡༦ སོན་པ་ཁོང་གིས་བུ་རྒན་པ་མཐུ་སྟོབས་ལགས་ཀྱིས་པཱ་ལགས་ནས་ཁེར་རྐྱང་གིས་བོད་དོན་ལས་འགུལ་འདི་ལྟ་བུ་སྤེལ་བར་དགའ་སྤོབས་ཚད་མེད་བྱུང་ཞེས་གསུངས་སོང་།གཞི་རྩའི་སུད་སིར་གནས་སྡོད་བོད་དོན་ཞི་བའི་གོམ་བགྲོད་ལས་འགུལ་སྤེལ་མཁན་བོད་མི་ཚེ་རིང་དབང་འདུས་ལགས་ཆ་མཚོན་ན་ཐེངས་འདིའི་ཞི་བའི་གོམ་བགྲོད་ཀྱི་ལས་འགུལ་སྤེལ་བ་ཙམ་མ་ཟད་དེ་སྔོན་ཁོང་ནས་སུད་སི་གྲོང་ཁྱེར་ཛུ་རིག་ནས་འཇར་མི་ནི་གྲོང་ཁྱེར་ Frankfurt བར་བོད་རང་དབང་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བ་དང་། དེ་བཞིན་སུད་སི་རྒྱལ་ས་ bern ནས་ཇི་ནི་ཝ་བར་གྱི་བོད་དོན་གོམ་བགྲོད་ལས་འགུལ་བཅས་ཀྱི་ནང་མཉམ་ཞུགས་གནང་མྱོང་ཡོད་པ་ཞིག་ཡིན་པ་རེད།

པི་ཅིང་གནམ་སྡེ་སྒོ་མའི་ཐང་ཆེན་གྱི་དྲུག་བཞིའི་དོན་རྐྱེན་བྱུང་ནས་ལོ་ངོ་༣༡ འཁོར་བའི་དུས་ཚིགས་དང་བསྟུན། ཁ་སང་ཡོ་རོབ་རྒྱལ་ཁབ་ཨི་ཊ་ལི་རྒྱལ་ས་རོམ་ནང་ཡུལ་དེའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ། བོད་མི་དངཡུ་གུར་བ། དེ་བཞིན་ཧོང་ཀོང་ཧྥ་ལུང་གོང་བཅས་ཀྱི་འཐུས་ཚབ་འདུ་འཛོམས་ཐོག་རྒྱ་ནག་གི་མི་སེར་སྤེལ་གྱི་བྱ་སྤྱོད་ལ་་ངོ་རྒོལ་བྱས་འདུག ཐེངས་འདིའི་ངོ་རྒོལ་ལས་འགུལ་འདི་ནི།  ཉེ་ཆར་ཨི་ཊ་ལིའི་ནང་དུ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉམ་རིམ་གྱི་གནོད་འཚེ་ཚབས་ཆེན་ཕོགས་པའི་རྗེས་སུ་མང་ཚོགས་འདུ་འཛོམས་ཀྱིས་རྒྱ་ནག་གཞུང་ལ་ངོ་རྒོལ་ལས་འགུལ་དང་པོ་ཆགས་ཀྱི་ཡོད་པ་དང། ལས་འགུལ་དེ་ཡང་གཙོ་བོ། པི་ཅིང་གནམ་སྡེ་སྒོ་མའི་ཐང་ཆེན་གྱི་དྲུག་བཞིའི་དོན་རྐྱེན་དུས་ཚིགས་སྲུང་བརྩི་དང་འབྲེལ། ཉེ་བའི་ཆར་རྒྱ་ནག་ནས་ཐོག་མར་ཁྱབ་གདལ་བྱུང་བའི་ཏོག་དབྱིབས་གཉན་རིམ་རྐྱེན་པས་ཨི་ཊ་ལི་གཙོས་པའི་འཛམ་གླིང་ནང་མང་ཚོགས་སྟོང་ཕྲག་མང་པོའི་ཚེ་སྲོག་ཤོར་བའི་གནད་དོན་དང། རྒྱ་གཞུང་གིས་དབང་ཆ་གཅིག་བསྡུས་རིང་ལུགས་འོག་བོད་དང་ཤར་ཏུ་ཀི་སེ་ཐན་དང། དེ་བཞིན་ཧོང་ཀོང་ནང་རྒྱ་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐོང་རྡོག་རོལ་གཏོང་བཞིན་པའི་བྱ་སྤྱོད་ལ་སྐྱོན་བརྗོད །  ལྷག་པར་དུ་ཨི་ཊ་ལི་གཞུང་ལ། ཨི་ཊ་དང་རྒྱ་ནག་དབར་གྱི་བརྒྱུད་གཅིག་དང་ལམ་གཅིག་གི་གྲོས་མཐུན་མཚོན་པའི་རྒྱལ་ཁབ་ཕྱོགས་གཉིས་དབར་གྱི་ཚོང་གི་འབྲེལ་ལམ་བརྒྱུད། མ་འོངས་པར་ཨི་ཊི་ལི་རྒྱལ་ཁབ་དེ་བཞིན་རྒྱ་ནག་མི་སེར་སྤེལ་ཡུལ་གྱི་གཡོ་ཇུས་འོག་མ་ཚུད་པ་བྱ་དགོས་པའི་རེ་འདུན་བཏོན་འདུག དེའི་སྐོར་ཨི་ཊ་ལའི་བོད་རིགས་ཚོགས་པས་ཚོགས་གཙོ་རྣམ་རྒྱལ་བཟོད་པ་ལགས་ཀྱིས་འགྲེལ་བརྗོད་གནང་གསལ། ལས་འགུལ་དེ་བཞིན་ཨི་ཊ་ལི་བོད་རིགས་ཚོགས་པ་དང་ཨི་ཊ་ལི་ས་གནས་བོད་ཀྱི་བུད་མེད་ཚོགས་པ། དེ་བཞིན་ཨི་ཊ་ལི་དང་བོད་མཛའ་འབྲེལ་ཚོགས་པ་གསུམ་གྱི་སྣེ་ཁྲིད་འོག  ཧོང་དང་ཡུ་གུར། ཧྥ་ལུང་གོང་སོགས་ཚོགས་པ་ཉེར་ལྔའི་རྒྱབ་སྐྱོར་འོག་སྤེལ་བ་ཞིག་ཆགས་ཀྱི་འདུག ཁ་སང་ལས་འགུལ་དེའི་ཐོག སྐབས་དེར་ཨི་ཊ་ལིའི་གྲོས་ཚོགས་འཐུས་མི་Matteo Bianchi ལགས་དང། དེ་བཞིན་ཨི་ཊ་ལིའི་ཆབ་སྲིད་ཚོགས་པའི་སྐུ་ཚབ་དང། ས་གནས་བོད་མིའི་གཞུང་འབྲེལ་མིན་པའི་་ཚོགས་པ་དང་བོད་དོན་རྒྱབ་སྐྱོར་ཚོགས་པའི་སྐུ་ཚབ་སོགས་ནས། རྒྱ་ནག་གཞུང་གིས་བོད་གཙོས་པའི་གྲངས་ཉུང་མི་རིགས་ཀྱི་ཐོག་སྤེལ་བཞིན་པའི་སྲིད་བྱུས་ཁག་ལ་སྐྱོན་བརྗོད་དང་། ལྷག་པར་དུ་རྒྱ་ནག་གཞུང་གིས་ཨི་ཊ་ལིའི་གཙོས་པའི་རྒྱལ་ཁབ་མང་པོའི་ནང་དུ་ཐོག་མར་ཚོང་གྱི་འབྲེལ་ལམ་བརྒྱུད་ནས་རིམ་པའི་དཔལ་འབྱོར་སྟོབས་ཤུགས་ཀྱི་གནོན་ཤུགས་བརྒྱུད་མི་སེར་་སྤེལ་ཡུལ་གྱི་བྱ་སྤྱོད་སྤེལ་བཞིན་པ་ཐེར་འདོན་གྱིས་ངོ་རྒོལ་སྐྱོན་བརྗོད་ཀྱི་གཏམ་བཤད་ཀྱང་སྤེལ་ཡོད་འདུག རྩ་བའི་ད་ལྟའི་ཆར་ཨི་ཊ་ལའི་རྒྱལ་ཁབ་དེ་བཞིན་ཡོ་རོབ་ནང་རྒྱ་ནག་ལྷན་དུ་འབྲེལ་ལམ་དམ་ཟབ་ཡོད་པའི་རྒྱལ་ཁབ་ཅིགཆགས་ཀྱི་ཡོད་པ་མ་ཟད། རྒྱ་ནག་གི་བརྒྱུད་གཅིག་དང་ལམ་གཅིག་གྱི་གྲོས་མཐུན་ཐོག་རྒྱབ་སྐྱོར་གྱིས་མཚན་རྟགས་འཁོད་མཁན་ཡོ་རོབ་རྒྱལ་ཁབ་ཆེས་ཐོག་མ་དེ་ཡང་ཆགས་ཀྱི་ཡོད་ལ། ཉེ་ཆར་རྒྱ་ནག་ནས་ཐོག་མར་མཆེད་པའི་ཏོགས་དབྱིབས་གཉན་རིམ་དེ་བཞིན་ཡོ་རོབ་རྒྱལ་ཁབ་ཁོངས་ནས་ཐོག་མར་ཨི་ཊ་ལི་ནང་ཁྱབ་གདལ་བྱུང་ནས།  མི་གྲངས་འབུམ་གཉིས་ལྷག་གཉམ་རིམ་ཕོགས་ཡོད་པ་མ་ཟད། མི་ཁྲི་གསུམ་ལྷག་རྐྱེན་འདས་ཕྱིན་ཡོད་པ་རེད།

རྒྱལ་སྤྱིའི་བོད་དོན་ལས་འགུལ་ཁང་གི་བརྙན་འཕྲིན་ལས་རིམ་ཐོག་ཨ་རིའི་གྲོས་ཚོགས་འཐུས་མི་ Jim McGovern ལགས་ཀྱིས་རྒྱ་ནག་གཞུང་གིས་བོད་ཀྱི་ལོ་རྒྱུས་དང་བོད་མིའི་ཆོས་རིག་རྩ་མེད་གཏོང་ཐབས་བྱེད་བཞིན་པའི་སྲིད་བྱུས་དེ་ལམ་ལྷོངས་རྩ་བ་ནས་བྱུང་མེད་པ་གསུངས་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ལོ་ལྟར་ཨ་རིའི་ནང་བོད་པའི་གཞོན་སྐྱེས་རྣམས་ལ་འགོ་ཁྲིད་ཀྱི་ཟབ་སྦྱོང་ཞིག་གནང་བའི་ཐོག་ནས་བོད་དོན་ཞུ་གཏུག་གནང་ཕྱོགས་དང་ཨ་རིའི་འགོ་ཁྲིད་མི་སྣ་ངོ་སྤྲོད་གནང་རྒྱུའི་ལས་འཆར་ཞིག་གོ་སྒྲིག་གནང་སྲོལ་ཡོད་པ་དེ་ལྟར་ཡང་། འདི་ལོ་རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་འོག་གཞོན་སྐྱེས་འགོ་ཁྲིད་ཟབ་སྦྱོང་དེ་གནང་ཐུབ་མེད་སྟབས། ཟླ་བ་སྔོན་མའི་ཕྱི་ཚེས་ ༧ ནས་ Tibet Talks ཞེས་བོད་དོན་དང་འབྲེལ་བའི་དྲྭ་རྒྱའི་ཐད་གཏོང་ལས་རིམ་ཞིག་དབུ་འཛུགས་གནང་སྟེ་ཨ་རིའི་ནང་གི་འགོ་ཁྲིད་མི་སྣ་དང་ལས་འགུལ་བ། དེ་བཞིན་སྒྱུ་རྩལ་བ་དང་ཆབ་སྲིད་མཁས་པ་སོགས་གདན་ཞུ་གནང་ཐོག་དེ་དག་དང་ལྷན་དུ་བོད་རིགས་གཞོན་སྐྱེས་རྣམས་གླེང་མོལ་ཞུ་རྒྱུའི་གོ་སྐབས་སྐྲུན་བཞིན་ཡོད་པ་རེད།ཁ་སང་རྒྱལ་སྤྱིའི་བོད་དོན་ལས་འགུལ་ཁང་གི་ཐད་གཏོང་ལས་རིམ་དེའི་ཐོག་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་ཨ་རིའི་གྲོས་ཚོགས་ནང་བོད་དོན་རྒྱབ་སྐྱོར་གྱི་ཁྲིམས་འཆར་འདོན་སྤེལ་གནང་མཁན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་དང་Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim McGovern ལགས་རྣམ་གཉིས་གདན་ཞུ་གནང་བ་དང་འབྲེལ། དེ་སྔ་ལས་འགུལ་ཁང་གི་ཟབ་སྦྱོང་ནང་མཉམ་ཞུགས་གནང་མྱོང་མཁན་བོད་རིག་གཞོན་སྐྱེས་ཁག་ཅིག་དང་ལྷན་དུ་གླེང་མོལ་གྱི་ལས་རིམ་ཞིག་གཉེར་འདུགསྐབས་དེར་སྐུ་ཞབས་ Jim McGovern ལགས་ཀྱིས་དེ་སྔ་ཕྱི་ལོ་ ༢༠༡༥ ཁོང་བོད་ནང་གཞུང་འབྲེལ་སྐོར་སྐྱོད་ཕེབས་པ་དང་འབྲེལ་བའི་དྲི་བར་ལན་འདེབས་དང་འབྲེལ་ཏེ་ཁོང་རྣམས་ལྷ་སའི་ས་ཚིགས་འདྲ་མིན་དུ་གཟིགས་སྐོར་ལ་སྐྱོད་སྐབས་༸གོང་ས་མཆོག་གི་༸སྐུ་པར་གཅིག་ཀྱང་མཇལ་རྒྱུ་མེད་པ་བཅས་སྐབས་དེའི་གནས་ཚུལ་རྣམས་དྲན་གསོ་གནང་སྟེ། རྒྱ་གཞུང་གིས་བོད་ཐོག་དྲག་གནོན་དང་། བོད་ཀྱི་ལོ་རྒྱུས་ནག་གསུབ་གཏོང་ཐབས་བྱེད་བཞིན་པ་རྣམས་གསལ་པོ་མངོན་རྒྱུ་ཡོད་པ་སོགས་ཀྱིས་སྐབས་དེར་མཛེས་སྡུག་ལྡན་པའི་ས་ཚིགས་ཤིག་མཇལ་རྒྱུའི་གོ་སྐབས་ཐོབ་པར་དགའ་ཚོར་དང་མཉམ་དུ་དྲག་གནོན་གྱི་རྣམ་པ་ཡང་མངོན་རྒྱུ་ཡོད་སྟབས་ཕྱོགས་གཞན་ཞིག་ནས་ཡིད་སྐྱོའི་ཐུགས་ཚོར་བྱུང་ཡོད་སྐོར་གསུངས་འདུག སྐབས་དེར་ཁོང་རྣམས་རྒྱ་གཞུང་གིས་བཀོད་སྒྲིག་གི་རྒྱ་ལས་འདས་པའི་བོད་ཀྱི་དགོན་སྡེ་ཁག་ཅིག་ཏུ་གཟིགས་སྐོར་ཕེབས་པར་བརྟེན་བོད་པའི་དགེ་འདུན་པ་རྣམས་ཀྱིས་ཁོང་རྣམས་ལ་ཟུར་དུ་འཐེན་སྟེ་༸གོང་ས་༸སྐྱབས་མགོན་མཆོག་ལ་འཚམས་འདྲིའི་བརྡ་ལན་ཕུལ་རོགས་ཞེས་རེ་སྐུལ་ཞུས་ཡོད་པ་སོགས་ལུང་འདྲེན་དང་འབྲེལ་ཏེ། བོད་ནང་བོད་མི་རྣམས་ཀྱིས་ཉན་ཁ་ཆེན་པོར་གདོང་ལེན་གནང་སྟེ་རང་མི་རིགས་ཀྱི་ངོ་བོ་སྲུང་སྐྱོབ་གནང་བཞིན་ཡོད་པ་མངོན་རྒྱུ་ཡོད་སྐོར་གསུངས་པ་མ་ཟད་རྒྱ་གཞུང་གིས་སྔར་ནས་ད་བར་བོད་ཀྱི་ལོ་རྒྱུས་དང་བོད་མིའི་ཆོས་རིག་རྩ་མེད་གཏོང་ཐབས་བྱེད་བཞིན་པའི་སྲིད་བྱུས་དེ་ལམ་ལྷོངས་རྩ་བ་ནས་བྱུང་མེད་པ་གསུངས་འདུགདེ་བཞིན་སྐབས་དེར་སྐུ་ཞབས་ Sam Brownback ལགས་ཀྱིས་ཕྱི་ལོ་ ༢༠༡༨  ལོའི་ལོ་མཇུག་ཏུ་ཨ་རིའི་གཞུང་གི་ཁྲིམས་གཞིར་གཏན་འབེབས་བྱུང་བའི་བོད་ནང་དུ་ཕར་འགྲོ་ཚུར་འོག་གི་རང་དབང་འདྲ་མཉམ་དགོས་པའི་ཁྲིམས་གཞི་དེ་ལག་བསྟར་གནང་ཕྱོགས་དང་འབྲེལ་བའི་དྲི་བར་ལེན་འདེབས་གནང་བའི་ཁྲོད་ཁྲིམས་གཞི་དེ་ལག་བསྟར་གནང་རྒྱུ་ཡོད་པའི་ཁྲིམས་གཞི་ཡིན་པ་ལྟར་ཁོང་རྣམས་ནས་རྒྱ་ནག་ལ་དེའི་ཐོག་མུ་མཐུད་གནོན་ཤུགས་སྤྲོད་བཞིན་ཡོད་པ་མ་ཟད། གྲོས་ཚོགས་སུ་སྙན་ཐོ་འགོད་འབུལ་ཞུ་དགོས་ཀྱི་ཡོད་པ་རྣམས་ཀྱང་ངེས་པར་དུ་ཞུ་རྒྱུ་ཡིན་པ་གསུངས་འདུག དེ་བཞིན་གླེང་མོལ་གྱི་ལས་རིམ་འདིའི་ཐོག་ཨ་རིའི་འགོ་ཁྲིད་རྣམ་པ་གཉིས་ཀྱི་ངོས་ནས་ཨ་རིའི་གྲོས་ཚོགས་དང་མང་ཚོགས་ཁྲོད་བོད་དོན་ཞུ་གཏུག་གི་ལས་འགུལ་སྤེལ་རྒྱུ་དེ་ཧ་ཅང་གལ་གནད་ཆགས་ཡོད་པ་དང་། དེ་སྔ་བོད་ནང་ཕར་འགྲོ་ཚུར་གྱི་རང་དབང་འདྲ་མཉམ་དགོས་པའི་ཁྲིམས་གཞི་གཏན་འབེབས་གནང་ཐུབ་པ་བཞིན་འདི་ལོ་བོད་དོན་རྒྱབ་སྐྱོར་གྱི་ཁྲིམས་འཆར་དེ་ཡང་ཁྲིམས་སུ་བསྟར་ཐུབ་རྒྱུའི་རེ་བ་ཆེན་པོ་ཡོད་པ་ལྟར་ཞུ་གཏུག་གི་ལས་འགུལ་ལ་གྲུབ་འབྲས་འཐོན་རྒྱུ་ཡོད་སྐོར་གསུངས་པ་དང་འབྲེལ། བོད་མི་རྣམས་ནས་སེམས་ཤུགས་མ་ཆག་པར་གྲོས་ཚོགས་འཐུས་མི་དང་མང་ཚོགས་ལ་བོད་དོན་གོ་རྟོགས་སྤེལ་ནས་བོད་ཀྱི་གནད་དོན་ཐོག་དོན་ཕན་ལྡན་པའི་སྲིད་བྱུས་གཏན་འབེབས་གནང་དགོས་གལ་ཡིན་པར་མ་ཟད་དེ་ལྟར་ཉེར་བར་དགོས་གནད་ཡིན་པར་ཞལ་གཅིག་གྲག་གསུངས་འདུགཁ་སང་གི་ལས་རིམ་དེ་རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་མཐུད་འགན་འཛིན་བསྟན་ཆོས་རྒྱ་མཚོ་ལགས་དང་འགན་འཛིན་སྐུ་ཞབས་ Matteo Meccaci ལགས་རྣམ་གཉིས་ཀྱིས་གཙོ་སྐྱོང་གནང་ཡོད་པ་རེད། གསུང་བཤད་གནང་མཁན་ཁོངས་སུ་ཨ་རིའི་འགོ་ཁྲིད་མི་སྣ་གཉིས་དང་ལྷན་དུ་བོད་རིགས་གཞོན་སྐྱེས་འགོ་ཁྲིད་ ༤ གདན་ཞུ་གནང་བ་མ་ཟད་ཐད་གཏོང་ལས་རིམ་ཁྲོད་མང་ཚོགས་ནས་བཀའ་འདྲི་ཞུས་ཁག་ལ་ལན་འདེབས་ཀྱང་གནང་ཡོད་པ་རེད།

དེ་རིང་སྔ་དྲོ་བཞུགས་སྒར་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་གོ་སྒྲིག་གནང་སྟེ་དེ་སྔ་ཕྱི་ལོ་ ༡༩༨༩ ལོའི་ཟླ་ ༦ ཚེས་ ༤ ཉིན་རྒྱ་ནག་གིས་རྒྱལ་ས་པེ་ཅིན་དུ་སློབ་ཕྲུག་སྟོང་ཕྲག་མང་པོ་དམར་གསོད་བཏང་བའི་དྲུག་བཞིའི་དོན་རྐྱེན་གྱི་ཉིན་མོ་སྲུང་བརྩི་ཞུས་པ་དང་སྦྲགས། ད་ལྟའི་ཆར་ཡུལ་ལུང་གང་སར་རྒྱ་ནག་གི་འདི་ལོའི་ཏོག་དབྱིབས་ནད་ཡམས་ཁྱབ་བརྡལ་གྱི་རྐྱེན་གྱིས་རྒྱལ་སྤྱིའི་སྒང་ནས་རྒྱ་ནག་ལ་ཞེ་འཁོན་འཛིན་མཁན་གྱི་མི་མང་སྟོང་ཕྲག་མང་པོ་ཡོད་པའི་དུས་སྐབས་འདིར་བོད་པའི་ལས་འགུལ་བ་དང་འཐབ་རྩོད་བ་རྣམས་ཀྱིས་ཀྱང་གོ་སྐབས་དམ་འཛིན་གྱིས་རྒྱ་ནག་ལ་ཁ་གཏད་གཅོག་རྒྱུའི་ལས་འགུལ་ཤུགས་ཆེར་སྤེལ་དགོས་པའི་སྐུལ་མ་གནང་སོང་། བོད་རང་བཙན་སློབ་ཕྲུག་ཚོགས་པའི་རྒྱུན་ལས་རྣམས་ཀྱིས་དྷ་སའི་མེག་གྷན་ཁྲོམ་གཞུང་དུ་གནམ་སྡེ་སྒོར་མོ་ཆེའི་དོན་རྐྱེན་དྲན་དགོས། བོད་དོན་དྲན་དགོས་ཞེས་པའི་སྦྱར་ཡིག་བསྣམས་ཏེ་རྒྱ་ནག་མི་མང་གིས་མང་གཙོའོ་དགོས་འདུན་བཏོན་ནས་སྲིད་གཞུང་ལ་རྒོལ་རྡུང་བཏང་བའི་ལོ་རྒྱུས་ཀྱི་དུས་བབ་དེར་དྲན་གསོ་ཞུས་པ་དང་སྦྲགས། རྒྱ་གར་ནང་གི་བོད་རང་དབང་སློབ་ཕྲུག་ཚོགས་པའི་ངེས་སྟོན་པ་རིག་འཛིན་ཆོས་སྒྲོན་ལགས་ཀྱིས་ཐེངས་འདིའི་ལས་འགུལ་གྱི་ངོ་བོ་གཙོ་བོ་ནི་གནམ་སྡེ་སྒོ་མོ་ཆེ་ཡི་དོན་རྐྱེན་ཁྲོད་ནས་ཚེ་སྲོག་ཤོར་བའི་རྒྱ་རིགས་སློབ་མ་རྣམས་ལ་གདུང་སེམས་མཉམ་བསྐྱེད་དང་། དེ་བཞིན་རྒྱ་ནག་གི་མང་གཙོ་དོན་གཉེར་བ་རྣམས་ལ་རྒྱབ་སྐྱོར་མཚོན་ཕྱིར་དུས་དྲན་སྲུང་བརྩི་ཞུས་པར་འགྲེལ་བརྗོད་གནང་སོང་། དེ་བཞིན་ཁོང་གིས་ད་ལྟའི་ཆར་རྒྱལ་རྒྱ་ནག་གི་ཏོག་དབྱིབས་ནད་ཡམས་ཀྱིས་རྒྱལ་སྤྱིའི་མི་མང་ལ་དཀའ་ངལ་འཕྲད་བཞིན་པ་དང་། དེང་སྐབས་རྒྱ་དཀར་ནག་གི་རྙོག་གླེང་ཆེ་རུ་འགྲོ་བཞིན་པའི་དུས་སྐབས་འདིར་བོད་མི་རྣམས་ཀྱིས་གནད་དོན་འདི་དག་གི་གོ་སྐབས་དམ་འཛིན་གྱིས་བོད་དོན་དང་འབྲེལ་བ་མཐུད་པའི་ཐོག་ནས་རྒྱ་ནག་གི་མདུན་དུ་ལངས་དགོས་རྒྱུ་གལ་ཆེན་པོ་ཡིན་པར་ངོ་སྤྲོད་གནང་སོང་། འདི་ལོའི་དྲུག་བཞིའི་དོན་རྐྱེནད་དང་བསྟུན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་ཀྱིས་ཁ་ཉིན་ཚེས་ ༢ ཉིན་ཕྱི་སྡོད་ཀྱི་རྒྱ་རིགས་མང་གཙོ་དོན་གཉེར་བ་དང་གནམ་སྡེ་སྒོ་མོ་ཆེ་ཡི་དོན་རྐྱེན་ཁྲོད་ནས་བྲོས་བྱོལ་དུ་ཕྱིན་པའི་རྒྱ་རིགས་ཁག་ཅིག་ལ་མཇལ་འཕྲད་གནང་བ་དང་། དེ་བཞིན་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ Morgan Ortagus ལགས་ཀྱིས་རྒྱ་ནག་གིས་སྐབས་དེའི་དོན་རྐྱེན་ཁྲོད་དུ་ཤི་རྨས་ཐེབས་པ་དང་བོར་བརླག་བྱུང་བའི་གྲངས་ཐོ་གསལ་འདོན་གནང་དགོས་པའི་འབོད་སྐུལ་གནང་འདུག ཐེ་ཝན་སྲིད་གཞུང་གིས་ཀྱང་ཁ་སང་ཐེངས་འདིའི་དུས་དྲན་དང་འབྲེལ་བའི་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་གིས་གནམ་སྡེ་སྒོ་མོ་ཆེ་ཡི་དོན་རྐྱེན་ཁྲོད་སློབ་ཕྲུག་སྟོང་ཕྲག་མང་པོ་དམར་བསད་བཏང་བར་དགོངས་སེལ་ཞུ་དགོས་པར་འབོད་སྐུལ་གནང་བ་དང་སྦྲགས། རྒྱ་ནག་སྲིད་གཞུང་གིས་དབང་འཛིན་མི་སྣའི་ནོར་འཁྲུལ་ལ་ངོས་ལེན་བྱས་པའི་ཐོག་ནས་མི་མང་ལ་དབང་ཆ་སྤྲོད་དགོས་བར་ཡོངས་གྲགས་གནང་འདུག དེ་བཞིན་ཁ་སང་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་ཡོངས་ཁྱབ་ཀྱི་བསྒྲགས་གཏམ་ཞིག་སྤེལ་ནས་དྲུག་བཞིའི་དོན་རྐྱེན་གྱི་ཉིན་མོ་འདིར་གྱ་དགུ་ལོའི་ཞི་བའི་སྒེར་ལངས་ལ་ཞུགས་མཁན་གྱི་སློབ་མ་རྣམས་དང་ངལ་རྩོལ་བ་རྣམས་ཀྱི་སྙིང་སྟོབས་དྲན་ཞུ་དགོས་པའི་ཉིན་མོ་ཞིག་ཡིན་སྟབས་ཨ་རིའི་སྲིད་གཞུང་གི་ངོས་ནས་སྐབས་དེའི་ཟིང་འཁྲུག་ཁྲོད་ནས་ཚེ་སྲོག་ཤོར་བའི་གདོང་མཆོང་གི་ལས་འགུལ་བ་རྣམས་ཀྱི་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཡོད་པར་ཡོངས་གྲགས་ཀྱིས་དེ་རིང་གི་དུས་དྲན་གྱི་ཉིན་མོ་དང་བསྟུན་མང་ཚོགས་ཁྲོད་དེ་འབྲེལ་གྱི་བགྲོ་གླེང་དང་སློབ་སྦྱོང་གནང་འཇུག་དགོས་པའི་སྐུལ་སློང་གནང་འདུག དེ་དང་ཕྱོགས་མཚུངས་ཁ་སང་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་ཡོངས་ཁྱབ་ཀྱི་བསྒྲགས་གཏམ་ཞིག་སྤེལ་ཏེ་དྲུག་བཞིའི་དོན་རྐྱེན་གྱི་ཉིན་མོ་འདིར་གྱ་དགུ་ལོའི་ཞི་བའི་སྒེར་ལངས་ལ་ཞུགས་མཁན་གྱི་སློབ་མ་རྣམས་དང་ངལ་རྩོལ་བ་རྣམས་ཀྱི་སྙིང་སྟོབས་དྲན་དགོས་པའི་ཉིན་མོ་ཞིག་ཡིན་པར་བསྒྲགས་འདུག དེ་བཞིན་ཨ་རིའི་སྲིད་གཞུང་གི་ངོས་ནས་སྐབས་དེའི་ཟིང་འཁྲུག་གི་ཁྲོད་ནས་ཚེ་སྲོག་ཤོར་ཟིན་པའི་གདོང་མཆོང་གི་ལས་འགུལ་བ་རྣམས་ཀྱི་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཡོད་པར་ཡོངས་གྲགས་གནང་སྟེ་རྒྱ་ནག་སྲིད་གཞུང་གིས་སྐབས་དེའི་དོན་རྐྱེན་གྱི་ཁྲོད་དུ་ཚེ་སྲོག་ཤོར་བ་དང་བོར་བརླག་སོང་བའི་མི་མང་གི་གྲངས་ཐོ་ཕྱིར་འདོན་དགོས་པ་མ་ཟད། དེ་རིང་དུས་དྲན་གྱི་ཉིན་མོ་དང་བསྟུན་ནས་མང་ཚོགས་ཁྲོད་དེ་འབྲེལ་གྱི་བགྲོ་གླེང་དང་སློབ་སྦྱོང་གནང་འཇུག་དགོས་པའི་སྐུལ་སློང་གནང་འདུགདེ་བཞིན་རྒྱ་ནག་གི་ནང་དུ་དམར་གསོད་ཀྱི་དོན་རྐྱེན་དེ་བྱུང་ནས་མི་ལོ་ ༣༡ ཕྱིན་ཡོད་ཀྱང་རྒྱ་ནག་སྲིད་གཞུང་གིས་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྒོལ་རྡུང་ཚ་ནན་གཏོང་གི་ཡོད་པ་མངོན་གསལ་གནང་བ་དང་ཆབས་ཅིག་ཏུ་རྒྱ་ནག་གིས་འཕྲལ་དུ་བཙོན་འཇུག་ཁྲིམས་ཐག་བཅད་ཟིན་པའི་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་ནས་གློད་བཀྲོལ་གཏོང་དགོས་པ་སོགས་ཀྱི་དགོས་འདུན་བཏོན་པ་དང་། རྒྱ་ནག་གིས་རྒྱུན་དུ་བོད་དང་ཤིན་ཅང་སོགས་ཀྱི་ཆོས་རིག་ལ་གཏོར་བཅོམ་གཏོང་གི་ཡོད་པ་མ་ཟད། དེང་གི་ཆར་ཧོང་ཀོང་གི་རང་སྐྱོང་གི་གནས་བབ་ལ་བཀག་སྡོམ་བྱེད་བཞིན་པ་སོགས་ལ་གདུང་སེམས་མཉམ་བསྐྱེད་ཡོད་ལུགས་གསལ་འདོན་གྱིས་རྒྱ་ནག་ནང་གི་ཁྲིམས་རྩོད་པ་རྣམས་ཀྱིས་དྲང་བདེན་འཚོལ་ཞིབ་སོགས་མཚོན་པའི་ཆོས་ལུགས་རང་དབང་དང་སྤྱི་མང་གི་མངོན་འདོད་སོགས་ལ་རྒྱབ་སྐྱོར་ཡོད་པར་ཕྱིར་བསྒྲགས་གནང་སྟེ་དྲུག་བཞིའི་དོན་རྐྱེན་ཁྲོད་ནས་དམར་གསོད་བཏང་བའི་ཡ་ང་བའི་གནས་བབ་དེ་ལོ་རྒྱུས་ཀྱི་ནང་དུ་འཁོད་ཟིན་པས་སུས་ཀྱང་གསུབ་ཐབས་མེད་པར་བསྒྲགས་འདུག