༸གོང་ས་མཆོག

༸པཎ་ཆེན་སྐུ་ཕྲེང་བཅུ་པའི་ལོ་འཁོར་མོའི་བཀྲིན་རྗེས་དྲན་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་ལྟར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༡༢ ཚེས་ ༢༨ ཉིན་བརྙན་ཐུང་བརྒྱུད་གསུང་འཕྲིན་ཞིག་མཛད་པའི་ནང། ༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་པ་དེ་ནི་བོད་མིའི་བསོད་ནམས་ཀྱིས་མ་འཆུན་པ་བྱུང་ཡོད་པར་བཀའ་བསྩལ་འདུག སྐར་མ་ལྔ་ཡོད་པའི་བརྙན་ཐུང་དེའི་ནང་། ༸གོང་ས་མཆོག་གིས་༸པཎ་ཆེན་རིན་པོ་མཆོག་གིས་བོད་ནང་དུས་ཚོད་ཧ་ཅང་དཀའ་ཚེགས་ཆེ་བའི་སྐབས་སུ་ཐུགས་ཁུར་ཆེན་པོའི་ཐོག་ནས་སྐུ་ངལ་འཛེམས་མེད་དང་། ལྷག་བསམ་གཡོ་བ་མེད་པ། དེ་བཞིན་ཐུགས་གཞི་དོར་བ་མེད་པར་བོད་བསྟན་སྲིད་སྤྱིའི་བདེ་དོན་སླད་ཐུགས་ཁུར་ཆེ་བཞེས་མཛད་ཡོད་སྐོར་དྲན་སྐུལ་མཛད་པ་དང་ཆབས་ཅིག ༸གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་མི་ཚོ་འདིར་རྒྱ་གར་དུ་གནས་པ་དང་། ༸པཎ་ཆེན་རིན་པོ་ཆེ་མཆོག་བོད་ནང་ལ་དུས་ཚོད་གང་ཙམ་༸སྐུ་བཞུགས་གནང་ཐུབ་ཡོད་ཚེ་བོད་ཀྱི་བདེན་དོན་ཐོག་ཕན་ཐོགས་ངེས་ཅན་ཞིག་ཡོང་ཐུབ་ཀྱང་། བོད་མི་སྤྱིའི་བསོད་ནམས་ཀྱི་རྒྱབ་རྟེན་མ་འདང་བའི་དབང་གིས་དགོངས་པ་རྫོགས་ཡོད་སྐོར་ཐུགས་ཕམ་དང་བཅས་བཀའ་བསྩལ་འདུག ༸གོང་ས་མཆོག་གིས་གཞན་ཡང་༸པཎ་ཆེན་སྐུ་ཐོག་གོང་མའི་ཡང་སྲིད་མཆོག་སྤྲུལ་དེ་ལ་༸གང་ཉིད་མཆོག་གིས་ངོས་འཛིན་མཛད་པའི་༸པཎ་ཆེན་དང་རྒྱ་གཞུང་གིས་ངོས་འཛིན་བྱས་པའི་༸པཎ་ཆེན་མཆོག་སྤྲུལ་གཉིས་བྱུང་ཡོད་བའི་སྐོར་བཀའ་བསྩལ་བ་དང་སྦྲགས། དེ་སྔ་བོད་ནང་ལོ་རབས་བརྒྱ་ཕྲག་གཅིག་གི་གོང་ལ་ཆེས་སྙན་གྲགས་ཡོད་པའི་འཇམ་མགོན་མཁྱེན་བརྩེ་དབང་པོ་མཆོག་གི་ཡང་སྲིད་ལྔ་འཁྲུངས་མྱོང་ཡོད་པ་བཞིན་སངས་རྒྱས་ཀྱི་བསྟན་པ་སྤྱི་དང་བྱེ་བྲག་གང་ལ་བཤད་སྒྲུབ་གཉིས་ཀྱི་ཐོག་ནས་ཞབས་འདེགས་བསྒྲུབ་ཐུབ་མཁན་གྱི་སྐྱེས་བུ་དམ་པ་གང་འདྲ་ཞིག་འཁྲུངས་ན་འགྲིག་སྐོར་ལམ་སྟོན་མཛད་འདུག ༸གོང་ས་མཆོག་གིས་བརྙན་ཐུང་དེའི་ནང་ད་དུང་༸པཎ་ཆེན་སྐུ་ཕྲེང་བཅུ་པ་མཆོག་དང་༸གང་ཉིད་མཆོག་གི་དབར་ཐུན་མིན་གྱི་འབྲེལ་བ་ཞིག་ཡོད་པ་མ་ཟད། བོད་ཀྱི་ལོ་རྒྱུས་ཐོག་ནས་༸རྒྱལ་བ་ཡབ་སྲས་རྣམ་གཉིས་ཀྱི་སྐུ་ཕྲེང་རིམ་ཁག་བར་འབྲེལ་བ་དམིགས་བསལ་བ་ཡོད་སྐོར་བཀའ་བསྩལ་བ་དང་ཆབས་ཅིག ༸པཎ་ཆེན་སྐུ་ཕྲེང་རིམ་བྱོན་གྱི་སྐུ་ཚེའི་མཛད་འཕྲིན་རྣམས་ངོ་སྤྲོད་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འདི་ག་གནས་མཆོག་རྡོ་རྗེ་གདན་དུ་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་དབུ་འཛུགས་བཀྲིན་བསྐྱངས་ཡོད་པ་རེད། དེ་རིང་ཟླ་ ༡༢ ཚེས་ ༢༨ ཉིན་སྔ་དྲོ་ཆོས་འབྲེལ་དངོས་གཞི་དབུ་འཛུགས་མ་གནང་གོང་ཐོག་མར་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་ཞི་བར་གཤེགས་ནས་ལོ་ ༣༠ འཁོར་བའི་རྗེ་དྲན་གྱི་ཉིན་མོ་དང་བསྟུན་དུས་འཁོར་ཐང་ཆེན་གྱི་ཚོགས་རར་མགོན་པོ་༸གང་ཉིད་དབུ་བཞུགས་ཀྱི་ཐོག་རིས་མེད་བླ་སྤྲུལ་མཁན་པོ་དང་དགེ་བཤེས། དད་ལྡན་གྲྭ་བཙུན་སེར་སྐྱ་ཡོངས་ནས་དགོངས་རྫོགས་མཆོད་འབུལ་གནང་འདུགདེ་ནས་༸གོང་ས་༸སྐྱབས་མགོན་ཆེན་པོ་མཆོག་ནས་ཉེ་བརྒྱུད་འཇམ་དབྱངས་ཆོས་སྐོར་གྱི་ཆོས་འབྲེལ་དངོས་གཞི་བཀྲིན་བསྐྱངས་ཡོད་པ་དང་། ཉིན་དང་པོའི་ཆོས་འབྲེལ་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་འཇམ་དབྱངས་ཀྱི་རྗེས་གནང་བཅུའི་ཁོངས་ནས་འཇམ་དབྱངས་གསང་སྒྲུབ་བར་གྱི་རྗེས་གནང་བཀྲིན་བསྩལ་ཡོད་པ་མ་ཟད། མགོན་པོ་༸གང་ཉིད་མཆོག་ནས་ད་དུང་དེ་རིང་ཆོས་འབྲེལ་དུ་ཕེབས་པའི་དད་ལྡན་རྣམས་ནས་ཉིན་རེར་དམིགས་བརྩེ་མ་དང་ཨོཾ་ཨ་ར་པ་ཙ་ན་དྷཱིཿ་ཕྲེང་སྐོར་རེ་ངེས་པར་དུ་གསོག་བསྒྲུབ་གནང་དགོས་པའི་ལམ་སྟོན་ཡང་བཀྲིན་བསྩལ་ཡོད་པ་རེད།

དེ་རིང་ཟླ་ ༡༢ ཚེས་ ༢༦ རེས་གཟའ་ལྷག་པའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་གཟའ་དང་སྟབས་བསྟུན་ཏཱ་ལའི་བླ་མའི་དགེ་རྩ་ནས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་༸ཞབས་པད་ཡུན་རིང་དུ་བརྟན་པ་དང་བོད་ཀྱི་བདེན་མཐའ་མྱུར་དུ་གསལ་རྒྱུ་སོགས་ལ་དམིགས་ཏེ་གནས་མཆོག་རྡོ་རྗེ་གདན་གྱི་དུས་འཁོར་ཐང་ཆེན་གྱི་གསུང་ཆོས་ར་བའི་རྒྱབ་ངོས་སུ་ས་གནས་འདིར་ཡོད་པའི་ངན་སློང་ཉམ་ཐག་ཆིག་སྟོང་ལྷག་ལ་ཞལ་ལག་དང་མ་དངུལ་ཧིན་སྒོར་ ༢༠༠ ནས་ ༥༠༠ བར་ཟས་ནོར་གཉིས་ཀྱི་སྦྱིན་པ་གནང་ཡོད་པ་རེད། གཞི་རྩའི་༸དཔལ་ལྡན་དགའ་ལྡན་ཕོ་བྲང་གིས་དེ་སྔ་ནས་མགོན་པོ་༸གང་ཉིད་མཆོག་རྒྱ་གར་གྱི་གནས་མཆོག་རྡོ་རྗེ་གདན་དུ་བཞུགས་ཞག་མཛད་པའི་རིང་རེས་གཟའ་ལྷག་པ་འཆར་ཅན་རྒྱ་གར་གྱི་ཡུལ་མི་གཙོ་གྱུར་ངན་སློང་རྣམས་ལ་ཟས་ནོར་གྱི་སྦྱིན་པ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་འདི་ག་གནས་མཆོག་རྡོ་རྗེ་གདན་དུ་ཕྱི་ནང་གི་དད་ལྡན་ཆོས་ཞུ་བ་མི་གྲངས་བཞི་ཁྲི་ཙམ་འདུ་འཛོམས་བྱུང་ཡོད་པ་དེ་དག་ལ་འཇིགས་བྱེད་དཔའ་གཅིག་གི་བཀའ་དབང་བཀྲིན་བསྩལ་ཡོད་པ་རེད།དེ་རིང་ཟླ་ ༡༢ ཚེས་ ༢༦ ཉིན་སྔ་དྲོ་ཚོུད་ ༧༌༣༠ སྟེང་མགོན་པོ་༸གང་ཉིད་མཆོག་གནས་མཆོག་རྡོ་རྗེ་གདན་གྱི་བོད་དགོན་དགའ་ལྡན་འཕེལ་རྒྱས་གླིང་རྣམ་རྒྱལ་གྲྭ་ཚང་གི་གཟིམ་ཆུང་ནས་དུས་འཁོར་དབང་ཆེན་གྱི་ཆོས་རར་ཆིབས་བསྒྱུར་དང་འབྲེལ་ཐོག་མར་བཀའ་དབང་སྒྲུབ་བཞག་མཛད་ཡོད་པ་དང་། ཚོུད་ ༩ ཙམ་ལ་སྒྲུབ་བཞག་ལེགས་པར་གྲུབ་བསྟུན་ཐའི་དང་དབྱིན་ཇིའི་ཆོས་དད་པ་ཁག་གཅིག་ནས་ཤེས་རབ་སྙིང་པོ་གསུང་འདོན་གནང་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དབང་གི་སྟ་གོན་མ་གནང་གོང་དུ་ནང་པ་སངས་རྒྱས་པའི་ཆོས་འདི་ཟབ་མོ་རྟེན་འབྱུང་གི་ལྟ་བ་གཞིར་བཞག་པའི་ད་ལྟའི་དུས་རབས་དང་མཐུན་པ་ཞིག་ཡིན་པ་མ་ཟད། གཞི་མ་དེའི་ཐོག་ནས་རྒྱུན་དུ་ང་ཚོས་སྨོན་ལམ་ཚུན་ཆད་ནས་འགྲོ་བ་རིགས་དྲུག་གི་སེམས་ཅན་ཐམས་ཅད་རང་ཉིད་ཀྱི་མ་ལྟར་གཉེན་དུ་བལྟས་ནས་རྒྱུན་དུ་སེམས་བཟང་པོ་བྱེད་དགོས་པར་ལམ་སྟོན་བསྩལ་ཡོད། ༸གོང་ས་མཆོག་གིས་གསང་སྔགས་རྡོ་རྗེ་ཐེག་པའི་ཆོས་ནི་བསོད་ནམས་ཀྱི་རྒྱབ་རྟེན་ཡོད་པའི་གང་ཟག་དགོས་མཚན་དང་མདོ་ཕྱོགས་ཀྱི་ཆོས་དེ་དག་གང་ཟག་སྤྱི་མཚན་ཡིན་སྐོར་སོགས་བཀའ་བསྩལ་ཏེ་གསང་སྔགས་ཀྱི་གོ་དོན་སྙིང་པོ་ཡང་ངོ་སྤྲོད་མཛད་ཡོད།གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ད་རེས་གནས་མཆོག་རྡོ་རྗེ་གདན་གྱི་ཆོས་འབྲེལ་ཁག་ཁ་ཉིན་རེས་གཟའ་ཟླ་བ་ནས་དབུ་འཛུགས་མཛད་ཡོད་པ་དང་། མགོན་པོ་༸གང་ཉིད་མཆོག་ནས་ལག་ལེན་སོ་བདུན་མའི་བཀའ་ཁྲིད་དང་གདན་ས་བཀྲིས་ལྷུན་པོ་ནས་གསོལ་འདེབས་ཞུས་པའི་ཚད་མ་རྣམ་འགྲེལ་བཅས་ཀྱི་འཕྲོ་སྐྱོང་བཀྲིན་བསྩལ་བ་དང་འབྲེལ། དེ་རིང་འཇིགས་བྱེད་དཔའ་གཅིག་བཅས་ཀྱི་བཀའ་དབང་ལེགས་གྲུབ་མཛད་ཡོད་པ་རེད།གནངས་ཉིན་སླར་༸གོང་ས་མཆོག་ནས་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་བསྩལ་རྒྱུ་ཡིན་པ་ལྟར། ཆོས་སྐོར་དེ་ལ་དམིགས་བརྩེ་མའི་བསྙེན་པའི་དམ་བཅའ་དགོས་པས་དམ་བཅའ་མི་ནུས་པ་དང་། ཐུན་མོང་ལམ་སྦྱོང་ལ་གོམས་འདྲིས་མེད་རིགས་རྣམས་ཆོས་གྲལ་དུ་མི་ཕེབས་པའི་ཆོས་བརྡ་བསྐྱངས་ཡོད་པ་རེད།

ཆོས་ཞུ་བ་ཁྲི་ཚོ་ལྷག་ལ་དགེ་བསྙེན་དང་བྱང་སེམས་སྡོམ་པ་འབོགས་པར་མཛད་པ།

ཟླ་བ་འདིའི་རེས་གཟའ་ཉི་མའི་ཉིན་རྒྱ་གར་གྱི་གསར་ཁང་ཞིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུའི་ཡང་སྲིད་དང་འབྲེལ་ནས་བཅར་འདྲི་ཁག་གཅིག་ཞུས་པར་ད་ལྟའི་ཆར་༸སྐུའི་ཡང་སྲིད་ཀྱི་གནད་དོན་ཐོག་བཀའ་བསྡུར་གྱི་བརྒྱུད་རིམ་གང་ཡང་དབུ་འཛུགས་གནང་མེད་སྐོར་བཀའ་ལན་མཛད་པ་དང་འབྲེལ། མགོན་པོ་༸གང་ཉིད་མཆོག་ནམ་ཞིག་༸སྐུ་ཚེ་མ་ཟིན་པའི་གནས་སུ་གྱུར་རྗེས་རྒྱལ་སྤྱིའི་ལྷན་ཚོགས་ཤིག་གི་ཐོག་ནས་གནད་དོན་དེར་ཐག་གཅོད་དགོས་ཀྱི་རེད་ཅེས་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་དེང་སྐབས་གནས་མཆོག་རྡོ་རྗེ་གདན་དུ་༸སྐུ་བཞུགས་གནང་མུས་དང་བསྟུན། རྒྱ་གར་གྱི་ Hindustan Times གསར་ཁང་གིས་ཚེས་ ༢༣ ཉིན་མགོན་པོ་༸གང་ཉིད་མཆོག་ལ་༸སྐུའི་ཡང་སྲིད་ཀྱི་གནད་དོན་དང། བོད་རྒྱའི་འབྲེལ་ལམ། ༸དཔལ་རྒྱལ་དབང་ཀརྨ་པ་མཆོག་གི་གནས་བབས་ལ་སོགས་པའི་གནད་དོན་འདྲ་མིན་ཐོག་དམིགས་བསལ་བཅར་འདྲི་ཞུས་འདུག སྐབས་དེར་༸གོང་ས་མཆོག་ནས་༸སྐུའི་ཡང་སྲིད་ཀྱི་གནད་དོན་སྐོར་བཀའ་བསྩལ་བར་གནད་དོན་དེའི་ཐོག་དངོས་སུ་བཀའ་བསྡུར་སོགས་ཀྱི་བརྒྱུད་རིམ་གང་ཡང་དབུ་འཛུགས་གནང་མེད་པ་དང་། སྤྱིར་ཏཱ་ལའི་བླ་མའི་སྒྲིག་འཛུགས་འདི་མུ་མཐུད་གནས་དང་མི་གནས་ཞེས་པ་དེ་བོད་མི་མང་ཚོགས་ནས་ཐག་གཅོད་བྱེད་དགོས་པའི་གནད་དོན་ཞིག་ཡིན་པ་མ་ཟད། ༸རྒྱལ་བ་སྐུ་འཕྲེང་རིམ་འབྱོན་གྱི་བརྒྱུད་རིམ་དང་སོག་ཡུལ་གཉིས་དབར་ཐུན་མོང་མ་ཡིན་པའི་འབྲེལ་བ་ཞིག་ཡོད་སྟབས། གནད་དོན་དེའི་ཐོག་སོག་པོ་རྣམས་ཀྱང་མཉམ་ཞུགས་དགོས་པ་རེད། ཧི་མཱ་ལ་ཡའི་རི་རྒྱུད་གཙོ་གྱུར་ནང་པའི་རྒྱལ་ཁབ་གཞན་ཁག་ཀྱང་མཉམ་ཞུགས་ཡོད་པའི་རྒྱལ་སྤྱིའི་ལྷན་ཚོགས་ཤིག་གི་ཐོག་ནས་གནད་དོན་དེར་ཐག་གཅོད་དགོས་ཀྱི་རེད་ཅེས་བཀའ་བསྩལ་ཡོད་པ་རེད། གསར་འགོད་པས་སྐབས་དེར་བོད་ནང་གི་བོད་མི་ཚོས་གནད་དོན་དེའི་ཐོག་མཉམ་ཞུགས་གནང་ཕྱོགས་སྐོར་བཀའ་འདྲི་ཞུས་པར་དེ་ནི་རང་དབང་ལྡན་པའི་རྒྱལ་ཁབ་ཤིག་མ་གཏོགས་རང་དབང་བྲལ་བའི་བོད་ནང་ནས་ཐག་གཅོད་ཐུབ་པ་ཞིག་མ་རེད་ཅེས་བཀའ་བསྩལ་འདུག གསར་ཁང་དེས་༸གོང་ས་མཆོག་ལ་རྒྱ་ནག་ཏུ་གནས་མཇལ་ལ་ཕེབས་རྒྱུའི་ཐུགས་རེ་ཡོད་དམ་ཞེས་བཀའ་འདྲི་ཞུས་པར་རྒྱ་ནག་རིི་བོ་རྩེ་ལྔ་དེ་༸རྒྱལ་དབང་སྐུ་ཕྲེང་ ༡༣ པའི་བཞུགས་གནས་ཡིན་སྟབས་༸གང་ཉིད་མཆོག་གིས་ཕྱི་ལོ་ ༡༩༥༤ ལོ་ནས་རྒྱ་ནག་སྲིད་གཞུང་ལ་གནས་དེར་ཕེབས་འདོད་ཡོད་པར་བཀའ་གནང་ཡོད་ཀྱང་།  རྒྱ་ནག་གིས་ལམ་ཁ་མེད་པར་བརྗོད་སྟབས་ཕེབས་ཐུབ་མེད་སྐོར་བཀའ་བསྩལ་བ་དང་སྦྲགས། གང་ལྟར་སྔོན་བོད་ཀྱི་བླ་ཆེན་ཞིག་གིས་རྒྱ་གར་རྡོར་གདན་དུ་ཕེབས་འདོད་ཆེན་པོ་ཡོད་ནའང་། ཁོང་གི་དགེ་ཕྲུག་གིས་རྡོ་གདན་ངོ་མ་དེ་སེམས་ནང་ན་ཡོད་པར་བརྗོད་ཡོད་པ་ལྟ་བུ་རེད། ལོ་རྒྱུས་ཀྱི་ཐོག་ནས་བརྗོད་ན་རྒྱ་ནག་རི་བོ་རྩེ་ལྔ་དེ་ཤེས་རབ་ཀྱི་ལྷ་ཡི་བཞུགས་གནས་ཡིན་པས་༸གང་ཉིད་མཆོག་དངོས་སུ་གནས་དེར་ཕེབས་མ་ཐུབ་ཀྱང་། ཤེས་རབ་ཀྱི་ལྷ་དེ་༸གང་ཉིད་མཆོག་གི་ཀླད་པའི་ནང་ཡོད་པ་མ་ཟད། ཧ་ཅང་གི་རྣམ་རིག་བཀྲ་བོ་ཡོད་པར་བཀའ་ལན་མཛད་ཡོད་པ་རེད། དེ་བཞིན་བོད་རྒྱ་གཉིས་དབར་གྱི་འབྲེལ་མོལ་སྐོར་དང་འབྲེལ་༸གོང་ས་མཆོག་གིས་གསར་ཁང་དེར་ཕྱི་ལོ ༢༠༡༠ ལོ་ནས་བཟུང་བོད་རྒྱ་གཉིས་ཀྱི་གཞུང་འབྲེལ་གྱི་གྲོས་མོལ་དེ་མཚམས་ཆད་ཡོད་པར་བརྟེན། ད་ཆ་རྒྱ་ནག་ནང་གི་རྒས་ཡོལ་ཞུས་ཟིན་པའི་དཔོན་རིགས་དང་ཚོང་པ་དེ་འདྲ་བརྒྱུད་ནས་འབྲེལ་བ་གནང་བཞིན་ཡོད་པ་དང། མི་སྣ་དེ་དག་ཁ་ཤས་རྒྱ་ནག་གཞུང་གི་འགོ་ཁྲིད་དང་ལྷན་དུ་འབྲེལ་བ་ཡོད་མཁན་ཡིན་སྐོར་བཀའ་བསྩལ་བ་དང་ཆབས་ཅིག ༸གང་ཉིད་མཆོག་གིས་ཕྱི་ལོ་ ༡༩༧༤ ནས་བཟུང་བོད་རང་བཙན་དོར་ཏེ་དབུ་མའི་ལམ་གྱི་སྲིད་བྱུས་བརྒྱུད་ནས་རྒྱ་ནག་གིས་ས་བགོས་བྱས་ཡོད་པའི་བོད་རང་སྐྱོང་ལྗོངས་དང་མདོ་སྟོད་སྨད་ཀུན་ཏུ་བོད་ཀྱི་རིག་གཞུང་དང་སྐད་ཡིག ཆོས་ལུགས། ཁོར་ཡུག་སོགས་ལ་སྲུང་སྐྱོབ་བྱེད་རྒྱུའི་རང་སྐྱོང་གི་གནས་བབས་ཤིག་ལ་ཐུགས་རེ་གནང་བཞིན་ཡོད་པ་ལྟར།  བོད་རིགས་ཚོ་རྒྱ་ནག་དང་ལྷན་དུ་བསྡད་ན་དཔལ་འབྱོར་གྱི་ཁེ་ཕན་ཡོད་པར་དགོངས་བཞིན་ཡོད་སྐོར་སོགས་བཀའ་བསྩལ་འདུག གསར་ཁང་དེས་ཐེངས་འདིའི་བཅར་འདྲིའི་ལས་རིམ་ཁྲོད་༸དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་གནས་བབས་སྐོར་བཀའ་འདྲི་ཞུས་པར་༸གང་ཉིད་མཆོག་གིས་༸དཔལ་རྒྱལ་བ་ཀརྨ་པ་མཆོག་ཕལ་ཆེར་ཕྱིར་རྒྱ་གར་ལ་ཕེབས་མདོག་ཁ་པོ་རེད་ཅེས་བཀའ་བསྩལ་བ་དེ་ལྟར་ཡང་། རྩ་བའི་གནད་དོན་དེ་༸དཔལ་རྒྱལ་བ་ཀརྨ་པ་མཆོག་དང་རྒྱ་གར་གཞུང་གཉིས་དབར་གྱི་དོན་དག་ཅིག་ཡིན་སྟབས། མགོན་པོ་༸གང་ཉིད་མཆོག་ནས་དེའི་ཐོག་ཐེ་བྱུས་གནང་ཐབས་མེད་པ་དང་། རྒྱ་གར་གྱི་ཕྱི་སྲིད་ལས་ཁུངས་ལའང་དེ་ལྟར་བཀའ་བསྩལ་ཡོད་སྐོར་བཀའ་ལན་མཛད་འདུག དེ་བཞིན་གསར་ཁང་དེས་༸གོང་ས་མཆོག་ཨ་རིར་ཆིབས་བསྒྱུར་གནང་རྩིས་ཡོད་དམ་ཞེས་བཀའ་འདྲི་ཞུས་པར་༸སྐུ་གཟུགས་གནས་བབས་ཀྱི་ཆ་ནས་ཨ་རི་ལྟ་བུའི་ས་ཐག་རིང་པོར་ཕེབས་ཐུབ་ཐབས་མེད་པ་དང།  ༸གང་ཉིད་མཆོག་སྔོན་ཆད་ཨ་རིར་སྨན་བཅོས་ཀྱི་ཆེད་དུ་ཕེབས་བཞིན་ཡོད་པ་ལྟར་རྒྱ་གར་གྱི་སྨན་པ་ཞིག་གིས་༸གང་ཉིད་མཆོག་ལ་འབྲས་སྐྲན་གྱི་ནད་གཞི་ཡོད་པར་ངོས་འཛིན་གནང་ཡང་ད་ཆ་ནད་གཞི་དེ་ཡོངས་སུ་དྲག་སྐྱེལ་ཐུབ་ཡོད་སྐོར་བཀའ་བསྩལ་བ་མ་ཟད། དགུང་གྲངས་ ༨༤ ལ་ཕེབས་པའི་སྐྱེ་བོ་ཞིག་ལ་དཔག་པའི་༸སྐུའི་འཕྲོད་བཞེས་ད་ཆ་ཡག་ཐག་ཆོད་ཡིན་པ་དང། ༸གང་ཉིད་མཆོག་ནས་བཞུགས་སྒར་དུ་༸སྐུ་བཞུགས་མཛད་རིང་སྔ་དྲོ་འཆར་ཅན་ཞབས་ཐང་ལ་ཕེབས་ཀྱི་ཡོད་པ་མ་ཟད། ད་ཆ་གནས་མཆོག་རྡོ་རྗེ་གདན་དུའང་ཉིན་ལྟར་ཞབས་ཐང་གིས་དགོན་པའི་གོམ་པ་ ༦༠༠ ཙམ་ཕེབས་གནང་གི་ཡོད་པར་བཀའ་བསྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ག་གནས་མཆོག་རྡོ་རྗེ་གདན་དུ་ཉིན་གྲངས་དྲུག་རིང་ཆོས་འབྲེལ་ཁག་གཅིག་བཀྲིན་བསྩལ་རྒྱུའི་མཛད་འཆར་ཡོད་པ་ལྟར། དེ་རིང་སྔ་དྲོ་པཱ་ལི་དང་། ལེགས་སྦྱར།   རྒྱ་སྐད་བཅས་ཀྱི་ཐོག་བཀྲ་ཤིས་པའི་མདོ་གསུང་པ་དང་སྦྲགས་བཀའ་ཆོས་དངོས་གཞི་དབུ་འཛུགས་བཀྲིན་བསྐྱངས་ཡོད་པ་རེད།དེ་རིང་ཟླ་ ༡༢ ཚེས་ ༢༤ ཉིན་རྒྱ་གར་རྡོ་རྗེ་གདན་གྱི་དུས་འཁོར་དབང་ཆེན་གྱི་གསུང་ཆོས་ར་བ་ནས་ཆོས་འབྲེལ་དངོས་གཞི་དབུ་འཛུག་མ་གནང་གོང་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་སྟོན་པ་སངས་རྒྱས་བཅོམ་ལྡན་འདས་མངོན་པར་རྫོགས་པ་སངས་རྒྱས་པའི་གནས་མཆོག་ཁྱད་པར་ཅན་འདིར་ས་ཕྱོགས་གང་ས་ནས་འདུ་འཛོམས་བྱུང་བའི་ཆོས་ཞུ་བ་རྣམས་ལ་ཤིན་ཏུ་ནས་སྐལ་བཟང་ཡིན་སྐོར་སོགས་བཀའ་བསྩལ་ཏེ་ནང་ཆོས་ཀྱི་སྤྱི་བཤད་ངོ་སྤྲོད་ཚུལ་དུ་ནང་པ་སངས་རྒྱས་པའི་ཆོས་འདི་སྨོན་ལམ་གསུང་འདོན་གནང་བ་ཙམ་ཞིག་མིན་པར་ཆོས་ལུགས་གཞན་དང་མི་འདྲ་བར་དམིགས་བསལ་གྱི་ཁྱད་ཆོས་ལྡན་པ་ཞིག་ཡིན་པ་དང་། ལྷག་དོན་སྟོན་པ་བཅོམ་ལྡན་འདས་ནི་ཐབས་དང་ཤེས་རབ་ཀྱི་ཉམས་མྱོང་ལ་བརྟེན་ནས་རྟོགས་པའི་ཡོན་ཏན་ལྡན་ཐོག་གཞན་དོན་མཛད་ཐུབ་མཁན་གྱི་བླང་དོར་གྱི་ཆོས་སྟོན་ཡོད་པ་སོགས་ལམ་སྟོན་བཀྲིན་བསྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞུ་བ་ཚོར་སྟོན་པའི་ཆོས་འཁོར་གྱི་རིམ་པ་ཁག་ངོ་སྤྲོད་བཀྲིན་བསྩལ་བ་མ་ཟད། ད་རེས་ཀྱི་ཆོས་འབྲེལ་དེའི་སྐབས་དབང་དང་རྗེས་གནང་སོགས་ཞུས་ནས་སྟོང་ཉིད་དང་བྱང་ཆུབ་སེམས་བསྒོམ་དགོས་གལ་ཡིན་པ་དང་ཁྱད་པར་དུ་ཆོས་ཞུ་བ་ཚོས་ཉིན་རེའི་འཚོ་བའི་ཁྲོད་དུ་དེ་ལྟར་ཡོང་བར་དམ་འཇོག་གནང་གནད་ཡིན་པ་སོགས་ལམ་སྟོན་མཛད་ཡོད་པ་རེད།༸གོང་ས་མཆོག་གིས་རྡོ་རྗེ་གདན་གྱི་དུས་འཁོར་དབང་ཆེན་གྱི་གསུང་ཆོས་ར་བ་ནས་བཀའ་ཆོས་དེ་དག་བསྩལ་གྲུབ་རྗེས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཁྲིད་དང་། ཕྱི་ལོ་ ༢༠༡༥ ལོར་གདན་ས་བཀྲ་ཤིས་ལྷུན་པོ་རུ་གནང་བའི་ཚད་མ་རྣམ་འགྲེལ་གྱི་བཀའ་ཁྲིད་༼མཁན་ཆེན་ཀུན་དགའ་དབང་ཕྱུག་གིས་མཆན་འགྲེལ་བཏབ་པའི་རྣམ་རྩ་༽འཕྲོ་སྐྱོང་བཀའ་དྲིན་བསྩལ་ཡོད་པ་རེད།

དེ་རིང་བོད་ཚེས་ ༡༥ ཉིན་སྔ་དྲོ་ཆུ་ཚོད་ ༩ མ་ཟིན་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་གྱི་བཞུགས་གནས་དགའ་ལྡན་འཕེལ་རྒྱས་གླིང་ནས་ཉེ་འཁྲིས་སུ་ཆགས་པའི་ Watpa Temple ཞེས་ཐེ་ལན་ཌི་ནང་པའི་དགོན་པར་གནས་གཟིགས་མཛད་པ་མ་ཟད། ཁུལ་དེར་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་དང་ཏཱ་ལའི་བླ་མ་དགེ་རྩ་ཚོགས་པ། དེ་བཞིན་ Watpa ཐེ་ལན་ཌི་དགོན་པ་བཅས་ཀྱིས་གོ་སྒྲིག་ཞུས་པའི་ནང་པའི་བཀའ་སྡེ་སྣོད་གསུམ་གྱི་རྒྱལ་སྤྱིའི་ལྷན་ཚོགས་ཐོག་དབུ་བཞུགས་མཛད་ཡོད། ལྷན་ཚོགས་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་གཙོས། ཐེ་ལན་ཌི་ནང་པའི་ཆོས་ཚོགས་ཀྱི་དབུ་ཁྲིད་ Phra Dhammabodhivited ལགས། Watpa ཐེ་ལན་ཌི་ནང་པོའི་དགོན་པའི་མཁན་པོ་ Phra Bhodhinandhamunee ལགས། དགོན་པའི་ཚོགས་གཙོ་ Piroon Shinawatra ལགས། དེ་བཞིན་བོད་པའི་དགེ་བཤེས་མཁས་པ་ཁག་གཅིག ཐེ་ལན་ཌིའི་ནང་པ་བཅས་ནས་ལྷན་ཞུགས་གནང་འདུག སྐབས་དེར་༸གོང་ས་མཆོག་གིས་སྟོན་པ་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་པའི་རྗེས་སུ་ནང་པའི་ཁྲོད་ལ་ཕྱག་ལེན་མི་འདྲ་བ་གཙོ་བོ་བཞི་ཙམ་བྱུང་ཡོད་ཀྱང་། སངས་རྒྱས་པའི་ཆོས་དེ་ནི་གཙོ་བོ་ཐར་པའི་དོན་དུ་དམིགས་པ་ཞིག་ཡིན་སྟབས། སངས་རྒྱས་ཀྱི་བསྟན་པའི་གཞི་མ་དེ་འདུལ་བ་འཛིན་པ་རྣམས་རེད་ཅེས་བཀའ་བསྩལ་སོང་། མགོན་པོ་༸གང་ཉིད་མཆོག་ནས་ཐེངས་འདིའི་ལྷན་ཚོགས་ཐོག་ལ་འཕགས་པ་གནས་བརྟན་སྡེ་པ་དང་གཞི་ཐམས་ཅད་ཡོད་པ་སྨྲ་བའི་སྡེ་པའི་དབར་གཙོ་བོ་སྡེ་སྣོད་གསུམ་དང་འབྲེལ་བའི་ཕན་ཚུན་མཐུན་པའི་ཆ་གང་ཡོད་མེད་དང་།  ལྷག་པར་དུ་འདུལ་བ་དང་འབྲེལ་བའི་ཐོག་ནས་སྡོམ་པ་མ་འཐོབ་པ་ཐོབ་པར་བྱེད་པ་དང་། ཐོབ་པ་མི་ཉམས་པར་སྲུང་བར་བྱེད་ཚུལ་སོགས་ཀྱི་ཐད་གྲོས་བསྡུར་ཞིབ་ཚགས་པོ་གནང་ཐུབ་ན་དགེ་མཚན་ཆེན་པོ་ཡོད་པར་ལམ་སྟོན་སོགས་ཀྱང་མཛད་ཡོད། གཞན་ཡང་ལྷན་ཚོགས་དབུ་འབྱེད་ཀྱི་མཛད་སྒོའི་ཐོག་ཐེ་ལན་ཌི་ནང་པའི་ཆོས་ཚོགས་ཀྱི་དབུ་ཁྲིད་དང་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས་སོགས་ནས་ནང་པའི་སྡེ་སྣོད་གསུམ་དང་འབྲེལ་ངོ་སྤྲོད་གསུང་བཤད་དང་སྦྲགས་ལྷན་ཚོགས་ཐོག་༸གོང་ས་མཚོག་༸སྐུ་དངོས་དབུ་བཞུགས་མཛད་པར་ཐུགས་རྗེ་ཆེ་སོགས་ཞུས་ཡོད། གཞི་རྩའི་ཐེངས་འདིའི་ནང་པའི་སྡེ་སྣོད་གསུམ་གྱི་རྒྱལ་སྤྱིའི་ལྷན་ཚོགས་དེ་དེ་རིང་དང་སང་ཉིན་བཅས་ཉིན་གྲངས་གཉིས་ཀྱི་རིང་ཚོགས་གནང་གི་ཡོད་པ་དང་། ལྷན་ཚོགས་ཐོག་ནང་ཆོས་ཉམས་ལེན་གནང་མཁན་འཕགས་པ་གནས་བརྟན་སྡེ་པ་དང་། གཞི་ཐམས་ཅད་ཡོད་པ་སྨྲ་བའི་སྡེ་པ་བཅས་ཀྱི་དགེ་འདུན་པ་རྣམ་པའི་དབར་ནང་པའི་སྡེ་སྣོད་གསུམ་སྟེ། འདུལ་བའི་སྡེ་སྣོད། མདོ་སྡེའི་སྡེ་སྣོད། མངོན་པའི་སྡེ་སྣོད་བཅས་ཀྱི་བརྗོད་བྱའི་ཐོག་ཕན་ཚུན་དབར་གྲོས་བསྡུར་སྦྱང་བཤད་གནང་གི་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ནས་དེ་རིང་སྔ་དྲོ་ནང་པའི་སྡེ་སྣོད་གསུམ་གྱི་རྒྱལ་སྤྱིའི་ལྷན་ཚོགས་ཐོག་དབུ་བཞུགས་མ་མཛད་པའི་གོང་དུ་Watpa ཐེ་ལན་ཌི་དགོན་པར་གསར་རྒྱག་གནང་འཆར་ཡོད་པ་ Phra Bhodhinandhamunee སློབ་གཉེར་ཁང་གི་རྩིག་རྨང་འཇོག་གནང་བ་དང་རབ་གནས་བཅས་བཀའ་དྲིན་མཛད་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གནས་མཆོག་རྡོ་རྗེ་གདན་དུ་ཆོས་འབྲེལ་བསྐྱང་རྒྱུའི་མཛད་འཆར་ཁག་ལ་དུས་ཚོད་ཀྱི་ཆ་ནས་སྔ་ཕྱི་འགྱུར་བ་ཕྱིན་པ་མ་གཏོགས་གཞུང་དང་ནང་དོན་སོགས་ལ་འགྱུར་བ་གང་ཡང་ཕྱིན་མེད་པ་རེད། དེའང་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་འགྱུར་བ་ཕྱིན་པར་གཞིགས་ན། ཟླ་ ༡༢ ཚེས་ ༢༤ ནས་ ༢༥ ཉིན་གཉིས་རིང་གི་ཞོགས་པར་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཁྲིད་དང་། ཕྱི་ལོ་ ༢༠༡༥ ལོར་གདན་ས་བཀྲ་ཤིས་ལྷུན་པོར་་གནང་བའི་ཚད་མ་རྣམ་འགྲེལ་གྱི་བཀའ་ཁྲིད་༼མཁན་ཆེན་ཀུན་དགའ་དབང་ཕྱུག་གིས་མཆན་འགྲེལ་བཏབ་པའི་རྣམ་རྩ་༽ འཕྲོ་སྐྱོང་མཛད་རྒྱུ་དང་། ཚེས་ ༢༦ ཉིན་སྔ་དྲོར་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་འཇིགས་བྱེད་དཔའ་གཅིག་གི་བཀའ་དབང་བཀའ་དྲིན་བསྩལ་རྒྱུ་ཡིན་པ་རེད། དེ་རྗེས་ཚེས་ ༢༨ ནས་ ༣༠ བར་དུ་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་བསྩལ་རྒྱུའི་ཞལ་བཞེས་ཐོབ་ཡོད་ཀྱང་། ཆོས་སྐོར་འདི་ལ་དམིགས་བརྩེ་མའི་བསྙེན་པའི་དམ་བཅའ་དགོས་པར་བརྟེན་དམ་བཅའ་མི་ནུས་པ་དང་། ཐུན་མོང་ལམ་སྦྱོང་ལ་གོམས་འདྲིས་མེད་རིགས་རྣམས་ཆོས་གྲལ་དུ་མི་ཕེབས་པ་དེ་དོན་རང་དོན་རང་གཅེས་ཀྱིས་དགོངས་བཞེས་གནང་གལ་ཡིན་པ་རེད་འདུག ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གནས་མཆོག་རྡོ་རྗེ་གདན་དུ་བོད་མིའི་སྒྲིག་འཛུགས་དང་རྣམ་རྒྱལ་གྲྭ་ཚང་། ཤེལ་དཀར་ཆོས་སྡེ་མངའ་ཞབས་བཅས་ནས་བརྟན་བཞུགས་བསྟར་འབུལ་ཞུ་རྒྱུ་བཅས་ཀྱི་མཛད་འཆར་ཐུགས་གཏན་ཁེལ་ཡོད་པ་རེད། གཞི་རྩའི་བོད་མའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་ ༡༢ ཚེས་  ༡༦ ཉིན་གནས་མཆོག་རྡོ་རྗེ་གདན་དུ་༸ཞབས་སོར་བཀྲིན་བསྐྱངས་ཡོད་པ་དང་། ཆེས་ཐོག་མའི་མཛད་འཆར་ལྟར་ན་མགོན་པོ་༸གང་ཉིད་མཆོག་གནས་མཆོག་རྡོ་རྗེ་གདན་ནས་ཕྱི་ལོ་ ༢༠༡༩ ལོའི་ཕྱི་ཟླ་ ༡  ཚེས་ ༩ ཉིན་ཕྱིར་བཞུགས་སྒར་དུ་ཆིབས་ཞལ་བསྒྱུར་གནང་རྒྱུའི་མཛད་འཆར་ཐུགས་གཏན་ཁེལ་ཡོད་ཀྱང་། ཤེས་རྟོགས་བྱུང་བར་༸གོང་ས་མཆོག་ཕྱི་ཚེས་ ༢ ཉིན་གནས་ཕྱོགས་རྡོ་རྗེ་གདན་ནས་ཆིབས་ཞལ་བསྒྱུར་གནང་གི་ཡོད་པ་རེད། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་གསུང་འབུམ་ཕྱོགས་སྒྲིག་ཚན་པའི་འགན་འཛིན་ཡང་སྟེང་རིན་པོ་ཆེ་མཆོག་ལ་དེ་འབྲེལ་བཀའ་འདྲི་ཁག་ཅིག་ཞུས་ཡོད།