༸གོང་ས་མཆོག

བོདམིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བདུན་ཕྲག་རྗེས་མའི་ནང་ཐའེ་ལན་ཌི་དང་སིངྒ་པུར། ཀོ་རི་ཡ། ཨིན་ཌོ་ནེ་ཤཱིཡ། མ་ལེ་ཤཱི་ཡ། ཝེ་ཏི་ནམ་བཅས་ཀྱི་ཨེ་ཤེ་ཡའི་དད་ལྡན་ཁག་ཅིག་ལ་ཉིན་བཞིའི་རིང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་གཉིས་པའི་གསུང་ཆོས་བཀྲིན་བསྐྱང་གཏན་འཁེལ་བའི་ཁྲོད། དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་ཐའེ་ལན་ཌའི་རླུང་འཕྲིན་དང་བརྙན་འཕྲིན་ལེ་ཚན་ཆེ་གྲས་ཁག་གི་མདོ་འཛིན་པ་གྲགས་ཅན་སྐུ་ཞབས་ Woody Milintachinda ལགས་ཀྱིས་༸གོང་ས་མཆོག་ལ་ངོ་དེབ་བརྒྱུད་བཀའ་འདྲི་ཞུས་པ་དང་སྦྲགས། ལས་རིམ་དེ་ཁོང་གི་རྗེས་འབྲང་པ་མི་ཁྲི་ཚོ་མང་པོ་ཡོད་པར་ཐད་གཏོང་གནང་འདུག སྐབས་དེར་སྐུ་ཞབས་ Woody ལགས་ཀྱིས་༸གོང་ས་མཆོག་ལ་ངོ་དེབ་བརྒྱུད་ཐད་ཀར་བསྡུ་རུབ་གནང་པའི་དྲི་བ་ཁག་ཅིག་ཕུལ་བའི་ཁོངས་སུ་བྱམས་བརྩེའི་ཕན་ཡོན་དང། མི་ཚེའི་དགོས་དོན་གང་ཡིན། ཆོས་ཉམས་ལེན་མ་བྱེད་ཚེ་བདེ་སྐྱིད་དང་ལྡན་པའི་མི་ཚེ་བསྐྲུན་ཐུབ་མིན་སོགས་ཀྱི་ཐོག་བཀའ་འདྲི་ཁག་ཅིག་ཞུས་འདུག སྐབས་དེར་༸གོང་ས་མཆོག་གིས་གཞན་ལ་བྱམས་བརྩེའི་བློ་འཛིན་ན་རང་ཉིད་ལ་ཕན་ཐོགས་མེད་པའི་བསམ་ཚུལ་ཡོད་པ་དེ་ནོར་འཁྲུལ་ཡིན་སྐོར་བཀའ་སྩལ་དང་འབྲེལ། བྱམས་བརྩེ་དང་གཞན་ཕན་གྱི་ལྟ་གྲུབ་ལག་བསྟར་གནང་ཚེ་རང་ཉིད་ཀྱི་རྒྱུད་ལའང་ཞི་བདེ་བསྐྲུན་ཐུབ་ངེས་ཡིན་པ་བཀའ་གནང་པ་མ་ཟད། མགོན་པོ་༸གང་ཉིད་མཆོག་གི་ཐུགས་ཉེ་བའི་གྲོགས་པོ་ཁོངས་སུ་ཆོས་ཉམས་ལེན་མ་བྱེད་པའི་ཐོག་མི་ཚེ་བདེ་སྐྱིད་དང་ལྡན་པ་སྐྱེལ་མཁན་མང་པོ་ཡོད་སྐོར་དཔེ་མཚོན་དང་བཅས་ཏེ་བཀའ་སྩལ་འདུག སྐར་མ་བཅིུས་ཙམ་གྱི་བཀའ་འདྲིའི་ལས་རིམ་དེའི་ཐོག་སྐུ་ཞབས་ Woody ལགས་ཀྱིས་༸གོང་ས་མཆོག་ལ་༸གང་ཉིད་མཆོག་ནས་མང་ཚོགས་ལ་དྲི་བ་གང་ཡོད་དམ་ཞེས་བཀའ་འདྲི་ཞུས་པར། ༸གོང་ས་མཆོག་གིས་འཛམ་གླིང་དེའི་ནང་མི་འབོར་འཐེར་འབུམ་བདུན་ཡོད་པ་ཡོངས་རྫོགས་སྡུག་བསྔལ་མི་འདོད་པ་དང་བདེ་བ་འདོད་པ། དེ་བཞིན་སེམས་ཚོར་སོགས་གང་ཅིའི་ཐོག་ནས་གཅིག་མཚུངས་ཡིན་པ་ལྟར། གོ་ལའི་ཚ་དྲོད་དང་མི་འབོར་འཕེལ་རྒྱས་སོགས་དེང་རབས་ཀྱི་དཀའ་ངལ་འཕྲད་པའི་ཁྲོད། ང་ཚོས་འཛམ་གླིང་དེའི་འགྲོ་བ་མིི་ཡོངས་རྫོགས་མི་གཅིག་འགྱུར་ཡིན་པའི་འདུ་ཤེས་འཛིན་ཏེ་བསམ་བློ་དེ་གོང་མཐོར་གཏང་ཐུབ་ཚེ། རང་ཉིད་ཀྱི་ལས་རིགས་འདྲ་མིན་དང་ཆོས་ལུགས་འདྲ་མིན་ལ་ལྟོས་མེད་ཀྱིས་དུས་རབས་ ༢༡ པའི་སྨད་ཆ་དེ་བྱམས་བརྩེ་དང་ཞི་བདེ་མཉམ་གནས་ལྡན་པའི་དུས་རབས་ཤིག་ཏུ་འགྱུར་ཐུབ་ངེས་ཡིན་པ་བཀའ་སྩལ་དང་ཆབས་ཅིག མང་ཚོགས་ནས་དེར་མོས་མཐུན་ཡོད་མེད་ཀྱི་བཀའ་འདྲི་གནང་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་འདིའི་ཚེས་ ༢༩ ནས་དབུ་འཛུགས་ཀྱིས་ཟླ་ ༩ ཚེས་ ༡ བར་ཉིན་གྲངས་བཞིའི་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨིན་ཌོ་ནེ་ཤཱིཡ་དང་ཀོ་རི་ཡ། མ་ལེ་ཤཱི་ཡ་དང་སིངྒ་པུར། ཐའེ་ལན་ཌི། ཝེ་ཏི་ནམ་བཅས་ཀྱི་དད་ལྡན་ཆོས་ཞུ་བར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་གཉིས་པའི་གསུང་ཆོས་འཕྲོ་སྐྱོང་བཀའ་དྲིན་སྩལ་རྒྱུ་ཡིན་པ་རེད།

བོད་མིའི་སྒྲིག་འཛུགས་ཀྱིས་རིང་མིན་དཔལ་དུས་ཀྱི་འཁོར་ལོའི་དབང་ཆེན་ཐོག་ཆོས་ཞུ་བ་མང་ཚོགས་འབུམ་བཞི་ལྷག་ཡོང་རྒྱུའི་ཚོད་དཔག་གནང་བཞིན་འདུག་པ་དང་། ལྷག་དོན་༸གོང་ས་མཆོག་གི་༸སྐུའི་སྲུང་ཆ་གཙོས་པའི་མང་ཚོགས་ཀྱི་བདེ་འཇགས་དང། ཆོས་ཞུ་བའི་བཞུགས་གནས་སོགས་ཀྱི་ཐད་སྔར་ལྷག་གོ་སྒྲིག་ཞུ་རྒྱུ་ཡིན་ཅེས་གསུངས་སོང་། དེ་རིང་ཟླ་ ༨ ཚེས་ ༢༥ ཉིན་རྒྱབ་ཏུ་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་དབུས་པའི་ཚོགས་གཞོན་བདེ་སྲུང་བཀའ་བློན་འཕགས་པ་ཚེ་རིང་མཆོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བཅས་རྣམ་པ་གསུམ་དབུ་བཞུགས་ཀྱིས་དུས་དབང་གི་ལས་དོན་དང་གོ་སྒྲིག་ཞུ་ཕྱོགས་ཐད་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་། སྐབས་དེར་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཐེངས་འདིའི་དུས་འཁོར་དབང་ཆེན་དེ་གཙོ་བོ་བོད་མིའི་སྒྲིག་འཛུགས་ཀྱིས་གོ་སྒྲིག་གནང་གི་ཡོད་པ་དང། དེ་ཡང་༸གོང་ས་མཆོག་གཙོས་པའི་འགྲོ་བ་ལྷ་དང་བཅས་པའི་ཕན་བདེ་མ་ལུས་པའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་འཕེལ་ཡོང་བ་དང། འཛམ་གླིང་སྐྱེ་འགྲོ་ཀུན་ལ་བདེ་སྐྱིད་གོང་འཕེལ་ཡོང་ཐབས། དེ་བཞིན་བོད་བསྟན་སྲིད་མི་རིགས་ཀྱི་བདེ་དོན་སེལ་རྒྱུ་བཅས་ལ་དམིགས་ཏེ་གོ་སྒྲིག་གནང་པ་ཞིག་ཡིན་སྐོར་འགྲེལ་བརྗོད་གནང་པ་དང་ཆབས་ཅིག དུས་དབང་གོ་སྒྲིག་ཚོགས་ཆུང་གིས་ ༢༠༡༧ ལོའི་དུས་འཁོར་དབང་ཆེན་སྐབས་༸སྐུའི་སྲུང་ཆ་གཙོས་པའི་མང་ཚོགས་ཀྱི་བདེ་འཇགས་དང། ཆོས་ཞུ་བའི་བཞུགས་གནས་སོགས་ཀྱི་ཐད་སྔར་ལྷག་གོ་སྒྲིག་ཞུ་རྒྱུ་ཡིན་ཅེས་གསུངས་སོང་། དཔལ་དུས་ཀྱི་འཁོར་ལོའི་དབང་ཆེན་གནང་ཡུལ་དུ་༸གོང་ས་མཆོག་གི་བཀའ་དགོངས་ལྟར་ཆོས་ཞུ་བའི་བདེ་དོན་རང་ལ་དམིགས་ཏེ་སྡོད་གུར་དང། འཕྲོད་བསྟེན། ཁོར་ཡུག་གཙང་བཟོ། ཆུ་དང་གློག དེ་བཞིན་གསུང་ཆོས་སྐབས་མི་ཤི་དོན་རྐྱེན་བྱུང་བའི་རིགས་ཚུན་ཆད་ལ་ལྟ་རྟོག་ཞུ་ཕྱིར་དམིགས་བསལ་གྱི་སྡེ་ཚན་འཆར་འགོད་ཀྱིས་གོ་སྒྲིག་ཚོགས་ཆུང་ཆེད་འཛུགས་ཐོག་རྒྱ་ཆེ་ཆོས་ཞུ་བར་དཀའ་ངལ་མི་ཡོང་བར་འབད་བརྩོན་སྔར་ལྷག་ཞུ་རྒྱུ་ཡིན་ཅེས་གསུངས་སོང་། ད་དུང་ཆོས་རིག་བཀའ་བློན་མཆོག་གིས་ཐེངས་འདིའི་དུས་དབང་ཐོག་བོད་མིའི་སྒྲིག་འཛུགས་ཀྱིས་ནང་སྲིད་དང་འཕྲོད་བསྟེན། ཤེས་རིག། ཆོས་རིག་ཁྱས་ཁོངས་ཀྱི་ཉམས་ཐག་དང་ནད་གཅོང་། དྭ་ཕྲུག་སློབ་མ། དེ་བཞིན་རྒས་གཅོང་བཅས་ཆོས་ཞུ་བ་ ༡༥༠༠ ལྷག་ལ་རིན་མེད་ཐོག་དུས་དབང་ཞུ་བར་ཁྲིད་རྒྱུ་ཡིན་ཅེས་གསུངས་ཡོད། ཆོས་རིག་བཀའ་བློན་མཆོག་གིས་གསུངས་པར་ལྟར་ན་བོད་མིའི་སྒྲིག་འཛུགས་ནས་ཐེངས་འདིའི་དཔལ་དུས་ཀྱི་འཁོར་ལོའི་དབང་ཆེན་ཐོག་ཆོས་ཞུ་བ་མང་ཚོགས་འབུམ་བཞི་ལྷག་ཡོང་རྒྱུའི་ཚོད་དཔག་གནང་བཞིན་འདུག་པ་དང་། ད་ལྟའི་ཆར་དེ་དག་གི་བཞུགས་གནས་སྡོད་གུར་ ༡༥༠༠ ལྷག་གོ་སྒྲིག་ཞུས་འདུག་པ་དང་། ཕྱིས་སུ་རིམ་བཞིན་ཆོས་ཞུ་བའི་དགོས་མཁོ་ལ་གཞིགས་ཏེ་མང་རུ་གཏོང་རྒྱུ་ཡིན་འདུག་པ་མ་ཟད། ཆོས་ཞུ་བའི་སྡོད་གུར་ལ་རྣམ་གྲངས་མི་འདྲ་བ་བཞི་འདུག་པ་དེ་དག་ལ་བོད་མིའི་སྒྲིག་འཛུགས་ཀྱིས་བརྒྱ་ཆ་ ༥༠ ནས་ ༢༥ བར་ཆག་ཡང་གནང་བའི་རྗེས། མི་གྲངས་ ༨ ཤོང་ཚད་ཅན་གྱི་སྡོད་གུར་ལ་ཧིན་སྒོར་ ༢༧༧༥ དང་། མི་གྲངས་ ༣༠ ཤོང་ཚད་ཅན་གྱི་གུར་ལ་ཧིན་སྒོར་ ༡༣༡༥༥ དང་། Swiss Cottage Tent མི་གྲངས་ ༤ ཤོང་བའི་གུར་ལ་ཧིན་སྒོར་ ༡༡༦༤༦ དེ་བཞིན་ ply wood སྡོད་ཁང་མི་གྲངས་ ༨ ཤོང་ཚད་ཅན་ལ་ཧིན་སྒོར་ ༡༧༢༥༠ བཅས་ཡིན་པ་རེད་འདུག རྩ་བའི་དུས་འཁོར་དབང་ཆེན་ཐེངས་ ༣༤ དེ་༸གོང་ས་མཆོག་གིས་རྒྱ་གར་གྱི་གནས་མཆོག་རྡོ་རྗེ་གདན་དུ་ ༢༠༡༧ ལོའི་ཟླ་ ༡ ཚེས་ ༣ ནས་དབུ་འཛུགས་ཀྱིས་ཚེས་ ༡༤ བར་བསྩལ་གནང་རྒྱུ་ཡིན་པ་དང་། དུས་དབང་གི་བཀའ་ཆོས་སྔོན་འགྲོའི་གསུང་ཆོས་ལ་མགོན་པོ་མཆོག་གིས་སྤྱོད་འཇུག་ཆེན་མོ་དང་སྒོམ་རིམ་བར་པའི་བཀའ་ཆོས་བསྩལ་རྒྱུ་རེད་འདུག དེ་མཚུངས་སུ་གསུང་ཆོས་ཀྱི་སྐབས་ཆོས་བརྒྱུད་རིས་མེད་ཀྱི་བླ་ཆེན་ཁག་དབུས་པའི་གྲྭ་བཙུན་རྣམས་འདུ་འཛོམས་ཀྱིས་རིས་མེད་སྨོན་ལམ་རྒྱལ་འཛོམས་གསུང་ཚོགས་གནང་རྒྱུ་རེད་འདུག དུས་འཁོར་དབང་ཆེན་ཐེངས་ ༣༤ དེ་བོད་མིའི་སྒྲིག་འཛུགས་ཀྱིས་གོ་སྒྲིག་གནང་པ་ཞིག་ཡིན་ཀྱང་། དུས་དབང་གི་བཀའ་ཆོས་ཐོག་ཡོན་བདག་ཞུ་རྒྱུའི་གསོལ་འདེབས་ཞུ་མཁན་མང་དག་ཞིག་བྱུང་ཡོད་སྟབས། དཔལ་ལྡན་དགའ་ལྡན་ཕོ་བྲང་གིས་བཀའ་བཞེས་ཐོབ་པའི་ཡོན་བདག་ཁོངས་སུ་ གཞིས་བྱེས་མགོ་ལོག་ཨ་སྐྱོང་ཁང་གསར་སྡེ་ཚོགས་ཀྱི་སེར་སྐྱ་མང་ཚོགས་ཀྱིས་གཙོས་པའི་བཙན་བྱོལ་ཕྱི་ནང་གི་ཁྱིམ་ཚང་དང་སྒེར་པ་ ༢༠ ཐམ་པ་བཅས་འདུག

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ནང་ཟླ་བ་གཅིང་རིང་གི་ཆོས་འབྲེལ་བཀའ་སློབ་སོགས་ཀྱི་མཛད་འཕྲིན་ཁག་ལེགས་པར་གྲུབ་ཏེ་དེ་རིང་སྔ་ཐོག་སླེ་ནས་མཁའ་ལམ་བརྒྱུད་བཞུགས་སྒར་དུ་ཆིབས་སྒྱུར་བསྐྱངས་གནང་སོང་། དེ་རིང་ཟླ་ ༨ ཕྱི་ཚེས་ ༢༥ ཉིན་གྱི་སྔ་དྲོ་ཚོུད་ ༡༠།༠༠ ཡོལ་ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སླེ་བ་ཀུ་ལ་གནམ་ཐང་ནས་མཁའ་ལམ་བརྒྱུད་བཞུགས་སྒར་ཉེ་འདབས་སུ་ཡོད་པའི་གྷ་གལ་གནམ་ཐང་དུ་༸ཞབས་སོར་བདེ་བར་འཁོད་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟེན་འཕེལ་མཆོག་གིས་གཙོས་གཞུང་འབྲེལ་དང་གཞུང་མིན་པའི་ཚོགས་ཁག་གི་གནད་ཡོད་མི་སྣ་སོགས་ཆེད་བཅར་གྱིས་ཕེབས་བསུ་ཞུས་སོང་བ་དང་། བཞུགས་སྒར་དུ་ཆིབས་སྒྱུར་སྐབས་ཕེབས་ལམ་གྱི་གཡས་གཡོན་དུ་སྲི་ཞུ་ལས་བྱེད་རྣམ་པ་གཙོས་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་དང་དྲི་ཞིམ་གྱི་དུག་སྤོས། ཞུགས་ཏོག་བཅས་བསྣམས་ཏེ་དགའ་དད་སྤྲོ་གསུམ་གྱི་ངང་ནས་མགོན་པོ་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་སོང་། མགོན་པོ་མཆོག་ལ་དྭགས་ཞི་བའི་ཚལ་ཕོ་བྲང་ནས་བ་ཀུ་ལ་གནམ་ཐང་དུ་ཕེབས་ཐོན་མཛད་སྐབས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་ཁྲིག་རྩེ་མཁན་པོ་རིན་པོ་ཆེ་མཆོག དགོན་ཁག་གི་མཁན་བླ་སྤྲུལ་རྣམ་པ། གཞུང་གི་དཔོན་རིགས་དང་གྲོས་ཚོགས་འཐུས་མི། ཆིབས་སྒྱུར་གོ་སྒྲིག་ཚོགས་ཆུང་གི་དབུ་སྐྱོང་སོགས་ཕེབས་སྐྱེལ་དུ་བཅར་ཡོད་པ་དང་། ཁྱད་པར་དུ་གཞུང་ལམ་གྱི་གཡས་གཡོན་དུ་ལ་དྭགས་པ་དང་བོད་པ་སྟོང་ཕྲག་ལྷག་གིས་དད་གུས་ཆེན་པོས་གྱོན་ཆས་ལེགས་པར་སྤྲད་དེ་ཕྱག་ཏུ་གདུག་སྤོས་དང་མཇལ་དར། ཞུགས་ཏོག་སོགས་བསྣམས་ཏེ་ཕེབས་སྐྱེལ་གཟབ་རྒྱས་ཞུས་ཡོད་པ་རེད། གཞི་རྩའི་མགོན་པོ་༸གང་ཉིད་མཆོག་ད་རེས་ལ་དྭགས་ཁུལ་དུ་ཟླ་བ་སྔོན་མའི་ཚེས་ ༢༥ ཉིན་དབུ་འཛུགས་ཀྱིས་དེ་རིང་ཟླ་ ༨ ཚེས་ ༢༥ བར་ཁྱོན་ཟླ་བ་གཅིག་རིང་བཞུགས་ཞག་མཛད་འཕྲིན་བསྐྱངས་པའི་ཁྲོད། གཙོ་བོ་ཕྱི་ཚེས་ ༩ ནས་ ༡༡ བར་ལ་དྭགས་ཁྲིག་རྩེ་ཚུལ་ཁྲིམས་རྣམ་དག་གླིང་དགོན་ནས་༸གང་ཉིད་མཆོག་ལ་ཇི་ལྟར་གསོལ་འདེབས་ཞུ་དོན་ལྟར། ཕར་ཕྱིན་དབྱར་ཆོས་ཆེན་མོ་ཐེངས་ ༤ པའི་ཚོགས་མགོན་དུ་དབུ་བཞུགས་མཛད་པ་དང་། ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན་དང་། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་བསྩལ་བ་མ་ཟད། ཕྱི་ཚེས་ ༡༨ ནས་ ༢༡ བར་༸གང་ཉིད་མཆོག་གིས་དད་ལྡན་མང་ཚོགས་སྟིང་ཚོ་བརྒལ་བར་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་ཡོད་པ་རེད། རྩ་བའི་༸གོང་ས་མཆོག་བཞུགས་སྒར་དུ་ཆིབས་སྒྱུར་བསྐྱངས་ཡོད་པ་ལྟར། ལ་དྭགས་སུ་གནས་མཇལ་དང་གསུང་ཆོས་ཆེད་དུ་བཅར་བའི་ཆོས་ཞུ་བ་རྣམས་ཀྱང་བླ་མའི་དྲུང་ནས་བྱིན་རླབས་ཆེན་པོ་བྱུང་སོང་ཞེས་གསུང་བཞིན་རང་རང་སོ་སོའི་ཡུལ་ལ་ཐོན་བཞིན་འདུག ཁོང་རྣམས་ཀྱིས་སླར་ཡང་དྲིན་ཅན་གྱི་བླ་མ་མཇལ་བར་ཤོག་ཅེས་སོགས་སྨོན་ལམ་འདེབས་བཞིན་འདུག ༸གོང་ས་སྐྱབས་མགོན་ཆེན་པོ་མཆོག་གི་མཛད་འཆར་ལ་གཞིགས་ན། རིན་མིན་ཟླ་ ༨ ཚེས་ ༢༩ ནས་དབུ་འཛུགས་ཀྱིས་ཟླ་ ༩ ཚེས་ ༡ བར་ཉིན་གྲངས་བཞིའརིང་ཨིན་ཌོ་ནེ་ཤཱིཡ་དང་ཀོ་རི་ཡ། མ་ལེ་ཤཱི་ཡ་དང་སིངྒ་པུར། ཐའེ་ལན་ཌི། ཝེ་ཏི་ནམ་བཅས་ཀྱི་དད་ལྡན་ཆོས་ཞུ་བས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་གཉིས་པའི་གསུང་ཆོས་འཕྲོ་སྐྱོང་བཀའ་དྲིན་སྩལ་རྒྱུ་ཡིན་པ་རེད།

དེ་རིང་ཟླ་ ༨ ཚེས་ ༢༤ ཉིན་གྱི་སྔ་དྲོ་ཚོུད་ ༡༡།༠༠ སྟེང་ལ་དྭགས་ཞི་བའི་ཚལ་གྱི་གསུང་ཆོས་རྭ་བར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་བཞུགས་གཙོས། དགའ་ལྡན་ཁྲི་རིན་པོ་མཆོག མཁན་བླ་སྤྲུལ་རྣམ་པ།  ས་གནས་ཀྱི་གཞུང་དང་སྒེར་ཚོགས་ཀྱི་གནད་ཡོད་མི་སྣ། ཆིབས་སྒྱུར་སྐབས་ཕྱག་ལས་གནང་མཁན་འབྲེལ་ཡོད་ལས་བྱེད་བཅས་ལྷན་འཛོམས་ཐོག་༸གང་ཉིད་མཆོག་ལ་ཐུགས་རྗེ་ཆེ་ཞུའི་གསོལ་སྟོན་གྱི་མཛད་སྒོ་ཚོགས་ཡོད་པ་རེད། སྐབས་དེར་མགོན་པོ་མཆོག་གིས་༸གང་ཉིད་ནང་པའི་གཞུང་སྡེ་སྣོད་གསུམ་དང་བསླབ་པ་གསུམ་ལ་ཐོས་བསམ་གནང་མཁན་གྱི་སངས་རྒྱས་བཅོམ་ལྡན་འདས་ཀྱི་དགེ་སློང་ཞིག་དང་། རྒྱ་གར་དཔལ་ནཱ་ལེནྡྲའི་མཁས་པའི་དགེ་ཕྲུག་གཅིག་ཡིན་པར་དགོངས་གནང་གི་ཡོད་པ་བཀའ་བསྩལ་དང་ཆབས་ཅིག བཀྲིན་རྗེས་དྲན་དགའ་སྟོན་གྱི་མཆོད་པ་གཙོ་བོ་དེ་སྒྲུབ་པའི་མཆོད་པ་རེད་ཅེས་བཀའ་བསྩལ་འདུག  ད་དུང་༸གང་ཉིད་མཆོག་གིས་དུས་སང་སླར་ལ་དྭགས་སུ་ཆིབས་བསྒྱུར་མཛད་རྒྱུའི་ཞལ་བཞེས་བཟང་པོ་སྨིན་བསྩལ་ཐོབ་པ་དང་དུས་མཚུངས་མགོན་པོ་མཆོག་གིས་ཀྱང་གནས་འདིར་ཕེབས་ཡག་གི་ཡིད་དབང་འཕྲོག་པ་གཅིག་དེ་ས་གནས་ཀྱི་ཆོས་ལུགས་མཐུན་སྒྲིལ་བཟང་པོ་ཡོད་པ་དེ་ཡིན་ཅེས་བསྔགས་བརྗོད་འདུག ཁྱད་པར་དུ་སྐབས་དེར་༸གོང་ས་མཆོག་གིས་ལ་དྭགས་ནང་གི་རོལ་མོ་བ་དང་རྒྱ་གར་གྱི་ས་གནས་ཁག་ཅིག་ཏུ་རིགས་རུས་ཀྱི་དབྱེ་འབྱེད་འོག་མཐོང་ཆུང་བྱེད་བཞིན་ཡོད་པའི་གནས་ཚུལ་དང་འབྲེལ།  ༸གང་ཉིད་མཆོག་གིས་རིགས་རུས་དབྱེ་འབྱེད་ལ་མཐའ་གཅིག་ཏུ་ངོ་རྒོལ་ཡོད་ཅེས་གསུངས་ཏེ་དེ་ལྟར་ནམ་ཡང་གནང་རྒྱུ་མེད་པའི་སྐུལ་མ་ཡང་གནང་ཡོད་པ་རེད། སྐབས་དེར་ལ་དྭགས་ནང་པའི་ཚོགས་འདུའི་ཚོགས་གཙོ་སྐུ་ཞབས་ཚེ་དབང་འཕྲིན་ལས་ལགས་ཀྱིས་དེ་རིང་ཐེངས་འདིའི་མཛད་སྒོ་མཐའ་མ་འདིའི་ཐོག་ནས་མགོན་པོ་མཆོག་ད་རེས་ལ་དྭགས་སུ་ཟླ་བ་གཅིག་རིང་བཞུགས་བཞག་མཛད་ནས་ལ་དྭགས་མི་མང་ལ་ཆོས་ཀྱི་འཁོར་ལོ་བསྐོར་བ་དང་། བླང་དོར་གྱི་ལམ་སྟོན་བཀའ་སློབ་རྒྱ་ཆེ་མཛད་པར་སྙིང་ཐག་པ་ནས་བཀྲིན་ཆེ་ཞུ་རྒྱུ་མ་ཟད། ལྷག་དོན་ས་གནས་ཀྱི་ཆོས་ལུགས་གཞན་གྱི་དབུ་ཁྲིད་མི་མང་དང་མཇལ་མོལ་གནང་པར་ཐུགས་རྗེ་བླ་མེད་དུ་ཆེ་ཞེས་གསུངས་སོང་། མཐའ་དོན་ཁོང་གིས་ལ་དྭགས་སྐད་ཀྱི་ཐོག་གསོལ་འདེབས་ཞུས་པར། བླ་མ་མཁྱེན་ངས་རེ་བ་བཅོལ། བླ་མ་ཉིད་ཡང་བསྐྱར་ལ་དྭགས་སུ་ཕེབས་ནས་ཟླ་བ་གཅིག་གཉིས་རིང་བཞུགས་སུ་གསོལ། ང་ཚོས་སྐུ་ཉིད་ལ་སྐུ་ངལ་བཟོ་གི་མིན། མང་ཚོགས་ལ་གསུང་ཆོས་མ་བསྩལ་ན་འགྲིག ༸སྐུ་ཉིད་མཆོག་འདི་གར་བཞུགས་པ་ཙམ་གྱིས་ང་ཚོར་བྱིན་རླབས་ཧ་ཅང་ཆེན་པོ་ཞིག་ཐོབ་ཀྱི་འདུག་ཅེས་༸གོང་ས་མཆོག་ལ་གདུང་ཤུགས་དྲག་པོས་གསོལ་འདེབས་ཞུས་ཡོད། མཛད་འཆར་ལྟར་ན། སང་ཉིན་ཟླ་ ༨ ཚེས་ ༢༥ ཉིན་༸གོང་ས་མཆོག་ད་རེས་ལ་དྭགས་ནང་ཟླ་བ་གཅིག་རིང་གི་མཛད་འཕྲིན་ཁག་ལེགས་པར་གྲུབ་ཐོག་མཁའ་ལམ་བརྒྱུད་བཞུགས་སྒར་དུ་ཕེབས་ཐོན་མཛད་ཀྱི་ཡོད་པ་རེད།

ལ་དྭགས་ཀྱི་ཁྲིག་དགོན་ཚུལ་ཁྲིམས་རྣམ་དག་གླིང་དུ་ཟླ་འདིའི་ཚེས་ ༩ ནས་དབུ་འཛུགས་ཀྱིས་ཚེས་ ༢༢ བར་བཅས་ཁྱོན་ཉིན་གྲངས་བཅོ་ལྔའི་རིང་ལ་བྱང་ཆུང་ལམ་སྒྲོན་བརྗོད་གཞི་གཙོ་བོར་བཞག་པའི་ཐོག་དབྱར་ཆོས་ཆེན་མོ་ཐེངས་བཞི་པ་ཚོགས་ཡོད་པ་ལྟར་ཁ་སང་ལེགས་གྲུབ་ཀྱི་མཛད་སྒོ་འཚོགས་ཡོད་པ་རེད། ཁ་སང་ཟླ་ ༨ ཚེས་ ༢༢ ཉིན་གྱི་སྔ་དྲོ་ཚོུད་ ༡༠།༠༠ ནས་ཉིན་རྒྱབ་ཚོུད་ ༣།༠༠ བར་ལ་དྭགས་ཁྲིག་རྩེ་དགོན་པར་སྐུ་མགྲོན་གཙོ་བོ་ས་གནས་ཀྱི་བཀྲིས་ལྷུན་པོ་དགོན་པའི་མཁན་རིན་པོ་ཆེ་བློ་བཟང་ཚེ་བརྟན་མཆོག་གིས་གཙོས། ལ་དྭགས་རི་ལྗོངས་ཡར་རྒྱས་ཚོགས་པའི་དབུ་སྐྱོང་འབུམ་རམས་པ་བསོད་ནམས་ཟླ་བ་ལགས་དང་། དེ་བཞིན་ལ་དྭགས་ནང་པའི་ཚོགས་འདུའི་ཚོགས་གཙོ་སྐུ་ཞབས་ཚེ་དབང་འཕྲིན་ལས་སོགས་གཞུང་དང་གཞུང་འབྲེལ་མིན་པའི་ཚོགས་ཁག་གི་མཛད་གཙོ་རྣམ་པ། མང་ཚོགས་བརྒྱ་སྐོར་ཁ་ཤས་ལྷན་འཛོམས་ཐོག་དབྱར་ཆོས་ཆེན་མོ་ལེགས་གྲུབ་ཀྱི་མཛད་སྒོ་འཚོགས་ཡོད་པ་རེད། སྐབས་དེར་དབྱར་ཆོས་ཆེན་མོ་གོ་སྒྲིག་པ་ཁྲིག་རྩེ་དགོན་པའི་མཁན་པོ་རིན་པོ་ཆེ་ངག་དབང་བྱམས་པ་བསྟན་འཛིན་མཆོག་གིས་སྐུ་མགྲོན་གཙོ་བོ་མཆོག་གིས་དབུས་པའི་གནད་ཡོད་དཔོན་རིགས་དང་ས་གནས་ཀྱི་མང་ཚོགས་བཅས་པར་འདི་ལོའི་དབྱར་ཆོས་ཆེན་མོ་དེ་སྔར་ལས་ཚགས་ཚུད་དང་གཞི་རྒྱ་ཆེ་བ་ཙམ་དུ་མ་ཟད། སྒོས་སུ་ཚོགས་འདུས་འདི་ནས་དགེ་བཙུན་ཙམ་མ་ཡིན་པར་སློབ་ཕྲུག་དང་མི་མང་དཀྱུས་མ་མང་དག་ལ་སློབ་སྦྱོང་དང་གོ་རྟོགས་མི་དམན་པ་ཐོབ་ཡོད་སྐོར་གསུངས་ཏེ་འབྲེལ་ཡོད་ཚང་མར་ཐུགས་རྗེ་ཆེ་ཞེས་གསུངས་སོང་། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་བཞིན། ལ་དྭགས་སུ་དབྱར་ཆོས་ཆེན་མོ་ཐོག་མ་དེ་ ༢༠༡༣ ལོར་མཚན་ཉིད་སློབ་གྲྭར་ཚོགས་པ་དང་། ཐེངས་གཉིས་པ་ལི་འཁྱིལ་དགོན་པ་དང་། གསུམ་པ་དཔེ་ཐུབ་དགོན་པར་ཚོགས་ཡོད་པ་རེད། དེའང་བགྲོ་གླེང་དང་གསུང་བཤད་སོགས་ལས་བོད་ཀྱི་ཆོས་བརྒྱུད་ནང་ཕན་ཚུན་དབར་ཐུགས་མཐུན་འཐུས་གཙང་དང་མང་ཚོགས་ལ་ནང་ཆོས་ངོ་སྤྲོད། ལྷག་པར་དུ་ཆོས་ལུགས་གཞན་དང་མཐུན་སྒྲིལ་གོང་སྤེལ་ཆེད་དུ་དམིགས་པ་ཞིག་ཡིན་པ་རེད། ད་ལན་གྱི་དབྱར་ཆོས་འདིའི་ཐོག་ལ་དྭགས་སླེ་དང་ནུབ་ར། དེ་བཞིན་ཟངས་དཀར་སོགས་ནས་ཆོས་བརྒྱུད་རིས་མེད་ཀྱི་དགོན་ཁག་ ༢༡ གི་དགེ་བཙུན་གྱི་སྐུ་ཚབ་དང་ཁྱད་པར་ཉེ་འཁོར་སློབ་གྲྭ་ཁག་ ༡༠ ལྷག་གི་སློབ་ཕྲུག་སྐུ་ཚབ་བཅས་ཁྱོན་ མཉམ་ཞུགས་གནང་མཁན་མི་གྲངས་ ༣༠༠ ལྷག་བྱུང་ཡོད་པ་དང་། ཉིན་གྲངས་ ༡༥ དེའི་རིང་ལ་གདན་ཞུས་ཆོས་བརྒྱུད་སོ་སོའི་ནང་པའི་དགེ་བཤེས་ཁག་ཅིག་དང་། ས་གནས་ཀྱི་ཡི་ཤུ་དང་ཁ་ཆེའི་མཁས་པ་འགའ།  མི་རིགས་དང་ཆོས་ལུགས་མཐུན་སྒྲིིལ་གྱི་གལ་གནད་དང་ཆང་རག་གི་ཉེས་དམིགས། ནང་ཆོས་དང་ཚན་རིག་གྱི་འབྲེལ་བའི་སྐོར།  བདེན་བཞི་དང་ཐེག་པ་གསུམ་སོགས་བརྗོད་གཞི་སྣ་མང་ཐོག་གསུང་བཤད་དང་། ཉིན་ལྟར་བྱང་ཆུབ་ལམ་སྒྲོན་གྱི་གཞུང་ཐོག་དམ་བཅའ་དང་རྩོད་པ་སོགས་རྩོད་གནང་ཡོད་པ་རེད། ལོ་རྗེས་མའི་ལ་དྭགས་ནང་གི་་དབྱར་ཆོས་ཆེན་མོ་དེ་ནུབ་ར་བདེ་སྐྱིད་དགོན་དུ་ཚོགས་རྒྱུའི་གསལ་བསྒྲགས་བསྐྱངས་པའི་ཐོག་ཁ་སང་ལ་དྭགས་པའི་གཞས་པ་དང་གཞས་མ་རྣམས་ནས་བྱོན་པ་ལེགས་སོ། བྱོན་པ་ལེགས་སོ། ༸རྒྱལ་དབང་བསྟན་འཛིན་རྒྱ་མཚོ་མཁྱེན། སེམས་པ་སྐྱིད་དོ། རང་ཡུལ་ལ་དྭགས་མི་དམངས་ཚང་མ་ཞེས་བསྟོད་དབྱངས་ཕུལ་ནས། ཁྲིིག་དགོན་དབྱར་ཆོས་ཆེན་མོ་ཐེངས་བཞི་པ་དེ་རྒྱལ་ཁའི་ངང་མཇུག་སྒྲིིལ་གནང་ཡོད་པ་རེད། རྩ་བའི་ཟླ་ ༨ ཚེས་ ༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་དབྱར་ཆོས་ཆེན་མོ་དབུ་འབྱེད་བསྐྱངས་པའི་སྐབས་ད་བར་ཚོགས་གྲུབ་པའི་དབྱར་ཆོས་དེ་དག་ཡག་པོ་བྱུང་ཡོད་པར་བསྔགས་བརྗོད་ཀྱིས་ཐུགས་རྗེ་ཞུ་དང་སྦྲགས། ལས་རིམ་འདི་ལྟ་བུ་བརྒྱུད་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གནང་གལ་ཡིན་པ་བཀའ་སློབ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་འདས་པའི་ཉིན་གྲངས་བཞིའི་རིང་ཞི་བའི་ཚལ་དུ་སྤྱོད་འཇུག་ཆེན་མོའི་བཀའ་ཆོས་བཀྲིན་བསྐྱངས་ཡོད་པ་ལྟར། ཁ་སང་ཚེས་ ༢༡ ཉིན་མགོན་པོ་མཆོག་གིས་ཐེངས་འདིའི་ཆོས་འབྲེལ་ཉིན་མཐའ་མའི་ཐོག་ཕྱི་ནང་གི་དད་ལྡན་མང་ཚོགས་ཁྲི་གཉིས་ལྷག་ལ་ཐུགས་རྗེ་ཆེན་པོའི་བཀའ་དབང་བཀྲིན་གནང་སོང་། སྐབས་དེར་༸གོང་ས་མཆོག་གིས་ཐོག་མར་མང་ཚོགས་ལ་ཐུགས་རྗེ་ཆེན་པོའི་དབང་འདི་ནི་དགེ་སློང་མ་པདྨོ་ནས་བརྒྱུད་པའི་གསང་སྔགས་རྡོ་རྗེ་ཐེག་པའི་ཆོས་འཁོར་ཞིག་ཆགས་ཡོད་པར་ངོ་སྤྲོད་དང་འབྲེལ། གསང་སྔགས་རྡོ་རྗེ་ཐེག་པ་ཞེས་པའི་ཚིག་དོན་སྐོར་དང་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ནི་བོད་གངས་ཅན་ལྗོངས་དང་དམིགས་བསལ་ལས་འབྲེལ་ཡོད་པ་སོགས་བཀའ་བསྩལ་དང་། ཁྱད་པར་དུ་༸གང་ཉིད་མཆོག་གིས་དབང་གྲལ་དུ་འཁོད་པའི་དད་ལྡན་པ་རྣམས་ལ་ལམ་སྟོན་བསྩལ་བའི་ཁྲོད་དབང་ཞུ་སྐབས་དམིགས་པ་གཞན་དོན་ཁོ་ནར་སེམས་བསྐྱེད་དགོས་གལ་ཆེ་བས་རང་ཉིད་ཀྱི་དམིགས་པ་བཞིན་ནམ་ཡང་ཀུན་སློང་འཕྱུག་རྒྱུ་མེད་པའི་ལམ་སྟོན་བསྩལ་ཡོད་པ་རེད། ༸གོང་ས་མཆོག་གིས་ཆོས་ཀྱི་སྙིང་པོ་མི་དང་སེམས་ཅན་གཞན་ལ་སེམས་བརྣག་མ་བྱེད་པར་སེམས་པ་བཟང་པོ་དང་དྲང་པོ། དེ་བཞིན་མིས་མི་ལ་རོགས་བྱ་རྒྱུ་གལ་ཆེ་བའི་བཀའ་བསྩལ་དང་ཆབས་ཅིག ཆོས་ཀྱི་བྱིན་རླབས་ཟེར་བ་དེ་གཙོ་བོ་ཉམས་ལེན་ལ་ཐུག་ཡོད་པ་བཀའ་གནང་ཡོད། ཉིན་གུང་ཚོུད་ ༡༡།༣༠ སྟེང་ཐུགས་རྗེ་ཆེན་པོའི་བཀའ་དབང་ཡོངས་སུ་གྲུབ་བསྟུན། ༸གོང་ས་མཆོག་གིས་ལ་དྭགས་པ་མང་ཚོགས་ལ་སང་ཞོགས་སླང་འཇལ་རྒྱུའི་བཀའ་བཞེས་བཟང་པོ་བསྩལ་སོང་བ་དང་། ལ་དྭགས་པ་རྣམས་ལ་ཁོར་ཡུག་ཐོག་དོ་སྣང་། སྒོས་སུ་ཤིང་སྣ་འདེབས་འཛུགས་དང་ཚལ་ཞིང་རིགས་དོན་གཉེར་བྱ་གལ་ཡིན་པའི་དམིགས་བསལ་བཀའ་སློབ་གནང་ཡོད་པ་རེད། ཐེངས་འདིའི་ཆིབས་སྒྱུར་གོ་སྒྲོག་ཚོགས་པ་ལ་དྭགས་ནང་པའི་ཚོགས་འདུའི་ཚོགས་གཙོ་སྐུ་ཞབས་ཚེ་དབང་འཕྲིན་ལས་ལགས་ཀྱིས་ཁ་སང་བཀའ་དབང་ལེགས་གྲུབ་རྗེས་༸གོང་ས་མཆོག་ལ་བླ་མ་མཁྱེན། གོང་མ་མཁྱེན། གོང་མའི་བདག་པོ་མཁྱེན་ཅེས་སོགས་གུས་ཕྱག་སྔོན་དུ་འགྲོ་བའི་ཐོག་ཐུགས་རྗེ་ཆེ་ཞུའི་གསུང་བཤད་གནང་སྐབས། ༸གང་ཉིད་མཆོག་ས་རེས་ས་གནས་སུ་ཟླ་བ་གཅིག་མན་ཙམ་རིང་ལ་༸ཞབས་སོར་བཀྲིན་བསྐྱངས་ནས་ཆོས་ཀྱི་འཁོར་ལོ་རྒྱ་ཆེ་སྐོར་བར་བཀྲིན་རྗེས་དྲན་གྱི་ཐུགས་རྗེ་ཆེ་ཞུ་དང་། ལྷག་པར་དུ་མགོན་པོ་མཆོག་གིས་ཐེངས་འདིའི་མཛད་འཕྲིན་ཁོངས་ཆོས་ལུགས་གཞན་གྱི་མི་སྣ་དང་མཇལ་མོལ་སྔར་ལྷག་གནང་ཡོད་པ་དེས་ལ་དྭགས་ཀྱི་མཐུན་སྒྲིལ་གོང་འཕེལ་སྲ་བརྟན་དུ་བཏང་ཡོད་སྐོར་ཞུས་པ་མ་ཟད། ལྷག་དོན་ལ་དྭགས་མང་ཚོགས་ནས་༸རྒྱལ་བའི་བཀའ་བཞིན་ཆོས་ལུགས་མཐུན་སྒྲིལ་སོགས་ཀྱི་ཐད་སྔར་ལྷག་འབད་བརྩོན་ཞུས་པའི་ཐོག་མགོན་པོ་༸གང་ཉིད་མཆོག་ཡང་ནས་ཡང་དུ་ལ་དྭགས་སུ་ཆིབས་བསྒྱུར་མཛད་སྐྱོང་ཡོང་བའི་གསོལ་འདེབས་ཞུས་ཡོད་པ་རེད། རྩ་བའི་༸གོང་ས་མཆོག་གིས་ལ་དྭགས་ཞི་བའི་ཚལ་དུ་ཉིན་གྲངས་བཞིའི་རིང་གི་བཀའ་ཆོས་སྩལ་བའི་ཐོག་ཆེད་བཅར་ཞུས་པའི་ལ་དྭགས་བྱང་ཐང་དང་ནུབ་ར། དེ་བཞིན་ཟངས་དཀར་སོགས་ལུང་ཁུག་ཁག་ཅིག་གི་དད་ལྡན་མང་ཚོགས་རྣམས་དྲིན་ཅན་རྩ་བའི་བླ་མར་དད་པ་དམ་ཚིག་གཡོ་བ་མེད་པའི་ངང་ལག་ཟུང་སྤྲལ་བར་བཀོད་དེ་གསོལ་བ་སྨོན་ལམ་དང་བཅས་རང་ཡུལ་ཕྱོགས་སུ་ཐོན་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཁྲི་ཚོགས་བརྒལ་བར་བྱང་ཆུབ་ཀྱི་སེམས་ལས་ཕན་ཐོགས་ཆེ་བ་ཅི་ཡང་མེད་སྐོར་བཀའ་བསྩལ་སོང་། དེ་རིང་ཟླ་ ༨ ཚེས་ ༢༠ ཉིན་༸གོང་ས་༸སྐྱབས་མགོན་ཆེན་པོ་མཆོ་གིས་ལ་དྭགས་གླེར་རྟེན་གཞི་བྱས་པའི་ཞི་བ་ཚལ་གསུང་ཆོས་ར་བའི་བཞུགས་ཁྲིར་༸ཞབས་སོར་འཁོད་བསྟུན། ལ་དྭགས་ས་གནས་མི་དམངས་གཙོས་ཕྱི་ནང་གི་དད་ལྡན་ཆོས་ཞུ་བ་ཁྲི་ཚོགས་བརྒལ་བར་བྱང་ཆུབ་སེམས་ཀྱི་གལ་གནད་སྐོར་དང་ཚོགས་བསགས་སྒྲིབ་བྱང་གི་མཆོག རང་གཞན་ཀུན་གྱི་གནས་སྐབས་དང་མཐར་ཐུག་གི་བདེ་སྐྱིད་ཀྱི་རྩ་བ་ནི་བྱང་ཆུབ་སེམས་ཡིན་སྟབས། བྱང་ཆུབ་ཀྱི་སེམས་དེ་ལས་ཕན་ཐོགས་ཆེ་བ་ཅི་ཡང་མེད་སྐོར་ལམ་སྟོན་བསྩལ་གནང་སོང་། ༸གོང་ས་མཆོག་གིས་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེའུ་དང་པོ་བྱང་སེམས་ཀྱི་ཕན་ཡོན་སྐོར་ནས་ལེའུ་གསུམ་པ་བྱང་སེམས་ཡོངས་སུ་བཟུང་བའི་བར་བཀའ་ཆོས་ལེགས་གྲུབ་མཛད་པ་དང་ཆབས་ཅིག ཁྱད་པར་དུ་ནཱ་ལེནྡྲའི་ཆོས་བརྒྱུད་ཡོངས་རྫོགས་བོད་ཡོག་ཐོག་སློབ་གཉེར་བྱ་རྒྱུ་ཡོད་པས་སངས་རྒྱས་བཅོམ་ལྡན་འདས་ཀྱི་བཀའ་དགོངས་འཐུས་ཚང་ཞིག་རྟོགས་པར་བཀའ་འགྱུར་དང་དེའི་དགོངས་འགྲེལ་བསྟན་བཅོས་རྣམས་ལ་དོ་སྣང་དང་དེར་སློབ་སྦྱོང་གནང་གལ་ཆེ་བ་ཡིན་སྐོར་བཀའ་བསྩལ་ཡོད་པ་རེད། དེ་རིང་ཉིན་མཐའ་མའི་ཆོས་འབྲེལ་སྐབས་༸གོང་ས་མཆོག་གིས་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཆོས་འབྲེལ་ལེགས་དང་བསྟུན། གསུང་ཆོས་གོ་སྒྲིག་ཚོགས་ཆུང་ལ་དྭགས་ནང་པའི་ཚོགས་འདུ་ཚོགས་པས་༸གང་ཉིད་མཆོག་ལ་བཀྲིན་གཏང་རག་ཚུལ་དུ་མཎྜལ་འདེབས་འབུལ་དང་མང་ཚོགས་ཚོས་ཀྱང་སྟོན་པ་ཐུབ་དབང་གི་སྐུ་བརྙན་གཙོས་བརྟན་བཞུགས་ཀྱི་འབུལ་རྫས་རྣམས་འདེགས་འབུལ་ཞུས་ཡོད་པ་རེད། མཛད་འཆར་ལྟར་ན། སང་ཉིན་ཚེས་ ༢༡ སྟེ་ཆོས་འབྲེལ་ཉིན་མཐའ་མའི་ཐོག་༸གང་ཉིད་མཆོག་གིས་དད་ལྡན་མང་ཚོགས་རྣམས་ལ་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ལ་དྭགས་ཞི་བའི་ཚལ་དུ་ཆོས་འབྲེལ་ཉིན་གཉིས་པ་བཀྲིན་བསྐྱངས་པའི་ཁྲོད། ད་ལྟའི་དུས་འདིར་བརྟག་དཔྱད་དང་ཚན་རིག་སློབ་སྦྱོང་བྱ་རྒྱུ་གལ་གནད་ཆེ་སྐོར་སྩལ་དང་སྦྲགས་ཏེ་ནང་པའི་ལྟ་གྲུབ་ཀྱི་ཆ་ནས་བཤད་ན་ཚན་རིག་པ་ང་ཚོའི་གྲོགས་པོ་ཆགས་ཡོད་པ་རེད་ཅེས་བཀའ་བསྩལ་སོང་། དེ་རིང་ཟླ་ ༨ ཚེས་ ༡༩ ཉིན་གྱི་སྔ་དྲོ་ཚོུད་ ༨།༣༠ སྟེང་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཞི་བ་ཚལ་གསུང་ཆོས་ར་བའི་བཞུགས་ཁྲིར་༸ཞབས་སོར་འཁོད་བསྟུན་པཎ་གྲུབ་ ༡༧ གསོལ་འདེབས་གསུང་འདོན་མཛད་པ་དང་ཆབས་ཅིག  གསོལ་འདེབས་སྨོན་ལམ་དེའི་མཛད་བྱང་ལས། རང་རེ་སངས་རྒྱས་ཀྱི་རྗེས་འཇུག་པ་རྣམས་སངས་རྒྱས་ཀྱི་ཆོས་ཚུལ་ལ་ཤེས་ནས་དད་པ་ཐོབ་པ་ཞིག་དགོས་གལ་ཤིན་ཏུ་ཆེ་བས་གཟུ་བོའི་བློས་ཐེ་ཚོམ་གྱི་སྒོ་ནས་ཞིབ་མོར་བརྟགས་ཤིང་དཔྱད་སྟེ། ཞེས་སོགས་ལས། སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་པར་དབང་རྣོན་ཆོས་ཀྱི་རྗེས་འབྲངས་ལྟར་རྒྱུ་མཚན་བརྟག་དཔྱད་བྱེད་དགོས་རྒྱུ་ནི་ཤིན་ཏུ་ནས་གལ་ཆེ་ཡིན་པ་མ་ཟད། ལྷག་དོན་ཐེ་ཚོམ་དགོས་རྒྱུ་དེའང་གནད་ཆེ་ཡིན་པར་བཀའ་གནང་ཡོད་པ་རེད། ཁྱད་པར་དུ་མགོན་པོ་མཆོག་གིས་སྐབས་དེར་བརྟག་དཔྱད་དང་ཚན་རིག་སློབ་སྦྱོང་བྱ་རྒྱུ་གལ་འགངས་ཆེན་པོ་ཡིན་སྐོར་དང་འབྲེལ།  ༸གང་ཉིད་མཆོག་གིས་ད་བར་འདས་པའི་ལོ་ངོ་ ༣༠ ཙམ་ནས་ཚན་རིག་པ་འདྲ་མིན་དང་ལྷན་དུ་གཞི་རྐང་། སེམས་ཁམས་རིག་པ་དང་ཀླད་རྩའི་ཚན་རིག འཇིག་རྟེན་ཆགས་རིམ་དང་དངོས་ཁམས་རིག་པ་བཅས་བརྗོད་གཞི་བཞིའི་ཐོག་བཀའ་བསྡུར་གནང་པའི་ཁྲོད་སྐབས་རེ་ཚན་རིག་གྲུབ་དོན་ནས་ཤེས་བྱ་ནང་འདྲེན་བྱ་རྒྱུ་ཡོད་པ་དང་། མཚམས་རེ་ནང་ཆོས་ཀྱིས་ཕར་ཕན་ཐོགས་གྲུབ་ཡག་ཡོད་སྟབས། ཁ་ཅིག་གིས་མཐོང་ཚུལ་ལ་ཚན་རིག་དེ་ཆོས་དང་འགལ་བ་ཡིན་པ་དང་དེ་བཞིན་དོན་མེད་པ་བཟོ་མཁན་ཞིག་ཏུ་འདོད་མཁན་ཡོད་རུང་། ནང་པའི་ལྟ་གྲུབ་ཀྱི་ཆ་ནས་ཚན་རིག་པ་ང་ཚོའི་གྲོགས་པོ་ཆགས་ཡོད་པ་བཀའ་གནང་སོང་།  ༸གོང་ས་མཆོག་གིས་མུ་མཐུད་རབ་བྱུང་ཕོ་མོ་གཙོར་གྱུར་པའི་དད་ལྡན་སྐྱ་སེར་མང་ཚོགས་ཚང་མས་ཚན་རིག་དང་ནང་པའི་ལྟ་གྲུབ་ལ་སློབ་སྦྱོང་བྱེད་པའི་ཐོག་ནས་སངས་རྒྱས་ཀྱི་བསྟན་པ་རྒྱས་པ་བྱ་དགོས་ཀྱི་རེད་ཅེས་ལམ་སྟོན་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཉིན་གཉིས་པའི་བཀའ་ཆོས་སྐབས་སྤྱོད་འཇུག་ཆེན་མོའི་ལེའུ་དགུ་པ་ཤེས་རབ་ཀྱི་ལེའུ་ནས་གཞུང་དངོས་དབུ་འཛུགས་མཛད་ཡོད་ཀྱང་། སྐབས་དེར་༸གང་ཉིད་མཆོག་གིས་ཁ་སང་དང་དེ་རིང་གི་ཆོས་ཐུན་དུས་ཚོད་མང་ཆེ་བ་དེ་ནང་ཆོས་ངོ་སྤྲོད་དང་ཤེས་རབ་སྙིང་པོ་སྤྱི་བཤད། དེ་བཞིན་པཎ་གྲུབ་ ༡༧ གསོལ་འདེབས་ཐོག་བཀའ་ཁྲིད་བསྩལ་དོན་ནི་སྔོན་བྱོན་ནཱ་ལེཎྡྲའི་མཁས་པ་དེ་དག་གིས་གཏན་ལ་ཕབ་པའི་གཞུང་དག་དེང་སང་དུས་རབས་ཉེར་གཅིག་པ་འདིའི་ནང་ཁ་ཡོད་ལག་ཡོད་ཀྱི་ཕན་ཐོགས་ཀྱི་ཡོད་སྐོར་བཀའ་བསྩལ་མཛད་ཡོད། མཛད་འཆར་ལྟར་ན། སང་ཚེས་ ༢༠ ཉིན་གསུང་ཆོས་གོ་སྒྲིག་ཚོགས་ཆུང་ལ་དྭགས་ནང་པའི་ཚོགས་འདུས་ཀྱིས་༸གོང་ས་མཆོག་ལ་༸སྐུ་ཚེ་བསྐལ་བརྒྱར་བརྟན་ཕྱིར་བརྟན་བཞུགས་རྒྱས་པ་ཞིག་བསྟར་འབུལ་ཞུ་གྲུབ་རྗེས། ༸གང་ཉིད་མཆོག་གིས་སྤྱོད་འཇུག་གི་བཀའ་ཆོས་མུ་མཐུད་སྩལ་གནང་མཛད་ཀྱི་ཡོད་པ་དང་།  གནངས་ཚེས་ ༢༡ ཉིན་༸གོང་ས་མཆོག་གིས་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་གི་ཡོད་པ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོ་གིས་རྒྱུན་ཕྱག་གསུམ་པ་དང་ཤེས་རབ་སྙིང་པོ་སྔོན་དུ་འགྲོ་བའི་ཐོག་ལ་དྭགས་པ་གཙོ་བོར་གྱུར་པའི་བོད་མི་དང་། གཞན་ཡང་ཕྱི་རྒྱལ་དད་ལྡན་པ་ཆིག་ཁྲི་བརྒལ་བར་ཉིན་བཞིའི་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་བསྐྱངས་གནང་སོང་། དེའང་ལ་དྭགས་ནང་པའི་ཚོགས་འདུས་ཇི་ལྟར་གསོལ་བ་བཏབ་པ་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཚེས་ ༡༨ ཉིན་ནས་དབུ་འཛུགས་ཀྱིས་ཚེས་ ༢༡ བར་མང་ཚོགས་ཚོར་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་དང་ཉིན་མཐའ་མར་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་གི་ཡོད་པ་རེད། དེ་རིང་ཆོས་འབྲེལ་ཉིན་དང་པོའི་སྔ་དྲོ་ཚོུད་ ༨།༣༠ ནས་ཉིན་དགུང་ཚོུད་ ༡༢།༠༠ བར་༸གོང་ས་མཆོག་གིས་མང་ཚོགས་ལ་སྔོན་འགྲོའི་ཆོས་བཤད་སྐབས་ནང་ཆོས་ངོ་སྤྲོད་དང་ཤེས་རབ་སྙིང་པོའི་བཀའ་ཁྲིད་བཀྲིན་བསྩལ་ཏེ་རྐང་ཆོས་ཞུ་དགོས་དོན་དང་ཆོས་ཤེས་དགོས་གལ། ཀུན་སློང་བཅོས་སྟངས་དང་། ལྷག་དོན་སངས་རྒྱས་བཅོམ་ལྡན་འདས་ཀྱི་མཛད་རྣམ་སྐོར་གསུངས་ནས་ཉོན་མོངས་སྤོང་རིམ་སོགས་ཀྱི་སྐོར་ལ་བཀའ་གནང་སོང་། མགོན་པོ་༸གང་ཉིད་མཆོག་གིས་ཐོག་མར་དེ་གར་འདུས་པའི་དད་ལྡན་པ་ཡོངས་ལ་ང་ཚོ་ཆོས་ལ་དད་པ་ཡོད་མཁན་ཚོས་སངས་རྒྱས་པའི་ཆོས་ཟེར་བ་དེའི་ངོ་བོ་དང་ཁྱད་པར་གང་འདྲ་ཞིག་ཡོད་མེད་མ་ཤེས་པར་དད་པ་དེ་ལམ་ལུགས་སྲོལ་ལྟར་ཕྱིན་པ་ཡིན་ན། ང་ཚོ་དུས་རབས་ཉེར་གཅིག་པ་དང་མཐུན་པ་བྱུང་ཡོད་མ་རེད་ཅེས་བཀའ་ནན་སྩལ་ཡོད་པ་རེད།   ད་དུང་མགོན་པོ་མཆོག་གིས་སྐབས་འདིའི་འཆད་པར་བྱ་བའི་སྤྱོད་འཇུག་གི་གཞུང་དེ་ནི་བྱང་ཆུབ་སེམས་དཔའི་སྡེ་སྣོད་དང་། ལྷག་དོན་རྣམ་མཁྱེན་གྱི་གོ་འཕང་སྒྲུབ་ཡག་ཅིག་ཆགས་ཡོད་སྟབས། བླ་མ་དང་སློབ་མ་གཉིས་ཀས་ཆོས་ལ་འཇུག་པའི་སྒོ་ཀུན་སློང་རྣམ་པར་དག་པ་བཅོས་དགོས་རྒྱུ་གལ་ཆེ་བའི་སྐོར་ལམ་སྟོན་སྩལ་སོང་བ་དང། ཁྱད་པར་དུ་དེ་རིང་ང་ཚོ་འདིར་ཆོས་ཉན་འཆད་བྱེད་ཡག་གི་དམིགས་ཡུལ་དེ་སེམས་མི་སྐྱིད་པ་བཟོ་མཁན་ཉོན་མོངས་ལ་གཉེན་པོ་བསྟེན་ཡག་དེ་རེད་ཅེས་བཀའ་སྩལ་སོང་། མགོན་པོ་མཆོག་གིས་ཉོན་མོངས་ལ་གཉེན་པོ་བསྟེན་སྟངས་སྐོར་བཀའ་གནང་པའི་ཁྲོད་མང་ཚོགས་ལ་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་དཀའ་སྤྱད་སྙིང་རུས་མཛད་ནས་སངས་རྒྱས་ཀྱི་གོ་འཕར་ཐོབ་ཡོད་པའི་མཛད་རྣམ་སྙིང་བསྡུས་ཤིག་ཀྱང་ངོ་སྤྲོད་གནང་ཡོད་པ་རེད། དེ་རིང་སྔ་དྲོའི་ཆོས་ཐུན་སྐབས་གཞན་ཡང་༸གོང་ས་མཆོག་གིས་མང་ཚོགས་ཚོས་བཀའ་འདྲི་ཞུས་པར་བཀའ་ལན་མཛད་པའི་ཁྲོད། ཆོས་ཁས་མི་ལེན་མཁན་ཞིག་གིས་སྙིང་རྗེ་ཉམས་ལེན་ཇི་ལྟར་བྱ་དགོས་སམ་ཞེས་བཀའ་འདྲི་ཞུས་པར་༸གང་ཉིད་མཆོག་གིས་བཀའ་ལན་སྩལ་དོན། ཚན་རིག་པ་ཚོས་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེའི་རང་བཞིན་ཡིན་པ་བཤད་ཀྱི་འདུག་སྟབས། གང་ཟག་སུ་འདྲ་ཞིག་ཡིན་རུང་དེ་ལ་རང་ཉིད་ཀྱི་དངོས་ཀྱི་མྱོང་བ་དང་འབྲེལ་ཏེ་སློབ་གསོ་ཡག་པོ་ཞིག་སྤྲོད་པ་ཡིན་ན་འཛམ་བུ་གླིང་འདི་བྱམས་བརྩེ་དང་ལྡན་པ་ཞིག་སྐྲུན་ཐུབ་ངེས་ཡིན་སྐོར་སོགས་དཔེ་དང་བཅས་བཀའ་སྩལ་ཡོད་པ་རེད། ཤེས་རྟོགས་བྱུང་བར་ཐེངས་འདིའི་ཆོས་འབྲེལ་ཐོག་རྒྱ་རིགས་གཙོས་པའི་ཕྱི་རྒྱལ་བ་ཉི་བརྒྱ་ཙམ་དང་། ཁྱད་པར་དུ་རླངས་འཁོར་ནང་ཉི་མ་གཉིས་གསུམ་འགྲུལ་བཞུད་བྱེད་དགོས་པའི་ལ་དྭགས་བྱང་ཐང་དང་ནུབ་ར། དེ་བཞིན་ཟངས་དཀར་སོགས་ལུང་ཁུག་ཁག་ཅིག་ནས་དད་ལྡན་ཆོས་ཞུ་བ་བརྒྱ་སྐོར་ལྷག་བཅར་ཡོད་པ་རེད་འདུག