༸གོང་ས་མཆོག

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གྲོང་ཁྱེར་སླེ་ནས་སྤྱི་ལེ་ ༡༨ ཙམ་གྱི་སར་ཆགས་པའི་ཤེས་རབ་སྐྱེད་ཚལ་དཔེ་མཛོད་ཁང་དབུ་འབྱེད་རབ་གནས་བཀྲིན་སྩལ་གནང་མཛད་འདུགཤེས་རབ་སྐྱེད་ཚལ་གླིང་དཔེ་མཛོད་ཁང་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་གཞིར་བཟུང་སྐྱབས་རྗེ་ཁྲིག་སེ་རིན་པོ་ཆེ་མཆོག་གིས་ཐུགས་འགན་གཙོ་བཞེས་ཐོག་བཞེངས་བསྐྲུན་གནང་པ་ཞིག་ཡིན་པ་དང་།དེ་རིང་དཔེ་མཛོད་ཁང་དངོས་སུ་དབུ་འབྱེད་ཀྱི་མཛད་སྒོའི་ཐོག་སླེ་གྲོང་ཁྱེར་གཡས་གཡོན་གྱི་སློབ་ཕྲུག་དང་།  མང་ཚོགས་བཅས་མི་གྲངས་དུ་མ་འདུ་འཛོམས་བྱུང་ཡོད་པ་དང་།   བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར།   དེ་རིང་སླར་ཡང་མང་ཚོགས་ཚང་མས་མཛའ་བརྩེའི་རྣམ་འགྱུར་བཏོན་པར་ཐུགས་རྗེ་ཆེ་ཞུས་དང་སྦྲགས།       ལ་དྭགས་མང་ཚོགས་ཀྱི་མཐུན་སྒྲིལ་ལ་ཡིད་རངས་བསྔགས་བརྗོད་མཛད་དེ།   ༸གང་ཉིད་ཀྱི་ཐུགས་བསྐྱེད་དམ་བཅའ་བཞིའི་ནང་ནས་ཆོས་ལུགས་ཕན་ཚུན་དབར་མཐུན་འབྲེལ་གོང་སྤེལ་ཡོང་ཐབས་སྐོར་བཀའ་སྩལ་གནང་པ་དང་སྦྲགས།   མང་ཚོགས་ཚང་མའི་ངོས་ནས་རང་ཉིད་ཀྱི་རྒྱལ་ཁབ་དང་།  མི་རིགས།  ཆོས་ལུགས་བཅས་ལ་ཞེན་ཆགས་གཅིག་པུ་མིན་པར་རྒྱ་ཆེ་ས་ནས་གོ་ལ་གཅིག་འགྱུར་གྱི་འདུ་ཤེས་ཐོག་བསམ་བློ་གཏང་དགོས་པ་དང་།   སེམས་བཟང་པོ་བྱེད་རྒྱུ་དེ་རང་གཞན་ཀུན་གྱི་ཞི་བདེའི་རྩ་བ་ཡིན་པ་བཅས་ཀྱི་ལམ་སྟོན་སྩལ་གནང་ཡོད། ༸གང་ཉིད་ནས་ད་དུང་།   བོད་ཀྱི་ནང་པའི་ཆོས་དང་སྐད་ཡིག་བཅས་པ་དུས་ཪབས་བདུན་པ་བརྒྱད་པ་ནས་ཡོད་པའི་བྱུང་རབས་ལོ་རྒྱུས་ངོ་སྤྲོད་སྩལ་གནང་མཛད་པ་དང་བསྟུན།  བོད་པའི་སྐད་དང་ཡི་གེ་རྒྱུན་སྤྱོད་བྱེད་མཁན་ཚོར་དཔལ་ན་ལན་ཌའི་ནང་པའི་ཆོས་ཀྱི་གོ་དོན་གཏིང་ཟབ་པོ་ཡོད་པ་དང་། དེའི་དཔེ་མཚོན་ནི།   ཆབ་སྲིད་ཀྱི་ཐོག་ནས་བོད་དེ་རྒྱ་ནག་དམར་པོའི་བཙན་དབང་འོག་ཏུ་གནས་ཡོད་རུང་། ཆོས་ཕྱོགས་ཀྱི་ཐོག་ནས་དེང་སྐབས་རྒྱ་རིགས་ཤེས་ཡོན་ཅན་མང་པོ་ཞིག་གིས་བོད་ཀྱི་ནང་ཆོས་ལ་ཡིད་རང་བསྔགས་བརྗོད་དང་སྦྲགས་ཉམས་ལེན་བྱེད་མཁན་རྗེ་མང་དུ་འགྲོ་བཞིན་པའི་སྐོར་ཡང་བཀའ་སྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གི་སྐབས་དེར་ད་དུང་།   གོ་ལའི་ཚ་དྲོད་འཕེལ་བཞིན་སྐོར་མང་ཚོགས་ལ་དྲན་སྐུལ་དང་སྦྲགས།   རྒྱ་གར་གྱི་ཁོར་ཡུག་ལས་འགུལ་བ་དམ་པ་ Bahuguna མཆོག་ནས་གང་ཉིད་ལ་ཧི་མ་ལ་ཡའི་རི་རྒྱུད་ཁག་ཏུ་ ཤིང་ནག་འདེབས་འཛུགས་མང་ཙམ་བྱ་དགོས་པའི་ལམ་སྟོན་གནང་པ་ལྟར། མང་ཚོགས་ཚང་མའི་ངོས་ནས་དེ་ལྟར་གནང་དགོས་པའི་སྐུལ་མ་ཡང་མཛད་ཡོད་པ་རེད།  མཛད་སྒོའི་ཐོག་སློབ་ཕྲུག་ཁག་གཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་འདྲི་ལམ་སྟོན་ཁག་གཅིག་ཞུས་པ་མ་ཟད།   སྐབས་དེར་ཤེས་རབ་སྐྱེད་ཚལ་གླིང་དཔེ་མཛོད་ཁང་དངོས་སུ་གསར་འཛུགས་ཀྱི་ཐུགས་འགན་བཞེས་མཁན་སྐྱབས་རྗེ་ཁྲིག་སེ་རིན་པོ་ཆེ་མཆོག་ནས།  ༸གོང་ས་མཆོག་༸གང་ཉིད་ཀྱི་དཔེ་མཛོད་དངོས་སུ་དབུ་འབྱེད་བཀྲིན་བསྐྱངས་བར་ཐུགས་རྗེ་ཆེ་ཞུས་དང་།   ལྷག་པར་ད་བར་༸གང་ཉིད་ཀྱིས་ལམ་སྟོན་དང་དགོངས་གཞི་གཞིར་བཟུང་མ་འོངས་པར་ཡང་དེ་ལྟར་མུ་མཐུད་ཞུ་རྒྱུའི་དམ་བཅའ་ཡང་ཕུལ་གནང་མཛད་ཡོད།གཞི་རྩའི་ཤེས་རབ་སྐྱེད་ཚལ་གླིང་དཔེ་མཛོད་ཁང་དེ་ནི།  ཕྱི་ལོ་ ༢༠༡༨ ལོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐྱབས་རྗེ་ཁྲིག་སེ་རིན་པོ་ཆེ་མཆོག་ལ་ལ་དྭགས་མི་མང་དང་།  དེ་བཞིན་ཕྱི་ཕྱོགས་ཀྱི་མང་ཚོགས་བཅས་ལ་ཤེས་ཡོན་གྱི་ལྟེ་གནས་དཔེ་མཛོད་ཞིག་འཛུགས་བསྐྲུན་ཡོང་ཐབས་ཀྱི་ལམ་སྟོན་གནང་པ་གཞིར་བཟུང་ཕྱི་ལོ་ ༢༠༢༠ ལོའི་ལས་འཆར་ལེགས་གྲུབ་ཟིན་པ་ཞིག་དང།   དཔེ་མཛོད་ཁང་གི་ངོས་ནས་རྒྱུན་དུ་སློབ་ཕྲུག་རྣམ་ལ་ཆོས་ལུགས་ལ་མ་བརྟེན་པའི་བཟང་སྤྱོད་དང་།   ལྷག་པར་ཕྱི་ནང་མང་ཚོགས་ལ་ནང་ཆོས་ངོ་སྤྲོད་དང་།  རྒན་པ་ཚོར་ཡི་གེ་བྲིས་ཀློག་སོགས་ཀྱི་ཟབ་སྦྱོང་ཡང་གནང་གི་ཡོད་པ་རེད།   ཤེས་རབ་སྐྱེད་ཚལ་གླིང་དཔེ་མཛོད་ཀྱི་འགན་འཛིན་དགེ་བཤེས་འཇམ་དབྱངས་བཀྲིས་ལགས་ཀྱིས་དེའི་སྐོར་འདི་ག་རླུང་འཕྲིན་ཁང་ལ་ངོ་སྤྲོད་གནང་ཡོད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་ཐུགས་བསྐྱེད་དམ་བཅའ་བཞིའི་ནང་ནས་འཛམ་གླིང་ཆོས་ལུགས་ཕན་ཚུན་དབར་མཐུན་སྒྲིལ་གོང་སྤེལ་འདི་བཞིན་དེ་རིང་མགོན་པོ་༧གང་ཉིད་མཆོག་གིས་ཞི་བའི་ཚལ་ཕོ་བྲང་ནས་སླེའི་ཁྲོམ་གཞུང་ཁུལ་དུ་ཡོད་པའི་ཁ་ཆེ་དང་། ཡེ་ཤུའི་བཅས་ཀྱི་ལྷ་ཁང་སོ་སོར་གནས་གཟིགས་ཆིབས་བསྒྱུར་བཀྲིན་མཛད་པ་མ་ཟད། རྒྱུན་དུ་སྤྱི་ཚོགས་མཐུན་སྒྲིལ་དང་། གོ་ལ་གཅིག་འགྱུར་གྱི་འདུ་ཤེས་བསྐྲུན་ཐབས་སོགས་དགོངས་པ་རྒྱ་གང་ཆེར་བཞེས་དགོས་པ་སོགས་ཀྱི་ལམ་སྟོན་བཀྲིན་སྩལ་གནང་མཛད་ཡོད་པ་རེད།དེ་རིང་སྔ་དྲོའི་ཕྱག་ཚོད་ ༨ ནས་དབུ་འཛུགས་ཀྱིས་མགོན་པོ་༧གང་ཉིད་མཆོག་ཐོག་མར་སླེའི་ཇོ་ཁང་དུ་ཆེད་ཕེབས་མཛད་དེ་སྐབས་དེར་༧གང་ཉིད་མཆོག་གིས་དད་ལྡན་ནང་པ་ཚོར་ལ་དྭགས་མི་མང་ནས་དད་པ་དམ་ཚིག་གཡོ་མེད་ཡོད་པ་དང་འབྲེལ། ༧གང་ཉིད་མཆོག་ནས་ཀྱང་བསྟན་འགྲོའི་ཞབས་འདེགས་སྒོ་གང་ས་ནས་འགྲུབ་པའི་སེམས་སྐྱེད་ཐུགས་སྨོན་གནང་གི་ཡོད་སྐོར་བཀའ་བཞེས་སྨིན་སྩལ་དང་སྦྲགས། རྒྱུན་དུ་བཤད་སྒྲུབ་གཉིས་ཀྱི་ཐོག་ནས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་དགོས་པ་ལས་ལུས་ལ་ཆོས་གོས་གྱོན་པ་ཙམ་གྱི་ཕན་ཐོག་མེད་པའི་ལམ་སྟོན་ཡང་བཀའ་སྩལ་སོང་།མགོན་པོོ་༧གང་ཉིད་མཆོག་ཇོ་ཁང་གི་མཛད་འཆར་གྲུབ་མཚམས་སུ་སླེའི་ཁྲོམ་གཞུང་དབུས་སུ་ཡོད་པའི་སུ་ནིའི་ལྷ་ཁང་དང་དེ་རྗེས་ཤི་ཡ་ཁ་ཆེ་ཆོས་ལུགས་ཀྱི་ཨི་མམ་བ་ར་ལྷ་ཁང་བཅས་སུ་གནས་གཟིགས་མཛད་པ་དང་འབྲེལ། ༧གང་ཉིད་མཆོག་གིས་ཆོས་ལུགས་གང་འདྲ་ཞིག་ཡིན་རུང་བྱམས་སྙིང་རྗེའི་ལམ་སྟོན་གནང་གི་ཡོད་པར་དེ་མིན་ཆོས་ལུགས་ཀྱི་མིང་ཐོག་ནས་ཕན་ཚུན་གསོད་རེས་བྱེད་པ་སོགས་ནི་སེམས་ངོར་མི་ཤོང་པ་ཞིག་དང་། དཔེར་ན་ཁྱིམ་མཚེས་རྒྱལ་ཁབ་ཨ་ཕི་གྷ་ནིས་ཏན་ནང་དུ་ཤི་ཡ་དང་སུན་ནིའི་བར་གསོད་རེས་བྱེད་ཀྱི་ཡོད་པ་དེ་ནི་སེམས་སྐྱོ་དགོས་པའི་གནད་དོན་ཞིག་ཡིན་པ་དེ་ལྟ་བུའི་གནས་སྟངས་ཀྱི་རྐྱེན་པས་མགོན་པོ་༧གང་ཉིད་མཆོག་ནས་ཐུགས་བསྐྱེད་དམ་བཅའ་འདི་བཞིན་ཆོས་ལུགས་ཕན་ཚུན་མཐུན་སྒྲིལ་གོང་སྤེལ་ཡོང་ཐབས་དེ་ཡིན་ཅེས་བཀའ་སྩལ་མཛད་པ་མ་ཟད། སྤྱིར་སྟངས་ཆོས་ལུགས་སོ་སོར་ལྟ་གྲུབ་མི་འདྲ་བ་ཡོད་ཀྱང་དམིགས་ཡུལ་གཞན་ཕན་གྲུབ་ཐབས་གཅིག་མཚུངས་ཡིན་པའི་ལམ་སྟོན་སོགས་སྩལ་ཡོད།དེ་འབྲེལ་ཤི་ཡ་ཁ་ཆེའི་ལྷ་ཁང་དེའི་ཚོགས་གཙོ་གཞོན་པས་༧གོང་ས་༧སྐྱབས་མགོན་ཆེན་པོ་མཆོག་དྭགས་སུ་ག་དུས་ཆིབས་བསྒྱུར་གནང་བ་ཡིན་ནའི་ང་ཚོའི་ལྷ་ཁང་ནང་ཆེད་ཕེབས་གནང་གི་ཡོད་པ་དེ་ནི་སྐལ་པ་བཟང་པོ་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། ༧གང་ཉིད་མཆོག་ཁུལ་འདིར་ཆིབས་བསྒྱུར་གནང་བའི་བརྒྱུད་ང་ཚོ་ལ་དྭགས་མི་མང་དབར་མཛའ་བརྩེ་གོང་འཕེལ་དང་ཕན་ཚུན་གཅིག་ཕན་གཅིག་གྲོགས་སོགས་ཀྱི་མཐུན་ལམ་གོང་ཐོར་འགྲོ་རྒྱུར་ཕན་ཐོགས་ཧ་ཅང་ཆེན་པོ་འདུག་ཅེས་གསུངས་སོང་།དེ་རིང་གི་མཛད་འཆར་མཐའ་མའི་སྐབས་༸གོང་ས་མཆོག་ནས་མོ་ར་ཝི་ནྱའི་ཡི་ཤུའི་ལྷ་ཁང་དུ་གནས་གཟིགས་ཆིབས་བསྒྱུར་གནང་ཡོད་པ་དང་། ལྷ་ཁང་དེ་ཉིད་ལོ་ངོ་ ༡༣༧ སོང་བའི་ལྷ་ཁང་ཞིག་དང་དེའི་ནང་ཡི་ཤུའི་ཆོས་དཔོན་ཚོས་མགོན་པོ་༧གང་ཉིད་མཆོག་སྐུ་ཚེ་ཞབས་པད་ཡུན་རིང་བརྟན་པ་དང་། ཐུགས་ཀྱི་བཞེད་དགོངས་མཐའ་དག་འགྲུབ་པ། ལྷག་པར་དུ་༧གང་ཉིད་ཀྱི་ཞབས་པུས་སྐུ་ངལ་གང་མགྱོགས་དྲག་སྐྱེད་ཡོང་བའི་ཐུགས་སྨོན་གནང་ཡོད་པ་རེད། དེ་བཞིན་མགོན་པོ་༧གང་ཉིད་མཆོག་གིས་སྐབས་དེར། སྤྱིར་ཡི་ཤུ་བ་ཚོས་སྤྱི་ཚོགས་གོང་འཕེལ་ཆེད་ཞབས་འདེགས་རླབས་ཆེན་ཞིག་ཞུས་ཡོད་པའི་སྐོར་དང་། དེ་སྔོན་གྱི་ཡེ་ཤུའི་ཆོས་དཔོན་དངོས་སུ་མཇལ་འཕྲད་གནང་མྱོང་ཡོད་པ་མ་ཟད། ལྷག་པར་དུ་ཚན་རིག་པ་སོགས་གྲོགས་པོ་མང་པོ་ངོ་ཤེས་བརྒྱུད་ཡེ་ཤུའི་ཆོས་ལུགས་ལ་གཟིགས་སྣང་ཡག་པོ་ཡོད་སྐོར་འགྲེལ་བརྗོད་དང་སྦྲགས། ང་ཚོ་ཚང་མ་འཛམ་གླིང་འདིའི་ནང་མཉམ་གནས་བྱེད་རྒྱུ་ཡིན་སྟབས། དཀའ་ངལ་ཆུང་ཙག་རིགས་ལ་གཡོལ་སྟེ། ཆེ་ས་ནས་གོ་ལ་གཅིག་འགྱུར་གྱི་འདུ་ཤེས་ཡོང་ཐབས་སུ་འབད་བརྩོན་བྱ་དགོས་སྐོར་དང་། རང་ཉིད་གནས་སའི་ས་གནས་ཀྱི་ཉམ་ཐག་རིགས་ལ་རྒྱུན་དུ་ནས་རོགས་ཕན་ཡོང་ཐབས་གནང་དགོས་པ་སོགས་ཀྱི་ལམ་སྟོན་མཛད་ཡོད།དེ་རིང་༸གོང་ས་སྐྱབས་མགོན་ཆེན་པོ་མཆོག་སླེའི་ས་གནས་ཆོས་ལུགས་ཁག་གི་ལྷ་ཁང་དུ་གནས་གཟིགས་མཛད་སྐབས། སླེའི་གཡས་གཡོན་གྱི་མང་ཚོགས་དང་། ལྷག་པར་དུ་ཕྱི་རྒྱལ་དང་རྒྱ་གར་གྱི་ས་ཕྱོགས་གང་ས་ནས་ཕེབས་པའི་ཡུལ་སྐོར་སྤྲོ་འཆམ་པ་རྣམས་ནས་མགོན་པོ་༧གང་ཉིད་མཆོག་གི་ཞལ་མཇལ་དང་། སྣེ་ལེན་ཕེབས་བསུ་ཞུ་མཁན་མང་ཚོགས་སྟོང་ཕྲག་བརྒལ་བ་འདུ་འཛོམས་བྱུང་འདུག་པ་མ་ཟད། རེས་གཟའ་ཟླ་བའི་ཉིན་༸གོང་ས་སྐྱབས་མགོན་ཆེན་པོ་མཆོག་སླེ་གྲོང་ཁྱེར་ནས་སྤྱི་ལེ་ ༡༨ ཙམ་གྱི་སར་ཡོད་པའི་ཁྲིག་སེ་དགོན་པར་ཆིབས་བསྒྱུར་སྩལ་གནང་མཛད་རྒྱུ་ཡིན་པ་རེད་འདུག སྐུ་པར་བདག་དབང་དགའ་ལྡན་ཕོ་བྲང་།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རིང་མིན་ལ་དྭགས་ལིང་ཤེད་དགོན་གྱི་དབྱར་ཆོས་ཆེན་མོའི་ཚོགས་མགོན་དུ་དབུ་བཞུགས་དང་སྦྲགས་བློ་སྦྱོང་ཚིགས་བརྒྱད་མའི་བཀའ་ཆོས་བཀའ་དྲིན་སྩལ་རྒྱུ་དང་དེ་རྗེས་ཟངས་དཀར་ཁུལ་དུ་ཆིབས་བསྒྱུར་གྱིས་ཆོས་འབྲེལ་ཁག་ཅིག་སྩལ་གཏན་ཁེལ་འདུགདེ་ཡང་འདི་ལོའི་ལ་དྭགས་དབྱར་ཆོས་ཆེན་མོ་ལིང་དགོན་སྐུ་འབུམ་བཀྲ་ཤིས་འོད་འབར་དུ་ཟླ་བ་ ༨ པའི་ཕྱི་ཚེས་ ༡ ནས་ ༡༠ བར་འཚོགས་གཏན་ཁེལ་བ་དང་བསྟུན་༸གོང་ས་མཆོག་ཕྱི་ཟླ་ ༨ པའི་ཚེས་ ༡༠ ཉིན་ལ་དྭགས་ཀྱི་རྒྱལ་ས་སླེ་ནས་ལིང་ཤེད་དགོན་དུ་ཆིབས་བསྒྱུར་གྱིས་དབྱར་ཆོས་མཛད་སྒོའི་ཚོགས་མགོན་དུ་དབུ་བཞུགས་དང་འབྲེལ་བློ་སྦྱོང་ཚིགས་བརྒྱད་མའི་བཀའ་ཆོས་བཀའ་དྲིན་བསྐྱང་རྒྱུ་ཡིན་པ་རེད།ཁ་སང་ཕྱི་ཚེས་ ༢༡ ཉིན་ཟངས་དཀར་ནང་པའི་ཆོས་ཚོགས་ལྷན་ཁང་གིས་གསར་འགོད་གསལ་བསྒྲགས་སྤེལ་གསལ་ལྟར་ལིང་ཤེད་ལ་ཆོས་འབྲེལ་སྩལ་རྗེས་༸གང་ཉིད་མཆོག་ཕྱི་ཚེས་ ༡༡ ཉིན་ལིང་ཤེད་ནས་ཟངས་དཀར་པ་ལྡུམ་ཁུལ་དུ་ཆིབས་བསྒྱུར་དང་།  ཕྱི་ཚེས་ ༡༢ དང་ ༡༣ ཉིན་གྲུ་འཛིན་ཕོ་བྲང་དུ་ཆོས་འབྲེལ་དང་དེ་བཞིན་ཕྱི་ཚེས་ ༡༤ ཉིན་སླེ་ལ་ཆིབས་སྒྱུར་བསྐྱང་རྒྱུ་ཡིན་པ་རེད་འདུགགཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་ ༡༥ ཉིན་ལ་དྭགས་ཀྱི་རྒྱལ་ས་སླེ་རུ་ཞབས་སོར་འཁོད་ཡོད་པ་དང་། ཐེངས་འདིའི་ཆིབས་བསྒྱུར་དེ་ནི་རྒྱལ་སྤྱིའི་ཁྲོད་ཏོག་དབྱིབས་གཉན་རིམས་ཁྱབ་གདལ་རྗེས་མགོན་པོ་༸གང་ཉིད་མཆོག་བཞུགས་སྒར་ཕྱི་ཕྱོགས་སུ་ཆིབས་སྒྱུར་མཛད་པ་ཐོག་མ་དེ་ཆགས་ཀྱི་ཡོད་པ་རེད།  ད་བར་༸གང་ཉིད་མཆོག་གིས་མཛད་རིམ་ཡོངས་གྲགས་གནང་ཁག་ལ་ལྟར་ན།  ༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་པ་ཚོགས་པ་ཐུན་མོང་ནས་གསོལ་འདེབས་ཞུས་དོན་ལྟར་ཞི་བ་ཚལ་ཕོ་བྲང་གི་གསུང་ཆོས་ར་བར་ཟླ་བ་ ༧ པའི་ཕྱི་ཚེས་ ༢༨ དང་ ༢༩ ཉིན་གཉིས་རིང་གི་སྔ་དྲོ་སྤྱོད་འཇུག་ཆེན་མོའི་ལེའུ་དགུ་པའི་འཕྲོ་སྐྱོང་མཛད་རྒྱུ་དང་།  དེ་བཞིན་ཚེས་ ༣༠ ཉིན་གྱི་སྔ་དྲོ་སྤྱན་རས་གཟིགས་ཀྱི་བཀའ་དབང་བཀའ་དྲིན་སྩལ་རྗེས་ལ་དྭགས་ནང་ཚོགས་དང་དགོན་ཚོགས་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད། སྐུ་པར་བདག་དབང་དགའ་ལྡན་ཕོ་བྲང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་དྲོ་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་ནས་ཡིན་པའི་ལྕམ་སྐུ་ Droupadi Murmu མཆོག་རྒྱ་གར་གྱི་སྲིད་འཛིན་སྐབས་ ༡༥ པར་བདམས་ཐོན་བྱུང་བར་དགའ་བསུའི་འཚམས་འདྲི་དང་སྦྲགས། མ་འོངས་ལས་དོན་ཁག་གང་ལེགས་གྲུབ་ཐུབ་པའི་ཐུགས་སྨོན་མཛད་འདུག དེ་ཡང་མགོན་པོ་གང་ཉིད་མཆོག་གིས་ད་ལྟའི་བཞུགས་བཞག་མཛད་ཡུལ་ལ་དྭགས་ཞི་བའི་ཚལ་ཕོ་བྲང་ནས་སྩལ་བའི་དགའ་བསུའི་འཚམས་འདྲི་དེའི་ནང་དུ་ད་ཆ་རྒྱལ་སྤྱིའི་སྤྱི་ཚོགས་ཁྱོན་ཡོངས་སུ་རྒྱ་གར་རྒྱལ་ཁབ་ཀྱི་གལ་གནད་དང་མཚན་མཐོང་གོང་འཕེལ་འགྲོ་བཞིན་པ་མ་ཟད། རྒྱ་གར་འདི་བཞིན་རྒྱལ་སྤྱིའི་ཐོག་ཞི་བདེ་དང་ཡར་རྒྱས་གོང་འཕེལ་ཐད་ཞབས་འདེགས་རླབས་ཆེན་གྲུབ་རྒྱུའི་ནུས་པ་ལྡན་པའི་རྒྱལ་ཁབ་ཞིག་ལ་ངོས་འཛིན་ཞུ་བཞིན་པའི་སྐབས་འདིར་ལྕམ་སྐུ་ Droupadi Murmu མཆོག་ནས་སྲིད་འཛིན་གྱི་ཐུགས་འགན་བཞེས་ཀྱིས་ཡོད་སྟབས། ལྕམ་སྐུ་མཆོག་གི་ལས་ཡུན་ཁྲོད་རང་ཉིད་ཀྱི་ནུས་པ་གང་ཡོད་ཀྱིས་རྒྱ་གར་རྒྱལ་ཁབ་འདི་བཞིན་མཚན་མཐོང་གོང་འཕེལ། ལྷག་པར་དུ་རྒྱ་གར་གྱི་གནའ་བོའི་རིག་གཞུང་བཟང་པོའི་བློ་སྤོབས་དང་སེམས་འགུལ་ཐེབས་པའི་ཐོག་རྒྱ་གར་གྱི་ནུས་སྟོབས་སྲ་བརྟན་དང་འཛམ་གླིང་ཞི་བདེའི་སྣེ་ཁྲིད་ཐུབ་པའི་ཡིད་ཆེས་ཡོད་ཅེས་བཀའ་སྩལ་འདུགམ་ཟད་མགོན་པོ་གང་ཉིད་མཆོག་རྒྱ་གར་གཞུང་གི་སྐུ་མགྲོན་དུས་ཡུན་རིང་ཤོས་ཤིག་ཡིན་པའི་ཆ་ནས་རྟག་ཏུ་རྒྱལ་ཁབ་འདི་ལ་གུས་བརྩི་ཞུ་བཞིན་ཡོད་པ་མ་ཟད། ལྷག་པར་དུ་འདས་པའི་ལོ་དུས་དེ་དག་རིང་རྒྱ་གར་གྱི་ས་གནས་ཕལ་མོ་ཆེར་ཕེབས་རྒྱུའི་གོ་སྐབས་བྱུང་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་རྒྱལ་ཁབ་ཀྱིས་ལོ་ངོ་སྟོང་ཕྲག་རིང་སྙིང་རྗེ་དང་འཚེ་བ་མེད་པའི་རྣམ་གཞག་རྒྱུན་འཛིན་དང་། བདག་ཉིད་ཆེན་པོ་གན་དྷི་མཆོག་གིས་འཚེ་བ་མེད་པའི་རྣམ་གཞག་རྒྱ་ཁྱབ་མཛད་པ། དེ་བཞིན་ཆོས་ལུགས་སྣ་ཚོགས་མཉམ་གནས་ཐོག་ཆོས་ལུགས་མཐུན་འབྲེལ་ལྡན་པའི་རྒྱལ་ཁབ་ཞིག་ཡིན་པ་དེ་ནི་གང་ཟག་སྒེར་དང་རྒྱ་ཆེ་ས་ནས་འཛམ་གླིང་སྤྱི་ལ་ཞི་བདེ་བསྐྲུན་རྒྱུའི་ནུས་པ་ཡོད་པ་བཀའ་སྩལ་འདུག་པ་མ་ཟད་། ད་ཆ་རྒྱ་གར་གྱི་གནའ་བོའི་སེམས་ཁམས་རིག་པའི་ཤེས་ཡོན་ལ་དོ་སྣང་དང་གོ་རྟོགས་སྤེལ་ཏེ་གནའ་དེང་གྱི་ཤེས་ཡོན་གཉིས་ཆ་སྙོམ་བཟོ་དགོས་རྒྱུ་གལ་ཆེན་པོ་ཡིན་པ་དང་། དེ་ལྟར་བྱུང་ཚེ་འགྲོ་བ་མི་རྣམས་ཀྱི་སེམས་ཁམས་འཕྲོད་བསྟེན་ལ་ཕན་པ་དང་། རྒྱུན་དུ་ཉོན་མོངས་མ་རིག་པའི་བསམ་བློ་ལ་གདོང་ལེན་གྱིས་སེམས་ཞི་བདེ་དང་ལྡན་པ་ཞིག་ཡོང་རྒྱུར་དགེ་ཚན་ཡོད་པ་སོགས་བཀའ་སྩལ་དང་ཆབ་ཅིག མགོན་པོ་གང་ཉིད་མཆོག་ནས་སྙིང་རྗེའི་ནུས་པ་གཙོ་བོར་གྱུར་པའི་རིན་ཐང་བྲལ་བའི་རྒྱ་གར་གྱི་གནའ་བོའི་རིག་གནས་ཁག་རྒྱ་གར་ཙམ་མ་ཟད་འཛམ་གླིང་མི་མང་ལ་གོ་རྟོགས་མུ་མཐུད་སྤེལ་རྒྱུའི་དམ་བཅའ་བརྟན་པོ་ཡོད་ཅེས་བཀའ་སྩལ་འདུགགཞན་ཡང་མགོན་པོ་གང་ཉིད་མཆོག་གིས་ལྕམ་སྐུ་ Droupadi Murmu མཆོག་ལ་སྩལ་བའི་འཚམས་འཕྲིན་དེའི་ནང་རྒྱ་གར་གཞུང་དམངས་གཉིས་ནས་བོད་མི་ཡོངས་ལ་ནང་ཆོས་གཙོས་པའི་བོད་ཀྱི་ངོ་བོ་སྲུང་སྐྱོབ་གནང་རྒྱུ་སོགས་ཀྱི་ཐོག་རྒྱབ་སྐྱོར་དང་རོགས་རམ་རྒྱ་ཆེར་གནང་དང་གནང་བཞིན་པར་ཐུགས་རྗེ་ཆེ་ཞུ་དང་སྦྲགས། ལྕམ་སྐུ་མཆོག་གི་མ་འོངས་ལས་དོན་མཐའ་དག་ལམ་ལྷོང་ཡོང་བའི་སྨོན་འདུན་མཛད་འདུག རྩ་བའི་ལྕམ་སྐུ་ Droupadi Murmu མཆོག་ནི་ཕྱི་ལོ་ ༡༩༥༨ ལོར་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་སུ་འཁྲུངས་ཤིང་། ད་རེས་ལྕམ་སྐུ་མཆོག་རྒྱ་གར་གྱི་སྲིད་འཛིན་ལ་བདམས་ཐོན་བྱུང་བ་དེ་ནི་རྒྱ་གར་ནང་བེུད་སྲིད་འཛིན་གནང་མཁན་གཉིས་པ་དང་། རྒྱ་གར་གྱི་ Santal ཞེས་པའི་གདོད་མའི་མི་རིགས་ཁྲོད་ཀྱི་བེུད་ཞིག་སྲིད་འཛིན་དུ་བསྐོ་བཞག་བྱུང་བ་ཐེངས་དང་པོ་དང་། རྒྱ་གར་རང་བཙན་ཐོབ་རྗེས་སྐུ་འཁྲུངས་པའི་སྲིད་འཛིན་ཐོག་མ། དེ་བཞིན་ད་བར་གྱི་རྒྱ་གར་སྲིད་འཛིན་དགུང་གྲངས་ཆུང་ཤོས་བཅས་ཆགས་ཀྱི་ཡོད་པ་རེད།ལྕམ་སྐུ་ Droupadi Murmu མཆོག་ཆབ་སྲིད་ཀྱི་ལས་དོན་ནང་མ་བཞུགས་གོང་ས་གནས་སུ་དགེ་རྒན་དང་སློབ་གསོ་བའི་ཕྱག་ལས་གནང་མྱོང་ཡོད་པ་དང་། ཕྱིས་སུ་རྒྱ་གར་གྱི་ BJP ཆབ་སྲིད་ཚོགས་པའི་ནང་བཞུགས་ཏེ་ Odisha མངའ་སྡེའི་གྲོས་ཚོགས་འཐུས་མི་དང་མངའ་སྡེའི་ཚོང་དང་འགྲིམ་འགྲུལ། དེ་བཞིན་ནུ་གསོ་སེམས་ཅན་ལྷན་ཁང་སོགས་ཀྱི་བློན་ཆེན། གཞན་ཡང་ཕྱི་ལོ་ ༢༠༡༥ ནས་ ༢༠༢༡ བར་ Jharkhand མངའ་སྡེའི་སྲིད་སྐྱོང་གི་ཐུགས་འགན་སོགས་བཞེས་ཡོད་པ་དང་། དེ་སྔ་མངའ་སྡེའི་གྲོས་ཚོགས་འཐུས་མི་གནང་པའི་སྐབས་འཐུས་མི་བཟང་ཤོས་ཀྱི་གཟེངས་རྟགས་སོགས་ཀྱང་ཐོབ་མྱོང་འདུག

ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩས་འདི་ལོའི་ The Dalai Lama Graduate Scholarships འམ་ཏཱ་ལའི་བླ་མའི་གཙུག་ལག་སློབ་ཐོན་སློབ་ཡོན་བོད་ཕྲུག་ ༤༥ ལ་གནང་གཏན་འཁེལ་བའི་གསལ་བསྒྲགས་སྤེལ་འདུག་པ་དང་། ཐེངས་འདིའི་སློབ་ཡོན་ཐོབ་མཁན་ཁྲོད་ཨ་རི་དང་ཁེ་ན་ཌ།  ཡོ་རོབ།  དེ་བཞིན་ཨེ་ཤེ་ཡ་བཅས་ཀྱི་ནང་རྟེན་གཞི་བྱས་པའི་སྙན་གྲགས་ཆེ་བའི་གཙུག་ལག་སློབ་གཉེར་ཁང་དུ་སློབ་སྦྱོང་གནང་བཞིན་པའི་གཙུག་ལག་རབ་འབྱམས་པ་དང་འབུམ་རམས་པའི་སློབ་མ་ཚུད་པ་རྣམས་ཀྱིས་སྐྱེ་དངོས་ཕྲ་རབ་རིག་པ་དང་།  མཁའ་དབྱིངས་འཕྲུལ་རིག  མི་རིགས་དཔྱད་ཞིབ་རིག་པ།  སྤྱི་ཚོགས་འཕྲོད་བསྟེན། ནད་ཡམས་དཔྱད་ཞིབ་རིག་པ། དེ་བཞིན་ཁྲིམས་དང་སྨན་སོགས་ལ་ཆེད་སྦྱོང་གནང་བཞིན་འདུག  སྤྱིར་འདི་ལོར་ཁྱོན་སློབ་ཡོན་ཞུ་མཁན་བོད་ཕྲུག་ ༧༥ བྱུང་ཡོད།གཞི་རྩའི་སློབ་ཡོན་དེ་ནི་བོད་ཕྲུག་སློབ་མ་རྣམས་ལ་སློབ་ཡོན་གྱི་མཐུན་རྐྱེན་སྦྱར་ཏེ་བོད་མིའི་ནུས་ཚད་གོང་མཐོར་དང་དེ་བཞིན་འགྲོ་བ་མི་དང་ཤེས་ཡོན་ལ་རམ་འདེགས་སྒྲུབ་ཐུབ་པར་དམིགས་ཏེ་ཕུལ་གྱི་ཡོད་པ་དང་།  ཕྱི་ལོ་ ༢༠༡༡ ལོར་ཐོག་མར་སློབ་ཡོན་གནང་འགོ་བཙུགས་ཏེ་ད་བར་ཨ་སྒོར་ས་ཡ་གཉིས་དང་ཕྱེད་ཀ་ཙམ་ཞིག་གི་འོག་བོད་ཕྲུག་ ༢༥༠ ལ་སློབ་ཡོན་དེ་ཐོབ་ཡོད་པ་རེད་འདུག སློབ་ཡོན་ཕུལ་མཁན་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༥ ལོར་སུད་སིར་འགྲོ་བ་མིའི་གཞི་རྩའི་རིན་ཐང་གོང་མཐོར་དང་།  ཆོས་ལུགས་མཐུན་སྒྲིལ།  ཞི་བདེ་དང་འཚེ་བ་མེད་པ།  དེ་བཞིན་ཁོར་ཡུག་སྲུང་སྐྱོབ་ལ་དམིགས་ཏེ་ཆེད་འཛུགས་མཛད་པའི་དགེ་རྩ་ཞིག་ཆགས་ཀྱི་ཡོད་པ་དང་། ལྷག་པར་དགེ་རྩ་དེའི་བརྒྱུད་བོད་ཀྱི་ཐུན་མིན་རིག་གཞུང་ཉར་ཚགས་དང་བོད་མི་གཙོས་མི་རིགས་དབྱེར་མེད་ལ་ལས་གཞི་སྣ་མིན་གྱི་ཐོག་ནས་དགོས་ངེས་ཀྱི་རོགས་འདེགས་གནང་ཀྱི་ཡོད་པ་རེད།  

བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་ལྔའི་རིང་མ་ཧཱ་གུ་རུའི་འབུམ་ཚོགས་དབུ་འཛུགས་བསྐྱངས་གནང་མཛད་སོང་།དེ་ཡང་དེ་རིང་ཟླ་ ༧ ཚེས་ ༡༩ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸རྒྱལ་བའི་སྐུ་ཕྱྭ་དང་བསྟན་སྲིད་ཞབས་རིམ་དུ་དམིགས་ཏེ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་དང་སྐུ་བཅར་རྣམ་རྒྱལ་གྲྭ་ཚང་གི་མཐུན་འགྱུར་འོག་ཕྱི་ལོ་ ༢༠༢༢ ཟླ་ ༧ ཚེས་ ༡༩ ནས་ ༢༣ བར་ཉིན་ལྔའི་རིང་བྱང་གཏེར་རིག་འཛིན་གདུང་སྒྲུབ་ཆོ་གའི་སྒོ་ནས་མ་ཧཱ་གུ་རུའི་འབུམ་ཚོགས་འདི་བཞིན་དབུ་འཛུགས་དང་། སྐབས་དེར་སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་སློབ་དཔོན་དང་དགེ་འདུན་འདུས་པ་རྒྱ་མཚོ། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་མཛད་གཙོ་རྣམ་པའི་དབུ་བཞུགས་ཐོག་སེར་སྐྱ་མི་མང་མང་པོ་ནས་གལ་ཆེན་དོན་ཆེར་དགོངས་ཏེ་འབུམ་ཚོགས་ལ་ཆེད་ཕེབས་ཀྱིས་ཚོགས་ཞུགས་གནང་འདུག རྩ་བའི་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་གོ་སྒྲིག་འོག་བཞུགས་སྒར་དུ་ལོ་ལྟར་༸གོང་ས་མཆོག་གི་དབུས་པའི་རིས་སུ་མ་ཆད་པའི་སྐྱེས་ཆེན་དམ་པ་རྣམས་ཀྱི་སྐུ་ཚེ་བསྐལ་བརྒྱར་བརྟན་པ་ཡོང་སླད་དང་། བོད་ཀྱི་བདེན་མཐའ་མྱུར་དུ་སེལ་བ། དེ་བཞིན་འཛམ་གླིང་ཞི་བདེ་བཅས་དམིགས་ཏེ་མ་ཧཱ་གུ་རུའི་འབུམ་ཚོགས་ཚོགས་སྲོལ་ཡོད་པ་དང་། ཐེངས་འདིའི་འགྲོ་གྲོན་སྔོན་བརྩི་འབུམ་བཅུ་གཉིས་ཞུས་ཡོད་པ་རེད་འདུག    

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཀྱི་རྒྱལ་ས་སླེའི་ཞི་བའི་ཚལ་དུ་ཟླ་བ་འདིའི་ཕྱི་ཚེས་ ༢༨ ནས་༣༠ བར་ཆོས་འབྲེལ་ཁག་ཅིག་སྩལ་རྒྱུ་ཐུགས་གཏན་འཁེལ་འདུག དེའང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་དེ་རིང་སྤེལ་བའི་གསལ་སྒྲགས་ནང་གསལ་ལྟར་ན། ༸གོང་ས་མཆོག་གིས་ལ་དྭགས་མང་ཚོགས་ལ་ཕྱི་ཚེས་ ༢༨ དང་ ༢༩ ཉིན་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་དགུ་པ་ཤེས་རབ་ཀྱི་ལེའུ་བཀའ་ཁྲིད་སྩལ་རྒྱུ་དང་། ཕྱི་ཚེས་ ༣༠ ཉིན་སྤྱན་རས་གཟིགས་ཀྱི་བཀའ་དབང་སྩལ་གནང་རྒྱུ་ཡིན་པ་མ་ཟད། ཕྱི་ཚེས་ ༣༠ ཉིན་ཐེངས་འདིའི་ཆོས་འབྲེལ་གསོལ་འདེབས་ཞུ་མཁན་ལ་དྭགས་ནང་པའི་མཐུན་ཚོགས་དང་། ལ་དྭགས་དགོན་པའི་ཚོགས་པ་གཉིས་ཀྱིས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་རེད་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་ ༡༥ ཉིན་ལ་དྭགས་ཀྱི་རྒྱལ་ས་སླེ་རུ་ཞབས་སོར་འཁོད་ཡོད་པ་དང་། ཐེངས་འདིའི་ཆིབས་སྒྱུར་དེ་ནི་རྒྱལ་སྤྱིའི་ཁྲོད་ཏོག་དབྱིབས་གཉན་རིམས་ཁྱབ་གདལ་རྗེས་མགོན་པོ་༸གང་ཉིད་མཆོག་བཞུགས་སྒར་ཕྱི་ཕྱོགས་སུ་ཆིབས་སྒྱུར་མཛད་པ་ཐོག་མ་དེ་ཆགས་ཀྱི་ཡོད་པ་རེད། ༸གོང་ས་མཆོག་གིས་ལ་དྭགས་སུ་ཞབས་སོར་འཁོད་མ་ཐག་ས་གནས་མང་ཚོགས་ཀྱི་༸གང་ཉིད་མཆོག་ལ་དད་སེམས་དང་སྤྲོ་བ་ཆེན་པོའི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས་པར་ཧ་ཅང་ཐུགས་མཉེས་པོ་བྱུང་སྐོར་བཀའ་སྩལ་དང་འབྲེལ། ཉིན་ཁ་ཤས་སྐུ་ལྷོད་བཞུགས་མཛད་རྗེས་མང་ཚོགས་ལ་ཆོས་འབྲེལ་སྩལ་རྒྱུ་ཞལ་བཞེས་མཛད་པ་དང་ཆབས་ཅིག ཁོར་ཡུག་སྲུང་སྐྱོབ་ཀྱི་གལ་གནད་སྐོར་ལ་ལམ་སྟོན་ཁག་ཅིག་ཕེབས་ཡོད་པ་རེད།

ཉེ་ལམ་ཟླ་བ་ ༧ པའི་ཕྱི་ཚེས་ ༦ སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དང་བསྟུན།  ཤྲི་ལངྐའི་ནང་ཉིན་དེར་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་ Universal ethics ཞེས་གོ་ལ་སྤྱི་ཡོངས་ལ་ཁྱབ་པའི་བཟང་སྤྱོད་སོགས་ཀྱི་བརྗོད་གཞིའི་ཐད་གོ་བསྡུར་གྱིས་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་ལྟར།  ༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་ཐུགས་རྗེ་ཆེ་ཞུའི་ཕྱག་བྲིས་ཞིག་སྩལ་འདུག དེ་ཡང་ཁ་སྔོན་ཕྱི་ཚེས་ ༡༦ ཉིན་ Sri lankan Tibetan Buddhist Brotherhood Society ཞེས་ཤྲི་ལངྐན་བོད་ཀྱི་ནང་ཆོས་མཐུན་ཚོགས་ཀྱི་ཚོགས་གཙོ་ Dr. Damenda Porage ལགས་ཀྱི་མཚན་ཐོག་ཏུ་སྩལ་བའི་ཕྱག་བྲིས་ནང་།  ཤྲི་ལངྐན་བོད་ཀྱི་ནང་ཆོས་མཐུན་ཚོགས་ནས་ཉེ་ཆར་༸གོང་ས་མཆོག་གི་༸སྐུའི་འཁྲུངས་སྐར་ཉིན་ལ་༸གང་ཉིད་མཆོག་གི་ཐུགས་བསྐྱེད་དམ་བཅའ་དང་མགོན་པོ་མཆོག་གི་འགྲོ་བ་མི་སྤྱིའི་བདེ་རྩའི་སླད་མཛད་འཕྲིན་བསྐྱངས་དང་སྐྱོང་མུས་གང་དེར་ཆེ་བསྟོད་ཀྱིས་བགྲོ་གླེང་གོ་སྒྲིག་གནང་བར་ཐུགས་རྗེ་ཆེ་ཞེས་བཀའ་སྩལ་མཛད་འདུགཕྱོགས་མཚུངས་ཤྲི་ལངྐའི་བླ་ཆེན་རྣམས་ནས་༸གང་ཉིད་མཆོག་ལ་༸སྐུའི་འཁྲུངས་སྐར་འཚམས་འདྲི་ཞུས་པར་མགོན་པོ་མཆོག་ཐུགས་ཧ་ཅང་མཉེས་པོ་བྱུང་བ་དང་དེ་འབྲེལ་འཚམས་འདྲི་ཞུ་མཁན་ཆོས་གྲོགས་ཡོངས་དང་གཏམ་བཤད་པ་རྣམས་ལ་ཐུགས་རྗེ་ཆེ་ཞེས་བཀའ་སྩལ་དང་སྦྲགས།  ལྷག་པར་ད་ཆ་ཤྲི་ལང་ཀའི་ལུང་པའི་ནང་དཀའ་ངལ་འཕྲད་བཞིན་པའི་གནད་དོན་རྣམས་མགོན་པོ་མཆོག་ནས་མཁྱེན་གྱི་ཡོད་པ་དང་།   ༸གང་ཉིད་མཆོག་ནས་ད་ཆ་ལུང་པའི་ནང་དཀའ་ངལ་འཕྲད་པ་ཁག་མྱུར་དུ་ཞི་བའི་སྨོན་འདུན་ཡོད་ཅེས་བཀའ་སྩལ་དང་།  ཆབས་ཅིག་མང་ཚོགས་ནས་གནས་སྟངས་ཁག་པོ་ཡོད་མིན་ལ་མ་ལྟོས་པར་ད་ལྟའི་གནས་སྟངས་དེ་བཞིན་བཟང་ས་ལ་བསྒྱུར་བ་གཏོང་བའི་ནུས་པར་གདེང་ཚོད་མ་བརླག་པའི་རེ་བ་ཡོད་པ་བཀའ་སྩལ་ཡོད་པ་འཁོད་འདུགགཞི་རྩའི་མི་འབོར་ས་ཡ་ ༢༢ ལྷག་ཡོད་པའི་ཤྲི་ལང་ཀའི་ནང་ཉེ་བའི་ཟླ་ཤས་ནས་སྔར་བྱུང་མྱོང་མེད་པའི་དཔལ་འབྱོར་གྱི་དཀའ་ངལ་ཤུགས་ཆེ་འཕྲད་པའི་རྐྱེན་གྱིས་མང་ཚོགས་དང་རྒྱལ་ཁབ་ཀྱི་དཔུང་དམག་དབར་གདོང་ཐུག་ཤུགས་ཆེ་བྱུང་མུས་ཡིན་པ་མ་ཟད། ལུང་པའི་ཆེས་ཛ་དྲག་གི་གནས་སྟངས་འོག ཡུལ་དེའི་སྲིད་བློན་ Mahinda Rajapaksa ལས་གནས་ནས་རྩ་དགོངས་ཞུས་དགོས་བྱུང་བ་དང་། དེ་བཞིན་ཁོང་གི་བུ་སྤུན་སྲིད་འཛིན་ Gotabaya Rajapaksa ཀྱང་ཡུལ་དེ་ནས་བྲོས་བྱོལ་དུ་འགྲོ་དགོས་བྱུང་བའི་གནས་སྟངས་ཆགས་ཡོད།བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། ཤྲི་ལངྐའི་གྲོས་ཚོགས་ནས་ཡུལ་དེའི་སྲིད་འཛིན་གསར་པ་འོས་བསྡུ་བྱ་རྒྱུའི་གྲ་སྒྲིག་ཁྲོད། བར་རྒལ་སྲིད་འཛིན་ Ranil Wickremesinghe མཆོག་གིས་ཁ་སང་ཕྱི་དྲོ་ཛ་དྲག་གི་བཀོད་ཁྱབ་ཞིག་བཏང་བའི་བརྒྱུད་རྒྱལ་ཁབ་དེའི་ནང་དྲག་པོའི་ཁྲིམས་གཞི་གདམ་རྒྱུའི་གསལ་བསྒྲགས་བྱས་ཡོད་པ་རེད་འདུག  

དེ་རིང་སྔ་དྲོ་ཕྱག་ཚོད་ ༡༡ མ་ཟིན་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལ་༸ཞབས་སོར་བདེ་བར་འཁོད་པ་དང་གནམ་ཐང་ནས་ཞི་བའི་ཚལ་ཕོ་བྲང་བར་དུ་གཉུག་མར་གནས་པ་དང་གློ་བུར་ལྷགས་པའི་སེར་སྐྱ་མང་ཚོགས་སྟོང་ཕྲག་བརྒལ་བས་མགོན་པོ་༸གང་ཉིད་མཆོག་ལ་ཕེབས་བསུའི་སྣེ་ལེན་་ཟབ་རྒྱས་ཞུས་འདུག༸གོང་ས་མཆོག་གི་ཐེངས་འདིའི་ལ་དྭགས་ཆིབས་སྒྱུར་ནི་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ལོ་ངོ་གཉིས་ལྷག་ཙམ་རིང་བཞུགས་སྒར་དྷརྨ་སཱ་ལཱར་༸སྐུ་བཞུགས་མཛད་རྗེས་ཀྱི་བཞུགས་སྒར་ནས་ཆིབས་བསྒྱུར་མཛད་པ་ཆེས་ཐོག་མ་ཆགས་ཀྱི་ཡོད་པ་དང་ཆབས་ཅིག ༸གོང་ས་མཆོག་ལ་དྭགས་སུ་༸སྐུ་ལྷོད་བཞུགས་མཛད་པའི་སྐབས་དེ་སྔོན་མགོན་པོ་༸གང་ཉིད་མཆོག་གིས་ལ་དྭགས་སུ་ཆིབས་སྒྱུར་མཛད་སྐབས་སྩལ་བའི་སྤྱོད་འཇུག་བཀའ་ཁྲིད་ལས་ཤེས་རབ་ལེའུ་ལྷག་ཡོད་པ་དེ་ཉིད་དང་དེ་བཞིན་ཐུགས་རྗེ་ཆེན་པོའི་བཀའ་དབང་སྕལ་རྒྱུ་ཡིན་པ་བཀའ་སྩལ་འདུགརྩ་བའི་༸གོང་ས་མཆོག་ལ་དྭགས་སུ་ཆིབས་སྒྱུར་མ་མཛད་གོང་ཁ་སང་བཞུགས་སྒར་ནས་ཆིབས་ཐོན་གྱིས་ཆིབས་གྲུ་བརྒྱུད་ནས་ཇམྨུ་ལ་ཆིབས་སྒྱུར་སྐབས་མང་ཚོགས་བརྒྱ་ཕྲག་མང་པོས་ཕེབས་བསུའི་སྣེ་ལེན་ཟབ་རྒྱས་ཞུས་པ་དང་སྦྲགས། མགོན་པོ་༸གང་ཉིད་མཆོག་གིས་སྐབས་དེར་རྒྱ་གར་གྱི་གསར་འགོད་པ་ཚོས་བཀའ་འདྲི་ཞུས་པར་བཀའ་ལན་མཛད་པར་རྒྱ་ནག་གིས་དུས་རྟག་ཏུ་ངོས་ལ་ངོ་རྒོལ་བྱེད་ཀྱི་ཡོད་པ་ནི་དམིགས་བསལ་གང་ཡང་མིན་པར་རྒྱུན་ལྡན་ཞིག་ཡིན་པ་དང་། རྒྱ་ནག་གི་འགོ་ཁྲིད་མགོ་མཁྲེགས་ཅན་ཁག་ཅིག་གིས་ངོས་ཁ་བྲལ་བར་ངོས་འཛིན་བྱས་པ་མ་ཚད་པར་དུས་རྟག་ཏུ་སྐྱོན་བརྗོད་བྱེད་ཀྱི་ཡོད།  འོན་ཀྱང་རིམ་པས་རྒྱ་ནག་ནང་མི་མང་པོ་ཞིག་ནས་ངོས་ཀྱིས་བོད་ལ་མིང་དོན་མཚུངས་པའི་རང་སྐྱོང་འདོད་པ་ལས་བོད་རང་བཙན་རྩོད་ཀྱི་མེད་པ་དང་། བོད་བརྒྱུད་ནང་བསྟན་བདག་གཉེར་བྱེད་འདོད་ཡོད་པ་རྟོགས་ཐུབ་ཡོད་ལ། ལྷག་པར་དུ་རྒྱ་ནག་ནང་ད་ཆ་བོད་བརྒྱུད་ནང་བསྟན་ཐད་དོ་སྣང་གནང་མཁན་རྒྱ་རིགས་ཇེ་མང་དུ་འགྲོ་བཞིན་ཡོད་སྟབས་དེང་སྐབས་རྒྱ་ནག་ནང་ལ་འགྱུར་ལྡོག་འགྲོ་བཞིན་སྐོར་བཀའ་སྩལ་ཡོད།  དེ་བཞིན་མགོན་པོ་༸གང་ཉིད་མཆོག་གིས་ཞི་བདེ་དང་འབྲེལ་ཏེ་འཛམ་གླིང་ནང་མི་ཐེར་འབུམ་བདུན་ཡོད་པ་དེ་དག་འཆམ་མཐུན་ངང་གནས་དགོས་པ་ལས་ཕན་ཚུན་རྩོད་རེས་བྱས་ནས་བསྡད་ན་ཕན་ཐོགས་གང་ཡང་མེད་པ་དང་། ལྷག་དོན་རྒྱལ་ཁབ་དང་ངའི་ལུང་པ་ཟེར་ནས་དགོངས་པ་བཞེས་ཚེ་དེ་ནི་བསམ་བློའི་རྒྱ་ཆུང་དྲག་པས་ང་ཚོ་ཚང་མ་འཛམ་གླིང་འདིའི་སྟེང་ལ་མཉམ་གནས་བྱེད་དགོས་སྟབས། ངལ་བ་ཕྲན་བུ་འཕྲད་སྐབས་ཕན་ཚུན་དབར་བཀའ་མོལ་གནང་དགོས་སྐོར་ལམ་སྟོན་བཀྲིན་ཆེ་བ་སྩལ་གནང་མཛད་ཡོད། ༸སྐུ་པར་ཁག་གི་བདག་དབང་དགའ་ལྡན་ཕོ་བྲང་ཡིག་ཚང་།