ཏོག་དབྱིབས་རིམས་ནད།

དེ་རིང་ The Guardian གསར་ཁང་གིས་གནས་ཚུལ་སྤེལ་བར་ད་ལྟའི་ཨ་རི་དང་ཨོ་གླིང་རྒྱལ་ཁབ་གཉིས་ཀྱིས་སྣེ་ཁྲིད་དེ་རྒྱལ་སྤྱིའི་སྟེང་རྒྱ་ནག་གི་ཏོག་དབྱིབས་རིམས་ནད་ཐོག་མ་ཕྱི་ལ་ཁྱབ་ཚུལ་ལ་ཞིབ་འཇུག་བྱེད་དགོས་པའི་སྐུལ་འདེད་གཏོང་བཞིན་ཡོད་པའི་ཁྲོད། ཧོང་ཀོང་གི་མི་མང་འཕྲོད་བསྟེན་གཙུག་ལམ་སློབ་ཁང་གིས་རྒྱ་ནག་གི་རིམས་ནད་ཁྱབ་བརྡལ་གྱི་གྲངས་ཐོ་ལ་ཞིབ་འཇུག་བྱས་པའི་གྲུབ་དོན་དུ་ཏོག་དབྱིབས་རིམས་ནད་ཀྱི་འགོས་ཁྱབ་ཀྱི་རིམ་པ་དང་པོའི་ནང་དུ་རིམས་ནད་འགོས་པའི་ནད་པ་ཁྱོན་ ༢༣༢༠༠༠ ལྷག་ཡོད་པར་ཕྱིར་བསྒྲགས་ཀྱིས་གྲངས་ཚད་དེ་ནི་རྒྱ་ནག་སྲིད་གཞུང་གིས་ཕྱིར་བསྒྲགས་བྱས་པའི་གྲངས་ཚད་ལས་ལྡབ་བཞི་ལས་ལྷག་པ་བརྒལ་ཡོད་པར་གསལ་འདོན་གནང་འདུགརྒྱ་ནག་གིས་ཕྱི་ཟླ་ ༢ ཚེས་ ༢༠ བར་རིམས་ནད་འགོས་ཁྱབ་བྱུང་བའི་དོན་རྐྱེན་ ༥༥༠༠༠ ལས་ཕྱིར་བསྒྲགས་བྱས་མེད་ཀྱང་། ཧོང་ཀོང་གི་མི་མང་འཕྲོད་བསྟེན་གཙུག་ལག་སློབ་ཁང་གིས་ཞིབ་འཇུག་བྱས་པ་ལྟར་ན་རིམས་ཆད་འགོས་ཁྱབ་བྱུང་བའི་དོན་རྐྱེན་གྱི་གྲངས་ཚད་ནི་རྒྱ་ནག་གིས་ཕྱིར་བསྒྲགས་བྱས་པ་ལས་ལྡབ་འགྱུར་གྱིས་མང་བ་ཡོད་པར་ཕྱིར་བསྒྲགས་བྱས་འདུག དེ་བཞིན་གསར་ཁང་གིས་རྒྱ་ནག་གིས་ད་ལྟའི་བར་དུ་རིམས་ནད་འགོས་ཁྱབ་བྱུང་བའི་མིའི་གྲངས་ཚད་དེ་ནི་ ༨༣༠༠༠ ཙམ་ཕྱིག་བསྒྲགས་བྱས་ཡོད་པ་དང་། ད་ལྟའི་ཆར་རྒྱལ་སྤྱིའི་ཁྲོད་རིམསནད་འགོས་ཁྱབ་ཀྱིས་རྐྱེན་འདས་སུ་ཕྱིན་པའི་གྲངས་ཚད་ནི་ ༡༨༤༠༠༠ ལྷག་བརྒལ་ནས་ཁྱོན་ཡོངས་མི་གྲངས་ཡ་ ༢་༦ ལྷག་ལ་གཉན་རིམས་འགོས་ཁྱབ་བྱུང་ཡོད་པར་ཡོངས་གྲགས་གནང་སྟེ་རྒྱ་ནག་གི་དངོས་བདེན་མིན་པའི་རིམས་ནད་འགོས་ཁྱབ་ཀྱི་གྲངས་ཚད་དེར་ཟུར་ཟ་གནང་འདུརྒྱ་ནག་གི་ནང་དུ་རིམས་ནད་དེ་ཐོག་མར་ངོས་འཛིན་བྱེད་ཕྱོགས་ཀྱི་རྩ་བའི་རྨང་གཞི་དེ་ནི་ཚད་གཞི་ལོང་བ་ཞིག་མིན་པར་བསྒྲགས་ཏེ་ཕྱི་ཟླ་ ༡ ཚེས་ ༡༥ ནས་ཟླ་ ༣ ཚེས་ ༣ བར་རྒྱ་ནག་གི་རྒྱལ་ཡོངས་ཀྱི་འཕྲོད་བསྟེན་ལྷན་ཚོགས་ཀྱིས་བསྐྱར་ཞིབ་རིམ་པ་བདུན་ལྷག་བྱས་པའི་གྲུབ་དོན་ནང་ད་ཆ་རིམས་ནད་དང་འབྲེལ་བའི་གནས་ཚུལ་མང་པོ་ཞིག་ལག་སོན་བྱུང་ཐུབ་པ་མ་ཟད། འཕྲུལ་རིགས་ཀྱིས་བརྟག་དཔྱད་བྱེད་རྒྱུའི་ནུས་བ་རྒྱ་སྐྱེད་ཡོད་ལུགས་ངོ་སྤྲོད་གནང་བ་དང་སྦྲགས། ཀོང་ཧོང་གིས་ཟླ་ ༢ ཚེས་ ༢༠ བར་ཞིབ་འཇུག་བྱས་པ་ལྟར་ན་རིམས་ནད་ངོས་འཛིན་གྱི་རྩ་བའི་རྒྱུ་ཆ་ལ་འགྱུར་བ་མང་པོ་ཐེབས་ཀྱི་ཡོད་ལུགས་ལུང་འདྲེན་གནང་འདུག གཞན་ཡང་ཞིབ་འཇུག་པས་གསལ་འདོན་བྱས་པར་དང་ཐོག་རྒྱ་ནག་གིས་རིམས་ནད་འགོས་ཁྱབ་ཡོད་མེད་ལ་ཞིབ་འཇུག་བྱེད་རྒྱུའི་རྒྱུ་ཆ་གཙོ་བོ་ནི་རྒྱ་ནག་གི་ཝུ་ཧན་གྲོང་ཁྱེར་ལ་འབྲེལ་བ་ཡོད་མེད་དང་དེ་བཞིན་ཁུལ་དེའི་མཚོ་ཟས་ཀྱི་ཁྲོམ་ར་ལ་འབྲེལ་བ་ཡོད་མེད། ནད་པའི་དབུགས་རྔུབ་ལེན་ཙམ་ལ་བརྟག་དཔྱད་བྱེད་ཀྱི་ཡོད་ལུགས་ལུང་འདྲེན་གྱིས་ཞིབ་འཇུག་པས་རྒྱ་ནག་ནང་དུ་རིམ་བཞིན་གཉན་རིམས་འགོས་ཁྱབ་ཀྱི་འགྲེལ་བརྗོད་དང་ནད་རྟགས་སོགས་གཞི་རྒྱ་ཆེ་རུ་ཕྱིན་པ་དང་མཉམ་དུ་རིམས་ནད་འགོས་པའི་ནད་པའི་གྲངས་ཚད་ཀྱང་ལྟོས་བཅོས་ཀྱིས་ཆེ་རུ་ཕྱིན་ཡོད་ཚུལ་བརྗོད་དེ་རྒྱ་ནག་ནང་གི་རིམས་ནད་འགོས་ཁྱབ་ཀྱི་ནད་པའི་གྲངས་ཚད་དེ་རིང་ཚོད་དཔག་བྱས་པ་ལས་ཀྱང་མང་བ་ཡོད་པར་བཀོད་འདུགགསར་ཁང་གི་དེས་ད་དུང་རྒྱ་ནག་གི་ནང་རིམས་ནད་འགོས་ཁྱབ་ཀྱི་ནད་པའི་གྲངས་ཚད་ལ་ཕྱི་གསལ་ནང་གསལ་མེད་པར་གསལ་འདོན་གྱིས་བདུན་ཕྲག་སྔོན་མའི་ནང་དུ་རྒྱ་ནག་གིས་རིམས་ནད་ཐོག་མར་ཁྱབ་སའི་གྲོང་ཁྱེར་ཝུ་ཧན་གྱི་འདས་གྲོངས་སུ་ཕྱིན་པའི་ནད་པའི་གྲངས་ཚད་དེ་སྔོན་གྱི་ཕྱིར་བསྒྲགས་བྱས་པ་ལས་ལྡབ་གཅིག་གིས་སྤར་ཏེ་ཕྱིར་བསྒྲགས་བྱས་ཡོད་ལུགས་ལུང་འདྲེན་གྱིས་སྲིད་གཞུང་གིས་ངེས་གཏན་མེད་པའི་ཕྱིར་བསྒྲགས་ཀྱི་གནས་བབས་དེར་པེ་ཅིང་གི་མི་མང་གིས་སྡང་ཟུག་སྟོན་བཞིན་པ་ཕྱིར་བསྒྲགས་གནང་འདུག

ད་ལྟའི་ཆར་ཡོ་རོབ་རྒྱལ་ཁབ་དབྱིན་ཡུལ་ནི་འཛམ་གླིང་ནང་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་གདལ་ཤུགས་ཆེ་ཤོས་ཕོག་ཡུལ་རྒྱལ་ཁབ་ཨང་ལྔ་པ་དེ་ཆགས་ཡོད་ཅིང་། ད་བར་ཁུལ་དེའི་མི་གྲངས་ ༡༣༨༠༧༨ ལྷག་ལ་ཏོག་དབྱིབས་རིམས་ནད་ཕོག་ཡོད་པ་དང་། རིམས་ནད་རྐྱེན་པས་ད་བར་མི་གྲངས་ ༡༨༧༣༨ ལྷག་རྐྱེན་འདས་སུ་གྱུར་འདུགརླུང་འཕྲིན་ཁང་གིས་ཏོག་དབྱིབས་རིམས་ནད་ཁྱབ་གདལ་ཆེས་ཆེར་འགྲོ་བཞིན་པའི་ཁྲོད་འདིར་དབྱིན་ཡུལ་ནང་གནས་སྡོད་བོད་མི་ཚོའི་གནས་སྟངས་ཇི་ཆགས་སྐོར་ལ་ས་གནས་བོད་རིགས་ཚོགས་པའི་ཚོགས་གཙོ་དགྲ་ལྷ་ཚེ་རིང་ལགས་སུ་བཅར་འདྲི་ཞུས་ཡོད།

དེ་རིང་ཉིན་དགུང་ཆུ་ཚོད་ ༡༢ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཤེས་རིག་བཀའ་བློན་པད་མ་དབྱངས་ཅན་མཆོག ཏོག་དབྱིབས་རིམས་ནད་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་ཚེ་རིང་མཚམས་གཅོད་ལགས་བཅས་ལྷན་ཞུགས་ཐོག་གཞུང་འབྲེལ་གསར་འགོད་ལྷན་ཚོགས་ཤིག་གནང་བ་བརྒྱུད་ཏོག་དབྱིབས་གཉན་རིམས་དང་འབྲེལ་བའི་ཛ་དྲག་གི་གནས་སྟངས་ཁྲོད་རྒྱ་གར་གྱི་མཐོ་སློབ་ཁག་ཏུ་ཡོད་པའི་བོད་ཕྲུག་དགོས་ངེས་ཅན་ཚོར་འཚོ་སྣོན་གྱི་རོགས་རམ་གནང་རྒྱུ་ཡིན་པ་གསུངས་སོང་།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་སྤྱིར་རྒྱ་ནག་གཞུང་གིས་དམ་དྲག་སོགས་བྱས་པར་བརྟེན་བོད་ནང་གི་རིམས་ནད་ཁྱབ་གདལ་ཐད་གནས་ཚུལ་མཁོ་སྒྲུབ་ཞུ་རྒྱུ་ཁག་པོ་ཆགས་ཀྱི་ཡོད་ཀྱང་། བོད་མིའི་སྒྲིག་འཛུགས་ཀྱི་རྒྱ་སྐད་སྡེ་ཚན་དང་བོད་ཀྱི་སྲིད་བྱུས་ཉམས་ཞིབ་ཁང་ནས་ད་བར་གནས་ཚུལ་མཁོ་སྒྲུབ་ཞུས་ཡོད་པའི་ཁོངས་སུ་བོད་ནང་ལ་ཏོག་དབྱིབས་རིམས་ནད་ཕོག་པའི་མི་གྲངས་ ༨༦༦ ཙམ་བྱུང་ཡོད་ཀྱང་། རིམས་ནད་ཁྲོད་ཚེ་སྲོག་ཤོར་ཡོད་པའི་གྲངས་ཐོའི་ཐད་ད་བར་རྩད་གཅོད་སོགས་ཐུབ་རྒྱུ་ཁག་པོ་ཆགས་ཀྱི་ཡོད་པ་སོགས་འགྲེལ་བརྗོད་དང་སྦྲགས། གཞིས་ལུས་བོད་ཡོངས་ལ་ཆེས་ཛ་དྲགས་ཀྱི་དུས་སྐབས་འདིར་བྱེས་བཞུགས་བོད་མིའི་ངོས་ནས་གདུང་སེམས་མཉམ་བསྐྱེད་ཡོད་པ་གསུངས་སོང་།  དེ་བཞིན་ཤེས་རིག་བཀའ་བློན་པདྨ་དབྱངས་ཅན་མཆོག་ནས་ཐེངས་འདིའི་ཛ་དྲག་གི་དུས་སྐབས་འདིར་རྒྱ་གར་གྱི་མཐོ་སློབ་ཁག་ཏུ་སློབ་སྦྱོང་གནང་བཞིན་པའི་བོད་པའི་སློབ་མ་རྣམས་ལ་སློབ་ཁྲིད་དང་དྲྭ་རྒྱའི་མཐུན་རྐྱེན། དེ་བཞིན་ཁང་གླ་སོགས་འཚོ་སྣོན་དང་འབྲེལ་བའི་ཐོག་དཀའ་ངལ་འཕྲད་བཞིན་པའི་དགོས་ངེས་ཅན་གྱི་སློབ་མ་ཚོར་རོགས་རམ་གང་ཐུབ་གནང་གཏན་ཁེལ་ཡོད་པ་དང་། དགོས་ངེས་ཅན་གྱི་མཐོ་རིམ་སློབ་མ་ཚོས་ཟླ་ ༤ ཚེས་ ༣༠ བར་ཤེས་རིག་ལས་ཁུངས་ལ་འབྲེལ་བ་གནང་དགོས་སྐོར་གསུངས་སོང་། བོད་མིའི་སྒྲིག་འཛུགས་ཀྱི་དབུས་ཉམ་ཐག་ཚོགས་ཆུང་གི་མིང་གཞུང་ཁོངས་སུ་ཡོད་པའི་ཉམ་ཐག་མཐོ་རིམ་སློབ་མ་རྣམས་ལ་ཧིར་སྒོར་ ༢༠༠༠ ཐམ་པ་གནང་རྒྱུ་ཡིན་པ་གསུངས་ཡོད། བཀའ་བློན་མཆོག་གིས་ད་ལྟའི་ཆ་ལ་མཐོ་སློབ་ཁག་ཙམ་མ་ཟད་སློབ་གྲྭ་ཁག་ཀྱང་སྒོ་བརྒྱབ་ཡོད་པའི་གནས་སྟངས་ཤིག་ཆགས་ཡོད་སྟབས་ཤེས་རིག་ལས་ཁུངས་ཀྱི་དྲྭ་རྒྱ་ཐོག་སློབ་ཁྲིད་ཐབས་ལམ་དང་འབྲེལ་བའི་དཔེ་དེབ་དང་བརྙན་ཐུང་། དེ་བཞིན་དྲྭ་ཐོག་སློབ་ཁྲིད་ཀྱི་མཐུན་འགྱུར་སོགས་གོ་སྒྲིག་ཞུ་མུས་ཡིན་པས་སློབ་མ་ཚོ་དང་ལྷག་པར་དུ་ཕ་མ་ཚོས་འགན་བཞེས་ཐོག་མཐུན་རྐྱེན་དེ་དག་བེད་སྤྱོད་གང་ཐུབ་གནང་སྐྱོང་ཡོང་བའི་སྐུལ་མ་གནང་སོང་།  གཞན་ཡང་སྐབས་དེའི་གསར་འགོད་ལྷན་ཚོགས་ཐོག་བོད་མིའི་སྒྲིག་འཛུགས་ཀྱི་ཏོག་དབྱིབས་རིམས་ནད་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་ཚེ་རིང་མཚམས་གཅོད་ལགས་ཀྱིས་ཏོག་དབྱིབས་རིམས་ནད་དང་འབྲེལ་བའི་སྤྱི་ཡོངས་ཀྱི་གནས་ཚུལ་ངོ་སྤྲོད་དང་ལྷག་པར་དུ་ཚོགས་ཆུང་གི་ངོས་ནས་ད་བར་བོད་མི་གནས་ཡུལ་ས་གནས་ ༢༧ ནང་གནས་བཞུགས་བོད་མི་ ༡༨༠༥༦ ལ་རིམས་ནད་དང་འབྲེལ་བའི་ནད་རྟགས་ཡོད་མེད་བརྟག་དཔྱད་གནང་ཡོད་པ་སོགས་ཞིབ་ཕྲ་ངོ་སྤྲོད་གནང་སོང་བ་མ་ཟད། རིང་མིན་ཕྱི་ཟླ་ ༥ ཚེས་ ༣ ནས་རྒྱ་གར་རྒྱལ་ཡོངས་ཐེམ་སྤང་གི་བཀའ་རྒྱ་མཇུག་སྒྲིལ་ཟིན་སྐབས་བོད་མིའི་གནས་ཡུལ་ས་གནས་ཁག་ཏུ་མུ་མཐུད་སྔོན་འགོག་གི་ལས་དོན་གནང་སླད་གཞིས་ཆགས་ཁག་གི་ Entry Gate ཞེས་འཛུལ་སྒོ་གཙོ་ཁག་ཏུ་ཐོ་འགོད་དང་ནད་རྟགས་ཡོད་མེད་སོགས་ཀྱི་བརྟག་དཔྱད་གནང་ས་གོ་སྒྲིག་ཞུ་དགོས་པའི་ཡོངས་ཁྱབ་གཞེན་བསྐུལ་སོགས་གནང་ཡོད།གཞི་རྩའི་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་ཁྱབ་གདལ་བྱུང་བའི་ Covid19 འམ་ཏོག་དབྱིབས་རིམས་ནད་དེ་ད་ཆ་རྒྱལ་སྤྱིའི་རྒྱལ་ཁབ་ ༢༡༣ ལྷག་ཏུ་ཁྱབ་སྟེ་མི་སེར་ ༢༤༧༥༧༢༣ ལ་རིམས་ནད་དེ་ཕོགས་པ་མ་ཟད་མི་སེར་ ༡༦༩༡༥༡ གི་ཚེ་སྲོག་ཤོར་ཡོད་པ་དང་། རྒྱ་གར་ནང་ལ་མཚོན་ན་ད་ལྟའི་ཆར་རིམས་ནད་དེ་ཕོག་མཁན་ ༡༦༤༥༤ དང་ཚེ་སྲོག་ཤོར་མཁན་ ༦༨༡ ཆགས་ཀྱི་འདུག

རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་ནད་ཡམས་ཆེས་ཆེར་ཁྱབ་བརྡལ་འགྲོ་བཞིན་པའི་དུས་སྐབས་སུ་རྒྱ་ནག་གིས་བོད་ཁུལ་གྱི་ས་ཁུལ་ཁག་ཏུ་ཆེད་བསྐྱོད་ཀྱིས་མི་མང་གི་ཆོས་ལུགས་དད་མོས་རང་དབང་ལ་རྡོག་རོལ་གྱིས་གྲྭ་མང་ལ་གཅར་བརྡུང་དང་གྲྭ་ཤག་མང་པོ་གཏོར་བཤིག་གཏོང་བཞིན་པའི་གནས་ཚུལ་ཐོན་འདུགདེ་རིང་བོད་གནད་ཉམས་ཞིབ་པ་ལྕམ་སྐུ་ kate saunders ལགས་ཀྱིས་ The Diplomat དུས་དེབ་ཐོག་གནས་ཚུལ་སྤེལ་བར་གཞིགས་ན་ཟླ་ ༤ ཚེས་ ༡ ཉིན་རྒྱ་ནག་དམར་ཤོག་གི་གཞུང་འབྲེལ་གྱི་མི་སྣ་ཁམས་སྨར་ཁམས་ཀྱི་དགོན་གྲོང་དུ་སླེབས་ནས་ཁུལ་དེར་ས་གནས་མི་མང་གིས་བོད་ལུགས་ཀྱི་སྲོལ་རྒྱུན་གྱི་བཟོ་དབྱིབས་ཅན་གྱི་གྲྭ་ཤག་བཅུ་དྲུག་ཙམ་ཞིག་འཛུགས་སྐྲུན་གནང་བཞིན་པར་གཏོར་བཤིག་བཏང་བ་མ་ཟད་སྨར་ཁམས་དགོན་གྱི་མཁན་པོ་ལགས་ཀྱིས་གྲྭ་ཤག་གཏོར་བཤིག་མི་གཏོང་བར་རེ་སྐུལ་ཞུས་པའི་སྐབས་རྒྱ་ནག་གིས་ཁོང་ལ་གཅར་བརྡུང་བཏང་བ་དང་གྲྭ་བ་གཞན་ལ་ཡང་བཙོན་འཇུག་བྱེད་རྒྱུའི་འཇིགས་སྐུལ་བཏང་སྟེ་གྲྭ་མང་དགོན་པ་ནས་ཕྱིར་ཕུད་བཏང་ཡོད་སྟབས་ད་ཆ་དགོན་པ་སྟོང་པ་ཆགས་ཡོད་པར་འཁོད་འདུག རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་གང་སར་ཁྱབ་བརྡལ་འབྱུང་བཞིན་པ་དང་བསྟུན་བོད་ཁུལ་དུ་ཕྱི་ལོགས་སུ་འབྲེལ་འདྲེས་བྱེད་རྒྱུར་སྔར་ལྷག་དམ་དྲག་ཇེ་ཆེར་བཏང་ཡོད་པ་དང་འབྲེལ་སྨར་ཁམས་ཁུལ་དང་རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་ཀྱི་ཁུལ་དུ་དགོན་པ་མང་པོ་ནས་གྲྭ་མང་བཙན་ཤེད་ཀྱིས་ཕྱིར་ཕུད་གཏོང་གི་ཡོད་པ་མ་ཟད། དགོན་པ་རེ་རེ་ནས་གྲྭ་གྲངས་ཉི་ཤུ་ལས་མང་བ་བསྡད་མི་ཆོག་པ་བཟོས་ཡོད་ཀྱང་། བོད་ཁུལ་བཀག་སྡོམ་རྐྱེན་གྱིས་དགོན་པ་དེ་དག་གི་གནས་ཚུལ་དངོས་ལ་རྒྱུས་ལོན་བྱེད་ཐབས་མེད་པར་ལུང་འདྲེན་གྱིས་དགོན་གྲོང་ནས་ཕྱིར་ཕུད་བཏང་བའི་གྲྭ་མང་རྣམས་རྒྱ་ནག་གི་ཤེས་ཡོན་བསྐྱར་སྤེལ་ཟེར་བའི་བཀག་སྐྱིལ་ཁང་དུ་བཅུག་ཡོད་པར་འཁོད་འདུག ལྕམ་སྐུ་ Saunders ལགས་ཀྱིས་སྨར་ཁམས་དགོན་པ་ཆགས་ས་ཆབ་མདོ་ཁུལ་ནི་ད་ཆ་རྒྱ་ནག་གིས་བླ་རུང་སྒར་དང་ཡ་ཆེན་སྒར་ནས་ཕྱིར་ཕུད་བཏང་བའི་གྲྭ་མང་བཀག་སྐྱིལ་བྱས་ཏེ་ཤེས་ཡོན་བསྐྱར་སྤེལ་ཞེས་པའི་ལས་གཞི་ལག་བསྟར་བྱེད་སའི་ལྟེ་གནས་ཤིག་ཏུ་བསྒྱུར་ཟིན་པ་མ་ཟད། ད་ལྟའི་ཆར་ཁུལ་དེར་བཀག་སྐྱིལ་བྱས་པའི་གྲྭ་བཙུན་རྣམས་ལ་སྡུག་སྦྱོང་མནར་གཅོད་ཆེས་ཆེར་གཏོང་བཞིན་ཡོད་པ་མ་ཟད་རྒྱ་ནག་གིས་ཀྱང་ཁུལ་དེ་ནི་བོད་ཁུལ་གྱི་ཁ་བྲལ་གདོང་ལེན་གྱི་ལྟེ་གནས་ཤིག་ཡིན་པར་བརྗོད་ཡོད་པ་དང་། དེ་བཞིན་རྒྱ་ནག་གཞུང་གིས་ཤིན་ཅང་ནང་གི་ཡུ་གུར་མི་རིགས་ས་ཡ་རྒལ་བ་དོ་དམ་གྱི་ལས་འགུལ་མ་སྤེལ་གོང་དུ་བོད་དེ་བཞིན་དེ་ལྟ་བུའི་དྲག་གནོན་གྱི་ཐབས་ལམ་འདྲ་མིན་ཚོད་ལྟ་བྱེད་ས་ཞིག་ཏུ་བེད་སྤྱོད་ཟིན་པ་དང་། ད་ཆ་ཏོག་དབྱིབས་རིམས་ནད་ཁྱབ་འདལ་གྱི་དུས་སྐབས་དེའི་ཁྲོད་ཐབས་ལམ་དེ་དག་དངོས་སུ་ལག་བསྟར་བྱེད་འགོ་ཚུགས་ཡོད་པ་གསུངས་འདུགདེའང་དེ་སྔ་བོད་མི་རྣམས་ཀྱི་འགྲུལ་བསྐྱོད་ལ་ཚོད་འཛིན་བྱ་རྒྱུའི་ཁ་པར་གྱི་མཉེན་ཆས་རྣམས་ད་ཆ་རིམས་ནད་ཁྱབ་བརྡལ་ཁྲོད་ཕན་ཚུན་འབྲེལ་ལམ་ལ་ཚོད་འཛིན་ཆེད་བེད་སྤྱོད་བྱེད་བཞིན་པ་དང་ལྷག་པར་བོད་ནང་དུ་ཏོག་དབྱིབས་རིམ་ནད་ཁྱབ་ཆེ་ཤོས་བྱུང་ས་ཁམས་རྟའུ་ཁུལ་དུ་དམིགས་བསལ་བེད་སྤྱོད་བྱས་ཡོད་པ་གསུངས་འདུག རྒྱ་ནག་གིས་རིམས་ནད་ཐོག་མར་ཁྱབ་བརྡལ་བྱུང་སའི་ལྟེ་གནས་ཝུ་ཧན་གྲོང་ཁྱེར་གྱི་མི་མང་ལ་བཙན་ཤེད་ཀྱིས་དམར་ཤོག་སྲིད་གཞུང་བཀའ་དྲིན་ཆེན་པོ་ཡིན་པར་བལྟ་དགོས་པར་བརྗོད་བཞིན་པ་ལྟར་ད་ཆ་བོད་ཁུལ་གྱི་སློབ་མ་རྣམས་ཀྱང་ཐེམ་སྤང་གི་བཀག་རྒྱ་ལས་གྲོལ་ཏེ་སློབ་ཞུགས་བྱས་མ་ཐག་རྒྱ་ནག་གིས་བོད་རིགས་སློབ་མ་རྣམས་ལ་རྒྱ་ནག་སྲིད་གཞུང་ལ་དགའ་མོས་བྱེད་དགོས་པ་དང་དམར་ཤོག་སྲིད་གཞུང་ལ་བློ་སེམས་དཀར་དགོས་པའི་སྐུལ་སློང་བྱེད་ཀྱི་ཡོད་པ་ཡོངས་གྲངས་ཀྱིས་ཕྱི་ལོ་ ༢༠༠༩ ལོ་ནས་བཟུང་བོད་ཁུལ་དུ་རང་ལུས་མེར་སྲེག་གི་གནད་དོན་དེ་དབུ་ཚུགས་པ་དང་བསྟུན་རྒྱ་ནག་གིས་ཨ་མདོ་རྔ་བ་ཁུལ་དུ་བོད་ཀྱི་སྐད་ཡིག་གི་སློབ་ཚན་གྱི་བསླབ་གཞི་མེད་པར་བཟོས་ནས་ཆེད་དུ་རྒྱའི་སྐད་ཡིག་གི་སློབ་ཁྲིད་ལག་བསྟར་ཤུགས་ཆེན་པོ་བྱེད་བཞིན་པ་ཡང་ཡོངས་གྲགས་གནང་བ་དང་ལྷན་དུ་རིམས་ནད་དང་འབྲེལ་ནས་རྒྱ་ནག་གིས་བོད་ཁུལ་དུ་སྤྱི་ཚོགས་བརྟན་ལྷིང་ཁ་ལ་ཁྱེར་ནས་བོད་མི་རྣམས་ལ་དམ་དྲག་བྱེད་རྒྱུའི་ལས་གཞི་ཤུགས་ཆེ་རུ་བཏང་ཡོད་པ་ཡོངས་གྲགས་གནང་འདུགལྕམ་སྐུ་མཆོག་གིས་ད་དུང་བོད་ཁུལ་དུ་རིམས་ནད་དང་འབྲེལ་ནས་བཀག་སྡོམ་ཤུགས་ཆེར་བཏང་བའི་དཔེ་མཚོན་གཅིག་ནི་རྒྱ་ནག་སྲིད་གཞུང་གིས་བོད་ཁུལ་གྱི་རྩོམ་པ་པོ་ཚེ་རིང་འོད་ཟེར་ལགས་སུ་སྲིད་གཞུང་གིས་བཀའ་རྒྱ་བཏང་སྟེ་༸གོང་ས་༸སྐྱབས་མགོན་ཆེན་པོ་མཆོག་དང་ཧོང་ཀོང་། དེ་བཞིན་ཏོག་དབྱིབས་རིམས་ནད་སོགས་ཀྱི་སྐོར་ལ་བཀའ་མོལ་གང་ཡང་གནང་མི་ཆོག་པའི་བཙན་བཤད་བཏང་ཡོད་པ་དང་། ཚེ་རིང་འོད་ཟེར་ལགས་ཀྱིས་རྒྱ་ནག་ལ་མཚོན་ན་སྨྲ་བརྗོད་ཀྱི་རང་དབང་སྔོན་འགོག་བྱེད་རྒྱུ་ནི་རིམས་ནད་སྔོན་འགོག་བྱེད་རྒྱུ་ལས་གལ་ཆེ་བར་ངོས་འཛིན་བཞིན་པར་ཡོངས་གྲགས་གནང་འདུག

ད་ལྟའི་ཆར་ཡོ་རོབ་རྒྱལ་ཁབ་འཇར་མ་ནི་ནི་འཛམ་གླིང་ནང་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་ཤུགས་ཆེ་ཤོས་ཕོག་ཡུལ་རྒྱལ་ཁབ་ཨང་བཞི་པ་དེ་ཆགས་ཡོད་ཅིང་། ད་བར་ཁུལ་དེའི་མི་གྲངས་ ༡༤༥༧༤༣ ལྷག་ལ་ཏོག་དབྱིབས་རིམས་ནད་ཕོག་ཡོད་པ་དང་། རིམས་ནད་རྐྱེན་པས་ད་བར་མི་གྲངས་ ༤༦༤༢ ལྷག་རྐྱེན་འདས་སུ་གྱུར་འདུག དེ་བཞིན་ད་བར་རིམས་ནད་འདིའི་འོག་ནས་དྲག་སྐྱེད་བྱུང་ཁག་ལ་གཞིགས་ན་མི་གྲངས་ ༩༡༥༠༠ ལྷག་ཆགས་ཀྱི་འདུགརླུང་འཕྲིན་ཁང་གིས་ཏོག་དབྱིབས་རིམས་ནད་འདིའི་ཁྲོད་འཇར་མ་ནི་ནང་གནས་སྡོད་བོད་མི་ཚོའི་གནས་སྟངས་ཇི་ཆགས་སྐོར་ལ་ས་གནས་བོད་རིགས་ཚོགས་པའི་ཚོགས་གཙོ་བློ་བཟང་ཕུན་ཚོགས་ལགས་སུ་བཅར་འདྲི་ཞུས་ཡོད།

རྒྱ་ནག་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ཁུལ་དུ་ད་ཆ་ཏོག་དབྱིབས་རིམས་ནད་ཕོག་པའི་མི་གཅིག་ཀྱང་མེད་སྐོར་དང་རྒྱ་ནག་ཁྱོན་ཡོངས་སུ་རིམས་ནད་འགོག་སྲུང་གང་ལེགས་བྱས་ཡོད་ཚུལ་སོགས་འགྲེལ་བརྗོད་བྱས་ཏེ་བོད་ཀྱི་དགོན་སྡེ་གྲྭ་ཚང་དང་ཚོང་གི་ལྟེ་གནས་ཁག་རིམ་བཞིན་སྒོ་ཕྱེ་རྒྱུ་ཡིན་སྐོར་བཤད་ཡོད། འོན་ཀྱང་བོད་ལྷོ་ཁ་ཁུལ་དུ་ཆགས་པའི་བསམ་ཡས་དགོན་པ་དང་བཀའ་བརྒྱུད་ཀྱི་ཆོས་སྡེ་ཆེན་པོ་གཡའ་བཟང་དགོན་པ་གཉིས་སླར་སྒོ་རྒྱག་དགོས་པའི་བཀའ་རྒྱ་བཏང་འདུགཟླ་བ་སྔོན་མའི་ཕྱི་ཚེས་ ༣༠ ཉིན་ལྷ་ས་གྲོང་ཁྱེར་ནང་བསྟན་མཐུན་ཚོགས་ནས་ལྷ་ས་གྲོང་ཁྱེར་དང་ཐག་རིང་གི་དགོན་པ་དང་ལྷ་ཁང་གྲངས་ ༢༤༡ ཕྱི་ཟླ་ ༣ ཚེས་ ༣༡ ནས་སྒོ་ཕྱེ་རྒྱུ་ཡིན་པ་ཡོངས་གྲགས་བྱས་ཡོད་པ་དེ་ལྟར་ཡང་། ཟླ་བ་འདིའི་ཚེས་ ༡༤ དང་ ༡༥ སོ་སོར་བསམ་ཡས་དང་གཡའ་བཟང་དགོན་པའི་ལས་ཤོག་ཐོག་ཏུ་གོང་རིམ་གྱི་བརྡ་ཐོ་དང་ཏོག་དབྱིབས་ནད་རིམས་འགོག་བཅོས་ཀྱི་ལས་ཀའི་དགོས་མཁོར་དམིགས་ནས་བསམ་ཡས་དགོན་པ་ཕྱི་ཟླ་ ༤ ཚེས་ ༡༤ ནས་སྒོ་རྒྱག་རྒྱུ་དང་དེ་བཞིན་གཡའ་བཟང་དགོན་པ་ཚེས་ ༡༥ ནས་སྒོ་རྒྱག་རྒྱུ་ཡིན་ཞེས་གསལ་བསྒྲགས་སྤེལ་འདུགགསལ་བསྒྲགས་དེའི་ནང་བོད་པའི་དགོན་པ་དེ་གཉིས་སླར་སྒོ་རྒྱག་དགོས་པའི་ཞིབ་ཕྲའི་རྒྱུ་མཚན་དང་དུས་ཚོད་ནམ་ཞིག་གི་བར་སྒོ་རྒྱག་རྒྱུ་ཡིན་པ་སོགས་ཁ་གསལ་གང་ཡང་བཀོད་མེད་པ་དང་། བརྒྱུད་ལམ་ཁག་ཏུ་དེ་འབྲེལ་གནས་ཚུལ་ཐོན་ཁག་ལ་གཞིགས་ན་ས་གནས་བོད་མི་ཚོས་ཐེངས་འདིའི་གོང་རིམ་གྱི་བཀའ་རྒྱ་དེ་ཏོག་དབྱིབས་རིམས་ནད་ལ་ཁག་དཀྲི་པ་ཞིག་ཡིན་ཀྱང་དོན་དངོས་སུ་རྒྱུ་རྐྱེན་གཞན་ཞིག་ཡོད་སྲིད་པར་ཚོད་དཔག་གནང་གི་འདུགགཞི་རྩའི་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་གྱི་འཕྲོད་བསྟེན་བདེ་ཐང་ལྷན་ཁང་གི་བརྡ་ཁྱབ་ལྟར་བྱས་ན་ཁུལ་དེར་ད་བར་རིམས་ནད་ཕོག་པ་གཅིག་བྱུང་བ་དེ་དྲག་སྐྱེད་བྱུང་ཡོད་པ་དང་། ད་ལྟའི་ཆར་རིམས་ནད་ཕོག་པ་དང་ནད་རྟགས་ཡོད་པའི་མི་གཅིག་ཀྱང་མེད་སྐོར་བརྗོད་འདུག་ཀྱང་། རྒྱལ་སྤྱིའི་གཞུང་དང་གཞུང་འབྲེལ་མ་ཡིན་པའི་ཚོགས་པ། ལྷག་པར་དུ་འཕྲོད་བསྟེན་དཔྱད་ཞིབ་པ་མང་དག་ཅིག་གིས་རྒྱ་ནག་གཞུང་གིས་ཏོག་དབྱིབས་གཉན་རིམས་ཕོག་པ་དང་འདས་གྲོངས་སུ་གྱུར་བ་སོགས་དང་འབྲེལ་བའི་གྲངས་ཐོའི་ཐོག་སྦས་བསྐུངས་བྱེད་བཞིན་པར་སྐྱོན་བརྗོད་ཤུགས་ཆེ་གནང་མུས་ཡིན་པ་རེད།  

རྒྱ་ནག་གྲོང་ཁྱེར་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་དེ་ད་ཆ་འཛམ་གླིང་གི་རྒྱལ་ཁབ་ཉིས་བརྒྱ་ལྷག་ནང་ཁྱབ་གདལ་འགྲོ་བཞིན་པར་བརྟེན་རིམས་ནད་དེར་གདོང་ལེན་དང་བཅོས་ཐབས་སོགས་ཀྱི་ཆེད་རྒྱལ་ཁབ་སོ་སོ་ནས་དམིགས་བསལ་མ་དངུལ་མཁོ་སྒྲུབ་གནང་གི་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་གཙོས་གཡུང་དྲུང་བོན་སོགས་རིས་མེད་ཀྱི་བླ་སྤྲུལ་ཁག་དང་བོད་པའི་ཚོགས་སྒེར་ཁག་གིས་རྒྱ་གར་དབུས་གཞུང་དང་མངའ་སྡེར་ཏོག་དབྱིབས་རིམས་ནད་ལ་གདོང་ལེན་སླད་དངུལ་དངོས་ཀྱི་ཞལ་འདེབས་མང་དག་ཅིག་གནང་བཞིན་ཡོད་པ་དང་དུས་ད་ལྟའང་དེ་ལྟར་ཞལ་འདེབས་ཕུལ་མཁན་ཇེ་མང་དུ་འགྲོ་བཞིན་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་༸སྐྱབས་རྗེ་པད་ནོར་རིན་པོ་ཆེ་མཆོག་གི་དགེ་རྩ་ཚོགས་པས་ཀ་ན་ཊ་ཀའི་མངའ་སྡེའི་བློན་ཆེན་གྱི་མཚན་ཐོག་ཏུ་ཕྱག་བྲིས་ཕུལ་བའི་ནང་ད་ཆ་ཏོག་དབྱིབས་རིམས་ནད་རྐྱེན་པས་མི་མང་དག་ཅིག་ནད་དེས་མནར་བཞིན་པ་དང་དེ་བཞིན་དུ་མ་ཞིག་འདས་གྲོངས་སུ་གྱུར་ཡོད་པས་དེར་ཐུགས་ཕམ་ཡོད་པ་གསུངས་པ་དང་སྒོས་རིམས་ནད་དེ་འགོག་ཐབས་སླད་རྒྱ་གར་གྱི་སྲིད་བློན་སྐུ་ཞབས་མོ་དཱི་མཆོག་གི་དབུ་ཁྲིད་འོག་དབུས་དང་མངའ་སྡེ་གཞུང་། འཕྲོད་བསྟེན་གྱི་འབྲེལ་ཡོད་ལས་བྱེད་སོགས་ནས་ཉིན་མཚན་བལྟོས་མེད་ཕྱག་ལས་གནང་བཞིན་པ་མ་ཟད་ལྷག་པར་ཀ་ན་ཊ་ཀ་མངའ་སྡེས་ས་གནས་ཀྱི་ཡུལ་མི་རྣམས་རིམས་ནད་དེ་ལས་སྐྱོབ་སླད་ལས་དོན་རྒྱ་གང་ཆེ་གནང་པར་རྒྱབ་སྐྱོར་མཚོན་ཕྱིར་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་བཅུ་ཞལ་འདེབས་ཕུལ་བ་དང་ནད་ཡམས་དེ་མགྱོགས་མྱུར་ཞི་བར་སྨོན་འདུན་གནང་འདུགདེ་བཞིན་རྒྱ་གར་བྱང་ཕྱོགས་སྒང་ཏོག་ཏུ་རྟེན་གཞི་བྱས་པའི་མཚུར་ཕུ་བླ་བྲང་གིས་ཏོག་དབྱིབས་ནད་ལ་གདོང་ལེན་སླད་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གསུམ་ཞལ་འདེབས་ཕུལ་འདུག དེ་དང་ཕྱོགས་མཚུངས་ཁ་སྔོན་ཚེས་ ༨ ཉིན་རྒྱ་གར་བྱང་ཕྱོགས་ལྡེ་ར་ལྡུན་གྲོང་ཁྱེར་ནང་རྟེན་གཞི་བྱས་པའི་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གིས་ཁུལ་དེའི་མངའ་སྡེ་གཞུང་གི་ཕྱག་ལས་གནང་ཁག་ལ་བསྔགས་བརྗོད་དང་སྦྲགས། མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་ལྔ་ཞལ་འདེབས་གནང་ཡོད་པ་དང་གཙུག་ལག་སློབ་གཉེར་ཁང་གི་དགེ་ལས་སློབ་མ་སོགས་ཀྱི་སར་ནས་དབུལ་ཕོངས་ཉམ་ཐག་ཚོར་ཟས་སྦྱིན་སླད་ཞལ་འདེབས་ཧིན་སྒོར་འབུམ་གཉིས་ལྷག་བསྡུ་རུབ་གནང་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གིས་ཁ་སང་ཚེས་ ༩ ཉིན་ནད་ཡམས་འགོག་བཅོས་ཀྱི་ལས་གཞིའི་ཆ་ཤས་སུ་རྒྱ་གར་དབུས་གཞུང་ལ་ཧིན་སྒོར་འབུམ་བདུན་དང་ཁྲི་ལྔ་དང་མངའ་སྡེ་གཞུང་ལ་ཧིན་སྒོར་འབུམ་གསུམ་དང་ཁྲི་ལྔ། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་འབུམ་གཉིས་དང་ཁྲི་ལྔ། མོན་གྷོ་འདོད་རྒུ་གླིང་གི་བོད་མིའི་ས་གནས་སུ་ཧིན་སྒོར་འབུམ་གཅིག་བཅས་ཞལ་འདེབས་གནང་འདུག བློ་གསལ་གླིང་གྲྭ་ཚང་གིས་མངའ་སྡེ་གཞན་ནས་ཡོང་བའི་རྒྱ་གར་ལས་མི་དང་ས་གནས་བོད་མི་གཙོས་པའི་རྒྱ་གར་བ་དཔལ་འབྱོར་ཞན་པའི་ཁྱིམ་ཚང་ཁག་ལ་བཟའ་ཆས་སོགས་ཀྱི་རོགས་སྐྱོར་གནང་མུས་རེད་འདུགཁ་སང་ཕྱི་ཚེས་ ༩ ཉིན་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་སྦིར་བོད་ཚོགས་ནས་ཀྱང་མངའ་སྡེ་ནས་རིམས་ནད་དེར་གདོང་ལེན་གནང་ཕྱོགས་ལ་རྒྱབ་སྐྱོར་དང་སྦྲགས་ཏེ་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གཅིག་དང་།  དེ་བཞིནཀཱངྒ་རཱ་རྫོང་དཔོན་གྱི་ངལ་སེལ་ཐེབས་རྩར་ཁྲི་ལྔ་ཞལ་འདེབས་གནང་འདུགགཞི་རྩའི་ཉེ་ལམ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མི་རྣམས་ནས་དང་བླངས་ཐོག་རང་རང་སོ་སོའི་མངའ་སྡེ་དང་དེ་བཞིན་སྲིད་བློན་མཆོག་གི་མཚན་ཐོག་ཏུ་ཡོད་པའི་ངལ་སེལ་ཐེབས་རྩར་ཞལ་འདེབས་རྒྱ་གང་ཆེ་གནང་དགོས་པའི་གཞེན་བསྐུལ་གནང་ཡོད་པ་དང་འདས་པའི་ཉིན་ཤས་ནས་བོད་པའི་བླ་སྤྲུལ་ཁག་དང་དགོན་སྡེ་གྲྭ་ཚང་། གཞིས་ཆགས་སོ་སོ་ནས་མངའ་སྡེ་དང་དབུས་གཞུང་གཉིས་སུ་རིམས་ནད་དེར་གདོང་ལེན་དང་གཞུང་གི་ལས་དོན་ལ་རྒྱབ་སྐྱོར་མཚོན་ཕྱིར་ཞལ་འདེབས་དང་དབུལ་ཕོངས་ཉམ་ཐག་ཚོར་ཟས་སྦྱིན་སོགས་རྣམ་དཀར་དགེ་བའི་ཕྱག་ལས་གནང་མུས་ཡིན་པ་རེད།རྩ་བའི་ཏོག་དབྱིབས་རིམས་ནད་རྐྱེན་པས་ད་བར་འཛམ་གླིང་གི་མི་གྲངས་ས་ཡ་གཅིག་ལྷག་ལ་ནད་དེ་ཕོག་ཡོད་པ་དང་ཁྲི་དགུ་ལྷག་ཙམ་འདས་གྲོངས་སུ་གྱུར་བ། འབུམ་གསུམ་ལྷག་དྲག་སྐྱེད་བྱུང་ཡོད་པ་རེད། ལྷག་དོན་རྒྱ་གར་ནང་རིམས་ནད་དེ་ཕོག་མཁན་གྱི་གྲངས་འབོར་ཉིན་རེ་བཞིན་ཇེ་འཕར་འགྲོ་གི་ཡོད་པ་དང་ད་བར་གྱི་གྲངས་ཐོར་གཞིགས་ན་རྒྱ་གར་ནང་མི་དྲུག་སྟོང་ལྷག་ལ་རིམས་ནད་དེ་ཕོག་ཡོད་པ་དང་ཉིས་བརྒྱ་ལྷག་འདས་གྲོངས་གྱུར་ཡོད་པ་རེད། དེ་བཞིན་མང་ཚོགས་ལྔ་བརྒྱ་ལྷག་ཙམ་དྲག་སྐྱེད་དུ་བྱུང་ཡོད་པ་རེད།

རྒྱ་ནག་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་རྐྱེན་གྱིས་འཛམ་གླིང་གང་སར་གཞུང་མང་གཉིས་ལ་དཀའ་ངལ་རབས་དང་རིམ་པ་འཕྲད་མུས་ཡིན་པ་ལྟར་བཙན་བྱོལ་བོད་མིའི་གནས་ཚང་རྒྱལ་ཁབ་རྒྱ་གར་ལ་མཚོན་ནའང་ད་ཆ་རིམས་ནད་རྐྱེན་པས་མི་མང་གི་ཉིན་རེའི་བྱེད་ལས་ཁག་ལ་བཀག་སྡོམ་བྱས་ཏེ་རང་ཁྱིམ་དུ་སྡོད་མུས་ཡིན་པའི་སྐབས་འདིར་བོད་མི་མང་ཚོགས་སྤྱི་དང་དགོན་སྡེ་གྲྭ་ཚང་སོགས་ཀྱིས་རང་རང་སྡོད་སའི་ཉེ་འཁོར་གྱི་རྒྱ་གར་ཡུལ་མི་རྣམས་ལ་ཟས་སྦྱིན་གནང་བ་དང་དེ་བཞིན་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་བཅས་ལ་ཞལ་འདེབས་གནང་མཁན་མང་པོ་བྱུང་འདུག གཡུང་དྲུང་བོན་འཛིན་སྐྱོང་ལྷན་ཚོགས་ཀྱིས་གནས་ཚུལ་སྤེལ་བར་ད་ཆ་རྒྱ་ནག་གི་ཏོག་དབྱིབས་རིམས་ནད་ཁྱབ་བརྡལ་རྐྱེན་པས་རྒྱལ་སྤྱིའི་ཁྱོན་འདིར་འགྲོ་བ་མིའི་རིགས་ལ་དཀའ་ངལ་ཆེན་པོ་འཕྲད་བཞིན་པ་མ་ཟད་མི་མང་པོ་ཞིག་རིམས་ནད་འདིའི་རྐྱེན་གྱིས་འདས་གྲོངས་སུ་གྱུར་ཡོད་པར་ཡོངས་གྲགས་གནང་སྟེ་རྒྱ་གར་དབུས་གཞུང་དང་མངའ་སྡེ་གཞུང་། དེ་བཞིན་སྨན་ཁང་ཁག་དང་ཉེན་རྟོག་རུ་ཁག་བཅས་ཀྱིས་རྒྱ་གར་ནང་རིམས་ནད་ཁྱབ་བརྡལ་ལ་གདོང་ལེན་གནང་བཞིན་པར་བཀའ་དྲིན་ཆེ་ཞུས་པ་དང་སྦྲགས། གཡུང་དྲུང་བོན་གྱི་སྨན་རི་ཁྲི་འཛིན་མཆོག་གིས་ལམ་སྟོན་ཕེབས་པ་བཞིན་གཡུང་དྲུང་བོན་གྱི་འཛིན་སྐྱོང་ལྷན་ཚོགས་ཀྱིས་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་ཧིན་སྒོར་འབུམ་གཉིས་དང་དེ་བཞིན་ཧི་མཱ་ཅལ་མངའ་སྡེ་གཞུང་གི་རིམས་ནད་ངལ་སེལ་ཐེབས་རྩར་ཧིན་སྒོར་འབུམ་གསུམ་བཅས་གནང་བ་མ་ཟད། ས་གནས་ཀྱི་ཡུལ་མིའི་ཁྱིམ་ཚང་ ༢༠༠ མ་ཟིན་ཙམ་ལ་ཉེར་མཁོའི་ཟས་རིགས་ཀྱི་སྦྱིན་པ་གནང་འདུག དེ་བཞིན་ཧི་མཱ་ཅལ་གྱི་མངའ་ཁོངས་སུ་གནས་པའི་དཔལ་སྤུངས་ཤེས་རབ་གླིང་དགོན་པས་ཀྱང་རྒྱ་གར་དབུས་གཞུང་དང་མངའ་སྡེ་གཞུང་གི་རིམས་ནད་ཀྱི་ངལ་སེལ་ཚོགས་པར་ཞལ་འདེབས་ཧིན་སྒོར་འབུམ་བཅོ་ལྔ་གནང་ཡོད་པ་ཟད་ནད་ཡམས་དོགས་གཞིའི་ཟུར་བཀག་གི་ལྟེ་གནས་སུ་ཡང་ཉེར་མཁོའི་བཟའ་བཅའ་རིགས་གནང་བ་དང་། གལ་ཏེ་ཛ་དྲག་ཆགས་པ་ཡིན་ན་དགོན་པའི་ངོས་ནས་རང་ལོ་སུམ་ཅུའི་འོག་གི་ན་གཞོན་དང་བླངས་པ་ ༣༠ ལྷག་གྲ་སྒྲིག་གིས་དགོས་ངེས་ཀྱི་རོགས་རམ་གནང་རྒྱུ་ཡིན་པར་ཡོངས་གྲགས་གནང་འདུག དེ་བཞིན་སྦིར་ཚོགས་པ་ཁག་གིས་ཀྱང་ཞལ་འདེབས་བསྡུ་རུབ་ཀྱིས་རྒྱ་གར་གཞུང་ལ་ཧིན་སྒོར་འབུམ་བཞིའི་ཞལ་འདེབས་གནང་འདུག གཞན་ཡང་ཧི་མཱ་ཅལ་མངའ་ཁོངས་ཀྱི་ཁམས་སྒར་གྲྭ་ཚང་། བཤད་གྲྭ། བྱང་ཆུབ་ལྗོངས་རྡོ་རྫོང་དགོན། བཙུན་དགོན་དོན་བརྒྱུད་གླིང་། བཀྲ་ཤིས་ལྗོངས་ཀྱི་གཞིས་ཆགས་ལས་ཁུངས་བཅས་མཉམ་རུབ་ཀྱིས་རྒྱ་གར་དབུས་དང་མངའ་སྡེ་གཞུང་ལ་ཧིན་སྒོར་འབུམ་དྲུག་གི་ཞལ་འདེབས་གནང་བ་མ་ཟད། མགོན་མེད་ཉམ་ཐག་གི་རིགས་ལ་ཉིན་རེའི་བཟའ་བཅའ་བཅས་ཀྱི་ཞལ་འདེབས་གནང་སྟེ་ཐེངས་འདིའི་རིམས་ནད་དོན་རྐྱེན་ཁྲོད་མདུན་བསྐྱོད་ཀྱིས་ཕྱག་ལས་གནང་མཁན་སྤྱི་དང་དེ་བཞིན་འཛིན་སྐྱོང་གི་ཐོག་ནས་རིམས་ནད་སྔོན་འགོག་གི་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུས་འདུག དེ་བཞིན་ལྷོ་ཕྱོགས་བཀྲ་ཤིས་ལྷུན་པོ་དགོན་པས་ཀྱང་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩར་ཧིན་སྒོར་འབུམ་གཅིག་དང་ཕྱེད་ཀ་དང་ཀ་ན་ཊ་ཀའི་མངའ་སྡེ་གཞུང་ལ་ཧིན་སྒོར་འབུམ་གཅིག་བཅས་ཀྱི་ཞལ་འདེབས་གནང་བ་མ་ཟད་ཁུལ་དེའི་ཉམ་ཐག་པ་རྣམས་ལ་བཟའ་བཅའ་རིགས་ཀྱི་རོགས་རམ་གནང་འདུག རྒྱ་གར་བྱང་ཕྱོགས་ཀྱི་བོད་རིགས་འདུས་སྡོད་ཀྱི་ས་ཁུལ་ལྡེ་ར་ལྡུན་ཁུལ་དུ་ས་སྐྱ་མཐོ་སློབ། ས་སྐྱ་སྨོན་ལམ་ཐེབས་རྩ་ཁང་། དེ་བཞིན་སྒྲོལ་མ་ཕོ་བྲང་ཚོགས་པ་དང་ས་སྐྱ་དབུས་ལྟེ་གནས་ཁང་སོགས་ཀྱིས་མཉམ་རུབ་ཀྱི་ཐོག་ནས་ཨོ་ཊྲར་ཁཱན་ཌ་མངའ་སྡེ་གཞུང་གི་བློན་ཆེན་གྱི་མཚན་ཐོག་ཏུ་ཧིན་སྒོར་འབུམ་ ༢༣ ལྷག་གི་ཞལ་འདེབས་གནང་སྟེ་མངའ་སྡེ་གཞུང་གི་འབྲེལ་ཡོད་ཀུན་གྱིས་རིམས་ནད་སྔོན་འགོག་གི་ཕྱག་ལས་རྒྱ་ཆེར་གནང་བཞིན་པར་བཀའ་དྲིན་ཆེ་ཞུས་འདུག དེ་མཚུངས་སུ་རྡོར་གདན་བཀའ་བརྒྱུད་སྨོན་ལམ་ཆེན་མོའི་ཐེབས་རྩ་ཚོགས་པའི་ངོས་ནས་བི་ཧཱར་མངའ་སྡེའི་བློན་ཆེན་མཆོག་གི་ཐེབས་རྩ་བརྒྱུད་དེ་ཧིན་སྒོར་བུམ་ལྔ་དང་རྒྱ་གར་གྱི་སྲིད་བློན་མཆོག་གི་ཐེབས་རྩར་ཧིན་སྒོར་འབུམ་ལྔ་ཕུལ་འདུག དེ་བཞིན་དྷ་སར་རྟེན་གཞི་བྱས་པའི་ནོར་བུ་བཀྲ་ཤིས་ལགས་ཀྱིས་ཀྱང་རྒྱ་གར་གྱི་ཡུལ་མི་བརྒྱ་ལྷག་ལ་གྲོ་ཕྱེ་དང་འབྲས། དེ་བཞིན་སྣུམ་དང་ཚལ་རིགས་བཅས་ཀྱི་རོགས་རམས་གནང་བཞིན་འདུག ཁོང་གིས་གསར་འགོད་པར་མི་ཚང་མར་མང་ཉུང་ལ་མ་བལྟས་པར་གཞན་ལ་རོགས་རམ་བྱེད་རྒྱུའི་ནུས་པ་ཡོད་སྟབས་ཛ་དྲག་གི་སྐབས་སུ་རོགས་བྱེད་རྒྱུ་དེ་ནི་རང་ཉིད་ནང་པ་ཞིག་ཡིན་པ་དང་༸གོང་ས་མཆོག་གི་དགོངས་གཞི་ཡིན་པར་འགྲེལ་བརྗོད་གནང་སོང་། གཞན་ཡང་ལ་དྭགས་ཁུལ་གྱི་ཀརྨ་སྒྲུབ་བརྒྱུད་དགོན་གྱིས་ཀྱང་རྒྱ་གར་དབུས་གཞུང་གི་ཐད་གར་སྟངས་འཛིན་འཛིན་སྐྱོང་ལས་ཁུངས་སུ་ཧིན་སྒོར་འབུམ་གཅིག་གི་ཞལ་འདེབས་གནང་སྟེ་གང་མགྱོགས་རིམས་ནད་ཞི་བའི་སྨོན་འདུན་ཡོད་པར་གསུངས་འདུག གཞི་རྩའི་རྒྱ་ནག་ཝུ་ཧན་གྱི་རིམས་ནད་དེ་འཛམ་གླིང་གི་ས་ཁུལ་གང་སར་ཁྱབ་བརྡལ་ཕྱིན་པ་དང་ལྷན་དུ་གཞུང་དང་མི་མང་ཡོངས་ཀྱིས་ནུས་ཤུགས་གཅིག་ཏུ་སྒྲིལ་ནས་རིམས་ནད་ལ་སྔོན་འགོག་གནང་བཞིན་པའི་ཁྲོད། བོད་མི་མང་ཚོགས་ཀྱིས་ཀྱང་རང་གི་འཇོག་ནུས་ལ་དཔག་པའི་ཞལ་འདེབས་དང་བཟའ་བཅའ་སོགས་ཀྱི་རོགས་རམ་གནང་མཁན་མང་པོ་བྱུང་གི་ཡོད་པ་ལྟར། རླུང་འཕྲིན་ཁང་གིས་མང་ཚོགས་ཀྱིས་འགན་རང་འཁུར་གྱིས་དངུལ་དངོས་ཀྱི་ཞལ་འདེབས་གནང་བ་དང་དེ་བཞིན་དཔལ་འབྱོར་གྱི་འཁོས་ཁ་ཞན་པའི་ཉམ་ཐག་རིགས་ལ་སྡོད་གནས་མཁོ་སྤྲོད་བྱེད་བཞིན་པ་སོགས་ཀྱི་གནད་དོན་ཁག་ཅིག་དེ་སྔ་ནས་བཏང་ཟིན་པ་བཞིན་དེ་རིང་བསྐྱར་དུ་བོད་རིགས་འདུས་སྡོད་ཀྱི་ས་ཁུལ་ཁག་ཅིག་གིས་རོགས་རམས་གནང་བཞིན་པའི་གནས་ཚུལ་ཕྱོགས་བསྡུས་ཞུས་ཡོད།

འཛམ་གླིང་གི་རྒྱལ་ཁབ་དང་ས་ཁུལ་ ༡༧༦ ཙམ་ནང་ཁྱོན་མི་འབུམ་བརྒྱད་ལྷག་ལ་རྒྱ་ནག་ནས་ཁྱབ་པའི་ Covid 19 འམ་ཏོག་དབྱིབས་རིམས་ནད་དེ་འགོས་ཡོད་པའི་ཁྲོད་ནས་ད་ཆ་གཉན་རིམས་དེ་ཁྱབ་གདལ་མང་ཤོས་བྱུང་ཡུལ་གྱི་རྒྱལ་ཁབ་ཨ་རི་དང་དེའི་ནང་ནས་ནིའུ་ཡོག་གྲོང་ཁྱེར་ཆགས་ཀྱི་ཡོད་པ་དང་གྲོང་ཁྱེར་དེར་མཚོན་ན་བོད་རིགས་སྨན་པའི་གྲངས་འབོར་གང་ཙམ་ཞིག་ཡོད་པ་རེད། ད་ལྟའི་ཆར་ནིའུ་ཡོག་འདི་རིམས་ནད་ཁྱབ་གདལ་བྱུང་སའི་ཆེས་ཛ་དྲག་རང་བཞིན་ཞིག་ཏུ་འགྱུར་བཞིན་ཡོད་ཀྱང་། ས་ཁུལ་དེའི་ནང་གནས་བཞུགས་བོད་རིགས་སྨན་པ་དང་སྨན་ཞབས། དེ་བཞིན་འཕྲོད་ལས་པ་སོགས་མུ་མཐུད་མདུན་ལ་འཐོན་ནས་ཕྱག་ལས་གནང་བཞིན་ཡོད་པ་ལྟར་མང་དག་ཅིག་ལ་གཉན་རིམས་དེ་ཕོག་ཡོད་པར་དོགས་གཞིའི་འོག་ཟུར་བཀག་གནང་བ་དང་ཁག་གཅིག་རིམས་ནད་ཕོག་རྐྱེན་སྤྱི་ཚོགས་ཁྲོད་ཀྱི་འཚོ་རྟེན་དང་ཉིན་རེའི་བྱ་གཞག་ལ་ཆེས་ངལ་བ་ཆེན་པོ་འཕྲད་མུས་རེད་འདུག དེའི་ཁོངས་ནིའུ་ཡོག་ཏུ་གཞུང་གི་སྨན་ཁང་ཆེ་གྲས་ Bellevue ནང་སྨན་ཞབས་ཕྱག་ལས་གནང་མཁན་བོད་རིགས་བསྟན་འཛིན་བག་གྲོ་ལགས་དང་འཆི་མེད་ཨ་འབུམ་ཚང་ལགས་གཉིས་ལ་ཏོག་དབྱིབས་རིམས་ནད་ཀྱི་ནད་རྟགས་འཐོན་པར་བརྟེན་ད་ཆ་ཟུར་བཀག་ཐོག་བཞུགས་མུས་ཡིན་པ་རེད། རིམས་ནད་དེ་འབྲེལ་ནིའུ་ཡོག་དང་ནིའུ་ཡོག་ཇར་སིའི་བོད་རིགས་སྨན་ཞབས་ཚོགས་པས་ཉིན་ཤས་གོང་ཁུལ་དེའི་ནང་གནས་བཞུགས་བོད་མི་སླད་ཛ་དྲག་ལམ་སྟོན་གྱི་འབྲེལ་གཏུག་ལས་རིམ་ཞིག་དབུ་འཛུགས་གནང་བ་མ་ཟད། Go Fund me ཞེས་པའི་དྲྭ་ཚིགས་གསར་བཟོ་བརྒྱུད་དེ་དཔལ་འབྱོར་བསྡུ་རུབ་གནང་སྟེ་ནིའུ་ཡོག་ནང་ཟུར་བཀག་གནང་བཞིན་པའི་བོད་རིགས་འཕྲོད་ལས་པ་དང་སྨན་ཁང་ཁག་ཏུ་ཕྱག་ལས་གནང་བཞིན་པ་རྣམས་ལ་འདང་ངེས་ཡོད་པའི་ Personal protection Equipment ཞེས་རིམས་ནད་སྔོན་འགོག་དང་སྲུང་སྐྱོབ་ཀྱི་ཁ་རས་དང་གདོང་ཁེབས་སོགས་མཁོ་ཆས་ཁག་གཅིག་མཁོ་སྒྲུབ་གནང་བཞིན་འདུག རླུང་འཕྲིན་ཁང་གིས་ཏོག་དབྱིབས་རིམས་ནད་ཀྱི་ནད་རྟགས་འཐོན་ནས་ཟུར་བཞུགས་གནང་བཞིན་པ་བོད་རིགས་སྨན་ཞབས་གཉིས་དང་ནིའུ་ཡོག་དང་ནིའུ་ཡོག་ཇར་སིའི་བོད་རིགས་སྨན་ཞབས་ཚོགས་པའི་ཚོགས་གཙོ་བཅས་ལ་བཅར་འདྲི་ཁག་གཅིག་ཞུས་ཡོད།