བཙན་བྱོལ།

ཉེ་སྔོན་ཕྱི་ཟླ་གསུམ་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ སྐབས་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་དང་ཚོགས་ཞུགས་ཀྱི་སྐུ་ཚབ་མི་སྣ་སོགས་ལ་ཕྱོགས་ཡོངས་ནས་གནོན་ཤུགས་སྤྲད་ནས་རྒྱ་ནག་་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་གླེང་སློང་མི་ཡོང་བའི་ཐབས་ཤེས་བྱས་ཡོད་པ་མངོན་གསལ་གནང་ཡོད།ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་དེའི་ཐོག་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཁག་གི་སྐུ་ཚབ་མི་སྣ་རྣམས་ལ་ཡི་གེ་ཞིག་ཕུལ་ཡོད་པ་ལྟ་ཞིབ་ཚོགས་པར་ལག་སོན་བྱུང་བ་དང་། དེ་བཞིན་ལྷན་ཚོགས་ཐོག་རྒྱ་གཞུང་གི་སྐུ་ཚབ་མི་སྣ་མང་པོ་ཆེད་བཅར་གྱིས་གནོད་ཤུསག་སྤྲད་དེ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབས་ཐད་སྐྱོན་བརྗོད་གནང་མི་ཆོག་པར་བསྔགས་བརྗོད་བྱེད་དགོས་བའི་ངན་སྐུལ་བྱས་ཡོད་པ་སོགས་མངོན་གསལ་གནང་འདུག རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་མི་སྣ་རྣམས་ལ་གནོན་ཤུགས་སྤྲོད་ཐབས་སུ་ཕུལ་བའི་ཡི་གེའི་ནང་རྒྱལ་ཚོགས་ཀྱི་ཚོགས་ཞུགས་སྐུ་ཚབ་རྣམས་ལ་ཕྱོགས་གཉིས་ཀྱི་རྒྱལ་ཁབ་ཀྱི་འབྲེལ་ལམ་དང་། དེ་བཞིན་ཕྱོགས་ཡོངས་ཀྱི་མཉམ་འབྲེལ་གཙོར་འཛིན་གྱི་ཐོག་ནས་དོ་ཕོག་འགྲོ་སྲིད་པ་དང།  ཁེ་ན་ཊ་དང་ཨ་རི་སོགས་ཀྱིས་ཕྱི་ཚེས་ ༡༣ ཉིན་རྒྱ་ནག་ནང་གི་ཡུ་གུར་མི་སེར་གྱི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་ཚོགས་འདུ་གཙོ་གྱུར་ལྷན་ཚོགས་སྤྱི་ཡོངས་ཐོག་འཛུལ་ཞུགས་དང་རྒྱབ་སྐྱོར་མི་བྱེད་པའི་ངན་སྐུལ་དང་ཉེན་བརྡ་བཏང་ཡོད་པ་གསལ་འདོན་བྱས་འདུགརྒྱལ་ཚོགས་ཀྱི་ཚོགས་མི་སྐུ་ཚབ་རྣམས་ལ་དོན་ཚན་དགུའི་ཐོག་ནས་སྤྲད་པའི་ཞུ་ཡིག་ནང་རྒྱལ་ཚོགས་ཀྱིས་ལས་བྱེད་པ་རྣམས་ནས་དེ་སྔོན་རྒྱ་ནག་གི་དུས་བཀག་བསྐྱར་ཞིབ་སྐབས་ཚོགས་པ་ཁག་གིས་ཕུལ་བའི་སྙན་ཐོ་རྣམས་ཕྱིར་བསྡུ་བྱེད་དགོས་པ། དེ་བཞིན་རྒྱལ་ཚོགས་ཀྱིས་ཚོགས་མི་རྣམས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བསྟོད་བསྔགས་གཏོང་དགོས་པ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་ཡུ་གུར་ས་ཁུལ་གྱི་པར་རིས་འགྲེམས་སྟོན་བྱས་ཏེ་ཡུ་གུར་མི་མང་རྒྱ་ནག་གི་སྲིད་གཞུང་གི་འོག་ཏུ་བདེ་སྐྱིད་ཀྱི་འཚོ་བར་རོལ་བཞིན་པ་མངོན་གསལ་བྱེད་ཐབས་སོགས་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲད་པ་དག་ཐེར་འདོན་གནང་ཡོད་པ་རེད། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ Geneva སྡེ་ཚན་གྱི་ངེས་སྟོན་པ་John Fisher ལགས་ཀྱིས་རྒྱ་ནག་གིས་ལོ་ངོ་དུ་མའི་རིང་ལ་རྒྱལ་ཚོགས་ཀྱི་འགྲོ་བ་མིའི་ཐང་ཚོགས་པའི་རྩ་བའི་གྲུབ་ཆ་དེར་གནོན་སྐྱོན་བཟོས་ནས་ནུས་བ་ཇེ་ཞན་དུ་གཏོང་ཐབས་བྱེད་བཞིན་ཡོདཔ་གསལ་འདོན་གནང་ཡོད་པ་དང་། དེ་བཞིན་རྒྱ་ནག་གིས་ཡུ་གུར་མི་རིགས་ལ་དྲག་གནོན་བྱེད་བཞིན་པའི་གནས་སྟངས་དེར་རྒྱལ་སྤྱིའི་སྒང་ནས་གླེང་སློང་མང་པོ་འབྱུང་བཞིན་པར་བརྟེན་རྒྱ་ནག་སྲིད་གཞུང་ད་ཆ་འཇིགས་དངངས་ཀྱི་གནས་བབས་ཤིག་ཏུ་ལྷག་ཡོད་སྟབས་མང་ཚོགས་ཡོངས་དང་མི་སྒེར་སོགས་ཚང་མར་གནོན་ཤུགས་སྤྲད་ནས་རྒྱལ་སྤྱིའི་སྟེང་གནས་དོན་དེའི་ཐད་ཐེ་གཏོགས་མི་ཡོང་བའི་ཐབས་ཤེས་གཏོང་བཞིན་ཡོད་པར་བསྒྲགས་འདུགརྒྱ་ནག་གིས་ཐབས་བརྒྱ་ཇུས་སྟོང་གིས་ཡུ་གུར་མི་མང་གི་ཐོབ་ཐང་ལ་དྲག་གནོན་བྱེད་བཞིན་པར་སྐྱོན་བརྗོད་ཡོད་ཚད་འགོག་ཐབས་བྱེད་ཡོད་ཀྱང་ཉེ་ཆར་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱལ་སྤྱིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་དང་། ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་གཙོས་ཆེད་མཁས་པ་རྣམས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་སྐྱོན་བརྗོད་དྲག་པོ་བྱེད་པ་དང་འབྲེལ། འཕྲལ་དུ་རང་དབང་ལྡན་པའི་རྟོག་ཞིབ་རུ་ཁག་རྣམས་བཀག་རྒྱ་མེད་པར་ཤིན་ཅང་ནང་ས་ཁུལ་དུ་བསྐྱོད་དུ་འཇུག་དགོས་པའི་འབོད་སྐུལ་གནང་ཡོད་པ་རེད། རིང་མིན་འཚོགས་ལ་ཉེ་བའི་ཕྱི་ཟླ་དྲུག་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༡ པའི་སྐབས་རྒྱལ་སྤྱིའི་སྲིད་གཞུང་ཡོངས་ཀྱིས་རྒྱ་ནག་གི་འགྲོ་བ་མིའིཐོབ་ཐང་གི་གནས་སྟངས་དེ་རྒྱལ་སྤྱིའི་ནང་ཚད་དང་ལྡན་པ་བཟོ་དགོས་བའི་ཞུ་སྐུལ་གནང་ཡོད་པ་གསུངས་འདུག

ཨ་རིར་རྟེན་གཞི་བྱས་པའི་བོད་དོན་ལས་འགུལ་ཁང་གིས་དབུ་ཁྲིད་པའི་ཐོག་ཟླ་ ༣ ཚེས་ ༢༥ དང་ ༢༦ བཅས་ཉིན་གཉིས་ཀྱི་རིང་བོད་དོན་ཞུ་གཏུགས་ཀྱི་ལས་འགུལ་ཞིག་སྤེལ་ཡོད་པ་ལྟར། ལས་འགུལ་དེའི་ནང་ཨ་རིའི་མངའ་སྡེ་ ༢༤ ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་ ༡༥༠ ལྷག་འདུ་འཛོམས་བྱུང་བ་མ་ཟད་དྲྭ་ཐོག་ནས་འཛུལ་ཞུགས་གནང་མཁན་སྟོང་ཕྲག་ལྷག་བྱུང་འདུགཐེངས་འདིའི་ཞུ་གཏུགས་ཀྱི་ལས་འགུལ་དེའི་ཁྲོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་དང་འབྲེལ་ཡོད་ལས་བྱེད་བཅས་ལ་མཇའ་འཕྲད་ཞུས་ནས་གཙོ་བོ་དོན་ཚོན་གསུམ་ཅན་གྱི་དགོས་འདུན་ཞིག་ཆེད་བཏོན་ཐོག་ཨ་རིའི་གཞུང་ནས་བོད་དོན་ཐོག་རྒྱབ་སྐྱོར་མུ་མཐུད་ཡོང་བའི་ཞུ་སྐུལ་ནན་པོ་ཞུས་འདུག རེ་ཞུའི་དོན་ཚན་གསུམ་པོ་དེ་དག་ནི།  གྲོས་ཚོགས་འཐུས་མི་རྣམས་ནས་ཨ་རིའི་ཕྱི་འབྲེལ་གྱི་དྲུང་ཆེ་ Mike Pompeo མཆོག་གི་མཚན་ཐོག་ལ་རྒྱ་ནག་གི་དབང་འཛིན་གྱི་འོག་ཏུ་བོད་མི་རྣམས་ཀྱི་བདེ་རྩ་ལ་སེམས་ཁྲལ་ཡོད་པའི་ཞུ་ཡིག་ཅིག་ཕུལ་ནས་ན་ནིང་བོད་ནང་དུ་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་བ་དེ་དང་། དེ་བཞིན་ཕྱི་ལོ་ ༢༠༠༢ ལོར་གཏན་འབེབས་གནང་བའི་བོད་ཀྱི་སྲིད་བྱུས་ཀྱི་ཁྲིམས་གཞི་གཉིས་ཕྱག་བསྟར་དོ་ནན་གནང་དགོས་བའི་འབོད་སྐུལ་ཞུ་དགོས་པ་དང་། བོད་ནང་གི་བསམ་བློའི་རང་དབང་དང་ཆོས་ལུགས་དད་མོས་ཀྱི་རང་དབང་ལ་གཙིགས་འཛིན་གྱིས་བོད་ཀྱི་ཆབ་སྲིད་བཙོན་པ་དག་ལ་རྒྱབ་སྐྱོར་གནང་རྒྱུ། ཨ་རིའི་སྲིད་གཞུང་གི་ངོས་ནས་བོད་དོན་རྒྱབ་སྐྱོར་མཇུག་སྐྱོང་གིས་བོད་ཀྱི་གནད་དོན་དང་འབྲེལ་བའི་བྱ་གཞག་གི་ཆེད་དུ་རོགས་དངུལ་གནང་སྐྱོང་ཡོང་བའི་རེ་སྐུལ་བཅས་དོན་ཚན་གསུམ་གྱི་ཞུ་སྐུལ་གནང་འདུགལས་འགུལ་ནང་མཉམ་ཞུགས་གནང་མཁན་རྣམས་ཀྱིས་འགྲེལ་བརྗོད་གནང་བར་གཞིགས་ན་ཨ་རིའི་གྲོས་ཚོགས་ཀྱི་འཐུས་མི་དང་། འབྲེལ་ཡོད་ལས་བྱེད་བཅས་ཀྱིས་གདན་དོན་དེ་དག་ལ་ངོས་ལེན་ཡོད་པའི་རྣམ་འགྱུར་ཡག་པོ་བསྟན་པ་མ་ཟད་མ་འོངས་པར་ཡང་མུ་མཐུད་མཇུག་སྐྱོང་གནང་ངེས་ཡིན་པའི་བརྡ་ལན་གནང་ཡོད་པ་བཀོད་འདུགརྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་འདི་ལོའི་ཞུ་གཏུགས་ཀྱི་ལས་འགུལ་ནང་མཉམ་ཞུགས་གནང་མཁན་དེ་སྔ་ལས་མང་བ་བྱུང་ཡོད་པ་དང་དེའི་རྒྱུ་མཚན་གཙོ་བོ་ནི། ཨ་རིའི་ངོས་ནས་ལོ་ངོ་བཅོ་ལྔའི་རྗེས་སུ་ཉེ་ལམ་བོད་དོན་རྒྱབ་སྐྱོར་གྱི་ཁྲིམས་གཞི་གཏན་འབེབས་གནང་ཡོད་རྐྱེན་ཡིན་སྐོར་གསུངས་འདུག ཁོང་གིས་ད་དུང་བོད་དོན་ཞུ་གཏུགས་པ་རྣམས་ཕྱི་ཚེས་ ༢༥ ཉིན་ཨ་རིའི་རྒྱལ་སར་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་དུ་འདུ་འཛོམས་བྱུང་སྐབས་ཨ་རིའི་སྲིད་གཞུང་གི་ངོས་ནས་བོད་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་བྱུང་བའི་ཆ་ཤས་འོག་ཚེས་ ༢༥ ཉིན་དམིགས་བསལ་སྙན་ཐོ་འདོན་སྤེལ་གནང་ཡོད་པ་སྙན་གསེང་ཞུས་པ་མ་ཟད། སྙན་ཐོ་དེ་ནི་ཁྲིམས་གཞི་གཏན་འབེབས་བྱུང་བ་ནས་དོན་དམ་གྱིས་ཕྱག་བསྟར་གནང་ཕྱོགས་ཀྱི་གོམ་པ་དང་པོ་སྤོས་པ་ཞིག་རེད་ཅེས་གསུངས་འདུག ཁོང་གིས་འདས་པའི་ཟླ་ཤས་ཀྱི་ནང་དུ་བོད་དོན་རྒྱབ་སྐྱོར་གྱི་ཚ་རླབས་གསར་པ་ཞིག་འཕྱུར་བཞིན་པ་འགྲེལ་བརྗོད་གནང་དེ་འདི་ལོའི་བོད་དོན་ཞུ་གཏུགས་ཉིན་མོར་ཨ་རིའི་མངའ་སྡེ་སོ་སོ་ནས་ མཉམ་ཞུགས་ཧ་ཅང་མང་པོ་གནང་བར་བཀའ་དྲིན་རྗེས་དྲན་ཞུས་པ་དང་སྦྲགས། བོད་དོན་ཞུ་གཏུགས་འདི་ལྟ་བུ་བརྒྱུད་ནས་ཨ་རིའི་ནང་དུ་བོད་དོན་རྒྱབ་སྐྱོར་ཤུགས་ཆེར་འཕེལ་བཞིན་པར་བརྟེན་ ༢༠༡༩ ནང་སྔར་ལས་ལྷག་པའི་ལས་དོན་བསྒྲུབ་ཐུབ་པར་རམ་འདེགས་གནང་དགོས་བའི་རེ་སྐུལ་གནང་འདུག

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་མཐའ་མའི་ཐོག་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གི་གྲོས་ཚོགས་མཇུག་བསྡུམ་གྱི་གསུང་བཤད་གནང་བའི་ཁྲོད། གྲོས་ཚོགས་ཀྱི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་བཞིན་ངོ་ཡོད་བོད་མི་སྤྱི་འཐུས་ ༤༣ ལས་སྤྱི་འཐུས་ ༢༡ གིས་རྒྱབ་སྐྱོར་གནང་བའི་ཐོག་བཀའ་བློན་དུ་བདམས་ཐོན་བྱུང་ཡོད་ཀྱང་། ཆེས་མཐོའི་ཁྲིམས་ཞིབ་ཁང་གིས་བཙན་བྱོལ་བོད་མིའི་བཅའ་ཁྲིམས་ནང་གསལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༨༦ ནང་གསལ་ལྟར། ངོ་ཡོད་སྤྱི་འཐུས་ཀྱི་རྒྱ་ཆ་ ༥༠ ལོན་མེད་པའི་རྒྱུ་མཚན་དང་འབྲེལ་ཏེ་བདམས་ཐོན་བཀའ་བློན་སྟོབས་རྒྱལ་ཚེ་རིང་ལགས་བཀའ་བློན་དུ་ངོས་བཞེས་གནང་མེད་པའི་གནས་སྟངས་འོག་ལུས་ཡོད་པ་གསུངས་སོང་།  གཞི་རྩའི་སྐབས་དེའི་བཀའ་བློན་འོས་འདེམས་སྐབས་སུ་ངོ་ཡོད་སྤྱི་འཐུས་ ༤༣ ཡོད་པ་ལས་དགོས་ངེས་འོས་གྲངས་ ༢༡༌༥ ཡོད་ཀྱང་། བཀའ་བློན་འོས་མི་སྟོབས་རྒྱལ་ཚེ་རིང་ལགས་འོས་གྲངས་ ༢༡ ཐོབ་པས་བཀའ་བློན་དུ་བདམས་ཐོན་བྱུང་མཚམས་སུ་བཅའ་ཁྲིམས་དགོངས་དོན་ལྟར་ཁོང་ལ་ངོ་ཡོད་སྤྱི་འཐུས་ ༥༠ ཡི་རྒྱབ་སྐྱོར་ཐོབ་ཀྱི་ཡོད་མེད་ཐོག་གླེང་གཞི་ཞིག་བྱུང་ཡོད་པ་མ་ཟད། སྐབས་དེར་ཆེས་མཐོའི་ཁྲིམས་ཞིབ་ཁང་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་མཚན་ཐོག་ལ་འདྲི་རྩད་ཞིག་ཀྱང་གནང་ཡོད་པ་རེད།དེ་རིང་ཚོགས་གཙོ་མཆོག་གིས་མཇུག་བསྡོམ་གྱི་གསུང་བཤད་སྐབས་ཐེངས་འདིའི་གྲོས་ཚོགས་ཚོགས་དུས་བདུན་པའི་ཐོག་གཞུང་འབྲེལ་མྱ་ངན་དུས་འདུད་དང་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གཏན་འབེབས་དང་། ལྷག་པར་དུ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ཕྱི་ལོ་ ༡༠༡༩ དང་ ༢༠༢༠ ལོའི་སྔོན་རྩིས་གཏན་འབེབས་སོགས་ལས་དོན་རྣམས་གང་ལེགས་བྱུང་བར་བསྔགས་བརྗོད་དང་སྦྲགས། ཚོགས་དུས་འདིའི་ཐོག་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་སྙན་ཐོའི་ནང་བོད་ཁྱིམ་གྱི་ཁྱབ་ཁོངས་ཏཱ་ལའི་བླ་མའི་མཐོ་སློབ་ཁང་གི་ཨར་ལས་ལས་གཞི་དང་འབྲེལ་བའི་གནད་དོན་ཐོག་གྲོས་ཚོགས་ནས་ཞིབ་འཇུག་ཚོགས་ཆུང་ཞིག་ཆེད་འཛུགས་གནང་དགོས་པའི་རྒྱབ་གཉེར་ཞུས་པ་དང་། དེའང་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་དང་འབྲེལ་བ་ཡོད་སྟབས་གལ་སྲིད་ལས་རྙོད་དེ་རིགས་རྐྱེན་པས་༸གོང་ས་མཆོག་ལ་མཚན་ཤས་བཟོ་ཚེ་ང་ཚོ་སུས་ཀྱང་འགན་བཟོད་ཐབས་མེད་པར་བརྟེན་རྩིས་ཀྱི་སྐྱོན་གནད་སེལ་ཆེད་དུ་རྒྱབ་གཉེར་ཞུས་ཡོད་པ་ལྟར་སྤྱི་འཐུས་རྒྱུན་ལས་ནང་གྲོས་བསྡུར་གནང་རྒྱུ་ཡིན་པ་སོགས་གསུངས་ཡོད།གཞི་རྩའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་འདི་བཞིན་ཟླ་བ་འདིའི་ཕྱི་ཚེས་ ༡༩ ནས་དེ་རིང་ཚེས་ ༢༩ བར་ཚོགས་ཡོད་པ་དང་། ཚོགས་དུས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༩༌༢༠ ལོའི་དགོས་དངུལ་སྔོན་རྩིས་སྒོར་ས་ཡ་ ༢༥༠༥,༦༦༣,༧༩༨ བཀའ་འཁྲོལ་གཏན་འབེབས་དང་སྦྲགས། ཚོགས་གཙོ་མཆོག་ནས་ལས་ཉིན་དེ་དག་རིང་སྤྱི་འཐུས་རྣམ་པས་རྒྱ་ཆེ་མང་ཚོགས་ལ་ཐུགས་མ་ཕམ་པ་ཞིག་གནང་ཡོད་པའི་ཐུགས་ཚོར་ཆེན་པོ་བྱུང་ཞེས་གསུངས་སོང་།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་མཐའ་མའི་ཐོག་སྲིད་སྐྱོང་མཆོག་གིས་ལྔ་དང་ལྔ་བཅུའི་འཆར་སྣང་ལྷན་ཚོགས་རིམ་པ་གསུམ་བསྐོང་ཚོགས་གནང་བའི་གྲུབ་དོན་ཐོག་བཀའ་འདྲི་མང་དག་ཅིག་ཕེབས་དོན་ལྟར་གསལ་བཤད་ལན་འདེབས་གནང་བར་བཀའ་ཤག་སྐབས་ ༡༤ པའི་ངོས་ནས་བོད་རྒྱའི་དཀའ་རྙོག་སེལ་རྒྱུ་དང་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་རྒྱུ་ཡིན་ཞེས་གསུངས་ཡོད་པ་བཞིན་ད་ལྟའི་བཀའ་ཤག་ལའང་གདེང་སྤོབས་ཆེན་པོ་ཡོད་ཅེས་གསུངས་སོང་།དེ་རིང་སྔ་དྲོ་དྲི་བ་དྲིས་ལན་གྱི་དུས་ཚོད་མེད་པའི་ཐོག་ནས་གྲོས་ཚོགས་དབུ་འཛུགས་གནང་བ་དང་འབྲེལ། ཁྲིམས་བཟོའི་ལས་དོན་ཁག་གཅིག་གཏན་འབེབས་ཀྱི་ལས་རིམ་གྲུབ་རྗེས་སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་གི་ལྔ་དང་ལྔ་བཅུའི་འཆར་སྣང་ཐོག་བགྲོ་གླེང་དང་བཀའ་འདྲི་གནང་ཁག་ཐོག་ལེན་འདེབས་གསལ་བཤད་གནང་བར་རིང་མིན་ཕྱི་ཟླ་ ༥ པའི་ནང་བོད་རྒྱ་འབྲེལ་མོལ་གྱི་ལས་དོན་ཚོགས་ཆུང་གི་ཚོགས་འདུ་ཞིག་འཚོགས་གཏན་ཁེལ་ཡོད་པ་དང་། བོད་རྒྱ་འབྲེལ་མོལ་བསྐྱར་གསོ་གནང་མ་ཐུབ་པའི་རྒྱུ་རྐྱེན་གཙོ་བོ་དེ་རྒྱ་ནག་ལ་ཐུག་ཡོད་པ་ལས་བཀའ་ཤག་གི་ངོས་ནས་དུས་རྟག་ཏུ་གྲ་སྒྲིག་ཡོད་ཅེས་བསྐྱར་ནན་གསུངས་ཡོད་པ་རེད། དེ་སྔ་སྲིད་སྐྱོང་མཆོག་གིས་ཕྱི་ལོ་ ༢༠༡༠ ལོར་སྐབས་དེའི་བཀའ་བློན་ཁྲི་པའི་འོས་མིར་བཞེང་སྐབས་བོད་རྒྱའི་དཀའ་རྙོག་སེལ་རྒྱུ་དང་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་སྐོར་གསུངས་ཡོད་པའི་ཐོག་ད་རེས་གྲོས་ཚོགས་སུ་སླར་ཡང་དྲི་བ་ཕེབས་དོན་ལྟར་སྲིད་སྐྱོང་གི་ངོས་ནས་བོད་ནང་གི་བོད་མིའི་མངོན་འདོད་གསལ་པོ་རྟོགས་ཀྱི་ཡོད་པ་དང་། བོད་མི་རང་ལུས་མེར་བསྲེགས་གནང་མཁན་རྣམས་ཀྱི་འབོད་སྒྲ་ལས་མངོན་གསལ་བྱུང་ཡོད་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུའི་ཐད་དུས་ད་ལྟའང་སྔར་བཞིན་གདེང་སྤོབས་ཆེན་པོ་ཡོད་པ་གསུངས་ཡོད།སྲིད་སྐྱོང་མཆོག་གིས་༸གོང་ས་མཆོག་གི་བཀའ་དགོངས་གཞིར་བཟུང་བརྒྱ་ཆ་བརྒྱ་ཐམ་པ་བསྒྲུབས་ཡོད་པར་གདེང་སྤོབས་ཆེན་པོའི་ཐོག་ནས་ཞུ་ཐུབ་ཀྱི་ཡོད་ཅེས་གསུངས་པ་དང་འབྲེལ། ཆིག་སྒྲིལ་དང་འབྲེལ་བའི་དྲི་བར་བོད་མི་མང་ཚོགས་ཁྲོད་ལ་ཆིག་སྒྲིལ་གྱི་གནས་བབས་ཧ་ལས་པའི་ཚད་མཐོ་པོ་ཡོད་སྐོར་གསུངས་པ་དང་ཆབས་ཅིག སྲིད་སྐྱོང་རང་ཉིད་ཀྱིས་ ༢༠༡༡ དང་ ༢༠༡༦ གི་འོས་བསྡུའི་ཉམས་མྱོང་ལ་གཞིགས་ཏེ་ ༢༠༡༦ ལོའི་འོས་བསྡུའི་རྗེས་སུ་བསླབ་བྱ་བླང་རྒྱུ་གལ་ཆེ་ཤོས་གཅིག་གཟིགས་པ་ནི་འོས་བསྡུའི་རྒྱལ་ཕམ་གྱི་གྲུབ་འབྲས་སོན་པའི་རྗེས་སུ་རྒྱལ་ཁ་སོན་པར་ཡི་རང་དང་ཕམ་མཁན་ཕམ་པ་ལྟར་བཞུགས་དགོས་གལ་ཡིན་པ་གསུངས་སོང་བ་མ་ཟད། དེ་ལྟར་གནང་ཐུབ་པའི་རེ་བ་གནང་བཞིན་ཡོད་པ་གསུངས་ཡོད།རྩ་བའི་ཐེངས་འདིའི་གྲོས་ཚོགས་ཀྱི་ལས་ཉིན་དང་པོར་བོད་ནང་གི་ཛ་དྲག་གི་གནས་བབས་དང་འབྲེལ་གཞུང་འབྲེལ་གྲོས་ཆོས་གྲོས་ཆར་ཞིག་གཏན་འབེབས་གནང་བའི་ནང་དགྲ་བོ་རྒྱ་ནག་ཞེས་ཚིག་བཀོད་སྟངས་ཐོག་སྤྱི་འཐུན་ཕན་ཚུན་དབར་བགྲོ་གླེང་ཤུགས་ཆེན་པོ་གནང་སྐོར་དང་འབྲེལ། སྲིད་སྐྱོང་མཆོག་གིས་དེ་རིང་གྲོས་ཚོགས་སུ་༸གོང་ས་མཆོག་གིས་དེ་སྔ་ཕྱི་ལོ་ ༡༩༩༡ ལོའི་ཕྱི་ཟླ་ ༡༠ པའི་ནང་ཨ་རིའི་ Yale གཙུག་ལག་སློབ་གཉེར་ཁང་དུ་ embracing the enemy ཞེས་དགྲ་བོ་གདུལ་བའམ་ཐག་ཉེར་གཏང་དགོས་པའི་བཀའ་སློབ་བསྩལ་ཡོད་པ་ཞིག་ལུང་འདྲེན་དང་འབྲེལ་ཏེ་༸གོང་ས་མཆོག་དང་དབུ་མའི་ལམ་ལ་རྒྱབ་སྐྱོར་ཐོབ་པའི་རྒྱུ་མཚན་གལ་ཆེ་ཤོས་གཅིག་ནི་ང་ཚོའི་དགྲ་བོ་ལ་བྱམས་དང་སྙིང་རྗེ། དེ་བཞིན་གཉིས་སྨན་གྱི་ཐོག་ནས་ངོས་འཛིན་གནང་ཕྱོགས་དེ་ཡིན་པ་ལྟར་ཚིག་དེས་བོད་མིའི་དབུ་མའི་ལམ་གྱི་སྲིད་བྱུས་དེ་རླབས་ཆེན་ཇི་ཙམ་ཡིན་པ་མངོན་གསལ་གནང་གི་ཡོད་པ་གསུངས་སོང་།དེ་བཞིན་སྲིད་སྐྱོང་མཆོག་གིས་ཁ་སང་བགྲོ་གླེང་ཁྲོད་ཀྱི་དྲི་བ་རིམ་པར་གསལ་བཤད་གནང་བ་ལས་རྒྱལ་སྤྱིའི་ངོས་ནས་བོད་མིའི་གཉིས་སྨན་དབུ་མའི་ལམ་གྱི་འཐབ་རྩོད་ལ་རྒྱབ་སྐྱོར་གནང་མཁན་མང་དུ་ཕྱིན་ཡོད་པ་དང། ད་ལྟའི་ཨ་རིའི་སྲིད་འཛིན་ Trump མཆོག་གི་ངོས་ནས་༸གོང་ས་མཆོག་དང་མཇལ་འཕྲད་དང་དབུ་མའི་ལམ་ལ་རྒྱབ་སྐྱོར་ཡོད་པ་སོགས་ཞལ་ནས་གསུངས་མེད་ཀྱང། ཁོང་གི་ལས་ཡུན་དབུ་འཛུགས་གནང་བ་ནས་བཟུང་ད་བར་བོད་ནང་འདྲ་མཉམ་འགྲུལ་སྐྱོད་ཀྱི་རང་དབང་ཁྲིམས་འཆར་དང། Asia Reassurance Act ཞེས་ཨེ་ཤ་ཡ་ཡོངས་ལ་ཨ་རིའི་གཞུང་གི་སྲིད་བྱུས་དང་འབྲེལ་བའི་གལ་ཆེའི་ཁྲིམས་འཆར་གཉིས་ལ་མཚན་རྟགས་བསྐྱོན་ཡོད་པ་དང། རོགས་དངུལ་མང་དུ་བཏང་བ། དེ་བཞིན་ཨ་རིའི་སྲིད་འཛིན་གཞོན་པ་དང་ཕྱི་སྲིད་བློན་ཆེན། ཕོ་བྲང་དཀར་པོ་དང་ཕྱི་སྲིད་ལས་ཁུངས་ཀྱི་ལས་བྱེད་བཅས་སྤྱི་ཡོངས་ནས་བོད་མིའི་སྒྲིག་འཛུགས་ལ་ཁས་ལེན་གནང་རྒྱུ་དང་། བོད་དོན་ཐོག་དེ་སྔའི་སྲིད་བྱུས་ལ་འགྱུར་བ་གང་ཡང་མེད་པར་བོད་དོན་རྒྱབ་སྐྱོར་གནང་བཞིན་ཡོད་པ་གསལ་པོ་མངོན་རྒྱུ་ཡོད་སྐོར་སོགས་གསུངས་སོང་།དེ་མཚུངས་ནང་སྲིད་ཐད་ ༢༠༡༤ ལོར་རྒྱ་གར་གཞུང་གི་གཏན་འབེབས་གནང་བའི་ Tibetan Rehabilitation Act ཞེས་པའི་རྒྱ་གར་གཞུང་གི་སྲིད་བྱུས་ལག་བསྟར་ཡིན་ནའང་རེད། དཔལ་འབྱོར་ཐད་བོད་མིའི་སྒྲིག་འཛུགས་ཀྱི་བང་མཛོད་ཐོག་སྒོར་ས་ཡ་ ༡༠༠༠ གསོག་སྒྲུབ་ཞུས་པ་མ་ཟད། མང་ཚོགས་ལ་མ་དངུལ་བུན་གཡར་བཅས་ཀྱི་ལས་གཞི་རིམ་པ་བརྒྱུད་བོད་མིའི་སྤྱི་ཚོགས་དེ་རང་ཁ་རང་གསོའི་གནས་སུ་གོམ་སྐྱོད་བྱེད་བཞིན་ཡོད་སྐོར་གསུང་པ་མ་ཟད། བོད་མི་ཆབ་སྲིད་བཙོན་ཟུར་ཐོག་དོ་སྣང་ཆེ་ཙམ་གནང་དགོས་པར་ངོས་ལེན་གནང་བ་བཞིན་ཕྱག་ལས་གནང་མུས་ཡིན་པ་དང། Australia ནང་དུ་བོད་ནས་ཕེབས་མཁན་འམ་ཡང་ན་ཉམ་ཐག་སོགས་སུ་གཏང་དགོས་མིན་ཐད་དགོངས་འཆར་ཕུལ་དོན་བཞིན་བཅའ་ཁྲིམས་ཀྱི་སྒྲོམ་གཞི་འོག་ནས་འཆར་གཞི་དེའི་ཐོག་དགོངས་པ་ཟབ་ནན་བཞེས་བཞིན་ཡོད་པ་སོགས་གསལ་བཤད་གནང་བ་དང་འབྲེལ། སྤྱི་འཐུས་ལྷན་ཚོགས་ནས་བཀའ་ཤག་གི་གསལ་བཤད་གནང་བའི་དོན་གནད་རྣམས་སྤྱི་འཐུས་ལྷན་ཚོགས་ཀྱི་བློ་ངེས་བྱུང་བའི་གྲོས་ཆོད་ཡང་འཇོག་གནང་ཡོད།

དབྱིན་ཡུལ་དུ་རྟེན་གཞི་བྱས་པའི་རྒྱལ་སྤྱིའི་སྒྱུ་རྩལ་བའི་སྤྱི་ཚོགས་དང་འབྲེལ་བརྗོད་གཞི་འདྲ་མིན་ཐད་གློག་བརྙན་དང་འཁྲབ་གཞུང་རིགས་གཟིགས་འབུལ་གནང་ཡུལ་ Royal Court འཁྲབ་སྟོན་ཁང་ནས་ཕྱི་ལོ་ ༢༠༠༨ ལོའི་བོད་ནང་ཞི་རྒོལ་སྐད་འབོད་བྱུང་བའི་དངོས་བྱུང་ལ་གཞིར་བཞག་པའི་ཕ་ལྷའི་འཁྲབ་གཞུང་ནང་འཁྲབ་སྟོན་པ་བོད་མི་སྐུ་ཚབ་མེད་པར་བློ་ཕམ་ཡོད་པ་བརྗོད་པ་དང་འབྲེལ་བའི་བསྒྲགས་གཏམ་ཞིག་སྤེལ་འདུག ཁ་སང་ཕྱི་ཚེས་ ༢༨ ཉིན་རོ་ཡལ་ཀོཊ་འཁྲབ་སྟོན་ཁང་གི་དྲྭ་གནས་ཐོག་བསྒྲགས་གཏམ་ཞིག་སྤེལ་བའི་ནང་ཕ་ལྷའི་འཁྲབ་གཞུང་ཐོག་ལས་དོན་འགོ་འཛུགས་སྐབས་བོད་མི་འཁྲབ་སྟོན་པ་དང་ལྷན་དུ་དེ་དོན་ཕྱག་ལས་གནང་བར་དགའ་སྣང་བྱུང་ཡང་རིམ་པས་ལས་དོན་དེ་དག་དམིགས་ཡུལ་གཞིར་བཟུང་གནང་མ་ཐུབ་པར་བློ་ཕམ་ཡོད་ཅེས་བརྗོད་འདུགགཞི་རྩའི་འཁྲབ་སྟོན་ཁང་ནས་འཁྲབ་གཞུང་སླད་འདས་ལོའི་ཟླ་ ༡༢ ནང་འཁྲབ་སྟོན་པ་བསྡུ་བསྐོང་གི་ཡོངས་བསྒྲགས་གནང་བ་དང་། སྐབས་དེར་བོད་མི་འཁྲབ་སྟོན་པ་ཁག་གཅིག་ཚོད་རྒྱུགས་སླད་ཕེབས་ཀྱང་འཁྲབ་སྟོན་གྱི་ཚོད་རྒྱུགས་དངོས་གཞི་དེ་ཟླ་ ༡ པོའི་ནང་གནང་རྒྱུ་ཡིན་ཞེས་བརྗོད་དེ་ཟླ་བ་ ༣ པ་བར་འབྲེལ་ལམ་རྩ་བ་ནས་ཞུས་མེད་པ་རེད། མཐར་འཁྲབ་གཞུང་དེའི་སླད་འཁྲབ་སྟོན་པ་ཡོངས་རྫོགས་ཤར་ཨེ་ཤ་ཡའི་མི་རིགས་བདམས་ཡོད་སྟབས། བོད་མི་དོན་གཉེར་བ་རྣམས་ནས་འཕྲུལ་སྒྲ་དང་ངོ་དེབ་བརྒྱུད་ཕ་ལྷའི་འཁྲབ་གཞུང་ནང་བོད་མི་སྐུ་ཚབ་གཅིག་ཀྱང་མེད་པར་སྐྱོན་བརྗོད་ཤུགས་ཆེ་གནང་བ་དང་། ཉིན་ཤས་རྗེས་འཁྲབ་སྟོན་ཁང་ནས་བོད་མི་དོན་གཉེར་བ་ཁག་གཅིག་དང་དབྱིན་ཡུལ་བོད་རིགས་ཚོགས་པའི་འཐུས་ཚབ་དང་ཐུག་འཕྲད་ཀྱིས་དེ་དོན་གྲོས་བསྡུར་བྱུང་བར་བརྟེན་ད་ཆ་འཁྲབ་གཞུང་དེའི་ཆ་ཤས་སུ་བོད་མི་ཁག་གཅིག་ནས་མཉམ་ཞུགས་གནང་གི་འདུག འཁྲབ་སྟོན་ཁང་དེས་ཕ་ལྷའི་གནད་དོན་དང་འབྲེལ་བོད་རིགས་ཚོགས་པ་ནས་དོན་རྐྱེན་དེ་དག་སེལ་སླད་མཉམ་ཞུགས་ལྷུག་པོ་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་ཏུ་འཁྲབ་གཞུང་ནང་བོད་མི་སྐུ་ཚབ་མེད་པར་བོད་མི་རྣམས་བློ་ཕམ་བྱུང་བར་དགོངས་སེལ་ཞུས་འདུག འཁྲབ་སྟོན་ཁང་ནས་གོ་སྐབས་འདི་བརྒྱུད་བོད་རིགས་ཚོགས་པ་དང་ལྷན་དུ་མ་འོངས་མདུན་བསྐྱོད་སླད་དོན་ཕན་ལྡན་པའི་ལས་དོན་གནང་རྒྱུ་དང་། ལྷག་པར་དུ་དབྱིན་ཡུལ་ནང་རྟེན་གཞི་བྱས་པའི་བོད་རིགས་ཚོགས་པ་ནས་འཁྲབ་གཞུང་གི་བརྒྱུད་རིམ་ཁྲོད་བོད་མི་ཕན་ཚུན་རྒྱབ་སྐྱོར་དང་། དེ་བཞིན་རང་ཉིད་ཀྱི་ངོ་བོ་བརྒྱུད་ལམ་འདྲ་མིན་ཐོག་ནས་རྒྱལ་སྤྱིའི་ཐོག་གཟིགས་འབུལ་ཞུ་ཐུབ་པའི་སྙིང་སྟོབས་ལ་བསྔགས་བརྗོད་ཞུས་ཡོད་པ་རེད།དེ་བཞིན་འཁྲབ་སྟོན་ཁང་ནས་ཕན་ཚུན་ཡིད་ཆེས་བསྐྱར་གསོ་སླད་རེས་གཟའ་སྤེན་པ་གཉིས་རེ་ལ་བོད་མི་ན་གཞོན་དང་དབྱིན་ཡུལ་ནང་ཡོད་པའི་བོད་མི་འཁྲབ་སྟོན་པ་རྣམས་ལ་འཁྲབ་སྟོན་དང་འབྲེལ་ཟབ་སྦྱོང་སྤྲད་རྒྱུ་དང་། རིང་མིན་ཟླ་ ༤ ཚེས་ ༢༥ ཉིན་༸པཎ་ཆེན་རིན་པོ་ཆེ་མཆོག་གི་འཁྲུངས་སྐར་དང་བསྟུན་རིག་གཞུང་འཁྲབ་སྟོན་གཟིགས་འབུལ་ཞུ་རྒྱུའི་གོ་སྐབས་གནང་རྒྱུ།  སྒོས་སུ་རོ་ཡལ་ཀོཊ་ཡི་རྩོམ་པ་པོ་ཡར་རྒྱས་ཀྱི་ལས་གཞིའི་ཁྲོད་བོད་མི་རྩོམ་པ་པོ་དང་སྒྱུ་རྩལ་བ་གདན་འདྲེན་ཞུ་རྒྱུ་དང། ལྷག་དོན་བོད་རིགས་ཚོགས་པར་མང་ཚོགས་དང་ལྷན་དུ་འཁྲབ་གཞུང་དང་འབྲེལ་གནས་ཚུལ་མཁོ་སྤྲོད་གནང་རྒྱུའི་གོ་སྐབས་གནང་རྒྱུ་ཡིན་ཞེས་བརྗོད་འདུག ཕ་ལྷའི་འཁྲབ་གཞུང་གི་སྦྱར་པར་ཐོག་བོད་པའི་བུ་མོ་ཞིག་བཙུན་མའི་ཆས་སྤྲས་པ་བཞག་ཡོད་ཀྱང་འཁྲབ་གཞུང་དངོས་ནང་བུ་མོ་དེ་མེད་པས་སྦྱར་པར་དེ་ཕྱི་ར་འཐེན་བྱས་འདུག་པ་དང། འཁྲབ་སྟོན་ཁང་དེས་ང་ཚོས་འཁྲབ་གཞུང་དེ་གཟིགས་འབུལ་ཞུ་སླད་ཀུན་སློང་གཙང་མ་ཞིག་ཡོད་ཀྱང་། ད་རེས་འཁྲབ་གཞུང་དེར་སྐུ་ཚབ་མེད་པའི་གནད་དོན་དེ་དག་འཁྲབ་སྟོན་ཁང་གི་བཀའ་མོལ་འབྲེལ་ལམ་གནང་ཕྱོགས་ནོར་རྐྱེན་བྱུང་བ་ཞིག་ཡིན་པར་བཤད་ཡོད་པ་རེད།

དེ་རིང་གྲོས་ཚོགས་ཚོགས་དུས་ ༧ པའི་ལས་ཉིན་མཐའ་མའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་ལས་བསྡོམས་དང་རྒྱབ་གཉེར་སྙན་ཐོ་འགོད་འབུལ་ཞུས་པའི་ཐོག་ལྷན་ཁང་ཁག་དང་གཞིས་མགོ། རང་དབང་བདེན་པའི་ལས་འགུལ། དེ་བཞིན་ས་འཐུས་སོགས་སྡེ་ཁག་གིས་སྙན་ཐོར་ཐུགས་སྣང་གང་ཆེ་གནང་ཡོད་སྟབས་སྐྱོན་གནས་ཁག་མེད་པ་ཆགས་ཡོད་པར་བསྔགས་བརྗོད་གནང་སོང་བ་དང་སྦྲགས། མཉམ་འབྲེལ་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་གཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་རྒྱ་གང་ཆེ་གནང་དགོས་གལ་ཡིན་པ་སོགས་ཀྱི་རྒྱབ་གཉེར་ཁག་ཅིག་ཕུལ་སོང་། དེ་རིང་གྲོས་ཚོགས་ཚོགས་དུས་ ༧ པའི་ལས་ཉིན་ ༡༠ པའམ་གྲོས་ཚོགས་ཀྱི་ལས་ཉིན་མཐའ་མའི་སྔ་དྲོ་ཐོག་ཁ་སང་སྤྱི་འཐུས་ཁག་གཅིག་ནས་བཀའ་ཤག་གི་ལྔ་དང་ལྔ་བཅུའི་འཆར་སྣང་དང་འབྲེལ་བའི་གནད་དོན་ཐད་བཀའ་འདྲི་གནང་ཡོད་པ་ལྟར། སྲིད་སྐྱོང་མཆོག་གིས་དེ་འབྲེལ་བཀའ་ལན་གནང་གྲུབ་མཚམས་སུ་ཚོགས་ཐེངས་གཉིས་པ་དང་གསུམ་པ་གཉིས་ལ་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་ལས་བསྡོམས་སྙན་ཐོ་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ཀྱིས་གཙོས་པའི་ཚོགས་ཆུང་གི་ཚོགས་མི་རྣམ་པ་རེ་མོས་ཀྱིས་འགོད་འབུལ་ཞུས་སོང་། མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་ངོས་ནས་འདས་པའི་ཟླ་བ་དགུ་ཙམ་རིང་ལ་སྤྱི་ཁྱབ་རྩིས་ཞིབ་ལས་ཁང་ནས་རྩིས་ཞིབ་ཟིན་པའི་ལས་ཁུངས་སམ་སྡེ་ཚན་ཁག་ ༡༧༦ གི་རྩིས་སྙན་ཁག་ལ་ཞིབ་གཟིགས་གནང་བ་བརྒྱུད་རྩིས་སྙན་དང་མཇུག་སྣོན་མ་བྱུང་བའི་ཚན་པ་ ༢༡༢༡ ལ་མཇུག་སྣོན་གྱི་ཐག་གཅོད་གནང་ཡོད་པ་དང་། ད་ལྟའི་ཆར་སྡེ་ཚན་ ༡༠༣༡ ལ་མཇུག་སྐྱོང་གནང་རྒྱུ་ལྷག་བསྡད་ཡོད་པ་རེད་འདུགམང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་ལས་དོན་དེའི་ཁོངས་སུ་བོད་མི་སྒྲིག་འཛུགས་ཀྱི་ལྷན་ཁང་ཁག་དང་དེའི་ཁྱབ་ཁོངས་སུ་ཡོད་པའི་སྡེ་ཚན་ཁག རང་དབང་ཅན་གྱི་སྡེ་ཚན། སྒེར་གྱི་ཚོགས་པ་སོགས་ཀྱི་རྩིས་ལོ་ ༢༠༡༥ ནས་ ༢༠༡༦ དང་། རྩིས་ཞིབ་ཟིན་པའི་ ༢༠༡༧ ལོའི་རྩིས་ཁྲ་ཁག་གཅིག་དེ་བཞིན་ཕྱི་ལོ་ ༢༠༡༤ ལོའི་ལྷག་ལུས་རྩིས་ཁྲར་ཞིབ་འཇུག་གནང་ཡོད་པ་རེད།ཚོགས་ཆུང་གི་ངོས་ནས་སྙན་ཐོའི་ནང་མཉམ་འབྲེལ་ཁག་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་གཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་ཆུང་བ་དང་། ལྷག་པར་དུ་བོད་ཁྱིམ་གྱི་ཁྱབ་ཁོངས་ཏཱ་ལའི་བླ་མའི་མཐོ་སློབ་ཁང་གི་ཨར་ལས་ལས་གཞི་དང་འབྲེལ་བའི་གནད་དོན་ཐོག་གྲོས་ཚོགས་ནས་ཞིབ་འཇུག་ཚོགས་ཆུང་ཞིག་ཆེད་འཛུགས་གནང་དགོས་པའི་རྒྱབ་གཉེར་ཞུས་པ་དང་། དེའང་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་དང་འབྲེལ་བ་ཡོད་སྟབས་གལ་སྲིད་ལས་རྙོད་དེ་རིགས་རྐྱེན་པས་༸གོང་ས་མཆོག་ལ་མཚན་ཤས་བཟོ་ཚེ་ང་ཚོ་སུས་ཀྱང་འགན་བཟོད་ཐབས་མེད་པར་བརྟེན་རྩིས་ཀྱི་སྐྱོན་གནད་སེལ་ཆེད་དུ་རྒྱབ་གཉེར་ཞུས་ཡོད་ཅེས་གསལ་བཏོན་གནང་སོང་། འདི་ག་རླུང་འཕྲིན་ཁང་གིས་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་སྙན་ཐོ་འགོད་འབུལ་ཟིན་རྗེས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་སུ་མང་ཚོགས་རྩིས་ཁྲའི་ཚོགས་ཆུང་གི་ཐེངས་འདིའི་སྙན་ཐོའི་སྐོར་བཀའ་འདྲི་ཞུས་ཡོད། རྩ་བའི་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པ་ནི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང། ལས་དོན་བྱེད་ཕྱོགས་ཀྱི་སྒྲིག་གཞི་དགོངས་དོན་ལྟར། སྤྱི་འཐུས་ཚོགས་གཙོ་སྦྲེལ་པོས་སྔ་ལོའི་ཟླ་ ༤ ཚེས་ ༢༧ ཉིན་ཚོགས་ཆུང་ཆེད་འཛུགས་གནང་བ་དང་། ཚོགས་ཆུང་གི་མི་འགྲོར་སྤྱི་འཐུས་ཀླུ་ཚང་རྒྱ་རིགས་ཐར་ལགས་དང་། སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་ལགས། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས། སྤྱི་འཐུས་དོན་གྲུབ་བཀྲ་ཤིས་ལགས། སྤྱི་འཐུས་བློ་བཟང་ཆོས་འབྱོར་ལགས་བཅས་བསྐོ་གཞག་གནང་ཡོད་ཀྱང་། སླར་ཡང་ཕྱི་ལོ་ ༢༠༡༨ ཕྱི་ཟླ་ ༡༠ ཚེས་ ༡ ཉིན་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་མང་ཚོགས་རྩིས་ཁྲའི་ཚོགས་ཆུང་གི་ཚོགས་གཙོར་བསྐོ་གཞག་གནང་བ་དང་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་ལགས ཚོགས་ཆུང་གི་ཚོགས་དྲུང་དུ་བསྐོ་གཞག་གནང་ཡོད་པ་རེད།

བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སུ་བཀའ་ཤག་གི་ལྔ་དང་ལྔ་བཅུའི་འཆར་སྣང་དང་འབྲེལ་རྒྱལ་སྤྱིའི་ལྔ་དང་ལྔ་བཅུའི་ལྷན་ཚོགས་དང་། འབྱུང་འགྱུར་བོད་ཀྱི་མདུན་ལམ་ཞེས་པའི་གཞོན་སྐྱེས་ལྔ་དང་ལྔ་བཅུའི་ལྷན་ཚོགས། དེ་བཞིན་བཙན་བྱོལ་བོད་མིའི་སྤྱི་ཚོགས་སྲ་བརྟན་རྒྱུན་སྐྱོང་ལ་དམིགས་པའི་ལྔ་དང་ལྔ་བཅུའི་ལྷན་ཚོགས་བཅས་ཚོགས་འདུ་རིམ་པ་གསུམ་བསྐོང་ཚོགས་གནང་བའི་གྲུབ་དོན་ཐོག་བཀའ་འདྲི་མང་དག་ཞིག་ཕེབས་པའི་ཁྲོད། ཁ་སང་གྲོས་ཚོགས་ཀྱི་ལས་ཉིན་བརྒྱད་པའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་ལྔ་དང་ལྔ་བཅུའི་གྲུབ་དོན་སྙན་ཐོ་དེ་གྲོས་ཚོགས་ཀྱི་གསོལ་ཅོག་ཐོག་ཏུ་ཕུལ་བ་དང་འབྲེལ་ཏེ་འཆར་སྣང་དེའི་ཐོག་དམིགས་བསལ་གསལ་བཤད་གནང་ཡོད་པ་ལྟར། དེ་རིང་གྲོས་ཚོགས་ཀྱི་ཉིན་རྒྱབ་ཚོགས་དུས་ཐོག་སྤྱི་འཐུས་རྣམས་ནས་བཀའ་ཤག་གི་གསལ་བཤད་ཐོག་བགྲོ་གླེང་ལྷུག་པོ་གནང་ཡོད་པ་རེད།སྐབས་དེར་སྤྱི་འཐུས་ཁག་གཅིག་ནས་བཀའ་ཤག་གི་ལྔ་དང་ལྔ་བཅུའི་འཆར་སྣང་ལ་དམིགས་བསལ་གྱི་གལ་གནད་དང་གསར་སྟོད་གང་ཡང་མེད་པ་དང་ཁག་གཅིག་གཅིག་གིས་དེར་རྒྱབ་སྐྱོར་དང་འབྲེལ་དེའི་ནང་གསལ་དོན་གནད་ཁག་གཅིག་གི་ཐོག་བཀའ་འདྲི་གནང་ཡོད་པ་རེད།དེའང་སྤྱི་འཐུས་ཤིག་ནས་ཁ་སང་བཀའ་ཤག་གི་གསལ་བཤད་གནང་སྐབས་ད་ནས་བཟུང་༸གོང་ས་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་བསྒྱུར་མཛད་རྒྱུ་དཀའ་བ་ཆགས་ཡོད་སྟབས་ང་ཚོས་དེར་བློ་འཚབ་བྱེད་དགོས་པ་ཞིག་རེད་ཅེས་གསུངས་པ་ལུང་འདྲེན་དང་འབྲེལ། ཞལ་ཙམ་མིན་པར་དེའི་ཚབ་ཏུ་བཀའ་བློན་རྣམ་པ་ཕྱི་རྒྱལ་ཁག་ཏུ་མང་བ་ཕེབས་ནས་བོད་དོན་དྲིལ་བསྒྲགས་གནང་རྒྱུ་དང་། ལྷག་དོན་བཀའ་ཤག་ནས་དེ་འབྲེལ་འཆར་གཞི་བཀོད་སྒྲིག་གནང་ཡོད་མེད་དང་། དེ་བཞིན་སྤྱི་འཐུས་གཞན་ཞིག་ནས་དེ་སྔ་ཨ་རིའི་སྲིད་འཛིན་ཨོ་བྷ་མས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་དོན་ལྟར་ད་ལྟའི་སྲིད་འཛིན་ལས་ཐོག་ཊམ་མཆོག་གིས་གཙོས་པའི་གནད་ཡོད་དཔོན་རིགས་ཚོས་དེ་སྔ་གསུང་དོན་ལྟར་རྒྱུན་སྐྱོར་གནང་བར་གདེང་སྤེབས་ག་ཚོད་ཡོད་དམ་ཞེས་བཀའ་འདྲི་ཞུས་པ་མ་ཟད། བཀའ་ཤག་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་རྒྱུ་ཡིན་ཞེས་གསུངས་ཡོད་པ་བཞིན་བཀའ་ཤག་གི་ལས་ཡུན་དུས་ཐུང་ནང་ལ་གནད་ཞུ་ཇི་ལྟར་ཐུབ་པར་དགོངས་ཀྱི་འདུག་གམ་ཞེས་བཀའ་འདྲི་ཞུས་སོང་།གཞན་ཡང་སྤྱི་འཐུས་ཤིག་གིས་དེ་སྔ་བཀའ་ཤག་གིས་རྒྱ་ནག་གི་སྲིད་འཛིན་ཞི་ཅིན་ཕིང་ལ་རེ་བ་ཆེན་པོ་ཡོད་པ་གསུངས་ཡོད་པ་རེད། ད་ལྟའི་ཆར་ཞི་ཅིན་ཕིང་ལ་དེ་སྔ་ལྟར་རེ་བ་གཟིགས་ཀྱི་ཡོད་མེད་དང་། ཞི་ཅིན་ཕིང་བོད་དང་འབྲེལ་བའི་ཚོགས་ཆུང་ཁག་གི་ཐོག་ལ་བཅར་གྱི་མེད་པའི་རྒྱུ་མཚན་གང་ལ་ཐུག་ཡོད་དམ་ཞེས་བཀའ་འདྲི་ཞུས་ཡོད།དེ་བཞིན་སྤྱི་འཐུས་གཞན་ཞིག་གིས་ཆབ་སྲིད་བཙོན་པའི་གནས་སྟངས་དང་སྤྱི་ཁང་། དོན་ཁང་། དེ་བཞིན་གསར་འབྱོར་བའི་གནས་བབས་སོགས་ཛ་དྲག་ཆགས་ཀྱི་ཡོད་ཀྱང་། བཀའ་ཤག་གི་ངོས་ནས་དེ་དག་ལས་ཛ་དྲག་ཆེས་ཆེ་ཤོས་བོད་ནད་གི་བོད་མིའི་ཆབ་སྲིད་བཙོན་པའི་གནས་བབས་ཆགས་ཀྱི་ཡོད་པ་བཞིན་དེར་ཞིབ་འཇུག་གནང་མཁན་ཆེད་འཛུགས་གནང་ཐུབ་ཀྱི་ཡོད་མེད་ཐོག་བཀའ་འདྲི་ཞུས་སོང་།རྩ་བའི་སྲིད་སྐྱོང་མཆོག་གིས་ཁ་སང་བཀའ་ཤག་གི་གསལ་བཤད་གནང་སྐབས་ལྔ་དང་ལྔ་བཅུའི་སྲིད་བྱུས་དེ་ནི་༸གོང་ས་མཆོག་གི་གཟིམ་ཆུང་མཇལ་ཁ་རིམ་པའི་ཐོག་སྩལ་བའི་བཀའ་སློབ་ཀྱི་དགོངས་དོན་གཞི་རྩར་བཟུང་ནས་བྱུང་བ་ཞིག་ཡིན་པ་དེའང་རིམ་པས་བཟང་དུ་དང་ཡག་ཏུ་འགྲོ་རྒྱུའི་གདེང་ཚོད་ཆེན་པོ་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་དེ་རིང་བཀའ་ཤག་གི་གསལ་བཤད་དང་འབྲེལ་བའི་བགྲོ་གླེང་དེའི་ཁྲོད་སྤྱི་འཐུས་ཁག་གཅིག་གིས་ལྔ་དང་ལྔ་བཅུའི་སྲིད་བྱུས་ཀྱི་འཆར་སྣང་དེ་ལ་དམིགས་བསལ་གང་ཡང་མེད་པ་དང་དེ་ནི་བཀའ་ཤག་སྐབས་གོང་མ་ཚོའི་འཆར་གཞི་རྣམས་རྒྱུན་སྐྱོང་གནང་བ་དང་མིང་གསར་པ་བཏགས་པ་ཙམ་ཞིག་ཡིན་སྐོར་གསུང་མཁན་བྱུང་ཡོད།ལས་རིམ་ལ་གཞིས་ན་སང་ཉིན་གྲོས་ཚོགས་ཀྱི་ལས་ཉིན་མཐའ་མའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་སྤྱི་འཐུས་རྣམ་པའི་དྲི་བར་ལན་འདེབས་གསལ་བཤད་གནང་གི་ཡོད་པ་རེད།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་དགུ་པའི་སྔ་དྲོའི་ཚོགས་དུས་ཐོག་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དམིགས་བསལ་དང་རྒྱུན་གྲོན། དེ་བཞིན་ཟུར་བཀོལ་མ་དངུལ་གཏན་འབེབས་དང་ལས་དོན་གནང་ཕྱོགས་ཐོག་མུ་མཐུད་བགྲོ་གླེང་གནང་ཡོད་པ་རེད།སྐབས་དེར་བོད་མི་མང་སྤྱི་འཐུས་ཁག་ཅིག་ནས་སྐབས་བཅུ་བཞི་པ་དང་བཅོ་ལྔ་པའི་བཀའ་ཤག་གི་ངོས་ནས་བོད་ནས་གསར་དུ་ཕེབས་པའི་གསར་འབྱོར་བ་ཁག་ཅིག་ལ་སྡོད་ཁང་སོགས་ཀྱི་མཐུན་རྐྱེན་བསྐྲུན་ཡོད་ཀྱང་། ད་ལྟ་ཡང་བཞུགས་སྒར་གཙོས་པའི་ས་གནས་ཁག་ཏུ་བོད་པ་གསར་འབྱོར་མི་ཉུང་བ་ཞིག་ལ་འཚོ་སྡོད་ཀྱི་དཀའ་ངལ་དང་། སླར་བོད་ལ་ལོག་ན་ཆབ་སྲིད་ཀྱི་དཀའ་ངལ་འཕྲད་བཞིན་པ་སོགས་འགྲེལ་བརྗོད་དང་སྦྲགས། འབྲེལ་ཡོད་ལས་ཁུངས་དང་བཀའ་བློན་ཚོས་གསར་འབྱོར་བའི་དཀའ་སྡུག་གཟིགས་སྐྱོང་གནང་རྒྱུའི་དུས་ལ་བབས་འདུག་ཅེས་གསུངས་སོང་། སྐབས་དེར་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་ཐོག་མར་བདུན་བཅུ་དོན་གྲངས་དང་བརྒྱད་བཅུའི་ནང་ལ་བོད་ནས་ཕེབས་མཁན་ཉུང་ཉུང་ཡིན་པའི་སྐབས་ནས་གསར་འབྱོར་བ་རྣམས་ཀྱི་གནས་སྟངས་དེ་ཆབ་སྲིད་ཀྱི་གལ་གནད་ཅིག་ཏུ་བརྩིས་ཏེ་སྐུ་སྒེར་ཡིག་ཚང་རང་ནས་ཐུགས་འགན་བཞེས་ཡོད་པ་དང་། དེ་ནས་རིམ་པས་བོད་ནས་ཕེབས་མཁན་མང་དུ་ཕྱིན་སྟབས་༸གོང་ས་མཆོག་གི་བཀའ་དགོངས་ལྟར་སྣེ་ལན་འབྲེལ་མཐུད་ཁང་ཞེས་ཟུར་དུ་བཙུགས་ཏེ་བལ་ཡུལ་ས་འཚམས་སུ་འབྱོར་བ་ནས་བཟུང་མཐའ་མའི་སྒྲིག་ཁོངས་ཤིག་ཏུ་མ་ཞུགས་ཀྱི་བར་དུ། ང་དང་ཁོ་ཞེས་དབྱེ་འབྱེད་མེད་པར་འགྲོ་སོང་ཆ་ཚང་སྐབས་དེའི་བོད་གཞུང་གིས་བཏང་པའི་ཐོག་གཟིགས་སྐྱོང་གནང་ཡོད་པ་སོགས་འགྲེལ་བརྗོད་དང་སྦྲགས། སྒེར་གྱི་དཀའ་ངལ་རེ་ཟུང་ཙམ་མ་གཏོགས་སྤྱི་ཡོངས་ནས་བོད་མིའི་སྒྲིག་འཛུགས་ཀྱིས་གསར་འབྱོར་བ་ཚོར་གཟིགས་སྐྱོང་ཧ་ལས་པའི་བཀའ་དྲིན་ཆེན་པོ་གནང་ཡོད་ཅེས་གསུངས་སོང་། མ་ཟད་བཀའ་བློན་མཆོག་གིས། ད་ལྟའི་ཆ་ལ་ནང་སྲིད་ལས་ཁུངས་ལ་ཐོ་གཞུང་འབྱོར་བའི་ནང་དུ་བོད་ནས་ཕེབས་པའི་ཁྱིམ་ཚང་གཅིག་སྟོང་གསུམ་བརྒྱ་ཙམ་ཡོད་པ་དང་། དེ་ཚོའི་རིགས་ལ་ཡང་ནང་སྲིད་ལས་ཁུངས་ནས་རོགས་རམ་ག་ལ་གང་འཚམས་ཞུས་ཡོད་པ་དང་། ལྷག་པར་དུ་སྡོད་ཁང་ས་ཆ་བཞུགས་སྒར་ཁུལ་དུ་ཐོབ་ཐབས་སུ་ད་ལོའི་སྔོན་རྩིས་ནང་སྒོར་ས་ཡ་༥༠ ཙམ་ཞུས་ཏེ། བཀའ་ཤག་འདིའི་ལོ་དུས་མ་རྫོགས་གོང་ལ་སྡོད་ཁང་ཞིག་བསྐྲུན་རྒྱུའི་འབད་རྩོན་ཞུས་མུས་ཡིན་པས། རྒྱ་ཆེ་མང་ཚོགས་ཀྱི་ངོས་ནས་ཀྱང་ལས་གཞི་འདི་འགྲུབ་ཐབས་སུ་འགོག་རྐྱེན་བཟོ་རྒྱུ་མེད་པ་གསུངས་སོང་།  ད་དུང་ནང་སྲིད་ལས་ཁུངས་ཀྱི་ལས་དོན་དང་འབྲེལ། སྤྱི་འཐུས་ཁག་ཅིག་ནས་ཉམས་ཐག་བསྐྱར་ཞིབ་ཀྱི་ལས་དོན་དང་། བལ་ཡུལ་གློ་ཚེ་རོགས་རྣམ་རྒྱལ་གླིང་བོད་མིའི་གཞིས་སྒར། དེ་བཞིན་ལ་དྭགས་བྱང་ཐང་སོགས་མཐའ་མཚམས་ཀྱི་གཞིས་ཆགས་ཁག་གི་འབྱུང་བའི་དཀའ་ངལ་སེལ་ཐབས་ག་རེ་གནང་ཡོད་སོགས་ཀྱི་བཀའ་འདྲི་ཞུས་ཡོད། མ་ཟད་སྤྱི་འཐུས་ཁག་ཅིག་ནས་དེ་སྔ་བཙན་བྱོལ་བོད་མིའི་མཉམ་འབྲེལ་དེ་དག་བོད་པའི་སྤྱི་ཚོགས་ས་བརྟན་དང་། རང་ཁ་རང་གསོ་ཐུབ་ཐབས་སོགས་ལ་དམིགས་ཡོད་པ་འགྲེལ་བརྗོད་དང་སྦྲགས། ད་ལྟའི་ཆ་ལ་བཙན་བྱོལ་བོད་མིའི་མཉམ་འབྲེལ་ཁག་གི་གནས་བབས་གང་འདྲ་ཆགས་ཡོད་མེད་སོགས་ཀྱི་བཀའ་དྲི་ཞུས་སོང་བ་དང་། སྐབས་དེར་བཀའ་བློན་མཆོག་གིས། བཙན་བྱོལ་བོད་མིའི་མཉམ་འབྲེལ་དེ་དག་ཐོག་མའི་རེ་བ་བྱས་པ་གཞིར་བཟུང་ཡོང་གི་ཡོད་མེད་ཞུ་ཚོད་མ་ཐིག་པ་ཞིག་ཏུ་གྱུར་ཡོད་པ་དང་། སྒྲིག་འཛུགས་ཀྱི་ངོས་ནས་ཀྱང་དེའི་ཐད་བློ་ཚབ་ཡོང་གི་འདུག་ཅེས་གསུངས་སོང་། ཐེངས་འདིའི་ནང་སྲིད་ཀྱི་ལས་དོན་སོགས་ཀྱི་ཐད་བགྲོ་གླེང་དང་ལན་འདེབས་གསལ་བཤད་གནང་སྐབས་བཀའ་བློན་མཆོག་ནས། དེ་སྔ་གྲོས་ཚོགས་རིམ་པའི་ཐོག་བོད་པའི་སྤྱི་ཚོགས་ནང་སོ་ནམ་འདེབས་ལས་ཀྱི་ལས་གཞི་རྒྱུན་གནས་ཐུབ་ཐབས་སུ་ཕུལ་བྱུང་སོ་ནམ་གཟེངས་བསྟོད་ཀྱི་བྱ་དགའ་ཞིག་ཕུལ་དགོས་གལ་གྱི་བསམ་ཚུལ་མང་པོ་བྱུང་པ་ལྟར། འདི་ལོ་ནས་བོད་མིའི་སྒྲིག་འཛུགས་ཀྱི་མང་གཙོའི་དུས་ཆེན་ཉིན་སོ་ནམ་འདེབས་ལས་རྩེད་ཕུད་སོན་པ་ཞིག་དང་། ལོ་ན་བཞི་བཅུ་མན་གྱི་གཞོན་སྐྱེས་སོ་ནམ་འདེབས་ལས་གནང་མཁན་གཅིག་བཅས་ལ་སྒོར་འབུམ་རེ་རེ་དང་ཕྱག་ཁྱེར་བཅས་གནང་གཏན་འཁེལ་ཡོད་པ་གསུངས་སོང་།

སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བརྒྱད་པའི་ཉིན་རྒྱབ་ཚོགས་དུས་ཐོག་བོད་མིའི་སྒྲིག་འཛུགས་བཀའ་ཤག་ནས་ལྔ་དང་ལྔ་བཅུའི་བྱུང་རིམ་དང་། ད་བར་ཚོགས་པའི་ལྔ་དང་ལྔ་བཅུའི་ཚོགས་འདུའི་དགོས་དམིགས་སོགས་ཀྱི་ཐད་ལ་དམིགས་བསལ་གསལ་བཤད་ཀྱི་གོ་སྐབས་བླངས་ཐོག་ལྔ་དང་ལྔ་བཅུ་ཞེས་པ་དེ་ནི་༸གོང་ས་མཆོག་གི་གཟིམ་ཆུང་མཇལ་ཁ་རིམ་པའི་ཐོག་སྩལ་བའི་བཀའ་སློབ་ཀྱི་དགོངས་དོན་གཞི་རྩར་བཟུང་ནས་ལྔ་དང་ལྔ་བཅུ་ཞེས་པ་དེ་བྱུང་ཡོད་པ་གསུངས་སོང་།བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁོང་དེ་སྔ་སྲིད་སྐྱོང་གི་དམ་འབུལ་ཐོག་མར་ཕུལ་བའི་རྗེས་སུ་༸གོང་ས་མཆོག་གི་གཟིམ་ཆུང་མཇལ་ཁར་ཡང་ཡང་བཅར་སྐབས་མགོན་པོ་༸གང་ཉིད་མཆོག་ནས་ད་ཁྱེད་རང་ཆབ་སྲིད་ཀྱི་འགན་འཁྱེར་དགོས། ངོས་མེད་པ་ནང་བཞིན་བྱས་ནས་འཆར་གཞི་སྒྲིགས་ཤིག་ཞེས་བཀའ་ཡང་ཡང་ཕེབས་ཡོད་སྟབས། སེམས་ལྗིད་ཏིག་ཏིག་དང་སྐྱོང་ལྷང་ལྷང་ཡོང་མིན་ལ་ལྟོས་མེད། ༸གོང་ས་མཆོག་གི་བཀའ་སྒྲུབ་རྒྱུའི་འགན་དེ་བཀའ་ཤག་ལ་ཡོད་བསམ་པའི་ཐོག་ནས་བཀའ་ཤག་ལྷན་རྒྱས་དང་མང་ཚོགས་ཁྲོད་ལ་༸གོང་ས་མཆོག་ཡོད་པའི་སྐབས་ཀྱི་འཆར་གཞི་དང་མེད་པའི་སྐབས་ཀྱི་འཆར་གཞི་ཞེས་གསུང་ཕོད་པ་ཞིག་མེད་སྟབས། ལྔ་དང་ལྔ་བཅུ་ཞེས་ཕྱོགས་གཅིག་ནས་ལོ་ལྔ་དང་ལྔ་བཅུ། ཕྱོགས་གཉིས་ནས་འཕྲལ་དང་ཕུགས། ད་ལྟ་དང་མ་འོངས་བཅས་ལྔ་དང་ལྔ་བཅུའི་འཆར་སྣང་དང་། འཆར་གཞི། སྲིད་བྱུས་དང་ལག་བསྟར་བཅས་བྱུང་ཡོད་པ་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་བཞིན་རིམ་པས་བཟང་དུ་དང་ཡག་ཏུ་འགྲོ་རྒྱུའི་གདེང་ཚོད་ཆེན་པོ་ཡོད་པ་གསུངས་སོང་། སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མི་ལོ་བདུན་ཅུ་ཙམ་གྱི་ནང་གནང་བའི་བོད་མིའི་ཆེད་མཐོང་དང་། བོད་མིའི་སྒྲིག་འཛུགས་ཀྱི་གནས་བབས། དེ་བཞིན་བོད་ནང་གི་བོད་མི་ཚོའི་སྙིང་སྟོབས་བཅས་མི་ཉམས་གོང་འཕེལ་གནང་རྒྱུ་གལ་ཆེན་པོ་ཡིན་པ། མགོན་པོ་༸གང་ཉིད་མཆོག་དགུང་ལོའོ་བབས་ལ་གཞིགས་པའི་ཕྱིའི་རྒྱལ་ཁབ་ཁག་ཏུ་ཕེབས་རྒྱུ་ཁག་པོ་ཡིན་པ་སོགས་ཀྱི་བཀའ་སློབ་ཕེབས་ཁག་ལུང་འདྲེན་དང་སྦྲགས། ལྔ་དང་ལྔ་བཅུའི་འཆར་སྣང་འདིའི་ཐོག་ནས་བོད་པའི་རྩ་དོན་གྱི་འགན་དེ་བོད་མི་མང་ཚོགས་ནས་འཁྱེར་ཐུབ་དགོས་གལ་ཡིན་པ་གསུངས་ཡོད།  ལྷག་པར་དུ་སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་གཙོ་གྱུར་མང་གཙོ་དར་སྤེལ་དང་ཁོར་ཡུག འགྲོ་བ་མིའི་ཐོབ་ཐང་སོགས་ཀྱི་ཐད་ལ་མཛད་འཕྲིན་རླབས་ཆེན་བསྐྱངས་པ་རྣམས་མུ་མཐུད་རྒྱུན་སྐྱོང་ཞུ་རྒྱུའི་འགན་དེ་ང་ཚོ་བོད་པ་ཚོར་ཡོད་སྟབས། ང་ཚོས་ག་ཚོད་སྒྲུབ་ཐུབ་ཀྱི་ཡོད་མེད་ལ་དགོངས་པ་བཞེས་གལ་ཡིན་པ་དང་། ༸གོང་ས་མཆོག་གི་བཀའ་དྲིན་ཐོག་ད་བར་རྒྱལ་སྤྱིའི་ཁྲོད་དབུ་མའི་ལམ་ལ་རྒྱབ་སྐྱོར་ཐོབ་པ་ཁག་གཙོ་གྱུར་བོད་ཀྱི་ཆབ་སྲིད་གནད་དོན་ཁག་རྒྱུན་སྐྱོང་ཞུ་རྒྱུའི་བོད་མི་ཚོར་འགན་ཡོད་སྟབས། གནད་དོན་དེ་དག་སྒྲུབ་ཐབས་སུ་ཐོག་མར་ཆབ་སྲིད་ཀྱི་ལྔ་དང་ལྔ་བཅུ་ཞེས་འགོ་འཛུགས་གནང་ཡོད་པ་གསུངས་སོང་།  སྐབས་དེར་སྲིད་སྐྱོང་མཆོག་ནས་ཆབ་སྲིད་ཀྱི་ལྔ་དང་ལྔ་བཅུའི་རྗེས་སུ་གཞོན་སྐྱེས་ལྔ་དང་ལྔ་བཅུ་དང་བཙན་བྱོལ་བོད་མིའི་སྤྱི་ཚོགས་སྲ་བརྟན་རྒྱུན་སྐྱོང་ལ་དམིགས་པའི་ལྔ་དང་ལྔ་བཅུ་བཅས་ཀྱི་ཚོགས་འདུ་རིམ་པ་ཚོགས་པ་ཁག་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་ད་རེས་ཀྱི་བཀའ་ཤག་ནས་མཚམས་འཇོག་རྒྱུ་ཞིག་མིན་པར་མུ་མཐུད་གནང་དགོས་གལ་ཡིན་པ་གསུངས་ཡོད།  བཀའ་ཤག་གི་གསལ་བཤད་དེའི་ཁྲོད་སྲིད་སྐྱོང་མཆོག་ནས་ལྔ་དང་ལྔ་བཅུའི་འཕྲལ་ཕུགས་ཀྱི་ལས་དོན་སོགས་དང་འབྲེལ། ད་བར་འཛིན་སྐྱོང་ནས་ཆོས་རིག་དང་འབྲེལ་བའི་ཐོག་ལ་མཐའ་མཚམས་ཁག་ཏུ་ཡོད་པའི་དགོན་ཁག་རྣམས་ཉམས་གསོ་དང་དཔེ་ཁྲིད་དགེ་རྒན་བསྐོ་གཞག དེ་བཞིན་ནང་སྲིད་དང་འབྲེལ་བོད་པའི་གཞིས་ཁག་རྒྱ་གར་གཞུང་གྱི་ཁྲིམས་མཐུན་ངོས་ལེན་དང་སྲིད་བྱུས་ལྡན་པ། དེ་བཞིན་དཔལ་འབྱོར་དང་འབྲེལ་བའི་དངུལ་ཁང་དང་བུན་གཡར་ལས་གཞི་བརྒྱུད་སྒྲིག་འཛུགས་དང་མང་ཚོགས་གཉིས་ཀར་ཕན་པའི་ལས་གཞི། གཞན་ཡང་བདེ་སྲུང་གི་ལས་དོན་དང་འབྲེལ་༸གོངས་མཆོག་གི་༸སྐུ་ཕྱྭའི་སྲུང་སྐྱོབ་ཐོག་སྔར་ལྷག་ཚགས་ཚུད་དང་། ཤེས་ཡོན་དང་འབྲེལ། ཤེས་ཡོན་ལྷན་ཚོགས་གསར་འཛུགས་དང་ཤེས་ཡོན་སྲིད་བྱུས་ལག་བསྟར་གཙོས་དགེ་རྒན་གསོ་སྐྱོང་དང་ཟབ་སྦྱོང་རྒྱ་ཆེ་གནང་བ། འཕྲོད་བསྟེན་དང་འབྲེལ་ནས་སྨན་བཅོས་ལྟ་སྐྱོང་ལས་གཞི་སོགས་འཆར་གཞི་དང་ལྡན་པའི་ཐོག་ནས་གནང་ཐུབ་ཡོད་པ་སོགས་ཀྱང་གསུངས་ཡོད།