བོད་མིའི་སྒྲིག་འཛུགས།

བཞུགས་སྒར་དུ་རང་ལུས་མེར་སྲེག་གནང་མཁན་དེ་བོད་མི་པ་སངས་དོན་གྲུབ་ཡིན་པ་ཁ་སང་ཉིན་དགུང་ཤེས་རྟོགས་བྱུང་ཡོད་པ་ལྟར། དེ་རིང་ཟླ་ ༨ ཚེས་ ༡ ཉིན་དགུང་འདི་ག་ས་གནས་ཀྱི་འབྲེལ་ཉེན་རྟོག་པས་ཁྲིམས་ལྟར་དོན་གྲུབ་ལགས་དམ་པ་དེའི་སྐུ་ཕུང་རྡ་རམ་ས་ལའི་ས་གནས་འགོ་འཛིན་ཟླ་བ་རིན་ཆེན་ལགས་བརྒྱུད་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ལ་རྩིས་སྤྲོད་གནང་སོང་བ་དང་། སྐུ་ཕུང་རྩིས་ལེན་ཆེད་དུ་ཕེབས་པ་ནོར་གླིང་ལས་བྱེད་པ་ཁག་ཅིག་ནས་དོན་གྲུབ་ལགས་དམ་པ་དེའི་སྐུ་ཕུང་ཐོག་བོད་རྒྱལ་པ་ཆེན་པོའི་རྒྱལ་དར་སྒྲོན་ནས་རྡ་ཤོད་རྒྱ་གར་གཞུང་གི་ཕུང་པོ་འཇོག་ཡུལ་ནས་གངས་སྐྱིད་བདེ་ལེགས་སྨན་དུ་བསྣམས་ཕེབས་ཡོད་པ་རེད། རྡ་རམ་ས་ལའི་ས་གནས་འགོ་འཛིན་ཟླ་བ་རིན་ཆེན་ལགས་ཀྱིས་དོན་གྲུབ་ལགས་ཀྱི་སྐུ་ཕུང་ཞུགས་འབུལ་སྐོར་དང་འབྲེལ། སང་ཉིན་སྔ་དྲོ་ཚོུད་༥༣༠ཐོག་བདེ་ལེགས་སྨན་ཁང་ནས་ལྷ་རྒྱལ་རིར་གདན་འདྲེན་ཞུ་རྒྱུ་ཡིན་པ་གསུངས་སོང་། ད་དུང་ཉིན་རྒྱབ་ཚོུད་བཞི་པ་ནས་ལྔ་པ་བར་ནོར་གླིང་བདོ་ཀྱི་རིག་གཞུང་གཅེས་སྐྱོང་ཁང་དང་རྡ་ས་གནས་འཐུས་ཚོགས་དང་རང་བདེན་ཚོགས་ཆུང་སོགས་ཀྱི་གོ་སྒྲིག་འོག་ཐེག་ཆེན་ཆོས་གླིང་གཙུག་ལག་ཁང་དུ་བསྔ་སྨོན་མཆོད་འབུལ་གནང་རྒྱུ་རེད་འདུག གཞི་རྩའི་རྒྱལ་གཅེས་པ་པ་སངས་དོན་གྲུབ་ལགས་ནས་ཕྱི་ཚེས་ ༢༩ ཉིན་རྒྱབ་ཏུ་བཞུགས་སྒར་སྐོར་ལམ་དུ་རང་ལུས་མེར་སྲེག་གནང་ནས་འདས་གྲོངས་སུ་གྱུར་རྗེས་ཉིན་གཅིག་དང་ཕྱེད་ཀ་སོང་རྗེས་ཁ་སང་ཚེས་ ༣༡ ཉིན་དགུང་དངོས་སུ་ར་སྤྲོད་བྱུང་ཡོད་སྟབས། བཞུགས་སྒར་དུ་རྟེན་གཞི་བྱས་པའི་ས་གནས་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་ནས་མེག་ལོར་ཁྲོམ་གཞུང་ནས་ཆོལ་གསུམ་དཔའ་བོའི་རྡོ་རིང་བར་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གོ་སྒྲིག་གནང་ཡོད་པ་རེད།

ཡིག་ཆ་དང་དངོས་པོ་སོགས་ཁག་ཅིག་ལ་དཔྱད་ཞིབ་བྱས་རྗེས་རྡ་རམ་ས་ལ་མེག་ལོར་འབྲེལ་ཡོད་ས་གནས་ཉེན་རྟོག་པ་གཙོ་འཛིན་སྐུ་ཞབས་ Surender Rana ལགས་དང་ས་གནས་འགོ་འཛིན་ཟླ་བ་རིན་ཆེན་ལགས་གཉིས་ཀྱིས་ཁ་ཉིན་ཕྱི་ཚེས་ ༢༩ ཉིན་རྒྱབ་སྐོར་ལམ་དུ་རང་ལུས་མེར་སྲེག་གནང་མཁན་དེ་བཞུགས་སྒར་ཉེ་འཁྲིས་ནོར་བོད་ཀྱི་རིག་གཞུང་གཅེས་སྐྱོང་ཁང་གི་ཤིང་ཚོན་སྡེ་ཚན་གྱི་ལས་བྱེད་དོན་གྲུབ་ཡིན་པ་གསུངས་སོང་། རྩ་བའི་པ་སངས་དོན་གྲུབ་འམ་དོན་གྲུབ་ལགས་ནི་ད་ལྟར་ལོ་ ༤༩ ཡིན་པ་དང་ཕ་ཡུལ་རྒྱང་རྩེ་ནས་ཡིན་ཞིང་། ཕ་མིང་ལ་ཡེ་ཤེས་ཚེ་རིང་དང་མ་མིང་ལ་བཅོ་ལྔ་ལྷ་མོ་རེད་འདུག རང་སྲེག་མ་གནང་གོང་བཞུགས་སྒར་གྱི་ཉེ་འཁྲིས་སུ་ཡོད་པའི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཤིང་ཚོན་སྡེ་ཚན་གྱི་ལས་མི་ཡིན་པ་མ་ཟད། དེ་སྔ་ཕྱི་ལོ་ ༢༠༡༢ ལོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་འཛུལ་ཞུགས་གནང་འདུག ཁོང་དེ་སྔ་སྦིར་སློབ་གྲྭ་ནས་འཛིན་རིམ་བཅུ་པ་སློབ་ཐོན་ཟིན་པའི་ལག་འཁྱེར་ཡང་འདུག ཁ་ཉིན་རང་ལུས་མེར་སྲེག་གི་དོན་རྐྱེན་ཐོག་དཔྱད་ཞིབ་གནང་མཁན་འབྲེལ་ཡོད་ས་གནས་ཉེན་རྟོག་པ་གཙོ་བོ་སྐུ་ཞབས་Surender Rana ལགས་ཀྱིས་འདི་ག་རླུང་འཕྲིན་ཁང་གི་བཅར་འདྲི་དང་ལེན་གནང་སྟེ། ཐེངས་འདིའི་རང་སྲེག་རྗེས་འབྲེལ་ནས་དེ་རིང་བར་གྱི་བརྒྱུད་རིམ་ཆ་ཚང་འགྲེལ་བརྗོད་གནང་སོང་བ་མ་ཟད། ལྷག་པར་དུ་ཁ་ཉིན་རང་ལུས་མེར་སྲེག་གནང་མཁན་གྱི་ས་ཚིགས་ནས་རྙེད་པའི་ལྡེ་མིག་དེ་ནོར་གླིང་ཉེ་འཁྲིས་སུ་བཞུགས་པའི་དོན་གྲུབ་ལགས་ཀྱི་ཁང་པའི་ལྡེ་མིག་ཡིན་པ་དང་། དེ་བཞིན་སིལ་ལྷམ་ཐོག་གི་ཚོན་དང་ནང་ནས་རྙེད་པའི་གྱོན་ཆས་ཐོག་གི་ཚོན། ཕུང་པོ་དང་ནང་ནས་བརྙེད་པའི་པར། ད་དུང་རྒྱ་གར་སྐྱབས་བཅོལ་ལག་དེབ་དང་བཙན་བྱོལ་བོད་མིའི་དང་བླངས་དཔྱ་དངུལ་ལག་དེབ་སོགས་དངོས་རྫས་ཁག་ཅིག་ནས་བོད་མི་རང་ལུས་མེར་སྲེག་གནང་མཁན་དེ་ཕལ་ཆེར་དོན་གྲུབ་ཡིན་པ་ཤེས་རྟོགས་བྱུང་ཡོང་གི་འདུག་ཅེས་གསུངས་སོང་། ས་གནས་འགོ་འཛིན་ཟླ་བ་རིན་ཆེན་ལགས་ཀྱིས་དེ་རིང་སྔ་དྲོ་གསར་འགོད་ལྷན་ཚོགས་ཐོག་རང་སྲེག་གནང་མཁན་དེ་བོད་མི་ཞིག་ཡིན་པ་ར་སྤྲོད་གཙང་མ་བྱུང་ཡོད་པ་རེད། འོན་ཀྱང་ད་ལྟ་ནོར་གླིང་གི་འགན་འཛིན་གཞོན་པ་ཚེ་རིང་ཕུན་ཚོགས་ལགས་ཀྱིས་ཞལ་པར་བརྒྱུད་ནས་དེ་གར་དུ་ཕུང་པོ་དང་མཉམ་དུ་རྙེད་པའི་སིལ་ལྷམ་སོགས་ལ་དཔྱད་ཚེ་དོན་གྲུབ་ཡིན་པར་དོགས་གཞི་ཡོད་སྐོར་གསུངས་པ་དང་། དེ་བཞིན་རེས་གཟའ་སྤེན་པའི་ཉིན་ལས་ཁུངས་ལ་སླེབས་མེད་པ་གསུངས་ནས་ང་འདིར་བཅར་རོགས་ཞེས་གསུངས་པ་ལྟར་ངས་རྒྱ་གར་གྱི་ཉེན་རྟོག་པ་འཁྲིད་ནས་དོན་གྲུབ་ལགས་ཀྱི་སྡོད་གནས་སུ་ཕྱིན་པ་དང་། དེ་སྔོན་ཕུང་པོའི་ཉེ་འཁོར་ནས་ལྡེ་མིག་གཅིག་རྙེད་སོན་བྱུང་བ་དེ་ཁོང་གི་ཁང་པའི་སྒོ་ལྕགས་ཕྱེ་ཐུབ་པ་དེས་ལྡེ་མིག་དེ་དོན་གྲུབ་ཀྱི་ཡིན་པ་དང་། ཁང་པ་དེའི་ནང་གི་ཅ་དངོས་དང་རྒྱ་གར་དུ་གནས་སྡོད་ཆོག་པའི་ལག་དེབ་ RC རྡ་ས་ཁོར་ཡུག་གཙང་བཟོ་ལག་དེབ། བཙན་བྱོལ་བོད་མིའི་དང་བླངས་དཔྱ་དངུལ་ལག་དེབ་སོགས་ལ་བརྟག་དཔྱད་གནང་མཐར་ཁ་ཉིན་རང་སྲེག་གནང་མཁན་དེ་ཁོང་ཡིན་པར་ཕལ་ཆེར་ར་སྤྲོད་་ཐུབ་སྐོར་གསུངས་སོང་། གཞི་རྩའི་དོན་གྲུབ་ལགས་ཀྱི་བཞུགས་སྒར་སྐོར་ལམ་དུ་རང་ལུས་མེར་སྲེག་གནང་པའི་ས་ཚིགས་དེ་ནས་ལྡེ་མིག་ཆ་གཅིག་དང་། ལྷག་པར་རས་ཁུག་དམར་པོ་ཞིག་གི་ནང་དུ་བོད་ཀྱི་རྒྱལ་དར་དང་ཉི་གདུགས་ནག་པོ་གཅིག ཧིན་སྒོར་ཤོག་ལོར་ ༨༠༠ དེ་བཞིན་ཤོག་བུ་དཀར་པོའི་སྟེང་དབྱིན་སྐད་ཐོག་ Dalai lama 80th happy birthday Nyima Gyalpo ཞེས་དང་། ད་དུང་ནོར་གླིང་ས་གནས་ཀྱི་བརྙན་འཕྲིན་ལས་མི་ཞིག་གི་ཁ་པར་ཨང་བཅས་སོགས་འཁོད་ཡོད་སྟབས། འདི་ག་རླུང་འཕྲིན་ཁང་ནས་དཔྱད་ཞིབ་བྱས་པའི་ཁྲོད་རང་ལུས་མེར་སྲེག་གནང་མཁན་དོན་གྲུབ་ལགས་ནི་ཤིང་ཚོན་སྡེ་ཚན་གྱི་རྒན་ཉི་མ་རྒྱལ་པོ་ལགས་ཀྱི་ཁྱབ་ཁོངས་ལས་བྱེད་ཡིན་པ་དང་ཤོག་བུ་དེ་དང་དེའི་སྟེང་གང་བྲིས་ཡོད་པ་དེ་རྒན་ཉི་མ་རྒྱལ་པོ་ལགས་ཀྱི་ཕྱག་བྲིས་རེད་འདུག ད་དུང་ཤོག་བུ་དེའི་སྟེང་ཁུལ་དེའི་བརྙན་འཕྲིན་ལས་མི་ཞིག་གི་ཁ་པར་ཨང་གྲངས་ཡོད་པ་དེ་ནི་པ་སངས་དོན་གྲུབ་ལགས་ནས་ཁ་ཉིན་རང་ལུས་མེར་སྲེག་མ་བཏང་གོང་དུ་ནོར་གླིང་ལས་བྱེད་ལ་བཀའ་འདྲི་ཞུས་འདུག པ་སངས་དོན་གྲུབ་ལགས་དང་འདྲིས་ཆེ་ཤོས་གྲས་ཡིན་པ་རྒན་ཉི་མ་རྒྱལ་པོ་ལགས་སུ་ཁོང་གང་ནས་ཡིན་པ་སོགས་བཅར་འདྲི་ཞུས་ཡོད། པ་སངས་དོན་གྲུབ་ལགས་ཀྱི་བཞུགས་གནས་ནོར་གླིང་ཉེ་འཁྲིས་རྒྱ་གར་བ་ཁང་བདག་ Ishwar Dass ལགས་ལ་བཅར་འདྲི་ཞུས་པར་པ་སངས་དོན་གྲུབ་ལགས་ཉེ་ཆར་གནས་སྤོ་ཟིན་ཙམ་རེད། འོན་ཀྱང་ཁོང་མི་ཉམ་ཆུང་དང་སྐད་ཆ་ཉུང་ཉུང། རྙོག་གྲ་རིགས་གཏན་ནས་མེད་མཁན་ཞིག་ཡིན་པ་གསུངས་ སོང་། གཞི་རྩའི་པ་སངས་དོན་གྲུབ་ལགས་ཀྱིས་རང་ལུས་མེར་སྲེག་གནང་ཡུལ་སྐོར་ལམ་དེ་ནི་ས་ཆ་ཏོག་ཙམ་ཁུག་སྐྱོག་ཆགས་ཡོད་སྟབས། སྐབས་དེ་དུས་དངོས་སུ་མཐོང་མཁན་མི་རེ་ཟུང་མ་གཏོགས་བྱུང་མེད་པ་དང་།  ཁོང་རྣམ་པས་བོད་མི་ཞིག་ཡིན་པ་ར་སྤྲོད་བྱས་པ་མ་ཚད་༸རྒྱལ་བ་རིན་པོ་ཆེ་༸སྐུ་ཚེ་ཁྲི་ལོར་བརྟན་པར་ཤོག་ཅེས་པའི་འབོད་ཚིག་སྒྲོག་ཡོད་པ་གསུངས་ཡོད། ཁ་ཉིན་པ་སངས་དོན་གྲུབ་ལགས་ཀྱིས་རང་ལུས་མེར་སྲེག་གནང་ས་དང་དེ་བཞིན་དེ་རིང་ཁོང་གི་ནང་ནས་ད་བར་ཞལ་ཆེམས་ཡི་གེ་རིགས་གང་ཡང་རྙེད་མེད་པ་རེད། ཤེས་རྟོགས་བྱུང་བར་ས་གནས་ཀྱི་ཉེན་རྟོག་དང་འབྲེལ་ཡོད་ཚན་པས་རིམ་བཞིན་པ་སངས་དོན་གྲུབ་ལགས་ཀྱི་སྐུ་ཕུང་རྡ་ས་ས་གནས་འགོ་འཛིན་ལ་རྩིས་སྤྲོད་གནང་གི་འདུག་པ་དང་། དེ་ནས་ནོར་གླིང་རིག་གཞུང་གཅེས་སྐྱོང་ཁང་ནས་འགན་རྐང་བཞེས་གནང་གི་འདུག སྐུ་ཕུང་ཞུགས་འབུལ་ག་དུས་གནང་མིན་སོགས་ཀྱི་ཚེས་གྲངས་ད་ལྟའི་ཆར་གཏན་འཁེལ་གནང་མི་འདུག་པས་རིམ་པས་གསར་འགྱུར་ནང་རྒྱང་སྲིང་ཞུ་རྒྱུ་ཡིན།

རྒྱ་ནག་གཞུང་ཚབ་མི་སྣས་ཆུ་ཚོད་གཉིས་རིང་ཁུལ་དེར་༸གོང་ས་མཆོག་གི་ཆིབས་བསྒྱུར་བསྐྱང་རྒྱུ་ཐོག་བཀའ་སྡོམ་བྱེད་དགོས་པའི་འབོད་སྐུལ་ཞུས་ཡོད་ཀྱང་བྷོ་ཙ་ཝ་ནའི་སྲིད་འཛིན་སྐུ་ཞབས་ Ian Kaham མཆོག་ནས་༸གོང་ས་མཆོག་གི་ཆིབས་སྒྱུར་དང་འབྲེལ་བའི་བཞེངས་ཕྱོགས་ལ་འགྱུར་བ་མེད་པ་གསུངས་འདུག དེ་ཡང་ཉེ་ཆར་ཟླ་ ༧ ཚེས་ ༢༥ ཉིན་བྷོ་ཙ་ཝ་ན་ཕྱི་སྲིད་བློན་ཆེན་ལྕམ་ Pelonomi VensonMoitoi མཆོག་གིས་ཡུལ་དེའི་གྲོས་ཚོགས་སུ་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་དྲི་བར་ལན་འདེབས་གནང་སྐབས་མགོན་པོ་མཆོག་གི་ཆིབས་སྒྱུར་དང་འབྲེལ་བའི་ཐོག་ཉེ་ཆར་བྷོ་ཙ་ཝ་ན་རྒྱལ་ས་ Gaborone ནང་དུ་རྟེན་གཞི་བྱས་པའི་རྒྱ་ནག་གཞུང་ཚབ་མི་སྣས་སྲིད་འཛིན་ཁ་མཱ་མཆོག་གི་ལྷན་དུ་ཆུ་ཚོད་གཉིས་རིང་ཐུག་འཕྲད་བྱེད་དེ་༸གོང་ས་མཆོག་ཡུལ་དེར་ཆིབས་བསྒྱུར་གནང་བཅུག་རྒྱུ་མེད་པར་ཞུ་འབོད་བྱས་ཡོད་ཀྱང་སྲིད་འཛིན་མཆོག་གིས་དེར་དང་ལེན་མ་གནང་ཁར་རྒྱ་གཞུང་གིས་གནོན་ཤུགས་སྤྲོད་པར་ལྟོས་མེད་ཀྱིས་འགྱུར་ལྡོག་གང་ཡང་མེད་པ་གསུངས་ཡོད་པ་རེད། རྒྱ་གཞུང་གིས་༸གོང་ས་མཆོག་གི་ཆིབས་སྒྱུར་དང་འབྲེལ་བའི་ཐོག་བྷོ་ཙ་ཝ་ན་གཞུང་གི་བཞེངས་ཕྱོགས་ལ་འགྱུར་ལྡོག་ཡོང་ཐབས་སུ་ཆེད་དམིགས་ཀྱིས་ཉེ་ཆར་ཡུལ་དེའི་གསར་འགྱུར་བརྒྱུད་ལམ་ཁག་ཅིག་ལ་དཔལ་འབྱོར་གྱི་མཐུན་འགྱུར་སྦྱོར་བྱེད་བཞིན་ཡོད་པ་མངོན་གསལ་གནང་འདུག སྐབས་དེར་གྲོས་ཚོགས་འཐུས་མི་ Dithapelo Keorapetse ལགས་ཀྱིས་དྲི་བར་ལན་འདེབས་སྐྱོན་པའི་ནང་དུ་བློན་ཆེན་མཆོག་གིས་ང་ཚོའི་གཞུང་ཕྱོགས་ནས་རྒྱ་གཞུང་མི་སྣའི་ལྷན་དུ་ཐུག་འཕྲད་བྱས་ཡོད་པ་དང། སྐབས་དེར་ཁོ་ཚོས་༸གོང་ས་མཆོག་གི་ཆིབས་སྒྱུར་གྱི་གནད་དོན་ལ་དགག་བྱ་དང་འདོད་བློ་མེད་པ་འགྲེལ་བརྗོད་བྱས་ཡོད་ཀྱང་། ང་ཚོའི་ངོས་ནས་༸གོང་ས་མཆོག་ནི་ཞི་བདེའི་དེད་དཔོན་ཞིག་ལ་ངོས་འཛིན་ཞུ་བཞིན་ཡོད་པ་མ་ཟད། Interpol འམ་རྒྱལ་སྤྱིའི་སྐོར་སྲུང་ལྷན་ཚོགས་བརྒྱུད་ནས་རྟོག་ཞིབ་མཐིལ་ཕྱིན་ཞུས་རྗེས་༸གོང་ས་མཆོག་ནི་ཉེན་ཚབས་ཡོད་པའི་མི་སྣ་ཞིག་མིན་པ་ར་སྤྲོད་བྱུང་སོང་། ང་ཚོས་ཕྱི་མི་ཞིབ་བཤེར་ཁྲིམས་སྒྲིག་ལྟར་རྒྱལ་ཁབ་ལ་ཉེན་ཁ་མེད་པའི་མི་སུ་འདྲ་ཞིག་ཡིན་རུང་སྣ་ཡུལ་འདིའི་ནང་ཕེབས་ཆོག་གི་ཡོད་སྟབས། Botswana རྒྱལ་ཁབ་འདི་ཡུལ་འདིའི་འབངས་མི་སེར་རྣམས་ཀྱི་ཡིན་སྟབས། ང་ཚོས་ཁེ་ཕན་ཕྲན་བུ་ཞིག་ལ་ལྟོས་མེད་ཀྱིས་༸གོང་ས་མཆོག་གི་ཆིབས་སྒྱུར་གནད་དོན་དང་འབྲེལ་ཐད་ཕྱིའི་རྒྱལ་ཁབ་གཞན་ཞིག་ནས་ཐག་གཅོད་བྱེད་རྒྱུར་ཆོག་མཆན་སྤྲད་རྒྱུ་མིན་ཞེས་གསུངས་འདུག ཡུལ་དེའི་ཕྱི་སྲིད་བློན་ཆེན་མཆོག་གིས་རྒྱ་ནག་གཞུང་གི་ཕྱི་འབྲེལ་སྲིད་བྱུས་དང་འབྲེལ་བའི་གནད་དོན་ནི་རྒྱལ་ཁབ་དེའི་ནང་གནད་ཡིན་པས་རྒྱལ་སྤྱིའི་ངོས་ནས་ཐད་བྱུས་བྱ་རྒྱུ་མེད་པར་དགོས་འདུན་སྟོན་པ་ལྟར་རྒྱ་ནག་གཞུང་ཕྱོགས་ནས་ཀྱང་བྷོ་ཙ་ཝ་ན་གཞུང་གིས་རང་ཐག་རང་གཅོད་གནང་པ་དེར་གུས་བརྩི་དང་ཐད་བྱུས་མི་གནང་པར་རེ་བ་གནང་བཞིན་ཡོད་ཅེས་ནན་བརྗོད་གནང་འདུག ༸གོང་ས་མཆོག་གི་ཆིབས་སྒྱུར་གྱི་གནད་དོན་དང་འབྲེལ་རྒྱ་ནག་གི་དཔོན་རིགས་ཆེ་གྲས་ཁག་ཅིག་གིས་གལ་སྲིད་བྷོ་ཙ་ཝ་ན་གཞུང་གི་ངོས་ནས་༸གོང་ས་མཆོག་གི་ཆིབས་སྒྱུར་ལ་དང་ལེན་ཞུ་ཚེ་ གནད་དོན་འདིའི་རྐྱེན་པས་རྒྱ་ནག་དང་བྷོ་ཙ་ཝ་ན་རྒྱལ་ཁབ་ཕྱོགས་གཉིས་པོའི་དབར་འབྲེལ་བ་དམ་ཟབ་ཡོད་པ་དེར་འགྱུར་བ་འགྲོ་ངེས་ཡིན་པའི་ཉེན་བརྡ་བཏང་ཡོད་པ་རེད། གཞི་རྩའི་ཕྱི་ཟླ་ ༨ ཚེས་ ༡༧ ནས་ ༡༩ བར་ཉིན་གྲངས་ ༣ རིང་ཡུལ་དེའི་རྒྱལ་ས་ Gaborone ནང་དུ་ ལུས་སེམས་སྲོག་གི་ལྷན་ཚོགས་ཤིག་ཚོགས་གཏན་འཁེལ་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་རྒྱུ་དང་། དབང་རྩའི་རིག་པའི་ཚན་རིག་པ་རྣམ་པའི་དབར་ Botho/Ubuntu ཞེས་པའི་ཨ་ཕི་རི་ཀའི་གདོད་མའི་མི་རིགས་རྣམས་ཀྱི་ཁྲོད་གནའ་སྔ་མོ་ནས་ཡོད་པའི་བསམ་བློའི་རིག་གཞུང་ཐོག་གོ་བསྡུར་སྦྱང་བཤད་གནང་རྒྱུ་དང་། ལྷན་ཚོགས་ཀྱི་དབུ་འབྱེད་མཛད་སྒོའི་ཐོག་སྲིད་འཛིན་ Ian Khama མཆོག་གིས་དབུ་འབྱེད་གསུང་བཤད་ཀྱང་གནང་རྒྱུ་ཡིན་པ་འཁོད་འདུག  

རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མཐོ་སློབ་གྲགས་ཆེན་ Hansraj སློབ་གཉེར་ཁང་ལོ་ངོ་ ༧༠ འཁོར་བའི་དུས་ཆེན་མཛད་སྒོའི་ཐོག་ནས་མཐོ་སློབ་དེའི་སློབ་ཟུར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་བདག་ཉིད་ཆེན་པོ་ Hansraj ཡི་ཆེ་བསྟོད་གཟེངས་རྟགས་ཤིག་ཕུལ་འདུག ཁ་སང་ཚེས་ ༢༦ ཉིན་ཚོགས་པའི་མཛད་སྒོ་དེའི་ཐོག་ལྟེ་གནས་ཁང་དེའི་སློབ་སྤྱི་དབུས་པའི་དགེ་ལས་སློབ་གཉེར་བ་དང་། ཁྱད་པར་དུ་མཐོ་སློབ་དེ་གའི་སློབ་ཟུར་ཡིན་པ་ད་ལྟ་རྒྱ་གར་དབུས་གཞུང་གི་ནང་སྲིད་བློན་ཆེན་གཞོན་པ་སྐུ་ཞབས་ Kiren Rijiju མཆོག་སོགས་སྐུ་མགྲོན་གཙོ་བོར་གདན་ཞུ་ཕུལ་འདུག སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཁོང་དེ་སྔ་དཔལ་འབྱོར་གནས་སྟངས་སྐྱོ་བོ་ཞིག་འོག་ནས་ཐོག་མར་མཐོ་སློབ་དེའི་ནང་དུ་སློབ་ཞུགས་བྱུང་སྟངས་དང། བར་དུ་བོད་དོན་ལས་འགུལ་མང་པོའི་ནང་མཉམ་ཞུགས་གནང་རྐྱེན་མཐར་ཡིག་རྒྱུགས་ནང་ཞུགས་ཆོག་མིན་སོགས་ཀྱི་དཀའ་ངལ་མང་དག་འཕྲད་ཡོད་ནའང། མཐོ་སློབ་ཀྱི་དགེ་རྒན་ཆེན་མོ་བཀྲིན་ཅན་ཚོས་དགོངས་པ་ཆེ་བཞེས་གནང་ཐོག་མཐར་ཁོང་སློབ་མཐར་སོན་ཐུབ་པ་བྱུང་ཡོད་པའི་བརྒྱུད་རིམ་སོགས་ངོ་སྤྲོད་གནང་པ་དང་སྦྲགས། ཁྱད་པར་དུ་Hansraj སློབ་གཉེར་ཁང་དེ་ནས་ཁོང་ལ་བོད་དོན་ཆེད་དོ་དབྱིངས་དང་རང་དབང་ཆ་ཚང་གནང་ཡོད་སྟབས། ལྟེ་གནས་ཁང་འདི་བཞིན་ཧ་ཅང་གི་བཀྲིན་ཆེན་པོ་ཞིག་ཡིན་པ་དང་། དེ་དེ་བཞིན་དེ་རིང་གི་གཟེངས་རྟགས་འདི་ནི་ Hansraj མཐོ་སློབ་ཀྱི་ཆེ་བསྟོད་ཀྱི་ངོས་འཛིན་ཞིག་དང་། རྒྱ་ཆེ་ས་ནས་རྒྱ་གར་ནི་བཀའ་དྲིན་ཅན་ཞིག་ཡིན་པ་མཚོན་གྱི་ཡོད་པ་དེ་ལྟར་ཡང་། ད་བར་རྒྱ་གར་མ་གཏོགས་རྒྱལ་ཁབ་གཞན་སུ་གཅིག་གིས་༸གོང་ས་མཆོག་དང་བོད་དང་བོད་མིར་དེ་ལྟར་རྒྱབ་སྐྱོར་གནང་མཁན་བྱུང་མེད་པ་རེད་ཅེས་གསུངས་འདུག ཁྱད་པར་དུ་སྲིད་སྐྱོང་མཆོག་གིས་མཛད་སྒོའི་སྐུ་མགྲོན་དུ་ཕེབས་ཡོད་པ་དབུས་ནང་སྲིད་བློན་ཆེན་གཞོན་པ་སྐུ་ཞབས་ Kiren Rijiju མཆོག་གིས་དབུས་པའི་དགེ་ལས་ཀུན་ལ་བོད་མིའི་སྒྲིག་འཛུགས་ཀྱི་འགོ་ཁྲིད་མང་ཆེ་བ་ནི་རྒྱ་གར་ནང་དུ་འཚར་ལོངས་བྱེད་ནས་སློབ་སྦྱོང་གི་གོ་སྐབས་ཐོབ་མཁན་ཤ་སྟག་ཡིན་པ་མ་ཟད། ང་ཚོས་རྒྱ་གར་གྱི་མེས་པོ་དམ་པ་གྷན་དྷཱི་མཆོག་གིས་འཚེ་མེད་ཞི་བའི་ལྟ་གྲུབ་དང་མང་གཙོའི་འགྲོ་ལུགས་ལག་བསྟར་ཞུས་ནས་རྒྱ་གར་གྱི་སྲིད་བློན་མོ་དི་མཆོག་གིས་ Make in India འམ་རྒྱ་གར་རང་གི་བཟོས་པ་ཞེས་པའི་ལྟ་གྲུབ་ལག་བསྟར་བྱེད་མཁན་ངོ་མ་དེ་ཆགས་ཀྱི་ཡོད་སྐོར་གསུངས་པ་དང་སྦྲགས། ལྷག་དོན་མཐོ་སློབ་ཀྱི་སློབ་ཕྲུག་ཀུན་ལ་ཁོང་འཛིན་གྲྭ་མང་པོ་ཆད་མྱོང་མཁན་ཞིག་དེ་རིང་བོད་ཀྱི་སྲིད་སྐྱོང་ཆགས་ཐུབ་ཀྱི་ཡོད་སྟབས། ད་ལྟ་སློབ་སྦྱོང་གནང་བཞིན་པའི་ཁྱེད་ཅག་ལ་རེ་བ་ཆེ་བ་རང་བཞིན་སླེབས་ཀྱི་འདུག དེས་ན་འཛིན་གྲྭ་ཆད་རྒྱུ་མེད་པ་དང་རང་ངོས་ནས་དཀའ་ལས་རྒྱག་དགོས་རྒྱུ་ཤིན་ཏུ་ནས་གལ་ཆེ་ཡིན་པའི་ལམ་སྟོན་གནང་འདུག ད་དུང་སྲིད་སྐྱོང་བློ་བཟང་སེང་གེ་མཆོག་གིས་དེ་རིང་སང་ཉིན་རྒྱལ་སྤྱིའི་འགྱུར་འགྲོས་སྤྱི་དང་དེའི་ནང་ནས་རྒྱ་གར་དང་རྒྱ་ནག་ནང་ཡར་རྒྱས་སྐོར་དང་། ལྷག་པར་དུ་རྒྱལ་སྤྱིའི་སྤྱི་ཚོགས་ནས་རྒྱ་གར་ལ་རེ་ལྟོས་བྱེད་བཞིན་པའི་དུས་མཚམས་འདིར་ང་ཚོས་རྒྱ་གར་རང་བཙན་ཐོབ་ནས་ད་བར་གྱི་ལོ་ ༧༠ འདིའི་ནང་གཅིག་པུར་མ་ལྟ་བར། རྒྱ་ཆེ་ས་དང་ཁྱབ་ཆེ་ས་ནས་འདས་པའི་ལོ་ངོ་བརྒྱ་ཕྲག་དང་སྟོང་ཕྲག་གོང་གི་རྒྱ་གར་སྟོབས་ཆེན་རྒྱལ་ཁབ་དེའི་གནའ་བོའི་རྒྱལ་རབས་དང་རིག་གཞུང་། དེའི་ནང་ནས་དཔལ་ནཱ་ལེནྡྲའི་ཆོས་བརྒྱུད་འདི་ནི་རྒྱ་གར་གྱི་ངོས་ནས་འཛམ་གླིང་འདིའི་ཐོག་ལེགས་སྐྱེས་གཙོ་གྲས་ཤིག་ཆགས་ཀྱི་ཡོད་པ་དེའི་ཐོག་དགོངས་པ་བཞེས་ཏེ་རྒྱ་གར་གྱིས་འཛམ་གླིང་འགོ་ཁྲིད་ཐུབ་པའི་ཕྱོགས་སུ་འབད་བརྩོན་གནང་དགོས་གལ་ཡིན་པ་སོགས་གསུང་བཤད་གནང་འདུག གཞི་རྩའི་ལྡི་ལིའི་ Hansraj མཐོ་རིམ་སློབ་གཉེར་ཁང་དེའི་ནང་ཚན་རིག་དང་ཚོང་རིག དེ་བཞིན་འབྱུང་རིག་སོགས་ཀྱི་མཐོ་རིམ་སློབ་སྦྱོང་གནང་རྒྱུ་ཡོད་པ་ལྟར། ད་བར་ལྟེ་གནས་ཁང་དེ་ནས་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཆེན་ Shah Rukh Khan དང་ཚོང་པ་འབྱོར་ལྡན་ Naveen Jindal སོགས་རྒྱ་གར་དང་རྒྱལ་སྤྱིའི་ཐོག་སྙན་གྲགས་ཡོད་པའི་མི་སྣ་མང་དག་ཐོན་འདུག

དེ་རིང་ཟླ་ ༧ ཚེས་ ༢༦ ཉིན་སྔ་དྲོ་ཚོུད་ ༧།༠༠ སྟེང་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱི་སྐུ་ཕུང་རྡ་སར་རྟེན་གཞི་བྱས་པའི་ལྷ་རྒྱལ་རིའི་མདུན་ཐང་དུ་གདན་ཞུས་ཀྱིས་དམ་པ་དེ་ཉིད་ཀྱི་ཕ་མ་གཉིས་དང་སྤུན་མཆེད་ལྷན་རྒྱས། དབུས་བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་མཆོག དཔལ་འབྱོར་བཀའ་བློན་མཆོག་དང་ནང་སྲིད་བཀའ་བློན་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་མཆོག་གིས་དབུས་སྤྱི་འཐུས་རྒྱུན་ལས་རྣམ་པ་དང་སྤྱི་འཐུས་ཁག་གཅིག བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་རྣམ་པ། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚོགས་གཞོན་གྱིས་གཙོས་རྒྱུན་ལས་རྣམ་པ། གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་ཚོགས་གཞོན་དབུས་པའི་ལས་བྱེད་རྣམ་པ། དེ་བཞིན་རྡ་སར་གཉུག་མར་གནས་པ་དང་གློ་བུར་དུ་ལྷགས་པ་སེར་སྐྱ་མང་ཚོགས་བཅས་ནས་ཚོར་ཤུགས་ཆེན་པོས་དམ་པ་ཁོང་ལ་གདུང་སེམས་མཉམ་བསྐྱེད་དང་ཁོང་གི་བློས་བཏང་ལ་ཆེ་བསྟོད་ཀྱི་མཛད་སྒོ་ཚོགས་ཡོད་པ་རེད། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས་གསུང་བཤད་གནང་དོན། བསྟན་འཛིན་ཆོས་དབྱིངས་ལགས་ཀྱིས་འདས་པའི་ལོ་དུས་ནང་ལ་སྤྱི་ཚོགས་ཞབས་ཞུ་དང་ཆབ་སྲིད་ཀྱི་ལས་འགུལ་འདྲ་མིན་ནང་མཉམ་ཞུགས་གནང་པ་མ་ཟད། བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་དང་འབྲེལ་བའི་སྒེར་གྱི་སྙན་རྩོམ་འདྲ་མིན་སྤེལ་ཡོད་པ་སོགས་ངོ་སྤྲོད་དང་འབྲེལ། དམ་པ་ཁོང་ནས་མཐར་བོད་རྒྱལ་ཁབ་དང་མི་རིགས་ཀྱི་བདེ་དོན་སླད་དུ་བློས་བཏང་གནང་པའི་སྙིང་སྟོབས་ལ་ཡི་རངས་དང་གདུང་སེམས་མཉམ་བསྐྱེད་ཞུས་སོང་།  ད་དུང་ཁོང་གིས་བསྟན་འཛིན་ཆོས་དབྱིངས་ལགས་ཀྱིས་གཙོས་པའི་བོད་མི་ཚོས་ད་བར་རང་ལུས་མེར་སྲེག་གནང་དགོས་པའི་རྒྱུ་མཚན་གཙོ་བོ་ནི་རྒྱ་གཞུང་གིས་བོད་དུ་བཙན་འཛུལ་བྱས་པ་ཙམ་མ་ཟད། བོད་མིའི་གཞི་རྩའི་རང་དབང་བརྩི་མེད་རྡོག་རོལ་གཏོང་བཞིན་པའི་གནས་སྟངས་ལ་ཐུག་ཡོད་ཅེས་གསུངས་ཡོད། ལྷག་དོན་རྒྱ་གཞུང་གི་འགོ་ཁྲིད་ཚོས་རྒྱ་ནག་གི་མ་འོངས་ཕུགས་བསམ་ཐོག་ལ་བསམ་བློ་ཞིག་གཏང་ཚེ་བོད་ཀྱི་གནད་དོན་ཐོག་ངེས་པར་དུ་དགོངས་བཞེས་གནང་དགོས་པ་དང་། རྒྱལ་ཚོགས་ཀྱི་ཚོགས་མི་རྒྱལ་ཁབ་རྣམས་ནས་བོད་དང་རྒྱ་ནག་གི་གནད་དོན་ཐོག་མིག་ལོང་བ་ལྟར་བཞུགས་ན་ཚོགས་པ་དེ་ཐོག་མར་གསར་འཛུགས་གནང་པའི་དགོངས་དམིགས་དང་ཡོངས་སུ་འགལ་གྱི་ཡོད་པ་ནན་བརྗོད་གནང་སོང་། སྐབས་དེར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་བཟུང་གི་སྲིད་བྱུས་རྣམས་མུ་མཐུད་གནས་བཞིན་ཡོད་སྟབས། བོད་ཕྱི་ནང་གཉིས་སུ་བཞུགས་པའི་བོད་མི་ཚོས་རྒྱ་གཞུང་གི་སྲིད་བྱུས་ལ་མ་བཟོད་པར་རང་ལུས་མེར་སྲེག་གནང་བཞིན་ཡོད་པ་འགྲེལ་བརྗོད་དང་འབྲེལ། བསྟན་འཛིན་ཆོས་དབྱིངས་ལགས་དམ་པའི་རང་སྲེག་ཀྱི་གནད་དོན་འདིའི་བརྒྱུད་རྒྱལ་སྤྱི་ཁྱོན་དང་རྒྱ་གཞུང་ལ་བརྡ་ལན་གསལ་པོ་ཞིག་སྤྲོད་ཐུབ་པའི་ཡིད་ཆེས་ཡོད་ཅེས་གསུངས་སོང་། བོད་ཀྱི་འཐབ་རྩོད་འདི་ནི་མི་རིགས་ཀྱི་འཐབ་རྩོད་ཅིག་ཡིན་པས་བོད་རིགས་མང་ཚོགས་ཚོས་དམ་པ་ཁོང་གི་ཞལ་ཆེམས་ནང་འཁོད་པ་ལྟར་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཐད་ནུས་པ་སྔར་ལྷག་སྤུངས་དགོས་པའི་སྐུལ་མ་གནང་སོང་། དེ་བཞིན་སྐབས་དེར་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱི་ཕ་ངག་དབང་ལགས་ཀྱིས་བོད་མི་ཁྱོན་ཡོངས་ཀྱིས་གདུང་ཤུགས་དྲག་པོས་བུས་བོད་ཀྱི་རྩ་དོན་ཆེད་བློས་བཏང་བྱས་པར་ཆེ་བསྟོད་ཀྱི་གུས་བརྩི་དང་གདུང་སེམས་མཉམ་བསྐྱེད་ཞུས་པར་བཀའ་དྲིན་ཆེ་ཞུས་པ་དང་སྦྲགས། བོད་མི་རིགས་ཀྱི་འཐབ་རྩོད་འདི་མུ་མཐུད་རྒྱུན་གནས་ཐུབ་པ་ཞིག་དགོས་ཀྱི་ཡོད་སྟབས། བོད་པའི་ན་གཞོན་ཚོས་རང་ལུས་མེར་སྲེག་མི་གནང་བར་སྨན་པའི་ཐབས་ལམ་གཞན་བརྒྱུད་བོད་ཀྱི་རྩ་དོན་རྩོད་དགོས་པའི་འབོད་སྐུལ་ཡང་གནང་ཡོད་པ་རེད། དེ་རྗེས་རྒྱལ་གཅེས་པ་ཁོང་གི་སྐུ་ཕུང་ལ་མཛད་གཙོ་རྣམ་པ་དང་མང་ཚོགས་ནས་རིམ་བཞིན་མཇལ་དར་སྒྲོན་ཟིན་རྗེས། མང་ཚོགས་ནས་བྱང་ཆུབ་སེམས་མཆོག་རིན་པོ་ཆེ་གསུང་བཞིན་བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱི་སྐུ་ཕུང་ཞུགས་འབུལ་ཆེད་དུར་ཁྲོད་དུ་གདན་ཞུས་ཀྱིས་བསྔོ་སྨོན་གསུང་དོན་དང་བཅས་རྒྱལ་གཅེས་པ་ཁོང་གི་སྐུ་ཕུང་གཞི་བརྗིད་ལྡན་པའི་ངང་ཞུགས་འབུལ་གནང་ཡོད་པ་རེད། གཞི་རྩའི་བསྟན་འཛིན་ཆོས་དབྱིངས་ལགས་ནི་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ནང་གནས་སྡོད་ཕ་མཁས་གྲུབ་ལགས་དང་མ་བཀྲིས་དབྱངས་འཛོམས་ལགས་གཉིས་ཀྱི་བུ་ཡིན་ཞིང་། ད་ལྟ་རང་ལོ་ ༡༩ སོན་ཡོད་པ་དང་ཝཱར་ཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་དབུ་མ་གོང་མ་ལོ་རིམ་དང་པོའི་ནང་སློབ་སྦྱོང་གནང་མུས་ཡིན་པ་མ་ཟད། ཁོང་གིས་ཟླ་ ༧ ཚེས་ ༡༤ ཉིན་སྔ་ཐོག་ཝཱ་རཱ་ཎ་སཱི་བོད་ཀྱི་གཙུག་ལག་སློབ་ཁང་དུ་རང་ལུས་མེར་བསྲེགས་གནང་རྗེས་ཁུལ་དེར་རྟེན་གཞི་བྱས་པའི་ཧི་རེ་ཊེཇ་སྨན་ཁང་དུ་ཉིན་གྲངས་དྲུག་ཙམ་རིང་ལ་སྨན་བཅོས་གནང་ཡོད་ཀྱང་། ཁོང་གི་གཟུགས་གཟིའི་གནས་སྟངས་རིམ་བཞིན་ཛ་དྲག་ཏུ་གྱུར་བར་བརྟེན་ཚེས་ ༢༠ ཉིན་ཛ་དྲག་གི་ནད་པ་བོར་འདྲེན་བྱ་རྒྱུའི་དམིགས་བསལ་མཁའ་ལམ་གནམ་གྲུ་བརྒྱུད་རྒྱལ་ས་ལྡི་ལིར་རྟེན་གཞི་བྱས་པའི་སཧྥ་དར་ཇངྒ་སྨན་ཁང་དུ་འཁྱེར་ནས་སྨན་བཅོས་ཞུས་ཡོད་ཀྱང་། ཁོང་གི་ལུས་པོ་བརྒྱ་ཆ་དགུ་བཅུ་ལྷག་ལ་འཚིག་སྐྱོན་བྱུང་པས་སྨན་བཅོས་ཇི་ལྟར་ཞུས་ནའང་ཕན་འབྲས་མ་སོན་པར་ཚེས་ ༢༢ ཉིན་ཕྱི་དྲོ་ཚོུད་ ༤།༥༠ སྟེང་སྐུ་ཚེ་མ་ཟིན་པར་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བྱུང་ཡོད་པ་རེད། འདི་ག་རླུང་འཕྲིན་ཁང་གིས་མང་ཚོགས་ཁྲོད་ལ་བཅར་འདྲི་ཁག་ཅིག་ཞུས་པར། མང་ཚོགས་ནས་ད་ལན་དམ་པ་ཁོང་གིས་རང་ལུས་མེར་སྲེག་གནང་པར་ཡི་རངས་བསྔགས་བརྗོད་ཀྱི་གུས་བརྩི་དང་གདུང་སེམས་མཉམ་བསྐྱེད་ཡོད་ཅེས་གསུངས་པ་དང་འབྲེལ། ཁོང་རྣམས་ནས་ཚོར་ཤུགས་ཆེན་པོས་བོད་ཀྱི་གཞོན་སྐྱེས་ཚོས་མ་འོངས་པར་རང་ལུས་མེར་སྲེག་མིན་པར་ཤེས་ཡོན་གཙོས་པའི་ཐབས་ལམ་གཞན་བརྒྱུད་བོད་ཀྱི་རྩ་དོན་རྩོད་དགོས་པའི་འབོད་སྐུལ་ཡང་གནང་གི་འདུག  

དེ་རིང་ཟླ་ ༧ ཚེས་ ༢༥ ཉིན་སྔ་དྲོ་བཞུགས་སྒར་རྡ་སར་བོད་མི་ ཚོས་ཆར་ཤུགས་དྲག་པོའི་ཁྲོད་རྒྱལ་གཅེས་པ་བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱིས་བོད་བསྟན་སྲིད་ཆེད་རང་ལུས་མེར་སྲེག་གནང་བར་གུས་འདུད་དང་གདུང་སེམས་མཉམ་བསྐྱེད་ཞུ་ཕྱིར་ཁོང་གི་སྐུ་ཕུང་གཟི་བརྗིད་དང་ལྡན་པའི་ངང་རྡ་ས་བོད་ཀྱི་གཞོན་ནུ་ལྷན་ཚོགས་ཀྱི་ཡིག་ཚང་དུ་གདན་ཞུ་གནང་ཡོད་པ་དང་། སྐབས་དེར་དམ་པ་དེ་ཉིད་ཀྱི་ཕ་ངག་དབང་ལགས་ཀྱིས་གསར་འགོད་ལྷན་ཚོགས་ཐོག་རང་ཉིད་ཀྱི་བུས་རྒྱལ་ཁབ་དང་མི་རིགས་ཀྱི་ཆེད་དུ་བློས་བཏང་གནང་པ་དེར་ཕ་ཞིག་གི་ངོས་ནས་གཟི་བརྗིད་དང་སྤོབས་པ་ཞིག་ཏུ་ངོས་འཛིན་ཞུ་བཞིན་ཡོད་ཀྱང་། མ་འོངས་པར་བོད་པའི་ན་གཞོན་ཚོས་རང་ལུས་མེར་སྲེག་མི་གནང་བར་ཤེས་ཡོན་སོགས་ཐབས་ལམ་གཞན་གྱི་སྒོ་ནས་བོད་ཀྱི་རྩ་དོན་རྩོད་དགོས་པའི་འབོད་སྐུལ་ཤུགས་ཆེ་གནང་སོང་། དེ་ཡང་བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱིས་ཟླ་ ༧ ཚེས་ ༡༤ ཉིན་སྔ་ཐོག་ཝཱ་རཱ་ཎ་སཱི་བོད་ཀྱི་གཙུག་ལག་སློབ་ཁང་དུ་རང་ལུས་མེར་བསྲེགས་གནང་རྗེས་ཁུལ་དེར་རྟེན་གཞི་བྱས་པའི་ Heritage སྨན་ཁང་དུ་ཉིན་གྲངས་དྲུག་ཙམ་རིང་ལ་སྨན་བཅོས་གནང་ཡོད་ཀྱང་། ཁོང་གི་གཟུགས་གཟིའི་གནས་སྟངས་རིམ་བཞིན་ཛ་དྲག་ཏུ་གྱུར་བར་བརྟེན་ཚེས་ ༢༠ ཉིན་ཛ་དྲག་གི་ནད་པ་བོར་འདྲེན་བྱ་རྒྱུའི་དམིགས་བསལ་མཁའ་ལམ་གནམ་གྲུ་བརྒྱུད་རྒྱལ་ས་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་འཁྱེར་ནས་ཛ་དྲག་ལྟ་སྐྱོང་ཁང་དུ་སྨན་པས་མྱུར་སྐྱོབ་ཞུས་ཡོད་པ་རེད། འོན་ཀྱང་ཁོང་གི་ལུས་པོ་བརྒྱ་ཆ་དགུ་བཅུ་ལྷག་ལ་འཚིག་སྐྱོན་བྱུང་པས་སྨན་བཅོས་ཇི་ལྟར་ཞུས་ནའང་ཕན་འབྲས་མ་སོན་པར་ཚེས་ ༢༢ ཉིན་ཕྱི་དྲོ་ཚོུད་ ༤།༥༠ ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་རྗེས། ཁ་སང་ཟླ་འདིའི་ཚེས་ ༢༤ ཉིན་རྒྱ་གར་གྱི་རྒྱལ་ས་ལྡི་ལི་ནས་གདན་ཞུ་གནང་བ་ལྟར། དེ་རིང་ཚེས་ ༢༥ ཉིན་སྔ་དྲོ་ཚོུད་ ༨།༣༠ ཐོག་སྐུ་ཕུང་གདན་ཞུ་བ་ཚོས་སྦག་སྦག་དང། རླངས་འཁོར་སོགས་ཀྱི་སྟེང་བོད་ཀྱི་རྒྱལ་དར་དང་། བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱི་ཞལ་ཆེམས། སྐུ་པར་བཅས་སྒྲེང་འཛུགས་ཀྱིས་གདན་ཞུ་གནང་པ་མ་ཟད། བཞུགས་སྒར་རྡ་སའི་ས་གནས་མང་ཚགས་དང་ཕྱོགས་མཐའ་ཁག་ནས་ཕེབས་པའི་མང་ཚོགས་ཀུན་གྱིས་སེར་བང་སྒྲིག་ནས་གུས་བརྩི་དང་གདུང་སེམས་མཉམ་བསྐྱེད་ཀྱིས་ཕེབས་བསུ་གཟབ་རྒྱས་ཞུས་ཡོད། རྩ་བའི་དེ་རིང་སྔ་དྲོ་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཡིག་ཚང་དུ་དམ་པ་དེ་ཉིད་ཀྱི་ཕ་མ་སྤུན་མཆེད་རྣམས་ལྷན་འཛོམས་ཐོག་མ་སྒྲོལ་མ་དབྱངས་འཛོམས་ལགས་ཀྱིས་དམ་པ་ཁོང་གི་རྣམ་ཀུན་གཤིས་སྤྱོད་ཇི་ཡོད་ངོ་སྤྲོད་གནང་པ་ལས་སྤྱི་དོན་ལ་ལྷག་བསམ་དང་དེ་ལྟར་ཞུ་རྒྱུར་དགའ་པོ་ཡོད་པ་དང་། རང་ལུས་མེར་སྲེག་མ་གནང་གོང་གི་གནད་དོན་ཁག་ཅིག་དྲན་གསོ་དང་འབྲེལ། དམ་པ་ཁོང་གི་ངོས་ནས་འཆར་གཞི་དང་ལྡན་པའི་ཐོག་བོད་དོན་ཆེད་རང་ལུས་མེར་སྲེག་གནང་པ་ཞིག་ཡིན་པ་མངོན་གསལ་གནང་སོང་། བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱི་སྐུ་ཕུང་རྡ་ས་དབུས་བོད་ཀྱི་གཞོན་ནུ་ལྷན་ཚོགས་སུ་བཞག་ཡོད་པ་དང། དགེ་འདུན་པ་དང་བཙུན་མ་ཚོས་བསྔོ་སྨོན་གསུང་འདོན་གནང་མུས་ཡིན་པ་མ་ཟད། མང་ཚོགས་ནས་རེ་མོས་ཀྱིས་སྐུ་ཕུང་ལ་མཇལ་དར་སྒྲོན་ཡོད་པ་རེད། སང་ཉིན་ཚེས་ ༢༦ ཉིན་གྱི་སྔ་དྲོ་ཚོུད་ ༧།༠༠ སྟེང་ལྷ་རྒྱལ་རིར་རྡ་སར་གཉུག་མར་གནས་པ་དང་གློ་བུར་དུ་ལྷགས་པ་ཀུན་ཚང་འཛོམས་ཐོག་གདུང་སེམས་མཉམ་བསྐྱེད་ཀྱི་མཛད་སྒོ་ཞིག་ཚོགས་རྒྱུ་དང་། དེ་རྗེས་སྐུ་ཕུང་ཞུགས་འབུལ་གནང་རྒྱུ་ཡིན་པ་རེད།

ཝཱ་རཱ་ཎ་སཱི་བོད་ཀྱི་གཙུག་ལག་སློབ་ཁང་དུ་ཟླ་བ་འདིའི་ཚེས་ ༡༤ ཉིན་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱིས་རང་ལུས་མེར་བསྲེགས་གནང་ཡོད་པ་དང་། ཚེས་ ༢༢ ཉིན་རྒྱལ་ས་ལྡིའི་ Safdarjung སྨན་ཁང་དུ་སྐུ་འདས་གྲོངས་སུ་གྱུར་སྟབས་ཁོང་གི་སྐུ་ཕུང་བཞུགས་སྒར་དུ་གནད་ཞུ་གནང་ཐོག་གནངས་ཉིན་སྔ་དྲོ་བཞུགས་སྒར་དུ་ཞུགས་འབུལ་གནང་རྒྱུ་རེད་འདུག རྩ་བའི་བསྟན་འཛིན་ཆོས་དབྱིངས་ལགས་ཀྱིས་ཟླ་ ༧ ཚེས་ ༡༤ ཉིན་སྔ་ཐོག་ཝཱ་རཱ་ཎ་སཱི་བོད་ཀྱི་གཙུག་ལག་སློབ་ཁང་དུ་རང་ལུས་མེར་བསྲེགས་གནང་རྗེས་ཁུལ་དེར་རྟེན་གཞི་བྱས་པའི་ Heritage སྨན་ཁང་དུ་ཉིན་གྲངས་དྲུག་ཙམ་རིང་ལ་སྨན་བཅོས་གནང་ཡོད་ཀྱང་། ཁོང་གི་གཟུགས་གཟིའི་གནས་སྟངས་རིམ་བཞིན་ཛ་དྲག་ཏུ་གྱུར་བར་བརྟེན་ཚེས་ ༢༠ ཉིན་ཛ་དྲག་གི་ནད་པ་བོར་འདྲེན་བྱ་རྒྱུའི་དམིགས་བསལ་མཁའ་ལམ་གནམ་གྲུ་བརྒྱུད་རྒྱལ་ས་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་འཁྱེར་ནས་སྨན་བཅོས་ཞུས་ཡོད་པ་རེད། འོན་ཀྱང་ཁོང་གི་ལུས་པོ་བརྒྱ་ཆ་དགུ་བཅུ་ལྷག་ལ་འཚིག་སྐྱོན་བྱུང་པས་སྨན་བཅོས་ཇི་ལྟར་ཞུས་ནའང་ཕན་འབྲས་མ་སོན་པར་ཚེས་ ༢༢ ཉིན་ཕྱི་དྲོ་ཚོུད་ ༤།༥༠ སྟེང་སྐུ་ཚེ་མ་ཟིན་པར་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བྱུང་ཡོད་པ་རེད། ཁ་སང་རྒྱལ་གཅེས་པ་ཁོང་གི་ཕ་མ་རྣམ་པའི་རེ་སྐུལ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྐང་འགན་བཞེས་ཐོག་ཁོང་གི་སྐུ་ཕུང་སཕྡར་ཇངྒ་སྨན་ཁང་ནས་ལྡི་ལི་བོད་མིའི་གཞིས་སྒར་བསམ་ཡས་གླིང་དུ་གནད་ཞུ་གནང་ཡོད་པ་དང་། སྐབས་དེར་གཉུག་མར་གནས་པ་དང་གློ་བུར་དུ་ལྷགས་པ་རྣམས་ནས་དམ་པ་ཁོང་ལ་མྱ་ངན་གུས་འདུད་ཞུ་ཕྱིར་སྐུ་ཕུང་ལ་མཇལ་དར་སྒྲོན་འབུལ་དང་བསྔོ་སྨོན་གསུང་འདོན་སོགས་གནང་ཡོད་པ་རེད། དེ་རིང་ཚེས་ ༢༤ ཉིན་སྔ་དྲོ་དམ་པ་ཁོང་གི་སྐུ་ཕུང་ལྡི་ལི་བསམ་ཡས་གླིང་བོད་མིའི་གཞིས་སྒར་ནས་བཞུགས་སྒར་དུ་གདན་ཞུ་གནང་ཡོད་པ་དང་། སང་ཚེས་ ༢༥ ཉིན་སྔ་ཐོག་ཚོུད་ ༨།༠༠ ཙམ་ལ་བཞུགས་སྒར་དུ་འབྱོར་གྱི་ཡོད་པ་རེད། སྐབས་དེར་གཙོ་བོ་དམ་པ་ཁོང་གི་སྐུ་ཕུང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཡིག་ཚང་དུ་གདན་ཞུ་ཐོག་ཞབས་རིམ་ཁག་གསོག་སྒྲུབ་ཞུ་རྒྱུ་དང་། མང་ཚོགས་རྣམས་ལ་རྗེས་དྲན་གྱི་མཇལ་དར་སྒྲོན་འབུལ་ཞུ་ཕྱིར་བཞག་གནང་རྒྱུ། གནངས་ཚེས་ ༢༦ སྟེ་རེས་གཟའ་ལྷག་པའི་སྔ་དྲོ་རྒྱལ་གཅེས་པ་བསྟན་འཛིན་ཆོས་དབྱིངས་ལགས་དམ་པ་དེ་ཉིད་ཀྱི་སྐུ་ཕུང་ཞུགས་འབུལ་གནང་རྒྱུ་ཡིན་པ་རེད། ཁ་སང་ཚེས་ ༢༣ ཉིན་ལྡི་ལི་བོད་མིའི་གཞིས་སྒར་བསམ་ཡས་གླིང་དུ་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས་མང་ཚོགས་རྣམས་འདུ་འཛོམས་སར་དམ་པ་ཁོང་ལ་མྱ་ངན་གུས་འདུད་ཞུས་པ་དང་སྦྲགས། རྒྱ་གཞུང་གི་འགོ་ཁྲིད་ཚོས་རྒྱ་ནག་གི་མ་འོངས་ཕུགས་བསམ་ཐོག་ལ་བསམ་བློ་ཞིག་གཏང་ཚེ་བོད་ཀྱི་གནད་དོན་ཐོག་ངེས་པར་དུ་དགོངས་བཞེས་གནང་དགོས་པ་དང་། རྒྱལ་ཚོགས་ཀྱི་ཚོགས་མི་རྒྱལ་ཁབ་རྣམས་ནས་བོད་དང་རྒྱ་ནག་གི་གནད་དོན་ཐོག་མིག་ལོང་བ་ལྟར་བཞུགས་ན་ཚོགས་པ་དེ་ཐོག་མར་གསར་འཛུགས་གནང་པའི་དགོངས་དམིགས་དང་ཡོངས་སུ་འགལ་གྱི་ཡོད་པ་ནན་བརྗོད་གནང་འདུག རྒྱལ་གཅེས་པ་བསྟན་འཛིན་ཆོས་དབྱིངས་ལགས་སྐུ་འདས་གྲོངས་སུ་གྱུར་བའི་སྐབས་དེར་འདི་ག་རླུང་འཕྲིན་ཁང་ནས་དམ་པ་ཁོང་གི་ཕ་ངག་དབང་ལགས་སུ་བཅར་འདྲི་ཞུས་པར་ཁོང་གིས་རང་ཉིད་ཀྱི་བུས་རྒྱལ་ཁབ་དང་མི་རིགས་ཀྱི་ཆེད་དུ་བློས་བཏང་གནང་པ་དེར་ཕ་ཞིག་གི་ངོས་ནས་གཟི་བརྗིད་དང་སྤོབས་པ་ཞིག་ཏུ་ངོས་འཛིན་ཞུ་ཡི་ཡོད་པ་གསུངས་ཡོད། གཞི་རྩའི་རང་ལོ་ ༡༩ སོན་པའི་སློབ་མ་བསྟན་འཛིན་ཆོས་དབྱིངས་ལགས་དམ་པས་ཟླ་ ༧ ཚེས་ ༡༤ ཉིན་ཝཱར་ཎ་དབུས་བོད་ཀྱི་གཙུག་ལག་ཁང་དུ་བོད་དོན་ཆེད་རང་ལུས་མེར་བསྲེགས་གནང་ཡོད་པ་དང་། ཚེས་ ༢༢ ཉིན་སྐུ་ཚེ་མ་ཟིན་པར་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་མ་ཐག་བོད་མི་གནས་ཡུལ་རྒྱ་གར་གྱི་རྒྱལ་ས་ལྡི་ལི་གཙོས་པའི་ས་གནས་ཁག་གི་ཚོགས་སྐྱིད་ཚོས་གོ་སྒྲིག་ཐོག་དམ་པ་ཁོང་ལ་གདུང་སེམས་མཉམ་བསྐྱེད་ཀྱི་མཆོད་འབུལ་སྨོན་ལམ་གསུང་འདོན་རྒྱ་ཆེ་གནང་པ་མ་ཟད། ལྷག་པར་ཨ་རིའི་ནིའུ་ཡོག་དང་ནིའུ་ཇར་སི་ས་གནས་གཞོན་ནུ་ལྷན་ཚོགས་ཀྱིས་གོ་སྒྲོག་འོག་དམ་ཁོང་ལ་མྱ་ངན་གུས་འདུད་དང་ཐུགས་སྨོན་སོགས་གནང་པ་དང་འདི་བཞིན་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་ངོ་རྒོལ་སྐད་འབོད་ཀྱང་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ལ་དྭགས་རྒྱལ་ས་གླེ་ནས་གསར་དུ་འདེམས་ཐོན་བྱུང་བའི་རྒྱ་གར་གྱི་སྲིད་འཛིན་ ༡༤ པ་སྐུ་ཞབས་རཱམ་ནཱཐ་ཀོ་བིཾད་མཆོག་ལ་དགའ་བསུའི་འཚམས་འདྲི་བསྩལ་བ་དང་ཆབས་ཅིག རྒྱ་གར་གཞུང་མང་གཉིས་ནི་བོད་མིར་བཀྲིན་ཆེན་པོ་ཡིན་པའི་གསུང་འཕྲིན་ཞིག་གནང་འདུག མགོན་པོ་མཆོག་གིས་འཚམས་འཕྲིན་དེའི་ཐོག་ནས་སྲིད་འཛིན་སྐུ་ཞབས་ Ram Nath Kovind མཆོག་ལ་འདི་ལོ་བོད་མི་རྣམས་རྒྱ་གར་ནང་བཙན་བྱོལ་བྱས་ནས་ལོ་ ༥༨ ཆགས་ཀྱི་ཡོད་པ་དང་། དུས་ཡུན་འདིའི་རིང་ལ་རྒྱ་གར་གཞུང་མང་གཉིས་བོད་མི་རྣམས་ལ་བརྩེ་བ་ཆེན་པོས་གཟིགས་སྐྱོང་དང་བོད་མི་འབུམ་གཅིག་ལྷག་ཙམ་ཡོད་པ་རྣམས་མུ་མཐུད་གནས་ཚང་གཡར་གནང་བཞིན་ཡོད་སྟབས། རྒྱ་གར་ནི་བོད་མི་རྣམས་ལ་ཧ་ཅང་གི་བཀྲིན་ཆེན་པོ་ཡིན་པ་བཀའ་གནང་འདུག ཁྱད་པར་དུ་མགོན་པོ་༸གང་ཉིད་མཆོག་ལྟ་བུ་ལ་ཆ་མཚོན་ན་རྒྱ་གར་གྱི་འབྲས་དང་། སྲན་མ། བག་ལེབ་བཅས་ལ་བརྟེན་ནས་ཕྱི་ལུས་པོ་འཚོ་བཞིན་ཡོད་པ་དང་། དེ་བཞིན་༸གང་ཉིད་མཆོག་གི་ནང་བསམ་བློའི་ཡོན་ཏན་དེ་དག་༸དཔལ་ནཱ་ལེནྡྲའི་ནང་པའི་རིག་གཞུང་ལ་བརྟེན་ནས་བྱུང་ཡོད་སྟབས། ༸སྐུ་ཉིད་མཆོག་ནས་རྒྱ་གར་རྒྱལ་ཁབ་ཆེན་པོ་འདི་ལ་དོན་དམ་གྱི་འབྲེལ་བ་དམིགས་བསལ་བ་ཞིག་དང་རྒྱལ་ཁབ་ཀྱི་བདེ་དོན་སླད་ཡང་ཡང་སེམས་ཚོར་ཡོང་གི་ཡོད་པ་བཀའ་གནང་འདུག ད་དུང་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་དེའི་ནང་། སྲིད་འཛིན་མཆོག་ལ་མགོན་པོ་༸གང་ཉིད་མཆོག་ནས་འཛམ་གླིང་ཆོས་ལུགས་མཐུན་སྒྲིལ་སོགས་༸སྐུའི་ཐུགས་བསྐྱེད་དམ་བཅའ་གསུམ་གྱི་ཐོག་ནས་འཛམ་གླིང་བྱམས་བརྩེ་ལྡན་པ་ཞིག་སྐྲུན་ཐབས་གནང་བཞིན་ཡོད་པ་བཀའ་གནང་པ་མ་ཟད། ཉེ་ལམ་ནས་མགོན་པོ་མཆོག་གིས་མཛད་འཁུར་བཞི་པ་སྟེ་རྒྱ་གར་གྱི་གནའ་བོའི་ཤེས་བྱ་བསྐྱར་གསོ་གནང་འགོ་ཚུགས་ཡོད་པ་དེ་ཡང་རྐང་ནང་སེམས་ཁམས་རིག་པའི་རྣམ་གཞག་སྐོར་ཆགས་ཀྱི་ཡོད་པ་བཀའ་གནང་འདུག ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་དུས་འདིར་དེང་དུས་ཤེས་ཡོན་དང་གནའ་བོའི་ཤེས་བྱ་ཟུང་འབྲེལ་ཐོག་ནས་ནང་སེམས་རྒྱུད་ཀྱི་བཟང་པོའི་རིན་ཐང་གོང་འཕེལ་དང་སེམས་རྒྱུད་འདུལ་རྒྱུའི་ནུས་པ་ཁྱད་པར་བ་དེ་རྒྱ་གར་ཁོ་ན་མ་གཏོགས་མེད་པ་གཟིགས་ཀྱི་ཡོད་པ་བཀའ་ནན་གནང་འདུག མགོན་པོ་མཆོག་གི་རྒྱ་གར་གྱི་སྲིད་འཛིན་གསར་པ་མཆོག་ལ་སྩལ་བའི་གསུང་འཕྲིན་དེའི་མཐའ་མཇུག་ཏུ། དེ་རིང་སང་ཉིན་རྒྱ་གར་དེ་བཞིན་ཡར་རྒྱས་དང་ནུས་སྟོབས་གོང་འཕེལ་འགྲོ་བཞིན་པའི་དུས་སྐབས་སུ་༸གང་ཉིད་མཆོག་སྤོབས་པ་སྐྱེས་གནང་གི་འདུག་ཅེས་དང་། ཡང་སྒོས་ཁྱད་དུ་མཚར་བའི་རྒྱ་གར་གྱི་མིག་དཔེ་འོས་པའི་ཆོས་ལུགས་མཐུན་སྒྲིལ་དང་བྱམས་རྙིང་རྗེ། དེ་བཞིན་འཚེ་མེད་ཞི་བའི་ཡོན་ཏན་དེ་དག་ལ་བརྟེན་ནས་དེང་སང་རྒྱལ་སྤྱིའི་སྤྱི་ཚོགས་ནས་རྒྱ་གར་གྱི་གལ་གནད་སྐོར་ལ་གོ་རྟོགས་སླེབས་མཚམས་སུ་མགོན་པོ་༸གང་ཉིད་མཆོག་དམིགས་བསལ་ཐུགས་དགྱེས་ཚོར་ཡོང་ཡོད་པ་མ་ཟད། རྒྱ་གར་གྱི་ངོས་ནས་སྤྱི་ཚོགས་དང་རྒྱལ་ཕྲན་གཞན་གྱི་བདེ་རྩའི་སླད་རང་གི་གནའ་བོའི་རིག་གཞུང་ཕྱུག་པོ་དེ་སྤྱོད་ནས་རོགས་ཕན་གནང་གལ་ཡིན་པའི་བསྔགས་བརྗོད་མཛད་པ་དང་ལྷན་ཅིག་ཏུ་སྐུ་ཞབས་ Ram Nath Kovind མཆོག་གིས་ད་བར་འདས་པའི་དུས་ཡུན་དེའི་ནང་དཀའ་སྡུག་འོག་ཚུད་པ་དང་དབུལ་ཕོངས་མང་པོར་རོགས་རམ་གནང་ཡོད་པའི་རླབས་ཆེན་གྱི་ཕྱག་ལས་ཁག་ལ་བསྔགས་བརྗོད་དང་། ཁོང་གིས་དབུ་ཁྲིད་འོག་རྒྱ་གར་དེ་བཞིན་འཛམ་གླིང་འགོ་ཁྲིད་ཐུབ་པའི་རྒྱལ་ཁབ་ཅིག་ཡོང་སླད་ཕྱོགས་གང་ཅིའི་ཐད་ནས་ནུས་པ་གོང་མཐོར་སྤེལ་གནང་རྒྱུར་ཡིད་ཆེས་གཏན་པོ་ཡོད་པ་སོགས་བཀའ་གནང་འདུག དུས་མཚུངས་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཀྱང་སྐུ་ཞབས་ Ram Nath Kovind མཆོག་ལ་བོད་གཞིས་བྱེས་མང་ཚོགས་ཀྱི་ཚབ་ཞུས་ནས་འཚམས་འདྲི་དང་ད་བར་བོད་དང་བོད་མིར་རྒྱབ་སྐྱོར་གནང་པར་ཐུགས་རྗེ་ཆེ་ཞུ་སོགས་གསུངས་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཐེངས་འདིར་སྐུ་ཞབས་རཱམ་ནཱཐ་ཀོ་བིཾད་མཆོག་ལ་སྲིད་འཛིན་འོས་བསྡུའི་ནང་ནས་ཚད་མཐོའི་རྒྱལ་ཁ་ཐོབ་པ་དེས་རྒྱ་གར་མི་མང་གིས་མང་གཙོའི་རིན་ཐང་དང་། ཆོས་ལུགས་མཐུན་སྒྲིལ། སྤྱི་ཚོགས་འཆམ་མཐུན་ངང་འཚོ་གནས་བྱ་རྒྱུའི་རིན་ཐང་དེ་དག་མུ་མཐུད་རྒྱུན་སྐྱོང་བྱེད་བཞིན་པ་གསལ་འདོན་གནང་ཡོད་པ་གསུངས་པ་དང་འབྲེལ། རྒྱ་གར་གནའ་རབས་ནས་དར་སྲོལ་ཡོད་པའི་ཆོས་ལུགས་མཐུན་སྒྲིལ་དང་སྤྱི་ཚོགས་འཆམ་མཐུན། བྱམས་སྙིང་རྗེ་གོང་འཕེལ་གཏོང་རྒྱུ་སོགས་མིག་དཔེར་འོས་པའི་རིག་གཞུང་བཟང་པོ་དེ་དག་རྒྱུན་འཛིན་གནང་མཁན་གྱི་སྣེ་ཁྲིད་ཞིག་ཏུ་གྱུར་ཐུབ་རྒྱུར་ང་ཚོས་རེ་བ་ཞུ་བཞིན་ཡོད་ཅེས་དང་། རྒྱ་གར་གཞུང་མང་གཉིས་ནི་བོད་མི་བཙན་བྱོལ་བ་རྣམས་ལ་བཀྲིན་ཆེན་པོ་ཡིན་པ་མ་ཟད། བོད་མིའི་འཐབ་རྩོད་ཀྱི་གཞི་རྟེན་ནི་རྒྱ་གར་གནའ་རབས་ཀྱི་སྲོལ་རྒྱུན་ལ་གཞི་བཅོལ་བ་ཞིག་ཡིན་སྟབས་ང་ཚོ་བོད་མི་ཚོས་དགའ་སྤོབས་སྐྱེ་གཞི་ཞིག་ཏུ་གྱུར་ཡོད་པ་སོགས་གསུངས་འདུག མཐའ་དོན་དུ་སྲིད་སྐྱོང་མཆོག་གིས་སྐུ་ཉིད་མཆོག་ལ་འབྱུང་འགྱུར་ལས་དོན་གང་ཅིའི་ཐོག་བྱ་བ་ལམ་ལྷོང་ཡོང་བའི་སྨོན་འདུན་ཡོད་པ་གསུངས་འདུག ཕྱོགས་མཚུངས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་བོད་གཞིས་བྱེས་གཉིས་ཀྱི་ངོ་ཚབ་ཞུས་ཏེ་འཚམས་འདྲི་དང་འབྲེལ། རྒྱ་གར་གཞུང་མང་གཉིས་ནི་བོད་མིའི་བདེ་དོན་གྱི་འཐབ་རྩོད་ཀྱི་གནད་དོན་གཙོས་ཕྱོགས་གང་ཅིའི་ཐད་ནས་རོགས་རམ་གནང་དང་གནང་མུས་ཡིན་པ་མ་ཟད། བོད་མིའི་ངོ་བོ་མཚོན་པའི་བོད་པའི་སྐད་ཡིག་དང་། རིག་གཞུང་། བཙན་བྱོལ་བོད་མིའི་སྒྲིག་འཛུགས་སོགས་གསར་འཛུགས་ཐུབ་ཐབས་བཅས་ལ་བཀྲིན་ཆེན་པོ་ཆགས་ཡོད་པ་གསུངས་འདུག དེ་བཞིན་ཚོགས་གཙོ་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་རྒྱ་གར་གྱི་སྲིད་འཛིན་དང་པོ་སྐུ་ཞབས་ Rajendra Prasad མཆོག་གིས་གཙོས་སྔ་ལོའི་ནང་སྲིད་འཛིན་ ༡༣ པ་སྐུ་ཞབས་ Pranab Mukherjee མཆོག་གི་བར་སྲིད་འཛིན་རིམ་ཕེབས་རྣམས་ལ་མཇལ་མོལ་མཛད་མྱོང་ཡོད་པ་གསལ་འདོན་གནང་ཡོད། སྐུ་ཞབས་རཱམ་ནཱཐ་ཀོ་བིཾད་མཆོག་གིས་དབུ་ཁྲིད་པའི་གཞུང་འཛིན་འོག་བོད་མིའི་བདེ་དོན་ཐོད་རྒྱབ་སྐྱོར་སྔར་ལྷག་གནང་སྐྱོང་ཡོང་བ་དང་། སྐུ་ཉིད་ཀྱི་སྲིད་འཛིན་གནང་རིང་ལ་རྒྱ་ནག་གཞུང་དང་༸གོང་ས་མཆོག་གི་༸སྐུ་ཚབ་དབར་འབྲེལ་མོས་བསྐྱར་གསོ་ཐུབ་པར་རེ་བ་ཞུ་བཞྀན་ཡོད་པ་གསུངས་འདུག མཐར་དོན་དུ་ཁོང་གིས་སྐུ་ཉིད་མཆོག་གི་གཞུང་འཛིན་ལས་ཡུན་རིང་ལ་ལས་དོན་གང་ཅིའི་ཐོག་བྱ་བ་ལམ་ལྷོང་ཡོང་བའི་སྨོན་འདུན་ཡོད་པ་གསུངས་འདུག གཞི་རྩའི་ཁ་སང་གསར་དུ་འདེམས་ཐོན་བྱུང་བའི་རྒྱ་གར་གྱི་སྲིད་འཛིན་ ༡༤ པ་སྐུ་ཞབས་ Ram Nath Kovind མཆོག་ནས་ཕྱི་ལོ་ ༢༠༡༥ ནས་བི་ཧཱར་མངའ་སྡེའི་སྲིད་སྐྱོང་གནང་ཡོད་པ་དང། དེའི་གོང་ལ་ཕྱི་ལོ་ ༡༩༩༤ ནས་ ༢༠༠༦ བར་ལ་རྒྱ་གར་གྲོས་ཚོགས་གོང་མའི་འཐུས་མི་སོགས་གཞུང་གི་མཛད་འཁུར་གཙོ་གནད་ཁག་ཅིག་བཞེས་གནང་ཡོད་པ་རེད།

ཉིན་ཤས་གོང་རང་ལུས་མེར་སྲེག་གནང་མཁན་ཝཱ་རཱ་ཎ་སཱི་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་མ་བསྟན་འཛིན་ཆོས་དབྱིངས་ལགས་ཀྱི་གཟུགས་གཞིའི་གནས་སྟངས་ཛ་དྲག ་ཆགས་ཡོད་པ་གསུངས་འདུག དེ་ཡང་བསྟན་འཛིན་ཆོས་དབྱིངས་ལགས་ཀྱིས་ཕྱི་ཚེས་ ༡༤ སྔ་ཐོག་ཝཱ་རཱ་ཎ་སཱི་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་རང་ལུས་མེར་སྲེག་གནང་རྗེས་ཁོང་གི་ལུས་པོ་བརྒྱ་ཆ་དྲུག་བཅུ་ལྷག་ལ་འཚིག་སྐྱོན་བྱུང་སྟབས། ཁུལ་དེར་རྟེན་གཞི་བྱས་པའི་ Heritage སྨན་ཁང་དུ་ཉི་གྲངས་དྲུག་ཙམ་རིང་ལ་སྨན་བཅོས་གནང་ཡོད་ཀྱང་། སྨན་ཁང་དེར་མེས་ཚིགས་པའི་ནད་པ་ལ་དམིགས་བསལ་གྱི་སྨན་བཅོས་མཐུན་རྐྱེན་མེད་སྟབས། ཁ་སང་བསྟན་འཛིན་ཆོས་དབྱིངས་ལགས་ཛ་དྲག་གི་ནད་པ་བོར་འདྲེན་བྱ་རྒྱུའི་དམིགས་བསལ་མཁའ་ལམ་གནམ་གྲུ་བརྒྱུད་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་འཁྱེར་དགོས་བྱུང་ཡོད་པ་རེད། འདི་ག་རླུང་འཕྲིན་ཁང་ནས་བསྟན་འཛིན་ཆོས་དབྱིངས་ལགས་དང་ལྷན་དུ་ཡོད་པའི་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་སུ་ཁོང་གི་གཟུགས་གཞིའི་གནས་སྟངས་སྐོར་བཅར་འདྲི་ཞུས་པར་ཁོང་གིས་བསྟན་འཛིན་ཆོས་དབྱིངས་ལགས་དེ་རིང་སྔ་ཐོག་ཕྱག་ཚོད་དགུ་པ་ཙམ་ནས་དབུགས་གཏོང་ལེན་གནང་སྐབས་དཀའ་ངལ་འཕྲད་བཞིན་ཡོད་པ་དང་། ད་ལྟའི་ཆར་ཁོང་ལྡི་ལིར་རྟེན་གཞི་བྱས་པའི་ Safdarjung སྨན་ཁང་གི་ ICU ཞེས་མྱུར་སྐྱོབ་སྨན་བཅོས་ཁང་དུ་སྨན་བཅོས་གནང་མུས་ཡིན་ཀྱང་། ཁོང་ལ་སྨན་བཅོས་གནང་མཁན་གྱི་ཆེད་ལས་སྨན་པས་བསྟན་འཛིན་ཆོས་དབྱིངས་ལགས་ཀྱི་གཟུགས་གཞིའི་གནས་སྟངས་ཆེས་ཛ་དྲག་ཆགས་ཡོད་པ་གསུངས་སོང་། གཞི་རྩའི་སློབ་མ་བསྟན་འཛིན་ཆོས་དབྱིངས་ལགས་ཀྱིས་ཟླ་ ༧ ཚེས་ ༡༤ ཉིན་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་བོད་དོན་ཆེད་རང་ལུས་མེར་སྲེག་གནང་ཡོད་པ་དང་། སྐབས་དེར་ཁོང་ནས་རང་ཉིད་ཀྱི་གྲོགས་པོ་ནོར་བུ་འམ་དངོས་མིང་ལ་དཀོན་མཆོག་མཐར་ཕྱིན་ལགས་ཀྱི་མཚན་ཐོག་ལ་ཞལ་ཆེམས་ཤིག་བཞག་པའི་ནང་། ངའི་ལུས་པོ་འདི་བོད་ཀྱི་རང་དབང་དང་། བོད་རིགས་གཞོན་སྐྱེས་རྣམས་ནས་རང་མི་རིགས་ཀྱི་སྐད་ཡིག་ལ་དོ་སྣང་དགོས་སྐོར་སོགས་འཁོད་ཡོད་པ་རེད།