རྒྱ་ནག

དབྱིན་ཡུལ་གྱིས་རྒྱ་ནག་དེ་དཔལ་འབྱོར་དང་འཕྲུལ་ལས་རིག་པའི་ཐོག་ནས་རྒྱལ་སྤྱིའི་བདེ་འཇགས་དང་། ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁ་སང་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། GCHQ Government Communications Headquarters ཞེས་དབྱིན་ཡུལ་གྱི་གསང་བ་ལས་ཁུངས་ཀྱི་གཙོ་འཛིན་སྐུ་ཞབས་ Jeremy Fleming ལགས་ཀྱིས་རྒྱ་ནག་གི་སྟོབས་ཤུགས་དང་རྒྱལ་སྤྱིའི་སྤྱི་ཚོགས་ལ་ཞེད་སྣང་ཁྲོད་ནས་དེ་འབྲེལ་ལས་དོན་མང་པོ་ཞིག་སྤེལ་བཞིན་ཡོད་པར་བརྟེན་ང་ཚོར་ཉེན་ཁ་ཆེན་པོ་ཆགས་ཡོད་པ་དང་། རྒྱ་ནག་དམར་པོའི་གཞུང་གིས་རྒྱལ་སྤྱིའི་ཁྲོད་འཕྲུལ་རིག་ཁོར་ཡུག་གི་ཐབས་བྱུས་ཐོག་ཁེ་ཕན་རྩོད་རྒྱུའི་འདོད་པ་ཡོད་སྐོར་འགྲེལ་བརྗོད་དང་འབྲེལ། འཕྲུལ་རིག་ཐོག་ནས་རྒྱལ་སྤྱིའི་བདེ་འཇགས་དང་ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁོང་གིས་དབྱིན་ཡུལ་གྱི་ཕ་མ་རྣམས་ཀྱིས་རང་ཉིད་ཀྱི་ཕྲུ་གུ་རྣམས་ནས་རྒྱ་ནག་གིས་བཟོས་པའི་ Tiktok བརྙན་ཆས་སྤྱོད་རྒྱུ་ཐད་ལ་དགོངས་བཞེས་གནང་དགོས་སྐོར་དང་། དེ་བཞིན་རྒྱ་ནག་གི་ངོས་ནས་འཇིགས་སྐུལ་དང་བཙན་ཤུགས་ཁྲོད་རྒྱལ་ཁབ་གཞན་རྣམས་རྩོད་ཟླའི་ངོ་བོ་དང་། ཡང་ན་ཚོང་རོགས་ཀྱི་ངོ་བོར་ལྟ་ཡི་ཡོད་པར་འགྲེལ་བརྗོད་དང་སྦྲགས། རྒྱ་ནག་གིས་རྒྱལ་སྤྱིའི་ཁྲིམས་ལུགས་དང་རང་དབང་མང་གཙོའི་ལམ་ལུགས་ཀྱི་སྤྱི་ཚོགས་ལ་འཕྲུལ་རིག་བརྒྱུད་ནས་བཙན་ཤུགས་སྤེལ་བཞིན་པར་སྐྱོན་བརྗོད་ནན་པོ་གནང་ཡོད། དེ་བཞིན་ཁུལ་དེའི་རྙིང་ཞེན་ཚོགས་པའི་འཐུས་མི་སྐུ་ཞབས་ Iain Duncan Smith ལགས་ཀྱིས་དབྱིན་ཡུལ་ནས་རྒྱ་ནག་ཐོག་འཛིན་པའི་སྲིད་བྱུས་དམ་པོ་དེ་དུས་ཐོག་ལ་ལག་བསྟར་གནང་ཐུབ་མེད་སྐོར་འགྲེལ་བརྗོད་གནང་སྟེ། ང་ཚོའི་འཚོ་བའི་ཁྲོད་ལ་རྒྱ་ནག་དེ་ཇི་ཙམ་ཉེན་ཁ་ཆེན་པོ་ཞིག་ཏུ་གྱུར་ཡོད་པ་ངོས་འཛིན་ཐུབ་དགོས་གལ་དང་། ཨུ་རུ་སུས་ཡུཀ་རེན་ལ་བཙན་འཛུལ་བྱེད་བཞིན་སྐབས་ཡུཀ་རེན་གྱིས་དེར་གདོང་ལེན་གང་འདྲ་གནང་བ་ལྟར་ང་ཚོས་ཀྱང་རྒྱ་ནག་ལ་དེ་ལྟ་བུའི་གདོང་ལེན་གནང་བའི་དུས་ལ་བབས་ཡོད་སྐོར་གསུངས་འདུག དབྱིན་ཡུལ་དུ་རྟེན་གཞི་བྱས་པའི་རྒྱ་ནག་ནག་གི་འགྲོ་བ་མིའི་ཐོབ་ཐང་འཐབ་རྩོད་པ་སྐུ་ཞབས་ Luke de Pulford ལགས་ཀྱིས་ཀྱང་རྒྱ་ནག་དེ་འཛམ་གླིང་ཞི་བདེ་དང་བརྟན་ལྷིང་ཆེད་ཉེན་ཁ་ཆེན་པོ་ཆགས་ཡོད་པ་ལྟར་ད་བར་འདི་ཕྱོགས་ནས་རྒྱ་ནག་ལ་གདོང་ལེན་གནང་མེད་པ་དེ་ལྟར་ཡང་ད་ཆ་རིམ་བཞིན་གཉིད་སད་པ་ཞིག་ཡིན་སྐོར་འགྲེལ་བརྗོད་གནང་འདུག The Sun ཞེས་པའི་བརྒྱུད་ལམ་གྱིས་གནས་ཚུལ་སྤེལ་བར་དབྱིན་ཡུལ་གྱི་སྲིད་བློན་ལྕམ་སྐུ་ Liz Truss མཆོག་གིས་ཟླ་བ་སྔོན་མར་རྒྱ་ནག་ཐོག་གི་བཞེངས་ཕྱོགས་ལ་བསྐྱར་ཞིབ་ཀྱིས་དེ་ལས་དམ་པ་གནང་རྒྱུའི་གྲ་སྒྲིག་གནང་བཞིན་ཡོད་སྐོར་དང་། རིང་མིན་བསྐྱར་ཞིབ་རྗེས་མའི་ནང་རྒྱ་ནག་དེ་དབྱིན་ཡུལ་ལ་ཉེན་ཚབས་གང་འདྲ་ཆགས་ཡོད་པ་གསལ་བཟོ་གནང་གི་ཡོད་སྐོར་བཀོད་འདུག

ཟླ་བ་རྗེས་མར་འཚོགས་ལ་ཉེ་བའི་རྒྱ་ནག་དམར་ཤོག་ཚོགས་ཆེན་ཐེངས་ ༢༠ པའི་ནང་མཉམ་ཞུགས་བྱེད་མཁན་རྒྱལ་ཡོངས་འཐུས་མི་རྣམས་ཀྱི་མིང་གསལ་འདོན་དང་འབྲེལ། རྒྱ་ནག་གི་སྲིད་འཛིན་ཞི་ཅིན་ཕིང་གི་སྲོག་ཤིང་གི་གནས་བབ་ཡང་བསྐྱར་ནན་བྱས་འདུགདེ་ཡང་ཁ་སང་ཕྱི་ཚེས་ ༢༥ ཉིན་རྒྱ་ནག་གི་གཞུང་འབྲེལ་ཤིན་ཧུའ་གསར་ཁང་གིས་སྤེལ་བའི་གནས་ཚུལ་ནང་། རིང་མིན་ཟླ་བ་ ༡༠ པའི་ཚེས་ ༡༦ ཉིན་འཚོགས་ལ་ཉེ་བའི་རྒྱ་ནག་དམར་ཤོག་ཚོགས་ཆེན་ཐེངས་ ༢༠ པའི་ནང་མཉམ་ཞུགས་བྱེད་མཁན་རྒྱལ་ཡོངས་འཐུས་མི་ཁྱོན་ ༢༢༩༦ བདམ་པའི་ལས་དོན་ཡོངས་རྗོགས་བདེ་བླག་ངང་ལེགས་འགྲུབ་ཟིན་སྐོར་དང་འབྲེལ། ཞི་ཅིན་ཕིང་གི་མིང་དེ་ཨང་ ༣༦ ཐོག་བཀོད་པ་མ་ཟད། རྒྱལ་ཡོངས་འཐུས་མི་དེ་དག་དམར་ཤོག་ཚོགས་པའི་རྩ་ཁྲིམས་གཞིར་བཟུང་གྱི་འདེམས་ཡོད་སྐོར་དང་། དེའང་ བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་འདེམས་བསྐོའི་ལས་དོན་ཡོངས་སུ་ལེགས་འགྲུབ་བྱུང་ཡོད་སྐོར་བཀོད་འདུག རྩ་བའི་ལོ་བཅུ་རའི་ནང་ཐེངས་གཉིས་རེ་ལས་ཚོགས་སྲོལ་མེད་པའི་རྒྱ་ནག་དམར་ཤོག་ཚོགས་པའི་ཚོགས་ཆེན་དེ་ཚོགས་ལ་རན་པ་དང་བསྟུན། ཁ་སང་སྤྱི་ཚོགས་དྲ་ལམ་ཁག་དང་། ལྷག་པར་བརྒྱུད་ལམ་ཁག་གི་ནང་དུ་རྒྱ་ནག་གི་སྲིད་འཛིན་ཞི་ཅིན་ཕིང་བཟང་བཙོན་གྱི་གནས་སྟངས་འོག་ཡོད་ལུགས་དང་། ཁོང་གི་དམག་གི་དབང་ཆ་འཕྲོག་ཟིན་ལུགས་ཀྱི་གནས་ཚུལ་བཀོད་དེ་ཁྱབ་བརྡལ་ཆེན་པོ་ཕྱིན་ཡོད་པ་རེད།འོན་ཀྱང་གནད་དོན་དེའི་ཐོག་དཔྱད་ཞིབ་པ་ཁག་གཅིག་གིས་གནས་ཚུལ་དེ་བདེན་པ་མིན་སྐོར་བརྗོད་ཡོད་པ་མ་ཟད། ཨ་རིར་གནས་བཞུགས་བོད་དང་རྒྱ་ནག་གི་གནད་དོན་དབྱེ་ཞིབ་པ་ཀུན་དགའ་བཀྲ་ཤིས་ལགས་ཀྱིས་དེ་རིང་རང་ཉིད་ཀྱི་ངོ་དེབ་ཐོག་གནས་ཚུལ་དེའི་སྐོར་ལ་དཔྱད་ཞིབ་གནང་བའི་ནང་དུའང་། རྒྱ་ནག་དམར་ཤོག་ཚོགས་པས་ཏང་གི་ཚོགས་ཆེན་ཐེངས་ ༢༠ པའི་ནང་མཉམ་བཞུགས་བྱེད་མཁན་རྒྱལ་ཡོངས་འཐུས་མི་༢༠༠༠ ལྷག་ཙམ་བདམ་པའི་མིང་གཞུང་ནང་ཞི་ཅིན་ཕིང་གི་མིང་གསལ་འདོན་བྱུང་བ་དེ་ལས་ཤུགས་ཀྱིས་གནས་ཚུལ་དེ་ཉིད་ཕལ་ཆེར་བདེན་པ་མིན་པའི་གཟིགས་ཚུལ་འགྲེལ་བརྗོད་གནང་འདུགདེ་བཞིན་འདི་ག་རླུང་འཕྲིན་ཁང་གིས་ཐེ་ཝན་བོད་ཀྱི་སྐུ་ཚབ་དོན་གཅོད་སྐལ་བཟང་རྒྱན་མཚན་ལགས་སུ་ཞི་ཅིན་ཕིང་དང་འབྲེལ་བའི་གནས་ཚུལ་དེ་བྱུང་དོན་ཐོག་བཀའ་འདྲི་ཞུ་སྐབས་ཞི་ཅིན་ཕིང་གི་དབང་སྒྱུར་འོག་རྒྱ་ནག་རྒྱལ་ཁབ་ནང་རང་དབང་མེད་པའི་ཐོག་དབང་ཆ་གཅིག་སྡུད་ཀྱིས་མང་གཙོ་ལ་ཁ་གཏད་བཅོག་པའི་རྒྱལ་སྤྱིའི་ཐོག་སྲིད་བྱུས་འཛིན་སྟངས་དང་། རྒྱ་ནག་ནང་ཁུལ་ལ་ལྐོག་ཟ་རུལ་སུངས་གཙང་སེལ་གྱི་སྲིད་བྱུས་འོག་ཆབ་སྲིད་ཀྱི་ལྟ་བ་མི་མཐུན་པ་མང་པོ་ཞིག་གོ་གནས་ནས་གནས་དབྱུང་བཏང་བ་མ་ཟད། བཙོན་འཇུག་གི་ཁྲིམས་ཆད་བཏང་བ་དང་། དེ་བཞིན་ཏོག་དབྱིབས་གཉན་རིམས་ལ་ཁག་དཀྲིས་ཏེ་འགྲོ་བ་མིའི་ཐོབ་ཐང་རྡོག་རོལ་སོགས་མདོར་ན་རྒྱ་ནག་ནང་དཔལ་འབྱོར་དང་ཆབ་སྲིད་ཀྱི་ཁོར་ཡུག་ཧ་ཅང་ཉམས་རྒུད་དུ་སོང་བར་བརྟེན་ནང་ཁུལ་གྱི་འགལ་ཟླའི་དབང་གིས་དེ་ལྟར་བྱུང་བ་ཞིག་ཡིན་པ་འགྲེལ་བརྗོད་གནང་བྱུང་།གཞི་རྩའི་བརྒྱུད་ལམ་ཁག་གི་ནང་ཁ་སྔོན་ཕྱི་ཚེས་ ༡༥ དང་ ༡༦ བཅས་ཉིན་གཉིས་རིང་ཨུཛ་བེགྷིས་ཏན་ནང་ Shanghai Cooperation Organisation ཞེས་པའི་ཚོགས་ཆེན་དེ་གྲུབ་མཚམས་སུ་ཞི་ཅིན་ཕིང་སླར་རྒྱ་ནག་ནང་དུ་ལོག་པའི་རྗེས་མང་ཚོགས་ཀྱིས་མཐོང་རྒྱུ་མེད་གནས་ཚུལ་བྱུང་འཕྲལ་ད་ལྟ་སྤྱི་ཚོགས་དྲ་ལམ་ཐོག་ཁྱབ་བཞིན་པའི་གནས་ཚུལ་དེ་བྱུང་ཡོད་པ་དང་། ཁག་གཅིག་གིས་ད་ལྟའི་འཆར་རྒྱ་ནག་ནང་ཏོག་དབྱིབས་ཀྱི་དཀའ་ངལ་ཤུགས་ཆེ་འཕྲད་བཞིན་པའི་ཁྲོད་ཞི་ཅིན་ཕིག་བཟུར་བཀག་ལ་ཡོད་པའི་འགྲེལ་བརྗོད་བྱེད་བཞིན་ཡོད་པ་རེད།

རྒྱ་གར་གྱི་སྲིད་བློན་ན་རེནྡྲ་མོ་དི་་མཆོག་དང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་རྣམ་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པར་རྒྱ་ནག་གིས་སྐྱོན་བརྗོད་བྱས་འདུག རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་རྒྱུན་ལྡན་ལྟར་བསྐོང་ཚོགས་བྱས་པའི་གསར་འགོད་གསལ་བསྒྲགས་ཐོག་བོད་དང་འབྲེལ་བའི་གནད་དོན་རྣམས་རྒྱ་ནག་རྒྱལ་ནང་གི་གནད་དོན་ཡིན་པ་དང་ཕྱི་ཕྱོགས་ནས་ཐེ་བྱུས་གནང་བར་ངོས་ལེན་མེད་སྟབས། རྒྱ་ནག་ནས་ཕྱི་ཕྱོགས་ཀྱི་དབུ་ཁྲིད་དང་༸གོང་ས་མཆོག་དབར་འབྲེལ་བ་ཡོངས་ལ་དགག་པ་ཡོད་ཅེས་བཤད་འདུག ཁོ་པས་ད་དུང་རྒྱ་གར་ཕྱོགས་ནས་རྒྱ་ནག་ལ་བོད་དོན་ཐོག་ཀྱི་བཞེངས་ཕྱོགས་ཁས་ལེན་གནང་བ་ལྟར་དོན་ལ་གནས་དགོས་པ་དང་བོད་དོན་དང་འབྲེལ་བའི་གནད་དོན་སྤྱོད་ནས་རྒྱ་ནག་ནང་མོལ་གྱི་གནད་དོན་ལ་ཐེ་བྱུས་གནང་མཚམས་འཇོག་དགོས་ཞེས་སྐྱོན་བརྗོད་གནང་འདུགགཞི་རྩའི་སྲིད་བློན་མོ་དི་མཆོག་ནས་༸རྒྱལ་བ་རིན་པོ་ཆེའི་༸སྐུའི་འཁྲུངས་སྐར་ལ་ཞལ་པར་བརྒྱུད་འཚམས་འདྲི་ཞུས་པ་དང་ཆབས་ཅིག་མགོན་པོ་༸གང་ཉིད་མཆོག་༸སྐུ་ཚེ་ཞབས་པད་བརྟན་པ་དང་༸སྐུ་ཁམས་གསལ་ཐང་ཡོང་བའི་སྨོན་འདུན་ཞུས་ཡོད་པ་ Twitter དྲ་གནས་ཐོག་བཀོད་ཡོད་པ་དང་འབྲེལ་ཏེ། རྒྱ་གར་གྱི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Arindam Bagchi ལགས་ཀྱིས་རྒྱ་ནག་ལ་སྲིད་བློན་མོ་དི་མཆོག་གིས་འདས་ལོར་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་ཡོད་པ་དང་།  རྒྱ་གར་གཞུང་གི་ངོས་ནས་ཀྱང་༸གོང་ས་མཆོག་སྐུ་མགྲོན་གལ་ཆེ་ཞིག་དང་ཆོས་ཕྱོགས་ཀྱི་དབུ་ཁྲིད་རླབས་ཆེན་ཞིག་ལ་ངོས་འཛིན་ཞུས་ཏེ་སྣེ་ལེན་ཞུ་རྒྱུ་ནི་མུ་མཐུད་ནས་ལག་བསྟར་གནང་བཞིན་པའི་སྲིད་བྱུས་ཞིག་ཡིན་པ་གསུངས་འདུག ལྷག་པར་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ནི་རྒྱ་གར་ཙམ་མ་ཟད་ཕྱི་རྒྱལ་ཡུལ་གྲུ་ཁག་ཏུ་གནས་བཞུགས་༸གོང་ས་མཆོག་ལ་དད་གུས་ཡོད་མཁན་རྣམས་ནས་སྲུང་བརྩི་ཞུས་དང་ཞུ་བཞིན་ཡོད་པ་ལྟར་སྲིད་བློན་མོ་དི་མཆོག་གིས་༸སྐུའི་འཁྲུངས་སྐར་འཚམས་འདྲི་ཞུས་པ་དེའང་གཅིག་མཚུངས་ཡིན་པ་གསུངས་འདུགརྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་གིས་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པར་སྐྱོན་བརྗོད་བྱས་ཏེ་༸གོང་ས་མཆོག་ནི་ཡུན་རིང་ནས་བོད་དེ་རྒྱ་ནག་དང་ཁ་བྲལ་ཐབས་གནང་བཞིན་ཡོད་སྟབས། ཨ་རིའི་ངོས་ནས་རྒྱ་ནག་ནང་མོལ་གྱི་གནད་དོན་ལ་གུས་བརྩི་ཞུས་ཏེ་༸གོང་ས་མཆོག་དང་འབྲེལ་བ་ཞུ་མཚམས་འཇོག་དགོས་པ་དང་འཛམ་གླིང་སྤྱིར་བརྡ་ལན་ནོར་བ་གཏོང་རྒྱུ་མཚམས་འཇོགས་དགོས་ཞེས་རེ་སྐུལ་ཞུས་འདུག གཞི་རྩའི་སྲིད་བློན་མོ་དི་མཆོག་གིས་དེ་སྔའི་བཞེངས་ཕྱོགས་དང་མི་འདྲ་བར་སྔ་ལོར་མགོན་པོ་༸གང་ཉིད་མཆོག་ལ་ཞལ་པར་ཕུལ་ཏེ་༸སྐུའི་འཁྲུངས་སྐར་གྱི་འཚམས་འདྲི་ཞུས་ཡོད་པ་མ་ཟད་དེའི་སྐོར་ Twitter དྲ་གནས་ཐོག་ཡོངས་གྲགས་གནང་ཡོད་པ། རྒྱ་གར་གྱི་དཔྱད་ཞིབ་པ་ཁག་ཅིག་གིས་སྲིད་བློན་མཆོག་ལ་བསྔགས་བརྗོད་དང་འབྲེལ། སྲིད་བློན་མཆོག་གི་གནང་སྟངས་དེ་རིམ་པས་སྲོལ་ལྟ་བུ་ཞིག་ལ་གྱུར་ཡོད་པ་དེ་ནི་བཟང་ཕྱོགས་ཀྱི་རྣམ་པ་ཞིག་ལ་ངོས་འཛིན་གནང་ཡོད། རྩ་བའི་རྒྱ་དཀར་ནག་གཉིས་དབར་ཕྱི་ལོ་ ༢༠༢༠ ལོར་འཕགས་བོད་མཐའ་མཚམས་ཀྱི་རྩོད་རྙོག་བྱུང་ནས་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་གང་ཙམ་ཐེབས་ཡོད་པ་རེད། ཁ་སང་ཨིན་ཌོ་ནི་ཤ་ཡའི་བྷ་ལི་ནང་ཚོགས་པའི་ G20 ཡི་ཕྱི་སྲིད་བློན་ཆེན་ཚོགས་འདུར་རྒྱ་ནག་གི་ཕྱི་སྲིད་བློན་ཆེན་ Wang Yi དང་རྒྱ་གར་གྱི་ཕྱི་སྲིད་བློན་ཆེན་ Jaishankar གཉིས་ཐུག་འཕྲད་ཀྱིས་ཆུ་ཚོད་གཅིག་ཙམ་རིང་ཚོགས་འདུ་ཚོགས་ཡོད་པ་དང་། རྒྱ་ནག་ཕྱི་སྲིད་ལས་ཁུངས་ཀྱིས་གསར་འགོད་བསྒྲགས་གཏམ་སྤེལ་བ་དེ་འབྲེལ་ Xinhua གསར་ཁང་གིས་གནས་ཚུལ་བཀོད་པའི་ནང་Wang Yi ཡིས་Jaishankar ལ་རྒྱ་དཀར་ནག་གཉིས་ནས་འདི་ལོ་ཟླ་བ་ ༣ ནས་རྩིས་ཏེ་ཕྱོགས་གཉིས་ཀྱི་མི་མཐུན་པའི་གནད་དོན་ལ་ཕན་ཚུན་དབར་གོ་བསྡུར་གྱིས་ད་ཆ་ཕྱོགས་གཉིས་ཀྱི་འབྲེལ་ལམ་དེ་ཡར་རྒྱས་ཀྱི་རྣམ་པ་ཡོད་པ་བཤད་པ་མ་ཟད་རྒྱལ་ཁབ་གཉིས་ཀྱི་འབྲེལ་ལམ་ཇེ་བཟང་དང་མ་འོངས་འབྲེལ་ལམ་ལེགས་པོ་ཡོང་བར་མཉམ་འབྲེལ་གནང་དགོས་སྐོར་སོགས་བཤད་པ་བཀོད་འདུག་ཀྱང་།  བརྒྱུད་ལམ་ཁག་ཏུ་འཕགས་བོད་མཐའ་མཚམས་སུ་ཡོད་པའི་དམག་མི་ཕྱིར་འཐེན་ཐད་གང་ཡང་བཤད་མེད་པ་གསལ་འདུག  འོན་ཀྱང་རྒྱ་གར་ཕྱི་སྲིད་ལས་ཁུངས་ནས་འདོན་སྤེལ་གནང་བའི་སྤྱི་བསྒྲགས་ནང་ཕྱི་སྲིད་བློན་ཆེན་ Jaishankar མཆོག་ནས་ Wang Yi ལ་ལ་དྭགས་ཕྱོགས་ཀྱི་འཕགས་བོད་མཐའ་མཚམས་ཀྱི་རྩོད་རྙོག་གཙོས་གནད་དོན་ལྷག་མ་ཁག་ཅིག་ཡོད་པ་དེ་དག་གང་མགྱོགས་གསེལ་དགོས་སྐོར་གསུངས་པ་བཀོད་འདུག

ཉེ་ཆར་རྒྱ་ནག་གཞུང་གིས་བོད་ཁམས་ཕྱོགས་རྫ་ཆུ་ཁ་སེར་ཤུལ་རྫོང་ཁོངས་སུ་ཡོད་པའི་བོད་པའི་སྒེར་བཙུགས་སློབ་གྲྭ་ཆ་ཚང་སྒོ་བརྒྱབས་ཏེ་བསླབ་གཞིའི་སྐད་ཡིག་རྒྱ་ཡིག་ཡིན་པའི་རྒྱ་གཞུང་གི་སློབ་གྲྭར་ཐོ་འགོད་གནང་དགོས་པའི་བཙན་བཀའ་བཏང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་བོད་ཁམས་ཕྱོགས་རྫ་ཆུ་ཁ་སེར་ཤུལ་རྫོང་ཁོངས་སུ་ཡོད་པའི་བོད་པའི་སྒེར་བཙུགས་སློབ་གྲྭ་ཆ་ཚང་སྒོ་བརྒྱབས་ནས་ཟླ་བ་འདིའི་ཚེས་ ༢༠ སྔོན་ཚུད་དུ་བསླབ་གཞིའི་སྐད་ཡིག་རྒྱ་ཡིག་ཡིན་པའི་རྒྱ་གཞུང་སློབ་གྲྭར་ངེས་པར་དུ་སློབ་ཕྲུག་ཆ་ཚང་ཐོ་འགོད་གནང་དགོས་པའི་བཙན་བཀའ་བཏང་ཡོད་པ་དེར་ས་གནས་བོད་མི་ཚོས་དང་ལེན་བྱེད་དགོས་པ་དང་། གལ་ཏེ་བཀའ་རྒྱར་དང་ལེན་མ་གནང་བར་རྒྱབ་འགལ་རིགས་བྱས་པའི་གནས་སྟངས་འབྱུང་ཚེ་བཙོན་འཇུག་སོགས་ཀྱི་ཉེས་ཆད་ཕོག་སྲིད་པའི་ཉེན་བརྡ་བཏང་ཡོད་སྐོར་བཀོད་འདུག གཞི་རྩའི་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་གྲྭ་དེ་དག་ཕལ་ཆེ་བ་འབྲོག་པའི་ས་ཁུལ་དུ་ཡོད་པ་དང་། ད་ཆ་ཁུལ་དེར་ཡོད་པའི་དགེ་མང་སྒེར་བཙུགས་སློབ་གྲྭ་དང་འབུམ་གསར་སློབ་གྲྭ། ཁྲོ་ཤུལ་སློབ་གྲྭ། ཨ་སེ་སློབ་གྲྭ། ཕན་བདེ་གཅེས་སྐྱོང་སློབ་གྲྭ། ཝ་རོང་སློབ་གྲྭ་སོགས་སྒེར་བཙུགས་སློབ་གྲྭ་བཅུ་གྲངས་ཤིག་ཡོད་པ་ཆ་ཚང་སྒོ་བརྒྱག་ཏུ་བཅུག་ཡོད་པ་རེད། ལྟེ་གནས་ཁང་གིས་གནས་ཚུལ་སྤེལ་བར་རྒྱ་གཞུང་གི་ཐག་གཅོད་དེར་ས་གནས་སྡེ་པ་སོ་སོའི་མི་མང་ནས་འགོ་ཁྲིད་ཚོར་སློབ་གྲྭ་སྒོ་བརྒྱབ་པ་ཡིན་ན་གཞུང་གི་སློབ་གྲྭ་ས་ཐག་རིང་དྲག་སྟབས་ཕྲུ་གུ་སློབ་གྲྭར་འཇོག་རྒྱུ་ཧ་ཅང་དཀའ་ངལ་ཡོད་པ་སོགས་ཀྱི་བདེ་སྡུག་ཞུས་ཡོད་ཀྱང་། ས་གནས་འགོ་ཁྲིད་ཚོས་མི་མང་གི་བདེ་སྡུག་ལ་བསམ་ཤེས་མེད་པར་གཞུང་གི་བཀོད་ཁྱབ་ལ་འགྱུར་ལྡོག་རྩ་བ་ནས་མེད་པས་ས་གནས་མི་མང་ཚོའི་ངོས་ནས་ཚུལ་བཞིན་ལག་བསྟར་བྱེད་དགོས་པ་སོགས་བཤད་པ་མ་ཟད་བཀའ་རྒྱ་དང་ལེན་མ་གནང་ན་བཙོན་འཇུག་སོགས་ཀྱི་ཉེས་ཆད་ཕོག་སྲིད་པའི་ཉེན་བརྡ་བཏང་བའི་གནས་སྟངས་བྱུང་ཡོད་པ་བཀོད་འདུག དེ་བཞིན་ལྟེ་གནས་ཁང་ལ་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་ཆུང་ཞིག་ཏུ་སློབ་ཁྲིད་བྱེད་བཞིན་པའི་དགེ་རྒན་ཞིག་གིས་གཞུང་གི་སློབ་གྲྭ་ལས་སྒེར་བཙུགས་སློབ་གྲྭར་སློབ་ཁྲིད་བྱ་རྒྱུ་ལས་སླ་བ་མ་ཟད། སྒེར་བཙུགས་སློབ་གྲྭར་སྲིད་གཞུང་གིས་གཏན་འབེབས་བྱས་པའི་སློབ་ཚན་གྱི་ཞོར་དུ་བོད་ཀྱི་སྐད་ཡིག་དང་ལོ་རྒྱུས་མང་ཙམ་ཁྲིད་ཐུབ་ཀྱི་ཡོད་པ་དང་། གཞུང་གཉེར་སློབ་གྲྭའི་ནང་དེ་ལྟ་བུའི་གོ་སྐབས་རྩ་བ་ནས་མེད་སྐོར་སོགས་འགྲེལ་བརྗོད་གནང་འདུག གཞི་རྩའི་རྒྱ་ནག་གཞུང་ནས་འདས་པའི་ལོ་ཤས་ནས་བཟུང་སྟེ་བོད་གཙོས་པའི་གྲངས་ཉུང་མི་རིགས་ཀྱི་ས་གནས་ཁག་ཏུ་མི་རིགས་ཀྱི་ངོ་བོ་རྩ་མེད་གཏོང་ཐབས་སོགས་ལ་དམིགས་ཏེ་རྒྱ་གཞུང་གིས་གཏན་འབེབས་བྱས་པའི་རྒྱ་ཡིག་ཐོག་གི་བསླབ་གཞི་ཁག་སློབ་ཁྲིད་བྱེད་དགོས་པའི་བཙན་བཀའ་བཏང་དང་གཏོང་བཞིན་ཡོད་པ་དང་། རྒྱ་གཞུང་གི་བྱ་སྤྱོད་དང་སྲིད་བྱུས་དེ་དག་དང་འབྲེལ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་ཨེ་ཤ་ཡའི་གཟི་བརྗིད་སྣེ་ཁྲིད་ཚོགས་པ་གཉིས་ནས་ང་ཚོའི་རུས་རྐང་འཇིབས་སོང་། ཞི་ཅིན་ཕིང་འོག་གི་བོད་ཀྱི་ཤེས་ཡོན་དང་སྐད་ཡིག་གི་ཐོབ་ཐང་ཞེས་པའི་སྙན་ཐོ་ཞིག་ཀྱང་འདོན་སྤེལ་གནང་འཆར་ཡོད་པ་རེད།

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་གིས་ལོ་བཞིའི་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་བློ་བཟང་ལྷུན་འགྲུབ་ལགས་དང། ལོ་དྲུག་གི་བཙོན་འཇུག་ཁྲིམ་ཐག་བཅད་པའི་གླུ་བ་ལྟུན་འགྲུབ་གྲགས་པ་ལགས། དེ་བཞིན་རྒྱ་གཞུང་གིས་འཛིན་བཟུང་བཙན་ཁྲིད་འོག་གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་བོད་ནང་བོད་མི་ཆབ་སྲིད་བཙོན་པ་གསུམ་གྱི་གཟུགས་གཞིའི་གནས་སྟངས་ཁ་གསལ་དགོས་སྐོར་རྒྱ་ནག་གཞུང་ལ་ཡིག་ཐོག་ནས་འདྲི་རྩད་གནང་འདུག རྒྱལ་ཚོགས་ཀྱི་དྲ་ཚིགས་ཐོག་གསལ་བར་གཞིགས་ན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་ལ་བཏང་བའི་ཡིག་ཐོག་འདྲི་རྩད་ནང་གོང་དུ་གསལ་བའི་བོད་མི་ཆབ་སྲིད་བཙོན་པ་གསུམ་ཐོག་མར་རྒྱ་གཞུང་ཉེན་རྟོག་པས་འཛིན་བཟུང་བཙན་འཁྲིད་དང། རྒྱུན་རིང་བཀག་ཉར་འོག་གར་སོང་ཆ་མེད་དུ་གྱུར་བ། མཐར་ཕྱི་གསལ་ནང་གསལ་མེད་པར་གསང་བའི་ཐོག་ནས་བཙོན་འཇུག་ཁྲིམས་ཐག་བཅད་པའི་དོ་བདག་ཆབ་སྲིད་བཙོན་པ་ཁོང་གསུམ་གྱི་ཐོག་མཐའ་བར་གསུམ་གྱི་གནས་ཚུལ་རྣམས་ཞིབ་ཁྲ་མངོན་གསལ་གནང་སྟེ། རྒྱ་ཆེ་ས་ནས་ད་ལྟའི་ཆར་རྒྱ་ནག་གཞུང་གིས་བོད་ནང་བོད་མི་རིགས་ཀྱི་སྐད་ཡིག་དང་བོད་མིའི་ངོ་བོ་མཚོན་པའི་ལེགས་བྱང་ཁག་སྲུང་སྐྱོབ་དར་སྤེལ་གནང་མཁན་དང། དེ་བཞིན་རྒྱ་གཞུང་གི་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་གནང་མཁན་མི་སྣ་ཁག་ལ་དྲག་གནོན་བྱེད་བཞིན་པའི་གནས་སྟངས་དངོས་ར་འཕྲོད་པ་ཞིག་མཚོན་གྱི་ཡོད་པ་མ་ཟད། ད་ལྟའི་ཆར་རྒྱ་གཞུང་གིས་བོད་ནང་ཤེས་ཡོན་ཅན་དང་སྒྱུ་རྩལ་བ་སོགས་མང་ཚོགས་ཀྱི་རང་དབང་སྲུང་སྐྱོབ་གནང་མཁན་གྱི་མི་སྣ་ཁག་འཛིན་བཟུང་བཙན་ཁྲིད་དང། རྒྱུན་རིང་བཀར་ཉར་གྱི་གར་ཡོད་ཤེས་རྟོགས་མེད་པ་བཟོས་པ། དེ་བཞིན་བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཁག་རྒྱུན་ལྡན་གྱི་ལམ་ལུགས་ལྟར་ཆགས་ཡོད་པར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་གི་ངོས་ནས་ཧ་ཅང་སེམས་འཚབ་ཡོད་ཅེས་གསུངས་འདུག ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་ནས་ད་ལན་རྒྱ་གཞུང་ལ་འདྲི་རྩད་གནང་བའི་ནང་ལ་ད་ལྟ་རྒྱ་ནག་གི་བཙོན་ཁང་དུ་ཡོད་པ་རྩོམ་པ་པོ་བློ་བཟང་ལྷུན་འགྲུབ་ལགས་དང། གླུ་བ་ལྟུན་འགྲུབ་གྲགས་པ་ལགས། གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་གསུམ་གང་དུ་ཡོད་མེད་དང་གཟུགས་གཞིའི་བདེ་ཐང་གང་ཡིན། ཁོང་གསུམ་ཐོག་མར་འཛིན་བཟུང་དང་བཀག་ཉར། དེ་ནས་འབྲེལ་ཡོད་ནང་མི་ཚོར་ཤེས་རྟོགས་གང་ཡང་མེད་པར་བཙོན་འཇུག་ཁྲིམས་ཐག་བཅད་པ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་གི་འབྲུ་དོན་དང་མཐུན་པ་ཞིག་ཆགས་ཀྱི་ཡོད་མེད་སོགས་ལན་འདེབས་ཁ་གསལ་དགོས་པ། རྒྱ་གཞུང་གི་ངོས་ནས་ད་བར་བོད་ཀྱི་ས་ཁུལ་ཁག་གི་མང་ཚོགས་ཚོར་རང་ཉིད་ཀྱི་སྐད་ཡིག་རང་དབང་དང་ཆོས་དད་རང་དབང། དེ་བཞིན་སྨྲ་བརྗོད་རང་དབང་། བསམ་བློའི་རང་དབང་སོགས་འགན་སྲུང་ཆེད་དུ་གང་དང་གང་བྱས་པ་ཁ་གསལ་བཟོ་དགོས་པ་བཅས་ཀྱི་འདྲི་རྩད་ཁག་ཅིག་གནང་ཡོད། རྒྱ་ནག་གཞུང་ལ་བོད་མི་ཆབ་སྲིད་བཙོན་གསུམ་གྱི་གནད་དོན་དང་འབྲེལ་ནས་ཡིག་ཐོག་འདྲི་རྩད་གནང་མཁན་རྒྱལ་ཚོགས་ཀྱི་སྡེ་ཁག་དྲུག་ནི། རྒྱལ་ཚོགས་ཀྱི་འཛིན་བཟུང་བཀག་ཉར་ཐོག་རྟོག་ཞིབ་གནང་མཁན་གྱི་དམིགས་བསལ་ཁེ་ལས་རྟོག་ཞིབ་ཚོགས་ཆུང་དང། བཙན་ཁྲིད་དམ་གར་སོང་ཆ་མེད་ཀྱི་གནད་དོན་རྟོག་ཞིབ་གནང་མཁན་དམིགས་བསལ་ཁེ་ལས་རྟོག་ཞིབ་ཚོགས་ཆུང། རྒྱལ་ཚོགས་ཀྱི་ཤེས་ཡོན་རང་དབང་གི་དམིགས་བསལ་ཁེ་ལས་རྟོག་ཞིབ་མི་སྣ། སྨྲ་བརྗོད་རང་དབང་དང་བསམ་བློའི་རང་དབང་དར་སྤེལ་དང་སྲུང་སྐྱོབ་གནང་མཁན་ཁེ་ལས་རྟོག་ཞིབ་མི་སྣ། ལེགས་བྱང་རང་དབང་དང་གྲངས་ཉུང་མི་རིགས་ཐོག་གི་ཁེ་ལས་རྟོག་ཞིབ་མི་སྣ་བཅས་ཡིན་པ་རེད།

རྒྱ་ནག་གིས་རྒྱ་གར་བྱང་ཕྱོགས་ལ་དྭགས་སྤང་གོང་མཚོའི་ཉེ་འགྲམ་ཆུ་ཤུལ་ས་ཁུལ་ཉེ་སར་ Mobile Tower འམ་ཁ་པར་གྱི་ལྕོག་མཁར་གསུམ་གསར་རྒྱག་བྱེད་བཞིན་པ་མངོན་གསལ་གནང་འདུགཁ་སང་རྒྱ་གར་གྱི་ Hindustan Times དང་ Times Now སོགས་བརྒྱུད་ལམ་ཆེ་ཁག་གིས་གནས་ཚུལ་སྤེལ་བར་ཁ་ཉིན་རྒྱ་གར་བྱང་ཕྱོགས་ལ་དྭགས་མངའ་ཁུལ་གྱི་ཆུ་ཤུལ་ས་གནས་འཐུས་མི་སྐུ་ཞབས་དཀོན་མཆོག་བསྟན་འཛིན་ལགས་ཀྱིས་རང་ཉིད་ཀྱི་འཕྲུལ་སྒྲ་ཐོག་ཆུ་ཤུལ་ཉེ་འགྲམ་གྱི་རྒྱ་ནག་ཕྱོགས་ཀྱི་ས་ཁུལ་དུ་རྒྱ་ནག་གིས་ལག་ཐོགས་ཁ་པར་གྱི་ལྕོག་མཁར་གསུམ་གསར་རྒྱག་བྱས་ཡོད་པའི་འདྲ་པར་དང་བཅས་མངོན་གསལ་གནང་བ་དང་འབྲེལ། རྒྱ་ནག་ཕྱོགས་ནས་ས་མཚམས་ཉེ་འགྲམ་གྱི་ས་ཁུལ་ཁག་ཏུ་འཛུགས་སྐྲུན་གྱི་ལས་གཞི་རྒྱ་ཆེན་པོ་སྤེལ་བཞིན་པའི་ཁྲོད། ཉེ་ཆར་ཆུ་ཤུལ་ཉེ་འགྲམ་གྱི་སྤང་གོང་མཚོ་ཐོག་ཏུ་ཟམ་ཆེན་འཛུགས་སྐྲུན་བྱས་ཟིན་པའི་རྗེས་སུ་ད་ཆ་ས་མཚམས་ས་ཁུལ་གྱི་ཐག་ཉེ་སར་ལག་ཐོགས་ཁ་པར་གྱི་ལྕོག་མཁར་གསུམ་གསར་རྒྱག་བྱས་ཡོད་སྐོར་བཀོད་པ་དང་ཆབས་ཅིག རྒྱ་གར་ཕྱོགས་ཀྱི་ཆུ་ཤུལ་ས་ཁུལ་གྱི་གྲོང་ཚོ་ཁག་ ༡༡ ནང་ད་ཆ་ 4G ལག་ཐོགས་ཁ་པར་འབྲེལ་གཏུག་གི་མཐུན་རྐྱེན་བསྐྲུན་ཡོད་སྟབས། རྒྱ་གར་ངོས་ནས་དེར་སེམས་འཚབ་ཀྱི་གནད་དོན་ཞིག་མ་རེད་དམ་ཞེས་དྲི་བ་བཏང་འདུགརྩ་བའི་སྤང་གོང་མཚོ་ཐོག་ཏུ་རྒྱ་ནག་གིས་ཟམ་ཆེན་གསར་རྒྱག་བྱས་ཡོད་པའིས་ཁུལ་དེའང་དེ་སྔོན་ཕྱི་ལོ་ ༡༩༦༢ ལོའི་རྒྱ་དཀར་ནག་གཉིས་དབར་གྱི་དམག་འཁྲུག་ཁྲོད་རྒྱ་ནག་གིས་ཁྲིམས་འགལ་ཐོག་བཙན་བཟུང་བྱས་པའི་ས་ཁུལ་ཞིག་ཡིན་པ་རེད། ཁོང་གི་ངོས་ནས་འདས་པའི་དུས་ཡུན་ནང་རྒྱ་ནག་གིས་ས་མཚམས་ཁུལ་དུ་འཛུགས་སྐྲུན་གྱི་ལས་གཞི་མང་དག་ཅིག་སྤེལ་བཞིན་ཡོད་པའི་ཐུགས་སྣང་བྱུང་སྐོར་གསུངས་པ་དང་སྦྲགས། ཉེ་ཆར་རྒྱ་ནག་གིས་སྤང་གོང་མཚོ་ཐོག་ཏུ་ཟམ་ཆེན་གསར་རྒྱག་དང་། ད་ཆ་རྒྱ་གར་གྱི་ས་ཐོག་ནས་མཐོང་རྒྱུ་ཡོད་པའི་ལ་དྭགས་སྤང་གོང་མཚོའི་ཉེ་འགྲམ་ཆུ་ཤུལ་ས་ཁུལ་ཉེ་སར་ Mobile Tower འམ་ཁ་པར་གྱི་ལྕོག་མཁར་གསུམ་གསར་རྒྱག་བྱེད་བཞིན་པ་དེས་རྒྱ་གར་ལ་སེམས་འཚབ་ཀྱི་གནད་དོན་ཞིག་ཆགས་ཀྱི་ཡོད་སྐོར་གསུངས་འདུག རྒྱ་ནག་གི་ངོས་ནས་ས་མཚམས་ས་ཁུལ་དུ་འཛུགས་སྐྲུན་ལས་གཞི་གང་ཞིག་སྤེལ་བ་ཡིན་ཀྱང་། དང་པོ་མི་མང་དཀྱུས་མ་བསྡད་བཅུག་ནས་དེ་རྗེས་དམག་མི་བསྡད་ས་བཟོ་ཡི་ཡོད་པར་བརྟེན་ལས་གཞི་རྣམས་གོ་ཉིས་ཆོད་ཀྱི་དམིགས་ཡུལ་ཐོག་ནས་སྤེལ་བཞིན་ཡོད་སྟབས། རྒྱ་གར་ཕྱོགས་ནས་གནད་དོན་དེར་དོ་སྣང་ཆེན་པོ་གནང་སྟེ་རྒྱ་གར་གྱི་ངོས་ནས་ཀྱང་ས་ཁུལ་དེ་དག་ཏུ་འཛུགས་སྐྲུན་གྱི་ལས་གཞི་མང་ཙམ་སྤེལ་དགོས་གལ་ཡིན་པ་གསུངས་འདུགགཞི་རྩའི་རྒྱ་ནག་གི་རྒྱལ་ཁོངས་རྒྱ་སྐྱེད་ཀྱི་སྲིད་བྱུས་འོག་ཏུ་བོད་ཀྱི་ས་ཁག་ཁུལ་བརྒྱུད་ནས་རྒྱ་གར་དང་བལ་ཡུལ། དེ་བཞིན་འབྲུག་སོགས་དང་ས་འབྲེལ་ཡོད་པའི་མཐའ་མཚམས་ཁག་ཏུ་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད་མཐའ་མཚམས་ཁུལ་དུ་གྲོང་ཚོ་གསར་རྒྱག་གིས་མི་འབོར་ཕོན་ཆེ་འོར་འདྲེན་བྱེད་བཞིན་པའི་ཁྲོད་ད་བར་རྒྱ་དཀར་ནག་གི་བར་དུ་གྲོས་མོལ་ཐེངས་བཅུ་བཞི་ཙམ་བྱས་པའི་རྗེས་སུའང་མཐའ་མཚམས་ཀྱི་དཀའ་རྙོག་དང་འབྲེལ་ནས་གྲོས་མོལ་གྱི་ཐོག་མཇུག་སྐྱོང་བྱེད་རྒྱུ་ཡིན་པར་གྲོས་མཐུན་བྱུང་བ་ཙམ་ལས་དོན་དངོས་ཐོག་ཕྱོགས་གཉིས་དབར་གནད་སྨིན་གྱི་གྲུབ་འབྲས་གང་ཡང་སོན་མེད་པ་རེད།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས། རྒྱ་ནག་གཞུང་གིས་ཉེ་ཆར་བོད་ཀྱི་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་ཐོག་དགོངས་པ་རྫོགས་པའི་པའི་སྔ་རྗེས་ཀྱི་གནད་དོན་ལ་གསང་རྒྱ་དང་། རིན་པོ་ཆེའི་འདས་མཆོད་ལ་དམ་དྲག་བྱེད་སྟངས་ལ་གཞིགས་ཚེ། རྒྱ་གཞུང་ངོས་ནས་དྲག་གནོན་བརྒྱུད་༸གོང་ས་མཆོག་གི་ཤུགས་རྐྱེན་བཙན་འགོག་དང་། བོད་བརྒྱུད་ནང་བསྟན་དང་འབྲེལ་བའི་བྱེད་སྒོ་དག་ལ་ཚད་མཐོའི་སྟངས་འཛིན་བྱེད་བཞིན་པ་གསལ་པོ་ཡིན་པ་ར་སྤྲོད་གནང་འདུགདེའང་ཚོགས་པ་དེས་ཁ་སང་སྤེལ་བའི་གནས་ཚུལ་ནང་དུ། རྒྱ་ནག་གིས་བོད་ཁུལ་དུ་དྲག་གནོན་གྱིས་བོད་ཀྱི་གནད་དོན་ཕྱི་ཕྱོགས་སུ་ཁྱབ་སྤེལ་བྱེད་རྒྱུར་བཀག་སྡོམ་བྱེད་མུས་ཡིན་ཡང་། ཉེ་ཆར་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་གི་ཐོག་ལྷ་སར་དགོངས་པ་རྫོགས་པའི་གནས་ཚུལ་དང་། ལྷག་པར་གནས་ཚུལ་དེའི་ཐོག་རྒྱ་ནག་གིས་གསང་རྒྱ་ཤུགས་ཆེ་བྱས་པའི་གནད་དོན་དེ་ཕྱི་ལ་ཐོན་ཡོད་པར་འགྲེལ་བརྗོད་ཀྱིས། རིན་པོ་ཆེ་དགོངས་རྫོགས་ཀྱི་སྔ་རྗེས་གནས་ཚུལ་ཞིབ་ཕྲ་ཡོང་གྲགས་གནང་འདུག གནས་ཚུལ་དེའི་ནང་གསལ་ལྟར་ན།  ནག་ཆུའི་ཤག་རོང་པོ་དགོན་དགའ་ལྡན་དར་རྒྱས་གླིང་གི་མཆོག་སྤྲུལ་ཟླ་བ་རིན་པོ་ཆེ་མཆོག་སྤྲུལ་ཕྱི་ལོ ༢༠༡༠ ལོའི་ཕྱི་ཟླ་ ༥ པའི་ནང་འཛིན་བཟུང་བྱས་པ་དང་། དེའང་གཙོ་བོ་རིན་པོ་ཆེ་མཆོག་གིས་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་དང་འབྲེལ་བའི་གནད་དོན་ཐད་་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་ལམ་སྟོན་ཞུས་པའི་ནག་ཉེས་འོག་འཛིན་བཟུང་གིས་ལོ་བདུན་ལ་བཙོན་འཇུག་ཁྲིམས་ཐག་བཅད་དེ་ནམ་ཡང་ཕྱིར་རང་དགོན་དུ་ཕེབས་མི་ཆོག་པའི་བཀའ་རྒྱ་བཏང་ཡོད་པ་མ་ཟད། དགོན་པའི་ནང་ཆབ་སྲིད་སློབ་གསོ་ཤུགས་ཆེར་སྤེལ་བའི་ཁྲོད། གྲྭ་བ་བགྲས་སོང་ཞིག་གིས་རང་སྲོག་བཅད་པའི་གནད་དོན་ཡང་བྱུང་ཡོད་པ་རེད་འདུགགནད་དོན་དེ་དང་འབྲེལ་ནས་ཤག་རོང་པོ་དགོན་དུ་ཕྱི་ལོ་ ༢༠༡༣ ལོར་གྲྭ་མང་གིས་རྒྱ་གཞུང་ལ་ངོ་རྒོལ་གྱི་ལས་འགུལ་བརྩམས་པར་རྒྱ་ནག་གིས་དྲག་གནོན་ཆེས་ཆེར་བྱས་ཏེ་མི་ལྔ་བཅུ་ཙམ་འཛིན་བཟུང་བྱས་པ་ཟད། ཤག་རོང་པོ་དགོན་པའི་དགེ་འདུན་པ་མང་པོ་ཕྱི་ལ་བྲོས་བྱོལ་དུ་ཕྱིན་རྗེས་རྒྱ་ནག་གིས་དགོན་པ་གནས་སྐབས་སྒོ་བརྒྱབ་ཀྱང་བདུན་ཤས་རྗེས་དགོན་པ་བསྐྱར་དུ་སྒོ་འབྱེད་བྱས་ཏེ་རྒྱ་ནག་གིས་ངོས་འཛིན་བྱས་པའི་ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སར་བཀོད་ཡོད་པ་སོགས་བཀོད་འདུག རྒྱ་ནག་གིས་མཆོག་སྤྲུལ་ཟླ་བ་རིན་པོ་ཆེ་མཆོག་ལ་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་ཀྱང་། དམ་པ་ཁོང་གི་དགུང་ནའི་བབ་དང་སྐུ་གཟུགས་འཕྲོད་བསྟེན་སོགས་ཞན་པའི་རྐྱེན་གྱིས་ལྷ་སར་བཟང་བཙོན་དུ་བཞག་ཡོད་པའི་ཁྲོད།  ཕྱི་ལོ་ ༢༠༡༤ ལོར་ཐེངས་གཅིག་ཁོང་གི་མ་དགོན་དུ་ཕྱིར་ཕེབས་སུ་བཅུག་རྗེས་སྔར་བཞིན་བཟང་བཙོན་འོག་བཅུག་ཡོད་པར་གསལ་འདུག འདི་ལོའི་ཟླ་བ་དང་པོའི་ཚེས་སུམ་ཅུའི་ཉིན་དམ་པ་ཁོང་དགོངས་པ་རྫོགས་འཕྲལ། རྒྱ་ནག་གིས་ལྷ་ས་ཁུལ་དུ་ཡོད་པའི་ཁོང་གི་དད་ལྡན་རྗེས་འཇུག་པ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་པ་ལས།  ཁོང་གི་མ་དགོན་གྱི་དད་ལྡན་མང་ཚོགས་དང་སློབ་མ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་མེད་པ་མ་ཟད།  དམ་པ་ཁོང་གི་དགོངས་རྫོགས་ཀྱི་གནད་དོན་དང་པར་རིས་སོགས་སྤྱི་ཚོགས་དྲ་ལམ་ནས་ནག་གསུབ་བཏང་བ་དང་། སྐུ་གདུང་མཇལ་མཁན་རྣམ་པས་པར་སོགས་བརྒྱབ་ན་བཙོན་འཇུག་ཉེས་ཆད་གཅོད་རྒྱུ་ཡིན་པའི་བཙན་བཀའ་བཏང་བ་བརྒྱུད།  དམ་པ་ཁོང་གི་སྐུ་གདུང་ཤག་རོང་པོ་དགོན་དུ་ཞུགས་འབུལ་བྱེད་དུ་བཅུག་ཡོད་ཀྱང་མང་ཚོགས་འདས་མཆོད་དུ་ཞུགས་བཅུག་མེད་པ་མ་ཟད།  འདས་མཆོད་སྒྲུབ་མཁན་གྱི་དགེ་འདུན་པ་རྣམས་ཀྱི་ལུས་པོར་ཞིབ་བཤེར་ནན་པོ་བྱས་ཡོད་པ་མངོན་གསལ་གནང་འདུགའགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་ད་རེས་མཆོག་སྤྲུལ་ཟླ་བ་རིན་པོ་ཆེ་མཆོག་གི་སྐུ་གདུང་ཞུགས་འབུལ་ལ་དམ་དྲག་དང་། ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སྟོན་བྱེད་སྟངས་བཅས་ཀྱི་གནད་དོན་ལ་གཞིགས་ན། རྒྱ་ནག་གིས་བོད་བརྒྱུད་ནང་བསྟན་དང་འབྲེལ་བའི་༸གོང་ས་མཆོག་གི་ཤུགས་རྐྱེན་དག་བཙན་འགོག་དང་། ཆོས་ལུགས་ཀྱི་ལས་དོན་སྤྱི་ལ་ཚད་མཐོའི་སྟངས་འཛིན་སླད་མང་ཚོགས་ལ་དྲག་གནོན་དང་། འཇིགས་སྐུལ། སོ་མྱུལ་སོགས་བྱ་རྒྱུར་ཐེ་ཚོམ་མེད་པ་གསལ་པོ་ཡིན་པ་དང་། སྲོལ་རྒྱུན་གྱི་ལམ་ལུགས་ཁག་མ་འོངས་པར་མུ་མཐུད་རྡོག་རོལ་དང་དྲག་གནོན་བྱ་ངེས་ཡིན་པ་གསལ་སྟོན་བྱས་འདུག གཞི་རྩའི་མཆོག་སྤྲུལ་ཟླ་བ་རིན་པོ་ཆེ་མཆོག་ཕྱི་ལོ་ ༡༩༣༧ ལོར་ནག་ཆུ་ས་ཁུལ་ཁམས་སྟོད་རུ་གསར་དུ་འཁྲུངས་པ་དང་། ཕྱི་ལོ་ ༡༩༦༠ ལོར་རྒྱ་ནག་གིས་བོད་ལ་དབང་བསྒྱུར་བྱེད་སྐབས་རྒྱ་ལ་ཁ་གཏད་ལངས་པའི་ཉེས་འཛུགས་ཀྱིས་དམངས་གཙོ་བཅོས་བསྒྱུར་ཟེར་བའི་སྐབས་སུ་འཛིན་བཟུང་དང་། ལན་མང་འཐབ་རྩོད་དང་རྡུང་རྡེག་ཚབ་ཆེན་བཏང་སྟེ་བཙོན་འཇུག་ལོ ༥ དང་། གཞན་ཡང་རིག་གནས་གསར་བརྗེ་སྐབས་ལས་མི་རུ་ཁག་ཟེར་བའི་ནང་ནས་སླར་ཡང་འཛིན་བཟུང་བྱས་ཏེ་འཐབ་རྩོད་དང་མནར་གཅོད་བཟོད་བཀའ་བ་བཏང་སྟེ་ལོ་ ༧ བཙོན་འཇུག་བྱས་ཡོད་པ་རེད། དེ་རྗེས་ཕྱི་ལོ་ ༢༠༡༠ ཟླ་ ༥ ཚེས་ ༢༠ ཉིན་མདོ་ཁམས་ཤག་རོང་པོ་ཁུལ་དུ་སླར་ཡང་རྒྱ་གཞུང་གིས་ལྔ་ཉི་ཤུའི་དོན་རྐྱེན་ཟེར་བའི་འོག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་སྐོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་ཡོད་པའི་ནག་ཉེས་བཙུགས་ཏེ་སླར་ཡང་ལོ་ ༧ བཙོན་འཇུག་ཁྲིམས་ཐག་བཅད་ཡོད་པ་ཞིག་ཡིན་པ་རེད།

སྔར་ལོ་རྒྱ་ནག་གིས་དམར་ཤོག་ཚོགས་པ་བཙུགས་ནས་ལོ་བརྒྱ་འཁོར་བ་དང་བོད་ཞི་བའི་བཅིངས་གྲོལ་ཞེས་པ་ཚུགས་ནས་ལོ་བདུན་ཅུ་འཁོར་བའི་དུས་དྲན་ཁྲོད། རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་ཁོངས་ཀྱི་བྱིས་པ་མང་པོ་ཞིག་བཙན་ཤེད་ཀྱི་བཅིངས་གྲོལ་དམག་ཁོངས་སུ་བཅུག་ནས་སྦྱོང་བརྡར་སྣ་མང་སྤྲད་ཡོད་པ་ལྟར། ད་ལྟ་ཡང་ལས་གཞི་དེ་མི་མཐུད་དུ་ལག་བསྟར་བྱེད་བཞིན་ཡོད་པའི་གནས་ཚུལ་ཐོན་འདུག དེ་རིང་རྒྱ་གར་གྱི་ Times now ཞེས་པའི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གི་གསང་བའི་གནས་ཚུལ་དང་འབྲེལ་ནས། འཕགས་བོད་མཐའ་མཚམས་དང་ས་འབྲེལ་ཡོད་པའི་བོད་ཀྱི་ས་ཁུལ་ཌེམ་ཆོག་དང་བཀྲ་ཤིས་སྒང་། དེ་བཞིན་ལྕགས་སྒང སོགས་ནས་བོད་ཀྱི་བྱིས་པ་༡༢༠ ལྷག་བཙན་ཤེད་ཀྱིས་བཅིངས་གྲོལ་དམག་ཁོངས་སུ་བཅུག་ཡོད་པ་མ་ཟད། ཐ་ན་ལོ་ན་དྲུག་ཅན་གྱི་བྱིས་པ་རྣམས་ཀྱང་པེ་ཅིན་གྱི་བཅའ་སྡོད་སློབ་གྲྭར་བཙན་ཁྲིད་བྱས་ཟིན་པ་མངོན་གསལ་གནང་འདུག དེ་བཞིན་གསར་ཁང་གིས། རྒྱ་གཞུང་གིས་གཞན་ཡང་ལོ་ན་བཅུ་ནས་བཅོ་བརྒྱད་བར་གྱི་སློབ་མ་མང་པོ་ཞིག་ Shiqanhe ཞེས་མངའ་རིས་ས་ཁུལ་སེང་གེ་ཁ་འབབ་གྲོང་རྡལ་གྱི་དམག་ཁུལ་དུ་བཅུག་ཏེ་ཕྱོགས་གཅིག་ནས་དམག་སྦྱོང་དང་ཕྱོགས་གཞན་ཞིག་ནས་རྒྱ་སྐད་རྒྱ་ཡིག་སློབ་ཁྲིད་དང་མཉམ་དུ་ཧིན་སྐད་ཡིག་ཀྱང་ཟབ་ཁྲིད་བྱད་བཞིན་ཡོད་པར་འཁོད་འདུག མ་ཟད་འཛིན་རིམ་བཅུ་གཅིག་དང་བཅུ་གཉིས། དེ་བཞིན་དེ་དང་ཚད་མཉམ་གྱི་བོད་ཀྱི་སློབ་མ་རྣམས་ལོ་ངོ་གསུམ་ནས་ལྔ་བར་གྱི་དུས་བཀག་བཟོས་ཏེ་བཅིངས་གྲོལ་དམག་ཁོངས་སུ་འཇུག་བཞིན་ཡོད་པ་དང་། ལོ་ལྔའི་རྗེས་སུ་བོད་སློབ་དེ་དག་ལ་གདམ་གསེས་སྤྲད་དེ་དམག་ཁོངས་སུ་འདུག་འདོད་ཡོད་རིགས་ལ་མཐོ་རིམ་གྱི་སློབ་སྦྱོང་སྤྲོད་མུས་ཡིན་པར་གསལ་འདུག གཞི་རྩའི་རྒྱ་ནག་གིས་བོད་པའི་སློབ་ཕྲུག་རྣམས་རྒྱ་ནག་གི་བཅིངས་གྲོལ་དམག་ཁོངས་སུ་འཇུག་དགོས་དོན་ནི། འདས་བའི་ལོ་ངོ་གཉིས་ཀྱི་ནང་དུ་རྒྱ་དཀར་གཉིས་ཀྱི་དབར་མཐའ་མཚམས་དང་འབྲེལ་བའི་དཀའ་ངལ་བསྟུད་མར་བྱུང་བའི་ཁྲོད་རྒྱ་ནག་གི་དམག་མི་རྣམས་ཀྱིས་འཕགས་བོད་མཐའ་མཚམས་ཀྱི་ས་མཐོའི་གནམ་གཤིས་ལ་བསྟུན་འགྱུར་བྱེད་མ་ཐུབ་པར་ནད་གཅོང་དུ་འགྱུར་བཞིན་ཡོད་པར་བརྟེན། མཐོ་སྒང་གི་གྲང་ངར་དང་ས་བབ་ལ་བསྟུན་འགྱུར་བྱེད་ཐུབ་མཁན་དང་། བོད་མཐོ་སྒང་གི་ས་གཤིས་ལ་རྒྱུས་མངའ་ཡོད་པའི་བོད་སློབ་དག་དམག་ཁོངས་སུ་བཅུག་པ་ཡིན་ན་ཕན་ཐོག་ཡོང་གི་ཡོད་པར་ངོས་འཛིན་བྱེད་བཞིན་ཡོད་པ་རེད། Times now གསར་ཁང་གིས་སྤེལ་བའི་གནས་ཚལ་དེའི་ནང་གསལ་ལྟར་ན། ད་ལྟའི་ཆར་རྒྱ་གཞུང་གིས་འབྲས་སྤུངས་དགོན་པའི་ཉེ་འཁྲིས་སུ་འགྲེམས་འཇོག་བྱས་པའི་བཅིངས་གྲོལ་དམག་ནང་བོད་དམག་ཆིག་སྟོང་ལྷག་ཡོད་པ་དང་། དེ་བཞིན་ལྷ་སའི་གཡས་གཡོན་དུ་ཡང་བཅིངས་གྲོལ་དམག་ཁོངས་ནས་དམག་སྦྱོང་སྣ་མང་ཐོབ་ཡོད་པའི་བོད་མི་ ༢༡༦ ཙམ་འགྲེམས་འཇོག་བྱས་པར་ངོ་སྤྲོད་ཀྱིས། སྤྱིར་བོད་སློབ་རྣམས་ཀྱིས་བཅིངས་གྲོལ་དམག་ཁོངས་སུ་འཛུལ་ཞུགས་བྱེད་རྒྱུར་དགའ་མོས་བྱེད་ཀྱི་མེད་ཀྱང་། རྒྱ་ནག་གིས་ཨུ་ཚུགས་མཐར་སྐྱེལ་གྱིས་ད་དུང་ཡང་བོད་སློབ་མང་པོ་བཙན་དབང་གིས་དམག་ཁོངས་སུ་འཇུག་བཞིན་པ་ཡོངས་གྲགས་གནང་འདུག རྩ་བའི་སྔར་ལོར་ཟླ་ ༩ ནང་བོད་རང་སྐྱོང་ལྗོངས་ཟེར་བའི་ཁྱབ་ཁོངས་ནག་ཆུ་ཁུལ་གྱི་གྲོང་སྡེ་ལས་ཁུངས་དང་སློབ་གསོ་ལས་ཁུངས། སྤྱི་བདེ་ལས་ཁུངས། དེ་བཞིན་མེ་འགོག་རུ་ཁག་བཅས་ཀྱིས་ནག་ཆུ་ཁུལ་གྱི་གཏན་སྡོད་སློབ་གྲྭར་ལོ་ན་ ༡༣ ནས་ ༡༩ བར་གྱི་བོད་རིགས་བྱིས་པ་ ༥༠༠ ཙམ་ལ་དམག་གི་སྦྱོང་བརྡར་ཐེངས་མང་སྤྲད་ཡོད་པ་དང་། དེ་བཞིན་ཀོང་པོ་ཁུལ་གྱི་བྲག་གསུམ་མཚོའི་སར་དབྱར་ཁའི་གུང་སེང་ལ་ཕེབས་པའི་ལྷ་སའི་ཁུལ་གྱི་སློབ་ཆུང་དང་སློབ་འབྲིང་ནང་སློབ་གཉེར་གནང་མཁན་ལོ་ངོ་༨ ནས་ ༡༦ བར་གྱི་བོད་པའི་བྱིས་པ་བརྒྱ་ཕྲག་གཅིག་ལ་གངས་ལྗོངས་ཁྲ་ཕྲུག་དམག་དོན་དབྱར་སྒར་ཞེས་པའི་མིང་ཐོག་ནས་དམག་སྦྱོང་སྤྲད་པའི་གནས་ཚུལ་ཕྱི་ལ་ཐོན་ཡོད་པ་དང་། དམག་སྦྱོང་ཁྲོད་ཀྱི་སློབ་མ་རྣམས་རྒྱལ་སྲུང་དང་འབྲེལ་བའི་སློབ་སྦྱོང་བྱེད་སའི་བསྟི་གནས་སུ་ཁྲིད་དེ་རྒྱལ་ཞེན་དང་རྒྱལ་ཁབ་བདེ་སྲུང་། དྲག་པོའི་དམག་གི་རིང་ལུགས་སོགས་ཀྱི་སྐོར་ལ་སྦྱོང་བརྡར་སྤྲད་དེ་རྒྱ་ནག་ལ་དགའ་ཞེན་ཆེ་བའི་དཔུང་ཁག་ཅིག་གསར་འཛུགས་བྱེད་ཐབས་སུ་དམིགས་པ་ཞིག་ཡིན་ར་སྤྲོད་བྱུང་ཡོད་པ་རེད།

དེ་རིང་ཕྱི་དྲོ་ཕྱག་ཚོད་བཞི་བའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ།  སྲིད་སྐྱོང་དང་བཀའ་བློན་ལྷན་རྒྱས། གཞན་ཡང་སྤྱི་འཐུས་རྒྱུན་ལས་རྣམས་དང་ལྷན་ཁང་ཁག་གི་དྲུང་ཆེ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་སུ་ལྷན་འཛོམས་ཀྱིས།  ཁ་ཉིན་ཕྱི་ཟླ་ ༣ ཚེས་ ༢༧ ཉིན་གྱི་ཞོགས་པའི་ཆུ་ཚོད་ལྔ་པ་ཡས་མས་སུ་རང་ལོ་ ༨༡ ཡིན་པའི་བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ་རང་ལུས་མེར་སྲེག་བཏང་ནས་འདས་གྲོངས་སུ་གྱུར་བའི་རྒྱལ་གཅེས་ཁོང་ལ་གདུང་སེམས་མཉམ་སྐྱེད་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་སོང་།སྐབས་དེར་དགེ་འདུན་པ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་ཀྱིས་ཞལ་འདོན་བསྔོ་སྨོན་གསུང་འདོན་གནང་རྗེས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་གཅེས་བ་བཀྲ་ཕུན་དམ་པ་དེ་ཉིད་ཀྱི་ལོ་རྒྱུས་སྒྲོག་སྦྱོང་གནང་བ་དང་སྦྲགས།  ད་ལྟའི་ཆར་རྒྱ་ནག་གི་དྲག་གནོན་གྱི་རྐྱེན་གྱིས་ཁོང་གི་སྐུ་ཕུང་ནང་མིར་རག་སོན་བྱུང་མིན་གྱི་ཐད་ནས་གནས་ཚུལ་ཤེས་རྟོགས་དཀའ་བའི་གནས་སུ་གྱུར་ཡོད་པར་འགྲེལ་བརྗོད་ཀྱིས། དམ་པ་ཁོང་དང་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་ཡོད་པར་གསུངས་སོང་། རྩ་བའི་བཀྲ་ཕུན་ལགས་ནི་རྔ་པའི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་ཕུར་རྩ་ཚང་ནས་ཡིན་པ་དང་། དུས་རྟག་ཏུ་བོད་དོན་ལ་སེམས་ཁུར་དང་ལ་རྒྱ་ཡོད་མཁན་ཞིག་ཡིན་པ་དང་། ལྷག་པར་དུ་ཁོང་གིས་ ༢༠༢༡ ལོར་བརྒྱད་ཅུའི་གྱ་སྟོན་སྐབས་སུ་༸རྒྱལ་བ་རིན་པོ་ཆེའི་ཐུགས་རྗེ་བྱིན་རླབས་ཀྱིས། བོད་ལ་སྐྱིད་པའི་ཉི་མ་ཞིག་ཤར་རྒྱུ་ཡོད་པ་གཏན་འཁེལ་ཡིན་པས་ན་ཆུང་གཞོན་ནུ་ཚོའི་སེམས་ཤུགས་མ་ཆགས་ཞེས་གཏམ་བཤད་སྤེལ་མྱོང་ཡོད་པ་རེད་འདུག གཞི་རྩའི་འདས་པའི་ཉིན་ཤས་ནང་བོད་ཁམས་སྐྱེ་རྒུ་མདོ་གྲོང་ཁྱེར་གྱི་ཁུལ་རིམ་པའི་ཉེན་རྟོག་ལས་ཁུངས་མདུན་དུ་བོད་མི་ཞིག་གིས་རང་ལུས་མེར་བསྲེགས་གནང་ཡོད་པའི་གནས་ཚུལ་ཐོན་ཡོད་ལ། དེའི་གོང་སྟེ་ཕྱི་ཟླ་ ༢ པའི་ནང་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏྭ་ལའི་མདུན་དུ་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་བགཏང་སྟེ་ཁོང་རྗེས་སུ་སྨན་ཁང་ནང་འདས་གྲོངས་སུ་འགྱུར་བའི་གནས་ཚུལ་ཐོན་ཡོད་པ་དེ་ལྟར་ཡང་། རྒྱ་གཞུང་གིས་ཆེས་དམ་དྲག་གི་གནས་སྟངས་འོག སྐྱེ་རྒུ་མདོ་གྲོང་ཁྱེར་ནང་རང་ལུས་མེར་བསྲེགས་བཏང་མཁན་སུ་ཡིན་གྱི་ཞིབ་ཕྲའི་གནས་ཚུལ་དང་། དེ་བཞིན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་དང་འབྲེལ་བའི་སྔ་རྗེས་གནས་ཚུལ་ཁ་གསལ་ཞིག་ཐོན་ཁག་པོར་གྱུར་ཡོད་པ་རེད། དེའི་ཁྲོད་དེ་རིང་ Nextshark ཞེས་པའི་གསར་ལམ་དུ་ཐོན་པའི་གནས་ཚུལ་ཞིག་གི་ནང་།  ཕྱི་ཕྱོགས་ཀྱི་གསར་ཁང་མང་པོས་ཟླ་ ༢ པའི་ཚེས་ ༢༥ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་རྒྱ་གཞུང་ལ་ངོ་རྒོལ་གྱིས་སྐུ་ལུས་མེར་བསྲེགས་གནང་མཁན་གྲགས་ཅན་ན་གཞོན་གཞས་བ་ཚེ་དབང་ནོར་བུ་ལགས་ཀྱི་སྐོར་ནས་གླེང་སློང་དང་འདྲི་རྩད་མང་པོ་བྱུང་བའི་མཚམས་འདིར། རྒྱ་ནག་གི་ཕྱི་སྲིད་ལས་ཁུངས་ཀྱིས་ཚེ་དབང་ནོར་བུ་ལགས་ད་ལྟ་གྲོངས་མེད་པར་སྨན་བཅོས་བྱེད་བཞིན་པར་བརྗོད་པ་ཞིག་ལུང་འདྲེན་བྱས་འདུག དེ་ཡང་རྒྱ་ནག་གི་ཕྱི་སྲིད་བློན་ཆེན་ལས་ཁུངས་ཀྱི་གནས་ཚུལ་སྤེལ་བ་དེའི་ནང་དུ།  རང་ལུས་མེར་བསྲེགས་གཏང་མཁན་གང་ཟག་དེར་དེ་སྔོན་ནས་སེམས་ཁམས་དང་འབྲེལ་བའི་ནད་གཞི་ཞིག་ཡོད་པ་མ་ཟད།  ཁོང་གིས་ཐེངས་ཁ་ཤས་ལ་རང་སྲོག་བཅད་ཐབས་བྱས་མྱོང་ཡོད་པ་དང་། ཁོང་ད་ལྟའང་འདས་གྲོངས་སུ་གྱུར་མེད་པར་སྨན་བཅོས་བྱེད་མུས་ཡིན་པར་འགྲེལ་བརྗོད་བྱས་འདུག གཞི་རྩའི་ཕྱི་ཕྱོགས་སུ་གནས་ཚུལ་འབྱོར་ཁག་ལ་གཞིགས་ན། རྒྱལ་གཅེས་པ་དམ་པ་དེ་ཉིད་ལྷ་ས་གྲོང་ཁྱེར་ནང་གི་རང་སྐྱོང་ལྗོངས་མི་མང་སྨན་ཁང་དུ་གཟུགས་གཞི་མིས་ཚིག་དྲག་པས་རྐྱེན་གྱིས་འདས་གྲོངས་སུ་གྱུར་ཡོད་པའི་གནས་ཚུལ་ཐོན་པ་མ་ཟད། བཞུགས་སྒར་ཁུལ་གྱི་ཚོགས་སྐྱིད་ཁག་གིས་དམ་པ་ཁོང་གི་འདས་རྐྱེན་དང་འབྲེལ་ནས་གདོང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གནང་བ་མ་ཟད། ཟླ་བ་སྔོན་མའི་ཚེས་ ༡༤ ཉིན།   བོད་མིའི་སྒྲིག་འཛུགས་ཆོས་རིག་ལས་ཁུངས་ནས་དམ་པ་དེ་ཉིད་སྐུ་འདས་གྲོངས་སུ་གྱུར་བའི་གནས་ཚུལ་དང་འབྲེལ་ནས་ཆེད་དུ་གདུང་སེམས་མཉམ་སྐྱེད་ཀྱི་མྱ་ངན་རྗེས་དྲན་སླད་མཆོད་འབུལ་སྨོན་ལམ་ཞིག་ཚོགས་གནང་ཡོད་པ་རེད།གང་ལྟར་ཐེངས་འདི་རྔ་པའི་ནང་སླར་ཡང་རང་ལུས་མེར་བསྲེགས་ཀྱི་གནས་ཚུལ་ཐོན་པ་དང་སྦྲགས།ཁ་སང་ཨ་རིའི་ཁུལ་གྱི་ནེའུ་ཡོག་དང་ནེའུ་ཇིར་སི་ས་གནས་སུ་བོད་ཀྱི་གཞོན་ནུ་ཚོགས་པ་དང་བོད་རིགས་སྤྱི་མཐུན་ཚོགས་པ་སོགས་ཀྱིས་ཉེ་ཆར་རང་ལུས་མེར་བསྲེགས་བཏང་བའི་རྒྱལ་གཅེས་བ་གསུམ་གྱི་ཆེད་རྒྱ་ནག་གི་གཞུང་ཚབ་ཁང་གི་མདུན་དུ་མར་མེ་ཁྲོམ་སྐོར་དང་ཞི་བའི་རྔམ་སྟོན་ཁྲོམ་སྐོར་གནང་སྟེ་རྒྱལ་གཅེས་བ་གསུམ་ལ་གདུང་སེམས་མཉམ་སྐྱེད་གནང་བ་བརྒྱུད། རང་ལུས་མེར་བསྲེགས་ཀྱི་གནད་དོན་དེ་ལས་བོད་ནང་གི་རྒྱ་ནག་གི་གདུག་རྩུབ་ཀྱི་སྲིད་བྱུས་དེ་གསལ་བོར་ཕྱི་ལ་མངོན་ཡོད་པ་ཞིག་ཡིན་པའི་གཏམ་བཤད་གནང་སྟེ། བོད་མི་རྣམས་ས་གནས་གང་དུ་ཡོད་མེད་ལ་ལྟོས་མེད་ཀྱིས་བོད་སྤྱི་བའི་རྩ་དོན་འཐབ་རྩོད་ལ་འགན་འཁྲི་ལེན་དགོས་བའི་གཞེན་སྐུལ་གནང་འདུག