རྒྱ་ནག

ཉེ་ལམ་རྒྱལ་སྤྱིའི་གསར་ལམ་ཁག་ཏུ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་གནས་ཚུལ་ཁག་གཅིག་ཐོན་བཞིན་པ་ལྟར་དེ་རིང་ DNA གསར་ཁང་གིས་རྒྱལ་ཁབ་ཁག་གི་ཆབ་སྲིད་དང་རིག་གཞུང་ཐོག་བཤད་པ་དང་དཔྱད་རྩོམ་སྤེལ་མཁན་སྐུ་ཞབས་ Prasenjit Chowdhury ལགས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དང་དེར་རྒྱ་དཀར་ནག་གཉིས་ཀྱི་བཞེངས་ཕྱོགས་སོགས་དང་འབྲེལ་བའི་དཔྱད་གཏམ་ཞིག་སྤེལ་འདུག དེའི་ནང་སྐུ་ཞབས་ Prasenjit Chowdhury ལགས་ཀྱིས་ཉེ་ཆར་བོད་རང་སྐྱོང་ལྗོངས་དམར་ཤོག་ཚོགས་པའི་དྲིལ་བསྒྲགས་ཚན་པའི་འགན་འཛིན་གཞོན་པ་ Wang Neng Sheng དང་། པེ་ཅིང་དུ་རྟེན་གཞི་བྱས་པའི་བོད་རིག་པའི་ཞིབ་འཇུག་བསྟི་གནས་ཁང་གི་སྤྱི་ཁྱབ་ Zha Luo ཟེར་བ་གཉིས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ནི་རྒྱ་ནག་རྒྱལ་ནང་གི་གནད་དོན་དང་འབྲེལ་བ་ཆགས་ཀྱི་ཡོད་སྟབས། རྒྱ་གར་གཞུང་ལ་ཐེ་བྱུས་གནང་རྒྱུའི་དབང་ཆ་གང་ཡང་མེད་པ་མ་ཟད་གལ་སྲིད་རྒྱ་གར་གཞུང་ནས་བཙན་བྱོལ་བོད་གཞུང་ཟེར་བས་བདམས་པའི་༸སྐུའི་ཡང་སྲིད་ལ་ངོས་འཛིན་ཞུ་ཚེ་རྒྱ་གར་དང་རྒྱ་ནག་དབར་གྱི་ཆབ་སྲིད་གནད་དོན་ལ་དོ་ཕོག་ཤུགས་ཆེར་འགྲོ་ངེས་ཡིན་པའི་ཉེན་བརྡ་བཏང་བ་ལུང་འདྲེན་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་ཨ་རིའི་གྲོས་ཚོགས་ཀྱིས་རྒྱ་ནག་ནས་ངོས་འཛིན་ཞུས་པའི་༸སྐུའི་ཡང་སྲིད་ལ་ངོས་ལེན་མེད་ཅེས་ཡོངས་བསྒྲགས་གནང་བ་ལྟར། རྒྱགར་གཞུང་ནས་རྒྱ་དཀར་ནག་གཉིས་ཀྱི་གནད་དོན་ཐོག་རྒྱ་ནག་ལ་ཆེས་དགའ་དགའ་དང་ཞི་འཇམ་གྱི་རྣམ་འགྱུར་མ་བསྟན་པར་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་བཞེངས་ཕྱོགས་བརྟན་པོ་ཞིག་འཛིན་དགོས་པའི་སྐུལ་མ་གནང་འདུག ཁོང་ནས་དེ་སྔ་ཕྱི་ལོ་ ༡༩༥༤ ལོར་རྒྱ་གར་གྱི་སྲིད་བློན་ནེཧ་རུ་མཆོག་གིས་བོད་དེ་རྒྱ་ནག་གི་ཆ་ཤས་ཡིན་པའི་གྲོས་མཐུན་ལ་མཚན་རྟགས་བསྐྱོན་པ་དང་། ཕྱི་ལོ་ ༢༠༠༣ རྒྱ་ནག་གིས་འབྲས་ལྗོངས་ས་མཚམས་ས་ཁུལ་ཁག་ཅིག་རྒྱ་ནག་གི་ཆ་ཤས་ཡིན་སྐོར་བརྗོད་སྐབས་གནད་དོན་འགྲིག་འཇགས་ཡོངས་ཐབས་སུ་སྲིད་བློན་ Atal Bihari Vajpayee མཆོག་གིས་སླར་བོད་དེ་རྒྱ་ནག་གི་ཤས་ཡིན་སྐོར་གསུངས་པ་དང་། དེ་བཞིན་ད་ལྟའི་རྒྱ་གར་གཞུང་འཛིན་ཚོགས་པའི་ངོས་ནས་གཞུང་འབྲེལ་གནད་ཡོད་མི་སྣ་རྣམས་བོད་མིའི་སྒྲིག་འཛུགས་ཀྱིས་གོ་སྒྲོག་ཞུས་པའི་མཛད་རིམ་ཐོག་མཉམ་ཞུགས་གནང་མི་ཆོག་པའི་བརྡ་ཁྱབ་བཏང་ཡོད་པ་སོགས་ལུང་འདྲེན་གྱིས་རྒྱ་གར་གཞུང་ནས་མུ་མཐུད་འདས་པའི་ལོ་ངོ་བཅུ་ཕྲག་ཁ་ཤས་ནང་གི་གནང་སྟངས་ལྟར་རྒྱ་ནག་ལ་འཇིགས་སྣང་ཁོ་ན་གནང་ནས་བཞུགས་ཚེ་རིམ་པས་རྒྱལ་སྤྱིའི་ཐོག་ནས་རྒྱ་གར་ལ་གཟིགས་ཕྱོགས་མི་ལེགས་པ་ཞིག་ཡོང་ངེས་ཡིན་པ་གསུངས་འདུག ལྷག་དུ་སྐུ་ཞབས་ Prasenjit Chowdhury ལགས་ནས་རྒྱ་གར་གཞུང་ནས་རྒྱ་ནག་གི་འདོད་མོས་ལྟར་འདས་པའི་ལོ་ངོ་དེ་དག་ཁྲོད་དུ་བོད་འདི་རྒྱ་ནག་གི་ཆ་ཤས་རེད་ཅེས་བརྗོད་པ་བཞིན་ཡོད་ཀྱང་། རྒྱ་དཀར་ནག་དབར་གྱི་ས་མཚམས་གནད་དོན་དེ་ནི་ད་ལྟའང་ཀྱ་གེ་ཀྱོག་གེ་ངང་གནས་ཡོད་པར་འགྲེལ་བརྗོད་དང་འབྲེལ་ཏེ་རྒྱ་གར་གཞུང་ནས་འདས་པའི་ལོ་ངོ་བཅུ་ཕྲག་ཁ་ཤས་གོང་ནས་བོད་ཐོག་འཛིན་པའི་སྲིད་བྱུས་ལ་གྲུབ་འབྲས་ཐོན་ཡོད་མེད་ལ་དཔྱད་ཞིབ་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་རྒྱ་ནག་ལ་རྒྱབ་སྐྱོར་གནང་ཚེ་དེ་སྔ་རྒྱ་གར་གྱིས་བོད་ཐོག་ནོར་འཁྲུལ་བཟོས་ཟིན་པའི་སྲིད་བྱུས་ཐོག་ཁ་སྣོན་ཆགས་རྒྱུ་ཡིན་པ་དང་། རྒྱ་ནག་གཞུང་ནས་ཀྱང་༸སྐུའི་ཡང་སྲིད་ཀྱི་གནད་དོན་དེ་རྒྱ་དཀར་ནག་དབར་གྱི་ས་མཚམས་གནད་དོན་དང་འབྲེལ་བ་བཏགས་ཚེ་དེས་རྒྱ་ནག་གཞུང་ནས་རྒྱ་གར་གཞུང་ལ་ཡིད་ཆེས་མེད་པའི་རྣམ་པ་ཞིག་མཚོན་གྱི་རེད་ཅེས་ནན་པོ་གསུངས་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ཕྱི་ཟླ་ ༣ ཚེས་ ༡༨ ཉིན་ Reuters  གསར་ཁང་གི་བཅར་འདྲིར་བཀའ་ལན་མཛད་སྐབས་མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་ངོས་འཛིན་བྱས་པའི་གཅིག་བཅས་གཏན་འབེབས་བྱུང་ཚེ། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས་རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་ནན་བསྩལ་བ་དང་ཆབས་ཅིག མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་ཞག་མཛད་བཞིན་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པའི་ནང་ལ་འཁྲུངས་སྲིད་སྐོར་བཀའ་བསྩལ་ཡོད་པ་རེད། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་ནས་༸སྐུའི་ཡང་སྲིད་ཀྱི་གནད་དོན་དང་འབྲེལ་ཏེ་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མགོན་པོ་༸གང་ཉིད་མཆོག་གི་ཡང་སྲིད་དེ་༸རྒྱལ་མཆོག་༸རྗེ་དགེ་འདུན་གྲུབ་པའི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང་། བོད་མི་གཙོས་པའི་དད་ལྡན་མང་ཚོགས་རྣམས་ལ་གོ་བསྡུར་གྱིས་༸རྒྱལ་དབང་༸སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་གནང་རྒྱུ་ཡིན་པ་མ་ཟད། གལ་སྲིད་༸སྐུ་ཕྲེང་བཅོ་ལྔ་པའི་ཡང་སྲིད་དགོས་གལ་དུ་གཟིགས་ཚེ་དེའི་གནང་སྒོའི་འགན་དབང་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་གི་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་ཚོས་མཚོན་པའི་སྲིད་དབང་འཛིན་པ་སུ་ཞིག་ལའང་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པ་བཅས་ཀྱི་བཀའ་སློབ་ནན་པོ་ཕེབས་ཡོད་པ་རེད།  

རྒྱ་ནག་གིས་ཨ་རིའི་ནང་བཟོ་སྐྲུན་བྱས་པའི་ Top Gun འམ་མེ་དམའི་ཡང་རྩེ་ཞེས་པའི་གློག་བརྙན་གྱི་སྔོན་འགྲོའི་ཁྱབ་བསྒྲགས་ཀྱི་འཁྲབ་སྟོན་པ་ Tom Cruise ལགས་ཀྱི་སྟོད་གོས་སྒང་གི་ཐེ་ཝན་དང་ཉི་ཧོང་གི་རྒྱལ་དར་གྱི་མཚོན་རྟགས་དེ་མེད་པར་བཟོས་པར་བརྟེན་གནད་དོན་དེ་སྤྱི་ཚོགས་ཀྱི་དྲྭ་ལམ་ཁག་ཏུ་གླེང་རྙོག་རང་བཞིན་ཞིག་ཏུ་གྱུར་འདུག དེ་རིང་གསར་ལམ་ཁག་ཏུ་མེ་མདའི་ཡང་རྩེ་ཞེས་པའི་གློག་བརྙན་དེ་དང་ཐོག་ ༡༩༨༦ ལོར་ཐོག་མར་འཁྲབ་ཁྲིད་བྱས་ཏེ་ཁྲོམ་རར་ཐོན་པར་མི་མང་གིས་དགའ་བསུ་ཆེན་པོ་ཐོབ་པ་ལྟར། ལོ་ངོ་ ༣༤ རྗེས་སུ་སླར་གློག་བརྙན་དེའི་མུ་འབྲེལ་གཉིས་པ་དེ་ཕྱི་ལོ་ ༢༠༢༠ ནང་དངོས་སུ་ཁྲོམ་རར་གཟིགས་འབུལ་ཞུ་འཆར་ཡོད་ཀྱང་། སྟབས་མ་ལེགས་པ་ཞིག་ལ་ཐེངས་འདིའི་གློག་བརྙན་ནང་གློག་བརྙན་འཁྲབ་སྟོན་པ་སྐུ་ཞབས་ Tom Cruise ལགས་ཀྱི་སྟོད་གོས་སྟེང་གི་ཐེ་ཝན་དང་ཉི་གོང་གི་རྒྱལ་དར་མེད་པར་ནག་གསུབ་བཏབ་ཡོད་སྟབས། དེ་ནི་ཕྱོགས་གཅིག་ནས་རྒྱལ་སྤྱིའི་ཁྲོམ་རའི་ཁྲོད་ནས་རྒྱ་ནག་གི་ཉེན་ཁ་གཡོལ་ཐབས་ཤིག་དང་ཕྱོགས་གཞན་ཞིག་ནས་གློག་བརྙན་དེ་བཟོ་སྐྲུན་གནང་བར་རྒྱ་ནག་གིས་མ་རྩ་ཆེད་འཛུགས་བྱས་ཡོད་པར་བརྗོད་བཞིན་འདུག དེ་རིང་ The Hollywood Reporter གསར་ཁང་གིས་རྒྱ་ནག་ནི་འཛམ་གླིང་གི་གློག་བརྙན་གྱི་ཁྲོམ་ཆེ་ཤོས་གཉིས་པ་དེ་ཡིན་སྟབས་གློག་བརྙན་སྒྲིག་སྦྱོར་བས་རྒྱ་ནག་གི་མངོན་འདོད་ལྟར་ཉི་ཧོང་དང་ཐེ་ཝན་གྱི་རྒྱལ་དར་གྱི་མཚོན་རྟགས་དེ་ནག་གསུབ་བཏང་ནས་པེ་ཅིན་སྲིད་གཞུང་དང་མཉམ་འབྲེལ་ལམ་གསར་འཛུགས་ཀྱིས་གློག་བརྙན་དེ་གཟིགས་འབུལ་ཞུ་རྩིས་ཡོད་པར་བརྗོད་འདུག པེ་ཅིན་གྱི་མ་རྩ་ཆེད་གཏོང་བ་དང་འབྲེལ་བ་ཐད་ཀར་ཡོད་མེད་གང་ཞིག་ལ་ Hollywood གློག་བརྙན་སྒྲིག་བཟོ་ཁང་གིས་དུས་རྒྱུན་ནས་གློག་བརྙན་སྒྲིག་སྦྱོར་སྐབས་སུ་རྒྱ་ནག་གི་དཔོན་རིགས་དང་རྒྱལ་ཞེན་ཆེ་བའི་མི་མང་ལ་གནོད་པའི་ཡིག་ངག་དང་རི་མོ་སོགས་ཀྱི་མཚོན་དོན་གང་ཡང་འཇོག་གི་མེད་པར་འཁོད་འདུག ཐེ་ཝན་དང་ཉི་ཧོང་གཉིས་ལ་ལོ་རྒྱུས་ཀྱི་ཁྲོད་དུ་རྒྱ་ནག་དང་ལྷན་དུ་འཁོན་སེམས་རང་བཞིན་གྱི་འབྲེལ་ལམ་ཞིག་ཡོད་པས་མེ་མདའི་ཡང་རྩེ་ཞེས་པའི་ཨ་རིའི་དམག་མིས་ཐེ་ཝན་དང་ཉི་ཧོང་ལ་འབྲེལ་བ་བཙུགས་པའི་གློག་བརྙན་དེ་ནི་རྒྱ་ནག་གིས་དམ་དྲག་བྱེད་ངེས་ཞིག་ཡིན་ཀྱང་ད་ཆ་རྒྱལ་ཁབ་དེ་གཉིས་ཀྱི་རྒྱལ་དར་གློག་བརྙན་ལས་ནག་གསུབ་བཏང་ཟིན་པར་གནས་སྟངས་དེ་ཡོངས་སུ་འགྱུར་བ་ཐེབས་ཡོད་པར་བརྗོད་འདུག སྔོན་ཆད་ཨ་རིའི་ངོས་ནས་བོད་ནང་གི་ལོ་བདུན་ལྟ་བུའི་གློག་བརྙན་དེ་བཟོ་སྐྲུན་བྱས་ཡོད་པ་ལྟར་གློག་བརྙན་དེའི་ནང་རྒྱ་ནག་གི་ཁྲིམས་ལུགས་དབང་འཛིན་ལ་སྐྱོན་བརྗོད་བྱས་ཡོད་ཀྱང་། དེ་ནས་བཟུང་ཨ་རིའི་ངོས་ནས་རྒྱ་ནག་གི་ཆེ་མཐོང་ལ་གནོད་པའི་གློག་བརྙན་གཅིག་ཀྱང་བཟོ་སྐྲུན་བྱས་མེད་པ་མ་ཟད། རྒྱ་ནག་གི་ནམ་ཡང་བརྟན་བརླིང་རང་བཞིན་ལྡན་པའི་འཕྲུལ་ལས་སྔོན་ཐོན་གྱི་ཚོང་གྲོགས་རྒྱལ་ཁབ་ཅིག་ཡིན་པར་སྟོན་ཐབས་བྱེད་བཞིན་ཡོད་པ་བརྗོད་འདུག རྩ་བའི་མེ་དམའི་ཡང་རྩེ་ཞེས་པའི་གློག་བརྙན་དེ་ཐོག་མ་ ༡༩༨༦ ལོར་གསར་དུ་འཁྲབ་པ་ཞིག་ཡིན་ཞིང་། གློག་བརྙན་དེའི་འཁྲབ་ཁྲིད་པའི་སྟོད་གོས་ཀྱི་སྟེང་དུ་ཐེ་ཝན་དང་ཉི་ཧོང་གི་རྒྱལ་ཁབ་ཀྱི་རྒྱལ་དར་ཡོད་ནའང་། གློག་བརྙན་དེའི་མུ་འབྲེལ་གཉིས་པའི་ནང་འཁྲབ་ཁྲིད་པའི་སྟོད་གོས་སྟེང་གི་རྒྱལ་དར་གྱི་རི་མོ་གཉིས་ཡོངས་སུ་བསྒྱུར་ཟིན་སྟབས་ཐེ་ཝན་དང་ཉི་ཧོང་གི་མང་ཚོགས་ཁྲོད་དུ་གནད་དོན་དེར་གླེང་སློང་ཆེན་པོ་གནང་བཞིན་པ་མ་ཟད་ཨ་རིའི་གློག་བརྙན་བཟོ་གྲྭ་དེར་རྒྱ་ནག་གིས་དངུལ་དངོས་གཉིས་ཀྱི་ཁེ་བཟང་སྤྲད་ཡོད་པར་དོགས་འདྲི་བྱེད་བཞིན་ཡོད་པ་རེད།

བོད་མཐོ་སྒང་ནི་བཟོ་ལས་ཐོན་སྐྱེད་ཆེས་དར་བཞིན་པའི་མི་གྲངས་མང་ཤོས་ཀྱི་ཨེ་ཤ་ཡའི་རྒྱ་དཀར་ནག་གཉིས་ཀྱི་དབར་གནས་རྒྱལ་ཁབ་ཅིག་ཡིན་པར་བརྟེན་དངོས་ཟོག་ཐོན་སྐྱེད་ཀྱི་དུད་རླངས་དང་རྫས་འགྱུར་གྱིས་བོད་མདོ་དབུས་མཐོ་སྒང་ངམ་འཛམ་གླིང་གི་སྣེ་གསུམ་པར་གྲགས་པའི་འཁྱགས་རོམ་དང་གངས་རི་ཞུ་ཚད་ལྡབ་འགྱུར་གྱིས་མང་དུ་འཕེལ་བཞིན་ཡོད་སྟབས་བོད་མཐོ་སྒང་གི་ཁོར་ཡུག་གི་གནས་བབ་ཆེས་ཉེན་ཚབ་ཅན་དུ་འགྱུར་བཞིན་ཡོད་པ་གསུངས་འདུག དེ་རིང་གསར་གནས་ཁག་ཏུ་བོད་མཐོ་སྒང་གི་འཁྱགས་རོམ་ཞུ་ཚད་དང་རི་བོ་ཧི་མཱ་ལ་ཡའི་གནམ་གཤིས་འགྱུར་ལྡོག་གི་ཆེད་མཁས་པ་སྐུ་ཞབས་ Michael Buckley ལགས་ཀྱིས་འཛམ་གླིང་གི་རྩིས་རིག་གི་གྲུབ་དོན་ལྟར་ན། ང་ཚོའི་འཛམ་གླིང་འདིའི་ཁོར་ཡུག་གི་འཇིགས་ཉེན་དེ་ཕྱིར་ལྡོག་ཐབས་མེད་པའི་ཉེན་ཁ་ཞིག་འཕྲད་རྒྱུ་ཡིན་སྟབས་མང་ན་ལོ་བཅུ་གཉིས་དང་ཉུང་ན་ལོ་བདུན་གྱི་རྗེས་སུ་སྤྱི་ཡོངས་ཀྱི་འཛམ་གླིང་གི་ཁོར་ཡུག་ཉམས་ཉེས་ཀྱི་དཀའ་ངལ་མང་དག་ཅིག་འཕྲད་རྒྱུ་ཡིན་པ་ལུང་འདྲེན་གྱིས་ས་སྒང་རིང་མོ་སྟེང་གི་ཤེས་ཡོན་གྱི་ལྟེ་གནས་བདུན་སྟོང་ལྷག་མཉམ་འབྲེལ་གྱིས་འགྲོ་བ་མིའི་རིགས་ཀྱི་ཨ་མ་ལྟ་བུའི་རང་བྱུང་ཁོར་ཡུག་དེ་འཇིག་ཉེན་ཡོད་པའི་གནས་སུ་ལྷུང་ཡོད་པའི་གསལ་བསྒྲགས་གནང་ཡོད་ཀྱང་། བོད་མཐོ་སྒང་གི་གནམ་གཤིས་འགྱུར་ལྡོག་ཐད་ནས་ད་དུང་ལྷིང་འཇགས་སུ་གནས་ཡོད་པར་བརྗོད་འདུག ཆེད་མཁས་པས་འཛམ་གླིང་གི་ས་ཕྱོགས་གང་སར་ཁོར་ཡུག་གི་ཚོགས་འདུ་དང་གྲོས་ཆོད་མང་དུ་འཇོག་བཞིན་ཡོད་ནའང་རྒྱ་དཀར་ནག་གཉིས་ཀྱིས་དེ་ལྟ་བུར་ཚོགས་ཞུགས་བྱེད་ཀྱི་མེད་པར་བརྗོད་དེ། རྒྱ་དཀར་ནག་གི་དཔལ་འབྱོར་ཡར་རྒྱས་ཀྱི་མ་ཁོངས་ཡོད་ཚད་རྡོ་སོལ་ལ་བསྟེན་ཡོད་སྟབས་ཕྱི་ལོ་ ༢༠༣༠ ལོ་བར་དུ་རྒྱ་དཀར་ནག་གིས་རྡོ་སོལ་སྤྱོད་སྒོ་ཉུང་དུ་གཏོང་རྒྱུའི་རྣམ་འགྱུར་གང་ཡང་མངོན་གྱི་མེད་པར་བརྗོད་དེ་དེ་ནི་ཧ་ཅང་འཕྱི་དྲག་པའི་གནས་བབ་ཅིག་ཏུ་འགྱུར་ཉེན་ཡོད་པ་གསལ་བཤད་གནང་འདུག འཛམ་གླིང་གི་ལྷོ་བྱང་གཉིས་ཀྱི་འཁྱགས་རོམ་རྣམས་ཀྱང་ག་ལེར་ཞུ་འགོ་ཚུགས་བཞིན་པ་ལྟར།  འཛོམ་གླིང་གི་སྣེ་གསུམ་པར་འབོད་པའི་བོད་མཐོ་སྒང་གི་འཁྱགས་རོམ་རྣམས་ཀྱང་ཞུ་བཞིན་ཡོད་པར་འགྲེལ་བརྗོད་ཀྱིས།   འཛམ་གླིང་གི་མི་འབོར་གྱི་བརྒྱ་ཆ་བཅོ་ལྔའམ།   མི་གྲངས་ཐེར་འབུམ་གཅིག་དང་ཕྱེད་ཀ་ལྷག་བོད་མཐོ་སྒང་གི་འཁྱགས་རོམ་ནས་བཞུར་ཡོང་བའི་གཙང་ཆུ་ཁག་ལ་བརྟེན་ཡོད་པས་བོད་མཐོ་སྒང་གི་ཁོར་ཡུག་གི་འཇིག་ཉེན་ནི་ཨེ་ཤ་ཡའི་འཚོ་རྟེན་གྱི་ཉེན་ཁ་ཆེ་ཤོས་ཤིག་ཡིན་པ་མངོན་གསལ་གནང་འདུག་པ་དང་། ཁོང་གིས་ཚན་རིག་གི་གྲུབ་དོན་གྱི་སྟེང་ནས་འགྲེལ་བརྗོད་བྱས་པར་ལོ་རབས་བདུན་ཅུའི་ནང་གི་བོད་མཐོ་སྒང་གི་འཁྱགས་རོམ་ཞུ་ཚད་དང་དེ་རིང་གི་འཁྱགས་རོམ་ཞུ་ཚད་ལ་ཟུང་སྐར་བརྒྱུད་ནས་དཔྱད་འབྲས་སུ་དེང་སྐབས་འཁྱགས་རོམ་ཞུ་ཚད་དེ་ལྡབ་གཉིས་ཀྱིས་མང་དུ་འཕེལ་ཡོད་པ་ལུང་འདྲེན་གནང་འདུག   འཛམ་གླིང་ལྷོ་བྱང་གཉིས་མ་བརྩིས་པ་ཡིན་ན་བོད་མཐོ་སྒང་དུ་ས་འོག་གི་གཏན་འཇགས་འཁྱགས་རོམ་མང་ཤོས་ཀྱི་ས་ཁུལ་ཞིག་ཆགས་ཡོད་ཀྱང་ཕྱི་ལོ་ ༢༠༠༦ ལོ་ནས་བཟུང་བོད་མཐོ་སྒང་དུ་རྒྱ་ནག་གིས་མེ་འཁོར་ལྕགས་ལམ་གསར་རྒྱག་གིས་གཏེར་ཁ་སྔོག་འདོན་ཤུགས་ཆེར་བྱེད་བཞིན་པར་བརྟེན་བོད་མཐོ་སྒང་གི་གནམ་གཤིས་ཀྱི་དྲོད་ཚད་ཆེ་ཕྱིན་ཏེ། དྲོད་ཁང་གི་ཤུགས་རྐྱེན་དེ་རྫས་འགྱུར་གྱི་ནུས་པ་ལས་ལྡབ་ ༣༠ ལྷག་མང་དུ་འཕེལ་ཡོད་རྐྱེན་བོད་མཐོ་སྒང་གི་ས་འོག་གི་གཏན་འཇགས་འཁྱགས་རོམ་ཞུ་བཞིན་པ་མ་ཟད་བོད་དེ་བྱེ་ཐང་ཅན་དུ་འགྱུར་བཞིན་ཡོད་པ་ཡང་མངོན་གསལ་གནང་འདུག ཁོང་གིས་བོད་མཐོ་སྒང་གི་འཁྱགས་རོམ་འཇིག་ཉེན་རྐྱེན་གྱིས་རང་བྱུང་གི་གོད་ཆག་སྟེ་ཆུ་ལོག་དང་མཚོ་རླུང་གི་གནད་དོན་མང་དུ་འབྱུང་བཞིན་པར་བརྗོད་ཡོད་པ་མ་ཟད། བོད་མཐོ་སྒང་གི་གཙང་ཆུ་དག་ལ་རྒྱ་ནག་གིས་ཆ་མཛོད་མང་དུ་བརྒྱབས་ཡོད་པ་དག་ཀྱང་རིམ་བཞིན་སྐམ་རྒྱུ་ཡིན་པ་འགྲེལ་བརྗོད་ཀྱིས་དེ་དུས་འཛམ་གླིང་གི་མི་འབོར་ཐེར་འབུམ་མང་པོར་གཙང་ཆུའི་དཀའ་ངལ་འཕྲད་རྒྱུ་ཡིན་པ་ཚོད་དཔག་གནང་ནས་དཀའ་ངལ་དེ་ནི་མི་རིགས་ཀྱི་ལོ་རྒྱུས་ནང་ལོ་ངོ་སྟོང་ཕྲག་མང་པོའི་རིང་ལ་བྱུང་མ་མྱོང་བའི་གནད་དོན་ཞིག་ཡིན་པར་ཉེན་བརྡ་བཏང་འདུག ཁོང་གིས་ཚན་རིག་གིས་ཞིབ་འཇུག་གྲུབ་དོན་ལྟར་ན་རི་བོ་ཧི་མཱ་ལ་ཡི་འཁྱགས་རོམ་ཞུ་རྐྱེན་གཙོ་བོ་དེ་ནི་རྡོ་སོལ་དང་ཤིང་ནགས་བསྲེགས་པའི་དུག་རྫས་མང་པོ་གངས་ཁྲོད་དུ་འབབ་པའི་གནས་བབ་དང་འབྲེལ་ཡོད་པ་འགྲེལ་བརྗོད་གནང་བ་མ་ཟད། གངས་དང་འཁྱགས་རོམ་གྱིས་ཉི་འོད་ལྡོག་འཕྲོས་བྱེད་ཀྱིན་ཡོད་ནའང་བསྲེགས་སྦྱོར་གྱི་དུ་བ་ནག་པོ་དེས་ཉི་འོད་ཚུར་འཇུབ་ཀྱི་ཡོད་པ་གསལ་བཤད་གནང་བ་དང་སྦྲགས། རྒྱ་ནག་གི་བཟོ་ལས་ཀྱི་རྐྱེན་གྱིས་རི་བོ་ཧི་མཱ་ཡི་འཁྱགས་རོམ་ཞུ་ཚད་ཀྱི་བརྒྱ་ཆ་ལྔ་བཅུ་ལྷག་ཐོན་སྐྱེད་བྱེད་ཀྱི་ཡོད་པ་དང་། རྒྱ་གར་གྱིས་ཀྱང་བརྒྱ་ཆ་བདུན་ལྷག་ཞུ་བཞིན་ཡོད་པར་གསལ་བཤད་གནང་སྟེ་རྡོ་སོལ་བསྲེགས་པའི་དུག་རྫས་ནག་པོ་དེ་ནི་འཁྱགས་རོམ་ཞུ་བ་གཅིག་པོར་གནོད་པ་བྱེད་སྤྱད་ཙམ་མིན་པར་འགྲོ་བ་མིའི་རིགས་ཀྱི་འཕྲོད་བསྟེན་ལའང་གནོད་ཚབ་ཆེན་པོ་ཡོད་པ་འགྲེལ་བརྗོད་གནང་འདུག སྐུ་ཞབས་ Michael Buckley ལགས་ཀྱིས་འཛམ་གླིང་གི་ས་ཕྱོགས་གང་སར་ཁོར་ཡུག་གི་ཉེན་ཚབ་སྲུང་སྐྱོབ་ཀྱི་ཚོགས་འདུ་སྣང་མང་ཞིག་འཚོགས་བཞིན་ཡོད་ཀྱང་རྒྱ་ནག་གིས་དུས་རྒྱུན་ནས་ཚོགས་ཞུགས་བྱེད་ཀྱི་མེད་པར་མངོན་གསལ་གནང་བ་དང་ཆབས་ཅིག་ཏུ་བོད་མཐོ་སྒང་གི་ཁོར་ཡུག་ལ་ཉེན་ཁ་ཞིག་འཕྲད་ཚེ་ དེ་ནི་ཨེ་ཤ་ཡ་གཅིག་པོའི་དཀའ་ངལ་ཞིག་མིན་པར་གོ་ལ་སྤྱིའི་མི་གྲངས་སྟོང་མང་པོའི་འཚོ་གནས་ལ་དཀའ་ངལ་འཕྲད་རྒྱུ་ཡིན་སྟབས་བོད་མཐོ་སྒང་གི་ཁོར་ཡུག་གི་གནས་བབ་དེ་ཛ་དྲག་གི་ངོ་བོར་གནས་ཡོད་པའི་གསལ་བསྒྲགས་ཤིག་གནང་རྒྱུའི་དུས་ལ་བབ་འདུག་ཅེས་སྡོམ་ཚིག་གནང་འདུག རྩ་བའི་སྐུ་ཞབས་ Michael Buckley ལགས་ཀྱིས་དེ་སྔོན་བོད་ནང་གི་འཁྱགས་རོམ་ཞུ་འགྱུར་དང་འབྲེལ་བའི་ཕྱག་དེབ་ཅིག་ལྗགས་རྩོམ་གནང་སྟེ་རྒྱ་ནག་གིས་ལོ་རབས་ལྔ་བཅུ་བ་ནས་བཟུང་བོད་མི་རིགས་དམར་གསོད་བཏང་ཡོད་པ་ལྟར། ད་ཆ་རྒྱ་ནག་གིས་བཟོ་ལས་ཐོན་སྐྱེད་ཤུགས་ཆེར་བཏང་ནས་བོད་མཐོ་སྒང་གི་ཁོར་ཡུག་འབག་བཙོག་གི་ངོ་བོར་བཟོ་བཞིན་པ་མ་ཟད། གཙང་ཆུ་ཁག་ལ་ཆུ་མཛོད་གསར་རྒྱག་གིས་བོད་ཀྱི་གཙང་ཆུ་ཁག་ཕྱིར་རྒྱ་ནག་ཏུ་ནང་འདྲེན་བྱེད་ཀྱི་ཡོད་པ་རེད་ཅེས་པའི་དཔེ་དེབ་ཅིག་འདོན་སྤེལ་གནང་འདུག

ཨ་རིའི་ཕྱི་སྲིད་ལས་ཁུངས་སུ་ཚོགས་བཞིན་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ལྷན་ཚོགས་ཐེངས་གཉིས་པའི་ཉིན་མཐའ་མའི་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike Pence མཆོག་གིས་རྒྱ་ནག་ནང་གི་ཆོས་དད་རང་དབང་གི་གནས་སྟངས་སྐོར་གླེང་སྐབས་༸ཀུན་གཟིགས་༸པཎ་ཆེན་རིན་པོ་ཆེའི་གནས་སྟངས་འབུར་འདོན་དང་སྦྲགས་བོད་ནང་གི་ཆོས་དད་རང་དབང་གི་གནས་སྟངས་སྐྱོ་པོ་ཡོད་པ་གསུངས་འདུག སྲིད་འཛིན་གཞོན་པ་སྐུ་ཞབས་ Mike Pence མཆོག་གིས་རྒྱ་ནག་གཞུང་གིས་ཆོས་དད་རང་དབང་རྩིས་མེད་རྡོག་རོལ་གཏང་ཡུལ་ས་གནས་དང་ཆོས་ལུགས་ཁག་རེ་རེ་བཞིན་གསལ་འདོན་གནང་སྐབས། དེ་སྔ་ཕྱི་ལོ་ ༡༩༩༥ ལོར་རྒྱ་ནག་གཞུང་གིས་༸ཀུན་གཟིགས་༸པཎ་ཆེན་རིན་པོ་ཆེ་སྐུ་གོང་མའི་ཡང་སྲིད་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་སྐུ་འཁོར་དང་བཅས་པ་འཛིན་བཟུང་བཙན་ཁྲིད་བྱས་ཏེ་ད་ཆ་ཁོང་རྣམ་པ་གར་སོང་ཆ་མེད་གྱུར་ནས་ལོ་ཉི་ཤུ་རྩ་བཞི་འགྲོ་བཞིན་ཡོད་པ་འབུར་འདོན་དང་སྦྲགས། རྒྱ་ནག་གཞུང་གིས་འདས་པའི་ལོ་ངོ་དེ་དག་ཁྲོད་དུ་བོད་མིའི་ཆོས་དད་རང་དབང་ཐོག་བཟང་ཕྱོགས་ཀྱི་ཡར་རྒྱས་མེད་པར་མུ་མཐུད་དམ་དྲག་དང་སྔར་ལྷག་ཚོད་འཛིན་བྱེད་བཞིན་ཡོད་པ་གསུངས་འདུག སྲིད་འཛིན་གཞོན་པ་མཆོག་ནས་རྒྱ་ནག་གཞུང་གིས་ཤིན་ཅང་ཁུལ་དུ་ཁ་ཆེའི་ཆོས་དད་པ་ས་ཡ་གཅིག་ལྷག་འཛིན་བཟུང་བཀག་ཉར་བྱེད་བཞིན་པའི་གནད་དོན་དང་། རྒྱ་ནག་ཁྱོན་ཡོངས་སུ་ཡོད་པའི་ཡི་ཤུའི་ལྷ་ཁང་དང་དཔེ་ཆ་ཁག་རྩ་གཏོར་གཏོང་བཞིན་པའི་གནད་དོན། ལྷག་པར་དུ་རྒྱ་ནག་གཞུང་གིས་ཆོས་དད་རང་དབང་ཐོག་ཕྱག་ལས་གནང་མཁན་ཚོ་འཛིན་བཟུང་བཙན་ཁྲིད་བྱས་པ་མ་ཟད། ཁོང་རྣམ་པའི་ནང་མི་སྤུན་མཆེད་ཚོར་སུན་གཙེར་ཆེན་པོ་བཟོ་བཞིན་པ་སོགས་འགྲེལ་བརྗོད་དང་འབྲེལ། ཨ་རིའི་སྲིད་གཞུང་གི་ངོས་ནས་རྒྱ་ནག་དང་ལྷན་དུ་ཚོང་དོན་གཙོས་པའི་གྲོས་མོལ་གང་འདྲ་ཞིག་གནང་ཡང་། རྒྱ་ནག་ནང་དཀའ་སྡུག་མྱོང་བཞིན་པའི་ཆོས་དད་པ་རྣམ་པའི་གནད་དོན་ངེས་པར་དུ་གླེང་རྒྱུ་ཡིན་ཞེས་ཞལ་བཞེས་གནང་འདུག གཞི་རྩའི་ཨ་རི་ཕྱི་སྲིད་ལས་ཁུངས་ཀྱིས་གོ་སྒྲོག་ཞུས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ལྷན་ཚོགས་ཐེངས་གཉིས་པའི་ཐོག་རྒྱལ་སྤྱིའི་རྒྱལ་ཁབ་འདྲ་མིན་གྱི་སྐུ་ཚབ་ཆིག་སྟོང་ལྷག་ནས་མཉམ་ཞུགས་གནང་ཐོག་ཕྱི་ཚེས་ ༡༦ ནས་ཁ་སང་བར་ཉིན་གྲངས་གསུམ་རིང་འཚོགས་ཡོད་པ་དང་། ལྷན་ཚོགས་ཉིན་གཉིས་པའི་སྐབས་སུ་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་གཙོས་པའི་ཆོས་དད་རང་དབང་དང་འགྲོ་བ་མིའི་ཐོབ་གྱི་གནད་དོན་ཐོག་དངོས་སུ་དཀའ་སྡུག་ཚད་མེད་མྱངས་མཁན་རྒྱལ་སྤྱིའི་སྐུ་ཚབ་ཁག་གཅིག་ཨ་རི་ཕོ་བྲང་དཀར་པོའི་ནང་ཨ་རིའི་སྲེད་འཛིན་སྐུ་ཞབས་ཌོ་ནལཌ་ཊམ་མཆོག་དང་མཇལ་འཕྲད་བརྒྱུད་བཀའ་མོལ་ཞུ་རྒྱུའི་གོ་སྐབས་ཀྱང་གནང་ཡོད་པ་རེད། ཨ་རིའི་སྲིད་འཛིན་མཆོག་དང་བཀའ་མོལ་ཞུ་རྒྱུའི་ལས་རིམ་ལས་ཁྲོད་དུ་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲོན་ཚབ་པ་ Lu Kang གིས་གསར་འགོད་ལྷན་ཚོགས་ཤིག་གི་ཐོག་ཨ་རིས་གོ་སྒྲིས་ཞུས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ལྷན་ཚོགས་ཐོག་རྒྱ་ནག་ནང་ཆོས་དད་རང་དབང་མེད་སྐོར་བརྗོད་པ་རྣམས་བདེན་པ་མིན་པ་དང་། རྒྱ་ནག་ནང་སོ་སོའི་རྒྱལ་ཁབ་ཀྱི་ཁྲིམས་ལུགས་གཞིར་བཟུང་ཆོས་དད་རང་དབང་ཡོད་ཅེས་བརྗོད་པ་དང་ཆབས་ཅིག ཨ་རི་གཞུང་ནས་ལྷན་ཚོགས་དེའི་ཐོག་རྒྱ་ནག་གི་ཆོས་ཕྱོགས་སྲིད་བྱུས་ལ་མི་འདོད་པའི་མི་སྣ་ཁག་གཅིག་གདན་ཞུས་ཀྱིས་སྲིད་འཛིན་ Donald Trump མཆོག་དང་གླེང་མོལ་ཞུ་རྒྱུའི་གོ་སྐབས་སྐྲུན་པ་དེ་ནི་རྒྱ་ནག་རྒྱལ་ནང་གི་གནད་དོན་ལ་ཐེ་བྱུས་པ་ཞིག་རེད་ཅེས་ཨ་རི་གཞུང་ལ་སྐྱོན་བརྗོད་བྱས་འདུག འོན་ཀྱང་ཨ་རི་ཕྱི་སྲིད་དྲུང་ཆེ་སྐུ་ཞབས་Mike Pompeo མཆོག་ནས་ཁ་སང་ལྷན་ཚོགས་ཀྱི་མཇུག་བསྡོམ་གསུངས་བཤད་དང་སྦྲགས། རྒྱ་ནག་རྒྱལ་ཁབ་དེ་ནི། དུས་རབས་འདིའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་སྡུག་ཤོས་ཀྱི་རྒྱལ་ཁབ་དེ་ཡིན་པ་མ་ཟད། རྒྱ་ནག་གཞུང་གིས་ཤིང་ཅང་མི་མང་ཐོག་ལག་བསྟར་བྱེད་བཞིན་པའི་སྲིད་བྱུས་དེ་ནི་དུས་རབས་འདིའི་ནག་ཉེས་ཆེ་ཤོས་དེ་རེད་ཅེས་རྒྱ་ནག་ལ་མུ་མཐུད་བསྐྱོན་བརྗོད་ནན་པོ་བྱས་འདུག ལྷག་པར་དུ་སྐུ་ཞབས་ Mike Pompeo མཆོག་ནས་རྒྱ་ནག་གཞུང་ནས་རྒྱ་ནག་ནང་ཙམ་མ་ཟད་རྒྱལ་སྤྱིའི་རྒྱལ་ཁབ་ཁག་གི་སྐུ་ཚབ་ལ་ཐེངས་འདིའི་ལྷན་ཚོགས་ཐོག་མཉམ་ཞུགས་གནང་རྒྱུ་མེད་པའི་གནོན་ཤུགས་སྤྲད་ཡོད་པར་འགྲེལ་བརྗོད་དང་སྦྲགས། རྒྱ་ནག་གཞུང་ནས་གནོན་ཤུགས་སྤྲད་པ་དེ་རྒྱ་ནག་ནང་ལ་ཆོས་དད་རང་དབང་མེད་པའི་རྣམ་པ་གསལ་པོ་མཚོན་གྱི་ཡོད་ཅེས་གསུངས་པ་དང་ཆབས་ཅིག་ཏུ་གནོན་ཤུགས་དེར་ལྟོས་མེད་ལྷན་ཚོགས་ཐོག་མཉམ་ཞུགས་གནང་མཁན་ཡོངས་ལ་བསྔགས་བརྗོད་གནང་འདུག གཞི་རྩའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ལྷན་ཚོགས་འདི་བཞིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གི་སྲིད་གཞུང་ནས་རྒྱལ་སྤྱིའི་མང་ཚོགས་ཀྱི་ཆོས་དད་རང་དབང་སྲུང་སྐྱོབ་དང་གོང་འཕེལ་གཏོང་རྒྱུར་དམིགས་ཏེ་ལྷན་ཚོགས་དང་པོ་དེ་སྔར་ལོའི་ཕྱི་ཟླ་བདུན་པའི་ནང་ཚོགས་ཡོད་པ་དང་། ལས་དོན་དེའི་སླད་ཨ་རི་གཞུང་དང་ལྷན་ཚོགས་ནས་ལོ་རེར་ཨ་སྒོར་ས་ཡ་བཞི་བརྒྱ་ལྷག་གི་འགྲོ་གྲོན་གནང་བཞིན་ཡོད་པ་རེད།

མཉམ་འབྲེལ་རྒྱལ་ཚོགས་ཀྱི་དམིགས་བསལ་སྐུ་ཚབ་ཁག་གཅིག་གིས་རྒྱ་ནག་ལ་ཞུ་ཡིག་ཞིག་ཕུལ་ཏེ་ཕྱི་ལོ་ ༢༠༡༥ ལོར་ཀིརྟི་དགོན་གྱི་གྲྭ་འབྲུག་གྲགས་དང་བློ་བཟང་མཁས་སྒྲུབ་སོགས་བོད་མི་དགུ་ཡིས་༸སྐུའི་གྱ་སྟོན་སྲུང་བརྩི་གནང་བ་དང་འབྲེལ་ནས་རྒྱ་ནག་གི་ཁོང་རྣམས་འཛིན་བཟུང་བྱས་ཏེ་ལོ་ ༡༤ ནས་ ༥ ཀྱི་བར་གྱི་བཙོན་འཇུག་ཁྲིམས་ཐག་བཅད་ཡོད་པ་རྣམས་ཀྱི་ད་ལྟའི་གནས་སྟངས་ཕྱིར་སྒྲོག་དགོས་པའི་རེ་སྐུལ་གནང་འདུག དེ་རིང་རྒྱལ་སྤྱིའི་བོད་དོན་ལས་འགུལ་ཁང་གིས་མཉམ་འབྲེལ་རྒྱལ་ཚོགས་ཀྱི་དམིགས་བསལ་གྱི་སྐུ་ཚབ་ཚོགས་ཆུང་དེས་བོད་མི་དེ་དག་གི་ད་ལྟའི་གནས་སྟངས་ལ་སེམས་འཚབ་ཡོད་པ་ཡོངས་གྲགས་གནང་ཡོད་པ་མ་ཟད། རྒྱ་ནག་གིས་ཁྲིམས་སྒྲིག་གི་ལམ་ལུགས་ལ་བརྩི་འཇོག་གང་ཡང་མེད་པར་བོད་མིའི་མངོན་འདོད་ཡོད་ཚད་ནག་ཉེས་ཅན་ལ་བསྒྱུར་ཏེ་རྒྱལ་ཁབ་ཁ་བྲལ་གྱི་བསྙོན་འཛུགས་འོག་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་ཡོད་པར་སྐྱོན་བརྗོད་གནང་བ་འཁོད་འདུག རྒྱལ་ཚོགས་ཀྱི་སྐུ་ཚབ་ལྔ་ལས་གྲུབ་པའི་ཞུ་ཡིག་དེར་མཚན་རྟགས་རྒྱག་མཁན་ཁོངས་སུ་རྒྱལ་ཚོགས་ཀྱི་རིག་གཞུང་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Karima Bennoune ལགས་དང་སྨྲ་བརྗོད་རང་དབང་གཅེས་འཛིན་གྱི་དམིགས་བསལ་སྐུ་ཚབ་ David Kaye ལགས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྩོད་ལེན་པའི་གནད་དོན་དང་གྲངས་ཉུང་མི་རིགས་གྱི་གནད་དོན། དེ་བཞིན་ཆོས་དད་རང་དབང་སྡེ་ཁག་བཅས་ཀྱི་དམིགས་བསལ་སྐུ་ཚབ་ལྔ་ཡོད་པ་རེད། ཚོགས་ཆུང་དེས་ཞུ་ཡིག་དེའི་ནང་རྒྱ་ནག་གིས་ནག་ཉེས་ཁྲིམས་སྒྲིག་གི་དོན་ཚན་ ༡༠༣ གྱི་ནང་གསེས་དོན་ཚན་གཉིས་པ་བེད་སྤྱོད་ཀྱིས་རྒྱལ་ཁབ་ཁ་བྲལ་སྐུལ་སློང་ཟེར་བའི་ཁྲིམས་དོན་གྱི་འོག་ནས་བོད་མིའི་སྨྲ་བརྗོད་རང་དང་ཆོས་ལུགས་ཀྱི་རང་དབང་། དེ་བཞིན་རིག་གཞུང་དང་འདུ་འཛོམས་ཀྱི་རང་དབང་ཡོད་ཚད་ལ་བཏང་འཛིན་བྱེད་བཞིན་པ་མངོན་གསལ་གནང་སྟེ། བོད་མི་དགུ་པོ་དེ་དག་འཛིན་བཟུང་བྱེད་ལུགས་ཀྱི་སྐོར་ནས་ཁྲིམས་སྒྲིག་གི་བརྒྱུད་རིམ་གང་ཡང་གསལ་བཤད་གནང་མེད་པ་མ་ཟད། ཁོང་ཅག་བཙོན་ཁང་གང་དུ་བཙོན་འཇུག་བྱས་ཡོད་མེད་ཀྱི་གནས་སྟངས་ཙམ་ཡང་ཕྱིར་བསྒྲགས་བྱས་མེད་པར་སེམས་ཁྲལ་ཆེན་པོ་ཡོད་ཚུལ་བརྗོད་འདུག རྒྱལ་སྤྱིའི་བོད་དོན་ལས་འགུལ་ཁང་གི་འཇར་མན་ཡན་ལག་ལས་ཁུངས་ཀྱི་ངེས་སྟོན་པ་སྐུ་ཞབས་ Kai Mueller  ལགས་ཀྱིས་རྒྱ་ནག་གི་དུས་ཡུན་རིང་པོ་ནས་བཟུང་བོད་མི་རྣམས་ལ་བསྙོན་འཛུགས་འདྲ་མིན་བྱས་པ་བརྒྱུད་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྩ་གཏོར་གཏོང་ཐབས་བྱས་ཡོད་པ་མངོན་གསལ་གནང་བ་དང་འབྲེལ། འཛམ་གླིང་ནོ་སྦེལ་ཞི་བདེ་གཟེངས་རྟགས་བཞེས་མཁན་གྱི་༸གོང་ས་ཏཱ་ལའི་བླ་མའི་༸སྐུའི་གྱ་སྟོན་སྲུང་བརྩི་གནང་རྐྱེན་བོད་མི་དགུ་འཛིན་བཟུང་བཙོན་འཇུག་བྱས་པ་དེ་ནི་རྒྱ་ནག་གི་བོད་མིར་བསྙོན་འཛུགས་བྱེད་བཞིན་པའི་དཔེ་མཚོན་གསལ་ཤོས་ཤིག་ཡིན་པར་གསུངས་འདུག ཁོང་གིས་ད་དུང་ཐེངས་འདིའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་སྐུ་ཚབ་ལྔས་བོད་མི་དགུ་པོ་དེ་དག་གི་གནད་དོན་དང་འབྲེལ་ནས་རྒྱ་ནག་གིས་བོད་མིར་བསྙོན་འཛུགས་བྱེད་བཞིན་པ་དེ་ཡོང་གྲགས་གནང་སྟེ་ཁོང་རྣམ་པའི་གནས་སྟངས་ཐོག་གནས་ཚུལ་མཁོ་སྤྲོད་བྱེད་རྒྱུར་སྐུལ་མ་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག  རྒྱ་ནག་གིས་བོད་ཀྱི་ཆབ་སྲིད་བཙོན་མ་རྣམས་གློད་བཀྲོལ་མ་ཐོབ་བར་དུ་རྒྱལ་སྤྱིའི་སྤྱི་ཚོགས་ཀྱི་ངོས་ནས་ཀྱང་མུ་མཐུད་དེ་རྒྱ་ནག་ལ་གནོད་ཤུགས་སྤྲད་ནས་བོད་མི་རྣམས་ཀྱིས་རང་དབང་གི་སྒོ་ནས་རང་གི་ཆོས་དང་རིག་གཞུང་ལག་བསྟར་ཐུབ་རྒྱུར་རྒྱབ་སྐྱོར་དགོས་པའི་འབོད་སྐུལ་གནང་འདུག

འདི་ལོ་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༦༠ འཁོར་བའི་དུས་ཚིགས་སྲུང་བརྩི་གནང་བཞིན་པ་དང་བསྟུན། རྒྱ་ནག་གཞུང་གིས་བོད་བརྒྱུད་ནང་བསྟན་ཐོག་དམ་དྲག་སྔར་ལྷག་བྱེད་བཞིན་པའི་ཁྲོད་བོད་བརྒྱུད་ནང་བསྟན་ཁྲོད་རྗེ་བཙུན་འཇམ་དཔལ་དབྱངས་ཀྱི་ཞིང་ཁམས་ལ་ངོས་འཛིན་གནང་བའི་ Wutai འམ་གནས་ཆེན་རི་བོ་རྩེ་ལྔ་ཁུལ་དུ་འདི་ལོའི་མགོ་སྟོད་ནས་བཟུང་རྒྱ་ནག་གིས་དེར་ཆགས་པའི་ནང་པའི་དགོན་པ་གཉིས་ལ་དམིགས་བསལ་དམ་དྲག་བྱེད་བཞིན་པའི་ཁྲོད་ Jixiang ཞེས་པའི་དགོན་པའི་བཏང་འཛིན་ཆ་ཚང་རྒྱ་གཞུང་མི་སྣས་བླངས་ཏེ་དགོན་པར་ཕྱི་མི་མཆོད་མཇལ་ལ་འགྲོ་མ་བཅུག་པར་དམ་དྲག་བྱས་པ་དང། དེ་མིན་དགོན་པ་གཞན་ཞིག་རྩ་མེད་གཏོར་བཤིག་བཏང་བ་མ་ཟད། དེར་བཅའ་སྡོད་བྱེད་མཁན་བོད་ཁམས་དཀར་མཛེས་ནས་ཡིན་པའི་དགེ་འདུན་པ་ Kapga ཞུ་བ་ཞིག་འཛིན་བཟུང་བཙོན་འཇུག་གིས་གར་སོང་ཆ་མེད་དུ་གྱུར་འདུག ཁ་ཉིན་ BitterWinter ཞེས་རྒྱ་ནག་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་དུས་དེབ་ཀྱི་དྲྭ་གནས་ཐོག་རྒྱ་ནག་བྱང་ཕྱོགས་ཀྱི་ Shanxi མངའ་ཁུལ་གྱི་ Wutai འམ་རི་བོ་རྩེ་ལྔའི་རི་རྒྱུད་ལས་ Qingliang ལ་ཆགས་པའི་ Jixiang དགོན་པར་འདི་ལོའི་ཕྱི་ཟླ་ ༣ པ་ནས་རྒྱ་གཞུང་མི་སྣས་དགོན་པའི་གྲྭ་མང་རྣམས་ཀྱི་འགྲུལ་སྐྱོད་དང་ཆོས་ལུགས་ཀྱི་བྱེད་སྒོ་ཁག་ལ་དམ་དྲག་བྱས་པ་མ་ཟད། དགོན་པའི་ཕྱིར་ཡོད་པའི་ནང་པ་གཞན་ཚོ་དང་ལྷན་དུ་འབྲེལ་བ་གནང་རྒྱུར་བཀག་སྡོམ་བྱས་པ་དང། དགོན་པར་ལྟ་སྲུང་པར་ཆས་ ༧༠ ཙམ་གསར་འཛུགས། དེ་བཞིན་དགོན་པར་བཅར་མཁན་ཡུལ་སྐོར་སྤྲོ་འཆམ་པ་ཡོངས་གི་ལག་འཁྱེར་ཞིབ་བཤེར་དང་ཉེན་རྟོག་པས་འདྲི་རྩད་སོགས་བྱས་འདུག ལྷག་དོན་དགོན་པར་ཉམས་གསོ་སོགས་ཀྱི་ལས་གཞི་མཚམས་འཇོག་བྱས་ཟིན་ཡང་དགོན་པའི་རྒྱལ་སྒོའི་ཉམས་གསོའི་ལས་དོན་སྤེལ་མུས་ཡིན་པ་དང་། ཕྱི་མི་ནང་དུ་སྐྱོད་མི་ཆོག་ཞེས་པའི་སྦྱར་ཡིག་ཆེད་སྦྱར་གྱིས་དམ་དྲག་བྱེད་བཞིན་པ་མངོན་གསལ་གནང་འདུག དེ་བཞིན་ Wutai ཁུལ་གྱི་ནང་པའི་དགོན་པ་གཞན་ཞིག་འདི་ལོའི་དགུན་ཁར་རྩ་མེད་བཏང་བ་མ་ཟད། དགོན་པ་དེར་ལོ་ ༢༠ ཙམ་ནས་བཅའ་སྡོད་བྱེད་བཞིན་པའི་བོད་དཀར་མཛེས་ཁུལ་ནས་ཡིན་པའི་བོད་པའི་དགེ་འདུན་པ་ Kapga ཞུ་བ་ཞིག་འཛིན་བཟུང་བྱས་པ་དང། དགོན་པ་དེར་བཞུགས་མཁན་གཞན་རྣམས་ཕྱིར་ཕུད་བཏང་འདུག ས་གནས་ཡུལ་མི་ཞིག་གིས་གསར་ཁང་ལ་འབྲེལ་བརྗོད་གནང་བར་གཞིགས་ན་དགེ་འདུན་པ་དེ་འཛིན་བཟུང་བྱས་ནས་ཉིན་གྲངས་གསུམ་གྱི་རྗེས་སུ་དགོན་པ་དེར་ཉེན་རྟོག་པ་དང་མེ་གསོད་རུ་ཁག་མི་སྣ་བཅས་ཁྱོན་མི་གྲངས་ ༢༠༠ སྐོར་ཞིག་སླེབས་ཏེ་དགོན་པའི་ཁང་མི་ ༡༦ ཙམ་ཡོད་པ་ཆ་ཚང་གཏོར་བཤིག་བཏང་ཡོད་པ་མ་ཟད། སྐབས་དེར་དགེ་འདུན་པའི་རྐང་ལག་ཆ་ཚང་ལྕགས་སྒྲོག་བརྒྱབས་ནས་དགོན་པ་གཏོར་བཤིག་གཏོང་བཞིན་པའི་ཡུལ་དངོས་ལ་ཁྲིད་འདུག དགེ་འདུན་པ་ཁོང་དགོན་པ་གཏོར་བཤིག་གི་ལས་དོན་ཚར་རྗེས་གར་སོང་ཆ་མེད་དུ་གྱུར་བའི་གནས་ཚུལ་བྱུང་འདུག ད་ལྟའི་ཆར་དགོན་པ་གཏོར་བཤིག་བཏང་བའི་ས་ཆར་ཤིང་སྣ་སོགས་འདེབས་འཛུགས་བྱས་ནས་བཞག་ཡོད་པའི་འདྲ་པར་དང་བཅས་པ་ཕྱིར་གྱར་བྱུང་ཡོད་པ་རེད། ས་གནས་ཡུལ་མི་རྣམས་ཀྱིས་ཕྱི་ལོ་ ༢༠༡༥ ཙམ་ནས་ས་ཁུལ་དེར་ཉེན་རྟོག་མི་སྣ་སླེབས་ཡོད་པ་དང་སྤྱི་ཚོགས་བརྟན་ལྷིང་ཆེད་དུ་ཡིན་ཁུལ་ཙམ་ལས་དོན་དངོས་སུ་ཕྱི་ཕྱོགས་ནས་སླེབས་པའི་དགེ་འདུན་པ་རྣམས་ལ་མྱུལ་ཞིབ་བྱེད་ཕྱིར་སླེབས་ཡོད་པ་དང་། སྐབས་འགར་ཉེན་རྟོག་མི་སྣ་རྣམས་མེ་མདའ་དང་གོ་མཚོན་ཕོན་ཆེ་དང་ཁྱི་སོགས་ཁྲིད་ནས་སླེབས་ཡོད་པ་དང་ཕྱི་ཕྱོགས་ཀྱི་དགེ་འདུན་པ་ཡོད་པ་ཤེས་རྟོགས་བྱུང་ཚེ་དེ་དག་འཕྲལ་དུ་རང་སར་ཕྱིར་ལོག་བཏང་བ་མ་ཟད་ཁོང་ཚོས་སྡོད་གནས་རྣམས་གཞུང་བཞེས་བཏང་ནས་ས་ཁང་བདག་པོར་དངུལ་གྱི་ཉེས་ཆད་བཏང་འདུག དེ་བཞིན་མིང་བརྗོད་འདོད་མེད་པའི་ས་གནས་མི་གཞན་ཞིག་གིས་དེང་སྐབས་རྒྱ་ནག་གཞུང་གིས་བོད་བརྒྱུད་ནང་བསྟན་ལ་དམ་དྲག་བྱེད་བཞིན་པའི་ཁྲོད། ས་གནས་སྲིད་གཞུང་ནས་དགོན་སྡེ་ཁག་ལ་ཕྱི་ཕྱོགས་ས་ཁུལ་ནས་སླེབས་མཁན་གྲྭ་བཙུན་ཚོ་དགོན་པར་འཇོག་རྒྱུ་མེད་པ་དང། དེ་ལྟར་སླེབས་ཚེ་དེ་དག་རྫོང་ཆོས་དོན་ལས་ཁུངས་སུ་ཞིབ་བཤེར་ཆེད་ཁྲིད་དགོས་པའི་བཀོད་ཁྱབ་རིམ་པ་བཏང་ཡོད་པ་དང། ཚུལ་མིན་གྱི་གནས་ཚུལ་བྱུང་ཚེ་དགོན་པའི་བདག་དབང་ཡིག་ཆ་འཕྲོག་རྒྱུ་ཡིན་པའི་ཉེན་བརྡ་བཏང་ཡོད་པ་མ་ཟད། སྲིད་གཞུང་གི་ངོས་ནས་བོད་རང་བཙན་གྱི་ལས་འགུལ་དང་༸གོང་ས་མཆོག་གི་ཤུགས་རྐྱེན་ལ་དམ་གནོན་དང་འབྲེལ། ས་གནས་དེར་བོད་ནས་སླེབས་མཁན་དགེ་འདུན་པ་ཡོངས་ལ་ཞིབ་བཤེར་བྱེད་བཞིན་པ་མངོན་གསལ་གནང་འདུག

ཁ་ཉིན་ཕྱི་ཚེས་ ༡༦ ནས་ཨ་རི་ཕྱི་སྲིད་ལས་ཁུངས་ཀྱིས་གོ་སྒྲིག་གནང་ཐོག་ཡུལ་དེར་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་ལྷན་ཚོགས་ཐེངས་གཉིས་པ་འཚོགས་བཞིན་ཡོད་པ་ལྟར། ཁ་སང་ལྷན་ཚོགས་ཉིན་གཉིས་པའི་སྐབས་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་ཨ་རིའི་སྲིད་འཛིན་སྐུ་ཞབས་ Donald Trump མཆོག་ལ་བོད་དོན་ཐོག་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུག ཉི་མ་ལྷ་མོ་ལགས་ནི་ཐེངས་འདིའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་ལྷན་ཚོགས་ཐོག་བོད་པའི་སྐུ་ཚབ་ཀྱི་མིང་ཐོག་ནས་ཆེད་ཕེབས་གནང་ཡོད་པ་དང་། ཁ་སང་ཉི་མ་ལྷ་མོ་ལགས་ཀྱིས་གཙོས་པའི་ཆོས་དད་རང་དབང་དང་འགྲོ་བ་མིའི་ཐོབ་ཐང་གི་གནད་དོན་ཐོག་དངོས་སུ་དཀའ་སྡུག་ཚད་མེད་མྱངས་པའི་རྒྱལ་སྤྱིའི་སྐུ་ཚབ་ཁག་གཅིག་ཨ་རི་ཕོ་བྲང་དཀར་པོའི་ནང་ཨ་རིའི་སྲིད་འཛིན་སྐུ་ཞབས་ཌོ་ནལ་ཌ་ཊམ་མཆོག་དང་མཇལ་འཕྲད་བརྒྱུད་ནས་བཀའ་མོལ་གྱི་གོ་སྐབས་བྱུང་ཡོད་པ་ལྟར། ཁོང་གིས་དང་ཐོག་དེར་སྲིད་འཛིན་མཆོག་དང་མཇལ་འཕྲད་ཀྱི་བདེ་སྡུག་ཞུ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་པ་དང་སྦྲགས། བོད་ནང་ཡོད་པའི་བོད་མི་ཚོར་ཨ་རིའི་ངོས་ནས་རྒྱབ་སྐྱོར་དགོས་ཀྱི་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་བོད་དུ་ཕྱིར་ཕེབས་ཐུབ་རྒྱུ། དེ་བཞིན་བོད་དོན་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བ་བཅས་ཚོར་ཤུགས་ཆེན་པོས་འབོད་སྐུལ་ཞུས་འདུག འབོད་སྐུལ་དེའི་ཁྲོད་ཉི་མ་ལྷ་མོ་ལགས་ནས་ངའི་དབྱིན་སྐད་དེ་ཡག་པོ་དེ་ཙམ་མེད་ཅེས་དགོངས་སེལ་ཞུས་པར་སྲིད་འཛིན་སྐུ་ཞབས་ Donald Trump མཆོག་ནས་གང་ཡང་གནང་གི་མ་རེད། ཁྱེད་ཀྱི་དབྱིན་སྐད་ཡག་པོ་འདུག་ཅེས་གསུངས་པ་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲི་ཞུ་རོགས་ཞེས་བཀའ་ལན་གནང་འདུག གཞི་རྩའི་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ནི་ཨ་རིའི་སྲིད་འཛིན་སྐུ་ཞབས་ཌོ་ནལ་ཌ་ཊམ་མཆོག་དང་མཇལ་འཕྲད་ཀྱི་བོད་དོན་ཞུ་སྐུལ་གནང་མཁན་བོད་པ་ཆེས་ཐོག་མ་དེ་ཡིན་པ་རེད། ཁ་སང་ཨ་རི་ཕོ་བྲང་དཀར་པོའི་ནང་ཨ་མི་རི་ཀའི་སྲིད་འཛིན་མཆོག་དང་མཇལ་འཕྲད་མ་གནང་གོང་དུ་ཡི་ཤུ་རྣམ་དག་གི་གནད་ས་ཝ་ཊི་ཀན་གྱི་ཨ་རི་གཞུང་ཚབ་ལྕམ་སྐུ་ Callista Gingrich ལགས་ནས་ཨ་རི་ཕྱི་སྲིད་ལས་ཁུངས་ཀྱི་ཚོམས་ཁང་ Burns ཞེས་པར་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་ལྷན་ཚོགས་ཀྱི་ཚོགས་བཅར་བ་དང་གནད་ཡོད་མི་སྣ་ཚོར་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་། ཁོང་གི་ཚ་མོ་ཉི་མ་ལྷ་མོ་ལགས་གཉིས་ཀྱི་ལོ་རྒྱུས་ངོ་སྤྲོད་དང་འབྲེལ། འཛམ་གླིང་ཐོག་ཆོས་དད་རང་དབང་ལ་བརྩི་བཀུར་མི་བྱེད་མཁན་གྱི་རྒྱལ་ཁབ་གཙོ་བོ་གཅིག་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཡིན་པ་དང་། དེ་ཡང་རྒྱ་ནག་གཞུང་ནས་ཆོས་ལུགས་ཀྱི་མི་སྣར་སུན་གཙེར་དང་། སྡང་ཟུག བཙོན་འཇུག་སོགས་ཀྱི་ལས་དོན་རྣམས་གོ་རིམ་ལྡན་པའི་ཐོག་ནས་ལག་བསྟར་བྱས་པ་མ་ཟད། ཁ་ཆེ་དང་ཡི་ཤུ། ནང་པ་བཅས་གྲངས་ཉུང་མི་རིགས་ཐོག་དམིགས་བསལ་གྱི་དམ་དྲག་དང་གཉའ་གནོན་གཏོང་བཞིན་ཡོད་པ་ཐེར་འདོན་གནང་འདུག ལྷག་པར་དུ་ཕྱི་སྲིད་ལས་ཁུངས་ཀྱི་སྐུ་ཚབ་ལྕམ་སྐུ་ Callista Gingrich ལགས་ནས་ཉེ་དུས་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་ཤུགས་ཆེ་བྱེད་བཞིན་པར་སྐྱོན་བརྗོད་དང་སྦྲགས། ༸གོང་ས་མཆོག་ནི་བོད་མིའི་སེམས་ཁུངས་ནས་བརྩི་བཀུར་དང་དད་མོས་ཞུ་ཡུལ་ཞིག་ཡིན་པ་ལྟར། མགོན་པོ་༸གང་ཉིད་མཆོག་གི་མ་འོངས་པའི་༸སྐུའི་ཡང་སྲིད་དེ་རྒྱ་གཞུང་ནས་ཐེ་བྱུས་གང་ཡང་བྱེད་དབང་མེད་པར་དད་མོས་དང་བརྩི་བཀུར་ཅན་གྱི་བོད་མི་རང་ངོས་ནས་ངོས་འཛིན་ཞུ་རྒྱུ་ཞིག་རེད་ཅེས་ནན་པོ་གསུངས་འདུག དེ་བཞིན་སྐབས་དེར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷ་མོ་ལགས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་༸གོང་ས་མཆོག་གི་བཀའ་དགོངས་ཇི་བསྩལ་ལྟར་སྒྲུབ་མཁན་ཞིག་ཡིན་པ་དང་། རིན་པོ་ཆེ་དམ་པས་བོད་ནང་གི་ཆོས་ཕྱོགས་ཀྱི་ལས་དོན་ཙམ་མ་ཟད། སྤྱི་ཚོགས་ཀྱི་ཞབས་ཞུ་མང་དག་ཅིག་སྒྲུབ་བཞིན་ཡོད་སྟབས་རྒྱ་གཞུང་གིས་རིན་པོ་ཆེ་མཆོག་འཛིན་བཟུང་གིས་སྲོག་ཐོག་དང་ཚེ་བཙོན་སོགས་ཀྱི་ཁྲིམས་ཐག་རིམ་པ་བཅད་དེ་མཐར་བཙོན་ཁང་དུ་དགོངས་པ་རྫོགས་པའི་གནས་སྟངས་ཆགས་ཡོད་པ་སོགས་འགྲེལ་བརྗོད་དང་སྦྲགས། རིན་པོ་ཆེ་མཆོག་གིས་གཙོས་པའི་ད་ལྟའི་ཆར་གར་སོང་ཆ་མེད་དུ་གྱུར་བའི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་གནས་སྟངས་སོགས་ནས་བོད་ནང་གི་ཆོས་དད་རང་དབང་གི་གནས་བབས་གང་འདྲ་ཡོད་མེད་མཚོན་ཐུབ་སྐོར་གསུངས་འདུག སྐབས་དེར་ཉི་མ་ལྷ་མོ་ལགས་ཀྱི་གསུང་བཤད་དེ་དག་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ནས་དབྱིན་སྒྱུར་གནང་ཡོད་པ་དང་། གསུང་བཤད་ཀྱི་མཐའ་མ་དེར་ཉི་མ་ལྷ་མོ་ལགས་ནས་ཨ་རི་སྲིད་གཞུང་དང་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་ལྷན་ཚོགས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་བཙོན་ཁང་ནང་སྐུ་གྲོངས་པའི་གནད་དོན་ཐད་རྒྱ་ནག་གཞུང་ལ་འདྲི་རྩད་ནན་པོ་གནང་དགོས་པ་དང་། རྒྱལ་སྤྱིའི་གཞུང་དང་ཉམས་ཞིབ་པ། དེ་བཞིན་གསར་འགོད་པ་རྣམས་ནས་རྒྱ་གཞུང་གིས་བོད་ནང་ཆོད་དད་རང་དབང་ཡོད་ལུགས་བརྗོད་བཞིན་པ་དེ་བདེན་པ་ཡིན་མིན་དཔྱད་ཞིབ་སླད་བོད་ནང་ཕེབས་དགོས་པ། རྒྱ་ནག་གཞུང་ནས་བོད་ནང་གི་བོད་མི་ཚོར་ནང་ཆོས་ལ་སློབ་གཉེར་གནང་རྒྱུའི་ཐོབ་ཐང་སྤྲོད་དགོས་པ། ༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་རྒྱ་ནག་གཞུང་ནས་ཐེ་བྱུས་བྱ་རྒྱུ་མཚམས་འཇོག་དགོས་པ། ༸ཀུན་གཟིགས་༸པཎ་ཆེན་རིན་པ་ཆེ་མཆོག་གཙོ་གྱུར་བོད་པའི་ཚབ་སྲིད་བཙོན་པ་རྣམས་གློད་བཀྲོལ་དགོས་པ་མ་ཟད། ཁོང་རྣམ་པའི་མ་འོངས་ཀྱི་གནས་སྟངས་ཇི་ཆགས་འགན་དེ་རྒྱ་ནག་གཞུང་ལ་ཡོད་ཅེས་འབོད་སྐུལ་དོན་ཚན་ལྔ་སྟོན་འདུག རྩ་བའི་ཁ་ཉིན་ནས་དབུ་འཛུགས་གནང་བའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་ལྷན་ཚོགས་ཐེངས་གཉིས་པའི་ཐོག་རྒྱལ་སྤྱིའི་རྒྱལ་ཁབ་འདྲ་མིན་གྱི་སྐུ་ཚབ་ཆིག་སྟོང་ལྷག་ནས་མཉམ་ཞུགས་གནང་ཡོད་པ་དང་། ལྷན་ཚོགས་ཀྱི་དབུ་འབྱེད་མཛད་སྒོ་དང་ཚོགས་དུས་དང་པོའི་ཐོག་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Sam Brownback མཆོག དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་དང་། གྲོས་ཚོགས་འཐུས་མི་ཟུར་པ་སྐུ་ཞབས་ Frank Wolf ལགས་སོགས་ནས་རྒྱ་ནག་གི་རྒྱ་ནག་སྤྱི་དང་ལྷག་པར་དུ་བོད་དང་ཤིན་ཅང་བཅས་སུ་ལག་བསྟར་བྱེད་བཞིན་པའི་སྲིད་བྱུས་རྣམས་ས་གནས་མི་མང་གི་ཆོས་དད་རང་དབང་དང་གཞི་རྩའི་འགྲོ་བ་མིའི་ཐོབ་ཐང་ལ་དོ་ཕོག་ཤུགས་ཆེ་གཏོང་བཞིན་པ་སོགས་རྒྱ་ནག་གཞུང་ལ་སྐྱོན་བརྗོད་ནན་པོ་གནང་ཡོད་པ་རེད།

རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱིས་ནོ་སྦེལ་ཞི་བདེ་ཡི་གཟེགས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་རྒྱ་ནག་དམར་ཤོག་གི་བཙོན་ཁང་དུ་སྐུ་གྲོངས་ནས་ལོ་ངོ་གཉིས་ཕྱིན་པའི་རྗེས་སུའང་། རྒྱ་ནག་ནི་མུ་མཐུད་གསར་འགོད་པ་ཆེས་མང་ཤོས་བཙོན་དུ་འཇུག་མཁན་གྱི་རྒྱལ་ཁབ་ཆེ་ཤོས་ཤིག་ཏུ་གྱུར་ཡོད་པར་བསྐྱར་ནན་གནང་འདུག སྐུ་ཞབས་ Liu Xiaobo ལགས་དགོངས་པ་རྫོགས་ནས་ལོ་གཉིས་འཁོར་བའི་དུས་དྲན་གྱི་སྔ་ནུབ་ཏུ་ཕ་རན་སི་རྒྱལ་ས་ Paris དུ་རྟེན་གཞི་བྱས་པའི་  Reporters Without Borders ཞེས་རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱི་ཤར་ཨེ་ཤ་ཡ་ཁུལ་གྱི་ཚོགས་གཙོ་སྐུ་ཞབས་ Cédric Alviani ལགས་ཀྱིས་ཡོངས་གྲགས་བསྒྲགས་གཏམ་གནང་སྟེ། རྒྱ་ནག་གིས་སྐུ་ཞབས་ Liu Xiaobo ལགས་ལྐོག་གསོད་བྱས་པ་དེས་རྒྱལ་སྤྱིའི་སྟེང་རྩོད་རྙོག་ཆེན་པོ་བཟོས་ཡོད་ནའང་། རྒྱ་ནག་གིས་ད་དུང་ལམ་ལུགས་ཚགས་ཚུད་ཡོད་པའི་ཐོག་ནས་གསར་འགོད་པ་རྣམས་བཙོན་ལ་བཅུག་ནས་མུ་མཐུད་སྡུག་སྦྱོང་མནར་གཅོད་གཏོང་བཞིན་ཡོད་པ་མངོན་གསལ་གནང་བ་དང་འབྲེལ། རྒྱལ་སྤྱིའི་ངོས་ནས་རྒྱ་ནག་ལ་གནོན་ཤུགས་སྤྲད་པ་བརྒྱུད་བཙོན་དུ་ཡོད་པའི་གསར་འགོད་རང་དབང་གི་འཐབ་རྩོད་པ་རྣམས་མྱུར་དུ་གློད་ཐབས་བྱེད་དགོས་པའི་སྐུལ་མ་གནང་འདུག རྩ་བའི་སྐུ་ཞབས་ Liu Xiaobo ལགས་ཕྱི་ལོ་ ༢༠༠༩ ལོར་རྒྱལ་ཁབ་ཀྱི་སྲིད་དབང་མགོ་རྟིང་སློག་ཐབས་བྱས་པའི་ནག་ཉེས་འོག་ལོ་ངོ་ ༡༡ རིང་བཙོན་འཇུག་ཁྲིམ་ཐག་བཅད་པ་དང་། ཕྱི་ལོ་ ༢༠༡༠ ལོར་རྒྱལ་སྤྱིའི་ཐོག་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་ཐོབ་ཡོད་ཀྱང་། བཙོན་དུ་ལོ་ ༨ བཞུགས་རྗེས་ཕྱི་ལོ་ ༢༠༡༧ ཕྱི་ཟླ་ ༦ ཚེས་ ༢༦ ཉིན་སྨན་བཅོས་ཀྱི་ཐོབ་ཐང་འོག་གློད་བཀྲོལ་བཏང་བ་དང་ཕྱི་ཟླ་ ༧ ཚེས་ ༡༣ ཉིན་རྒྱ་ནག་གི་ Liaoning ཞིང་ཆེན་གྱི་ Shenyang གྲོང་ཁྱེར་ནང་མཆིན་པའི་འབྲས་ནད་ཀྱི་སྨན་བཅོས་དྲག་སྐྱེད་མ་བྱུང་སྟབས་འདས་གྲོངས་སུ་གྱུར་ཡོད་པ་རེད། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ ༢༠༡༧ ལོར་སྐུ་ཞབས་ཞའོ་པའོ་གཅིག་པོ་བཙོན་དུ་སྐུ་གྲོངས་བ་ཙམ་མ་ཡིན་པར་རྒྱ་ནག་གི་རྩོམ་པ་པོ་དང་དྲྭ་རྒྱའི་ཟིན་བྲིས་པ་སྐུ་ཞབས་ཡཱང་ཐོན་ཡོན་ལགས་ཀྱང་བཙོན་ཁང་དུ་སྨན་བཅོས་མ་བྱས་པར་གྲོངས་ཡོད་པ་མ་ཟད། རྒྱ་ནག་གི་གསར་འགོད་པ་ཆིན་ཡོང་མེན་ལགས་དང་སྐུ་ཞབས་ཧོང་ཆཱི་ལགས་དེ་བཞིན་ Sweden རྒྱལ་ཁབ་ཀྱི་དཔེ་དེབ་པར་སྐྲུན་པ་སྐུ་ཞབས་གོའི་མཱེན་ཧེ་ལགས་ཀྱང་ཚེ་སྲོག་ལ་ཉེན་འཚབ་ཆེ་བའི་གནས་སྟངས་འོག་མུ་མཐུད་བཅོན་ཁང་ནང་ལྷུང་ཡོད་པ་ལུང་འདྲེན་གནང་འདུག གཞི་རྩའི་འདི་ལོའི་ཟླ་བ་བཞི་པའི་ནང་རྒྱལ་མཚམས་མེད་པའི་གསར་འགོད་པའི་ཚོགས་པས་འཛམ་གླིང་ཁྲོད་གསར་འགོད་རང་དབང་གི་གནས་སྟངས་དང་འབྲེལ་བའི་ཕྱི་ལོ་ ༢༠༡༩ ལོའི་སྙན་ཐོ་ཞིག་འདོན་སྤེལ་གནང་བའི་ནང་དེང་སྐབས་རྒྱ་ནག་ཏུ་སྲིད་འཛིན་ཞི་ཅིན་ཕིང་གིས་སྣེ་ཁྲིད་འོག་དེང་དུས་ཀྱི་ཚད་མཐོའི་འཕྲུལ་ཆས་སྤྱོད་ཐོག་གསར་འགྱུར་དང་གསར་འགོད་པར་དམ་དྲག་ནན་པོ་བྱས་པ་མ་ཟད། མང་ཚོགས་ཐོག་ལྟ་སྲུང་སོགས་སྔར་ལྷག་བྱས་ནས་རྒྱལ་སྤྱིའི་ཁྱོན་ལ་རྒྱ་ནག་གི་ཤུགས་རྐྱེན་ཡོད་པའི་བརྒྱུད་ལམ་གྱི་འགྲོ་ལུགས་སྤེལ་ཐབས་བྱེད་བཞིན་ཡོད་པ་མངོན་གསལ་གནང་འདུག ལྷག་དོན་འཛམ་གླིང་ནང་གི་རྒྱལ་ཁབ་ ༡༨༠ ཁྲོད་དུ་རྒྱ་ནག་ནི་གསར་འགོད་ཀྱི་རང་དབང་ཆེས་ཞན་པའི་མཐའ་མའི་ཨང་གྲངས་གསུམ་པ་དེ་ཡིན་པར་ཡོངས་གྲགས་གནང་ཡོད་པ་རེད།

ཁ་སང་ཕྱི་ཚེས་ ༡༦ ཉིན་ཨ་མི་རི་ཀའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་ཐོག་ཡུལ་དེར་རྒྱལ་སྤྱིའི་ཆོས་དད་རང་དབང་ལྷན་ཚོགས་ཐེངས་གཉིས་པ་དངོས་སུ་དབུ་འཛུགས་གནང་ཡོད་པ་དང་། ལྷན་ཚོགས་དབུ་འབྱེད་ཀྱི་མཛད་སྒོའི་ཐོག་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Sam Brownback མཆོག དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་གཙོས་པའི་གྲོས་ཚོགས་འཐུས་མི་ཁག་གཅིག དེ་བཞིན་བགྲེས་ཡོལ་དུ་ཕེབས་ཟིན་པའི་གྲོས་ཚོགས་འོག་མའི་འཐུས་མི་སྐུ་ཞབས་ Frank Wolf ལགས་གཙོ་གྱུར་གནད་ཡོད་མི་སྣ་དང་། རྒྱལ་སྤྱིའི་རྒྱལ་ཁབ་འདྲ་མིན་གྱི་སྐུ་ཚབ་མི་སྣ་ཆིག་སྟོང་ལྷག་གི་ཁྲོད་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷ་མོ་ལགས་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་གཙོས་པའི་ལས་བྱེད་ཁག་གཅིག་མཉམ་ཞུགས་གནང་ཡོད་པ་རེད། ལྷན་ཚོགས་ཉིན་དང་པོའི་ཉིན་རྒྱབ་ཏུ་ཨ་རིའི་རྒྱལ་སྤྱིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Sam Brownback མཆོག་གིས་གཙོ་སྐྱོང་གནང་ཐོག་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་དང་གྲོས་ཚོགས་འཐུས་མི་ཟུར་པ་སྐུ་ཞབས་ Frank Wolf ལགས་རྣམ་གཉིས་ནས་རྒྱ་ནག་ནང་གདོང་ལེན་གནང་དགོས་པའི་ཆོས་དད་རང་དབང་གི་གནད་དོན་ཞེས་པའི་བརྗོད་གཞིའི་ཐོག་གྲོས་བསྡུར་གྱི་ལས་རིམ་ཞིག་གནང་ཡོད་པ་དང་། སྐབས་དེར་ལྕམ་སྐུ་ནེན་སི་པི་ལོ་སི་མཆོག་ནས་དེང་གི་འཛམ་བུ་གླིང་འདིའི་ཐོག་ཆོས་དད་རང་དབང་གི་གནད་དོན་ཐད་ཚང་མས་དོན་སྣང་ཆེན་པོ་གནང་དགོས་ས་དེ་རྒྱ་ནག་ཆགས་ཡོད་པ་དང་། དེ་ཡང་རྒྱ་ནག་གིས་ས་གནས་མི་མང་གི་ཆོས་དད་རང་དབང་སྔར་ལྷག་རྡོག་རོལ་གཏོང་བཞིན་པའི་སྐབས་འདིར་དཔལ་འབྱོར་ཁེ་ཕན་སོགས་ལ་མ་གཟིགས་པར་རྒྱ་ནག་ལ་ཐད་ཀར་གསུངས་དགོས་ཞེས་དང་། ལྷག་པར་དུ་ཨ་རིའི་ངོས་ནས་རྒྱ་ནག་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་གཏོང་བཞིན་པའི་གནད་དོན་ཐོག་ཁ་ཁུ་སིམ་པོར་བཞུགས་ཚེ་རྒྱ་ནག་ཕུད་པའི་རྒྱལ་ཁབ་གཞན་གྱི་གནད་དོན་ཐོག་གསུང་བཤད་གནང་རྒྱུའི་གཞི་རྩའི་ཐོབ་ཐང་ཁག་བརླག་གི་རེད་ཅེས་ནན་པོ་གསུངས་འདུག ལྕམ་སྐུ་མཆོག་ནས་དེ་སྔ་ཕྱི་ལོ་ ༢༠༡༥ ལོར་ཁོང་གིས་སྣེ་ཁྲིད་འོག་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་བོད་ནང་ཕེབས་སྐབས་སྲིད་འཛིན་ཞི་ཅིན་ཕིང་གི་སྣེ་ཁྲིད་པའི་རྒྱ་ནག་གཞུང་གིས་ས་གནས་བོད་མིའི་ཆོས་དད་ཀྱི་རང་དབང་གཙོས་པའི་རིག་གཞུང་དང་སྐད་ཡིག་ཐོག་དམ་དྲག་བྱེད་བཞིན་པ་དངོས་སུ་གཟིགས་ཚུལ་བྱུང་ཡོད་པ་དང་། སྐབས་དེར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་གྱི་དམར་ཤོག་ཚོགས་པའི་དྲུང་ཆེ་ Chen Quanguo ཞེས་པ་དེ་ཡིན་པ་དང་། ད་ཆ་ཁོང་ཤིན་ཅང་རང་སྐྱོང་ཁུལ་གྱི་དམར་ཤོག་ཚོགས་པའི་དྲུང་ཆེ་བྱེད་མུས་ཐོག་དེ་སྔ་ཁོང་གིས་བོད་ཐོག་ལག་བསྟར་བྱས་ཡོད་པའི་དྲག་པོའི་སྲིད་བྱུས་རྣམས་ཤིན་ཅང་ནང་ལག་བསྟར་བྱས་ནས་ས་གནས་མི་མང་གི་ཆོས་དད་རང་དབང་དང་གཞི་རྩའི་འགྲོ་བ་མིའི་ཐོབ་ཁག་རྡོག་རོལ་གཏོང་བཞིན་པ་སོགས་འགྲེལ་བརྗོད་དང་སྦྲགས། ཨ་རིའི་ངོས་ནས་རྒྱ་ནག་དམར་ཤོག་ཚོགས་པའི་དྲུང་ཆེ་ Chen Quanguo ལ་ Global Magnitsky Act ཞེས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་དང་འབྲེལ་བའི་ཁྲིམས་འཆར་ཐོག་ནས་ཉེས་ཆད་གཏོང་དགོས་པ་གསུངས་འདུག དེ་བཞིན་སྐབས་དེར་གྲོས་ཚོགས་འཐུས་མི་ཟུར་པ་སྐུ་ཞབས་ Frank Wolf ལགས་ཀྱིས་ད་ལྟའི་རྒྱ་ནག་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་དེ་ལོ་ངོ་སུམ་ཅུའི་གོང་དང་བསྡུར་ན་སྡུག་ཏུ་ཕྱིན་ཡོད་པས་འཛམས་གླིང་མང་ཚོགས་ནས་ཁ་ཁུ་སིམ་པོ་བཞུགས་རྒྱུ་ཡོད་མ་རེད་ཅེས་ནན་པོ་གསུངས་འདུག ད་དུང་ཁོང་གིས་དེང་སྐབས་རྒྱ་ནག་གིས་བོད་དང་ཤིན་ཅང་གཙོ་གྱུར་རྒྱ་ནག་གི་ས་གནས་ཁག་ཏུ་དེང་དུས་ཀྱི་འཕྲུལ་ཆས་བེད་སྤྱོད་བརྒྱུད་མང་ཚོགས་ཀྱི་ལས་དོན་ལ་ཚོད་འཛིན་དང་། ལྟ་སྲུང་ཀྱི་ལས་གཞི་སོགས་སྤེལ་བཞིན་པ་ཐེར་འདོན་དང་སྦྲགས། ཕྱིའི་རྒྱལ་ཁག་ཁག་ཏུ་ལྟ་སྲུང་གི་འཕྲུལ་ཆས་རིགས་བཟོ་མཁན་གྱི་ཚོང་ལས་ཁང་རྣམས་ནས་རྒྱ་ནག་དང་ལྷན་དུ་ཚོང་འབྲེལ་གནང་རྒྱུ་མེད་པ་དང་། ལྷག་པར་དུ་ཨ་རི་ནང་ཡོད་པའི་དེ་འབྲེལ་གྱི་ཚང་ལས་ཁང་རྣམས་མུ་མཐུད་རྒྱ་ནག་དང་འབྲེལ་བ་གནང་ཚེ་ཁྲིམས་གཏུག་གནང་བ་དང་། གལ་སྲིད་ཁྲིམས་ཐོག་ནས་དོན་འབྲེས་མ་སོན་ཚེ་ཨ་རིའི་གྲོས་ཚོགས་ནས་ཁྲིམས་གསར་པ་གཏན་འབེབས་གནང་གནད་ཡིན་པར་སྐུལ་མ་གནང་ཡོད། ཁ་སང་གི་གྲོས་བསྡུར་གྱི་ལས་རིམ་དེ་དབུ་འཛུགས་མ་གནང་གོང་དུ་རྒྱལ་ཁབ་ཁ་བྲལ་གྱི་ཉེས་འཛུགས་འོག་རྒྱ་གཞུང་གི་བཙོན་ཁང་ནང་ཚེ་བཙོན་གྱི་ཁྲིམས་ཆད་མྱོང་བཞིན་པའི་ཡུ་གུར་མི་རིགས་ཀྱི་རང་དབང་རྩོད་ལེན་པ་སྐུ་ཞབས་ Ilham Tohti ལགས་ལ་ཆེ་བསྟོད་དང་སྦྲགས་ཁོང་གི་བུ་མོ་ Jewher Ilham ལགས་ཀྱིས་ད་ལྟའི་ཡུ་གུར་གྱི་ཛ་དྲག་གནས་སྟངས་འགྲེལ་བརྗོད་གནང་བ་དང་། རྒྱ་ནག་གཞུང་ནས་བཀག་སྐྱིལ་ཁང་དུ་བཀག་ཉར་བྱེད་བཞིན་པའི་ཡུ་གུར་བ་རྣམས་འཕྲལ་དུ་གློད་བཀྲོལ་དགོས་པ་དང་། རྒྱ་ནག་གི་བཙོན་ཁང་ནང་ཡོད་པའི་ཆབ་སྲིད་བཙོན་པ་རྣམས་གློད་བཀྲོལ་དགོས་པ། དེ་བཞིན་ཕྱི་ལོ་ ༢༠༢༢ ལོའི་དགུན་དུས་ Olympic དེ་རྒྱ་ནག་ལ་འཚོགས་རྒྱུའི་འོས་ཆོས་ཚང་ཡོད་མེད་ཐོག་དཔྱད་ཞིབ་གནང་དགོས་པ་སོགས་ཀྱི་དགོས་འདུན་ཁག་གཅིག་སྟོན་འདུག གཞི་རྩའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཐེངས་གཉིས་པ་འདི་བཞིན་ཁ་སང་ནས་དབུ་འཛུགས་ཀྱིས་སང་ཉིན་བར་ཉིན་གྲངས་གསུམ་རིང་ཚོགས་ཀྱི་ཡོད་པ་དང་། དབུ་འབྱེད་མཛད་སྒོའི་སྐབས་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་ནས་ཐེངས་འདིའི་ལྷན་ཚོགས་བརྒྱུད་འཛམ་གླིང་སྤྱི་ཡོངས་ལ་ཆོས་དད་རང་དབང་གོང་སྤེལ་གནང་རྒྱུའི་ཐད་ཤུགས་གནོན་རྒྱག་གི་ཡིན་ཞེས་ནན་པོ་གསུངས་ཡོད་པ་མ་ཟད། ཨ་རིའི་རྒྱལ་སྤྱིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Sam Brownback མཆོག་གིས་ལྷན་ཚོགས་འདི་ནི་ཨ་རི་གཞུང་ནས་རྒྱལ་སྤྱིའི་ཐོག་ཆོས་དད་རང་དབང་གོང་སྤེལ་གནང་རྒྱུར་དམིགས་པ་ཞིག་ཡིན་པ་དང་ལས་དོན་འདིའི་ཐོག་རྒྱལ་སྤྱིའི་རྒྱལ་ཁབ་ཚང་མས་མཉམ་འབྲེལ་ཐོག་ནས་ཕྱག་ལས་གནང་དགོས་གལ་ཡིན་པ་གསུངས་འདུག སང་ཉིན་ལྷན་ཚོགས་ཀྱི་ཉིན་མཐའ་མའི་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike Pence མཆོག་གིས་མཇུག་སྡོམ་གསུང་བཤད་དང་སྤྱིའི་ཆོས་དད་རང་དབང་གི་ལས་དོན་ཐོག་བྱས་རྗེས་ཆེན་པོ་འཇོག་མཁན་ཚོར་བྱ་དགའ་གནང་རྒྱུ་སོགས་ཀྱི་མཛད་རིམ་ཡོད་པ་རེད།