རྒྱ་ནག

རྒྱ་ནག་གི་དུས་བཀག་བསྐྱར་ཞིབ་གྲུབ་པ་དང་བསྟུན། རྒྱ་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འཆར་གཞི་གསར་པ་ཞེས་པའི་སྙན་ཐོ་ཞིག་འདོན་སྤེལ་བརྒྱུད། ཕྱི་རྒྱལ་གྱི་ཆབ་སྲིད་གནད་ཡོད་མི་སྣ་དང་གཞུང་ཚབ་པ་རྣམས་བོད་དང་གྲངས་ཉུང་མི་རིགས་ཀྱི་ས་ཁུལ་ཁག་ཏུ་གདན་ཞུ་བྱ་རྒྱུ་ཡིན་ཚུལ་བརྗོད་འདུག དེ་ཡང་ཁ་ཉིན་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པ་དེ་གནང་སྐབས་བོད་དང་ཤིན་ཅང་གི་གནད་དོན་ཐོག་རྒྱ་ནག་ལ་འདྲི་རྩད་བྱེད་མཁན་མང་དག་ཅིག་བྱུང་ཡོད་པ་མ་ཟད། ལྷག་པར་ཨ་རི་དང་ Australia, Denmark, New Zealand བཅས་རྒྱལ་ཁབ་ ༡༢ ནས་བོད་ཀྱི་གནད་དོན་ཐོག་འབུར་བཏོན་གནང་ཡོད་པ་རེད། ཁ་ས་རྒྱ་ནག་ཕྱི་སྲིད་ལས་ཁུངས་ནས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འཆར་གཞི་གསར་པ་ཞེས་དོན་ཚན་ ༣༠ ཅན་གྱི་ཁས་ལེན་སྙན་ཐོ་ཞིག་འདོན་སྤེལ་གནང་འདུག་པའི་ནང་། རྒྱ་གཞུང་ངོས་ནས་ནུབ་ཕྱོགས་རྒྱལ་ཁབ་ཁག་དང་ལྷན་འགྲོ་བ་མིའི་ཐོབ་ཐང་གླེང་མོལ་མུ་མཐུད་བྱ་རྒྱུ་དང་དེ་བཞིན་རྒྱལ་སྤྱིའི་ཚོགས་འདུ་དང་རིག་གནས་སྤེལ་རེས་ཆེད་ཕྱི་རྒྱལ་གྱི་ཆབ་སྲིད་གནད་ཡོད་མི་སྣ་དང་གཞུང་ཚབ་པ་བཅས་བོད་དང་གྲངས་ཉུང་མི་རིགས་ཀྱི་ས་ཁུལ་ཁག་ཏུ་གདན་ཞུ་བྱ་རྒྱུ་མ་ཟད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་མཆོག་རྒྱ་ནག་ལ་གདན་ཞུ་བྱ་རྒྱུ་ཡིན་ཚུལ་བཅས་ཡོངས་བསྒྲགས་བྱས་འདུག ད་དུང་རྒྱ་གཞུང་གི་སྙན་ཐོ་དེ་འབྲེལ་ཐོག་ཁ་ས་རེས་གཟའ་ལྷག་པ་ཉིན་རྒྱ་ནག་གི་ཕྱི་སྲིད་ལས་ཁུངས་སུ་ཚོགས་པའི་ལྷན་ཚོགས་ཤིག་གི་ཐོག་རྒྱ་ནག་ཕྱི་སྲིད་མགྲིན་ཚབ་པ་ Hua Chuying ཡིས་ཁ་ཉིན་རྒྱལ་ཚོགས་སུ་ཚོགས་པའི་རྒྱ་ནག་གི་དུས་བཀག་བསྐྱར་ཞིབ་ཐོག་ནུབ་ཕྱོགས་རྒྱལ་ཁབ་ཁག་ཅིག་གིས་འགྲོ་བ་མིའི་ཐོབ་ཐང་གི་གནད་དོན་དེ་ཆབ་སྲིད་དང་འབྲེལ་བ་བཏགས་ནས་རྒྱ་ནག་གི་མི་རིགས་དང་ཆོས་ལུགས། དེ་བཞིན་ཁྲིམས་ལུགས་ཀྱི་གནད་དོན་ཐོག་གཞི་རྩ་མེད་པའི་སྐྱོན་འཛུགས་བྱས་ཡོད་ཚུལ་བརྗོད་འདུག གནད་དོན་དེའི་ཐད་སུད་སི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་སུ་བཀའ་འདྲི་ཞུས་པར། ཁོང་གིས་རྒྱ་གཞུང་ངོས་ནས་མུ་མཐུད་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁོངས་སུ་བཞུགས་འདོད་ཡོད་ན་ཡུལ་དེའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏོང་རྒྱུའི་ཁས་ལེན་བྱས་པ་ཁག་ངེས་པར་དུ་ལག་ལེན་དུ་འཁེལ་དགོས་ཀྱི་ཡོད་པ་དང་གལ་ཏེ་དེ་ལྟར་མ་བྱས་ཚེ་རྒྱ་ནག་ངོས་ནས་ལོ་བཞི་རེའི་མཚམས་སུ་ཡོང་རྒྱུའི་རྒྱ་ནག་གི་དུས་བཀག་བསྐྱར་ཞིབ་ཀྱི་ལས་རིམ་དེ་ནས་གཡོལ་ཐབས་མེད་པ་ཞིག་རེད་ཅེས་ནན་བརྗོད་གནང་བ་མ་ཟད། ད་ཆ་རྒྱ་གཞུང་གིས་རྒྱལ་ཚོགས་ཀྱི་སྡིངས་ཆ་བེད་སྤྱོད་བརྒྱུད་རྒྱ་ནག་རང་ཉིད་ཀྱི་ཁེ་ཕན་ཁོ་ན་སྒྲུབ་ཐབས་བྱེད་བཞིན་པ་དེ་ནི་སེམས་འཚབ་བྱ་དགོས་པའི་གནད་དོན་ཞིག་ཆགས་ཀྱི་ཡོད་སྟབས་བོད་མིའི་སྒྲིག་འཛུགས་གཙོས་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གྱི་ཚོགས་སྒེར་ཡོངས་ནས་དེར་གདོང་ལེན་ཇི་ལྟར་གནང་ཐུབ་པའི་ཐོག་དགོངས་པ་བཞེས་དགོས་གལ་ཡིན་པ་གསུངས་སོང་།  

ཆབ་མདོ་གྲོང་ཁྱེར་འཇོ་མདའ་རྫོང་སྤོ་ལོ་པད་དགེ་གྲོང་ཚོའི་འབྲི་ཆུའི་རྒྱུད་དུ་ཡང་བསྐྱར་རི་ཉིལ་བྱུང་སྟེ་འབྲི་ཆུའི་བཞུར་རྒྱུན་ཚབས་ཆེན་འགག་ཡོད་འདུག ཁ་སང་རྒྱ་ནག་གི་ཞིན་ཧ་གསར་ཁང་གིས་གནས་ཚུལ་སྤེལ་བ་ལྟར་ན། སྤོ་ལོ་ཡུལ་ཚོར་ཡང་བསྐྱར་རི་ཉིལ་བྱུང་བར་བརྟེན་ཆུ་འཁྱིལ་བའི་ཤུགས་ཚད་ཆེས་ཆེར་འཕེལ་བཞིན་ཡོད་པས།  གོད་ཆགས་བྱུང་སའི་ཉེ་འཁྲིས་ཀྱི་མི་མང་ ༡༠༠༠༠ ལྷག་གནས་སྤོར་བྱས་ཡོད་པ་མ་ཟད།  གཟའ་སྤེན་པ་ནས་བཟུང་ཆུ་འཁྱིལ་འགོ་ཚུགས་ཡོད་པར་གཞིགས་ན། ཁ་སང་བར་དུ་ཆུའི་མཐོ་ཚད་རྨིད་ ༣༣.༨༨ འཕར་ཡོད་པ་དང་།   ཆུ་འགག་གི་རྒྱུ་རྐྱེན་གྱིས་ས་ཁུལ་དེའི་གནམ་གཤིས་ཀྱི་དྲོད་ཚད་ལ་འགྱུར་ལྡོག་ཆེན་པོ་ཕྱིན་ཡོད་པས་མི་འགྱངས་བར་ཁ་བ་ཆེན་པོ་འབབ་ངེས་ཡིན་པར་ཚོད་དཔག་བྱས་འདུགགནས་ཚུལ་དེ་དང་འབྲེལ་ནས་གཞིས་བཞུགས་རྩོམ་པ་པོ་ཚེ་རིང་འོད་ཟེར་ལགས་ཀྱིས་སྒེར་གྱི་ངོ་དེབ་དུ་བཀོད་པ་ལྟར་ན། རི་ཉིལ་བྱུང་སའི་ཡུལ་དངོས་ཀྱི་དགོན་པ་ལ་གནས་སྐབས་སུ་ཉེན་ཁ་མེད་ནའང་བདེ་འཇགས་ཀྱི་ཆེད་དུ་སྤོ་ལོ་དགོན་གྱི་ལྷ་སྐུ་རྟེན་གསུམ་ཕྱིར་འདྲེན་བྱེད་འགོ་ཚུགས་ཟིན་ཡོད་པ་རེད་འདུག   ཁོང་གིས་ས་ཁུལ་དེར་ཅིའི་ཕྱིར་ཡང་ཡང་རི་ཉིལ་གྱི་དོན་རྐྱེན་བྱུང་བཞིན་པ་ཡིན་ནམ་ཞེས་དོགས་འདྲི་བྱས་པ་དང་འབྲེལ།  རྒྱ་ནག་གཞུང་གིས་འགྲེལ་བརྗོད་བྱས་པ་ལྟར་ན་རི་ཉིལ་གྱི་དོན་རྐྱེན་དེ་ནི་རང་བྱུང་གོད་ཆགས་ཤིག་ཡིན་པར་བརྗོད་ཡོད་ནའང་། རི་ཉིལ་བྱུང་སའི་ཡུལ་དངོས་སུ་རྒྱ་ནག་གིས་ཆེད་དུ་འཛུགས་བསྐྲུན་བྱས་པའི་ཆུ་མཛོད་ཆེ་ཤོས་ཡོད་པར་བརྟེན། རི་ཉིལ་དོན་རྐྱེན་དེ་ནི་རང་བྱུང་གོད་ཆགས་ཤིག་ཡིན་མིན་ལ་བསམ་བློ་གཏོང་དགོས་པ་ཞིག་རེད་ཅེས་བཀོད་འདུག རྩ་བའི་རྒྱ་ནག་གཞུང་འབྲེལ་གྱི་དྲ་རྒྱ་ཁག་དུ་རི་ཉིལ་གྱི་དོན་རྐྱེན་དེ་ནི་བཟོ་བསྐྲུན་དང་འབྲེལ་བ་ཡོད་པའི་གནས་ཚུལ་གང་ཡང་འཁོད་མེད་ནའང་དབྱིན་ཡུལ་དུ་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པ་ཞིག་གིས་འབྲི་ཆུའི་རྒྱུད་ཀྱི་རི་ཉིལ་དེ་ནི་ཐད་ཀར་རྒྱ་ནག་གི་བཟོ་ལས་འཛུགས་བསྐྲུན་དང་གཏེར་ཁ་སྔོག་འདོན་ལ་རག་ལས་པ་ཞིག་ཡིན་པ་དང་། དམིགས་བསལ་དུ་རྒྱ་ནག་གི་གྲོང་ཁྱེར་ཆེ་ཁག་གི་གློག་འདོན་ཐོན་ཁོངས་མང་པོ་ཞིག་ནི་འབྲི་ཆུའི་རྒྱུད་ཀྱི་ཆུ་གློག་འཛུགས་བསྐྲུན་ཡིན་པར་བརྟེན་རྔ་བ་དང་དཀར་མཛེས་ས་ཁུལ་དུ་ཆུ་མཛོད་མང་པོ་གསར་འཛུགས་བྱས་པ་ནི་རི་ཉིལ་གྱི་དོན་རྐྱེན་དང་འབྲེལ་བ་ཆེས་ཆེར་ཡོད་པ་ཞིག་ཡིན་ཚུལ་བརྗོད་འདུག    

རྒྱ་གར་གྱི་སྲིད་བྱུས་ཉམས་ཞིབ་ལྟེ་གནས་ཁང་གི་འགན་འཛིན་ Jay Ranade ལགས་ཀྱིས་ཉེ་ལམ་རྒྱ་ནག་གི་རྒྱལ་སྲིད་སྤྱི་ཁྱབ་ཁང་དང་མི་མང་བདེ་འཇགས་ལྷན་ཁང་གི་བློན་ཆེན་ Zhang Kezhi གཙོས་པའི་འཐུས་མི་ ༢༠ ཡིས་རྒྱ་གར་ལ་གཟིགས་སྐོར་བྱེད་སྐབས་བོད་ཀྱི་གནད་དོན་དེ་ཕྱོགས་གཉིས་དབར་གྱི་གྲོས་གཞིའི་ནང་གནད་དོན་གཙོ་བོའི་ཁོངས་སུ་ཡོད་སྐོར་གསུངས་ཡོད་པ་དང་འབྲེལ། Zhang Kezhi ཡིས་སྲིད་འཛིན་ཞི་ཅིན་ཕིང་ལ་ཐེངས་འདིའི་མཇལ་འཕྲད་ཀྱི་གྲུབ་དོན་གང་ཡིན་ངོ་སྤྲོད་བྱས་པ་དེ་རྒྱ་ནག་གིས་རྒྱ་གར་ལ་འཛིན་པའི་སྲིད་བྱུས་ཀྱི་གནད་དོན་གལ་ཆེན་ཞིག་ཆགས་རྒྱུ་ཡིན་པར་འགྲེལ་བརྗོད་གནང་འདུག དེའང་སྐུ་ཞབས་ Ranade ལགས་ཀྱིས་ཟླ་འདིའི་ཚེས་ ༣ ཉིན་ Sunday Guardian ཞེས་པའི་དྲ་གནས་སུ་དཔྱད་རྩོམ་ཞིག་སྤེལ་བའི་ནང་ཟླ་ ༡༠ ཚེས་ ༢༢ ཉིན་རྒྱ་ནག་གི་རྒྱལ་སྲིད་སྤྱི་ཁྱབ་ཁང་དང་མི་མང་བདེ་འཇགས་ལྷན་ཁང་གི་བློན་ཆེན་གྱི་གཙོས་པའི་འཐུས་མི་ ༢༠ ཡིས་རྒྱ་གར་ལ་གཟིགས་སྐོར་བྱས་ཡོད་པ་དང་། སྐབས་དེར་རྒྱ་ནག་གི་ངོས་ནས་གཟིགས་སྐོར་དེའི་བརྒྱུད་ནས་ཕྱོགས་གཉིས་ཀྱི་དབུ་ཁྲིད་རྣམ་གཉིས་རྒྱ་ནག་གི་ས་ཆ་ Wuhan དུ་མཇལ་འཕྲད་བྱས་པའི་གྲུབ་འབྲས་སུ་རྒྱ་དཀར་ནག་གི་འབྲེལ་ལམ་ཇེ་བཟང་དུ་འགྲོ་བཞིན་པ་ཞིག་མཚོན་པར་བྱས་ཡོད་ཀྱང། གཟིགས་སྐོར་དེའི་སྐབས་དོན་གནད་གཙོ་བོ་༸གོང་མཆོག་གིས་དབུས་པའི་བོད་ཀྱི་གནད་དོན་དེ་ཡིན་པར་འགྲེལ་བརྗོད་བྱས་འདུག རྒྱ་ནག་གི་སྐུ་ཚབ་འཐུས་མིའི་གཟིགས་སྐོར་དེའི་སྐབས་སུ་རྒྱ་ནག་གི་རྒྱལ་སྲིད་སྤྱི་ཁྱབ་ཁང་གི་བློན་ཆེན་ Zhao Kezhi རྒྱ་གར་གྱི་སྲིད་བློན་དང་ནང་སྲིད་བློན་ཆེན། དེ་བཞིན་རྒྱལ་ཡོངས་བདེ་འཇགས་ལྷན་ཁང་གི་བློན་ཆེན་སོགས་ལ་མཇལ་འཕྲད་བྱས་ཏེ་ཕྱོགས་གཉིས་ཕན་ཚུན་དབར་གསང་གྲོས་ཁག་དང་ལས་རིམ་ཁག་བརྗེ་ལེན་བྱེད་རྒྱུ། དེ་བཞིན་གོད་ཆག་སྐབས་སུ་མཉམ་རུབ་བྱེད་རྒྱུ་དང་ལག་ལེན་གྱི་སྦྱོང་བརྡར་སོགས་བརྗེ་ལེན་བྱེད་རྒྱུ་སོགས་རྒྱལ་སྲུང་དང་འབྲེལ་བའི་གྲོས་ཆོད་ཁག་ཅིག་བཞག་ཡོད་པ་རེད། རྒྱ་ནག་གི་བློན་ཆེན་གྱི་གཟིགས་སྐོར་སྔ་རྗེས་སུ་རྒྱ་ནག་གི་དམག་མིས་ལ་དྭགས་ཀྱི་བདེ་མཆོག་ལྷ་རི་དཀར་པོ་ས་མཚམས་བརྒྱུད་རྒྱ་གར་ལ་སིམ་འཛུལ་དང་དེ་བཞིན་ཕྱོགས་གཉིས་དབར་གྱི་ཚོགས་འདུའི་སྐབས་ནང་སྲིད་བློན་ཆེན་གཞོན་པ་དང་ཨ་རུ་ནཱ་ཅལ་གྱི་མངའ་སྡེའི་གྲོས་ཚོགས་འཐུས་མི་སྐུ་ཞབས་ kiren rijiju ལགས་མཉམ་ཞུགས་གནང་བ་སོགས་ཀྱི་གནད་དོན་ཁག་ཅིག་བྱུང་ཡོད་ནའང། རྒྱ་ནག་གི་སྲིད་འཛིན་ཞི་ཅིན་ཕིང་གིས་ངེས་པར་དུ་དོ་སྣང་བྱ་རྒྱུའི་གནད་དོན་ནི་བློན་ཆེན་ཁོང་གིས་གཟིགས་སྐོར་དེའི་སྐབས་བོད་དོན་དང་༸གོང་ས་མཆོག་གི་སྐོར། རྒྱ་གར་གྱི་རྒྱལ་ཡོངས་འོས་བསྡུའི་གྲུབ་འབྲས་སོགས་ཀྱི་ཐོག་དཔྱད་ཞིབ་གང་གནང་མིན་དེ་ཆགས་རྒྱུ་ཡིན་ཚུལ་གསུངས་ཡོད། སྐུ་ཞབས་ Ranade ལགས་ཀྱིས་དཔྱད་རྩོམ་དེའི་ནང་བཀོད་པར་གཞིགས་ན། ཐེངས་འདིའི་རྒྱ་ནག་གི་འཐུས་ཚབ་མི་སྣ་རྒྱ་གར་ལ་སྐོར་བསྐྱོད་དུ་ཡོང་བ་ནི་ད་སྐབས་རྒྱ་ནག་གཞུང་གིས་བོད་དུ་དམར་ཤོག་ཚོགས་པའི་དྲིལ་བསྒྲགས་དང། མང་ཚོགས་ཁྲོད་དོགས་སྲུང་གི་ལས་གཞི་ཤུགས་ཆེར་སྤེལ་ནས་གྲྭ་བཙུན་ཚོར་རྒྱ་ནག་གི་སྤྱི་ཚོགས་རིང་ལུགས་ཀྱི་ལྟ་བ་སྤེལ་བཞིན་པ་སོགས་ཀྱི་དུས་མཚམས་དང་སྟབས་འཁེལ་ཡོད་པ་མ་ཟད། བློན་ཆེན་ Zhao Kezhi ཡིས་དྷ་སར་རྟེན་གཞི་བྱས་པའི་ཏཱ་ལའི་བླ་མའི་སྒྲིག་འཛུགས་དེས་བོད་ནང་དུ་ངན་སྐུལ་བྱས་ནས་རྒྱ་ནག་གི་བདེ་འཇགས་ལ་གནོད་པའི་ལས་གཞི་རྩོམ་བཞིན་ཡོད་པར་བསྙོན་འདོགས་བྱས་པ་དང་སྦྲགས། རྒྱ་གར་གྱི་དཔོན་རིགས་རྣམས་ནས་༸གོང་ས་མཆོག་གི་༸སྐུ་ཕྱྭའི་ཐོག་དམ་དྲག་བྱེད་དགོས་པའི་འབད་བརྩོན་བྱས་ཡོད་སྐོར་འགྲེལ་བརྗོད་བྱས་འདུག ཁོང་གིས་ད་དུང་རྒྱ་ནག་གཞུང་གིས་དཔལ་༸རྒྱལ་དབང་ཀརྨ་པ་རྣམ་གཉིས་ཉེ་ལམ་ཕ་རན་སིའི་དབེན་གནས་ཤིག་ཏུ་མཇལ་འཕྲད་གནང་བ་དང་༸རྒྱལ་དབང་ཀརྨ་བ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ Dominican Republic རྒྱལ་ཁབ་ཀྱི་མི་སེར་ཕྱག་འཁྱེར་བླངས་པ་སོགས་ཀྱི་གནས་ཚུལ་ལ་དོ་སྣང་ཆེན་པོ་གནང་བཞིན་པ་མ་ཟད། ༸དཔལ་རྒྱལ་དབང་ཀརྨ་པ་མཆོག་ New Jersey དུ་བཞུགས་དུས་རྒྱ་ནག་གིས་ཞི་མཐུན་གྱི་གྲོས་གཞི་བཏོན་པའི་གནས་ཚུལ་ཡང་ཐོན་ཡོད་པར་འགྲེལ་བརྗོད་བྱས་འདུག རྒྱ་གར་དུ་ཡོང་མཁན་རྒྱ་ནག་གི་སྐབས་དེའི་འཐུས་ཚབ་པའི་ནང་བོད་དོན་དང་འབྲེལ་བའི་གནད་ཡོད་མི་སྣ་ཡོད་པར་འགྲེལ་བརྗོད་བྱས་ཡོད་པ་དང་། དེ་དག་ལས་གཅིག་ནི་བོད་རང་སྐྱོང་ལྗོངས་ཀྱི་བདེ་འཇགས་ལྷན་ཁང་གི་འགན་འཛིན་ Zhang Hongpo ཡིན་པ་དང་། ཁོང་ནི་བོད་ནང་གི་བདེ་འཇགས་དང་འབྲེལ་བའི་ལས་དོན་ཐད་ཉམས་མྱོང་ཕུན་སུམ་ཚོགས་པོ་ཡོད་མཁན་ཞིག་དང་། སྔོན་ཆད་གཞིས་ཀ་རྩེ་ཁྲོང་ཁྱེར་གྱི་རྫོང་དཔོན་བྱས་ནས་ཡུན་རིང་འདུག་མཁན་ཞིན་ཡིན་པ་དང་། དེ་བཞིན་རྒྱ་ནག་གི་ཕྱི་འབྲེལ་བློན་ཆེན་ལས་ཁུངས་ཀྱི་སློབ་སྟོན་པ Wu Wei དང་། ལས་ཁུངས་དེའི་ལས་བྱེད་ Hou Yanqi སོགས་ཡོད་པ་དང་། Hou Yanqi ནི་རྒྱ་ནག་གི་ཕྱི་ལོག་ཏུ་ཡོད་པའི་བོད་མི་དག་གི་ལས་དོན་ཐད་ལས་ཀ་བྱེད་མྱོང་མཁན་ཞིག་ཡིན་ཚུལ་འགྲེལ་བརྗོད་བྱས་འདུག།

རྒྱ་ནག་གིས་ཕྱོགས་གཅིག་ནས་ནང་ཆོས་ནི་དུག་ཏུ་བརྩི་བཞིན་ཡོད་ཀྱང་། ཕྱོགས་གཞན་ཞིག་ནས་རང་ཉིད་ཀྱི་ཁེ་ཕན་སྒྲུབ་ཐབས་སུ་རྒྱུད་གཅིག་ལམ་གཅིག་གི་སྲིད་བྱུས་བརྒྱུད་ནས་མ་དངུལ་ཁྲག་ཁྲིག་ ༡ ཙམ་ཆེད་གཏོང་གིས་འཇམ་པའི་སྟོབས་ཤུགས་ཐོག་ནས་བོད་བརྒྱུད་ནང་བསྟན་དེ་ཕྱི་ནང་གི་འབྲེལ་ལམ་གསར་འཛུགས་ཀྱི་ལག་ཆ་གནད་ཆེ་ཞིག་ཏུ་ངོས་འཛིན་བྱས་འདུག དེའང་བོད་བརྒྱུད་ནང་བསྟན་གྱི་བདག་དབང་རྩོལ་སྒྲུབ་བྱས་པ་མ་ཟད་དེའི་བརྒྱུད་༸གོང་ས་མཆོག་གི་༸སྐུའི་ཡང་སྲིད་ངོས་འཛིན་གནང་ཕྱོགས་ཀྱི་བདག་དབང་དེ་རྒྱ་ནག་གཞུང་ལ་རག་ཐབས་སླད་ཤུགས་སྣོན་རྒྱག་བཞིན་ཡོད་པ་རེད། ཉེ་ལམ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་འབུམ་རམས་པ་རིག་འཛིན་རྡོ་རྗེ་ལགས་ཀྱིས་དཔྱད་རྩོམ་ཞིག་སྤེལ་བའི་ནང་རྒྱ་ནག་ནང་ཁུལ་དུ་ནང་བསྟན་ཆོས་ལུགས་ཀྱི་ལྟེ་གནས་གསར་འཛུགས་བྱེད་བཞིན་པ། ཕྱི་ཕྱོགས་ཀྱི་རྒྱལ་ཁབ་ཁག་ཏུ་འཇམ་པོའི་རྩལ་གྱི་ཐོག་ནས་ནང་ཆོས་དང་འབྲེལ་བའི་དངུལ་དངོས་ཀྱི་མ་རྩ་ཆེད་འཛུགས་བྱེད་བཞིན་པ། དེ་བཞིན་ནང་ཆོས་ཀྱི་བདག་དབང་རྩོལ་སྒྲུབ་ཀྱི་ཐོག་ནས་༸གོང་ས་ཏཱ་ལའི་བླ་མའི་༸སྐུའི་ཡང་སྲིད་ངོས་འཛིན་གྱི་ཐད་ལ་འབད་བརྩོན་བྱེད་བཞིན་པ་སོགས་ས་བཅད་གསུམ་གྱི་ཐོག་ནས་རྒྱ་ནག་གི་ངོས་ནས་ཇི་ལྟར་ནང་བསྟན་ཆོས་ལུགས་དེ་བེད་སྤྱོད་གཏོང་བཞིན་ཡོད་པ་ར་སྤྲོད་གནང་འདུག འདི་ག་རླུང་འཕྲིན་ཁང་གིས་ཉམས་ཞིབ་པ་འབུམ་རམས་པ་རིག་འཛིན་རྡོ་རྗེ་ལགས་སུ་དེ་འབྲེལ་བཅའ་འདྲི་ཁག་ཅིག་ཞུས་པར་ཁོང་གིས་རྒྱ་ནག་དམར་པོའི་གཞུང་ལ་ལོ་རྒྱུས་དང་རིག་གཞུང་གང་གི་ཐོག་ནས་ཀྱང་བོད་བརྒྱུད་ནང་བསྟན་གྱི་བདག་དབང་ཡོད་སྲིད་ཀྱི་མ་རེད་ཅེས་གསུངས་ཡོད།

ཨ་རིའི་ནང་རྟེན་གཞི་བྱས་པའི་ Cornell གཙུག་ལག་སློབ་གྲྭ་ཆེན་མོས་རྒྱ་ནག་ནང་དུ་རྟེན་གཞི་བྱས་པའི་ Renmen གཙུག་ལག་སློབ་གྲྭར་ཤེས་ཡོན་སློབ་གསོའི་རང་དབང་ལ་བཀག་འགོག་བྱས་པར་སློབ་གྲྭ་ཆེན་མོ་དེ་དག་གཉིས་ཀྱི་དབར་རིག་གཞུང་བརྗེ་ལེན་གྱི་ལས་གཞི་རེ་ཞིག་མཚམས་འཇོག་བྱས་འདུག Reuter གསར་ཁང་གིས་གནས་ཚུལ་སྤེལ་བར་ Cornell གཙུག་ལག་སློབ་གྲྭ་ཆེན་མོ་དང་ Renmen གཙུག་ལག་སློབ་གྲྭ་གཉིས་ཀྱི་དབར་འདས་པའི་ལོ་ངོ་དྲུག་ནང་ཕན་ཚུན་རིག་གཞུང་བརྗེ་ལེན་གྱི་ལས་རིམ་ཞིག་སྤེལ་བཞིན་ཡོད་ནའང།  Renmen གཙུག་ལག་སློབ་གྲྭའི་རྒྱ་རིགས་སློབ་མ་ཁག་ཅིག་གིས་ཉེ་ལམ་དྲྭ་རྒྱའི་བརྒྱུད་ནས་རྒྱ་ནག་གི་ལྷོ་ངོས་སུ་ཡོད་པའི་ Huizhou རྒྱལ་སའི་ནང་གི་ཚ་ལ་རྒྱག་སའི་ཚོང་ལས་ཁང་ཞིག་གི་ངལ་རྩོལ་བའི་ཁེ་དབང་ཚོགས་པ་འཛུགས་ཆོག་པའི་དགོས་འདུན་ཆེད་བཏོན་དང་། ངལ་རྩོལ་བ་རྣམས་ལ་རྒྱབ་སྐྱོར་བྱས་པར་བརྟེན་སློབ་མ་དེ་དག་ལ་ཆད་པ་བཅད་པ་ནི་ཤེས་ཡོན་སློབ་གསོའི་རང་དབང་གི་བྱ་སྤྱོད་ལ་བཀག་འགོག་བྱས་པ་རེད་ཅེས་ཨ་རིའི་གཙུག་ལག་སློབ་གྲྭ་ཆེན་མོས་སྐྱོན་བརྗོད་ནན་པོ་གནང་སྟེ་རིག་གཞུང་བརྗེ་ལེན་གྱི་ལས་གཞི་མཚམས་འཇོག་གནང་བའི་གནས་ཚུལ་སྤེལ་འདུག Cornell གཙུག་ལག་སློབ་གྲྭ་ཆེན་མོའི་མགོ་འཛིན་སྐུ་ཞབས་ Michael kotlikoff་ལགས་ཀྱིས་ཐག་གཅོད་དེ་ལྟར་གནང་དོན་གཙོ་བོ་ནི་རྒྱ་ནག་གི་གཙུག་ལག་སློབ་གྲྭ་ཆེན་མོ་དེའི་ནང་རྒྱ་རིགས་སློབ་མ་ཚོས་ངལ་རྩོལ་བའི་ཆེད་དུ་འབོད་སྒྲ་སྒྲོག་པར་སློབ་མ་དེ་དག་ལ་ཉེས་ཆད་བཏང་རྐྱེན་ཡིན་པར་འགྲེལ་བརྗོད་གནང་འདུག བརྒྱུད་ལམ་ཁག་ཏུ་ཐོན་པའི་གནས་ཚུལ་ནང་གསལ་གཞིགས་ཚེ་ Renmen གཙུག་ལག་སློབ་གྲྭའི་རྒྱ་རིགས་སློབ་མ་ཁག་ཅིག་ནས་ངལ་རྩོལ་བའི་ཆེད་དུ་རྒྱབ་སྐྱོར་བྱས་པའི་རྐྱེན་གྱིས་རྒྱ་ནག་དམར་ཤོག་ཚོགས་པས་རྒྱ་རིགས་སློབ་མ་ཁག་ཅིག་འཛིན་བཟུང་བྱས་ཡོད་པ་མ་ཟད། Remen གཙུག་ལག་སློབ་གྲྭ་གཙོ་གྱུར་ཡུལ་དེའི་གཙུག་ལག་སློབ་གྲྭ་གཞན་རྣམས་ལ་ཡང་ལས་འགུལ་དེ་རིགས་ནང་མཉམ་ཞུགས་མི་ཆོག་པའི་བཀོད་ཁྱབ་བཏང་ཡོད་པ་རེད་འདུག Cornell གཙུག་ལག་སློབ་གྲྭ་ཆེན་མོའི་རྒྱལ་སྤྱིའི་ལས་གཞིའི་འགན་འཛིན་སྐུ་ཞབས་ Eli Friedman ལགས་ཀྱིས་རྒྱ་ནག་གི་གཙུག་ལག་སློབ་གྲྭ་ཆེན་མོའི་བྱ་སྤྱོད་ནི་ཤེས་ཡོན་སློབ་གསོའི་རང་དབང་ལ་བརྩི་མེད་བཏང་བ་ཞིག་ལ་ངོས་འཛིན་གནང་གི་ཡོད་ཅེས་གསུངས་པ་དང་འབྲེལ། སློབ་མ་ཚོས་ངལ་རྩོལ་བ་དེ་དག་གི་ཆེད་དུ་འབོད་སྒྲ་སྒྲོག་མཁན་སློབ་ཕྲུག་དེ་དག་གི་ཕ་མ་རྣམས་ལ་གནོན་ཤུགས་སྤྲད་རྒྱུ་དང་། གསང་བའི་ངང་ནས་དམ་དྲག་བྱ་རྒྱུ་དེ་དག་ནི་ཐལ་ཆ་ཅན་གྱི་བྱ་སྤྱོད་ཞིག་ཡིན་པར་མ་ཟད་གཙུག་ལག་སློབ་གྲྭ་དེས་ཐལ་ཆ་ཅན་གྱི་ལག་བསྟར་གནང་སྐོར་གསུངས་པ་དང་འབྲེལ་ནམ་ཞིག་རྒྱ་ནག་གི་གཙུག་ལག་སློབ་གྲྭ་དེའི་ནང་ཤེས་ཡོན་སློབ་གསོའི་རང་དབང་ཐོག་ཡར་རྒྱས་ཕྱིན་པའི་དཔང་པོ་རིགས་བྱུང་ཚེ་ཕན་ཚུན་དབར་རིག་གཞུང་བརྗེ་ལེན་ཡོང་ངེས་ཡིན་པ་བརྗོད་འདུག རྩ་བའི་ Cornell གཙུག་ལག་སློབ་གྲྭ་ཆེན་མོ་དང་ Renmen གཙུག་ལག་སློབ་གྲྭ་ཆེ་མོ་གཉིས་ཀྱི་དབར་རིག་གཞུང་བརྗེ་ལེན་དེ་ཕྱི་ལོ་ ༢༠༡༤ ནས་དབུ་འཛུགས་གནང་བ་ཞིག་ཡིན་པ་དང་། ལོ་ལྟར་དབྱར་དུས་ཀྱི་སྐབས་ཨ་རི་ནས་སློབ་མ་ ༡༠ ཙམ་ renmen གཙུག་ལག་སློབ་གྲྭར་སློབ་སྦྱོང་ཆེད་ཡོང་གི་ཡོད་པ་དང་། དེ་བཞིན་ཨ་རིའི་ནང་རྒྱ་རིགས་སློབ་མ་རྣམས་ལོ་ཕྱེད་ཀྱི་སློབ་སྦྱོང་བྱ་ཕྱིར་གཏོང་སྲོལ་ཡོད་པ་རེད།

རྒྱ་ནག་གིས་རྒྱལ་ནང་གི་བདེ་འཇགས་སྲུང་སྐྱོབ་ཀྱི་ཆེད་དུ་དེང་རབས་ཀྱི་འཕྲུལ་ཆས་གསར་པ་མང་དག་ཞིག་གསར་བཟོ་བྱས་ཏེ་གྲངས་ཉུང་མི་རིགས་ཀྱི་ས་ཁུལ་ལ་ཆེད་དམིགས་ཀྱིས་བེད་སྤྱོད་གཏང་རྒྱུ་རེད་འདུག The Straight Time  ཞེས་པའི་དྲྭ་གནས་ཐོག་གནས་ཚུལ་སྤེལ་བར་ཟླ་བ་འདིའི་ཚེས་ ༢༣ ནས་ ༢༦ བར་རྒྱལ་ས་པེ་ཅིང་དུ་བདེ་འཇགས་སྲུང་སྐྱོབ་དང་འབྲེལ་བའི་འཕྲུལ་ལས་གསར་བཟོའི་མ་ལག་ཁག་ཅིག་ཕྱོགས་བསྡུས་ཀྱིས་འགྲེམས་སྟོན་བྱས་ཡོད་པ་དང་། དེའི་ཁྲོད་དུ་མིའི་གདོང་པ་ངོས་འཛིན་བྱེད་སྤྱད་དང་། iris scanner ཞེས་པའི་མིག་འབྲས་བཤེར་འཚོལ་བྱེད་སྤྱད། དོགས་ཡོད་སྐབས་སུ་ཐད་ཀར་ནམ་མཁའ་ནས་བེད་སྤྱོད་གཏོང་ཐུབ་པའི་མེ་མདའ་དང་མིག་ཤེལ་བརྒྱུད་ནས་དོགས་ཡོད་ངོས་འཛིན་ཐུབ་པ་སོགས་མང་པོ་ཞིག་ཡོད་པ་རེད།  དེ་བཞིན་མིག་འབྲས་བཤེར་འཚོལ་བྱེད་པ་ནི་སྐྱེ་ལྡན་གྱི་གཟུགས་པོའི་མ་ལག་ལ་གཞིར་བཟུང་སྟེ་བཟོས་པ་ཞིག་ཡིན་སྟབས་ནོར་འཁྱུག་མེད་པར་མི་མང་ངོས་འཛིན་ཐུབ་ཀྱི་འདུག འཇར་མ་ནིའི་ནང་རྟེན་གཞི་བྱས་པའི་ཡོ་རོབ་ཀྱི་རིག་གཞུང་དང་འཕྲུལ་ཆས་ཀྱི་མཁས་དབང་།  དམིགས་བསལ་དུ་རྒྱ་ནག་གི་བདེ་འཇགས་ཆེད་མཁས་པ་ Adrian Zenz ལགས་ཀྱིས་ཆེད་བཏོན་གནང་བའི་སྙན་ཐོ་ནང་གསལ་ལྟར་ན། ཕྱི་ལོ་ ༢༠༡༧ ལོའི་རྒྱ་ནག་ནང་གི་བདེ་འཇགས་མ་དངུལ་གྱི་འགྲོ་གྲོན་རྒྱ་སྒོར་ཁྲག་ཁྲིག་ཆེན་མོ་ ༡༢.༤ ལྷག་བརྒལ་ཡོད་པ་དང་། དེ་ནི་སྤྱི་ཡོངས་ཀྱི་ལོ་གཅིག་གི་བདེ་འཇགས་ཀྱི་མ་དངུལ་ལས་བརྒྱ་ཆ་ ༡༢.༤ ལས་འཕར་ཡོད་པ་ཞིག་ཡིན་པ་རེད། སྐུ་ཞབས་ Zenz ལགས་ཀྱིས་རྒྱ་གཞུང་གིས་གྲངས་ཉུང་མི་རིགས་ཀྱི་ས་ཁུལ་ཁག་གི་བདེ་འཇགས་སྲུང་སྐྱོབ་ཐད་དམིགས་བསལ་གྱི་འབད་བརྩོན་ཆེ་བ་བྱེད་བཞིན་པ་དང། དཔེར་ན་བོད་ནང་ལ་ཆ་མཚོན་ན་ཉེ་བའི་ལོ་ཤས་ནས་རྒྱ་ནག་དམར་ཤོག་གི་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་གནང་མཁན་མང་པོ་བྱུང་བར་བརྟེན། རྒྱ་ནག་གིས་ཕྱི་ལོ་ ༢༠༠༧ ནས་ ༢༠༡༦ བར་གྱི་དུས་ཡུན་དེ་དག་ཁྲོད་བདེ་འཇགས་ཐད་ཀྱི་མ་དངུལ་གཏོང་ཕྱོགས་དེ་བརྒྱ་ཆ་ ༤༠༠ ལྷག་འཕར་ཡོད་པ་དང་།  དེ་བཞིན་ཕྱི་ལོ་ ༢༠༡༧ ལོར་རྒྱ་ནག་ནང་གི་ཡུ་གུར་བྱང་ནུབ་ས་ཁུལ་དུ་རིམ་པ་མང་པོའི་དོགས་སྲུང་འཕྲུལ་ཆས་མང་པོ་བསྒྲིགས་ཏེ་བདེ་སྲུང་མ་དངུལ་གྱི་འགྲོ་གྲོན་བརྒྱ་ཆ་ ༡༠༠ ཙམ་སྤར་ཡོད་པ་མ་ཟད་དེ་ནི་ས་ཁུལ་དེའི་འཕྲོད་བསྟེན་གྱི་མ་དངུལ་དང་བསྡུར་ན་ལྡབ་གཉིས་ལས་བརྒལ་ཟིན་སྐོར་འགྲེལ་བརྗོད་བྱས་འདུག རྒྱལ་ས་པེ་ཅིང་དུ་ཚོགས་པའི་བདེ་འཇགས་སྲུང་སྐྱོབ་དང་འབྲེལ་བའི་འཕྲུལ་ལས་གསར་བཟོའི་མ་ལག་འགྲེམས་སྟོན་ཐོག་རྒྱ་ནག་གི་གྲོང་ཁྱེར་ Shenzhen ནང་རྟེན་གཞི་བྱས་ཡོད་པའི་བཟོ་གྲྭ་ ZNV ཟེར་བས་བརྙན་ལམ་ནས་མིའི་གདོང་གི་རྣམ་འགྱུར་དང་ནང་སེམས་ཀྱི་ཆ་ཕྲ་མོ་སོགས་ཀྱང་ཤེས་རྟོགས་ཐུབ་པའི་བདེ་སྲུང་གི་འཕྲུལ་ལས་གསར་བཟོ་བྱས་ཡོད་པ་དང་།  དེ་དག་གི་སྤྱོད་སྒོ་གཅིག་ནི་ཉེན་རྟོག་པས་འདྲི་གཅོད་སྐབས་སུ་སྤྱོད་བཞིན་ཡོད་པ་འཁོད་འདུག རྒྱ་ནག་ནང་གི་ཞིབ་འཇུག་རང་བཞིན་གྱི་མི་མང་བདེ་སྲུང་ཁང་ཞིག་གིས་མེ་མདའ་བེད་སྤྱོད་གཏོང་ཕྱོགས་ཐད་ནས་བརྙན་ལམ་གྱི་རྩེད་མོ་དེ་འདྲ་བཟོས་ཏེ་ཉེན་རྟོག་པ་ཚོར་མེ་མདའ་རྒྱག་ཕྱོགས་ཀྱི་སློབ་སྦྱོང་སྤྲོད་ཀྱི་ཡོད་པ་དང་། ད་ལྟའི་ཆར་དེ་ལྟ་བུའི་རོལ་རྩེད་ཀྱི་མཉེན་ཆས་མ་ལག་ ༣༠ ལྷག་གསར་བཟོ་བྱས་ཡོད་པ་འཁོད་འདུག

རྒྱ་གཞུང་གིས་བོད་གསེར་རྟ་བླ་རུང་སྒར་ཆོས་སྒར་དུ་བདེ་ཆེན་ཞིང་སྒྲུབ་ཆེན་མོ་འཚོགས་ལ་ཉེ་བ་དང་བསྟུན། འདི་ལོ་ཡང་ཁུལ་དེའི་ནང་བདེ་ཆེན་ཞིང་སྒྲུབ་གྱི་སྨོན་ལམ་ཆེན་མོ་ཚོགས་མི་ཆོག་པའི་བཀའ་རྒྱ་བཏང་འདུག བཞུགས་སྒར་དུ་རྟེན་གཞི་བྱས་པའི་ Tibet Watch འམ་བོད་གནས་ལྟ་ཞིབ་ཁང་ལ་རག་སོན་བྱུང་བའི་བཀའ་རྒྱའི་ནང་གསེར་རྟ་བླ་རུང་དགོན་དོ་དམ་ཨུ་ཡོན་ལྷན་ཁང་དང་གསེར་རྟ་ལྔ་རིག་ནང་བསྟན་སློབ་གླིང་ཨུ་ཡོན་ལྷན་ཁང་། གསེར་རྟ་རྫོང་མི་རིགས་ཆོས་ལུགས་ལས་དོན་ཅུས་བཅས་ཀྱི་བླ་རུང་དགོན་པའི་ ༢༠༡༨ ལོར་བདེ་ཆེན་ཞིང་སྒྲུབ་ཆེན་མོ་ཚོགས་པའི་ཐད་ཀྱི་སྤྱི་བསྒྲགས་ཤིག་སྤེལ་བའི་བརྒྱུད་གསེར་རྟ་བླ་རུང་སྒར་གྱི་གྲྭ་བཙུན་ཚོའི་འདི་ལོ་ཡང་ཁུལ་དེའི་ནང་བདེ་ཆེན་ཞིང་སྒྲུབ་ཀྱི་སྨོན་ཆེན་མོ་ཚོགས་མི་ཆོག་པ་གསལ་འདུག་པ་དང་སྐབས་དེར་གསེར་རྟ་བླ་རུང་ཆོས་སྒར་རང་གི་གྲྭ་བཙུན་ཚོའི་ངོས་ནས་ཆོས་གསུང་ཆོག་ཀྱང་ཕྱི་ཕྱོགས་ཀྱི་གྲྭ་བཙུན་དང་ཆོས་ཞུ་བ་རྣམས་གསེར་རྟ་བླ་རུང་སྒར་དུ་ཕེབས་མི་ཆོག་པར་ནན་བརྗོད་བྱས་འདུགསྤྱིར་ལོ་ལྟར་གསེར་རྟ་བླ་རུ་སྒར་དུ་ཚོགས་སྲོལ་ཡོད་པའི་བདེ་ཆེན་ཞིང་སྒྲུབ་ཀྱི་སྨོན་ལམ་ཆེན་མོ་ནི་བོད་ཟླ་ ༩ ཚེས་ ༢༢ ལྷ་བབ་དུས་ཆེན་ཉིན་འཁེལ་གྱི་ཡོད་པ་དང་། དེ་ནི་གསེར་རྟ་བླ་རུང་སྒར་དུ་ཆོས་ཚོགས་ཆེན་མོ་བཞི་ཚོགས་སྲོལ་ཡོད་པའི་ནང་ནས་མི་ཚོགས་འདུ་འཛོམས་ཆེ་ཤོས་ཤིག་ཡིན་པ་མ་ཟད། སྨོན་ལམ་ཆེན་མོ་དེ་བོད་ཟླ་ ༩ ཚེས་ ༢༢ ནས་འགོ་འཛུགས་ཀྱིས་ཉིན་གྲངས་བརྒྱད་ཙམ་རིང་ཚོགས་ཀྱི་ཡོད་པ་དང་སྐབས་དེར་ཆོས་ཞུ་བའི་ངོས་ནས་གཙོ་བོ་སངས་རྒྱས་འོད་དཔག་མེད་ཀྱི་གཟུངས་འབུམ་ཕྲག་མང་པོ་གསུང་འདོན་གནང་བའི་དུས་ཆེན་ཁྱད་པར་བ་ཞིག་ཡིན་པ་རེད། རྩ་བའི་བོད་གསེར་རྟ་བླ་རུང་སྒར་དུ་དེ་སྔ་ ༢༠༡༦ ལོར་རྒྱ་གཞུང་གིས་བཙན་དབང་ཐོག་གྲྭ་བཙུན་རྣམས་ཀྱིས་གྲྭ་ཤག་གཏོར་བཤིག་དང་ཁོང་རྣམས་དགོན་པ་ནས་ཕྱིར་འབུད་བཏང་ནས་དཀའ་ངལ་དུ་མ་བྱུང་ཡོད་པའི་ཁྲོད་ལོ་དེར་བླ་རུང་སྒར་དུ་ལོ་ལྟར་ཚོགས་སྲོལ་ཡོད་པའི་བདེ་ཆེན་ཞིང་སྒྲུབ་ཀྱི་སྨོན་ལམ་ཚོགས་རྒྱུར་བཀག་སྡོམ་བྱས་པ་མ་ཟད། སྔ་ལོ་ཡང་གསེར་རྟ་བླ་རུང་དུ་སྨོན་ལམ་ཆེན་མོ་བཀག་སྡོམ་བྱས་ཡོད་པ་དང་ད་རེས་སླར་ཡང་བཀག་སྡོམ་བྱས་པ་ནི་ཐེངས་གསུམ་པ་དེ་ཆགས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གི་ལམ་སྟོན་འོག་བཙན་བྱོལ་བོད་མིའི་སྒྲིག་འཛུགས་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱ་གཉིས་དབར་གྱི་རྩོད་རྙོག་སེལ་ཐབས་གནང་བཞིན་པའི་ཁྲོད། རྒྱ་མི་རིགས་དང་འབྲེལ་བ་བྱས་ནས་ཁོ་ཚོར་བོད་མིའི་བདེན་དོན་ཐོག་གོ་རྟོགས་སྤེལ་རྒྱུ་ནི་གལ་ཆེ་ནང་གི་དོན་ཆེན་ཞིག་ཏུ་ངོས་འཛིན་གནང་གི་ཡོད་པ་རེད།བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྒྱ་ཡིག་ཚན་པས་དེ་འབྲེལ་བཞུགས་སྒར་དྷ་སར་ཁ་ཉིན་ཚེས་ ༢༢ ནས་བཟུང་རྒྱ་བོད་འབྲེལ་མཐུད་ཀྱི་ཚོགས་འདུ་དང་ཟབ་སྦྱོང་གི་ལས་རིམ་ཞིག་དབུ་འཛུགས་གནང་ཡོད་པ་དང་བསྟུན། འདི་ག་རླུང་འཕྲིན་ཁང་ནས་འཛམ་གླིང་གི་ས་ཕྱོགས་གང་ས་ནས་ཕེབས་པའི་ཚོགས་བཅར་བ་ཁག་ཅིག་དང་དེ་བཞིན་བཀའ་ཤག་གི་རྒྱ་རིགས་འབྲེལ་མཐུད་པའི་དྲུང་ཆེ་བཅས་ལ་དངོས་སུ་སྤྱི་ཚོགས་ནང་ཕེབས་ནས་རྒྱ་རིགས་དང་ལྷན་དུ་བོད་དོན་དྲིལ་བསྒྲགས་གནང་སྐབས་ཀྱི་དཀའ་ངལ་ཆེ་ཤོས་དེ་གང་ཡིན་སྐོར་ལ་བཀའ་འདྲི་ཞུས་པ་ཡིན།ཚོགས་བཅར་བ་ཁག་ཅིག་ནས་སྐབས་དེར་བོད་མིའི་སྒྲིག་འཛུགས་ནས་ཕྱི་རྒྱལ་དུ་གནས་བཞུགས་བོད་མི་གཞོན་སྐྱེས་ཚོར་ད་རེས་བཞུགས་སྒར་དུ་ཚོགས་པ་ལྟ་བུའི་ཟབ་སྦྱོང་རིགས་ཚོགས་དགོས་པ་དང། ཐེ་ཝན་ནང་རྒྱ་ཡིག་སྦྱོང་བརྡར་ཆེད་སློབ་ཡོན་སྤྲོད་དགོས་པ། དེ་བཞིན་བོད་དོན་དང་འབྲེལ་བའི་རྒྱ་ཡིག་གི་དཔེ་དེབ་མང་ཙམ་པར་སྐྲུན་གནང་དགོས་པ་སོགས་ཀྱི་དགོངས་ཚུལ་གནང་མཁན་བྱུང་སོང་བ་མ་ཟད། སྤྱིར་རྒྱ་རིགས་ལ་འབྲེལ་བ་དམ་ཟབ་ཡོང་ཐབས་གནང་རྒྱུ་དེ་ཧ་ཅང་གནད་ཆེ་ཡིན་པ་དེ་ལྟར་ཡང། རྒྱ་མི་རིགས་ལ་སྐད་ཆ་མ་བཤད་གོང་དུ་རང་མི་རིགས་ཀྱི་རྒྱབ་ལྗོངས་དང་ཁྱད་ཆོས་ཆ་ཚང་བ་ཞིག་ཤེས་དགོས་གལ་ཡིན་པ་གསུངས་ཡོད།

དེ་རིང་ཟླ་ ༡༠ ཚེས་ ༢༣ ཉིན་རྒྱབ་རྒྱ་ནག་གཞུང་གི་སྤྱི་བདེ་ལས་ཁུངས་ཀྱི་བློན་ཆེན་ Zhao Kezhi གིས་སྣེ་ཁྲིད་འོག་རྒྱ་ནག་གི་ཆེས་མཐོའི་སྐུ་ཚབ་ཚོགས་ཁག་ཞིག་རྒྱ་གར་དུ་འབྱོར་ཡོད་པ་དང་བསྟུན། དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག་གཞོན་ནུའི་ལས་འགུལ་བ་རྣམས་ནས་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་བོད་ཀྱི་རྒྱལ་དར་འཕྱར་ནས་རྒྱ་མི་བོད་ནས་ཕྱིར་ལོག་དགོས་པ་དང་། ང་ཚོར་རང་དབང་དགོས། ང་ཚོར་ཞི་བདེ་དགོས་པ་སོགས་ཀྱི་ཞུ་སྐུལ་གནང་སྟེ་ངོ་རྒོལ་གྱི་ལས་འགུལ་སྤེལ་སྟབས། གཞོན་ནུའི་ལས་འགུལ་བ་ ༣༥ ལྷག་ཙམ་རྒྱ་ནག་གཞུང་ཚབ་ལས་ཁུངས་མདུན་ནས་འཛིན་བཟུང་བྱས་འདུག གཞི་རྩའི་རྒྱ་ནག་སྤྱི་བདེ་ལས་ཁུངས་ཀྱི་བློན་ཆེན་ Zhao Kezhi ནས་ད་རེས་རྒྱ་ནག་གི་ཆེས་མཐོའི་དཔོན་རིགས་ཁྱོན་ ༣༠ ལྷག་ཙམ་དང་མཉམ་དུ་ཚེས་ ༢༡ ནས་ ༢༥ བར་རྒྱ་གར་ལ་གཞུང་འབྲེལ་ཕྱོགས་བསྐྱོད་བྱེད་བཞིན་ཡོད་པ་དང། ཁ་སང་རྒྱ་ནག་གི་སྐུ་ཚབ་ཚོགས་ཁག་དེ་དག་གིས་རྒྱ་གར་གྱི་ནང་སྲིད་བློན་ཆེན་ Rajnath Singh མཆོག་དང་ལྷན་འཇིགས་སྐུལ་རིང་ལུགས་ལ་གདོང་ལེན་དང། མྱོས་རྫས་ངན་གོམས་བཏང་འཛིན། ཕན་ཚུན་གནས་ཚུལ་སྤེལ་རེས་སོགས་ཕྱོགས་གཉིས་དབར་བདེ་འཇགས་སྲུང་སྐྱོབ་དང་འབྲེལ་བའི་གྲོས་མཐུན་ཞིག་ལ་མིང་རྟགས་བཀོད་ཡོད་པ་རེད།བོད་ཀྱི་གཞོན་ནུ་ལྷན་ཚོགས་ནས་དེ་རིང་ཡོངས་ཁྱབ་གསལ་བསྒྲགས་ཤིག་སྤེལ་ཏེ་རྒྱ་ནག་གི་སྐུ་ཚབ་ཚོགས་ཁག་དེ་དག་གི་ཕྱོགས་སྐྱོད་ལ་ངོ་རྒོལ་མཐའ་གཅིག་ཏུ་ཡོད་པ་དང། སྲིད་བློན་མོ་དི་མཆོག་གིས་དབུས་པའི་རྒྱ་གར་གྱི་དཔོན་རིགས་རྣམས་ནས་ད་རེས་རྒྱ་ནག་གི་སྐུ་ཚབ་ཚོགས་ཁག་དང་ལྷན་དུ་བོད་ཀྱི་གནད་དོན་གླེང་དགོས་པ་མ་ཟད། ཕྱི་འབྲེལ་གྱི་ཐབས་བྱུས་སྒོ་ནས་རྒྱ་དཀར་ནག་གཉིས་དབར་གྱི་འབྲེལ་ལམ་ཁྲོད་ཚོང་འབྲེལ་དང་དཔལ་འབྱོར་གྱི་གནད་དོན་དེ་ཇི་ཙམ་གནད་ཆེ་ཡིན་པ་དེ་ལྟར་འགྲོ་བ་མིའི་ཐོབ་ཐང་གི་གནད་དོན་དེའང་གལ་ཆེར་འཛིན་བཞིན་པ་དེ་གསལ་པོ་བཟོ་དགོས་ཞེས་གསུངས་འདུགརྩ་བའི་རྒྱ་གར་སྐོར་སྲུང་བས་དེ་རིང་འཛིན་བཟུང་བྱས་པའི་གཞོན་ནུའི་ལས་འགུལ་བ་རྣམས་ལྡི་ལི་རོ་ཧི་ནི་བོད་ཁྱིམ་གྱི་མཐོ་རིམ་སློབ་མ་ཤ་སྟགས་ཡིན་པ་དང། ཁོང་རྣམ་པ་ད་ཆ་ལྡི་ལི་ Chanakya སྐོར་སྲུང་ལས་ཁང་དུ་དོ་དམ་བྱེད་མུས་རེད་འདུག