རྒྱལ་སྤྱི།

བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་གིས་དེ་རིང་ཉིན་རྒྱབ་གནས་མཆོག་རྡོ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་འདུག དེའང་༸གོང་ས་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས་བྷི་ཧར་མངའ་སྡེའི་བློན་ཆེན་སྐུ་ཞབས་Nitish Kumar མཆོག་གིས་མགོན་པོ་གང་ཉིད་གི་མཆོག་ལ་མཇལ་ཁ་ཞུ་སྲོལ་ཡོད་པ་ལྟར། དེ་རིང་ཉིན་རྒྱབ་ཆུ་ཚོད་ ༢།༥༠ ཙམ་གྱི་ཐོག་སྤྱི་ཁྱབ་བློན་ཆེན་མཆོག་གནས་མཆོག་རྡོ་རྗེ་གདན་དུ་ཡོད་པའི་རྒྱལ་བའི་བཞུགས་གནས་ཕོ་བྲང་དུ་ཆེད་ཕེབས་དང་འབྲེལ། ༸གོང་ས་མཆོག་ལ་མཇལ་བཅར་ཞུས་ཡོད་པ་རེད། ༸གོང་ས་མཆོག་གིས་སྐབས་དེར་སྤྱི་ཁྱབ་བློན་ཆེན་མཆོག་ནི་རྒྱ་གར་གྱི་དཔལ་ནཱ་ལེནྡཱའི་གནའ་བོའི་རིག་གནས་ལ་དོ་དབྱིངས་ཆེན་པོ་གནང་མཁན་གྱི་སྐུའི་མཛའ་གྲོགས་རྙིང་པ་ཞིག་ཡིན་པའི་དགའ་བསུ་ཞུས་པ་དང་སྦྲགས། དབུ་ཁྲིད་རྣམས་གཉིས་དབར་གྱི་མཇལ་མོལ་དེའི་ཁྲོད་གཙོ་བོ་མགོན་པོ་མཆོག་གི་སྐུའི་ཐུགས་བསྐྱེད་དམ་བཅའ་བཞིའི་སྐོར་དང་། དེའི་ནང་གསལ་དཔལ་ནཱ་ལེནྡཱའི་གནའ་བོའི་རིག་གནས་བསྐྱར་གསོའི་སྐོར་ལ་བཀའ་བསྡུར་མཛད་འདུགགང་ཉིད་དང་བློན་ཆེན་གྱི་མཇལ་མོལ་དེའི་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཆེད་བཅར་ཞུས་ཡོད་པ་རེད་འདུག གཞི་རྩའི་བྷེ་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་གིས་༸གོང་ས་སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས། མགོན་པོ་གང་ཉིད་དང་ལྷན་མཇལ་འཕྲད་ཞུ་སྲོལ་ཡོད་པ་ལྟར། སྔ་ལོའི་ཕྱི་ཟླ་ ༡༢ པའི་ལོ་མཇུག་ཏུའང་༸གོང་ས་མཆོག་ཁུལ་དེར་ཆིབས་བསྒྱུར་མཛད་སྐབས། ཁོང་གིས་མགོན་པོ་གང་ཉིད་ཀྱི་མཇལ་ཁ་ཞུས་ཡོད་པ་མ་ཟད། ༸གོང་ས་མཆོག་ལ་ཡུལ་དེའི་ སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོས་འདུན་ལ་རྒྱབ་སྐྱོར་ཞུ་མྱོང་ཡོད་པ་རེད།

རྒྱ་ནག་གཞུང་གིས་ཆོས་ལུགས་ཚོགས་པ་དོ་དམ་བྱ་ཐབས་ཟེར་བའི་ཁྲིམས་སྒྲིག་གཏན་འབེབས་དང་འབྲེལ། ལོ་འདིའི་ཕྱི་ཟླ་ ༢ པའི་ཚེས་ ༡ ནས་ལག་བསྟར་འགོ་འཛུགས་རྒྱུ་ཡིན་པའི་བརྡ་ཁྱབ་བཏང་འདུག དེའང་ཉེ་ཆར་ཕྱི་ཟླ་ ༡༢ ཀྱི་ཚེས་ ༣༠ ཉིན་འདོན་སྤེལ་བྱས་པའི་ཆོས་ལུགས་ཚོགས་པ་དོ་དམ་བྱ་ཐབས་ཟེར་བའི་ཁྲིམས་སྒྲིག་དེ་ནི་རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཁྲིམས་ཡིག་ཨང་༡༣ པ་དེ་ཡིན་པ་དང་། ཕྱི་ལོ་༢༠༢༠ ཟླ་༢ ཚེས་༡ ཉིན་ནས་ལག་བསྟར་བྱ་རྒྱུ་ཡིན་རབས་བསྒྲགས་འདུག ལེའུ་༦ དང་ནང་གསེས་དོན་ཚན་༤༡ ཡོད་པའི་ཁྲིམས་ཡིག་དེའི་ནང་དུ་གཙོ་བོ། ཆོས་ལུགས་ཚོགས་པའི་རྩ་འཛུགས་དང་སྒྲིག་གཞི། ཆོས་ལུགས་ཚོགས་པའི་འགན་འཁུར་མི་སྣ་དང་དེའི་ནུས་པ། དེ་ལ་ལྟ་སྐུལ་དོ་དམ་སོགས་གཏན་འབེབས་བྱས་ཡོད་པ་འཁོད་འདུག ཁྲིམས་སྒྲིག་འདི་ནི་རྒྱ་གཞུང་གིས་ཕྱི་ལོ་ ༢༠༠༥ ལོར་གཏན་འབེབས་དང་ཕྱི་ལོ་༢༠༡༧ ལོར་བསྐྱར་གཅོས་བྱས་སྟེ་༢༠༡༨ ཟླ་༢ ཚེས་༡ ཉིན་ནས་ལག་བསྟར་བྱེད་པའི་༼ཆོས་ལུགས་ལས་དོན་སྲོལ་ཡིག་༽ཅེས་པ་དེ་སྔར་ལྷག་ལག་བསྟར་དོན་འཁྱོལ་གཏིང་ཟབ་བྱེད་ཐབས་ལ་དམིགས་པ་ཞིག་རེད་འདུག རྩ་བའི་ཆོས་ལུགས་ལས་དོན་གྱི་སྲོལ་ཡིག་ཞེས་པ་འདིའི་ནང་གཙོ་བོ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་བཞག་འཕེལ་རྒྱས་དང་། ཏང་དང་མི་དམངས་མང་ཚོགས་དབར་གྱི་ཤ་རུས་ལྟ་བུའི་འབྲེལ་བ་བཟོ་རྒྱུ། དེ་བཞིན་སྤྱི་ཚོགས་ཞི་མཐུན་དང་མི་རིགས་མཐུན་སྒྲིལ། རྒྱལ་ཁབ་ཀྱི་བདེ་འཇགས་དང་མེས་རྒྱལ་གོང་བུ་གཅིག་གྱུར་བཅས་འཁོད་ཡོད་པ་ལྟར། དེའི་ནང་ནས་གཙོ་བོ་དེ་ཆོས་ལུགས་ཀྲུང་གོ་ལ་བསྒྱུར་བ་ཞེས་པ་དེ་ཡིན་པ་རེད་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པད་མ་རྒྱལ་ལགས་སུ་བཀའ་འདྲི་ཞུས་སྐབས། ཁོང་གིས་རྩ་བའི་རྒྱ་ནག་དམར་ཤོག་ཚོགས་པས་ཆོས་ལུགས་ཀྱི་རིག་གཞུང་དེ་དུག་ཡིན་པར་བརྗོད་མཁན་གྱི་ཆོས་མེད་སྨྲ་བའི་སྒེར་གཅོད་སྲིད་གཞུང་ཞིག་ཡིན་པ་ལྟར། མི་རིགས་ཀྱི་ཆོས་ལུགས་རིག་གཞུང་ཚང་མ་ཀྲུང་གོ་ཅན་ལ་བསྒྱུར་དགོས་ཟེར་བ་དེ་ནི་དོན་དངོས་སུ་དམར་པོའི་རིང་ལུགས་དང་། དེའི་ཆབ་སྲིད་ཀྱི་ལྟ་བ་མ་གཏོགས། མི་རིགས་སོ་སོའི་ཆོས་ལུགས་རིག་གཞུང་ཁག་ཚང་མ་རྩ་མེད་བཟོ་དགོས་ཟེར་བ་དང་གཅིག་པ་ཡིན་པར་གསུངས་སོང་། ལྷག་པར་དུ་ཁོང་གིས་རྒྱ་ནག་གཞུང་གིས་དམིགས་ཡུལ་བཟུང་པ་ལྟར་ད་བར་མི་རིགས་ཀྱི་ཆོས་ལུགས་རྩ་མེད་གཏོང་ཐུབ་མེད་པ་སོགས་ལ་བརྟེན་ནས་རྒྱ་གཞུང་གི་ལོ་ལྟར་ཆོས་ལུགས་དང་འབྲེལ་བའི་ཁྲིམས་སྒྲིག་གཏན་འབེབས་དང་བསྐྱར་བཅོས་བྱེད་བཞིན་ཡོད་པ་གསུངས་སོང་།

Australia ནང་དུ་མེའི་གོད་ཆག་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བའི་ཆེས་ཛ་དྲག་གི་གནས་སྟངས་ཆགས་ཡོད་པ་དང་འབྲེལ། གནས་མཆོག་རྡོ་རྗེ་གདན་དུ་དཔལ་ལྡན་རྒྱུད་སྟོད་གྲྭ་ཚང་དང་དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་ཁུལ་དུ་རྟེན་གཞི་བྱས་པའི་རྣམ་གྲོལ་གླིང་དུ་སྨོན་ལམ་བསྔོ་སྨོན་གསུང་འདོན་སོགས་གནང་བ་མ་ཟད། ཨོ་སི་ཊོ་ལི་ཡའི་ Sydney གྲོང་ཁྱེར་ནང་གི་བོད་རིགས་མཐུན་ཚོགས་ཀྱི་ངོས་ནས་མི་སྐྱོན་ཕོག་པ་རྣམས་ལ་རོགས་སྐྱོར་གྱི་ཞལ་འདེབས་བསྡུ་རུབ་དང་རྐྱེན་འདས་སུ་གྱུར་བ་རྣམས་ཀྱི་ཆེད་དུ་མཆོད་འབུལ་སྨོན་ལམ་གནང་བཞིན་འདུག ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་བཀའ་ཆོས་ཉིན་མཐའ་མའི་ཐོག་མེའི་འཇིག་པའི་གོད་ཆག་ཚབས་ཆེན་ཕོག་པར་ཐུགས་འཚབ་ཡོད་པའི་བཀའ་སློབ་བསྩལ་བ་དང་བོད་མི་རྣམས་ནས་རང་ནུས་གང་ལྕོགས་ཀྱིས་སྨོན་ལམ་གསུང་འདོན་གནང་དགོས་པའི་ལམ་སྟོན་ཕེབས་དོན་བཞིན་ཕྱི་དྲོ་རྡོ་རྗེ་གདན་དུ་དཔལ་ལྡན་རྒྱུད་སྟོད་གྲྭ་ཚང་གི་འདུན་ཡོངས་ནས་ཨོ་སི་ཊོ་ལི་ཡར་མེའི་འཇིག་པའི་གོད་ཆག་ཕོག་རྐྱེན་ཚེ་སྲོག་ཤོར་བ་དང་དཀའ་སྡུག་མྱོང་བཞིན་པའི་སྐྱེ་འགྲོ་ཡོངས་ཀྱི་ཆེད་དུ་སྨོན་ལམ་གསུང་འདོན་གནང་འདུག དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་ཁུལ་དུ་རྟེན་གཞི་བྱས་པའི་རྣམ་གྲོལ་གླིང་དུ་ཨོ་སི་ཊོ་ལི་ཡ་ནང་དུ་མེའི་གོད་ཆག་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བའི་ཆེས་ཛ་དྲག་གི་གནས་སྟངས་གྱུར་པར་བསྔོ་སྨོན་གསུང་འདོན་སོགས་གནང་འདུག དེ་དང་ཕྱོགས་མཚུངས་ཁ་སང་ཨོ་སི་ཊོ་ལི་ཡ་ནང་གི་ Sydney བོད་རིགས་མཐུན་ཚོགས་ཀྱི་ངོས་ནས་བསྒྲགས་གཏམ་ཞིག་སྤེལ་བའི་ནང་དུ་བོད་རིག་མཐུན་ཚོགས་ཀྱིས་འདས་གསོན་ཡོངས་ལ་གདུང་སེམས་མཉམ་བསྐྱེད་མཚོན་ཕྱིར་ཞལ་འདེབས་བསྡུ་རུབ་ཀྱི་ལས་འགུལ་སྤེལ་དོན་ལྟར་ཞལ་འདེབས་ཇི་བྱུང་རྣམས་འབྲེལ་ཡོད་ལས་ཁུངས་སུ་འབུལ་རྒྱུ་ཡིན་པ་དང། ཕྱི་ཚེས་ ༩ ཉིན་གྱི་སྔ་དྲོ་ཕྱག་ཚོད་ ༡༠ ནས་ཉིན་རྒྱབ་ཕྱག་ཚོད་ ༡ བར་ཁུལ་དེའི་ Dee Why Beach ས་གནས་སུ་དགེ་འདུན་པ་དང་མི་མང་རྣམས་ཞབས་རིམ་གསོག་སྒྲུབ་རྒྱལ་བའི་བཀའ་འགྱུར་རིན་པོ་ཆེའི་ཆོས་བསྐོར་སེར་ཕྲེང་གནང་རྒྱུ་ཡིན་པ་གསུངས་འདུག རྩ་བའི་དེ་རིང་ BBC སོགས་རྒྱལ་སྤྱིའི་བརྒྱུད་ལམ་ཁག་གིས་ཁ་སང་དང་དེ་རིང་གཉིས་ལ་མེ་སྐྱོན་ཚབས་ཆེན་ཕོག་སའི་ས་ཁུལ་ New South Wales དང་ Victoria ནང་དུ་ཆར་པ་ཕྲན་བུ་བབས་པར་བརྟེན་གནས་སྟངས་ཅུང་དྲག་སྐྱེད་ཕྱིན་པས་མེ་སྐྱོན་འོག་ཚུད་པ་རྣམས་ལ་ལྟོ་ཆས་བསྐྱལ་ཐུབ་པ་བྱུང་སྐོར་བཀོད་འདུག འོན་ཀྱང་ཁུལ་དེའི་ནང་གི་གནམ་གཤིས་སྔོན་བརྡར་གཞིགས་ཚེ་ བདུན་ཕྲག་འདིའི་རེས་གཟའ་པ་སངས་ཉིན་སླར་ཚ་དྲོད་རྒྱས་སྲིད་པར་ཚོད་དཔག་གནང་འདུག དེ་རིང་བར་གྱི་གནས་ཚུལ་ལ་གཞིགས་ན་ཐེངས་འདིའི་ཨོ་སི་ཊོ་ལི་ཡའི་མེ་སྐྱོན་འོག་མི་གྲངས་ ༢༥ འདས་གྲོངས་སུ་ཕྱིན་ཡོད་པ་ཤེས་རྟོགས་ཐུབ་པ་དང། རི་དྭགས་ས་ཡ་ ༥༠༠ ཙམ་རྐྱེན་འདས་སུ་གྱུར་བ། མེ་སྐྱོོན་མ་ཕོག་སའི་རྒྱལ་ས་ Canberra དང་ Sydney དེ་བཞིན་ Melbourne བཅས་ཀྱི་ནང་དུའང་དུ་བ་འཁེངས་པས་བེུད་སྦྲུམ་མ་དང་ཕྲུ་གུ དེ་བཞིན་དུས་རྒྱུན་དབུགས་བསག་ནད་པ་ཚོར་འཕྲོད་བསྟེན་གྱི་དཀའ་ངལ་དང། དུ་བ་མང་དྲག་རྐྱེན་མཐོང་མ་ཐུབ་པ་སོགས་ཀྱི་དཀའ་ངལ་འཕྲད་བཞིན་ཡོད་པ་རེད་འདུག ད་ལྟའི་ཆར་ཡུལ་དེའི་སྲིད་བློན་གྱིས་མེ་སྐྱོན་ཕོག་པ་རྣམས་ལ་ངལ་སེལ་རོགས་སྐྱོར་ཆེད་ཨ་སྒོར་ཐེར་འབུམ་ ༢ ཙམ་གྱི་འགྲོ་གྲོན་གཏང་རྒྱུའི་ཐག་གཅོད་གནང་ཡོད་ཀྱང། ཁོང་གིས་མེ་སྐྱོན་ཕོག་སྐབས་ Hawaii ནང་སྤྲོ་འཆམ་ལ་ཕེབས་པ་དང་གནམ་གཤིས་འགྱུར་ལྡོག་ཐད་མཚན་རིག་པ་དང་ཁོར་ཡུག་ལས་འགུལ་བ་རྣམས་ཀྱི་ཉེན་བརྡ་དང་ཞུ་གཏུག་རིམ་པར་སྣང་མེད་བཏང་བར་བརྟེན་མང་ཚོགས་ཀྱིས་སྐྱོན་བརྗོད་ཤུགས་ཆེ་གནང་བཞིན་འདུག དེའི་ཁྲོད་དེ་རིང་སྤྱི་ཚོགས་བརྒྱུད་ལམ་ཁག་གི་ཐོག་རྒྱལ་སྤྱིའི་གློག་བརྙན་འཁྲབ་སྟོན་པ་དང་གཞས་པ། གཞས་མ། དེ་བཞིན་སྙན་གྲགས་ཆེ་བའི་མི་སྣ་མང་དག་ཅིག་ནས་ཨོ་སི་ཊོ་ལི་ཡ་ནང་གི་གནས་སྟངས་ཐོག་སེམས་འཚབ་དང་འབྲེལ་རོགས་སྐྱོར་ཆེད་དཔལ་འབྱོར་བསྡུ་རུབ་ཀྱི་ལས་འགུལ་སྤེལ་བ་ལྟར་གཏོང་ཕོད་ཅན་ཚོས་ཨ་སྒོར་ས་ཡ་མང་པོ་ཞལ་འདེབས་གནང་མཁན་འབྱུང་བཞིན་ཡོད་པ་རེད་འདུག

བཞུགས་སྒར་དྷ་རྨ་ས་ལ་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བར་བོད་དོན་གོ་རྟོགས་ཀྱི་རྐང་འཁོར་སྐོར་བསྐྱོད་གནང་མཁན་རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ Sandesh Meshram འམ་བོད་མིང་དུ་སྐུ་ཞབས་བསམ་གཏན་ཡེ་ཤེས་ལགས་དེ་རིང་ Gujurat མངའ་སྡེའི་ Surat གྲོང་ཁྱེར་ནང་དུ་འབྱོར་འདུག རླུང་འཕྲིན་ཁང་གིས་དེ་རིང་སྔ་དྲོ་ཞལ་པར་བརྒྱུད་སྐུ་ཞབས་ Sandesh Meshram ལགས་སུ་བཀའ་འདྲི་ཞུས་པར་ཁོང་གིས་ འདས་པའི་ཟླ་བ་གཅིག་ལྷག་ཙམ་གྱི་རིང་ལ་ཁོང་ནས་མངའ་སྡེ་འདྲ་མིན་ ༦ ཙམ་དང་གྲོང་ཁྱེར་མང་དག་ཅིག་གི་ནང་དུ་རྐང་འཁོར་སྐོར་བསྐྱོད་གནང་ཟིན་ཡོད་པ་དང་། ད་ལྟའི་ཆར་ Gujurat མངའ་སྡེའི་ནང་དུ་འབྱོར་རྗེས་མངའ་སྡེའི་ Bharukh གྲོང་ཁྱེར་དང། དེ་རིང་ Surat གྲོང་ཁྱེར་དུ་འབྱོར་གྱི་ཡོད་སྐོར་གསུངས་པ་དང་སྦྲགས་ཏེ་ད་བར་རྒྱ་གར་མང་ཚོགས་དང་བརྒྱུད་ལམ་ཁག་ནས་ཁོང་གི་བོད་དོན་ཆེད་རྐང་འཁོར་སྐོར་སྐྱོད་ལས་འགུལ་སྤེལ་བར་དོ་སྣང་དང་ངོས་ལེན་ཡག་པོ་གནང་གི་འདུག་ཅེས་ངོ་སྤྲོད་གནང་སོང་། ཁོང་གིས་ད་དུང་ཐེངས་འདིའི་སྐོར་བསྐྱོད་ཐོག་ཁོང་ནས་རྒྱ་གར་མང་ཚོགས་ཁྲོད་ “Free Tibet, Save India” འམ་བོད་ཀྱི་རང་དབང་དང་རྒྱ་གར་གྱི་བདེ་འཇགས་ཞེས་པའི་ཐོག་ནས་རྒྱ་གར་སྐྱོབ་དགོས་པ་དང་། རྒྱ་གཞུང་གིས་བཙོན་འཇུག་འོག་གར་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གི་གནད་དོན། དེ་བཞིན་༸གོང་ས་མཆོག་ལ་རྒྱ་གར་གྱི་སྤྱི་དམངས་ཆེ་བསྟོད་གཟེངས་རྟགས་ Bharat Ratna ཕུལ་དགོས་པ་སོགས་ཀྱི་དབུས་པའི་བོད་དོན་དང་འབྲེལ་བའི་གནད་དོན་མང་དག་ཅིག་གི་ཐོག་གོ་རྟོགས་སྤེལ་བཞིན་ཡོད་པ་གསུངས་སོང་། ལྷག་པར་དུ་ཁོང་གི་སྐོར་བསྐྱོད་ལས་འགུལ་གནང་བའི་ཁྲོད་དུ་རྒྱ་གར་མང་ཚོགས་ནས་རྒྱ་གར་ཡུལ་མི་ཞིག་གིས་བོད་དོན་ཆེད་འགན་འཁུར་དེ་ལྟར་བཞེས་དགོས་པའི་རྒྱུ་མཚན་གང་ཡིན་ནམ་ཞེས་བཀའ་འདྲི་ཡང་ཡང་གནང་གི་འདུག་སྟབས་ཁོང་ནས་རྒྱ་གར་མི་མང་རྣམས་ལ་བོད་དེ་རྒྱ་ནག་གིས་ཧམ་བཟུང་བྱས་པའི་རྐྱེན་གྱིས་ད་ལྟ་རྒྱ་ནག་དང་མཉམ་དུ་ས་མཚམས་ཀྱི་རྩོད་རྙོག་དང་ཆུའི་རྩོད་རྙོག དེ་བཞིན་དཔལ་འབྱོར་སོགས་ཀྱི་རྩོད་རྙོག་མང་དག་ཅིག་ཡོད་པས་བོད་ལ་རང་བཙན་ཐོབ་ཚེ་རྩོད་རྙོག་དེ་དག་རང་བཞིན་གྱི་མེད་པར་འགྱུར་བའི་ཆ་ནས་ཁེ་ཕན་མཐའ་མ་དེ་རྒྱ་གར་རང་ལ་རག་རྒྱུ་ཡིན་པ་སོགས་འགྲེལ་བརྗོད་གནང་ཡོད་པ་གསུངས་ཡོད། རྩ་བའི་བོད་དོན་ཆེད་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་མཁན་སྐུ་ཞབས་ Sandesh Meshram ལགས་ཁོང་ད་ལྟའི་ཆར་ Nagpur བོད་དོན་རྒྱབ་སྐྱོར་ནང་མའི་ས་གནས་འབྲེལ་མཐུད་པའི་འགན་ཁུར་བཞེས་བཞིན་ཡོད་པ་དང་། འདས་པའི་ལོ་ངོ་ ༤༠ ཙམ་ནས་བོད་དོན་ལ་ཚོར་ཤུགས་ཆེན་པོས་རྒྱབ་སྐྱོར་གནང་མཁན་རྒྱ་གར་ཡུལ་མི་ཞིག་ཡིན་པ་རེད། བསམ་གཏན་ཡེ་ཤེས་ལགས་ནས་ཐོག་མར་ཕྱི་ལོ་ ༡༩༩༦ ལོར་བཞུགས་སྒར་དྷ་རྨ་ས་ལ་ནས་ལྡི་ལི་བར་ཞི་བའི་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་འདུག་པ་མ་ཟད། ད་བར་བོད་དོན་དྲིལ་བསྒྲགས་དང་འབྲེལ་བའི་རྐང་འཁོར་སྐོར་བསྐྱོད་ཐེངས་གསུམ་གནང་མྱོང་ཡོད་པར་མ་ཟད། ད་རེས་རྐང་འཁོར་སྐོར་སྐྱོད་ཐེངས་བཞི་པ་འདི་འདས་ལོ་ཟླ་ ༡༢ ཚེས་ ༡ ཉིན་གྱི་སྔ་དྲོ་ཚོུད་ ༡༠ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ནས་དབུ་འཛུགས་ཀྱིས་རྒྱ་གར་གྱི་མངའ་སྡེ་ཆེ་ཁག་ ༡༢ ནང་ཕྱི་ལེ་ ༧༥༠༠ ལྷག་བརྒྱུད་དེ་རྒྱ་གར་ལྷོ་ཕྱོགས་བོད་མིའི་གཞིས་སྒར་མོན་གྷོ་འདོད་རྒུ་གླིང་དུ་བོད་མིའི་རང་དབང་སྒེར་ལངས་ཉིན་མོ་སྟེ་ཕྱི་ལོ་ ༢༠༢༠ ཕྱི་ཟླ་ ༣ ཚེས་ ༡༠ ཉིན་མཇུག་སྒྲིལ་གནང་གི་ཡོད་པ་རེད།

གསེར་རྟ་བླ་རུང་སྒར་གྱི་མཁན་པོ་བསོད་དར་རྒྱས་ལགས་ཀྱི་ཤེས་རབ་སྙིང་རྗེ་དགེ་ལས་ཐེབས་རྩ་ཚོགས་པ་ཞེས་པ་དེ་སྒོ་རྒྱབ་ཡོད་པ་དང་། མཁན་པོ་མཆོག་གི་གསལ་བཤད་ནང་ཐེབས་རྩ་ཁང་སྒོ་རྒྱག་དགོས་པའི་རྒྱབ་ལྗོངས་ཀྱི་རྒྱུ་མཚན་ཁོངས་སུ་མི་རེ་འགས་ལྟེ་གནས་ཁང་དེའི་མིང་ཐོག་ནས་ཁྲིམས་འགལ་གྱི་ལས་དོན་མང་པོ་སྤེལ་བཞིན་པར་འགྲེལ་བརྗོད་གནང་ཡོད་པ་དེ་ལྟར་ཡང་། མཁན་པོའི་སློབ་མ་ཁག་ཅིག་གིས་ཐེབས་རྩ་ཁང་སྒོ་བརྒྱབ་པ་དེའི་རྒྱབ་ཏུ་རྒྱ་ནག་གི་གནོན་ཤུགས་ཡོད་པ་དྭོགས་པ་བྱེད་བཞིན་ཡོད་པ་རེད་འདུག རྩ་བའི་མཁན་པོ་བསོད་དར་རྒྱས་ལགས་ནི་བོད་ནང་དང་དམིགས་བསལ་གྱི་རྒྱ་ནག་གི་སྤྱི་ཚོགས་ནང་དུ་ནང་ཆོས་འཆད་ཁྲིད་བྱེད་མཁན་གྱི་སྐད་གྲགས་ཡོད་པའི་མི་སྣ་ཞིག་ཆགས་ཡོད་པ་མ་ཟད། ཁོང་གི་ནང་ཆོས་ཁྱབ་སྤེལ་གྱི་ལྟེ་གནས་ཁང་དེར་རྒྱལ་ཁབ་ཕྱི་ནང་གཉིས་སུ་་ཡན་ལག་ཀྱི་ལས་ཁུངས་ཡང་མང་པོ་ཡོད་པ་རེད། དེ་རིང་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བ་ལྟར་ན། མཁན་པོ་བསོད་དར་རྒྱས་ལགས་ཀྱིས་ཉེ་ལམ་ཟླ་ ༡༢ པའི་ཚེས་ ༣༠ ཉིན། བླ་རུང་སྒར་སྒར་གྱི་དྲ་རྒྱའི་སྟེང་དུ་གསལ་བསྒྲགས་ཤིག་སྤེལ་ཏེ། དེ་རིང་ནས་བཟུང་ཁོང་གི་བྱམས་བརྩེ་དང་ཤེས་རབ་ཀྱི་ལྟེ་གནས་ཁང་གི་བྱེད་ལས་ཚང་མ་མཚམས་འཇོག་དང་། དེར་འབྲེལ་གྱི་ཡན་ལག་གི་ལས་ཁུངས་དང་་ཆོས་ཚོགས་སོགས་ཡོང་རྫོགས་སྒོ་རྒྱག་རྒྱུ་ཡིན་པར་བརྟེན། སླད་ཐེབས་རྩ་ཁང་འདི་དང་འབྲེལ་བའི་བྱེད་སྒོ་ཁག་གི་གསལ་བསྒྲགས་ཅི་ཞིག་སྤེལ་བ་ཡིན་ནའང་། དེ་ནི་གཞི་རྩ་མེད་པའི་རྫུན་བཟོ་ཡིན་པར་བརྟེན་ཡིིད་ཆེས་བྱེད་མི་རུང་བ་དང་། དེར་འབྲེལ་གྱི་ལྟེ་གནས་ཁང་ལ་ཞལ་འདེབས་ཕུལ་མཁན་རྣམས་ལ་ཡང་ཁོང་དང་འབྲེལ་བ་མེད་པས་མཚམས་འཇོག་བྱེད་དགོས་བ་དང་། གལ་ཏེ་ཐེབས་རྩ་ཁང་གི་མིང་ཐོག་ནས་གསལ་བསྒྲགས་སྤེལ་བ་དང་ཞལ་འདེབས་ལེན་པ་སོགས་ཀྱི་གནས་ཚུལ་བྱུང་བ་ཡིན་ན། ཁོང་གིས་ཁྲིམས་ཐོག་ནས་གནས་ཚུལ་དེར་གདོང་ལེན་བྱེད་རྒྱུ་ཡིན་པར་གསུངས་པ་མ་ཟད། ཁོང་ཉིད་སྔར་ལྟར་རྒྱལ་ཁབ་ལ་དགའ་ཞིང་། ནང་ཆོས་ལ་བློ་སེམས་དཀར་བའི་མི་མང་གི་ཆེད་དུ་ཕྱག་ལས་གནང་ངེས་ཡིན་པར་བརྗོད་པ་དང་སྦྲགས། མི་མང་གིས་དྲང་ཚིགས་ལྡན་པའི་ངང་ནས་ཁྲིམས་བརྩི་སྲུང་བྱེད་རོགས་ཞེས་འབོད་སྐུལ་བྱས་འདུག འོན་ཀྱང་རྒྱལ་སྤྱིའི་བོད་དོན་ལས་འགུལ་ཁང་ལ་ནུབ་ཕྱོགས་སུ་གནས་སྡོད་བྱེད་མཁན་གྱི་མཁན་པོ་བསོད་དར་རྒྱས་ལགས་ཀྱི་རྒྱ་རིགས་སློབ་མ་ཞིག་གིས་གནས་ཚུལ་མཁོ་སྤྲོད་བྱས་པ་ལྟར་ན། སྤྱི་ལོ་ ༢༠༡༩ ལོའི་ཟླ་བ་ ༡༢ པའི་ནང་དུ། རྒྱ་ནག་སྲིད་གཞུང་གིས་བླ་རུང་སྒར་གྱི་མཁན་པོ་བསོད་དར་རྒྱས་དང་མཁན་པོ་ཚུལ་ཁྲིམས་བློ་གྲོས་གཉིས་ལ་དུས་ཡུན་མ་འདྲ་བར་འདྲི་གཅོད་བྱས་ཡོད་པ་དང་། ཐེངས་འདིར་མཁན་པོ་བསོད་དར་རྒྱས་ལགས་ཀྱི་བྱམས་བརྩེ་དང་ཤེས་རབ་ཀྱི་ལྟེ་གནས་ཁང་དེ་སྒོ་རྒྱབ་པ་དེ་ཡང་གནས་ཚུལ་འདི་དང་འབྲེལ་བ་ཡོད་པ་ཞིག་ཡིན་པར་དྭོགས་པ་བྱེད་བཞིན་པ་རེད་འདུག རྒྱལ་སྤྱིའི་བོད་དོན་ལས་འགུལ་ཁང་གིས། མཁན་པོ་བསོད་དར་རྒྱས་ལགས་ཀྱི་ཐེབས་རྩ་ཁང་དེ་སྒོ་རྒྱབ་པ་དེ་ནི་གཅིག་བྱས་ན་ཁོང་ཉིད་ལོ་འདི་གའི་རིང་ལ་སྤྱི་ཚོགས་ཀྱི་ཁྲོད་དུ་ཤན་ཤུགས་ཆེ་བའི་མི་སྣ་ཞིག་ཏུ་གྱུར་ཏེ་རྒྱ་ནག་གི་བདུན་རེའི་དུས་དེབ་ཀྱི་རྒྱབ་ཤོག་ཏུ་བཀོད་པའི་བོད་རིགས་ཐོག་མ་དེ་ཡིན་པར་ལུང་འདྲེན་བྱས་ཏེ།ཐེངས་འདིར་རྒྱ་ནག་གིས་ཁོང་གི་ལྟེ་གནས་ཁང་དེ་ཆེད་དུ་སྒོ་རྒྱབ་པ་དེས་ཁོང་གི་སྤྱི་ཚོགས་ཁྲོད་ཀྱི་ནུས་ཤུགས་དེར་སྟངས་འཛིན་བྱས་པ་ཞིག་ཡིན་སྲིད་པར་བརྗོད་འདུག རྩ་བའི་མཁན་པོ་བསོད་དར་རྒྱས་དང་མཁན་པོ་ཚུལ་ཁྲིམས་བློ་གྲོས་གཉིས་ནི་བླ་རུང་སྒར་ཐོག་མར་ཕྱག་འདེབས་མཁན་གྱི་མཁན་པོ་འཇིགས་མེད་ཕུན་ཚོགས་མཆོག་གི་དངོས་སློབ་ཡིན་པ་དང་། དམ་པ་ཁོང་སྤྱི་ལོ་ ༢༠༠༤ ལོར་དགོངས་པ་རྫོགས་རྗེས། བླ་རུང་སྒར་གྱི་དགོན་པའི་སྐྱིད་སྡུག་ཡོད་ཚད་མཁན་པོ་བསོད་དར་རྒྱས་དང་མཁན་པོ་ཚུལ་ཁྲིམས་བློ་གྲོས་སོགས་ཀྱིས་འགན་ལེན་བྱེད་ཀྱི་ཡོད་པ་རེད། གཞི་རྩའི་བླ་རུང་སྒར་ནི་བོད་ཁུལ་གྱི་དགོན་པ་ཆེས་ཆེ་ཤོས་དེ་ཡིན་པར་བརྟེན། བོད་ཆོལ་ཁ་གསུམ་གྱི་གྲྭ་བཙུན་ཕོན་ཆེར་སློབ་གཉེར་བྱེད་དུ་ཡོང་གི་ཡོད་པར་བརྟེན།སྤྱི་ལོ ༢༠༠༡ ་ནས་བཟུང་། རྒྱ་ནག་གིས་གྲྭ་བཙུན་མང་པོ་བཙན་ཤེད་ཀྱིས་དགོན་པ་ནས་ཕྱིར་ཕུད་བཏང་ཡོད་པ་མ་ཟད། གྲྭ་ཤག་མང་པོ་ཆེད་དུ་གཏོར་བཤིག་བཏང་སྟེ་དགོན་པའི་གྲྭ་བཙུན་གྱི་གྲངས་ཐོ་ལ་ཚོད་འཛིན་བྱས་དང་བྱེད་མུས་ཡིན་པ་རེད།

ཕྱི་ལོ་ ༢༠༢༢ ལོའི་རྒྱ་ནག་ནང་གི་དགུན་དུས་ཨོ་རྩེད་འགྲན་བསྡུར་གྱི་སླད་དུ་རྒྱ་ནག་གི་གངས་ཤུད་གཏོང་མཁན་གྱི་རུ་ཁག་ཞིག་ནོར་ཝེ་ Meråker  ཁུལ་དུ་རྩེད་འགྲན་སྦྱོང་བརྡར་བྱེད་བཞིན་པ་དང་བསྟུན་རུ་ཁག་དེས་ཁུལ་དེའི་དཔེ་མཛོད་ཁང་ཞིག་ལ་རྒྱ་ནག་ནང་ཁུལ་གྱི་རྩོད་རྙོག་ཅན་གྱི་དཔེ་དེབ་ཁག་གཅིག་ཕྱིར་འཐེན་བྱ་དགོས་པའི་དགོས་འདུན་ཆེད་བཏོན་བྱས་ཀྱང་དཔེ་མཛོད་དོ་དམ་པས་མཐའ་གཅིག་ཏུ་དགག་པ་གནང་སྟེ་དེར་ངོས་ལེན་གནང་མི་འདུག ཁ་སང་ཕྱི་ཚེས་ ༢ ཉིན་ norway today གསར་ཁང་གིས་གནས་ཚུལ་སྤེལ་བར་ནོར་ཝེ་དང་རྒྱ་ནག་གཉིས་ མཉམ་སྦྲེལ་གྱིས་ཕྱི་ལོ་ ༢༠༢༢ ལོའི་ཨོ་རྩེད་འགྲན་བསྡུར་གྱི་སླད་དུ་གངས་ཤུད་སྦྱོང་བརྡར་ཞིག་ Meråker ནང་གོ་སྒྲིག་ཞུས་ཡོད་པ་དང་། སྦྱོང་བརྡར་དེའི་ཕྱིར་རྒྱ་ནག་གི་ས་ཁག་འདྲ་མིན་ནས་རྩེད་འགྲན་པ་མི་གྲངས་ ༤༠ དང་སློབ་སྟོན་པ་ ༡༥ དང་འགོ་འཛིན་བཅས་ཀྱི་རུ་ཁག་ཞིག་འབྱོར་ཡོད་པ་རེད། ཁོང་ཚོས་ས་གནས་དེའི་དཔེ་མཛོད་ཁང་གི་ནང་དུ་ Falun Gong ཆོས་བརྒྱུད་འཛིན་མཁན་གྱི་གནད་དོན་དང་འབྲེལ་བའི་དཔེ་དེབ་ཅིག་དང་རྩོད་རྙོག་ཅན་གྱི་དཔེ་དེབ་གཞན་གཉིས་ཡོད་པ་མཐོང་སྟེ་དེར་དོགས་འདྲི་དང་དཔེ་དེབ་དེ་དག་དཔེ་མཛོད་ནས་ཕྱིར་འཐེན་བྱེད་དགོས་པའི་དགོས་འདུན་ཆེད་བཏོན་བྱས་ཡོད་ཀྱང་། སྐབས་དེར་དཔེ་མཛོད་ཁང་གི་འགོ་འཛིན་ Anne Marken ལགས་ཀྱིས་ནོར་ཝེ་ཁུལ་དུ་སྨྲ་བརྗོད་ཀྱི་རང་དབང་ཆ་ཚང་ཡོད་པ་ཞིག་ཡིན་སྟབས་དེ་ནི་ཚད་འགལ་གྱི་འདྲི་རྩད་ཅིག་ཡིན་པར་བརྗོད་དེ་དཔེ་དེབ་དེ་དག་ཕྱིར་འཐེན་བྱ་རྒྱུར་མཐའ་གཅིག་ཏུ་དགག་པས་དེར་ངོས་ལེན་གནང་མི་འདུག དཔེ་མཛོད་ཁང་དེའི་འགོ་འཛིན་ Anne Marken ལགས་ཀྱིས་གསར་ཁང་ལ་མུ་མཐུད་བརྗོད་དོན་རྒྱ་ནག་གི་རྩེད་འགྲན་བ་དེ་དག་ཁུལ་དེར་གནས་སྡོད་བྱེད་བཞིན་རིང་རྒྱ་རིགས་རྩེད་འགྲན་པ་ཁག་གཅིག་ནས་དཔེ་དེབ་དེ་དག་དང་འབྲེལ་ནས་འདྲི་རྩད་ཐེངས་གསུམ་ཙམ་བྱས་ཡོད་སྐོར་དང་། རྒྱ་ནག་གི་རྩེད་འགྲན་པ་ཚོས་བཤད་ཚུལ་ལ་བལྟས་ན་ཅི་སྟེ་རྒྱ་ནག་གཞུང་གིས་རྩེད་འགྲན་པ་རྣམས་དཔེ་དེབ་དེ་དག་དང་ལྷན་དུ་འཛིན་བཟུང་བྱུང་ཚེ་བཙོན་འཇུག་ཁྲིམས་ཐག་བཅད་ངེས་ཡིན་པ་བརྗོད་སྐོར་ལུང་འདྲེན་དང་སྦྲགས། ཁོང་གིས་སྐབས་དེར་རྩེད་འགྲན་པ་དེ་དག་ལ་དཔེ་མཛོད་ཀྱི་ནང་དུ་ཡོད་པའི་དཔེ་དེབ་དེ་རྣམས་ནི་སུས་ཀྱང་བཀླག་ཆོག་པའི་རང་དབང་ཡོད་པ་ཞིག་ཡིན་པར་མ་ཟད་རྒྱ་རིགས་ཚོས་འདྲི་རྩད་བྱས་པ་དེར་བརྟེན་ནས་དཔེ་དེབ་དེ་དག་ཕྱིར་འཐེན་གནང་གི་མ་རེད་ཅེས་ནན་བརྗོད་གནང་ཡོད་སྐོར་འགྲེལ་བརྗོད་གནང་འདུག

དེ་རིང་སྔ་དྲོ།   རྒྱ་གར་བོད་དོན་རྒྱབ་སྐྱོར་ཚོགསཔའི་སྡེ་ཚན་ནང་མའི་གོ་སྒྲིག་གི་འོག  ནུབ་བྷེང་ཀལ་མངའ་སྡེའི་Kolkata གྲོང་ཁྱེར་ནང་རྒྱ་གར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས། དེ་བཞིན་ནུབ་བྷེང་ཀལ་མངའ་སྡེའི་སྲིད་སྐྱོང་Shri. Jagdeep Shanka མཆོག་དང་མངའ་སྡེ་དེ་ཡི་གྲོས་ཚོགས་ཀྱི་འཐུས་མི།  གཞན་ཡང་རྒྱ་གར་གྱི་ཆབ་སྲིད་ཀྱི་ལྟ་གྲུབ་འདྲ་མིན་ཁག་གི་ཚོགས་ཁག་བཅུ་གཉིས་ཀྱི་འཐུས་ཚབ་མི་སྣ་སོགས་ལྷན་འཛོམས་ཀྱི་ཐོག་ནས།  རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་ཆེན་ཚོགས་ཐེངས་དང་པོ་ཚོགས་ནས་མི་ལོ་དྲུག་ཅུ་འཁོར་བར་དྲན་གསོ་དང་སྦྲགས། བོད་དོན་རྒྱབ་སྐྱོར་སྔར་ལགས་ཇེ་ཆེར་གཏོང་རྒྱུའི་ཚོགས་འདུ་ཚོགས་འདུག  དེ་རིང་གི་ཚོགས་འདུ་དང་འབྲེལ་ནས། འདི་གའི་གསར་འགོད་པས་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་འཇིགས་མེད་ཚུལ་ཁྲིམས་ལགས་སུ་བཀའ་འདྲི་ཞུས་པར་ཁོང་གིས།  གཙོ་བོ་རྒྱ་གར་གྱི་འཐབ་རྩོད་པ་གྲགས་ཅན་སྐུ་ཞབས་ Prakash Narayan མཆོག་གི་དབུ་ཁྲིད་འོག་ནས་བོད་མི་རྣམས་ཐོག་མར་༡༩༥༩ ལོར་རྒྱ་གར་དུ་འབྱོར་མཚམས་སུ་ཀོལ་ཀ་ཏ་གྲོང་ཁྱེར་ནང་རྒྱ་གར་བོད་དོན་རྒྱབ་སྐྱོར་གྱི་ཚོགས་འདུ་སྐོང་བའི་ལོ་རྒྱུས་ཀྱི་དུས་ཚིགས་དེར་དྲན་གསོ་ཞུས་པའི་ཐོག་ནས།  སྔོན་མའི་དམིགས་ཡུལ་ལྟར་རྒྱ་གར་གྱིས་བོད་དོན་ལ་རྒྱབ་སྐྱོར་བྱེད་ཕྱོགས་སྐོར་གྱི་ཐད་ནས་གོ་བསྡུར་གནང་ཡོད་པ་ངོ་སྤྲོད་གནང་སོང་། གཞན་ཡང་ཁོང་ལ་དེ་རིང་ཚོགས་ཆེན་དེ་བརྒྱུད་ནས་དམིགས་བསལ་གྱི་བོད་དང་འབྲེལ་བའི་གྲོས་ཆོད་ག་རེ་བཞག་ཡོད་མེད་ཀྱི་ཐད་ནས་བཀའ་དྲི་གནང་བར་ཁོང་གིས།   ཚོགས་ཆེན་གྱི་གྲོས་ཆོད་ནང་དུ་ཕྱོགས་གཅིག་ནས་སྤྱི་ནོར་༸གོང་ས་སྐྱབས་མགོན་མཆོག་ལ་རྒྱ་གར་གྱི་མི་སེར་གཟེངས་རྟགས་མཐོ་ཤོས། Bharat Ratna ཞེས་པ་དེ་འབུལ་བཞེས་གནང་རྒྱུར་ཤུགས་སྣོན་རྒྱག་རྒྱུ་དང་། དེ་བཞིན།  རྒྱ་གར་གྱི་སྤྱི་ཚོགས་ཀྱི་ཁྲོད་དུ་བོད་དོན་གོ་རྟོགས་ཀྱི་ལས་དོན་ཤུགས་ཆེར་སྤེལ་བ་བརྒྱུད་ནས་སྔར་ལས་ལྷག་པའི་བོད་དོན་རྒྱབ་སྐྱོར་ཡོང་ཐབས་སོགས་ཀྱི་གྲོས་ཆོད་བཞག་ཡོད་པར་གསུངས་སོང་། ཁོང་གིས་ད་དུང་། རྩ་བའི་ནུབ་བྷེང་ཀལ་མངའ་སྡེ་ནི་རྒྱ་གར་གྱི་ནང་དུ་དམར་ཤོག་གི་ཆབ་སྲིད་ཚོགས་པ་ཆེ་ཁག་གི་ས་ཁུལ་ཞིག་ལ་འཁེལ་གྱི་ཡོད་སྟབས།  བོད་དོན་དང་འབྲེལ་བའི་ལས་འགུལ་ཤུགས་ཆེར་སྤེལ་རྒྱུར་འགལ་རྐྱེན་སྣ་མང་ཞིག་ཡོད་ནའང་།  དེ་རིང་འདིར་རྒྱ་གར་གྱི་སྤྱི་ཚོགས་ཀྱི་འགོ་ཁྲིད་མང་པོ་ཆེད་དུ་འཛོམས་ནས་ཧིན་བོད་གཉིས་ཀྱི་མཛའ་འབྲེལ་ལ་གཞིགས་པའི་བོད་དོན་རྒྱབ་སྐྱོར་བྱེད་ཕྱོགས་ཀྱི་ཚོགས་འདུ་ཆེན་པོ་ཞིག་ཚོགས་ཡོད་པ་དེས་རྒྱ་ནག་དམར་གཞུང་ལ་བརྡ་ལན་གསལ་བོ་ཞིག་སྤྲད་ཡོད་སྐོར་ཡང་གསུངས་སོང་། རྩ་བའི་རྒྱ་གར་གྱི་འཐབ་རྩོད་པ་གྲགས་ཅན་Jai Prakash Narayan མཆོག་གི་དབུ་ཁྲིད་འོག་ཕྱི་ལོ་ ༡༩༥༩ ཟླ་ ༥ ཚེས་ ༣༠ ནས་ ༣༡ བར་རྒྱ་གར་གྱི་གྲོང་ཁྱེར་ཀོལ་ཀ་ཏར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་ཆེན་ All India Convention on Tibet ཞེས་པ་དེ་ཆེས་ཐོག་མར་ཚོགས་ནས་འདི་ལོར་ལོ་ངོ་ ༦༠ འཁོར་བའི་དུས་དྲན་སྲུང་བརྩི་དང་སྟབས་བསྟུན་གྱིས་ཕྱོགས་ཡོངས་ནས་བོད་དོན་རྒྱབ་སྐྱོར་གོང་སྤེལ་གྱི་ཆེད་དུ་ཐེངས་འདིའི་ཚོགས་འདུ་དེ་ཚོགས་པ་ཞིག་རེད་འདུག པར་དབང་། འཕགས་བོད་འབྲེལ་མཐུད་ལས་ཁུངས།

རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱལ་སྲུང་སྲིད་བྱུས་ཞེས་པའི་འོག ཕྱིའི་འཛམ་བུ་གླིང་དང་བོད་དབར་དེང་དུས་ཀྱི་ཆ་རྐྱེན་ལྡན་པའི་འགག་སྒོ་མཁྲེགས་པོ་ཞིག་བཟོ་བསྐྲུན་བྱེད་དགོས་པའི་དམིགས་ཡུལ་གྱི་འོག་ནས་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་ཞེས་པའི་འཛུགས་སྐྲུན་ལས་གཞི་དེ་འདི་ལོ་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག དེ་ཡང་ཨ་རིའི་རྒྱལ་ས་ Washington DC ནང་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁ་ཉིན་གནས་ཚུལ་སྤེལ་བའི་ནང་དུ། རྒྱ་ནག་གཞུང་གིས་འདི་ལོ་བོད་ཀྱི་ས་མཚམས་ས་ཁུལ་དུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་འཛུགས་བསྐྲུན་ཞེས་པའི་ལས་གཞི་དེ་ཤུགས་ཆེ་རུ་བཏང་བའི་འོག   གྲོང་འཚོ་དེ་དག་གི་ནང་དུ་རྒྱ་ནག་དམར་ཤོག་ཚོགས་པའི་ལས་བྱེད་པ་ཆེད་འཛུགས་ཀྱིས་༸གོང་ས་མཆོག་ལ་དད་གུས་བྱེད་མཁན་བོད་མི་ཚོ་གཙོ་བྱས་པའི་ཕྱིའི་སྟོབས་ཤུགས་སིམ་འཛུལ་གྱི་རིགས་ལ་འགོག་རྒོལ་གྱི་ལས་གཞི་སྤེལ་བཞིན་པ་དང། དེའི་ཁྲོད་བོད་ཀྱི་མཐའ་མཚམས་ས་ཁུལ་ཁག་གི་གྲྭ་བཙུན་རྣམས་ལ་༸གོང་ས་མཆོག་གི་ཤུགས་རྐྱེན་ལ་འགོག་རྒོལ་བྱེད་ཕྱོགས་ཀྱི་དམིགས་གསལ་སྦྱོང་དར་སྤྲད་པ་དང། དེ་བཞིན་བོད་ཀྱི་རྒྱལ་ས་ལྷ་ས་ནས་ཟི་ཁྲོན་ཞིང་ཆེན་བར་དུ་མེ་འཁོར་ལྕགས་ལམ་དང་ཕུག་ལམ་འཛུགས་སྐྲུན་བྱས་ཟིན་པ་སོགས་ཐེར་འདོན་གནང་འདུག ལས་འགུལ་ཁང་གིས་རྒྱ་ནག་གཞུང་འབྲེལ་བརྒྱུད་ལམ་རང་གི་ཐོག་ཐོན་པའི་གནས་ཚུལ་ལ་གཞིགས་ཏེ། རྒྱ་གཞུང་གིས་ཕྱི་ལོ་་༢༠༡༧ ལོ་ནས་ཕྱི་ལོ ༢༠༢༠ བར་གྱི་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་སྲུང་གྲོང་ཚོ་འཛུགས་སྐྲུན་གྱི་ལས་གཞི་ཕྱིར་བསྒྲགས་བྱས་པའི་ནང་དུ། བོད་ཀྱི་མཐའ་མཚམས་ས་ཁུལ་ཁག་ཏུ་གྲོང་ཚོ་འདིའི་རིགས་ ༦༢༤ ཙམ་འཛགས་སྐྲུན་བྱེད་འཆར་ཡོད་པ་དང་། དེ་དག་རྒྱ་གར་གྱི་ཨ་རུ་ན་ཅལ་མངའ་སྡེ་དང་ས་ཐག་ཉེ་བའི་ཉིང་ཁྲི་ས་ཁུལ་དང་། དེ་བཞིན་གཞིས་ཀ་རྩེ་བཅས་ཀྱི་ནང་དུ་འཛུགས་སྐྲུན་བྱེད་འཆར་ཡོད་པ་དང། གྲོང་ཚོ་དེ་དག་ནི་མི་འབོར་ཤུགས་ཆེན་པོ་མེད་པའི་ས་ཁུག་ཁག་དང་། བོད་ནང་གི་བོད་མི་རྣམས་བལ་ཡུལ་དང་རྒྱ་གར་ལ་བྲོས་བྱོལ་ཡོང་སའི་ས་ཁུལ་ཁག་ཏུ་འཛུགས་སྐྲུན་བྱེད་བཞིན་པ་མངོན་གསལ་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་གཞུང་གི་ངོས་ནས་རྒྱ་དཀར་ནག་གཉིས་ཀྱི་ས་མཚམས་ནས་ས་ཐག་རིང་ཐུང་ལ་གཞིགས་ཏེ་སྲུང་སྐྱོབ་ཀྱི་རིམ་པ་དང་པོ་དང་། རིམ་པ་གཉིས་པ་ཞེས་མིང་བཏགས་ཡོད་པ་དང་། ད་ལྟའི་ཆར་རིམ་པ་དང་པོའི་ས་ཁུལ་ཁག་གི་ནང་དུ་གྲོང་ཚོ་ ༤༢༧ འཛུགས་སྐྲུན་ཟིན་པ་དང། དེ་ནས་རིམ་པ་གཉིས་པའི་ས་ཁུལ་ནང་དུ་ད་བར་གྲོང་ཚོ་གསར་པ་༢༠༡ འཛུགས་སྐྲུན་བྱས་ཟིན་པ། དེ་བཞིན་འཛུགས་སྐྲུན་གྱི་ལས་གཞི་དེའི་འོག་ས་གནས་བོད་མི་རྣམས་བཙན་དབང་གིས་གཞིས་སྤོར་བྱེད་དུ་བཅུག་ཡོད་པར་གསུངས་པ་དང་འབྲེལ། རྒྱ་གཞུང་གིས་ས་མཚམས་ཁག་ཏུ་རྒྱལ་སྲུང་གྲོང་ཚོ་གསར་སྐྲུན་གྱི་ལས་གཞིར་དོ་སྣང་ཆེན་པོ་བྱེད་དགོས་དོན་གཅིག་ནི། ས་གནས་བོད་རིགས་འགོ་ཁྲིད་རྣམས་ལ་དམར་ཤོག་ཚོགས་པར་བློ་གཏད་བྱེད་དགོས་པ་དང་། དམར་ཤོག་ཚོགས་པའི་སྟངས་འཛིན་འོག་སྡོད་དུ་འཇུག་རྒྱུའི་ཆེད་དུ་ཡིན་པ་མངོན་རྒྱུ་ཡོད་པ་གསུངས་འདུག དེ་བཞིན་རྒྱ་གཞུང་གིས་རྒྱ་ནག་མི་དམངས་བཅིངས་གྲོལ་དམག་མིའི་དབང་ཚད་རྒྱ་ཆེ་རུ་བཏང་སྟེ་བོད་ཀྱི་ས་མཚམས་བརྒལ་ནས་རྒྱ་གར་དང་བལ་ཡུལ་སོགས་ཀྱི་ནང་དུའང་ཉམས་ཞིབ་བྱེད་དུ་འཇུག་བཞིན་ཡོད་པ་དང་། རྒྱལ་སྲུང་གྲོང་ཚོའི་ནང་གི་དམར་ཤོག་ཚོགས་པའི་ལས་བྱེད་པ་རྣམས་ལ་ཡང་རྒྱ་གར་དང་བལ་ཡུལ་གྱི་ས་མཚམས་ས་ཁུལ་དུ་འབྲེལ་བ་བྱས་པ་བརྒྱུད་རྒྱ་ནག་གི་ཤུགས་རྐྱེན་ཆེ་རུ་གཏོང་རྒྱུའི་ལས་འགན་སྤྲད་ཡོད་པ་ཐེར་འདོན་གནང་འདུག འདི་གའི་གསར་འགོད་པས་གནད་དོན་དེའི་ཐོག་ཕྱི་ལོ་་༢༠༡༧ ཙམ་ནས་ཉམས་ཞིབ་གནང་བཞིན་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པདྨ་རྒྱལ་ལགས་སུ་བཀའ་འདྲི་ཞུས་པར་ཁོང་གིས་རྒྱ་གཞུང་གིས་རྩ་བའི་རྒྱལ་ཁབ་ཀྱི་ས་མཚམས་སྲུང་སྐྱོབ་ཀྱི་མིག་ཐོག་ནས་བོད་མིའི་ཐོག་དམ་དྲག་བྱེད་རྒྱུ་དང་། འདི་ལོ་རྒྱ་ནག་གིས་པཎ་ཆེན་རྒྱལ་མཚན་ནོར་བུ་སྐྱིད་རོང་ཁུལ་དུ་སླེབས་སྐབས་བལ་ཡུལ་ནས་སླེབས་པའི་མི་མང་ཁག་ཅིག་ལ་གཏམ་བཤད་སྤེལ་བ་སོགས་ལ་གཞིགས་ཏེ།  རྒྱ་གཞུང་གི་དམིགས་ཡུལ་གཞན་གཅིག་ནི་ལས་གཞི་དེའི་འོག་རྒྱ་གར་དང་བལ་ཡུལ་གྱི་ས་མཚམས་སུ་གནས་བའི་མི་སེར་རྣམས་རྒྱ་ནག་གི་མི་སེར་ལ་བསྒྱུར་ཐབས་སོགས་ཡིན་པ་གསུངས་སོང་།

དེ་རིང་བོད་མིའི་སྒྲིག་འཛུགས་ཀྱི་དྲ་གནས་སུ་གནས་ཚུལ་སྤེལ་བ་ལྟར་ན། ཨ་རིའི་བོད་ཀྱི་དོན་གཅོད་ཁང་གི་གོ་སྒྲིག་གིས། སྤྱི་ལོ་༢༠༡༩ ལོའི་བོད་རྒྱ་ཞི་མོལ་ཞེས་པའི་བརྗོད་གཞིའི་འོག རྒྱ་རིགས་ཤེས་ལྡན་མི་སྣ་དང་མང་གཙོ་དོན་གཉེར་བ་སོགས་ཀྱི་གཙོ་བྱས་པའི་རྒྱ་རིགས་འཐུས་ཚབ་པ་སུམ་བཅུ་ཙམ་མཉམ་འཛོམས་ཀྱི་ཐོག་ནས་གསར་འགོད་གསལ་བསྒྲགས་ཤིག་སྤེལ་དེ། རྒྱ་ནག་གིས་༸གོང་ས་ཏཱ་ལའི་བླ་མིའི་ཡང་སྲིད་ཀྱི་ཐད་ལ་ཐེ་ཇུས་བྱེད་བཞིན་པ་དེར་ངོས་ལེན་མེད་པའི་དོན་ཚན་བཞི་ཕྱིར་བསྒྲགས་བྱས་འདུག ཨ་རིའི་གྲོང་ཁྱེར་ནིའུ་ཡོག་ཏུ་འཚོགས་པའི་ལས་རིམ་དེའི་སྐབས། རྒྱ་ནག་གི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཟུར་བ་སྐུ་ཞབས་ཧཱོ་ཕཱེན་ 胡平དང་། རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空སོགས་ཀྱི་གཙོ་བྱས་པའི་རྒྱ་རིགས་ཀྱི་ཤེས་ལྡན་མི་སྣ་སུམ་བཅུ་ཙམ་ལྷན་འཛོམས་ཀྱི་ཐོག ༸གོང་ས་ཏ་ལའི་བླ་མིའི་སྐུའི་ཡང་སྲིད་ཀྱི་གནད་དོན་དེ་ནི་ཆོས་ལུགས་ཀྱི་བྱེད་སྒོ་དང་འབྲེལ་བ་ཡོད་པ་ཞིག་ཡིན་པར་བརྟེན། གནད་དོན་དེ་ནི་༸གོང་ས་མཆོག་དང་བོད་མི་མང་གི་ཕྱག་ན་ཡོད་པ་ལས་རྒྱ་ནག་དམར་ཤོག་སྲིད་གཞུང་ལ་དེར་ཐེ་བྱུས་བྱེད་རྒྱུའི་དབང་ཆ་གཅིག་ཀྱང་མེད་པ་ཡོངས་གྲགས་གནང་འདུག དེ་ཡང་ཐེངས་འདིའི་ཚོགས་ཐོག་ཏུ་སྐུའི་ཡང་སྲིད་དང་འབྲེལ་བའི་དོན་ཚན་བཞི་ཅན་གྱི་བསྒྲགས་གཏམ་ཞིག་ཕྱིར་བསྒྲགས་བྱས་ཡོད་པ་རྣམས་ནི། ལོ་རྒྱུས་ཀྱི་ཐོག་ནས་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་དེ་ནི་བོད་མི་ཁོ་ནས་རང་ཆས་སུ་མངའ་བའི་ཆོས་ཕྱོགས་ཀྱི་ལམ་ལུགས་ཤིག་ཡིན་པར་བརྟེན། རྒྱ་ནག་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་གཏོགས་བྱེད་ཐབས་མེད་པ་དང་། དམིགས་བསལ་གྱིས་དུས་རྒྱུན་ནས་༸གོང་ས་མཆོག་གིས་བཀའ་གནང་བ་ལྟར། རྒྱ་ནག་དམར་ཤོག་སྲིད་གཞུང་གིས་ནང་བསྟན་ཆོས་ལུགས་འདི་རྨོངས་དད་དང་རྗེས་ལུས་སུ་བརྩི་མཁན་ཞིག་ཡིན་པ་མ་ཟད། མགོན་པོ་གང་ཉིད་གདོན་འདྲེར་བལྟ་མཁན་ཞིག་ཡིན་པར་བརྟེན། མགོན་པོ་གང་ཉིད་མཆོག་གི་ཡང་སྲིད་འཚོལ་ཞིབ་ལ་ཐེ་གཏོགས་བྱེད་བཞིན་པ་དེ་ནི་རྒྱུ་མཚན་དང་བྲལ་ཞིང་དགོད་བྲོ་བའི་བྱ་སྤྱོད་ཅིག་ཡིན་པ་དང་། ལྷག་པར་དུ་རྒྱ་ནག་གིས་སྐུའི་ཡང་སྲིད་ལ་ཐེ་བྱུས་བྱས་པ་འདི་ཡིས་འཛམ་གླིང་གི་ཤར་ནུབ་གང་སར་ཡོད་པའི་བོད་མི་རྣམས་ཀྱི་རྩ་བའི་ཐོབ་ཐང་ལ་རྡོག་རོལ་བྱས་པ་ཞིག་ཡིན་པར་བརྟེན། རྒྱ་ནག་གིས་སྐུའི་ཡང་སྲིད་ཀྱི་གནད་དོན་དེར་ཐེ་གཏོགས་བྱས་པ་ནི་དུས་ནམ་ཡང་ཁྲིམས་འགལ་གྱི་བྱ་སྤྱོད་ཅིག་ཡིན་པར་གསུངས་འདུག གཞན་ཡང་། ཐེངས་འདིའི་ཚོགས་ཞུགས་ཀྱི་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་བོད་མི་རྣམས་ཀྱི་རྩ་བའི་འགྲོ་བ་མིའི་ཐོབ་དང་རིག་གཞུང་སྲུང་སྐྱོབ། གཞན་ཡང་ཆོས་ལུགས་དད་མོས་དང་རང་བྱུང་སྐྱེད་ཁམས་ཁོར་ཡུག་སྲུང་སྐྱོབ་བཅས་ཀྱི་ཐོབ་ཐང་ལ་རྒྱབ་སྐྱོར་བྱེད་ཀྱི་ཡོད་པ། དེ་བཞིན་མགོན་པོ་གང་ཉིད་ཀྱིས་ལམ་སྟོན་མཛད་པའི་བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་ལ་ཡང་རྒྱབ་སྐྱོར་བྱེད་ཀྱི་ཡོད་པར་གསལ་བོར་འཁོད་འདུག དེ་བཞིན་དོན་ཚན་ཕྱི་མའི་ནང་དུ། ཚོགས་ཞུགས་པ་རྣམས་ཀྱིས་མགོན་པོ་གང་ཉིད་མཆོག་གིས་དགོངས་བཞེས་མཛད་པའི་བོད་རྒྱ་མཛའ་འབྲེལ་དེར་རྒྱབ་སྐྱོར་དང་གུས་བརྩི་ཡོད་པར་བརྗོད་དེ། བོད་རྒྱ་མཛའ་འབྲེལ་དེ་ནི་ལོ་རྒྱུས་རང་བཞིན་ལྡན་པ་ཞིག་ཡིན་ཕྱིར་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་མཛའ་འབྲེལ་དེ་རྒྱུན་སྲིང་བྱེད་རྒྱུར་ཤུགས་སྣོན་བྱེད་རྒྱུ་ཡིན་པ་སོགས་ཀྱི་དོན་ཚན་བཞི་འཁོད་པའི་ཐོག རྒྱ་ནག་ལ་ནམ་ཡང་མགོན་པོ་གང་གི་སྐུའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་བྱུས་བྱེད་རྒྱུའི་ཐོབ་ཐང་མེད་པ་མངོན་གསལ་གནང་འདུག གཞན་ཡང་སྐབས་དེར་རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空 ཀྱིས། དེང་གི་ཆར་རྒྱ་ནག་གི་ནང་དུ་དཔལ་འབྱོར་དང་ཕྱི་འབྲེལ་གྱི་ཐད་ནས་ཉམས་དམས་ཆེན་པོ་བྱུང་བཞིན་པའི་གཏམ་བཤད་སྤེལ་བ་མ་ཟད། ཧོང་ཀོང་གཙོ་བྱས་པའི་རྒྱ་ནག་གི་ས་ཁུལ་གང་སར་སྤྱི་ཚོགས་བརྟན་བརླིང་དང་ལྷིང་འཇགས་མེད་སྐོར་བརྗོད་ཡོད་པ་ལྟར། ཧོང་ཀོང་གི་སྐུ་ཚབ་ཞིག་གིས་ཀྱང་ཧོང་མི་མང་གི་མངོན་འདོད་དང་ཕུགས་བསམ་སོགས་ཀྱི་ཐད་ནས་གཏམ་བཤད་གནང་འདུག སྐབས་དེར་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་ཤོག་གི་རྩུབ་སྤྱོད་འོག་ཏུ་མནར་གཅོད་ཐེབས་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ཀྱིས་མཉམ་མཐུན་གྱི་སྒོ་ནས་ལས་འགུལ་སྤེལ་ཤུགས་ཆེ་རུ་བཏང་སྟེ། རྒྱལ་སྤྱིའི་སྤྱིི་ཚོགས་ཀྱི་ཁྲོད་དུ་རྒྱ་ནག་གི་དབང་བསྒྱུར་ལ་ཁ་གཏད་གཅོག་དགོས་གལ་ཡིན་པ་དང་། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་མི་ལོ་བཞི་བཅུའི་རིང་ལ་དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་དཀའ་རྙོག་སེལ་ཐབས་མཛད་ཡོད་ནའང་རྒྱ་ནག་དམར་ཤོག་སྲིད་གཞུང་གིས་དེར་ངོས་ལེན་གནང་མེད་ཚུལ་དང་འབྲེལ་ནས་ད་ཆ་བོད་རྒྱ་མཛའ་འབྲེལ་ཀྱི་ཚོགས་པ་དེ་ཤུགས་ཆེ་རུ་གཏོང་དགོས་བའི་ཞུ་སྐུལ་གནང་འདུག གཞན་ཡང་ཁོང་གིས། རྒྱ་ནག་སྲིད་གཞུང་གིས་ཉེ་བའི་ཆར་ཧྥོ་ཊན་གཙུལ་ལག་མཐོ་སློབ་ཀྱི་སྒྲིག་ཡིག་གི་ཁོངས་ནས་བསམ་བློའི་རང་དབང་སོགས་ཀྱི་ཚིག་བརྗོད་ཁག་ཕྱིར་འཐེན་བྱས་ཏེ་ཞི་ཅིན་ཕིང་གི་ལྟ་བ་གསར་འཇུག་བྱས་ཡོད་པ་སོགས་ཀྱི་གནས་ཚུལ་དེ་ཡང་ལུང་འདྲེན་གནང་སྟེ་ད་ལྟའི་སྤྱི་ཡོངས་ཀྱི་རྒྱ་ནག་གི་གནས་བབ་ཐད་ནས་གཏམ་བཤད་གནང་འདུག རྩ་བའི་ཐེངས་འདིའི་བོད་རྒྱ་མཛའ་འབྲེལ་གྱི་བསྒྲགས་གཏམ་གྱི་ཚོགས་ཐོག་ཏུ། རྒྱ་རིགས་མང་གཙོ་དོན་གཉེར་བ་དང་ཤེས་ལྡན་མི་སྣ་སུམ་བཅུ་ལྷག་གི་གཙོ་བྱས་པའི་ཨ་རིའི་དོན་གཅོད་པ་དང་ད་ཡོད་ཀྱི་ཨ་རིའི་དོན་གཅོད་ཁང་གི་བོད་རྒྱ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་འབྲེལ་མཐུད་པ་ཟུར་བ་ཀུན་དགའ་བཀྲ་ཤིས་ལགས། གཞན་ཡང་ཨ་རིའི་ནིའུ་ཡོག་དང་ནིའུ་ཇིར་སཱི་ཁུལ་གྱི་བོད་རིགས་སྤྱི་དོན་ཚོགས་པའི་ཚོགས་གཙོ་དང་ཚོགས་མི་རྣམས། དེ་བཞིན་ཨ་རིའི་ཁུལ་གྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་ཀྱིས་མཉམ་ཞུགས་མཛད་ཡོད་པ་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་རིགས་རྣམས་ལ་སྣེ་ལེན་བྱས་པའི་ཐོག དོན་གཅོད་ཁང་གི་རྒྱ་རིགས་འབྲེལ་མཐུད་ཀྱི་ལས་རིམ་ངོ་སྤྲོད་དང་བོད་རྒྱ་གཉིས་ཀྱི་སྤྱི་ཚོགས་ཀྱི་ཁྲོད་དུ་མཛའ་འབྲེལ་མཐོར་འདེགས་གཏོང་ཕྱོགས་སོགས་ཀྱི་ཐད་ནས་གསུངས་བཤད་གནང་འདུག