རྒྱལ་སྤྱི།

ཉེ་ཆར་ཟླ་བ་སྔོན་མའི་ཚེས་ ༡༧ ཉིན་གྱི་མཚན་མོར།   བོད་མཚོ་སྔོན་ཞིང་ཆེན་གྱི་ཡ་གྱལ། དགའ་སྐྱེ་དགུ་མདོ་ཡི་ཁྲི་འདུ་རྫོང་སྡོམ་མདའ་ཡུལ་ཚོའི་ཉེན་རྟོག་ལས་ཁུངས་ཀྱིས།   ལོ་གསར་གྱི་སྐབས་ལ་དམིགས་ནས་ཆེད་དུ་བཟོས་པའི་རྫ་རི་དཀར་མོའི་དགོང་ཚོགས་ཟེར་བའི་སྐད་འཕྲིན་ཚོགས་པའི་ཚོགས་གཙོ་ཀན་སྲི་དང་མཐོ་རིམ་སློབ་མ་སངས་རྒྱས་མཚོ། དགྲ་འདུལ་བཅས་སྡོམ་མདའ་ནས་འཇུ་བཟུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ཡོད་ནའང་།  ཉིན་འགའི་རྗེས་སུ་དགྲ་འདུལ་ལགས་ལ་བཙོན་ཁང་དུ་གཅར་རྡུང་བྱས་ནས་རྐང་ལག་གཉིས་ཆ་བཅག་ནས་སྨན་ཁང་དུ་བསྐྱལ་ཡོད་པའི་གནས་ཚུལ་ཕྱི་ལོ་ཐོན་ཡོད་པ་རེད།

ཨ་རི་དང་ཁེ་ན་ཌ།་དེ་བཞིན་ཉེ་ཆར་ནི་ཐར་ལན་ཌི་བཅས་ཀྱིས་གཞུང་འབྲེལ་སྒོ་ནས་རྒྱ་ནག་གཞུང་གིས་ཡུ་གུར་མི་རིགས་ཐོག་གཉེར་བཞིན་པའི་བྱ་སྤྱོད་དེ་དག་མི་རིགས་རྩ་མེད་གཏོང་རྒྱུའི་བྱ་སྤྱོད་ཡིན་པར་འགྲེལ་བརྗོད་སྔ་རྗེས་སུ་གནང་བའི་ཁྲོད། ཨོ་ལམ་པིག་རྩེད་འགྲན་ནང་མཉམ་ཞུགས་གནང་མཁན་ཡོ་རོབ་དང་ཨ་རི། ཁེ་ན་ཌའི་གྲོ་ཚོགས་འཐུས་མི་ཁག་ཅིག་གིས་རྒྱ་ནག་གཞུང་གིས་ཡུ་གུར་ས་ཡ་མང་པོར་སྡུག་སྦྱོང་ཚད་མེད་བཏང་དང་གཏོང་བཞིན་པར་བརྟེན་ ༢༠༢༢ ལོའི་དགུན་དུས་ཀྱི་ཨ་རྩེད་འགྲན་ཚོགས་དེ་རྒྱ་ནག་ནས་ཕྱིར་འཐེན་གྱིས་རྒྱལ་ཁབ་གཞན་ནང་སྐོང་ཚོགས་གནང་དགོས་པའི་ཞུ་སྐུལ་རིམ་པ་གནང་བཞིན་ཡོད་པ་རེད།ཨ་རིར་རྟེན་གཞི་བྱས་པའི་ Politico ཞེས་པའི་གསར་ཁང་གི་བཅར་འདྲིའི་ཐོག་ནི་ཐར་ལན་ཌིའི་གྲོས་ཚོགས་འཐུས་མི་ Sjoerd Sjoerdsma ལགས་ཀྱིས་ཡུ་གུར་མི་རིགས་བཀག་སྐྱིལ་བྱ་ཡུལ་དེ་དམག་ཆེན་གཉིས་པའི་རྗེས་ཀྱི་བཀག་སྐྱིལ་ཁང་ཆེ་ཤོས་དེ་ཆགས་ཡོད་པར་མ་ཟད། རྒྱ་ནག་གཞུང་གིས་ཡུ་གུར་ཁ་ཆེའི་མི་རིགས་ཀྱི་བེུད་རྣམས་ལ་བཙན་གཡེམ་དང་སྐྱེ་སྒོ་བཀག་རྒྱུ་སོགས་ཀྱི་བྱ་ངན་མུ་མཐུད་སྤེལ་བཞིན་པའི་དཔང་རྟགས་གསལ་པོ་ཡོད་སྟབས། ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་དེ་རྒྱ་ནག་གྱི་རྒྱལ་ས་པེ་ཅིང་དུ་འཚོགས་རྒྱུ་ཡིན་པ་ལས་འཕྲལ་མར་ཕྱིར་འཐེན་གནང་དགོས་སྐོར་སོགས་གསུངས་འདུག་པ་དང་སྦྲགས། རྒྱལ་སྤྱིའི་རྩེད་རིགས་ལྷན་ཚོགས་སུ་འདྲ་ཞིག་ནས་ཨོ་རྩེད་དང་རྐང་སྤོལ་རྩེད་འགྲན་སོགས་གོ་སྒྲིག་གནང་སྐབས་གོ་སྒྲིག་གནང་ཡུལ་གྱི་རྒྱལ་ཁབ་དེར་གཞི་རྩའི་འགྲོ་བ་མིའི་ཐོབ་ཐང་གི་གནས་བབས་སོགས་ལ་རྟོག་ཞིག་ནན་པོ་གནང་དགོས་གལ་ཡིན་པ་གསུངས་འདུགརྩ་བའི་འདི་ལོའི་ཕྱི་ཟླ་ ༢ པའི་ནང་ཨ་རིའི་གྲོས་ཚོགས་གོང་མའི་འཐུས་མི་བདུན་གྱིས་པེ་ཅིང་ཨོ་ལམ་སྤིག་རྩེད་འགྲན་དེ་ས་གནས་གཞན་དུ་གནས་སྤོ་གནང་དགོས་པའི་གཞེན་སྐུལ་གནང་བ་དང་། ཁེ་ན་ཌའི་ཕྱོགས་འགལ་ཚོགས་པའི་དབུ་ཁྲིད་ཀྱིས་ཀྱང་ཟླ་བ་དེའི་ཟླ་དཀྱིལ་དུ་དགོས་འདུན་དེ་སླར་ཆེད་འདོན་གནང་ཡོད་པ་རེད།Politico གསར་ཁང་གིས་ཨོ་ལམ་སྤིག་རྩེད་འགྲན་ཚོགས་ཡུལ་གྱི་རྒྱལ་ཁབ་ཞིག་གི་ཐོག་འདི་ལྟ་བུའི་གླེང་གཞི་བྱུང་བ་དེ་ད་རེས་ཐེངས་དང་པོ་ཆགས་ཀྱི་མེད་པ་དང་། དེ་སྔ་ ༡༩༣༦ ལོར་འཇར་མ་ནི་ཁུལ་དུ་རྩེད་འགྲན་དེ་ཚོགས་སྐབས་ཨ་རི་གཙོས་རྒྱལ་ཁབ་ཁག་ཅིག་ཕྱིར་འཐེན་གནང་བ་མ་ཟད། ཕྱི་ལོ་ ༡༩༨༠ ལོར་སྐབས་དེའི་ཨུ་རུ་སུའི་གཞུང་གིས་ Afghanistan ལ་དབང་སྒྱུར་བྱས་པར་བརྟེན་རྒྱལ་ས་ Moscow ཁུལ་གྱི་ཨོ་རྩེད་འགྲན་ཚོགས་ནས་ཕྱིར་འཐེན་གནང་ཡོད་པ་སོགས་ལུང་འདྲེན་གནང་བ་དང་འབྲེལ། པེ་ཅིང་གི་དགུན་དུས་ཨོ་ལམ་སྤིག་ལ་ངོ་རྒོལ་བྱེད་མཁན་ཇེ་མང་དུ་འགྲོ་བཞིན་པ་དེས་རྩེད་འགྲན་དངོས་ཀྱི་ཐོག་ཤུགས་རྐྱེན་ཇི་འདྲ་ཞིག་ཐེབས་མིན་ད་ལྟ་བརྗོད་དཀའ་བའི་གནས་ལས་མ་འདས་ཀྱང་།དེ་སྔ་ ༢༠༠༨ ལོར་པེ་ཅིང་དུ་རྩེད་འགྲན་དེ་ཚོགས་སྐབས་རྒྱ་ནག་གིས་བོད་ཐོག་འཛིན་པའི་སྲིད་བྱུས་དང་འབྲེལ་བོད་ས་ཁྱོན་ཡོངས་སུ་རྩེད་འགྲན་སྔ་སྣུར་གྱིས་ངོ་རྒོལ་ལས་འགུལ་ཆེས་ཆེར་སྤེལ་སྐོར་དྲན་སྐུལ་གནང་འདུགའོན་ཀྱང་ Netherlands གྱི་ Clingendael Institute ཞེས་པའི་ཉམས་ཞིབ་ཁང་དུ་རྒྱ་ནག་ཐོག་ཉམས་ཞིབ་གནང་མཁན་ TiesDams ཡིས་ཡུ་གུར་མི་རིགས་ཀྱི་གནད་དོན་རྐྱེན་གྱིས་ཐེངས་འདིའི་ཨོ་རྩེད་འགྲན་ཚོགས་ལ་དོ་ཕོག་འགྲོ་རྒྱུ་ནི་ཆེས་དཀའ་བ་ཞིག་ཡིན་སྐོར་གསུངས་པ་དང་ཆབས་ཅིག ནི་ཐར་ལན་ཌི་གྲོས་ཚོགས་ཀྱིས་འཇོག་པའི་གྲོས་ཆོད་སྟེ་རྒྱ་ནག་གཞུང་གིས་ཡུ་གུར་མི་རིགས་རྩ་མེད་ཀྱི་བྱ་འགུལ་བརྩམས་དང་རྩོམ་བཞིན་པའི་གྲོས་ཆོད་དེའི་རྐྱེན་གྱིས་ཡུལ་དེའི་གཞུང་གསར་པའི་ངོས་ནས་ཨ་རིའི་སྲིད་འཛིན་གསར་པ་ JoeBiden དང་ཁོང་གི་འཛིན་སྐྱོང་གི་ངོས་ནས་རྒྱ་གཞུང་ལ་ཁ་གཏད་གཅོག་རྒྱུའི་སྲིད་བྱུས་ལ་རྒྱབ་སྐྱོར་དང་ཡང་ན་འཇར་མ་ནིའི་བློན་ཆེན་དང་ཕ་རན་སིའི་སྲིད་འཛིན་ལྟར་བསྟུན་མཁས་བཅས་གང་གནང་མིན་འདམ་ག་ཞིག་བཟོ་ངེས་ཡིན་སྐོར་གསུང་འདུགGlobal Athlete ཞེས་པའི་རྩེད་འགྲན་ཚོགས་པའི་སྐུ་ཞབས་ Rob Koehler ལགས་ཀྱིས་ཨོ་ལམ་སྤིག་རྩེད་འགྲན་ལྷན་ཚོགས་ཀྱིས་ཐོག་མ་ཉིད་ནས་འགྲོ་བ་མིའི་ཐོབ་ཐང་གི་གནས་བབས་ཆེས་ཞན་པའི་རྒྱལ་ཁབ་ལ་གོ་སྐབས་གནང་ཡོད་སྟབས་དེས་རྩེད་འགྲན་པ་ཚོ་གང་གནང་མིན་དཀའ་བརྗོད་དཀའ་བའི་གནས་སུ་ལྷུང་ཡོད་སྐོར་གསུངས་འདུགསྤྱིར་འཛམ་གླིང་ཁྱོན་ཡོངས་ནས་སྐྱོན་བརྗོད་ཤུགས་ཆེ་གནང་བར་བརྟེན་ཟླ་བ་སྔོན་མར་རྒྱ་ནག་གི་ཕྱི་སྲིད་བློན་ཆེན་གྱི་མགྲིན་ཚབ་པས་ཆབ་སྲིད་ཀྱི་གནད་དོན་ལ་ཁ་གཡར་ནས་ཨོ་རྩེད་འགྲན་ཚོགས་ལ་བར་ཆད་བཟོ་བ་ནི་འགན་མ་འཁུར་བའི་མཚོན་རྟགས་ཤིག་དང་རྒྱལ་སྤྱིའི་ཚོགས་སྡེ་ཁག་གིས་ཀྱང་དེ་འབྲེལ་སྐྱོན་བརྗོད་གནང་མཁན་དག་ལ་རྒྱབ་སྐྱོར་མི་གནང་བའི་ཡིད་ཆེས་ཡོད་སྐོར་བཤད་པ་མ་ཟད། རྒྱ་ནག་གི་ཕྱི་སྲིད་སྲིད་བློན་ཆེན་ WangYi ཡིས་ཡོ་རོབ་མཐུན་ཚོགས་ཀྱི་ཕྱི་འབྲེལ་སྲིད་བྱུས་གཙོ་འཛིན་JosepBorrell ལགས་སུ་ཕྱོགས་གཉིས་ཀའི་ཁེ་ཕན་སླད་ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་ལམ་སྤིག་རྩེད་འགྲན་དེ་གོ་སྐབས་ཤིག་ཡིན་པར་བཤད་ཡོད་པ་རེད།།

ཨ་རིའི་རྙིང་ཞེན་ཚོགས་པའི་གྲོས་ཚོགས་འཐུས་མི་གཉིས་ཀྱིས་གྲོས་ཚོགས་འོག་མའི་ནང་དུ། ཨ་རིའི་ངོས་ནས་དུས་ཚོད་ཡོལ་ཟིན་པའི་རྒྱ་ནག་གཅིག་གི་སྲིད་བྱུས་དེ་ནག་གསུབ་བཏང་སྟེ། ཐེ་ཝན་དང་མཉམ་དུ་གཞུང་འབྲེལ་གྱི་ཐོག་ནས་འབྲེལ་ལམ་བསྐྱར་གསོ་གནང་དགོས་བའི་གྲོས་འཆར་ཞིག་ཆེད་འདོན་གནང་འདུགདེ་རིང་གསར་ལམ་ཁག་ཏུ་གནས་ཚུལ་ཐོན་ཁག་ལ་གཞིགས་ན། ཨ་རིའི་གྲོས་ཚོགས་འཐུས་མི་སྐུ་ཞབས། Tom Tiffany དང་ Scott Perry ལགས་གཉིས་ཀྱིས་གྲོས་ཚོགས་ཀྱི་དབུས་སུ་ཨ་རིའི་ངོས་ནས་རྒྱ་ནག་གཅིག་གི་སྲིད་བྱུས་དོར་ཏེ་ཐེ་ཝན་གྱི་རྒྱལ་ཁབ་མཉམ་དུ་གཞུང་འབྲེལ་གྱི་འབྲེལ་ལམ་བསྐྱར་འཛུགས་དགོས་བར་འབོད་སྐུལ་བྱས་པ་མ་ཟད། ཐེ་ཝན་ནི་འདས་བའི་མོ་ལོ་༧༠ ལྷག་གི་ལོ་རྒྱུས་ཐོག་ནས་རང་བཙན་གྱི་རྒྱལ་ཁབ་ཅིག་ཡིན་པར་མངོན་གསལ་གནང་འདུགགྲོས་ཚོགས་འཐུས་མི་གཉིས་ཀྱིས་ཐེངས་འདིའི་གྲོས་འཆར་བརྒྱུད་བྷ་ཌན་སྲིད་གཞུང་ནས་རྒྱལ་སྤྱིའི་སྒྲིག་འཛུགས་གང་སར་ཐེ་ཝན་ལ་ངོས་འཛིན་ཡོང་ཐབས་བྱེད་དགོས་པ་མ་ཟད། ཐེ་ཝན་སྲིད་གཞུང་ལ་འབྲེལ་མོལ་གྱིས་ཕྱོགས་གཉིས་དབར་རང་དབང་གི་ཚོང་འབྲེལ་གྲོས་ཆོད་འཇོག་དགོས་པའི་ཞུ་སྐུལ་བྱས་འདུག གྲོས་ཚོགས་སུ་གྲོས་འཆར་ཆེད་འདོན་གནང་སྐབས། སྐུ་ཞབས་ Tiffany ལགས་ཀྱིས་འདས་པའི་མི་ལོ་ ༤༠ རིང་ལ། ཨ་རིའི་ཆབ་སྲིད་ཚོགས་པ་གཉིས་ཀྱི་སྲིད་འཛིན་རིམ་པས་དངོས་ཡོད་གནས་ལུགས་ལ་ལྟོས་མེད་ཐེ་ཝན་དེ་རྒྱ་ནག་གི་ཆ་ཤས་ཤིག་ཡིན་པར་རྒྱ་ནག་གི་རྫུན་བསྒྲགས་བྱེད་བཞིན་པ་དེ་བསྐྱར་བཟློས་ཡང་བཟློས་བྱས་ཡོད་སྐོར་བརྗོད་པ་དང་འབྲེལ། ད་ནི་ཨ་རིའི་ངོས་ནས་དུས་ཚོད་ཡོལ་ཟིན་པའི་རྒྱ་ནག་གཅིག་གི་སྲིད་བྱུས་དེ་རྒྱང་ནས་དོར་དགོས་བའི་དུས་ལ་བབ་ཡོད་ཅེས་གསུང་བ་མ་ཟད། སྐུ་ཞབས་ Perry ལགས་ཀྱིས་ཀྱང་ད་བར་ཐེ་ཝན་དང་མཉམ་དུ་ཕྱོགས་མང་པོ་ནས་མཉམ་ལས་བྱེད་མཁན་རང་དབང་ལྡན་པའི་ཨ་རིའི་རྒྱལ་ཁབ་ངོས་ནས་ཐེ་ཝན་ནི་འདས་པའི་ལོ་ངོ་ ༧༠ ནས་རང་བཙན་ལྡན་པའི་རྒྱལ་ཁབ་ཅིག་ཡིན་པ་ཡོངས་གྲགས་གནང་དགོས་སྐོར་གསུངས་འདུག གཞི་རྩའི་ཨ་རིའི་གཞུང་ངོས་ནས་ཕྱི་ལོ་ ༡༩༧༩ བར་ཐའེ་ཝན་དང་ལྷན་དུ་གཞུང་འབྲེལ་གྱི་འབྲེལ་ལམ་བཞག་ཡོད་ཀྱང་། ༧༩ ལོར་སྐབས་དེའི་སྲིད་འཛིན་སྐུ་ཞབས་ Jimmy Carter མཆོག་གིས་བློ་བུར་ཐའེ་ཝན་དང་འབྲེལ་ལམ་བཅད་དེ་རྒྱ་ནག་དམར་ཤོག་གཞུང་ལ་ངོས་འཛིན་གནང་ཡོད་པ་རེད། ཨ་རིའི་གྲོས་ཚོགས་འཐུས་མི་རྣམས་ཀྱིས་དེའི་རྗེས་ Taiwan Relations Act ཞེས་པའི་ཁྲིམས་གཞི་གཏན་འབེབས་བརྒྱུད་ཨ་རི་དང་ཐེ་ཝན་གཉིས་དབར་དཔལ་འབྱོར་དང་རིག་གཞུང་སོགས་ཀྱི་འབྲེལ་ལམ་འཙུགས་ཡོད་པ་མ་ཟད། ཨ་རིའི་སྲིད་འཛིན་བཞི་བཅུ་བ། སྐུ་ཞབས་ Ronald Reagan ལགས་ཀྱི་ལས་ཡུན་སྐབས་ six assurances ཞེས་གནད་དོན་དྲུག་གི་ཐོག་ནས་ཕྱོགས་གཉིས་ཀྱི་འབྲེལ་ལམ་འཕེལ་རྒྱས་བཏང་བ་དང་སྦྲགས། ཐེ་ཝན་གྱི་བདག་དབང་རྒྱ་ནག་ལ་ཡོད་པར་བརྗོད་བཞིན་པ་དེར་ཨ་རིའི་ངོས་ནས་ངོས་ལེན་མེད་པའི་རྣམ་པ་གསལ་སྟོན་བྱས་ཡོད་པ་རེད། འོན་ཀྱང་གྲོས་ཚོགས་འཐུས་མི་རྣམས་གཉིས་ཀྱིས་ཨ་རིའི་གཞུང་གིས་ད་དུང་ཡང་ཐའེ་ཝན་ལ་གཞུང་འབྲེལ་སྒོ་ནས་ངོས་འཛིན་མེད་པ་མ་ཟད། མཚོ་གླིང་རྒྱལ་ཁབ་དེར་ཨི་རན་དང་བྱང་ཀོ་རི་ཡ་ལྟ་བུའི་ཆེས་གདུག་རྩུབ་ལྡན་པའི་རྒྱལ་ཁབ་བཞིན་ལྟ་ཕྱོགས་འཛིན་བཞིན་པར་སྐྱོན་བརྗོད་དང་འབྲེལ། སྐུ་ཞབས་ Tiffany ལགས་ཀྱིས་ཨ་རིའི་ངོས་ནས་རང་གི་ཁྱིམ་མཚེས་རྒྱལ་ཁབ་རྣམས་ལ་སྐད་ཆ་བཤད་རྒྱུར་རྒྱ་ནག་དམར་ཤོག་གི་ཆོག་མཆན་གྱི་དཔང་ཡིག་ཅིག་དགོས་དོན་མེད་པ་དང་།  ཐེ་ཝན་ནི་རང་དབང་དང་མང་གཙོ་ལྡན་པའི་རང་བཙན་གྱི་རྒྱལ་ཁབ་ཅིག་རེད་ལ། ཨ་རིའི་ངོས་ནས་དངོས་བདེན་གྱི་གནད་དོན་དེ་མངོན་གསལ་གནང་དགོས་བའི་དུས་ལ་བབ་ཡོད་པར་བསྒྲགས་འདུག འདི་ལོའི་ཕྱི་ཟླ་གཉིས་བའི་ནང་དུ་ཡང་། ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་ Rick Scott ལགས་ཀྱིས་ Taiwan Invasion Prevention Act ཞེས་ཐེ་ཝན་བཙན་འཛུལ་སྔོན་འགོག་གི་ཁྲིམས་འཆར་བསྐྱར་འདོན་གནང་ཡོད་པ་དང་།  ཁྲིམས་འཆར་དེ་བརྒྱུད་ཨ་རི་དང་ཐེ་ཝན་གཉིས་ཀྱི་འབྲེལ་ལམ་སྲ་བརྟན་གྱིས། ཐེ་ཝན་གྱི་ངོས་ནས་རྒྱ་ནག་དམར་ཤོག་སྲིད་གཞུང་གི་སྲིད་བྱུས་དང་དམག་ཤུགས་ལ་འགོག་རྒོལ་བྱེད་རྒྱུའི་ནུས་པ་སྤྲོད་ཀྱི་ཡོད་པ་དེ་ལྟར་ཡང་། རྒྱ་ནག་གཞུང་གིས་ཉེ་བའི་ཟླ་ཤས་ནང་ཐའེ་ཝན་གྱི་གཡས་གཡོན་དུ་དམག་གི་ལས་དོན་གཞི་རྒྱ་ཆེ་རུ་བཏང་བ་མ་ཟད། ཐེ་ཝན་དེ་བཞིན་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཞིག་ཡིན་པ་བསྐྱར་ནན་དང་། མཚོ་གླིང་དེ་རྒྱ་ནག་སྐམ་ས་དང་ཟླ་སྒྲིལ་བྱ་རྒྱུར་དྲག་ཤུགས་བེད་སྤྱོད་བྱེད་དགོས་བྱུང་ནའང་བྱེད་རྒྱུ་ཡིན་པ་གསལ་སྟོན་བྱས་ཡོད་པ་རེད།

བོད་རང་བཙན་འཐབ་རྩོད་པ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་ཀྱིས་བོད་ལོ་གསར་པའི་ཚེས་གཅིག་སྟེ། ཕྱི་ཟླ་ ༢ ཕྱི་ཚེས་ ༡༢ ཉིན་བཞུགས་སྒར་རྡ་རམ་ས་ལ་ནས་དབུ་འཛུགས་ཀྱི་རྒྱལ་ས་ལྡི་ལི་བར་དུ་རྒྱ་གར་གཞུང་གིས་རྒྱ་ནག་གཅིག་གི་སྲིད་བྱུས་ལ་ངོས་ལེན་གནང་བཞིན་པ་དེར་བསྒྱུར་བཅོས་གཏོང་དགོས་པའི་དགོས་འདུན་བཏོན་པའི་ཐོག་བོད་དོན་གོམ་བགྲོད་གནང་བཞིན་ཡོད་པ་རེད། དེ་རིང་བསྟན་འཛིན་བརྩོན་འགྲུས་ལགས་གོམ་བགྲོད་ཉིན ༢༠ པ་དེར་རྒྱ་གར་གྱི་མངའ་སྡེ་ Haryana གྲོང་ཁྱེར་ Karnal ནས་ Panipat ཕྱོགས་སུ་ཐོན་བཞིན་པ་དང་བསྟུན། འདི་ག་རླུང་འཕྲིན་ཁང་ནས་སྤྱི་ཡོངས་ནས་ད་བར་གྱི་གོམ་བགྲོད་ལས་འགུལ་གྱི་གནས་སྟངས་དང་། ལྷག་པར་དུ་རིང་མིན་རྒྱལ་ས་ལྡི་ལིར་འབྱོར་བའི་སྐབས་སུ་ལས་འགུལ་དང་འབྲེལ་བའི་འཆར་གཞི་ག་རེ་ཡོད་མིན་སོགས་དང་འབྲེལ་བཀའ་འདྲི་ཁག་ཅིག་ཞུ་སྐབས། ཕྱི་ཚེས་ ༡༠ ཉིན་རྒྱལ་ས་ལྡི་ལིར་འབྱོར་སྐབས་གསུམ་བཅུའི་དུས་དྲན་དང་འབྲེལ་བའི་མཛད་རིམ་ཁག་ལ་མཉམ་ཞུགས་གནང་རྒྱུ་ཙམ་མ་ཟད། ཐེངས་འདིའི་གོམ་བགྲོད་ཁྲོད་ཀྱི་དགོས་འདུན་གཙོ་བོ་སྟེ། རྒྱ་གར་གཞུང་ནས་རྒྱ་ནག་གཅིག་གི་སྲིད་བྱུས་ལ་ངོས་ལེན་གནང་བཞིན་པ་དེ་བསྒྱུར་བཅོས་གཏོང་དགོས་པའི་དགོས་འདུན་ལ་རྒྱབ་སྐྱོར་གྱི་མཚན་རྟགས་བསྡུ་རུབ་གནང་པ་ཁག་རྒྱ་གར་གྱི་སྲིད་བློན་ལས་ཁུངས་སུ་འབུལ་རྒྱུ་སོགས་ཀྱི་འཆར་གཞི་ཡོད་པ་ངོ་སྤྲོད་དང་སྦྲགས། གོམ་བགྲོད་ཀྱི་དགོས་འདུན་འདི་ནུས་པ་ལྡན་པ་ཞིག་ཡོང་བར་བོད་མི་མང་ཚོགས་ནས་སྤྱི་དོན་རང་ལ་བསམ་བློ་བཏང་སྟེ། མཚན་རྟགས་བསྡུ་རུབ་ནང་ངེས་པར་དུ་མཉམ་ཞུགས་གནང་རོགས་གནང་ཞེས་རེ་སྐུལ་གནང་སོང་། གཞི་རྩའི་བསྟན་འཛིན་བརྩོན་འགྲུས་ལགས་ཀྱི་བཞུགས་སྒར་ནས་རྒྱལ་ས་ལྡི་ལི་བར་སྤྱི་ལེ་ ༥༠༠ ལྷག་གི་གོམ་བགྲོད་ཀྱི་ལས་འགུལ་འདིའི་ཁྲོད་ས་གནས་ས་ཐོག་གི་རྒྱ་གར་མང་ཚོགས་རྣམས་ལ་རྒྱ་ནག་གཞུང་ནས་བོད་ས་བཙན་འཕྲོག་བྱས་པ་མ་ཟད། ད་ཆ་རྒྱ་གར་གྱི་ས་ཁུལ་ཁག་ཏུ་ཡང་བཙན་འཛུལ་བྱེད་བཞིན་པའི་གནས་སྟངས་དང་། རྒྱ་གར་འདི་བོད་དང་ས་མཚམས་ཀྱི་འབྲེལ་བ་ཡོད་པ་ལས། རྒྱ་ནག་དང་ས་མཚམས་ཀྱི་འབྲེལ་བ་མེད་པ་སོགས་ཞིབ་ཕྲ་ངོ་སྤྲོད་དང་བོད་དོན་དྲིལ་བསྒྲགས་ཀྱི་ཡིག་ཆ་འགྲེམ་སྤེལ་སོགས་ཀྱང་གནང་བཞིན་ཡོད་པ་རེད།

ད་བར་རྒྱལ་སྤྱིའི་སྙན་ཐོ་རིམ་པའི་ནང་རྒྱ་ནག་དེ་གསར་འགོད་རང་དབང་ཐོག་ལ་དམ་དྲག་ཤུགས་ཆེ་ཤོས་བྱེད་མཁན་གྱི་རྒྱལ་ཁབ་ཞིག་ཏུ་མངོན་གསལ་གནང་མུས་ཁྲོད་ཁ་སང་ Foreign Correspondent Club of China ཞེས་རྒྱ་ནག་ཏུ་ཕྱག་ལས་གནང་བཞིན་པའི་ཕྱིའི་རྒྱལ་ཁབ་ཀྱི་གསར་འགོད་པའི་མཐུན་ཚོགས་ཀྱི་སྙན་ཐོ་འདོན་སྤེལ་གནང་བར་སྔ་ལོ་ ༢༠༢༠ ལོར་རྒྱ་གཞུང་གིས་ཡུལ་དེར་ཕྱག་ལས་གནང་བཞིན་པའི་ཕྱིའི་གསར་འགོད་པ་དང་གསར་ཁང་ཁག་གི་ཐོག་དམ་དྲག་ཆེས་ཆེར་བྱས་ཡོད་པར་མ་ཟད་ལྷག་པར་དུ་ཏོག་དབྱིབས་གཉན་རིམས་སྔོན་འགོག་ལ་ཁ་གཡར་ནས་གསར་འགོད་པར་སུན་གཙེར་དང་མཐོང་མཆན་མ་སྤྲད་སོགས་ཀྱི་གནད་དོན་མང་དག་ཅིག་གི་ཐོག་ནས་དམ་དྲག་ཤུགས་ཆེ་བྱེད་བཞིན་ཡོད་སྐོར་གསུངས་འདུགཁ་སང་རྒྱ་ནག་ནང་གནས་སྡོད་བྱེད་བཞིན་པའི་ཕྱི་རྒྱལ་གསར་འགོད་པའི་མཐུན་ཚོགས་ཀྱིས་འདས་པའི་ཕྱི་ལོ་ ༢༠༢༠ ལོའི་གནས་སྟངས་དང་འབྲེལ་བའི་སྙན་ཐོ་འདོན་སྤེལ་གནང་བར་ལྷན་ཚོགས་ཀྱི་ངོས་ནས་རྒྱ་ནག་ཏུ་གསར་འགོད་ལས་དོན་གཉེར་བཞིན་པའི་གསར་ཁང་དང་གསར་འགོད་པ་བཅས་ལ་འདྲི་རྩད་གནང་སྐབས་ལན་འདེབས་གནང་མཁན་ ༡༥༠ ཙམ་ལས་བྱུང་མེད་པ་དང་། དེའི་ཁོངས་ནས་རྒྱ་ནག་ཏུ་གསར་འགོད་པའི་ལས་རིགས་གཉེར་ཕྱོགས་ཀྱི་གནས་སྟངས་ལ་ཡར་རྒྱས་ཕྱིན་འདུག་ཅེས་གསུང་མཁན་གང་ཟག་གཅིག་ཀྱང་བྱུང་མེད་པའི་ཁར་གནས་སྟངས་དེ་ལོ་གསུམ་གྱི་རིང་དེ་མུར་ལུས་ཡོད་པ་རེད་འདུག སྙན་ཐོར་གཞིགས་ཚེ་སྔ་ལོར་རྒྱ་ནག་གཞུང་གིས་ལྟ་སྲུང་འཕྲུལ་ཆས་སོགས་གཉན་རིམས་འགོག་ཐབས་དང་འབྲེལ་བའི་ཐབས་བྱུས་ཡོངས་རྫོགས་སྤྱོད་དེ་ཕྱིའི་གསར་འགོད་པ་དང་དེ་དག་གི་རྒྱ་རིགས་ལས་རོགས། དེ་བཞིན་བཅར་འདྲི་ཞུ་ཡུལ་བཅས་ལ་འཇིགས་སྐུལ་དང་སུན་གཙེར་བཟོས་ཡོད་སྐོར་བཀོད་འདུག དེ་བཞིན་ཉེན་རྟོག་པས་མང་ཚོགས་ཀྱི་འཕྲོད་བསྟེན་བདེ་འཇགས་ལ་ཁ་གཡར་བ་དང་བཙན་དབང་ཐོག་ནས་ཟུར་འཇོག་བྱ་རྒྱུ་སོགས་ཀྱི་ཉེན་བརྡ་བཏང་བར་མ་ཟད་རྒྱ་ནག་ཏུ་གནས་སྡོད་ཆོག་པའི་མཐོང་མཆན་བཀག་སྡོམ་བརྒྱུད་གསར་འགོད་པ་རྣམས་ལ་ཚོར་བ་རྣོ་བའི་ས་ཚིགས་ཁག་ཏུ་བསྐྱོད་རྒྱུར་དམ་དྲག་ཆེས་ཆེར་བྱེད་པའི་ཁྲོད་རྣམ་ཀུན་ལོ་གཅིག་གི་རིང་བསྡད་ཆོག་པའི་མཐོང་མཆན་རག་སར་སྔ་ལོར་གསར་འགོད་པ་ ༡༣ ཙམ་ལ་ཟླ་བ་དྲུག་དང་དེ་ལས་ཉུང་བའི་དུས་ཐུང་གི་ཆོག་མཆན་སྤྲད་འདུག་པ་དང་། ཨ་རི་དང་ལྷན་དུ་འབྲེལ་ལམ་སྡུག་ཏུ་སོང་བར་བརྟེན་རྒྱ་ནག་ནང་དུ་ལས་དོན་གཉེར་བཞིན་པའི་ཨ་རིའི་གསར་འགོད་པ་བཅུ་ལྷག་ཕྱིར་ཕུད་བཏང་བ་དང་དེ་བཞིན་ཨོ་སི་ཊོ་ལི་ཡའི་གསར་འགོད་པ་གཉིས་ལ་སུན་གཙེར་བཟོས་རྐྱེན་ཕྱིར་ལོག་གནང་དགོས་པའི་གནས་སྟངས་སོགས་བྱུང་ནས་གསར་འགོད་པ་རྣམས་ཆབ་སྲིད་ཀྱི་ལག་ཆ་ལྟ་བུར་སྤྱོད་ཀྱི་ཡོད་སྐོར་གསུངས་འདུག ལྷག་པར་དུ་ཤིན་ཅང་ཁུལ་དུ་གསར་འགོད་ལས་དོན་གཉེར་བཞིན་པ་རྣམས་ལ་དམིགས་བསལ་གྱི་དམ་དྲག་ཆེ་བ་བྱེད་ཀྱི་ཡོད་པ་དང་སྔ་ལོར་རྒྱ་ནག་གི་གཞུང་འབྲེལ་བརྒྱུད་ལམ་ནང་ཕྱག་ལས་གནང་བྱེད་བཞིན་པའི་ཨོ་སི་ཊོ་ལི་ཡའི་མི་སེར་ཡིན་པའི་གསར་འགོད་པ་ Cheng Lei དང་དེའི་རྗེས་སུ་ Bloomberg གསར་ཁང་དུ་ཕྱག་ལས་གནང་བཞིན་པའི་རྒྱ་རིགས་གསར་འགོད་པ་ Haze Fan ལགས་གཉིས་ལ་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་པའི་ཉེས་མིང་འོག་འཛིན་བཟུང་གིས་དུས་ད་ལྟའང་བཙོན་འཇུག་འོག་ཡོད་པར་མངོན་གསལ་གནང་ཡོད་པ་རེད། དེ་རིང་ AFP གསར་ཁང་གིས་སྙན་ཐོའི་སྐོར་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Wang Wenbin ལ་འདྲི་རྩད་བྱེད་སྐབས་ཁོ་པས་རྒྱ་ནག་གཞུང་གིས་ད་བར་ FCCC ལྷན་ཚོགས་དེ་ངོས་ལེན་བྱེད་ཀྱི་མེད་པ་དང་ལྷན་ཚོགས་ཀྱི་འདོན་སྤེལ་གནང་བའི་སྙན་ཐོ་དེ་རྙོག་གླེང་བཟོ་རྒྱུ་དང་འུར་སྒྲོག་བྱ་རྒྱུར་དམིགས་པ་ཞིག་ཡིན་པར་འགྲེལ་བརྗོད་དང་། རྒྱ་ནག་དེ་ཁྲིམས་ཀྱི་དབང་སྒྱུར་ལྡན་ཞིང་། རྒྱ་ནག་གིས་ཕྱིའི་གསར་ཁང་དང་གསར་འགོད་པ་རྣམས་ལ་རྒྱལ་ཁབ་ཀྱི་ཁྲིམས་གཞིར་བཟུང་ལས་དོན་གཉེར་བར་དགའ་བསུ་ཞུ་བཞིན་ཡོད་པ་ལྟར་གསར་འགོད་པ་དེ་དག་ལ་མུ་མཐུད་མཐུན་རྐྱེན་སྦྱོར་རྒྱུ་ཡིན་སྐོར་བརྗོད་པར་མ་ཟད། གསར་འགོད་རང་དབང་ལ་ཁ་གཡར་ནས་རྒྱ་ནག་ལ་མི་དགའ་བའི་གནས་ཚུལ་རྫུན་མ་སྤེལ་བཞིན་ཁག་ལ་དགག་པ་ཡོད་ཅེས་བཤད་འདུག རྩ་བའི་ Foreign Correspondents’ Club of China ཞེས་པ་ནི་རྒྱ་ནག་ནང་ཕྱག་ལས་གནང་བཞིན་པའི་རྒྱལ་སྤྱིའི་གསར་འགོད་པའི་མཐུན་ཚོགས་ཤིག་ཡིན་པ་དང་མཐུན་ཚོགས་དེར་རྒྱལ་སྤྱིའི་རྒྱལ་ཁབ་འདྲ་མིན་ ༤༠ ཙམ་གྱི་གསར་འགོད་པ་དང་གསར་འགོད་ལས་རིགས་ཀྱི་མཁས་དབང་། དེ་བཞིན་གཞུང་འབྲེལ་གྱི་མི་སྣ་བཅས་ཡོད་པ་རེད།

ཁ་སང་ཕྱི་ཚེས་ ༢༢ ཉིན་དྲ་ཐོག་བརྒྱུད་དབྱིན་ཡུལ་གྲོས་ཚོགས་ཀྱི་འཐུས་མི་སྐུ་ཞབས TimLoughton ལགས་ཀྱིས་གཙོ་སྐྱོང་གནང་སྟེ་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམ་པ་ལྷན་འཛོམས་ཐོག་བོད་དོན་སྐོར་བགྲོ་གླེང་གནང་བ་བརྒྱུད་ All Party Parliamentary Group for Tibet ཞེས་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཚོགས་གཞོན་གསར་དུ་བསྐོ་གཞག་གནང་རྒྱུའི་ཐད་བགྲོ་བསྡུར་གནང་འབྲས་སུ་གྲོས་ཚོགས་འཐུས་མི་ ChrisLaw ལགས་དང་ Tim Loughton ལགས་རྣམ་གཉིས་སླར་ཡང་ཚོགས་གཙོར་བསྐོ་བཞག་དང་སྐུ་ཞབས་ Navendu Mishra ལགས་ཚོགས་གཞོན་དུ་བསྐོ་གཞག་གནང་འདུགསྐབས་དེར་ Free Tibet ཞེས་པའི་དབྱིན་ཡུལ་བོད་དོན་རྒྱབ་སྐྱོར་ཚོགས་པའི་དྲིལ་བསྒྲགས་འགན་འཛིན་སྐུ་ཞབས་ John Jones ལགས་ཀྱིས་བོད་ཀྱི་ཆབ་སྲིད་བཙོན་པའི་ད་ལྟའི་གནས་བབ་སྤྱི་དང་རྒྱ་ནག་གཞུང་གིས་སྡུག་སྦྱོང་མནར་གཅོད་འོག་ཉེ་ལམ་འདས་གྲོངས་སུ་གྱུར་བའི་ཆབ་སྲིད་བཙོན་ཟུར་དཀོན་མཆོན་སྦྱིན་པ་ལགས་ཀྱི་གནད་དོན་མངོན་གསལ་གནང་བར་མ་ཟད་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ད་ལྟའི་ཆར་གློད་བཀྲོལ་ཐོབ་ཡོད་ཀྱང་། ཁོང་གི་གནས་སྟངས་ཤེས་རྟོགས་ཐུབ་ཀྱི་མེད་སྟབས་གྲོས་ཚོགས་འཐུས་མི་རྣམས་ནས་དེ་འབྲེལ་ཐོག་གྲོས་བསྡུར་ལྷུག་པོ་གནང་ཡོད་པ་རེད། དེ་བཞིན་གྲོས་ཚོགས་འཐུས་མི་སྐུ་ཞབས་ Tim Loughton མཆོག་གིས་ཕྱི་ཟླ་ལྔ་པའི་ནང་སླར་ཡང་ཨིན་ཡུལ་གྲོས་ཚོགས་འོག་མར་བོད་ནང་རང་དབང་གི་སྒོ་ནས་ཕར་འགྲོ་ཚུར་འོང་ཆོག་པའི་ཁྲིམས་འཆར་ངོ་སྤྲོད་གནང་རྒྱུ་ཡིན་སྐོར་གསུངས་འདུག་པར་མ་ཟད། འདི་ལོའི་ལོ་དཀྱིལ་ནས་སྲིད་སྐྱོང་མཆོག་གི་ལས་ཡུན་རྫོགས་ཀྱི་ཡོད་སྟབས་ལས་ཡུན་མ་རྫོགས་གོང་ལ་སྲིད་སྐྱོང་མཆོག་དང་ཐུག་འཕྲད་གནང་རྒྱུ་ཡིན་པར་གསུངསའདུག ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ པ་དེ་བྷིར་ཊིན་བོད་རིགས་ཚོགས་པ་དང་བོད་རང་དབང་ལས་འགུལ་ཚོགས་པ། དེ་བཞིན་བོད་དོན་རྒྱབ་སྐྱོར་ཚོགས་པ་བཅས་ཀྱིས་གོ་སྒྲིག་འོག་དྲ་ཐོག་ནས་སྲུང་བརྩི་ཞུ་རྒྱུ་ཡིན་སྐོར་གསུངས་པ་དང་འབྲེལ། སྐབས་དེར་གྲོས་ཚོགས་འཐུས་མི་རྣམས་ནས་གསུང་བཤད་གནང་སྐྱོང་ཡོང་བའི་རེ་སྐུལ་ཞུས་འདུག ཚོགས་འདུའི་ཐོག་ཨིན་ཡུལ་བོད་དོན་རྒྱབ་སྐྱོར་ཚོགས་པའི་དྲིལ་བསྒྲགས་ཀྱི་འགན་འཛིན་སྐུ་ཞབས་ John Jones ལགས་ཀྱིས་ཨིན་ཡུལ་བོད་དོན་རྒྱབ་སྐྱོར་ཚོགས་པས་ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་ལམ་པིག་རྩེད་འགྲན་དེ་པེ་ཅིང་ལ་འཚོགས་རྒྱུར་ངོ་རྒོལ་གྱི་ལས་འགུལ་ཞིག་སྤེལ་བཞིན་ཡོད་སྐོར་ངོ་སྤྲོད་གནང་བ་དང་ཆབས་ཅིག་ཏུ་གྲོས་ཚོགས་འཐུས་མི་རྣམས་ནས་ལས་འགུལ་དེར་རྒྱབ་སྐྱོར་གནང་རོགས་ཞེས་འབོད་སྐུལ་གནང་ཡོད།

འདི་ལོའི་བོད་པའི་ལོ་གསར་ཚེས་ ༡ ནས་བོད་མིའི་གསུམ་བཅུའི་དུས་དྲན་བར་ཕ་རན་སི་རྒྱལ་ས་པེ་རིས་ནང་འགྲོ་བ་མིའི་ཐོབ་ཐང་ཆེན་དུ་བོད་དོན་དྲིལ་བསྒྲགས་ཀྱི་ལས་འགུལ་སྤེལ་བཞིན་པ་བསྟན་པ་དར་རྒྱས་ལགས་དང་ལོ་གསར་ཚེས་ ༤ ནས་ལས་འགུལ་ནང་མཉམ་ཞུགས་གནང་མཁན་ལྷ་རི་ཡེ་ཤེས་ལགས་རྣམ་གཉིས་ཉེ་ཆར་ཕ་རན་སི་ས་གནས་ཉེན་རྟོག་པས་རྒྱུ་མཚན་མང་དག་ཅིག་གི་ཐོག་ནས་ཁོང་གཉིས་མུ་མཐུད་ Effiel Tower མདུན་ངོས་ཀྱི་འགྲོ་བ་མིའི་ཐོབ་ཐང་ཆེན་དུ་མུ་མཐུད་ལས་འགུལ་སྤེལ་རྒྱུའི་ཆོག་མཆན་མ་སྤྲད་པར་ལས་འགུལ་གྱི་ས་ཚིགས་གཞན་དུ་གནས་སྤོས་རུ་འཇུག་བཞིན་འདུགབསྟན་པ་དར་རྒྱས་ལགས་ཀྱིས་ངོ་དེབ་ཐོག་འགྲེལ་བརྗོད་གནང་བར་ད་ལྟའི་ཆར་ལས་འགུལ་དེའི་ཐོག་ས་གནས་མང་ཚོགས་ནས་དོ་སྣང་ཇེ་ཆེར་གནང་བཞིན་པའི་དུས་སྐབས་འདིར་ཉེ་ཆར་ས་གནས་ཉེན་རྟོག་པས་ཁོང་གཉིས་ཀྱི་ལས་འགུལ་སྤེལ་ཡུལ་ས་ཚིགས་སུ་ཡོང་ནས་ས་གནས་འབྲེལ་ཡོད་ལས་ཁུངས་ཀྱི་བཀོད་ཁྱབ་དང་འབྲེལ་ཡོད་ནས་ལས་འགུལ་བ་ཁོང་གཉིས་ཀྱི་གཟུགས་གཞིའི་བདེ་ཐང་སེམས་འཚབ་ཡོད་ལུགས་སོགས་ཀྱི་རྒྱུ་མཚན་མང་དག་ཅིག་ལ་ཁ་གཡར་ཏེ་ཁོང་གཉིས་པེ་རིས་འགྲོ་བ་མིའི་ཐོབ་ཐང་ཆེན་ནས་ Place de la republique ལས་འགུལ་ས་ཚིགས་སུ་གནས་སྤོ་རུ་འཇུག་པར་མ་ཟད་ལས་འགུལ་སྤེལ་ཆོག་པའི་དུས་ཡུན་ཉུང་འཕྲི་གནང་འདུགད་ལན་བོད་པའི་ལོ་གསར་ཚེས་གཅིག་ནས་འགོ་བརྩམས་པའི་བསྟན་པ་དར་རྒྱས་ལགས་ཀྱི་བོད་དོན་དྲིལ་བསྒྲགས་ཀྱི་ལས་འགུལ་ལ་ཕ་རན་སི་གཙོ་བོར་གྱུར་པའི་འཛམ་གླིང་ས་ཕྱོགས་གང་སར་གནས་བཞུགས་བོད་མི་ཚོས་དོ་སྣང་ཆེན་པོ་གནང་ཡུལ་ཞིག་ཏུ་གྱུར་ཡོད་པ་དང་། ངོ་དེབ་ཐོག་ཁོང་གི་ལས་འགུལ་ལ་གདུང་སེམས་མཉམ་བསྐྱེད་དང་བརྒྱུད་སྤེལ་དང་མཆན་བཀོད་གནང་མཁན་མང་པོ་བྱུང་འདུགབསྟན་པ་ལགས་ཀྱི་ངོས་ནས་ཐེངས་འདིའི་བོད་དོན་ལས་འགུལ་མུ་མཐུད་སྤེལ་རྒྱུར་ཕ་རན་ས་གནས་འབྲེལ་ཡོད་གཞུང་དང་ས་གནས་ཉེན་རྟོག་པས་ཆོག་མཆན་མ་སྤྲད་པའི་གནད་དོན་དེ་ནི་གཙོ་བོ་རྒྱ་ནག་གཞུང་གིས་ཕ་རན་སིའི་འབྲེལ་ཡོད་ལས་ཁུངས་ལ་གནོན་ཤུགས་ཆེས་ཆེར་སྤྲད་པའི་དབང་གིས་ཡིན་པར་ཚོད་དཔག་གནང་བཞིན་འདུགབོད་མི་ལས་འགུལ་བ་ཁོང་གཉིས་ལ་ Effeil Tower མདུན་ངོས་སུ་མུ་མཐུད་ལས་འགུལ་སྤེལ་རྒྱུར་ཆོག་མཆན་མ་སྤྲད་པར་ས་གནས་གཞན་དུ་གནས་སྤོ་རུ་བཅུག་པར་བརྟེན་ཁ་སང་རེས་གཟའ་ལྷག་པའི་ཉིན་ཕ་རན་སི་བོད་རང་བཙན་སློབ་ཕྲུག་ཚོགས་པས་བོད་མི་ལས་འགུལ་བ་བསྟན་པ་དར་རྒྱས་ལགས་དང་ལྷ་རི་ཡེ་ཤེས་ལགས་གཉིས་ཀྱི་ཞི་བའི་བོད་དོན་དྲིལ་བསྒྲགས་ཀྱི་ལས་འགུལ་ལ་རྒྱབ་སྐྱོར་གནང་བ་དང་འབྲེལ། ཁོང་གཉིས་དང་ལྷན་དུ་ལས་འགུལ་སྤེལ་ཡུལ་གྱི་ས་ཚིགས་སུ་ས་གནས་བོད་མི་བསྡུ་སྐོང་གིས་རྒྱ་ནག་གཞུང་ལ་ཞི་བའི་རྔམ་སྟོན་གྱི་ལས་འགུལ་སྤེལ་འདུག ཕ་རན་སི་ནང་བོད་དོན་ལས་འགུལ་བ་བསྟན་དར་རྒྱས་ལགས་དང་ལྟ་རི་ཡེ་ཤེས་ལགས་གཉིས་ཀྱིས་ཞི་བའི་བོད་དོན་དྲིལ་བསྒྲགས་ལས་འགུལ་དེ་རིང་མིན་བོད་མིའི་རང་དབང་སྒེར་ལངས་གནང་སྟེ་མི་ལོ་ ༦༢ འཁོར་བའི་གསུམ་བཅུའི་དུས་དྲན་བར་སྤེལ་རྒྱུ་ཡིན་པ་དེ་ལྟར་ཡང། ད་ཆར་ས་གནས་ཉེན་རྟོག་པས་ཁོང་གཉིས་ལ་བདུན་ཕྲག་འདིའི་རེས་གཟའ་པ་སངས་བར་ལས་འགུལ་སྤེལ་རྒྱུའི་ཆོག་མཆན་སྤྲད་འདུག འོན་ཀྱང་ཁོང་གཉིས་ནས་མུ་མཐུད་འབྲེལ་ཡོད་ལས་ཁུངས་ལ་ཞུ་གཏུག་གནང་སྟེ་ཆོག་མཆན་རག་ཐབས་གནང་མུས་ཡིན་པ་རེད།

རྒྱ་ནག་ནང་གི་གྲོང་ཁྱེར་པེ་ཅིང་དུ་ཕྱི་ལོ་ ༢༠༢༢ ལོའི་དགུན་དུས་ཨོ་ལམ་པིག་རྩེད་འགྲན་འཚོགས་འཆར་གྱི་གནད་དོན་ཕྱི་ལ་ཐོན་མ་ཐག་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་དང་མང་གཙོ་ལས་འགུལ་བ། དེ་བཞིན་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་མང་དག་ཅིག་གིས་རྒྱ་ནག་ནག་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་མ་བཏང་བར་དུ་རྒྱ་ནག་ཏུ་རྩེད་འགྲན་དེ་འཚོགས་རྒྱུའི་གོ་སྐབས་སྤྲོད་རྒྱུ་མེད་པར་སྐྱོན་བརྗོད་གནང་བཞིན་ཡོད་པ་ལྟར། ཁེ་ན་ཌ་ནང་དུ་རྟེན་གཞི་བྱས་པའི་ Canadian Friends of Hong Kong ཞེས་ཁེ་ན་ཌའི་ཧོང་ཀོང་མཛའ་འབྲེལ་ཚོགས་པ་དང་ Students for a Free Tibet Canada ཞེས་བོད་རང་བཙན་སློབ་ཕྲུག་ཚོགས་པ། དེ་བཞིན་ Uyghur Rights Advocacy Project ཞེས་ཡུ་གུར་ཞུ་གཏུག་ལས་འཆར་ཚོགས་པ་བཅས་ཀྱིས་ཁེ་ན་ཌ་གཞུང་གི་ངོས་ནས་རྒྱ་གཞུང་གིས་བོད་དང་ཡུ་གུར་མང་ཚོགས་ལ་མི་སྤྱོད་ལས་འདས་པའི་དྲག་གནོན་དང་མི་རིགས་རྩ་མེད། ངལ་རྩོལ་བསྒྱུར་བཀོད་སོགས་ཀྱི་སྲིད་བྱུས་ལག་བསྟར་ཁྲོད་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་ངོས་འཛིན་གྱིས་འཚོགས་ལ་ཉེ་བའི་ ༢༠༢༢ ལོའི་རྒྱ་ནག་གི་དགུན་དུས་ཨོ་རྩེད་འགྲན་ཚོགས་ལས་ཕྱིར་འཐེན་གནང་དགོས་པའི་ཞུ་སྐུལ་གྱི་ལས་འགུལ་སྤེལ་འདུགདེའང་ཁ་ཉིན་ཚེས་ ༢༣ ཉིན་ཡུ་གུར་ཞུ་གཏུག་ལས་འཆར་ཚོགས་པའི་དྲྭ་རྒྱར་གནས་ཚུལ་སྤེལ་བར་གཞིགས་ན། ཁེ་ན་ཌ་ནང་གི་འགྲོ་བ་མིའི་ཐོབ་ཐང་དོན་གཉེར་བ་ཚོགས་ཁག་ཁྱོན་ཚོགས་སྡེ་ ༡༤༠ ཡི་མང་ཚོགས་ ༡༥༠ ལྷག་གིས་མཚན་རྟགས་ཆེད་བཀོད་ཀྱིས་རེས་གཟའ་མིག་དམར་ཉིན་ཁེ་ན་ཌ་གཞུང་ལ་རྒྱ་ནག་གཞུང་གིས་ཡུ་གུར་མང་ཚོགས་རྩ་མེད་བཟོ་བཞིན་པ་དང་། བོད་དང་ནང་སོག་ལ་དྲག་གནོན། ངལ་རྩོལ་བསྒྱུར་བཀོད། དེ་བཞིན་ལུས་པོའི་མ་ལག་ཕྱིར་འདོན་གྱིས་གཙོས་པའི་ཧོང་ཀོང་མང་གཙོ་དོན་གཉེར་བའི་ཐོག་དྲག་གནོན་དང་བཙོན་འཇུག་དོ་དམ་འོག་ཡོད་པའི་ཁེ་ན་ཌའི་ Michael Spavor དང་  Michael Kovrig གཉིས་ཀྱི་གནས་སྟངས་སོགས་ཆེས་མངོན་གསལ་གནང་སྟེ་ཕྱི་ལོ་ ༢༠༢༢ ལོའི་རྒྱ་ནག་གི་དགུན་དུས་ཨོ་ལམ་པིག་འགྲན་ཚོགས་ལས་ཕྱིར་འཐེན་གནང་དགོས་པའི་ཞུ་སྐུལ་གནང་ཡོད་པ་རེད།དེ་བཞིན་ Uyghur Rights Advocacy Project ཚོགས་པའི་མགྲིན་ཚབ་པ་ Ivy Li ཡིས་ང་ཚོའི་འདོད་པར་ཁེ་ན་ཌ་གཞུང་དང་རྒྱལ་སྤྱིའི་ཨོ་རྩེད་འགྲན་ཚོགས་ཚོགས་ཆུང་གཉིས་ལ་ཁེ་ན་ཌའི་མང་ཚོགས་རྣམས་ཀྱི་དགོངས་པར་ཁེ་ན་ཌའི་རྒྱལ་ཁབ་དེ་ ༢༠༢༢ ལོའི་རྒྱ་ནག་གི་དགུན་དུས་ཨོ་རྩེད་འགྲན་ཚོགས་ལས་ཕྱིར་འཐེན་གནང་རྒྱུའི་འདུན་པ་ཡོད་པ་དང་དེ་ལྟར་མ་གནང་ཚེ་མང་ཚོགས་ཀྱིས་ངོ་རྒོལ་གནང་ངེས་ཡིན་པར་གསུངས་འདུག ད་དུང་ཁོང་གིས་མི་མང་མང་དག་ཅིག་གིས་ཕྱི་ལོ་ ༢༠༢༢ ལོའི་དགུན་དུས་ཨོ་ལམ་པིག་རྩེད་འགྲན་དེ་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་འཁེལ་བ་ལས་ཕྱིར་བཤོལ་གནང་རྒྱུར་རྒྱབ་སྐྱོར་གྱི་རྣམ་པ་ཤུགས་ཆེར་བསྟན་ཡོད་ཀྱང་། རྒྱ་ནག་ཏུ་ནང་མི་ཡོད་མཁན་དང་ཚོང་དོན་གྱི་འབྲེལ་བ་ཡོད་པའི་མང་ཚོགས་དེ་དག་གི་ངོས་ནས་རྒྱ་ནག་གི་གནོན་ཤུགས་ལ་འཇིགས་ནས་རང་ཉིད་ཀྱི་མིང་མངོན་གསལ་གནང་དཀའ་བའི་གནས་སྟངས་སུ་གྱུར་སྐོར་གསུངས་འདུག་པར་མ་ཟད། རྒྱ་ནག་གི་ཨོ་རྩེད་འགྲན་ཚོགས་དེའི་ཐོག་ནས་ང་ཚོའི་རྩེད་འགྲན་པ་ཚོ་རྒྱ་ནག་དམར་ཤོག་ཚོགས་པའི་འཁྱོག་བཤད་ཀྱི་དྲིལ་བསྒྲགས་སྤེལ་བའི་ལག་ཆ་ཆགས་ཡོད་པ་དང་། འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་ལྷག་དོན་རྒྱལ་ནང་དང་རྒྱལ་སྤྱིའི་ཁྲོད་རྒྱ་ནག་གི་སྲིད་དབང་སྒེར་སྤྱོད་རིང་ལུགས་ཀྱི་ནུས་ཤུགས་ཁྱབ་སྤེལ་བཅས་ལ་དམིགས་ནས་སྤྱོད་ཀྱི་ཡོད་པར་བརྗོད་འདུགགཞི་རྩའི་རྒྱ་ནག་གིས་ཕྱི་ལོ་ ༢༠༠༨ ལོའི་ཨོ་རྩེད་འགྲན་ཚོགས་སྐབས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གོང་འཕེལ་དུ་གཏོང་རྒྱུའི་ཁས་ལེན་རིམ་པ་བྱས་ཡོད་པ་ཁག་ལག་བསྟར་དོན་འཁྱོལ་མ་བྱུང་མ་ཟད། བོད་དང་ཤིན་ཅང་། ནང་སོག་དང་ཧོང་ཀོང་བཅས་ཀྱི་ནང་དུ་སྔར་ལྷག་དམ་དྲག་བྱེད་བཞིན་ཡོད་སྟབས། ཉེ་སྔོན་རྒྱ་ནག་གི་འདི་ལོའི་རྒྱལ་སྟོན་དུས་ཆེན་གྱི་སྐབས་སུ་རྒྱལ་སྤྱིའི་ཚོགས་སྡེ་བརྒྱ་ལྷག་གིས་མཉམ་རུབ་ཀྱི་ཐོག་ནས་བསྒྲགས་གཏམ་སྤེལ་ཏེ་ཕྱི་ལོ་ ༢༠༢༢ ལོར་རྒྱ་ནག་གི་ནང་དུ་དགུན་དུས་ཀྱི་ཨོ་རྩེད་འཚོགས་འཆར་ལ་དགག་ལན་གནང་ཡོད་པར་མ་ཟད། རྒྱལ་སྤྱིའི་ཨོ་རྩེད་ལས་ཁུངས་ཀྱིས་རྒྱ་ནག་ཏུ་འཚོགས་རྒྱུའི་དགུན་དུས་ཀྱི་ཨོ་རྩེད་འགྲན་ཚོགས་དེ་ཕྱིར་བསྡུ་བྱེད་དགོས་བའི་རེ་སྐུལ་གནང་ཡོད་པ་རེད། དེ་བཞིན་ ༢༠༢༢ ལོའི་རྒྱ་ནག་ཏུ་འཚོགས་རྒྱུའི་དགུན་དུས་ཨོ་ལིམ་སྤིང་རྩེད་འགྲན་ཆེན་མོར་བོད་མི་རྣམས་ཀྱིས་སྣེ་ཁྲིད་དེ་ཤར་ཏུ་ཀི་སི་ཐན་དང་ནང་སོག ཐེ་ཝན། ཧོང་ཀོང་སོགས་ཀྱི་མང་ཚོགས་མཚོན་པའི་རྒྱལ་སྤྱིའི་ཚོགས་སྡེ་ ༡༨༠ ལྷག་མཉམ་རུབ་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པར་སྐྱོན་བརྗོད་ཀྱིས་རྒྱལ་སྤྱིའི་ཨོ་ལམ་སྤིག་རྩེད་འགྲན་ཚོགས་ཆུང་ལ་རྒྱ་ནག་ཏུ་འགྲན་ཚོགས་དེ་བསྡུ་སྐོང་གནང་རྒྱུའི་ཐོབ་ཐང་གནང་ཐབས་མེད་པའི་ལས་འགུལ་སྣ་མང་སྤེལ་ཡོད་ཀྱང་། ད་བར་དུ་ཨོ་རྩེད་འགྲན་ཚོགས་ཀྱི་ངོས་ནས་རྒྱ་ནག་ནང་དུ་ཨོ་རྩེད་འགྲན་ཚོགས་འཚོགས་གཏན་ཁེལ་བ་དེ་ཕྱིར་བཤོལ་བྱས་མེད་སྟབས། ད་ལྟའི་ཆར་ལས་འགུལ་གྱི་ཁ་ཕྱོགས་ལ་འགྱུར་བ་བཏང་ནས་རྒྱལ་སྤྱིའི་སྲིད་གཞུང་ཁག་དང་རྩེད་འགྲན་པ་རྣམ་པར་ཞུ་སྐུལ་གནང་སྟེ་རྒྱ་ནག་ཏུ་འཚོགས་རྒྱུའི་དགུན་དུས་རྩེད་འགྲན་དེར་འཛུལ་ཞུགས་མི་གནང་བར་ངོ་རྒོལ་གནང་དགོས་བའི་གཞེན་སྐུལ་གནང་བཞིན་ཡོད་པ་རེད།

འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་གཞུང་གིས་འདས་པའི་ལོ་ཤས་ནས་ཤིན་ཅང་ནང་གི་ཡུ་གུར་མི་རིགས་གཙོ་བོར་གྱུར་པའི་ཁ་ཆེའི་གྲངས་ཉུང་མི་རིགས་ཐོག་གཞི་རྩ་མེད་པའི་ཁྲིམས་གཏུག་བརྒྱུད་དུས་ཡུན་རིང་པོའི་བཙོན་འཇུག་གི་ཁྲིམས་ཐག་གཅོད་རྒྱུའི་གནས་ཚུལ་ཇེ་མང་འགྲོ་བཞིན་ཡོད་པ་མངོན་གསལ་གནང་འདུགཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྙན་ཐོ་ཞིག་འདོན་སྤེལ་གནང་ཡོད་པ་དང་། དེའི་ནང་རྒྱ་ནག་གཞུང་གིས་འདས་པའི་ལོ་ཤས་ནང་ཤིན་ཅང་གི་ཡུ་གུར་མི་རིགས་གཙོ་བོར་གྱུར་པའི་ཁ་ཆེའི་གྲངས་ཉུང་མི་རིགས་ཐོག་ཁུངས་ལུང་མེད་པའི་ཁྲིམས་གཏུག་བརྒྱུད་དུས་ཡུན་རིང་པོའི་བཙོན་འཇུག་གི་ཁྲིམས་ཐག་བཅད་ཀྱི་ཡོད་པ་མངོན་གསལ་གནང་བར་མ་ཟད། རྒྱ་གཞུང་གིས་དེ་སྔ་ ༢༠༡༦ ལོར་རྒྱལ་ཁབ་ཁ་བྲལ་གཏོང་མཁན་ལ་འགོག་རྒོལ་བྱེད་ཆེད་ཤིན་ཅང་ཁུལ་དུ་རྡུང་རྡེག་ཚ་ནན་གྱི་ལས་འགུལ་ཞིག་སྤེལ་བའི་ཁྲོད་གྲངས་ཉུང་མི་རིགས་འབུམ་གཉིས་དང་ཕྱེད་ཀ་ལྷག་ལ་བཙོན་འཇུག་གི་ཁྲིམས་ཐག་བཅད་ཡོད་པ་ར་སྤྲོད་གནང་འདུགརྒྱ་གཞུང་གིས་བཙོན་འཇུག་འོག་ཚུད་པའི་མི་ ༦༠ ཙམ་གྱི་གནད་དོན་ལ་ཞིབ་འཇུག་གནང་སྐབས་དེ་དག་ཁྲོད་མང་དག་ཅིག་ནས་ཁྲིམས་འགལ་གྱི་བྱ་སྤྱོད་གང་ཡང་སྤེལ་མེད་ཀྱང་བཙན་དབང་གིས་བཙོན་འཇུག་ཁྲིམས་ཐག་བཅད་པ་ཤ་སྟག་ཆགས་ཀྱི་ཡོད་པ་དང་ཁྲིམས་གཏུག་བྱ་ཕྱོགས་རྣམས་རྒྱ་ནག་གི་ལྟ་སྤྱོད་དང་མཐུན་པའི་ཆབ་སྲིད་ཀྱི་སློབ་གསོ་སྤྲོད་ཕྱོགས་དང་ཐ་དད་ཆགས་ཀྱི་ཡོད་པར་འགྲེལ་བརྗོད་གནང་འདུག སྙན་ཐོའི་ནང་རྒྱ་ནག་གཞུང་འབྲེལ་གྱི་ཉེས་ཆད་འགེལ་བའི་རེའུ་མིག་ལ་གཞིགས་ཚེ་རྒྱ་གཞུང་གིས་ཕྱི་ལོ་ ༢༠༡༧ ནང་ཡུ་གུར་མི་རིགས་གཙོ་གྱུར་ཁ་ཆེའི་གྲངས་ཉུང་མི་རིགས་ཐོག་ཁུངས་མེད་ཀྱི་ཁྲིམས་གཏུག་བརྒྱུད་ལོ་མང་རིང་བཙོན་འཇུག་ཁྲིམས་ཐག་བཅད་པའི་གནད་དོན་དེ་ཇེ་མང་དུ་འགྲོ་བཞིན་ཡོད་པར་མ་ཟད། ཕྱི་ལོ་ ༢༠༡༨ དང་ ༢༠༡༩ སོ་སོར་ཉེས་ཆད་འགེལ་བའི་གནས་ཚུལ་སྔར་ལྷག་འཕར་ཡོད་པ་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་འབྲེལ་མཐུད་ཁང་གི་སྙན་ཐོ་དང་ནིའུ་ཡོག་ Times བཅས་སུ་འཁོད་ཡོད་པ་ལུང་འདྲེན་གནང་བར་མ་ཟད་ཤིན་ཅང་ཁྲིམས་ཁང་ནས་ཕྱི་ལོ་ ༢༠༡༧ ལོར་མི་ ༩༩༣༢༦ ལྷག་དང་ ༢༠༡༨ ལོར་ ༡༣༣༡༩༨ ལྷག་ལ་ཁྲིམས་ཐག་བཅད་ཡོད་པ་ཀྱང་། ཕྱི་ལོ་ ༢༠༢༩ ལོར་མང་ཚོགས་ཇི་ཡོད་ལ་ཉེས་ཆད་འགེལ་རྒྱུའི་རྣམ་གྲངས་རེའུ་མིག་ད་ལྟ་ཡང་མངོན་གསལ་བྱེད་ཀྱི་མེད་པ་གསུངས་འདུགའོན་ཀྱང་ཤིན་ཅང་ Victims Database ཞེས་གཞུང་འབྲེལ་མིན་པའི་འགྲོ་བ་མིའི་ཐོབ་ཚོགས་པའི་ཚོད་དཔག་གནང་བར་གཞིགས་ན་ཕྱི་ལོ་ ༢༠༡༩ ལོར་ཁྲིམས་ཐག་བཅད་པའི་གྲངས་ཐོ་དེ་གོང་གི་ཕྱི་ལོ་ ༢༠༡༧ དང་ ༢༠༡༨ གཉིས་ཀྱི་གྲངས་ཐོ་དང་ཆ་སྙོམས་ཆགས་ཀྱི་ཡོད་པར་ངོས་འཛིན་དང་ ༢༠༡༩ ནང་ཁྱོན་མི་སྟོང་ཕྲག་བཅུ་ཕྲག་མང་པོར་ཉེས་ཆད་བཏང་ཡོད་པར་ཚོད་དཔག་གནང་གི་འདུགའགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་ཉམས་ཞིབ་པ་བགྲེས་པ་ལྕམ་ Maya Wang ལགས་ཀྱིས་རྒྱལ་སྤྱིའི་ཚོགས་སྡེ་ཁག་གིས་རྒྱ་ནག་གཞུང་ལ་གནོན་ཤུགས་བསྟུད་མར་སྤྲད་པའི་རྐྱེན་གྱིས་རྒྱ་གཞུང་གིས་ཤིན་ཅང་གི་ཆབ་སྲིད་སློབ་གསོའི་བསྟི་གནས་ཁང་ནས་མི་ཁག་ཅིག་གློད་བཀྲོལ་བཏང་ཡོད་སྟབས་ད་ཆ་རྒྱལ་སྤྱིའི་ཚོགས་སྡེ་ཁག་གིས་ཤིན་ཅང་ནང་རང་དབང་ལྡན་པའི་ཞིབ་འཇུག་ཡོང་བར་རྒྱ་ནག་གཞུང་ལ་མུ་མཐུད་གནོན་ཤུགས་འཕར་མ་སྤྲོད་དགོས་པ་དང་། དེ་ནི་དྲང་བདེན་མེད་པར་བཀག་སྐྱིལ་དང་བཙོན་འཇུག་བྱས་པ་རྣམས་གློད་བཀྲོལ་ཐུབ་པའི་རེ་བ་བཟང་ཤོས་དེ་ཡིན་པར་གཞེན་སྐུལ་གནང་འདུག