Homepage

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་རྒྱལ་ཁབ་ Lithuania དང་ Latvia ནང་ཉིན་གྲངས་ ༥ ཙམ་གྱི་མཛད་འཆར་བསྐྱང་སླད་ཁ་སང་བཞུགས་སྒར་ནས་ཆིབས་བསྒྱུར་མཛད་སོང་། མཛད་འཆར་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་ནས་ཟླ་ ༦ ཚེས་ ༡༣ ཉིན་ཡོ་རོབ་ Lithuania རྒྱལ་ཁབ་ཀྱི་ Vilnius གྲོང་ཁྱེར་དུ་རྟེན་གཞི་བྱས་པའི་ Vilnius གཙུག་ལག་སློབ་གྲྭ་ཆེན་མོར་ཤེས་ཡོན་ལམ་ལུགས་ནང་བཟང་སྤྱོད་དགོས་གལ་སྐོར་བཀའ་སློབ་དང་ཚེས་ ༡༤ ཉིན་བདེ་སྐྱིད་ཀྱི་བསྟན་བཅོས་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་རྒྱུ་མ་ཟད། ལ་ཊི་ཝི་ཡ་བོད་སྐྱོབ་ཚོགས་པ་དང་ཨུ་རུ་སུ་བོད་སྐྱོབ་ཐེབས་རྩ་ཁང་། ཨུ་རུ་སུ་སྐུ་ཚབ་དོན་ཁང་གསུམ་གྱིས་མགོན་པོ་༸གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་བསྩལ་ཐོབ་སྟེ། ཟླ་ ༦ ཚེས་ ༡༦ དང་ ༡༧ ཉིན་གྲངས་གཉིས་རིང་ Latvia རྒྱལ་ས་ Riga ནང་རྟེན་གཞི་བྱས་པའི་ Skonto ཚོགས་ཁང་ཆེན་མོར་༸གོང་ས་མཆོག་གིས་༸རྗེ་ཙོང་ཁ་པ་བློ་བཟང་གྲགས་པ་དཔལ་བཟང་པོ་མཆོག་གིས་མཛད་པའི་ལམ་རིམ་བསྡུས་དོན་དང་རྟེན་འབྲེལ་བསྟོད་པ། དེ་བཞིན་རྡོ་རྗེ་གཅོད་པ་བཅས་ཀྱི་བཀའ་ཆོས་བསྩལ་རྒྱུ་ཡིན་པ་དང་། དེ་རྗེས་ཕྱི་ཚེས་ ༡༨ ཉིན་༸གོང་ས་མཆོག་གིས་མང་ཚོགས་རྣམས་ལ་འཇམ་དཔལ་དབྱངས་ཀྱི་རྗེས་གནང་བཀྲིན་སྩལ་རྒྱུ་ཡིན་པ་རེད། ༸གོང་ས་༸སྐྱབས་མགོན་པོ་མཆོག་ནས་ Vilnius གྲོང་ཁྱེར་ནང་གི་མཛད་འཕྲིན་ཁག་ལེགས་གྲུབ་ཀྱིས་ཚེས་ ༡༥ ཉིན་ཡོ་རོབ་རྒྱལ་ཁབ་ལ་ཊི་ཝི་ཡ་ནང་ཆིབས་ཞལ་བསྒྱུར་གནང་སྟེ་ཁུལ་དེར་ཆོས་འབྲེལ་གྱི་མཛད་འཆར་ཐུགས་གཏན་ཁེལ་ཡོད་པ་ལྟར། ད་ཆ་ Riga ནང་གཙོ་བོ་རུ་སུའི་ནང་པའི་ཆོས་ཞུ་བ་ཚོར་དམིགས་ནས་གོ་སྒྲིག་གནང་བའི་ཉིན་གསུམ་གྱི་ཆོས་འབྲེལ་ལས་རིམ་ཡོངས་རྫོགས་གྲ་སྒྲིག་གང་ཙམ་གནང་ཟིན་ཡོད་པ་དང་། ཆོས་འབྲེལ་གྱི་ཕྱག་འཁྱེར་ ༤༠༠༠ ནས་ཁྱོན་ ༣༢༠༠ ཚོང་འགྲེམས་གནང་ཟིན་པའི་ཁྲོད་ཕྱག་འཁྱེར་ ༣༠༠༠ དེ་དག་ཡོངས་རྫོགས་རུ་སུའི་ནང་པའི་ཆོས་ཞུ་བ་ཚོས་བཞེས་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་ནང་གི་མཛད་འཆར་སླད་ཁ་སང་སྔ་དྲོ་ཚོུད་ ༡༡ ཡོལ་ཙམ་ལ་བཞུགས་སྒར་ནས་མཁའ་ལམ་བརྒྱུད་ལྡི་ལིར་ཕེབས་ཐོན་མཛད་ཡོད་པ་ལྟར། ཁ་སང་དང་དེ་རིང་བཅས་ཉིན་གཉིས་རིང་༸སྐུ་ངལ་གསོ་བཞུགས་གྲུབ་རྗེས་སང་སྔ་དྲོ་༸གང་ཉིད་མཆོག་ཡོ་རོབ་རྒྱལ་ཁབ་ Lithuania གྲོང་ཁྱེར་ Vilnius ནང་ཆིབས་བསྒྱུར་མཛད་ཀྱི་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་བཞུགས་སྒར་ནས་ཡོ་རོབ་ཏུ་ཆིབས་བསྒྱུར་མཛད་པ། ཁོང་ཁྲོའི་བྲན་གཡོག་ཏུ་མ་ཚུད་པ་བྱེད་དགོས་པའི་བཀའ་བསྩལ་བ། བོད་རྒྱལ་ཡོངས་རྐང་སྤོལ་རྩེད་འགྲན་གྱི་རྒྱལ་ཁ་དྭང་སློབ་བོད་དམག་རུ་ཁག་ལ་ཐོབ་པ། བོད་རང་སྐྱོང་ལྗོངས་ཀྱི་ཁྱབ་ཁོངས་བོད་མི་ཚོར་རྒྱ་ནག་གི་རྒྱལ་གླུ་བློ་རྒྱུགས་ལེན་བཞིན་འདུག བོད་རང་སྐྱོང་ལྗོངས་ཀྱི་ཁུལ་དུ་གནམ་ཐང་གསུམ་གསར་རྒྱག དམིགས་བསལ་ལས་རིམ། ༸རྒྱལ་མཆོག་སྐུ་ཕྲེང་ལྔ་པའི་སྐོར། Monday 11/06/2018 Dalai Lama leaves for Lithuania and Latvia visit Dalai Lama meets with foreigners visiting Dharamsala ‘Victory FC’ team wins Thank You India Tibetan football tournament Tibetans in TAR forced to memorize the Chinese National Anthem China to build three more airports in south-west Tibet HISTORY FEATURE: 5TH Dalai Lama Ngawang Lobsang Gyatso

ལོ་ལྟར་ཕྱི་ཟླ་ ༧ ཚེས་ ༡ ཉིན་རྒྱ་ནག་དམར་ཤོག་གཞུང་དབུ་བརྙེས་པའི་དུས་ཆེན་ཁེལ་གྱི་ཡོད་པ་བཞིན་འཆར་ལ་ཉེ་བའི་ཉིན་མོ་དེའི་ཆེད་རྒྱ་ནག་གཞུང་གིས་འབོད་བཞིན་པའི་བོད་རང་སྐྱོང་ལྗོངས་ཀྱི་ཁྱབ་ཁོངས་ཁྱོན་ཡོངས་ནང་གནས་པའི་བོད་མི་ཚོར་ཁྱིམ་ཚང་ལ་མིའི་ཆ་རྐྱེན་དང་འདོད་བློ་ཡོད་མེད་ལ་མ་ལྟོས་པར་བཙན་ཤེད་ཀྱི་སྒོ་ནས་རྒྱ་ནག་གི་རྒྱལ་གླུ་རྒྱུགས་སྤྲོད་དང་རྒྱ་ནག་དམར་ཤོག་གཞུང་ལ་བསྟོད་པའི་གླུ་གཞས་སྦྱོང་བརྡར་གྱི་ལས་འགུལ་ཞིག་སྤེལ་བཞིན་ཡོད་པ་རེད་འདུག བོད་མི་ཚོས་རྒྱ་ནག་དམར་ཤོག་གི་རྒྱལ་གླུ་རྒྱུགས་ཡག་པོ་འཕྲོད་མཁན་ལ་བྱ་དགའ་སྤྲོད་པ་དང་གལ་སྲིད་གླུ་གཞས་སྦྱོང་བརྡར་མ་གནང་བ་བྱུང་ཚེ་རྒྱ་སྒོར་ ༡༠༠ ཡན་གྱི་ཆད་པ་གཅོད་བཞིན་ཡོད་པར་བརྟེན་འཚོ་བའི་ཆ་རྐྱེན་ཞན་པའི་ཁྱིམ་ཚང་ལ་དཀའ་ངལ་ཆེན་པོ་འཕྲད་བཞིན་ཡོད་པ་རེད་འདུག གླུ་གཞས་སྦྱོང་བརྡར་བྱེད་པའི་ལས་འགུལ་དེ་ནི་བོད་རང་སྐྱོང་ལྗོངས་ཁྱོན་ཡོངས་ལ་གཅིག་གྱུར་ཡིན་ཀྱང་རྒྱལ་གླུ་བློ་རྒྱུགས་སྤྲོད་པ་དེ་ནི་གཙོ་བོ་གཞིས་ཀ་རྩེ་ཁྱབ་ཁོངས་ཁྱོན་ཡོངས་སུ་སྤེལ་བཞིན་ཡོད་པ་རེད་འདུག དེའང་ཕྱི་ཟླ་ ༤ ཚེས་ ༢༦ དང་ ༢༧ ཉིན་རྒྱུགས་སྤྲོད་དང་ཕྱི་ཟླ་ ༥ ཚེས་ ༡ ཉིན་རྒྱུགས་འཕྲོད་པ་རྣམས་རྒྱལ་གླུ་གཏོང་རྒྱུ་དང་གཏམ་བཤད་ཀྱི་ལས་འགུལ་སྤེལ་འདུག དེ་དང་ཕྱོགས་མཚུངས་ལྷ་ས་ཆུ་ཤུལ་ནས་སྣེ་འུར་གནས་སྤོས་བྱས་པའི་གྲོང་མི་ཚོས་ཕྱི་ཟླ་ ༧ ཚེས་ ༡ ཉིན་གུང་ཁྲན་ཏང་གི་བཀའ་དྲིན་འོག་འཚོ་བར་ཡར་རྒྱས་ཕྱིན་པའི་འཁྲབ་སྟོན་གྱི་བྱེད་སྒོ་ཞིག་སྤེལ་འཆར་ཡོད་པ་དང་། སྣེའུ་གྲོང་ཚོའི་འགོ་ཁྲིད་ཀྱིས་ཟླ་ ༧ ཚེས་ ༡ ཉིན་མང་ཚོགས་ཀྱིས་གུང་ཁྲན་ཏང་ལ་བསྟོད་པའི་བྱེད་སྒོའི་ནང་མཉམ་ཞུགས་བྱེད་དགོས་པར་བཙན་བཀའ་བཏང་ཡོད་པ་རེད་འདུག གཞས་གཏང་མ་ཤེས་པའམ་ནད་གཞི་རྐྱེན་པས་གཞས་གཏང་མ་ཐུབ་མཁན་ཚོའི་ངོས་ནས་གྲོང་ཚོའི་འགོ་ཁྲིད་ལ་དགོངས་པ་ཞུ་སྐབས་འགོ་ཁྲིད་ཀྱིས་རྒྱ་སྒོར་ ༥༠༠ ཆད་པ་བཏང་ཡོད་པ་དང་དེ་ནི་ཟླ་རེའི་གླ་ཕོགས་རྒྱ་སྒོར་ ༣༠༠༠ ལས་མེད་པའི་སྣེའུ་གྲོང་མིར་མཚོན་ན་འཚོ་བའི་ཐད་དཀའ་ངལ་ཆེན་པོ་འཕྲད་བཞིན་ཡོད་པ་རེད་འདུག

ཁ་སང་ཟླ་ ༦ ཚེས་ ༡༠ ཉིན་༸གོང་ས་མཆོག་ཡུ་རོབ་ཁུལ་དུ་ཕེབས་ཐོན་མ་མཛད་པའི་ཉིན་གཅིག་གི་སྔ་རོལ་ཚེས་ ༩ ཉིན་སྔ་དྲོ་ཚོུད་ ༩ ཡོལ་ཙམ་ལ་མགོན་པོ་༸གང་ཉིད་མཆོག་གིས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་རྒྱ་གར་གྱི་ས་གནས་འདྲ་མིན་ནས་བཅར་བའི་ཡུལ་མི་དང་། ཨ་རི་དང་ཡུ་རོབ། དེ་བཞིན་ཨོ་གླིང་སོགས་ཕྱིའི་ཡུལ་གྲུ་ཁག་ནས་ཕེབས་པའི་ཡུལ་སྐོར་སྤྲོ་འཆམ་པ་བཅས་ཁྱོན་མང་ཚོགས་ ༣༠༠༠ ཙམ་ལ་བཀའ་སློབ་དང་བཀའ་ལན་མཛད་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་ནས་འཛམ་བུ་གླིང་འདིའི་ཐོག་ཡོད་པའི་འགྲོ་བ་མིའི་ཁྲོད་དུ་ཆོས་ལ་ཡིད་ཆེས་ཡོད་མེད་དང་། འཇིག་རྟེན་བཀོད་པ་པོ་ཡོད་མེད་སོགས་འདོད་ཚུལ་མི་འདྲ་བ་མང་དག་ཡོད་ཀྱང་འགྲོ་བ་ཀུན་བདེ་སྐྱིད་འདོད་མཁན་གཅིག་མཚུངས་ཡིན་སྟབས་རྣམ་ཀུན་ནས་སེམས་པ་བཟང་པོ་དང་གཞན་ཕན་གྱི་ལས་དོན་བསྒྲུབ་གལ་ཡིན་པ་དང་། དེ་ལྟར་བྱུང་ཚེ་རང་ཉིད་ཀྱི་མི་ཚེ་དེ་ཡང་དོན་ཕན་ལྡན་པ་ཞིག་ཡོང་ངེས་རེད་ཅེས་ལམ་སྟོན་གནང་བ་དང་ཆབས་ཅིག བྱམས་བརྩེ་ནི་འགྲོ་བ་མིའི་ལྷན་སྐྱེས་སུ་ཡོད་པ་ཞིག་ཡིན་སྟབས་དུས་རྒྱུན་དུ་བྱམས་སྙིང་རྗེ་དང་གཞན་ཕན་གྱི་བསམ་བློ་གོང་འཕེལ་གཏོང་ཐབས་གནང་དགོས་གནད་ཡིན་པ་བཀའ་བསྩལ་འདུག ལྷག་པར་དུ་༸གང་ཉིད་མཆོག་ནས་འགྲོ་བ་མིའི་སེམས་ཀྱི་ཞི་བདེ་འཁྲུག་བཅུག་མཁན་གཙོ་བོ་དེ་ཁོང་ཁྲོ་ཡིན་སྟབས། རྣམ་ཀུན་སྨོན་ལམ་རྒྱབ་པ་དང་ཁ་འདོན་བྱས་པ་ཙམ་མིན་པར་འགྲོ་བ་མིའི་རྣམ་དཔྱོད་བེད་སྤྱོད་བྱས་ནས་ཁོང་ཁྲོའི་ཆ་དེ་དག་ལ་གདོང་ལེན་གྱིས་དེའི་བྲན་གཡོག་ཏུ་མ་ཚུད་པ་ཞིག་བྱེད་དགོས་ཞེས་བཀའ་ནན་བསྩལ་འདུག སྐབས་དེར་མཇལ་བཅར་བ་ཁག་ཅིག་ནས་མགོན་པོ་༸གང་ཉིད་མཆོག་ལ་སེམས་ཁམས་རིག་པ་དང་ནང་ཆོས་ཟུང་འབྲེལ་ཡོངས་ཐུབ་མིན་དང་སྤྱི་ཚོགས་ཁྲོད་དབྱེ་འབྱེད་མེད་པར་འདྲ་མཉམ་ཡོང་ཐབས་གནང་ཕྱོགས་སོགས་ཀྱི་ཐད་བཀའ་འདྲི་ཁག་ཅིག་ཞུས་པར་༸གོང་ས་མཆོག་གིས་རྒྱ་གར་གྱི་གནའ་བོའི་རིག་གནས་ནང་ཡོད་པའི་སེམས་ཁམས་རིག་པའི་རྣམ་གཞག་གི་འགྲོ་སྟངས་དེ་དག་ཧ་ཅང་ཕྱུག་པོ་ཡོད་ཀྱང་། བར་སྐབས་ཤིག་ནས་ལེགས་བཤད་དེ་དག་ཉམས་ཆག་འགྲོ་བཞིན་ཡོད་སྟབས། ༸གང་ཉིད་མཆོག་ནས་རྒྱ་གར་གྱི་གནའ་བོའི་ལེགས་བཤད་དེ་དག་ཉམས་གསོ་ཡོང་ཐབས་གནང་བཞིན་ཡོད་སྐོར་བཀའ་བསྩལ་དང་འབྲེལ་ཏེ་རིག་གནས་དེ་དག་དེང་དུས་ཀྱི་ཤེས་ཡོན་སློབ་གསོའི་ཁྲོད་སློབ་ཁྲིད་གནང་ཐུབ་ཚེ་མིའི་བསམ་བློ་གཏོང་སྟངས་ལ་ཕན་པ་མ་ཟད་སེམས་ཁམས་དང་འབྲེལ་བའི་དཀའ་ངལ་ཁག་ལ་གདོང་ལེན་གནང་བར་དགེ་མཚན་ཆེན་པོ་ཡོད་པར་ལམ་སྟོན་རྒྱ་ཆེ་མཛད་འདུག དེ་བཞིན་སྤྱི་ཚོགས་ཀྱི་དབྱེ་འབྱེད་སོགས་དང་འབྲེལ་བའི་བཀའ་ལན་མཛད་པར་འཛམ་བུ་གླིང་འདིའི་ཐོག་འཕྲད་བཞིན་པའི་དཀའ་རྙོག་མང་པོ་ཞིག་འགྲོ་བ་མི་རྣམས་ནས་ང་དང་ཁོ། རིགས་རུས་དང་ལུང་ཚན་སོགས་རིམ་པ་གཉིས་པའི་དབྱེ་འབྱེད་ཀྱི་བསམ་བློ་ཤུགས་ཆེ་དྲག་པའི་དབང་གིས་བྱུང་སྐོར་བཀའ་བསྩལ་བ་དང་ཆབས་ཅིག་ཏུ་འགྲོ་བ་མི་ཐེར་འབུམ་བདུན་ལྷག་ཡོད་པ་ཚང་མས་རིམ་པ་གཉིས་པའི་དབྱེ་འབྱེད་ཀྱི་བསམ་བློ་དེ་དག་དོར་ནས་འགྲོ་བ་མི་གཅིག་གྱུར་གྱི་བསམ་བློ་གོང་འཕེལ་གནང་དགོས་གལ་ཡིན་པ་བཀའ་བསྩལ་འདུག གཞན་ཡང་༸གོང་ས་མཆོག་ནས་གཞོན་སྐྱེས་ཚོར་ཆེད་དམིགས་ཀྱིས་འདས་པའི་དུས་རབས་ཉི་ཤུའི་ནང་འཛམ་གླིང་དམག་ཆེན་དང་པོ་དང་གཉིས་པ། དེ་བཞིན་ཀོ་རི་ཡ་དང་ཝི་ཏི་ནམ་དམག་སོགས་དམག་འཁྲུག་མང་དག་ཞིག་བྱུང་ནས་འགྲོ་བ་མིའི་ཚེ་སྲོག་མང་པོ་ཤོར་ཡོད་པ་བཀའ་གནང་བ་དང་སྦྲགས། དུས་རབས་ཉེར་གཅིག་པ་འདི་ཞི་བདེ་དང་བདེ་སྐྱིད་ལྡན་པའི་དུས་རབས་ཤིག་ཡོང་ཐབས་སུ་གཞོན་སྐྱེས་ཚོར་དམིགས་བསལ་གྱི་འགན་བཞེས་དགོས་པར་ལམ་སྟོན་བཀྲིན་ཆེ་བ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་འགྲོ་བ་མིའི་སྤྱི་ཚོགས་འདི་བདེ་སྐྱིད་དང་བྱམས་བརྩེ་ལྡན་པ་ཞིག་བཟོ་རྒྱུའི་འགན་དང་ནུས་པ་འགྲོ་བ་མི་ཚང་མར་ཡོད་སྟབས། འགྲོ་བ་མི་རེ་ངོ་རེ་ནས་རྒྱུན་དུ་དེའི་ཐད་བསམ་ཞིབ་ནན་པོའི་ཐོག་ནས་ནུས་པ་མཉམ་སྤུངས་གནང་གལ་ཡིན་པར་ལམ་སྟོན་མཛད་ཡོད།

དབུས་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་ཞུས་པའི་བོད་ཀྱི་རྒྱལ་ཡོངས་རྐང་རྩེད་སྤོ་ལོའི་རྩེད་འགྲན་མཐའ་མའི་ཨང་དང་པོའི་བྱ་དགའ་དེ་རྡེ་ར་ལྡུན་ཁུལ་དུ་ཡོད་པའི་བོད་མིའི་དང་ཞབས་དམར་སྒར་གྱི་ Victory FC རྐང་སྤོལ་རུ་ཁག་ལ་ཐོབ་སོང་། ཁ་སང་ཉིན་རྒྱབ་བཞུགས་སྒར་རྡ་སྟེང་བོད་ཁྱིམ་གྱི་རྐང་སྤོལ་རྩེད་ཐང་དུ་སེར་སྐྱ་མང་ཚོགས་སྟོང་ཕྲག་བརྒལ་བ་འདུ་འཛོམས་ཐོག་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་བོད་ཀྱི་རྒྱལ་ཡོངས་རྐང་རྩེད་སྤོ་ལོའི་རྩེད་འགྲན་མཐའ་མ་དེ་བདེ་སྐྱིད་གླིང་ས་གནས་གཞོན་ནུ་རྐང་སྤོལ་རུ་ཁག་དང་བོད་མིའི་དང་ཞབས་དམར་སྒར་གྱི་ Victory FC རྐང་སྤོལ་རུ་ཁག་གཉིས་དབར་འགྲན་རྩོད་གནང་ཡོད་པ་རེད། རུ་ཁག་གཉིས་པོ་ཕན་ཚུན་དབར་རྩེད་འགྲན་གནང་སྐབས་ཐོག་མའི་སྐར་མ་ ༤༥ འི་བར་སེང་བར་རུ་ཁག་གཉིས་ནས་སྤོ་ལོ་གཅིག་ཀྱང་བླུགས་ཐུབ་མེད་པ་རེད། བར་སེང་རྗེས་ཀྱི་སྐར་མ་ ༦༠ དང་ ༧༠ ནང་ཚུད་ལ་དང་དམག་རུ་ཁག་གིས་སྤོ་ལོ་གཉིས་བླུགས་ཡོད་པ་དང་། སྐབས་དེར་བདེ་སྐྱིད་གླིང་ས་གནས་གཞོན་ནུ་རུ་ཁག་གི་རྩེད་འགྲན་པ་ཚོས་སེམས་ཤུགས་མ་ཆག་པར་མུ་མཐུད་རྩེད་འགྲན་ཧུར་ཐག་རྩེད་ཡོད་སྟབས་དང་དམག་རུ་ཁག་ལ་སྤོ་ལོ་གཅིག་བླུགས་ཐུབ་པ་བྱུང་ཡོད་པ་རེད། འོན་ཀྱང་རྩེད་འགྲན་གྱི་མཐའ་མའི་དུས་ཚོད་རྫོགས་མཚམས་སུ་སླེབས་པར་བརྟེན་བདེ་སྐྱིད་གླིང་རུ་ཁག་ནས་སྤོ་ལོ་གཅིག་མཚུངས་བླུགས་མ་ཐུབ་པར་དང་ཞབས་དམག་སྒར་གྱི་ Victory FC  རྐང་སྤོལ་རུ་ཁག་ལ་སྤོ་ལོ་གཉིས་དང་བདེ་སྐྱིད་གླིང་ས་གནས་གཞོན་ནུ་རུ་ཁག་ལ་སྤོ་ལོ་གཅིག་བཅས་ ༢༠༡༨ ལོའི་རྒྱ་གར་གཞུང་མང་གཉིས་ལ་ཐུགས་རྗེ་ཞུའི་བོད་ཀྱི་རྒྱལ་ཡོངས་རྐང་སྤོལ་རྩེད་འགྲན་མཐའ་མའི་རྒྱལ་ཁ་དྭང་སློབ་བོད་དམག་རུ་ཁག་ལ་ཐོབ་ཡོད་པ་རེད། སྐབས་དེར་རྩེད་འགྲན་གྱི་བྱ་དགའ་དེ་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་གནང་སོང་བ་དང་། སྐབས་དེར་ཁོང་གིས་མ་འོངས་པར་ཕ་མ་ཚོ་དང་སློབ་གྲྭའི་སྒྲིག་འཛུགས་སོགས་ནས་ཕྲུ་གུའི་རྩེད་རིགས་ཤེས་ཡོན་ཐོག་མཐུན་འགྱུར་གནང་དགོས་གལ་ཡིན་པ་གསུངས་ཡོད། བོད་ཀྱི་གཞོན་ནུ་ལྷན་ཚོགས་ནས་རྩེད་འགྲན་ཨང་དང་པོ་སོན་པར་བྱ་དགའ་བུམ་པ་དང་ཧིན་སྒོར་འབུམ་གཅིག ཨང་གཉིས་པར་བུམ་པ་དང་ཧིན་སྒོར་ཁྲི་ལྔ་བཅས་གནང་ཡོད་པ་རེད། ཐེངས་འདིའི་རྩེད་འགྲན་ནང་ཁྱོན་སྤོ་ལོ་བདུན་བླུགས་མཁན་ Victory FC རུ་ཁག་གི་རྩེད་འགྲན་པ་བསྟན་འཛིན་འཕྲིན་ལས་ལགས་སུ་རྩེད་འགྲན་ལེགས་ཤོས་ཀྱི་བྱ་དགའ་དང་དེ་བཞིན་བདེ་སྐྱིད་གླིང་རུ་ཁག་གི་རྩེད་འགྲན་པ་སངས་རྒྱས་མཁར་ལ་སྒོ་རགས་པ་ལེགས་ཤོས་ཀྱི་བྱ་དགའ་བཅས་གནང་ཡོད་པ་རེད། རྩ་བའི་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་ཞུས་པའི་ཐེངས་འདིའི་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་བོད་ཀྱི་རྒྱལ་ཡོངས་རྐང་རྩེད་སྤོ་ལོའི་རྩེད་འགྲན་ཆེན་མོའི་ཐོག་རྒྱ་གར་བྱང་ཤར་ཁུལ་གྱི་ཏི་ཛུ་དང་། ལྷོ་ཕྱོགས་མོན་གྷོ། སྦེང་ལོར། དེ་བཞིན་བྱང་ཕྱོགས་ལྡི་ལི། རྡེ་ར་ལྡུན།  ཅན་ཌཱི་གྷར། མ་ན་ལི། སྦིར། སིམ་ལ་སོགས་བོད་མིའི་གནས་སྡོད་ས་གནས་ཁག་འདྲ་མིན་ནས་རྩེད་འགྲན་རུ་ཁག་ ༡༦ གི་ན་གཞོན་རྩེད་འགྲན་པ་ ༡༥༠ ལྷག་འདུ་འཛོམས་བྱུང་ཡོད་པ་རེད། རྩེད་འགྲན་དེ་འདི་ལོ་ཟླ་ ༦ ཚེས་ ༡ ཉིན་ནས་ཁ་སང་ཟླ་ ༦ ཚེས་ ༡༠ བར་ཁྱོན་ཉིན་གྲངས་བཅུའི་རིང་རྩེད་གནང་ཡོད་པ་དང་། ཁ་སང་ཉིན་མཐའ་མའི་རྩེད་འགྲན་དབུ་འཛུགས་མ་གནང་གོང་དྷ་ས་ཁུལ་གྱི་བོད་མིའི་གཞུང་འབྲེལ་མིན་པའི་ཚོགས་ཁག་ལས་གྲུབ་པའི་རྐང་སྤོལ་རུ་ཁག་དང། དེ་བཞིན་དྷ་ས་ཁུལ་གྱི་རྒྱ་གར་ཡུལ་མི་དང་བོད་དོན་རྒྱབ་སྐྱོར་ཚོགས་པ་ལས་གྲུབ་པའི་རུ་ཁག་གཉིས་དབར་མཛའ་མཐུན་གྱི་རྐང་སྤོལ་རྩེད་འགྲན་གནང་ཡོད་པ་རེད།

ཉན་པ།: Listen ཕབ་ལེན། Download བསྟན་འཛིན་འཛུགས་སྐྲུན་ཁེ་ལས་ཁང་གི་གཙོ་གཉེར་བ་བསྟན་འཛིན་ལགས་དང་ལྷན་ཚོང་ལས་དང་སྤྱི་ཚོགས་ཞབས་ཞུའི་སྐོར། Sunday 10/06/2018 Bringing Business and Philanthropy together: In conversation with Waho Tenzin, owner and CEO of Tenzin Construction Company