རྒྱལ་སྤྱི།

ཤིན་ཅང་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་གནད་དོན་དང་འབྲེལ་ཨ་རི་གཞུང་གིས་ཤིན་ཅང་ནང་གི་རྒྱ་ནག་གཞུང་འབྲེལ་ལས་ཁུངས་གཅིག་དང་ད་ལྟའི་ཤིན་ཅང་གི་དམར་ཤོག་ཚོགས་པའི་དཔོན་རིགས་ ༤ ལ་ Global Magnitsky Act ཞེས་པའི་ཁྲིམས་གཞིའི་འོག་ནས་ཉེས་ཆད་བཀལ་བར་ངན་ལན་དང་སྦྲགས་ཏེ་རྒྱ་ནག་གཞུང་གིས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་དང་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་གྲོས་ཚོགས་འཐུས་མི་གསུམ་བཅས་ཨ་རིའི་གཞུང་གི་ལས་ཁུངས་གཅིག་དང་དཔོན་རིགས་ ༤ ལ་ཉེས་ཆད་འགེལ་རྒྱུ་ཡིན་པ་ཡོངས་གྲགས་བྱས་འདུགདེ་རིང་རྒྱལ་སྤྱིའི་བརྒྱུད་ལམ་ཁག་གིས་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་གསར་འགོད་ལྷན་ཚོགས་བརྒྱུད་ནས་རྒྱ་ནག་གཞུང་གི་ངོས་ནས་རྣམ་ཀུན་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ཐོག་ཚོར་ཤུགས་ཆེན་པོའི་ཐོག་ནས་གསུང་མཁན་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Chris Smith ལགས། དེ་བཞིན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་སྐུ་ཞབས་ Marco Rubio ལགས། ཨ་རིའི་གྲོས་ཚོགས་ནང་སྐུ་ཞབས་ Rubio ལགས་ཀྱི་ལྷན་དུ་ཤིན་ཅང་ནང་གི་གནད་དོན་ཐད་རྒྱ་ནག་དཔོན་རིགས་ལ་ཉེས་ཆད་འགེལ་དགོས་པའི་གྲོས་འཆར་འདོན་མཁན་གྲོས་ཚོགས་གོང་མའི་འཐུས་མི་སྐུ་ཞབས་ Ted Cruz ལགས་བཅས་ལ་རྒྱ་ནག་གཞུང་གིས་ཉེས་ཆད་འགེལ་རྒྱུ་ཡིན་པ་དང་ད་ལྟའི་ཆར་ཉེས་ཆད་གང་འགེལ་རྒྱུ་ཡིན་པ་སོགས་ཁ་གསལ་གང་ཡང་བརྗོད་མི་འདུགསྐབས་དེར་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་ཤིན་ཅང་གི་གནད་དོན་ནི་རྒྱ་ནག་རྒྱལ་ནང་གི་གནད་དོན་ཡིན་པས་ཨ་རི་གཞུང་ལ་དེའི་ཐོག་ཐད་བྱུས་གནང་དབང་མེད་སྐོར་དང་འབྲེལ། ཨ་རི་གཞུང་གི་ངོས་ནས་ཉེ་ལམ་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་ཡོངས་གྲགས་གནང་བ་དེ་ནོར་འཁྲུལ་ཡིན་སྟབས་ནོར་འཁྲུལ་ལ་ཡོ་བསྲང་གནང་དགོས་ཞེས་སྐུལ་མ་གནང་འདུགརྩ་བའི་གཟའ་འཁོར་སྔོན་མའི་ནང་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་སྐོར་གསུངས་པ་མ་ཟད། དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཀྱི་མིང་མངོན་གསལ་གནང་ཡོད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁེལ་འདུག དཔྱད་ཞིབ་པ་རྣམས་ཀྱིས་ད་ལྟ་ཨ་རི་དང་རྒྱ་ནག་གཉིས་དབར་འབྲེལ་ལམ་ཆེས་ཞན་པོ་ཆགས་ཡོད་པ་དང་། རྒྱལ་ཁབ་ཕྱོགས་གཉིས་ཀྱི་ངོས་ནས་བཞེངས་ཕྱོགས་མཁྲེགས་པོ་འཛིན་ཡོད་པ་ལྟར་དེ་ལྟར་གནང་བ་མ་གཏོགས། ཕན་ཚུན་ཉེས་ཆད་འགེལ་སའི་ལས་ཁུངས་དང་སྒེར་གྱི་དཔོན་རིགས་རྣམས་དང་ལྷན་དུ་དུས་རྒྱུན་ཚོང་སོགས་ཀྱི་འབྲེལ་བ་དེ་ཙམ་མེད་སྟབས། ཚོང་འབྲེལ་ལ་དམིགས་བསལ་དཔོ་ཕོག་གི་མེད་པ་དེ་ལྟར་ཡང་། གལ་ཏེ་ཨ་རི་གཞུང་གིས་ཧོང་ཀོང་ནང་གི་ཁྲིམས་གཞིའི་འོག་ནས་ལག་བསྟར་གནང་ཚེ་ཕྱོགས་གཉིས་ཀྱི་ཚོང་འབྲེལ་ལའང་དོ་ཕོག་ངེས་ཅན་འགྲོ་སྲིད་པར་གསུངས་འདུག

ཨི་ཊ་ལི་གྲོས་ཚོགས་འཐུས་མི་སྐུ་ཞབས་ Matteo Lungi Bianchi ལགས་ཀྱིས་གྲོས་ཚོགས་སུ་རྒྱ་ནག་གཞུང་གིས་ཁེ་ལེན་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་འབྲུ་དོན་ཁག་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་དང་འབྲེལ། ནུབ་ཕྱོགས་རྒྱལ་ཁབ་ཁག་ནས་རྒྱ་ནག་གཉའ་གནོན་ཐུབ་ཚོད་ལ་དུས་ནམ་ཡང་མགོ་སྒུར་རྒྱུ་མེད་ཅེས་གསུངས་འདུགཉེ་ཆར་ཡོ་རོབ་རྒྱལ་ཁབ་ཨི་ཊ་ལིའི་གྲོས་ཚོགས་ནང་གྲོས་ཚོགས་འཐུས་མི་སྐུ་ཞབས་ Matteo Lungi Bianchi ལགས་ཀྱིས་ད་ལྟའི་ཆར་རྒྱ་ནག་བཙན་གནོན་འོག་བོད་ནང་གི་ཛ་དྲག་གནས་སྟངས་ལ་སེམས་འཚབ་གནང་བ་དང་འབྲེལ། ཕྱི་ཟླ་དང་པོའི་ནང་དུ་རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་གོམས་སྲོལ་རྙིང་པ་བསྒྱུར་བཅོས་ཞེས་པའི་ལས་འགུལ་འོག་བོད་མི་ཚོས་ལོ་ངོ་སྟོང་ཕྲག་གོང་ནས་ཆོས་ཕྱོགས་ཀྱི་གནང་གོམས་ཡོད་ཁག་དང་འབྲེལ་ནས་རི་ལུང་ཁག་ཏུ་དཔྱང་བའི་རླུང་རྟ་དང་དར་ཅོག་རྣམས་མར་ཕབ་དགོས་པའི་བཙན་བཀའ་བཏང་བའི་གནད་དོན་ལུང་འདྲེན་གྱིས་བྱ་སྤྱོད་དེ་ནི་རྒྱ་གཞུང་གིས་བོད་མིའི་ཆོས་ཕྱོགས་ཀྱི་རིག་གཞུང་རྩ་མེད་གཏང་རྒྱུའི་སྲིད་བྱུས་ཤིག་ཡིན་པ་མ་ཟད། དུས་ཡུན་རིང་པོ་མ་སོང་བར་བོད་མིའི་ཐོུང་མ་ཡིན་པའི་ངོ་བོ་རྩ་བརླག་འགྲོ་ཉེན་ཆེན་པོ་ཞིག་ཆགས་འདུག་ཅེས་གསུངས་པ་དང་ཆབས་ཅིག ནུབ་ཕྱོགས་རྒྱལ་ཁབ་ཁག་གི་ངོས་ནས་རྒྱ་ནག་གཞུང་གིས་བོད་མིའི་ཐོག་དེ་ལྟ་བུའི་དྲག་གནོན་དང་གཉའ་གནོན་ཐུབ་ཚོད་གཏོང་བཞིན་པར་མགོ་སྒུར་ཏེ་གོ་མེད་ཚོར་མེད་དུ་མི་བཞུགས་པའི་རེ་སྐུལ་ནན་པོ་གནང་འདུགདེ་བཞིན་ཁོང་གིས་སྐབས་དེར་རྒྱ་ནག་གཞུང་གིས་ཉེ་ཆར་ཧོང་ཀོང་ཐོག་རྒྱལ་ཁབ་བདེ་འཇགས་ཀྱི་ཁྲིམས་གཞི་གཏན་འབེབས་བྱས་པར་སྐྱོན་བརྗོད་དང་། ཁྲིམས་གཞི་འདིས་ཧོང་ཀོང་གི་རང་སྐྱོང་གནས་བབས་དང་མང་ཚོགས་ཀྱི་རང་དབང་། འགྲོ་བ་མིའི་ཐོབ་ཐང་གི་གནས་སྟངས་མེད་པ་ཆགས་ཏེ་ད་ཆ་ཧོང་ཀོང་དེ་དམག་སྲུང་གི་རྒྱལ་ཁབ་ཞིག་ཏུ་གྱུར་ཡོད་ཅེས་གསུངས་འདུག ལྷག་པར་དུ་ཁོང་གིས་གྲོས་ཚོགས་ནང་བོད་དང་ཧོང་ཀོང་ནང་གི་གནས་སྟངས་གླེང་སློང་གནང་བ་བརྒྱུད་ནས་རྒྱལ་སྤྱིའི་གཞུང་སྒེར་ཚོགས་སྡེ་ཁག་དང་ཨི་ཊ་ལིའི་གཞུང་ནས་རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཐོག་ཁ་གཏད་མ་གནང་བར་ཁུ་སིམ་པོར་བཞུགས་ནས་རང་དབང་དང་མང་གཙོ་ཡོད་ཚུལ་གནང་བ་ལས་དོན་དངོས་ཐོག་དབང་ཆ་གཅིག་བསྡུས་རིང་ལུགས་ ལ་རྒྱབ་སྐྱོར་གནང་བ་མཚོན་སྐོར་གསུངས་པ་མ་ཟད་རྒྱ་ནག་གཞུང་གིས་མང་ཚོགས་ཐོག་སྡུག་རྩུབ་ཀྱི་བྱ་སྤྱོད་དེ་དག་སྤེལ་མཚམས་འཇོག་དགོས་པ་ཐུགས་ཚོར་ཆེན་པོས་ནན་བརྗོད་གནང་འདུགགཞི་རྩའི་ཨི་ཊ་ལིའི་གཞུང་འཛིན་ཚོགས་པའི་གྲོས་ཚོགས་འཐུས་མི་སྐུ་ཞབས་ Matteo Luigi Bianchi ལགས་ནི་བོད་མི་དང་བོད་དོན་ཐོག་རྒྱབ་སྐྱོར་གནང་མཁན་ཞིག་ཡིན་པ་དང་། ལྷག་དོན་སྔ་ལོར་ཁོང་བཞུགས་སྒར་དུ་ཆེད་ཕེབས་ཀྱིས་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐོག་ལྷན་ཞུགས་གནང་ཡོད་པ་མ་ཟད། ཁོང་གིས་ཨི་ཊ་ལིའི་གྲོས་ཚོགས་ནང་དུ་བོད་ཀྱི་གནད་དོན་སྔ་རྗེས་སུ་གླེང་སློང་གིས་ཨི་ཊ་ལའི་གཞུང་ལ་རྒྱ་ནག་གཞུང་གིས་བོད་མིའི་ཐོག་སྤེལ་བའི་བྱ་སྤྱོད་མཐོང་བཞིན་དུ་ཁུམ་སིམ་པོར་བཞུགས་ཐུབ་བམ་ཞེས་འདྲི་རྩད་ནན་པོ་གནང་ཡོད་པ་རེད།

ཁ་སང་ཚེས་ ༡༢ ཉིན་བོད་ཀྱི་ཆབ་སྲིད་བཙོན་པ་གྲགས་ཅན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གིས་བཙན་བཟུང་བྱས་ཏེ་མི་ལོ་ཧྲིལ་པོ་ ༡༣ གྱི་རིང་ལ་མི་སྤྱོད་ལས་འདས་པའི་མནར་གཅོད་བཏང་མཐར་ཕྱི་ལོ་ ༢༠༡༥ ལོར་སྐུ་ཚེ་མ་ཟིན་པར་དགོངས་པ་རྫོགས་ཏེ་ལོ་ལྔ་འཁོར་བའི་ཉིན་མོ་འཁེལ་ཡོད་སྟབས། རིན་པོ་ཆེ་ཁོང་གི་ཚ་མོ་ཉི་མ་ལྷ་མོ་ལགས་ཀྱིས་གཙོས་པའི་བོད་དོན་ལས་འགུལ་ཁང་མང་པོ་ཞིག་གིས་ཁོང་ཉིད་ཀྱི་དགོངས་རྫོགས་དང་འབྲེལ་ནས་སླར་ཡང་ཁོང་གིས་བོད་རིགས་མི་མང་གི་བདེ་དོན་ལ་རླབས་ཆེན་གྱི་ཕྱག་ལས་གནང་ཁག་ལ་བསྔགས་བརྗོད་དང་རྒྱ་ནག་གིས་ཁོང་སྐུ་བཀྲོངས་ཡོད་པར་སྐྱོན་བརྗོད་གནང་ནས་དྲན་གསོ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གི་གསར་གནས་སུ་སྤྲུལ་སྐུལ་བསྟན་འཛིན་བདེ་ལེགས་རིན་པོ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་ཁོང་གི་དགོངས་རྫོགས་དང་འབྲེལ་ནས་བརྙན་ལམ་དུ་ཕུལ་བའི་དྲན་གསོའི་བརྙན་དེ་བཞག་ཡོད་པའི་ཁྲོད་ཉི་མ་ལྷ་མོ་ལགས་ཀྱིས་རིན་པོ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སྐུ་ཚེ་གང་པོ་བོད་མི་རིགས་ཀྱི་ཆོས་དང་རིག་གཞུང་གི་དོན་དུ་སྐུ་ངལ་འཛེམ་མེད་ཀྱིས་ཕྱག་ལས་གནང་ཡོད་པ་ཡོངས་གྲགས་གནང་སྟེ་བོད་དོན་རྒྱབ་སྐྱོར་བའི་ཚོགས་སྐྱིད་ཁག་གིས་རིན་པོ་ཆེ་མཆོག་གཙོས་གཞིས་བཞུགས་བོད་ཀྱི་ཆབ་སྲིད་བཙོན་པ་ཡོངས་ཀྱི་ཆེད་དུ་སྐུ་ལས་བསྐྱོན་ཡོད་པ་ལྟར་ད་དུང་ཡང་དཀའ་ལས་རྒྱག་དགོས་པའི་རེ་སྐུལ་ཞུས་འདུགརྒྱལ་སྤྱིའི་བོད་དོན་འབྲེལ་མཐུད་ཁང་གིས་ཀྱང་རིན་པོ་མཆོག་གིས་བོད་དོན་གྱི་ཆེད་དུ་ཕྱག་ལས་རྒྱ་ཆེར་གནང་ཡོད་པར་ཡོངས་གྲགས་ཀྱིས་འབྲེལ་མཐུད་ཁང་གི་ངོས་ནས་དེ་སྔ་ནས་སྤྲུུལ་སྐུ་བསྟན་འཛིན་བདེ་ལེགས་རིན་པོ་ཆེ་ཡི་སྙིང་སྟོབས་གཟེངས་རྟགས་ཞེས་པ་ཞིག་གསར་གཏོད་ཀྱིས་བོད་དོན་ཆེད་དུ་ཕྱག་ལས་རྒྱ་ཆེར་གནང་མཁན་རྣམས་ལ་གནང་བཞིན་ཡོད་ཀྱང་། འདི་ལོ་ཏོག་དབྱིབས་རིསམ་ནད་ཀྱི་རྐྱེན་གྱིས་གཟེངས་རྟགས་དེ་གནང་མ་ཐུབ་པར་བརྟེན་བོད་མིའི་རང་དབང་དང་འགྲོ་བ་མིའི་ཐོབ་ཐང་གི་ཐད་ལ་ཕྱག་ལས་གནང་མཁན་རྣམས་ལ་ཆེ་བསྟོད་ཞུས་འདུགདེ་བཞིན་ཐེ་ཝན་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་ཀྱང་རིན་པོ་ཆེ་མཆོག་གི་དགོངས་རྫོགས་དང་འབྲེལ་ནས་ཁོང་ཉིད་དྲན་རྟེན་གྱི་རི་མོ་ཞིག་འབྲི་བཞེངས་བརྒྱུད་རིན་པོ་ཆེ་མཆག་ནི་བོད་པའི་སྤྱི་ཚོགས་ཀྱི་ཁྲོད་དུ་ཤེས་ཡོན་སློབ་གསོ་དང་འཕྲོད་བསྟེན། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་ལ་ཐུགས་ཁུར་ཆེན་པོ་གནང་མཁན་ཞིག་ཡིན་པར་བརྟེན་རྒྱ་ནག་དམར་ཤོག་སྲིད་གཞུང་གིས་ཁོང་འཛིན་བཟུང་བྱས་ཏེ་མཐར་བཙོན་ཁང་ནས་བཀྲོངས་ཡོད་པ་ཞིག་ཡིན་སྐོར་དང་བཅས། དམ་པ་གང་གིས་བོད་རིགས་སྤྱི་ཚོགས་ཀྱི་ཆེད་དུ་རླབས་ཆེན་གྱི་མཛད་རྗེས་བཞག་ཡོད་པར་བསྔགས་བརྗོད་ཞུས་འདུགརྩ་བའི་རྒྱ་ནག་གཞུང་གིས་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་མཆོག་ཁྲིན་ཏུའུ་རུ་འབར་རྫས་གས་ཐོར་གྱི་དོན་རྐྱེན་ཞིག་དང་འབྲེལ་བ་ཡོད་པ་བསྙད་ནས་ཕྱི་ལོ་ ༢༠༠༢ ཟླ་ ༤ ཚེས་ ༧ ཉིན་གྱི་དགོང་མོའི་ཆུ་ཚོད་ ༡༢ ཙམ་ལ་གློ་བུར་དུ་འཛིན་བཟུང་བྱས་ཡོད་པ་དང་། དེ་རྗེས་སྲོག་ཁྲིམས་ནས་ཚེ་བཙོན་དུ་འགྱུར་བ་བཏང་སྟེ་བཙོན་ཁང་གི་མནར་གཅོད་འོག་ལོ་ངོ་ ༡༣ རིང་བཞག་མཐར་སྔ་ལོ་ ༢༠༡༥ ཕྱི་ཟླ་ ༧ ཚེས ༡༢ ཉིན་ཁྲིན་ཏུའུ་བཙོན་ཁང་དུ་གློ་བུར་དུ་དགོངས་པ་རྫོགས་པའི་གནས་ཚུལ་བྱུང་ཡོད་པ་དང་། དུས་ད་ལྟའང་སྤྲུལ་སྐུ་བསྟན་འཛིན་བདེ་ལེགས་རིན་པོ་མཆོག་གི་ཤུལ་ལུས་ནང་མི་ཚོ་རྒྱ་ནག་གིས་དམ་དྲག་བྱེད་བཞིན་གནས་སྟངས་ཁྲོད་དུ་ལྷུང་ཡོད་པ་རེད།

ཕྱི་ཟླ་ ༦ ཚེས་ ༣༠ ཉིན་ནས་སུད་སི་གྲོང་ཁྱེར་ཇི་ནི་ཝ་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ འཚོགས་བཞིན་ཡོད་པ་དང་། ཕྱི་ཚེས་ ༡༠ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཚོང་འབྲེལ་སྡེ་ཁག་ཐོག་གི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གི་སྙན་ཐོ་དང་འབྲེལ་བའི་བགྲོ་གླེང་ལས་རིམ་ཐོག་བོད་ནང་རྒྱ་ནག་གི་གཞུང་འབྲེལ་མི་སྣས་ཁྲིམས་འགལ་ཐོག་འབྲོག་ས་བཙན་འཕྲོག་བྱེད་བཞིན་པའི་གནས་སྟངས་སྤྱི་དང་དེ་འབྲེལ་རྒྱ་གཞུང་ལ་ཞི་རྒོལ་གྱིས་གདོང་ལེན་གནང་མཁན་བོད་མི་རྣམས་འཛིན་བཟུང་བཙོན་འཇུག་གིས་ཁྲིམས་ཆད་གཅོད་བཞིན་པའི་གནས་སྟངས་སྙན་སེང་ཞུས་འདུག སྐབས་དེར་སུད་སི་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་ Society  for Threatened People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པའི་མཚན་ཐོག་ནས་བོད་ནང་གི་འབྲོག་པའི་གནས་སྟངས་སྐོར་སྙན་སེང་ཞུས་པ་དང་འབྲེལ། ཉེ་བའི་ཆར་རྒྱ་ནག་གཞུང་གིས་བོད་ནང་འཛུག་སྐྲུན་དང་རྒྱུད་ཅིག་ལམ་གཅིག་གི་ལས་གཞིར་ཁ་གཡར་ནས་ མང་ཚོགས་སྤྱི་དང་སྒོས་འབྲོག་པ་ཚོའི་རྩྭ་ས་བཙན་འཕྲོག་གིས་གྲོང་ཁྱེར་ནང་གནས་སྤོས་བྱེད་བཅུག་ པའི་གནས་སྟངས་དང་། དེ་བཞིན་ས་ཆ་བཙན་འཕྲོག་གི་གནད་དོན་དང་འབྲེལ་བའི་ཐོག་ནས་རྒྱ་ནག་གཞུང་ལ་ཞི་རྒོལ་དང་གདོང་ལེན་གནང་མཁན་ཚོ་འཛིན་བཟུང་བཀག་ཉར་དང་མནར་གཅོད། བོད་མི་དེ་དག་ལ་རྒྱལ་ཁབ་ཁ་བྲལ་གྱི་ནག་ཉེས་གཡོགས་ནས་བཙོན་འཇུག་གི་ཁྲིམས་ཐག་གཅོད་བཞིན་ཡོད་པ་སྙན་སེང་ཞུས་འདུག ལྷག་པར་དུ་འདས་ལོ་ནང་བོད་མགོ་ལོག་ཁུལ་ནས་རྒྱ་གཞུང་གིས་འབྲོག་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ཨ་ཉ་སེང་སྒྲ་ལགས་སུ་རྒྱ་གཞུང་གིས་སྤྱི་བདེ་ཉེན་རྟོག་དང་གཞུང་། དེ་བཞིན་ཁྲིམས་ཁང་ངན་པ་ལག་འབྲེལ་གྱིས་ཁོང་འཛིན་བཟུང་བཀག་ཉར་དང་མནར་གཅོད། དེ་བཞིན་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ནག་ཆེན་ས་ཁུལ་ནས་སྔ་རྗེས་སུ་རྒྱ་ནག་གཞུང་གི་རྩྭ་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ ༣༠ བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཡང་ལུང་འདྲེན་གནང་ཡོད་པ་རེད། ཁོང་གིས་ལྷན་ཚོགས་ཐོག་རྒྱལ་ཚོགས་ཀྱི་ངོས་ནས་རྒྱ་གཞུང་ལ་གནོན་ཤུགས་ཀྱིས་ཨ་ཉག་སེང་སྒྲ་ལགས་ཀྱིས་གཙོས་པའི་བོད་མི་བཙོན་པ་གཞན་རྣམས་གློད་བཀྲོལ་ཡོང་བའི་འབོད་སྐུལ་ཞུས་པ་དང་འབྲེལ། རྒྱལ་ཚོགས་ཀྱིས་རྒྱ་ནག་གི་གཞུང་འབྲེལ་སྡེ་ཁག་ནས་ངན་པ་ལག་འབྲེལ་གྱིས་བོད་ནང་གི་མང་ཚོགས་ཀྱི་ས་ཆ་འཕྲོག་བྱེད་བཞིན་པའི་བྱ་སྤྱོད་དེ་དག་འཕྲལ་མར་མཚམས་འཇོག་བྱེད་རྒྱུའི་དུས་ལ་བསླེབས་སོང་ཞེས་གསུངས་འདུགཉེ་ཆར་རྒྱལ་ཚོགས་ཁྱད་ལས་མི་སྣ་ ༤༩ ནས་རྒྱ་ནག་གཞུང་གིས་བོད་དང་ཧོང་ཀོང་། དེ་བཞིན་ཤར་ཏུ་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་རྒྱལ་ཁབ་ཁག་ལ་རྒྱ་ནག་ཐོག་དམིགས་བསལ་ཚོགས་དུས་བསྐོང་ཚོགས་གནང་དགོས་པའི་རེ་འདུན་གནང་ཁག་དོན་འཁྱོལ་ཕྱག་བསྟར་ཡོང་བའི་འབོད་སྐུལ་བསྐྱར་ནན་ཞུས་ཡོད་པ་རེད། རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་འདུག་པ་མ་ཟད། དེ་བཞིན་ཚོགས་་འདུ་མང་དག་ཅིག་དྲྭ་ལམ་ཐོག་ཚོགས་ཀྱི་ཡོད་པ་རེད།

ད་ལྟའི་ཆར་ས་མཚམས་དང་ཚོང་འབྲེལ། དེ་བཞིན་ཏོག་དབྱིབས་རིམ་ནད། འགྲོ་བ་མིའི་ཐོབ་ཐང་སོགས་གནད་དོན་དུ་མ་དང་འབྲེལ་ནས་རྒྱ་ནག་གཞུང་ལ་གནོན་ཤུགས་ཆེན་པོ་སྤྲོད་བཞིན་པ་དང་བསྟུན་ཁ་ཉིན་རེས་གཟའ་སྤེན་པའི་ཉིན་བོད་རང་བཙན་ལས་འགུལ་བ་གསུམ་གྱིས་རྒྱ་ནག་གཞུང་ཚབ་མདུན་དུ་རྒྱ་ནག་གྱི་རྒྱལ་དར་མེར་བསྲེགས་བཏང་བ་སོགས་ཀྱི་ལས་འགུལ་སྤེལ་འདུགརྒྱལ་ས་ལྡི་ལིར་གནས་བཞུགས་བོད་རང་བཙན་ལས་འགུལ་བ་རྡོ་རྗེ་བཀྲིས་ལགས་དང་མིག་དམར་ཚེ་རིང་ལགས། ལེགས་ལྡན་ལགས་བཅས་ཀྱིས་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་རྒྱ་ནག་གི་རྒྱལ་དར་མེར་སྲེག་བཞིན་བོད་རང་བཙན་གཙང་མ་ཡིན། བོད་རང་བཙན་རྒྱ་གར་གྱི་བདེ་འཇགས་རེད། རྒྱ་ནག་གི་ཅ་དངོས་བེད་སྤྱོད་གནང་རྒྱུ་མེད། བོད་མི་རྣམས་རྒྱ་གར་གྱི་དམག་མི་དང་མི་མང་ཚོ་དང་མཉམ་དུ་ཡོད་ཅེས་སོགས་ཀྱི་འབོད་ཚིག་བསྒྲགས་ཏེ་རྒྱ་ནག་གཞུང་ལ་ངོ་རྒོལ་གནང་འདུག སྐབས་དེའི་ལས་འགུལ་ཁྲོད་ཁོང་རྣམ་པ་ས་གནས་རྒྱ་གར་ཉེ་རྟོག་པས་འཛིན་བཟུང་གིས་ Chanakyapuri ཉེན་རྟོག་ལས་ཁུངས་སུ་བཙོན་འཇུག་རྗེས་གློད་བཀྲོལ་བཏང་འདུག བོད་རང་བཙན་ལས་འགུལ་བ་རྡོ་རྗེ་བཀྲིས་ལགས་ཀྱིས་ད་ལྟའི་ཆར་ཏོག་དབྱིབས་རིམ་ནད་དང་ས་མཚམས་གནད་དོན། དེ་བཞིན་ཧོང་ཀོང་གི་བདེ་འཇགས་ཁྲིམས་གཞི་གཏན་འབེབས་དང་འབྲེལ་རྒྱལ་སྤྱིའི་ངོས་ནས་རྒྱ་ནག་ལ་གཟིགས་སྟངས་ཡག་པོ་མེད་པ་མ་ཟད། ཆབ་སྲིད་ཀྱི་འཁོར་ཡུག་འཁྲུག་པོ་ཞིག་ཆགས་ཡོད་པར་བརྟེན་བོད་མིའི་ངོས་ནས་ནང་ཁུལ་གྱི་ལྟ་སྤྱོད་སོགས་ལ་དབུ་མ་འཁོར་བར་གོ་སྐབས་དམ་འཛིན་གྱིས་ལས་འགུལ་སྤེལ་དགོས་གལ་ཡིན་པ་གསུངས་སོང་།  དེ་བཞིན་ཁ་ཉིན་ཡོ་རོབ་རྒྱལ་ཁབ་ཕ་རན་སིའི་རྒྱལ་ས་ Paris ནང་དུ་ནེ་ཇོང་ཀོང་གི་སློབ་ཕྲུག་དང་འགྲོ་བ་མིའི་ཐོབ་ཐང་རྒྱབ་སྐྱོར་བ་སོགས་ནས་ཉེ་ཆར་རྒྱ་ནག་གཞུང་གིས་ཧོང་ཀོང་རང་སྐྱོང་གི་གནས་བབས་ལ་ཐེ་བྱུས་དང་། ལྷག་པར་དུ་ཧོང་ཀོང་གི་བདེ་འཇགས་ཁྲིམས་གཞི་གཏན་འབེབས་བྱས་པར་ངོ་རྒོལ་དང་སྦྲགས། གོམ་བགྲོད་གནང་སྟེ་ཞི་རྒོལ་སྐད་འབོད་གནང་འདུག་པ་དང་། དེའི་ནང་ས་གནས་བོད་རང་བཙན་སློབ་ཕྲུག་ཚོགས་པའི་ཚོགས་མི་དང་བོད་དོན་རྒྱབ་སྐྱོར་བ་སོགས་ནས་མཉམ་ཞུགས་གནང་འདུགཁ་སང་རེས་གཟའ་ཉི་མའི་ཉིན་ཉི་ཧོང་ཡུ་གུར་ཚོགས་པ་དང་ཉི་ཧོང་ཧོང་ཀོང་རྒྱབ་སྐྱོར་ཚོགས་པ་གཉིས་ཀྱིས་གོ་སྒྲིགས་ཐོག་ཉི་ཧོང་གི་རྒྱལ་ས་ Tokyo ནང་དུ་ཧོང་ཀོང་བསྐྱར་གསོ་བྱེད་དགོས། ཐེ་ཝན་རྒྱ་ནག་དང་ཟླ་སྒྲིལ་གཏོང་རྒྱུའི་བསམ་བློ་དོར་དགོས། མནར་གཅོད་དང་བཙན་གནོན་རིགས་མཚམས་འཇོག་དགོས་པ་སོགས་ཀྱི་ཕྲེད་དར་དང་འབོད་ཚིག་སྒྲོག་བཞིན་རྒྱ་གཞུང་ལ་ངོ་རྒོལ་དྲག་པོ་གནང་འདུག སྐབས་དེའི་ལས་འགུལ་ནང་ས་གནས་མི་མང་དང་བོད་མི། ཡུ་གུར་བ། ནེ་ཇོང་ཀོང་དང་ཐེ་ཝན། ནང་སོག་བཅས་ཀྱི་མི་སེར་རྣམས་མཉམ་ཞུགས་གནང་འདུགདེ་འབྲེལ་གསར་འགོད་བསྒྲགས་གཏམ་སྤེལ་བར་ཉེ་ཆར་གཏན་འབེབས་བྱས་པའི་ཧོང་ཀོང་གི་བདེ་འཇགས་ཁྲིམས་གཞི་དེ་ངོས་ལན་མེད་པ་དང་ད་ཆ་རྒྱ་གཞུང་གི་སྲིད་བྱུས་འོག་ཧོང་ཀོང་དང་ཤིན་ཅང་ཙམ་མ་ཟད་བོད་དང་ནང་སོག་ཁུལ་གྱི་མང་ཚོགས་རྣམས་ཀྱང་དཀའ་ངལ་ཆེན་པོ་འཕྲད་བཞིན་པ་སོགས་འགྲེལ་བརྗོད་དང་། མང་གཙོ་དང་འགྲོ་བ་མིའི་ཐོབ་ཐང་ལ་གུས་བརྩི་དང་དགའ་ཞེན་ཆེ་བའི་རྒྱལ་སྤྱིའི་མང་ཚོགས་ནས་ཆིག་སྒྲིག་ཐོག་རྒྱ་ནག་ལ་ངོ་རྒོལ་གནང་དགོས་པ་སོགས་གསུངས་འདུགགཞི་རྩའི་ད་ཆར་རྒྱལ་སྤྱིའི་ཁྱོན་དུ་རྒྱ་ནག་གཞུང་གི་བྱེད་བབས་ལ་ངོ་རྒོལ་སྐད་འབོད་སོགས་ཀྱི་ལས་འགུལ་དུ་མ་སྤེལ་བཞིན་པ་ལྟར། ཉེ་ཆར་ཕྱི་ཚེས་ ༡༠ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་བཀོད་ཁྱབ་འོག་བཞུགས་སྒར་གཙོས་རྒྱལ་སྤྱིའི་ཁྱོན་དུ་ཉིན་བརྒྱ་དུས་གཅིག་ལ་རྒྱ་ནག་གི་ཅ་དངོས་ཉོ་ཚོང་མཚམས་འཇོག་དགོས་པའི་གཞི་རྒྱ་ཆེ་བའི་ལས་འགུལ་ སྤེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་དཀར་ནག་གཉིས་དབར་ལོ་རྒྱུས་ཀྱི་ཐོག་ནས་འབྲེལ་བ་ཡོད་པ་མ་ཟད་དུས་ད་ལྟའང་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར། རྒྱལ་ཁབ་ཕྱོགས་གཉིས་ཀའི་ངོས་ནས་མཐའ་མཚམས་སྲུང་སྐྱོབ་ལ་འགྲོ་གྲོན་ཕོན་ཆེན་པོ་བཏང་བ་ལས་ཕན་ཚུན་ཞི་བདེ་མཉམ་གནས་གོང་འཕེལ་སླད་འགྲོ་གྲོན་མང་ཙམ་གཏང་དགོས་པར་ལམ་སྟོན་བསྩལ་བ་དང་སྦྲགས། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགཁ་སང་ Time བརྒྱུད་ལམ་གྱིས་གོ་སྒྲིགས་གནང་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཏོག་དབྱིབས་རིམས་ནད་ཀྱི་གནས་སྟངས་ཁྲོད་སེམས་ཞི་བར་གནས་ཐབས་དང་ཨ་རི་གཙོས་འཛམ་གླིང་ནང་མི་རིགས་དབྱེ་འབྱེད་ཀྱི་དཀའ་ངལ། དེ་བཞིན་ཁོར་ཡུག་དང་རྒྱ་དཀར་ནག་གཉིས་དབར་ས་མཚམས་དང་འབྲེལ་དཀའ་རྙོག་བཅས་ཀྱི་གནད་དོན་ཐོག་བཀའ་འདྲི་དགོངས་སྐོར་ཁག་ཅིག་ཞུས་ཡོད་པ་དང་། ༸གོང་ས་མཆོག་གིས་རྒྱ་དཀར་ནག་གཉིས་དབར་ས་མཚམས་རྩོད་རྙོག་དང་འབྲེལ་བའི་བཀའ་འདྲིར་རྒྱ་གར་དང་རྒྱ་ནག་གཉིས་ཀ་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་ཡིན་པ་དང་། དེ་བཞིན་གཅིག་ནི་མང་གཙོའི་རྒྱལ་ཁབ་དང་གཞན་དེ་དམར་ཤོག་རྒྱལ་ཁབ་ཡིན་པའི་ཆ་ནས་ཕན་ཚུན་འགྲན་བསྡུར་བཅས་ཀྱི་ཁྲོད་རྒྱལ་ཁབ་ནང་ཁུལ་ལ་རྩོད་རྙོག་ཕྲན་བུ་ཡོང་སྲིད་ཀྱང་། ལོ་རྒྱུས་ལ་བལྟས་ནས་རྒྱ་ནག་དེ་ནང་པའི་རྒྱལ་ཁབ་ཅིག་དང་རྒྱ་གར་ནི་བདག་ཅག་གི་སྟོན་པ་བཅོམ་ལྡན་འདས་གང་ཉིད་༸སྐུ་འཁྲུངས་སའི་ཞིང་ཁམས་ཆགས་ཀྱི་ཡོད་པ་ལྟར་སངས་རྒྱས་ཀྱི་ཆོས་བོད་སྒྱུར་མ་གནང་གོང་དུ་རྒྱ་སྐད་ནང་བསྒྱུར་ཟིན་པ་སོགས་བཀའ་བསྩལ་ཏེ་རྒྱལ་ཁབ་ཕྱོགས་གཉིས་དབར་ཡུན་རིང་ནས་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར་དུས་ད་ལྟའང་རྒྱ་ནག་གི་ནང་པ་མང་པོ་ལོ་ལྟར་རྒྱ་གར་གྱི་གནས་མཆོག་རྡོ་རྗེ་གདན་ལ་གནས་སྐོར་དུ་ཡོང་བཞིན་ཡོད་པ་སོགས་ལུང་འདྲེན་དང་འབྲེལ། གང་ལྟར་ཕན་མཚུན་མཉམ་གནས་གནང་དགོས་གལ་ཡིན་སྟབས་རྒྱལ་ཁབ་ཕྱོགས་གཉིས་ཀའི་ངོས་ནས་ས་མཚམས་སྲུང་སྐྱོབ་ཆེད་དུ་འགྲོ་གྲོན་ཕོན་ཆེ་བཏང་བ་ལས་ཕན་མཚུན་ཞི་བདེའི་ངང་མཉམ་གནས་ཐུབ་ཐབས་དང་ཡར་རྒྱས་ཀྱི་ཆེད་དུ་འགྲོ་གྲོན་བཏང་དགོས་པ་དང་། ལྷག་པར་དུ་དེ་སྔ་ ། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགདེ་བཞིན་དེང་སྐབས་ཨ་རི་ནང་མི་རིགས་ནག་པོའི་གནད་དོན་དང་འབྲེལ་མི་རིགས་དབྱེ་འབྱེད་ཀྱི་ངལ་བ་འཕྲད་བཞིན་སྐོར་དང་འབྲེལ་བཀའ་འདྲི་ཞུས་པར་མི་རིགས་དབྱེ་འབྱེད་ཀྱི་དཀའ་ངལ་ཡོང་དང་མི་ཡོང་ཞེས་པ་དེ་གང་ཟག་སྒེར་གྱི་ཕྱག་ཏུ་ཡོད་པ་དང་། གཞུང་གི་ངོས་ནས་མང་ཚོགས་ཀྱི་བསམ་བློར་དོ་སྣང་གནང་སྟེ་དེ་འབྲེལ་ངལ་བ་མི་འཕྲད་པར་ཐུགས་ཁུར་བཞེས་གནད་ཡིན་པ་བཀའ་བསྩལ་བ་དང་ཆབས་ཅིག དེང་སྐབས་མང་གཙོའི་དུས་རབས་ཤིག་ཡིན་སྟབས་མང་ཚོགས་ལ་ཐག་གཅོད་གནང་རྒྱུའི་འགན་དབང་ཡོད་པ་བཞིན་ནང་སེམས་ཀྱི་སློབ་སྦྱོང་ཡོད་པའི་ཐོག་ནས་མཐར་མང་ཚོགས་ནས་ཐག་གཅོད་གནང་རྒྱུ་ཡིན་པ་བཀའ་བསྩལ་འདུག༸གོང་ས་མཆོག་གིས་མགོན་པོ་༸གང་ཉིད་མཆོག་ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཀྱི་མེད་ཀྱང་བོད་ཀྱི་ཐུན་མོང་མ་ཡིན་པའི་ཆོས་རིག་དང་བོད་ཀྱི་ཁོར་ཡུག་སྲུང་སྐྱོབ་ཀྱི་གནད་དོན་དེ་དག་ཐུགས་བསྐྱེད་བཞིའི་ཁོངས་ནས་གཅིག་ཡིན་པ་ལྟར་ཐུགས་འགན་བཞེས་ཀྱི་ཡོད་པར་བརྟེན་བོད་དེ་འཛམ་གླིང་སྤྱི་ཡོངས་ཀྱི་ཁོར་ཡུག་གནས་སྟངས་དང་འབྲེལ་བ་ཆེན་པོ་ཡོད་པ་མ་ཟད། ལྷག་དོན་ཨེ་ཤ་ཡའི་གླིང་ཆེན་གྱི་ཐུང་ཆུའི་མཛོད་ལྟ་བུ་ཡིན་སྟབས་འཛམ་གླིང་གི་ངོས་ནས་བོད་ཀྱི་ཁོར་ཡུག་གནད་དོན་ཐོག་ཐུགས་སྣང་ཆེ་ཙམ་གནང་དགོས་པ་བཀའ་བསྩལ་འདུགམགོན་པོ་མཆོག་གིས་ད་དུང་དེང་སྐབས་ཏོག་དབྱིབས་རིམས་ནད་ཁྱབ་གདལ་གྱི་ཆེས་ཛད་དྲག་གི་གནས་སྟངས་དང་འབྲེལ། རང་སྲོག་ལ་ལྟོས་མེད་ཀྱིས་འགྲོ་བ་མིའི་ཚེ་སྲོག་སྐྱོབ་མཁན་གྱི་སྨན་པ་དང་སྨན་ཞབས་རྣམས་ཀྱི་ཕྱག་ལས་ལ་ཡི་རང་བསྔགས་བརྗོད་མཛད་པ་དང་། དེ་སྔ་དུས་རབས་བརྒྱད་པའི་ནང་བོད་དུ་ཕེབས་པའི་རྒྱ་གར་གྱི་མཁས་གྲུབ་ཚོས་གལ་ཏེ་བཅོས་སུ་ཡོད་ན་དེར་ཧུར་བརྩོན་ཆེན་པོས་འབད་དགོས་པ་དང་། གལ་ཏེ་བཅོས་རྒྱུ་མེད་ཚེ་དེར་འབད་དོན་མེད་ཅེས་གསུངས་པ་ལྟར་དཀའ་ངལ་དེ་སེལ་རྒྱུ་ཡོད་ཚེ་ཧུར་བརྩོན་གནང་དགོས་པ་དང་དེ་ལྟར་མེད་ཚེ་དེའི་ཐོག་ངལ་བ་དང་སེམས་ཁྲལ་གནང་བ་དོན་མེད་ཡིན་པས་ཚང་མས་རེ་བ་མ་བརླག་པར་བཟང་ཕྱོགས་ཀྱི་ཐོག་ནས་དགོངས་པ་བཞེས་ནས་ངལ་བ་དག་ལ་གདོང་ལེན་གནང་དགོས་ཞེས་ལམ་སྟོན་མཛད་འདུགརྩ་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་རྒྱལ་སྤྱིའི་ཁྲོད་ཀྱི་ཆབ་སྲིད་མི་སྣ་དང་འགྲོ་བ་མིའི་ཐོབ་ཐང་ལས་འགུལ་བ་གྲགས་ཅན། དེ་བཞིན་ཁོར་ཡུག་ལས་འགུལ་བ། མི་རིགས་འདྲ་མཉམ་གྱི་ཐོབ་ཐང་རྩོད་ལེན་པ་སོགས་མི་སྣ་གྲགས་ཅན་ ༡༠༠ ཙམ་གདན་ཞུ་ཐོག་འཛམ་གླིང་ཞི་བདེ་ལྡན་པ་དང་མཉམ་གནས་ཐུབ་ཐབས་བསྐྲུན་གནད་སོགས་ཀྱི་བརྗོད་གཞིའི་ཐད་བཀའ་བསྡུར་གནང་ཡོད་པ་རེད།

ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ནས་ཉིན་གཉིས་སོང་མཚམས་སུ་ཨ་རི་གཞུང་ནས་ཡུ་གུར་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་སྲིད་བྱུས་དང་འབྲེལ་བ་ཡོད་པའི་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་གསལ་བསྒྲགས་གནང་འདུགཁ་སང་ཕྱི་ཚེས་ ༩ ཉིན་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་པ་གསུངས་འདུག མིང་མངོན་གསལ་གནང་བའི་རྒྱ་ནག་གི་དཔོན་རིགས་བཞི་པོ་ནི་དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཡིན་པ་རེད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁལེ་འདུག གནད་དོན་དེ་དང་འབྲེལ་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཨ་རིའི་ངོས་ནས་རྒྱ་ནག་གཞུང་གིས་ཤིང་ཅང་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཐད་ནམ་ཡང་ཁ་ཁུ་སིམ་པོ་བཞུགས་རྒྱུ་མིན་པ་དང་ལྷག་པར་དུ་དམར་ཤོག་ཚོགས་པའི་དྲུང་ཆེ་ Chen Quanguo ཡིས་ད་ལྟ་ཤིན་ཅང་ནང་ཙམ་མ་ཟད་དེ་སྔ་བོད་ནང་དྲག་པོའི་སྲིད་བྱུས་མང་དག་ཅིག་ལག་བསྟར་བརྒྱུད་བོད་མིའི་འགྲོ་བ་མིའི་ཐོབ་ཐང་སོགས་ལ་རྡོག་རོལ་མང་པོ་བཏང་མྱོང་མཁན་ཞིག་རེད་ཅེས་གསུངས་འདུགཨ་རིའི་ནོར་སྲིད་སྤྱི་ཁྱབ་ལྷན་ཁང་གི་དྲུང་ཆེ་སྐུ་ཞབས་ Steven Mnuchin ལགས་ནས་ཨ་རིའི་ངོས་ནས་དཔལ་འབྱོར་གྱི་ནུས་ཤུགས་ཡོད་ཚད་ཆེད་འདོན་གྱིས་ཤིན་ཅང་གཙོས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་རྡོག་རོག་གཏང་མཁན་རྣམས་འགན་ཁུར་ལྡན་པ་ཞིག་བཟོ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་འདུག གཞི་རྩའི་ད་རེས་ཨ་རི་གཞུང་ནས་རྒྱ་ནག་གི་དཔོན་རིགས་ཐོག་ཕྱག་བསྟར་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་ཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་ཕྱི་ལོ་ ༢༠༡༢ ལོར་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Ben Cardin ལགས་ཀྱིས་གྲོས་ཚོགས་སུ་འདོན་སྤེལ་གནང་རྗེས་ཕྱི་ལོ་ ༢༠༡༦ ཕྱི་ཟླ་ ༡༢ ནང་གྲོས་ཚོགས་སུ་གཏན་འབེབས་དང་། དེ་ནས་ཕྱི་ལོ་ ༢༠༡༧ ལོར་ཨ་རིའི་སྲིད་འཛིན་མཆོག་གིས་མཚན་རྟགས་བསྐྱོད་ནས་ཁྲིམས་སུ་བཅད་པ་ཞིག་ཡིན་པ་དང་། ཁྲིམས་གཞི་དེའི་འོག་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་ཁག་ཅིག་མིང་མངོན་གསལ་གྱིས་ཉེས་ཆད་བཅད་པ་ཆེས་ཐོག་མ་ཆགས་ཀྱི་ཡོད་པ་རེད།

ཨོ་སི་ཊོ་ལི་ཡའི་སྲིད་བློན་སྐུ་ཞབས་ Scott Morrison ལགས་ཀྱིས་རྒྱ་ནག་གིས་ཧོང་ཀོང་གི་བདེ་འཇགས་ཁྲིམས་གཞི་ཞེས་པ་ཞིག་གསར་དུ་ལག་བསྟར་བྱེད་བཞིན་པ་དེ་ནི་ཧོང་ཀོང་གི་གཞི་རྩའི་བཅའ་ཁྲིམས་དང་ཡོངས་སུ་འགལ་བ་མ་ཟད་ཁུལ་དེའི་རང་སྐྱོང་གི་གནས་བབས་ལ་དོ་ཕོག་ཆེན་པོ་བཏང་ཡོད་པ་འགྲེལ་བརྗོད་དང་སྦྲགས། ཨོ་གླིང་གི་ངོས་ནས་ཧོང་ཀོང་དང་ཉེས་ཅན་རྩིས་སྤྲོད་ཀྱི་ཆིངས་ཡིག་བརྩི་མེད་བཏང་བ་དང་། ཨོ་སི་ཊོ་ལི་ཡའི་ནང་ཡོད་པའི་ཧོང་ཀོང་མང་ཚོགས་ཀྱི་མཐོང་མཆན་དུས་འགྱངས་དང་ཚོང་གཉེར་བ་རྣམས་ཨི་གླིང་དུ་འཚོ་བ་བསྐྱར་འཛུགས་གནང་རྒྱུར་རྒྱབ་སྐྱོར་གནང་རྒྱུའི་འཆར་གཞི་ཡོད་སྐོར་གསུངས་འདུགཨོ་སི་ཊོ་ལི་ཡའི་ནང་གི་རྒྱ་ནག་གཞུང་ཚབ་ཁང་གིས་ཨོ་སི་ཊོ་ལི་ཡའི་གཞུང་གིས་གནང་སྟངས་དེ་ནི་རྒྱ་ནག་རྒྱལ་ནང་གི་གནད་དོན་ལ་ཐད་བྱུས་གནང་བར་སྐྱོན་བརྗོད་བྱས་པ་དང་ལྷག་དོན་ཨོ་གླིང་གཞུང་གིས་འཕྲལ་མར་དེ་ལྟར་གནང་མཚམས་འཇོག་དགོས་པའི་སྐུལ་མ་བྱས་འདུག རྩ་བའི་རྒྱ་ནག་གཞུང་གིས་ཧོང་ཀོང་གི་བདེ་འཇགས་ཁྲིམས་གཞི་ཟེར་བ་དེ་གཟའ་འཁོར་སྔོན་མའི་ནང་ཁྲིམས་སུ་བཅད་པ་ནས་བཟུང་ཨོ་སི་ཊོ་ལི་ཡ་ཙམ་མིན་པར་ཁེ་ན་ཌ་གཞུང་ངོས་ནས་ཀྱང་ཁྲིམས་གཞི་དེར་སེམས་འཚབ་དང་བཅས་ཧོང་ཀོང་དང་ཉེས་ཅན་པ་སྤྲོད་ལེན་གྱི་ཆིངས་ཡིག་བརྩི་མེད་བཏང་བ་མ་ཟད། དབྱིན་ཡུལ་གྱི་སྲིད་བློན་ Boris Johnson མཆོག་གིས་ཀྱང་རྒྱ་ནག་གིས་ཧོང་ཀོང་གི་ནང་དུ་བདེ་འཇགས་ཀྱི་ཁྲིམས་གཞི་ཞེས་པ་དེ་ལག་བསྟར་བྱས་ན་རྒྱལ་ཁབ་གཅིག་ལ་ལམ་ལུགས་གཉིས་ཀྱི་གཞི་རྩའི་ཧོང་ཀོང་གི་རང་སྐྱོང་གི་གནས་བབ་ལ་དོ་ཕོག་ཆེན་པོ་འགྲོ་ངེས་ཡིན་སྟབས་དབྱིན་གཞུང་གིས་ཧོང་ཀོང་གི་མི་སེར་ས་ཡ་གསུམ་མ་ཟིན་ཙམ་ཡུལ་དེར་གཏན་སྡོད་བྱེད་ཆོག་པ་དང་རིམ་བཞིན་མི་སེར་བཞེས་རྒྱུའི་ཐོབ་ཐང་གནང་རྒྱུ་ཡིན་པ་གསུངས་ཡོད་པ་རེད།ཧོང་ཀོང་གི་ས་གནས་གཞུང་གི་ངོས་ནས་བདེ་འཇགས་ཀྱི་ཁྲིམས་གཞི་དེ་ནི་ཁུལ་དེའི་ནང་གི་བརྟན་ལྷིང་སྲུང་ཆེད་དགོས་ངེས་ཅན་ཞིག་ལ་ངོས་འཛིན་བྱེད་བཞིན་ཡོད་ཀྱང་། དཔྱད་ཞིབ་པ་རྣམས་ཀྱིས་ཁྲིམས་གཞི་དེའི་བརྒྱུད་རྒྱུན་དུ་རྒྱ་ནག་གཞུང་ལ་ངོ་རྒོལ་བྱེད་མཁན་དང་གཞུང་གི་ལྟ་སྤྱོད་དང་མི་མཐུན་མཁན་དག་ལ་ཉེས་ཆད་འགེལ་སླ་བ་ཆགས་ཡོད་སྐོར་གསུངས་པ་མ་ཟད། ད་ལྟའི་ཆར་ཁྲིམས་གཞི་དེའི་ནང་དོན་ཆ་ཚང་གསལ་ཁ་མེད་ཀྱང་ཁྲིམས་གཞི་དེའི་བརྒྱུད་ཕྱི་མི་དག་ཧོང་ཀོང་ནང་ཁྲིམས་མེད་ལུགས་མེད་ཀྱིས་དོ་དམ་བྱེད་ཐབས་ལ་སྤྱོད་སྲིད་པར་ཚོད་དཔག་གནང་བཞིན་པ་ལྟར། ད་ཆ་ཨོ་སི་ཊོ་ལི་ཡའི་གཞུང་དང་རྒྱལ་ཁབ་གཞན་ཁག་གཅིག་གིས་ཧོང་ཀོང་ནང་དུ་གནས་བཞུགས་ཡུལ་དེ་གའི་མི་སེར་རྣམས་ལ་ཡིད་གཟབ་གནང་དགོས་པའི་གཞེན་སྐུལ་གནང་དང་གནང་མུས་ཡིན་པ་རེད། གཞན་ཡང་ནིའུ་ཛར་ལན་ཌི་གཞུང་གི་ཕྱི་སྲིད་བློན་ཆེན་སྐུ་ཞབས་ Peters ལགས་ཀྱིས་རེས་གཟའ་ཕུར་བུ་ཉིན་ཧོང་ཀོང་བདེ་འཇགས་ཀྱི་ཁྲིམས་གཞི་ཞེས་པ་དེར་ཧ་ཅང་གི་ཐུགས་འཁུར་ཡོད་ཅེས་གསུངས་པ་མ་ཟད་ New Zealand གཞུང་གི་ངོས་ནས་མུ་མཐུད་ཁྲིམས་གཞི་དེས་ཧོང་ཀོང་མང་ཚོགས་རྣམས་ལ་ཤུགས་རྐྱེན་ནམ་གནོན་ཤུགས་གང་ཐེབས་ཐོག་གཟིགས་རྟོག་ནན་པོ་གནང་གི་ཡིན་ཞེས་གསུངས་འདུག གཞི་རྩ་འི་ཨོ་གླིང་གཞུང་དང་ཧོང་ཀོང་དབར་གྱི་ཉེས་ཅན་རྩིས་སྤྲོད་དང་འབྲེལ་བའི་ཆིངས་ཡིག་ལོ་ངོ་བཅུའི་གོང་ནས་ཡོད་པ་ཞིག་ཆགས་ཀྱི་ཡོད་པ་རེད། ཨོ་གླིང་གཞུང་གི་ངོས་ནས་ད་རེས་ཆིངས་ཡིག་དེ་བརྩི་མེད་བཏང་བ་དང་འབྲེལ། ཡུལ་དེར་གནས་བཞུགས་ཧོང་ཀོང་གི་མང་ཚོགས་ཆིག་ཁྲི་ལྷག་ལ་ལོ་ལྔའི་རིང་མཐོང་མཆན་དུས་འགྱངས་དང་འབྲེལ་རིམ་པས་མི་སེར་གྱི་མཐུན་རྐྱེན་གནང་རྒྱུའི་ལམ་ཕྱོགས་བཟོས་ཡོད་པ་རེད།  

ཁ་ཉིན་ཕྱི་ཚེས་ ༧ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་དེ་སྔ་ ༢༠༡༨ ལོར་ཡུལ་དེའི་གྲོས་ཚོགས་གོང་འོག་གཉིས་སུ་གཏན་འབེབས་གནང་རྗེས་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཨ་རིའི་ཁྲིམས་སུ་གཏན་ལ་ཕབ་པའི་Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།གནད་དོན་དེ་དང་འབྲེལ་ཁ་སང་རྒྱ་ནག་གཞུང་འབྲེལ་གྱི་ཉིན་རེའི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ཨ་རིས་བོད་དང་འབྲེལ་རྒྱ་ནག་རྒྱལ་ནང་གི་གནད་དོན་ལ་ཐད་བྱུས་གནང་རྒྱུ་ངེས་པར་དུ་མཚམས་འཇོག་བྱས་ཏེ་ཨ་རི་དང་རྒྱ་ནག་གཉིས་ཀྱི་འབྲེལ་བ་བཟང་དུ་གཏང་རྒྱུར་དོ་སྣང་གནང་དགོས་ཞེས་བརྗོད་པ་དང་ཆབས་ཅིག ཨ་རིས་བོད་ཀྱི་གནད་དོན་དང་འབྲེལ་རྒྱ་ནག་གི་དཔོན་རིགས་ཚོ་ཨ་རི་ནང་བསྐྱོད་རྒྱུའི་མཐོང་མཆན་གནང་རྒྱུ་མིན་སྐོར་བརྗོད་པ་དེར་རྒྱ་ནག་ཕྱོགས་ནས་ཀྱང་བོད་དོན་འབྲེལ་བ་དམ་ཟབ་ཡོད་པའི་ཨ་རིའི་གཞུང་འབྲེལ་མི་སྣ་དང་མི་སྒེར་རྣམས་རྒྱ་ནག་དང་བོད་ནང་ཕེབས་རྒྱུར་དམ་དྲག་བྱེད་ངེས་ཡིན་ཞེས་ལན་འདེབས་བྱས་འདུགཁོ་པས་ད་དུང་རྒྱ་ནག་གི་ངོས་ནས་བོད་འདི་རྒྱལ་སྤྱིའི་གཞུང་ཚབ་དང་ཡུལ་སྐོར་སྤྲོ་འཆམ་པ་ཚོར་དུས་རྟག་ཏུ་སྒོ་ཕྱེ་ཡོད་པ་མ་ཟད་ཕྱི་ལོ་ ༢༠༡༥ ནས་ ༢༠༡༨ བར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁོ་ནའི་ནང་གཞུང་ཚབ་པ་དང་ཡུལ་སྐོར་སྤྲོ་འཆམ་པ་ ༡༧༦༠༠༠  ལྷག་བཏང་ཡོད་པར་འགྲེལ་བརྗོད་དང་སྦྲགས། ད་རེས་ཨ་རིས་ཕྱག་བསྟར་གནང་རྒྱུའི་ཁྲིམས་འཆར་དེ་ནི་གནང་སྟངས་ཡག་པོ་ཞིག་མིན་པ་དང་། རྒྱ་ནག་ནས་བོད་ཐོག་འགྲོ་སྐྱོད་ཆོག་མིན་དང་འབྲེལ་བའི་སྒྲིག་ཁྲིམས་གཏན་འབེབས་ཡོད་པ་དེ་བོད་ཀྱི་ས་བབས་གནས་སྟངས་ལ་གཞིགས་ཏེ་ཕྱི་མིའི་བདེ་འཇགས་ལ་ཆེད་དམིགས་ཀྱིས་བཟོས་པ་ཞིག་རེད་ཅེས་བརྗོད་འདུགརྒྱ་གཞུང་གི་ཡར་ལན་དེ་དང་འབྲེལ་ཁ་སང་གསར་འགོད་པ་ཁག་ཅིག་ནས་ཨ་རི་ཕོ་བྲང་དཀར་པོའི་གསར་འགོད་ལྷན་ཚོགས་སྐབས་གསར་འགོད་དྲུང་ཆེ་ Kayleigh McEnany ལགས་སུ་བཀའ་འདྲི་ཁག་ཅིག་ཞུ་སྐབས་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གི་བྱ་སྤྱོད་ཡར་ལན་སོགས་ཀྱི་ཐད་ཕྱག་བསྟར་གནང་རྒྱུའི་སྲིད་བྱུས་དང་འཆར་གཞི་ཁག་ཅིག་གཏན་འབེབས་གནང་ཡོད་པས་དེ་དག་རིམ་པས་མཁྱེན་རྟོགས་ཡོང་གི་རེད་ཅེས་གསུངས་ཡོད་པ་ལས་དེ་མིན་ཕྱག་བསྟར་གནང་རྒྱུའི་འཆར་གཞི་གང་དག་ཡོད་མེད་ཁ་གསལ་གནང་མེད་པ་རེད།གཞི་རྩའི་རྒྱ་ནག་གཞུང་ནས་བོད་ཀྱི་ས་ཁུལ་ཁག་ཏུ་རྒྱལ་སྤྱིའི་གཞུང་ཚབ་མི་སྣ་དང་ཡུལ་སྐོར་སྤྲོ་འཆམ་པ་རྣམས་རང་དབང་ཐོག་བསྐྱོད་རྒྱུར་དམ་དྲག་བྱེད་བཞིན་པ་དེ་ནི་དངོས་ཡོད་གནས་སྟངས་ཤིག་ཡིན་པ་དང་། གལ་སྲིད་གཞུང་ཚབ་མི་སྣ་གཙོས་ཕྱི་མི་ཞིག་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱིས་གཙོས་པའི་བོད་ཀྱི་ས་ཁུལ་ཁག་ཏུ་བསྐྱོད་རྒྱུའི་ཆོག་མཆན་སྤྲད་དབང་དུ་བཏང་ཡང་ས་གནས་རྒྱ་གཞུང་ལས་བྱེད་ཚོས་ཁོང་ཚོར་ལྟ་སྲུང་ནན་པོ་བྱས་ནས་བོད་མི་དང་ཐུག་འཕྲད་གནང་རྒྱུར་དམ་དྲག་ཆེན་པོ་བྱེད་ཀྱི་ཡོད་པ་རེད།ཁ་ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ཕྱག་བསྟར་བརྒྱུད་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དང་འབྲེལ། དེ་སྔ་ཁྲིམས་དེ་ཨ་རིའི་གྲོས་ཚོགས་སུ་ཆེད་འདོན་གནང་མཁན་ཁོངས་སུ་ཡོད་པ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ནས་དགའ་བསུ་དང་བོད་ནང་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་གཏང་མཁན་རྒྱ་ནག་གི་དཔན་རིགས་ཚོ་ཨ་རི་ནང་རང་དབང་ལོངས་སུ་སྤྱོད་རྒྱུའི་ཐོབ་ཐང་ཡོད་མ་རེད་ཅེས་ནན་བརྗོད་གནང་བ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ཁ་སང་རྒྱ་གར་གྱི་ Republic གསར་ཁང་གི་བཅར་འདྲི་ཐོག་ཨ་རིས་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དེ་ནི་དགའ་བསུ་ཞུ་འོས་པ་དང་རྒྱལ་སྤྱིར་བསྒྲགས་ཆོག་པའི་བརྡ་ལན་ཞིག་ཀྱང་རེད་ཅེས་གསུངས་འདུགསྲིད་སྐྱོང་མཆོག་ནས་ད་དུང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་རྒྱལ་སྤྱིའི་མང་ཚོགས་ནས་བློ་འཚབ་ཀྱིས་དོ་སྣང་ཆེན་པོ་གནང་བཞིན་ཡོད་པ་མ་ཟད། ཉེ་ཆར་ཡོ་རོན་མཐུན་ཚོགས་དང་རྒྱ་ནག་དབར་གྱི་ཆེ་མཐོའི་ལྷན་ཚོགས་ཐོག་བོད་དོན་གླེང་བ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་ལས་པ་ ༥༠ ཐུན་མོང་གིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་ཞིབ་འཇུག་ཆེད་ཕེབས་འདོད་ཡོད་པའི་བསྒྲགས་གཏམ་ཞིག་སྤེལ་ཡོད་པ་སོགས་གསུངས་ཡོད། དེ་བཞིན་རྒྱ་དཀར་ནག་གཉིས་ཀྱི་གནད་དོན་དང་འབྲེལ་ལོ་རྒྱུས་ཐོག་རྒྱ་གར་དང་རྒྱ་ནག་དབར་གྱི་ས་མཚམས་ཞེས་པ་ཞིག་མེད་པ་དང་། བོད་དང་རྒྱ་གར་གཉིས་དབར་ས་མཚམས་ཞེས་པ་ཞིག་ཡོད་སྟབས། གསར་ཁང་ཁག་གིས་གཙོས་པའི་ཉམས་ཞིབ་པ་རྣམས་ནས་རྒྱ་དཀར་ནག་མིན་པར་བོད་དང་རྒྱ་གར་གྱི་ས་མཚམས་ཞེས་བེད་སྤྱོད་གནང་དགོས་པ་དང་། བོད་མི་རྣམས་དུས་རྟག་ཏུ་རྒྱ་གར་དང་ལྷན་དུ་ཡོད་ཅེས་གསུངས་འདུགགཞི་རྩའི་ད་ལྟའི་ཆ་ས་མཚམས་དང་ཚོང་འབྲེལ། དེ་བཞིན་ཏོག་དབྱིབས་རིམས་ནད་དང་འགྲོ་བ་མིའི་ཐོབ་ཐང་སོགས་གནད་དོན་དུ་མ་ཞིག་གི་ཐད་ནས་རྒྱ་ནག་ལ་གནོན་ཤུགས་ཆེན་པོ་སྤྲོད་བཞིན་པ་མ་ཟད། ལྷག་པར་དུ་ཨ་རིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་དུ་འཛུགས་གནང་མུས་ཀྱི་དུས་སྐབས་འདིར་དབྱིན་ཡུལ་གྲོས་ཚོགས་འཐུས་མི་སྐུ་ཞབས Tim Loughton ལགས་ཀྱིས་དབྱིན་ཡུལ་གྲོས་ཚོགས་ནང་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་རྣམས་དབྱིན་ཡུལ་ནང་ཡོང་རྒྱུར་བཀག་སྡོམ་གནང་དགོས་པའི་གླེང་སློང་དང་། དབྱིན་ཡུལ་སྲིད་གཞུང་གིས་ཀྱང་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་དགོས་པའི་གཞེན་སྐུལ་གནང་ཡོད།