གསར་འགྱུར།

ཕྱི་ཟླ་ ༢ ཚེས་ ༡༠ ནས་ ༡༤ བར་སུད་སི་གྲོང་ཁྱེར་ཇི་ཝར་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་ཡོད་པ་ལྟར་ཚོགས་ཆེན་དེ་དང་བསྟུན་བོད་མའི་སྐུ་ཚབ་ནས་འབྲེལ་ཡོད་ཚོགས་ཆུང་ལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མིའི་ཆབ་སྲིད་བཙོན་པའི་གནད་དོན་སྐོར་ལ་ཞུ་གཏུག་སྙན་སེང་ཞུས་འདུག གཙོ་བོར་དེ་སྔ་ཕྱི་ལོ་ ༡༩༩༥ ལོར་སུད་སི་སྐུ་ཚབ་དོན་གཅོད་ཁང་ནས་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ལ་རྒྱ་གཞུང་གིས་བཙན་ཁྲིད་བྱས་པའི་འོག་གར་སོང་ཆ་མེད་དུ་གྱུར་བའི་ ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་ཡབ་ཡུབ་གཉིས་ཀྱི་གནད་དོན་གྱོད་གཞི་ཐོ་འཁོད་ངོས་བཞེས་གནང་བ་ནས་བཟུང་ད་བར་རྒྱུན་མི་ཆད་པར་འཇུག་སྣོན་ཞུ་གཏུག་གནང་བཞིན་པའི་ཁྲོད་འདིར་ཉེ་ཆར་སུད་སི་སྐུ་ཚབ་དོན་གཅོད་འཆེ་མེད་རིན་འཛིན་ལགས་ཀྱིས་སྣི་ཁྲིད་འོག་དོན་ཁང་གི་འགྲོ་བ་མིའི་ཐོབ་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་དང་འཕྲིན་ལས་ཆོས་སྐྱིད་ལགས་བཅས་གསུམ་ནས་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་པ་དང་བསྟུན་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ཚོགས་གཞོན་སྐུ་ཞབས་ Tae Uug Baik ལགས་སུ་མཇལ་མོལ་གྱིས་ད་ལྟའི་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གནས་བབས་དང་བོད་མིའི་རང་ལུས་མེར་སྲེག་གི་གནད་དོན། ༸པཎ་ཆེན་དགེ་ཆོས་ཀྱི་ཉི་མ་མཆོག་གི་གནད་དོན་མུ་མཐུད་འཇུག་སྐྱོང་ཞུ་གཏུག་གནང་བ་དང་འབྲེལ། རྒྱལ་ཚོགས་ནས་རྒྱ་གཞུང་ལ་གནོན་ཤུགས་སྤྲད་དེ་རིན་པོ་ཆེ་མཆོག་གིས་གཙོས་པའི་ད་བར་གར་སོང་ཆ་མེད་དུ་གྱུར་བའི་བོད་མི་རྣམས་ཀྱི་གནད་དོན་རྩད་གཅོད་གནང་ཕྱིར་རྒྱལ་ཚོགས་ཀྱི་རང་དབང་རྟོག་ཞིབ་ཚོགས་ཆུང་ཞིག་བོད་ནང་ཆེད་བསྐྱོད་གནང་རྒྱུ། དེ་བཞིན་རྒྱ་གཞུང་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་དང་བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་བྱ་སྤྱོད་རྣམས་འཕྲལ་དུ་མཚམས་འཇོག་ཡོང་བར་གནོན་ཤུགས་སྤྲོད་རོགས་ཞེས་འབོད་སྐུལ་སོགས་གནང་ཡོད་པ་རེད། སྔ་ལོའི་ཕྱི་ཟླ་དགུ་པའི་ནང་ཚོགས་པའི་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་ཐོག་རྟོག་ཞིབ་གནང་མཁན་གྱི་མཁས་ལས་དོན་ཚོགས་ཆུང་གི་ཚོགས་འདུ་ཐེངས་ ༡༡༩ སྟེང་ལས་དོན་ཚོགས་ཆུང་གི་ངོས་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མཆོག་གི་གནད་དོན་དང་འབྲེལ་ཏེ་འདྲི་རྩད་བྱས་པར་རྒྱ་ནག་གཞུང་གིས་༸པཎ་ཆེན་རིན་པོ་མཆོག་རྒྱུན་ལྡན་གྱི་འཚོ་བར་རོལ་བཞིན་ཡོད་སྐོར་བརྗོད་པ་དང་འབྲེལ། ད་ལྟའི་ཆར་གཙུག་ལག་སློབ་གྲྭ་ཆེན་མོ་ཐོན་ནས་ཕྱག་ལས་གནང་གི་ཡོད་ཅེས་བརྗོད་པ་ཙམ་ལས་ཞིབ་ཕྲའི་གནས་ཚུལ་ཁ་གསལ་གང་ཡང་བཤད་མེད་པ་རེད། སྐབས་དེར་རྒྱ་གཞུང་གིས་ལན་འདེབས་དེ་ཕྱི་ལོ་ ༢༠༡༣ ལོར་༸པཎ་རིན་པོ་ཆེའི་གནད་དོན་སྐོར་ལ་རྒྱལ་ཚོགས་ལན་འདེབས་གནང་བའི་རྗེས་ཀྱི་ལན་འདེབས་ཐོག་མ་དེ་ཆགས་ཀྱི་ཡོད་པ་རེད། འོན་ཀྱང་སྐབས་དེར་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་མཁས་ལས་ལས་དོན་དོན་ཚོགས་ཆུང་ནས་རྒྱ་ནག་གཞུང་གིས་གསལ་བཤད་ལན་འདེབས་དེ་ནི་འདོད་བློ་ཁེངས་པ་ཞིག་མི་འདུག་ཅེས་དང། རིན་པོ་ཆེ་མཆོག་གི་གནས་སྟངས་སྐོར་ལ་ཞིབ་འཇུག་དང་ཤེས་རྟོགས་ཁ་གསལ་ཡོང་བའི་གནས་ཚུལ་ཆ་ཚང་བ་ཞིག་རྒྱ་གཞུང་ནས་ལན་འདེབས་ནང་མི་འདུག་པས་ལས་དོན་ཚོགས་ཆུང་ནས་དེ་འབྲེལ་ཐོག་དོ་སྣང་གནང་གནད་ཡིན་སྐོར་རྒྱ་ནག་གཞུང་ལ་བསྐྱར་ནན་གནང་ཡོད་པ་རེད། རྩ་བའི་འཛམ་གླིང་ནང་རྒྱལ་ཁབ་ཁག་གི་ཁྲོད་དུ་གར་སོང་ཆ་མེད་དུ་གྱུར་བའི་གནད་དོན་ཐོག་ལྟ་སྲུང་ རོགས་སྐྱོར་བྱེད་མཁན་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དབུ་བརྙེས་ཏེ་འདི་ལོར་ལོ་ངོ་ ༤༠ འཁོར་བ་དང་བསྟུན་ཁ་སང་སྤེལ་བའི་སྤྱི་བསྒྲགས་ནང་འདས་པའི་ལོ་ངོ་དེ་དག་ནང་འཛམ་གླིང་རྒྱལ་ཁབ་འདྲ་མིན་ ༡༠༠ ལྷག་གི་ཁྲོད་ནས་གར་སོང་ཆ་མེད་དུ་གྱུར་བའི་གྱོད་གཞི་ཁྱོན་ ༥༨༠༠༠ ལྷག་ཚོགས་ཆུང་ལ་ཐོ་འཁོད་སྙན་སེང་ཞུས་ཡོད་པའི་ཁྲོད་ནས་གྱོད་གཞི་ ༤༦༠༠༠ དུང་ཡང་གསལ་མ་ཐུབ་པར་ལྷག་ཡོད་པར་མངོན་གསལ་གནང་འདུག་པར་མ་ཟད་བཙན་ཁྲིད་འོག་གར་སོང་ཆ་མེད་དུ་གྱུར་བའི་གནད་དོན་མུ་མཐུད་ནས་འཕྲད་བཞིན་པ་འདིས་འཛམ་གླིང་ནང་ཁྱོན་ཡོངས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐོང་རྡོག་རོལ་གྱི་གནད་དོན་ཚབས་ཆེས་ཆེར་འགྲོ་བཞིན་ཡོད་པར་བརྗོད་འདུག དེ་བཞིན་ཁ་སང་ལས་དོན་ཚོགས་ཆུང་དེ་དབུ་བརྙེས་ནས་ལོ་ངོ་ ༤༠ འཁོར་བའི་དུས་དྲན་སྲུང་བརྩི་དང་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གནས་ཡུལ་དུ་དམིགས་བསལ་གྱི་འདུ་འཛོམས་ཆེས་ཐོག་མ་དེ་གཉེར་ཡོད་པ་དང། སྐབས་དེར་ཚོགས་ཆུང་གིས་སླད་མར་འབྲེལ་ཡོད་འཛམ་གླིང་ས་ཕྱོགས་གང་ས་ནས་ཚོགས་སྡེ་ཁག་དང་མང་ཚོགས་ངོས་ནས་གར་སོང་ཆ་མེད་ཀྱི་གྱོད་གཞི་གང་འདྲ་ཞིག་ཡིན་རུང་སྟབས་བདེ་ཐོག་ལས་དོན་ཚོགས་ཆུང་ལ་ཞུ་གཏུག་ཐོ་འགོད་དང་སྙན་སེང་ཞུ་ཕྱིར་ཆེད་དམིགས་བསལ་བཀོད་སྤྱོད་མཉེན་ཆས་ཤིག་ཀྱང་དབུ་འབྱེད་གནང་ཡོད་པ་རེད། སུད་སི་གཅོད་ཁང་གི་རྒྱལ་ཚོགས་དང་འབྲེལ་ཡོད་ཀྱི་ལས་བྱེད་རྣམས་བོད་མིའི་སྐུ་ཚབ་ཐོག་ནས་མཛད་སྒོར་མཉམ་ཞུགས་ཀྱང་གནང་ཡོད་པ་རེད།

བཞུགས་སྒར་དྷརྨ་ས་ལ་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བར་བོད་དོན་གོ་རྟོགས་ཀྱི་རྐང་འཁོར་སྐོར་སྐྱོད་གནང་མཁན་རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ Sandesh Meshram ཁ་ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་འབྱོར་འདུག གསར་འགོད་པས་དེ་རིང་སྔ་དྲོ་སྐུ་ཞབས་བསམ་གཏན་ཡེ་ཤེས་ལགས་སུ་བཀའ་འདྲི་ཞུས་པར་ ཁོང་གིས་འདས་པའི་ཟླ་བ་གཉིས་ལྷག་ཙམ་གྱི་རིང་མངའ་སྡེ་འདྲ་མིན་ ༡༠ ཙམ་དང་གྲོང་ཁྱེར་མང་དག་ཅིག་ནང་ཁྱོན་རྒྱང་ཐག་སྤྱི་ལེ་ ༦༠༦༥ བར་རྐང་འཁོར་སྐོར་སྐྱོད་གནང་ཡོད་པ་དང་ཁ་ཉིན་ནས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་ཕེབས་འབྱོར་གྱིས་ཁུལ་དེའི་ནང་གི་ཏཱ་ལའི་བླ་མ་མཐོ་སློབ་དང་རྒྱ་གར་གྱི་མཐོ་རིམ་སློབ་གཉེར་ཁང་ཁག་ཅིག་གི་ནང་བོད་དང་འབྲེལ་བའི་གསུང་བཤད་གནང་ཡོད་སྐོར་གསུངས་སོང་། ཁོང་གིས་ད་བར་རྒྱ་གར་མང་ཚོགས་དང་བརྒྱུད་ལམ་ཁག་ནས་བོད་དོན་ཆེད་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བར་དོ་སྣང་དང་ངོས་ལེན་ཡག་པོ་གནང་སོང་བ་མ་ཟད། བོད་མི་འདུ་སྡོད་ཁག་ཏུ་འབྱོར་སྐབས་ས་གནས་ཀྱི་གཞུང་དང་གཞུང་འབྲེལ་མིན་པའི་བོད་མིའི་ཚོགས་སྒེར་ཁག་ནས་ཁོང་གིས་ལས་འགུལ་ལ་ཆེ་བསྟོད་ཀྱི་དགའ་བསུའི་སྣེ་ལེན་གང་ལེགས་གནང་ཡོད་པ་རེད། འོན་ཀྱང་སྐུ་ཞབས་བསམ་གཏན་ཡེ་ཤེས་ལགས་རྒྱ་གར་ལྷོ་ཕྱོགས་ཁུལ་དུ་འབྱོར་སྐབས་ཡུལ་དེར་སྤྱོད་བཞིན་པའི་སྐད་ཡིག་དེ་དག་ཤེས་ཀྱི་མེད་པར་བརྟེན་ཁོང་ལ་དེ་འབྲེལ་གོ་བརྡ་མ་འཕྲོད་པའི་དཀའ་ངལ་ཕྲན་བུ་འཕྲད་འདུག གཞི་རྩ་སྐུ་ཞབས་ Sandesh Meshram ལགས་སང་ཉིན་ཧུབ་ལི་བརྒྱུད་གྲོང་ཁྱེར་ལྔའི་ནང་དང་དེ་ནས་མོན་གྷོ་འདོད་རྒུ་གླིང་བོད་མིའི་གཞིས་སྒར་བར་རྐང་འཁོར་སྐོར་སྐྱོད་གནང་རྒྱུ་ཡིན་པ་དང་། ཉེ་སྔོན་ཁོང་ལ་གློ་བུར་དུ་ནད་མནར་རྐྱེན་པས་ཟླ་བ་འདིའི་ཚེས་ ༢༡ ཉིན་ལས་འགུལ་དེ་མཇུག་སྒྲིག་གནང་གི་ཡོད་པ་རེད།

ཕྱི་ཟླ་ ༢ ཚེས་ ༡༢ ཉིན་རྒྱ་གར་རྒྱལ་དི་ལླཱིར་ཚོགས་པའི་ ༢༠༢༠ ལོའི་ Mr and Miss Glory of India ཞེས་པའི་མཛངས་མའི་འགྲན་བསྡུར་ནང་བོད་རིགས་བེུད་མེ་ཏོག་ལྷ་མཛེས་ལགས་ལ་ Miss Himalaya Global བྱ་དགའ་ཐོབ་འདུག Aman Gandhi གློག་བརྙན་བཟོ་སྐྲུན་ཁང་གི་གོ་སྒྲིག་འོག་ཉེ་ཆར་དི་ལླླི་གསར་པར་ཚོགས་པའི་མཛངས་མའི་འགྲན་བསྡུར་ནང་མེ་ཏོག་ལྷ་མཛེས་ལགས་ནས་མཉམ་ཞུགས་གནང་བ་ལྟར་ཁོང་ལ་ Miss Himalaya Global བྱ་དགའ་ཐོབ་འདུག འགྲན་བསྡུར་དེའི་ནང་རྒྱ་གར་གྱི་མངའ་སྡེ་འདྲ་མིན་དང་བལ་ཡུལ་བཅས་ནས་བུ་དང་བུ་མོ་རང་ལོ་ ༡༨ ནས་ ༣༠ བར་དང་གཟུགས་པོའི་རིང་ཐུང་ཕི་ཊི་ ༥་༣ ནས་ ༥་༡༡ བར་ཡིན་པ་བཅས་ནས་མཉམ་ཞུགས་གནང་ཡོད་པ་རེད། སྐབས་དེར་འགྲན་བསྡུར་གྲུབ་མཚམས་སུ་གསར་འགོད་པས་བཅར་འདྲི་ཞུས་པའི་ཁྲོད་ལས་རིམ་གོ་སྒྲིག་གནང་མཁན་གྱི་ངོས་ནས་ Mr and Miss Glory of India ཞེས་པའི་འགྲན་དེ་གློག་བརྙན་བཟོ་སྐྲུན་ཁང་དེས་ཕྱི་ལོ་ ༢༠༡༢ ལོ་ནས་དབུ་འཛུགས་གནང་བ་ཞིག་ཡིན་པ་དང། དེའི་ནང་མཛངས་མའི་འགྲན་བསྡུར་གཞན་ལྟར་གྱོན་ཆས་ཉུང་ཉུང་སྤྲས་མི་དགོས་པའི་དམིགས་གསལ་གྱི་ཁྱད་ཆོས་ཡོད་པ། དེ་བཞིན་འགྲན་བསྡུར་ཐོག་དེ་སྔ་ཨིན་ཇིའི་ Hollywood བེུད་ནས་ཀྱང་མཉམ་ཞུགས་གནང་ཡོད་པར་མ་ཟད། ཐེངས་འདིའི་འགྲན་བསྡུར་ཐོག་བོད་ཀྱི་བེུད་ཅིག་ནས་མཉམ་ཞུགས་གནང་ཡོད་པར་གསུངས་འདུག དེ་རྗེས་མེ་ཏོག་ལྷ་མཛེས་ལགས་ཀྱིས་གསར་འགོད་པར་ཁོང་མོ་ད་རེས་འགྲན་བསྡུར་དེའི་ནང་མཉམ་ཞུགས་གནང་རྒྱུའི་གོ་སྐབས་གནང་བ་དེ་ནི་བོད་དོན་ལ་རྒྱབ་སྐྱོར་གནང་བ་ཅིག་དང་གོ་སྐབས་དེ་ལྟར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་ཏུ་ཁོང་ལ་བྱ་དགའ་ཐོབ་པར་དགའ་ཚོར་ཆེན་པོ་བྱུང་ཞེས་གསུངས་འདུག རྩ་བའི་མེ་ཏོག་ལྷ་མཛེས་ལགས་ནི་ཕྱི་ལོ་ ༡༩༩༩ ལོར་བོད་ནས་རྒྱ་གར་དུ་འབྱོར་རྗེས་སུ་ཇཱ་བོད་ཁྱིམ་སློབ་གྲྭར་སློབ་ཞུགས་གནང་ཡོད་པ་དང་། རྗེས་སུ་ཁོང་གི་པཱ་ལགས་ཀྱི་གཟུགས་གཞི་བདེ་མིན་རྐྱེན་པས་བོད་ལ་ཕྱིར་ལོག་གནང་དགོས་བྱུང་ཡོད་སྟབས་བོད་ནང་ལོ་གསུམ་རིང་བཞུགས་འདུག སྐབས་དེར་རྒྱ་གཞུང་གིས་ཁོང་ལ་དོགས་གཞི་འདྲ་མིན་བྱས་པར་བརྟེན་ཟླ་བ་གཅིག་དང་ཕྱེད་ཀ་ཙམ་གྱི་རིང་བཙོན་འཇུག་བྱས་མྱོང་འདུག ཕྱི་ལོ་ ༢༠༠༤ ལོར་ཁོང་རྒྱ་གར་དུ་ཐེངས་གཉིས་པ་ཕེབས་རྗེས་བཞུགས་སྒར་དྷརྨ་སཱ་ལཱར་ཕྱི་ལོ་ ༢༠༠༦ ལོའི་བོད་ཀྱི་མཛངས་མའི་འགྲན་བསྡུར་ནང་ཞུགས་མྱོང་ཡོད་པ་རེད།

རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རི་རྒན་ན་གཞོང་ལ་མེ་སྐྱོན་ཚབས་ཆེན་བྱུང་སྟེ་རྩྭ་ས་མུའུ་ཁྲི་ཚོ་བརྒལ་བ་མེར་འཚིགས་ནས་གནོད་སྐྱོན་ཆེན་པོ་ཐེབས་ཡོད་པ་ད་དུས་ལྟའང་མེ་འབར་བཞིན་པ་རེད་འདུག ཁ་སང་ཕྱི་ཚེས་ ༡༢ ཉིན་བོད་ནང་གི་ཉིན་རྒྱབ་ཆུ་ཚོད་ ༡ ཙམ་ལ་རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རི་རྒན་ན་གཞོང་ལ་མེ་སྐྱོན་ཚབས་ཆེན་ཤོར་ཡོད་པ་དང་ཡུལ་མི་རྣམས་ཀྱིས་འཕྲལ་དུ་མེ་གསོད་ཐབས་གནང་ཡོད་ཀྱང་རྩྭ་ས་ཆེ་དྲག་པ་དང་རླུང་གཡུག་དྲག་པར་བརྟེན་མེ་གསོད་ཐུབ་མི་འདུག རྒྱ་ནག་སྲིད་གཞུང་གིས་གནས་ཚུལ་སྤེལ་བར་རྫོང་སྲིད་གཞུང་གི་ཉེན་རྟོག་པ་དང་མེ་གསོད་རུ་ཁག་གི་རོགས་འདེགས་འོག་མེ་བསད་ཡོད་པར་འགྲེལ་བརྗོད་བྱས་ཡོད་ནའང་། ཁྱུང་མཆུ་རྫོང་གི་ཡུལ་མི་རྣམས་ཀྱིས་གནས་ཚུལ་དེ་རྫུན་མ་ཡིན་པ་ཕྱིར་བསྒྲགས་གནང་ཡོད་པའི་ཁྲོད་ཡུལ་མི་ཞིག་གིས་ཁོང་གི་སྐད་འཕྲིན་གྱི་པར་མཛོད་དུ་སྲིད་གཞུང་གིས་མེ་བསད་ཡོད་པའི་གསར་འགྱུར་དང་ད་ལྟ་འབར་བཞིན་པའི་རྩྭ་ཐང་གི་པར་གཉིས་བཞག་སྟེ་སྲིད་གཞུང་གིས་ཀྱང་རྫུན་བཤད་པར་ཟུར་ཟ་གནང་ཡོད་པ་དང་མི་གཞན་ཞིག་གིས་སྲིད་གཞུང་གི་གསར་འགྱུར་ཚང་མ་རྫུན་མ་ཡིན་པས་དེང་སང་གི་རྒྱ་ནག་ནང་གི་ཏོག་དབྱིབས་ནད་རིམས་སྐོར་གྱི་གསར་འགྱུར་རྣམས་ཀྱང་རྫུན་མ་ཡིན་པར་བརྟེན་ཀུན་གྱིས་གཟབ་གཟབ་བྱོས་ཞེས་སྤེལ་འདུག  ཁྱུང་མཆུ་རྫོང་གི་ཡུལ་མི་ཞིག་གིས་འདི་གར་གསར་འགྱུར་མཁོ་སྤྲོད་བྱས་པར་མེ་སྐྱོན་ཤོར་ཚད་ཧ་ཅང་ཚབས་ཆེན་ཡིན་པ་དང་། ལྷག་པར་དུ་ན་གཞོང་ཆེན་པོ་དང་རྩྭ་ཡག་པོ་ཡོད་པས་མེ་གསོད་རྒྱུ་ཧ་ཅང་ཁག་པོ་ཆགས་ཡོད་རབས་དང་། དེ་བཞིན་ཁ་སང་ས་ཁྱོན་མུའུ་ ༡༠༠༠༠ ལྷག་འཚིག་ཚར་བར་བརྗོད་བཞིན་པ་དང་དེ་རིང་ད་དུང་མེ་འབར་བཞིན་ཡོད་པས་ས་ཁྱོན་ཁ་སང་ལས་ལྡབ་འགྱུར་འཚིག་འདུག མེ་སྐྱོན་བྱུང་རྗེས་ཁུལ་དང་རྫོང་མེ་གསོད་རུ་ཁག ས་གནས་མི་མང་གིས་ཀྱང་ཧུར་ཐག་གིས་མེ་གསོད་ཐབས་བྱེད་ཀྱི་ཡོད་སྟབས་མི་དང་ཕྱུགས་ཟོག་ལ་གནོད་སྐྱོན་གང་ཡང་བྱུང་མེད་ཀྱང་། མེ་གསོད་རྒྱུ་དཀའ་ལས་ཆེན་པོ་ཆགས་ཡོད་སྐོར་བརྗོད་པ་དང་འབྲེལ་ཏེ་ད་ལྟའི་ཆར་མེ་ཤོར་བའི་རྒྱུ་རྐྱེན་གང་ཡིན་ཤེས་རྟོགས་ཐུབ་མེད་སྐོར་བརྗོད་སོང་། གསར་འགོད་པས་ཕ་ཡུལ་ཁྱུང་མཆུ་ནས་ཡིན་པའི་བྱེས་བཞུགས་བོད་མི་ཞིག་ལ་བཅར་འདྲི་ཞུས་པར་ད་ལྟའི་ཆར་ཤེས་རྟོགས་མེད་ཚུལ་དགསུངས་པ་དང་འབྲེལ་ཏེ་ཐེངས་འདིའི་མེ་སྐྱོན་ཁྲོད་ས་ཁྱོན་ཆེ་པོ་འཚིགས་ཡོད་པར་བརྟེན་དཔྱིད་ངན་འདིར་འབྲོག་པ་མང་ཚོགས་ཀྱི་ཕྱུགས་ཟོག་ལ་གཟན་ཆག་གི་དཀའ་ངལ་ཆེན་པོ་འཕྲད་རྒྱུ་ཡིན་པར་ངོ་སྤྲོད་གནང་ཡོད།

ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཁུལ་དེའི་ State of the National Address  འམ་ལྷོ་ཨ་ཕི་རི་ཀའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་གདན་ཞུས་གནང་དོན་ལྟར་ཁ་སང་ཚེས་ ༡༣ ཉིན་ Inkatha Freedom Party སྲིད་དོན་ཚོགས་པའི་གྲོས་ཚོགས་འཐུས་མི་རྣམས་དང་མཇལ་འཕྲད་དང་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་ལྷན་ཞུགས་གནང་འདུག ཚོགས་གཙོ་མཆོག་ནས་དེ་རིང་ཕྱི་ཚེས་ ༡༤ ཉིན་རྒྱ་དམར་གྱིས་བོད་ས་བཙན་བཟུང་བྱས་རྗེས་རྒྱ་གར་ནང་བཙན་བྱོལ་བོད་མིའི་སྒྲིག་འཛུགས་ཞེས་པའི་བརྗོད་གཞིའི་ཐོག་ས་གནས་མི་མང་རྣམས་ལ་གསུང་བཤད་གནང་གི་འདུག ཕྱི་དྲོ་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་ཅིག་དང་མཇལ་འཕྲད་གནང་རྒྱུ། དེ་བཞིན་ཕྱི་ཚེས་ ༡༥ ཉིན་ལྷོ་ཨ་ཕི་རི་ཀའི་རྒྱལ་ས་ཇོཧ་ན་ས་བྷག་ལ་ཕེབས་ཐོན་གནང་རྒྱུ་རེད་འདུག གཞི་རྩའི་ཕྱི་ལོ་ ༢༠༡༨ ཕྱི་ཟླ་ ༢ པའི་ནང་ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་ཡུལ་དེའི་གྲོས་ཚོགས་སུ་ལྷོ་ཨ་ཕི་རི་ཀའི་སྲིད་འཛིན་ཛུ་མ་མཆོག་གི་རྒྱལ་ཡོངས་གཏམ་བཤད་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟངསེང་གེ་མཆོག་ཀྱང་གདན་ཞུ་གནང་ཡོད་པ་མ་ཟད། འདས་པའི་ལོ་ཤས་ནང་ལྷོ་ཨ་ཕི་རི་ཀའི་རྒྱལ་ཁབ་དང་རྒྱ་ནག་གཞུང་དབར་དཔལ་འབྱོར་དང་ཚོང་གི་འབྲེལ་ལམ་དམ་ཟབ་ཕྱིན་ཡོད་པ་དང་། འབྲེལ་ལམ་དེའི་རྐྱེན་གྱིས་རྒྱ་གཞུང་གིས་གནོན་ཤུགས་འོག་ཕྱི་ལོ་ ༢༠༠༩ ལོ་ནས་ད་བར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེའི་ནང་ཆིབས་བསྒྱུར་མཛད་ཐུབ་མེད་པ་རེད། དེ་བཞིན་སྔ་ལོའི་ཕྱི་ཟླ་ ༡༢ ཚེས་ ༡༥ ནས་འདི་ལོའི་ཕྱི་ཟླ་ ༢ ཚེས་ ༩ ཉིན་བར་ཨ་ཕི་རི་ཀར་རྟེན་གཞི་བྱས་པའི་ Johannesburg Holocaust དང་  Genocide Centre ཨ་ཕི་རི་ཀའི་དོན་གཅོད་ལས་ཁུངས་ཀྱིས་གོ་སྒྲིག་གནང་སྟེ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་མཛད་རྣམ་དང་འབྲེལ་བའི་འགྲེམས་སྟོན་ཞིག་གོ་སྒྲིག་གནང་མུས་ཁྲོད་ཉེ་ལམ་ཕྱི་ཚེས་ ༩ ཉིན་༸གོང་ས་མཆོག་གི་ཐུགས་བསྐྱེད་ཆེན་པོ་དག་ལས་ཚན་རིག་དང་འབྲེལ་ནས་ནང་ཆོས་ཐོག་དཔྱད་བསྡུར་གནང་རྒྱུའི་སྐོར་ལ་གཏམ་བཤད་ལས་རིམ་ཞིག་གནང་འདུག སྐབས་དེར་གཏམ་བཤད་གནང་མཁན་གྱི་མི་སྣ་གཙོ་བོ་ནི་ཁུལ་དེར་རྟེན་གཞི་བྱས་པའི་ལམ་རིམ་ནང་པའི་བསྟི་གནས་ཁང་དགེ་རྩ་ཚོགས་པའི་སྐུ་ཞབས་ Philip Wyse  ལགས་ཡིན་པ་དང་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ངོ་སྤྲོད་གསུང་བཤད་གནང་ཐོག་འགྲེམས་སྟོན་བརྒྱུད་དེ་ཨ་ཕི་རི་ཀའི་མི་མང་ཡོངས་ལ་༸གོང་ས་མཆོག་ཀྱི་སྐུ་ཚེའི་མཛད་རྣམ་དང་བོད་ཀྱི་ལོ་རྒྱུས། རིག་གཞུང་སོགས་ཐུན་མིན་ཡོད་པ་ངོ་སྤྲོད་དང་སློབ་གསོ་སྤེལ་སླད་ཡིན་པར་གསུངས་ཡོད་པ་རེད།

ཕྱི་ལོ་ ༢༠༡༩ ལོའི་ཟླ་བ་ལྔ་བ་དང་དྲུག་པའི་ནང་རྒྱ་ནག་གིས་ཡ་ཆེན་སྒར་གྱི་གྲྭ་ཤག་མང་པོ་རྩ་གཏོར་བཏང་སྟེ་གྲྭ་བཙུན་མང་པོ་བཙན་ཤེད་ཀྱིས་དགོན་གྲོང་ནས་ཕྱིར་ཕུད་བཏང་ཡོད་པའི་ཁྲོད་ཡ་ཆེན་སྒར་གྱི་ཆོས་ཉིད་རིག་རྩལ་མཁའ་འགྲོ་གླིང་གི་བཙུན་མ་བསོད་ནམས་དབྱངས་བྷ་ལགས་ཀྱིས་རྒྱ་ནག་གིས་ཁོང་མོ་དགོན་གྲོང་ནས་ཕྱིར་ཕུད་བཏང་བར་བརྟེན་རང་སྲོག་བཅད་འདུག བལ་ཡུལ་དུ་གནས་སྡོད་བྱེད་བཞིན་པའི་ཨ་རིའི་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་ལགས་ལ་བོད་ནས་འབྲེལ་ཡོད་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། བཙུན་མ་བསོད་ནམས་དབྱངས་བྷ་ལགས་ནི་དགུང་ལོ་སུམ་ཅུའི་གཡས་གཡོན་ཞིག་ཡིན་པ་དང་། ཁོང་བོད་ལྗོངས་ཆབ་མདོ་ཁུལ་འཇོ་མདའ་རྫོང་མདོ་གཞུང་མ་སྡེ་བ་ནས་ཡིན་པ་དང་། ཁོང་རྒྱ་ནག་གིས་བཙན་གྱིས་ཡ་ཆེན་སྒར་ནས་ཕྱིར་ཕུད་བཏང་སྟེ་བཀག་བསྐྱིལ་ཁང་དུ་བཅུག་པར་བརྟེན་ཁོང་ལ་སྙུང་གཞི་བཞེས་ནས་སྨན་ཁང་དུ་ཅུང་ཙམ་ལྷག་ཡོད་པ་དང་། སྐབས་དེར་རྒྱ་ནག་གི་ཉེན་རྟོག་པས་ཁོང་མགྱོགས་མྱུར་ངང་ཕྱིར་བཀག་བསྐྱིལ་ཁང་དུ་ཡོང་དགོས་པའི་ཉེན་བརྡ་བཏང་བས་རྗེས་སུ་ཁོང་བཀག་བསྐྱིལ་ཁང་དུ་མ་སོང་བར་རང་སྲོག་བཅད་ཡོད་པ་ལས་ཟླ་ཚེས་ནམ་ཞིག་ལ་རང་སྲོག་བཅད་པའི་གནད་དོན་ཁ་གསལ་ཤེས་རྟོགས་ཐུབ་མེད་པར་གསུངས་སོང་། བཙུན་མ་བསོད་ནམས་དབྱངས་བྷ་ལགས་ཀྱིས་ཟླ་བ་བདུན་པ་བརྒྱད་པ་ཞིག་ལ་རང་སྲོག་བཅད་པ་བརྟེན་ནས་ཁུལ་དེར་རྒྱ་ནག་གིས་སྔར་ལས་ལྷག་པའི་དོ་དམ་བྱེད་ཀྱི་ཡོད་པར་བརྟེན། ད་ཆ་བཙུན་མ་ཁོང་གི་ནང་མི་རྣམས་ལ་འབྲེལ་བ་བྱེད་ཐབས་མེད་པར་གསུངས་བ་དང་སྦྲགས། ཉེ་སྔོན་རྒྱ་ནག་གིས་ཡ་ཆེན་སྒར་ནས་བཙན་ཁྲིད་བྱས་པའི་བཙུན་མ་རྣམས་ཕྱིར་དགོན་གྲོང་དུ་འགྲོ་རུ་འཇུག་གི་མེད་པ་མ་ཟད་ཁོང་རྣམས་ཀྱི་ཕ་ཡུལ་གྱི་གྲོང་སྡེའི་དགོན་པའི་ནང་དུ་འཛུལ་ཞུགས་བྱེད་དུ་འཇུག་གི་མེད་པ་དང་། བཙུན་མ་ཚོ་སྐྱ་སར་འབབ་དགོས་པའི་སློབ་གསོ་སྤྲོད་བཞིན་ཡོད་པ་སོགས་ངོ་སྤྲོད་གནང་ཡོད། རྩ་བའི་བཙུན་མ་བསོད་ནམས་དབྱངས་བྷ་ལགས་རྒྱ་ནག་གིས་དགོན་གྲོང་ནས་ཕྱིར་ཕུད་བཏང་ནས་བཀག་སྐྱིལ་ཁང་དུ་མནར་གཅོད་བཏང་བར་བརྟེན་སྙུང་གཞི་བཞེས་ཡོད་པ་དང་། ཁོང་སྨན་ཁང་དུ་བཞུགས་དུས་སུ་ཡང་རྒྱ་ནག་གིས་ཁོང་ངེས་བར་དུ་ཕྱིར་བཀག་སྐྱིལ་ཁང་དུ་ལོག་དགོས་བའི་ཉེན་བརྡ་བཏང་བར་བརྟེན་ཁོང་གིས་རང་སྲོག་བཅད་པ་ཞིག་ཡིན་ཀྱང་ད་ལྟའི་ཆར་རྒྱ་ནག་གིས་ལྟ་རྟོག་ནན་མོ་བྱེད་བཞིན་པར་བརྟེན་ཁོང་གི་གནས་ཚུལ་ཆ་ཚང་བ་ཞིག་ཤེས་རྟོགས་ཞུ་ཐབས་མི་འདུག

བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་བཞུགས་སྒར་ཁྲོམ་ཞུང་དུ་བོད་ཆས་སྤྲས་ནས་འགྱིང་འགྲོས་གནང་སྟེ་༸རྒྱལ་མཆོག་སྐུ་ཕྲེན་བཅུ་གསུམ་པ་ཐུབ་བསྟན་རྒྱ་མཚོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་དེ་ལོ་ངོ་ ༡༠༧ འཁོར་བའི་ཉིན་མོ་སྲུང་བརྩི་ཞུས་སོང་། དེ་རིང་གི་ཉིན་མོ་འདི་ནི་དེ་སྔ་ཕྱི་ལོ་ ༡༩༡༣ ཕྱི་ཟླ་ ༢ ཚེས་ ༡༣ ཉིན་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་ཁེལ་གྱི་ཡོད་པ་ལྟར། དེ་རིང་ཉིན་གུང་ཚོུད་ ༡ ཐོག་རྒྱ་གར་བོད་རང་བཙན་སློབ་ཕྲུག་ཚོགས་པས་རྐང་གོ་སྒྲིག་གནང་སྟེ་བོད་པའི་གཞོན་སྐྱེས་ཕོ་མོ་བརྒྱ་སྐོར་ཞིག་གིས་བོད་ཀྱི་ཐུན་མོང་མ་ཡིན་པའི་ཆས་གོས་དང་། ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་བོད་བོད་ཡུལ་དུ་སྐྱིད། རྒྱ་རྒྱ་ཡུལ་དུ་སྐྱིད་ཅེས་པའི་འབོད་ཚིག ལོ་རྒྱུས་རང་བཞིན་ལྡན་པའི་བོད་དང་རྒྱ་ནག་དབར་གྱི་ཆིངས་ཡིག་གི་དོན་ཚན་སོགས་འཁོད་པའི་འཕྲེད་དར་བསྣམས་ཏེ་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཆགས་པའི་དཔའ་བོའི་རྡོ་རིང་མདུན་ནས་མེག་གྷན་སྣུམ་འཁོར་བབས་ཚུགས་བར་འགྱིང་འགྲོས་གནང་སྟེ་ཉིན་མོ་འདི་སྲུང་བརྩི་ཞུས་ཡོད། སྐབས་དེར་རྒྱ་གར་བོད་རང་བཙན་སློབ་ཕྲུག་ཚོགས་པའི་ངེས་བསྟོན་པ་རིག་འཛིན་ཆོས་སྒྲོན་ལགས་ནས་ཉིན་མོ་འདིའི་གལ་ཆེའི་རང་བཞིན་ཁག་ངོ་སྤྲོད་གནང་བ་དང་སྦྲགས། རྒྱ་ནག་དམར་ཤོག་སྲིད་གཞུང་དང་སྲིད་གཞུང་དེས་རྒྱལ་སྤྱིའི་ཐོག་བོད་ཀྱི་དངོས་ཡོད་རྒྱལ་རབས་ལོ་རྒྱུས་ཁག་འཁྱོག་བཤད་དྲིལ་བསྒྲགས་སྣ་མང་བྱེད་བཞིན་པའི་བྱ་སྤྱོད་དེ་དག་ལ་ངོས་ལེན་རྩ་བ་ནས་མེད་ཅེས་གསུངས་སོང་།  ཁོང་གིས་འགྱིང་འགྲོས་ཀྱི་ལས་འགུལ་འདི་ནི་བོད་ནང་ལ་མཚོན་ན་རྒྱ་གཞུང་གི་དམ་དྲག་རྐྱེན་པས་བོད་ཀྱི་རྒྱལ་དར་འཆར་རྒྱུ་ཁག་པོ་ཡིན་སྟབས། སྨོན་ལམ་ཆེན་མོའི་རྗེས་སུ་ཆོས་དར་བསྣམས་ཏེ་སྤེལ་སྲོལ་ཡོད་པ་སོགས་ངོ་སྤྲོད་དང་ཆབས་ཅིག བཙན་བྱོལ་རང་དབང་ལུང་པའི་ནང་བོད་མི་ཚོས་རང་གི་རིག་གཞུང་དང་ལོ་རྒྱུས་དེ་དག་བདག་གཅེས་གནང་དགོས་གལ་ཡིན་པར་མ་ཟད་གཞོན་སྐྱེས་ཚོར་དེ་དག་དང་འབྲེལ་བའི་འོས་འགན་འཕར་མ་ཞིག་ཡོད་པ་གསུངས་ཡོད། དེ་བཞིན་ལོ་རྒྱུས་རང་བཞིན་ལྡན་པའི་དུས་ཚིགས་དང་བསྟུན་རྒྱ་གར་བོད་རང་བཙན་སློབ་ཕྲུག་ཚོགས་པས་དགོང་དྲོ་ཆུ་ཚོད་དྲུག་པ་ནས་ Drum Stick ཟ་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་གཉིས་གདན་ཞུ་ཐོག་སིམ་ལ་ཆིངས་ཡིག་གི་འབྱུང་རྐྱེན་གང་ཡིན་ལ་ལྟ་བ་ཅེས་པའི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་སོགས་གནང་གི་ཡོད་པ་རེད། རྩ་བའི་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་སྲུང་བརྩི་ཞུ་རྒྱུའི་ལས་འགུལ་དེ་ནི་བོད་རང་བཙན་སློབ་ཕྲུག་ཚོགས་པས་དེ་སྔ་ཕྱི་ལོ་ ༢༠༡༣ ལོར་༸གོང་ས་༸སྐུ་ཕྲེང་བཅུ་གསུམ་པོ་ཆེན་པོ་མཆོག་གིས་བོད་རང་བཙན་གསལ་བསྒྲགས་བསྐྱངས་ནས་ལོ་ངོ་ ༡༠༠ འཁོར་བའི་དུས་ཚིགས་ཉིན་ནས་དབུ་འཛུགས་ཀྱིས་ལོ་ལྟར་ཟླ་ ༢ ཚེས་ ༡༣ ཉིན་བོད་མིའི་གནས་ཡུལ་རྒྱལ་སྤྱིའི་ས་གནས་མང་དག་ཅིག་ཏུ་ལས་འགུལ་གྱི་རྣམ་པ་འདྲ་མིན་ཐོག་སྲུང་བརྩི་ཞུ་བཞིན་ཡོད་པ་ལྟར། ཨ་རི་ནང་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་ཀྱང་ཡུལ་དེའི་གྲོང་ཁྱེར་ New York ནང་སྙན་ངག་དང་འགོག་རྒོལ་ཞེས་པའི་བརྗོད་གཞིའི་འོག་ས་གནས་བོད་མི་དང་བོད་དོན་རྒྱབ་སྐྱོར་བ། དེ་བཞིན་རང་དབང་འཐབ་རྩོད་སོགས་ཀྱི་ནང་ཕྱག་ལས་གནང་མྱོང་ཡོད་པའི་མི་སྣ་དང་མང་ཚོགས་འདུ་འཛོམས་ཀྱིས་འཐབ་རྩོད་ལས་འགུལ་སོགས་དང་འབྲེལ་བའི་སྙན་ངག་གྱེར་འདོན་དང་བསམ་ཚུལ་བརྗེ་ལེན་གནང་སྟེ་སྲུང་བརྩི་ཞུས་ཡོད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་རིམས་ནད་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་ཡོད་སྟབས། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་མགོན་པོ་༸གང་ཉིད་མཆོག་ནས་འཆར་ལོའི་ཕྱི་ཟླ་ ༣ པ་ནང་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་སོ་བཞི་བའི་བཀའ་ཆོས་བཀའ་དྲིན་སྩལ་རྒྱུ་ཕྱིར་བཤོལ་གནང་འདུག དེའང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་ཨིན་ཡིག་དྲྭ་རྒྱར་བཀའ་ཁྱབ་སྤེལ་བར་གཞིགས་ན། རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་ནད་དུག་གསར་པའི་གློ་ཚད་རིམས་ནད་དང་འབྲེལ་བའི་ཆེས་ཛ་དྲག་གི་གནས་བབས་གྱུར་བརྟེན་འཆར་ལ་ཉེ་བའི་ཕྱི་ཟླ་ ༣ ཚེས་ ༩ དང་བོད་ཟླ་ ༡ ཚེས་ ༡༥ ཉིན་བཅོ་ལྔ་མཆོད་པའི་ཆོས་ཕྱོགས་ཀྱི་དུས་ཚིགས་ཁྱད་པར་ཅན་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མི་གཙོ་བོར་གྱུར་པའི་ཕྱི་ནང་གི་དད་ལྡན་སེར་སྐྱ་རྣམས་ལ་སློབ་དཔོན་དཔའ་བོས་མཛད་པའི་སྐྱེས་རབས་སོ་བཞི་བའི་བཀའ་ཆོས་སྩལ་རྒྱུའི་མཛད་འཆར་དེ་རེ་ཞིག་ཕྱིར་བཤོལ་གནང་འདུགདེ་བཞིན་ཁ་སང་ཕྱི་ཚེས་ ༡༢ ཉིན་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་བཀའ་ཁྱབ་ཅིག་བསྒྲགས་འདུག་པའི་ནང་༸སྐུའི་བླ་སྨན་པ་དང་ཞབས་གྲས་སྤྱི་དང་ཕྱོགས་མཐའི་དད་ལྡན་དུ་མས་སྤྱི་ནོར་༸གོང་ས་༸སྐྱབས་མགོན་ཆེན་པོ་ལ་བསྐྱར་ནན་གྱིས་མཛད་འཆར་ཁག་ཕྱིར་བཤོལ་གནང་སྐྱོང་ཡོང་བའི་གསོལ་འདེབས་ཞུས་པ་ལྟར་དེ་ལྟར་གནང་འཐུས་ཀྱི་བཀའ་བཞེས་བཟང་པོ་སྨིན་བསྩལ་ཐོབ་ཡོད་སྟབས། འཆར་ལོའི་ཆོ་འཕྲུལ་ཟླ་བར་དགེ་ཚུལ་སློང་སྡོམ་པ་སྩལ་རྒྱུའི་མཛད་འཆར་དེའང་རེ་ཞིག་ཕྱིར་འཐེན་གནང་བ་དང་། སླད་མར་དགེ་ཚུལ་སློང་སྡོམ་པ་སྩལ་རྒྱུའི་མཛད་འཆར་ཐུགས་གཏན་ཁེལ་མཚམས་སུ་བཀའ་ཁྱབ་བསྩལ་རྒྱུ་རེད་འདུག གཞི་རྩའི་རྣམ་ཀུན་བཞུགས་སྒར་དུ་༸གོང་ས་མཆོག་༸སྐུ་བཞུགས་མཛད་པའི་རིང་རེས་གཟའ་ཟླ་བ་དང་ལྷག་པ། པ་སངས་ནམ་ཡིན་ལ་བོད་མིས་གཙོས་པའི་ཕྱི་རྒྱལ་ཡུལ་གྲུ་གང་ས་ནས་བཅར་བའི་མང་ཚོགས་ལ་མཇལ་མང་བསྩལ་གྱི་ཡོད་པ་མ་ཟད། དད་ལྡན་རྣམས་ལ་དགོས་གལ་ནམ་གཟིགས་བཀའ་ཆོས་སོགས་བཀྲིན་སྩལ་གྱི་ཡོད་པ་དང་། དེ་དག་གི་ཁོངས་སུ་རྒྱ་ནག་དང་ལྷོ་ཤར་ཨེ་ཤ་ཡ་སོགས་གཙོ་གྱུར་ཡུལ་གྲུ་ཁག་གི་ནང་པའི་དད་ལྡན་ཕོན་ཆེ་ཡོད་པར་བརྟེན་བོད་མི་མང་ཚོགས་ཁྲོད་ནས་ཀྱང་སྤྱི་ཚོགས་ཀྱི་བརྒྱུད་ལམ་ཐོག་ནས་མཇལ་མང་རེ་ཞིག་མཚམས་འཇོག་གནང་སྐྱོང་ཡོང་བའི་གསོལ་འདེབས་ཞུས་ཡོད་པ་ལྟར་ཕྱི་ལོ་ ༢༠༢༠ ཕྱི་ཟླ་ ༡ ཚེས་ ༣༠ ཉིན་ནས་མགོན་པོ་༸གང་ཉིད་མཆོག་གི་མཇལ་མང་གནས་སྐབས་རིང་མཚམས་འཇོག་གནང་ཡོད་པ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་དི་ལླཱི་སྤྱི་ཁྱབ་བློན་ཆེན་སྐུ་ཞབས་ Arvind Kejriwal མཆོག་སླར་ཡང་མངའ་སྡེའི་འོས་བསྡུའི་ཁྲོད་ཚད་མཐོའི་རྒྱལ་ཁ་ཐོབ་པར་འཚམས་འདྲི་བསྩལ་བ་དང་སྦྲགས། རྒྱ་གར་མང་ཚོགས་ནས་མང་གཙོ་ཡང་དག་ལོངས་སུ་སྤྱོད་བཞིན་པར་བསྔགས་བརྗོད་མཛད་འདུག ཁ་སང་༸གོང་ས་མཆོག་གིས་བསྩལ་བའི་གསུང་འཕྲིན་ནང་དི་ལླཱི་མང་ཚོགས་ནས་མུ་མཐུད་ཁྱེད་ཀྱི་འགོ་ཁྲིད་ལམ་སྟོན་འོག་ཁེ་ཕན་བྱུང་ངེས་ཡིན་པ་དང་སྒོས་དེ་སྔ་མགོན་པོ་༸གང་ཉིད་མཆོག་ནས་ཕྱི་ལོ་ ༢༠༡༨ ལོར་དི་ལླཱི་མངའ་སྡེ་གཞུང་གི་སྟངས་འཛིན་འོག་ཡོད་པའི་གཞུང་གི་སློབ་གྲྭའི་དགེ་སློབ་བཅས་ལྷན་ཞུགས་ཐོག་བདེ་སྐྱིད་སྐྲུན་ཐབས་ Happiness Curriculum ཞེས་པའི་བསླབ་གཞི་གསར་པ་དབུ་འབྱེད་མཛད་པར་སྐུ་ཞབས་ཁོང་དང་དི་ལླཱིའི་གཞུང་འཛིན་ཚོགས་པར་བསྔགས་བརྗོད་མཛད་པ་ལུང་འདྲེན་དང་འབྲེལ། བསླབ་གཞི་དེས་སློབ་ཕྲུག་ཚོའི་སློབ་སྦྱོང་སྤྱི་ཡོངས་ལ་གྲུབ་འབྲས་བཟང་པོ་ཐོན་ངེས་དང་ལྷག་པར་དུ་སློབ་ཕྲུག་ཞན་ཚོར་རང་ཉིད་ཀྱི་མི་ཚེ་གོང་འཕེལ་གཏང་རྒྱུའི་རོགས་འདེགས་ཐུབ་རྒྱུ་ཡིན་པར་བཀའ་བསྩལ་འདུག མགོན་པོ་༸གང་ཉིད་མཆོག་གིས་འགྲོ་བ་མིའི་གཞི་རྩའི་རིན་ཐང་གོང་མཐོར་དང་ཆོས་ལུགས་ཕན་ཚུན་མཐུན་སྒྲིལ་གནང་ཕྱིར་༸མགོན་པོ་མཆོག་ནས་རྒྱ་གར་གྱི་གནའ་བོའི་རིག་གནས་བསྐྱར་གསོའི་སླད་ཞལ་བཞེས་མཛད་པ་དང་དི་ལླཱི་གཞུང་ནས་སློབ་གྲྭ་ཁག་ཏུ་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་ཡི་རངས་བསྔགས་བརྗོད་མཛད་པ་མ་ཟད། དི་ལླཱི་གཞུང་ནས་དེ་ལྟར་གནང་བ་དེས་རྒྱ་གར་གྱི་མངའ་སྡེ་གཞན་ཁག་ལའང་མིག་དཔེ་ཞིག་བསྟན་ཐུབ་ཡོད་པར་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་རྒྱ་གར་ལྟ་བུར་ཆ་མཚོན་ན་གནའ་དེང་གཉིས་ཀྱི་ཤེས་ཡོན་ཟུང་འབྲེལ་གནང་ཐུབ་པའི་རྒྱལ་ཁབ་གཅིག་པོ་དེ་ཡིན་པར་ཡིད་ཆེས་མཛད་ཀྱི་ཡོད་པ་དང་ཆབས་ཅིག་ཏུ་རྒྱ་གར་གྱི་སློབ་ཕྲུག་ཚོའི་ངོས་ནས་བསླབ་གཞི་དེར་དོ་སྣང་དང་དགའ་མོས་བྱེད་པ་དེ་ནི་རེ་བ་དང་སེམས་འགུལ་གྱི་རྣམ་པ་མངོན་པ་ཞིག་ཡིན་པར་བཀའ་བསྩལ་ཡོད་པ་དང་། ལྷག་དོན་༸གོང་ས་མཆོག་གིས་སྐུ་ཞབས་ཀེཇ་རི་ཝལ་མཆོག་ལ་རྒྱལ་ས་དི་ལླཱིའི་མི་མང་གི་བསམ་དོན་འགྲུབ་པའི་ཐུགས་སྨོན་མཛད་འདུག དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་སྤྱི་ཁྱབ་བློན་ཆེན་མཆོག་ལ་བོད་མིའི་སྒྲིག་འཛུགས་དང་བོད་མི་སྤྱི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུས་ཏེ་སྐུ་ཞབས་ཀེཇ་རི་ཝལ་མཆོག་སླར་ཡང་འོས་བསྡུའི་རྒྱལ་ཁ་ཐོབ་པ་དེས་མང་ཚོགས་ནས་ཁོང་གི་འགོ་ཁྲིད་དང་ཁོང་གི་ཆབ་སྲིད་ཚོགས་པར་ཡིད་ཆེས་བློ་སྐྱེལ་གནང་གི་ཡོད་པ་ཞིག་མཚོན་པ་མ་ཟད།  ཁོང་གི་གཞུང་འཛིན་ཚོགས་པ་ནས་དི་ལླཱིར་གནས་བཞུགས་བོད་མི་ཡོད་དོ་ཅོག་ལ་རྒྱབ་སྐྱོར་གནང་བ་དེ་དག་རྣམ་ཀུན་ནས་ཚོར་བཞིན་ཡོད་པ་དང་། ལྷག་དོན་དི་ལླཱི་གཞུང་ནས་སློབ་གྲྭ་ཁག་ཏུ་ ༸གོང་ས་མཆོག་གི་དགོངས་གཞི་ལས་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་ཡི་རངས་བསྔགས་བརྗོད་གནང་ཡོད་པ་རེད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གིས་ཀྱང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་འབྲེལ། སྐུ་ཞབས་ཀེཇ་རི་ཝལ་མཆོག་དང་ཁོང་གི་ཆབ་སྲིད་ཚོགས་པས་བོད་དོན་ཐོག་རྒྱབ་སྐྱོར་གཡོ་མེད་པར་གནང་ཁག་ལ་ཐུགས་རྗེ་ཆེ་ཞུས་པ་དང་ཆབས་ཅིག དི་ལླཱི་གཞུང་གི་སློབ་གྲྭ་ཁག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལས་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་བསྔགས་བརྗོད་ཞུས་ཏེ་བསླབ་གཞི་དེས་སླད་མར་མི་རབས་གཞོན་པ་ཚོར་ཕན་ངེས་ཡིན་པ་གསུངས་འདུག ཚོགས་གཞོན་མཆོག་གིས་ད་དུང་དི་ལླཱི་གཞུང་འཛིན་ནས་ཁུལ་དེར་གནས་བཞུགས་བོད་མི་དང་བོད་སྒར་བསམ་ཡས་གླིང་གི་བོད་མིར་རྒྱབ་སྐྱོར་དང་། དེ་བཞིན་ཕྱི་ལོ་ ༢༠༡༦ ལོར་ལཱལ་ཀི་ལར་སུད་ཚོང་གཉེར་མཁན་རྣམས་ཀྱི་ཁྲོམ་རར་མེ་སྐྱོན་ཤོར་སྐབས་རོགས་རམས་གནང་བར་ཐུགས་རྗེ་ཆེ་ཞུས་འདུག ལྷག་དོན་ཁོང་གི་ཆབ་སྲིད་ཚོགས་པ་ Aam Aadmi Party ནས་སླད་མར་བོད་མིར་དེ་འབྲེལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་གནང་ཡོད་པ་རེད། གཞི་རྩའི་སྐུ་ཞབས་ Kejriwal མཆོག་ད་རེས་རྒྱལ་ས་དི་ལླཱི་ནས་འོས་བསྡུའི་རྒྱལ་ཁ་ཐོབ་པ་དེ་ཐེངས་གསུམ་པ་ཆགས་ཀྱི་ཡོད་པ་དང་། དི་ལླཱི་མངའ་སྡེ་གྲོས་ཚོགས་ནང་ཞབས་སྟེགས་ ༧༠ ཡོད་པའི་ཁྲོད་ད་རེས་ Aam Aadmi ཆབ་སྲིད་ཚོགས་པར་ཞབས་སྟེགས་ ༦༢ ཐོབ་ཏེ་ཚད་མཐོའི་རྒྱལ་ཁ་ཐོབ་ཡོད་པ་རེད། དྲྭ་ལམ་ཁག་ཏུ་གནས་ཚུལ་སྤེལ་བར་གཞིགས་ན་ཀེཇ་རི་ཝལ་མཆོག་གི་ཆབ་སྲིད་ཚོགས་པར་བསྐྱར་དུ་རྒྱལ་ཁ་ཐོབ་པ་ནི་འདས་པའི་ལོ་ལྔའི་ནང་ཁོང་གི་ཆབ་སྲིད་ཚོགས་པས་ལས་དོན་ཡག་པོ་གནང་བར་ངོས་འཛིན་གྱིས་མང་ཚོགས་ནས་འོས་འཕེན་ཡོད་སྐོར་གསུང་བཞིན་འདུག