Tibetan Royal Year of 2151 | Year of the Wood Dragon

བོད་མིའི་སྒྲིག་འཛུགས།

སྤུ་རུ་ཝ་ལ་ས་སྐྱ་གཞིས་ཆགས་ཀྱི་ངོས་ནས་ཐོག་མའི་དམིགས་ཡུལ་ལྟར་ཕྱག་ལས་གནང་དགོས།

དེ་རིང་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེ་ནང་ནང་རྟེན་གཞི་བྱས་པའི་སྤུ་རུ་ཝ་ལ་ས་སྐྱ་གཞིས་ཆགས་དབུ་བརྙེས་ནས་མི་ལོ་ ༥༠ འཁོར་བའི་དུས་དྲན་མཛད་སྒོ་ཚོགས་པ་དང་འབྲེལ། འཁོན་རིགས་བསྟན་པའི་གསལ་བྱེད་༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་གིས་ས་སྐྱ་གཞིས་ཆགས་ཀྱི་ངོས་ནས་ས་གནས་བོད་མིའི་ཤེས་ཡོན་དང་འཕྲོད་བསྟེན། དེ་བཞིན་འཚོ་བའི་གནས་བབས་སོགས་ལ་དམིགས་པའི་ཐོག་མའི་དམིགས་ཡུལ་ལྟར་ཕྱག་ལས་གནང་གལ་ཡིན་པར་ལམ་སྟོན་བཀྲིན་བསྩལ་འདུགསྤུ་རུ་ཝ་ལར་རྟེན་གཞི་བྱས་པའི་༸དཔལ་ས་སྐྱའི་མ་དགོན་བཤད་གྲྭ་ཐུབ་བསྟན་རྣམ་རྒྱལ་གླིང་དུ་ཚོགས་པའི་དུས་དྲན་མཛད་སྒོའི་ཐོག་༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་དང་༸དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་རྣམ་གཉིས་དབུ་བཞུགས་ཀྱིས་གཙོས་པའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག དེ་བཞིན་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་མཆོག་དང་སྤྱི་འཐུས་རྒྱུན་ལས། སེར་སྐྱ་མང་ཚོགས་སོགས་ཆེད་ཕེབས་གནང་ཡོད་པ་རེད།སྐབས་དེར་༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་གིས་སྤུ་རུ་ཝ་ལ་ས་སྐྱ་གཞིས་ཆགས་ཀྱི་ལོ་རྒྱུས་ངོ་སྤྲོད་གནང་བའི་ཐོག་ནས་གསུང་བཤད་དབུ་འཛུགས་གནང་བའི་ཁྲོད། སྐབས་དེར་གཞིས་ཆགས་ཐོག་མ་གསར་འཛུགས་གནང་མཁན་དང་སྐུ་ལས་བསྐྱོན་མཁན་མི་རབས་རྒན་པ་ཚོའི་སྐོར་གསུངས་ཏེ་ང་ཚོས་མི་རབས་རྒན་པ་དེ་དག་གི་བྱས་རྗེས་དྲན་གསོ་གནང་གལ་ཡིན་པ་དང་ལྷག་དོན་བོད་མི་རྣམས་ད་ཆ་བཙན་བྱོལ་ནང་ཞི་བདེ་བག་ཕེབས་ངང་གནས་བཞིན་པ་དེ་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་སྐུ་དྲིན་དང་དེ་བཞིན་རྒྱ་གར་གཞུང་མང་གི་མཐུན་འགྱུར་ལ་བརྟེན་ནས་ཡིན་པ་བཀའ་བསྩལ་བ་དང་ཆབས་ཅིག ས་སྐྱ་གཞིས་ཆགས་ཀྱི་ངོས་ནས་ས་གནས་བོད་མིའི་ཤེས་ཡོན་དང་འཕྲོད་བསྟེན། དེ་བཞིན་འཚོ་བའི་གནས་བབས་སོགས་ལ་དམིགས་པའི་ཐོག་མའི་དམིགས་ཡུལ་ལྟར་འབད་བརྩོན་གྱིས་ཕྱག་ལས་གནང་གལ་ཡིན་པར་ལམ་སྟོན་བཀྲིན་བསྩལ་འདུགལྷག་དོན་དེ་རིང་གི་དུས་དྲན་མཛད་སྒོ་དང་བསྟུན་ས་སྐྱའི་སེར་སྐྱ་མི་མང་ནས་༸དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་བརྟན་བཞུགས་བསྟར་འབུལ་ཞུས་སྐབས་རིན་པོ་ཆེ་མཆོག་གིས་བོད་མི་ཚོའི་ངོས་ནས་རེ་སྨོན་ཞུས་པ་ལྟར་སྐུ་ཚེ་ཡུན་རིང་བཞུགས་ཐུབ་པར་ཐུགས་སྨོན་གནང་གི་ཡིན་ཞེས་བཀའ་བསྩལ་འདུགསྲིད་སྐྱོང་བློ་བཟང་སེང་གེ་མཆོག་གིས་༸དཔལ་ས་སྐྱ་བདག་ཁྲི་རིན་པོ་ཆེ་མཆོག་ནས་སྐུ་ཚེ་ཡུན་རིང་བཞུགས་རྒྱུའི་བཀའ་བཞེས་བཟང་པོ་སྨིན་བསྩལ་མཛད་པར་ཐུགས་རྗེ་ཆེ་ཞེས་ཞུས་པ་དང་ཆབས་ཅིག རིན་པོ་ཆེ་མཆོག་ཐོག་མ་བཙན་བྱོལ་ལ་ཆིབས་བསྒྱུར་མཛད་པ་ནས་བཟུང་སྟེ་ད་བར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་འོག་རླབས་ཆེན་གྱི་མཛད་འཕྲིན་སྣ་མང་བསྐྱངས་ཡོད་པ་དང་། ལྷག་དོན་༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་ ༤༡ པ་མཆོག་ནས་༸དཔལ་ས་སྐྱའི་ཁྲི་འཛིན་ལམ་ལུགས་གསར་གཏོད་མཛད་པ་དེ་རླབས་ཆེན་གྱི་མཛད་རྗེས་ཤིག་ལ་ངོས་འཛིན་ཞུ་བཞིན་ཡོད་སྐོར་སྙན་གསེང་ཞུས་འདུགརྩ་བའི་སྤུ་རུ་ཝ་ལ་ས་སྐྱ་གཞིས་ཆགས་ནི་ཕྱི་ལོ་ ༡༩༦༩ ལོའི་ཕྱི་ཟླ་ ༧ ཚེས་ ༢༤ ཉིན་སིམ་ལར་ཡོད་པའི་ཧི་མཱ་ཅལ་མངའ་སྡེའི་དེབ་སྐྱེལ་ལས་ཁུངས་སུ་དབྱིན་སྐད་དུ་ Sakya Tibetan Society ཞེས་པ་དང་བོད་སྐད་དུ་ས་སྐྱ་བོད་མིའི་ཚོགས་པ་ཞེས་པའི་མིང་ཐོག་ཏུ་ཁྲིམས་མཐུན་དེབ་སྐྱེལ་བྱུང་ཡོད། འོན་ཀྱང་སྤྱི་ཚོགས་ནང་ཡོངས་གྲགས་སུ་སྤུ་རུ་ཝ་ལ་ས་སྐྱ་གཞིས་ཆགས་ཞེས་བརྗོད་ཀྱི་ཡོད་པ་དང་ཕྱིས་སུ་ཕྱི་ལོ་ ༡༩༦༩ ལོར་མི་མང་བྱིངས་མ་ན་ལི་ནས་སྤུ་རུ་ཝ་ལར་གནས་སྤོས་གནང་ཞིང་། ཕྱི་ལོ་ ༡༩༦༩ ཟླ་ ༡༡ ཚེས་ ༡༠ ཉིན་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གཞིས་ཆགས་སུ་ཐོག་མར་ཆིབས་བསྒྱུར་བཀའ་དྲིན་བསྐྱངས་ཏེ་དུས་ཡུན་བདུན་ཕྲག་གསུམ་ཙང་རིང་གཞིས་ཆགས་སུ་བཞུགས་ཞག་མཛད་ནས་ཕྱི་ལོ་ ༡༩༦༩ ཟླ་ ༡༡ ཚེས་ ༢༡ ཉིན་རིན་པོ་ཆེ་མཆོག་གིས་གཞིས་ཆགས་དབུ་འབྱེད་གནང་ཡོད་པ་རེད། ༸སྐུ་དཔར་༸དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་གི་ངོ་དེབ།

བོད་ཕྲུག་ཞིག་ཡིན་ཚེ་ལོ་ནའི་བབས་ཀྱི་ཁྱད་པར་མེད་པར་སྐྱབས་བཅོལ་ལག་དེབ་གསར་བཟོ་བྱེད་དགོས།

རྒྱ་གར་ནང་སྐྱེས་མིན་ལ་ལྟོས་མེད་བོད་ཕྲུག་ཞིག་ཡིན་ཕྱིན་ཆད་ལོ་ནའི་བབས་ཀྱི་ཁྱད་པར་གང་ཡང་མེད་པར་སྐྱབས་བཅོལ་ལག་དེབ་འམ་ RC གསར་བཟོ་བྱེད་དགོས་པ་ཡོངས་བསྒྲགས་གནང་འདུག ཕྱི་ལོ་ ༢༠༡༨ ཟླ་ ༤ ཚེས་ ༢༥ ཉིན་རྒྱ་གར་དབུས་གཞུང་ནང་སྲིད་ལས་ཁུངས་ནས་རྒྱ་གར་ནང་གནས་སྡོད་བྱེད་མཁན་གྱི་བོད་རིགས་ཡིན་ཕྱིན་ཆད་ལོ་ནའི་བབས་ཀྱི་ཁྱད་པར་གང་ཡང་མེད་པར་རྒྱ་གར་ནང་གནས་སྡོད་ཆོག་པའི་སྐྱབས་བཅོལ་ལག་དེབ་བཟོ་དགོས་པའི་སྲིད་བྱུས་གསར་པའི་བཀའ་རྒྱ་དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་སུ་འབྱོར་དོན་ལྟར་ཉེ་ལམ་ཟླ་ ༢ ཚེས་ ༡༡ ཉིན་བདེ་སྲུང་ལས་ཁུངས་ནས་རྒྱ་གར་ནང་ཡོད་པའི་བོད་པའི་ས་གནས་འགོ་འཛིན་ཁག་གི་ལས་ཁུངས་བརྒྱུད་བོད་ཕྲུག་ཚོས་སྐྱབས་བཅོལ་ལག་དེབ་བཟོ་དགོས་པའི་བཀའ་རྒྱ་ཞིག་གནང་ཡོད་པ་རེད། ཕྲུ་གུ་ཚོའི་སྐྱབས་བཅོལ་ལག་དེབ་བཟོ་བར་དགོས་ངེས་ཆ་རྐྱེན་དང་གསར་བཟོའི་བརྒྱུད་རིམ་ནི་རྒྱ་གར་གྱི་ས་གནས་གང་རུང་ཞིག་ཏུ་སྐྱེས་པའི་སྐྱེས་ཚེས་ལག་ཁྱེར་དང་ཕ་མའི་སྐྱབས་བཅོལ་ལག་ཁྱེར། དེ་བཞིན་ཕྱེད་པར་གཅིག་བཅས་ཚང་ཐོག་ཁ་བྱང་རྩ་འཛིན་གྱི་ཆེད་ས་གནས་འགོ་འཛིན་གྱི་ལས་ཁུངས་དང་བདེ་སྲུང་ལས་ཁུངས་བཅས་ནས་རྒྱབ་གཉེར་གནང་བའི་ཡི་གེ་བསྣམས་ཏེ་ཉེན་རྟོག་ལས་ཁུངས་སུ་ཡིག་ཆར་ཞིབ་བཤེར་གནང་ཕྱིར་ཆེད་བསྐྱོད་ཀྱིས་དྲྭ་ཐོག་ནས་དེབ་སྐྱེལ་གནང་དགོས་པ་དང་། ནམ་ཞིག་སྐྱབས་བཅོལ་ལག་དེབ་གྲུབ་མཚམས་སུ་རང་ཉིད་ཀྱི་གློག་འཕྲིན་བརྒྱུད་འབྱོར་གྱི་ཡོད་པ་རེད་འདུག དྷ་ས་ས་གནས་འགོ་འཛིན་ཟླ་བ་རིན་ཆེན་ལགས་ཀྱིས་བོད་མིའི་སྐྱབས་བཅོལ་ལག་དེབ་དང་འབྲེལ་བའི་དཀའ་ངལ་ཞུ་བར་ཡོང་མཁན་མང་དག་ཅིག་ཡོད་སྐོར་གསུངས་པ་དང་། དེ་དག་ལས་བལ་ཡུལ་ནས་ཡིན་པ་གང་ཞིག་སྐྱབས་བཅོལ་ལག་དེབ་མེད་མཁན་བོད་རིགས་ཁྱོན་ ༥༠༠ ཙམ་ལ་སྐྱབས་བཅོལ་ལག་དེབ་ཞུས་ཟིན་ཡོད་པ་མ་ཟད། སྐྱབས་བཅོལ་ལག་དེབ་མེད་མཁན་བོད་རིགས་ཁག་ཅིག་ཡོང་བཞིན་ཡོད་པ་ལྟར་དེ་དག་གི་ཐོ་གཞུང་བསགས་ནས་རིམ་བཞིན་བཟོ་རྒྱུར་འབད་མུས་ཡིན་པ་གསུངས་ཡོད། རྩ་བའི་རྒྱ་གར་དུ་གནས་པའི་བོད་མི་ཚོས་སྐྱབས་བཅོལ་ལག་དེབ་ཀྱི་དུས་འགྱངས་དེ་ལོ་རེར་ཐེངས་གཅིག་ཞུ་དགོས་ཀྱི་ཡོད་པ་དེ་ལྟར་ཡང་ཉེ་ལམ་ལོ་ཤས་ནས་བཟུང་ས་གནས་ཁག་ཅིག་གི་ནང་ལོ་ལྔ་རེའི་མཚམས་སུ་དུས་འགྱངས་ཞུ་དགོས་པ་གསར་བཟོ་གནང་ཡོད་པ་མ་ཟད། རྒྱ་གར་གཞུང་གིས་སྐྱབས་བཅོལ་ལག་དེབ་དུས་ཐོག་ཏུ་དུས་འགྱང་མ་ཞུས་ཚེ་ཨ་སྒོར་ ༣༠༠ ནས་ ༥༠༠ བར་ཉེས་ཆད་བསྐྱེལ་རྒྱུར་ཐག་གཅོད་གནང་རྒྱུའི་གསལ་བསྒྲགས་སྤེལ་ཡོད་པ་རེད། དྷ་ས་ས་གནས་འགོ་འཛིན་ཟླ་བ་རིན་ཆེན་ལགས་ཀྱིས་དྷ་སའི་ཁུལ་གྱི་བོད་མི་ ༧༠ ཙམ་ནས་རྒྱ་གར་གཞུང་གི་སྐྱབས་བཅོལ་ལག་དེབ་དུས་འགྱངས་ཀྱི་ཉེས་ཆད་དེ་ཆེ་དྲགས་པས་ཉེས་ཆེད་ཆག་ཡང་ཡོང་བའི་ཞུ་སྙན་ཕུལ་ཡོད་སྟབས་ས་གནས་འགོ་འཛིན་ལས་ཁུངས་ནས་ངལ་སེལ་སླད་བདེ་སྲུང་ལས་ཁུངས་ཀྱི་དྲུང་ཆེར་སྙན་སེང་ཞུས་ཡོད་སྐོར་གསུངས་ཡོད། གཞི་རྩའི་དྷ་ས་ས་གནས་ཁུལ་དུ་ད་བར་ས་གནས་རང་ནས་ཡིན་པའི་བོད་རིགས་ ༩༥༠༠ ལྷག་ཙམ་དང་ས་གནས་གཞན་གྱི་སྐྱབས་བཅོལ་ལག་དེབ་ཡོད་པ་གང་ཞིག་དྷ་སའི་ཁུལ་དུ་བཞུགས་ཞག་གནང་མཁན་གྱི་གྲངས་འབོར་ ༡༥༠༠ མ་ཟིན་ཙམ་ཞིག་ལ་སྐྱབས་བཅོལ་ལག་དེབ་ཡོད་པ་རེད་འདུག

སྦེལ་ཀོབ་ཏུ་བོད་ཀྱི་ཞོ་སྟོན་རྒྱས་པ་ཐེངས་ ༢༤ པ་དབུ་འཛུགས།

དེ་རིང་ཟླ་ ༢ ཚེས་ ༡༥  ཉིན་བོད་ཀྱི་ཟློས་གར་ཚོགས་པས་གོ་སྒྲིག་ཞུས་པའི་བོད་ཀྱི་ཞོ་སྟོན་རྒྱས་པ་ཐེངས་ ༢༤ པ་རྒྱ་གར་ལྷོ་ཕྱོགས་བོད་མིའི་གཞིས་ཆགས་སྦེལ་ཀོབ་ཏུ་དབུ་འཛུགས་གནང་སོང་། བོད་ཀྱི་ཞོ་སྟོན་ཐེངས་ ༢༤ པའི་ཐོག་རྒྱ་བལ་གཉིས་ཀྱི་ནང་ཡོད་པའི་ཀ་སྦུག་དང་ཀོ་ལི་གྷར། མོན་གྷོ་ཌ། སྦེལ་ཀོབ། དེ་བཞིན་བོད་ཀྱི་ཟློས་གར་ཚོགས་པ་བཅས་བཙན་བྱོལ་བོད་མིའི་ལྷ་མོ་ཚོགས་པ་ལྔ་ཆེད་ཕེབས་ཀྱིས་མཉམ་ཞུགས་གནང་ཡོད་པ་རེད།དེ་རིང་གི་འཁྲབ་སྟོན་དབུ་འབྱེད་མཛད་སྒོར་མི་སྣ་གཙོ་བོ་ལྷོ་སྤྱི་ཆོས་འཕེལ་ཐུབ་བསྟན་ལགས་ཕེབས་ཡོད་པ་དང་ཁོང་གིས་ཞོ་སྟོན་ལྷ་མོའི་འཁྲབ་སྟོན་དང་འབྲེལ་བའི་གསུང་བཤད་གནང་ཡོད། དེ་བཞིན་བོད་ཀྱི་སྲོལ་རྒྱུན་ལྷ་མོའི་ལོ་རྒྱུས་ཀྱི་འཕེལ་རིམ་སྙིང་བསྡུས་ངོ་སྤྲོད་ཀྱང་གནང་ཡོད་པ་རེད།གྲུབ་ཆེན་ཐང་སྟོང་རྒྱལ་པོའི་སྐུ་ཚེའི་ལོ་རྒྱུས་གལ་ཆེ་ཁག་སྙིང་བསྡུས་སུ་ངོ་སྤྲོད་གནང་བ་དང་འབྲེལ་དུས་རབས་ ༡༤ པའི་ནང་བྱོན་པའི་བོད་ཀྱི་སྲོལ་རྒྱུན་ལྷ་མོའི་རིག་གཞུང་ཐོག་མར་གསར་གཏོད་གནང་མཁན་གྲུབ་ཆེན་ཐང་སྟོང་རྒྱལ་པོའི་ལོ་རྒྱུས་ལ་བལྟས་ཚེ་ཁོང་དགུང་ལོ་ ༡༢༥ བཞུགས་རིང་ཁོང་གིས་བོད་ཀྱི་གསོ་བ་རིག་པ་དང་འཛུགས་སྐྲུན་འཆར་འགོད། ལྕགས་ཟམ་གསར་རྒྱག་གནང་བསོགས་མདོར་ན་བོད་ཀྱི་སྤྱི་ཚོགས་དང་རིག་གནས་ཐད་བླ་ན་མེད་པའི་མཛད་རྗེས་བཞག་པའི་རླབས་ཆེན་གྱི་སྐྱེས་བུ་ཞིག་ཡིན་པ་སོགས་གསུངས་པ་དང་ཆབས་ཅིག་ཏུ་དེ་རིང་ནི་ང་ཚོས་ཁོང་ནས་བོད་མི་རིགས་ལ་རླབས་ཆེན་གྱི་མཛད་རྗེས་བཞག་པ་དེ་དག་གི་བཀའ་དྲིན་དྲན་པའི་སྒོ་ནས་ གུས་བཏུད་དང་རྗེས་དྲན་ཞུ་དགོས་པའི་དུས་ཚིགས་ཁྱད་པར་བ་ཞིག་ཡིད་པ་གསུངས་ཡོད།ལྷག་པར་དུ་ལོ་ངོ་ ༦༠༠ ལྷག་གི་ལོ་རྒྱུས་ལྡན་པའི་བོད་ཀྱི་ཐོུང་མ་ཡིན་པའི་སྲོལ་རྒྱུན་ལྷ་མོའི་རིག་གཞུང་གི་ནང་དོན་དང་གལ་གནད་སྐོར་ངོ་སྤྲོད་དང་འབྲེལ་མང་ཚོགས་ཚང་མས་ལྷ་མོའི་རིག་གཞུང་དེ་མི་ཉམས་རྒྱུན་འཛིན་གནང་དགོས་གལ་ཡིན་པ་གསུངས་སོང་།བོད་ཀྱི་ཟློས་གར་ཚོགས་པའི་དབུ་འཛིན་ངག་དབང་ཡོན་ཏན་ལགས་ཀྱིས་བོད་ཀྱི་ཞོ་སྟོན་སྐོར་ངོ་སྤྲོད་སྙིང་བསྡུས་དང་བོད་ཀྱི་ཟློས་གར་ཚོགས་པའི་ལོ་རྒྱུས། དེ་བཞིན་ལས་བསྡོམས་སྙན་སྒྲོན་གནང་བ་དང་ཆབས་ཅིག བཙན་བྱོལ་ནང་ད་ཡོད་ཡན་ལག་ལྷ་མོ་ཚོགས་པ་ཁག་ ༡༠ ཙམ་ཡོད་ཀྱང་ད་རེས་བོད་ཀྱི་ཞོ་སྟོན་ཐེངས་ ༢༤ པའི་ཐོག་ལྷ་མོའི་ཚོགས་པ་ལྔ་ལས་མཉམ་ཞུགས་ཐུབ་མེད་པ་ནི་ལྷ་མོ་ཚོགས་པ་གཞན་ཁག་གི་ཚོགས་མི་དེ་དག་འདི་ལོའི་དགུན་ཚོང་མཇུག་མ་སྒྲིལ་བ་དང་བལ་ཡུལ་ལྷ་མོ་ཚོགས་པའི་སློབ་ཕྲུག་རྣམས་ལ་སློབ་གྲྭའི་གསེང་མེད་པ་བཅས་ལ་བརྟེན་ནས་ཡིན་སྐོར་གསུངས་ཡོད།དེ་རིང་ཕྱི་ཚེས་ ༡༥ ཉིན་དང་པོར་ཀ་ལོན་སྦུག་གི་ལྷ་མོའི་རུ་ཁག་ནས་ཁྱིའུ་པད་མ་འོད་འབར་གྱི་འཁྲབ་གཞུང་གཟིགས་འབུལ་ཞུས་ཡོད་པ་དང་། ཉིན་གཉིས་པར་མོན་གྷོ་འདོད་རྒུ་གླིང་ལྷ་མོ་ཚོགས་པས་གཅུང་པོ་དོན་ཡོད་དོན་གྲུབ་ཀྱི་འཁྲབ་གཞུང་། ཉིན་གསུམ་པར་ཀོ་ལི་གྷལ་དོན་ལྡན་གླིང་གི་ལྷ་མོ་ཚོགས་པས་སྣང་ས་འོད་འབུམ།  ཉིན་བཞི་པར་སྦེལ་ཀོབ་ལྷ་མོ་ཚོགས་པས་གཟུགས་ཀྱི་ཉི་མ། ཉིན་ལྔ་པར་བོད་ཀྱི་ཟློས་གར་ཚོགས་པས་སྟོན་པའི་མཛད་རྣམ་བཅས་འཁྲབ་སྟོན་གནང་གི་ཡོད་པ་མ་ཟད་ཕྱི་ཚེས་ ༡༦ ནས་ ༡༨ བར་ཉིན་གསུམ་རིང་ཕྱི་དྲོ་བོད་ཀྱི་ཟློས་གར་ཚོགས་པས་ཨ་ཀ་མ་དེང་དུས་བོད་ཀྱི་རོལ་དབྱངས་གླུ་གཞས་དང་སྲོལ་རྒྱུན་བོད་ཀྱི་ཡུལ་ལུང་ཁག་གི་ཞབས་གཞས་གཟིགས་འབུལ་ཞུ་རྒྱུ་རེད་འདུགགཞན་ཡང་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་མཆོག་གིས་བཞུགས་སྒར་དྷ་སར་བཅའ་བཞུགས་སྐུ་ཞབས་བསོད་ནམས་དབང་འདུས་ལགས་ཀྱིས་རྩོམ་སྒྲིག་གནང་བའི་བོད་ཀྱི་གནའ་བོའི་ཐོུང་མ་ཡིན་པའི་སྒྱུ་རྩལ་རིག་གནས་ཨ་ཅེ་ལྷ་མོའི་འཁྲབ་གཞུང་ནང་གི་འཁྲབ་ཆས་དང་འབག་གི་པར་རིས་སོགས་ཀྱི་མཚོན་དོན་སྐོར་ངོ་སྤྲོད་གནང་བའི་ཚོན་ཁྲ་ཅན་གྱི་དཔེ་དེབ་དང་ཀ་སྦུག་ལྷ་མོ་ཚོགས་པས་བཏོན་པའི་ལྷ་གཞུང་དང་འབྲེལ་བའི་འོད་སྡེར་བཅས་དབུ་འབྱེད་གནང་ཡོད།

བོད་མི་སྤྱི་བོ་གནམ་བསྟན་ཡོངས་ཀྱིས་བོད་ཀྱི་རྩ་དོན་ཐོག་ཐུགས་ཁུར་ཆེ་ཙམ་བཞེས་དགོས།

ཁ་ཉིན་ཟླ་ ༢ ཚེས་ ༡༢ ཉིན་ཨ་རི་རྒྱལ་ས་ཝ་ཤིང་ཊོན་ནང་རྟེན་གཞི་བྱས་པའི་ཨ་རི་བོད་ཀྱི་སྐུ་ཚབ་དོན་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། ཕྱོགས་བཞུགས་བོད་མི་མང་སྤྱི་འཐུས་རྣམ་གཉིས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས། འབྲེལ་མཐུད་འགན་འཛིན་བསྟན་ཆོས་རྒྱ་མཚོ་ལགས། དེ་བཞིན་ཨ་རིའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ཚོགས་གཙོ་ལྷན་འཛོམས་ཐོག་བཞུགས་མོལ་ཚོགས་འདུ་ཞིག་ཚོགས་འདུགབོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་བཞུགས་མོལ་ཚོགས་འདུའི་ཐོག་སྲིད་སྐྱོང་མཆོག་གིས་བཀའ་ཤག་གི་ཕྱག་ལས་གནང་ཕྱོགས་དང། ལྔ་དང་ལྔ་བཅུའི་འཆར་སྣང་། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི། བོད་མི་ཕན་ཚུན་དབར་འཆམ་མཐུན་གོང་འཕེལ་གནང་དགོས་གལ་སོགས་ཀྱི་སྐོར་གསུངས་འདུག འདི་ལོའི་གསུམ་བཅུའི་དུས་དྲན་ནི་བོད་མི་རྣམས་རང་ཡུལ་ནས་བཙན་བྱོལ་དུ་གྱར་ནས་མི་ལོ་  ༦༠ འཁོར་གྱི་ཡོད་པའི་དུས་ཚིགས་གལ་འགངས་ཅན་ཞིག་དང་སྒོས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་༸སྐུ་འཚོ་བཞུགས་མ་མཛད་པའི་དུས་སྐབས་སུའང་བོད་མིའི་འཐབ་རྩོད་རྒྱུན་སྐྱོང་གནང་དགོས་སྐོར་བཀའ་སློབ་བསྩལ་བ་ལུང་འདྲེན་དང་འབྲེལ། བོད་མི་སྤྱི་བོ་གནམ་བསྟན་ཡོངས་ཀྱིས་བོད་ཀྱི་རྩ་དོན་ཐོག་ཐུགས་ཁུར་ཆེ་ཙམ་བཞེས་དགོས་པའི་སྐུལ་ལྕག་གནང་ཡོད་པ་རེད།སྐབས་དེར་སྤྱི་མཐུན་ཚོགས་པ་ཁག་གི་ཚོགས་གཙོ་རྣམ་པས་ས་གནས་སོ་སོའི་གནས་སྟངས་དང་དེ་འབྲེལ་དགོངས་འཆར་རྣམས་སྲིད་སྐྱོང་མཆོག་ལ་སྙན་སེང་ཞུས་ཡོད་པ་རེད། རྩ་བའི་སྲིད་སྐྱོང་མཆོག་ཨ་རི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོར་ལྷན་ཞུགས་གནང་རྒྱུའི་ཆེད་གཞུང་འབྲེལ་ཕྱོགས་སྐྱོད་གནང་བ་མ་ཟད། དེ་རིང་ཨ་རི་ནང་རྟེན་གཞི་བྱས་པའི་ Rhode Island ཞི་བདེ་བསྟི་གནས་ཁང་གི་གཙུག་ལག་ཁང་ནས་གདན་ཞུ་གནང་དོན་ལྟར་འཚེ་མེད་ཞི་བའི་འཐབ་རྩོད་དང་བོད་མིའི་ཕྱི་དྲིལ་གྱི་འབྲེལ་ལམ་བརྒྱུད་འཛམ་གླིང་ལ་ཞི་བདེའི་སློབ་གསོ་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ། དེ་བཞིན་ Yale མཐོ་སློབ་ཀྱི་སློབ་ཕྲུག་ཆབ་སྲིད་ཚོགས་པར་གསུང་བཤད་གནང་གཏན་ཁེལ་འདུག

ཨ་རི་གཞུང་མང་གཉིས་ནས་བོད་མིར་ཤ་ཚ་དང་རྒྱབ་སྐྱོར་གནང་བའི་བཀའ་དྲིན་ནམ་ཡང་བརྗེད་རྒྱུ་མེད།

ཁ་སང་ཨ་རི་རྒྱལ་ས་ཝ་ཤིང་ཊོན་ཌི་སིར་རྟེན་གཞི་བྱས་པའི་ཨ་རིའི་གྲོས་ཚོགས་ཀྱི་ཚོགས་ཁང་དུ་བོད་མིའི་སྒྲིག་འཛུགས་དང་རྒྱལ་སྤྱིའི་བོད་དོན་ལས་འགུལ་ཁང་། དེ་བཞིན་ཨ་རིའི་རྒྱལ་སའི་མངའ་ཁུལ་བོད་མིའི་སྤྱི་མཐུན་ཚོགས་པ་བཅས་ཐུན་མོང་ནས་གོ་སྒྲིག་ཞུས་པའི་ཐོག་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཚོགས་ཡོད་པ་རེད།ཁ་སང་གི་མཛད་སྒོ་དང་འབྲེལ་བོད་མིའི་སྒྲིག་འཛུགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་མགོན་པོ་༸གང་ཉིད་མཆོག་གིས་བརྙན་པར་བརྒྱུད་གསུང་འཕྲིན་ཞིག་བསྩལ་འདུག་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རི་ནི་ཕྱོགས་གཅིག་ནས་འཛམ་གླིང་གི་སྟོབས་ཆེན་རྒྱལ་ཁབ་གཅིག་དང་། སྟོབས་ཆེན་རྒྱལ་ཁབ་དེའང་རང་དབང་དང་མང་གཙོ། ཁྲིམས་ཀྱི་དབང་སྒྱུར་ལྡན་པ། འཛམ་གླིང་སྤྱིའི་མིག་ལྟོས་བྱེད་ས་ཞིག་ཡིན་པ་མ་ཟད་བློ་གཏད་བཅོལ་ས་ཞིག་ཀྱང་ཆགས་ཡོད་སྐོར་བཀའ་བསྩལ་བ་དང་ཆབས་ཅིག ལྷག་དོན་མགོན་པོ་༸གང་ཉིད་མཆོག་གིས་ཨ་རིའི་སྲིད་འཛིན་སྔ་རྗེས་རྣམ་པས་བོད་དོན་ཐོག་ཤ་ཚ་དང་རྒྱབ་སྐྱོར། སེམས་ཁུར་གནང་བར་བརྟེན་བོད་རྒྱ་ཆེའི་མི་མང་གི་བསམ་བློའི་ནང་དུ་དངོས་གནས་བོད་མི་ཚོར་ཤ་ཚའི་ཐོག་ནས་རྒྱབ་སྐྱོར་གནང་མཁན་ཚོའི་བཀའ་དྲིན་ནམ་ཡང་བརྗེད་ཀྱི་མ་རེད་ཅེས་བཀའ་བསྩལ་འདུགཨ་རི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོའི་ཐོག་ཨ་རི་གྲོས་ཚོགས་ཀྱི་ཚོགས་གཙོ་ལྕམ་ Nancy Pelosi མཆོག་གིས་དབུས་པའི་ཨ་རི་གྲོས་ཚོགས་ཀྱི་འཐུས་མི་སྐུ་ཞབས་ Jim Mcgovern ལགས་དང་གྲོས་ཚོགས་འཐུས་མི་ཁག་གཅིག།དེ་བཞིན་ཨ་རིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས། ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ James Maloney ལགས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Meccaci ལགས་ཀྱིས་གཙོས་པའི་ཚོགས་མི་རྣམ་པ། ཨ་རིའི་མངའ་ཁུལ་དུ་ཡོད་པའི་བོད་རིགས་སྤྱི་མཐུན་ཚོགས་པའི་ཚོགས་གཙོ། དེ་བཞིན་བོད་དོན་རྒྱབ་སྐྱོར་བ་བཅས་ནས་མཉམ་ཞུགས་གནང་ཡོད་པ་རེད།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་གཉན་འཕྲང་ཅན་གྱི་དུས་སུ་རྒྱལ་སྤྱིའི་ཁྲོད་རྒྱལ་ཁབ་མང་དག་ཅིག་ནས་བོད་མིར་རྒྱབ་སྐྱོར་མ་གནང་བའི་སྐབས་ཨ་མི་རི་ཀའི་གཞུང་ནས་དོགས་ཟོན་མེད་པར་རོགས་སྐྱོར་གང་ཐུབ་ཅི་ཐུབ་གནང་ཡོད་པ་དང་སྦྲགས། བོད་མི་རྣམས་ནས་དུས་རྟག་ཏུ་ཨ་རི་གཞུང་མང་གཉིས་ལ་བློ་གཏད་བཅོལ་སའི་གྲོགས་པོ་ཞིག་ཏུ་ངོས་འཛིན་གནང་གི་ཡོད་པ་གསུངས་སོང་བ་མ་ཟད་འདི་ལོ་བོད་མི་རྣམས་བཙན་བྱོལ་དུ་གྱར་ནས་མི་ལོ་ ༦༠ འཁོར་བ་དང་བསྟུན་བོད་མི་རྣམས་ནས་མི་ལོ་ ༦༠ རིང་ཨ་རི་གཞུང་མང་གཉིས་ཀྱི་རྒྱབ་སྐྱོར་ལ་བརྟེན་ནས་རྒྱ་གཞུང་གི་དྲག་པོའི་སྲིད་བྱུས་ལ་གདོང་ལེན་གནང་ཐུབ་པ་དང་འབྲེལ། བོད་ཀྱི་ལོ་རྒྱུས་ལ་གཞིགས་ཚེ་བོད་དོན་གྱི་འཐབ་རྩོད་ལ་རྒྱབ་སྐྱོར་གཙོ་བོ་གནང་མཁན་ཨ་མི་རི་ཀའི་གཞུང་མང་གཉིས་ཡིན་པར་འགྲེལ་བརྗོད་གནང་འདུག ལྷག་པར་དུ་ཨ་མི་རི་ཀའི་སྲིད་འཛིན་མང་དག་ཅིག་ནས་བོད་ཀྱི་གནད་དོན་ཐོག་རྒྱབ་སྐྱོར་གནང་སྐོར་ལུང་འདྲེན་དང་སྦྲགས་ཏེ་མཛད་སྒོར་ཕེབས་པའི་ལྕམ་ནེན་སི་པི་ལོ་སི་མཆོག་ནས་ད་བར་དེ་མཚུངས་རྒྱབ་སྐྱོར་གནང་བར་ཡི་རངས་བསྔགས་བརྗོད་དང་འབྲེལ་ཐུགས་རྗེ་ཆེ་ཞུས་ཡོད།སྲིད་སྐྱོང་མཆོག་གིས་ད་དུང་ད་ལྟའི་བོད་ནང་གི་གནས་སྟངས་ངོ་སྤྲོད་དང་སྦྲགས། ཨ་མི་རི་ཀའི་གཞུང་ནས་བོད་མིར་གཞིས་ཆགས་སྲ་བརྟན་དང་ཤེས་ཡོན། འཕྲོད་བསྟེན་སོགས་ཀྱི་ཐད་རོགས་སྐྱོར་གནང་བ་མ་ཟད་ཁོང་རང་ཉིད་ལའང་ཨ་རི་གཞུང་གི་མཐུན་རྐྱེན་འོག་ཧར་ཝཊ་མཐོ་སློབ་ཏུ་སློབ་སྦྱོང་གནང་རྒྱུ་གོ་སྐབས་ཐོབ་སྐོར་གསུངས་འདུག ཨ་རི་གྲོས་ཚོགས་ནས་ཉེ་ཆར་ཨ་མི་རི་ཀའི་གཞུང་འབྲེལ་དང་གཞུང་འབྲེལ་མིན་པའི་མི་སྣ་བོད་ནང་རང་དབང་ཐོག་འགྲུལ་སྐྱོད་ཆོག་པ་དང་རྒྱ་གར་རྒྱ་མཚོ་དང་ཞི་བདེ་རྒྱ་མཚོའི་བར་གྱི་ཞི་བདེ་སྲུང་སྐྱོབ་ཀྱི་གྲོས་འཆར་ལ་སོགས་པར་གཏན་འབེབས་གནང་ཐུབ་པར་ཐུགས་རྗེ་ཆེ་ཞུས་པ་མ་ཟད། བོད་ནང་རང་དབང་ཐོག་འགྲུལ་སྐྱོད་ཆོག་པའི་ཁྲིམས་འཆར་དེ་དངོས་སུ་ལག་བསྟར་དང། ཨ་རིའི་ནང་བོད་གནས་འབྲེལ་མཐུད་པ་བསྐོ་གཞག་གནང་ཐུབ་རྒྱུ། དེ་བཞིན་ཨ་རི་གཞུང་ནས་བོད་ལ་རང་སྲིད་རང་སྐྱོང་མ་ཐོབ་ཀྱི་བར་དུ་རྒྱབ་སྐྱོར་མུ་མཐུད་གནང་རོགས་ཞེས་འབོད་སྐུལ་ཞུས་ཡོད་པ་རེད།སྲིད་སྐྱོང་མཆོག་གིས་མཛད་སྒོའི་སྐུ་མགྲོན་གཙོ་བོ་ལྕམ་ Nancy Pelosi མཆོག་ལ་ཐུགས་རྗེ་ཆེ་ཞུ་མཚོན་ཕྱིར་ཆོས་ཀྱི་འཁོར་ལོའི་ཕྱག་རྟགས་ཕུལ་བ་དང་སྦྲགས། ལྕམ་མཆོག་གིས་ང་ཚོའི་བོད་ཀྱི་གནད་དོན་དེ་གོ་སྐབས་ནམ་བྱུང་ལ་རྒྱ་ནག་གི་ཤུགས་རྐྱེན་ལ་ལྟོས་མེད་གླེང་སློང་གནང་དགོས་པ་དེ་གལ་ཆེ་དོན་ཆེ་ཞིག་ཡིན་པ་དང། ད་རེས་ཨ་མི་རི་ཀའི་གྲོས་ཚོགས་ནས་ཨ་རི་མི་སེར་བོད་ནང་རང་དབང་ཐོག་འགྲུལ་སྐྱོད་ཆོག་པའི་གྲོས་འཆར་གཏན་འབེབས་གནང་ཐུབ་པ་ནི་གྲུབ་འབྲས་ཆེན་པོ་ཞིག་ལ་ངོས་འཛིན་ཞུ་བཞིན་ཡོད་པ་གསུངས་པ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་པའི་ལམ་སྟོན་འོག་བོད་མི་རྣམས་ནས་རང་ཉིད་ཀྱི་ཆོས་དང་རིག་གཞུང་སྲུང་སྐྱོབ་གནང་ཐུབ་པར་ཐུགས་རྗེ་ཆེ་ཞུས་འདུག མཛད་སྒོ་དེའི་ཐོག་ཕེབས་པའི་ཨ་རི་གྲོས་ཚོགས་ཀྱི་འཐུས་མི་གཞན་རྣམས་ནས་ཀྱང་གསུང་བཤད་གནང་བ་དང་སྦྲགས། བོད་དོན་གྱི་འཐབ་རྩོད་ལ་རྒྱབ་སྐྱོར་གྱི་རྣམ་པ་ཤུགས་ཆེ་བསྟན་པ་དང་བོད་རིགས་ཁག་ཅིག་ནས་ཐུགས་རྗེ་ཆེ་ཞུའི་གླུ་གཞས་བླངས་ཐོག་མཛད་སྒོ་རྒྱལ་ཁའི་ངང་གྲོལ་ཡོད་པ་རེད།

ལྷོ་ཨ་ཕི་རི་ཀའི་ནང་གི་གཞུང་འབྲེལ་ཕྱོགས་ཕེབས་ལེགས་གྲུབ།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཟླ་ ༢ ཚེས་ ༧ ཉིན་ལྷོ་ཨ་ཕི་རི་ཀའི་ SONA 2019 འམ་ ༢༠༡༩ སོ་ན་གྲོས་ཚོགས་ཀྱི་དབུ་འབྱེད་མཛད་སྒོར་ཡུལ་དེའི་མང་གཙོ་མནའ་སྦྲེལ་ཚོགས་པས་གདན་ཞུ་གནང་དོན་ལྟར་ཟླ་བ་འདིའི་ཚེས་ ༥ ནས་ ༩ བར་ལྷོ་ཨ་ཕི་རི་ཀའི་ནང་གཞུང་འབྲེལ་ཕྱོགས་ཕེབས་གནང་ཡོད་པ་དང་། སྲིད་སྐྱོང་མཆོག་ནས་ཡུལ་དེའི་སྲིད་འཛིན་ཟུར་པ་སྐུ་ཞབས་ F W De Klerk མཆོག་དང་མཇལ་མོལ་གནང་བ་མ་ཟད་ཡུལ་དེའི་ནང་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཨིན་ཁ་ཏ་རང་དབང་ཚོགས་པའི་ཚོགས་མི། དེ་བཞིན་ཡུལ་དེའི་གཙུག་ལག་སློབ་གྲྭའི་ཤེས་ཡོན་མི་སྣ་དང་གསར་འགོད་པ་བཅས་མཇལ་འཕྲད་གནང་འདུགཡུལ་དེའི་མང་གཙོ་མནའ་འབྲེལ་ཚོགས་པའི་གྲོས་ཚོགས་འཐུས་མི་ཁག་གཅིག་དང་ལྷན་འཛོམས་ཐོག་སྲིད་སྐྱོང་མཆོག་ནས་ད་ལྟའི་བོད་ནང་གི་ཛ་དྲག་གནས་སྟངས་གཙོས་པའི་རྒྱ་ནག་གི་སྲིད་བྱུས་རྣམས་ངོ་སྤྲོད་གནང་བ་མ་ཟད་གྲོས་ཚོགས་འཐུས་མི་རྣམ་པས་བོད་ཀྱི་གནད་དོན་ཐོག་གླེང་སློང་གནང་མ་ཐུབ་ཚེ་དེ་ནི་སྨྲ་བརྗོད་རང་དབང་དང་མང་གཙོའི་ལམ་ལུགས་རྣམས་རྩ་ཁྲིམས་གཞིར་བཟུང་ལག་བསྟར་གནང་མ་ཐུབ་པའི་རྣམ་པ་ཡིན་པར་འགྲེལ་བརྗོད་གནང་འདུགདེ་བཞིན་ཚེས་ ༦ ཉིན་སྲིད་སྐྱོང་མཆོག་ནས་ཡུལ་དེའི་སྲིད་འཛིན་ཟུར་པ་ De Klerk མཆོག་དང་མཇལ་མོལ་གནང་སྐབས་བོད་མི་ ༡༥༣ ལྷག་གིས་རང་ལུས་མེར་བསྲེགས་གནང་ཡོད་པའི་ཛ་དྲག་གི་གནས་སྟངས་ལས་ད་ལྟའི་ཆར་བོད་ནང་དུ་ཆབ་སྲིད་ཐོག་དམ་བསྒྲགས་ཇི་ཙམ་ཡོད་མེད་ཚོད་དཔག་ཐུབ་པ་དང་། བོད་མི་དེ་དག་གིས་རང་སྲེག་གནང་སྐབས་བོད་ལ་རང་དབང་དགོས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པའི་དགོས་འདུན་བཏོན་ཡོད་སྐོར་འགྲེལ་བརྗོད་གནང་ཡོད་པ་རེད། སྲིད་འཛིན་ཟུར་པ་མཆོག་ནས་ཀྱང་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲི་ཞུས་པ་དང་སྦྲགས། བོད་མིའི་རང་དབང་འཐབ་རྩོད་ཀྱི་མངོན་འདོད་ལ་རྒྱབ་སྐྱོར་ཡོད་པ་གསུངས་འདུག རྩ་བའི་སྲིད་སྐྱོང་བློ་བཟང་སེང་གེ་མཆོག་གི་ལྷོ་ཨ་ཕི་རི་ཀའི་ནང་གཞུང་འབྲེལ་ཕྱོགས་ཕེབས་འདི་ནི་ཁུལ་དེར་གཞུང་འབྲེལ་ཕྱོགས་ཕེབས་གནང་བ་ཐེངས་གཉིས་པ་དེ་ཡིན་པ་རེད།

ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་དང་མཇལ་མོལ་གནང་བ།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བདུན་ཕྲག་གཅིག་ཙམ་གྱི་རིང་ཉི་ཧོང་དུ་གཞུང་འབྲེལ་ཕྱོགས་བསྐྱོད་གནང་བཞིན་པའི་ཁྲོད། ཁ་སང་ཟླ་ ༡ ཚེས་ ༣༡ ཉིན་སྲིད་སྐྱོང་མཆོག་གིས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Shimomura Hakubun མཆོག་གིས་གཙོས་པའི་འཐུས་མི་བརྒྱད་དང་དམིགས་བསལ་མཇལ་མོལ་གནང་འདུགདེའང་སྲིད་སྐྱོང་མཆོག་གིས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཤེས་རིག་བློན་ཆེན་ཟུར་པ་སྐུ་ཞབས་  Shimomura མཆོག་དང་ཚོགས་གཞོན་སྐུ་ཞབས་ Watanabe Shu མཆོག་རྣམ་གཉིས་ཀྱིས་གཙོས། Yamatani Eriko ལགས།  Furuya Keiji ལགས།  Seichi Eto ལགས། Baba Nobuyuk ལགས། Nagao Takashi ལགས། དེ་བཞིན་  Sakurai Yoshiko ལགས་སོགས་གྲོས་ཚོགས་འཐུས་མི་བརྒྱད་དང་མཇལ་མོལ་གནང་འདུག གྲོས་ཚོགས་འཐུས་མི་རྣམས་དང་ཚོུད་ ༡ ཙམ་རིང་མཇལ་མོལ་གནང་སྐབས་སྲིད་སྐྱོང་མཆོག་གིས་བོད་ནང་གི་གནས་སྟངས་དང་བོད་ནང་གི་ཆེས་ཞན་པའི་གནས་བབས་ལ་གཞིགས་ནས་རྒྱལ་སྤྱིའི་ཚོགས་སྡེ་ཁག་གིས་རྒྱབ་སྐྱོར་གནང་བའི་འོག་ཉེ་ཆར་ Reciprocal Access to Tibet Act of 2018 ཞེས་ཨ་རིའི་མི་སེར་རྣམས་ལ་བོད་དུ་རང་དབང་ཐོག་འགྲུལ་སྐྱོད་ཆོག་པའི་ཁྲིམས་འཆར་དང་རྒྱ་གར་རྒྱ་མཚོ་དང་ཞི་བདེ་རྒྱ་མཚོ་བར་གྱི་ཞི་བདེ་སྲུང་སྐྱོབ་ཀྱི་ཁྲིམས་འཆར་ལ་ཨ་རིའི་སྲིད་འཛིན་ཊམ་མཆོག་གིས་མཚན་རྟགས་བསྐྱོན་ནས་ཁྲིམས་གཞིར་གཏན་འབེབས་གནང་ཡོད་པ་སོགས་སྙན་གསེང་ཞུས་འདུགལྷག་པར་དུ་གྲོས་ཚོགས་ཀྱི་འཐུས་མི་ཚོས་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབས་ཡོང་བར་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གྱི་བསྒྲགས་གཏམ་སྤེལ་བ་དང་། རྒྱ་གཞུང་གིས་བོད་ནང་བོད་ཀྱི་ཐུན་མིན་ལེགས་བྱང་དང་ཤེས་ཡོན། སྐད་ཡིག དེ་བཞིན་ཆོས་དད་རང་དབང་སོགས་ལ་དྲག་གནོན་བྱེད་བཞིན་པར་སྐྱོན་བརྗོད་ཤུགས་ཆེ་གནང་འདུག དེ་དང་ཕྱོགས་མཚུངས་སྲིད་སྐྱོང་མཆོག་གིས་ཁ་སང་ཁ་བའི་འོག་གི་མེ་ལྕེ་ Fire under the Snow ཞེས་པའི་ཉི་ཧོང་བོད་དོན་རྒྱབ་སྐྱོར་ཚོགས་པས་གོ་སྒྲིག་འོག་ཉི་ཧོང་གི་གྲོང་ཁྱེར་ Osaka ནང་མང་ཚོགས་བརྒྱ་ཕྲག་བརྒལ་བར་བོད་ཀྱི་གནད་དོན་ཐོག་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་ཁྱེད་ཅག་ནས་རྒྱ་ནག་གི་སྐོར་ཤེས་དགོས་ཚེ་ཐོག་མར་བོད་སྐོར་ངེས་པར་དུ་ཤེས་དགོས་ཞེས་གསུངས་འདུག བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་སྲིད་སྐྱོང་བློ་བཟང་སེང་གེ་མཆོག་གིས་སྐབས་དེར་བོད་ནང་རྒྱ་ནག་གིས་བཙན་འཛུལ་བྱས་ནས་བསམ་ཡུལ་ལས་འདས་པའི་གནས་ཚུལ་ཐབས་སྡུག་པོ་བྱུང་བ་ལྟར་ཉི་ཧོང་ལའང་དེ་ལྟ་བུ་འབྱུང་སྲིད་པ་རེད་ཅེས་གསུངས་པ་དང་འབྲེལ། རྒྱ་ནག་གིས་བོད་ནང་ཐོག་མར་གཞུང་ལམ་གསར་རྒྱག་ལ་བསྙད་དེ་རིམ་པས་བོད་ཀྱི་ཐུན་མིན་ཁོར་ཡུག་གཏོར་བཤིག་དང་རང་བྱུང་གཏེར་ཁ་སྔོག་འདོན། ནགས་ཚལ་གཅོད་འབྲེག་སོགས་ཀྱི་སྲིད་བྱུང་ངན་པ་ལག་བསྟར་བྱེད་བཞིན་པ་དེ་ད་ཆར་ཨེ་ཤ་ཡ་དང་ཨ་ཕི་རི་ཁ་ཁུལ་དུ་དེ་མཚུངས་སྤེལ་མུས་ཡིན་པ་མ་ཟད། དེ་བཞིན་ཡུ་རོབ་དང་ལྷོ་ཨ་མི་རི་ཁ། ཨོ་སི་ཊོ་ལི་ཡ་རྒྱལ་ཁབ་སོགས་ཀྱི་སྤྱི་ཚོགས་དང་། རིག་གཞུང་། ཆབ་སྲིད་ལས་དོན་ནང་རྒྱ་ནག་གི་ཤུགས་རྐྱེན་ཐེབས་ཀྱི་ཡོད་སྐོར་གསུངས་འདུག ལྷག་དོན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་གཙོས་པའི་ཆོས་དད་རང་དབང་སོགས་ཀྱི་གནས་བབས་དངོས་གླེང་བར་དམ་བསྒྲགས་ཤུགས་ཆེ་བྱ་རྒྱུས་མཚོན་ཤེས་ཡོན་ཐོག་ལའང་རང་དབང་ངང་སློབ་གཉེར་གནང་རྒྱུར་དམ་བསྒྲགས་བྱེད་མུས་ཡིན་པ་དང་། རྒྱ་མི་རིགས་ཀྱི་སློབ་ཕྲུག་ཕྱི་རྒྱལ་གྱི་མཐོ་སློབ་ཁག་ཏུ་སློབ་སྦྱོང་བྱེད་བཞིན་ཁག་ལ་རྒྱ་ནག་གཞུང་གིས་གནོན་ཤུགས་ཧ་ཅང་སྤྲོད་བཞིན་པ་ལྟར། ཉི་ཧོང་གི་ཤེས་ཡོན་བསྟི་གནས་ཁག་གི་ནང་དུའང་དེ་ལྟར་བསླེབ་སྲིད་པས་ངེས་པར་དུ་དོགས་ཟོན་གནང་དགོས་པ་མ་ཟད། ཉི་ཧོང་བ་ཁྱེད་རང་ཚོས་རྒྱ་ནག་གི་སྐོར་ཤེས་དགོས་ཚེ་དང་ཐོག་བོད་སྐོར་ངེས་པར་དུ་ཤེས་དགོས་ཞེས་གསུངས་འདུག ད་དུང་སྲིད་སྐྱོང་མཆོག་གིས་ཤར་ནུབ་རྒྱལ་ཁབ་མང་པོའི་ནང་རྒྱ་ནག་གི་གནོན་ཤུགས་བསླེབས་ཡོད་སྐོར་གསུངས་པ་དང་འབྲེལ་ནས་ཅེཀ་སྤྱི་མཐུན་རྒྱལ་ཁབ་ཀྱིས་རྒྱ་ནག་གི་ཤུགས་རྐྱེན་ལ་གདོང་ལེན་གྱིས་གྲོས་ཚོགས་འཐུས་མི་ ༥༡ ལས་གྲུབ་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཞིག་གསར་འཛུགས་གནང་ཡོད་པ་མ་ཟད་དེ་ཡུ་རོབ་ནང་གི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་དེ་ཆགས་ཡོད་པ་དང་། ཉི་ཧོང་མང་ཚོགས་ཚོས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཚོགས་མི་མང་ཤོས་ཡོད་པའི་ཉི་ཧོང་གི་གྲོས་ཚོགས་འཐུས་མི་ཚོར་བརྒྱུད་སྐུལ་གང་མང་གནང་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་གཞུང་གི་སྐུ་ཚབ་དབར་གྲོས་མོལ་བསྐྱར་གསོ་དང་། བོད་ཀྱི་འགྲོ་བ་མིའི་ཐོབ་ཐང་། རིག་གཞུང་། སྐད་ཡིག ཁོར་ཡུག་སོགས་སྲུང་སྐྱོབ་གནང་རྒྱུར་ཤུགས་སྣོན་གནང་རོགས་ཞེས་འབོད་སྐུལ་ཞུས་འདུག ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་སྐུ་ཞབས་ Nagao Takash ལགས་ཀྱིས་ཉི་ཧོང་བ་ཚོས་བོད་མིའི་ཆོས་དང་རིག་གཞུང་། རང་དབང་སོགས་སྲུང་སྐྱོབ་ཀྱི་ཆེད་ཞབས་འདེགས་ཞུ་ཐུབ་པའི་ནུས་པ་ལྡན་ཡོད་པ་དང་། ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པས་བཙན་བྱོལ་བོད་མིའི་ཤེས་ཡོན་དང་འཕྲོད་བསྟེན་སོགས་ལ་རོགས་རམ་གནང་གི་ཡོད་སྐོར་གསུངས་འདུག དེ་བཞིན་སྲིད་སྐྱོང་མཆོག་ཉི་ཧོང་གི་གནའ་བོའི་རྒྱལ་ས་ Nara ནང་རྟེན་གཞི་བྱས་པའི་ Todai-ji ལྷ་ཁང་དུ་གནས་མཇལ་ཕེབས་འདུག

༸ཀུན་གཟིགས་༸པཎ་ཆེན་རིན་པོ་ཆེ་མཆོག་སྐུ་གཤེགས་ནས་ལོ་ངོ་ ༣༠ འཁོར་བའི་དུས་དྲན་སྲུང་བརྩི།

ཁ་ཉིན་ཚེས་ ༢༦ ཉིན་ཨ་རིའི་གྲོང་ཁྱེར་ནིའུ་ཡོག་ཏུ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པ་མཆོག་གི་༸སྐུ་ཚེའི་མཛད་རྗེས་ལ་ཆེ་བསྟོད་ཀྱི་བགྲོ་གླེང་དང་རིག་གཞུང་མཚན་ཚོགས་བཅས་གོ་སྒྲིག་གནང་བའི་ཐོག་ནས་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ ༣༠ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད་པ་རེད།ཁ་ཉིན་༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་ནས་མི་ལོ་ ༣༠ འཁོར་བའི་དུས་དྲན་དང་བསྟུན། བྱང་ཨ་རིའི་༸པཎ་ཆེན་རྗེས་དྲན་ཚོགས་ཆུང་གིས་གོ་སྒྲིག་འོག་སྔ་དྲོ་ཚོུད་ ༡༠ པ་ནས་ཉིན་རྒྱབ་བར་མཁས་དབང་དང་གནད་ཡོད་མི་སྣ་ཁག་ཅིག་གདན་ཞུས་ཀྱིས་༸ཀུན་གཟིགས་༸པཎ་ཆེན་རིན་པོ་མཆོག་གི་མཛད་རྗེས་སྐོར་བགྲོ་གླེང་གནང་བ་འདུག་པ་དང་། དེའི་ཐོག་སྐུ་འབུམ་དགོན་པའི་དགོན་བདག་༸སྐྱབས་རྗེ་ཨ་རྒྱ་རིན་པོ་ཆེ་མཆོག་གིས་གཙོ་བོར་གྱུར་པའི་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་འབུམ་རམས་པ་བསྟན་འཛིན་རྡོ་རྗེ་ལགས། རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲིས་ལགས། དེ་བཞིན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་དང་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་ཟུར་པ་བཅས་ནས་ལྷན་ཞུགས་གནང་འདུག ལྷག་དོན་བོད་ཀྱི་ལོ་རྒྱུས་ཞིབ་འཇུག་པ་དང་རྩོམ་པ་པོ་རྒྱ་རིགས་མཁས་པ་དང་ཕྱི་རྒྱལ་བ་བཅས་ནས་ཀྱང་བགྲོ་གླེང་ཐོག་ཆ་ཤས་བླངས་ཡོད་པ་རེད། སྐུ་མགྲོན་རྣམ་པས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ནས་བོད་ནང་བསྐྱངས་པའི་ཆོས་སྲིད་ཀྱི་མཛད་འཕྲིན་གཙོ་བོར་གྱུར་པའི་རྒྱ་རིགས་མི་མང་དང་༸པཎ་ཆེན་རིན་པོ་ཆེ་མཆོག་གི་འབྲེལ་བ། གཞིས་བྱེས་བོད་མིའི་སེམས་ནང་རིན་པོ་ཆེའི་རིན་ཐང་སྐོར། བོད་རྒྱ་ཞི་མོལ་གྱི་སྐུ་ཚབ་རུ་ཁག་ནས་༸ཀུན་གཟིགས་མཆོག་དང་མཇལ་མོལ་གནང་བ། ལྷག་དོན་རིན་པོ་ཆེས་མཛད་པའི་ཡིག་འབྲུ་ཁྲི་བདུན་གྱི་སྙན་ཞུའི་གལ་གནད། དེ་བཞིན་རྒྱལ་སྤྱིའི་སྟེང་རིན་པོ་ཆེ་མཆོག་ལ་ངོས་འཛིན་ཞུ་ཕྱོགས་དང་༸ཀུན་གཟིགས་༸པཎ་ཆེན་མཆོག་གི་ཡང་སྲིད་རྩད་གཅོད་ཀྱི་བརྒྱུད་རིམ་བཅས་ཀྱི་བརྗོད་གཞི་འདྲ་མིན་ཐོག་གསུང་བཤད་གནང་ཡོད་པ་རེད།བགྲོ་གླེང་གི་ལས་རིམ་གྲུབ་རྗེས་༸པཎ་ཆེནརིན་པོ་ཆེ་མཆོག་ལ་རྗེས་དྲན་གྱི་མཛད་སྒོ་དངོས་གཞི་གོ་སྒྲིག་གནང་བའི་ཐོག་ནས་རིན་པོ་ཆེའི་༸སྐུ་ཚེའི་མཛད་རྣམ་གྱི་ཕྱག་དེབ་དབུ་འབྱེད་གནང་བ་དང་། མཁས་པའི་གཏམ་བཤད་ཀྱི་ལས་རིམ་ཞིག་ཀྱང་གནང་ཡོད་པ་ཟད། ཕྱི་དྲོ་བོད་པའི་གཞས་པ་དང་གཞས་མ་ཁག་གཅིག་གིས་རིག་གཞུང་མཚན་ཚོགས་ཐོག་རིན་པོ་ཆེའི་མཛད་རྗེས་ལ་ཆེ་བསྟོད་ཀྱི་བསྟོད་གླུ་འདྲ་མིན་ཕུལ་ཡོད་པ་རེད། ༸པཎ་ཆེན་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ ༣༠ འཁོར་བའི་དུས་དྲན་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་༸དཔལ་ས་སྐྱ་གོང་མ་རིན་པོ་ཆེ་མཆོག་དང་དགའ་ལྡན་ཁྲི་རིན་པོ་ཆེ་མཆོག་བཅས་ནས་རིན་པོ་ཆེ་མཆོག་ལ་རྗེས་དྲན་གྱི་གསུང་འཕྲིན་བསྩལ་ཡོད་པ་རེད། རྩ་བའི་ཁ་ཉིན་ཨ་རིའི་ནིའུ་ཡོག་ཙམ་མ་ཟད་བོད་མི་གནས་ཡུལ་ས་གནས་མང་ཆེ་བའི་ནང་༸པཎ་ཆེན་རིན་པོ་ཆེ་མཆོག་དགོངས་པ་རྫོགས་ནས་མི་ལོ་ ༣༠ འཁོར་བའི་དུས་དྲན་སྲུང་བརྩི་ཞུས་ཡོད་པ་ལྟར། རྒྱ་གར་བྱང་ཕྱོགས་སྡེ་ར་སྡུན་ས་གནས་སུ་༸དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་དབུ་བཞུགས་ཐོག་བོད་མི་མང་སྤྱི་འཐུས་ཚོགས་གཙོ་མཆོག་དང་བོད་མིའི་སྒྲིག་འཛུགས་ཆོས་རིག་བཀའ་བློན་མཆོག་རྣམ་གཉིས། དེ་བཞིན་མཁས་དབང་དང་མང་ཚོགས་བཅས་ཁྱོན་མི་གྲངས་ ༡༠༠༠ ལྷག་འདུ་འཛོམས་ཐོག་རིན་པོ་ཆེ་མཆོག་གི་མཛད་རྗེས་ལ་དྲན་གསོ་ཞུས་འདུག

རྒྱ་ནག་གཞུང་ལ་བོད་རྒྱ་འབྲེལ་མོལ་བསྐྱར་གསོ་དགོས་པའི་རེ་འདུན་ཤུགས་ཆེ་གནང་བ།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་བདུན་ཕྲག་གཅིག་ཙམ་གྱི་རིང་ཉི་ཧོང་དུ་གཞུང་འབྲེལ་ཕྱོགས་བསྐྱོད་གནང་བ་དང་བསྟུན། ཟླ་ ༡ ཚེས་ ༢༤ ཉིན་ཉི་ཧོང་གི་རྒྱལ་ཡོངས་གསར་འགྱུར་བརྒྱུད་ལམ་གྲགས་ཅན་NHK ཡི་བཅར་འདྲིར་དང་ལེན་གནང་བ་དང་འབྲེལ། སྲིད་སྐྱོང་མཆོག་ནས་ཕྱི་ལོ་ ༢༠༡༠ ནས་ད་བར་བོད་རྒྱ་འབྲེལ་མོལ་གནང་མ་ཐུབ་པར་དེ་མུར་ལྷག་ཡོད་ནའང་རྒྱ་རིགས་ནང་པ་གཙོ་གྱུར་མཁས་དབང་དང་། རྒྱ་རིགས་ཚོང་པ། སློབ་ཕྲུག་སོགས་མང་པོ་ཞིག་གིས་སྒེར་གྱི་ཐོག་ནས་༸གོང་ས་མཆོག་དང་མཇལ་བཅར་ཞུ་གནང་གི་ཡོད་པའི་ཁར་བོད་ཀྱི་རིག་གཞུང་ལ་དགའ་ཞེན་དང་། ལྷག་པར་དུ་བོད་བརྒྱུད་ནང་བསྟན་ལ་དད་གུས་ཆེན་པོ་ཡོད་པའི་རྣམ་པ་གསལ་པོ་ཆགས་བཞིན་ཡོད་སྐོར་གསུངས་པ་དང་འབྲེལ། རྒྱ་གཞུང་གིས་བོད་ནང་གི་བོད་མིའི་མངོན་འདོད་ལ་ངེས་པར་དུ་བརྩི་བཀུར་ཞུས་པའི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་མགྱོགས་མྱུར་འབྲེལ་མོལ་བསྐྱར་གསོ་གནང་བའི་བརྒྱུད་བོད་ཀྱི་གནད་དོན་གསལ་ཐབས་དགོས་པའི་རེ་འདུན་ཤུགས་ཆེ་བཏོན་འདུགབོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་སྲིད་སྐྱོང་མཆོག་ནས་བཅར་འདྲིའི་སྐབས་རྒྱ་ནག་གཞུང་གི་དམ་དྲག་ཅན་གྱི་སྲིད་བྱུས་ལ་ངོ་རྒོལ་གྱིས་ད་བར་བོད་ནང་བོད་མི་ ༡༥༣ ནས་རང་ལུས་མེར་སྲེག་གནང་བའི་བརྒྱུད་བོད་ནང་གཞི་རྩའི་འགྲོ་བ་མིའི་ཐོབ་ཐང་དགོས་པ་དང་། ༸གོང་ས་༸སྐྱབས་མགོན་ཆེན་པོ་མཆོག་བོད་དུ་མགྱོགས་མྱུར་གདན་ཞུ་གནང་དགོས་པའི་དགོས་འདུན་བཏོན་པ་རྣམས་ངོ་སྤྲོད་གནང་བ་དང་སྦྲགས། རྒྱ་ནག་གཞུང་གིས་བོད་མིས་འབོད་སྒྲ་དང་ངུ་འབོད་ལ་ངེས་པར་དུ་གསན་འཇོག་གནང་བའི་ཐོག་ནས་བོད་རྒྱ་གཉིས་ལ་སྨིན་པའི་ཐབས་ལམ་བརྒྱུད་བོད་ཀྱི་གནད་དོན་གསལ་དགོས་པ་དང་། དེ་ལྟར་གནང་ཚེ་རྒྱ་གཞུང་གིས་གཙོས་པའི་རྒྱ་ནག་མི་མང་ལ་ཁེ་ཕན་ཡོད་པ་ཞིག་རེད་ཅེས་འགྲེལ་བརྗོད་གནང་འདུག དེ་བཞིན་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་མཐར་བོད་མི་ཚོས་ཐག་གཅོད་གནང་དགོས་པ་ཞིག་ཡིན་སྐོར་༸གང་ཉིད་མཆོག་ནས་བཀའ་སློབ་བསྩལ་མྱོང་ཡོད་པ་སོགས་ལུང་འདྲེན་གནང་བ་དང་ཆབས་ཅིག བོད་མི་རྣམས་འཕགས་པ་སྤྱན་རས་གཟིགས་ཀྱི་ཐུན་མིན་གདུལ་བྱར་སྐྱེས་པ་ཞིག་ཡིན་སྟབས་༸གོང་ས་མཆོག་དང་ཁ་བྲལ་ཐབས་མེད་པར་བརྟེན། རྒྱ་གཞུང་གི་༸སྐུའི་ཡང་སྲིད་ཀྱི་གནད་དོན་ཐད་ཐེ་བྱུས་དང་ཐག་གཅོད་བྱ་རྒྱུར་ཁྲིམས་མཐུན་གྱི་དབང་ཚད་དང་རྒྱུ་མཚན་གང་ཡང་མེད་པ་ཞིག་ཡིན་པ་མ་ཟད། བོད་ནང་རྒྱའི་དབང་སྒྱུར་འོག་བོད་ཀྱི་དགོན་སྡེ་བརྒྱ་ཆ་ ༩༨ རྩ་གཏོར་བཏང་ཡོད་པ་དང་དགེ་བཙུན་གྱི་བརྒྱ་ཆ་ ༩༩.༩ བཙན་དབང་ཐོག་སྐྱ་སར་ཕབ་ཏུ་བཅུག་ཡོད་པ་མ་ཟད། དེ་བཞིན་དགོན་པའི་ནང་༸གོང་ས་མཆོག་གི་༸སྐུ་པར་ཙམ་ཡང་སྒྲིག་ཤོམ་གནང་མི་ཆོག་པའི་བཙན་བཀའ་བཏང་དང་གཏོང་མུས་ཡིན་པ་གསུངས་ཡོད།སྲིད་སྐྱོང་མཆོག་གིས་ཉེ་ལམ་ཨ་རིའི་སྲིད་འཛིན་སྐུ་ཞབས་ Donald Trump མཆོག་ནས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་ལ་མཚན་རྟགས་བཀོད་ནས་ཁྲིམས་གཞིར་གཏན་འབེབས་བྱུང་བ་ནི་དྲང་བདེན་དང་འགྲོ་བ་མིའི་ཐོབ་ཐང་། མང་གཙོའི་རིང་ལུགས་ལ་རྒྱལ་སྤྱིས་རྒྱབ་སྐྱོར་དང་སྲུང་སྐྱོབ་གནང་བའི་རྣམ་འགྱུར་ཞིག་ཡིན་པ་མ་ཟད། རྒྱ་ནག་གཞུང་ལ་ཆབ་སྲིད་ཀྱི་བརྡ་ལན་ཤུགས་ཆེན་པོ་གནང་ཡོད་པ་གསུངས་འདུག དེ་བཞིན་ཁ་ཉིན་ཚེས་ ༢༦ ཉིན་ཉི་ཧོང་གི་རྒྱལ་ས་ Tokyo ནང་ཉི་ཧོང་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ། ས་གནས་བོད་མི་དང་ཉི་ཧོང་མང་ཚོགས་དང་ཐུག་འཕྲད་ཀྱིས་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་ནས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་དེ་ཉི་ཧོང་ནང་ཆེད་འཛུགས་གནང་ཐུབ་ཡོད་པ་དང་འབྲེལ། ཉི་ཧོང་གིས་བོད་ཐོག་གླེང་སློང་གནང་རྒྱུ་ཁྱབ་ཆེ་བ་ཡོང་རྒྱུའི་རེ་བ་དང་། ལྷག་པར་དུ་ཉི་ཧོང་གཞུང་ནས་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་བོད་རྒྱ་ཞི་མོལ་གང་མགྱོགས་སླར་གསོ་ཡོང་བའི་སླད་དུ་མུ་མཐུད་ཤུགས་སྣོན་གནང་རོགས་ཞེས་འབོད་སྐུལ་ཞུས་འདུག་པ་དང་ཆབས་ཅིག ཉི་ཧོང་ནང་གནས་སྡོད་བོད་རིགས་དང་ཉི་ཧོང་བ་ཚོས་སྤྱི་ཚོགས་དྲྭ་ལམ་བརྒྱུད་བོད་དོན་གོ་རྟོགས་སྤེལ་རྒྱུ་དང་མཐོ་སློབ་ཁག་གི་རྒྱ་རིགས་དགེ་རྒན་དང་སློབ་མ་ཚོའི་ལྷན་དུ་བོད་དོན་གླེང་རྒྱུ། དེ་བཞིན་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐོག་མཉམ་ཞུགས་གནང་དགོས་པར་སྐུལ་མ་གནང་འདུག

Latest news