གསར་འགྱུར།

རིང་མིན་བདུན་ཕྲག་འདིའི་རེས་གཟའ་པ་སངས་ཉིན་རྒྱ་ནག་གྱི་རྒྱལ་ས་པེ་ཅིང་དུ་རྒྱལ་སྤྱིའི་དགུན་དུས་ཨོ་ལམ་པིག་རྩེད་འགྲན་འཚོགས་གཏན་ཁེལ་ཡོད་པ་དང་བསྟུན། Inter-Parliamentary Alliance on China ཞེས་རྒྱ་ནག་ལ་གདོང་ལེན་གནང་མཁན་གྱི་རྒྱལ་སྤྱིའི་གྲོས་ཚོགས་འཐུས་མི་ལས་གྲུབ་པའི་ཚོགས་པའི་ཚོགས་མི་ཁག་ཅིག་ཐུན་མོང་གིས་རྒྱ་ནག་ནང་དགུན་དུས་ཨོ་རྩལ་མ་འཚོགས་གོང་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་ནས་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་བབ་སྙན་ཐོ་ཡོངས་གྲགས་བྱེད་དགོས་ཞེས་གསུངས་འདུགཉེ་ཆར་རྒྱ་ནག་གཞུང་ནས་ཤིན་ཅང་གི་གནད་དོན་དང་འབྲེལ་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཤིན་ཅང་དུ་སྐྱོད་རྒྱུའི་ཆོག་མཆན་ཕུལ་བའི་གནས་ཚུལ་ཞིག་ཐོན་ཡོད་ཀྱང་། དེའི་ཆ་རྐྱེན་དུ་རྒྱ་ནག་གི་ཨོ་རྩལ་འགྲན་ཚོགས་ཟིན་པའི་རྗེས་སུ་སྙན་ཐོ་འདོན་སྤེལ་གནང་རྒྱུ་ཡིན་སྐོར་བཤད་ཡོད་པ་རེད། གནད་དོན་དེ་འབྲེལ་ཉེ་ཆར་ IPAC ཚོགས་པའི་གྲོས་ཚོགས་འཐུས་མི་ཁག་ཅིག་ཅིག་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཀྱི་མཚན་ཐོག་ལ་སྙན་ཞུ་ཞིག་ཕུལ་བའི་ནང་དེ་སྔ་ཕྱི་ལོ་ ༢༠༢༠ ཕྱི་ཟླ་ ༦ པའི་ནང་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐོག་ཕྱག་ལས་གནང་མཁན་གྱི་ཆེས་མཐོའི་རང་དབང་ཅན་གྱི་སྐུ་ཚབ་ལྔ་བཅུས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་གཞུང་ནས་ཤིན་ཅང་ནང་ཡུ་གུར་བ་གཙོས་གྲངས་ཉུང་མི་རིགས་མང་དག་ཅིག་འཛིན་བཟུང་བཙན་ཁྲིད་བྱས་པའི་གནད་དོན་སྐོར་ཞིབ་འཇུག་འཐུས་གཙང་ཞིག་གནང་སྟེ་སྙན་ཐོ་ཞིག་ངེས་པར་དུ་འདོན་སྤེལ་གནང་དགོས་པའི་ཞུ་སྐུལ་གནང་བ་དེ་ད་ཆ་ལོ་གཅིག་དང་ཕྱད་ཀ་ཙམ་འགྲོ་བཞིན་ཡོད་ཀྱང་། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་གནད་དོན་འདིའི་སྐོར་ཁ་གསལ་གང་ཡང་གསུངས་མེད་སྟབས་ཆེས་མཐོའི་སྐུ་ཚབ་རྣམ་པའི་ངོས་ནས་དེར་ཐུགས་ཕམ་ཆེན་པོ་ཡོད་སྐོར་གསུངས་ཡོད།ལྷག་པར་དུ་ད་ཆ་རྒྱ་ནག་ལ་རྒྱལ་སྤྱིའི་དགུན་དུས་ཨོ་ལམ་པིག་རྩེད་འགྲན་དངོས་སུ་འཚོགས་ལ་ཉེ་བའི་མཚམས་འདིར་རྒྱལ་སྤྱིའི་སྲིད་གཞུང་དང་མང་ཚོགས་མང་པོས་རྒྱ་ནག་ལ་དོ་སྣང་དང་སྐྱོན་བརྗོད་བྱེད་བཞིན་པའི་སྐབས་སུ་རྒྱ་ནག་གཞུང་ནས་ད་བར་ཤིན་ཅང་ནང་ཡུ་གུར་མི་སེར་གཙོ་གྱུར་རྒྱ་ནག་གི་མངའ་འོག་ཏུ་ཡོད་པའི་གྲངས་ཉུང་མི་རིགས་ཐོག་ལག་བསྟར་བྱེད་བཞིན་པའི་དྲག་རྩུབ་ཅན་གྱི་སྲིད་བྱུས་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་ཐོག་འགན་ཁུར་ལྡན་པ་ཞིག་བཟོ་གལ་ཡིན་པར་འགྲེལ་བརྗོད་གནང་བ་དང་ཆབས་ཅིག ལྕམ་སྐུ་ Michelle Bachelet ལགས་ཀྱིས་སྣེ་ཁྲིད་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་གི་ངོས་ནས་རྒྱ་ནག་ནང་དགུན་དུས་ཨོ་རྩལ་མ་འཚོགས་གོང་ལ་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་བབས་སྙན་ཐོ་ཡོངས་གྲགས་གནང་དགོས་ཞེས་གསུངས་འདུག ཞུ་སྐུལ་དེའི་ནང་ IPAC ཚོགས་པའི་གྲོས་ཚོགས་འཐུས་མི་རྣམས་ནས་དུས་རྟག་ཏུ་རྒྱལ་ཚོགས་ཀྱི་ལས་དོན་དང་ལྷག་པར་དུ་རྒྱ་ནག་གཞུང་གི་བྱེད་བབ་ཁག་ཐེར་འདོན་གནང་རྒྱུའི་ལས་དོན་ཐོག་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་གི་ཡོད་ཅེས་གསུངས་འདུག་ལ། ཞུ་སྐུལ་དེའི་ཐོག་ཡོ་རོབ་གྲོས་ཚོགས་ཀྱི་འཐུས་མི་དང་འཇར་མི་ནི། དབྱིན་ཡུལ། ཁེ་ན་ཌ། ཕ་རན་སི། དེ་བཞིན་རྒྱ་གར་དང་ཨོ་སི་ཀྲོ་ལི་ཡ་སོགས་ IPAC ཚོགས་པའི་ཚོགས་མི་རྒྱལ་སྤྱིའི་གྲོས་ཚོགས་འཐུས་མི་ ༢༦ ལྷག་གིས་མཚན་རྟགས་ཆེད་བཀོད་གནང་ཡོད་པ་རེད།གཞི་རྩའི་ཉེ་ཆར་རྒྱ་ནག་གཞུང་ནས་ཤིན་ཅང་གི་གནད་དོན་དང་འབྲེལ་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཤིན་ཅང་དུ་སྐྱོད་རྒྱུའི་ཆོག་མཆན་ཕུལ་བའི་གནས་ཚུལ་ཞིག་ཐོན་ཡོད་ཀྱང་། འགྲོ་བ་མིའི་ཐོབ་ཐང་གི་གནད་དོན་ཐོག་དཔྱད་ཞིབ་གནང་མཁན་ཁག་ཅིག་ནས་རྒྱ་ནག་གཞུང་གི་ངོས་ནས་ཆོག་ཆན་ཕུལ་བའི་ནང་ལྕམ་སྐུ་ Michelle Bachelet ལགས་རྒྱ་ནག་གི་ཨོ་རྩལ་འགྲན་ཚོགས་ཟིན་པའི་རྗེས་སུ་ཤིན་ཅང་ཕེབས་ཆོག་ཅེས་བཀོད་པ་དེ་ནི་གཙོ་བོ་རྒྱ་ནག་ནང་འཚོགས་རྒྱུའི་ཨོ་རྩལ་ལ་ཕྱི་ཕྱོགས་ནས་བར་ཆད་མི་ཡོང་བ་དང་། རྒྱ་ནག་རང་ཉིད་ཀྱི་ངོ་སྲུང་སྐྱོབ་བྱེད་རྒྱུར་དམིགས་པ་ཞིག་རེད་ཅེས་གསུང་མཁན་འདུག་ལ། ད་ཆ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་ཤིང་ཅང་ནང་གི་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་བའི་སྙན་ཐོ་དེ་ཡོངས་གྲགས་མ་གནང་པ་དེ་ཡང་རྒྱ་ནག་གཞུང་གི་གནོན་ཤུགས་དབང་གི་ཡིན་པ་ཡང་གསུངས་མཁན་འདུག

ཁ་སང་དབྱིན་ཡུལ་དུ་རྟེན་གཞི་བྱས་པའི་ Free Tibetཞེས་པའི་བོད་དོན་རྒྱབ་སྐྱོར་ཚོགས་པས་དབྱིན་ཡུལ་གྱི་ཁུལ་དུ་མང་ཚོགས་གཅིག་སྟོང་ལྷག་གི་ཁྲོད་འདི་ལོའི་རྒྱ་ནག་གི་དགུན་དུས་ཀྱི་ཨོ་རྩལ་འགྲན་ཚོགས་ལ་དྲྭ་ལམ་ནས་ལྟ་ཉན་བྱེད་རྒྱུ་ཡིན་མིན་གྱི་བསམ་ཤོག་བསྡུ་རུབ་ཁྲོད་དུ། མང་ཚོགས་བརྒྱ་ཆ་ ༥༨ ཙམ་གྱིས་རྒྱ་ནག་གི་ཨོ་རྩལ་ལ་བལྟ་ཉན་ཉུང་ཙམ་བྱེད་རྒྱུ་ཡིན་པ་དང་བརྒྱ་ཆ་ཉི་ཤུ་ལྷག་གིས་བལྟ་ཉན་རྩ་བ་ནས་བྱེད་རྒྱུ་མིན་པར་བསྒྲགས་འདུག དེ་ཡང་མང་ཚོགས་ཁྲོད་དུ་བསམ་ཤོག་ཁྲོད་དྲི་བ་གཉིས་དྲིས་བའི་ནང་། གཅིག་ནས་དགུན་དུས་ཨོ་རྩལ་འགྲན་ཚོགས་དང་རྒྱལ་སྤྱིའི་རྐང་སྤོལ་རྩེད་འགྲན་ལས་མང་ཚོགས་ཀྱིས་དུས་རྒྱུན་རྩེད་འགྲན་ཅི་ཙམ་ལ་བལྟ་ཉན་བྱེད་ཀྱི་ཡོད་མེད་དང་། གཉིས་པར་དབྱིན་ཡུལ་གཞུང་གཙོས་པའི་རྒྱལ་ཁབ་གཅིག་གིས་རྒྱ་ནག་གི་ནང་དུ་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབ་དང་འབྲེལ་ནས་ཐཻངས་འདིའི་དགུན་དུས་འགྲན་ཚོགས་སུ་གཞུང་འབྲེལ་གྱི་སྐུ་ཚབ་གཏོང་རྒྱུ་མིན་པར་བསྒྲགས་ཡོད་དུས་མང་ཚོགས་ཀྱིས་གནད་དོན་དེར་འབྲེལ་གྱིས་དྲྭ་ལམ་བརྒྱུད་རྒྱ་ནག་གི་ཨོ་རྩལ་ལ་བལྟ་ཉན་བྱེད་རྒྱུ་ཡིན་མིན་བཀའ་འདྲི་ཞུས་འདུགབོད་དོན་རྒྱབ་སྐྱོར་ཚོགས་པའི་དྲིལ་བསྒྲགས་དང་ཞིབ་འཇུག་འགན་འཛིན་ John Jones ལགས་ཀྱིས། རྒྱ་ནག་གིས་ཊི་ནེ་སི་རྩེད་འགྲན་པ་ Peng Shauiལགས་ཀྱི་གནད་དོན་དེ་ལྐོག་གྱུར་བཟོས་བ་བཞིན་རྒྱལ་སྤྱིའི་ཨོ་རྩལ་ལྷན་ཚོགས་ངོས་ནས་ཀྱང་རྩེད་འགྲན་གྱི་དམིགས་འདུན་ལས་ཁེ་བཟང་གཙོ་བོར་བཟུང་སྟེ་རྒྱ་ནག་དང་ངན་འབྲེལ་བྱས་ཏེ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་གནས་ཚུལ་དེ་རིགས་སྦེད་ཐབས་བྱ་རྒྱུ་ཉག་གཅིག་ཡིན་སྐོར་གསུང་བ་དང་ཆབས་ཅིག ཨོ་རྩལ་འགྲན་ཚོགས་ལ་རྒྱུན་དུ་དགའ་མོས་གནང་མཁན་རྣམས་ཀྱིས་ད་རེས་ཀྱི་བསམ་ཤོག་བསྡུ་རུབ་དེ་བརྒྱུད། རྩེད་འགྲན་དེ་བཞིན་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབ་དེ་གཙང་བཟོ་བྱེད་ཐབས་ལ་བེད་སྤྱོད་བྱེད་དུ་འཇུག་འདོད་མེད་པའི་རྣམ་པ་གསལ་པོར་བསྒྲགས་པ་མ་ཟད། དགོས་མཁོར་ཐུག་ན་རྩེད་འགྲན་ཕྱིར་སྟོན་གྱི་དྲྭ་ལམ་དེ་དག་ཡོངས་སུ་སྒོ་རྒྱག་རྒྱུ་ཡིན་པར་གསུངས་འདུགཁོང་གིས་ད་དུང་ཨོ་རྩལ་ལྷན་ཚོགས་དང་FIFAཞེས་པའི་རྒྱལ་སྤྱིའི་རྐང་རྩེད་ཚོགས་པ་སོགས་ཀྱིས་དུས་ཡུན་རིང་བོར་ལྟད་མོ་བ་རྣམས་ཀྱིས་རྒྱབ་སྐྱོར་ཡོད་ཤག་གིས་རང་སྣང་གང་དྲན་བྱས་ཀྱང་། རྩེད་འགྲན་ལ་དགའ་མོས་ཡོད་མཁན་རྣམས་ཀྱིས་དྲང་བདེན་གྱི་རྩེད་འགྲན་ལ་རེ་བ་གསལ་འདོན་གྱིས། རྒྱལ་སྤྱིའི་རྩེད་འགྲན་ཚོགས་པ་ཁག་གིས་རྒྱལ་སྤྱིའི་བུད་མེད་ཊི་ནེ་སི་ཚོགས་པ་ལྟར་བློ་ཁོག་ཆེན་པོའི་ངང་ནས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་འཛུལ་ཞུགས་ཕྱིར་འཐེན་དགོས་བར་སྐུལ་མ་གནང་ཡོད་པར་འགྲེལ་བརྗོད་གནང་འདུག དབྱིན་ཡུལ་བོད་དོན་རྒྱབ་སྐྱོར་ཚོགས་པས་ཕྱི་ལོ་༢༠༠༨་ལོའི་རྒྱ་ནག་གི་དབྱར་དུས་ཀྱི་ཨོ་རྩལ་སྔ་རོལ་དུ་བོད་མི་རྣམས་ཀྱིས་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་ཡོད་ཀྱང་། རྒྱ་ནག་གིས་སྐབས་དེར་བོད་མིའི་ཐོག་དྲག་སྤྱོད་ཤུགས་ཆེ་སྤེལ་དང་སྤེལ་མུས་ཁྲོད། ཨ་རིའི་རང་དབང་ཁང་པའི་ལོ་འཁོར་སྙན་ཐོ་ནང་དུ་བོད་ནི་རྒྱལ་སྤྱིའི་ཁྲོད་རང་དབང་ཆེས་ཞན་པའི་དྲག་གནོན་གྱི་ས་ཁུལ་ཞིག་ཡིན་པར་ཕྱིར་བསྒྲགས་བྱས་ཡོད་པར་ལུང་འདྲེན་དང་འབྲེལ། ད་ཆ་རྒྱལ་སྤྱིའི་གསར་ཁང་ཆེ་གྲས། BBCདང་Discovery གཞན་ཡང་ ITV སོགས་ཀྱིས་ཨོ་རྩལ་ལྟད་མོ་སྟོན་ཐབས་སུ་མ་འཛུགས་ཆེན་པོ་བྱས་ཡོད་པ་དང་། དེ་བཞིན་ཁྱབ་བསྒྲགས་པ་དང་སྦྱིན་བདག་སོགས་ཀྱང་རྩེད་འགྲན་དང་འབྲེལ་ནས་མ་དངུལ་ཆེན་པོ་བཏང་ཡོད་པ་དེ་ནི་ཧང་སང་དགོས་བའི་གནད་དོན་ཞིག་ཡིན་པར་བསྒྲགས་འདུགརྩ་བའི་དབྱིན་ཡུལ་བོད་དོན་རྒྱབ་སྐྱོར་ཚོགས་པའི་ངོས་ནས་No Beijing 2022 ཞེས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་ངོ་རྒོལ་གནང་མཁན་གྱི་ཚོགས་པ་ཁག་གཅིག་དང་མཉམ་འབྲེལ་གྱིས། འདི་ལོའི་ཨོ་རྩལ་འགྲན་ཚོགས་ལ་བལྟ་ཉན་བྱེད་རྒྱུ་མེད་པའི་འབོད་སྐུལ་བྱས་ཏེ། དེའི་ཚབ་ཏུ། རྩེད་འགྲན་དང་འབྲེལ་བའི་ལྟད་མོ་དང་། ཡང་ན་བོད་དང་བོད་མིའི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་ལྟད་མོ་སོགས་ལ་བལྟ་ཉན་བྱེད་རྒྱུའི་སྐུལ་སློང་གི་ལས་འགུལ་སྤེལ་མུས་ཡིན་པ་རེད། གཞི་རྩའི་རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་རྒྱ་ནག་ཏུ་འདི་ལོའི་དགུན་དུས་ཀྱི་ཨོ་རྩལ་འགྲན་ཚོགས་བསྡུ་རྒྱུའི་ཆོག་མཆན་སྤྲད་པ་དང་འབྲེལ་ནས། རྒྱ་ནག་གིས་གཅིག་ནས་བོད་ས་བཙན་བཟུང་བྱས་པ་དང་། ཡུ་གུར་ཁ་ཆེ་མི་རིགས་རྩ་གཏོར་བཏང་བ། དེ་བཞིན་ཧོང་ཀོང་ནང་གི་མང་གཙོའི་རང་དབང་ལ་དྲག་གནོན་བྱས་པ་སོགས་ཀྱི་གནད་དོན་དང་འབྲེལ་ཏེ་རྒྱལ་སྤྱིའི་སྤྱི་ཚོགས་ཀྱི་སྟེང་འདས་བའི་ལོ་གཉིས་ཀྱི་ནང་དུ་ཨོ་རྩལ་ལྷན་ཚོགས་ལ་སྐྱོན་བརྗོད་དྲག་པོ་བྱས་ཏེ་རྒྱ་ནག་ཏུ་ཨོ་རྩལ་བསྡུ་རྒྱུའི་གནས་བབ་མེད་པར་ཡོངས་གྲགས་གནང་ཡོད་བའི་ཁྲོད། དབྱིན་ཡུལ་དང་ཨ་རི་སོགས་ཀྱི་མཚོན་པའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཨོ་རྩལ་འགྲན་ཚོགས་ཐོག་གཞུང་འབྲེལ་གྱི་སྐུ་ཚབ་མི་སྣ་མི་གཏོང་རྒྱུ་ཕྱིར་བསྒྲགས་གནང་ཡོད་པ་རེད།

ད་ཆ་རྒྱ་ནག་ཏུ་དགུན་དུས་ཨོ་རྩལ་འགྲན་ཚོགས་སླད་རྒྱལ་སྤྱིའི་ཡུལ་གྲུ་འདྲ་མིན་ཁག་ནས་རྩེད་འགྲན་པ་འབྱོར་བཞིན་ཡོད་པ་དང་བསྟུན། རྒྱ་གཞུང་གིས་ཡུལ་དེའི་ནང་གི་མང་གཙོ་ལས་འགུལ་བ་འཛིན་བཟུང་དང་སྤྱི་ཚོགས་དྲ་ལམ་ཁག་བཙན་དབང་གིས་སྒོ་རྒྱག་བཞིན་ཡོད་པ་རེད།ནིའུ་ཡོག་གསར་ཤོག་ New York Times གིས་གནས་ཚུལ་སྤེལ་བར་ཟླ་བ་འདིའི་ཚེས་ ༤ ཉིན་རྒྱལ་ས་པེ་ཅིང་དུ་དགུན་དུས་ཨོ་ལམ་པིཀ་རྩལ་འགྲན་དངོས་སུ་འཚོགས་ཀྱི་ཡོད་པ་དང་བསྟུན། རྒྱ་གཞུང་གིས་རྒྱ་ནག་ཏུ་ཡོད་པའི་མང་གཙོའི་ལས་འགུལ་བ་རྣམས་རང་ཉིད་ཀྱི་ནང་དུ་བཀག་སྐྱིལ་དང་ཁག་ཅིག་བཙོན་རར་བཅུག་པ་མ་ཟད། གཞུང་གི་ལས་དོན་ཁག་ལ་མངོན་གསལ་དོད་པོས་སྐྱོན་བརྗོད་གནང་མཁན་རྣམས་ཀྱི་སྤྱི་ཚོགས་དྲ་རྒྱ་སྒོ་རྒྱག་པ་དང་ཆབས་ཅིག་ཏུ་རྒྱ་གཞུང་གིས་མང་ཚོགས་ཀྱི་ཁྲོད་ནས་ཨོ་ལམ་པིཀ་རྩེད་འགྲན་པ་རྣམས་ལ་ངོ་རྒོལ་རིགས་གནང་ཚེ་ཁྲིམས་གཏུག་གི་མཇུག་འབྲས་ཕོག་སྲིད་པའི་ཉེན་བརྡ་སོགས་བཏང་ཡོད་པ་རེད།གསར་ཤོག་ཐོག་ད་དུང་གཟའ་འཁོར་སྔོན་མའི་རེས་གཟའ་པ་སངས་ནས་པེ་ཅིང་ནང་དགུན་དུས་ཨོ་རྩལ་འགྲན་ཚོགས་ཆེད་རྒྱལ་སྤྱིའི་ཡུལ་གྲུ་འདྲ་མིན་ཁག་ནས་ཨོ་ལམ་པིཀ་རྩེད་འགྲན་པ་དང་གསར་འགོད་པ། དེ་བཞིན་མཉམ་ཞུགས་པ་སོགས་འབྱོར་བཞིན་པ་རྣམས་ལ་ལྟ་སྲུང་ནན་པོ་བྱེད་བཞིན་པའི་འོག་ནས་འགྲོ་དགོས་པ་ཆགས་པ་དེ་ནི་ད་བར་གྱི་རྒྱལ་སྤྱིའི་རྩེད་འགྲན་གཞན་ཐོག་ཏུ་བྱུང་མྱོང་མེད་པ་ཞིག་ཡིན་པ་དང་ལྟ་སྲུང་དེ་ལྟར་བྱེད་བཞིན་པ་དེ་རིགས་མང་ཆེ་བ་ཏོག་དབྱིབས་སྔོན་འགོག་དང་འབྲེལ་བ་ཡོད་ཚུལ་བརྗོད་ཡོད་ཀྱང་། ལས་དོན་དེ་ལྟར་མང་དག་ཅིག་སྤེལ་བ་ནི་རྒྱ་གཞུང་གིས་རྒྱ་ནག་དང་ལྟ་སྤྱོད་མི་མཐུན་མཁན་ཚོར་དྲག་གནོན་ཆེས་ཆེར་བྱེད་བཞིན་པའི་རྣམ་ཆེས་མངོན་གསལ་ཆགས་པ་ཞིག་མཚོན་སྐོར་བཤད་འདུགའགྲོ་བ་མིའི་ཐོབ་ཐང་ལས་འགུལ་བ་གྲགས་ཅན་སྐུ་ཞབས་ Hu Jia ལགས་ཀྱིས་རྒྱ་གཞུང་ཉེན་རྟོག་པས་ཁོང་རང་ཁྱིམ་དུ་བཀག་སྐྱིལ་བྱ་རྒྱུའི་ཐབས་ཤེས་བྱེད་བཞིན་ཡོད་པར་འགྲེལ་བརྗོད་དང་འབྲེལ། ཁོང་གིས་ཟླ་བ་སྔོན་མར་རང་ཉིད་ཀྱི་ Twitter དྲ་གནས་ཐོག་རྒྱ་གཞུང་གིས་པེ་ཅིང་དགུན་དུས་ཨོ་རྩལ་འགྲན་ཚོགས་འཚོགས་ལ་ཉེ་བའི་སྔ་རོལ་དུ་རྒྱ་ནག་གཞུང་དང་ལྟ་སྤྱོད་མི་མཐུན་མཁན་ཚོར་འདྲི་གཅོད་དང་སུན་གཙེར་གྱིས་བཀག་སྐྱིལ་སོགས་བྱས་དང་བྱེད་བཞིན་པར་སྐྱོན་བརྗོད་ཚ་ནན་གནང་ཡོད་སྟབས། དུས་དེ་ནས་བཟུང་ཉེན་རྟོག་པས་ཁོང་གི་ནང་དུ་ཉིན་བརྒྱད་ཀྱི་ནང་ཚུད་ལ་ཐེངས་བཞི་བསླེབས་ཡོད་པ་མ་ཟད། གལ་ཏེ་ཁོང་ནས་ཁ་ཁུ་སིམ་པོར་མ་བསྡད་ཚེ་ཁོང་གི་ཨ་མར་ཐུག་འཕྲད་གནང་དཀའ་སྐོར་ཉེན་བརྡ་བཏང་བ་སོགས་རྒྱ་གཞུང་གིས་འཚོགས་ལ་རན་པའི་པེ་ཅིང་དགུན་དུས་ཨོ་རྩལ་ལ་མངོན་གསལ་དོད་པོས་སྐྱོན་བརྗོད་བྱེད་མཁན་རྣམས་ལ་དྲག་གནོན་བྱ་རྒྱུའི་ཐག་གཅོད་བྱས་པ་གསལ་པོ་རེད་ཅེས་གསུངས་ཡོད།རྒྱལ་སྤྱིའི་བོད་དོན་འབྲེལ་མཐུད་ལས་ཁུང་གི་ངེས་སྟོན་པ་ Mandie McKeown ལགས་ཀྱིས་རྒྱ་ནག་ནང་གི་དེ་ལྟ་བུའི་ཁོར་ཡུག་ལ་ཧང་སང་བའི་རྣམ་པ་གསལ་བཟོ་དང་འབྲེལ། བོད་དོན་རྒྱབ་སྐྱོར་ཚོགས་པ་ཁག་ཟུང་སྦྲེལ་ཐོག་རྒྱལ་སྤྱིའི་ཡུལ་གྲུ་འདྲ་མིན་ནང་དུ་ངོ་རྒོལ་གྱི་ལས་འགུལ་གོ་སྒྲིག་བརྒྱུད་པེ་ཅིང་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་གནང་བཞིན་པའི་མཚམས་སུ་རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་རྒྱ་ནག་ནང་གི་སྨྲ་བརྗོད་རང་དབང་གཙོས་ཨོ་ལམ་པིཀ་བཅའ་ཁྲིམས་ནང་འཁོད་པའི་རིན་ཐང་ཁག་བརྩི་སྲུང་ཡོང་སླད་རྒྱ་གཞུང་ལ་གནོན་ཤུགས་སྤྲོད་རྒྱུའི་ཐབས་ཤེས་གང་ཡང་གནང་གི་མེད་པར་སྐྱོན་བརྗོད་ཤུགས་ཆེ་གནང་འདུག ཕྱི་ལོ་ ༢༠༠༨ ལོའི་པེ་ཅིང་ཨོ་རྩལ་འགྲན་ཚོགས་སྐབས་འཛིན་བཟུང་ནན་པོ་བྱས་མྱོང་ཡོད་པ་རྒྱ་ནག་གི་ཁྲིམས་རྩོད་པ་ Teng Biao ལགས་ཀྱིས་ད་ལན་པེ་ཅིང་དུ་ཡོང་མཁན་རྒྱལ་སྤྱིའི་རྩེད་འགྲན་པ་རྣམས་ལ་རྒྱ་ནག་ནང་གི་དྲག་གནོན་སྐོར་གླེང་རྒྱུའི་དམིགས་བསལ་འགན་དབང་ཡོད་ཅེས་གསུངས་འདུག

རིང་མིན་ཕྱི་ཟླ་ ༢ ཚེས་ ༤ ཉིན་རྒྱ་ནག་པེ་ཅིང་ནང་དགུན་དུས་ཨོ་ལམ་པིཀ་རྩེད་འགྲན་འཚོགས་གཏན་ཁེལ་ཡོད་ཀྱང་རྒྱལ་སྤྱིའི་ཁྲོད་བོད་མི་དང་ཡུ་གུར་མི་རིགས་སོགས་ནས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་ངོ་རྒོལ་གནང་སྟེ་པེ་ཅིང་གི་ཨོ་རྩལ་འགྲན་ཚོགས་ཕྱིར་འཐེན་དགོས་པ་དང་།  རང་དབང་ཅན་གྱི་རྒྱལ་ཁབ་རྣམས་ནས་དགུན་དུས་ཨོ་རྩེད་ལ་ངོ་རྒོལ་གནང་དགོས་པའི་འབོད་སྐུལ་གྱི་ལས་འགུལ་རྣམ་པ་འདྲ་མིན་ཐོག་ནས་སྤེལ་མུས་ཡིན་པ་ལྟར། དེ་རིང་ཨོ་སི་ཀྲོ་ལི་ཡ་ནང་དུ་ཡོད་པའི་བོད་མི་རྣམས་ཀྱིས་བོད་དོན་སླད་ Newcastle ནས་སིཌ་ནི་བར་དུ་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་འདུག ཨོ་གླིང་རྒྱལ་ཡོངས་སུ་བོད་རིགས་མཐུན་ཚོགས་ཁག་དང་བོད་དོན་ལྷན་ཁང་། ཡུ་གུར་མཐུན་ཚོགས། དེ་བཞིན་ཧོང་ཀོང་དང་རྒྱ་ནག་མང་གཙོ་དོན་གཉེར་བ་རྣམས་ཟུང་འབྲེལ་གྱིས་པེ་ཅིང་གི་དགུན་དུས་ཨོ་རྩལ་ལ་ངོ་རྒོལ་དང་རྒྱ་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་བཞིན་པའི་དྲག་གནོན་ཅན་གྱི་སྲིད་བྱུས་རྣམས་འཕྲལ་དུ་མཚམས་འཇོག་དགོས་པ།  ཉེ་ཆར་ཁམས་བྲག་མགོར་༸སྟོན་པའི་སྐུ་བརྙན་དང་མ་ཎི་དུང་འཁོར་སོགས་གཏོར་བཤིག་བཏང་བར་ངོ་རྒོལ་སླད་ཨོ་གླིང་གི་ Newcastle བོད་རིགས་མཐུན་ཚོགས་ཀྱི་ངོས་ནས་དེ་རིང་ཕྱི་ཚེས་ ༣༡ ནས་ཟླ་ ༢ ཚེས་ ༤ བར་ Newcastle ནས་སིཌ་ནི་གྲོང་ཁྱེར་བར་སྤྱི་ལེ་ ༡༦༤ ཙམ་གྱི་ཞི་བའི་གོམ་བགྲོད་གནང་རྒྱུ་ཡིན་པ་དང་། ཕྱི་ཟླ་ ༢ ཚེས་ ༣ ཉིན་གྱི་ཕྱི་དྲོར་སིཌ་ནི་ས་གནས་ Deewhy ལ་ཕེབས་འབྱོར་གནང་རྒྱུ་དང་དེ་བཞིན་ཟླ་ ༢ ཚེས་ ༤ ཉིན་གྱི་སྔ་དྲོའི་ཚོུད་ ༧ ཐོག་ Deewhy Walters Gors Park ནང་ཉིན་ལྔ་པའི་གོམ་བགྲོད་དབུ་འཛུགས་ཐོག་སིཌ་ནི་བོད་རིགས་མཐུན་ཚོགས་མཉམ་ཞུགས་ངང་ Deewhy ནས་སིཌ་ནི་གྲོང་ཁྱེར་བར་སྤྱི་ལེ་ ༡༨ ཙམ་ལ་ཞི་བའི་གོམ་བགྲོད་གནང་རྒྱུ་རེད་འདུག དེ་བཞིན་ཉིན་དགུང་ཚོུད་ ༡༢ ཐོག་སིཌ་ནི་གྲོང་ཁྱེར་ Martin Place ནང་ཞི་བའི་གོམ་བགྲོད་ཀྱི་ལས་འགུལ་མཇུག་སྒྲིལ་དང་ཚོགས་པ་ཁག་མཉམ་རུབ་ཐོག་དབུ་འབྱེད་ཀྱི་མཛད་སྒོར་གཞི་རྒྱ་ཆེ་བའི་ལས་འགུལ་སྤེལ་འཆར་འདུག ནིའུ་ཁཱས་ཊིལ་བོད་རིགས་མཐུན་ཚོགས་ཀྱི་ཚོགས་གཙོ་མགུར་འབུམ་རྒྱལ་ལགས་ཀྱིས་རླུང་འཕྲིན་ཁང་ལ་གོམ་བགྲོད་ཀྱི་ལས་འགུལ་ངོ་སྤྲོད་གནང་བ་དང་འབྲེལ། གོམ་བགྲོད་པ་རྣམས་ནས་ཕྱི་ཚེས་ ༤ ཉིན་ Martin Place ནང་རྟེན་གཞི་བྱས་པའི་ Channel 7 བརྙན་འཕྲིན་ཁང་གི་ངོས་ནས་པེ་ཅིང་གི་དགུན་དུས་ཨོ་རྩལ་རྩེད་འགྲན་དང་འབྲེལ་བའི་ཐད་གཏོང་གནང་རྒྱུ་མེད་པའི་འབོད་སྐུལ་ཞུ་རྒྱུ་ཡིན་པ་དང་གལ་ཏེ་དེ་ལྟར་མ་གནང་ཚེ་ང་ཚོའི་ངོས་ནས་དེར་བལྟ་རྒྱུ་མིན་ཞེས་བརྡ་ལན་སྤྲད་རྒྱུ་ཡིན་པ་གསུངས་སོང་།ལྷག་པར་དུ་ད་བར་བོད་མི་སོགས་ནས་རང་ཉིད་ཀྱི་གནས་ཡུལ་ས་གནས་སོ་སོར་པེ་ཅིང་གི་དགུན་དུས་ཨོ་རྩལ་ལ་ངོ་རྒོལ་གནང་རྐྱེན་ད་ཆ་ཨ་རི་གཙོས་ཨོ་གླིང་སོགས་རྒྱལ་ཁབ་ཁག་ཅིག་གིས་པེ་ཅིང་གི་ཨོ་རྩལ་འགྲན་ཚོགས་ལ་གཞུང་འབྲེལ་སྐུ་ཚབ་གཏང་རྒྱུ་མིན་པར་ཐག་གཅོད་གནང་ཡོད་པ་རེད། དེ་འབྲེལ་ལས་འགུལ་སྤེལ་ཤུགས་ཆེ་བ་གཅིག་ནི་ཨོ་གླིང་གི་མི་སྒེར་ནས་འགྲན་ཚོགས་ཀྱི་ཐད་གཏོང་ལ་མ་གཟིགས་བ་དེས་རྣམ་འགྱུར་ངེས་ཅན་ཞིག་ཆེད་འདོན་གནང་གི་འདུག་ཅེས་གསུངས་ཡོད།

དབྱིན་ཡུལ་ནང་གནས་སྡོད་བསྟན་འཛིན་བཟང་མོ་ལགས་དང་ཁོང་གི་སྐུ་ཟླ་བཀྲིས་དོན་གྲུབ་ལགས་རྣམ་གཉིས་ཀྱིས་ལོ་བདུན་སོན་པའི་བོུ་བསྟན་འཛིན་མཚོ་མོ་དང་བསྟན་འཛིན་བདེ་ཆེན་གཉིས་ཁྲིད་དེ་དབྱིན་ཡུལ་ལྷོ་ནུབ་གྲོང་ཁྱེར་ཆེ་གྲས་ཁག་བཞིའི་ནང་དུ་བོད་ཀྱི་རྒྱལ་དར་བསྣམས་ཏེ་འཚོགས་ལ་ཉེ་བའི་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་དེ་མི་རིགས་སྡེབ་གསོད་ཀྱི་རྩེད་འགྲན་ཞིག་ཡིན་པ་དང། རྒྱལ་སྤྱིའི་མང་ཚོགས་ཀྱི་ངོས་ནས་རྒྱ་ནག་གི་མངའ་འོག་ཏུ་སྡུག་རྩུབ་མྱོང་བཞིན་པའི་བོད་མི་གཙོས་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་གི་རང་དབང་ལ་རྒྱབ་སྐྱོར་གནང་སྟེ་རྒྱ་ནག་གི་ཨོ་རྩལ་ལ་མཉམ་ཞུགས་གནང་ཕྱིར་འཐེན་དང་གཟིགས་རྒྱུ་མེད་པའི་འབོད་སྐུལ་གྱི་སྐོར་སྐྱོད་ལས་འགུལ་ཞིག་དབུ་འཛུགས་གནང་ཡོད་པ་རེད།རྩ་བའི་ཁོང་བཞི་པོས་ལས་འགུལ་དེ་ཟླ་ ༡ ཕྱི་ཚེས་ ༢༨ ཉིན་དབྱིན་ཡུལ་གྱི་ལྟོ་ནུབ་གྲོང་ཁྱེར་ Bath ནས་དབུ་འཛུགས་ཀྱིས་རིམ་པས་གྲོང་ཁྱེར་ Cardiff དང་། Birmingham དེ་བཞིན་ Bristol བཅས་གྲོང་ཁྱེར་ཆེ་ཁག་བཞིའི་ནང་གི་མང་ཚོགས་དང་ཡུལ་སྐོར་སྤྲོ་འཆམ་པ་འདུ་འཛོམས་ཆེ་བའི་ས་ཚིགས་སུ་ཞུ་འབོད་ཀྱི་སྐོར་སྐྱོད་གནང་བཞིན་ཡོད་པ་དང། ཁོང་རྣམ་པས་ཕྱི་ལོ་ ༢༠༢༢ པེ་ཅིང་དགུན་དུས་ཨོ་རྩལ་འགྲན་ཚོགས་ལ་མཉམ་ཞུགས་ཕྱིར་འཐེན་དང་མི་རིགས་སྡེབ་གསོད་ཀྱི་རྩེ་འགྲན་མཚམས་འཇོག་དགོས། འགྲོ་བ་མིའི་ཐོབ་ཐང་མེད་ན་རྩེད་འགྲན་མེད་ཅེས་སོགས་ངོ་རྒོལ་མཚོན་པའི་ཤོག་སྦྱང་བཤམ་སྟོན་དང། ཁྲོམ་གཞུང་ཐོག་ཏུ་ཕེབས་མཁན་མང་ཚོགས་ལ་ཨོ་རྩལ་འགྲན་ཚོགས་གོ་སྒྲིག་བྱེད་མཁན་རྒྱ་དམར་པོའི་གཞུང་ནི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་རྩིས་མེད་རྡོག་རོལ་ཚབས་ཆེན་གཏང་མཁན་མི་གསོད་ཁྲག་སྦྱོར་བའི་གཞུང་ཞིག་ཡིན་པའི་གོ་རྟོགས་སྤེལ་བཞིན་འདུག རྩ་བའི་དབྱིན་ཡུལ་ནང་གནས་སྡོད་བསྟན་འཛིན་བཟང་མོ་ལགས་དང་ཁོང་གི་སྐུ་ཟླ་བཀྲིས་དོན་གྲུབ་ལགས་རྣམ་གཉིས་ཀྱིས་ལོ་བདུན་སོན་པའི་བོུ་བསྟན་འཛིན་མཚོ་མོ་དང་བསྟན་འཛིན་བདེ་ཆེན་གཉིས་བཅས་ཀྱིས་ད་རེས་བོད་དོན་ལས་འགུལ་སྤེལ་བ་འདི་ཆེས་ཐོག་མ་མ་ཡིན་པར་རྒྱུན་དུ་ནས་བོད་དོན་འཐབ་རྩོད་དང་འབྲེལ་བའི་དུས་ཚིགས་ཁག་ལ་ས་གནས་སུ་དང་བླངས་ཐོག་ནས་བོད་དོན་དང་འབྲེལ་བའི་ལས་འགུལ་འདྲ་མིན་སྤེལ་བཞིན་ཡོད་པ་རེད།དེ་མཚུངས་སུ་འདས་པའི་གཟའ་འཇུག་ནང་ཡོ་རོབ་རྒྱལ་ཁབ་སྦེལ་འཇམ་དང་ནི་ཌར་ལན་ཌི། ཕ་རན་སི་སོགས་རྒྱལ་ཁབ་ཁག་ཅིག་ནང་དུ་བོད་དོན་རྒྱབ་སྐྱོར་བ་ཚོས་གོ་སྒྲིག་གནང་སྟེ། འཚོགས་ལ་ཉེ་བའི་པེ་ཅིང་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་སྐད་འབོད་དང་བགྲོ་གླེང་སོགས་ཀྱི་ལས་འགུལ་རྣམ་པ་འདྲ་མིན་སྤེལ་དང་སྤེལ་མུས་ཡིན་པ་རེད།ཕྱི་ཚེས་ ༢༩ ཉིན་ཡོ་རོབ་རྒྱལ་ཁབ་སི་པཱན་གྱི་གྲོང་ཁྱེར་སྦར་སི་ལོ་ནར་རྒྱ་ནག་གི་ལོ་གསར་གླུ་སྒར་གྱི་ཁྲོམ་སྟོན་ཐོག་རྒྱ་གཞུང་གིས་བོད་དོན་འཁྱོག་བཤད་དྲིལ་བསྒྲགས་སྤེལ་བཞིན་པའི་ས་ཚིགས་སུ་བོད་རིགས་ཚོགས་པའི་བོད་མི་ཁག་ཅིག་གིས་བོད་ཀྱི་རྒྱལ་དར་འཕྱར་ཏེ་རྒྱ་གཞུང་གིས་ཕྱིའི་མི་རིགས་ལ་བོད་དེ་རྒྱ་ཁོངས་ཡིན་པ་དང་བོད་ཀྱི་གླུ་སྒར་སྒྱུ་རྩལ་ལ་འཁྱོག་བཤད་བྱེད་བཞིན་པར་ངོ་རྒོ་གྱི་ལས་འགུལ་སྤེལ་ཡོད།

དེ་ཡང་གཟའ་འཁོར་སྔོན་མའི་རེས་གཟའ་ཕུར་བའི་ཉིན། ཡུ་རོབ་མཐུན་ཚོགས་ཀྱིས་རྒྱ་ནག་གིས་དབྱེ་འབྱེད་རང་བཞིན་གྱི་རྒྱལ་སྤྱིའི་ཚོང་ལས་ལག་བསྟར་བྱེད་ཀྱི་ཡོད་པ་དང་འབྲེལ་ནས། WTO ཞེས་པའི་རྒྱལ་སྤྱིའི་ཚོང་ལས་ལྷན་ཚོགས་སུ་རྒྱ་ནག་གི་བྱེད་བབ་དང་འབྲེལ་བའི་ཚོང་དོན་གྱོད་གཞིའི་ཁྲིམས་གཏུགས་བྱེད་འགོ་ཚུགས་འདུག ཡུ་རོབ་མཐུན་ཚོགས་ཀྱིས། རྒྱ་ནག་གིས་ Baltic མངའ་ཁུལ་གྱིས་ཐེ་ཝན་དང་མཉམ་དུ་འབྲེལ་ལམ་གཏིང་ཟབ་ཏུ་བཏང་བ་དང་འབྲེལ་ནས་རྒྱ་ནག་གིས་ཁུལ་དེའི་ལི་ཐོ་ཎི་ཡ་རྒྱལ་ཁབ་དང་མཉམ་དུ་ཚོང་འབྲེལ་ཡོད་ཚད་བཀག་སྡོམ་བྱས་པར་ ཡུ་རོབ་མཐུན་ཚོགས་ཀྱིས་རྒྱ་ནག་གིས་དབྱེ་འབྱེད་རང་བཞིན་གྱི་ཚོང་ལས་ལག་བསྟར་བྱེད་ཀྱི་ཡོད་པར་ངོས་འཛིན་གྱིས་རྒྱལ་སྤྱིའི་ཚོང་ལས་ལྷན་ཚོགས་སུ་ཁྲིམས་གཏུགས་བྱས་ཡོད་འདུགདེ་ཡང་ཡུ་རོབ་མཐུན་ཚོགས་ཀྱི་ཚོང་ལས་ཀྱི་གཙོ་འཛིན།  སྐུ་ཞབས Valdis Dombrovskis ལགས་ཀྱིས་འགྲེལ་བརྗོད་བྱས་པའི་ནང་དུ། གཞི་རྩའི་རྒྱལ་སྤྱིའི་ཚོང་ལས་ལྷན་ཚོགས་ལ་གྱོད་དོན་ཞུ་གཏུགས་བྱེད་རྒྱུ་དེ་ནི་ང་ཚོ་ལས་སླ་བོ་ཞིག་ལ་ངོས་འཛིན་བྱེད་བཞིན་མེད་ཀྱང་། རྒྱལ་ཁབ་ཕྱོགས་གཉིས་ཀྱིས་ཐེངས་མང་པོ་ཚོང་འབྲེལ་གྱི་གྱོད་དོན་དེ་ཞི་འགྲིག་ཐུབ་ཐབས་སུ་འབད་བརྩོན་བྱས་ཀྱང་གྲུབ་འབྲས་མ་བྱུང་བས།  ད་ནི་རྒྱལ་སྤྱིའི་ཚོང་ལས་ལྷན་ཚོགས་སུ་ཞུ་སྐུལ་གྱིས་རྒྱ་ནག་དང་འབྲེལ་བའི་གྱོད་དོན་དེ་ཞི་འཇགས་ཡོང་ཐབས་སུ་སྐུལ་མ་གནང་རྒྱུ་ལས་ལྷག་མེད་པ་ཞིག་ཡིན་པར་མངོན་གསལ་གནང་འདུག གཞན་ཡང་ཁོང་གིས། ཡུ་རོབ་མཐུན་ཚོགས་ནི་ཚོང་ར་གཅིག་གི་ངོ་བོར་གནས་ཡོད་པ་དང་རྒྱལ་སྤྱིའི་ཚོང་ལས་ལྷན་ཚོགས་ཀྱི་ཁྲིམས་སྒྲིག་དང་འགལ་བའི་བྱ་སྤྱོད་ལ་ཐུག་སྐབས་ཀྱང་ཡུ་རོབ་མཐུན་ཚོགས་ཀྱིས་གནད་དོན་དེར་མཉམ་མཐུན་གྱིས་ཁ་གཏད་གཅོག་རྒྱུ་ཡིན་ལུགས་ངོ་སྤྲོད་ཀྱིས། ཚོང་ལས་ཀྱི་ཁྲིམས་སྒྲིག་རྩ་གཏོར་བྱིན་པ་དེ་ཡིས་ཡུ་རོབ་མཐུན་ཚོགས་ཀྱི་ཚོང་རའི་གཅིག་སྒྲིལ་ལ་ཉེན་ཁ་སྤྲད་པ་ཞིག་ཡིན་སྟབས་ཕྱི་འབྲེལ་གྱི་མི་སྣ་བརྒྱུད་ནས་གནད་བབ་དེ་གང་མགྱོགས་ཞི་འཇགས་ཡོང་ཐབས་གནང་དགོས་བར་སྐུལ་འདུགཡུ་རོབ་ལྷན་ཚོགས་ཀྱི་རྒྱལ་སྤྱིའི་ཚོང་ལས་ལྷན་ཚོགས་ཀྱི་སྐུ་ཚབ་པས་ཚོང་ལས་ལྷན་ཚོགས་སུ་དང་ཁ་གཏད་ཀྱི་རྒྱ་ནག་སྐུ་ཚབ། Li Chenggang ལགས་སུ་ཡི་གེ་བཏང་བའི་ནང་དུ། པེ་ཅིང་གིས་ལི་ཐོ་ཎི་ཡའི་ཚོང་ལས་ནང་འདྲེན་དང་རྒྱ་ནག་གི་ཅ་དངོས་ཕྱིར་འདྲེན་སོགས་ཡོངས་སུ་བཀག་སྡོམ་བྱས་ཡོད་པ་ཞིག་ཡིན་པར་འཁོད་ཡོད་པ་མ་ཟད། རྒྱ་ནག་གིས་ལི་ཐོ་ཎི་ཡ་དང་འབྲེལ་བའི་ཚོང་ལས་དང་ཞབས་ཞུའི་རིགས་བཀག་སྡོམ་བྱས་པའི་ཁྲོད།  ཡུ་རོབ་མཐུན་ཚོགས་བརྒྱུད་པའི་ཚོང་ལས་ལ་ཡང་དོ་ཕོག་འགྲོ་བཞིན་ཡོད་པར་མངོན་གསལ་གནང་འདུག རྒྱ་ནག་གིས་ཡུ་རོབ་མཐུན་ཚོགས་ཀྱི་གྱོད་དོན་དེ་དང་འབྲེལ་ནས་གནད་དོན་དེ་ནི་རྒྱ་ནག་དང་ལི་ཐོ་ཎི་ཡ་གཉིས་བར་གྱི་གནད་དོན་ཞིག་ཡིན་པར་འགྲེལ་བརྗོད་ཀྱིས། ཡུ་རོབ་མཐུན་ཚོགས་ཀྱིས་གནད་དོན་དེར་ཐེ་གཏོགས་མི་བྱེད་རྒྱུའི་ཉེན་བརྡ་བཏང་ཡོད་པ་དང་། རྒྱ་ནག་གིས་ལི་ཐོ་ཎི་ཡ་དང་འབྲེལ་བའི་ཚོང་འབྲེལ་བྱེད་ཕྱོགས་དེ་ནི་རྒྱ་ནག་གི་ཚོང་ལས་ཀྱི་འདོད་མོས་ཡིན་པ་ལས་གནད་དོན་གཞན་དང་འབྲེལ་བ་ཡོད་པར་ཁས་ལེན་བྱས་མེད་ཀྱང་ཡུ་རོབ་ལྷན་ཚོགས་ཀྱིས་རྒྱ་ནག་གི་འགྲེལ་བརྗོད་བྱེད་སྟངས་དེར་ངོས་ལེན་གནང་མེད་པ་རེད་འདུགགཞི་རྩའི་ཡུ་རོབ་མཐུན་ཚོགས་ཀྱིས་རྒྱ་ནག་གིས་ཡུ་གུར་ཁ་ཆེ་མི་མང་ངལ་རྩོལ་བསྒྱུར་བཀོལ་བྱས་པའི་གནད་དོན་དང་འབྲེལ་ནས་རྒྱ་ནག་གི་འབྲེལ་ཡོད་དཔོན་རིགས་ཁག་ཅིག་ཡུ་རོབ་ཏུ་འགྲོ་སྐྱོད་མི་ཆོག་པའི་ཁྲིམས་ཀྱི་ཉེས་ཆད་བཅད་པ་དང་བསྟུན་ནས་རྒྱ་ནག་གིས་ཀྱང་ཡུ་རོབ་ཀྱི་དཔོན་རིགས་ཁག་ཅིག་རྒྱ་ནག་གི་ནང་དུ་ཡོང་མི་ཆོག་པའི་བཀའ་རྒྱ་བསྒྲགས་ཡོད་པ་དང་བསྟུན་ནས།  ཡུ་རོབ་མཐུན་ཚོགས་དང་རྒྱ་ནག་གཉིས་ཀྱི་བར་དུ་ཚོང་དོན་གྱི་གན་རྒྱ་མང་པོ་ཞིག་དུས་ལྟར་འཇོག་མ་ཐུབ་པར་རང་སོར་ལྷག་ཡོད་པ་རེད།

རྒྱ་ནག་གཞུང་ངོས་ནས་ཡུལ་དེའི་ནང་ཚོགས་རྒྱུའི་ཨོ་རྩལ་འགྲན་ཚོགས་ཀྱི་རྗེས་སམ། འདི་ལོའི་ལོ་དཀྱིལ་དུ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཤིན་ཅང་དུ་བསྐྱོད་རྒྱུའི་ཆོག་མཆན་ཕུལ་ཡོད་པའི་གནས་ཚུལ་ཐོན་འདུགདེ་རིང་ལྷོ་རྒྱ་ནག་གི་ཞོགས་པའི་ཆ་འཕྲིན་གསར་ཤོག་ཐོག་གནས་ཚུལ་ཐོན་པར་གཞིགས་ན། ལྕམ་སྐུ་ Michelle Bachelet ལགས་ཀྱིས་ཕྱི་ལོ་༢༠༡༨ ལོ་ནས་བཟུང་ཤིན་ཅང་ཁུལ་དུ་སྐུ་ཚབ་ཚོགས་པ་ཞིག་ཆེད་གཏོང་བྱེད་རྒྱུར་གྲ་སྒྲིག་བྱས་པ་ལྟར། རྒྱ་ནག་གཞུང་གིས་འདི་ལོའི་ཟླ་བ་ ༤ བའི་ཚེས་ ༢༠ རྗེས་སམ། པེ་ཅང་གི་ཨོ་རྩལ་འགྲན་ཚོགས་མཇུག་སྒྲིལ་རྗེས་ལྕམ་སྐུ་མཆོག་གི་སྣེ་ཁྲིད་འོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་ཚོ་ཁག་ཤིན་ཅང་གི་ནང་དུ་ཆེད་ཕེབས་གནང་རྒྱུའི་ཆོག་མཆན་ཕུལ་ཡོད་པ་དེ་ལྟར་ཡང་། ཐེངས་འདིའི་སྐོར་སྐྱོད་དེ་ནི་ཕན་ཚུན་གྲོགས་པའི་མཛའ་བརྩེའི་ངང་ནས་ཆེད་ཕེབས་གནང་རྒྱུ་ཡིན་པ་ལས་དམིགས་བསལ་གྱི་རྟོག་ཞིབ་ཀྱི་ངོ་བོའི་ཐོག་ནས་ཕེབས་རྒྱུ་མིན་པར་བསྒྲགས་འདུག མ་ཟད་དེ་རིང་པེ་ཅིང་དུ་ཚོགས་པའི་གསར་འགོད་ལྷན་ཚོགས་ཤིག་གི་ཐོག རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པས། རྒྱ་ནག་གཞུང་གི་ངོས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ལ་ལྕམ་སྐུ་མཆོག་རིང་མིན་ཤིན་ཅང་གཙོ་བྱས་པའི་རྒྱ་ནག་གི་ས་ཁུལ་ཁག་ཏུ་ཆེད་ཕེབས་གནང་རྒྱུར་གདན་ཞུ་ཕུལ་ཟིན་པ་དང་། ད་ལྟའི་ཆར་ཕྱོགས་གཉིས་དབར་གནད་དོན་དེའི་སྐོར་འབྲེལ་བ་བྱེད་མུས་ཡིན་པར་བརྗོད་འདུག རྩ་བའི་ཐེངས་འདིར་རྒྱ་ནག་གཞུང་གིས་རྒྱལ་ཚོགས་ལ་ཕུལ་བའི་གདན་ཞུ་དེ་ནི་ད་ལྟའི་ཆར་སུད་སི་ཇཱ་ནི་ཝ་གྲོང་ཁྱེར་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ ༤༦ པ་དེ་འཚོགས་བཞིན་པའི་ཁྲོད་ཕུལ་བ་ཞིག་ཡིན་པ་དང་། བརྒྱུད་ལམ་ཁག་གཅིག་ཏུ་ཐོན་པའི་འབྲེལ་ཡོད་གནས་ཚུལ་ཞིག་གི་ནང་གསལ་ལྟར་ན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རིང་མིན་ཤིན་ཅང་དང་འབྲེལ་བའི་སྙན་ཐོ་ཞིག་འདོན་འཆར་ཡོད་ཀྱང་། རྒྱ་ནག་གཞུང་ནས་ཐེངས་འདིའི་ཨོ་ལམ་སྤིག་རྩེད་འགྲན་མ་འཚོགས་གོང་དུ་སྙན་ཐོ་དེ་འདོན་སྤེལ་གནང་རྒྱུ་མེད་པའི་གནོན་ཤུགས་སྤྲད་ཡོད་པ་རེད་འདུག སྤྱིར་ཕྱི་ལོ་ ༢༠༠༨ ལོའི་པེ་ཅིང་ཨོ་ལམ་སྤིག་རྩེད་འགྲན་སྐབས་བཞིན། ཐཻངས་འདིའི་པེ་ཅིང་གི་དགུན་དུས་ཨོ་ལམ་སྤིག་རྩེད་འགྲན་གྱི་སྔ་རོལ་དུ་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ཐོག་སླར་ཡང་རྒྱལ་སྤྱིའི་ཁྲོད་དོ་སྣང་དང་བགྲོ་གླེང་ཡོང་བཞིན་པའི་ཁྲོད། ཨ་རི་གཙོས་པའི་རྒྱལ་ཁབ་མང་དག་ཅིག་གིས་རྒྱ་ནག་གིས་ཡུ་གུར་མི་རིགས་རྩ་གཏོར་གྱི་སྲིད་བྱུས་ལག་བསྟར་བྱེད་བཞིན་ཡོད་པར་འགྲེལ་བརྗོད་ཀྱིས་འདི་ལོའི་རྩེད་འགྲན་སྐབས་གཞུང་འབྲེལ་སྐུ་ཚབ་གཏོང་རྒྱུ་མིན་པར་ཐག་གཅོད་གནང་ཡོད་པ་རེད།འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་ངེས་སྟོན་པ་ Sophie Richardson ལགས་ཀྱིས་Reuters གསར་སྤེལ་ཁང་ལ་ཡིག་ལམ་ནས་འགྲེལ་བརྗོེད་གནང་བའི་ནང་དུ། རྒྱལ་སྤྱིའི་སྣེ་འདྲེན་གྱི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་ཕྱི་འབྲེལ་གྱི་སྐུ་ཚབ་མི་སྣ་རྣམས་རྒྱ་ནག་གིས་ཡུ་གུར་ཁ་ཆེ་མི་རིགས་ལ་དམིགས་པ་སོགས་ཀྱི་མཚོན་པའི་འགྲོ་བ་མིའི་རིགས་ལ་བསགས་པའི་ནག་ཉེས་ལས་གཡོལ་ཐབས་ཀྱི་བསླུ་བྲིད་འོག་ཏུ་ཚུད་རྒྱུ་མེད་པར་བརྗོད་འདུག གཞི་རྩའི་རྒྱ་ནག་གི་དམར་ཤོག་སྲིད་གཞུང་གི་འོག་ཏུ་ཡོད་པའི་གྲངས་ཉུ་མི་རིགས་ཀྱི་ས་ཁུལ་སོ་སོར་འགྲོ་བ་མིའི་ཐོབ་ཐང་གི་གཙོ་བྱས་པའི་སྐད་ཡིག་དང་ཆོས་ལུགས་དད་མོས་ལ་རྡོག་རོལ་ཆེས་ཆེར་ཐེབས་བཞིན་པ་ཡོངས་གྲགས་ཡིན་པ་ལྟར། སྔར་ལོ་ཨོ་གླིང་དུ་རྟེན་གཞི་བྱས་པའི་ཨོ་གླིང་གི་འཐབ་བྱུས་ལྟེ་གནས་ཁང་(ASPI) གིས་ཟུང་སྐར་བརྒྱུད་བླངས་པའི་པར་རིས་དང་། གཞུང་འབྲེལ་ཡིག་ཆ། དེ་བཞིན་ཕྱི་རྒྱལ་དུ་བྲོས་བྱོལ་དུ་སོང་བའི་ཡུ་གུར་རྣམས་ཀྱི་དངོས་བྱུང་མྱོང་བ་ཁག་ལ་གཞིར་བཟུང་སྟེ་ཞིབ་འཇུག་བྱས་ནས་སྙན་ཐོ་ཞིག་བཏོན་པའི་ནང་དུ། རྒྱ་ནག་གཞུང་གིས་ཡུ་གུར་འདུས་སྡོད་ཆེ་སའི་ཤིན་ཅང་ཁུལ་དུ་ཉུང་མཐར་བཀག་སྐྱིལ་ཁང་ཆེ་ཆུང་མི་འདྲ་བ་ ༣༨༠ ལྷག་འཛུགས་སྐྲུན་བྱས་ཏེ། མི་མང་བཀག་སྐྱིལ་དང་བསམ་བློ་བཅོས་སྒྱུར་བྱེད་བཞིན་ཡོད་པ་མངོན་གསལ་གནང་ཡོད་པ་རེད།

རྒྱ་གར་བྱང་ཤར་མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་བུ་བསྟན་འཛིན་ཚེ་རིང་ལགས་ཀྱིས་དུས་རྒྱུན་ནས་དང་བླང་གིས་ཁུལ་དེའི་འབྱོར་འཁས་ཞན་པའི་སློབ་མ་རྣམས་ལ་དང་བླང་གིས་སློབ་ཁྲིད་གནང་བཞིན་སྟབས། ཁ་ཉིན་རྒྱ་གར་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་ ༧༣ འཁོར་བའི་དུས་དྲན་གྱི་ཉིན་མོར། ཁུལ་དེའི་མེའོ་རྫོང་དཔོན་གཞོན་པའི་ལས་ཁུངས་ནས་ཁོང་ལ་ཡི་རང་བསྔགས་བརྗོད་ཀྱི་གཟེངས་བསྟོད་ཕྱག་འཁྱེར་ཞིག་གནང་འདུག རྩ་བའི་བསྟན་འཛིན་ཚེ་རིང་ལགས་ནི་མཐོ་སློབ་འགྲིམ་བཞིན་པའི་སློབ་མ་ཞིག་ཡིན་ཞིང་། ཏོག་དབྱིབས་ནད་དུག་གི་རྐྱེན་གྱིས་མཐོ་སློབ་ཀྱི་འཛིན་གྲྭ་ཁག་དྲྭ་ལམ་དུ་འཚོགས་བཞིན་པ་དང་སྟབས་བསྟུན་གྱིས།  ཁོང་གིས་ཁུལ་དེའི་འབྱོར་འཁས་ཞན་པའི་ཁྱིམ་ཚང་གི་སློབ་མ་མང་པོར་དང་བླང་གིས་སློབ་ཁྲིད་བྱེད་མུས་རེད་འདུག ཁོང་གིས་འདི་ག་གསར་ཁང་ལ་བརྗོད་པ་ལྟར་ན། དུས་རྒྱུན་ནས་༸གོང་ས་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་ཡིད་ལ་བཅིངས་བའི་ཐོག་ནས་མི་རིགས་དང་ཆོས་ལུགས་ཀྱི་དབྱེ་བ་མེད་པར་དཔལ་འབྱོར་གྱི་མཐུན་རྐྱེན་ཞན་པའི་སློབ་མ་རྣམས་ལ་སློབ་ཁྲིད་བྱེད་རྒྱུར་འབད་བརྩོན་བྱེད་མུས་ཡིན་པ་མ་ཟད།  དེ་ནི་རང་གཞན་གཉིས་ཕན་གྱི་བྱ་བཞག་ཅིག་ཡིན་པར་གསུངས་སོང་།

ཉེ་ལམ་ཟླ་ ༡ ཚེས་ ༢༡ ཉིན་རྒྱ་གར་མངའ་སྡེ་ཧར་ཡ་ནའི་གྲོང་ཁྱེར་ཨམ་བྷ་ལ་ནང་ Potala Tibetan Refugee Market ཞེས་བོད་མིའི་སུད་ཚོང་གཉེར་སའི་ཁྲོམ་རར་མེ་སྐྱོན་ཕོག་ནས་ཁྲོམ་ས་བཅུ་རྩ་གཏོར་ཕྱིན་པའི་ཁྲོད་ཚོང་པ་རྣམས་ལ་ཁྱོན་ཧིན་སྒོར་འབུམ་དགུ་བཅུ་གོ་བརྒྱད་ལྷག་གི་གྱོང་གུད་ཕོག་འདུག ཨམ་བྷ་ལ་བོད་མིའི་ཁྲོམ་རར་མེ་སྐྱོན་ཕོག་པའི་གནད་དོན་བྱུང་རྗེས་རྐང་ས་གནས་སུ་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཞོན་བསྟན་འཛིན་མཁྱེན་བརྩེ་ལགས་དང་ལྷན་ཕྱག་རོགས་ཁག་གཅིག་གིས་ས་གནས་སུ་གནས་སྟངས་ཇི་ཆགས་ཞིབ་འཇུག་གནང་སླད་ཨམ་བྷ་ལར་ཆེད་བཅར་གནང་བ་ལྟར་རླུང་འཕྲིན་ཁང་གིས་མཁྱེན་བརྩེ་ལགས་སུ་བཅར་འདྲི་ཞུས་པར་ཁྲོམ་ས་བཅུ་ལ་ཁྱོན་ཧིན་སྒོར་འབུམ་དགུ་བཅུ་གོ་བརྒྱད་དང་སྟོང་ཕྲག་བདུན་ཅུ་དོན་གཉིས་ལྷག་གི་གྱོང་གུད་ཕོག་ཡོད་སྐོར་སོགས་འགྲེལ་བརྗོད་གནང་སོང་། ད་ལན་མེ་སྐྱོན་གྱི་དོན་རྐྱེན་བྱུང་བ་དེ་ཐོག་མ་མིན་པར་དེ་སྔའང་བོད་མིའི་སུད་ཚོང་གཉེར་ཡུལ་ཁག་གཅིག་ལ་མེའི་འཇིག་པའི་ངལ་བ་འཕྲད་མྱོང་ཡོད་པ་རེད། མཁྱེན་བརྩེ་ལགས་ཀྱིས་སྤྱིར་བཙན་བྱོལ་བོད་མིའི་ཚོང་པ་ཚོགས་པས་དུས་དང་རྣམ་པ་ཀུན་ཏུན་ས་གནས་སོ་སོར་མེ་སྐྱོན་དང་བརླག་སྟོར་ལ་སོགས་པའི་ཐད་ལམ་སྟོན་ཞུས་དང་ཞུ་མུས་ཡིན་པ་གསུངས་པ་དང་ཆབས་ཅིག ལྷག་པར་དུ་ད་རེས་ཀྱི་མེ་སྐྱོན་དེ’ང་གློག་འཁྱུད་ལ་བརྟེན་ནས་བྱུང་བ་ཡིན་པར་ཐེ་ཚོམ་ཡོད་སྐོར་གསུངས་ཡོད།ཨམ་བྷ་ལའི་དོན་རྐྱེན་ལ་ད་བར་ཧར་ཡ་ན་ནང་བཙན་བྱོལ་བོད་མིའི་ཚོང་པ་ཚོགས་པའི་ཁྱབ་ཁོངས་སུ་གཏོགས་པའི་ཚོགས་པས་སྟོང་ཕྲག་ལྔ་བཅུ་ཞལ་འདེབས་གནང་འདུག་པ་དང་དེ་བཞིན་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ས་གནས་སུ་ཆེད་བཅར་གྱིས་བོད་མི་རྣམས་དང་ཐུག་འཕྲད་གནང་སྟེ། སེམས་གསོ་ཆེད་ཧིན་སྒོར་འབུམ་གཅིག་ཞལ་འདེབས་ཕུལ་འདུག དབུས་བོད་ཀྱི་བུད་མེད་ལྷན་ཚོགས་ཀྱིས་ཀྱང་ཞལ་འདེབས་ཕུལ་འདུག་པར་མ་ཟད་གཞོན་ལྷན་དང་བུད་མེད་ལྷན་ཚོགས་ཀྱི་ཁྱབ་ཁོངས་ས་གནས་ཁག་ནས་ཞལ་འདེབས་བསྡུ་རུབ་གནང་མུས་ཡིན་པ་རེད།