རིང་མིན་བདུན་ཕྲག་འདིའི་རེས་གཟའ་པ་སངས་ཉིན་རྒྱ་ནག་གྱི་རྒྱལ་ས་པེ་ཅིང་དུ་རྒྱལ་སྤྱིའི་དགུན་དུས་ཨོ་ལམ་པིག་རྩེད་འགྲན་འཚོགས་གཏན་ཁེལ་ཡོད་པ་དང་བསྟུན། Inter-Parliamentary Alliance on China ཞེས་རྒྱ་ནག་ལ་གདོང་ལེན་གནང་མཁན་གྱི་རྒྱལ་སྤྱིའི་གྲོས་ཚོགས་འཐུས་མི་ལས་གྲུབ་པའི་ཚོགས་པའི་ཚོགས་མི་ཁག་ཅིག་ཐུན་མོང་གིས་རྒྱ་ནག་ནང་དགུན་དུས་ཨོ་རྩལ་མ་འཚོགས་གོང་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་ནས་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་བབ་སྙན་ཐོ་ཡོངས་གྲགས་བྱེད་དགོས་ཞེས་གསུངས་འདུག
ཉེ་ཆར་རྒྱ་ནག་གཞུང་ནས་ཤིན་ཅང་གི་གནད་དོན་དང་འབྲེལ་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཤིན་ཅང་དུ་སྐྱོད་རྒྱུའི་ཆོག་མཆན་ཕུལ་བའི་གནས་ཚུལ་ཞིག་ཐོན་ཡོད་ཀྱང་། དེའི་ཆ་རྐྱེན་དུ་རྒྱ་ནག་གི་ཨོ་རྩལ་འགྲན་ཚོགས་ཟིན་པའི་རྗེས་སུ་སྙན་ཐོ་འདོན་སྤེལ་གནང་རྒྱུ་ཡིན་སྐོར་བཤད་ཡོད་པ་རེད།
གནད་དོན་དེ་འབྲེལ་ཉེ་ཆར་ IPAC ཚོགས་པའི་གྲོས་ཚོགས་འཐུས་མི་ཁག་ཅིག་ཅིག་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཀྱི་མཚན་ཐོག་ལ་སྙན་ཞུ་ཞིག་ཕུལ་བའི་ནང་དེ་སྔ་ཕྱི་ལོ་ ༢༠༢༠ ཕྱི་ཟླ་ ༦ པའི་ནང་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐོག་ཕྱག་ལས་གནང་མཁན་གྱི་ཆེས་མཐོའི་རང་དབང་ཅན་གྱི་སྐུ་ཚབ་ལྔ་བཅུས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་གཞུང་ནས་ཤིན་ཅང་ནང་ཡུ་གུར་བ་གཙོས་གྲངས་ཉུང་མི་རིགས་མང་དག་ཅིག་འཛིན་བཟུང་བཙན་ཁྲིད་བྱས་པའི་གནད་དོན་སྐོར་ཞིབ་འཇུག་འཐུས་གཙང་ཞིག་གནང་སྟེ་སྙན་ཐོ་ཞིག་ངེས་པར་དུ་འདོན་སྤེལ་གནང་དགོས་པའི་ཞུ་སྐུལ་གནང་བ་དེ་ད་ཆ་ལོ་གཅིག་དང་ཕྱད་ཀ་ཙམ་འགྲོ་བཞིན་ཡོད་ཀྱང་། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་གནད་དོན་འདིའི་སྐོར་ཁ་གསལ་གང་ཡང་གསུངས་མེད་སྟབས་ཆེས་མཐོའི་སྐུ་ཚབ་རྣམ་པའི་ངོས་ནས་དེར་ཐུགས་ཕམ་ཆེན་པོ་ཡོད་སྐོར་གསུངས་ཡོད།
ལྷག་པར་དུ་ད་ཆ་རྒྱ་ནག་ལ་རྒྱལ་སྤྱིའི་དགུན་དུས་ཨོ་ལམ་པིག་རྩེད་འགྲན་དངོས་སུ་འཚོགས་ལ་ཉེ་བའི་མཚམས་འདིར་རྒྱལ་སྤྱིའི་སྲིད་གཞུང་དང་མང་ཚོགས་མང་པོས་རྒྱ་ནག་ལ་དོ་སྣང་དང་སྐྱོན་བརྗོད་བྱེད་བཞིན་པའི་སྐབས་སུ་རྒྱ་ནག་གཞུང་ནས་ད་བར་ཤིན་ཅང་ནང་ཡུ་གུར་མི་སེར་གཙོ་གྱུར་རྒྱ་ནག་གི་མངའ་འོག་ཏུ་ཡོད་པའི་གྲངས་ཉུང་མི་རིགས་ཐོག་ལག་བསྟར་བྱེད་བཞིན་པའི་དྲག་རྩུབ་ཅན་གྱི་སྲིད་བྱུས་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་ཐོག་འགན་ཁུར་ལྡན་པ་ཞིག་བཟོ་གལ་ཡིན་པར་འགྲེལ་བརྗོད་གནང་བ་དང་ཆབས་ཅིག ལྕམ་སྐུ་ Michelle Bachelet ལགས་ཀྱིས་སྣེ་ཁྲིད་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་གི་ངོས་ནས་རྒྱ་ནག་ནང་དགུན་དུས་ཨོ་རྩལ་མ་འཚོགས་གོང་ལ་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་བབས་སྙན་ཐོ་ཡོངས་གྲགས་གནང་དགོས་ཞེས་གསུངས་འདུག
ཞུ་སྐུལ་དེའི་ནང་ IPAC ཚོགས་པའི་གྲོས་ཚོགས་འཐུས་མི་རྣམས་ནས་དུས་རྟག་ཏུ་རྒྱལ་ཚོགས་ཀྱི་ལས་དོན་དང་ལྷག་པར་དུ་རྒྱ་ནག་གཞུང་གི་བྱེད་བབ་ཁག་ཐེར་འདོན་གནང་རྒྱུའི་ལས་དོན་ཐོག་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་གི་ཡོད་ཅེས་གསུངས་འདུག་ལ། ཞུ་སྐུལ་དེའི་ཐོག་ཡོ་རོབ་གྲོས་ཚོགས་ཀྱི་འཐུས་མི་དང་འཇར་མི་ནི། དབྱིན་ཡུལ། ཁེ་ན་ཌ། ཕ་རན་སི། དེ་བཞིན་རྒྱ་གར་དང་ཨོ་སི་ཀྲོ་ལི་ཡ་སོགས་ IPAC ཚོགས་པའི་ཚོགས་མི་རྒྱལ་སྤྱིའི་གྲོས་ཚོགས་འཐུས་མི་ ༢༦ ལྷག་གིས་མཚན་རྟགས་ཆེད་བཀོད་གནང་ཡོད་པ་རེད།
གཞི་རྩའི་ཉེ་ཆར་རྒྱ་ནག་གཞུང་ནས་ཤིན་ཅང་གི་གནད་དོན་དང་འབྲེལ་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet ལགས་ཤིན་ཅང་དུ་སྐྱོད་རྒྱུའི་ཆོག་མཆན་ཕུལ་བའི་གནས་ཚུལ་ཞིག་ཐོན་ཡོད་ཀྱང་། འགྲོ་བ་མིའི་ཐོབ་ཐང་གི་གནད་དོན་ཐོག་དཔྱད་ཞིབ་གནང་མཁན་ཁག་ཅིག་ནས་རྒྱ་ནག་གཞུང་གི་ངོས་ནས་ཆོག་ཆན་ཕུལ་བའི་ནང་ལྕམ་སྐུ་ Michelle Bachelet ལགས་རྒྱ་ནག་གི་ཨོ་རྩལ་འགྲན་ཚོགས་ཟིན་པའི་རྗེས་སུ་ཤིན་ཅང་ཕེབས་ཆོག་ཅེས་བཀོད་པ་དེ་ནི་གཙོ་བོ་རྒྱ་ནག་ནང་འཚོགས་རྒྱུའི་ཨོ་རྩལ་ལ་ཕྱི་ཕྱོགས་ནས་བར་ཆད་མི་ཡོང་བ་དང་། རྒྱ་ནག་རང་ཉིད་ཀྱི་ངོ་སྲུང་སྐྱོབ་བྱེད་རྒྱུར་དམིགས་པ་ཞིག་རེད་ཅེས་གསུང་མཁན་འདུག་ལ། ད་ཆ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་ཤིང་ཅང་ནང་གི་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་བའི་སྙན་ཐོ་དེ་ཡོངས་གྲགས་མ་གནང་པ་དེ་ཡང་རྒྱ་ནག་གཞུང་གི་གནོན་ཤུགས་དབང་གི་ཡིན་པ་ཡང་གསུངས་མཁན་འདུག
