གསར་འགྱུར།

དབྱིན་ཡུལ་ནང་གནས་སྡོད་བོད་མི་ཚོས་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་མཉམ་ཞུགས་ཀྱིས་ཧོ་ཀོང་མང་ཚོགས་ཀྱི་ལས་འགུལ་དང་མངོན་འདོད་ལ་རྒྱབ་སྐྱོར་གྱི་གདུང་སེམས་མཉམ་བསྐྱེད་ཞུས་འདུག སྤྱིར་འདི་ལོ་ཧོང་ཀོང་སྤྱི་ཁྱབ་ཀེ་རི་ལེམ་གྱིས་ཧོང་ཀོང་ནས་རྒྱ་ནག་སྐམ་ས་ཆེན་པོ་དང་ལྷན་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་ནས་ད་བར་འདས་པའི་ཟླ་བ་གཉིས་ལྷག་གི་རིང་ལ་ཧོང་ཀོང་མི་མང་ས་ཡ་མང་པོས་པེ་ཅིང་གཞུང་དང་ཧོང་ཀོང་ད་ཡོད་གཞུང་འཛིན་ལ་ངོ་རྒོལ་གྱི་ལས་འགུལ་རྒྱུན་མི་མི་ཆད་པ་སྤེལ་བཞིན་པ་དང་། ཧོང་ཀོང་གི་ཉེན་རྟོག་པ་ཚོས་མི་མང་ངོ་རྒོལ་གནང་མཁན་ཚོར་དྲག་གནོན་དང་འཛིན་བཟུང་སོགས་བྱེད་འགོ་བཙུགས་ཏེ་ད་ཆ་ཉིན་རེ་བཞིན་ཧོང་ཀོང་ནང་གནས་སྟངས་ཆེས་ཛ་དྲག་ཏུ་འགྱུར་བཞིན་ཡོད་པ་རེད། ཟླ་ ༨ ཚེས་ ༡༦ ནས་ ༡༩ བར་འཛམ་གླིང་ས་ཕྱོགས་གང་སར་གནས་སྡོད་ཧོང་ཀོང་མང་ཚོགས་དང་ཧོང་ཀོང་ལ་རྒྱབ་སྐྱོར་གནང་མཁན་མི་མང་ནས་ GLOBAL: Solidarity with HK Rally ཞེས་རྒྱལ་སྤྱིའི་ཁྱོན་ཀྱི་རྒྱལ་ཁབ་ ༣༠ ལྷག་གི་ནང་ཧོང་ཀོང་མང་ཚོགས་ཀྱི་ལས་འགུལ་ལ་གདུང་སེམས་མཉམ་བསྐྱེད་ཀྱི་རྔམ་སྟོན་གཞི་རྒྱ་ཆེ་བའི་ལས་འགུལ་སྤེལ་འགོ་བརྩམས་ཡོད་པ་དང་། ཕྱི་ཚེས་ ༡༧ ཉིན་དབྱིན་ཡུལ་གྱི་རྒྱལ་ལོན་ཊན་དུ་སྤེལ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་ཁུལ་དེར་གནས་སྡོད་བོད་མི་ཚོས་མཉམ་ཞུགས་ཀྱིས་བོད་མི་ཚོ་ཧོང་ཀོང་མང་ཚོགས་དང་མཉམ་དུ་ཡོད་ཅེས་དང་། ཧོང་ཀོང་མང་ཚོགས་ལ་གཉའ་གནོན་མཚམས་འཇོག་དགོས་ཞེས་པའི་ཕྲད་དར་དང་ཤོག་སྦྱང་སོགས་ཀྱི་སྟེང་ལ་དགོས་འདོན་ཆེད་བཀོད་ཀྱིས་རྔམ་སྟོན་ཁྲོམ་སྐོར་དང་ཧོང་མང་ཚོགས་ཀྱི་ཞི་རྒོལ་ལ་གདུང་སེམས་མཉམ་བསྐྱེད་ཞུས་འདུག སྐབས་དེའི་མང་ཚོགས་ཆིག་སྟོང་ལྷག་འདུ་འཛོམས་བྱུང་བའི་ལས་འགུལ་དེ་ལོན་ཊན་རྒྱལ་ས་ Trafalgar Square ཞེས་མང་ཚོགས་འདུ་འཛོམས་ཆེ་བའི་ཐང་ཆེན་ནས་དབྱིན་ཡུལ་སྲིད་བློན་བཞུགས་གནས་དང་། དེ་བཞིན་དབྱིན་ཡུལ་གྲོས་ཚོགས་ཐང་ཆེན་བར་རིམ་པས་ལས་འགུལ་སྤེལ་འདུག་ཅིང་། སྐབས་དེར་ཧོང་ཀོང་མང་ཚོགས་ཀྱི་གདུང་སེམས་མཉམ་བསྐྱེད་ཀྱི་ལས་འགུལ་ལ་གདོང་ལེན་གྱི་ཚུལ་དུ་རྒྱ་ནག་གཞུང་ཚབ་ཁང་ནས་རྒྱ་རིགས་སློབ་ཕྲུག་ངོ་རྒོལ་བ་གྲ་སྒྲིག་གིས་ལས་འགུལ་ཡང་སྤེལ་འདུག རྩ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ཀྱི་ལས་འགུལ་དེ་ཡོ་རོབ་རྒྱལ་ཁབ་འཇར་མི་ནི་དང་ཕ་རན་སི། དེ་བཞིན་ཌེན་མཀ བྱང་ཨ་རི། ཨོ་སི་ཊོ་ལི་ཡ། ཨེ་ཤ་ཡ་བཅས་ཀྱི་རྒྱལ་ཁབ་ཁག་ ༣༠ ལྷག་གི་ནང་དུའང་ལས་འགུལ་གྱི་རྣམ་པ་འདྲ་མིན་བརྒྱུད་ནས་ཧོང་ཀོང་མང་ཚོགས་ལ་གདུང་སེམས་མཉམ་བསྐྱེད་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་རྒྱ་གར་ཧི་མཱ་ཅལ་མངའ་སྡེའི་མ་ན་ལི་གྲོང་ཁྱེར་ནང་ཕྱི་ནང་གི་དད་ལྡན་ཆོས་ཞུ་བ་སྟོང་ཕྲག་བརྒལ་བར་འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་བསྩལ་སོང་། དེ་རིང་ཕྱི་ཟླ་ ༨ ཚེས་ ༡༧ ཉིན་ཆུ་ཚོད་ ༩ ཙམ་ནས་དབུ་འཛུགས་མཛད་པའི་ཆོས་འབྲེལ་ཐོག་ཁུལ་འདིའི་ས་གནས་ཀྱི་དད་ལྡན་རྣམས་གཙོ་གྱུར་ཉེ་འབྲེལ་ས་གནས་ལ་དྭགས། ཁུ་ནུ། ཟངས་དཀར། སྤི་ཏི་སོགས་ཧི་མཱ་ལ་ཡའི་རི་རྒྱུད་ཀྱི་དད་ལྡན་པ་དག དེ་བཞིན་ཕྱི་རྒྱལ་མི་རིགས། བོད་མི་བཅས་ཁྱོན་ཆོས་ཞུ་བ་མི་གྲངས་ ༨༠༠༠ ལྷག་ཙམ་ཞིག་འདུ་འཛོམས་བྱུང་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དབང་གི་སྔོན་འགྲོའི་སྤྱི་བཤད་དང་འབྲེལ་ཏེ་འཕགས་པ་སྤྱན་རས་གཟིགས་ནི་བོད་གངས་ཅན་པའི་ལྷ་སྐལ་ཞིག་ཡིན་པ་མ་ཟད་༸གོང་ས་ལྔ་པ་ཆེན་པོར་དག་སྣང་བྱུང་བ་ཞིག་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་༸གང་ཉིད་མཆོག་༸སྐུ་ན་ཕྲ་དུས་སྐབས་ནས་གསང་བ་རྒྱ་ཆེན་གྱི་ཆོས་འཁོར་དེ་དག་སྟག་བྲག་རིན་པོ་ཆེའི་༸སྐུ་མདུན་ནས་ཞུས་པ་དང་། ཚེ་སྒྲུབ་ཀྱི་ཁྲིད་དེ་དིལ་མགོ་མཁྱེན་བརྩེ་རིན་པོ་ཆེའི་༸སྐུ་མདུན་ནས་ཞུས་པ་སོགས་བཀའ་ཆོས་བཀྲིན་བསྐྱངས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ད་དུང་མགོན་པོ་༸གང་ཉིད་མཆོག་གི་ངོས་ནས་བོད་ཀྱི་སྔོན་བྱོན་མཁས་པ་ཚོས་གང་ཟག་དགོས་མཚན་དང་བསྟན་པ་སྤྱི་མཚན་གསུངས་པ་དེ་མདོ་སྔགས་གཉིས་ལ་སྦྱར་ནས་གསུངས་ཡོད་པ་དང་། དེའང་མདོ་སྔགས་གཉིས་ལས་མདོ་ལམ་དེ་བསྟན་པ་སྤྱི་མཚན་དང་སྔགས་ལམ་དེ་གང་ཟག་དགོས་མཚན་དུ་དགོངས་ནས་གསུངས་ཡོད་པར་བཀའ་བསྩལ་བ་མ་ཟད། མགོན་པོ་༸གང་ཉིད་མཆོག་གིས་དེ་སྔ་བོད་ནང་གང་ཟག་དགོས་མཚན་དབང་དུ་གནང་སྟེ་རྒྱུད་སྡེའི་ཆོ་གར་དོ་སྣང་ཆེན་པོ་གནང་ནས་བསྟན་པ་སྤྱི་མཚན་ལ་སྨན་པའི་རྒྱ་ཆེ་བའི་ལམ་གྱི་རིམ་པའི་སྐོར་གྱི་སློབ་སྦྱོང་ལ་མ་འདང་བར་གཟིགས་ཏེ་རྒྱ་གར་དུ་འབྱོར་མ་ཐག་རྒྱུད་གྲྭ་སྟོད་སྨད་གཉིས་ཀྱིས་མཚོན་པའི་སྔགས་ཀྱི་ཆོ་ག་གནང་མཁན་ཚོར་གཞུང་ཆེན་ལ་སློབ་གཉེར་གནང་དགོས་པའི་ལམ་སྟོན་བསྐྱར་ནན་བསྩལ་སྐོར་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གི་ད་རེས་མ་ན་ལི་ཁུལ་གྱི་བཀའ་ཆོས་འདི་དག་དྲྭ་རྒྱའི་ཐོག་ཐད་སྲིང་གནང་བཞིན་པ་ལྟར་མགོན་པོ་༸གང་ཉིད་མཆོག་གིས་དྲྭ་རྒྱའི་ཐོག་ནས་གསང་སྔགས་བླ་མེད་ཀྱི་ཆོས་འཁོར་གསན་མཁན་ས་ཕྱོགས་ཉེ་རྒྱང་ལ་ལྟོས་མེད་དད་དམ་གཙང་མའི་ཐད་ནས་དམིགས་པ་བཟང་པོས་བཀའ་དབང་ཞུ་ཚེ་བཀའ་དབང་གི་བྱིན་རླབས་འཐོབ་རྒྱུ་ཡིན་པར་བཀའ་བསྩལ་ཡོད། གཞི་རྩའི་ཐོག་མའི་མཛད་འཆར་གཞིར་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཐེངས་འདིའི་མ་ན་ལའི་བཀའ་ཆོས་ཁག་ཕྱི་ཚེས་ ༡༣ ནས་མུ་མཐུད་ཉིན་གྲངས་གསུམ་གྱི་རིང་བཀྲིན་བསྐྱང་འཆར་ཡོད་ཀྱང་། ཁ་ཉིན་ཕྱི་ཚེས་ ༡༥ དང་ ༡༦ བཅས་ཉིན་གཉིས་ཀྱི་རིང་བར་གསེང་བཞག་རྗེས་དེ་རིང་མགོན་པོ་༸གང་ཉིད་མཆོག་ནས་འཕགས་པ་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བསྩལ་ཡོད་པ་དང་། སང་ཉིན་༸གོང་ས་མཆོག་ནས་བློ་སྦྱོང་ཚིག་བརྒྱད་མ་དང་རྒྱལ་སྲས་ལག་ལེན་སོ་མདུན་མའི་བཀའ་ཆོས་བཀྲིན་བསྩལ་རྒྱུ་ཡིན་པ་རེད།

དེ་རིང་སྔ་དྲོ་ལྔ་དང་ལྔ་བཅུའི་གཞོན་སྐྱེས་ཚོགས་འདུའི་ཚོགས་ཐུན་གསུམ་པའི་ཐོག་བོད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་དབར་འབྲེལ་ལམ་སྲ་བརྟན་དང་དོན་ཕན་ལྡན་པའི་གྲོས་མོལ་བསྐྲུན་ཐབས་ཞེས་པའི་བརྗོད་གཞིའི་ཐོག་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྔ་བ་ཚེ་རྒྱམ་ལགས་ཀྱིས་བོད་ཀྱི་གནད་དོན་སེལ་བར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ལྷག་དོན་རྒྱ་མི་རིགས་ནས་བོད་ཀྱི་གནད་དོན་ལ་ངོས་འཛིན་ཀྱིས་ཤེས་རྟོགས་ཡོང་བ་བཟོ་དགོས་པ་མ་ཟད་བོད་དོན་ལ་གདུང་སེམས་མཉམ་བསྐྱེད་ཀྱིས་རྒྱབ་སྐྱོར་གནང་དགོས་པར་ནན་སྐུལ་གནང་སོང་། དེ་རིང་སྔ་དྲོ་ཚོུད་ ༩ ཐོག་ཚོགས་པའི་ཚོགས་ཐུན་གསུམ་པའི་ཐོག་གསུང་བཤད་གནང་མཁན་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྔ་བ་ཚེ་རྒྱམ་ལགས་དང་བོད་རྒྱ་ཞི་མོལ་ལས་དོན་ཚོགས་ཆུང་གི་དྲུང་ཆེ་དང་བཀའ་དྲུང་ཡིག་ཚང་གི་ཟུང་དྲུང་སྐལ་བཟང་ཚེ་རིང་ལགས། དེ་བཞིན་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་ལས་བྱེད་འཕྲིན་ལས་ཆོས་སྐྱིད་ལགས་བཅས་གསུམ་ཆེད་འབོད་ཀྱིས་བོད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་དབར་འབྲེལ་ལམ་སྲ་བརྟན་དང་དོན་ཕན་ལྡན་པའི་གྲོས་མོལ་བསྐྲུན་ཐབས་ཞེས་པའི་བརྗོད་གཞིར་ཚོུད་གཅིག་གི་རིང་གསུང་བཤད་གནང་ཡོད་པ་ལྟར། སྐབས་དེར་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྔ་བ་ཚེ་རྒྱམ་ལགས་ནས་བོད་རྒྱ་གཉིས་དབར་ཞི་མོལ་གནང་དགོས་དོན་ཅི་ཡིན་དང་ད་ལྟ་བར་གྱི་འབྲེལ་ལམ་རྣམས་གང་འདྲ་བྱུང་མིན། དེ་བཞིན་མ་འོངས་པར་རྒྱ་ནག་དང་ལྷན་དོན་ཕན་ལྡན་པའི་གྲོས་མོལ་ཡོང་བར་ཐབས་ཤེས་གང་གནང་དགོས་མིན་བཅས་ཀྱི་དོན་ཚན་གསུམ་ཅན་ཞིག་གསལ་འདོན་གནང་ཐོག་ད་རེས་ང་ཚོ་འཛམ་གླིང་ཡུལ་གྲུ་འདྲ་མིན་ནས་ཕེབས་པའི་ཚོགས་བཅར་བ་རྣམས་ས་གནས་གཅིག་ཏུ་ཚང་འཛོམས་ཀྱིས་བགྲོ་གླེང་འདི་ལྟར་གནང་དོན་ནི་ང་ཚོར་དཀའ་རྙོག་གམ་བོད་ཀྱི་གནད་དོན་ཞིག་ཡོད་པ་དང་དཀའ་རྙོག་འདི་ནི་ཕྱི་ལོ་ ༡༩༤༩ ལོར་བོད་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་འགོ་བཙུགས་ནས་བོད་ལ་བཙན་འཛུལ་བྱས་རྐྱེན་བྱུང་བ་ཞིག་ཡིན་པ་མ་གཏོགས་ཕྱི་ལོ་ ༡༩༥༠ གོང་ལ་བོད་ཀྱི་དཀའ་རྙོག་ཞེས་པ་ཞིག་བྱུང་མྱོང་མེད་ཅེས་ནན་བརྗོད་གནང་སོང་། དེ་བཞིན་རྔ་བ་ཚེ་རྒྱམ་ལགས་ཀྱིས་རྒྱ་གཞུང་ནས་རྒྱལ་སྤྱིའི་ཐོག་བོད་ཀྱི་གནད་དོན་ཞིག་མེད་པར་བརྗོད་བཞིན་པ་དེ་ཡང་དག་པ་ཞིག་མིན་པ་དང་དོན་དངོས་ཐོག་བོད་ཀྱི་གནད་དོན་ཡོད་པར་བརྟེན་དེ་སྔ་ཕྱི་ལོ་ ༡༩༨༠ ནང་བོད་རང་སྐྱོང་ལྗོངས་ཟེར་བའི་ས་ཁུལ་གཙོ་གྱུར་མདོ་དབུས་ཁམས་ཡོངས་རྫོགས་ནང་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་མང་འཚོགས་ཡོད་པར་འགྲེལ་བརྗོད་གནང་བ་མ་ཟད། ད་ལྟའི་ཆར་རྒྱ་གཞུང་གིས་བོད་ལ་དབང་སྒྱུར་བྱས་ནས་མི་ལོ་ ༦༠ ལྷག་འགྲོ་བཞིན་པའི་ཁྲོད་བོད་ཀྱི་ཆོས་དང་རིག་གཞུང་། ལེགས་བྱང་། སྐད་ཡིག་བཅས་པའི་རྨང་གཞི་དང་མི་རིགས་སོགས་རྩ་མེད་གཏང་རྒྱུའི་ཐབས་བརྒྱ་བྱུས་སྟོང་ཀྱི་ཐབས་ཤེས་བྱེད་བཞིན་པའི་གཉན་འཕྲང་ཅན་གྱི་དུས་ཚོད་འདིར་བོད་མི་ཚོས་ངེས་པར་དུ་བོད་ཀྱི་གནད་དོན་དེ་སེལ་དགོས་པ་དང་དེ་བོད་མིར་ཁ་ཚ་དགོས་གཏུགས་ཀྱི་གནད་དོན་ཞིག་ཆགས་ཡོད་པར་ནན་བརྗོད་གནང་ཡོད། རྔ་བ་ཚེ་རྒྱམ་ལགས་ཀྱིས་ད་དུང་གཞོན་སྐྱེས་ཚོའི་དུས་ཀུན་ཏུ་རང་ཉིད་འཐབ་རྩོད་ཀྱི་སྒྲིག་འཛུགས་ཤིག་ནང་ཡོད་པ་དང་རང་ཉིད་ཀྱི་སྒྲིག་འཛུགས་འདི་འཐབ་རྩོད་ཀྱི་སྒྲིག་འཛུགས་ཤིག་ཡིན་པར་དྲན་སྐུལ་གནང་དགོས་པ་མ་ཟད། འཐབ་རྩོད་དེ་ཡང་བོད་ཀྱི་བདེན་དོན་གྱི་འཐབ་རྩོད་ཞིག་ཡིན་སྟབས་བོད་མི་རིགས་ཀྱི་དཀའ་ངལ་དེ་སེལ་བར་ཐབས་ལམ་སྣ་ཚོགས་ཤིག་ཡོད་ཀྱང་དེའི་ནང་ནས་མེད་དུ་མི་རུང་བའི་ཆ་རྐྱེན་གཅིག་པོ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ལྷག་དོན་རྒྱ་རིགས་མི་མང་ནས་བོད་ཀྱི་གནད་དོན་ལ་ངོས་འཛིན་གྱིས་ཤེས་རྟོགས་གནང་ཐུབ་པ་བཟོ་དགོས་པ་མ་ཟད་ཁྱད་པར་དུ་བོད་དོན་ལ་གདུང་སེམས་མཉམ་བསྐྱེད་ཀྱིས་རྒྱབ་སྐྱོར་གནང་རྒྱུ་དེ་ཡིན་པ་གསུངས་སོང་། ཁོང་གིས་ཕྱི་ལོ་ ༡༩༥༩ ནས་ ༡༩༧༤ བར་དུ་བོད་མིའི་འཐབ་རྩོད་ཀྱི་ངོ་བོ་དེ་ད་ལྟ་ལྟར་མིན་ནའང་ ༡༩༧༤ རྗེས་སུ་༸གོང་ས་མཆོག་གིས་རྒྱ་ནག་རྒྱལ་ཁབ་ཁ་བྲལ་མི་ཡོང་བ་དང་བོད་ཀྱི་ད་ལྟའི་ཛ་དྲག་གནས་སྟངས་སྐྱོབ་རྒྱུ། དེ་བཞིན་བོད་མི་རིགས་མུ་མཐུད་གནས་རྒྱུ་བཅས་ལ་གཟིགསཏེ་གཉིས་སྨན་དབུ་མའི་ལམ་གྱི་སྲིད་བྱུས་འདི་གཏན་ལ་ཕབ་ཡོད་པ་དང་། སྲིད་བྱུས་དེའི་འོག་ང་ཚོས་རྒྱ་ནག་གཞུང་དང་རྒྱ་མི་རིགས་གཉིས་ལྷན་གྲོས་མོལ་གནང་དགོས་ཀྱི་ཡོད་པ་དེ་ལྟར་ཡང་། རྒྱ་གཞུང་ནས་འདོད་མོས་ཡོད་པ་བཞིན་ང་ཚོས་རྒྱ་ནག་དང་ལྷན་དུས་ནམ་ཡང་བཀའ་མོལ་ཞུ་དཀའ་ནའང་རྒྱ་ནག་མི་མང་ཚོ་དང་ལྷན་བཀའ་མོལ་ཞུ་རྒྱུའི་གོ་སྐབས་མང་དག་ཅིག་ཡོད་པ་དང་། གོ་སྐབས་ཡོད་པ་ལྟར་ཕྱི་རྒྱལ་དུ་གནས་སྡོད་བོད་ཕྲུག་ན་གཞོན་ཚོར་གོ་སྐབས་དེ་དམ་འཛིན་གྱིས་རྒྱ་ནག་མི་མང་ཚོར་འབྲེལ་ལམ་དེ་སྔར་ལྷག་རྒྱུར་ཤུགས་གནོན་གནང་གནད་ཡིན་པར་སྐུལ་མ་གནང་ཡོད། ལས་རིམ་ལ་གཞིགས་ཚེ་སང་ཉིན་སྔ་ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ནས་ནང་ཆོས་ངོ་སྤྲོད་དང་དེ་ནས་ཚོགས་བཅར་བ་རྣམས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་ལྷན་བཞུགས་མོལ་ཚོགས་འདུ་འཚོགས་རྒྱུ། དེ་བཞིན་གོ་སྒྲིག་ཚོགས་ཆུང་ནས་ཚོགས་བཅར་བ་ཆ་བགོས་ཀྱིས་ཚོགས་ཆུང་ཟུར་འཛུགས་ཞུས་ཏེ་བརྗོད་གཞི་ཁག་ལ་གོ་བསྡུར་གནང་རྒྱུ་ཡིན་པ་རེད། འབྲེལ་ཡོད་པར་རྣམས་བོད་མིའི་སྒྲིག་འཛུགས་ཀྱི་དྲྭ་རྒྱ།

བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་འོག་གངས་སྐྱིད་ཚོགས་ཁང་གསར་པའི་ནང་འབྱུང་འགྱུར་བོད་ཀྱི་མདུན་ལམ་དང་འབྲེལ་བའི་གཞོན་སྐྱེས་ལྔ་དང་ལྔ་བཅུའི་ཚོགས་འདུ་ཐེངས་གཉིས་པ་དབུ་འཛུགས་གནང་སོང་། དེ་རིང་ཉིན་རྒྱབ་ཚོུད་ ༣ ཐོག་ཚོགས་འདུ་དབུ་འབྱེད་ཀྱི་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་རྒྱ་བལ་འབྲུག་གསུམ་གཙོས་པའི་འཛམ་གླིང་ཡུལ་གྲུ་འདྲ་མིན་ ༡༣ ནས་ཕེབས་པའི་བོད་རིགས་གཞོན་སྐྱེས་ཚོགས་བཅར་བ་མི་གྲངས་ ༡༠༠ ལྷག་ལྷན་འཛོམས་གནང་ཡོད་པ་རེད། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཚོགས་འདུའི་གལ་གནད་སྐོར་གསུངས་པ་དང་འབྲེལ། ཚོགས་འདུ་ཐོག་ཕེབས་པའི་གཞོན་སྐྱེས་རྣམས་ནས་བོད་མིའི་རང་དབང་འཐབ་རྩོད་དེ་ཤུགས་ཆེ་ཡོང་བར་ཐབས་ལམ་འཚོལ་རྒྱུ་དང་། རང་ཉིད་ཀྱི་བསམ་ཚུལ་ཞུ་རྒྱུ་དང་བསམ་ཚུལ་བརྗེ་རེས་སོགས་ཀྱི་བརྒྱུད་ནས་མ་འོངས་པར་བོད་མིའི་འཐབ་རྩོད་ལ་སྨན་པའི་གྲོས་བསྡུར་གནང་རྒྱུའི་གོ་སྐབས་བཟང་པོ་ཞིག་ཡིན་པ་གསུངས་སོང་། ལྷག་པར་དུ་སྲིད་སྐྱོང་མཆོག་གིས་ད་ལྟའི་མི་རབས་ཀྱི་གཞོན་སྐྱེས་ཚོར་གདོང་ལེན་གནང་དགོས་པའི་གནད་དོན་གཙོ་བོ་ནི་༸གོང་ས་མཆོག་གི་དགུང་ལོའི་བབ་ཀྱི་ཆ་ནས་ད་ཆ་མགོན་པོ་༸གང་ཉིད་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་བསྒྱུར་བསྐྱང་རྒྱུའི་མཛད་འཕྲིན་ཁག་རིམ་བཞིན་ཉུང་འཕྲི་གནང་བཞིན་པའི་མཚམས་འདིར་བོད་ཀྱི་གནད་དོན་དེ་རྒྱལ་སྤྱིའི་ཐོག་མངོན་གསལ་མེད་པར་འགྱུར་ཉེན་ཡོད་སྟབས། གཞོན་སྐྱེས་ཚོའི་ངོས་ནས་དེ་ལྟར་མི་ཡོང་བར་དམིགས་བསལ་འགན་ཁུར་གནང་དགོས་གནད་ཡིན་པ་སོགས་ལམ་སྟོན་གནང་ཡོད། དེ་བཞིན་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་བོད་པའི་མི་རབས་གསར་པ་ཚོ་ཕྱི་རྒྱལ་དུ་འགྲོ་རྒྱུར་དགའ་མོས་ཡོད་པ་མ་ཟད་དེ་དག་ཕ་མ་ཚོས་ཀྱང་ཕྱི་རྒྱལ་དུ་ཐར་ཐབས་སུ་འབད་བརྩོན་གང་ཡོང་གནང་བཞིན་པའི་གནས་བབས་འདིའི་ཐོག་ནས་མ་འོངས་པར་བོད་ཀྱི་གནས་སྟངས་དེ་གང་འདྲ་ཆགས་ཀྱི་རེད་དམ་བསམ་པའི་ཐུགས་འཚབ་ཡོང་བཞིན་ཡོད་སྐོར་གསུངས་པ་དང་སྦྲགས། ད་ལྟའི་བོད་ཀྱི་གནས་སྟངས་ཇི་འདྲ་གྱུར་མིན་དེ་གཞོན་སྐྱེས་ཚོར་ལྡོག་ཏུ་མེད་པའི་འོས་འགན་ཡོད་པ་སོགས་ལམ་སྟོན་གནང་སོང་། དེ་བཞིན་ཚོགས་གཙོ་མཆོག་གིས་བོད་པས་བོད་པའི་འཐབ་རྩོད་ཀྱི་ངོ་བོ་མཁྱེན་དགོས་གལ་སྐོར་གསུངས་པ་དང་འབྲེལ་ཏེ་གཞོན་སྐྱེས་ཚོའི་ངོས་ནས་བོད་སྤྱིའི་འཐབ་རྩོད་དེ་ཇི་སྲིད་རང་དབང་སླར་གསོ་མ་བྱུང་བར་དེ་སྲིད་དུ་རྒྱུན་སྐྱོང་གནང་དགོས་པ་སོགས་གསུངས་སོང་། དེ་རིང་ཕྱི་ཟླ་ ༨ ཚེས་ ༡༦ ནས་དབུ་འཛུགས་ཀྱིས་ཚེས་ ༡༩ བར་ཉིན་གྲངས་བཞིའི་རིང་ཚོགས་འདུའི་ཐོག་བོད་དང་རྒྱ་ནག་མི་མང་སྤྱི་མཐུན་རྒྱལ་ཁབ་དབར་གྱི་ལོ་རྒྱུས་ཐོག་འབྲེལ་ལམ་གྱི་གལ་གནད་དང་དོན་ཕན་གྱི་འབྲེལ་ལམ་བསྐྲུན་ཐབས། དེ་བཞིན་བོད་ཕྱི་ནང་གཉིས་ཀྱི་བོད་མི་ཐུན་མོང་ནས་བོད་ཀྱི་གནད་དོན་ཐོག་མཉམ་ཞུགས་གནང་ཕྱོགས་སོགས་བརྗོད་གཞིའི་ཁག་ཅིག་གི་ཐོག་གསུང་བཤད་དང་ཚོགས་བཅར་བ་ཕན་ཚུན་དབར་གོ་བསྡུར་དང་སྦྱང་བཤད་གནང་རྒྱུ་ཡིན་པ་རེད། གཞི་རྩའི་བོད་མིའི་སྒྲིག་འཛུགས་ཀྱིས་ལྔ་དང་ལྔ་བཅུའི་སྲིད་བྱུས་ཀྱི་དགོངས་དོན་འོག་སྔ་ལོར་བཞུགས་སྒར་དུ་ལྔ་དང་ལྔ་བཅུའི་རྒྱལ་སྤྱིའི་ལྷན་ཚོགས་དང་ལྔ་དང་ལྔ་བཅུའི་འཆར་སྣང་ལྷན་ཚོགས། དེ་བཞིན་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་དང་པོ་བཅས་ཚོགས་ཡོད་པ་དང་། ཐེངས་འདིའི་ཚོགས་བཅར་བ་རྣམས་དེ་རིང་སྔ་ཐོག་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་བོད་མི་མང་སྤྱི་འཐུས་ལྷན་ཚོགས་བཅས་སུ་ལྟ་སྐོར་ལ་བཅར་ཡོད་པ་རེད།  

ཡུ་རོབ་རྒྱལ་ཁབ་བྷེལ་འཇམ་ནང་རྟེན་གཞི་བྱས་པའི་བྷར་སེལ་སྐུ་ཚབ་དོན་ཁང་གི་དོན་གཅོད་བཀྲིས་ཕུན་ཚོགས་ལགས་ཀྱིས་གཙོས་ལས་བྱེད་གཉིས་བཅས་ནས་ཟླ་བ་འདིའི་ཚེས་ ༡༤ ཉིན་ཉེ་ཆར་སྐུ་ཞབས་ Wilfried Vandale མཆོག་བྷེལ་འཇམ་གྱི་ས་གནས་ Flemish Parliament གྲོས་ཚོགས་ཀྱི་ཚོགས་གཙོར་འདེམས་ཐོན་བྱུང་བར་དགའ་བསུའི་འཚམས་འདྲི་ཞུ་རྒྱུ་དང་འདི་བཞིན་དོན་གཅོད་ལས་ཁུངས་དང་ཡུལ་དེའི་གྲོས་ཚོགས་དབར་ཡུན་རིང་ནས་འབྲེལ་བ་དམ་ཟབ་ཡོད་སྐོར། ད་ལྟའི་བོད་ནང་གི་ཛ་དྲག་གནས་སྟངས་བཅས་སྙན་སེང་གི་གླེང་སློང་ཞུ་ཕྱིར་མཇལ་འཕྲད་གནང་འདུག དེའང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ཚེ། མཇལ་མོལ་དེའི་ཐོག་བཀྲིས་ཕུན་ཚོགས་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་སྤྱི་མཐུན་ཚོགས་པའི་སྒྲིག་འཛུགས་སམ་སྒྲོམ་གཞིར་རྒྱབ་སྐྱོར་དང་ཡི་རངས་བསྔགས་བརྗོད་རྒྱ་ཆེ་མཛད་བཞིན་ཡོད་པ་དང་། མགོན་པོ་༸གང་ཉིད་མཆོག་ཡོ་རོབ་ཀྱི་གྲོས་ཚོགས་ནང་དུ་ཐེངས་འགའ་ཆིབས་བསྒྱུར་མཛད་མྱོང་ཡོད་པ་མ་ཟད། ལྷག་དོན་ཕྱི་ལོ་ ༢༠༡༦ ལོར་ཡོ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ Schulz མཆོག་དང་མཇལ་མོལ་གནང་བ་དང་དེ་བཞིན་ཕྱི་སྲིད་ཚོགས་ཆུང་ལ་བཀའ་སློབ་བསྩལ་སྐོར་སོགས་སྙན་སེང་ཞུས་འདུག གཞན་ཡང་དེང་སྐབས་བོད་ནང་རྒྱ་ནག་གཞུང་གིས་བོད་མིའི་ཐོག་བཙན་གནོན་དང་དམ་བསྒྲགས་ཇེ་ཆེར་གཏོང་བཞིན་ཡོད་པ་དང་། བོད་ནང་བོད་མི་ཚོའི་ངོས་ནས་ཆོས་ལུགས། ལེགས་བྱང་། དེ་བཞིན་ཆབ་སྲིད་སོགས་དང་འབྲེལ་བའི་གནད་ཐོག་ལ་རང་དབང་ལྡན་པའི་ལས་འགུལ་སྤེལ་བར་དམ་བསྒྲགས་ཚད་མེད་བྱས་པར་བརྟེན་བོད་དེ་ད་ལྟའི་འཆར་འཛམ་གླིང་ནང་ Syria རྒྱལ་ཁབ་ཀྱི་རྗེས་སུ་རང་དབང་ཞན་ཤོས་ཀྱི་རྒྱལ་ཁབ་ཆགས་ཡོད་པ་སོགས་ཞུས་འདུག་པ་དང་ཆབས་ཅིག ད་ལྟའི་དུས་སྐབས་འདིར་རྒྱ་གཞུང་གིས་བོད་ནང་བཙན་གནོན་དང་དམ་བསྒྲགས་ཇེ་ཆེར་གཏོང་བཞིན་ཡོད་པ་མ་ཟད། རྒྱ་ནག་ནས་རྒྱལ་སྤྱིའི་ཐོག་ཏུའང་དེ་ལྟ་བུའི་དབང་སྒྱུར་དང་གཉའ་གནོན་གྱི་བྱ་སྤྱོད་སྤེལ་བཞིན་ཡོད་ཀྱང་། བར་ལམ་ཞིག་ནས་ཡོ་རོབ་རྒྱལ་ཁབ་བྷེལ་འཇམ་གཞུང་གིས་གཙོས་པའི་ནུབ་ཕྱོགས་རྒྱལ་ཁབ་ཁག་གིས་རྒྱ་ནག་གིས་ལག་བསྟར་བྱེད་བཞིན་པའི་སྲིད་བྱུས་དེ་དག་ལ་ཁ་གཏད་ཀྱི་གདོང་ལེན་གནང་མུས་ཡིན་པར་ཐུགས་རྗེ་ཆེ་ཞེས་ཞུས་འདུག སྐབས་དེར་སྐུ་ཞབས་ Wilfried Vandale མཆོག་གིས་ཁོང་དང་ཁོང་གི་ཆབ་སྲིད་ཚོགས་པ་ Nieuw Vlaamse Alliantie གཉིས་ལ་རྒྱ་གཞུང་གིས་ཐད་བྱུས་དང་གནོན་ཤུགས་གང་ཡང་སྤྲོད་ཐུབ་ཀྱི་མ་རེད་ཅེས་གསུངས་པ་དང་། ཁོང་ནས་མུ་མཐུད་བོད་དོན་ཐོག་དེ་སྔའི་ཚོགས་གཙོ་ལྟར་རྒྱབ་སྐྱོར་གནང་རྒྱུའི་ཞལ་བཞེས་ཀྱང་གནང་འདུག་པ་མ་ཟད། ཁོང་གི་ཆབ་སྲིད་ཚོགས་པའི་ངོས་ནས་ལེགས་བྱང་གང་ཡིན་དེ་དག་ཀུན་དང་མི་རིགས་སོ་སོའི་ངོ་བོ་སྲུང་སྐྱོབ་གནང་རྒྱུར་བརྩི་བཀུར་གཅིག་མཚུངས་གནང་ངེས་ཡིན་པའང་གསུངས་འདུག རྩ་བའི་ཡུལ་དེའི་གྲོས་ཚོགས་ཀྱི་ཚོགས་གཙོ་ཟུར་པ་སྐུ་ཞབས་ Jan Peumans མཆོག་ནས་ལོ་མང་རིང་དོན་གཅོད་ལས་ཁུངས་དང་། ལས་ཁུངས་ཀྱི་ལས་འཆར། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ནམ་ཕེབས་ལ་མཇལ་མོལ་གནང་བར་བརྟེན་རྒྱ་ནག་གཞུང་ཚབ་ཁང་ནས་ཁོང་ལ་སྔ་རྗེས་སུ་དེ་ལྟར་མི་གནང་བའི་འབྲེལ་གཏུགས་ཞུས་ཡོད་ཀྱང་། ཁོང་གིས་དེར་ལྟོས་མེད་བོད་དོན་ཐོག་མུ་མཐུད་རྒྱབ་སྐྱོར་གནང་ཡོད་པ་རེད། ལྷག་དོན་གྲོས་ཚོགས་ཀྱི་ཚོགས་གཙོ་སྔ་ཕྱི་གཉིས་མཇལ་འཕྲད་གནང་སྐབས་བོད་དང་བོད་ཀྱི་དོན་གཅོད་ཁང་གི་སྐོར་ལ་གླེང་མོལ་གནང་ཡོད་པ་རེད།  འབྲེལ་ཡོད་པར་བོད་མིའི་སྒྲིག་ཀྱི་ཨིན་ཡིག་དྲྭ་རྒྱ།  

བཞུགས་སྒར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་རྒྱ་གར་དབྱིན་ཇིའི་མངའ་འོག་ནས་རང་བཙན་གཙང་མ་ཐོབ་ནས་མི་ལོ་ ༧༣ འཁོར་བའི་ཉིན་མོ་སྲུང་བརྩི་ཞུས་པ་དང་སྦྲགས། བོད་མི་ཚོས་ཀྱང་ཀྱང་འཚེ་མེད་ཞི་བའི་ལམ་ནས་བོད་ཀྱི་རྩ་དོན་རྩོད་རྒྱུན་སྐྱོང་གནང་ཐུབ་ཚེ་རྒྱ་གར་ལྟར་ལམ་ལྷོང་ཡོང་ངེས་ཡིན་པ་གསུངས་སོང་། རྩ་བའི་ཕྱི་ཟླ་ ༨ ཚེས་ ༡༥ སྟེ་དེ་རིང་གི་ཉིན་མོ་འདི་ནི་ཕྱི་ལོ་ ༡༩༤༧ ལོར་རྒྱ་གར་དབྱིན་ཇིའི་མངའ་འོག་ནས་རང་བཙན་གཙང་མ་ཐོབ་པའི་དུས་ཚིགས་ཤིག་ཡིན་པ་དང་། ཉིན་མོ་འདིར་རྒྱ་གར་རྒྱལ་ཡོངས་གཙོས་པའི་འཛམ་གླིང་ས་ཕྱོགས་ཁག་ཏུ་བཞུགས་ཡོད་པའི་རྒྱ་གར་མི་མང་ཡོངས་ཀྱིས་སྲུང་བརྩི་གཟབ་རྒྱས་ཞུ་བཞིན་ཡོད་པ་རེད། དེ་རིང་སྔ་དྲོ་ཚོུད་ ༩༌༡༥ ཡོལ་ཙམ་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་དང་ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་བཀའ་ཤག་གི་མདུན་ཐང་དུ་ལྷན་འཛོམས་ཀྱིས་ཆེས་ཐོག་མར་རྒྱ་གར་གྱི་རྒྱལ་གླུ་དབྱངས་སུ་གྱེར་པ་དང་དུས་མཚུངས་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་བསྒྲེངས་ནས་ཉིན་མོ་འདི་སྲུང་བརྩི་ཞུས་སོང་། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་རང་བཙན་ཉིན་མོར་རྒྱ་གར་གཞུང་མང་ཡོངས་ལ་དགའ་བསུའི་འཚམས་འདྲི་གནང་བ་དང་འབྲེལ། རྒྱ་གར་གཞུང་མང་གཉིས་ཀྱིས་འདས་པའི་ལོ་ངོ་ ༦༠ ལྷག་གི་ནང་བོད་མི་རྣམས་ལ་བཀྲིན་ཆེན་པོ་ཆགས་ཡོད་སྟབས་སྙིང་ཐག་པ་ནས་ཐུགས་རྗེ་ཆེ་ཞེས་ཞུས་པ་མ་ཟད། ལྷག་དོན་རྒྱ་གར་འདི་འབྱུང་འགྱུར་གང་ས་ཅི་ཐད་ནས་དར་རྒྱས་ཕུན་སུམ་ཚོགས་པ་དང་སྲིད་གཞུང་མངའ་ཐང་ལྡན་པ་ཡོང་བའི་རེ་སྨོན་ཡོད་ཅེས་གསུངས་ཡོད་པ་རེད། དེ་བཞིན་སྲིད་སྐྱོང་མཆོག་གིས་རྒྱ་གར་དེ་བཞིན་མེས་པོ་དམ་པ་བདག་ཉིད་ཆེན་པོ་གྷན་དྷི་མཆོག་གིས་དབུ་ཁྲིད་པའི་འཚེ་མེད་ཞི་བའི་ཐབས་ལམ་ལ་བརྟེན་ནས་རྒྱལ་ཁ་ཐོབ་པར་ལྟར། བོད་མི་ཚོས་ཀྱང་འཚེ་མེད་ཞི་བའི་ཐབས་ལམ་དེ་རྒྱུན་སྲིང་གནང་ཐོག་འཐབ་རྩོད་གནང་ཚེ་བོད་ནང་གི་བོད་མིའི་མངོན་འདོད་ལྟར་བསྒྲུབ་ཐུབ་པ་དང་༸གོང་ས་མཆོག་བོད་ལ་གདན་འདྲེན་ཞུ་ཐུབ་པ་མ་ཟད་བོད་མིའི་རང་དབང་བསྐྱར་གསོ་གནང་ཐུབ་པའི་སྨོན་འདུན་ཡོད་པ་སོགས་གསུངས་སོང་། ལྷག་དོན་སྲིད་སྐྱོང་མཆོག་གིས་ཧོང་ཀོང་གི་གནད་དོན་དང་འབྲེལ་ནས་གསར་འགོད་པའི་བཅར་འདྲིར་བཀའ་ལན་གནང་བར་བོད་མི་རྣམས་ནས་ཧོང་ཀོང་གི་མང་གཙོ་དང་རང་དབང་ལས་འགུལ་ཡོངས་ལ་གདུང་སེམས་མཉམ་བསྐྱེད་ཞུ་བཞིན་ཡོད་པ་དང་། ད་ཆ་བརྒྱུད་ལམ་ཁག་ཏུ་རྒྱ་གཞུང་གིས་དམག་མི་རླངས་འཁོར་མང་དག་ཅིག་ཧོང་ཀོང་གི་ས་མཚམས་སུ་བསྡུ་སྐོང་བྱེད་བཞིན་པའི་གནས་ཚུལ་འཐོན་བཞིན་པ་དེས་གནས་སྟངས་ཇེ་ཞན་ཇེ་སྡུག་ཏུ་གཏོང་མུས་ལས་ཕན་ཐོགས་གང་ཡང་མེད་པར་འགྲེལ་བརྗོད་གནང་སྟེ་རྒྱ་གཞུང་ནས་གྲོས་མོལ་གྱི་ལམ་ནས་དཀའ་ངལ་སེལ་ཐབས་བྱེད་དགོས་གལ་ཡིན་པ་སྐུལ་མ་གནང་སོང་། སྔ་ཐོག་མཛད་སྒོ་སྒྲུབ་བསྟུན་དྷ་ས་ས་གནས་ཀྱི་ཉེན་རྟོག་ལས་ཁུངས་ཀྱིས་གདན་ཞུས་ལྟར་སྲིད་སྐྱོང་མཆོག་དང་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་རྣམ་གཉིས་ས་གནས་ཀྱི་ཉེན་རྟོག་ཐང་ཆེན་དུ་རྒྱ་གར་གྱི་གཞུང་འབྲེལ་མཛད་སྒོར་ལྷན་ཞུགས་ཀྱིས་ཧི་མཱ་ཅལ་མངའ་སྡེའི་འཕྲོད་བསྟེན་དང་ཁྱིམ་ཚང་བདེ་དོན་བློན་ཆེན་སྐུ་ཞབས་ Vipin Singh Parmar མཆོག དེ་བཞིན་གྲོས་ཚོགས་འཐུས་མི་སྐུ་ཞབས་ Kishan Kapoor མཆོག་རྣམ་གཉིས་གཙོས་པའི་གནད་ཡོད་དཔོན་རིགས་ཁག་ཅིག་དང་མཇལ་འཕྲད་གནང་ཡོད་པ་རེད། རྩ་བའི་དེ་རིང་གི་ཉིན་མོ་འདི་དང་བསྟུན་བཞུགས་སྒར་དྷ་རྨ་ས་ལའི་བོད་མིའི་སྒྲིག་འཛུགས་ཙམ་མ་ཟད། རྒྱ་གར་གྱི་ས་གནས་འདྲ་མིན་ནང་ཡོད་པའི་བོད་པའི་སློབ་གྲྭ་ཁག་དང་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་ནས་ཀྱང་རྒྱ་གར་གཞུང་མང་གཉིས་དགའ་བསུའི་འཚམས་འདྲི་དང་བཀྲིན་རྗེས་དྲན་ཞུ་རྒྱུའི་གནང་སྒོ་སྣང་མང་སྤེལ་ནས་ཉིན་མོ་འདི་བཞིན་སྲུང་བརྩི་གཟབ་རྒྱས་ཞུ་མུས་ཡིན་པ་དང་། རྒྱ་གར་གྱིས་གཙོས་པའི་འཛམ་གླིང་ས་ཕྱོགས་གང་སར་གནས་པའི་བོད་མི་ཚོས་ངོ་དེབ་ལ་སོགས་པའི་སྤྱི་ཚོགས་ཀྱི་བརྒྱུད་ལམ་ཐོག་ཏུ་རྒྱ་གར་གྱི་མཚོན་དོན་གསུམ་ཅན་གྱི་རྒྱལ་དར་པར་བཞག་སྟེ་རྒྱ་གར་གཞུང་མང་གཉིས་ལ་འཚམས་འདྲི་ཞུས་ཡོད་པ་མངོན་རྒྱུ་འདུག ཁག་ཅིག་གིས་རྒྱ་གར་གཞུང་མང་ཡོངས་ཀྱི་ངོས་ནས་ད་བར་བོད་མིའི་ཐོག་མཐུན་འགྱུར་རོགས་རམ་གང་ལེགས་གནང་བར་ཐུགས་རྗེ་ཆེ་ཞུས་པ་དང། ལ་ལས་བསྟོད་དབྱངས་སོགས་ཕུལ་ནས་རྒྱ་གར་རང་བཙན་ཉིན་མོར་སྲུང་བརྩི་ཞུས་ཡོད་པ་རེད།

དེ་རིང་མ་ན་ལི་ཁུལ་གྱི་ཉིན་གཉིས་པའི་བཀའ་ཆོས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འབྲེལ་གྱི་ཆོས་འབྲེལ་དང་། མགོན་པོ་༸གང་ཉིད་མཆོག་གིས་མཛད་པའི་དཔལ་ནཱ་ལེནྡཱའི་པཎ་གྲུབ་བཅུ་བདུན་གྱི་གསོལ་འདེབས་བཀའ་ལུང་བཅས་བཀྲིན་བསྩལ་སོང་།   མ་ན་ལི་ཁུལ་དུ་ཁ་སང་ཕྱི་དྲོ་ནས་ཆར་ཤུགས་ཆེན་པོ་བབས་ཡོད་པ་མ་ཟད། དེ་རིང་སྔ་དྲོའང་སིལ་ཆར་མུ་མཐུད་འབབ་བཞིན་པའི་ཁྲོད་༸གོང་ས་མཆོག་གིས་ཆོས་ཞུ་བ་མི་གྲངས་ ༥༠༠༠ བརྒལ་བ་དེ་དག་ལ་ཐོག་མར་པཎ་གྲུབ་བཅུ་བདུན་གྱི་གསོལ་འདེབས་བཀའ་ལུང་བཀྲིན་བསྩལ་བ་དང་། སྐབས་དེར་མགོན་པོ་༸གང་ཉིད་མཆོག་ནས་པཎ་གྲུབ་བཅུ་བདུན་གྱི་གཞུང་དེ་དག་ནི་ང་ཚོར་རྣམ་དཔྱོད་ཀྱི་བློ་མིག་ཕྱེ་མཁན་གཞུང་གལ་འགངས་ཆེན་པོ་ཞིག་དང་། རྒྱུན་དུ་གཞུང་དེ་དག་ལ་དོ་སྣང་གནང་ཚེ་དབང་རྣོན་ཆོས་ཀྱི་རྗེས་འབྲང་པའི་དད་པ་ཐོབ་རྒྱུ་མ་ཟད། མ་འོངས་པའི་དུས་རབས་ནང་དུའང་ནང་པ་སངས་རྒྱས་པའི་ཆོས་འདི་མུ་མཐུད་གནས་ཐུབ་ཀྱི་རེད་ཅེས་བསྩལ་ནན་བསྩལ་ཡོད།  འོན་ཀྱང་ད་ལྟའི་མི་རབས་ཚོས་སྔོན་གྱི་མི་རབས་རྒན་པ་ལྟར་སྐྱབས་སུ་མཆིའོ་ཞེས་དད་པ་ཙམ་ལ་བརྟེན་ནས་དབང་རྟུལ་དད་པའི་རྗེས་འབྲང་པ་ཞིག་གནང་ཚེ་ནང་པ་སངས་རྒྱས་པའི་ཆོས་འདི་དུས་རབས་འདི་ཙམ་མ་གཏོགས་གནས་ཐུབ་རྒྱུ་ཁག་པོ་ཡིན་པ་སོགས་ལམ་སྟོན་བསྩལ་བ་དང་ཆབས་ཅིག ས་གནས་ཀྱི་དགོན་པ་སོ་སོའི་ངོས་ནས་ཀྱང་ཆོ་ག་ཕྱག་ལེན་ཙམ་ལ་མ་བརྟེན་པར་སངས་རྒྱས་པའི་གཞུང་དག་ལ་བསླབ་པ་སློབ་གཉེར་གནང་དགོས་པའི་བཀའ་བསྩལ་སོང་།   ༸གོང་ས་༸སྐྱབས་མགོན་ཆེན་པོ་མཆོག་ནས་དེ་རྗེས་དཔལ་མགོན་འཕགས་པ་ཀླུ་སྒྲུབ་མཆོག་ནི་སྨྲ་བ་ཟླ་མེད་པའི་སྟོན་པ་གཉིས་པ་ལྟ་བུ་ཞིག་ཡིན་པ་དང་། ལྷག་པར་དུ་མདོ་སྔགས་གཉིས་ཀྱི་ཐོག་ལ་རིག་པའི་ལམ་ནས་གཏན་ལ་ཕབ་ཐུབ་མཁན་གྱི་སྐྱེས་བུ་དམ་པ་ཞིག་ཡིན་སྐོར་སོགས་བསྟོད་པ་ཕུལ་ཏེ་བྱང་ཆུབ་སེམས་འབྲེལ་གྱི་བཀའ་ཆོས་དངོས་གཞི་དབུ་འཛུགས་བསྐྱངས་ཡོད་པ་རེད།    གཞི་རྩའི་དེ་རིང་ནས་བཟུང་༸དཔལ་ལྡན་དགའ་ལྡན་ཕོ་བྲང་གི་ཡིག་ཚང་ནས་བཀའ་ཆོས་ཁག་སྐད་ཡིག་གསུམ་གྱི་ཐོག་ལ་གསུང་སྒྱུར་གནང་བཞིན་ཡོད་པ་མ་ཟད་དྲྭ་རྒྱའི་བརྒྱུད་ཐད་གཏོང་ཡང་གནང་གི་འདུག དེ་རིང་གི་བཀའ་ཆོས་བསྩལ་གྲུབ་པའི་མཇུག་ཏུ་༸གོང་ས་༸སྐྱབས་མགོན་ཆེན་པོ་མཆོག་གིས་སང་ཉིན་རྒྱ་གར་གྱི་རང་བཙན་ཐོབ་པའི་ཉིན་མོ་དང་བསྟུན་ཆོས་འབྲེལ་ཉིན་གཉིས་རིང་ཕྱིར་འགྱངས་ཀྱིེས་བློ་སྦྱོང་ཚིག་བརྒྱད་མ་དང་ལག་ལེན་སོ་བདུན་མ། སྤྱན་རས་གཟིགས་ཀྱི་བཀའ་དབང་བཅས་ཕྱི་ཚེས་ ༡༧ ཉིན་བསྩལ་རྒྱུ་ཡིན་པའི་བཀའ་བསྩལ་ཡོད་པ་རེད།

རྒྱ་གཞུང་གིས་དེ་སྔ་ཨ་མདོ་རྔ་པ་ནས་དགེ་འདུན་པ་གསུམ་འཛིན་བཟུང་བཙན་ཁྲིད་བྱས་པའི་གནས་ཚུལ་ད་ལྟ་གཞི་ནས་ཕྱིར་གྱར་བྱུང་འདུག་ཀྱང་། ཁོང་གསུམ་ད་ཆ་ས་གནས་གང་དུ་ཡོད་མེད་དང་གནས་སྟངས་ཇི་ཆགས་སོགས་ཤེས་རྟོགས་གང་ཡང་མེད་པར་གྱུར་འདུག རང་ལོ་ ༣༧ ཙམ་ཡིན་པའི་རྔ་པ་ཀིརྟི་དགོན་གྱི་གྲྭ་བློ་བཟང་ཐབས་མཁས་ལགས་སྔ་ལོར་རྒྱ་གཞུང་གིས་རྒྱུ་མཚན་གང་ཡིན་གསལ་བཤད་མེད་པར་འཛིན་བཟུང་བཙན་ཁྲིད་བྱས་ཏེ་ཉེ་ཆར་ཕྱི་ཟླ་ ༧ ཚེས་ ༣༠ ཡས་མས་ཤིག་ལ་ལོ་བཞིའི་བཙོན་འཇུག་ཁྲིམས་ཐག་བཅད་ཡོད་ཀྱང་། ས་གནས་མང་ཚོགས་ནས་ཁོང་ཅིའི་ཕྱིར་འཛིན་བཟུང་བྱས་ཡོད་མེད་དང་ས་གནས་གང་དུ་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་བྱུང་མི་འདུག དེ་བཞིན་རང་ལོ་ ༣༢ ཡིན་པ་རྔ་པ་སྤྲོ་ཚིགས་དགོན་པའི་གྲྭ་ཐུབ་པ་ལགས་ཕྱི་ལོ་ ༢༠༡༧ ལོའི་ལོ་མཇུག་ཏུ་རྒྱ་གཞུང་གི་ཉེན་རྟོག་པས་མཚན་མོ་རང་ཤག་ནས་གློ་བུར་དུ་འཛིན་བཟུང་བཙན་ཁྲིད་བྱས་ཡོད་པ་དང་ད་ལྟ་བར་ཁོང་གི་གནས་སྟངས་ཇི་ཆགས་ཤེས་རྟོགས་གང་ཡང་མེད་པར་གྱུར་ཡོད་པ་རེད། གཞན་ཡང་རང་ལོ་ ༣༦ ཙམ་ཡིན་པ་རྔ་པ་ཀིརྟི་དགོན་པའི་གྲྭ་བློ་བཟང་རྡོ་རྗེ་ལགས་རྒྱ་གཞུང་གིས་མཚན་མོ་རང་ཉིད་ཀྱི་ཤག་ནས་འཛིན་བཟུང་བཙན་ཁྲིད་བྱས་ཏེ་ད་བར་ས་གནས་གང་དུ་ཡོད་མེད་ཀྱི་གནས་ཚུལ་ཞིབ་ཕྲ་ཤེས་རྟོགས་མེད་པར་གྱུར་ཡོད་པ་རེད། གཞི་རྩའི་རྒྱ་གཞུང་གིས་ད་ལན་རྔ་པ་ནས་འཛིན་བཟུང་བཙོན་འཇུག་བྱས་པའི་ཁོངས་ནས་གྲྭ་བློ་བཟང་ཐབས་མཁས་ལགས་ནི་ལྷ་སྡེ་གོང་མའི་བློ་ཁོའི་བུ་ཡིན་ཞིང་། ཆུང་དུས་ནས་རྔ་པ་ཀིརྟི་དགོན་པར་གྲྭ་ཞུགས་གནང་བ་དང་ནང་བསྟན་གཞོན་ནུའི་རིག་སློབ་ཁང་གི་སྐབས་གསུམ་པའི་མཐར་ཕྱིན་སློབ་པ་ཞིག་ཡིན་པ་མ་ཟད། དེ་ནས་ཁོང་མཚན་ཉིད་གྲྭ་ཚང་དུ་གཞུང་ཆེན་སློབ་སྦྱོང་གིས་དེང་སྐབས་དབུ་མའི་འཛིན་གྲྭར་སླེབས་ཡོད་པ་རེད་འདུག དེ་བཞིན་གྲྭ་ཐུབ་པ་ལགས་ནི་སྤྲོ་ཚིགས་ཐང་བ་མའི་མགར་བ་ཚང་གི་བུ་ཡིན་པ་དང་ཁོང་ཆུང་དུས་ནས་སྤྲོ་ཚིགས་དགོན་པར་ཆོས་ཞུགས་གནང་སྟེ་ ༢༠༠༨ ཕྱི་ཟླ་ ༣ ཚེས་ ༡༦ ཉིན་སྤྲོ་ཚིགས་ཡུལ་ཚོའི་ཐོག་ནས་ངོ་རྒོལ་སྐད་འབོད་དང་རྒྱའི་དར་དམར་མེར་སྲེག་གནང་བའི་ཉེས་མིང་གཡོག་ནས་ལོ་གཅིག་དང་ཟླ་བ་དྲུག་ལ་ངལ་རྩོལ་སྒྱུར་བཀོལ་གྱི་མིང་ཐོག་ནས་བཙོན་འཇུག་བྱས་ཡོད་པ་མ་ཟད། ཁོང་གི་ཕ་སྐལ་བཟང་ལགས་ཀྱང་དེ་སྔ་ཕྱི་ལོ་ ༢༠༡༡ ལོར་ངོ་རྒོལ་སྐད་འབོད་གནང་རྐྱེན་འཛིན་བཟུང་གིས་བཙོན་འཇུག་གནང་མྱོང་ཡོད་པ་རེད་འདུག དེ་དང་ཆབས་ཅིག་རྔ་པ་ཀིརྟི་དགོན་པའི་གྲྭ་བློ་བཟང་རྡོ་རྗེ་ལགས་ནི་རྔ་བ་རྫོང་ཕྱུགས་ལས་འགབ་མའི་ཕ་སངས་རིས་ཀྱི་བུ་ཡིན་པ་དང་ཕྱི་ལོ་ ༢༠༡༡ ལོར་འཛིན་བཟུང་གིས་ལོ་གསུམ་གི་བཙོན་འཇུག་ཁྲིམས་ཐག་བཅད་མྱོང་ཡོད་པའི་ཆབ་སྲིད་བཙོན་ཟུར་ཞིག་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་བཅུ་གཉིས་ནང་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་སྒར་དུ་རྟེན་གཞི་བྱས་པའི་གདན་ས་དགའ་ལྡན་དང་འབྲས་སྤུངས་སྒོ་མང་གྲྭ་ཚང་སོགས་སུ་བཀའ་ཆོས་ཀྱི་མཛད་འཕྲིན་བསྐྱང་སླད་ཆིབས་བསྒྱུར་བཀའ་དྲིན་མཛད་གཏན་ཁེལ་འདུག ༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲྭ་གནས་ཐོག་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༡༢ ཚེས་ ༡༢ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒྱུ་གླིང་བོད་མིའི་གཞིས་གཞིས་སྒར་དུ་༸ཞབས་སོར་འཁོད་ཀྱི་ཡོད་པ་དང་། ཕྱི་ཚེས་ ༡༤ ཉིན་གྱི་སྔ་ཐོག་མགོན་པོ་༸གང་ཉིད་མཆོག་གིས་འབྲས་སྤུངས་སྒོ་མང་གྲྭ་ཚང་གི་ཆོས་རྭ་གསར་པ་དབུ་འབྱེད་རབ་གནས་མཛད་རྒྱུ་དང་། དེ་ཉིན་ཁུལ་དེར་འཚོགས་གཏན་ཁེལ་བའི་ཨེ་མོ་རི་བོད་ཀྱི་ཚན་རིག་ལས་འཆར་དབུ་འཛུགས་གནང་སྟེ་ལོ་ངོ་དྲུག་འཁོར་བའི་མཛད་སྒོའི་ཚོགས་མགོན་དུ་དབུ་བཞུགས་མཛད་ཀྱི་འདུག མགོན་པོ་༸གང་ཉིད་མཆོག་གིས་ཚེས་ ༡༥ ནས་ ༡༧ བར་དད་ལྡན་མང་ཚོགས་རྣམས་ལ་སྔར་ལོའི་ལོ་མཇུག་ཏུ་གནས་མཆོག་རྡོ་རྗེ་གདན་དུ་དབུ་འཛུགས་བཀའ་དྲིན་བསྐྱངས་པའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་མཛད་རྒྱུ་དང་། དེ་བཞིན་ཚེས་ ༢༠ ནས་ ༢༢ བར་༸གོང་ས་༸སྐྱབས་མགོན་ཆེན་པོ་མཆོག་གིས་གདན་ས་དགའ་ལྡན་གྲྭ་ཚང་དགེ་ལུགས་བསྟན་པའི་སྲོལ་འབྱེད་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་༸སྐུ་ཞི་བར་གཤེགས་ནས་ལོ་ངོ་ ༦༠༠ འཁོར་བའི་རྗེས་དྲན་མཛད་སྒོའི་ཚོགས་མགོན་དུ་དབུ་བཞུགས་ཀྱིས་དད་ལྡན་མང་ཚོགས་ལ་བཀའ་ཆོས་དང་བཀའ་སློབ་བསྩལ་རྒྱུ། ཁུལ་དེའི་ནང་གི་མཛད་འཆར་མཐའ་མ་སྟེ་ཕྱི་ཚེས་ ༢༢ ཉིན་དགའ་ལྡན་བླ་སྤྱིར་རྒྱལ་སྤྱིའི་དགེ་ལྡན་ལྷན་ཚོགས་དང་གྲྭ་ཚང་ཁག་ལྷན་རྒྱས་ནས་མགོན་པོ་༸གང་ཉིད་མཆོག་༸སྐུ་ཚེ་མི་འཇིགས་རྡོ་རྗེ་འཆང་གི་ངོ་བོར་བརྟན་ཕྱིར་བརྟན་བཞུགས་བསྟར་འབུལ་ཞུ་རྒྱུ་རེད་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་རྒྱ་གར་བྱང་ཕྱོགས་མ་ན་ལི་གྲོང་ཁྱེར་ནང་དད་ལྡན་མང་ཚོགས་ལ་བཀའ་ཆོས་ཀྱི་མཛད་འཕྲིན་ཁག་གཅིག་སྐྱོང་བཞིན་ཡོད་པ་དང་། ཕྱི་ཟླ་ ༩ ཚེས་ ༤ ནས་ ༦ ཉིན་གསུམ་རིང་གི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་ཌོ་ནེ་ཤི་ཡ་དང་། ཀོ་རི་ཡ། མ་ལེ་ཤི་ཡ། སིངྒ་པུར། ཐེ་ལན་ཌི། ཝི་ཏི་ནམ་སོགས་ཨེ་ཤ་ཡའི་ཡུལ་གྲུ་ཁག་གི་དད་ལྡན་ཆོས་ཞུ་བས་ཇི་ལྟར་གསོལ་ཞུས་པ་ལྟར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་གསུང་ཆོས་བཀའ་དྲིན་བསྩལ་རྒྱུ་དང་། ཕྱི་ཚེས་ ༡༣ ཉིན་ཤང་དགའ་ལྡན་ཆོས་འཁོར་གླིང་དང་། མདོ་ཁམས་ཆུ་སྒང་། སྤྱི་མཐུན་མཉམ་འབྲེལ། འབྲུག་སྡོད་བོད་མི། གོ་འཇོ་བཅས་ཚོ་ཁག་ལྔ་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། གཞན་ཡང་ཕྱི་ཟླ་ ༡༠ ཚེས་ ༣ ནས་ ༥ བར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་རྨ་ས་ལར་ཐེ་ཝན་གྱི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་བཞིན་ཉིན་གྲངས་གསུམ་རིང་དབུ་མ་རིན་ཆེན་ཕྲེང་བའི་བཀའ་ཆོས་བཀའ་དྲིན་བསྩལ་རྒྱུ་དང་། ཕྱི་ཟླ་ ༡༡ ཚེས་ ༤ ནས་ ༦ བར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཀོ་རི་ཡའི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་ཉིན་གྲངས་གསུམ་རིང་བཀའ་ཆོས་བཀའ་དྲིན་བསྩལ་རྒྱུ་སོགས་ཀྱི་མཛད་འཆར་ཐུགས་གཏན་ཁེལ་ཡོད་པ་རེད།