གསར་འགྱུར།

དེ་རིང་ཟླ་ ༢ ཚེས་ ༡༣ ཉིན་སྔ་དྲོ་ཚོུད་ ༡༡ ཐོག་བཞུགས་སྒར་དུ་རྟེན་གཞི་བྱས་པའི་རྒྱ་གར་བོད་རང་བཙན་སློབ་ཕྲུག་ཚོགས་པས་བཞུགས་སྒར་གཙུག་ལག་ཁང་གི་ཉེ་འདབས་སུ་ཡོད་པའི་སྣུམ་འཁོར་འབབ་ཚུགས་ཁང་གི་ཡང་སྟེང་དུ་ STAND FOR THE TIBETAN NATIONAL ANTHEM འམ་བོད་རྒྱལ་ཁབ་ཆེན་པོའི་རྒྱལ་གླུ་ཐོག་སྐུ་བཞེང་ཞེས་པའི་མཚན་བྱང་འོག་བོད་རང་བཙན་བསྐྱར་གསོ་ཉིན་མོ་སྲུང་བརྩི་ཞུས་སོང་། བཙན་བྱོལ་ནང་གི་བོད་རིགས་གཞོན་སྐྱེས་ཁག་ཅིག་དང་བོད་དོན་རྒྱབ་སྐྱོར་བ་ལས་གྲུབ་པའི་བོད་རང་བཙན་གཙང་མ་འདོད་མཁན་གྱི་གཞུང་འབྲེལ་མ་ཡིན་པའི་ཚོགས་པ་བོད་རང་བཙན་སློབ་ཕྲུག་ཚོགས་པས་དེ་སྔ་ཕྱི་ལོ་ ༡༩༡༣ ཟླ་ ༢ ཚེས་ ༡༣ ཉིན་༸གོང་ས་སྐུ་འཕྲེང་བཅུ་གསུམ་པ་ཆེན་པོ་མཆོག་གིས་བོད་དང་ཕྱི་སོག་དབར་སོག་པོའི་རྒྱལ་ས་ཨུར་གར་དུ་ཆིངས་ཡིག་བཞག་པ་དང༌། བོད་མི་སེར་སྐྱ་ཡོངས་ལ་སྤང་བླང་རྩ་ཚིག་དོན་ཚན་ལྔ་ཅན་དང་སྦྲགས་བོད་རང་བཙན་གཙང་མ་ཡིན་པའི་ཡོངས་ཁྱབ་གསལ་བསྒྲགས་མཛད་པའི་ཉིན་མོ་དང་བསྟུན་རྣམ་པ་འདྲ་མིན་བརྒྱུད་ལས་འགུལ་སྤེལ་ཏེ་བོད་རང་བཙན་བསྐྱར་གསོ་ཉིན་མོ་ཞེས་སྲུང་བརྩི་ཞུ་བཞིན་ཡོད་པ་ལྟར། ཁོང་རྣམས་ནས་བོད་རྒྱལ་ཁབ་འདི་རང་དབང་ཅན་གྱི་རྒྱལ་ཁབ་ཞིག་ཏུ་མཚོན་པ་གནང་སྐབས་བོད་ཀྱི་རྒྱལ་དར་དང་བོད་གཞུང་གི་བསྟི་གནས་ཕོ་ཕྲང་ཆེན་པོ་རི་བོ་གྲུ་འཛིན་གྱི་འདྲ་གཟུགས། དེ་བཞིན་བོད་ཀྱི་རྒྱལ་རབས་ལོ་རྒྱུས་དང་འབྲེལ་བའི་པར་ཡིག་སོགས་འགྲེམས་སྟོན་གྱི་ལམ་ནས་ཉིན་མོ་དེ་སྲུང་བརྩི་ཞུས་ཡོད། ལྷག་ཏུ་བོད་རྒྱལ་ཁབ་ཆེན་པོའི་རྒྱལ་གླུ་ཐོག་སྐུ་བཞེང་ཞེས་པའི་བརྗོད་ཚིག་གཙོ་བཟུང་གནང་དོན་ནི་བོད་རྒྱལ་ཁབ་ཆེན་པོའི་རྒྱལ་གླུ་ནི་བོད་འདི་རང་དབང་རང་བཙན་གཙང་མའི་རྒྱལ་ཁབ་ཞིག་ཡིན་པའི་དཔང་རྟགས་གནད་ཆེ་ཞིག་ཡིན་པར་བརྟེན་དེ་ལྟར་གནང་ཡོད་སྐོར་སོགས་གསུངས་སོང་། གཞི་རྩའི་རྒྱ་གར་བོད་རང་བཙན་སློབ་ཕྲུག་ཚོགས་པས་དེ་རིང་སྔ་དྲོོ་ཚོུད་ ༡༡ ནས་དགོང་དྲོ་ཆུ་ཚོད་ ༥ བར་འགྲེམས་སྟོན་གོ་སྒྲིག་དང་། བོད་ལ་རང་དབང་རང་བཙན་གང་མྱུར་ཐོབ་པའི་རྟེན་འབྲེལ་མཚོན་སླད་དུ་གཉུག་མར་གནས་པ་དང་གློ་བུར་དུ་ལྷགས་པ་ཀུན་ལ་བོད་ཀྱི་གཞས་པ་གཞས་མ་དང་། སྒྱུ་རྩལ་བ་འདྲ་མིན་མགྲོན་འབོད་ཐོག་དགོང་དྲོ་ཚོུད་ ༦ སྟེང་བོད་ཀྱི་ཐུན་མིན་སྲོལ་རྒྱུན་དང་དེང་རབས་ཀྱི་རྐང་བྲོ་གླུ་གཞས། དེ་བཞིན་གཏམ་བརྗོད་སོགས་གཟིགས་འབུལ་ཞུ་རྒྱུ་རེད་འདུག རྩ་བའི་བོད་རང་བཙན་བསྐྱར་གསོའི་ཉིན་མོ་སྲུང་བརྩི་ཞུ་རྒྱུའི་ལས་འགུལ་དེ་ནི་བོད་རང་བཙན་སློབ་ཕྲུག་ཚོགས་པས་དེ་སྔ་ཕྱི་ལོ་ ༢༠༡༣ ལོར་༸གོང་ས་༸སྐུ་འཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གསལ་བསྒྲགས་བསྐྱངས་ནས་ལོ་ངོ་ ༡༠༠ ཐམ་པ་ཧྲིལ་པོ་འཁོར་བའི་དུས་ཚིགས་དང་བསྟུན་ནས་རྒྱ་གར་དང་ཨ་རི། ཁེ་ན་ཌ་གཙོ་གྱུར་རྒྱལ་སྤྱིའི་ཁྱོན་ཡོངས་ལ་དབུ་འཛུགས་གནང་བའི་ལས་དོན་གཙོ་ཆེ་ཞིག་ཡིན་པ་རེད།

དེ་རིང་ཟླ་ ༢ ཚེས་ ༡༣ ཉིན་བཞུགས་སྒར་ཉེ་འདབས་སུ་རྟེན་གཞི་བྱས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དང་ཤེས་རིག་བཀའ་བློན་གཅིག་ལྕོགས་གཡུ་ཐོག་ཀརྨ་དགེ་ལེགས་མཆོག་གིས་དབུས། ས་སྐྱ་སྨོན་ལམ་ཐེབས་རྩ་ཁང་གི་ཚོགས་གཞོན་དང་ས་སྐྱ་༸གོང་མ་ཁྲི་འཛིན་རིན་པོ་ཆེ་མཆོག་གི་སྐུ་ཚབ། དེ་བཞིན་སློབ་གཉེར་ཁང་དེའི་དགེ་ལས་སློབ་མ་བཅས་འདུ་འཛོམས་ཐོག་སྐབས་དང་པོའི་ས་སྐྱའི་གཞི་རིམ་འོག་མའི་དགེ་འོས་འཛིན་གྲྭའི་བསླབ་པ་མཐར་སོན་གྱི་མཛད་སྒོ་ཚོགས་ཡོད་པ་རེད། ཆོས་རིག་དང་ཤེས་རིག་བཀའ་བློན་གཅིག་ལྕོགས་གཡུ་ཐོག་ཀརྨ་དགེ་ལེགས་མཆོག་གིས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཐོག་མའི་དམིགས་ཡུལ་གཞིར་བཟུང་ད་བར་གཉེར་བཞིན་པའི་དགེ་འོས་སྦྱོང་བརྡར་གྱི་ལས་གཞི་ཁག་ལ་ཆེ་བསྟོད་གནང་བ་དང་འབྲེལ། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱ་རྒྱུའི་འགན་དེ་བོད་མིའི་སྒྲིག་འཛུགས་ཁོ་ནར་མ་བཞག་པར་འབྲེལ་ཡོད་ཚང་མས་འཕྱར་གྲུ་མཉམ་འདེགས་ཐོག་གནང་དགོས་གལ་ཡིན་པ་གསུངས་སོང་། ལྷག་པར་དུ་འབྲེལ་ཡོད་སྒྲིག་འཛུགས་ཀྱི་ངོས་ནས་ད་བར་དགེ་འོས་སྦྱོང་བརྡར་གནང་བའི་ཐོག་མའི་དམིགས་ཡུལ་དང་མཐའ་འཇུག་གྱི་ཞན་ཆ་ཁག་ལུང་འདྲེན་དང་ཆབས་ཅིག དགེ་འོས་སྦྱོང་བརྡར་ཐོབ་པ་རྣམས་ནས་དགེ་རྒན་གྱི་ལས་གནས་ཐོག་རྒྱུན་རིང་ཙམ་བཞུགས་དགོས་གལ་ཡིན་པ་གསུངས་ཡོད། རྩ་བའི་ཐེངས་འདིའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དང་ས་སྐྱ་སྨོན་ལམ་ཐེབ་རྩ་ཁང་གཉིས་ཟུང་འབྲེལ་ཐོག་སྤེལ་བའི་ས་སྐྱའི་སྐབས་དང་པོའི་དགེ་འོས་སྦྱོང་བརྡར་ལས་གཞི་ནི་ས་སྐྱ་ཁྲི་ཆེན་༸གོང་མ་རིན་པོ་ཆེ་མཆོག་གི་དགོངས་གཞིར་གཙོ་དམིགས་ཀྱིས་རྒྱ་བལ་གཉིས་སུ་ས་སྐྱའི་ཆོས་བརྒྱུད་ཁྱབ་ཁོངས་དགོན་སྡེ་ཁག་གི་གཞི་རིམ་སློབ་གྲྭ་ཁག་ ༢༥ ཡོད་པ་དེ་དག་གི་དགེ་རྒན་ཚོའི་སྤུས་ཚད་ལེགས་པོ་ཡོང་བར་ཕྱི་ལོ་ ༢༡༠༦ ལོར་དབུ་འཛུགས་གནང་བ་ཞིག་ཡིན་པ་རེད། ས་སྐྱ་སྨོན་ལམ་ཐེབས་རྩ་ཁང་གིས་ཇི་ལྟར་རེ་འདུན་ཞུས་པ་བཞིན་ས་རཱ་བོད་ཀྱི་མཐོ་རིམ་སློབ་གཉེར་ཁང་ནས་དགེ་འོས་སྐབས་དང་པོའི་སློབ་མ་ཚོར་སློབ་གཉེར་ཁང་རང་དུ་སློབ་ཁྲིད་དང་སྦྱོང་བརྡར་སོགས་གནང་ཡོད་པ་དང། སྐབས་གཉིས་པའི་ས་སྐྱའི་དགེ་འོས་འཛིན་གྲྭ་དེ་ཕྱི་ལོ་ ༢༠༡༩ ལོར་མུ་མཐུད་གནང་རྒྱུ་ཡིན་པ་རེད་འདུག

ཉེ་ཆར་ཕྱི་ཟླ་ ༡༢ ཕྱི་ཚེས་ ༢༥ ཉིན་བོད་ནས་བྲོས་བྱོལ་གྱིས་ཨ་རིའི་ California མངའ་སྡེའི་ San Fransicco གྲོང་ཁྱེར་དུ་བདེ་འབྱོར་བྱུང་བ་འཇིགས་བྲལ་གློག་བརྙན་བཟོ་བསྐྲུན་པ་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཨ་རིའི་རྒྱལ་ས་ཝ་ཤིང་ཊོན་ཌི་སིར་ཨ་རིའི་ཕྱི་སྲིད་ལས་ཁུངས་ཀྱི་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་སྟེ། བོད་ནང་གི་བོད་མིའི་ངོས་ནས་རང་དབང་ཆེད་དུ་འཐབ་རྩོད་ཀྱི་རྣམ་པ་ནམ་ཡང་བློས་བཏང་གནང་མེད་ཅེས་གསུངས་འདུག དེ་ཡང་ Filming For Tibet ཚོགས་པའི་དྲ་གནས་ཐོག་གནས་ཚུལ་སྤེལ་བར་ཁ་སང་དོན་གྲུབ་དབང་ཆེན་ལགས་ཨ་རིའི་ཕྱི་སྲིད་ལས་ཁུངས་སུ་ཕེབས་པ་དང་སྦྲགས། ལྷན་ཁང་དེའི་ Multilateral Organization འམ་རྒྱལ་ཁབ་མཉམ་སྡེབ་སྡེ་ཚན་གྱི་དྲུང་གཞོན་ལས་རོགས་སྐུ་ཞབས་ Scott Bustby ལགས་དང་མང་གཙོ་དང་འགྲོ་བ་མིའི་ཐོབ་ཐང་སྡེ་ཚན་གྱི་དྲུང་གཞོན་ལས་རོགས་སྐུ་ཞབས་ Mike Kozak ལགས་རྣམ་གཉིས་དང་ལྷན་མཇལ་འཕྲད་གནང་འདུག སྐབས་དེར་དོན་གྲུབ་དབང་ཆེན་ལགས་ཀྱིས་ཨ་རིའི་གཞུང་འབྲེལ་མི་སྣ་ཚོར་བོད་ནང་གི་བོད་མིའི་ངོས་ནས་རང་དབང་ཆེད་འཐབ་རྩོད་ཀྱི་རྣམ་པ་ནམ་ཡང་བློས་བཏང་གནང་མེད་ཅེས་ནན་པོ་གསུངས་འདུག་པ་དང་གཞུང་འབྲེལ་མི་སྣ་ཚོས་ཀྱང་དེར་ཐུགས་སྣང་ཆེན་པོས་གསན་ཞིབ་གནང་འདུག དོན་གྲུབ་དབང་ཆེན་ལགས་ནས་ཤར་ཨེ་ཤ་ཡ་དང་ལྷོ་ཞི་བདེ་རྒྱ་མཚོ་སྡེ་ཚན་གྱི་དྲུང་གཞོན་ལས་རོགས་ལྕམ་སྐུ་ Laura Stone ལགས་ཀྱིས་གཙོས་པའི་སྡེ་ཚན་གཞན་གྱི་མི་སྣའི་ལྷན་དུའང་མཇལ་འཕྲད་གནང་ཡོད་པ་རེད། རྩ་བའི་ཁ་སང་ཨ་རིའི་གཞུང་འབྲེལ་མི་སྣ་མཇལ་འཕྲད་སྐབས་དོན་གྲུབ་དབང་ཆེན་ལགས་ཀྱི་ལྷན་དུ་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་སྐུ་ཞབས་ Matteo Meccaci ལགས་དང། Filming for Tibet ཚོགས་མི་བདེ་ཆེན་སྤེན་པ་ལགས། དེ་བཞིན་འཇམ་དབྱངས་ཚུལ་ཁྲིམས་ལགས་བཅས་ཆེད་ཕེབས་གནང་འདུག གཞི་རྩའི་ཨ་རིའི་གྲོས་ཚོགས་སུ་བོད་དོན་ཉན་ཞིབ་ཀྱི་ལས་རིམ་དེ་ཨ་མི་རི་ཀའི་གྲོས་ཚོགས་ཀྱི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་གོ་སྒྲིག་ཐོག་སང་ཕྱི་ཚེས་ ༡༤ ཉིན་ཡུལ་དེའི་གྲོས་ཚོགས་ཀྱི་ཚོགས་ཁང་ཨང་ ༣༠༡ ནང་འཚོགས་ཀྱི་ཡོད་པ་དང་། སྐབས་དེར་ཁོང་ནས་ཨ་རིའི་གྲོས་ཚོགས་འཐུས་མི་དང་གནད་ཡོད་མི་ཚོར་འདས་པའི་ལོ་དུས་ནང་ཁོང་རྒྱ་གཞུང་གི་བཙོན་ཁང་དུ་མནར་གཅོད་ཇི་མྱངས་དང་། ལྷག་པར་དུ་བོད་གཙོ་གྱུར་གྱི་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་ཐོག་སྙན་གསེང་ཞུ་གནང་གི་ཡོད་པ་མ་ཟད། དེ་འབྲེལ་གྲོས་ཚོགས་འཐུས་མིའི་བཀའ་འདྲི་ཁག་ལ་ལན་འདེབས་གསལ་བཤད་ཀྱང་ཞུ་གནང་གི་ཡོད་པ་རེད།

ཁ་སང་ Global Times ཞེས་པའི་རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་བར་ཉེ་ཆར་ཕྱི་ཟླ་ ༡ ཚེས་ ༡༡ ཉིན་བོད་རང་སྐྱོང་ལྗོངས་ཟེར་བའི་སྤྱི་བདེ་ལས་ཁུངས་ནས་ངན་སྐུལ་གྱིས་ཁྲིམས་འགལ་བྱ་སྤྱོད་ལ་དམ་དྲག་དང་གཙང་བཟོའི་ལས་གཞི་ཟེར་བའི་ལམ་སྟོན་ཡིག་ཆ་ཞིག་འདོན་སྤེལ་བརྒྱུད། ས་གནས་མང་ཚོགས་ནས་ཏཱ་ལའི་རུ་ཚོགས་ཀྱིས་བརྒྱུད་སྐུལ་བྱས་པའི་ཁྲིམས་འགལ་ལས་དོན་རིགས་སོགས་ཀྱི་སྐོར་འབྲེལ་ཡོད་ལས་ཁུངས་སུ་སྐབས་ཐོག་བརྡ་ལན་སྤྲོད་དགོས་པའི་འབོད་སྐུལ་བྱས་འདུག དེའང་སྤྱི་བདེ་ལས་ཁུངས་ཀྱི་ཡིག་ཆའི་ནང་ཕུགས་རྒྱང་རིང་པོའི་སྤྱི་ཚོགས་བརྟན་ལྷིང་དང་མང་ཚོགས་ཁྲོད་འཆམ་མཐུན་དང་བདེ་སྐྱིད་བསྐྲུན་ཆེད། དོན་ཚན་ ༢༢ ཅན་གྱི་ལམ་སྟོན་ཁག་ཅིག་སྟོན་པ་ལས་ཉུང་མཐར་དོན་ཚན་གསུམ་ཙམ་ཞིག་ཏཱ་ལའི་རུ་ཚོགས་ཟེར་བ་དང་ཐད་ཀར་འབྲེལ་བ་བཏགས་འདུག དེའི་ཁོངས་སུ་ཏཱ་ལའི་ཁ་བྲལ་རུ་ཚོགས་ཀྱིས་བརྒྱུད་སྐུལ་འོག་ས་གནས་སུ་བརྟན་ལྷིང་དཀྲུག་པ་དང་ཁ་བྲལ་གྱི་བྱ་སྤྱོད་སྤེལ་བ། དེ་བཞིན་དཔལ་འབྱོར་དང་ཁོར་ཡུག ཤེས་ཡོན། རིག་གཞུང་སོགས་ཀྱི་གནད་དོན་ཐོག་མང་ཚོགས་ཀྱི་མགྲིན་ཚབ་པ་ཡིན་ཁུལ་བྱས་ནས་ཏཱ་ལའི་རུ་ཚོགས་ཀྱི་མགྲིན་ཚབ་པ་ཡིན་པའི་ཁྲིམས་འགལ་གྱི་རུ་ཁག གཞན་ཡང་ཁྲིམས་མཐུན་མིན་པའི་ལམ་ཐོག་ནས་མང་ཚོགས་ཁྲོད་དང་བླངས་དང་བཙན་དབང་གཉིས་ཀའི་ཐོག་ནས་དངུལ་གྱི་ཞལ་འདེབས་བསྡུ་རུབ་ཀྱིས་ཏཱ་ལའི་རུ་ཚོགས་ཀྱི་ལས་དོན་ལ་མཐུན་འགྱུར་སྦྱར་བའི་ལས་དོན་སོགས་འཁོད་འདུག

བོད་ཁམས་དཀར་མཛེས་ཁུལ་བྲག་མགོ་རྫོང་དུ་རྟེན་གཞི་བྱས་པའི་བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས་རྒྱ་གཞུང་གི་བཙོན་ཁང་དུ་ལོ་དྲུག་རིང་བཙོན་འཇུག་རྗེས་ཟླ་བ་སྔོན་མའི་ཚེས་ ༢༤ ཉིན་བཙོན་གྲོལ་བཏང་འདུག་ཀྱང་། བཙོན་ཁང་དུ་བཞུགས་རིང་ལ་མི་སྤྱོད་ལས་འདས་པའི་མནར་གཅོད་བཏང་རྐྱེན་ཁོང་བཙོན་གྲོལ་སྐབས་ཞབས་གཉིས་ཀ་ཐང་པོ་མེད་པར་བརྟེན་ལག་རྟེན་བསྣམས་ནས་ཕེབས་དགོས་པ་ཆགས་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གནས་ཚུལ་མཁོ་སྒྲུབ་པ་ཁྲི་སྲུང་རྡོ་རྗེ་ལགས་ཀྱིས་དེ་སྔོན་ཕྱི་ལོ་ ༢༠༡༢ ལོའི་ཕྱི་ཟླ་ ༡ ཚེས་ ༢༣ སྟེ་རྒྱ་ནག་གི་དཔྱིད་གསར་དུས་སྟོན་གྱི་ཚེས་གཅིག་ཉིན་བྲག་མགོར་བོད་མིའི་ཞི་བའི་སྒེར་ལངས་ཀྱི་གནད་དོན་བྱུང་ཡོད་པ་དང་། སྐབས་དེར་རྒྱ་གཞུང་གི་དྲག་ཆས་ཉེན་རྟོག་པས་བོད་མི་ཞི་རྒོལ་བའི་ཐོག་ལ་གང་བྱུང་མེ་མདའ་བརྒྱབ་པའི་ཁྲོད་བོད་མི་ཁག་ཅིག་དེ་གར་དམར་བསད་བཏང་བ་དང་མང་དག་ཞིག་ལ་རྨས་སྐྱོན་ཚབས་ཆེན་ཕོག་པའི་གནད་དོན་བྱུང་བ་ཡོད་པ་མ་ཟད། ཉིན་ཤས་རྗེས་ཁྲིན་ཏུ་གྲོང་ཁྱེར་སྒོ་ཆེན་དགོན་པའི་སྤྲུལ་སྐུ་བློ་བཟང་བསྟན་འཛིན་ལགས་དང་བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས། ཚོང་པ་འཕྲིན་ལས་ལགས། རྩིས་པ་དགྲ་ལྷ་ལགས་སོགས་ལ་རྒྱ་གཞུང་གིས་བོད་མི་ངོ་རྒོལ་གྱི་གནད་དོན་དེ་དང་འབྲེལ་བ་བཏགས་ནས་འཛིན་བཟུང་བྱས་པ་ཡོད་པ་གསུངས་སོང་། ལྷག་པར་དུ་སྤྲུལ་སྐུ་བློ་བཟང་བསྟན་འཛིན་ལགས་ལ་ལོ་ ༧ གྱི་བཙོན་འཇུག་ཁྲིམས་ཐག་བཅད་པ་དང་། ཕྱག་མཛོད་དགེ་བཤེས་བསྟན་འཛིན་དཔལ་བཟང་ལགས་དང་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས། རྩིས་པ་དགྲ་ལྷ་ལགས་བཅས་ལ་ལོ་ ༦ རེ་དང་དེ་བཞིན་དགོན་པའི་ཚོང་པ་འཕྲིན་ལས་ལགས་ལ་ལོ་ ༥ ཡི་བཙོན་འཇུག་ཁྲིམས་ཐག་བཅད་ཡོད་པ་རེད་འདུག རྩ་བའི་དགེ་བཤེས་ཚེ་དབང་རྣམ་རྒྱལ་ལགས་ནི། ཕྱི་ལོ ༡༩༧༠ ལོར་བྲག་མགོའི་ཆུ་དབར་གྲོང་དུ་ཕ་རྡོ་དགའ་དང་མ་ཚེ་འཛིན་ལྷ་མོ་གཉིས་སུ་སྐུ་འཁྲུངས་ཞིང། ཆུང་དུས་སུ་སློབ་གྲྭ་འགྲིམས་ཏེ་བོད་ཡིག་དང་རྒྱ་ཡིག་གཉིས་ཀྱི་སློབ་སྦྱོང་གནང་བ་དང་། ཕྱི་ལོ་ ༡༩༨༧ ལོར་རྒྱ་གར་ལ་ཕེབས་ཏེ་འབྲས་སྤུང་བློ་གསལ་གླིང་གྲྭ་ཚང་དུ་ཆོས་སྒོར་ཞུགས། དགོན་དེའི་སློབ་གྲྭ་སོགས་ནས་ནང་དོན་རིག་པ་དང་དབྱིན་བོད་ཧིན་གསུམ་ལ་སྦྱང་པ་གནང་། ༡༩༩༤ ལོར་རྡ་སའི་མཚན་ཉིད་རིགས་ལམ་སློབ་གཉེར་ཁང་དུ་ཕེབས་ཏེ་རིས་མེད་ཆོས་བརྒྱུད་ཆེན་པོའི་ལྟ་གྲུབ་ལ་སྦྱང་པ་མཐར་སོན་གནང་བའི་མཁར་སློབ་གཉེར་ཁང་དེ་ནས་རིས་མེད་སློབ་དཔོན་ཀྱི་མཚན་རྟགས་ཐོབ་པ་དང་འབྲས་སྤུངས་བློ་གསལ་གླིང་གྲྭ་ཚང་དུ་གཞུང་ལུགས་རབ་འབྱམས་སྨྲ་བའི་དགེ་བཤེས་དམ་བཅའ་བཞག་ཡོད།  ཕྱི་ལོ ༢༠༡༡ ལོར་ཕྱིར་རང་ཡུལ་ཕེབས་ཏེ་བྲག་མགོ་དགོན་པའི་སློབ་དགེའི་ཐུགས་འགན་བཞེས་ཡོད་པ་རེད་འདུག གཞི་རྩ་བའི་ ༢༠༡༢ ལོ་དེར་བྲག་མགོ་རྫོང་ཁོངས་སུ་བོད་དོན་ལས་འགུལ་གྱི་ཉེས་མིང་འོག་བོད་མི་མང་དག་ཞིག་འཛིན་བཟུང་བྱས་ཡོད་པའི་ཁྲོད་བོད་མི་ ༣༦ ཙམ་ལ་བཙོན་འཇུག་ཁྲིམས་ཐག་བཅད་པའི་གནས་ཚུལ་མཐོན་ཡོད་པ་རེད།

རྒྱ་ནག་གཞུང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལྷོ་ཨ་ཕི་རི་ཀར་གཞུང་འབྲེལ་འཚམས་གཟིགས་དང་འབྲེལ་ཡུལ་དེའི་གཞུང་ལ་སྐྱོན་བརྗོད་ཤུགས་ཆེ་བྱས་ཡོད་སྟབས། ལྷོ་ཨ་ཕི་རི་ཀའི་གྲོས་ཚོགས་འཐུས་མི་ལྕམ་ Sandy Kalyan ལགས་ཀྱིས་རྒྱ་གཞུང་ནས་ལྷོ་ཨ་ཕི་རི་ཀའི་བདག་དབང་ཐོག་ཐེ་བྱུས་བྱ་རྒྱུ་མཚམས་འཇོག་དགོས་ཞེས་བརྗོད་འདུག ཟླ་བ་འདིའི་ཕྱི་ཚེས་ ༥ ནས་ ༨ བར་ཉིན་གྲངས་བཞིའི་རིང་སྲིད་སྐྱོང་མཆོག་ལྷོ་ཨ་ཕི་རི་ཀའི་ནང་གཞུང་འབྲེལ་འཚམས་གཟིགས་ཐེངས་དང་པོ་དེ་གནང་ཡོད་པ་དང། ཕྱི་ཚེས་ ༨ ཉིན་ཡུལ་དེའི་རྒྱལ་ས་ Pretoria ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ནས་སྲིད་སྐྱོང་མཆོག་ཡུལ་དེའི་ནང་གཞུང་འབྲེལ་ཕྱོགས་ཕེབས་གནང་བར་མི་འདོད་པའི་རྣམ་འགྱུར་བསྟན་པ་དང་འབྲེལ། ལྷོ་ཨ་ཕི་རི་ཀའི་གཞུང་ནས་རྒྱ་ནག་གཅིག་གི་སྲིད་བྱུས་ལ་རྒྱབ་འགལ་བྱས་པ་ཞིག་དང། ལྷག་པར་དུ་རྒྱལ་ཁབ་ཕྱོགས་གཉིས་པོའི་ཆབ་སྲིད་ཀྱི་འབྲེལ་ལམ་ལ་སྣང་ཆུང་བཏང་བ་དེས་མ་འོངས་པར་རྒྱ་ནག་གཞུང་ནས་ཡུལ་དེའི་ནང་ཚོང་གི་མ་རྩ་འཇོག་རྒྱུའི་ལས་གཞི་ཁག་ལ་དོ་ཕོག་འགྲོ་ངེས་ཡིན་པར་སྐྱོན་བརྗོད་ཤུགས་ཆེ་བྱས་ཡོད་པ་རེད། ལྷོ་ཨ་ཕི་རིའི་ Independentགསར་ཁང་ཐོག་གནས་ཚུལ་སྤེལ་བར་ཁ་ཉིན་ལྷོ་ཨ་ཕི་རི་ཀའི་རྒྱལ་ཁབ་ཀྱི་ཕྱོགས་འགལ་ཆབ་སྲིད་ཚོགས་པ་ཆེ་ཤོས་མང་གཙོ་ཚོགས་པའི་གྲོས་ཚོགས་འཐུས་མི་ལྕམ་ Sandy Kalyan ལགས་ཀྱིས་རྒྱ་གཞུང་ནས་ལྷོ་ཨ་ཕི་རི་ཀར་ཉེན་བརྡ་དེ་ལྟར་བཏང་བའི་བྱ་སྤྱོད་དེ་ཕྲུ་གུ་ཆུང་ཆུང་གི་བྱ་སྤྱོད་དང་གཅིག་མཚུངས་རེད་ཅེས་གསུངས་པ་མ་ཟད་བྱ་སྤྱོད་དེ་ནི་ལྷོ་ཨ་ཕི་རི་ཀའི་གཞུང་ནས་ངོས་ལེན་ཞུ་ཐབས་མེད་པ་ཞིག་ཡིན་པ་དང། ལྷག་པར་དུ་ཁོང་གིས་ཕྱི་རྒྱལ་བ་ཞིག་གིས་ལྷོ་ཨ་ཕི་རིའི་ཀའི་གཞུང་ལ་བཏང་འཛིན་བྱ་རྒྱུའི་དུས་སྐབས་དེ་སྔ་ས་ནས་རྫོགས་ཟིན་པ་རེད་ཅེས་ནན་བརྗོད་གནང་འདུག ལྕམ་ Sandy Kalyan ལགས་ནས་ཡུལ་དེའི་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ནས་སྲིད་སྐྱོང་མཆོག་ཁུལ་དེའི་ནང་ཕེབས་པ་དང། དེ་བཞིན་ Stellebosch གཙུག་ལག་སློབ་ཁང་དུ་སྲིད་སྐྱོང་མཆོག་གི་གཏམ་བཤད་ལས་རིམ་གཏན་འཁེལ་བར་འགོག་རྐྱེན་བཟོས་པ་བཅས་ལ་སྐྱོན་བརྗོད་དང་འབྲེལ རྒྱ་ནག་གཞུང་གི་ངོས་ནས་ལྷོ་ཨ་ཕི་རི་ཀའི་བདག་དབང་ཐོག་ཚད་ལས་བརྒལ་བའི་ཐེ་བྱུས་བྱ་རྒྱུ་འཚམས་འཇོག་དགོས་ཞེས་གསུངས་འདུག དེ་དང་འབྲེལ་ནས་ལྷོ་ཨ་ཕི་རི་ཀའི་ཕྱི་སྲིད་ལས་ཁུངས་ནས་ད་ལན་སྲིད་སྐྱོང་མཆོག་གི་འཚམས་གཟིགས་དང་འབྲེལ་ནས་ཁུལ་དེར་ཡོད་པའི་བོད་ཀྱི་སྐུ་ཚབ་དོན་གཅོད་ཁང་ལ་མངོན་གསལ་དོད་པོ་གནང་མི་དགོས་པའི་ཉན་བརྡ་བཏང་བ་དེར་སྐྱོན་བརྗོད་དང་སྦྲགས་ཏེ་ ལྷོ་ཨ་ཕི་རི་ཀའི་ཕྱི་སྲིད་ལས་ཁུངས་ནས་གསལ་བཤད་གནང་དགོས་པའི་དྲི་བ་ཡང་ཕུལ་འདུག རྩ་བའི་སྲིད་སྐྱོང་བློ་བཟང་སེང་གེ་མཆོག་སྲིད་སྐྱོང་གི་ཐུགས་འགན་བཞེས་ནས་ལྷོ་ཨ་ཕོ་རི་ཀར་གཞུང་འབྲེལ་ཕྱོགས་གནང་བ་ཆེས་ཐོག་མ་ཆགས་ཀྱི་ཡོད་ཅིང། གཞུང་འབྲེལ་འཚམས་གཟིགས་དེ་ཡུལ་དེའི་ཨི་ཀ་ཐ་ཀ་རང་དབང་ཆབ་སྲིད་ཚོགས་པ་གྲོས་ཚོགས་ཀྱི་འཐུས་མི་ཁག་ནས་གདན་ཞུ་ཕུལ་བ་ཞིག་ཡིན་པ་དང། རྒྱ་གཞུང་གི་གནོན་ཤུགས་ལ་ལྟོས་མེད་ལྷོ་ཨ་ཕི་རི་ཀའི་མང་གཙོ་ཚོགས་པའི་གཙོས་འཛིན་དང་ཡུལ་དེའི་གྲོས་ཚོགས་འཐུས་མི་སྐུ་ཞབས་ Steenhuisen ལགས་དང་། Sandy Kalyan ལགས། དེ་བཞིན་ཨི་ཐི་ཀ་ཆབ་སྲིད་ཚོགས་པའི་གཙོ་འཛིན་དང་ཚོགས་པ་གསར་འཛུགས་གནང་མཁན་རྒྱལ་སྲས་ Mangosuthu Buthelezi མཆོག་གིས་གཙོས་པའི་རྒྱལ་ཁབ་དེིའི་གྲོས་ཚོགས་འཐུས་མི་ཁག་ཅིག་ནས་སྲིད་སྐྱོང་མཆོག་ལ་མཇལ་མོལ་ཡང་ཞུས་ཡོད་པ་རེད། ལྷག་ཏུ་གྲོས་ཚོགས་འཐུས་མི་ལྕམ་ Sandy Kalyan ལགས་ནི་སྔ་ལོ་བཞུགས་སྒར་དུ་བོད་མིའི་སྒྲིག་འཛུགས་ནས་གོ་སྒྲིག་ཞུས་ཆབ་སྲིད་ཀྱི་གལ་གནད་ཆེ་བའི་ལྔ་དང་ལྔ་བཅུའི་ཚོགས་འདུར་ལྷན་ཞུགས་གནང་མྱོང་ཡོད་པ་ཞིག་རེད། སྤྱིར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་ཐེངས་འདིའི་ལྷོ་ཨ་ཕི་རི་ཀའི་ནང་གི་གཞུང་འབྲེལ་ཕྱོགས་ཕེབས་དང་འབྲེལ། ལྷོ་ཨ་ཕི་རི་ཀའི་ daliy Mavirick གསར་ཁང་གི་བཅར་འདྲི་སྐབས་རྒྱ་གཞུང་གིས་དེང་སྐབས་འཛམ་གླིང་ཁྲོད་སྤེལ་བཞིན་པའི་འཛུགས་སྐྲུན་ལས་གཞི་དང་དཔལ་འབྱོར་སྟོབས་ཤུགས་རྒྱ་སྐྱེད་ཀྱི་ཐབས་བྱུས་དེའི་འོག་མ་འོངས་པར་ཨ་ཕི་རི་ཀ་དང་ཡོ་རོབ། དེ་བཞིན་ཨོ་སི་ཊོ་ལི་ཡ་ཚུད་ཉེན་ཡོད་པ་གསུངས་པ་མ་ཟད། ལྷག་ཏུ་སྲིད་སྐྱོང་མཆོག་གིས་དེ་སྔ་འཛམ་གླིང་མང་ཚོགས་དང་རྒྱལ་སྤྱིིའི་ཚོགས་སྒེར་ཁག་གི་རྒྱབ་སྐྱོར་ལ་བརྟེན་ནས་ལྷོ་ཨ་ཕི་རི་ཀ་དེ་མང་གཙོའི་རྒྱལ་ཁབ་ཞིག་ཏུ་བསྐྱར་གསོ་ཐུབ་ཡོད་པ་དྲན་སྐུལ་གནང་བ་དང་ཆབས་ཅིག ལྷོ་ཨ་ཕི་རི་ཀ་གཞུང་གི་ངོས་ནས་ཀྱང་བོད་ཀྱི་གནད་དོན་ཐོག་ལའང་རྒྱབ་སྐྱོར་གནང་སྐྱོང་ཡོང་བར་འབོད་སྐུལ་ཞུས་འདུག འདི་ག་རླུང་འཕྲིན་ཁང་ནས་ལྷོ་ཨ་ཕི་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་སུ་བཅར་འདྲི་ཞུས་པར་ཁོང་གིས་ཐེངས་འདིའི་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་དེ་ཡག་པོ་བྱུང་ཡོད་པ་དང་ལྷག་ཏུ་རྒྱ་ནག་གཞུང་ཚབ་ཁང་ནས་ངོ་རྒོལ་བྱས་པར་བརྟེན་སྲིད་སྐྱོང་མཆོག་གི་འཚམས་གཟིགས་དེ་ཁྱབ་བསྒྲགས་ཤུགས་ཆེ་བ་བྱུང་ཡོད་པ་གསུངས་སོང་།

ཉེ་ཆར་ཕྱི་ཟླ་ ༡༢ ཕྱི་ཚེས་ ༢༥ ཉིན་བོད་ནས་བྲོས་བྱོལ་གྱིས་ཨ་རིའི་ California མངའ་སྡེའི་ San Fransicco གྲོང་ཁྱེར་དུ་བདེ་འབྱོར་བྱུང་བ་འཇིགས་བྲལ་གློག་བརྙན་བཟོ་བསྐྲུན་པ་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལྷན་ཞུགས་ཐོག་ཨ་རིའི་གྲོས་ཚོགས་སུ་བོད་དོན་ཉན་ཞིབ་ཀྱི་ལས་རིམ་ཞིག་ཚོགས་གཏན་འཁེལ་འདུག ཉན་ཞིབ་ཀྱི་ལས་རིམ་དེ་ཨ་མི་རི་ཀའི་གྲོས་ཚོགས་ཀྱི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་གོ་སྒྲིག་ཐོག་གནངས་ཉིན་ཕྱི་ཚེས་ ༡༤ ཉིན་ཡུལ་དེའི་གྲོས་ཚོགས་ཀྱི་ཚོགས་ཁང་ཨང་ ༣༠༡ ནང་འཚོགས་ཀྱི་ཡོད་པ་དང་། སྐབས་དེར་ཁོང་ནས་ཨ་རིའི་གྲོས་ཚོགས་འཐུས་མི་དང་གནད་ཡོད་མི་ཚོར་འདས་པའི་ལོ་དུས་ནང་ཁོང་རྒྱ་གཞུང་གི་བཙོན་ཁང་དུ་མནར་གཅོད་ཇི་མྱངས་དང་། ལྷག་པར་དུ་བོད་གཙོ་གྱུར་གྱི་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་ཐོག་སྙན་གསེང་ཞུ་གནང་གི་ཡོད་པ་མ་ཟད། དེ་འབྲེལ་གྲོས་ཚོགས་འཐུས་མིའི་བཀའ་འདྲི་ཁག་ལ་ལན་འདེབས་གསལ་བཤད་ཀྱང་ཞུ་གནང་གི་ཡོད་པ་རེད། ཉན་ཞིབ་ཀྱི་ལས་རིམ་དེའི་ཆེད་དོན་གྲུབ་དབང་ཆེན་ལགས་ཉེ་ཆར་ཕྱི་ཚེས་ ༩ ཉིན་གྲོང་ཁྱེར་ San Fransicco ནས་ཨ་རིའི་རྒྱལ་ས་ Washington DC ནང་ཕེབས་ཡོད་པ་དང་། སྐབས་དེར་ DC མངལ་ཁུལ་གྱི་བོད་མི་རྣམས་ནས་ཁུལ་དེར་རྟེན་གཞི་བྱས་པའི་འབྲི་གུང་ཆོས་ཀྱི་ཉི་མའི་ཆོས་ཚོགས་སུ་ཁོང་ལ་ཕེབས་བསུའི་གསོལ་སྟོན་འདེགས་འབུལ་ཞུས་ཡོད་པ་དང་། སྐབས་དེར་ཁོང་ནས་ད་རེས་ཨ་རིའི་རྒྱལ་ས་མངའ་ཁུལ་གྱི་ས་གནས་བོད་མི་ཚོ་དང་ཐུགས་འཕྲད་བྱུང་བར་དགའ་ཚོར་ཆེན་པོ་བྱུང་ཞེས་གསུངས་ཡོད། གཞི་རྩའི་བོད་མི་གློག་བརྙན་བཟོ་བསྐྲུན་པ་དོན་གྲུབ་དབང་ཆེན་ལགས་ཀྱིས་ཕྱི་ལོ་ ༢༠༠༨ ལོར་བོད་ནང་གི་བོད་མི་ཚོར་དངོས་སུ་ཐུགས་འཕྲད་ཀྱིས་འཇིགས་བྲལ་ཞེས་པའི་གློག་བརྙན་ཞིག་བཟོས་རྗེས་རྒྱ་ནག་གཞུང་གིས་ཁོང་ལ་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག་འཛིན་བཟུང་བཙན་ཁྲིས་བྱས་ཏེ། ཕྱི་ལོ་ ༢༠༠༨ ནས་ ༢༠༡༤ བར་མི་ལོ་དྲུག་གི་རིང་བཙོན་འཇུག་ཁྲིམས་ཐག་བཅད་ཡོད་པ་དང་། ཕྱི་ལོ་༢༠༡༤ ལོ་མཇུག་ཏུ་ཁོང་བཙོན་གྲོལ་ཐོབ་ཡོད་ཀྱང་རྒྱ་གཞུང་གི་ལྟ་སྲུང་འོག་ལོ་གསུམ་རིང་ཆབ་སྲིད་ཀྱི་ཐོབ་ཐང་རྩ་བ་ནས་མེད་པར་གནས་དགོས་བྱུང་ཡོད།

ཨ་རིའི་ Ohio མངའ་སྡེ་ནང་སྐྱེས་འཚར་བྱེད་བཞིན་པའི་ཕ་རྒྱ་གར་དང་ཨ་མ་བོད་པ་ཡིན་པའི་ཕོ་གསར་ Aftab Karma Singh Pureval ལགས་འདི་ལོའི་ཨ་མི་རི་ཀའི་གྲོས་ཚོགས་འོག་མའི་ འཐུས་མིའི་འོས་མིར་བཞེང་རྒྱུ་ཡིན་པ་ཡོངས་བསྒྲགས་གནང་འདུག དེ་ཡང་ཟླ་བ་ ༡༢ ཚེས་ ༣༡ ཉིན་ཨ་རིའི་ Ohio མངའ་སྡེའི་གྲོང་ཁྱེར་ Cincinnati ནང་ Aftab Karma Singh Pureval ལགས་ཀྱིས་ས་གནས་མང་ཚོགས་རྣམས་ལ་འཚམས་འདྲིའི་གསུང་བཤད་དང་སྦྲགས། ཁོང་འདི་ལོ་ཨ་རིའི་མང་གཙོ་ཚོགས་པའི་མིང་ཐོག་བརྒྱུད་ཨོ་ཧེ་ཧོ་མངའ་སྡེ་ནས་ཨ་མི་རི་ཀའི་གྲོས་ཚོགས་འོག་མའི་འཐུས་མིའི་འོས་མིར་བཞེང་རྒྱུ་ཡིན་པ་ཡོངས་བསྒྲགས་གནང་ཡོད་པ་དང་། སྐབས་དེར་ཁོང་ནས་ཐེསང་འདིའི་གྲོས་ཚོགས་འཐུས་མིའི་འོས་མིར་བཞེང་རྒྱུར་ཐག་གཅོད་ལས་སླ་པོ་ཞིག་དང་སྔར་ནས་དམིགས་ཡུལ་ཡོད་པ་ཞིག་མིན་ནའང་དེང་སྐབས་སྲིད་འཛིན་སྐུ་ཞབས་ Donald Trump མཆོག་གི་སྲིད་གཞུང་ནས་མང་ཚོགས་ཀྱི་འཕྲོད་བསྟེན་ལྟ་སྐྱོང་གཙོས་མང་ཚོགས་ཀྱི་བདེ་དོན་ཐོག་ཕྱག་ལས་གནང་སྟངས་ལ་བསྒྱུར་བཅོས་གཏང་རྒྱུ་དང་། ལྷག་པར་དུ་ཨ་རིའི་ཆེ་མཐོང་ཁག་སྲུང་སྐྱོབ་གནང་རྒྱུ་རྒྱལ་ཁབ་འདིའི་མི་རབས་གསར་པ་ཚོས་འགན་བཞེས་ཐོག་ཁ་ཕྱོགས་གསར་བ་ཞིག་གི་ཐོག་བསྐྱོད་དགོས་གལ་ཡིན་སྟབས། ཁོང་གྲོས་ཚོགས་འཐུས་མིའི་འོས་མིར་བཞེངས་པ་ཡིན་ཞེས་གསུངས་འདུག གཞི་རྩའི་ད་ལྟ་རང་ལོ་ ༣༥ ཡིན་པ་ Aftab Karma Singh Pureval ལགས་ཀྱི་ཨ་མ་ལགས་ནི་བོད་ནས་རྒྱ་གར་ལ་སྐྱབས་བཅོལ་དུ་ཕེབས་རྗེས་རང་ཉིད་ཀྱི་བཟའ་ཟླ་རྒྱ་གར་བ་ཞིག་དང་ལྷན་དུ་ལོ་ངོ་ ༤༠ གོང་ཨ་རིའི་ Ohio མངའ་སྡེར་གནས་སྡོད་བྱེད་བཞིན་ཡོད་པ་དང་། Aftab Karma Singh Pureval ལགས་འདས་པའི་ལོ་དུས་ནང་ཨོ་ཧེ་ཧོ་མངའ་སྡེའི་མི་མང་སློབ་གྲྭ་དང་གཙུག་ལག་སློབ་གཉེར་ཁང་སོགས་སུ་ཆབ་སྲིད་ཚན་རིག་དང་། ཁྲིམས་ལུགས་རིག་པའི་ཐོག་སློབ་སྦྱོང་གནང་ཡོད་པ་མ་ཟད། ཕྱི་ལོ་ ༢༠༡༦ ལོར་ཁོང་ Ohio མངའ་སྡེའི་སྲིད་གཞུང་གི་ཁྲིམས་ཁང་དུ་ཕྱག་ལས་ཀྱང་གནང་མྱོང་འདུག བརྒྱུད་ལམ་ཁག་ཏུ་གནས་ཚུལ་སྤེལ་བར་ Aftab Karma Singh Pureval ལགས་ཀྱི་ཁ་གཏད་འོས་མི་དེ་ནི་རང་ལོ་ ༦༥ ཡིན་པ་ཨ་རིའི་སྤྱི་མཐུན་ཚོགས་པའི་ Steve Chabot ལགས་ཡིན་པ་དང་། ཨ་རི་མང་གཙོ་ཚོགས་པས་ Aftab Karma Singh Pureval ལགས་ལ་རྒྱབ་སྐྱོར་གནང་སྟངས་དང་འོས་བསྡུའི་གྲ་སྒྲིག་གི་ལས་རིམ་ལ་གཞིགས་ན་ Aftab Karma Singh Pureval ལགས་ལ་འོས་བསྡུའི་རྒྱལ་ཁ་ཐོབ་རྒྱུར་ཚོད་དཔག་ཆེན་པོ་གནང་བཞིན་འདུག རྩ་བའི་དངོས་གཞིའི་འོས་བསྡུ་དེའདི་ལོའི་ཟླ་ ༡༡ ཚེས་ ༦ ཉིན་ཡིན་པ་དང་། གལ་སྲིད་ Aftab Karma Singh Pureval ལ་རྒྱལ་ཁ་ཐོབ་ཚེ་ཁོང་ནི་བོད་ཀྱི་མི་རྒྱུད་ཡིན་པ་ཨ་རིའི་གྲོས་ཚོགས་འཐུས་མི་ཆགས་པ་ལོ་རྒྱུས་ཁྲོད་ཀྱི་ཆེས་ཐོག་མ་དེ་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ ཟླ་ ༢ ཚེས་ ༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བའི་དབུ་གཡབ་ཏུ་བོད་དང་ལ་དྭགས་ནས་ཕེབས་པའི་མི་གྲངས་བརྒྱ་ཕྲག་ཁ་ཤས་གཙོ་གྱུར་དད་ལྡན་ཁག་ཅིག་ལ་དམིགས་བསལ་མཇལ་ཁ་དང་བཀའ་སློབ་བསྩལ་སྐབས་མགོན་པོ་༸གང་ཉིད་མཆོག་གིས་གཞིས་ལུས་རྒྱ་ཆེའི་མི་མང་དེ་དག་ངོས་ཀྱིས་ནམ་ཡང་བརྗེད་ཀྱི་མ་རེད་ཅེས་བཀའ་བསྩལ་འདུག དཔལ་ལྡན་དགའ་ལྡན་ཕོ་བྲང་གི་དྲ་གནས་ཐོག་བཀའ་སློབ་སྤེལ་བར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་གིས་དེ་སྔ་ཆོས་རྒྱལ་ཚོའི་སྐུ་དུས་ནས་ང་ཚོ་བོད་གངས་ཅན་པ་ཞེས་མདོ་དབུས་ཁམས་གསུམ་གྱི་ཆིག་སྒྲིལ་གནས་ཡོད་པ་དང། གླང་དར་རྗེས་སུ་བོད་སིལ་བུར་ཆགས་ནས་གཅིག་སྒྲིལ་མེད་པར་ཁ་འཐོར་དུ་ཕྱིན་ཡོད་པ་རེད། འོན་ཀྱང་དེ་རིང་ཁ་སང་ཕྱོགས་གཅིག་ནས་བསམ་བློ་བཏང་ན་རྐྱེན་ངན་གྲོགས་ལ་ཤར་བ་ལྟར། རྒྱ་གུང་ཁྲན་གྱིས་བོད་རིགས་ཡོངས་རྫོགས་ལ་བོད་ཀྱི་སྐད་ཡིག་དང་། བོད་ཀྱི་ཆོས་དང་རིག་གཞུང་སོགས་ལ་དམ་དྲག་ཤུགས་ཆེན་པོ་བྱེད་སྐབས་ཆོལ་ཁ་གསུམ་གྱི་བོད་རིགས་ཡོངས་རྫོགས་རྡོག་ལ་དྲིལ་ནས་གནས་ཡོད་པ་རེད། དེར་བརྟེན་མདོ་སྨད་ཁུལ་ནས་ཡིན་ནའང་རེད། མདོ་སྟོད་ཁུལ་ནས་ཡིན་ནའང་རེད། དབུས་གཙང་ཁུལ་ནས་ཡིན་ནའང་རེད། གང་ལྟར་ང་ཚོ་བོད་རིགས་གཅིག་པའི་འདུ་ཤེས་འཛིན་རྒྱུ་དེ་ཧ་ཅང་གལ་ཆེན་པོ་རེད་ཅེས་ལམ་སྟོན་མཛད་འདུག ད་དུང་༸གོང་ས་མཆོག་གིས་དུས་ད་ལྟར་བར་འཛམ་གླིང་འདིར་བོད་ཅེས་བོད་ཀྱི་གནད་དོན་ཞིག་ཡོང་བསྡད་པ་དེ་དང་། ལྷགས་ཡོད་པ་ནི་བོད་རྒྱ་ཆེའི་མི་མང་གི་སྙིང་སྟོབས་དང་སེམས་ཤུགས་གཉིས་པོ་དེ་ཡིན་སྟབས། གཞིས་ལུས་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ་འགྱུར་བ་མེད་པར་བསྡད་པ་དེ་ངོ་མཚར་སྐྱེས་དགོས་པ་ཞིག་རེད། དེས་ན་གཞིས་ལུས་རྒྱ་ཆེ་མི་མང་ལ་ཐུགས་རྗེ་ཆེ་ཞུ་གནང་བ་དང་ཆབས་ཅིག གཞིས་ལུས་རྒྱ་ཆེ་མི་མང་གི་ངོས་ནས་སྔར་བཞིན་དུ་སེམས་ཤུགས་བསྐྱེད་པའི་ཐོག་ལ་ཤེས་ཡོན་ལྡན་པ་ཞིག་གི་ཐོག་ནས་སེམས་ཤུགས་མུ་མཐུད་ནས་གནས་ཐུབ་པ་ཞིག་ལ་བསམ་བློ་གཏོང་དགོས་ཞེས་བཀའ་བསྩལ་ཡོད། ལྷག་པར་དུ་མགོན་པོ་༸གང་ཉིད་མཆོག་གིས་ཁྱོད་རང་ཚོས་ངོས་ལ་ཕ་ཡུལ་དུ་ཡོང་རོགས་ཟེར་གྱི་འདུག ལས་སླ་བོ་བྱས་ཏེ་ཕ་ཡུལ་དུ་ཡོང་ཐབས་ཡོད་པ་མ་རེད། རྒྱ་ནག་གཞུང་གི་བཀའ་འཁྲོལ་མེད་ན་ངོས་རང་ག་འདྲ་ཞིག་ཡོང་དགོས་པ་རེད། འོན་ཀྱང་གཞིས་ལུས་རྒྱ་ཆེའི་མི་མང་དེ་དག་ངོས་ཀྱིས་ནམ་ཡང་བརྗེད་མི་ཡོང་། ངོས་རང་ལོ་ ༨༢ ལ་སླེབས་ཡོད་པ་དང་ ༨༣ ཟིན་གྲབས་ཡོད་པ་རེད། སྤྱིར་བཏང་ངོས་ཀྱི་གཟུགས་པོ་ཧ་ཅང་བདེ་བོ་ཡིན། རྒྱ་ནག་རང་གི་སྲིད་བྱུས་ལ་ག་ལེར་འགྱུར་བ་འགྲོ་བའི་རེ་བ་ཡོད་བསྡད་པ་ཞིག་རེད། ཁྱོད་རང་ཚོ་ཚང་མ་བློ་བདེ་བོ་དང་སེམས་སྐྱིད་པོ་བྱོས་ཞེས་བཀའ་བསྩལ་ཡོད། དེ་བཞིན་༸གོང་ས་མཆོག་གིས་རྡ་རམ་ས་ལར་ཁྱོད་རང་ཚོ་ངོས་ལ་ཐུག་ཏུ་ཡོང་ནས་༸རྒྱལ་བ་རིན་པོ་ཆེའི་ཞལ་མཇལ་སོང་། ཕྱག་དབང་རེག་སོང་ཞེས་པ་ཙམ་ལ་ཆོག་ཤེས་མ་བྱས་པར་ངོས་ནས་བརྗོད་པ་ལྟར། དངོས་ནས་མ་འོངས་པར་སངས་རྒྱས་པའི་ཆོས་ལ་དོ་སྣང་བྱེད་མཁན་ཞིག་ཡིན་ཚེ་བོད་ཀྱི་སྐད་ཡིག་ལ་མ་བསླབ་པར་ཐབས་མེད་པ་ལྟ་བུ་ཕལ་ཆེར་ཆགས་ཀྱི་ཡོད་པས་སོ་སོའི་སྐད་ཡིག་ལ་དོ་སྣང་བྱེད་དགོས་པ་དང་། སྐད་ཡིག་ཤེས་པ་ཙམ་གྱིས་མི་ཆོག་པར་སྐད་ཡིག་ནང་དུ་ཡོད་པའི་སངས་རྒྱས་པའི་ལྟ་གྲུབ་དང་ཚད་མ་རིག་པ་སོགས་ལ་ག་ཚོད་ཐུབ་ཐུབ་ཀྱིས་དོ་སྣང་དང་སློབ་སྦྱོང་བྱ་རྒྱུ་གལ་ཆེན་པོ་རེད། ཁྱོད་རང་ཚོའི་ཕྲུ་གུ་ཚོ་ཡང་དེང་དུས་ཀྱི་ཤེས་ཡོན་ཡོད་པ་དང་ཆབས་ཅིག་ང་རང་ཚོའི་མི་རིགས་རང་ཉིད་ལ་སྔ་མོ་ནས་ཡོད་པའི་ལུང་སྡེ་སྣོད་གསུམ་གྱི་དོན་དག་ལ་སློབ་སྦྱོང་བྱེད་ཐུབ་པ་ཞིག་བྱོས་ལམ་སྟོན་བཀའ་སློབ་བཀྲིན་ཆེ་བསྩལ་ཡོད། ༸གོང་ས་མཆོག་ནས་ལམ་སྟོན་གྱི་བཀའ་སློབ་སྩལ་རྗེས་སངས་རྒྱས་ཆོས་ཚོགས་མ་དང་། མ་ཎི་ཡིག་དྲུག་མ། ཐུབ་པའི་གཟུངས་སྔགས། སྒྲོལ་མའི་གཟུངས་སྔགས་སོགས་ཀྱི་ལུང་གནང་སྟེ་ཆོས་འབྲེལ་བཀའ་དྲིན་བསྩལ་འདུག