༸གོང་ས་མཆོག

དེ་རིང་ཟླ་ ༡༢ ཚེས་ ༢༠ ཉིན་གྱི་སྔ་དྲོར་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པ་ RSS ཡི་གཙོ་འཛིན་སྐུ་ཞབས་  Mohan Bhagwat མཆོག་གིས་དབུས་པའི་ཚོགས་པའི་དབུ་ཁྲིད་རྒན་གྲས་སྐུ་ཞབས་ Indresh Kumar ལགས་དང་ཚོགས་པའི་བྱང་ཕྱོགས་སྤྱི་ཁྱབ་པ་བཅས་ནས་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷན་མཇལ་ཞུས་སོང་།སྐུ་ཞབས་ Indresh Kumar ལགས་ཀྱིས་གསུངས་པར་གཞིགས་ན། མཇལ་ཁའི་སྐབས་སུ་༸གོང་ས་མཆོག་གིས་རྒྱ་གར་ནི་ཆོས་ལུགས་མཐུན་སྒྲིལ་ཐད་འཛམ་གླིང་ཡོངས་ལ་དམིགས་དཔེ་ལྟ་བུ་ཞིག་ཆགས་ཡོད་པ་བཞིན་རྒྱ་གར་གཞུང་མང་གི་ངོས་ནས་རང་ཉིད་ཀྱི་དམིགས་བསལ་ཁྱད་ཆོས་ཡོད་པ་དེ་གོང་འཕེལ་གནང་གལ་ཡིན་པར་བཀའ་སྩལ་ཡོད་འདུག     སྐབས་དེར་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པ་ RSS ཚོགས་པའི་གཙོ་འཛིན་མཆོག་ནས་ཀྱང་སྐབས་དེར་༸གོང་ས་མཆོག་ལ་རྒྱ་གར་གྱི་ངོས་ནས་ད་བར་བོད་མི་རྣམས་ལ་སྐྱིད་སྡུག་མཉམ་མྱོང་གནང་ཡོད་ལ། མ་འོངས་པར་དེ་ལྟར་མུ་མཐུད་གནང་རྒྱུའི་ཞལ་བཞེས་ཞུས་འདུགགཞི་རྩའི་སྔ་ལོར་རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ ༡༩ ཁྱབ་གདལ་ཆེས་ཆེར་སོང་བ་ནས་བཟུང་འཛམ་གླིང་ཁྱོན་ལ་སྒོ་རྒྱ་བསྡམས་པའི་གནས་སྟངས་རིམ་པ་བྱུང་བའི་ཁྲོད་དྷ་ས་བཞུགས་སྒར་༸རྒྱལ་བའི་ཕོ་བྲང་དུའང་མཇལ་ཁ་སོགས་ཡོངས་རྫོགས་རེ་ཞིག་བཀག་སྡོམ་གནང་ཡོད་ཀྱང་། ཉེ་བའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོང་སྤེན་པ་ཚེ་རིང་མཆོག་ལ་དངོས་སུ་བཞུགས་སྒར་༸རྒྱལ་བའི་ཕོ་བྲང་དུ་གཟིམ་ཆུང་མཇལ་ཁ་སྩལ་བ་དང་སྦྲགས་ཏེ་མཇལ་མོལ་མཛད་པ་དེ་ནི་རིམས་ནད་ཀྱི་ཛ་དྲག་གནས་སྟངས་དང་འབྲེལ་བའི་དམ་དྲག་རྗེས་ཀྱི་མཇལ་ཁ་ཆེས་ཐོག་མ་དེ་ཆགས་ཀྱི་ཡོད་པ་མ་ཟད། ༸གོང་ས་མཆོག་ནས་གནད་ཡོད་མི་སྣ་ཚོར་༸གོང་ས་མཆོག་དང་དངོས་སུ་ཞལ་མཇལ་ཞུ་རྒྱུའི་མཛད་འཆར་གྱི་ཁོངས་ནས་ཆེས་ཐོག་མ་དེ་སྲིད་སྐྱོང་མཆོག་ནས་དབུ་འཛུགས་གནང་ཡོད་པ་རེད།སྐུ་ཞབས་ Mohan Bhagwat མཆོག་བཞུགས་སྒར་དྷརྨ་སཱ་ལཱར་ཉིན་གྲངས་བཞིའི་རིང་ཕྱོགས་ཕེབས་གནང་བ་དང་བསྟུན་ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བཅས་ནས་ཁོང་ལ་འཚམས་འདྲི་ཞུ་བར་ཆེད་བཅར་ཞུས་ཡོད་པ་དང་། དེ་རིང་༸གོང་ས་མཆོག་དང་ལྷན་མཇལ་འཕྲད་ཞུས་གྲུབ་རྗེས་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་དང་སྤྱི་འཐུས་ཚོགས་གཙོ་མཆོག་བཅས་ནས་བཞུགས་སྒར་༸རྒྱལ་བའི་ཕོ་བྲང་དུ་སྐུ་ཞབས་ Mohan Bhagwat མཆོག་དང་སླར་ཡང་མཇལ་འཕྲད་གནང་ཡོད། སྐབས་དེར་སྐུ་ཞབས་ Bhagwat མཆོག་གིས་ RSS འདི་ནི་མི་མང་གི་ཚོགས་པ་ཞིག་ཡིན་པའི་ཆ་ནས་བོད་མིའི་ཆབ་སྲིད་ཀྱི་བཞེངས་ཕྱོགས་གང་ཡིན་པ་དེར་རྒྱབ་སྐྱོར་ཞུས་དང་ཞུ་བཞིན་ཡོད་ཅེས་གསུངས་འདུག་པ་དང་། སྲིད་སྐྱོང་མཆོག་གིས་དེ་རིང་གི་མཇལ་འཕྲད་ཐོག་སྐུ་ཞབས་ Bhagwat མཆོག་ལ་ལོ་རྒྱུས་ཀྱི་ཐོག་ནས་བོད་དེ་རང་བཙན་གཙང་མའི་རྒྱལ་ཁབ་ཡིན་པའི་གནད་དོན་ཁ་གསལ་འཁོད་པའི་ཕྱག་དེབ་ཞིག་ཕུལ་བ་དང་འབྲེལ་ཏེ་བོད་དོན་འཐབ་རྩོད་ཁྲོད་དབུ་མའི་ལམ་གྱི་སྲིད་བྱུས་ཐོག་ནས་མདུན་སྐྱོད་གནང་གི་ཡོད་པ་སོགས་སྙན་སེང་ཞུས་འདུག

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་མདོ་དྲན་པ་ཉེར་བཞག་གི་བཀའ་ཆོས་ཉིན་གཉིས་པ་སྩོལ་བཅོམ་ལྡན་འདས་ཀྱི་རྗེས་འབྲང་རྣལ་མ་ཡིན་མཁན་ཚོས་ཕན་ཚུལ་དབར་ཟུང་སྦྲེལ་ཐོག་ནས་སངས་རྒྱས་ཀྱི་བསྟན་པ་མི་ཉམས་གོང་འཕེལ་དང་ཉམས་པ་སོར་ཆུད་གནང་དགོས་གལ་ཡིན་པར་ལམ་སྟོན་སྩལ་སོང་། མགོན་པོ་༸གང་ཉིད་མཆོག་གིས་ཨིན་དྷི་ནེ་ཤཱི་ཡ། མཱ་ལེ་ཞི་ཡ། འབར་མ། ཤྲིལངྒ། ཐེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་པ་རྣམས་ལ་ཁ་སང་གི་མདོ་དྲན་པ་ཉེར་བཞག་གི་བཀའ་ཆོས་འཕྲོ་སྐྱོང་མ་མཛད་པའི་སྔོན་དུ་སངས་རྒྱས་པའི་ཆོས་འདི་མི་ལོ་ ༥༠༠༠ ཙམ་གྱི་རིང་ལ་གནས་རྒྱུ་ཡིན་པ་གསུངས་སྲོལ་ཡོད་པ་དང་ད་ཆ་ལོ་ཉིས་སྟོང་ལྷག་འགྲོ་མུས་ཁྲོད་ཆོས་ལུགས་མང་པོ་ཡར་རྒྱས་དང་ཉམས་རྒུད་ཀྱི་གནས་སུ་གྱར་ཡོད་ཀྱང་བོད་ཀྱི་སངས་རྒྱས་པའི་ཆོས་འདི་བརྟན་པོར་གནས་ཡོད་པར་བཀའ་སྩལ་བ་དང་སྦྲགས། ཉེ་བའི་ཆར་ནུབ་ཕྱོགས་ཀྱི་ཡུལ་གྲུ་ཁག་ཅིག་ནང་ལ་དེ་སྔ་སངས་རྒྱས་པའི་ཆོས་མེད་ས་ཁག་ནས་ནང་ཆོས་ལ་དམིགས་བསལ་དོ་སྣང་གང་ཙམ་གནང་བཞིན་པའི་མཚམས་འདིར་ང་ཚོ་བཅོམ་ལྡན་འདས་ཀྱི་རྗེས་འབྲང་རྣལ་མ་ཡིན་མཁན་ཚོས་ཕན་ཚུལ་གཅིག་གིས་གཅིག་ལ་གནས་ཚུལ་ཤེས་པའི་སྒོ་ནས་ཐུན་མོང་གིས་འཛམ་གླིང་འདིའི་ཐོག་གནས་པའི་སྟོན་པའི་སྤྱོད་ཚུལ་འདི་མི་ཉམས་གོང་འཕེལ་དང་ཉམས་པ་སོར་ཆུད་གནང་དགོས་གལ་ཡིན་པ་མ་ཟད། བོད་རྒྱ་ཧོར་གྱི་ཡུལ་གྲུ་ཁག་ཅིག་གི་ནང་བར་སྐབས་སངས་རྒྱས་ཀྱི་བསྟན་པ་ཉམས་ཡོད་པ་དེ་དག་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་དམིགས་ཏེ་མགོན་པོ་༸གང་ཉིད་མཆོག་གིས་ཐུགས་སྨོན་མཛད་མུས་ལྟར་ཆོས་གྲོགས་ཚོས་ཀྱང་དེའི་ཐོག་དགོངས་པ་བཞེས་རོགས་ཞེས་གཞེན་སྐུལ་མཛད་ཡོད། ལྷག་དོན་དེང་རབས་ཆོས་དད་ཡོད་མེད་ལ་ལྟོས་མེད་སངས་རྒྱས་པའི་ཆོས་ཀྱི་ནང་ནས་སེམས་ཁམས་རིག་པ་དང་ལྟ་གྲུབ་སྐོར་ལ་ཐུགས་སྣང་གནང་མཁན་ཇེ་མང་དུ་འགྲོ་བཞིན་པའི་དུས་མཚམས་འདིར་པཱ་ལི་དང་ལེགས་སྦྱར་གྱི་ཆོས་བརྒྱུད་འཛིན་མཁན་རྣམས་བཅོམ་ལྡན་འདས་ཀྱི་རྗེས་འབྲང་པ་གཅིག་གྱུར་ཡིན་པ་གཞིར་བཞག་ཐོག་ཕན་ཚུན་དབར་སྔར་ལྷག་འབྲེལ་བ་དམ་གཟབ་གནང་སྟེ་བགྲོ་གླེང་མང་ཙམ་གནང་ཐུབ་ན་ཕན་ཐོགས་ཆེན་པོ་ཡོད་པར་ལམ་སྟོན་བཀྲིན་ཆེ་བ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཆོས་འཕྲོ་སྐྱོང་མཛད་གྲུབ་མཚམས་སུ་ཆོས་ཞུ་བ་དགེ་སློང་རྣམས་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་ཆེ་བར་སྩོལ་སྐབས། བྷན་མར་ནས་ཡིན་པའི་དགེ་སློང་ཞིག་གིས་མགོན་པོ་མཆོག་ལ་དཀའ་རྙོག་དང་འབྲེལ་བའི་དོགས་འདྲི་ཞུས་པ་དང་འབྲེལ་ཏེ་དེར་ཁོང་ཁྲོའི་གཞན་དབང་དུ་མ་སོང་བར་དྲན་པ་ཉེར་བཞག་ཐོག་ནས་ཇི་ལྟར་གནང་དགོས་སམ་ཞེས་་བཀའ་འདྲི་ཞུས་པར་མགོན་པོ་མཆོག་གིས་མི་བདེ་བའི་གནས་སྟངས་བྱུང་འཕྲལ་དེ་འབྲེལ་གནས་ལུགས་ལ་ཞིབ་འཇུག་མཐིལ་ཕྱིན་པ་ཞིག་གནང་རྒྱུའི་གོ་སྐབས་ཐོབ་ཀྱི་ཡོད་པ་དེ་ནི་དཔལ་ནཱ་ལེནྡྲའི་ཆོས་བརྒྱུད་ཀྱི་རྒྱུན་སྲོལ་ཞིག་ཆགས་ཀྱི་ཡོད་ཅེས་བཀའ་ལན་སྩལ་ཡོད།

དེ་རིང་ཟླ་ ༡༢ ཚེས་ ༡༧ ཉིན་སྔ་དྲོའི་ཆུ་ཚོད་ ༨ ནས་ ༩ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་དྷི་ནེ་ཤཱི་ཡ། མཱ་ལེ་ཞི་ཡ། འབར་མ། ཤྲིལངྒ། ཐེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་པ་རྣམས་ལ་གཙོ་བོར་དམིགས་ཏེ་དྲ་ལམ་བརྒྱུད་མདོ་དྲན་པ་ཉེར་བཞག་གི་བཀའ་ཆོས་དབུ་འཛུགས་བསྐྱངས་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་དངོས་སུ་དབུ་འཛུགས་མ་མཛད་གོང་པ་ལིའི་ཆོས་བརྒྱུད་འཛིན་མཁན་དང་ལེགས་སྦྱར་གྱི་ཆོས་བརྒྱུད་འཛིན་མཁན་རྣམས་བཅོམ་ལྡན་འདས་ཀྱི་རྗེས་འབྲང་གཅིག་གྱུར་ཞིག་ཡིན་པ་དང་ལྟ་གྲུབ་མ་འདྲ་བ་ཡོད་པ་ནི་བཅོམ་ལྡན་འདས་སྐུ་དངོས་ཞལ་བཞུགས་པའི་སྐབས་སུའང་བྱེ་བྲག་སྨྲ་བའི་སྡེ་པ་བཅོ་བརྒྱད་ཀྱིས་མཚོན་པའི་རིམ་བཞིན་མདོ་སྡེ་པ་དང་སེམས་ཙམ་པ། དབུ་མ་བ་སོགས་བྱུང་ཡོད་པ་དང་། བཅོམ་ལྡན་འདས་ཀྱིས་རང་དབང་ཆ་ཚང་ང་ཚོར་སྤྲད་དེ་སརྒྱས་ཀྱི་བཀའ་ལ་དཔྱད་པ་བྱེད་དགོས་ཞེས་བཀའ་སྩལ་ཡོད་པ་ལྟར་སརྒྱས་ཀྱི་བཀའ་ལ་ཇི་ཙམ་གྱིས་དཔྱད་པ་གནང་བ་དེའི་ཚོད་ཀྱིས་ངེས་པ་འདྲེན་རྒྱུ་ཤུགས་ཆེ་རུ་འགྲོ་ངེས་ཡིན་སྟབས་དད་པ་ཙམ་གྱི་ཐོག་ནས་རྗེས་སུ་འབྲང་རྒྱུ་ཞིག་ཆགས་ཀྱི་མ་རེད་ཅེས་ལམ་སྟོན་བཀའ་དྲིན་ཆེ་བར་སྩལ་ཡོད།ད་ལྟའི་ཆར་མགོན་པོ་༸གང་ཉིད་མཆོག་གིས་གིས་སྤྱིར་འཛམ་གླིང་ཞི་བདེ་དང་སྒོས་སུ་ཆོས་ལུགས་མཐུན་སྒྲིལ་ཡོང་ཐབས་སུ་ཐུགས་བརྩོན་མཛད་བཞིན་ཡོད་སྐོར་བཀའ་སྩལ་བ་དང་། ཆབས་ཅིག་ཏུ་འཚེ་བ་མི་བྱ་རྒྱུ་དང་སེམས་པ་བཟང་པོ་བྱ་རྒྱུ། དེ་བཞིན་བྱམས་པ་དང་སྙིང་རྗེ་ཉམས་ལེན་བྱ་རྒྱུ་ནི་ཆོས་ལུགས་ཚང་མས་གསུང་བཞིན་པའི་བསླབ་བྱ་གཅིག་མཚུངས་ཤིག་ཡིན་པ་དང་། ལྷག་དོན་རྒྱ་གར་ལྟ་བུར་ཆ་མཚོན་ན་ལོ་ངོ་སུམ་སྟོང་གོང་ནས་འཚེ་མེད་ཞིབ་བ་དང་བྱམས་བརྩེའི་ལྟ་གྲུབ་ཡོད་པའི་རྒྱུ་མཚན་དུ་བྱས་ནས་རྒྱ་གར་ནང་ཆོས་ལུགས་མི་གཅིག་པ་དུ་མ་ཡོད་ཀྱང་ཆོས་ལུགས་ཕན་ཚུན་དབར་མཐུན་སྒྲིལ་གྱི་ཐོག་ནས་གནས་ཀྱི་ཡོད་སྟབས་དེ་ནི་མིག་དཔེ་འོས་པ་ཞིག་ཆགས་ཡོད་ཅེས་བཀའ་སྩལ་སོང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་སྩལ་གྲུབ་མཚམས་སུ་ཐེ་ལན་ཌི་དང་ཤྲི་ལངྒའི་དགེ་སློང་རྣམ་པས་དོགས་འདྲི་ཕུལ་དོན་བཞིན་ཤྲི་ལངྒའི་དགེ་སློང་ Narangodapaluwe Thero ལགས་ཀྱིས་ཤྲི་ལངྒའི་ནང་མི་འདས་གྲོངས་སུ་གྱུར་སྐབས་དུར་ཁྲོད་དུ་མདོ་དྲན་པ་ཉེར་བཞག་གསུང་འདོན་གནང་སྲོལ་ཡོད་ཀྱང་། དེང་གི་ཆར་དེ་ལྟར་གནང་གི་མི་འདུག་ཅེས་ཞུས་པ་དང་འབྲེལ་ཏེ་མགོན་པོ་༸གང་ཉིད་མཆོག་ནས་སྔགས་ཀྱི་ལམ་སྲོལ་བསྐྱར་གསོ་མཛད་རྒྱུ་དེ་དགོས་གལ་ཇི་ཙམ་གཟིགས་ཀྱི་ཡོད་དམ་ཞེས་བཀའ་འདྲི་དགོངས་སྐོར་ཞུས་པར་༸གོང་ས་མཆོག་གིས་མི་འདས་གྲོངས་སུ་ཕྱིན་སྐབས་མདོ་དྲན་པ་ཉེར་བཞག་འདོན་ཚེ་སརྒྱས་ཀྱི་མཚན་དང་ཆོས་ཚིག་མང་དག་ཅིག་བར་སྲིད་དུ་ཡོད་པའི་འདས་པོའི་རྣམ་ཤེས་ལ་ཐོས་རྒྱུར་ཕན་ཐོགས་ཡོད་པ་མ་ཚད་པར་ཤུལ་ལུས་ནང་མི་སྤུན་མཆེད་རྣམས་ནས་མདོ་དེ་ཐོས་ཚེ་སེམས་ཞི་བར་ཡོང་བ་ལ་ཕན་ཐོགས་ཆེན་པོ་ཡོད་པར་ལམ་སྟོན་བཀའ་དྲིན་ཆེ་བར་མཛད་ཡོད།

དེ་རིང་ཕྱི་ཚེས་ ༡༥ རེས་གཟའ་ལྷག་པ་ལྷག་དཀར་ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཅར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་མཇལ་མོལ་ཞུས་འདུགགཞི་རྩའི་འདས་པའི་ལོ་ངོ་གཅིག་དང་ཕྱེད་ཀ་ལྷག་གི་གོང་ནས་ཏོག་དབྱིབས་རིམས་ནད་ཁྱབ་གདལ་གྱི་ཛ་དྲག་གནས་སྟངས་ཀྱི་རྐྱེན་གྱིས་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ཡོངས་རྫོགས་དྲ་ཐོག་བརྒྱུད་ནས་སྐྱོང་བཞིན་ཡོད་པ་མ་ཟད་ཕྱི་ནང་གི་གནད་ཡོད་མི་སྣ་ཚོ་ལའང་དྲ་ཐོག་བརྒྱུད་ནས་མཇལ་མོལ་མཛད་ཀྱི་ཡོད་པ་རེད།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོང་སྤེན་པ་ཚེ་རིང་མཆོག་ལ་ད་རེས་དངོས་སུ་བཞུགས་སྒར་༸རྒྱལ་བའི་ཕོ་བྲང་དུ་གཟིམ་ཆུང་མཇལ་ཁ་སྩལ་བ་དང་སྦྲགས་ཏེ་མཇལ་མོལ་མཛད་པ་དེ་ནི་རིམས་ནད་ཀྱི་ཛ་དྲག་གནས་སྟངས་དང་འབྲེལ་བའི་དམ་དྲག་རྗེས་ཀྱི་མཇལ་ཁ་ཆེས་ཐོག་མ་དེ་ཆགས་ཀྱི་ཡོད་པ་རེད།བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་སུ་ཐེངས་འདིའི་མཇལ་མོལ་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་སྲིད་སྐྱོང་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་གཙོ་བོ་བོད་མིའི་སྒྲིག་འཛུགས་ཀྱི་ལས་དོན་སྐོར་སྙན་སེང་ཞུས་ཡོད་པ་དང་། ད་རེས་༸གོང་ས་མཆོག་དང་དངོས་སུ་ཞལ་མཇལ་ཞུ་རྒྱུའི་མཛད་འཆར་དབུ་འཛུགས་གནང་བ་དེ་ནི་གནད་ཡོད་མི་སྣ་ཚོ་ལ་དམིགས་པ་ཞིག་ཡིན་པར་གསུངས་སོང་། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོང་སྤེན་པ་ཚེ་རིང་མཆོག་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ཐུགས་འགན་བཞེས་པ་ནས་བཟུང་སྟེ་ད་བར་དྲ་ཐོག་བརྒྱུད་མཇལ་མོལ་ཐེངས་བཞི་ཙམ་མཛད་ཡོད་ཅིང་། སྲིད་སྐྱོང་མཆོག་གི་ངོས་ནས་མཇལ་དུས་སོ་སོར་འཛིན་སྐྱོང་བཀའ་ཤག་གི་མ་འོངས་ལས་དོན་བྱེད་ཕྱོགས་དང་བཀའ་ཤག་གསར་པའི་བཀའ་བློན་རྣམ་པ་ངོ་སྤྲོད་སྙན་སེང་སོགས་ཞུས་པ་མ་ཟད་མ་འོངས་ལས་དོན་བྱེད་ཕྱོགས་སོགས་ཀྱི་ཐོག་བཀའ་སློབ་ལམ་སྟོན་ཞུས་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མངའ་སྡེ་ཁག་ཅིག་གི་ནང་དུ་རླུང་འཁོར་འཚུབ་མའི་གོད་ཆག་ཕོག་པའི་རྐྱེན་གྱིས་ཁུལ་དེའི་མི་རྒྱུ་གཉིས་ཀར་ངལ་བ་ཆེས་ཆེར་འཕྲད་བཞིན་པར་བརྟེན་གོད་ཆག་ཕོག་མཁན་རྣམས་ལ་གདུང་སེམས་མཉམ་བསྐྱེད་དང་དཀའ་སྡུག་མྱོང་བཞིན་པ་རྣམས་ཀྱི་ཆེད་དུ་ཐུགས་སྨོན་མཛད་བཞིན་ཡོད་པར་བཀའ་སྩལ་འདུག༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲ་གནས་ཐོག་གནས་ཚུལ་སྤེལ་བར་གཞིགས་ན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཚེས་ ༡༣ ཉིན་ཨ་རིའི་སྲིད་འཛིན་སྐུ་ཞབས་ Joe Biden མཆོག་གི་མཚན་ཐོག་ལ་ཐུགས་གསོའི་བཀའ་ཡིག་ཞིག་སྩལ་འདུག བཀའ་ཡིག་དེའི་ནང་དུ་ཨ་རིའི་ Arkansas གཙོས་ Illinois དང་།  Kentucky དེ་བཞིན་ Missouri དང་། Tennessee བཅས་ཀྱི་མངའ་སྡེ་ཁག་ཅིག་གི་ནང་དུ་རླུང་འཁོར་འཚུབ་མའི་གོད་ཆག་འོག་འདས་གྲོངས་སུ་གྱུར་བའི་ཤུལ་ལུས་ནང་མི་རྣམས་དང་དཀའ་ངལ་འོག་ཚུད་པ་ཚང་མར་ཐུགས་གསོ་དང་ཐུགས་སྨོན་མཛད་འདུགམགོན་པོ་༸གང་ཉིད་མཆོག་གིས་ད་དུང་ཨ་རི་གཞུང་དང་དེ་བཞིན་མངའ་སྡེ་གཞུང་བཅས་ཀྱིས་མྱུར་སྐྱོབ་དང་ངལ་སེལ་གྱི་ཕྱག་ལས་ཁྱད་དུ་གནང་བཞིན་པར་བསྔགས་བརྗོད་དང་འབྲེལ། ༸གོང་ས་མཆོག་དེ་སྔ་མངའ་སྡེ་དེ་དག་ལས་ཁག་ཅིག་གི་ནང་དུ་ཆིབས་བསྒྱུར་མཛད་མྱོང་ཡོད་སྐོར་བཀའ་སྩལ་བ་ཆབས་ཅིག་ཏུ་ཁུལ་དེའི་མང་ཚོགས་རྣམས་ཀྱིས་གཙོས་པའི་རླུང་འཁོར་འཚུབ་མའི་དབང་གིས་ཚབས་ཆེའི་གནོད་སྐྱོན་ཕོག་པ་ཀུན་ལ་ཐུགས་གསོ་མཛད་འདུག

དེ་རིང་སྔ་དྲོ་ཕྱག་ཚོད་ ༩.༣༠ སྟེང་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཀྱིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་འཛོམས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་རྗེས་དྲན་དགའ་སྟོན་མཛད་སྒོ་ཐེངས་ ༣༢ པ་སྲུང་བརྩི་ཞུས་སོང་། དེ་རིང་གི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་པའི་ཕྱག་རོགས་བཀའ་བློན་ལྷན་རྒྱས་དང་ཁྲིམས་ཞིབ་པ་ཆེ་བའི་ལས་ཚབ་མཆོག དེ་བཞིན་སྤྱི་འཐུས་རྒྱུན་ལས་རྣམས་དང་ལྷན་ཁང་ཁག་གི་དྲུང་ཆེ་ཆུང་རྣམས། གཞན་ཡང་སྲི་ཞུ་བ་སོགས་ཆེད་ཕེབས་གནང་ཡོད་པ་དང་སྐབས་དེར་སྲིད་སྐྱོང་མཆོག་གིས་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་སུམ་བཅུ་སོ་གཉིས་འཁོར་བའི་དུས་ཚེ་ཁྱད་པར་ཅན་འདིར་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་མགོན་པོ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་༸གང་ཉིད་མཆོག་གི་མཛད་འཕྲིན་ལ་ཆེ་བསྟོད་ཞུས་བ་དང་༸གང་ཉིད་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེས་གཞིས་བཞུགས་བོད་རིགས་སྤུན་ཟླར་སེམས་ཤུགས་དང་སྙིང་སྟོབས་འཕར་མ་ཞིག་སྤར་ཐུབ་ཡོད་པ་དང་བཙན་བྱོལ་བོད་མིའི་སྤྱི་ཚོགས་སུའང་རྒྱལ་སྤྱིའི་ནང་གོམ་པ་སྤོ་སྟངས་ཀྱི་ཁ་ཕྱོགས་གསར་པ་ཞིག་རྙེད་ཐུབ་ཡོད་ལ། བོད་རྒྱའི་དཀའ་རྙོག་གཉིས་སྨན་དབུ་མའི་ལམ་ནས་སེལ་རྒྱུའི་སྲིད་བྱུས་འགྱུར་མེད་དུ་གནས་རྒྱུར་གཞུང་ལུགས་ཀྱི་རྒྱབ་རྟེན་ཁུངས་བཙན་ཞིག་བཞེངས་བསྐྲུན་ཐུབ་ཡོད་ཅེས་བཀའ་དྲིན་རྗེས་དྲན་ཞུས་གནང་སོང་། དེ་བཞིན་སྲིད་སྐྱོང་མཆོག་གིས་དེ་རིང་དུས་དྲན་གྱི་མཛད་སྒོ་འདིར་ང་ཚོས་༸གང་ཉིད་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་དུས་ཆེན་གྱི་དགའ་སྟོན་ལ་རོལ་ཆོག་ནའང་༸མགོན་པོ་མཆོག་ལ་དད་དམ་གཡོ་བ་མེད་པའི་གཞིས་བཞུགས་སྤུན་ཟླ་ཚོར་རྩ་བའི་བླ་མའི་༸སྐུ་པར་བཤམ་རྒྱུའི་རང་དབང་ཙམ་ཡང་མེད་པ་དང་། ད་དུང་དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་བོད་ནང་གི་བོད་མི་ཚོར་མཁར་དབང་དང་འདོད་དབང་། ཆོས་དང་དང་འགྲོ་འོང་། དེ་བཞིན་རང་མི་རིགས་ཀྱི་སྐད་ཡིག་སྦྱོང་སྤྱོད་སོགས་གཞི་རྩའི་འགྲོ་བ་མིའི་ཐོབ་ཐང་ལ་ལོངས་སུ་སྤྱོད་པའི་སྐལ་བ་ཙམ་ཡང་མེད་པའི་ཁར་རྒྱ་གཞུང་གིས་བོད་ཀྱི་རང་བྱུང་ཁོར་ཡུག་ལ་གཏོར་བཤིག་དང་བོད་མིའི་ངོ་བོ་རྩ་བརླག་གཏོང་བའི་གདུག་རྩུབ་སྲིད་བྱུས་ཀྱི་གནོན་བཙིར་ཉིན་མཚན་གཉིས་སུ་མྱོང་དགོས་ཀྱི་ཡོད་པ་ལུང་འདྲེན་གནང་སྟེ་བོད་རྒྱ་གཉིས་ཀར་གྱོང་ལས་ཁེ་མེད་པའི་རྒྱ་གཞུང་གི་ནོར་འཁྲུལ་སྲིད་བྱུས་དེ་རིགས་ཁུངས་འཁྱོལ་ཐབས་མེད་ངེས་ཡིན་སྟབས། བོད་མིའི་སྒྲིག་འཛུགས་ཀྱིས་གཉིས་སྨན་དབུ་མའི་ལམ་གྱི་འཇུག་ངོགས་ནས་རྒྱ་གཞུང་ལ་འབྲེལ་གཏུག་བརྒྱུད་བོད་རྒྱའི་དཀའ་ངལ་སེལ་རྒྱུར་འབད་བརྩོན་བྱ་རྒྱུའི་ཆོད་སེམས་གཞིར་བཞག་ཐོག་རྒྱལ་སྤྱིའི་ནང་བོད་དོན་ལས་འགུལ་རྒྱ་གང་ཆེར་སྤེལ་རྒྱུ་དང་དེ་མཚུངས་སུ་རྒྱ་གཞུང་གི་དྲག་གནོན་སྲིད་བྱུས་དེའི་་རིགས་མཚམས་འཇོག་དང་ཡོ་བསྲང་དགོས་པའི་ཡིག་ཆ་ཞིག་ཀྱང་རྒྱ་གཞུང་ལ་རིང་མིན་སྤྲོད་འཆར་ཡོད་ཅེས་གསུངས་སོང་། ལྷག་དོན་ཉེ་ལམ་སྐབས་ ༡༦ པའི་བཀའ་ཤག་གིས་བོད་དོན་དང་བླངས་ཞུ་གཏུག་ལས་འགུལ་དབུ་འཛུགས་ཀྱི་གསལ་བསྒྲགས་སྤེལ་ཟིན་པ་འགྲེལ་བརྗོད་དང་སྦྲགས། འཛམ་གླིང་ཡུལ་གྲུ་གང་སར་གནས་བཞུགས་གཞོན་་སྐྱེས་གཙོས་པའི་བོད་མི་མི་རེ་ངོ་རེ་ལས་འགུལ་འདིའི་ནང་མཉམ་ཞུགས་གནང་སྟེ་བོད་དོན་བདེན་མཐའ་གསལ་ཐབས་སུ་སོ་སོའི་སེམས་ཤུགས་དང་ནུས་རྩལ་འདོན་སྤེལ་ཡོང་བའི་འབོད་སྐུལ་ཞུས་ཡོད་ལ། བོད་རྒྱའི་དཀའ་རྙོག་འདི་གཙང་སེལ་མ་བྱུང་བར་དུ་བོད་དོན་བདེན་མཐའ་གསལ་བའི་ཐབས་ཤེས་ཡོད་རྒུ་རྩལ་སྤྲུགས་བྱ་རྒྱུ་ནི་བཅའ་ཁྲིམས་ཀྱིས་བཙན་བྱོལ་བོད་མི་ཚོར་བསྐུར་བའི་ལས་འགན་གལ་ཆེ་ཤོས་དེ་ཡིན་སྟབས། རང་དབང་ལུང་པར་གནས་འཁོད་བོད་མི་གང་མང་ཞིག་ལས་འགུལ་འདིར་མཉམ་ཞུགས་ཐུབ་པའི་ཡིད་ཆེས་ཡོད་ཅེས་གཞེན་སྐུལ་གནང་སོང་། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་༸གོང་ས་མཆོག་གི་ཀུན་ཁྱབ་འགན་འཁུར་གྱི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པར་བཀའ་དྲིན་རྗེས་སུ་དྲན་པའི་སྒོ་ནས་༸གང་ཉིད་མཆོག་གི་མཛད་འཕྲིན་ལ་ཆེ་བསྟོད་ཞུས་བ་དང་འབྲེལ། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་སྟབས། རྒྱ་གཞུང་གིས་བོད་ནང་བཙན་འཛུལ་ཧམ་བཟུང་བྱས་པར་ཞི་བས་བཅིངས་འགྲོལ་བཏང་ལུགས་ཀྱི་ལོ་ ༧༠ འཁོར་ཟེར་བའི་དུས་དྲན་སྲུང་བརྩི་བྱས་པ་དང་དེ་དང་འབྲེལ་བའི་རྒྱབ་ཤ་དཀར་པོ་ཟེར་བའི་དཔེ་དེབ་འགྲེམས་སྤེལ་གྱིས་མི་བདེན་རྫུན་སྒྲིག་དང་ལོ་རྒྱུས་ལ་འཁྱོག་བཤད་སྣ་ཚོགས་བྱས་ཡོད་པ་མ་ཟད། ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་རྒྱ་ནག་གི་རྒྱལ་ས་པེ་ཅིང་དུ་འཚོག་འཆར་ཡོད་པ་བཅས་ནི་དྲང་བདེན་དང་བཟང་སྤྱོད་མེད་པའི་བྱེད་སྒོ་སྤེལ་བ་འདི་རིགས་ལ་བོད་མི་མང་སྤྱི་འཐུས་ལྷན་ཚོགས་ཀྱིས་ངོས་ལེན་ནམ་ཡང་མེད་པ་མ་ཟད། རྒྱལ་སྤྱིའི་སྤྱི་ཚོགས་ནས་ཀྱང་དེ་ལུགས་བསམ་གཞིགས་དགོས་པའི་དུས་ལ་བབ་ཡོད་པ་ངོས་འཛིན་ཞུ་བཞིན་ཡོད་ཅེས་གསུངས་པ་དང་ཆབས་ཅིག རྒྱ་གཞུང་གིས་བོད་མི་རྣམས་རྒྱ་རིགས་ཀྱི་ངོ་བོར་བསྒྱུར་རྒྱུའི་སྲིད་བྱུས་ངན་པ་ལག་བསྟར་བྱེད་བཞིན་པ་དེ་དག་འཕྲལ་དུ་མཚམས་འཇོག་དགོས་པའི་འབོད་སྐུལ་ཞུས་སོང་། དེ་བཞིན་ཚོགས་གཙོ་མཆོག་གིས་རྒྱ་གཞུང་ནས་ཉེ་ཆར་ཡང་༸གོང་ས་མཆོག་༸སྐུ་སྒེར་གྱི་གནད་དོན་ཙམ་ལས་བོད་དང་འབྲེལ་བའི་གནད་དོན་གང་ཡང་མེད་པའི་ལོག་བཤད་མུ་མཐུད་བྱེད་བཞིན་ཡོད་པས་རྒྱ་གཞུང་གི་འགོ་ཁྲིད་རྣམས་ལ་བོད་དོན་ཐག་གཅོད་བྱ་་རྒྱུའི་འདུན་པ་དང་ཆོད་སེམས་བརྟན་པོ་མེད་པ་ཁ་གསལ་དུ་འགྲོ་བཞིན་ཡང་༸གོང་ས་མཆོག་གི་ཐུགས་བསྐྱེད་མཛད་འཕྲིན་དང་བོད་ནང་གི་བོད་མིའི་སེམས་ཤུགས་དང་ལ་རྒྱ་བཅས་ལ་བརྟེན་ནས་བོད་དོན་ལ་དོ་སྣང་བྱེད་མཁན་མང་དུ་འགྲོ་བཞིན་པའི་གོ་སྐབས་དང་བསྟུན་བཙན་བྱོལ་བོད་མི་རྣམས་ཀྱིས་བོད་དོན་འཐབ་རྩོད་ལ་རྒྱབ་སྐྱོར་སྔ་ལྷག་ཡོང་ཐབས་དང་བོད་མིའི་སྒྲིག་འཛུགས་ཀྱི་གནས་བབ་སྲ་བརྟན་གཏོང་ཐབས། བོད་ཀྱི་ཆོས་རིག་དང་བོད་མིའི་ངོ་བོ་མི་བརླག་པའི་ཐབས་ཤེས་གང་ཡོད་ཀྱིས་མདུན་བསྐྱོད་བྱ་དགོས་པའི་གཞེན་སྐུལ་གནང་སོང་། དེ་རིང་གི་མཛད་སྒོའི་ཐོག་བོད་ཀྱི་ཟློས་གར་ཚོགས་པ་ནས་རིག་གཞུང་འཁྲབ་སྟོན་དང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་གཅིག་ལ་ཞབས་ལོ་ ༢༥ འཁོར་བའི་གཟེངས་བསྟོད་ལེགས་སྐྱེས་དང་། དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་ནས་བོད་མིའི་སྒྲིག་ཕྱི་དྲིལ་ལས་ཁུངས་ཀྱི་ཕྱོགས་སྒྲིག་གནང་བའི་ཕྱག་དདག་དབུ་འབྱེད་དང་གཞན་ཡང་སྲིད་སྐྱོང་མཆོག་གིས་དབུས་འོས་བསྡུ་ལས་ཁུང་ནས་བཟོ་སྐྲུན་གནང་བའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེ་མོའི་ལས་རིམ་དང་འབྲེལ་བའི་གློག་བརྙན་ང་ཚོས་འོས་ནི་ང་ཚོའི་མ་འོངས་ཞེས་པ་བཅས་དབུ་འབྱེད་གནང་སོང་། གཞི་རྩའི་དེ་རིང་གི་ཉིན་མོ་དང་ཚོགས་པས་གོ་སྒྲིག་འོག་བོད་ཀྱི་ཟློས་གར་ཚོགས་པར་དེ་རིང་དང་སང་ཉིན་བཅས་ཉིན་གཉིས་རིང་ཧི་མཱ་ལ་ཡའི་དུས་སྟོན་ཐེངས་ ༢༥ པ་སྲུང་བརྩི་ཞུ་གནང་གི་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དེ་རིང་འགྲོ་བ་མིའི་ཐོབ་ཐང་ཉིན་མོར་བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་བསྡུའི་རེའུ་མིག་བསྐྱར་སྒྲིག་གནང་བའི་དྲ་ཚིགས་ཤིག་འདོན་སྤེལ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་འཇར་མི་ནིའི་སྲིད་བློན་གསར་པར་འདེམས་ཐོན་བྱུང་བར་དགའ་བསུའི་འཚམས་འཕྲིན་སྩལ་འདུག དེ་རིང་༸གོང་ས་༸སྐྱབས་གོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་གི་མཚན་ཐོག་ལ་ཕྱག་ཡིག་ཞིག་སྩལ་བའི་ནང་དུ་ཁོང་སྲིད་བློན་དུ་འདེམས་ཐོན་བྱུང་བར་འཚམས་འདྲི་སྩལ་བ་དང་སྦྲགས། ཡུ་རོབ་མཐུན་ཚོགས་ཀྱི་ནུས་སྟོབས་དང་བརྟན་ལྷིང་སྲ་བརྟན་ཡོང་རྒྱུའི་ཐད་ལ་འཇར་མི་ནིའི་སྲིད་བློན་གྱི་ཞབས་སྟེགས་ཐོབ་པ་དེ་ནི་འཛམ་གླིང་ཁྱོན་ཡོངས་ལ་རེ་བ་དང་སེམས་སྐུལ་སྐྱེད་གཞི་ཞིག་ཆགས་ཡོད་པར་བཀའ་སྩལ་བར་མ་ཟད། སྐུ་ཞབས་ Olaf ཁོང་གི་ཉམས་མྱོང་དང་དཔྱད་གསུམ་དག་པའི་དབུ་ཁྲིད་འོག་དཔལ་འབྱོར་དང་རང་དབང་། ཁྲིམས་ཀྱི་དབང་བསྒྱུར། མང་གཙོ། དེ་བཞིན་འགྲོ་བ་མིའི་ཐོབ་ཐང་བཅས་ཀྱི་རིན་ཐངསྲུང་མཁན་འཛམ་གླིང་སྣེ་ཁྲིད་ཀྱི་རྒྱལ་ཁབ་ཞིག་ལ་མུ་མཐུད་ནས་མདུན་བསྐྱོད་གནང་རྒྱུའི་ཐུགས་རེ་ཡོད་ཅེས་བཀའ་སྩལ་འདུག ༸གོང་ས་མཆོག་གིས་ད་དུང་འདས་པའི་ལོ་ངོ་བཅུ་ཕྲག་བཞིའི་ནང་དུ་མགོན་པོ་མཆོག་འཇར་མི་ནི་ནང་དུ་ཐེངས་མང་ཆིབས་བསྒྱུར་མཛད་རྒྱུའི་གོ་སྐབས་བྱུང་ཡོད་པའི་ཁྲོད་ཡུལ་དེའི་མི་མང་གི་བརྩེ་སེམས་དང་བསམ་བློ། ལྷག་པར་དུ་མགོན་པོ་མཆོག་གིས་ཆོས་ལུགས་མཐུན་སྒྲིལ་དང་འགྲོ་བ་མི་གཅིག་འགྱུར་གྱི་མཛད་རྗེས་ལ་མང་ཚོགས་ཀྱི་དོ་སྣང་དང་རྒྱབ་སྐྱོར་གནང་ཕྱོགས་བཅས་ཀྱིས་ཐུགས་འགུལ་ཆེན་པོ་ཐེབས་ཡོད་སྐོར་བཀའ་སྩལ་ཡོད། ༸གོང་ས་མཆོག་གིས་འཇར་མི་ནིའི་མང་ཚོགས་ཀྱིས་བོད་མིའི་རང་དབང་གྱི་ཐོག་གདུང་སེམས་མཉམ་བསྐྱེད་གནང་བར་ཐུགས་རྗེ་ཆེ་ཞེས་བཀའ་སྩལ་བ་དང་འབྲེལ། དེ་སྔའི་སྲིད་བློན་ལྕམ་ Angela Merkel མཆོག་གིས་ཀྱང་བོད་དོན་ལ་དམིགས་བསལ་དོ་སྣང་དང་ཐུགས་འཁུར་བཞེས་པརབ་སྔགས་བརྗོད་མཛད་འདུག དེའི་བར་ན་ཁ་སང་རྒྱ་གར་ནང་དུ་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་ Bipin Rawat ལགས་ཀྱིས་གཙོས་བདེ་སྲུང་མཐོ་རིམ་ལས་བྱེད་མི་སྣ་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་བྱུང་རྐྱེན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད་སྟབས། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་ཐུགས་གསོའི་གསུང་འཕྲིན་ཞིག་སྩལ་བའི་ནང་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་བི་པིན་རཱ་ཝ་ཊ་ལགས་ཀྱིས་གཙོས་ཁོང་དང་ལྷན་དུ་ཕྱོགས་བསྐྱོད་གནང་མཁན་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་དབང་གིས་འདས་གྲོངས་སུ་གྱུར་པའི་གནས་ཚུལ་གསན་པར་ཐུགས་ཕམ་དང་།ཁོང་རྣམ་པའི་ནང་མི་སྤུན་མཆེད་ཡོངས་ལ་ཐུགས་གསོ་སྩལ་བ་དང་ཆབས་ཅིག འདས་པོ་རྣམས་ལ་བསྔོ་སྨོན་མཛད་འདུག

དེ་རིང་ཕྱི་ཟླ་ ༡༢ ཚེས་ ༨ ཉིན་གྱི་སྔ་དྲོ་ཆུ་ཚོད་ ༩ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ཐོག་བརྒྱུད་སེམས་དང་སྲོག་ཚོགས་པས་གོ་སྒྲིག་ཞུས་པའི་ Embracing Hope, Courage and Compassion in Times of Crisis དུས་ཚོད་གཉན་འཕྲང་ཅན་གྱི་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དང་དུ་ལེན་པ་ཞེས་པའི་བརྗོད་གཞིའི་ཐོག་གི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ནས་བཟང་སྤྱོད་གོང་འཕེལ་དང་ཆགས་འཇིག་གི་གནས་སྟངས་ཁྲོད་བསམ་བློའི་འཁྱེར་གསོ། དེ་བཞིན་སེམས་ཁམས་རིག་པའི་རྣམ་གཞག་སོགས་ཀྱི་ཐོག་ལ་བཀའ་སློབ་ལམ་སྟོན་དང་བགྲོ་གླེང་ཐོག་ལྷན་ཞུགས་གནང་མཁན་གྱི་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་ཡོད།བགྲོ་གླེང་གི་ཐོག་མར་་སེམས་དང་སྲོག་ཚོགས་པའི་འགན་འཛིན་ལྕམ་ Susan Bauer ལགས་ཀྱིས་མགོན་པོ་༸གང་ཉིད་མཆོག་གིས་དབུས་པའི་བགྲོ་གླེང་ཐོག་ལྷན་ཞུགས་གནང་མན་རྒྱལ་སྤྱིའི་ཚན་རིག་མཁས་པ་དང་སློབ་དཔོན་ཡོངས་ལ་འཚམས་དྲི་ཞུས་ཟིན་མ་ཐག་སེམས་ཁམས་འཕྲོད་བསྟེན་གྱི་སློབ་དཔོན་ Elissa Epel ལགས་ཀྱིས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་སྐབས་སུ་མིའི་སེམས་ཁམས་ཀྱི་གནས་སྟངས་སྐོར་ལ་ཉམས་ཞིབ་གནང་བའི་གྲུབ་དོན་ཁག་ཅིག་འགྲེལ་བརྗོད་དང་སྦྲགས། ཡིད་བརྟན་མེད་པའི་གནས་སྟངས་རིགས་འཕྲད་སྐབས་ང་ཚོས་གདོང་ལེན་གང་འདྲ་གནང་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་འབྱུང་བའི་གནད་དོན་སོགས་ངེས་གཏན་མེད་པའི་གནས་སྟངས་ཁག་ཅིག་བྱུང་གི་ཡོད་ཀྱང་འཛམ་གླེང་ཐོག་ཡོད་པའི་དཀའ་ངལ་མང་པོ་ཞིག་ང་ཚོ་མི་རྣམས་ཀྱིས་ཕུགས་རྒྱང་རིང་པོའི་བསམ་བློ་མ་འཁོར་བ་དང་ང་འཛིན་གྱི་བསམ་བློ་ཆེ་བ་སོགས་ཀྱིས་བཟོས་པ་ཞིག་ཡིན་པར་བཀའ་འགྲེལ་དང་སྦྲགས་ཏེ་འགྲོ་བ་མི་རྣམ་པའི་རང་བཞིན་ལྷན་སྐྱས་སུ་བྱམས་བརྩེ་དང་གཞན་ཕན་གྱི་བསམ་བློ་ཡོད་པ་དེ་གོང་འཕེལ་ཐུབ་ཚེ་རང་བཞིན་གྱི་དཀའ་ངལ་ཉུང་དུ་གཏང་ཐུབ་པར་མ་ཟད་རང་ཉིད་སྒེར་གྱི་མི་ཚེ་སྐྱིད་པ་དང་ལྷག་དོན་སྤྱི་ཚོགས་དང་འཛམ་གླིང་སྤྱིའི་ཞི་བདེ་ལའང་ཕན་ཐོགས་ཡོང་ཐུབ་ཀྱི་རེད་ཅེས་བཀའ་སྩལ་ཡོད།མགོན་པོ་༸གང་ཉིད་མཆོག་ནས་ཞི་བདེ་ལྡན་པའི་འཛམ་གླིང་ཞིག་ཡོང་བར་ང་ཚོས་ད་ཡོད་ཤེས་ཡོན་ལམ་ལུགས་ནང་ལ་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པའི་བཟང་པོའི་ཆ་དེ་དག་ཆོས་ཀྱི་ངོ་བོའི་ཐོག་ནས་མིན་པར་ཤེས་བྱའི་ངོ་བོའི་ཐོག་ནས་སློབ་ཁྲིད་ཐུབ་གལ་ཡིན་པར་བཀའ་སྩལ་སོང་།བགྲོ་གླེང་ཐོག་མཉམ་ཞུགས་གནང་བ་ Arizona མངའ་སྡེའི་གཙུགས་ལག་སློབ་ཁང་གི་སེམས་ཁམས་རིག་པའི་སློབ་དཔོན་ Lani ལགས་ནས་འགྲོ་བ་མིའི་སེམས་ཚོར་རྣམ་གཞག་ཐོག་ཉམས་ཞིབ་གནང་བའི་གྲུབ་དོན་ཁག་ཅིག་འགྲེལ་བརྗོད་དང་སྦྲགས་ཏེ། ངེས་གཏན་མེད་པའི་དུས་སྐབས་འདིར་ཁོང་ཁྲོ་དང་དངངས་འཚབ་ཀྱི་སེམས་ཚོར་དེ་དག་བཏང་འཛིན་གནང་སྟངས་སྐོར་ལ་བཀའ་འདྲི་ཞུས་སོང་བར་མགོན་པོ་༸གང་ཉིད་མཆོག་གིས་ཁོང་ཁྲོ་སོགས་སེམས་ཚོར་དྲག་པོའི་ཆ་དེ་དག་གི་འདས་པའི་དུས་ཚོད་ནང་ལ་དམག་འཁྲུག་སོགས་ཀྱི་དོན་རྐྱེན་སྣ་ཚོགས་བཟོས་ཡོད་པར་བཀའ་སྩལ་དང་སྦྲགས། ད་ཆ་ང་ཚོའི་ངོས་ནས་ཆོས་དད་ཡོད་མེད་སོགས་ཀྱི་སྐད་ཆ་མེད་པར་ནང་སེམས་ཀྱི་ཞི་བདེ་ཐོག་ལ་དགོངས་པ་ཆེ་ཙམ་བཞེས་དགོས་པ་དང་ལྷག་པར་དུ་ང་ཚོ་ཚང་མ་གཅིག་ལ་གཅིག་བརྟེན་ཐོག་ནས་འཚོ་དགོས་པ་ཞིག་ཡིན་སྟབས་ང་དང་ཁོ་ཞེས་སོགས་དབྱེ་འབྱེད་ཀྱི་བསམ་བློ་མེད་པར་འགྲོ་བ་མི་གཅིག་འགྱུར་དང་གོ་ལ་གཅིག་འགྱུར་གྱི་གནས་བབས་ཐོག་ལ་དགོངས་པ་བཞེས་གལ་ཡིན་པར་ལམ་སྟོན་བཀའ་སྩལ་མཛད་ཡོད།མགོན་པོ་མཆོག་གིས་ཆགས་འཇིག་གི་དུས་སྐབས་འདིར་བསམ་བློ་གུ་དོག་པོ་བཏང་ནས་བཞུགས་ན་མ་འགྲིག་པའི་གནས་སྟངས་མང་པོ་མཐོང་རྒྱུ་ཡོད་སྟབས་དུས་རྟག་ཏུ་སེམས་མ་ཞུམ་པར་གནས་སྟངས་གང་འདྲ་ཞིག་འཕྲད་ཀྱང་གདོང་ལེན་གནང་རྒྱུ་ཡོད་པར་དགོངས་ཚེ་དེར་དགེ་མཚན་ཡོད་པ་སོགས་ཀྱི་ལམ་སྟོན་མཛད་པ་མ་ཟད། ལྷག་པར་དུ་མགོན་པོ་༸གང་ཉིད་མཆོག་ནས་སྤྱོད་འཇུག་གི་ལེའུ་ཞིག་ལུང་འདྲེན་མཛད་པ་འབྲེལ་ནས་གཞན་དོན་གྱི་བསམ་བློ་མེད་ན་སངས་རྒྱས་ཀྱི་གོ་འཕང་ལྟ་ཞོག མི་ཚེ་འདི་ཡང་སྐྱིད་པོ་ཞིག་ཡོང་ཐབས་མེད་ཅེས་བཀའ་སྩལ་ཡོད།  མཛད་རིམ་གྱི་མཐའ་མར་སེམས་དང་སྲོག་ཚོགས་པའི་འགན་འཛིན་ལྕམ་སྐུ་ Susan Bauer ལགས་ཀྱིས་མགོན་པོ་༸གང་ཉིད་མཆོག་གིས་ད་བར་སེམས་དང་སྲོག་གི་ལས་གཞིའི་ཐོག་ལ་བཀའ་སློབ་ལམ་བསྟོན་མཛད་པར་ཐུགས་རྗེ་ཆེ་ཞུས་པ་དང་ཆབས་ཅིག རིམས་ནད་ཀྱི་གནས་སྟངས་བཟང་དུ་སོང་ཚེ་ལོ་རྗེས་མར་བགྲོ་གླེང་གི་ཚོགས་འདུ་ཞིག་འཚོགས་ཐུབ་པའི་རེ་བ་ཡོད་ཅེས་གསུངས་སོང་ལ། ༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་སེམས་དང་སྲོག་ཚོགས་པས་གནང་བཞིན་པའི་ལས་དོན་ཁག་ལ་བསྔགས་བརྗོད་མཛད་ཡོད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོས་ཚོགས་གོང་མའི་ཚོགས་གཙོ་ཟུར་པ་སྐུ་ཞབས་ Bob Dole ལགས་དགོངས་པ་རྫོགས་པར་ཐུགས་གསོའི་གསུང་འཕྲིན་ཞིག་སྩལ་འདུག ཉེ་ཆར་ཟླ་བ་འདིའི་ཚེས་ ༥ ཉིན་ཨ་རིའི་གྲོས་ཚོགས་གོང་མའི་ཚོགས་གཙོ་ཟུར་པ་དང་ཨ་རིའི་སྲིད་འཛིན་འོས་འདེམས་ཁྲོད་ཞུགས་མྱོང་མཁན་སྐུ་ཞབས་ Bob Dole ལགས་དགུང་དགྲངས་ ༩༨ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་པ་དང་འབྲེལ་ནས་ཁ་སང་༸གོང་ས་༸སྐྱབས་མགོན་ཆེན་པོ་མཆོག་གིས་དམ་པ་དེ་ཉིད་ཀྱི་སྐུ་ཟླའི་མཚན་ཐོག་ལ་ཐུགས་གསོའི་གསུང་འཕྲིན་ཞིག་སྩལ་ཏེ། དམ་པ་ཁོང་ནི་ཨ་རིའི་གྲོས་ཚོགས་འཐུས་མི་ཚོའི་ཁྲོད་ནས་༸གང་ཉིད་ལ་རྒྱུས་མངའ་ཆེ་ཤོས་གྲས་ཤིག་དང་ནམ་རྒྱུན་དམ་པ་ཁོང་དང་མཇལ་འཕྲད་བྱུང་སྐབས་ཁོང་གིས་མི་མང་ཉམ་ཐག་དང་རང་དབང་དང་རིག་གཞུང་མི་ཉམས་རྒྱུན་འཛིན་སླད་འཐབ་རྩོད་བྱེད་བཞིན་པའི་བོད་མི་རྣམས་ལ་དངོས་ཡོད་ཀྱིས་བྱམས་སྐྱོང་གནང་མཁན་བོད་མི་མང་གི་གྲོགས་པོ་ཞིག་ཡིན་པར་གསུངས་ཏེ་དམ་པ་ཁོང་སྐུ་ཚེའི་འཕེན་པ་རྫོགས་པའི་གནས་ཚུལ་ཤེས་རྟོགས་བྱུང་བས་ཆེས་ཐུགས་ཕམ་བྱུང་ཞེས་བཀའ་སྩལ་འདུག དེབཞིན་མགོན་པོ་མཆོག་ནས་སྐུ་ཞབས་ཁོང་གིས་ལོ་ངོ་བཅུ་ཕྲག་ཁ་ཤས་རིང་མི་མང་ཆེད་དུ་བློས་བཏང་གིས་ཞབས་འདེགས་ཞུས་ཏེ་མི་ཚེ་དོན་སྙིང་ལྡན་པ་ཞིག་བསྐྱལ་ཡོད་པས་དམ་པ་ཁོང་ལ་མགོན་པོ་༸གང་ཉིད་མཆོག་ནས་གུས་བཀུར་ཞུ་སའི་ཨ་རིའི་རིན་ཐང་ཆེ་བའི་རང་དབང་དང་འདྲ་མཉམ། དྲང་བདེན་བཅས་ཀྱི་སྐུ་ཚབ་ལྟ་བུ་ཞིག་མཚོན་གྱི་ཡོད་པ་དང་དམ་པ་ཁོང་སྒེར་གྱི་ངོས་ནས་ཕྱག་རོགས་རྣམ་པ་ཚོ་དང་ལྷན་དུ་གནད་དོན་བྱེ་བྲག་པའི་ཐོག་དགོངས་ཚུལ་མི་མཐུན་པ་བྱུང་སྐབས་འགྲོ་བ་མི་གཅིག་གྱུར་ཡིན་པའི་འདུ་ཤེས་གཞིར་བཟུང་གིས་མིག་དཔེ་བསྟན་ནས་ཕན་ཚུན་བརྩི་བཀུར་ཞུ་གནང་གི་ཡོད་ཅེས་བཀའ་སྩལ་ཡོད། དམ་པ་དེ་ཉིད་ཀྱིས་གཙོས་ཤུལ་ལུས་ནང་མི་སོགས་ལ་ཐུགས་སྨོན་མཛད་འདུག གཞི་རྩའི་སྐུ་ཞབས་ Bob Dole ལགས་ནི་ཕྱི་ལོ་ ༡༩༢༣ ནང་(Russell) གྲོང་ཁྱེར་ནང་སྐྱེས་ཤིང་། ཕྱི་ལོ་ ༡༩༤༢་ལོར་འཛམ་གླིང་དམག་ཆེན་གཉིས་པའི་སྐབས་ཨ་རིའི་དམག་གི་ནང་ཞུགས་གནང་ཡོད་པ་དང་། ཕྱི་ལོ་ ༡༩༦༨ ནས་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་ཚོགས་གཙོ་དང་དེ་ནས་ཨ་རིའི་སྲིད་འཛིན་འོས་མིར་ཞུགས་ཡོད་པ་མ་ཟད། ཕྱི་ལོ་༡༩༩༧ ལོར་ཨ་རིའི་སྲིད་འཛིན་མཚན་ཐོག་གི་རང་དབང་གཟེངས་རྟགས་ཐོབ་ཡོད་པ་དང་། ཁོང་གིས་བོད་དོན་སྐོར་ལ་ཡུན་རིང་རྒྱབ་སྐྱོར་གནང་ཡོད་པ་མ་ཟད། ཕྱི་ལོ་ ༡༩༩༡ ལོར་༧གོང་ས་སྐྱབས་མགོན་ཆེན་པོ་མཆོག་ཨ་རིར་ཕེབས་ཏེཨ་རིའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་སྐབས། སྐུ་ཞབས་ཁོང་ནས་༧གོང་ས་མཆོག་དང་བོད་མི་མང་གིས་རང་དབང་འཐབ་རྩོད་ཆེད་མདུན་སྐྱོད་བྱས་ཡོད་པས། ཁོང་ཉིད་༧གོང་ས་མཆོག་དང་སྔ་རྗེས་ཐེངས་མང་ལ་མཇལ་འཕྲད་གནང་ཡོད་པ་རེད།