བོད།

རྒྱ་ནག་གཞུང་གིས་མང་ཚོགས་ཀྱི་གསང་རྒྱའི་ཐོབ་ཐང་དང་རང་དབང་ལ་གུས་བརྩི་རྩ་བ་ནས་མེད་པར་བཙན་དབང་གིས་ལྟ་སྲུང་འཕྲུལ་ཆས་བརྒྱུད་དེ་ཏོག་དབྱིབས་རིམས་ནད་འགོག་ཐབས་བྱེད་བཞིན་པ་མངོན་གསལ་གནང་འདུག ཁ་སང་ཕྱི་ཟླ་ ༤ ཚེས་ ༡ ཉིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་དེ་བཞིན་དུས་རྒྱུན་ནས་མང་ཚོགས་ཀྱི་སྒེར་གྱི་གསང་རྒྱའི་རང་དབང་དང་གསར་འགོད་རང་དབང་། རང་དབང་ཅན་གྱི་ཁྲིམས་རྩོད་ཐོབ་ཐང་། དེ་བཞིན་རང་དབང་ལྡན་པའི་སྤྱི་ཚོགས་སོགས་གང་ལ་ཡང་བརྩི་སྲུང་མེད་པར་མང་ཚོགས་ཐོག་ལྟ་སྲུང་ནན་པོ་བྱེད་མཁན་ཞིག་ཡིན་པར་མ་ཟད་ཤིན་ཅང་དུ་འདས་པའི་ལོ་ཤས་ནང་རྒྱ་གཞུང་གིས་མང་ཚོགས་ཀྱི་མོས་མཐུན་མེད་པར་ Biometrics སོགས་སྒེར་གྱི་གནས་ཚུལ་གསོག་འཇོག་བརྒྱུད་དེ་མང་ཚོགས་ནས་གཞུང་ལ་དགའ་ཞེན་ཇི་ཙམ་ཡོད་མེད་དང་འགྲུལ་བསྐྱོད་ཀྱི་རང་དབང་ཇི་ཙམ་སྤྲོད་དགོས་མིན་གྱི་ཐག་གཅོད་བྱེད་བཞིན་ཡོད་པ་སོགས་ལུང་འདྲེན་དང་སྦྲགས་ཏེ། ད་ལྟའི་ཆར་ཏོག་དབྱིབས་རིམས་ནད་ཀྱི་གནས་སྟངས་ཁྲོད་རྒྱ་གཞུང་གིས་ Health Code འམ་མང་ཚོགས་ཀྱི་འཕྲོད་བསྟེན་དང་འབྲེལ་བའི་ཚོན་ཁྲ་གསུམ་ཅན་གྱི་བརྙན་ཆས་སྤྱོད་དེ་གཉན་རིམས་ཀྱི་གནས་སྟངས་འོག་གང་ཟག་སུ་ཞིག་ཕྱིར་བསྐྱོད་ནས་ལས་ཀ་བྱེད་ཆོག་པ་དང་། སུ་ཞིག་ཟུར་འཇོག་བྱེད་དགོས་པ། དེ་བཞིན་བརྙན་ཆས་བརྒྱུད་མི་དེ་ས་ཚིགས་གང་དུ་ཡོད་པ་སོགས་ཀྱི་གནས་ཚུལ་ཁག་ཉེན་རྟོག་པར་སྤྲད་པ་སོགས་སྒེར་གྱི་རང་དབང་ལ་གུས་བརྩི་མེད་པ་དང་། དེ་བས་ལྟ་སྲུང་འཕྲུལ་ཆས་ཀྱི་ཐོག་ནས་གཉན་རིམས་འགོག་ཐབས་བྱེད་བཞིན་ཡོད་པ་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ད་དུང་རྒྱ་ནག་གིས་དྲྭ་རྒྱའི་མང་ཚོགས་ཁྲོད་གཞུང་གི་བྱེད་ཕྱོགས་དེར་བསམ་ཚུལ་ཇི་ཡོད་སྐོར་དང་འབྲེལ་ཏེ་ Zhihu ཞེས་པའི་རྒྱ་ནག་ནང་གི་སྤྱི་ཚོགས་གླེང་སྟེགས་ཐོག་མི་ཞིག་གིས་འཕྲུལ་ཆས་ཀྱི་ཐོག་ནས་མིར་དབང་བསྒྱུར་བྱེད་རྒྱུའི་དུས་དེ་ད་དུང་ཡང་ཉུང་མཐར་ལོ་ལྔ་བཅུ་འགོར་སྲིད་པ་དྲན་གྱི་ཡོད་ཀྱང་། རིམས་ནད་དེ་རྐྱེན་དུས་དེ་ཡང་མགྱོགས་པོ་བསླེབས་སོང་ཞེས་གསུངས་པ་དང་འབྲེལ། རྒྱ་གཞུང་གིས་འཕྲོད་བསྟེན་བརྙན་ཆས་དེ་ལྟར་སྤྱོད་བཞིན་པར་སྐྱོན་བརྗོད་གནང་བཞིན་པ་མངོན་གསལ་གནང་འདུག རྩ་བའི་བརྙན་ཆས་དེ་ནང་ད་བར་མི་ས་ཡ་ ༧༠༠ ཙམ་གྱི་གནས་ཚུལ་མཁོ་སྒྲུབ་བྱས་ཟིན་པ་རྣམས་ཀྱི་སྒེར་གྱི་གསང་བའི་ཨང་གྲངས་དང་ལྷན་དུ་ས་གནས་གང་དུ་བཞུགས་ཀྱི་ཡོད་པ། རིམས་ནད་ཕོག་པའི་མི་དང་མཉམ་གནས་གནང་མིན། ད་བར་ནད་རྟགས་འཐོན་ཡོད་མེད་སོགས་ཀྱི་གནས་ཚུལ་མཁོ་སྒྲུབ་བྱས་རྗེས། ཚོན་ཁྲ་ལྗང་ཁུ་དང་སེར་པོ། དེ་བཞིན་དམར་པོ་གང་རུང་ཤར་གྱི་ཡོད་པ་དང་། ཅི་སྟེ་ལྗང་ཁུ་ཤར་ཚེ་མི་དེ་ཕྱི་ལ་བསྐྱོད་ཆོག་པ་དང་། སེར་པོ་དང་དམར་པོ་ཤར་ཚེ་རང་ཁྱིམ་དུ་ཟུར་བཀག་ཐོག་བཞག་གི་ཡོད་པ་རེད་འདུག བརྙན་ཆས་དེས་མི་ས་ཡ་ ༧༠༠ ཙམ་ཡོད་པ་རྣམས་ལ་རང་དབང་ཇི་ཙམ་རག་གི་ཡོད་མེད་ཐོག་ཐག་གཅོད་བཞིན་ཡོད་པ་མ་ཟད་ས་ཁུལ་ཁག་ཅིག་ཏུ་མིའི་གདོང་རིས་ར་འཕྲོད་ཐུབ་པའི་འཕྲུལ་ཆས་སྤྱོད་དེ་རང་ཁྱིམ་དུ་བཞུགས་ཆོག་མིན་གྱི་ཐག་གཅོད་བཞིན་ཡོད་པ་རེད་འདུག

ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱིས་གྲོང་ཁྱེར་ཡོངས་ཀྱི་བོད་བརྒྱུད་ནང་བསྟན་གྱི་ཆོས་ལུགས་གནང་སྒོ་སྤེལ་ཡུལ་གྱི་གནས་སྟངས་དང་གཞི་ཁྱོན། ཤུགས་རྐྱེན། དེ་བཞིན་རིམས་ནད་སྔོན་འགོག་ཚོད་འཛིན་སོགས་ལ་གཞིགས་ཏེ་སྔོན་ལ་ཐག་རིང་དང་དེ་ནས་རྫོང་གྲོང་། དེ་རྗེས་ལྟེ་བའི་གྲོང་ཁྱེར་བཅས་ཀྱི་གོ་རིམ་ལྟར་ཞིབ་འཇུག་བྱས་རྗེས་ཕྱི་ཟླ་ ༣ ཚེས་ ༣༡ ཉིན་ནས་ལྷ་ས་གྲོང་ཁྱེར་གྱི་ཐག་རིང་དགོན་སྡེ ༢༡༤ ཙམ་བསྐྱར་དུ་སྒོ་འབྱེད་བྱེད་རྒྱུ་ཡིན་པར་བསྒྲགས་ཡོད་པ་དང་། ད་ལྟའི་འཆར་སེ་འབྲས་དགེ་གསུམ་གཙོས་པའི་ལྷ་སའི་ནང་གི་དགོན་སྡེ་ཁག་གཅིག་ད་དུང་སྒོ་ཕྱེ་རྒྱུ་མིན་པར་བསྒྲགས་འདུག གནས་ཚུལ་དེ་དང་འབྲེལ་ནད་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གིས་རྒྱལ་སྤྱིའི་ཐོག་རྒྱ་ནག་གི་མཚན་མཐོང་ཆེ་རུ་གཏོང་ཐབས་དང་ཏོག་དབྱིབས་ནད་རིམས་ནད་ཁྱབ་བརྡལ་གྱི་རྗེས་སུ་ཡང་འཚོ་བའི་གནས་སྟངས་རང་འཇགས་ཡིན་པར་སྟོན་ཐབས་སུ་ལྷ་ས་ཁུལ་གྱི་དགོན་སྡེ་ཁག་བསྐྱར་དུ་སྒོ་འབྱེད་བྱེད་ཀྱི་ཡོད་པར་བསྒྲགས་ཡོད་ལུགས་འགྲེལ་བརྗོད་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Matteo Mecacci ལགས་ཀྱིས་རྒྱ་ནག་གིས་བོད་ཁུལ་གྱི་དགོན་སྡེ་ཁག་བསྐྱར་དུ་སྒོ་འབྱེད་བྱས་པ་དེ་ནི་ནང་པའི་སྤྱི་ཚོགས་ལ་སེམས་གསོ་ཕྲན་ཙམ་བཏང་བ་ལྟ་བུ་ཞིག་ཡིན་ཀྱང་རྒྱ་ནག་གིས་ད་དུང་ནང་པའི་དགོན་སྡེ་ཁག་ལ་དམ་དྲག་སྟངས་འཛིན་བྱེད་རྒྱུར་འགྱུར་བ་གང་ཡང་ཕྱིན་མེད་ལུགས་འགྲེལ་བརྗོད་གནང་འདུག རྒྱ་ནག་གིས་བོད་ཁུལ་དུ་དགོན་སྡེ་ཁག་སྒོ་འབྱེད་བྱས་པ་དེ་ནི་རྒྱལ་སྤྱིའི་ཐོག་བོད་ཁུལ་དུ་ཞི་འཇགས་ཀྱི་འཚོ་བ་སྐྱེལ་གྱི་ཡོད་པའི་རྣམ་པ་ཕྱིར་སྟོན་ཐབས་གཙོ་བོ་ཞིག་ཡིན་པ་དང་། དོན་དུ་བོད་ཁུལ་དུ་བོད་རིགས་སློབ་ཕྲུག་དང་གཞུང་ཞབས་པ་རྣམས་དགོན་པ་གྲྭ་ཚང་ཁག་གི་ཆོས་ལུགས་ཀྱི་གནང་སྒོར་ཞུགས་མི་ཆོག་པར་སྟངས་འཛིན་བྱེད་བཞིན་པར་མ་ཟད་སྤྱི་ཡོངས་ཀྱི་ཆ་ནས་དགོན་སྡེ་ཁག་ལ་དམ་དྲག་བྱེད་བཞིན་པར་སྤྱིར་སྟངས་ཤིག་མིན་པར་ཡོངས་གྲགས་གནང་འདུག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གིས་བོད་ཁུལ་གྱི་དགོན་སྡེ་ཁག་ལ་སྟངས་འཛིན་བྱེད་བཞིན་པ་དེར་རྣམ་དབྱེ་མང་དུ་ཡོད་པར་འགྲེལ་བརྗོད་ཀྱིས་ཕྱི་ལོ་ ༢༠༡༡ ལོའི་རྒྱ་ན་ནག་གིས་དགོན་སྡེ་ཁག་ཡུན་རིང་དོ་དམ་བྱེད་ཕྱོགས་ཀྱི་སྲིད་བྱུས་ཟེར་བ་ཞིག་གཏན་འབེབས་བྱས་པ་བརྒྱུད་ནས་སྲིད་གཞུང་གིས་དགོན་པ་ཁག་ཏུ་མི་སྐྱ་སུམ་ཅུ་ལས་གྲུབ་པའི་དོ་དམ་ཚོགས་ཆུང་ཟེར་བ་ཞིག་རྩ་འཛུགས་ཀྱིས་དགོན་པའི་ཆོས་ལུགས་ཀྱི་གནང་སྒོ་སྤྱི་དང་དགོན་པའི་སྲོལ་རྒྱུན་གྱི་སློབ་གཉེར་གྱི་རིམ་པར་འགྱུར་བ་བཏང་བར་མ་ཟད། དགོན་པའི་ནང་དུ་སྲིད་གཞུང་གིས་རྩ་འཛུགས་བྱས་པའི་བསླབ་གཞི་གསར་པ་གཏན་འབེབས་བྱས་ཡོད་པར་ཡོངས་གྲགས་གནང་འདུག གཞན་ཡང་ལས་འགུལ་ཁང་གིས་ ༢༠༡༩ ལོར་ལྷ་སའི་སློབ་གྲྭ་ཞིག་གིས་བོད་རིགས་སློབ་མ་རྣམས་ཀྱི་དགུན་ཁའི་གུང་གསེང་དང་འབྲེལ་བའི་སྒྲིག་ཡིག་ཅིག་ཕྱི་ལ་བཀྲམས་པའི་ནང་བོད་རིགས་སློབ་མ་རྣམས་གུང་གསེང་སྐབས་སུ་དགོན་སྡེ་ཁག་གི་ཆོས་ལུགས་གནང་སྒོ་ཁག་ལ་ཞུགས་མི་ཆོག་པ་དང་། ཕ་མ་ཚོས་ཀྱང་བོད་རིགས་སློབ་མ་རྣམས་ཐག་རིང་དུ་ཁྲིད་མི་ཆོག་པའི་བཙན་བཀའ་བཏང་སྟེ་ཕ་མ་སུ་ཞིག་གིས་སྒྲིག་འགལ་ཚེ་མཇུག་འབྲས་ངན་པ་འཕྲད་སྲིད་པའི་ཉེན་བརྡ་བཏང་ཡོད་པ་ལུང་འདྲེན་གནང་འདུག རྩ་བའི་གསར་ལམ་ཁག་ཏུ་ཉིན་ཤས་གོང་ནས་གནས་ཚུལ་ཐོན་པ་ལྟར་ན། སྲིད་གཞུང་གིས་མང་ཚོགས་དང་བཟོ་ཚོང་ཁག་ལ་བཙན་བཀའ་བཏང་ནས་ཚོང་ལས་དང་བཟོ་ལས་བསྐྱར་དུ་སྒོ་འབྱེད་བྱས་ནས་མི་མང་གིས་རྒྱུན་ལྡན་ལྟར་ལས་ཞུགས་བྱེད་དགོས་པའི་ཉེན་བརྡ་གཏོང་བཞིན་པའི་ཁྲོད། ས་གནས་མི་མང་དང་བཟོ་ཚོང་ཁང་སོགས་ནས་སྲིད་གཞུང་གིས་སྲིད་བཙན་དབང་བྱས་པ་དེར་ཡ་ལན་སྤྲོད་ཐབས་མེད་པར་ལས་ཞུགས་བྱེད་ཀྱི་ཡོད་པ་སོགས་ཀྱི་གནས་ཚུལ་ཐོན་ཡོད་པ་ལྟར་ཁ་སང་ནས་བོད་ཁུལ་གྱི་དགོན་སྡེ་ཁག་ཀྱང་སྒོ་འབྱེད་གནང་རྒྱུའི་གསལ་བསྒྲགས་སྤེལ་བ་ཞིག་རེད་འདུག

བོད་ཆབ་མདོ་ས་ཁུལ་ཚ་བ་མཛོ་སྒང་རྫོང་སྟོང་འབར་ཡུལ་ཚོའི་དགུང་ལོ་༧༥ ཡིན་པའི་ཕ་འཇམ་དཔལ་རྡོ་རྗེ་ལགས་དང་ཁོང་གི་བུ་ཚེ་རིང་འགྱུར་མེད་གཉིས་སྔར་ལོའི་ལོ་མཇུག་ཏུ་རྒྱ་ནག་གིས་འཛིན་བཟུང་བྱས་འདུག གོང་གི་གནས་ཚུལ་དེ་དང་འབྲེལ་ནས། ལྷོ་ཕྱོགས་ཀྱི་དགེ་བཤེས་བྱམས་པ་ལགས་ཀྱིས་འདི་ག་རླུང་འཕྲིན་ཁང་ལ་གནས་ཚུལ་མཁོ་སྤྲོད་བྱས་པ་ལྟར་ན།  སྔར་ལོའི་ལོ་མཇུག་སྟེ།  དགའ་ལྡན་ལྔ་མཆོད་དང་ཉེ་བའི་སྐབས་སུ་རྒྱ་ནག་གིས་ཁོང་ཕ་བུ་གཉིས་ཀྱིས་ཁ་པར་བརྒྱུད་༧གོང་ས་མཆོག་སྐྱབས་མགོན་ཆེན་པོ་མཆོག་གི་གསུང་ཆོས་ཞུས་བ་དང་། དེ་བཞིན་རྒྱ་གར་དུ་ཡོད་པའི་ཁོང་གི་བུ་མོ་དང་འབྲེལ་བ་བྱས་པའི་དོགས་གཞིའི་འོག   སྔར་ལོ་༢༠༡༩་ལོའི་ཟླ་༡༢་བའི་ཟླ་མཇུག་ཏུ་ཁོང་ཕ་བུ་གཉིས་ཚ་བ་མཛོ་སྒང་རྫོང་གི་རྒྱ་ནག་གི་ཉེན་རྟོག་པས་ཁྱིམ་ནས་བཙན་ཁྲིད་ཀྱིས་མཛོ་སྒང་རྫོང་དུ་དོ་དམ་བཀག་ཉར་འོག་འདྲི་རྩད་བྱས་བ་བརྒྱུད་ནས།  ཕྱིས་སུ་ཕྱི་ཕྱོགས་སུ་འབྲེལ་བ་བྱས་མི་ཆོག་པའི་བཙན་དབང་གི་གན་ཡིག་ལ་མིང་རྟགས་བཀོད་དུ་བཅུག་པ་མ་ཟད།    སྲིད་གཞུང་གིས་ཁོང་ཕ་བུ་གཉིས་ཀྱི་ཁ་པར་བཙན་འཕྲོག་བྱས་ཏེ་འབྲེལ་ཡོད་ཀྱི་ཁ་པར་ཨང་གྲངས་རྣམས་ཀྱང་ཐོ་འགོད་བྱས་རྗེས་ཁོང་གཉིས་གློད་བཀྲོལ་བཏང་ཡོད་པར་ངོ་སྤྲོད་གནང་སོང་། གཞན་ཡང་ཁོང་གིས།  ཚ་བ་མཛོ་སྒང་དུ་ས་གནས་ཀྱི་ལོག་སྐད་ཅིག་བེད་སྤྱོད་ཆེན་པོ་གཏོང་གི་ཡོད་པར་བརྟེན།   དབུས་སྐད་ཡག་པོ་གོ་ཐུབ་ཀྱི་མེད་ནའང་། ཕ་ཡུལ་གྱི་ཡུལ་མི་རྒན་པ་རྣམས་ཀྱིས་༸གོང་ས་མཆོག་གི་གསུང་ཆོས་གོ་མིན་ལ་མ་བལྟས་པར་ཁ་པར་བརྒྱུད་ནས་གསུང་ཆོས་ཞུ་མཁན་མང་པོ་ཡོད་པ་མ་ཟད།   དད་པ་དམ་ཚིག་གི་དབང་གིས་མགོན་པོ་གང་གི་གསུང་ཆོས་ལ་ཉན་པ་ཡིན་ན་ཡིད་སེམས་ལྷོད་ལྷོད་དང་གཉིད་ཀྱང་མ་འདྲ་བ་ཞིག་ཁུག་གི་ཡོད་པར་འགྲེལ་བརྗོད་གནང་མཁན་ཡོད་ཚུལ་གསུངས་སོང་། གཞན་ཡང་ཁོང་གིས། ཕྱི་ལོ་ ༢༠༡༤ ནང་རྒྱ་ནག་གཞུང་གིས་རྒྱལ་མོ་དངུལ་ཆུའི་ཉེ་འགྲམ་དུ། གཏེར་ཁ་སྔོག་འདོན་གྱི་ལས་འཆར་གསར་འཛུགས་བྱས་པའི་སྐབས་སུ།  ཚ་བ་མཛོ་སྒང་གི་ཡུལ་མི་རྣམས་ཀྱིས་རང་ས་སྲུང་སྐྱོབ་ཀྱིས་ངོ་རྒོལ་ཤུགས་ཆེར་བྱས་བརྟེན་བོད་མི་ཁག་ཅིག་རྒྱ་ནག་གཞུང་གིས་འཛིན་བཟུང་བྱས་པ་དང་།  སྐབས་དེའི་ངོ་རྒོལ་གྱི་ཁྲོད། ཕོ་གསར་ཞིག་གིས་རང་ལུས་ལ་གྲིས་བརྒྱབ་ནས་རང་སྲོག་བཅད་ཡོད་པ་སོགས་ཀྱི་གནས་ཚུལ་བྱུང་བ་དང་། དེ་བཞིན་ཚ་བ་མཛོ་སྒང་དུ་བོད་མི་རྣམས་ཀྱིས་༸གོང་ས་མཆོག་གི་བཀའ་སློབ་ལམ་སྟོན་ལྟར་དོལ་རྒྱལ་བསྟེན་སྲོལ་བྱེད་རྒྱུ་མེད་པར་བརྒྱུད་སྐུལ་བྱེད་མཁན་མང་པོ་བྱུང་ཡོད་པའི་ཁྲོད།   རྒྱ་ནག་གིས་གྲོང་པ་ནང་གི་རྒན་པ་ཁག་ཅིག་འཛིན་བཟུང་གིས་ཁྲིམས་ཐག་བཅད་པ་སོགས་ཀྱི་གནས་ཚུལ་མང་པོ་བྱུང་ཡོད་སྟབས།   ད་ཆ་ཚ་བ་མཛོ་སྒང་དེ་རྒྱ་ནག་གི་མིག་ནང་གི་ཚེར་མ་ལྟ་བུ་ཞིག་ཏུ་ཡོད་པར་གསུངས་སོང་། གཞི་རྩའི་རྒྱ་ནག་གིས་ལོ་མང་པོའི་གོང་ནས་ཚ་བ་མཛོ་སྒང་དུ་དམ་དྲག་ཤུགས་ཆེན་བྱེད་བཞིན་པར་བརྟེན།  ཕྱི་ལོག་ཏུ་ཡོད་པའི་བོད་མི་རྣམས་ཀྱིས་རང་གི་ཡུལ་མི་རྣམས་ལ་ལོ་གསར་ལ་འཚམས་འདྲི་ཙམ་ཡང་ཞུ་ཐབས་མེད་པ་མ་ཟད།   ཁ་སང་དེ་རིང་ཏོག་དབྱིབས་ནད་དུག་ཁྱབ་བརྡལ་གྱི་སྐབས་འདིར་ཡུལ་མི་རྣམས་ཀྱི་གནས་སྟངས་ལ་རྒྱུས་ལོན་ཙམ་ཡང་བྱེད་ཐབས་མེད་པར་ལྷག་ཡོད་པ་མ་ཟད།  ཕ་ཡུལ་དུ་འབྲེལ་བ་བྱེད་དགོས་བྱུང་ན།  ལྷ་ས་དང་ཆ་མདོ་སོགས་བརྒྱུད་ནས་འབྲེལ་བ་བྱེད་བཞིན་པ་ལས།  ཐད་གར་ཚ་བ་རྫོང་སྒང་དུ་འབྲེལ་བ་བྱེད་ཐུབ་ཀྱི་མེད་པ་རེད་འདུག

ཆེས་ཛ་དྲག་གི་རང་བཞིན་ལྡན་པའི་རྒྱ་ནག་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་དང་འབྲེལ་ཏེ་ཁ་སང་རེས་གཟའ་མིག་དམར་ཉིན་ཨ་རི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་ཁག་ཅིག་གིས་རྒྱ་ནག་དམར་ཤོག་ཚོགས་པའི་བྱ་སྤྱོད་ལ་ངེས་པར་དུ་རྒྱལ་སྤྱིའི་རང་བཞིན་ལྡན་པའི་ཞིབ་དཔྱོད་གནང་དགོས་པ་དང་། ནད་ཡམས་དེ་རྐྱེན་གནོད་འཚེ་ཕོག་ཡུལ་རྣམས་ལ་གུན་གསབ་སྤྲོད་དགོས་པའི་གྲོས་ཆོད་བཞག་འདུག ཐེངས་འདིའི་གྲོས་ཆོད་ཆེད་འདོན་གནང་མཁན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Josh Hawley ལགས་ཀྱིས་རྒྱ་ནག་དམར་ཤོག་གཞུང་གིས་ནད་ཡམས་དེ་ངོ་རྟགས་ཆོད་པའི་ཉིན་དང་པོ་ནས་འཛམ་གླིང་ཡོངས་ལ་བསླུ་ཁྲིད་བཏང་ཡོད་པར་མ་ཟད། སྔ་ལོའི་ཕྱི་ཟླ་ ༡༢ ནང་ནད་ཡམས་དེ་ཛ་དྲག་གི་རང་བཞིན་ཡིན་པར་ཤེས་རྟོགས་བྱུང་ཡོད་ཀྱང་སྐབས་དེར་ཟུངས་ཁྲག་བརྟག་དཔྱད་གནང་མཁན་གྱི་སྨན་ཁང་གཙོས་སྨན་པ་རྣམས་ལ་སྦས་གསང་བྱེད་དགོས་པའི་བཀོད་ཁྱབ་བཏང་ཡོད་སྐོར་གསུངས་པ་དང་འབྲེལ། རྒྱ་ནག་དམར་ཤོག་ཚོགས་པར་རྒྱལ་སྤྱིའི་རང་བཞིན་ལྡན་པའི་ཞིབ་དཔྱོད་གནང་དགོས་པར་བརྗོད་འདུགདེ་བཞིན་གྲོས་ཚོགས་འཐུས་མི་སྐུ་ཞབས་ Hawley ལགས་དང་ལྷན་དུ་གྲོས་ཆོད་འདོན་གནང་མཁན་གྲོས་ཚོགས་འཐུས་མི་ལྕམ་ Elise Stefanik ལགས་ཀྱིས་ཀྱང་ཏོག་དབྱིབས་ཀྱི་ནད་ཡམས་དེ་དང་འབྲེལ་ནས་རྒྱ་གཞུང་གིས་སྦས་གསང་བྱས་འབྲས་སུ་ད་ཆ་ཨ་རིས་གཙོས་པའི་འཛམ་གླིང་ས་ཕྱོགས་གང་སར་ཛ་དྲག་གི་རང་བཞིན་དུ་གྱུར་ཡོད་སྐོར་གསུངས་པར་མ་ཟད་ཐེངས་འདིའི་གྲོས་ཆོད་བརྒྱུད་དེ་རྒྱ་ནག་གཞུང་གིས་བྱ་ངན་དང་རྒྱ་ནག་ནས་ཁྱབ་བརྡལ་བྱུང་བའི་ནད་ཡམས་དེ་རྐྱེན་གནོད་འཚེ་ཕོག་ཡུལ་དང་གྱོང་གུད་ཕོག་ཡུལ་གྱི་རྒྱལ་ཁབ་ཡོངས་ལ་གུན་གསབ་སྤྲོད་དགོས་པར་བརྗོད་འདུག ཕྱོགས་མཚུངས་གྲོས་ཚོགས་འཐུས་མི་སྐུ་ཞབས་ Jim Banks ལགས་ཀྱིས་ཀྱང་རྒྱ་ནག་གཞུང་གིས་ནོར་འཁྲུལ་གཅིག་ཙམ་མིན་པར་ཆེས་ཛ་དྲག་གི་ནོར་འཁྲུལ་མང་དག་ཅིག་བཟོས་ཡོད་པ་དང་། ལྷག་པར་དུ་ཏོག་དབྱིབས་རིམས་ནད་དེ་དང་འབྲེལ་ཏེ་རྒྱ་ནག་གཞུང་གིས་སྦས་གསང་བྱ་རྒྱུའི་སླད་གནས་ཚུལ་རྫུན་མ་ཁྱབ་བརྡལ་བྱས་ཡོད་པ་གཙོས་རྒྱལ་སྤྱི་འཕྲོད་བསྟེན་ལྷན་ཚོགས་དང་མཉམ་ལས་བྱ་རྒྱུ་ཁས་ལེན་མ་བྱས་པ་དང་། དེ་བཞིན་ཁུལ་དེར་ཡོད་པའི་སྨན་པ་དང་གསར་འགོད་པ་རྣམས་ལ་གསོ་མྱུལ་བྱས་པ་སོགས་ནོར་འཁྲུལ་མང་དག་ཅིག་བཟོས་ཡོད་སྟབས་རྒྱལ་སྤྱིའི་རང་བཞིན་ལྡན་པའི་ཞིབ་དཔྱོད་གནང་དགོས་པར་བརྗོད་འདུགགཞི་རྩའི་འཛམ་གླིང་འཕྲོད་བསྟེན་ལྷན་ཚོགས་ཀྱིས་ཁ་སང་འདོན་སྤེལ་གནང་བའི་སྙན་ཐོར་གཞིགས་ན་ད་བར་ཁྱོན་འཛམ་གླིང་གྱི་རྒྱལ་ཁབ་དང་ས་གནས་ ༡༩༦ ལ་རྒྱ་ནག་གྲོང་ཁྱེར་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་དེ་ཁྱབ་བརྡལ་བྱུང་ཡོད་པ་དང་། ད་བར་མི་གྲངས་ ༤༡༦༦༨༦ ལ་ནད་དེ་ཕོག་ཡོད་པར་མ་ཟད། མི་གྲངས་ ༡༨༥༨༩ འདས་གྲོངས་སུ་གྱུར་ཡོད་པར་བཀོད་འདུག

བོད་ཀྱི་རྒྱལ་ས་ལྷ་སའི་ཉེ་འཁྲིས་ལྷོ་ཁ་ས་ཁུལ་དུ་རྒྱ་ནག་དཔོན་རིགས་ཀྱི་འདྲ་པར་སྒྲིག་གཤོམ་དང་རྒྱ་ནག་གི་དར་དམར་ཕོན་ཆེར་འཕྱར་ཏུ་བཅུག་ནས་ས་གནས་བོད་མི་ཞིང་པ་ཚོས་དཔྱིད་ཀའི་དཔྱིད་རྨོད་མཛད་སྒོ་ཚོགས་འདུགཉེ་ཆར་རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་བར་གཞིགས་ན། རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ལྷོ་ཁ་ས་ཁུལ། ཤ་སོས་གྲོང་བརྡལ་མཚོ་རྒྱལ་གྲོང་ཚོའི་ནང་ས་གནས་བོད་མི་ཚོས་འདི་ལོའི་དཔྱིད་རྨོད་ཀྱི་མཛད་སྒོ་ཚོགས་ཏེ་བོད་མི་རྣམས་ནས་ལོ་གསར་བཞིན་གཟབ་འཕྱོར་ལེགས་པོ་སྤྲས་ཏེ་གྲོ་སོ་ཕྱེ་མར་དང་ཆང་སོགས་འཁྱེར་ཏེ་མ་འོངས་ལོ་ཏོག་ཡག་པོ་ཡོང་བར་རྟེན་འབྲེལ་གྱི་མཛད་སྒོ་ཚོགས་པའི་ཐོག་བོད་ཀྱི་ཐུན་མོང་མ་ཡིན་པའི་ལམ་སྲོལ་དང་མི་འདྲ་བར་རྒྱ་ནག་དཔོན་རིག་ཚོའི་འདྲ་པར་དང་རྒྱ་ནག་གི་རྒྱལ་དར་དམར་པོ་ཕོན་ཆེར་ནམ་མཁར་འཕྱར་ཏེ་དཔྱིད་རྨོད་ཀྱི་ཐོང་གཤོལ་དང་པོས་རྨོད་གཉའ་གཅོག་འགོ་འཛུགས་བཞིན་པའི་རྣམ་པ་གསལ་འདོན་བྱས་འདུགཨོ་སི་ཊོ་ལི་ཡར་བཅའ་བཞུགས་རྒྱ་ནག་ཉམས་ཞིབ་པ་སྤྱི་ཟུར་འབའ་བ་སྐལ་བཟང་རྒྱལ་མཚན་ལགས་སུ་གནད་དོན་དེའི་ཐོག་ཁོང་གི་གཟིགས་ཚུལ་ཇི་ཡོད་སྐོར་བཅར་འདྲི་ཞུས་པར་ཁོང་གིས་རྒྱ་གཞུང་གིས་བོད་པའི་ཐུན་མོང་མ་ཡིན་པའི་སྲོལ་རྒྱུན་གྱི་བྱེད་ཕྱོགས་དང་མི་འདྲ་བར་ཆབ་སྲིད་རང་ལ་དམིགས་ཏེ་ཞིང་ལས་ལྟ་བུའི་ལས་དོན་ནང་དུའང་ཆབ་སྲིད་ཀྱི་དམིགས་ཡུལ་འཛིན་བཞིན་ཡོད་པར་མ་ཟད། བོད་ཡིག་དང་རྒྱ་ཡིག་གཉིས་ཀའི་ཐོག་དེའི་སྐོར་གནས་ཚུལ་སྤེལ་བར་པར་འཇོག་སྟངས་བཅས་ཀྱི་ནང་ཆབ་སྲིད་ཀྱི་དམིགས་ཡུལ་ལ་གཞིགས་པའི་འདྲ་པར་དང་གནས་ཚུལ་བཀོད་ཕྱོགས་ལ་ཁྱད་པར་ཡོད་པ་མངོན་རྒྱུ་ཡོད་སྐོར་གསུངས་སོང་། དེ་བཞིན་བོད་ནང་གི་བེུད་རྩོམ་པ་པོ་ཚེ་རིང་འོད་ཟེར་ལགས་ཀྱིས་རང་གི་ངོ་དེབ་ཐོག་ལྷོ་ཁ་ཁུལ་གྱི་དཔྱིད་རྨོད་མཛད་སྒོའི་འདྲ་པར་སྤེལ་བ་དང་སྦྲགས། དཔྱིད་རྨོད་ཀྱི་མཛད་སྒོ་དེ་བོད་པའི་རིག་གཞུང་གི་ཆ་ཤས་ཡིན་ཀྱང་སྐར་མ་ལྔ་ཅན་གྱི་དར་དམར་འཕྱར་དུ་བཅུག་པ་དེ་ནི་རིག་གནས་གསར་བརྗེ་སྐབས་ཀྱི་བྱེད་ཕྱོགས་ཡིན་པར་གསུངས་འདུགརྩ་བའི་རྒྱ་ནག་གཞུང་གིས་དེ་སྔོན་བོད་འབྲི་རུ་ཁུལ་དུ་བོད་མིའི་ཁང་པའི་ཐོག་དར་དམར་བསྒྲེང་འཛུགས་བྱེད་དགོས་པའི་བཙན་དཀའ་བཏང་བར་ས་གནས་བོད་མིས་ངོ་རྒོལ་ཤུགས་ཆེར་གནང་བའི་གནས་ཚུལ་ཐོན་པ་དང་། དེ་བཞིན་དེ་སྔོན་ ༢༠༡༦ ལོར་བོད་དཀར་མཛེས་ཁུལ་དུ་བོད་པའི་ཆོས་ཕྱོགས་ཀྱི་མཛད་སྒོ་ཞིག་གི་ཐོག་རྒྱ་གཞུང་གི་དར་དམར་སྒྲེང་འཛུགས་བྱེད་དགོས་པའི་བཙན་བཀའ་བཏང་བར་བོད་མིས་དང་ལེན་མ་གནང་སྟབས་བྱེད་སྒོ་དེ་ཕྱིར་འཐེན་བྱས་པའི་གནད་དོན་བྱུང་བར་མང་ཚོགས་ཁྲོད་གཞུང་ལ་སྐྱོན་བརྗོད་ཤུགས་ཆེར་གནང་བའི་གནད་དོན་བྱུང་མྱོང་ཡོད་པ་རེད།

དེ་རིང་རྒྱ་ནག་གི་ས་ཡོམ་ལས་ཁུངས་ཀྱི་དྲྭ་བས་གནས་ཚུལ་སྤེལ་བར་དེ་རིང་སྔ་དྲོ་ཆུ་ཚོད་ ༩༌༣༣ ཐོག་བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་ཤུགས་ཚད་ ༥༌༩ ཅན་ཞིག་བརྒྱབས་འདུག གསར་འགོད་པས་དྷ་སར་གནས་སྡོད་ཕ་ཡུལ་དིང་རི་ནས་ཡིན་པའི་འབྲེལ་ཡོད་ཅིག་ལ་ཞལ་པར་ཐོག་ནས་བཀའ་འདྲི་ཞུས་པར་ཁོང་གིས་ས་ཡོམ་བརྒྱབ་པའི་གནས་ཚུལ་དེ་བདེན་པ་ཡིན་ཀྱང་། ད་ལྟའི་ཆར་ཁང་པ་ལོག་པ་དང་མི་ཕྱུགས་སོགས་ལ་གོད་ཆག་ཕོག་པའི་གནས་ཚུལ་གང་ཡང་བྱུང་མེད་པར་འགྲེལ་བརྗོད་གནང་སོང་།

ཁ་ཉིན་ཟླ་ ༣ ཚེས་ ༡༦ ཉིན་ཕ་ཡུལ་ལི་ཐང་ནས་ཡིན་པའི་བོད་ཀྱི་ཆབ་སྲིད་བཙོན་ཟུར་བཀྲ་ཤིས་ཕུན་ཚོགས་ལགས་རྒྱ་ནག་གིས་མནར་གཅོད་ཚད་མེད་བཏང་པར་བརྟེན་ནད་གཅོང་དུ་གྱུར་ནས་ཁ་སང་སྐུ་གྲོངས་འདུགབཀྲ་ཤིས་ཕུན་ཚོགས་ལགས་དང་ཡུལ་ལུང་གཅིག་པའི་འབྲས་སྤུངས་སྒོ་མང་གྲྭ་ཚང་གི་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས་རླུང་འཕྲིན་ཁང་ལ་གནས་ཚུལ་མཁོ་སྤྲོད་གནང་བར་བཀྲ་ཤིས་ཕུན་ཚོགས་ལགས་ནི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་གིས་ཕྱག་བཏབ་པའི་ཁམས་ནཱ་ལེན་དྲ་ཐེག་ཆེན་བྱང་ཆུབ་ཆོས་གླིང་གི་དགོན་པའི་དགེ་བསྐོས་ཡིན་པ་དང་། ཕྱི་ལོ་ ༢༠༠༢ ཟླ་ ༤ ཙམ་ལ་སྤྲུལ་སྐུ་བསྟན་འཛིན་བདེ་ལེགསས་མཆོག་རྒྱ་ནག་གིས་མ་ཉེས་ཁག་གཡོགས་ཀྱིས་འབར་རྫས་གས་གཏོར་དང་འབྲེལ་ནས་འཛིན་བཟུང་བྱེད་སྐབས་བཀྲ་ཤིས་ཕུན་ཚོགས་ལགས་དོན་རྐྱེན་དེ་དང་བྲེལ་བ་ཡོད་པར་བསྙད་དེ་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་ཁྲིམས་ཁང་གིས་ཁོང་སྨན་ཁང་ནས་ཁོང་འཛིན་བཟུང་བྱས་ཏེ་ལོ་བདུན་གྱི་རིང་བཙོན་འཇུག་ཁྲིམས་ཐག་བཅད་དེ་སྡུག་སྦྱོང་མནར་གཅོད་མང་དག་ཅིག་བཏང་ཡོད་པར་བརྟེན་མཐར་ནད་གཅོང་དུ་གྱུར་ནས་སྨན་ཁང་ནས་ཤི་གྲབས་བྱེད་སྐབས་ཕྱིར་ཡུལ་མིར་རྩིས་སྤྲོད་བྱས་ཡོད་ལུགས་གསུངས་སོང་། བཀྲ་ཤིས་ཕུན་ཚོགས་ལགས་རྒྱ་ནག་གིས་འཛིན་བཟུང་བྱེད་དགོས་པའི་རྒྱུ་རྐྱེན་གང་ཡིན་གསུངས་པར་ཕྱི་ལོ་ ༡༩༩༣ ལོ་ཉག་ཆུ་རྫོང་ནག་ནགས་ལས་ཁང་གིས་གཞུང་གི་ཐོབ་དབང་ཟེར་བའི་ཤིང་ནགས་གཅོད་འབྲེག་གི་ལས་འགུལ་ཞིག་ཨོ་ཐོག་སྡེ་དྲུག་གི་ས་གནས་སུ་སྤེལ་སྐབས་ཁོང་གིས་དབུ་ཁྲིད་པའི་ཡུལ་མི་རྣམས་ཀྱིས་བཀག་འགོག་ངོ་རྒོལ་གྱི་ལས་འགུལ་སྤེལ་ཡོད་པ་དང་། དུས་དེ་ནས་བཟུང་རྒྱ་ནག་གིས་ཁོང་འཛིན་བཟུང་བྱེད་རྩིས་བྱས་ཡོད་པ་བཞིན་ཕྱིས་སུ་སྤྲུལ་སྐུ་བསྟན་འཛིན་བདེ་ལེགས་དམ་པ་མཆོག་དང་འབྲེལ་ཡོད་ཀྱི་མི་མང་པོ་རྒྱ་ནག་གིས་འཛིན་བཟུང་བྱས་པ་ལྟར་བཀྲ་ཤིས་ཕུན་ཚོགས་ལགས་ཀྱང་གས་རྫས་ཀྱི་དོན་རྐྱེན་དང་འབྲེལ་བ་ཡོད་པར་བསྙེད་ནས་འཛིན་བཟུང་བྱས་པ་ཞིག་ཡིན་སྐོར་ངོ་སྤྲོད་གནང་ཡོད།

ཨ་རིའི་ནང་ལོ་ལྟར་ Tibet lobby day འམ་ཨ་རི་གྲོས་ཚོགས་འཐུས་མིར་བོད་དོན་ཞུ་གཏུག་ལས་འགུལ་ཞིག་གོ་སྒྲིག་གནང་བཞིན་པ་ལྟར་ཉེ་ལམ་ཕྱི་ཚེས་ ༡༢ ཉིན་རྒྱལ་སྤྱིའི་བོད་དོན་ལས་འགུལ་ཁང་དང་བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་ཁང་བཅས་ཀྱིས་གསལ་བསྒྲགས་ཤིག་སྤེལ་བར་འདི་ལོའི་བོད་དོན་ཞུ་གཏུག་ཉིན་མོ་དེ་བདུན་ཕྲག་རྗེས་མའི་ཕྱི་ཚེས་ ༢༣ དང་ ༢༤ བཅས་ཉིན་གྲངས་གཉིས་ཀྱི་རིང་ཨ་རིའི་རྒྱལ་ས་ Washington DC དུ་གྲོས་ཚོས་འཐུས་མི་དང་འབྲེལ་ཡོད་ལས་བྱེད་རྣམས་ལྷན་འཛོམས་ཐོག་འཚོགས་གཏན་འཁེལ་ཡོད་ཀྱང་ཨ་རི་གཞུང་གིས་ཕྱི་ཟླ་ ༤ ཚེས་ ༡ བར་ཨ་རི་གྲོས་ཚོགས་ཀྱི་གཙོས་གྲོས་ཚོགས་ཀྱི་ལས་ཁུངས་ཁག་ཏུ་མི་མང་བཅར་རྒྱུ་རེ་ཞིག་སྒོ་རྒྱག་པའི་གནས་ཚུལ་ཐོན་ཡོད་སྟབས། དྲྭ་ལམ་བརྒྱུད་དེ་བོད་དོན་ཞུ་གཏུག་ལས་འགུལ་འཚོགས་རྒྱུ་ཡིན་པར་གནས་ཚུལ་སྤེལ་འདུགའཕྲོད་བསྟེན་སྔོན་འགོག་དང་བདེ་འཇགས་སྲུང་སྐྱོབ་ཐོག་ནས་བོད་དོན་ཞུ་གཏུག་ཉིན་མོ་དེ་ཨ་རིའི་རྒྱལ་ས་ Washington DC ནང་འཚོགས་མི་དགོས་པར་ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་དང་འབྲེལ་ཡོད་ལས་བྱེད་དང་ལྷན་དུ་དྲྭ་ལམ་བརྒྱུད་དེ་འཚོགས་རྒྱུ་ཡིན་པ་བཀོད་འདུག་པ་དང་། ཐེངས་འདིའི་ཞུ་གཏུག་ཉིན་མོར་གཙོ་བོ་དོན་ཚོན་གསུམ་ཅན་གྱི་དགོས་འདུན་ཞིག་ཆེད་བཏོན་གནང་རྒྱུ་ཡིན་སྐོར་དང་། དེ་ཡང་འདི་ལོའི་ཕྱི་ཟླ་དང་པོའི་ནང་ཨ་རི་གྲོས་ཚོགས་འོག་མའི་ནང་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་མང་མོས་ཀྱིས་གཏན་འབེབས་གནང་བ་ལྟར་ཁྲིམས་འཆར་དེ་གང་མགྱོགས་གྲོས་ཚོགས་གོང་མར་གཏན་འབེབས་གནང་དགོས་པ་དང་། ཨ་རི་སྲིད་འཛིན་མཆོག་གིས་དེར་མཚན་རྟགས་བསྐྱོན་ཏེ་ཁྲིམས་གཞིར་གཏན་འབེབས་ཡོང་ཐབས་གནང་དགོས་པའི་འབོད་སྐུལ་ཞུ་དགོས་པ། དེ་བཞིན་ཨ་རི་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་གིས་འདོན་སྤེལ་གནང་བའི་སྙན་ཐོར་གཞིགས་ཏེ་བོད་མིའི་ཆོས་དད་རང་དབང་གཙིགས་ཆེར་འཛིན་ཐོག་བོད་ཀྱི་ཆབ་སྲིད་བཙོན་པ་དག་ལ་རྒྱབ་སྐྱོར་གནང་རྒྱུ་གཙོས་ཨ་རིའི་གྲོས་ཚོགས་འཐུས་མི་རྣམས་ནས་རྒྱ་ནག་གི་སྲིད་བྱུས་དང་འབྲེལ་བའི་བགྲོ་གླེང་གི་གོ་སྐབས་ནམ་བྱུང་ལ་བོད་དོན་གླེང་སློང་གནང་རྒྱུ་དང་ལྷག་པར་དུ་རྒྱ་ནག་གཞུང་གི་གཞུང་འབྲེལ་མི་སྣ་ནམ་ཐུག་ལ་བོད་དོན་གླེང་སློང་གནང་དགོས་པའི་ཞུ་སྐུལ་གནང་དགོས་པ། གཞན་ཡང་ཨ་རིའི་སྲིད་གཞུང་གིས་བོད་ཀྱི་གནད་དོན་དང་འབྲེལ་བའི་བྱ་གཞག་གི་ཆེད་དུ་ད་བར་རོགས་དངུལ་མུ་མཐུད་གནང་བཞིན་ཡོད་པ་ལྟར། ཕྱི་ལོ་༢༠༢༠ ལོར་གནང་བའི་རོགས་དངུལ་གྱི་ཚད་གཞི་ལྟར་ཕྱི་ལོ་ ༢༠༢༡ ལོར་དེ་ལྟར་མུ་མཐུད་གནང་སྐྱོང་ཡོང་བའི་རེ་སྐུལ་བཅས་དོན་ཚན་གསུམ་ཆེད་འབུལ་ཞུས་འདུགའདི་ལོའི་བོད་དོན་ཞུ་གཏུག་ཉིན་མོ་འཆར་ཉེ་དང་བསྟུན་ཉེ་ཆར་ཨ་རིའི་གྲོས་ཚོགས་གོང་མའི་འཐུས་མི་སྐུ་ ཞབས་ Jim Mcgovern ལགས་དང་སྐུ་ཞབས་ Marco Rubio ལགས་རྣམ་གཉིས་ནས་བརྙན་ཐུང་བརྒྱུད་བསྒྲགས་གནང་འདུག་པ་དང་། ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་དང་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་ཚོགས་གཙོ་སྐུ་ཞབས་ Jim Mcgovern ལགས་ཀྱིས་བོད་དོན་ཞུ་གཏུག་ཉིན་མོ་དེ་ནི་བོད་དོན་ཞུ་གཏུག་གནང་རྒྱུའི་ཆེས་གོ་སྐབས་བཟང་ཤོས་ཤིག་ཡིན་པར་ངོ་སྤྲོད་གནང་བ་དང་འབྲེལ། ལོ་ཤས་ནས་བཟུང་བོད་དོན་ཞུ་གཏུག་བརྒྱུད་དེ་བོད་མིར་ཐུགས་ཕན་ཆེན་པོ་གསོས་ཡོད་པ་དང་། ལྷག་པར་དུ་ཕྱི་ལོ་ ༢༠༡༨ ལོར་དེ་སྔ་ཁོང་གིས་ཆེད་བཏོན་གནང་བའི་ Reciprocal Access to Tibet Act ཞེས་པའི་ཁྲིམས་འཆར་དེ་ཁྲིམས་གཞིར་གཏན་འབེབ་གནང་བ་ལྟར་བདུན་ཕྲག་ཁ་ཤས་གོང་དུ་ཨ་རི་གྲོས་ཚོགས་འོག་མའི་ནང་གཏན་འབེབས་གནང་བའི་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་ཡང་གཏན་འབེབས་གནང་བ་བཞིན་བོད་དོན་ལ་རྒྱབ་སྐྱོར་དང་བོད་མིའི་འགྲོ་བ་མིའི་ཐོབ་ཐང་ལ་སྲུང་སྐྱོབ། དེ་བཞིན་བོད་མིའི་ཆོས་དད་རང་དབང་སྲུང་སྐྱོབ་སླད་དུ་གྲོས་ཚོགས་གོང་མ་དང་ཨ་རིའི་གཞུང་ནས་ཁྲིམས་འཆར་དེ་ཁྲིམས་གཞིར་གཏན་འབེབས་གནང་རྒྱུ་དུས་ལ་བབ་ཡོད་སྟབས་ང་ཚོ་ལ་རྒྱབ་སྐྱོར་དགོས་པའི་རེ་སྐུལ་གནང་འདུགདེ་བཞིན་སྐུ་ཞབས་ Rubio ལགས་ཀྱིས་ཕྱི་ཟླ་གསུམ་པའི་ཟླ་མཇུག་ཏུ་ཆེས་གནད་ཆེ་བའི་བོད་ཀྱི་གནད་དོན་ཐོག་ཞུ་གཏུག་ལས་འགུལ་ཞིག་འཚོགས་ཀྱི་ཡོད་པ་ལྟར་ད་བར་རྒྱ་ནག་དམར་ཤོག་གཞུང་གིས་དྲག་གནོན་འོག་བོད་མི་ཁྲི་ཚོ་མང་པོ་སྡུག་བསྔལ་མྱོང་བཞིན་པ་དང་། ལྷག་པར་དུ་རྒྱ་ནག་གཞུང་དང་རྒྱ་ནག་དམར་ཤོག་ཚོགས་པས་བཙན་གནོན་ཤུགས་ཆེར་གཏོང་བཞིན་ཡོད་སྟབས། ང་ཚོ་རྡོག་རྩ་གཅིག་ཏུ་སྒྲིལ་ནས་བོད་ཕྱི་ནང་གཉིསཀྱི་བོད་མིའི་ཆོས་དང་རིག་གཞུང་སྐད་ཡིག་བཅས་ལ་སྲུང་སྐྱོབ་གནང་རྒྱུར་བཞེངས་དགོས་པ་གསུངས་འདུགདེ་བཞིན་སྔ་ལོར་ཁོང་གིས་ངོ་སྤྲོད་གནང་བའི་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་གང་མགྱོགས་གྲོས་ཚོགས་གོང་མར་གཏན་འབེབས་ཀྱིས་ཁྲིམས་གཞིར་གཏན་འབེབ་ཡོང་རྒྱུར་རེ་བ་དང་ཚོགས་ཞུགས་པ་ཡོངས་ནས་བོད་དོན་ལ་སྔར་ལྷག་རྒྱབ་སྐྱོར་དང་ཞི་བདེར་སྲུང་སྐྱོབ་གནང་བར་ཐུགས་རྗེ་ཆེ་ཞེས་གསུངས་འདུགཨ་རིའི་གྲོས་ཚོགས་འཐུས་མི་གཉིས་ནས་ཞུ་སྐུལ་གནང་བའི་བརྙན་ཐུང་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་གྲོས་ཚོགས་འཐུས་མི་རྣམ་གཉིས་ནི་བོད་དོན་ལ་རྒྱབ་སྐྱོར་ཤུགས་ཆེར་གནང་མཁན་གྱི་མི་སྣ་གཙོ་བོ་གཉིས་ཡིན་སྐོར་དང་། ཁོང་རྣམ་པ་གཉིས་ནས་ཚོགས་ཞུགས་པ་ཡོངས་ལ་བོད་དོན་རྒྱབ་སྐྱོར་དང་འབྲེལ་བའི་དགོངས་ཚུལ་གནང་བར་ཐུགས་རྗེ་ཆེ་ཞེས་གསུངས་ཏེ་ད་ཆ་ཏོག་དབྱིབས་རིམས་ནད་རྐྱེན་པས་ལྷན་འཛོམས་ཀྱི་ཚོགས་འདུ་འཚོགས་རྒྱུར་འགོག་རྐྱེན་བཟོས་ཡོད་ཀྱང་། བདུན་ཕྲག་རྗེས་མར་ Tibet lobby day འམ་ཨ་རི་གྲོས་ཚོགས་འཐུས་མིར་བོད་དོན་ཞུ་གཏུག་ཉིན་མོ་དེ་དྲྭ་ཐོག་ནས་ཚགས་ཚུད་ངང་འཚོགས་ཐུབ་རྒྱུར་ཐུགས་རེ་ཡོད་ཅེས་གསུངས་འདུག

རྒྱ་ནག་གིས་སྤྱི་ལོ་ ༢༠༠༨ ལོར་བུ་ལོན་གཡོ་ལེན་བྱས་པའི་ཉེས་བཙུགས་འོག་འཛིན་བཟུང་བྱས་ཏེ་ཚེ་བཙོན་གྱི་ཁྲིམས་ཐག་བཅད་པའི་རྡོ་རྗེ་བཀྲ་ཤིས་ལགས་ཀྱི་ཁྲིམས་རྩོད་པ་ཝང་ཧྥེའེ་ཡིས་ཉེ་ཆར་ཁོང་ལྷ་སར་སོང་ནས་རྡོ་རྗེ་བཀྲ་ཤིས་དང་ཐུག་འཕྲད་བྱུང་པའི་གནས་ཚུལ་ཞིག་ཟླ་༡ ཚེས་ ༥ ཉིན་པོད་འཕྲིན་དྲ་ལམ་དུ་བཀོད་པ་དང་འབྲེལ། འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་ནག་གིས་བོད་མི་རྡོ་རྗེ་བཀྲ་ཤིས་ལགས་སུ་མ་ཉེས་ཁག་གཡོགས་ཀྱིས་ཚེ་བཙོན་གྱི་ཁྲིམས་ཐག་བཅད་པ་དེ་ནི་རྒྱ་ནག་གི་རྩ་ཁྲིམས་ཀྱི་སྒྲིག་གཞི་དང་འགལ་བ་ཞིག་ཡིན་པར་ལུང་འདྲེན་གྱིས།    རྒྱ་ནག་གིས་འཕྲལ་དུ་བོད་རིགས་ཁེ་ལས་བ་རྡོ་རྗེ་བཀྲ་ཤིས་ལགས་གློད་བཀྲོལ་གཏོང་དགོས་བའི་ཞུ་སྐུལ་གནང་འདུགགནས་ཚུལ་དེ་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་བཀའ་།འདྲི་ཞུས་པར་ཁོང་གིས།    ཐེངས་འདིར་རྡོ་རྗེ་བཀྲ་ཤིས་ལགས་སུ་མ་ཉེས་ཁག་གཡོགས་ཀྱིས་ཚེ་བཙོན་གྱི་ཁྲིམས་ཐག་བཅད་པ་དེ་ནི་རྒྱ་ནག་གིས་དམིགས་ཡུལ་ལྡན་པའི་ཐོག་ནས་བོད་མིའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་པ་གསལ་སྟོན་བྱས་ཡོད་པར་ངོ་སྤྲོད་གནང་སོང་། པདྨ་རྒྱལ་ལགས་ཀྱིས་རྒྱ་ནག་ནང་གི་ཉེས་ཁྲིམས་ཆེད་མཁས་པ་དེ་དག་གིས་རྡོ་རྗེ་བཀྲ་ཤིས་ཀྱིས་དངུལ་བུན་གཡོ་ལེན་བྱས་པའི་བདེན་དཔང་ཅི་ཡང་མེད་པ་དང་། རྡོ་རྗེ་བཀྲ་ཤིས་ལ་ཚེ་བཙོན་གྱི་བཅད་ཁྲ་གཏོང་མཁན་ཁྲིམས་ཁང་དེས་རྡོ་རྗེ་བཀྲ་ཤིས་ཀྱི་གྱོད་དོན་གཅིག་མཚུངས་ཀྱི་གྱོད་དོན་གཞན་ཞིག་ཐག་གཅོད་བྱས་པ་དེ་དང་བསྡུར་ན། ཁྲིམས་ཁང་དེས་རྡོ་རྗེ་བཀྲ་ཤིས་ལ་དབྱེ་འབྱེད་ཀྱི་ཉེས་འཛུགས་བྱས་ཡོད་པ་ཧ་ཅང་གསལ་བོ་ཡིན་སྐོར་འདི་ལྟར་ངོ་སྤྲོད་གནང་སོང་།གཞན་ཡང་ཁོང་གིས། རྒྱ་ནག་གིས་རྡོ་རྗེ་བཀྲ་ཤིས་འཛིན་བཟུང་བྱེད་དོན་དངོས་ནི་མ་དངུལ་གྱི་གྱོད་གཞི་ཞིག་མིན་པར། ཁོང་གིས་ས་བྱིའི་ཞི་རྒོལ་གྱི་སྐབས་སུ་ཕྱི་ཕྱོགས་སུ་འབྲེལ་བ་བྱས་ཡོད་པ་དང་། དེ་བཞིན་བོད་ནང་གི་ཞི་རྒོལ་བར་མཐུན་རྐྱེན་སྤྲད་ཡོད་པར་དོགས་པའི་རྐྱེན་གྱིས། དམར་ཤོག་སྲིད་གཞུང་གིས་ཁོང་ལ་ཚེ་བཙོན་གྱི་ཁྲིམས་ཐག་བཅད་པ་ཞིག་ཡིན་སྐོར་ངོ་སྤྲོད་གནང་སོང་། རྩ་བའི་ཕྱི་ལོ་ ༢༠༠༨ ལོར་རྒྱ་ནག་གཞུང་གིས་རྡོ་རྗེ་བཀྲ་ཤིས་ལགས་འཛིན་བཟུང་བྱས་བ་དང་། ༢༠༡༠ ཟླ་ ༦ ་ཚེས་ ༢༦་ ཉིན་ལྷ་སར་རྒྱ་ནག་གི་ཁྲིམས་ཁང་ནས་གསང་བའི་ངང་ཁྲིམས་རྭ་ཚོགས་ཏེ། རྡོ་རྗེ་བཀྲ་ཤེས་ཀྱིས་བུ་ལོན་གཡོ་ལེན་བྱས་ཡོད་པའི་ཉེས་འཛུགས་ཀྱི་འོག་ཚེ་བཙོན་གྱི་ཁྲིམས་ཐག་བཅད་ཡོད་ནའང་།   ཁོང་གི་ཁྲིམས་རྩོད་པ་ཝང་ཧྥེའེ་དང་རྡོ་རྗེ་བཀྲ་ཤིས་གཉིས་ཀྱིས་རྒྱ་ནག་གི་ཁྲིམས་ཆད་དེར་ཁས་ལེན་བྱས་མེད་པ་མ་ཟད།  ༢༠༡༨ ཟླ་༡༠ ནང་རྒྱ་ནག་གི་རྒྱལ་ས་པེ་ཅིན་ནང་རྟེན་གཞི་བྱས་པའི་ཀྲུན་ཞིན་ཁྲིམས་རྩོད་པའི་ལས་གཉེར་ཁང་གི་ཉེས་ཁྲིམས་ཆེད་མཁས་པས་རྡོ་རྗེ་བཀྲ་ཤིས་ཀྱིས་དེ་སྔོན་མ་རྐང་འབོར་ཆེན་འཇོག་ས་ཆེན་སང་ཡུན་ Qin Sangyuan ཚོང་གཉེར་ཁང་གི་མ་དངུལ་དེ་ཁོ་རང་སྒེར་གྱི་ཁེ་ལས་ཐད་ལ་བེད་སྤྱད་བཏང་བ་མ་གཏོགས། ཁོང་གིས་དངུལ་བུན་གཡོ་ལེན་བྱས་ཟེར་བ་དེ་ཁུངས་མེད་ནོར་འཁྲུལ་འབའ་ཞིག་ཡིན་པའི་བསམ་འཆར་བཏོན་ཡོད་པར་བརྟེན་ཁོང་གི་གནད་དོན་དེ་ད་དུང་གླེང་རྙོག་མང་པོའི་ཁྲོད་ལྷག་ཡོད་པ་རེད།