བཙན་བྱོལ་བོད་མིའི་གཞིས་ཆགས་ཁག་གི་ས་གནས་འགོ་འཛིན་ལས་ཁུངས་ཀྱི་ལས་བྱེད་པར་འཛིན་སྐྱོང་དང་འབྲེལ་བའི་ཟབ་སྦྱོང་སྐབས་བོད་མིའི་སྒྲིག་འཛུགས་ཀྱི་སྲིད་ཚབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་གཞུང་ཞབས་སྲི་ཞུ་བ་ཚོར་མི་དམངས་དཀྱུས་མ་ལས་འགན་ཆེ་བ་ཡོད
་ཅེས་གསུངས་སོང་།
དེ་རིང་ཟླ་ ༡༡ ཚེས་ ༧ ཉིན་སྔ་དྲོར་བོད་མིའི་སྒྲིག་འཛུགས་ཀྱི་གཞུང་ཞབས་འདེམས་བསྐོ་ལྷན་ཁང་གིས་གོ་སྒྲིག་འོག་བཞུགས་སྒར་ཉེ་འདབས་དབུས་སྣེ་ལེན་ཁང་དུ་སྐུ་མགྲོན་གཙོ་བོ་སྲིད་ཚབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་གཙོས། འདེམས་བསྐོ་ལྷན་ཁང་གི་འགན་འཛིན་དང་དྲུང་ཆེ། དེ་བཞིན་དབུས་སྣེ་ལེན་ཁང་གི་འགན་འཛིན། དེ་བཞིན་གཞིས་ཁག་གི་ལས་བྱེད་རྣམས་ཆེད་འཛོམས་ཐོག་རྒྱ་གར་དང་བལ་ཡུལ་ཁུལ་གྱི་བོད་མིའི་གཞིས་ཆགས་ཁག་ ༢༦ གི་ས་གནས་འགོ་འཛིན་ལས་ཁུངས་ཀྱི་ལས་བྱེད་རྣམ་པར་ཉིན་གྲངས་ ༡༠ རིང་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འཛུགས་གནང་སོང་།
སྐབས་དེར་སྲིད་ཚབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ཐེངས་འདིའི་ཟབ་སྦྱོང་ཐོག་བཅར་བའི་གཞུང་ཞབས་སྲིད་ཞུ་བ་ཚོར་དྲང་བདེན་དང་ལྷག་བསམ། གདེང་སྤོབས། དེ་བཞིན་མཉམ་རུབ་ཀྱི་འགན་ཁུར་
སོགས་ནི་གཞུང་ཞབས་པ་གཅིག་ལ་ངེས་པར་དུ་ཚང་དགོས་པའི་ཆ་རྐྱེན་མེད་དུ་མི་རུང་བ་ཞིག་ཡིན་པར་ལམ་སྟོན་གནང་པ་དང་འབྲེལ། ལྷག་དོན་གཞུང་ཞབས་སྲི་ཞུ་ཚོ་མི་དམངས་དཀྱུས་མ་ལས་འོས་འགན་ཆེ་བ་ཡོད་པ་རེད་ཅེས་གསུངས་ཡོད་པ་རེད།
གཞི་རྩའི་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གིས་ད་ལན་བཀའ་ཤག་སྐབས་ ༡༥ པའི་ལོ་ཡུན་འདིའི་རིང་གཞུང་ཞབས་སྲི་ཞུ་ཚོའི་ངོས་ནས་ལས་དོན་གནང་ཕྱོགས་ལ་ནུས་པ་གོང་འཕེལ་ཡོང་སླད་ཟབ་སྦྱོང་ཁག་ཅིག་ཕུལ་འཆར་ཡོད་པ་ལས་འདི་ནི་ཆེས་ཐོག་མའི་ཟབ་སྦྱོང་ཞིག་ཆགས་ཀྱི་ཡོད་པ་རེད།
རྩ་བའི་ད་ལན་གྱི་ཟབ་སྦྱོང་འདིའི་རིང་ལས་བྱེད་ཚོར་བོད་མིའི་སྒྲིག་འཛུགས་ཀྱི་འཛིན་སྐྱོང་དང་དཔལ་འབྱོར། ས་ཁང་། ལས་བྱེད་དང་འབྲེལ་བའི་སྒྲིག་གཞི། གཞུང་ཡིག་འབྲི་སྟངས་དང་ལས་བསྡོམས་བཟོ་ཕྱོགས། ལས་གཞི་བཟོ་ཕྱོགས། རྩི་ཁྲ། དེ་བཞིན་བཟང་སྤྱོད་སོགས་བརྗོད་གཞི་འདྲ་མིན་ཐོག་ཆེད་ལས་མི་སྣས་ཟབ་འཁྲིད་གནང་རྒྱུ་དང་། ཁྱད་པར་དུ་འདེམས་བསྐོ་ལྷན་ཁང་གི་ངོས་ནས་ཟབ་སྦྱོང་དེའི་ཐོག་ཧི་མཱ་ཅལ་མངའ་སྡེའི་དྲུང་འཕར་ Virender Sharma དང་དྲུང་གཞོན་ Mahesh Bhardwaj གཉིས་གདན་ཞུ་ཕུལ་དོན་ལྟར་ལས་བྱེད་རྣམས་ལ་འབྲེལ་ལམ་ཞུ་ཕྱོགས་དང་། གཞུང་ཡིག་ཟིན་བྲིས། ཚིག་ཐོ་བཀོད་སྟངས་བཅས་ཀྱི་སྐོར་ཟབ་འཁྲིད་གནང་རྒྱུ་རེད་འདུག
