༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ཕྱིའི་དངོས་པོ་ཡར་རྒྱས་ཕྱིན་པའི་དུས་སྐབས་འདིའི་ནང་ནུབ་ཕྱོགས་པའི་སེམས་ཁམས་རིགས་པ་དང་ནང་པ་སངས་རྒྱས་པའི་ལྟ་གྲུབ་གཉིས་བཟུང་འབྲེལ་ཐོག་འགྲོ་བ་མིའི་སེམས་ཁམས་ཀྱི་དཀའ་ངལ་སེལ་རྒྱུ་ག
ནད་ཆེ་ཡིན་པ་གསུངས་སོང་།
དེ་རིང་ཟླ་ ༡༠ ཚེས་ ༡༢ ཉིན་སྔ་དྲོར་བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱིས་གོ་སྒྲོག་འོག་སྨན་རྩིས་མཐོ་སློབ་ཀྱི་ཚོགས་ཁང་དུ་ཀརྨ་པ་རིན་པོ་ཆེ་མཆོག་དབུ་བཞུགས་གཙོས། དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག གཞུང་དང་གཞུང་འབྲེལ་མིན་པའི་ཚོགས་ཁག་གི་སྐུ་ཚབ། དེ་བཞིན་ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་བཅས་འདུ་འཛོམས་ཀྱིས་སེམས་ངལ་གྱི་རྒྱུ་རྐྱེན་དང་བཅོས་ཐབས་ཞེས་པའི་བརྗོད་གཞིའི་ཐོག་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་བཞིི་པ་དབུ་འཛུགས་གནང་སོང་།
སྐབས་དེར་མཛད་སྒོའི་སྐུ་མགྲོན་གཙོ་བོ་ཀརྨ་པ་རིན་པོ་ཆེ་མཆོག་གིས་ལུས་སེམས་སྲོག་གི་ཚོགས་འདུ་འདིར་རྒྱབ་སྐྱོར་དང་ཚོགས་འདུ་རིམ་པའི་བརྗོད་གཞི་ཁག་དོན་སྙིང་ལྡན་པ་ཞིག་ཏུ་ངོས་འཛིན་གནང་གི་ཡོད་སྐོར་གསུངས་པ
་དང་སྦྲགས། ད་རེས་ཀྱི་ཚོགས་འདུ་འདིའི་བརྒྱུད་ནས་སློབ་ཕྲུག་རྣམས་ལ་བོད་ཀྱི་ཆོས་རིག་གཏིང་ཟབ་ཡོད་པ་དེ་དག་ངེས་ཤེས་རྙེད་པར་ཕན་ཐོགས་ཆེན་པོ་ཡོང་རྒྱུ་ཡིན་པ་བཀའ་སྩལ་གནང་པ་མ་ཟད། ཁྱད་པར་དུ་ཕྱིའི་དངོས་པོ་ཡར་རྒྱས་ཕྱིན་པའི་དུས་སྐབས་འདིའི་ནང་ནུབ་ཕྱོགས་པའི་སེམས་ཁམས་རིག་པ་དང་ཤར་ཕྱོགས་སུ་དར་བའི་ཆོས་ལུགས་དང་མཚན་ཉིད་རིག་པ། དེ་བཞིན་ལྟ་གྲུབ་གཉིས་བཟུང་འབྲེལ་ཐོག་འགྲོ་བ་མིའི་སེམས་ཁམས་ཀྱི་དཀའ་ངལ་སེལ་རྒྱུ་གནད་ཆེ་ཡིན་པར་བཀའ་སྩལ་གནང་ཡོད། དེ་བཞིན་དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་ཚོགས་ཆེན་འདིའི་བརྒྱུད་ནས་མ་འོངས་པར་འགྲོ་བ་སྤྱི་དང་སྒོས་བོད་མིའི་སེམས་ཁམས་ཀྱི་འཕྲོད་བསྟེན་ལ་དོན་ཕན་སོན་པའི་ཐུགས་རེ་ཡོད་ཅེས་གསུངས་སོང་།
དེ་རིང་མཛད་སྒོའི་ཐོག་མར་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱི་དགེ་བཤེས་བསྟན་པ་བཀྲ་ཤིས་ལགས་ཀྱིས་སྡེ་ཚན་དེ་ཆེད་བཙུགས་གནང་པ་ནས་བཟུང་ད་བར་ཚོགས་ཆེན་རིམ་པ་གསུམ་ཚོགས་པའི་བརྒྱུད་རིམ་ནང་སྨན་རྩིས་ཁང་གི་སློབ་ཕྲུག་རྣམས་ལ་རིག་གཞུང་འདྲ་
མིན་གྱི་ལེགས་བྱང་ཐོས་རྒྱུ་བྱུང་བར་བརྟེན་མ་འོངས་པའི་ཉམས་ཞིབ་ཀྱི་ལས་དོན་ལ་ཕན་ཐོགས་ཆེན་པོ་བྱུང་ཡོད་སྐོར་སོགས་ཀྱི་ལས་བསྡོམས་སྙན་སྒྲོན་ཞུས་ཡོད།
གཞི་རྩའི་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་དེ་ནི། བོད་ཀྱི་ཐུན་མིན་སྨན་རྩིས་ལས་བསྟན་པའི་ལུས་སེམས་འཕྲོད་བསྟེན་གཞི་རྩར་བཟུང་ཐོག ༸གོང་ས་མཆོག་གི་བཀའ་སློབ་ལམ་སྟོན་ལྟར་རིག་གཞུང་གསར་རྙིང་མང་པོའི་སྙིང་བཅུད་བསྡུ་ལེན་གྱིས་འགྲོ་བ་མིའི་ལུས་སེམས་གཉིས་ལས་གཙོ་བོ་སེམས་ཁམས་འཕྲོད་བསྟེན་ཞབས་ཞུ་ཚད་མཐོ་ཡོང་སླད་ཕྱི་ལོ་ ༢༠༡༣ ལོའི་ཟླ་ ༧ པའི་ནང་གསར་བཙུགས་གནང་པ་ཞིག་ཡིན་པ་རེད། སྡེ་ཚན་དེ་ཆེད་བཙུགས་གནང་ནས་ད་བར་ཚོགས་འདུ་སྔ་རྗེས་ཐེངས་གསུམ་གོ་སྒྲིག་ཞུས་ཟིན་པ་དང་འདི་བཞིན་ད་ལན་གྱི་ཚོགས་འདུ་ཐེངས་བཞི་པ་ཆགས་ཀྱི་ཡོད་པ་རེད།
ཚོགས་ཆེན་དེའི་བརྗོད་གཞི་ཁག་ནི། ནང་པའི་གཞུང་ནང་གསུང་པའི་སེམས་ངལ་གྱི་རྒྱུ་རྐྱེན་དང་བཅོས་ཐབས། བོད་ཀྱི་གསོ་རིག་དང་རྩིས་རིག་གཞུང་ནས་བསྟན་པའི་སེམས་ངལ་གྱི་རྒྱུ་རྐྱེན་དང་བཅས་ཐབས། དེ་བཞིན་ནུབ་ཕྱོགས་པའི་ཚན་རིག་ལས་སེམས་ངལ་གྱི་རྒྱུ་རྐྱེན་དང་བཅོས་ཐབས་བཅས་ཀྱི་ཐོག་གསུང་བཤད་དང་དྲི་བ་དྲིས་ལན་བཅས་གནང་རྒྱུ་རེད་འདུག
རྩ་བའི་ཚོགས་འདུ་དེའི་ཐོག་ཕྱི་ནང་གི་ཉམས་ཞིབ་པ་བརྒྱད་ཆེད་ཕེབས་གནང་ཡོད་པ་དང་། ཚོགས་བཅར་བའི་ཁོགས་སུ་ཨ་རི་དང་ཡོ་རོབ། སྨན་རྩིས་ཁང་གི་དགེ་ལས་སློབ་མ། དེ་བཞིན་སེ་ལ་ཀུ་བོད་ཁྱིམ་གྱི་ཚན་རིག་སྡེ་ཚན་གྱི་སློབ་མ་བཅས་མཉམ་ཞུགས་གནང་འདུག
