Tibetan Royal Year of 2151 | Year of the Wood Dragon

༸གོང་ས་མཆོག་གིས་བལ་ཡུལ་རྣམ་རྒྱལ་མཐོ་སློབ་ཀྱི་དགེ་སློབ་ཁག་གཅིག་ལ་མཇལ་ཁ་དང་བཀའ་སློབ་སྩལ་བ།

Tibetan News Headlines

  • ༸གོང་ས་མཆོག་གིས་བོད་མི་ཚོ་སེམས་རྒྱུད་བཟང་པོ་བྱ་དགོས་གལ་ཡིན་པའི་བཀའ་ནན་སྩལ་སོང་།
  • རྒྱ་གར་ཚེའི་རིག་འབྱེད་ཀྱི་གཞུང་ཕྱི་མོར་གྲགས་པ་ཙ་ར་ཀའི་བསྡུ་བའི་སྐོར་བཅར་འདྲི།

Saturday 24/02/2024

  • Being a good human being is our responsibility as a Tibetan: Dalai Lama confers Jataka teaching at Tsuklakhang
  • In conversation with Prof. Rakdo Lobsang Tenzin Rinpoche on Tibetan translation of Charaka Samhita

ཟླ་བ་འདིའི་ཚེས་ ༡༨  ནས་ཚེས་ ༢༧  བར་བལ་ཡུལ་རྣམ་རྒྱལ་མཐོ་སློབ་ཀྱི་དགེ་སློབ་སྡེ་ཁག་གཅིག་རྒྱལ་ས་ལྡི་ལི་དང་བཞུགས་སྒར་དུ་ཤེས་ཡོན་ལྟ་སྐོར་གནང་མུས་ལྟར། དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྣམ་རྒྱལ་མཐོ་རིམ་སློབ་གྲྭའི་འཛིན་རིམ་བཅིུས་ཀྱི་སློབ་མ་གྲངས་ ༣༤ དང་དགེ་ལས་ ༢ བཅས་ལ་དམིགས་བསལ་མཇལ་ཁ་དང་བཀའ་སློབ་སྩལ་སོང་།

༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་དེ་རིང་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་སློབ་རྣམས་ལ་བླང་དོར་གྱི་བཀའ་སློབ་བཀའ་དྲིན་སྩལ་བའི་བརྙན་ཐུང་ཞིག་འདོན་སྤེལ་གནང་བའི་ནང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་པའི་མི་རབས་རྒན་པ་རྣམས་རིམ་བཞིན་མེད་པ་འགྱུར་བཞིན་ཡོད་སྟབས་ད་ལྟའི་མི་རབས་གཞོན་པ་ཚོས་མི་རབས་གོང་མའི་རྒྱུན་མཐུད་དགོས་པར་མ་ཟད་ད་ལྟའི་འཛམ་གླིང་གི་དངོས་ཡོད་གནས་ཚུལ་གང་ཡིན་པ་དེ་དག་ངེས་པར་དུ་ཤེས་དགོས་ཞེས་བཀའ་སྩལ་བ་དང་ཆབས་ཅིག རྒྱ་གར་གྱི་དཔལ་ནཱ་ལེནྡཱའི་མཁས་པའི་དབང་པོ་ཚོས་རིགས་པས་དཔྱད་པ་གནང་བ་མ་གཏོགས་ཟེར་སྲོལ་ཙམ་ལ་ཆ་འཇོག་མི་གནང་བར་ཕྱག་དཔེ་དུ་མ་གཟིགས་ཀྱི་ཡོད། དེས་ན་ཁྱེད་རང་ཚོས་ཀྱང་གནས་ཚུལ་གང་ཡིན་ལ་ལྟོས་མེད་རིགས་པ་ཡང་དག་པས་དཔྱད་དགོས་ཞེས་ལམ་སྟོན་མཛད་འདུག

རླུང་འཕྲིན་ཁང་གི་གསར་འགོད་པས་བལ་ཡུལ་རྣམ་རྒྱལ་མཐོ་སློབ་ཀྱི་དགེ་རྒན་སྟོབས་རྒྱལ་ལགས་སུ་སློབ་མ་དེ་དག་རྒྱ་གར་དུ་ཤེས་ཡོན་ལྟ་སྐོར་ཀྱི་སྐོར་སྐྱོད་ཆེད་ཁྲིད་པའི་དམིགས་ཡུལ་གཙོ་བོ་གང་ཡིན་དང་འབྲེལ་ནས་བཅར་འདྲི་ཞུས་པར་ཁོང་གིས་རྒྱ་གར་གྱི་ཤེས་ཡོན་གནས་བབ་སྤྱི་དང་སྒོས་སུ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་ཁྱབ་ཁོངས་སློབ་གྲྭ་ཁག་གི་ཤེས་ཡོན་གནས་སྟངས་ཇི་དངོས་ཡོད་གནས་སྟངས་ཤེས་རྟོགས་ཐུབ་ཆེད་དུ་དམིགས་པ་ཞིག་ཡིན་སྐོར་གསུངས་སོང་།

དེ་བཞིན་གསར་འགོད་པས་བལ་ཡུལ་ནས་རྒྱ་གར་དུ་ཤེས་ཡོན་ལྟ་སྐོར་ཆེད་བཅར་བའི་སློབ་མ་འགའ་ཞིག་ལ་བཅར་འདྲི་ཞུས་སྐབས་ཁོང་རྣམས་ཀྱིས་དེ་རིང་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་མཇལ་རྒྱུ་དང་གསུང་ཐོས་རྒྱུ་བྱུང་བར་ཧ་ཅང་དགའ་ཚོར་ཆེན་པོ་བྱུང་ཞེས་གསུངས་སོང་།

རྩ་བའི་ཐེངས་འདིའི་ཤེས་ཡོན་ལྟ་སྐོར་ཁྲོད་ཁོང་རྣམས་ཀྱིས་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་བོད་ཀྱི་འགྲེམས་སྟོན་ཁང་། བོད་ཀྱི་དཔེ་མཛོད་ཁང་སོགས་ལ་ཤེས་ཡོན་ལྟ་སྐོར་གནང་བཞིན་ཡོད་པ་དང་། དེ་རིང་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་མཆོག་གིས་བོད་རིགས་གཞོན་སྐྱེས་དེ་དག་ལ་ཤེས་ཡོན་གྱི་གལ་འགངས་དང་གཞོན་སྐྱེས་ཀྱི་འགན་ཁྲིའི་སྐོར་ལ་ལམ་སྟོན་གནང་ཡོད་པ་རེད།

འབྲེལ་ཡོད་གསར་གནས།

གསར་གནས།