བོད་མིའི་སྒྲིག་འཛུགས་ཀྱིས་བདག་ཉིད་ཆེན་པོ་གྷན་དྷིའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ།

བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་བཀའ་ཤག་ནས་ཁ་ཉིན་ཕྱི་ཟླ་ ༦ ཚེས་ ༢༡ ཉིན་བཏང་པའི་གཞུང་འབྲེལ་རྩ་འཛིན་བཀོད་ཁྱབ་ཅིག་གི་ཐོག་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དེ་གཞུང་འབྲེལ་མཛད་སྒོའི་གདན་ཐོབ་དང་པོ་དང་། ཆེས་མཐོའི་ཁྲིམས་ཞིབ་པ་ཆེ་བ་གཉིས་པ་དང་བོད་མི་མང་སྤྱི་འཐུས་ཚོགས་གཙོ་གསུམ་པར་བཅོས་འགྱུར་བཏང་འདུག བཀོད་ཁྱབ་དེའི་ནང་གསལ་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན། མི་མང་ནས་འོས་འདེམས་བྱས་པའི་བཀའ་བློན་ཁྲི་པར་བོད་མིའི་ཆབ་སྲིད་ཀྱི་སྲིད་སྐྱོང་གི་སྐུ་དབང་རྩིས་སྤྲོད་བཀའ་དྲིན་བླ་མེད་དུ་ཆེ་བ་ནས་བཟུང་། ཆབ་སྲིད་དང་འཛིན་སྐྱོང་གི་འགན་དབང་ཆ་ཚང་འོས་འདེམས་བྱས་པའི་འགོ་འཁྲིད་རྣམས་ནས་གནང་བཞིན་པ་དང༌། བཙན་བྱོལ་བོད་མིའི་བཅའ་ཁྲིམས་ལའང་དེ་མཚུངས་དགོས་ངེས་ཀྱི་བསྐྱར་བཅོས་གནང་བ་སོགས་བྱུང་ཡོད། དེ་འབྲེལ་བོད་མིའི་སྒྲིག་འཛུགས་ཀྱི་འཆར་འཕར་གཞུང་འབྲེལ་མཛད་སྒོའི་སྐབས་སུ་བཞུགས་གྲལ་གདན་ཐོབ་ལའང་འགྱུར་བ་ཞིག་དགོས་ངེས་ཀྱང་། ད་ལྟ་བར་བཀའ་མོལ་གླེང་སློང་བྱུང་བ་ཙམ་ལས་འགྱུར་བཅོས་གཏན་འབེབས་བྱུང་མེད་པར་སོང༌། ཉེ་ཆར་དཔལ་ལྡན་བཀའ་ཤག་ནས་གོང་གསལ་གནས་དོན་དང་འབྲེལ་བའི་སྐོར་ཚོགས་མི་གསུམ་ལས་གྲུབ་པའི་བསྐྱར་ཞིབ་ཚོགས་ཆུང་ཞིག་བསྐོ་གཞག་གནང་ཡོད་པ་དང་། ཚོགས་ཆུང་ནས་སླད་ཕྱིན་གཞུང་འབྲེལ་མཛད་སྒོའི་ཐོག་བཞུགས་གྲལ་གདན་ཐོབ་འབུལ་ཕྱོགས་ཐད་བསྐྱར་བཅོས་གནང་འོས་ཚོགས་ཆུང་གི་གྲུབ་དོན་སྙན་ཐོ་ཞིག་འདི་ལོའི་ཟླ་ ༦ ཚེས་ ༨ ཉིན་ཕུལ་འབྱོར་བྱུང་བ་དེར་བཀའ་ཤག་ནས་ངོས་བཞེས་གནང་བ་ཞིག་རེད་འདུག སྤྱིར་དེ་སྔའི་གཞུང་འབྲེལ་མཛད་སྒོ་ཁག་གི་བཞུགས་གྲལ་གདན་ཐོབ་རྩ་འཛིན་ལྟར་བྱས་ན། དང་པོ་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་པ་ཆེ་བ་དང་གཉིས་པར་སྤྱི་འཐུས་ཚོགས་གཙོ་དང་གསུམ་པར་བཀའ་བློན་ཁྲི་པ་བཅས་སོགས་བཞུགས་གྲལ་གདན་ཐོབ་གནང་ཡོད་ནའང་།...

དེ་རིང་ཟླ་ ༢ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་རྒྱལ་ལོ་ ༢༡༤༤ རབ་གནས་མེ་བྱ་ལོའི་གནམ་ལོ་གསར་དུ་བཞད་པའི་མཚམས་འདིར། གཞིས་བྱེས་བོད་མི་གཙོ་བོར་གྱུར་བའི་རྒྱ་གར་གཞུང་མང་གཉིས་དང་བོད་དོན་རྒྱབ་སྐྱོར་བ་སོགས་ལ་བཀྲིས་པའི་འཚམས་འདྲི་གནང་སོང་། དེའང་འདི་ག་རླུང་འཕྲིན་ཁང་བརྒྱུད། སྲིད་སྐྱོང་མཆོག་གིས་ལོ་གསར་ལ་འཚམས་འདྲི་བསྩལ་དོན།  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་བསྟན་བདག་བླ་ཆེན་རྣམ་པ། གཞིས་བྱེས་གཉིས་སུ་གནས་པའི་བོད་རིགས་སྤུན་ཟླ་རྣམ་པ། རྒྱ་གར་གཞུང་མང་གཉིས་དང་ཕྱི་རྒྱལ་ཡུལ་གྲུ་ཁག་ལ་ཡོད་པའི་བོད་རིགས་གྲོགས་པོ་གྲོགས་མོ་བཅས་ལ་བཀའ་ཤག་དང་སྲིད་སྐྱོང་སྒེར་གྱི་ངོས་ནས་བོད་རྒྱལ་ལོ་ ༢༡༤༤ རབ་གནས་མེ་བྱ་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན་ཅེས་འཚམས་འཕྲིན་གནང་སོང་། ལོ་གསར་པ་འདི་ཡག་པོ་ཞིག་ཡོང་བའི་བརྟེན་འབྲེལ་ཆེད་ལོ་གསར་སྐབས་ཚང་མས་དགའ་དགའ་དགའ་སྤྲོ་སྤྲོ་གནང་དགོས་པ་གལ་ཆེན་པོ་ཡིན་ཞིང་། ཕྱོགས་མཚུངས་ལོ་གསར་པ་འདིའི་ནང་ང་ཚོས་རེ་བ་དང་ཡིད་ཆེས་གསར་པ་ཞིག་གི་ཐོག་ནས་གོམ་པ་མདུན་སྤོ་བྱེད་དགོས་རྒྱུའང་ཧ་ཅང་གལ་ཆེ་ཡིན་སྟབས། བོད་མིའི་ཆོས་དང་རིག་གཞུང་ལ་གཞི་འཛིན་པའི་བོད་མིའི་ཡ་རབས་བཟང་སྤྱོད་ཀྱི་གོམས་གཤིས་བཟང་པོ་འདི་ཉིད་མི་ཉམས་གོང་འཕེལ་ཡོང་བ་བྱ་རྒྱུ་ནི་དེ་བས་གནད་ཆེ་བ་དང་། བོད་མི་ཚོས་བོད་ནང་གི་གནས་སྟངས་ཛ་དྲག་དེ་དག་ ཡིད་ལ་བཅང་ཞིང་སྙིང་སྟོབས་གོང་ནས་གོང་དུ་འཕེལ་ཏེ་བོད་མིའི་བདེན་པའི་འཐབ་རྩོད་ལ་མུ་མཐུད་སྐུ་ལས་བསྐྱོན་རྒྱུར་ཆོད་སེམས་བརྟན་པོ་བཟུང་དགོས་གལ་ཡིན་པ་གསུངས་སོང་། འདི་ལོར་བོད་མིའི་སྒྲིག་འཛུགས་ཀྱིས་༸གོང་ས་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ བཀའ་དབང་སྩལ་དོན་ལྟར་ང་ཚོས་དུས་དབང་ཞུ་རྒྱུ་བྱུང་བ་དང་འདི་བཞིན་དུས་དབང་སྐབས་ལས་དོན་ཆ་ཚང་གྲ་སྒྲིག་པོ་བྱུང་སོང་ཞེས་གསུངས་ཡོད། དེ་བཞིན་སྲིད་སྐྱོང་མཆོགང་གིས་མགོན་པོ་༸གང་ཉིད་མཆོག་དགུང་ལོ་བརྒྱ་ལྷག་༸སྐུ་འཚོ་བཞུགས་མཛད་རྒྱུའི་བཀའ་བཞེས་བཟང་པོ་ཐོབ་པ་ནི་ཧ་ཅང་སྐལ་བ་བཟང་པོ་ཞིག་དང་རྩ་ཆེན་པོ་ཞིག་ཡིན་སཔས་ང་ཚོས་༸གོང་ས་མཆོག་གིས་ད་བར་བཀའ་སློབ་ལམ་སྟོན་ཕེབས་པ་དེ་དག་ཡིད་ལ་བཅངས་ཏེ་ལག་བསྟར་དོན་འཁྱོལ་ཐུབ་པ་ཞིག་གནང་ཚེ། བོད་སྤྱི་པའི་བསོད་ནམས་གསོག་རྒྱུ་གཙོས་སྤྱི་པའི་བསོད་ནམས་གོང་འཕེལ་འགྲོ་ནས་བོད་མིའི་བདེན་མཐའ་སེལ་བར་དོན་ཕན་སོན་རྒྱུ་ཡིན་པ་སོགས་གསུངས་སོང་། དེ་མཚུངས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རབ་གནས་མེ་བྱ་ལོའི་གནམ་ལོ་གསར་བཞད་ཀྱི་དུས་ཚིགས་དང་བསྟུན། བོད་མི་མང་སྤྱི་འཐུས་ལྷན་ཚོགས་དང་སྒེར་གྱི་ངོས་ནས་གཞིས་བྱེས་བོད་མི་ཡོངས་དང་བོད་དོན་རྒྱབ་སྐྱོར་གནང་མཁན། དེ་བཞིན་བོད་ཀྱི་གྲོགས་པོ་ཡོངས་ལ་ལོ་གསར་ལ་འཚམས་འདྲི་བཀྲིས་བདེ་ལེགས་ཞུ་རྒྱུ་ཡིན།...

བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༧་་་༡༨ ལོའི་འཁོར་སྔོན་རྩིས་འཆར་གཞིར་ཞིབ་འཇུག་གི་ལས་དོན་དབུ་འཛུགས་གནང་ཡོད་པ་རེད། བཙན་བྱོལ་བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས་བཏང་འཛིན་གྱི་སྒྲིག་གཞི་དགོངས་དོན་འོག་བོད་མིའི་སྒྲིག་འཛུགས་འཛིན་སྐྱོང་བཀའ་ཤག་གིས་ཕྱི་ཟླ་གསུམ་པའི་སྔོན་རྩིས་གྲོས་ཚོགས་མ་ཚོགས་སྔོན་དུ་བཙན་བྱོལ་བོད་མིའི་ལས་ཁུངས་མ་ལགས་དང་བཅས་པའི་ལོ་འཁོར་སྔོན་རྩིས་འཆར་གཞི་བོད་མི་མང་སྤྱི་འཐུས་ལྷན་ཚོགས་སུ་གྲུབ་དོན་སྙན་ཐོ་འབུལ་ལམ་ཞུ་དོན་ལྟར། ལོ་འཁོར་སྔོན་རྩིས་འཆར་གཞི་དེའི་རྒྱབ་ལྗོངས་དང་བཅས་པར་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་སྔོན་རྩིས་ཚོད་དཔག་འཆར་རྩིས་ཚོགས་ཆུང་ཞེས་མི་འགྲོར་སྤྱི་འཐུས་ལྔ་བསྐོ་འཛུགས་ཀྱིས་ལོ་འཁོར་སྔོན་རྩིས་འཆར་གཞིར་ཞིབ་འཇུག་གྱི་ལས་དོན་གནང་བཞིན་ཡོད་པ་རེད། རྩིས་ལོ་ ༢༠༡༧་་་༡༨ ལོའི་ཚོད་དཔག་འཅར་རྩིས་ཚོགས་ཆུང་གི་ལས་དོན་དེ་ཁ་སང་ཟླ་ ༢ ཚེས་ ༡༦ ཉིན་ཚོགས་ཆུང་ལྷན་འཛོམས་ཀྱིས་དབུ་འཛུགས་གནང་པ་དང་། ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། ཚོགས་ཆུང་གི་དྲུང་ཆེ་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་ལགས་རྣམ་གཉིས་བསྐོ་གཞག་གནང་འདུག གཞི་རྩའི་ད་ལན་གྱི་རྩིས་ལོ་ ༢༠༡༧་་་༡༨ ལོའི་ཚོད་དཔག་འཅར་རྩིས་ཚོགས་ཆུང་གི་མི་འགྲོར་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། སྤྱི་འཐུས་རྡོ་རྗེ་ཚེ་བརྟན་ལགས། སྤྱི་འཐུས་དོན་གྲུབ་བཀྲ་ཤིས་ལགས་བཅས་ཡིན་པ་རེད།  

  དེ་རིང་ཕྱི་ཟླ་ ༡ ཚེས་ ༢༦ ཉིན་མོ་སྟེ་དེ་སྔ་ཕྱི་ལོ་ ༡༩༥༠ ལོར་རྒྱ་གར་རྒྱལ་ཁབ་ཀྱི་རྩ་ཁྲིམས་གཏན་ལ་ཕན་ཏེ་རྒྱལ་ཁབ་དེ་མང་གཙོ་དང་སྤྱི་མཐུན་རྒྱལ་ཁབ་ཅིག་ཏུ་ཡོངས་གྲགས་གནང་ནས་ད་བར་ལོ་ངོ་ ༦༨ འཁོར་གྱི་ཡོད་པ་ལྟར། དེ་རིང་རྒྱ་གར་གྱི་རྒྱལ་ས་ལྡི་ལིར་གཙོས་པའི་རྒྱལ་ཁབ་ཁྱོན་ཡོངས་ལ་གཞུང་མང་གཉིས་ཀྱིས་ཉིན་མོ་འདི་བཞིན་སྲུང་བརྩི་གཟབ་རྒྱས་ཞུ་བཞིན་ཡོད་པ་རེད། བཙན་བྱོལ་བོད་མིའི་བསྟི་གནས་བཞུགས་སྒར་དྷ་རྨ་ས་ལར་སྔ་དྲོ་ཚོུད་ ༩།༠༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ་ལྷན་འཛོམས་ཀྱིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་ཞིང་། རྒྱ་གར་རྒྱལ་གླུ་བླངས་ནས་དུས་ཆེན་སྲུང་བརྩི་ཞུས་སོང་། སྐབས་དེར་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་གིས་བོད་མི་ཡོངས་ཀྱི་ཚབ་ཞུས་ཏེ་དེ་རིང་ཉིན་མོ་འདིར་རྒྱ་གར་གཞུང་མང་ཡོངས་ལ་དགའ་བསུའི་འཚམས་འདྲི་གནང་པ་དང་འབྲེལ། རྒྱ་གར་རྒྱལ་ཁབ་དེ་མང་གཙོའི་ལམ་ལུགས་འོག་འདས་པའི་ལོ་ངོ་ ༦༠ ལྷག་རིང་ཆོས་ལུགས་དང་སྐད་ཡིག་འདྲ་མིན་ཐོག་མཉམ་གནས་ཐུབ་པ་དེ་ནི་བྱེད་རྗེས་ཆེན་པོ་ཞིག་ལ་ངོས་འཛིན་ཞུ་བཞིན་ཡོད་ཅེས་རྒྱ་གར་གཞུང་མང་གཉིས་ལ་ཆེ་བསྟོད་གནང་སོང་། སྔ་ཐོག་མཛད་སྒོ་གྲུབ་བསྟུན། སྔ་དྲོ་ཚོུད་ ༡༡།༠༠ ཐོག་སྲིད་སྐྱོང་མཆོག་ས་གནས་ཀྱི་ཉེན་རྟོག་ལས་ཁུངས་སུ་རྒྱ་གར་ས་གནས་གཞུང་གིས་མཛད་སྒོར་ལྷན་ཞུགས་ཀྱིས་དཔོན་རིགས་ཁག་ཅིག་དང་མཇལ་འཕྲད་ཡང་གནང་འདུག

དེའང་རྡ་སྟེང་བོད་ཁྱིམ་གྱི་ཉེ་འཁྲིས་སུ་ཡོད་པའི་ཨིནྡྲ་པྲཱ་སི་ཐ་གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་ཕྱི་དྲིལ་རྒྱ་ཡིག་ཚན་པའི་གོ་སྒྲིག་འོག བོད་མིའི་སྒྲིག་འཛུགས་ཀྱི་རྒྱ་རིགས་ལས་དོན་དང་འབྲེལ་བའི་ལོ་འཁོར་ཚོགས་འདུ་ཐེངས་བཞི་པ་དབུ་འཛུགས་གནང་ཡོད། ཚོགས་འདུ་ཐེངས་བཞི་པ་དེའི་ཐོག་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོ་སྲིད་སྐྱོང་བློ་བཟང་སེངྒེ་མཆོག་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས། ཕྱི་དྲིལ་རྒྱ་ཡིག་ཚན་པའི་ལས་བྱེད་པ། ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས། ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས། ཐེ་ཝན་སྐུ་ཚབ་དོན་ཁང་གི་ལས་བྱེད་བསོད་ནམས་རྡོ་རྗེ་ལགས། ཐེ་ཝན་བདེ་དོན་ཚོགས་པའི་ཚོགས་གཙོ་བཀྲིས་ཚེ་རིང་ལགས་བཅས་ཀྱིས་དབུས་པའི་བོད་མིའི་སྒྲིག་འཛུགས་ཀྱི་འབྲེལ་ཡོད་ལས་བྱེད་ཁག་ཅིག དེ་མིན་ཨ་རི་དང་ཡུ་རོབ། ཐེ་ཝན་བཅས་ཀྱི་ནང་ཡོད་པའི་རྒྱ་ཡིག་དང་རྒྱ་སྐད་ཤེས་མཁན་མི་སྣའི་སྐུ་ཚབ་ཁག་ཅིག བཞུགས་སྒར་དུ་རྟེན་གཞི་བྱས་པའི་འབྲེལ་ཡོད་ཚོགས་ཁག་གི་སྐུ་ཚབ། ཏཱ་ལའི་བླ་མའི་མཐོ་སློབ་ཏུ་རྒྱ་ཡིག་སློབ་སྦྱོང་གནང་མཁན་སློབ་ཕྲུག་ཁག་ཅིག ལྡི་ལིའི་ཤར་ཨེ་ཤི་ཡའི་ཞིབ་འཇུག་ལྟེ་གནས་ཁང་ནས་ཚོགས་བཅར་བ་བཅས་མི་གྲངས་ ༤༠ སྐོར་ཞིག་མཉམ་ཞུགས་གནང་འདུག དབུ་བྱེད་ཀྱི་མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྟག་ཏུ་ལམ་སྟོན་བཀའ་སློབ་ཕེབས་དོན་ལྟར། བོད་མིའི་སྒྲིགས་འཛུགས་ཀྱི་ངོས་ནས་རྒྱ་རིགས་འབྲེལ་མཐུད་ཀྱི་ལས་དོན་དེ་ལས་དོན་གཙོ་ཆེར་ངོས་འཛིན་ཞུ་བཞིན་ཡོད་པ་དང་། ད་ལྟའི་ཆར་ཨ་རིའི་ནང་དུ་རྒྱ་རིགས་ཧ་ལམ་ས་ཡ་གསུམ་ཙམ་དང་། དེ་བཞིན་ཡུ་རོབ་དང་ཨོ་སི་ཊོ་ལི་ཡ། ཐེ་ཝན། ཧོང་ཀོང་སོགས་ཕྱི་སྡོད་རྒྱ་རིགས་ཧ་ཅང་མང་པོ་ཡོད་སྟབས། རྒྱ་རིགས་འབྲེལ་མཐུད་པ་གཅིག་པུས་རྒྱ་རིགས་ཕོན་ཆེར་སྙོབ་ཐུབ་རྒྱུ་ཁག་པོ་ཡིན་སྟབས། ང་ཚོས་མི་མང་བརྒྱུད་རྒྱ་རིགས་དང་འབྲེལ་བ་བྱེད་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད་པ་མ་ཟད། དེའང་རྒྱ་རིགས་རྣམས་ཀྱི་གཞི་རྩའི་བསམ་བློ་གཏོང་ཕྱོགས་དང་།...

བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་པའི་ཚན་པས་གོ་སྒྲིག་འོག་བོད་ནང་གི་རིག་གནས་གསར་བརྗེ་ལ་བསྐྱར་བལྟ་བྱེད་པ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གནང་སྟེ་རྒྱ་གཞུང་གིས་བོད་ས་ཡོངས་ལ་རིག་གནས་གསར་བརྗེ་ལས་འགུལ་སྤེལ་ནས་ལོ་ངོ་ ༥༠ ཐམ་པ་འཁོར་བར་དྲན་གསོ་ཞུས་པ་དང་ཆབས་ཅིག བོད་ནང་ལ་ད་དུང་ཡང་རྒྱ་གཞུང་གིས་རིག་གནས་གསར་བརྗེ་ལག་བསྟར་སྤེལ་བཞིན་པའི་ཤུགས་རྐྱེན་ལྷག་ཡོད་ཅེས་གསུངས་སོང་། དེ་རིང་ཟླ་ ༡༠ ཚེས་ ༢༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཆེད་ཕེབས་ཀྱིས་དབུ་བཞུགས་ཐོག་བོད་ནང་གི་རིག་གནས་གསར་བརྗེ་ལ་བསྐྱར་བལྟ་བྱེད་པ་ཞེས་པའི་པར་རིས་འགྲེམས་སྟོན་དབུ་འབྱེད་ཀྱི་མཛད་སྒོ་ཚོགས་གནང་སོང་། མཛད་སྒོའི་ཆེས་ཐོག་མར་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲིས་ཕུན་ཚོགས་ལགས་ཀྱིས་ད་རེས་འགྲེམས་སྟོན་དེ་ལྟར་གནང་པའི་དགོས་དམིགས་གཙོ་བོ་ནི་བོད་ནང་རིག་གསར་བརྗེའི་རླུང་ཚུབ་བསླེབས་ནས་མི་ལོ་ ༥༠ ཐམ་པ་འཁོར་བར་དུས་དྲན་ཞུས་པ་དང་བསྟུན་རྒྱལ་སྤྱིའི་མང་ཚོགས་ཚོས་དུས་དེའི་ཚེ་བོད་ནང་བྱུང་བའི་དངོས་ཡོད་གནས་ཚུལ་ཁག་ངོ་སྤྲོད་ཞུ་རྒྱུར་ཆེད་དམིགས་གནང་པ་ཞིག་ཡིན་སྐོར་གསུངས་པ་འབྲེལ་བོད་ནང་ལ་ད་དུང་ཡང་རྒྱ་གཞུང་གིས་རིག་གནས་གསར་བརྗེ་ལག་བསྟར་སྤེལ་བཞིན་པའི་ཤུགས་རྐྱེན་ལྷག་ཡོད་ཅེས་གསུངས་སོང་། སྐུ་མགྲོན་གཙོ་བོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་འཛམ་གླིང་ཐོག་གསར་བརྗེ་བྱེད་སྟངས་མང་པོ་ཡོད་ཀྱང་། དེ་སྔ་རྒྱ་གཞུང་གིས་བོད་ས་ཡོངས་ལ་སྤེལ་བའི་གསར་བརྗེ་དེ་ནི་རྒྱུ་མཚན་དང་ཁུངས་ལུང་གང་ཡང་མེད་པའི་ལྐུག་རྟགས་ཤིག་རེད་ཅེས་གསུངས་པ་མ་ཟད། ལྷག་དོན་རྒྱ་གཞུང་གིས་དེ་སྔ་བོད་ལ་སྤེལ་བའི་བྱེད་ངན་དེ་ལམ་ལྷོངས་བྱུང་མེད་པ་ར་ཕྲོད་ནས་བོད་ནང་གི་བོད་མིའི་སེམས་ཁོངས་ཀྱི་མངོན་འདོད་ལ་གཞིགས་པའི་སྲིད་བྱུས་འཛིན་དགོས་པ་གསུངས་སོང་། བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པས་བཞུགས་སྒར་བོད་ཀྱི་འགྲེམས་སྟོན་ཁང་དུ་པར་རིས་འགྲེམས་སྟོན་དེ་ཟླ་བ་ ༤ རིང་གནང་རྒྱུ་ཡིན་པ་དང་། རིང་མིན་རྒྱ་གར་གྱི་རྒྱལ་ས་ལྡི་ལིར་དེ་ལྟ་བུའི་འགྲེམས་སྟོན་ཞིག་གོ་སྒྲིག་གནང་འཆར་ཡོད་པ་རེད་འདུག གཞི་རྩའི་ཕྱི་ལོ་ ༡༩༦༦ ལོ་ནས་ ༡༩༧༦ བར་ལོ་བཅུའི་རིང་རྒྱ་ནག་དམར་པོའི་གཞུང་གིས་བོད་ས་ཁྱོན་ཡོངས་ལ་རིག་གནས་གསར་བརྗེ་ཟེར་བའི་ལས་འགུལ་ཤུགས་ཆེ་སྤེལ་ཏེ་བསམ་བློ་རྙིང་པ་དང་། རིག་གཞུང་རྙིང་པ། ཡུལ་སྲོལ་རྙིང་པ་། དེ་བཞིན་གོམས་གཤིས་རྙིང་པ་བཅས་རྙིང་པ་བཞི་གཏོར་བཤིག་ཟེར་ནས་བོད་ཀྱི་ཆོས་དང་རིག་གཞུང་། དེ་བཞིན་སྲོལ་རྒྱུན་གོམ་གཤིས་སོགས་མི་རིགས་ཀྱི་ངོ་བོ་མཚོན་པ་བོད་ནང་གི་དགོན་ཁག་ ༦༠༠༠...

བཙན་འབྱོལ་བོད་མིའི་ཉམ་ཐག་ལྟ་ཞིབ་ཚོགས་ཆུང་གི་ཚོགས་གཙོ་བཀའ་ཟུར་ཚེ་རིང་ཕུན་ཚོགས་མཆོག་གིས་བོད་མིའི་སྒྲིག་འཛུགས་ཀྱི་ངོས་ནས་འདས་པའི་ལོ་བཅུའི་ནང་བཙན་བྱོལ་བོད་མིའི་སྤྱི་ཚོགས་ཁྲོད་དངོས་ཡོད་ཀྱི་ཉམ་ཐག་ཡིན་མིན་དབྱེ་ཞིབ་གནང་ཐུབ་མེད་པ་གསལ་པོ་ཞིག་རེད་འདུག་ཅེས་གསུངས་སོང་། དེའང་འདི་ལོའི་ཕྱི་ཟླ་ ༣ ཚེས་ ༢༣ ཉིན་ ༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཕྱི་ལོ་ ༡༩༡༦ ལོར་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༠ ཐམ་པ་འཁོར་བའི་སྲུང་བརྩིའི་མཛད་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་སྨན་རྩིས་ཁང་གི་བོད་སྨན་སྡེ་ཚན་གཉིས་ནས་ས་གནས་མང་ཚོགས་ཀྱི་འཕྲོད་བསྟེན་སྔོན་འགོག་དང་ཉམ་ཐག་ལྟ་སྐྱོང་ཐད་འཐུས་ཤོར་ཕྱིན་ཡོད་པའི་བཀའ་སློབ་ལྕི་མོ་ཞིག་ཕེབས་ཡོད་པར་བརྟེན། དེ་དོནའཛིན་སྐྱོང་བཀའ་ཤག་གི་ངོས་ནས་ནད་རིགས་སྔོན་འགོག་དང་ཉམ་ཐག་ལྟ་ཞིབ་སླད་དུ་ཟུར་དུ་དམིགས་བསལ་ཚོགས་ཆུང་ཞིག་ཆེད་བཙུགས་གནང་ཡོད་པ་རེད། ཉམ་ཐག་ལྟ་ཞིབ་ཚོགས་ཆུང་གི་ཉམས་ཞིབ་ལས་དོན་དེ་འདི་ལོའི་ཟླ་ ༤ ཚེས་ ༢༩ ཉིན་བཀའ་ཟུར་ཚེ་རིང་ཕུན་ཚོགས་མཆོག་གིས་སྣེ་ཁྲིད་པའི་འོག་ནང་སྲིད་དྲུང་ཟུར་བཀྲིས་ཕུན་ཚོགས་ལགས།  ནང་སྲིད་དྲུང་འཕར་ཚེ་དབང་སྒྲོལ་མ་ལགས། འཕྲེད་བསྟེན་དྲུང་འཕར་ཚེ་དབང་དངོས་འགྲུབ་ལགས་དང་ཤེས་རིག་ཟུང་དྲུང་འཆི་མེད་ཚེ་དབྱངས་ལགས་བཅས་མི་ལྔ་ཡོད་པའི་ཚོགས་ཆུང་དེས་ཉམ་ཐག་ལྟ་སྐྱོང་གི་ཉམས་ཞིབ་ལས་དོན་དབུ་འཛུགས་གནང་ཡོད་པ་དང་། ཉེ་བའི་ཆར་འདས་པའི་ཟླ་བ་གསུམ་ལྷག་ནང་གི་ཉམ་ཐག་ཉམས་ཞིབ་ལས་དོན་གནང་པའི་གྲུབ་དོན་ཇི་སོན་གྱི་སྙནན་ཐོ་ཞིག་འཛིན་སྐྱོང་བཀའ་ཤག་ལ་ཕུལ་འདུག

ཁ་སང་ཕྱི་ཟླ་༩པའི་ཚེས་༥ཉིན་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ནང་དུ་རྟེན་གཞི་བྱས་པའི་སྦིར་བོད་ཁམས་བཟོ་གཞིས་དབུ་བརྙེས་ནས་ལོ་ངོ་༥༠འཁོར་བའི་དུས་དྲན་མཛད་སྒོ་ཚོགས་གནང་འདུག མཛད་སྒོའི་སྐུ་མགྲོན་ཁོངས་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཀི་ཤོར་རི་ལལ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་ལས་ཚབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་བསྟན་འཕེལ་མཆོག་གིས་དབུས་པའི་སྤྱི་འཐུས་ཚོགས་གཞོན་མཆོག་དང་རྒྱུན་ལས་རྣམ་པ། ནང་སྲིད་དྲུང་ཆེ་ལས་ཚབ་འཆི་མེད་རིག་འཛིན་ལགས་བཅས་གདན་ཞུས་ཕུལ་འདུག བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་གནས་ཐོག་དེ་དོན་གནས་ཚུལ་སྤེལ་བར། ཉིན་དེའི་མཛད་སྒོའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པའི་༸སྐུ་པར་མཐོང་གྲོལ་རིན་པོ་ཆེར་སྐུ་མགྲོན་རྣམ་པས་མཇལ་དར་ཕུལ་བ་དང་། སྤྲུལ་སྐུ་ཨོ་རྒྱན་སྟོབས་རྒྱལ་རིན་པོ་ཆེ་མཆོག་གིས་བོད་ཁམས་བཟོ་གཞིས་ཚོགས་པའི་ལོ་རྒྱུས་དངོས་ཀྱི་རྒྱབ་ལྗོངས་དང་འབྲེལ་བའི་ཐོག་ནས་གསུང་བཤད་དབུ་འཛུགས་གནང་འདུག དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དུས་དྲན་ཐོག་འཚམས་འདྲིའི་གསུང་བཤད་གནང་པའི་ཁྲོད། གཏེར་ཆེན་མཆོག་གླིང་པ་སྐུ་ཕྲེང་གསུམ་པ་པདྨ་འགྱུར་མེད་རྒྱ་མཚོ་མཆོག་དང་། ཆུ་སྒང་དམག་སྤྱི་ཟུར་པ་སྐབས་དེའི་མདོ་སྟོད་སྤྱི་འཐུས་བྱ་རྒོད་རྣམ་རྒྱལ་རྡོ་རྗེ་ལགས་གཉིས་ནས་ཕུགས་རྒྱང་རིང་པོའི་དགོངས་བཞེས་ཀྱིས་ས་ཆ་སྤུས་གཟིགས་དང་། དེ་རྗེས་གཞིས་ཆགས་འཛུགས་བསྐྲུན་ཙམ་མ་ཟད། གཞིས་ཆགས་འདིའི་དབུ་དབྱེད་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བཀའ་དྲིན་བསྐྱངས་ཡོད་པ་བཅས་གཞིས་ཆགས་ཐོག་མར་གསར་འཛུགས་གནང་མཁན་དང་དེའི་ཚེ་དེའི་དུས་ཀྱི་མི་རབས་རྒན་པའི་མཛད་རྗེས་སྐོར་གསུངས་ཏེ། གཞིས་ཆགས་འདིས་བོད་མི་རིགས་ཀྱི་བསྟན་པ་ཆབ་སྲིད་ལ་ཞབས་འདེགས་ཧུར་སྐྱེད་ཞུས་ཡོད་པའི་ངོས་འཛིན་བྱེད་ཀྱི་ཡོད་པ་གསུངས་བཤད་གནང་འདུག ད་དུང་དམིགས་བསལ་མཆོག་གིས་འདས་པའི་ལོ་ ༥༠ ཐམ་པའི་བྱུང་རབས་རྣམས་དྲན་གསོ་དང་སྦྲགས། གལ་ཆེ་བ་མ་འོངས་པར་གཞིས་ཆགས་འདིའི་འཛིན་སྐྱོང་ཡིན་ནའང་འདྲ། བོོད་མིའི་ཆོས་རིག་དང་། སྐད་ཡིག་གོམས་གཤིས་སོགས་ལ་འཐུས་ཤོར་མེད་པར་རྒྱུན་འཛིན་བྱེད་ནས་ཡར་རྒྱས་ཚགས་ཚུད་ཡོང་ཐབས་སུ་འབད་བརྩོན་བྱེད་དགོས་རྒྱུ་དང་། དེ་བཞིན་བོད་མིའི་འཐབ་རྩོད་ཐོག་ལའང་ཐུགས་སྣང་གནང་དགོས་རྒྱུ་གལ་ཆེ་ཡིན་པའི་སྐོར་སོགས་གསུངས་འདུག ཁ་སང་གི་མཛད་སྒོ་དེའི་ཐོག་སྐུ་མགྲོན་གཞན་རྣམ་པས་གསུང་བཤད་དང་དེ་རྗེས་གཞས་སྣ་འཁྲབ་སྟོན་བཅས་གཟིགས་འབུལ་ཞུས་ཡོད་པ་རེད་འདུག དུས་དྲན་གོ་སྒྲིག་ཚོགས་པས་ད་རེས་སྦིར་བོད་ཁམས་བཟོ་གཞིས་དབུ་བརྙེས་ནས་ལོ་ངོ་༥༠འཁོར་བའི་དུས་དྲན་དེ་བཞིན་དེ་རིང་བར་ཁྱོན་ཉིན་གསུམ་རིང་སྲུང་བརྩི་ཞུས་ཀྱི་ཡོད་པ་རེད་འདུག

དེ་རིང་ཟླ་ ༤ ཚེས་ ༤ ཉིན་གྱི་སྔ་དྲོ་ཚོུད་ ༩།༠༠ སྟེང་གངས་སྐྱིད་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་དཔལ་འབྱོལ་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩ་དང་དབྱིན་ཡུལ་བོད་ཀྱི་ཐེབས་རྩ་གཉིས་ཟུང་སྦྲེལ་གྱིས་གོ་སྒྲིག་འོག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གཙོས་ བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་འཆར་འགོད་ཚན་པའི་ལས་བྱེད་དང་རྩིས་པ་ཁག་གཅིག་བཅས་ལ་ཡུ་རོབ་མཐུན་ཚོགས་སུ་རོགས་དངུལ་ཞུ་ཆེད་ལས་འཆར་བཀོད་སྒྲིག་བྱེད་ཕྱོགས་དང་འབྲེལ་བའི་ཟབ་སྦྱོང་དབུ་འཛུགས་གནང་སོང་། སྐབས་དེར་ཟབ་སྦྱོང་གོ་སྒྲིག་གནང་མཁན་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་དངོས་གྲུབ་རྡོ་རྗེ་ལགས་ཀྱིས་གསུང་དོན་། ལྷན་ཁང་སོ་སོའི་ནང་གི་ལས་འཆར་ཚན་པའི་ངོས་ནས་ལོ་ལྔའི་ནང་ལྷན་ཁང་སོ་སོའི་འཆར་སྣང་དང་འཆར་གཞི་སྔོན་སྒྲིག་གནང་དགོས་རྒྱུ་གལ་ཆེན་པོ་འདུགས་ཅེས་གསུངས་ཡོད་པ་རེད། གཞི་རྩའི་ཐེངས་འདིའི་ཟབ་སྦྱོང་འདི་ནི་དེ་རིང་ནས་ཉིན་གྲངས་ལྔའི་རིང་ཚོགས་གནང་གི་འདུག་པ་དང། དེའི་དགོས་དམིགས་གཙོ་བོ་ནི་སྲི་ཞུ་བ་རྣམས་ལ་ཡོ་རོབ་མཐུན་ཚོགས་ཀྱི་བརྒྱུད་ནས་ལས་འཆར་ཁག་ལ་རོགས་དངོལ་དངུལ་ཞུ་ཕྱོགས་གཙོས་པའི་ལས་འཆར་འཆར་བགོད་དང་དབྱེ་ཞིབ། དེ་བཞིན་བོད་མིའི་སྒྲིག་འཛུགས་ཀྱི་སྔོན་རྩིས་ནང་རྩིས་འགོའི་མིང་འདོགས་སྟངས་དེ་དག་ཡུ་རོབ་མཐུན་ཚོགས་དང་མཐུན་པ་ཞིག་བཟོ་ཐུབ་ཐབས་དང་འདི་བཞིན་མཇུག་སྐྱོང་གནང་ཕྱོགས་སོགས་ཀྱི་ཐད་ལ་ཟབ་སྦྱོང་གནང་གི་འདུག