བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་པའི་ཚན་པས་གོ་སྒྲིག་འོག་བོད་ནང་གི་རིག་གནས་གསར་བརྗེ་ལ་བསྐྱར་བལྟ་བྱེད་པ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གནང་སྟེ་རྒྱ་གཞུང་གིས་བོད་ས་ཡོངས་ལ་རིག་གནས་གསར་བརྗེ་ལས་འགུལ་སྤེལ་ནས་ལོ་ངོ་ ༥༠ ཐམ་པ་འཁོར་བར་དྲན་གསོ་ཞུས་པ་དང་
ཆབས་ཅིག བོད་ནང་ལ་ད་དུང་ཡང་རྒྱ་གཞུང་གིས་རིག་གནས་གསར་བརྗེ་ལག་བསྟར་སྤེལ་བཞིན་པའི་ཤུགས་རྐྱེན་ལྷག་ཡོད་ཅེས་གསུངས་སོང་།
དེ་རིང་ཟླ་ ༡༠ ཚེས་ ༢༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཆེད་ཕེབས་ཀྱིས་དབུ་བཞུགས་ཐོག་བོད་ནང་གི་རིག་གནས་གསར་བརྗེ་ལ་བསྐྱར་བལྟ་བྱེད་པ་ཞེས་པའི་པར་རིས་འགྲེམས་སྟོན་དབུ་འབྱེད་ཀྱི་མཛད་སྒོ་ཚོགས་གནང་སོང་།
མཛད་སྒོའི་ཆེས་ཐོག་མར་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པའི་འ
གན་འཛིན་བཀྲིས་ཕུན་ཚོགས་ལགས་ཀྱིས་ད་རེས་འགྲེམས་སྟོན་དེ་ལྟར་གནང་པའི་དགོས་དམིགས་གཙོ་བོ་ནི་བོད་ནང་རིག་གསར་བརྗེའི་རླུང་ཚུབ་བསླེབས་ནས་མི་ལོ་ ༥༠ ཐམ་པ་འཁོར་བར་དུས་དྲན་ཞུས་པ་དང་བསྟུན་རྒྱལ་སྤྱིའི་མང་ཚོགས་ཚོས་དུས་དེའི་ཚེ་བོད་ནང་བྱུང་བའི་དངོས་ཡོད་གནས་ཚུལ་ཁག་ངོ་སྤྲོད་ཞུ་རྒྱུར་ཆེད་དམིགས་གནང་པ་ཞིག་ཡིན་སྐོར་གསུངས་པ་འབྲེལ་བོད་ནང་ལ་ད་དུང་ཡང་རྒྱ་གཞུང་གིས་རིག་གནས་གསར་བརྗེ་ལག་བསྟར་སྤེལ་བཞིན་པའི་ཤུགས་རྐྱེན་ལྷག་ཡོད་ཅེས་གསུངས་སོང་།
སྐུ་མགྲོན་གཙོ་བོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་འཛམ་གླིང་ཐོག་གསར་བརྗེ་བྱེད་སྟངས་མང་པོ་ཡོད་ཀྱང་། དེ་སྔ་རྒྱ་གཞུང་གིས་བོད་ས་ཡོངས་ལ་སྤེལ་བའི་གསར་བརྗེ་དེ་ནི་རྒྱུ་མཚན་དང་ཁུངས་
ལུང་གང་ཡང་མེད་པའི་ལྐུག་རྟགས་ཤིག་རེད་ཅེས་གསུངས་པ་མ་ཟད། ལྷག་དོན་རྒྱ་གཞུང་གིས་དེ་སྔ་བོད་ལ་སྤེལ་བའི་བྱེད་ངན་དེ་ལམ་ལྷོངས་བྱུང་མེད་པ་ར་ཕྲོད་ནས་བོད་ནང་གི་བོད་མིའི་སེམས་ཁོངས་ཀྱི་མངོན་འདོད་ལ་གཞིགས་པའི་སྲིད་བྱུས་འཛིན་དགོས་པ་གསུངས་སོང་།
བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པས་བཞུགས་སྒར་བོད་ཀྱི་འགྲེམས་སྟོན་ཁང་དུ་པར་རིས་འགྲེམས་སྟོན་དེ་ཟླ་བ་ ༤ རིང་གནང་རྒྱུ་ཡིན་པ་དང་། རིང་མིན་རྒྱ་གར་གྱི་རྒྱལ་ས་ལྡི་ལིར་དེ་ལྟ་བུའི་འགྲེམས་སྟོན་ཞིག་གོ་སྒྲིག་གནང་འཆར་ཡོད་པ་རེད་འདུག
གཞི་རྩའི་ཕྱི་ལོ་ ༡༩༦༦ ལོ་ནས་ ༡༩༧༦ བར་ལོ་བཅུའི་རིང་རྒྱ་ནག་དམར་པོའི་གཞུང་གིས་བོད་ས་ཁྱོན་ཡོངས་ལ་རིག་གནས་གསར་བརྗེ་ཟེར་བའི་ལས་འགུལ་ཤུགས་ཆེ་སྤེལ་ཏེ་བསམ་བློ་རྙིང་པ་དང་། རིག་གཞུང་རྙིང་པ། ཡུལ་སྲོལ་རྙིང་པ་། དེ་བཞིན་གོམས་གཤིས་རྙིང་པ་བཅས་རྙིང་པ་བཞི་གཏོར་བཤིག་ཟེར་ནས་བོད་ཀྱི་ཆོས་དང་རིག་གཞུང་། དེ་བཞིན་སྲོལ་རྒྱུན་གོམ་གཤི
ས་སོགས་མི་རིགས་ཀྱི་ངོ་བོ་མཚོན་པ་བོད་ནང་གི་དགོན་ཁག་ ༦༠༠༠ ལྷག་རྩ་གཏོར་བཏང་པ་དང་། རྩ་ཆེན་རིག་དངོས་གྲངས་ལས་འདས་པ་རྒྱ་ནག་ཏུ་འོར་འདྲེན་བྱས་པ་མ་ཟད། དེ་བཞིན་བོད་མི་ཁྲི་ ༩ ལྷག་འཐབ་འཛིང་འོག་འདས་གྲོངས་ཕྱིན་པ་དང་། འབུམ་གཅིག་ལྷག་བཙོན་ནང་ངལ་རྩོལ་བསྒྱུར་བཀོད་འོག་འདས་གྲོངས་སུ་གྱུར་སྟབས་བོད་ཀྱི་ལོ་རྒྱུས་ཁྲོད་ཀྱི་ཆེས་མུག་ནག་གི་དུས་ཚིགས་ཤིག་ལ་ངོས་འཛིན་ཞུ་བཞིན་ཡོད།
དེ་རྗེས་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་རྒྱ་གཞུང་གིས་རིག་གནས་གསར་བརྗེ་ལས་འགུལ་མཇུག་སྒྲིལ་ནས་ལོ་ ༤༠ འགྲོ་ཡི་ཡོད་རུང་། བོད་ནང་ལ་ད་ལྟ་ཡིན་ཡང་དེ་སྔའི་རིག་གནས་གསར་བརྗེའི་སྐབས་སུ་བྱེད་སྟངས་ངན་པ་རྣམས་མུ་མཐུད་ནས་ལག་བསྟར་བྱེད་བཞིན་ཡོད་པ་མ་ཟད། ལྷག་པར་དུ་ད་སྐབས་རྒྱ་གཞུང་གིས་རིག་གནས་གསར་བརྗེའི་སྐོར་གླེང་སློང་དང་ཞིབ་འཇུག རྗེས་དྲན་བྱེད་མཁན་རིགས་ལ་དམིགས་བསལ་བཀག་བསྡོམ་བྱེད་མུས་ཡིན་སྐོར་གསུངས་སོང་།
རྩ་བའི་ད་རེས་ཀྱི་འགྲེམས་སྟོན་ལས་གཞི་དེའི་སྐབས་དེ་སྔའི་རིགས་གནས་གསར་བརྗེའི་སྐབས་བོད་ཀྱི་ཆོལ་ཁ་གསུམ་ནང་རྒྱ་གཞུང་གི་བཙོན་ཁང་དུ་དཀའ་སྡུག་མྱངས་པའི་སྤྱི་ཟུར་རྨེའུ་མགོན་པོ་མཚོ་ལགས་དང་། ཚེ་རིང་སྟོབས་རྒྱལ་ལགས། བློ་བཟང་ཡོན་ཏན་ལགས་བཅས་བོད་མི་རྒན་རབས་གསུམ་གདན་ཞུས་ཀྱིས་དེའི་སྔའི་རིགས་གསར་བརྗེའི་དུས་ཚོད་དྲན་གསོ་དང་འབྲེལ་བའི་བགྲེ་གླེང་ལས་རིམ་ཞིག་ཀྱང་ཚོགས་ཡོད་པ་རེད།
