༸གོང་ས་མཆོག་གིས་ནང་ཆོས་ལ་སློབ་གཉེར་གནང་ནས་དབང་རྣོན་ཆོས་ཀྱི་རྗེས་འབྲང་ཞིག་བྱ་དགོས་པ་བཀའ་བསྩལ་བ།

  བོད་ཀྱི་བླ་ན་མེད་པའི་དབུ་ཁྲིད་༸སྤྱི་ནོར་གོང་ས་༸སྐྱབས་མགོན་ཆེན་པོ་མཆོག་གིས་དབུ་མ་བཞི་བརྒྱ་པའི་བཀའ་ཆོས་ཉིན་གསུམ་པའི་ཐོག་ནང་ཆོས་ལ་དད་པ་གཅིག་པོའི་ཐོག་ནས་ཕྱིན་ཚེ་སངས་རྒྱས་པའི་ཆོས་དེ་ཡུན་ཇི་ཙམ་རིང་པོ་གནས་མིན་བརྗོད་དཀའ་བ་རེད་ཅེས་བཀའ་སྩལ་མཛད་སོང་། དེ་རིང་ཟླ་ ༡༠ ཚེས་ ༥ ཉིན་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གཙོ་བོར་གྱུར་པའི་ཕྱི་ནང་གི་དད་ལྡན་མང་ཚོགས་ཆོས་ཞུ་བ་རྣམས་ལ་འཕགས་པ་ལྷས་མཛད་པའི་དབུ་མ་བཞི་བརྒྱ་པའི་ཉིན་གསུམ་པའི་བཀའ་ཆོས་འཕྲོ་སྐྱོང་མཛད་པའི་ཁྲོད། ༸གང་ཉིད་མཆོག་གིས་ཐོག་མར་ཆོས་ཞུ་བ་ཚོར་སྔོན་འགྲོའི་ཆོས་བཤད་མཛད་པར་༸གང་ཉིད་མཆོག་ནས་སློབ་དཔོན་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་མཇུག་ཏུ་སྟོན་པའི་བཀའ་དྲིན་དྲན་པའི་སྒོ་ནས་བསྟོད་ཕྱག་མཛད་པའི་ཚིགས་བཅད། གང་གིས་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་ནི་སྟོན་མཛད་པ། །གཽ་ཏམ་དེ་ལ་ཕྱག་འཚལ་ལོ། །ཞེས་པ་གསུང་འདོན་གྱིས་བསྟོད་ཕྱག་ཚིགས་བཅད་དང་འབྲེལ་ནས་བཀའ་སློབ་སྩལ་དོན། ནང་པ་སངས་རྒྱས་པའི་ཆོས་ཙམ་མིན་པར་འཛམ་གླིང་འདིའི་སྟེང་ཡོད་པའི་ཆོས་ལུགས་གཞན་གྱི་སྟོན་པ་ཕལ་མོ་ཆེ་སྙིང་རྗེའི་ཀུན་ནས་སློང་བ་ཞིག་ཡིན་པ་མཚུངས་ཀྱང་། བདག་ཅག་གི་སྟོན་པ་ཤཱཀྱ་ཐུབ་པ་ནི་སྟོན་པ་གཞན་དང་མི་གཅིག་པར་སྡུག་བསྔལ་ཡོང་བའི་རྒྱུ་བྱེད་མཁན་གྱི་ལྟ་བ་ཐམས་ཅད་སྤངས་པ་དང་། རྟེན་འབྱུང་གྱི་ལྟ་བ་རང་དབང་གི་སྒོ་ནས་སྡོམ་པར་མཛད་མཁན་བདག་ཉིད་ཅན་ཞིག་ཡིན་སྐོར་སོགས་གསུངས་ཏེ་སངས་རྒྱས་ཀྱི་ཆེས་ངོ་མཚར་ཆེ་བའི་ཡོན་ཏན་རྣམས་ངོ་སྤྲོད་གནང་པ་དང་འབྲེལ།  ལྷག་དོན་མགོན་པ་མཆོག་གིས་དེ་ལྟ་བུ་སྟོན་པ་དེ་མཐར་མངོན་པར་རྫོགས་པ་སངས་རྒྱས་པ་ལྟར། ང་རང་ཚོ་ལའང་སངས་རྒྱས་ཀྱི་སར་སླེབས་ཐུབ་པའི་ནུས་པ་གཅིག་མཚུངས་ཡོད་སྟབས།  ང་ཚོའི་ངོས་ནས་དེའི་རྒྱུ་གཙོ་བོ་བྱང་ཆུབ་ཀྱི་སེམས་ལ་བསམ་བློ་ཐོངས་དགོས་ཅེས་ལམ་སྟོན་མཛད་ཡོད་པ་རེད།   དེ་བཞིན་༸གོང་ས་མཆོག་གིས་ནང་པའི་རྗེས་འཇུག་རྣམས་ལ་ནང་པའི་ཆོས་ལས་གསུངས་པའི་ཆོས་ལ་འཇུག་པའི་རིམ་པ་གཉིས་ཡོད་པ་ནི་དབང་རྣོན་ཆོས་ཀྱི་རྗེས་འབྲང་དང་དབང་བརྟུལ་དད་པའི་རྗེས་འབྲང་བཅས་གཉིས་ཡོད་པ་ལས་དབང་བརྟུལ་དད་པའི་རྗེས་འབྲང་ཐོག་སངས་རྒྱས་པའི་ཆོས་ངོ་སྤྲོད་ཡག་པོ་ཞིག་བྱེད་ཚེ་ཆོས་དེ་ཕལ་ཆེར་དུས་རབས་བརྒྱ་ཕྲག་ཁ་ཤས་རིང་གནས་ཐུབ་ཀྱི་རེད། འོན་ཀྱང་དབང་བརྟུལ་དད་པའི་རྗེས་སུ་འབྲང་ནས་ཕྱིན་ཚེ་སངས་རྒྱས་པའི་ཆོས་དེ་ཡུན་ཇི་ཙམ་རིང་པོ་གནས་མིན་བརྗོད་དཀའ་བ་རེད་ཅེས་བཀའ་སྩལ་གནང་སོང་། ཆོས་འབྲེལ་གྱི་བར་མཚམས་ཤིག་ལ་ཐེ་ཝན་གྱི་དད་ལྡན་ཆོས་ཞུ་བ་ཚོས་༸གང་ཉིད་མཆོག་ལ་ནང་ཆོས་ཉམས་ལེན་གནང་ཕྱོགས་དང་། ཕུང་པོ་ལྔར་བཏགས་པའི་བདག་དོན་གང་ཡིན། རྟེན་འབྱུང་བཅས་ཀྱི་སྐོར་ལ་བཀའ་འདྲི་དགོངས་བསྐོར་ཞུས་ཡོད་པ་རེད། རྩ་བའི་༸གོང་ས་མཆོག་གིས་དབུ་མ་བཞི་བརྒྱ་པའི་ལེའུ་དྲུག་པ་ནས་འཕྲོ་སྐྱོང་མཛད་ཡོད་པ་དང་། སང་ཆོས་འབྲེལ་ཉིན་མཐའ་མའི་ཐོག་མགོན་པོ་མཆོག་གིས་ཆོས་ཞུ་བ་ཚོར་བྱང་ཆུབ་སེམས་པའི་སྡོམ་པ་འབོག་འཇོག་མཛད་རྒྱུ་ཡིན་འདུག

དེ་རིང་ཟླ་ ༦ ཚེས་ ༡ ཉིན་གྱི་སྔ་དྲོ་ཚོུད་ ༨།༣༠ སྟེང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་ས་ནང་ཆོས་ངོ་སྤྲོད་ཚོགས་ཆུང་དང་རྡ་སྟེང་བོད་ཁྱིམ་སློབ་གྲྭ་གཉིས་ནས་ཇི་ལྟར་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་སྨིན་བསྩལ་ཐོབ་སྟེ། མགོན་པོ་༸གང་ཉིད་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་པའི་སློབ་ཕྲུག་གཙོས་པའི་རྒྱལ་ཁབ་དྲུག་གི་སློབ་ཕྲུག་དང་། རྡ་སར་གཉུག་མར་གནས་པ་དང་གློ་བུར་ལྷགས་པའི་སེར་སྐྱ་མང་ཚོགས་སྟོང་ཕྲག་བརྒལ་བར་ནང་ཆོས་ངོ་སྤྲོད་ཐེངས་བཅུ་པའི་ཆོས་འབྲེལ་དབུ་འཛུགས་བསྐྱངས་གནང་སོང་། ༸གོང་ས་༸སྐྱབ་མགོན་ཆེན་པོ་མཆོག་བཞུགས་སྒར་ཕོ་བྲང་ནས་གཙུག་ལག་ཁང་དུ་ཆིབས་སྒྱུར་བསྐྱངས་ཏེ་བཞུགས་ཁྲིར་༸ཞབས་སོར་འཁོད་གྲུབ་བསྟུན། རྡ་ས་ནང་ཆོས་ངོ་སྤྲོད་ཚོགས་ཆུང་གི་ཚོགས་མི་ཁག་ཅིག་ནས་ཚན་རིག་དང་ལྟ་གྲུབ་སྐོར། བཞུགས་སྒར་ཉེ་འདབས་སུ་རྟེན་གཞི་བྱས་པའི་ཤེས་རབ་དགའ་ཚལ་སློབ་གླིང་གི་སློབ་མ་ཁག་ཅིག་ནས་ལས་འབྲས་བཅས་ཀྱི་བརྗོད་གཞི་ཐོག་ལ་སྐར་མ་ ༡༥ རིང་རིགས་ལམ་རྟགས་གསལ་སྤྱན་འབུལ་ཞུས་ཡོད། སྐབས་དེར་༸གོང་ས་མཆོག་གིས་ནང་ཆོས་ངོ་སྤྲོད་མ་གནང་པའི་གོང་ལ་བཀའ་བསྩལ་གནང་དོན། ནམ་རྒྱུན་ཡིན་ན་ནང་ཆོས་ངོ་སྤྲོད་དེ་རྡ་སྟེང་བོད་ཁྱིམ་དུ་ཚོགས་ཀྱི་ཡོད། ཕར་ཚུར་མོ་ཊའི་ནང་ཕྱིན་པ་ཡིན་ན་ཕལ་ཆེར་སྐར་མ་ཉི་ཤུ་དང་སུམ་ཅུ་ཙམ་འགོར་ནས་ཐང་ཆད་ནས་དུས་ཚོད་འཕྲོ་བརླག་འགྲོ་གི་ཡོད་པའི་བཟོ་འདྲ་འདུག གལ་ཆེ་ཤོས་དེ་ཐེག་ཆེན་ཆོས་གླིང་གཙུག་ལག་ཁང་འདིར་ཚོགས་པ་ཡིན་ན་འདིའི་ཉེ་འཁོར་ལ་ཡོད་པའི་མི་མང་མང་པོ་ཞིག་འདུ་འཛོམས་ཐུབ་རྒྱུར་ལས་སླ་བ་ཡོང་གི་འདུག་ཅེས་བཀའ་བསྩལ་གནང་སོང་། ད་དུང་མགོན་པོ་མཆོག་གིས་བོད་མིར་ཐུན་མོང་མ་ཡིན་པའི་རིགས་ལམ་སློབ་གཉེར་ཡོད་བཞིན་པ་དེ་བདག་པོ་རྒྱག་རྒྱུ་གལ་ཆིན་པོ་ཡིན་པ་དང་། ལྷག་པར་དུ་དེང་སྐབས་སློབ་གྲྭ་ཁག་གི་ནང་དུ་ཐོས་བྱུང་གི་ཤེས་རབ་གཅིག་པོའི་ཐོག་ནས་ཕྱིན་པ་ཡིན་ན་ནུས་པ་དེ་ཙམ་ཐོན་ཐུབ་ཀྱི་མེད་སྟབས། སློབ་སྦྱོང་གང་བྱེད་པ་དེ་སེམས་ལ་བརྟན་པོ་ངེས་ཆེད་རིགས་ལམ་སློབ་གཉེར་གནང་ཐུབ་པ་ཡིན་ན་ཕན་ཐོགས་ཆེན་པོ་ཡོད་སྐོར་བཀའ་གནང་སོང་། བོད་ལ་སངས་རྒྱས་ཀྱི་བསྟན་པ་ཐེག་པ་ཆེ་ཆུང་སྔགས་དང་བཅས་པ་ཆ་ཚང་གཅིག་ཡོད་ཀྱང་། བོད་པའི་མང་ཚོགས་ཁྲོད་སངས་རྒྱས་ཀྱི་བསྟན་པའི་གོ་དོན་རྟོགས་ནས་ཉམས་ལེན་ཐུབ་མཁན་དཀོན་པོ་ཡོད་སྟབས། དེ་དག་གི་ཐད་ལ་བོད་མི་རྒྱ་ཆེ་མང་ཚོགས་ཀྱིས་དོ་སྣང་བྱེད་དགོས་གལ་ཡིན་པ་མ་ཟད། ཆོས་དད་བྱེད་མིན་རང་དབང་ཡིན་ནའང། ཆོས་དད་བྱེད་པ་ཡིན་ན་ཆ་ཚང་བ་ཞིག་མེད་ན་གཟི་གརྗིད་ཁོག་སྟོང་ཆགས་ན་དགེ་མཚན་མེད་པ་རེད་ཅེས་བསྩལ་མཛད་ཡོད་པ་རེད། ལྷག་དོན་སློབ་ཕྲུག་ཚོའི་ངོས་ནས་ཤེས་ཡོན་གྱི་ཐོག་ནས་འཛམ་བུ་གླིང་སྤྱི་ལ་ཕན་ཐོགས་བྱེད་རྒྱུའི་གོ་སྐབས་བཟང་པོ་ཡོད་པ་དེ་ངེས་པར་དུ་དམ་འཛིན་གནང་དགོས་པའི་བཀའ་སློབ་ཟབ་ནན་ཕེབས་ཡོད། རྩ་བའི་༸གོང་ས་མཆོག་གིས་དབྱར་ཆོས་ཉིན་གྲངས་གསུམ་རིང་འབྲོམ་རྗེ་རྒྱལ་བའི་འབྱུང་གནས་ཀྱིས་མཛད་པའི་རང་རྒྱུད་ལ་སྐུལ་མ་འདེབས་པ་དད་པའི་ལྗོན་ཤིང་དང་། བཀའ་དབང་རྗེས་གནང་བཅས་ཀྱི་བཀའ་ཆོས་བཀྲིན་ཆེ་རྒྱུ་རེད་འདུག...

དེ་རིང་ཕྱི་ཟླ་ ༡༢ ཚེས་ ༣༡ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཆོས་སྡེ་བཀྲིས་ལྷུན་པོར་སྩོལ་བཞིན་པའི་ཆོས་འབྲེལ་ཉིན་བཅིུས་ཐོག་ཕྱི་ནང་གི་དད་ལྡན་ཆོས་ཞུ་བ་སེར་སྐྱ་མང་ཚོགས་ཁྲི་བཞི་ལྷག་ཉེ་བར་བཀའ་གདམས་ཐིག་ལེ་བཅུ་དྲུག་གི་དབང་བསྩལ་གྲུབ་པ་དང་བསྟུན། ནང་ཆོས་ལ་སློབ་གཉེར་གནང་ནས་དབང་རྣོན་ཆོས་ཀྱི་རྗེས་འབྲང་ཞིག་བྱ་དགོས་གལ་ཡིན་པ་བཀའ་བསྩལ་འདུག   སྐབས་དེར་༸གོང་ས་མཆོག་གིས་ཆོས་སྡེ་བཀྲིས་ལྷུན་པོར་འདས་པའི་ཆོས་འབྲེལ་གྱི་ཉིན་དེ་དག་རིང་འགེགས་མེད་ལམ་ལྷོངས་ཡོང་བ་ནི་དཀར་ཕྱོགས་སྐྱོང་བའི་ལྷ་དང་བཅས་པར་ལེགས་གསོའི་བསྔགས་བརྗོད་མཛད་ཡོད་པ་རེད། མགོན་པོ་༸གང་ཉིད་མཆོག་གིས་བཀའ་བསྩལ་དོན་ལ། ལོ་ཁ་ཤས་གོང་ནས་མགོ་བཙུགས་ཏེ་ལམ་རིམ་གྱི་ཁྲིད་ཆེན་བཅོ་བརྒྱད་ཀྱི་ཁྲིད་རྒྱུན་ཡོད་པ་དེ་དག་གཅིག་ཏུ་ལྡེབས་ནས་ཁྲིད་རྒྱུ་དེ་ཕལ་ཆེ་ངོས་ཀྱི་མི་ཚེ་གཅིག་ལ་ཚར་གཅིག་མ་གཏོགས་ཡོང་རྒྱུ་ཡོད་པ་མ་རེད། ད་ལྟ་ཚར་གཅིག་དེ་ཚར་ཟིན་པ་རེད། དེ་ཡང་འགལ་རྐྱེན་གང་ཡང་མེད་པར་ཞེ་དྲག་ཡག་པོ་བྱུང། གཙོ་བོ་དད་པ་དང་དམ་ཚིག་གཡོ་བ་མེད་པའི་ཐོག་ལ་ལས་དང་སྨོན་ལམ་གྱི་འབྲེལ་བ་ཡོད་པ་དང། དཀར་ཕྱོགས་སྐྱོང་བའི་སྲུང་མ་ཚོ་ལ་ཐུགས་རྗེ་ཆེ་ཟེར་གྱི་ཡིན་ལ། གཟུགས་ཅན་མིས་འདིར་མངོན་དུ་འགྱུར་པའི་ཐོག་ནས་སེམས་ཤུགས་བསྐྱེད་ནས་མཐུན་འགྱུར་གྱི་རོགས་རམ་བྱེད་མཁན་ཚོར་ཐུགས་རྗེ་ཆེ་ཟེར་གྱི་ཡིན། དགེ་བ་རྫོགས་བྱང་ལ་བསྔོ་ཡག་གལ་ཆེན་པོ་རེད་ཅེས་བཀའ་བསྩལ་མཛད་འདུག དེ་བཞིན་བཀྲིས་ལྷུན་པོ་གཙོས་པའི་དགོན་སྡེ་ཁག་གིས་ཕྱག་ལས་ལེགས་པོ་གནང་བར་ཐུགས་རྗེ་ཆེ་ཞུའི་བསྔགས་བརྗོད་སོགས་གནང་འདུག དེ་དང་ཕྱོགས་མཚུངས་སུ་༸གང་ཉིད་མཆོག་གིས་ང་ཚོ་ནང་ཆོས་ལ་ཉམས་ལེན་དང་སློབ་གཉེར་གནང་ནས་གསོན་པའི་རིང་གཞན་ལ་ཕན་པར་བསྒྲུབ་གང་ཐུབ་གནང་གལ་ཡིན་པ་བཀའ་གནང་འདུག མགོན་པོ་༸གང་ཉིད་མཆོག་གིས་བཀའ་བསྩལ་དོན་ལ། ང་ཚོ་གསོན་པའི་རིང་ལ་ང་ཚོས་གང་ཐུབ་ཐུབ་ཀྱི་ཆོས་ཉམས་ལེན་བྱེད་ཡག་དང་། ཆོས་ཉམས་ལེན་བྱེད་ཟེར་བ་དེ་ཡང་དབང་རྟུལ་དད་པའི་རྗེས་འབྲང་མིན་པར་ཆོས་ལ་སློབ་གཉེར་བྱེད་ནས་དབང་རྣོན་ཆོས་ཀྱི་རྗེས་འབྲང་ཞིག་བྱ་དགོས་པ་མ་ཟད། དབང་རྣོན་ཆོས་ཀྱི་རྗེས་འབྲང་པའི་བྱེད་སྟངས་དེ་ལྟར་བྱེད་པ་ཡིན་ན་དུས་རབས་ ༢༡ དང་ ༢༢ དེ་བཞིན་དུས་རབས་ ༢༣...