༸གོང་ས་མཆོག་ནས་ཨ་རིའི་བྱམས་བརྩེའི་གྲོང་ཁྱེར་གཉིས་ཀྱི་སྤྱི་ཁྱབ་དང་མཇལ་མོལ་མཛད་པ།

དེ་རིང་སྔ་དྲོ་བཞུགས་སྒར་༸རྒྱལ་བོའི་ཕོ་བྲང་དུ་རྨ་ལྷོ་སོག་རྫོང་གི་གཞིས་བྱེས་བོད་མིའི་སྐུ་ཚབ་ཞུས་ནས་རྒྱ་བལ་གཉིས་ཀྱི་མི་གྲངས་ ༡༦ སྐོར་ཞིག་གི་ཚོགས་ཆུང་གིས་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་འདུག སྐབས་དེར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་རྨ་ལྷོ་སོག་རྫོང་གི་ཡུལ་དགོན་རེ་རེའི་ལོ་རྒྱུས་རགས་ཟིན་རྣམས་ལ་གཟིགས་ཞིབ་ཀྱིས་ལྗགས་ཀློག་མཛད་པ་དང་། དགོན་ཁག་དེ་དག་ཏུ་ཆོས་འཆད་ཉན་གྱི་སློབ་སྦྱོང་ཡག་པོ་གནང་དགོས་གལ་ཡིན་པར་ལམ་སྟོན་བསྩལ་ཏེ་ཐེངས་འདིར་མཎྜལ་རྟེན་གསུམ་འདེགས་འབུལ་ཞུས་པར་ཡི་རངས་ཡོད་ཅེས་བཀའ་བསྩལ་འདུག གསར་འགོད་པས་བལ་ཡུལ་ནས་ཕེབས་པའི་རྨ་ལྷོ་སོག་རྫོང་གི་འབྲུག་ལྷ་ལགས་སུ་དེ་རིང་མགོན་པོ་༸གང་ཉིད་མཆོག་ལ་རྟེན་གསུམ་འདེགས་འབུལ་ཞུས་སྐོར་ཐོག་བཅར་འདྲི་ཞུས་པར་ཁོང་གིས་བོད་གཞིས་བྱེས་གཉིས་ཀྱི་མི་གྲངས་ཁྲི་བཞི་ལྷག་གི་ཚབ་ཞུས་ཏེ་རྟེན་གསུམ་ཕུལ་ཡོད་པ་དང་། མགོན་པོ་༸གང་ཉིད་མཆོག་ལ་མཎྜལ་རྟེན་གསུམ་ཕུལ་བ་དེས་བོད་གཞིས་བྱེས་གཉིས་ཀྱི་ཕ་ཡུལ་གཅིག་པ་དག་གིས་མགོན་པོ་མཆོག་གི་བཀའ་ཅི་གསུང་སྒྲུབ་རྒྱུའི་དམ་ཚིག་མཚོན་ཡོད་པར་ངོ་སྤྲོད་གནང་སོང་། དེ་བཞིན་ཨ་རིའི་གྲོང་ཁྱེར་ California མངའ་སྡེའི་ Anaheim གྲོང་སྡེའི་སྤྱི་ཁྱབ་པ་ཟུར་པ་སྐུ་ཞབས་ Tom tait ལགས་ཀྱིས་སྣེ་ཁྲིད་པའི་ཁུལ་དེར་རྟེན་གཞི་བྱས་པའི་ཚོང་པ་ཆེ་ཁག་བཅུ་ཙམ་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་འདུག རྩ་བའི་སྐུ་ཞབས་ Tom Tait ལགས་ཀྱིས་དེ་སྔོན་ Anaheim གྲོང་ཁྱེར་གྱི་སྤྱི་ཁྱབ་གནང་སྐབས་མང་ཚོགས་ཁྲོད་སྙིང་རྗེ་གོང་འཕེལ་དང་འབྲེལ་བའི་ལས་གཞི་མང་དག་ཅིག་སྤེལ་ཏེ་གྲོང་ཁྱེར་དེ་ city of kindness ཞེས་སྙིང་རྗེ་ལྡན་པའི་གྲོང་ཁྱེར་ཞིག་ཏུ་བསྐྲུན་རྒྱུའི་ལས་གཞི་སྤེལ་གནང་བའི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་དེར་ཚོགས་པའི་རྒྱལ་སྤྱིའི་བྱམས་བརྩེའི་ལྷན་ཚོགས་ཐོག་ཚོགས་མགོན་དུ་གདན་འདྲེན་ཞུས་པ་མ་ཟད། སྔ་ལོ་ཕྱི་ཟླ་ ༢ པའི་ནང་སྐུ་ཞབས་ཁོང་བཞུགས་སྒར་དུ་ཆེད་ཕེབས་ཀྱིས་༸གོང་ས་མཆོག་གི་གསེར་ཞལ་མཇལ་ཁ་ཞུས་ཡོད་པ་རེད། གསར་འགོད་པས་གྲོང་སྡེའི་སྤྱི་ཁྱབ་ཟུར་པ་ལགས་སུ་ཐེངས་འདིར་༸གོང་ས་མཆོག་གི་མཇལ་ཁ་ཞུ་དོན་དང་མགོན་པོ་༸གང་ཉིད་མཆོག་གིས་བཀའ་སློབ་གང་བསྩལ་སྐོར་བཅར་འདྲི་ཞུས་པར་༸གོང་ས་མཆོག་དང་མཇལ་ཁ་ཞུས་ནས་༸གང་ཉིད་མཆོག་གི་བྱིན་རླབས་ཐོབ་རྒྱུར་དམིགས་པ་ཞིག་ཡིན་པ་དང་།...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་འཇར་མ་ནིའི་རྒྱལ་ཡོངས་འོས་བསྡུ་ཆེན་མོའི་ཁྲོད་ལྕམ་སྐུ་ Angela Merkel མཆོག་ལ་རྒྱལ་ཁ་ཐོབ་ནས་སྲིད་བློན་གྱི་ལས་ཡུན་བཞི་པར་འོས་འདེམས་བྱུང་བར་འཚམས་འདྲིའི་གསུང་འཕྲིན་བསྩལ་འདུག ༸གོང་ས་མཆོག་གིས་འཚམས་འཕྲིན་དེའི་ནང་ལྕམ་སྐུ་ Angela Merkel མཆོག་ནི་མང་ཚོགས་ལ་སེམས་སྐུལ་སྤེལ་ཐུབ་མཁན་ཞིག་དང་འཆར་སྣང་དང་བརྟན་ལྷིང་གི་མཚོན་དོན་ཞིག་ཡིན་སྐོར་བཀའ་སྩལ་བ་དང་འབྲེལ། ངེས་མེད་ཀྱི་དུས་འགྱུར་དེའི་ཁྲོད་ལྕམ་སྐུ་མཆོག་གིས་མང་ཚོགས་ཀྱི་མངོན་འདོད་གྲུབ་ཐབས་དང་འཛམ་གླིང་འདི་ཞི་བདེ་དང་སྙིང་རྗེ་ལྡན་པ་ཞིག་ཏུ་བསྐྲུན་ཐབས་སུ་ཕྱག་ལས་མུ་མཐུད་གནང་རྒྱུའི་ཆོད་སེམས་བརྟན་པོ་ཡོད་པར་༸གང་ཉིད་མཆོག་ནས་ཐུགས་མོས་གནང་བཞིན་ཡོད་པ་མ་ཟད། སྲིད་བློན་གྱི་ལས་ཡུན་དེའི་ནང་བྱ་བ་ལམ་ལྷོང་ཡོང་བར་ཐུགས་སྨོན་མཛད་བཞིན་ཡོད་པ་བཀའ་བསྩལ་ཡོད། ལྷག་པར་དུ་༸གོང་ས་མཆོག་གིས་མགོན་པོ་༸གང་ཉིད་མཆོག་ནི་དུས་རྒྱུན་དུ་ཡོ་རོབ་མཐུན་ཚོགས་ཀྱི་སྒྲོམ་གཞི་དང་སྙིང་སྟོབས་བཅས་པར་ཡིད་སྨོན་མཛད་མཁན་ཞིག་ཡིན་པ་བཀའ་སྩལ་དང་འབྲེལ། སྒྲོམ་གཞི་དེའི་འོག་གི་རྒྱལ་ཁབ་ཁག་ཅིག་དེ་སྔ་ལོ་རྒྱུས་ཁྲོད་ཕན་ཚུན་དབར་དམག་འཐབ་གནང་མྱོང་མཁན་ཆགས་ཡོད་ཀྱང་། ད་ཆ་མཐུན་ཚོགས་ཀྱི་སྒྲོམ་གཞིའི་འོག་སྒེར་སོ་སོའི་ཁེ་ཕན་ལས་སྤྱིའི་ཁེ་ཕན་གལ་ཆེར་ངོས་འཛིན་མཁན་ཞིག་ཆགས་ཡོད་སྐོར་བཀའ་སྩལ་བ་མ་ཟད། རིམ་པས་ཡོ་རོབ་མཐུན་ཚོགས་ཀྱི་སྒྲོམ་གཞི་ལྟ་བུ་ཞིག་ཨ་ཕི་རི་ཀ་དང་ཨེ་ཤ་ཡ། ལ་ཊིན་ཨ་མི་རི་ཀའི་མངལ་ཁུལ་དུའང་ཆེད་འཛུགས་ཐུབ་པར་རེ་སྨོན་མཛད་བཞིན་ཡོད་པ་བཀའ་ནན་མཛད་འདུག རྩ་བའི་ལྕམ་སྐུ་ Angela Merkel མཆོག་ནི་འཇར་མ་ནིའི་ལོ་རྒྱུས་ནང་བེུད་ཀྱི་སྲིད་བློན་གནང་མཁན་དང་པོ་དེ་ཡིན་པ་མ་ཟད། ཁོང་གིས་ཕྱི་ལོ་ ༢༠༠༥ ལོ་ནས་བཟུང་ད་བར་ཡུལ་དེའི་རྒྱལ་ཡོངས་འོས་བསྡུ་ཆེན་མོ་ཐེངས་བཞིའི་ནང་ལ་རྒྱལ་ཁ་ཐོབ་སྟེ། ཡུལ་དེའི་སྲིད་བློན་དུ་མུ་མཐུད་བསྐོ་གཞག་གནང་ཡོད་པ་ཞིག་དང། སྲིད་བློན་གྱི་ངོ་བོའི་ཐོག་ནས་༸གོང་ས་མཆོག་དང་ལྷན་དངོས་སུ་མཇལ་འཕྲད་ཞུ་མྱོང་ཡོད་པ་རེད།    

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཟླ་ ༣ ཚེས་ ༢ དང་བོད་ཟླ་ ༡ ཚེས་ ༡༦ ཉིན་བཅོ་ལྔ་མཆོད་པའི་ཆོས་ཕྱོགས་ཀྱི་དུས་ཚིགས་ཁྱད་པར་ཅན་དང་བསྟུན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་ནས་གསར་དུ་འབྱོར་བ་དང་ཕྱི་ནང་གི་དད་ལྡན་སེར་སྐྱ་སྟོང་ཕྲག་ལྷག་ལ་སྐྱེས་རབས་སོ་བཞི་དང་རྟེན་འབྲེལ་བསྟོད་པའི་བཀའ་ཆོས་སྩལ་བ་དང་འབྲེལ། མགོན་པོ་༸གང་ཉིད་མཆོག་གིས་བོད་ཀྱི་ཆོལ་གསུམ་དང་ཆོས་བརྒྱུད་ཁག་གི་དབར་སྔར་ལྷག་དམ་ཚིག་འོ་ཆུ་གཅིག་འདྲེས་ལྟར་དགོས་གལ་ཆེན་པོ་ཡིན་པར་ལམ་སྟོན་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སློབ་དཔོན་དཔའ་བོས་མཛད་པའི་སྐྱེས་རབས་སོ་བཞིའི་བཀའ་ཆོས་བསྩལ་གྲུབ་མཚམས་སུ་༸རྗེ་ཙོང་ཁ་པ་ཆེན་པོ་བློ་བཟང་གྲགས་པས་མཛད་པའི་རྟེན་འབྲེལ་བསྟོད་པའི་བཤད་ལུང་བསྩལ་བ་ལས་བོད་གངས་ཅན་ལྗོངས་ལ་ཡོད་པའི་སངས་རྒྱས་ཀྱི་བསྟན་པ་འདི་ནི་འཛམ་བུ་གླིང་གི་སྤྱི་ནོར་ཞིག་ཆགས་ཡོད་པ་དང་། དེང་གི་དུས་སུ་སངས་རྒྱས་ཀྱི་བཀའ་སྡེ་སྣོད་གསུམ་ཆ་ཚང་བ་དང་དེ་བཞིན་བཀའ་བསྟན་པོ་ཏི་ ༣༠༠ བཅས་ཡོད་པ་དེ་དག་འགྲེལ་བརྗོད་ཕྱིན་ཅི་མ་ལོག་པ་རྒྱག་ཐུབ་མཁན་དེ་བོད་ཡིག་ཁོ་ན་ཆགས་ཡོད་སྐོར་བཀའ་ནན་བསྩལ་ཡོད། ལྷག་པར་དུ་བོད་ཡིག་དེ་ལ་བརྟེན་ནས་ད་ལྟའི་འཆར་བོད་ཆོལ་གསུམ་ཡོངས་རྫོགས་གཅིག་ཏུ་གནས་ཐུབ་པ་བྱུང་ཡོད་པས་བོད་ཆོལ་གསུམ་དང་ཆོས་བརྒྱུད་ཁག་གི་དབར་སྔར་ལྷག་དད་དམ་གཡོ་བ་མེད་པའི་ཐོག་ནས་དམ་ཚིག་འོ་ཆུ་གཅིག་འདྲེས་ལྟར་གནང་དགོས་གལ་ཆེན་པོ་རེད་ཅེས་བཀའ་ནན་མཛད་སོང་། དེ་བཞིན་༸གོང་ས་མཆོག་གིས་དེང་སྐབས་འཛམ་གླིང་ཐོག་ཆོས་ལུགས་ཕན་ཚུན་དབར་ལ་འཁྲུག་འཛིང་དང་གསོད་རེས་ཀྱི་གནས་ཚུལ་འབྱུང་བཞིན་པའི་དུས་སྐབས་འདིར་བོད་ཀྱི་ཆོས་བརྒྱུད་ཁག་གིས་འཛམ་གླིང་ཐོག་གི་མི་རིགས་གཞན་ཚོའི་ངོས་ནས་མིག་ལྟོས་འོས་པ་ཞིག་གནང་དགོས་གནད་ཡིན་པའི་ལམ་སྟོན་རྒྱ་ཆེ་བསྩལ་ཡོད་པ་རེད། བོད་མི་སེར་སྐྱ་མང་ཚོགས་ཚོས་བོད་ཡིག་ཐོག་ཡོད་པའི་ནང་པ་སངས་རྒྱས་པའི་ཆོས་ལ་སློབ་གཉེར་གནང་དགོས་གལ་ཡིན་པ་དང་། ནང་ཆོས་དེས་འཛམ་གླིང་ཐོག་བོད་ཀྱི་སྐད་ཡིག་གི་གཟི་བརྗིད་ཐོན་ཐུབ་པ་ཙམ་མ་ཟད། ལྷག་པར་དུ་འཛམ་གླིང་ཐོག་རང་གཞན་གཉིས་ལ་ཕན་པ་བསྒྲུབ་ཐུབ་པའི་ནུས་པ་ཁྱད་པར་བ་ཞིག་ཡོད་སྟབས་སེམས་འདུལ་ཐབས་ལ་ཕན་ཐོགས་ཆེན་པོ་ཡོད་སྐོར་བཀའ་བསྩལ་ཡོད།

བཙན་བྱོལ་ནང་གི་རིས་སུ་མ་ཆད་པའི་བཙུན་དགོན་ཁག་ནས་བོད་མའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀྲིན་རྗེས་དྲན་གྱི་བརྟན་བཞུགས་བསྟར་འབུལ་ཞུས་པའི་ཐོག་༸གོང་ས་མཆོག་གིས་བཙུན་མ་རྣམས་ནས་གཞུང་ཆེན་ཐོག་སློབ་གཉེར་རྒྱག་བཞིན་པ་ཐུགས་དགྱེས་ཚོར་ཆེན་པོས་རྗེས་སུ་ཡི་རང་བཀའ་བསྩལ་བ་དང་སྦྲགས། སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་མཚན་ཉིད་ཚང་བའི་ཐོག་ནས་གནང་དགོས་གལ་ཡིན་པ་ལམ་སྟོབ་རྒྱ་ཆེ་མཛད་སོང་། དེ་རིང་ཕྱི་ཟླ་ ༣ ཚེས་ ༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་ཀྱི་མཛད་སྒོའི་ཐོག་འབྲི་གུང་༸སྐྱབས་མགོན་ཆེ་ཚང་རིན་པོ་མཆོག་གིས་དབུས་པའི་བོད་ཀྱི་ཆོས་བརྒྱུད་ཁག་གི་བླ་ཆེན་སྐུ་ཚབ་ཁག་ཅིག་དང་བོད་ཀྱི་ཆོས་བརྒྱུད་ཆེན་པོ་བཞིན་དང་གཡུང་དྲུང་བོན་བཅས་ཀྱི་བཙུན་དགོན་ ༤༠ འི་སྐུ་ཚབ་བཙུན་པ་ ༩༠༠ ཙམ་ཆེད་ཕེབས་གནང་བ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམས་པ་སོགས་ཆིབས་སྒྱུར་བསྐྱངས་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་རིས་སུ་མ་ཆད་པའི་བཙུན་དགོན་ཁག་ནས་ཕེབས་པའི་བཙུན་མ་རྣམས་པ་དང་ཕྱི་ནང་གི་སེར་སྐྱ་མང་ཚོགས་སྟོང་ཚོ་ཁ་ཤས་ཡོད་པ་རྣམས་ལ་ད་རེས་བཙན་བྱོལ་ནང་གི་ས་དགེ་བཀའ་རྙིང་བོན་དང་བཅས་པ་རིས་སུ་ཆད་པའི་བཙུན་དགོན་ཁག་ནས་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་པར་ཐུགས་རྗེ་ཆེ་ཞེས་བཀའ་བསྩལ་སོང་བ་དང་། ཁྱད་པར་དུ་མགོན་པོ་༸གང་ཉིད་མཆོག་གི་དགོངས་པ་བཞིན་བཙན་བྱོལ་དུ་འབྱོར་རྗེས་བཙུན་མ་རྣམས་ནས་སྔར་ལམ་ལྟར་མ་ཡིན་པར་སངས་རྒྱས་ཀྱི་བསྟན་པ་མི་ཉམས་རྒྱུན་འཛིན་སླད་གཞུང་ཆེན་ཁག་ལ་བསླབ་པ་སློབ་གཉེར་འགོ་འཛུགས་དང་ད་ཆ་དགེ་བཤེས་མ་ཐོན་མཁན་བྱུང་ཡོད་སྟབས། རྗེས་སུ་ཡི་རང་དང་ད་དུངཡང་འཛམ་གླིང་ལ་ངོམས་ཆོག་པ་བོད་ཀྱི་ཆོས་རིག་སྤྱི་དང་ཁྱད་པར་དུ་བོད་བརྒྱུད་ནང་བསྟན་དེ་རྩ་ཆེན་པོ་ཡིན་ལུགས་སློབ་གཉེར་བྱེད་ནས་ཤེས་ཐོག་གཞན་ལ་འགྲེལ་བརྗོད་གནང་ཐུབ་དགོས་གལ་ཡིན་པ་ལམ་སྟོན་མཛད་ཡོད། ༸གོང་ས་མཆོག་གིས་ད་དུང་ཡང་བོད་ཀྱི་ས་དགེ་བཀའ་རྙིང་བོན་དང་བཅས་པའི་བཙུན་མ་རྣམས་དུས་གཅིག་ལ་འདུས་ཡོད་པ་དང་འབྲེལ་ནས་ཆོས་བརྒྱུད་ཕན་ཚུན་བསྟན་འཛིན་ཕུ་ནུ་བཞིན་དུ་ཐུགས་མཐུན་ཁྲིམས་གཙང་དགོས་རྒྱུ་ཤིན་ཏུ་ནས་གལ་ཆེ་ཡིན་པ་དང་། ང་ཚོ་བོད་མི་སྤྱི་བོ་གནམ་བསྟན་ཡོངས་ནས་བོད་རྒྱལ་ཁབ་ཀྱི་བསྟན་སྲིད་སྤྱིའི་སླད་དུ་དད་དམ་དང་ལྷག་བསམ་གཡོ་མེད་གནས་ཐུབ་ན་བརྟན་བཞུགས་ངོ་དེ་ཡིན་ཞེས་བཀའ་ནན་བསྩལ་སོང་། ཐེངས་འདིའི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་བཙུན་པ་བློ་བཟང་བདེ་ཆེན་ལགས་ཀྱིས་ ༸རྒྱལ་བའི་བཀྲིན་རྗེས་དྲན་གྱི་བརྟན་བཞུགས་ཀྱི་བྱུང་རིམ་དང་ཁྱད་པར་དུ་དེ་རིང་གི་དུས་ཚིགས་འདིའི་ཐོག་ནས་ཁས་ལེན་དམ་བཅའ་ཁག་ཅིག་ཞུས་ཡོད་སྐོར་ངོ་སྤྲོད་གནང་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བཙུན་མ་ཐུན་མོང་ནས་ཇི་ལྟར་གསོལ་འདེབས་ཞུས་དོན་ལྟར། ཕྱི་ཟླ་ ༣ ཚེས་ ༡ ཉིན་སྔ་དྲོ་ཚོུད་ ༨།༣༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོ་༸གང་ཉིད་མཆོག་༸སྐུ་ཚེ་མི་འཇིག་རྡོ་རྗེ་འཆང་གི་ངོ་བོར་བརྟན་ཕྱིར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་རེད་འདུག དེའང་ཐེངས་འདིའི་བརྟན་བཞུགས་དེ་གཙོ་བོ་ད་བར་༸རྒྱལ་མཆོག་༸སྐུ་འཕྲེང་རིམ་བྱོན་རྣམས་ནས་བོད་ཀྱི་རིས་སུ་མ་ཆད་པའི་ཆོས་བརྒྱུད་ཁག་གི་བཙུན་མ་རྣམས་ལ་ཐུགས་རྗེ་ཆེན་པོས་རྗེས་སུ་འཛིན་པ། ལྷག་པར་དུ་༸རྒྱལ་དབང་༸སྐུ་འཕྲེང་བཅུ་བཞི་པ་ཆེན་པོ་མཆོག་གིས་བཙུན་མའི་བསླབ་པ་སློབ་གཉེར་ཐོག་ལམ་བསྟོན་བཀའ་སློབ་དང་མཐུན་འགྱུར་སོགས་གནང་བར་བཀའ་དྲིན་རྗེས་དྲན་མཚོན་ཆེད་དང་། རང་ཅག་ཁ་བ་གངས་ཅན་པ་རྣམས་ཀྱི་ཚེ་རབས་ཐོག་མེད་ནས་བསགས་པའི་ལས་སྨོན་གྱི་རྟེན་འབྲེལ་གོང་འཕེལ། ཁྱད་པར་དུ་མགོན་པོ་༸གང་ཉིད་མཆོག་བསྟན་འགྲོ་ཡོངས་ཀྱི་སླད་དུ་༸སྐུ་ཚེ་མི་འཇིག་རྡོ་རྗེ་ཁམས་སུ་བརྟན་ཅིང་རླབས་ཆེན་གྱི་ཐུགས་བཞེད་མཐའ་དག་ལྷུན་གྱིས་གྲུབ་པ་སོགས་ལ་དམིགས་ཏེ་ཕུལ་བ་ཞིག་ཡིན་པ་རེད་འདུག ཐེངས་འདིའི་བརྟན་བཞུགས་དང་འབྲེལ་དེ་རིང་སྔ་ཐོག་གཙུག་ལག་ཁང་དུ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་དབུ་བཞུགས་ཐོག་བརྟན་བཞུགས་ཀྱི་སྒྲུབ་བཤག་ཆོ་ག་དབུ་འཛུགས་གནང་ཡོད་པ་དང་། བོད་ཚེས་ ༡༤ ཉིན་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་དང་སྐུ་ཚབ་བཅས་ཆེད་ཕེབས་གནང་གི་ཡོད་པ་དང་།  བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་བཅས་ནས་མཉམ་ཞུགས་གནང་གི་འདུག ཤེས་རྟོགས་བྱུང་བར་བོད་ཀྱི་ཆོས་བརྒྱུད་རིས་མེད་ཁག་གི་བཙུན་མ་ཐུན་མོང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དེ་ནི་ཆེས་ཐོག་མ་ཆགས་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་ཨ་རིའི་ Kentucky མངའ་སྡེའི་བྱམས་བརྩེ་གྲོང་ཁྱེར་ Louisville སྤྱི་ཁྱབ་སྐུ་ཞབས་ Greg Fischer མཆོག་དང་ཨ་རིའི་ California མངའ་སྡེའི་སྙིང་རྗེ་གྲོང་ཁྱེར་ Anaheim སྤྱི་ཁྱབ་སྐུ་ཞབས་ Tom tait མཆོག་རྣམ་གཉིས་དང་མཇལ་མོལ་མཛད་ཡོད་པ་རེད། དེའང་གྲོང་ཁྱེར་གྱི་སྤྱི་ཁྱབ་སྐུ་ཞབས་རྣམ་གཉིས་ནས་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་ཞུས་སྐབས་གྲོང་ཁྱེར་སོ་སོ་ནང་གི་བྱམས་བརྩེ་དང་སྙིང་རྗེ་འབྲེལ་བའི་ལས་གཞི་ཁྱབ་སྤེལ་དང་འཛུགས་སྐྲུན་ཞུ་སྒོ་ཁག་སྙན་གསེང་ཞིབ་རྒྱས་ཞུས་འདུག་པ་དང། སྤྱི་ཁྱབ་སྐུ་ཞབས་ Greg Fischer  མཆོག་སྐུ་སྒེར་གྱི་འཕྲུལ་བྱའི་སྟེང་དུ་སྐབས་དེར་མགོན་པོ་༸གང་ཉིད་མཆོག་གིས་ Louisville གྲེང་ཁྱོར་ནས་ཡིན་པའི་འཛམ་གླིང་ཐོག་ཁུ་ཚུར་རྩལ་འགྲན་པ་གྲགས་ཅན་སྐུ་གཤེགས་དམ་པ་ Muhammad Ali མཆོག་གི་མཚན་འཁོད་དབུ་ཞྭ་བཞེས་ཡོད་པ་མངོན་རྒྱུ་འདུག གཞི་རྩའི་ Louisville...