༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུ་དབུ་འཛུགས།

ཁ་སང་དང་དེ་རིང་བཅས་ཉིན་གྲངས་གཉིས་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུ་འཚོགས་བཞིན་ཡོད་པ་དང་ཉིན་གྲངས་གཉིས་ཀྱི་ཚོགས་འདུ་ཐོག་རྣམ་གྲྭ་ཕན་བདེ་ལེགས་བཤད་གླིང་གི་སློབ་སྤྱི་གྲྭ་ཐུབ་བསྟན་ཡར་འཕེལ་ལགས་དང་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་འབུམ་རམས་པ་བྱམས་པ་བསམ་གཏན་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་དགེ་རྒན་ཆེན་མོ་སྤྱི་ཟུར་བསོད་ནམས་རྒྱལ་མཚན་ལགས། ༸སྐུའི་དབྱིན་སྐད་གསུང་སྒྱུར་བ་འབུམ་རམས་པ་དགེ་བཤེས་ཐུབ་བསྟན་སྦྱིན་པ་ལགས། དེ་བཞིན་ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་འགན་འཛིན་འབུམ་རམས་པ་དགེ་བཤེས་བློ་བཟང་བསྟན་འཛིན་ནེ་གི་ལགས། བོད་ཀྱི་ཐེབས་རྩ་ཁང་གི་འགན་འཛིན་བཀའ་ཟུར་རྫ་ཡུལ་བློ་བཟང་སྙན་གྲགས་ལགས་བཅས་ཀྱིས་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་བྱུང་རིམ་དང་། ས་བབ་སྲིད་བྱུས་ཐོག་༸གོང་ས་མཆོག་གི་སྒྲིག་འཛུགས་ཀྱི་གལ་གནད། བོད་མིའི་རང་དབང་འཐབ་རྩོད་ཐོག་༸གོང་ས་མཆོག་གི་གལ་གནད། དེ་བཞིན་༸གོང་ས་མཆོག་གི་སྒྲིག་འཛུགས་ཀྱི་འབྱུང་འགྱུར་གྱི་གནད་དོན་བཅས་ཀྱི་ཐོག་གསུང་བཤད་དང་དྲི་བ་དྲིས་ལན་གནང་ཡོད།དེ་རིང་ཚོགས་འདུའི་ཉིན་གཉིས་པའི་སྔ་དྲོའི་ཚོགས་ཐེངས་དང་པོའི་ཐོག་༸སྐུའི་དབྱིན་སྐད་གསུང་སྒྱུར་བ་འབུམ་རམས་པ་དགེ་བཤེས་ཐུབ་བསྟན་སྦྱིན་པ་ལགས་ཀྱིས་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་འབྱུང་འགྱུར་གྱི་གནད་དོན་ཞེས་པའི་བརྗོད་གཞིའི་ཐོག་གསུང་བཤད་གནང་སྐབས་༸གོང་ས་མཆོག་གི་སྒྲིག་འཛུགས་རྒྱུན་གནས་ཡོང་རྒྱུར་ང་ཚོས་ངེས་པར་དུ་དགོངས་པར་བཞེས་དགོས་པ་ལས་༸གོང་ས་མཆོག་༸སྐུ་སྒེར་གྱི་མཛད་འགན་ཞིག་ཆགས་མེད་པར་གསུངས་པ་དང་སྦྲགས། ལྷག་པར་ད་ལྟའི་བོད་མིའི་གནས་སྟངས་སོགས་ལ་དགོངས་ཚེ་༸གོང་ས་མཆོག་གི་སྒྲིག་འཛུགས་འདི་རྒྱུན་རིང་པོར་གནས་དགོས་གལ་ཡིན་པར་གཟིགས་ཀྱི་ཡོད་པ་དང་། སྒྲིག་འཛུགས་འདི་རྒྱུན་གནས་ཐུབ་པར་༸གོང་ས་མཆོག་གི་མཚན་གནས་ཀྱི་བདག་དབང་དེ་བོད་པ་ཚོར་ཡོད་པ་ལྟར་གང་ཐུབ་ཀྱིས་རྒྱལ་སྤྱིའི་རྣམ་པའི་ཐོག་ནས་སྒྲིག་འཛུགས་རང་གི་ལམ་སྲོལ་ཞིག་བཟོས་ཚེ་དེར་གནད་འགག་པ་ཡོད་པར་གཟིགས་ཀྱི་ཡོད་སྐོར་གསུངས་ཡོད།གཞི་རྩའི་ཁ་སང་ཉིན་དང་པོའི་སྔ་དྲོའི་ཚོགས་ཐུན་ཐོག་རྣམ་གྲྭ་ཕན་བདེ་ལེགས་བཤད་གླིང་གི་སློབ་སྤྱི་གྲྭ་ཐུབ་བསྟན་ཡར་འཕེལ་ལགས་ཀྱིས་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་བྱུང་རིམ་དང་བོད་རྒྱུད་ནང་བསྟན་ཐོག་ཤུགས་རྐྱེན་ཇི་བྱུང་ཐོག་གསུང་བཤད་གནང་བར་དགའ་ལྡན་ཕོ་བྲང་གི་ལོ་རྒྱུས་བརྒྱུད་རིམ་སྐོར་འགྲེལ་བརྗོད་གནང་བ་དང་འབྲེལ་ཏེ་༸རྒྱལ་དབང་༸སྐུ་ཕྲེང་རིམ་བྱོན་གྱི་བོད་བརྒྱུད་ནང་བསྟན་ཐོག་མཛད་པ་འཕྲིན་ལས་བསྐྱངས་པ་དག་ངོ་སྤྲོད་གནང་སོང་བ་དང་ཆབས་ཅིག མ་འོངས་པར་བོད་རྒྱལ་ཁབ་དང་མི་རིགས་འདི་སྲ་བརྟན་དང་། དེ་བཞིན་ཆོས་དང་རིག་གཞུང་མི་ཉམས་གོང་འཕེལ་ཉམས་པ་སླར་གསོ་གནང་དགོས་ཚེ་༸རྒྱལ་མཆོག་༸སྐུ་ཕྲེང་རིམ་བྱོན་ངེས་པར་དུ་ཕེབས་དགོས་སྟབས། གཞུང་དང་གཞུང་འབྲེལ་མིན་པའི་ཚོགས་པས་༸སྐུ་ཕྲེང་བཅུ་བཞི་དང་བཅོ་ལྔ། བཅུ་དྲུག་ལ་སོགས་པ་ཕེབས་པར་གསོལ་འདེབས་ནན་ཞུ་གནང་གལ་ཡིན་པར་གཟིགས་སྐོར་གསུངས་སོང་།བོད་ཀྱི་ཐེབས་རྩ་ཁང་གི་འགན་འཛིན་བཀའ་ཟུར་རྫ་ཡུལ་བློ་བཟང་སྙན་གྲགས་ལགས་ཀྱིས་བོད་དོན་འཐབ་རྩོད་ཐད་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་གལ་གནད་སྐོར་གསུང་བཤད་གནང་སྐབས་༸རྒྱལ་བ་རིན་པོ་ཆེའི་སྒྲིག་འཛུགས་ལ་བོད་མི་དང་རྒྱ་གར། དེ་བཞིན་རྒྱལ་སྤྱིའི་ཐོག་ནས་གཟིགས་སྟངས་གང་ཡིན་སྐོར་ངོ་སྤྲོད་དང་འབྲེལ། འདས་པའི་ལོ་ ༦༠ ལྷག་ནང་བོད་མི་ཚོར་དཀའ་སྡུག་རིམ་པ་འཕྲད་པའི་ཁྲོད་བོད་མི་རྣམས་ཀྱི་རེ་བ་བཅོལ་ས་དེ་༸སྐྱབས་མགོན་རིན་པོ་ཆེ་མཆོག་ཆགས་ཀྱི་ཡོད་པ་དང་། ལྷག་པར་བོད་ནང་ལྟ་བུར་ཆ་མཚོན་ན་རྒྱ་གཞུང་གིས་༸རྒྱལ་བ་རིན་པོ་ཆེ་མཆོག་གི་༸སྐུ་པར་སྒྲིག་གཤོམ་ཞུས་པ་ཙམ་གྱིས་བོད་མི་ཚོར་མནར་གཅོད་དང་ལོ་མང་རིང་བཙོན་འཇུག་གི་ཁྲིམས་ཐག་བཅད་པའི་གནས་སྟངས་ཁྲོད་དུའང་བོད་མི་རྣམས་ཀྱིས་དཔའ་ངར་ཞུམ་པ་མེད་པར་མུ་མཐུད་ནས་༸རྒྱལ་བ་རིན་པོ་ཆེ་མཆོག་གི་༸སྐུ་པར་སྒྲིག་གཤོམ་གནང་རྒྱུ་དང་༸གོང་ས་མཆོག་༸སྐུ་ཚེ་བསྐལ་བརྒྱར་བརྟན་པར་ཤོག་ཅེས་འབོད་ཚིག་སྒྲོག་པ་སོགས་ཀྱི་ཐོག་ནས་གཞིས་ལུས་རྒྱ་ཆེ་མང་ཚོགས་ཀྱི་ཐུགས་རེ་ཞུ་ཡུལ་གཙོ་བོ་དེ་༸གོང་ས་༸སྐྱབས་མགོན་ཆེན་པོ་མཆོག་ཆགས་ཀྱི་ཡོད་པ་མངོན་གསལ་གནང་ཡོད་པ་མ་ཟད། རྒྱ་ནག་གིས་བོད་མིའི་ཐོག་དྲག་རྩུབ་ཅན་གྱི་སྲིད་བྱུས་ག་ཚོད་སྤེལ་ཡང་ང་ཚོའི་རེ་བ་བཅོལ་ས་༸རྒྱལ་བ་རིན་པོ་ཆེ་མཆོག་ཡོད་པར་བརྟེན་དེའི་བཀའ་དྲིན་ལ་བརྟེན་ནས་བོད་མི་རིགས་ཀྱི་འཐབ་རྩོད་ཀྱི་ལས་འགུལ་འདི་རྒྱུན་གནས་ཐུབ་པ་དང་སླད་མར་དེ་མཚུངས་སུ་གནས་ཐུབ་པར་༸གོང་ས་མཆོག་དང་མགོན་པོ་༸གང་ཉིད་མཆོག་གི་སྒྲིག་འཛུགས་འདི་གལ་ཆེན་པོ་ཆགས་ཀྱི་ཡོད་པར་ངོས་འཛིན་གནང་གི་ཡོད་སྐོར་གསུངས་ཡོད།

དེ་རིང་ཕྱི་ཟླ་ ༨ ཕྱི་ཚེས་ ༢༤ ཉིན་གྱི་སྔ་དྲོ་ཆུ་ཚོད་ ༩༌༣༠ ཐོག་བཞུགས་སྒར་ཉེ་འཁྲིས་སུ་ཆགས་པའི་  Imperial Heights གསོལ་མགྲོན་ཁང་གི་ཚོགས་ཁང་དུ་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཉིན་གཉིས་རིང་གི་ཚོགས་འདུ་དབུ་འཛུགས་གནང་སོང་།དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུ་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཁྱབ་ཁོངས་ས་གནས་གཞོན་ནུ་ལྷན་ཚོགས་ཁག་ ༤༢ ཀྱི་རྒྱུན་ལས་དང་ཚོགས་མི། བཞུགས་སྒར་དུ་རྟེན་གཞི་བྱས་པའི་བོད་མིའི་གཞུང་འབྲེལ་མ་ཡིན་པ་ཚོགས་པ་ཁག་གི་སྐུ་ཚབ་བཅས་མཉམ་ཞུགས་གནང་འདུགསྐབས་དེར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་༸རྒྱལ་དབང་༸སྐུ་ཕྲེང་རིམ་བྱོན་གྱིས་ད་བར་བོད་བསྟན་སྲིད་སྤྱིའི་བདེ་དོན་སླད་དུ་བསྐྱངས་པའི་མཛད་འཕྲིན་ཁག་གཅིག་ངོ་སྤྲོད་ཞུས་པ་དང་སྦྲགས་ཏེ། ཚོགས་འདུ་འདི་ནི་མང་ཚོགས་རྣམས་ལ་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་གིས་དབུས་པའི་༸རྒྱལ་དབང་༸སྐུ་ཕྲེང་རིམ་བྱོན་གྱི་ཆོས་སྲིད་གཉིས་ཀྱི་མཛད་འཕྲིན་རྣམས་ཤེས་རྟོགས་ཐུབ་ཐབས་དང་། ལྷག་དོན་བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་དོན་ཚན་དང་པོ་དང་། ད་བར་ཚོགས་པའི་ཚོགས་ཆེན་རིམ་པའི་གྲོས་ཆོད་ཁག་གི་དགོངས་དོན་ལྟར་དྲིན་གསབ་ཏུ་མེད་པའི་བླ་ན་མེད་པའི་དབུ་ཁྲིད་རྣམ་པའི་བཀའ་དྲིན་རྗེས་དྲན་ཞུ་རྒྱུ་སོགས་ལ་དམིགས་ཏེ་གོ་སྒྲིག་ཞུས་པ་ཞིག་ཡིན་པར་གསུངས་སོང་།  སྐུ་མགྲོན་གཙོ་བོ་སྲིད་སྐྱོང་སྤེན་པ་ཚེ་རིང་མཆོག་གིས་༸རྒྱལ་བ་༸སྐུ་ཕྲེང་ན་རིམ་གྱི་བཀའ་དྲིན་བསམ་ཤེས་ཐུབ་པར་༸རྒྱལ་དབང་༸སྐུ་ཕྲེང་ན་རིམ་གྱི་མཛད་རྣམ་དང་དེ་འབྲེལ་བོད་ཀྱི་ལོ་རྒྱུས་གནས་བབས་ཤེས་པ་གནང་གལ་ཡིན་པ་དང་། ལྷག་པར་དེ་རིང་གོ་སྒྲིག་ཞུས་པའི་༸རྒྱལ་དབང་༸སྐུ་ཕྲེང་རིམ་བྱོན་གི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུ་འདི་ལྟ་བུ་ཐོག་ནས་བོད་པའི་བསམ་ཚུལ་ཙམ་མིན་པར་རྒྱ་ཆེ་ས་ནས་རྒྱལ་སྤྱིའི་རྒྱལ་ཁབ་གཞན་རྣམས་ཀྱི་བསམ་ཚུལ་གང་འདྲ་ཡོད་མེད་བསྡུ་རུབ་ཞུས་ཏེ་རྒྱལ་ཁབ་སོ་སོའི་ནང་ཐག་གཅོད་ཀྱི་ངོ་བོའི་ཐོག་ནས་གཏན་འབེབས་རིགས་ཐུབ་ཚེ་མ་འོངས་པར་ཕན་ཐོགས་ཡོང་ངེས་ཡིན་པར་གསུངས་ཡོད།  སྲིད་སྐྱོང་མཆོག་གིས་ད་དུང་༸རྒྱལ་དབང་༸སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་བསྟན་སྲིད་སྤྱིའི་སླད་དུ་མཛད་འཕྲིན་ཇི་སྙེད་ཅིག་བསྐྱངས་དང་སྐྱོང་བཞིན་པའི་ཁྲོད་དབུ་མའི་ལམ་ནི་མཛད་འཕྲིན་གནད་ཆེ་བའི་གྲས་ཤིག་ཡིན་པར་འགྲེལ་བརྗོད་དང་ཆབས་ཅིག བོད་མི་མང་ཚོགས་ཡོངས་ནས་དབུ་མའི་ལམ་དང་འབྲེལ་བའི་༸རྒྱལ་བའི་བཞེད་དགོངས་གང་ཡིན་པ་དེ་ཤེས་ཐབས་གནང་གལ་ཆགས་ཡོད་པ་དང་། སྤྱིར་སྤྱི་ཚོགས་ནང་བསམ་བློ་མི་འདྲ་བ་ཡོད་པ་དེ་ནི་ཆོས་ཉིད་ཅིག་ཡིན་ཀྱང་མཐར་བསམ་ཚུལ་མཐུན་མིན་ལ་མ་ལྟོས་པར་ང་ཚོས་བོད་ཀྱི་རྩ་དོན་ལ་ཕན་པ་ཞིག་གནང་དགོས་ཞེས་གསུངས་ཡོད།དེ་བཞིན་སྲིད་སྐྱོང་མཆོག་གིས་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་དང་འབྲེལ་ཏེ་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་བཀའ་བསྡུར་གནང་འཆར་ཡོད་པ་དང་འབྲེལ། ༸སྐུའི་ཡང་སྲིད་ཀྱི་གནད་དོན་ཐོག་མགོན་པོ་༸གང་ཉིད་མཆོག་གིས་བསྟན་བདག་བླ་ཆེན་རྣམ་པའི་ཚོགས་ཆེན་དང་། བཀའ་ཆོས་ཁག་གི་སྐབས་བཀའ་སློབ་སྩལ་ཁག་གཞི་རྩར་བཟུང་སྟེ་ང་ཚོའི་ངོས་ནས་གནད་དོན་འདིའི་ཐོག་བཀའ་བསྡུར་གནང་རན་མིན་ལ་དགོངས་པ་བཞེས་གལ་ཡིན་པ་དང་། སླད་མར་༸སྐུའི་ཡང་སྲིད་ཀྱི་གནད་དོན་ཐོག་བཀའ་བསྡུར་མང་པོ་ཡོང་ངེས་ལ་གཟིགས་ཏེ་འཛིན་སྐྱོང་བཀའ་ཤག་གི་བཞེངས་ཕྱོགས་གང་ཡིན་དང་འབྲེལ་བའི་ཡོངས་ཁྱབ་གསལ་བསྒྲགས་ཤིག་སྤེལ་འཆར་ཡོད་པ་གསུངས་སོང་།གཞན་ཡང་སྲིད་སྐྱོང་མཆོག་ནས་ད་ལྟའི་རྒྱལ་སྤྱིའི་ཆབ་སྲིད་དང་རྒྱ་ནག་ནང་གི་འགོ་ཁྲིད་ཕན་ཚུན་དབར་ལ་བློ་མ་མཐུན་པའི་རྣམ་པ་ཆེ་རུ་འགྲོ་བཞིན་པའི་གནས་སྟངས་སོགས་འགྲེལ་བརྗོད་གནང་བ་དང་འབྲེལ་ནས་ཚོགས་མི་ཡོད་པའི་བོད་ཀྱི་གཞོན་ནུ་ལྷན་ཚོགས་ཀྱིས་ཆབ་སྲིད་ཀྱི་ལས་དོན་ཐོག་ནུས་པ་ཆེས་ཆེར་བཏོན་དགོས་གལ་ཡིན་པ་སོགས་ལམ་སྟོན་གནང་ཡོད།  གཞི་རྩའི་དབུས་བོད་ཀྱི་གཞོན་ནུ་ལྷན་ཚོགས་ཀྱིས་དེ་རིང་དང་སང་ཉིན་བཅས་ཉིན་གྲངས་གཉིས་རིང་གོ་སྒྲིག་ཞུས་པའི་༸རྒྱལ་དབང་༸སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུའི་འགྲོ་གྲོན་རྣམས་ཨ་རིར་རྟེན་གཞི་བྱས་པའི་བོད་ཀྱི་ཐེབ་རྩ་ཁང་ནས་གནང་གི་ཡོད་པ་དང་།...