གསར་འབྱོར་ཁ་འཐོར་བོད་མིར་ཁང་ཁྱིམ་སྦྱོར་སྤྲོད་ཀྱི་གནས་བབ།

ཉེ་སྔོན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བཅུ་པའི་ཐོག་ནང་སྲིད་ལས་ཁུངས་ཀྱི་སྔོན་རྩིས་དང་འབྲེལ་ནས་སྤྱི་འཐུས་ཁག་ཅིག་གིས་ད་ཆ་བོད་ནས་ཐད་ཀར་བཙན་བྱོལ་དུ་འབྱོར་མཁན་གྱི་གྲངས་འབོར་ལྟོས་བཅོས་ཀྱིས་ཇེ་ཉུང་དུ་ཕྱིན་པ་དང་རྒྱ་གར་དུ་ཡོད་པ་རྣམས་ཀྱང་ནུབ་གླིང་གི་སྤྱི་ཚོགས་ལ་འགྲིམས་བཞིན་པའི་གནས་སྟངས་ཁྲོད་འདིར་བོད་མིའི་གནད་ས་ཁག་གི་གྲྭ་རྒྱུན་དང་སློབ་གྲྭ་ཁག་གི་སློབ་རྒྱུན་སོགས་ཀྱི་ཐད་ལ་བློ་འཚབ་ཡོང་གཞི་ཞིག་ཏུ་གྱུར་ཡོད་སྟབས། རྒྱ་གར་དུ་གནས་སྡོད་ཁ་འཐོར་བོད་མི་གསར་འབྱོར་བ་རྣམས་ལ་ཁང་ལས་གསར་རྒྱག་གིས་བདག་པོ་སྐྱོན་དགོས་གལ་ཡིན་པའི་ཐད་བགྲོ་གླེང་རིམ་པ་བྱུང་ཡོད་པ་རེད།སྐབས་དེར་ནང་སྲིད་བཀའ་བློན་མཆོག་གིས་ད་ལྟའི་བཀའ་ཤག་དུས་ཡུན་གྱི་སྐབས་སུ་གསར་འབྱོར་ཁ་འཐོར་རྣམས་ལ་ཁང་ལས་གསར་རྒྱག་གི་ལས་གཞི་ཞིག་འགོ་འཛུགས་ཀྱིས་སྦིར་ལི་ལི་གཞིས་ཆགས་ཀྱི་མཚོན་པའི་སྦེལ་ཀོབ་དང་མོན་གྷོ་སོགས་སུ་ཁ་འཐོར་གསར་འབྱོར་བ་རྣམས་ཀྱི་ཆེད་དུ་ཁྱིམ་ཚང་ ༣༥༥ ཙམ་ལ་ཁང་ལས་གསར་རྒྱག་ཞུས་ཡོད་སྐོར་གསུངས་པ་དང་ཆབས་ཅིག ད་ཆ་སྔ་ལོའི་རིམས་ནད་ཀྱི་རྐྱེན་གྱིས་འཛུགས་སྐྲུན་གྱི་ལས་གཞི་ཁག་ཅིག་མཇུག་སྐྱོང་བྱེད་ཐབས་མེད་པར་ལྷག་ཡོད་སྐོར་གསུངས་ཡོད། ཉེ་སྔོན་གྱི་གྲོས་ཚོགས་སུ་སྤྱི་འཐུས་ཤིག་གིས་གསར་འབྱོར་བ་ཁག་ཅིག་རང་ཉིད་ཀྱི་ཕ་མའི་བཀའ་མངགས་ལྟར་བཞུགས་སྒར་གྱི་ཁུལ་དུ་མགོན་པོ་༸གང་ཉིད་མཆོག་གི་ཞབས་འོག་ཏུ་གནས་སྡོད་བྱེད་འདོད་ཡོད་པ་ལྟར་རང་ཉིད་ལ་ཕྱི་ཕྱོགས་སུ་འགྲོ་རྒྱུའི་གོ་སྐབས་ནམ་བྱུང་ལ་བཞུགས་སྒར་དང་བྲལ་འདོད་མེད་པར་གསུང་མཁན་ཡོང་གི་ཡོད་སྟབས། བཞུགས་སྒར་ཁུལ་དུ་གསར་འབྱོར་བ་རྣམས་ལ་ཁང་ཁྱིམ་རག་ཐབས་གནང་དགོས་སྐོར་རེ་སྐུལ་ཞུས་པར་ནང་སྲིད་བཀའ་བློན་མཆོག་གིས་ཐབས་ཤེས་གནང་མུས་ཡིན་པ་དང་། འོན་ཀྱང་ད་ལྟའི་ཆར་གྲུབ་འབྲས་གང་ཡང་སོན་མེད་སྐོར་འགྲེལ་བརྗོད་གནང་ཡོད། གནད་དོན་དེ་དང་འབྲེལ་ནང་སྲིད་དྲུང་འཕར་ཟླ་བ་ཚུལ་ཁྲིམས་ལགས་སུ་གསར་འབྱོར་བ་རྣམས་ལ་ཁང་ཁྱིམ་གསར་རྒྱག་གི་མཐུན་རྐྱེན་སྦྱོར་སྤྲོད་བྱེད་ཕྱོགས་དེར་ཐོ་འགོད་དང་སྙན་ཞུ་འབུལ་སྟངས་ཀྱི་ཐོག་བཀའ་འདྲི་ཞུས་ཡོད། གཞི་རྩའི་གསར་འབྱོར་བ་སུ་ཞིག་རང་ཉིད་གནས་སྡོད་བྱེད་སའི་ས་གནས་གཞིས་འགོ་བརྒྱུད་ནས་ནང་སྲིད་ལ་ཁང་ཁྱིམ་དགོས་ངེས་ཀྱི་ཐོ་འགོད་བྱེད་ཆོག་པ་དང་། གསར་འབྱོར་སྐྱིད་སྡུག་ཚོགས་པ་སོགས་བརྒྱུད་ནས་ཐོ་འགོད་བྱེད་ཐུབ་པར་ངོ་སྤྲོད་ཀྱིས་མི་མང་པོ་ཞིག་གིས་ཧི་མཱ་ཅལ་ནང་དུ་ཁང་ཁྱིམ་རག་ཐབས་ལ་འབད་བརྩོན་དང་གནང་བཞིན་ཡོད་ཀྱང་། ཧི་མཱ་ཅལ་དབུས་གཞུང་གི་ས་ཁང་སྒྲིག་གཞི་དང་འབྲེལ་ནས་ཕྱི་མིས་ས་ཆ་ཉོ་ཚོང་རིགས་ལ་བཀག་སྡོམ་བྱས་ཡོད་སྟབས་ཧ་ལམ་ཁག་པོ་ཡིན་སྐོར་ངོ་སྤྲོད་གནང་ཡོད།