གླིང་རིན་པོ་ཆེ།

ཁ་སང་བཞུགས་སྒར་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོ་ས་༸སྐྱབས་མགོན་ཆེན་པོ་མཆོག་ལ་ཚོགས་པ་ལྔས་བརྟན་བཞུགས་རྒྱས་པ་ཞིག་བསྟར་འབུལ་ཞུས་གྲུབ་པ་དང་བསྟུན། དེ་རིང་ཞོགས་པ་ཕྱག་ཚོད་ ༧ ཙམ་ལ་མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས་ཀྱིས་ཇི་ལྟར་གསོལ་འདེབས་ཞུས་པ་བཞིན་མོན་ཡུལ་ནས་ཕེབས་པའི་དད་ལྡན་མང་ཚོགས་རྣམས་ལ་གནས་ཆུང་སྒྲ་དབྱངས་གླིང་གྲྭ་ཚང་གི་འདུ་ཁང་དུ་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོའི་སྤྱན་འདྲེན་དང་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་མཇུག་ཏུ་དགེ་བའི་བཀའ་སློབ་ལམ་སྟོན་གནང་སོང་།གནས་ཆུང་ཆོས་སྐྱོང་གི་སྤྱན་འདྲེན་གྲུབ་མཚམས་སུ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་དྷ་སར་ཕེབས་པའི་མོན་པ་རྣམས་ས་ཐག་རིང་པོ་ནས་ཕེབས་དོན་གཙོ་བོ་༸གོང་ས་མཆོག་༸སྐུ་ཚེ་མི་འཇིག་རྡོ་རྗེ་འཆང་གི་ངོ་བོར་བརྟན་ཕྱིན་བརྟན་བཞུགས་བསྟར་འབུལ་ཞུ་བར་བཅར་ཡོད་སྟབས། ཐེངས་འདིའི་བརྟན་བཞུགས་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་བརྟན་བཞུགས་གཏང་རག་གི་མཎྜལ་མ་འདོན་གོང་དང་མཎྜལ་འདེགས་འབུལ་ཞུས་ཟིན་པའི་རྗེས་སུ་ད་དུང་དགུང་གྲངས་བརྒྱ་དང་བཅུ་གྲངས་ཤིག་གི་བར་དུ་༸སྐུ་འཚོ་བཞུགས་མཛད་རྒྱུའི་བཀའ་བཞེས་བཟང་པོ་ཕེབས་པ་ཙམ་མ་ཟད། བརྟན་བཞུགས་དངོས་ལ་ཆོས་སྐྱོང་ཐོག་ཕེབས་གནང་བ་སོགས་རྒྱུན་ལྡན་ལྟར་མིན་པ་རྟེན་འབྲེལ་བཟང་པོ་དང་། ས་ཐག་རིང་པོ་ནས་ཕེབས་པའི་དམིགས་ཡུལ་ལྟར་དོན་འབྲས་སོན་སོང་ཞེས་བཀའ་གནང་ཡོད། གླིང་མཆོག་སྤྲུལ་རིན་པོ་ཆེ་མཆོག་གིས་རིན་པོ་ཆེ་ཁོང་མོན་ཡུལ་དུ་ཐེངས་གསུམ་ཙམ་ཆེད་ཕེབས་གནང་མྱོང་བ་དང་ལྷག་དོན་༸རྒྱལ་བ་༸སྐུ་ཕྲེང་དྲུག་པ་ཚངས་དབྱངས་རྒྱ་མཚོ་མཆོག་གི་ཡོངས་འཛིན་གནང་བ། དེ་བཞིན་༸སྐུ་གོང་མ་ཡང་༸གོང་ས་མཆོག་དང་ལྷན་རྒྱས་སུ་མོན་ཡུལ་ནས་བྲོས་བྱོལ་ལ་ཕེབས་པ་ཞིག་ཡིན་པར་ངོ་སྤྲོད་དང་སྦྲགས། མོན་པའི་གཤིས་རྒྱུད་དུ་ཡོད་པའི་ཡ་རབས་བཟང་སྤྱོད་དེ་ཁྱད་ནོར་ཞིག་ཡིན་པར་དགོངས་ནས་༸གོང་ས་མཆོག་གི་དགོངས་གཞི་ལྟར་སརྒྱས་པའི་ཆོས་ཀྱི་བསླབ་བྱ་སེམས་པ་བཟང་པོ་དང་ཡ་རབས་བཟང་སྤྱོད་གནང་དགོས་གལ་ཡིན་པ་སོགས་བཀའ་གནང་སོང་།༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་བླང་དོར་བཀའ་སློབ་མ་གནང་གོང་སྤྱིར་༸གོང་ས་མཆོག་གི་༸སྐུ་ཚེའི་ཚེ་སྒྲུབ། འཛམ་གླིང་སྤྱི་དང་བྱེ་བྲག་ཏུ་མོན་པའི་སྐྱེས་འགྲོ་ཡོངས་ཀྱི་སླད་དུ་གནས་ཆུང་ཆོས་སྐྱོང་མཆོག་ལ་ཚོགས་མཆོད་ཕུལ་བའི་སྒོ་ནས་བཀའ་ལུང་ཞུས་པར་མ་ཟད་མང་ཚོགས་ཀུན་ལ་སྐུ་རྟེན་མཆོག་གི་མཇལ་ཁ་གནང་ཡོད།

ཟླ་བ་འདིའི་ནང་དུ་སྤྱི་ཚོགས་བརྒྱུད་ལམ་ཐོག་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་མཚན་ཏུ་ཡོད་པའི་ངོ་དེབ་ཞིག་བརྒྱུད་རིན་པོ་ཆེ་མཆོག་གི་རྗེས་འཇུག་ཕྱི་ནང་གི་དད་ལྡན་སེར་སྐྱ་མང་ཚོགས་དག་ལས་མ་དངུལ་བསྡུ་རུབ་བྱེད་བཞིན་ཡོད་པའི་གནས་ཚུལ་ཐོན་ཡོད་པ་དང་། གླིང་བླ་བྲང་གི་དྲུང་ཆེས་གང་ཟག་གཡོ་ཅན་ཁག་ཅིག་གིས་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་༸སྐུ་སྒེར་གྱི་ངོ་དེབ་ཐོག་གི་༸སྐུ་པར་དང་ངོ་དེབ་ཀྱི་བཟོ་བཀོད་ཇི་ལྟར་ཡོད་པ་བཞིན་འདྲ་བཟོ་བྱས་ནས་དྲྭ་ཐོག་གི་དད་ལྡན་མང་ཚོགས་བསླུ་ཁྲིད་ཀྱིས་མ་དངུལ་བསྡུ་རུབ་བྱེད་ཐབས་བྱས་པ་ཞིག་རེད་ཅེས་གསུངས་སོང་།དེའང་ཕྱི་ཟླ་ ༤ པའི་ནང་དུ་གང་ཟག་ཁག་ཅིག་གིས་སྤྱི་ཚོགས་བརྒྱུད་ལམ་སྤྱོད་དེ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་ངོ་དེབ་རྫུན་བཟོ་བྱས་ཏེ་རིན་པོ་ཆེ་མཆོག་གི་རྗེས་འཇུག་ཕྱི་ནང་གི་དད་ལྡན་རྣམས་ལ་ངོ་དེབ་ཀྱི་གྲོགས་པོའི་རེ་སྐུལ་བཏང་བ་དང་། དེ་རྗེས་ཁོང་རྣམ་པར་འཕྲིན་བསྐུར་བརྒྱུད་རིམ་པས་སྤྱི་ཚོགས་ཀྱི་བདེ་ཐབས་ལ་བསྙད་ནས་བསླུ་ཁྲིད་ཀྱིས་མ་དངུལ་བསྡུ་རུབ་བྱེད་བཞིན་པའི་གནས་ཚུལ་བྱུང་ཡོད་སྟབས། ༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་བླ་བྲང་གི་ངོས་ནས་འདི་ལོའི་ཕྱི་ཟླ་ ༤ ཚེས་ ༢༡ ཉིན་བརྡ་འཕྲིན་ནག་ཉེས་དང་འབྲེལ་བའི་གནས་དོན་ཐོག་རྒྱལ་ས་དི་ལླཱིའི་ཉེན་རྟོག་པར་ FIR འམ་གྱོད་གཞི་སྙན་སེང་ཞུས་ཡོད་པ་རེད།དེའི་ནང་དུ་རིན་པོ་ཆེ་མཆོག་གི་༸སྐུ་སྒེར་གྱི་ངོ་དེབ་ཐོག་གི་༸སྐུ་པར་དང་ངོ་དེབ་ཀྱི་བཟོ་བཀོད་ཇི་ལྟར་ཡོད་པ་བཞིན་འདྲ་བཟོ་ཐོག་ཕྱི་ལོ་ ༢༠༡༨ ལོ་ནས་བཟུང་ད་བར་དྲྭ་ཐོག་བརྒྱུད་དད་ལྡན་མང་ཚོགས་ལ་ཐེངས་བཞི་ཙམ་མགོ་སྐོར་བསླུ་ཁྲིད་བཏང་བའི་གནད་དོན་བྱུང་ཡོད་པ་དང་། བླ་བྲང་གིས་ཀྱང་དད་ལྡན་མང་ཚོགས་རྣམས་ལ་གཡོ་ཅན་རེ་འགས་དྲྭ་ཐོག་བརྒྱུད་དངུལ་ཁ་བསླུས་བརྒྱབ་པའི་གནས་ཚུལ་ཁག་གསལ་བཟོ་གནང་ཡོད་སྐོར་སོགས་ཆེད་བཀོད་གནང་འདུགགཞི་རྩའི་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་མཚན་སྤྱོད་དེ་ཕྱི་ལོ་ ༢༠༡༨ ལོ་ནས་བཟུང་ད་བར་སྤྱི་ཚོགས་བརྒྱུད་ལམ་ཐོག་དད་ལྡན་མང་ཚོགས་ལ་ཐེངས་བཞི་ཙམ་མགོ་སྐོར་བསླུ་ཁྲིད་བཏང་བའི་གནས་དོན་བྱུང་མྱོང་ཡོད་པ་རེད། དེའང་གང་ཟག་གཡོ་ཅན་ཚོས་དྲྭ་ཐོག་རྗེས་འབྲང་པ་དག་ལས་དངུལ་རྐུ་ཐབས་ཁོ་ནར་ཆེད་དམིགས་བྱས་པ་ཞིག་ཆགས་ཀྱི་ཡོད་པར་བརྟེན་གླིང་མཆོག་སྤྲུལ་རིན་པོ་ཆེའི་༸སྐུ་སྒེར་གྱི་བླ་བྲང་ངམ་ཡིག་ཚང་གིས་ཀྱང་ལན་མང་རིང་ཕྱི་ནང་གི་དད་ལྡན་རྗེས་འབྲང་པར་གནད་དོན་དེ་རིགས་ལ་ཡིད་གཟབ་གནང་དགོས་པའི་གཞེན་བསྐུལ་ཡང་གནང་ཡོད་པ་རེད།

༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ཕྱི་ཟླ་ ༦ པའི་ཟླ་མཇུག་ཙམ་ནས་བྱང་ཨ་མི་རི་ཀའི་ས་གནས་ཁག་གཅིག་ཏུ་ཆོས་འབྲེལ་དང་བཀའ་དབང་། དེ་བཞིན་གཙུག་ལག་སློབ་གཉེར་ཁང་། ཚོགས་སྐྱིད་ཁག་གི་སློབ་ཕྲུག་དང་མང་ཚོགས་རྣམས་ལ་བཀའ་སློབ་སོགས་ཀྱི་མཛད་འཕྲིན་རྒྱ་ཆེ་སྐྱོང་བཞིན་ཡོད་པ་ལྟར་ཟླ་ ༨ ཚེས་ ༢༣ ཉིན་གླིང་མཆོག་སྤྲུལ་རིན་པོ་ཆེ་མཆོག་གིས་ཨ་རིའི་ཕྱི་སྲིད་ལྷན་ཁང་དུ་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དམིགས་བསལ་སློབ་སྟོན་པ་སྐུ་ཞབས་ Thames Noax ལགས་དང་ཐུག་འཕྲད་ཀྱིས་བོད་དོན་སྙན་གསེང་ཞུས་འདུག རིན་པོ་ཆེ་མཆོག་གིས་སྐུ་ཞབས་ Thames Noax ལགས་སུ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་སྒོས་ཆོས་དད་རང་དབང་གི་གནས་སྟངས་དང་འབྲེལ་ནས་ཆོས་ལ་དད་པ་མེད་མཁན་རྒྱ་ནག་དམར་ཤོག་གཞུང་གིས་བོད་ཀྱི་ཆོས་དད་རང་དབང་དང་བླ་སྤྲུལ་ཡང་སྲིད་ཀྱི་ངོས་འཛིན་གནང་སྲོལ་ལམ་ལུགས་ལ་ཐེ་བྱུས་བྱེད་བཞིན་པ་ནི་གཞི་རྩ་མེད་པ་ཞིག་དང་། རྒྱ་ནག་གཞུང་གིས་བོད་ཀྱི་དགོན་པ་རེར་དོ་དམ་ཚོགས་ཆུང་ཞེས་ཆེད་འཛུགས་ཀྱིས་དགོན་པའི་ཉིན་རེའི་གནང་སྒོ་ཁག་ལ་དམ་དྲག་དང་བཏང་འཛིན་སོགས་བྱེད་བཞིན་ཡོད་སྟབས་དགོན་ཁག་གི་ཉིན་རེའི་གནང་སྒོ་ཁག་ལ་ཧ་ཅང་གི་སུན་གཙིར་ཆགས་ཡོད་པ་སོགས་གསལ་བཤད་གནང་འདུག རིན་པོ་ཆེ་མཆོག་གིས་ད་དུང་རྒྱ་གཞུང་གི་སྲིད་བྱུས་འོག་བོད་ནང་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་ཉམས་གུད་དུ་འགྲོ་བཞིན་པའི་ཆེས་ཛ་དྲག་གི་དངོས་ཡོད་གནས་སྟངས་ཡང་སྙན་གསེང་ཞུས་ཡོད་པ་རེད། སྐབས་དེར་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དམིགས་བསལ་སློབ་སྟོན་པ་སྐུ་ཞབས་ Thames Noax ལགས་ཀྱིས་བོད་ནང་གི་ཆོས་དད་རང་དབང་གི་གནས་སྟངས་ཐད་ཐུགས་འཚབ་ཆེན་པོ་གནང་གི་ཡོད་པ་མ་ཟད། ཉེ་ཆར་རྒྱལ་ཚོགས་ཀྱི་ཆོས་དད་རང་དབང་ཚོགས་འདུའི་སྐབས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་པ་སྐུ་ཞབས་ Sam Brownback ལགས་ཀྱིས་རྒྱ་ནག་ནང་གི་ཆོས་དད་རང་དབང་སྐོར་གླེང་སློང་གནང་ཡོད་པ་སོགས་འགྲེལ་བརྗོད་དང་འབྲེལ།...