པདྨ་བཀོད་པ་དང་འཕན་པོ་མང་ཚོགས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པ།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བཙུན་མ་ཐུན་མོང་ནས་ཇི་ལྟར་གསོལ་འདེབས་ཞུས་དོན་ལྟར། ཕྱི་ཟླ་ ༣ ཚེས་ ༡ ཉིན་སྔ་དྲོ་ཚོུད་ ༨།༣༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོ་༸གང་ཉིད་མཆོག་༸སྐུ་ཚེ་མི་འཇིག་རྡོ་རྗེ་འཆང་གི་ངོ་བོར་བརྟན་ཕྱིར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་རེད་འདུག དེའང་ཐེངས་འདིའི་བརྟན་བཞུགས་དེ་གཙོ་བོ་ད་བར་༸རྒྱལ་མཆོག་༸སྐུ་འཕྲེང་རིམ་བྱོན་རྣམས་ནས་བོད་ཀྱི་རིས་སུ་མ་ཆད་པའི་ཆོས་བརྒྱུད་ཁག་གི་བཙུན་མ་རྣམས་ལ་ཐུགས་རྗེ་ཆེན་པོས་རྗེས་སུ་འཛིན་པ། ལྷག་པར་དུ་༸རྒྱལ་དབང་༸སྐུ་འཕྲེང་བཅུ་བཞི་པ་ཆེན་པོ་མཆོག་གིས་བཙུན་མའི་བསླབ་པ་སློབ་གཉེར་ཐོག་ལམ་བསྟོན་བཀའ་སློབ་དང་མཐུན་འགྱུར་སོགས་གནང་བར་བཀའ་དྲིན་རྗེས་དྲན་མཚོན་ཆེད་དང་། རང་ཅག་ཁ་བ་གངས་ཅན་པ་རྣམས་ཀྱི་ཚེ་རབས་ཐོག་མེད་ནས་བསགས་པའི་ལས་སྨོན་གྱི་རྟེན་འབྲེལ་གོང་འཕེལ། ཁྱད་པར་དུ་མགོན་པོ་༸གང་ཉིད་མཆོག་བསྟན་འགྲོ་ཡོངས་ཀྱི་སླད་དུ་༸སྐུ་ཚེ་མི་འཇིག་རྡོ་རྗེ་ཁམས་སུ་བརྟན་ཅིང་རླབས་ཆེན་གྱི་ཐུགས་བཞེད་མཐའ་དག་ལྷུན་གྱིས་གྲུབ་པ་སོགས་ལ་དམིགས་ཏེ་ཕུལ་བ་ཞིག་ཡིན་པ་རེད་འདུག ཐེངས་འདིའི་བརྟན་བཞུགས་དང་འབྲེལ་དེ་རིང་སྔ་ཐོག་གཙུག་ལག་ཁང་དུ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་དབུ་བཞུགས་ཐོག་བརྟན་བཞུགས་ཀྱི་སྒྲུབ་བཤག་ཆོ་ག་དབུ་འཛུགས་གནང་ཡོད་པ་དང་། བོད་ཚེས་ ༡༤ ཉིན་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་དང་སྐུ་ཚབ་བཅས་ཆེད་ཕེབས་གནང་གི་ཡོད་པ་དང་།  བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་བཅས་ནས་མཉམ་ཞུགས་གནང་གི་འདུག ཤེས་རྟོགས་བྱུང་བར་བོད་ཀྱི་ཆོས་བརྒྱུད་རིས་མེད་ཁག་གི་བཙུན་མ་ཐུན་མོང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དེ་ནི་ཆེས་ཐོག་མ་ཆགས་ཀྱི་ཡོད་པ་རེད།

གཞིས་བྱེས་པདྨ་བཀོད་པ་དང་འཕན་པོ་མང་ཚོགས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པའི་ཐོག་མགོན་པོ་མཆོག་གིས་མང་ཚོགས་རྣམས་ལ་བཅོམ་ལྡན་འདས་ཀྱི་རྗེས་འབྲང་རྣལ་མ་ཞིག་བྱ་དགོས་པར་བཀའ་སློབ་བསྩལ་སོང་། དེ་རིང་ཟླ་ ༡༡ ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་རྒྱལ་མཆོག་ལྔ་པ་ཆེན་པོའི་དག་སྣང་གསང་བ་རྒྱ་ཆེན་གྱི་ཆོ་ག་དང་ཀུན་མཁྱེན་འཇིགས་མེད་གླིང་པས་མཛད་པའི་ཚོགས་གླུ་གསུང་འདོན་གནང་པའི་སྒོ་ནས་གཞིས་བྱེས་པདྨ་བཀོད་དང་འཕན་པོ་སེར་སྐྱ་མང་ཚོགས་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་མི་འཇིག་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་བསྟར་འབུལ་ཞུས་གནང་སོང་། དེ་ཡང་ཨོ་རི་ས་ཕུན་ཚོགས་གླིང་གཞིས་ཆགས་སུ་རྟེན་གཞི་བྱས་པའི་རི་དགོན་ཐུབ་བསྟན་སྨིན་གྲོལ་གླིང་གི་དབུ་བླ་སྐྱབས་རྗེ་ནམ་མཁའ་རིན་པོ་ཆེ་མཆོག་རྡོ་རྗེ་སློབ་དཔོན་གནང་སྟེ་རྒྱལ་མཆོག་ལྔ་པ་ཆེན་པོའི་དག་སྣང་གསང་བ་རྒྱ་ཆེན་གྱི་ཆོ་གའི་ཐོག་ནས་༸གོང་ས་མཆོག་ལ་གསོལ་འདེབས་ཞུས་གནང་སོང་བ་དང་། སྐབས་དེར་སྟག་ལུང་ཞབས་དྲུང་རིན་པོ་ཆེ་མཆོག་དང་བཅོ་བརྒྱད་ཞབས་དྲུང་རིན་པོ་ཆེ་མཆོག བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་སོགས་ཕེབས་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་ལ་གཞིས་བྱེས་འཕན་པོ་དང་པདྨ་བཀོད་པའི་དད་ལྡན་མང་ཚོགས་ནས་བརྟན་བཞུགས་བསྟར་འབུལ་ཞུས་པར་ཐུགས་རྗེ་ཆེ་གསུངས་པ་དང་སྦྲགས། གསོལ་འདེབས་འདིའི་ཐོག་ནས་ནུས་པ་ཞིག་ཡོང་ངེས་ཡིན་ནའང་གཙོ་བོ་བླ་སློབ་ཀྱི་དམ་ཚིགས་ཀྱི་ནུས་པ་ཆགས་ཡོད་པ་བཀའ་གནང་སོང་བ་མ་ཟད། སྒོས་སུ་༸གང་ཉིད་མཆོག་གིས་མང་ཚོགས་ཀུན་ནས་ཆོས་ཆོས་སུ་སོང་བ་ཞིག་བྱ་དགོས་པ་དང་སངས་རྒྱས་པའི་རྗེས་འབྲང་རྣལ་མ་ཞིག་བྱ་རོགས་ཞེས་བཀའ་སློབ་བསྩལ་སོང་། ༸གང་ཉིད་མཆོག་ནས་ཀྱང་ག་དུས་ཡིན་ཡང་བྱང་ཆུབ་ཀྱི་སེམས་དང་སྟོང་ཉིད་ལྟ་བ་སྒོམ་ནས། ཇི་སྲིད་ནམ་མཁའ་གནས་པ་དང་ཞེས་སོགས་ཀྱི་གསོལ་འདེབས་སྨོན་ཚིག་གསུངས་ནས་གཞན་དོན་མུ་མཐུད་གྲུབ་སླད་ལོ་མང་སྐུ་འཚོ་བཞུགས་ཡོང་བར་སྨོན་ལམ་འདེབས་གནང་གི་ཡོད་པ་མ་ཟད། ཇི་སྲིད་འཚོ་བའི་བར་དུ་སེམས་ཅན་ཀུན་ལ་ཕན་པ་དང་འདུན་པ་བསྐྱེད་གནང་རྒྱུ་གཙོ་འདོན་གནང་སྐོར་བཀའ་བསྩལ་གནང་ཡོད། ལྷག་པར་དུ་སྐབས་དེར་མགོན་པོ་མཆོག་གིས་དེ་སྔ་གཏེར་བཏོན་ཁག་ཅིག་གི་ལུང་བསྟན་ལྟར་༸གང་ཉིད་མཆོག་དགུང་གྲངས་ ༡༡༣ བར་བཞུགས་ཐུབ་མིན་གསུངས་དཀའ་བར་གྱུར་ཡང་དགུང་ལོ་བརྒྱ་བར་བཞུགས་ཐུབ་ཀྱི་རེད་ཅེས་བཀའ་བསྩལ་སོང་། ཁྱད་པར་དུ་དེ་རིང་བརྟན་བཞུགས་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་པདྨ་བཀོད་པ་ནས་ཡིན་པ་༸སྐྱབས་རྗེ་བདུད་འཇོམས་རིན་པོ་ཆེ་མཆོག་གི་སྐོར་ལ་བཀའ་གནང་པ་དང་འབྲེལ། རིན་པོ་ཆེ་མཆོག་ནི་དགའ་ལྡན་ཕོ་བྲང་ལ་ཐུགས་ཞེན་ཆེན་པོ་ཡོད་མཁན་ཞིག་ཆགས་ཡོད་པས་༸གོང་ཉིད་མཆོག་དང་དམིགས་བསལ་འབྲེལ་ཡོད་པ་བཀའ་གནང་སོང་། ཐེངས་འདིའི་བརྟན་བཞུགས་ཆེད་རྒྱ་གར་བྱང་ཤར་མིའོ་དང་ཀྲུ་ཀྲིང་གཙོ་བོར་གྱུར་པའི་ Arunachal དང་ Utarakand མངའ་སྡེ་སོགས་ནས་པདྨ་བཀོད་པའི་མི་གྲངས་༡༣༠༠ལྷག་དང་། དེ་བཞིན་རྡ་རམ་ས་ལས་གཙོས་བཙན་བྱོལ་ནང་གི་འཕན་པོ་བ་༡༥༠ཙམ་བཅར་འདུག