བཀའ་བློན་རྣམ་པ་ས་བགོས་ཀྱིས་བོད་མིའི་གཞིས་ཆགས་ཁག་ཏུ་འཚམས་གཟིགས་གནང་བཞིན་འདུག

  བཀའ་ཤག་སྐབས་བཅོ་ལྔ་པའི་བཀའ་བློན་རྣམ་པ་ས་བགོས་ལྟར་རྒྱ་གར་ནང་རྟེན་གཞི་བྱས་པའི་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་དང་འབྲེལ། ས་གནས་བོད་རིགས་མང་ཚོགས་རྣམས་ལ་བཀའ་ཤག་གི་ངོས་ནས་བོད་མིའི་བདེ་དོན་སེལ་ཐབས་དང་ཤེས་ཡོན། འཕྲོད་བསྟེན། དཔལ་འབྱོར། དེ་བཞིན་བོད་མིའི་ངོ་བོ་དང་གཅིག་སྒྲིལ་གྱི་ནུས་པ་གོང་མཐོར་གཏོང་ཐབས་སོགས་ཀྱི་ལས་འཆར་སྐོར་ངོ་སྤྲོད་གནང་བཞིན་འདུག དེ་ཡང་ཟླ་བ་སྔོན་མའི་ཟླ་མཇུགས་ཙམ་ནས་འགོ་འཛུགས་ཀྱིས་བོད་མིའི་སྒྲིགས་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་རྒྱ་གར་དབུས་ཁུལ་གྱི་བོད་མིའི་གཞིས་ཆགས་ཨོ་ཌི་ཤ་ཕུན་ཚོགས་གླིང་དང་། བྷན་ད་ར་ནོར་རྒྱས་གླིང་། མན་སྤར་ཕན་བདེ་གླིང་བཅས་དང་། ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ནས་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག གཞན་ཡང་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་ནས་ཧི་མཱ་ཅལ་མངའ་ཁོངས་སུ་ཡོད་པའི་ཀམ་རའོ་དང་སྤུ་རུ་ཝ་ལ་ས་སྐྱ་གཞིས་ཆགས། དེ་བཞིན་ཨུ་ཏྟར་ཁཎྜ་མངའ་སྡེའི་ནང་ཡོད་པའི་ཧ་སྤུར་དང་མ་སུ་རི། བདེ་སྐྱིད་གླིང་བོད་མིའི་གཞིས་ཆགས་སོགས་སུ་འཚམས་གཟིགས་ཀྱིས་མང་ཚོགས་ལ་བཀའ་སློབ་ལམ་སྟོན་སོགས་གནང་ཟིན་ཡོད་པ་མ་ཟད། ད་ལྟའི་ཆར་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་ཤེས་རིག་བཀའ་བློན་དངོས་གྲུབ་ཚེ་རིང་མཆོག དེ་བཞིན་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་བཅས་ནས་ཀུ་ལུ་མ་ན་ལི་དང་སླེ་ལ་དྭགས། མེའོ་ཆོས་འཕེལ་གླིང་དང་། ཏི་ཛུ་དར་རྒྱས་གླིང་སོགས་ཨ་རུ་ནཱ་ཅལ་ཁུལ་གྱི་བོད་མིའི་གཞིས་ཆགས་སྤྱི་དང་ཀ་རྡོར་སྒང་གསུམ་བཅས་སུ་རིམ་བཞིན་ཕེབས་ཐོན་གྱིས་གཞུང་འབྲེལ་འཚམས་གཟིགས་གནང་གི་ཡོད་པ་རེད།